Ioane 6.24-35 ÔROÀ

Tāpati 1 no Âtete 2021.

ÔROÀ

Taramo 78

Ärataì.

1 Matetira. Na Âtafa. E faaroo mai, e a ù mau taata, i ta ù ra ture, e färiu mai to òutou tarià i te parau a ta ù vaha. 2 E parau ta ù vaha i te parau taa maitaì, e faaìte au i te parau a manaò tahitohia ra. 3 O ta tätou hoì i faaroo e ua ìteä, e ua faaìte mai to tätou mau metua ia tätou. 4 E òre te reira e hunahia e tätou i ta rätou mau tamarii, e faaìte faahou rä tätou i te tahi uì, i te haamaitaìraa i te Fatu, e to na mana, e te òhipa taa ê i ravehia e ana ra. 5 Ua tuu mai o ia i te parau na Iatöpa e ua haapaò i te ture na Ìteraèra, ta na i faaue mai i to tätou mau tupuna ra, ia faaìte atu rätou i ta rätou ra mau tamarii. 6 Ia ìte te uì i pïhaì atu, te mau tamarii e fänau mai, e ia tupu, ia faaìte atu rätou i ta rätou mau tamarii, 7 ia tiàturi rätou i te Atua, e eiaha e haamoè i ta na ra òhipa, e haapaò rä rätou i ta na parau. 8 E eiaha rätou ia fäito i to rätou ra mau metua, ei uì ètaèta e te haapaò òre, ei uì âau mau òre, e aore to rätou âau i haapaò i te Atua. 9 Te mau tamarii a Èferaima, mai te mau taata e fana te mauhaa ra, e ua hoì mai ra i muri i te mahana àroraa ra: 10 aore rätou i haapaò i te faufaa a to rätou ra Atua, e aore aè ra i haapaò i ta na ra ture, 11 haamoè atu ra rätou i ta na ra mau òhipa, e te mau mea i maerehia ta na i faaìte ia rätou. 12 Te mau mea taa ê i ravehia e ana i mua i te aro o to rätou ra mau metua,

i te fenua ra i Àifiti, e te vähi ra i Tiona: 13 ua vähi o ia i te miti ia taeà ia rätou ia haere, e ua haapuè o ia i te moana mai te puèà ra.14 I te ao ra, ua arataì o ia ia rätou i te ata ra, e te ruì ra e ao noa aè, i te märamarama auahi ia. 15 Ua haapararï o ia i te mato i te mëtëpara, e ua tuu mai ra i te pape na rätou mai te moana te rahi.

16 Ua faatahe mai o ia i te pape no roto i te mato ra, e ua tahe mai ra mai te mau ânävai ra. 17 Ua tämau rä rätou i te rave i te hara ia na, i te faaririraa atu i Tei Teitei i te mëtëpara ra. 18 Ua faaoôo to rätou âau i te Atua, i te aniraa i te mäa ta rätou i hiaai ra. 19 Ua parau ìno hoì rätou i te Atua, ua nä ô aè ra: E tià änei i te Atua ia hohora mai i te àmuraa mäa i te mëtëpara nei? 20 Inaha, ua täìri o ia i te mato, e ua hï noa mai ra te pape, e ua tahe mai ra mai te vai puè ra. E tià atoà änei ia na ia horoà mai i te mäa ra? E noaa änei ia na te ìnaì na to na nei taata? 21 Ìte aè ra te Fatu i te reira, ua riri iho ra, àma aè ra te auahi ia Iatöpa, tupu aè ra te riri ia Ìteraèra, 22 no te mea aore rätou i faaroo i te Atua, aore hoì i tiàturi i te ora na na. 23 Ua faauehia rä e ana te mau ata i nià ra, e ua ìritihia e ana te mau ùputa o te raì ra, 24 e ua haamaìri noa mai ra i te mäna ei mäa, e te tïtona no te mau raì ra tei horoàhia mai e ana na rätou. 25 Ua àmu te taata atoà i te mäa a te feiä mana; e ua navaì roa te mäa ta na i hopoi mai ra. 26 Ua haafarara mai ra o ia i te maoaè mai te raì mai, e na to na püai i haafarara mai i te märaamu, 27 ua haamaìri mai ra i te ìnaì i nià ia rätou mai te huà rii repo ra, e te manu pererau mai te one tähatai ra. 28 Ua haamaìri mai ra o ia i te reira i rotopü i to rätou pühapa, e àti noa aè to rätou ra pärahiraa. 29 Ua àmu iho ra rätou e paìa aè ra rätou, ua hopoi mai hoì o ia i ta rätou i hiaai ra. 30 E aita aè ra rätou i paìa maitaì, e te vai noa ra ta rätou mäa i to rätou vaha, 31 i roohia mai ai rätou i te riri o te Atua. Pohe iho ra te feiä poria o rätou ra ia na, e täìrihia iho ra te taata maitataì o Ìteraèra ra. 32 Te rave noa rä rätou i te hara, e aore i faaroo i te mau òhipa taa ê na na ra. 33 I haamäuà noa ai o ia i to rätou puè mahana ei mea faufaa òre, e to rätou mau mätahiti i te fatimaùu. 34 Ia täìri o ia ia rätou ra, ua ìmi iho ra ia na, e ua färiu e ua uiui i te Atua. 35 Ua manaò aè ra rätou e, o te Atua to rätou haapüraa, e o te Atua, o Tei Teitei ra, to rätou ia Ora. 36 Ua haapaìà ra to rätou vaha ia na, e ua haavare ia na to rätou arero: 37 aore hoì to rätou âau i tià ia na, aore hoì rätou i haapaò maitaì i ta na parau. 38 O ia rä, no te î i te aroha, ua faaòre aè ra i ta rätou hara, e aore aè ra i rave pohe roa ia rätou; ua faahoì pinepine rä o ia i te riri, e aore to na riri i faahope-hua-hia: 39 ua manaò hoì o ia ia rätou e e taata, e mataì e pee noa ra e e òre e hoì mai. 40 Te pinepine o ta rätou faaoôoraa atu ia na i te fenua moèmoè ra e. E te pinepine hoì o ta rätou faaririraa atu ia na i te mëtëpara. 41 Oia ia, ua nä nià iho, ua nä nià iho rätou i te faaoôo i te Atua, e ua àa atu i Tei Moà i Ìteraèra nei. 42 Aore rätou i manaò i te òhipa i ravehia e ta na rima, i te mahana i faaora ai o ia ia rätou i te ènemi. 43 Te mau temeio ta na i rave i Àifiti, e te mau òhipa taa ê ta na i rave i taua vähi ra i Tiona: 44 i te faariroraa i ta rätou pape ei toto, e te pape rii matätia ra, e aita atu ra e tià ia inu. 45 Ua tuu atu ra i te popoti i rotopü ia rätou, e pau iho ra, e te rana e pohe atu ra rätou. 46 Ua horoà hoì o ia i ta rätou mäa na te hë, e ta rätou i òhipa ra na te àrape. 47 Ua täìri iho ra o ia i ta rätou mau vine i te ua-paari, e ta rätou mau tütämino i te toètoè. 48 Ua horoà o ia i ta rätou mau puaa i te ua-paari, e ta rätou mau nana mämoe i te uira. 49 Ua huri noa mai ra i to na riri rahi i nià ia rätou, te riri rahi, e te täiroiro, e te riri faaûàna, i te tonoraa mai i te mau veà parau ìno ra. 50 Ua rave o ia i te èà no to na riri, ua tuu noa atu o ia ia rätou no te pohe, ua horoà noa atu o ia ia rätou no te maì pohe ra. 51 Ua täìri o ia i te mau mätahiapo no Àifiti, te mätamehaì o to rätou püai i te mau tiàhapa o Hama ra. 52 Ua arataì rä o ia i to na iho ra taata mai te mämoe ra, e ua tiaì o ia ia rätou mai te nana i te mëtëpara ra. 53 Ua arataì o ia ia rätou mä te ora e aore rätou i mataù; ua pau hoì to rätou mau ènemi i te horomiihia e te miti ra. 54 Ua arataì o ia ia rätou i to na ra Vähi Moà, i teie nei mouà i noaa i ta na rima àtau. 55 Ua tiahi o ia i te mau êtene i mua ia rätou, e ua tufa i te fenua ei pärahiraa; e ua haapärahi i te mau ôpü o Ìteraèra i to rätou ra mau tiàhapa. 56 Ua faaoôo rä rätou e ua faariri i te Atua teitei, e aore i haapaò i ta na ra parau. 57 Ua täiva ä rätou, e ua haavare mai to rätou mau metua ra, ua hoì faahou i te huru tahito ra mai te fana i tärahia te hua ra. 58 Ua faariri rätou ia na i ta rätou mau vähi teitei ra, e ua faaoôo atu ia na i to rätou mau îtoro taraihia ra. 59 Ia hiò mai rä te Atua i te reira ua riri iho ra, e ua haafaufau roa ia Ìteraèra. 60 E ua faaruè iho ra i te tiàhapa i Tiro ra, i te tëtene ta na i pärahi i roto i te taata nei. 61 Ua tuu atu ra o ia i te âfata o to na püai ei tïtï, e to na hanahana i te rima o te ènemi. 62 Ua tuu atu hoì o ia i to na iho mau taata no te òè, e riri aè ra hoì o ia i ta na ra tufaa. 63 Pau iho ra to rätou mau taata âpï i te auahi, e aore ta rätou pötii i faaïpoïpohia ra. 64 Ua maìri ta rätou mau tahuà i te òè, e aore ta rätou mau ìvi vahine i òto. 65 Mäoro aè ra rä, ua ara mai ra te Fatu mai te ara taòto ra, e mai te taata itoito e pii i te uaina ra. 66 E ua täìri iho ra i ta na mau ènemi i muri ra, e ua tuu atu ra i te haamä vaiiho taiàta ia rätou. 67 Ua faaruè hoì o ia i te tiàhapa o Iotëfa, e aore hoì i hinaaro i te ôpü o Èferaima, 68 i hinaaro aè ra rä i te ôpü o Iüta, te mouà ra o Tiona ta na i hinaaro ra. 69 Ua patu iho ra i ta na vähi moà ra mai te fare teitei ra, e ua haamauhia mai te fenua i haamau-roa-hia nei. 70 I hinaaro aè ra rä i ta na tävini ia Tävita, ta na i rave mai mai te âua mämoe ra; 71 ua arataì mai o ia ia na mai te peeraa i te mämoe i faaòte i te ü ra, ia faaàmu o ia i to na taata, i te mau huaai o Iatöpa, e te mau tamarii a Ìteraèra ta na ra tufaa. 72 Ua faaàmu o ia ia rätou mä te âau haavare òre, e ua arataì o ia ia rätou i te àravihi o to na ra rima.

Ètoto 16.2-15

Höroà.

2 Ua amuamu iho ra taua âmuiraa atoà o te tamarii a Ìteraèra ra ia Möte räua Àarona i taua mëtëpara ra; 3 I nä ô mai te tamarii a Ìteraèra ia räua, Àhiri mätou i pohe i te rima o te Fatu i Àifiti e a pärahi ai mätou i pïhaì iho i te mau färii puaa, e ua àmu hoì i te mäa e ua paìa roa; i arataì mai nei hoì ôrua ia mätou i teie nei âmuiraa atoà i te poìa. 4 Ua nä ô mai ra hoì te Fatu ia Möte, Inaha, e haamaìri atu vai i te mäa no nià i te raì nei na òutou; e na te taata e haere noa i räpae i te mau mahana atoà ra a ohi ai i te mäa e navaì ai i taua mahana ra, ei tämataraa atu na ù ia rätou, i ta rätou haapaòraa i ta ù nei ture, e te òreraa. 5 Âreà ia tae i te mahana ono ra, e rave maitaì rätou i ta rätou e hopoi mai i roto ra, ia piti mai ia färii, i te färii ta rätou e ohi no te mau mahana atoà ra. 6 Ua nä ô iho ra Möte räua o Àarona i te mau tamarii atoà a Ìteraèra, Âùanei òutou e ìte ai ia ahiahi, e na te Fatu òutou i arataì mai, mai te fenua mai ra mai Àifiti. 7 Ia poìpoì hoì òutou e ìte ai i te hanahana o te Fatu; ua faaroo hoì o ia i ta òutou amuamu i te Fatu; e aha hoì ta mäua ia amuamu mai òutou ia mäua? 8 E ua nä ô aè ra hoì Möte, E ìte hua òutou ia ahiahi, ia höroà mai te Fatu i te ìnaì na òutou e àmu, e ia höroà mai hoì i te mäa ia poìpoì, e ia paìa roa òutou; te ìte ra hoì te Fatu ia òutou amuamu, ta òutou e amuamu ia na: e aha hoì ta mäua nei? eere ta òutou i te amuamu ia mäua nei, i te Fatu rä. 9 Ua parau aè ra Möte ia Àarona, A parau na òe i te âmuiraa atoà o te tamarii a Ìteraèra nei, A haafätata mai òutou i mua i te aro o te Fatu: ua ìte hoì o ia i ta òutou amuamu. 10 Te parau ra Àarona i taua âmuiraa atoà o te tamarii a Ìteraèra ra, ua hiò tià atu ra rätou i te pae i te mëtëpara ra, e inaha, ua ìteä te hanahana o te Fatu ra i roto i te ata. 11 Ua parau mai ra te Fatu ia Möte, nä ô mai ra, 12 Ua faaroo aè nei au i te amuamu a te tamarii a Ìteraèra: e parau iho na òe ia rätou, a nä ô atu ai, Ia ahiahi òutou e àmu ai i te ìnaì, e ia poìpoì òutou e paìa ai i te mäa; e e ìte òutou e o vau to òutou Atua o te Fatu. 13 E ahiahi iho ra o te tïàa manu pererau mai ra, e moè roa iho ra taua tiàhapa ra; e ao aè ra, ua maìri mai ra te hau e àti noa aè taua tiàhapa ra. 14 E pee aè ra taua hau i maìri ra, inaha, e mea rii menemene te vai noa ra i raro i te repo i taua mëtëpara ra mai te töpata hau te rarahi. 15 E ìte aè ra te tamarii a Ìteraèra i taua mea ra, ua nä ô aè ra rätou rätou iho, E aha teie? Aore hoì rätou i ìte i te reira. Ua nä ô aè ra Möte ia rätou, O taua mäa ra teie ta te Fatu e höroà mai na òutou e àmu.

Èfetia 4.17-24

Te oraraa âpï i roto i te Metia

17 E teie nei, teie ta ù parau, ta te Fatu ta ù e faaìte hua atu nei: a tirë roa òutou i te haere i ta te tahi pae Ètene haereà, i te haapaòraa i te parau maamaa a to rätou âau, 18 mä te manaò haapöurihia, e te taa ê hoì i te ora a te Atua i te ìte òre i roto ia rätou, e no te ètaèta o to rätou âau; 19 e no te ìte òre i te haamä, ua horoà noa ia rätou iho i te mau peu taiàta ra, ei rave i te mau parau faufau atoà mä te rü rahi. 20 Eere rä mai te reira ta òutou i ìte aè nei i te Metia ra. 21 Ua faaroo hoì òutou i ta na, e ua haapiihia òutou e ana, tei ia Ietu hoì te parau mau, 22 e e haapae òutou i ta òutou parau i mütaa iho ra, i te taata tahito i tei ìno i te hinaaro haavare ra; 23 e ia faahouhia òutou i to òutou värua ra i te âau; 24 e ia faataata âpï hoì òutou, o tei hämanihia ia au i te Atua ra, i te parau tià e te maitaì mau ra.

Ioane 6.24-35

Hoe.

24 E ia hiò aè ra taua mau taata ra e aore Ietu e ta na mau pipi atoà i reira, paìùma atoà atu ra rätou i nià i te pahï, hoe atu ra i Taperenaumi i te ìmiraa atu ia Ietu.

O Ietu te päne ora

25 E ìte atu ra rätou ia na i te tahi paeàu i taua roto ra, ua parau atu ra rätou ia na: E Rapi, i nä fea mai òe i ô nei? 26 Ua parau mai ra Ietu ia rätou, nä ô mai ra: Âmene, âmene, e parau atu vau ia òutou: eere rä no te mea ua ìte òutou i te mau täpaò ra, te ìmi nei rä òutou ia ù, no te mea i àmu òutou i te mäa ra e paìa aè ra. 27 Eiaha e òhipa i te mäa tähuti noa, i te mäa rä e tià i te vairaa e tae noa atu i te ora mure-òre-ra, o ta te Tamaiti a te taata e horoà mai na òutou na: oia hoì tei haapaòhia e te Atua e ta na Metua ra. 28 Ua ui atu ra rätou ia na: E aha ta te Atua òhipa i hinaaro ia rave mätou? 29 Ua parau mai ra Ietu ia rätou, nä ô mai ra: Teie ta te Atua òhipa hinaaro, ia faaroo òutou ia na i ta na i tono mai. 30 Ua parau atu ra rätou ia na: E aha ta òe täpaò e rave, ia hiò atu mätou a faaroo atu ai mätou ia òe? E aha ta òe räveà? 31 I àmu na to mätou hui-metua i te mäna i te mëtëpara ra, o tei päpaìhia ra e: I horoà mai na o ia i te päne o te raì na rätou ei àmuraa. 32 Ua parau mai ra Ietu ia rätou: Âmene, âmene, e parau atu vau ia òutou: aore Möte i horoà mai i te päne o te raì na òutou, ua horoà mai rä ta ù Metua i te päne mau o te raì no òutou. 33 Terä ta te Atua päne, o tei pou mai mai te raì ra, e o të horoà i te ora no to te ao ra. 34 Ua parau atu ra rätou ia na: E te Fatu, eiaha òe e faaea i te horoà mai i taua päne ra na mätou. 35 Ua parau mai ra Ietu ia rätou: O vau te päne ora. O të haere mai ia ù nei, e òre roa ia e poìa, e të faaroo mai ia ù nei, e òre roa ia e poìhä.

Manaò.

E faaroo mai, e a ù mau taata, i ta ù ra ture, e färiu mai to òutou tarià i te parau a ta ù vaha. Ta ù vaha i te parau taa maitaì, e faaìte au i te parau a manaò tahitohia ra. E òre te reira e hunahia e rätou i ta rätou mau tamarii, e faaìte faahou rä rätou i te tahi uì, i te haamaitaìraa i te Fatu, e to na mana, e te òhipa taa ê i ravehia e ana ra. Ua tuu mai o ia i te parau e ua haapaò i te ture na, ta na i faaue mai i to tätou mau tupuna ra, ia faaìte atu rätou i ta rätou ra mau tamarii. Ia ìte te uì i pïhaì atu, te mau tamarii e fänau mai, e ia tupu, ia faaìte atu rätou i ta rätou mau tamarii, ia tiàturi rätou i te Atua, e eiaha e haamoè i ta na ra òhipa, e haapaò rä tätou i ta na parau. E eiaha rätou ia fäito i to rätou ra mau metua, ei uì ètaèta e te haapaò òre, ei uì âau mau òre, e aore to rätou âau i haapaò i te Atua. I te ao ra, ua arataì o ia ia rätou i te ata ra, e te ruì ra e ao noa aè, i te märamarama auahi ia. Ua haapararï o ia i te mato i te mëtëpara, e ua tuu mai ra i te pape na rätou mai te moana te rahi. Ua tämau rä rätou i te rave i te hara ia na, i te faaririraa atu i Tei Teitei i te mëtëpara ra. Te rave noa rä rätou i te hara, e aore i faaroo i te mau òhipa taa ê na na ra. I haamäuà noa ai o ia i to rätou puè mahana ei mea faufaa òre, e to rätou mau mätahiti i te fatimaùu. Ia täìri o ia ia rätou ra, ua ìmi iho ra ia na, e ua färiu e ua uiui i te Atua. Ua manaò aè ra rätou e, o te Atua to rätou haapüraa, e o te Atua, o Tei Teitei ra, to rätou ia Ora. Te pinepine o ta rätou faaoôoraa atu ia na i te fenua moèmoè ra e. E te pinepine hoì o ta rätou faaririraa atu ia na i te mau mahana atoà. Oia ia, ua nä nià iho, ua nä nià iho rätou i te faaoôo i te Atua, e ua àa atu i Tei Moà i te fenua. Aore rätou i manaò i te òhipa i ravehia e ta na rima, i te mahana i faaora ai o ia ia rätou i te ènemi. Ua tuu atu ra i te täpaò i rotopü ia rätou, e pau iho ra, e te rana e pohe atu ra rätou. Ua faaoôo rä rätou e ua faariri i te Atua teitei, e aore i haapaò i ta na ra parau. Ua täiva ä rätou, e ua haavare mai to rätou mau metua ra, ua hoì faahou i te huru tahito ra mai te fana i tärahia te hua ra. Ua faariri rätou ia na i ta rätou mau vähi teitei ra, e ua faaoôo atu ia na i to rätou mau îtoro taraihia ra. Ia hiò mai rä te Atua i te reira ua riri iho ra, e ua haafaufau roa i to na nünaa. Pau iho ra to rätou mau taata âpï i te auahi, e aore ta rätou pötii i faaïpoïpohia ra. Ua maìri ta rätou mau tahuà i te òè, e aore ta rätou mau ìvi vahine i òto. Mäoro aè ra rä, ua ara mai ra te Fatu mai te ara taòto ra, e mai te taata itoito e pii i te uaina ra. E ua täìri iho ra i ta na mau ènemi i muri ra, e ua tuu atu ra i te haamä vaiiho taiàta ia rätou. Ua faaruè hoì o ia i te tiàhapa o Iotëfa, e aore hoì i hinaaro i te ôpü o Èferaima, i hinaaro aè ra rä i te ôpü o Iüta, te mouà ra o Tiona ta na i hinaaro ra. Teie ia te faaìteraa a na ìrava e maha nei :

-Taramo 78,  72 Ua faaàmu o ia ia rätou mä te âau haavare òre, e ua arataì o ia ia rätou i te àravihi o to na ra rima.

-Ètoto 16, 15 E ìte aè ra te tamarii a Ìteraèra i taua mea ra, ua nä ô aè ra rätou rätou iho, E aha teie? Aore hoì rätou i ìte i te reira. Ua nä ô aè ra Möte ia rätou, O taua mäa ra teie ta te Fatu e höroà mai na òutou e àmu.

-Èfetia 4, 21 Ua faaroo hoì òutou i ta na, e ua haapiihia òutou e ana, tei ia Ietu hoì te parau mau,

-Ioane 6, 35 Ua parau mai ra Ietu ia rätou: O vau te päne ora. O të haere mai ia ù nei, e òre roa ia e poìa, e të faaroo mai ia ù nei, e òre roa ia e poìhä.

Te haapaìa nei o Ietu tei poìa, e te haamäha nei tei poìhä, te faaìte nei teie reo i te puai no te aroha e te here o te Atua Nui Tumu Tahi. Teie huru parauraa, aita ä te taata i haamata i te òhipa, ua faatamaa ê na te Atua ia na i te hinuhinu e te tura. E aha paì ia teie ta te taata e peàpeà nei, e ta na e ìmi nei i te räveà ia ìtehia o ia, ia faufaahia o ia i mua i te mata o te taata, inaha ua ìte ê na te Atua ia na, ua rahi ê na to na parau i mua i te aro o te Atua. Ia au i teie fäìraa ta te päpaì taramo, mai te mau merahi tei riro ei mau tävini no te Atua, te reira atoà te tiàraa ta te Atua i hinaaro i te taata ia rave atu. Ia topa te taata i roto i te hepohepo e te mataù, te taime mau te reira e haapäpü ai o ia e, ua moè ia na te Atua e to na mau hinaaro atoà, aore ra : ua tatä ê na o ia i te Atua i räpae i to na oraraa. Eere rä te reira anaè, te täatoàraa o te òhipa a te Atua, aita o ia e haapaò nei, te òhipa ta te Atua i rahu e ta na i hämani, aita atoà o ia i täuà faahou atu. E inaha, te mau mea atoà ta te Atua i faatupu i te mana o ta na parau e te püai o to na here, ua mäìti o ia i te taata ei tiàau i te reira. Eiaha tätou e huna, te hepohepo e te mataù, te räveà ia ta te taata e haapaò nei no te haamoè roa i to na mau peàpeà, ia òre o ia ia manaò faahou, e taata âpï o ia i te reira taime, e taata e hinaaro nei e tämata i te mau mea âpï atoà. Taa noa atu ai ta na haafaufaa-òre-raa ia na iho, te taata e topa e te taata e pärahi i roto i te hepohepo, te taata atoà ia e manaò ra e, aita e òhipa e tiaì mai ra ia na, e tei maitaì hoì i roto i ta na hiòraa ra, ua maitaì roa ia.

Te òhipa a te Tumu Nui ta te taata e òre e täuà faahou nei, ta na ia täpura òhipa ta te Atua i horoà na na. Mea tano aè rä paha tätou e parau e, ua haamoè te taata, aore ra ua huna i te mea ta to na tiàraa e tïtau ra ia na. Nä ô na tätou i te ui : E aha te faufaa o te tahi arii aore o na e mana faatere ; e aha te faufaa o te tahi tävini të òre e rave i te òhipa no te maitaì o to na fatu ; e aha te faufaa o te parau, mai te peu aita e tarià no te haru mai i te mea i parauhia. Teie parau e, e òre e poìa e òre poìhä ta Ietu e parau nei, ua riro ia mai te tahi ture ta te taata i haamau, i te parauraa e, i te vähi e haamata atu ai to te tahi mana, e faaea mai to te tahi. I ô nei rä hoì, te taata iho teie e täpeà nei i te mana o te Atua, no te mea to na terä e haamata ra. Aita ta te Atua e parau faahou ia na, eere atoà ra te òhipa na na te haapaòraa i te parau a te Atua, e tae noa atu i te tiàturi rahi, e te here rahi o te Atua ia na i te püpüraa mai i ta na òhipa i roto i to na rima na na e haapaò. I te haamataraa te Atua i ta na òhipa, te mea mätamua roa ta na i rave, te ìritiraa ia i te ùputa o te märamarama, e i roto i taua märamarama ra, ua faaìte mai o ia i te täpaò o to na aroha e to na here. Te faufaa ia ta te Atua i püpü i roto i te rima o te taata. Te hinaaro nei te Atua Nui Tumu Tahi ia Ôroà te taata i parau ai o Ietu ua höroà mai ta ù Metua i te Päne no te raì mai. Te ôroà a te Fatu, e ôroà ia i reira te Fatu te faaìteraa i to te Atua here e to na aroha, tei riro noa te mäa e te inu ei täpaò faaìte. Ua riro atoà te Fatu iho tei faatià i teie ôroà ei tupuraa no te aroha e te here o te Atua i te taata. Te ôroà a te Fatu, e ôroà ia no te here e te aroha tei riro te rahu e te Tamaiti a te Teitei ei tupuraa. Te taò  ôroà, mai teie te faanahoraa o te taò ôroà : te ô, te faaàpu ia, te taihaa i ravehia no te tänuraa i te mäa, e te horoà a te fenua ; no te piti o te tuhaa o te taò, roà, e piti manaò rarahi ta na e faaìte ra. Te vai ra te haamanaòraa, oia te faaiho-faahou-raa mai, te faahoì-faahou-raa mai i te tahi parau i roto i te manaò ; e te vai ra hoì te märamaramaraa, oia te ìteraa i te auraa o te tahi parau. Te mea ia ta tätou e ìte nei i roto i te häroàroà. Ia faaea noa tätou i nià i te taò, teie te türamaraa ta te reo e horoà mai ra, a tahi : to te taata haamanaòraa i te maitaì o te Atua ta te fenua e faaìte noa ra ; a piti : to te taata faaìteraa e, ua märamarama o ia i te auraa o te horoà a te fenua, oia hoì to na ìte-päpü-raa i te tüàtiraa e vai ra i roto i te horoà a te fenua e te here o te Atua. Te ìte noa ra tätou e, eere teie parau no te mäa hoê noa, no te täatoàraa rä o te mau maitaì o te Atua ta te fenua e faaìte noa ra. Te mea ia te Atua i parau ai i te taata e : A hiò i tei au ei mäa, a rave a àmu, ta tätou e ìte nei i roto i te häroàroà. Ia faaea noa tätou i nià i te taò, teie te türamaraa ta te reo e horoà mai ra, a tahi : to te taata haamanaòraa i te maitaì o te Atua ta te fenua e faaìte noa ra ; a piti : to te taata faaìteraa e, ua märamarama o ia i te auraa o te horoà a te fenua, oia hoì to na ìte-päpü-raa i te tüàtiraa e vai ra i roto i te horoà a te fenua e te here o te Atua. Te ìte noa ra tätou e, eere teie parau no te mäa hoê noa, no te täatoàraa rä o te mau maitaì o te Atua ta te fenua e faaìte noa ra. Te mea ia te Atua i parau ai i te taata e : A hiò i tei au ei mäa, a rave a àmu. 35 Ua parau mai ra Ietu ia rätou: O vau te päne ora. O të haere mai ia ù nei, e òre roa ia e poìa, e të faaroo mai ia ù nei, e òre roa ia e poìhä.

 

Teraì òr. Faatura.

Ioane 6.1-15 Faaàmu.

 

Tāpati  25 no Tiurai 2021.

Faaàmu.

Taramo 145

Mata

1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu. 2 E haamaitaì ä vau ia òe i te mau mahana atoà nei, e ârue au i to iòa e a muri noa atu. 3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi. 4 Te mau uì atoà të faarahi i ta òe òhipa, e e faaìte hoì i ta òe ra òhipa mana. 5 E parau vau i te tura e te hanahana o to òe ra mana, e te mau räveà taa ê na òe ra. 6 E parau rätou i te mana o ta òe ra mau räveà mataù, e e faaìte hoì au i to òe ra mana. 7 E parau ä rätou i te manaòraa o to òe ra maitaì rahi, e himene hua hoì i ta òe ra parau tià. 8 E hämani maitaì e te aroha to te Fatu, e òre e riri vave, e te faaherehere rahi. 9 Hämani maitaì to te Fatu i te taata atoà, e te vai ra to na aroha faaherehere rahi i nià i ta na atoà ra mau òhipa. 10 E ârue anaè ta òe atoà ra mau òhipa ia òe, e te Fatu,  e na to mau tävini moà e haamaitaì ia òe. 11 E parau rätou i te hanahana o to òe ra pätireia, e faatià noa hoì i ta òe ra mau räveà püai. 12 I te faaìteraa i te tamarii a te taata nei i to na ra mana, e te hanahana e te manaò to na ra pätireia. 13 O to òe ra pätireia, e pätireia mure òre ia, e to òe ra mana, e tae ia i te mau uì atoà ra. 14 E Atua mau te Atua e te haavare òre i roto i ta na mau òhipa. Te mau ra te Fatu i te feiä e hià ra, e ua faatià i te feiä e piò i raro ra. 15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau. 16 Te heheu nei òe i to rima, e te haamäha nei i te hiaai o te mau mea ora atoà nei. 17 E parau tià ta te Fatu i ta na atoà ra mau haereà, e te hämani maitaì i ta na atoà ra mau òhipa. 18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre. 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou. 20 Te tiaì nei te Fatu i te feiä i hinaaro ia na, âreà te feiä paieti-òre ra, e haamouhia ia e ana. 21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

2 Te mau Arii 4.42-44

Faarahihia.

42 Ua haere mai ra te hoê taata mai Paara-tarita mai, hopoi mai ra i te mäa òho mätamua na te taata o te Atua ra, hoê taau päne tërite, e te tïtona täatoà i roto i te pütë ra. Ua parau atu ra o ia, A hopoi atu na te mau taata nei ia àmu rätou. 43 Ua nä ô mai ra te tävini, E aha, e tuu änei hoì au i teie i mua i te aro o te taata atoà hoê hänere nei? Ua parau faahou atu ra o ia, A hopoi na te taata ia àmu rätou: te nä ô mai ra hoì te Fatu, E àmu rätou, e e toe hoì. 44 Ua tuu atu ra o ia i taua mäa ra i mua ia rätou, e ua àmu iho ra, e ua toe, ta te Fatu hoì i parau mai ra.

Èfetia 4.1-6

Te tino

1 E teie nei, te aò atu nei au, te taata i täpeàhia i te Fatu nei, ia òutou, ia au to òutou haereà i te parauraa i parauhia mai ai òutou na, 2 mä te âau haèhaa, e te marü, mä te haamahuraa roa, i te faaòromaìraa te tahi i te tahi mä te aroha; 3 mä te ara mäite ia vai ä te au tähoê a te Värua i te àti ra i te hau. 4 Hoê ä tino, hoê hoì Värua, mai ia òutou hoì i parauhia i te tiaìraa hoê o to òutou parauraa ra. 5 Hoê hoì Fatu, hoê faaroo, hoê päpetito, 6 hoê Atua o te Metua o te taata atoà ra, e tei nià iho hoì i te taata atoà, e tei pïhaì iho i te taata atoà, e tei roto hoì ia òutou atoà.

Ioane 6.1-15

Tämäaraa.

(Mät 14,13-21; Mär 6,30-44; Ruta èv 9,10-17)

1 E muri aè ra, fano atu ra Ietu i te hoê paeàu i te roto i Tarirea ra, o tei parauhia i te roto i Tïpëria ra. 2 E tïàa rahi hoì tei pee mai ia na ra, no te mea ua ìte rätou i te mau täpaò ta na i rave i te feiä maì ra. 3 Haere atu ra Ietu i nià i te hoê mouà, e pärahi iho ra i raro e ta na mau pipi atoà. 4 Ua fätata te Päta, e ôroà na te âti-Iüta ra. 5 Hiò aè ra te mata o Ietu, e ìte atu ra o ia e, e tïàa rahi të haere mai ra ia na ra; ua parau atu ra ia Firipa: «Ei hea tätou e hoo ai i te mäa ei faaàmuraa atu i teie nei mau taata?  6 I nä reira atu ra o ia i te tämataraa atu ia na, ua ìte hoì o ia iho i ta na räveà. 7 Ua parau mai ra Firipa: «Ia piti noa atu ä hänere i te moni veo ia hoo i te mäa, eita roa e ravaì ia tätaìtahi hua iti i te taata hoê. 8 Ua parau mai ra ia na te hoê pipi a ana ra, o Àneterea te taeaè o Timona Pëtero ra: 9«E pae a te hoê tamaiti iti nei päne, e piti hoì ià. E aha rä hoì te reira e ravaì ai i teie nei feiä rahi? 10 Ua parau atu ra Ietu: «A faataòto na ia rätou i raro. E rave rahi hoì te nonoha i taua vähi ra. Ua taòto iho ra taua mau taata ra i raro, a pae paha tautani ia taiò ra. 11 Ua rave aè ra Ietu i nä päne ra, haamaitaì atu ra i te Atua, ua tuu atu ra i te mau pipi ra, e na te mau pipi i tuu atu i te feiä i taòto i raro ra. E ua tuu atoà atu ra hoì i te ià, e fiu anaè iho ra rätou. 12 E paìa roa aè ra rätou, ua parau atu ra o ia i ta na mau pipi: «A haaputu na i te huàhuà rii mäa toe ra, eiaha te hoê vähi iti e faaruèhia. 13 Ua haaputu iho ra rätou, e î aè ra nä ète rarahi auàhuru e mä piti i te toeà i taua nä päne e pae ra, o tei toe i taua mau taata i àmu ra. 14 E ìte aè ra taua mau taata ra i taua täpaò a Ietu i rave ra, ua nä ô aè ra rätou: «O taua perofeta mau ä teie e haere mai i te ao nei ra. 15 Te ìte ra Ietu i to rätou manaò e tii mai ia na e e hopoi e faaarii, hoì faahou atu ra o ia i nià i te mouà o ia anaè iho.

Manaò.

Te uiraa e tià ia ui i mua i teie mau taiòraa, mauti ra ia, E aha hoì tätou nei, i to tätou faarooraa i teie mau parau tei faaìtehia i mua i te nünaa o te Atua Nui Tumu Tahi, e te mau faanahoraa i faatupuhia i roto i tera uì taata no te hoê tau taaê te tahi i te tahi. E täpaò faaìte ia e ua ìtehia ua faaroohia te mau poroì tei haaputa pü te âau o te taata i te ìteraa i te hinaaro o te Atua ia tätou. Nahea tätou i te pähono mai te peu aita tätou i ìte, e aita tätou i faaroo. E nahea i te ui, mai te peu aita te âau i färii. E nahea tätou i te hinaaro ia na mai ta na iho i hinaaro ia ìtehia o Na. E nahea tätou i te hinaaro i te tauiraa mai te peu e, te faaètaèta noa ra tätou i to tätou âau. E oraraa ê atu änei tei hinaarohia i te feiä tei riro te parau no te hau o te Atua ei mea faufaa, te Hau o te Atua anaè te faatere, o Na hoì tei Hau i roto i to tätou âau, e na Na hoì e faaòre i te hïta o to tätou âau.

No reira te Atua i rave ai i te tahi taata no tē parau, no tē faaìte eere mai te reira, eere te reira ta te Atua e hinaaro ra. E te tumu ia teie taata i mäìtihia e taata âpī roa, no te mea e faaòhipa te riri o te taata i nià ia na. No reira ia te òhipa i tupu i nià ia Ietu, ua haere atoà mai Ietu no tē faaìte i te taata, e ua hahi. Aita e taata e au aè nei ia parauhia atu e, aita e tano ra, faahoì mai ihoā te riri o te taata i nià i te taata i mäìtihia.

Ia òre paì tātou ia manào e, te taata māìtihia, te taata faahiahia roa te reira. No reira o Pauro i parau ai e 6 hoê Atua o te Metua o te taata atoà ra, e tei nià iho hoì i te taata atoà, e tei pïhaì iho i te taata atoà, e tei roto hoì ia òutou atoà. Ia tupu te hinaaro o te Atua, ia ìte te taata i te êà. Eere no te òreraa te tahi i māìtihia, e òre ai o ia e riro atoà ei tāvini, aore ra, e òre ai o ia e tāvini. Te tāviniraa, ei vāhi i reira te Atua e tīaì mai ai i ta te taata faahanahanaraa atu ia na. Ia riro te taata mai te pape e faahoì i te ànaana o te mahana. Terā te auraa o te tāvini, ia hoì ihoā te hanahana o te òhipa e ravehia ra i te Atua. Tià mau atu te mau parau e faahitihia nei……

-Taramo 145, 15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau.

-2 Te mau Arii 4, 43 Ua nä ô mai ra te tävini, E aha, e tuu änei hoì au i teie i mua i te aro o te taata atoà hoê hänere nei? Ua parau faahou atu ra o ia, A hopoi na te taata ia àmu rätou: te nä ô mai ra hoì te Fatu, E àmu rätou, e e toe hoì.

-Èfetia 4, 6 hoê Atua o te Metua o te taata atoà ra, e tei nià iho hoì i te taata atoà, e tei pïhaì iho i te taata atoà, e tei roto hoì ia òutou atoà.

-Ioane 6, 5 Hiò aè ra te mata o Ietu, e ìte atu ra o ia e, e tïàa rahi të haere mai ra ia na ra; ua parau atu ra ia Firipa: «Ei hea tätou e hoo ai i te mäa ei faaàmuraa atu i teie nei mau taata?

-Te vahi ua pau te raveà a te taata, e raveà ta Ietu.

-Te maa ùtuafare, ua riro èi maa na te nünaa.

-E pae päne, e piti ïà, ua paia e pae tauatini paha taata.

-Ua toe hoê àhuru mä piti ète, èi faaìte i te pau òre te maitaì o te Atua Nui Tumu Nui.

Ua faaàmu o Ietu i teie rahiraa taata i te maa o te fenua e te ìnaì o te moana, ua noaa i te faarahihia ia tämaa e ia paìa ua toe te maa hoê àhuru mä piti ète i toe. Ua faaâpïhia e Ietu i te maa o te pata, ua faanaho i te maa e au no teie mau taata e rave rahi to rätou tiàraa i roto i te oraraa vaamataèinaa. No Ietu e mau taata teie tei ère  to rätou tiàturiraa i te mau peu tei òre roa e au i to rätou oraraa. E pae tauatini paha taata tei tiàturi i te mau haapiiraa a Ietu, e tei ìte i te parau mau e te parau tià i te faaìteraa a Ietu. Naò ia tätou i te parau e, e mau taata teie tei faataa mai ia rätou i te mau faatereraa o to rätou fenua, e tae noa atu i te pae o te faaroo, ua tiàturi ia Ietu.

E tià ia tätou i te parau e, e aha te hoo, e aha te faaàmu. Ua hinaaro teie mau taata e tähiti, e faaruè te vahi èita e tupu te hau o to rätou âau, te ìte nei rätou i roto i te mau haapiiraa a Ietu e matara te hoê èà e tià e ärataì ia rätou i roto i te märamarama no te ôpuaraa ora e tïtauhia ra ia rätou. Ua rave o Ietu i nä päne ra, haamaitaì atu ra i te Atua, ua tuu atu ra i te mau pipi ra, e na te mau pipi i tuu atu i te feiä i taòto i raro ra. E ua tuu atoà atu ra hoì i te ià, e fiu anaè iho ra rätou. Ua pärahi teie mau taata i roto i te hau ta te fenua e haamähanahana nei ia rätou, ia òre rätou ia riro èi rätere.

Te auraa, i nià i teie àmuraa mäa te âmui nei ia o Ietu, ta na mau pipi, e teie e pae tauatini paha taata, e piti òhipa ta Ietu e haapaò nei :

Ia tätou te parau o te päta, te haamanaò ra ia tätou e, ua vävähi o Ietu i te mau patu e faataa ê nei i te  taata i te Atua, manaò ai te âti Iuta e, no na anaè te Atua. Nä roto hoì i to Ietu täpeàraa mai i te färaoa e te ïà ei mäa i nià i te ôroà ta na i haamau, ua ìriti atoà Ietu i te ùputa e ö mai ai te mau mäa atoà ta te fenua e faahotu noa mai nei. No te ïà ihoä ia e te färaoa te parau i nià i te àmuraamäa a te Fatu, aita rä te reira i riro mai te mea, e patu âpï ta Ietu iho e faatià nei, e ùputa âpï teie ta Ietu e ìriti  nei. Te  riro nei te färaoa o te fenua, e te ïà o te moana e mau maitaì ta te Atua i horoà i teie mau taata, ei uruaìraa no ta rätou faahanahanaraa i te Atua Nui Tumu Tahi, te tumu o taua mau maitaì atoà ra. Mai te mea atu ra e, ia parau anaè te Atua e, 43 Ua nä ô mai ra te tävini, E aha, e tuu änei hoì au i teie i mua i te aro o te taata atoà hoê hänere nei? Ua parau faahou atu ra o ia, A hopoi na te taata ia àmu rätou: te nä ô mai ra hoì te Fatu, E àmu rätou, e e toe hoì.

Te Faaàmu i roto i teie reo no te faaìte ia i te faufaa o te mäa, e te parau o te tamarii e parau ihoä ra no te mäa te tumu. E piti noa mäa teie te färaoa e te ïà, ua paia e ua toe no te mea te mau taata àmu, ua ìte rätou i te faufaa no te mäa, te maa no te haapaìa, èita ra no te haaporia. Ia ìte tätou i te here e te aroha o te Atua Nui Tumu Tahi i roto i te mäa. E ia faariro tätou i te tämaa èi tiàturiraa tumu na tätou èi täpaò no to te Atua faaherehereraa ia tätou. Te auraa teie ia : mea faufaa te mäa no te ôpu, mea faufaa roa atu rä ia riro èi haamanaòraa tämau na tätou i te maitaì fäito òre o to tätou Atua. I roto i teie parau no te mäa, te vai atoà ra te ïà e te tai tei riro èi nohoraa no rätou. Eiaha na tätou e faaìno i te âua ïà rahi ta te Atua i höroà mai na tätou, eiaha e haaviivii i te miti, eiaha e faariro i te reira èi hueraa pehu, no te mea, o te taèro anaè e te pohe ta te reira huru faatura òre e faatupu mai. E haamanaò tätou nä roto i te färiiraa i te reira mau maitaì i te here metua o te Atua ia tätou ta na mau tamarii.

 

Teraì òe. Faatura.

 

                                                                                                                                

Décryptage des essaies Nucléaires Français en Polynésie.

 

Märeto 6, 30-34 Nana

 

Tāpati 18 no Tiurai 2021.

Nana.

Taramo 23.

Te fare.

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra,  te arataì nei o ia ia ù nä pïhaì iho i te pape atatià ra. 3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Ieremia 23.1-6

Te nana.

1 E te mau tiaì, e tei täparahi e ua haapurara i te mau mämoe ta ù i faaàmu nei, të nä reira mai ra te Fatu 2 Te nä ô mai ra te Atua o Ìteraèra, o te Fatu, i te mau faaàmu tei faaàmu i to ù ra mau taata, ua haapurara i ta ù ra mau nana, e ua tiahi-ê-hia e òutou, e aore òutou i tiaì noa atu ia rätou; inaha, teie au a tähoo atu ia òutou i te ìno ta òutou i rave të nä reira mai ra te Fatu. 3 E haaputu mai rä vau i te toeà o ta ù nana, i te mau fenua atoà i tïahihia atu ai rätou e au ra, e faahoì mai au ia rätou i ta rätou iho ra âua, e riro rätou i te tupu e rahi noa atu ra. 4 E tuu hoì au i te tiaì i nià iho ia rätou, ei faaàmu ia rätou ra. E òre atu ra rätou e mataù faahou, e òre e horuhoru, e òre hoì rätou e nä reira-faahou-hia te parau mai ra te Fatu. 5 Te nä ô mai ra te Fatu inaha, te fätata mai ra te tau, e faatupu ai au i te tahi âmaa parau tià no Tävita, e riro hoì te hoê taata ei arii e te haapaò i te parau maitaì, e te faatupu hoì i te parau au e te parau tià i te fenua nei. 6 Ia tae i to na ra tau, e ora ia Iüta, e pärahi noa hoì Ìteraèra mä te ora; e teie hoì te iòa e maìrihia nö na: O te Fatu ta tätou parau tià ra.

Èfetia 2.13-18

Värua hoê.

13 I teie nei rä, i te Metia nei ia Ietu, o òutou o te feiä i te ätea ê i mütaa iho ra, ua haafätatahia mai ia i te toto o te Metia nei. 14 Oia hoì to tätou hau o tei faariro ia tätou ei hoê, e ua huri hoì i raro i te patu faataa ê i röpü ra. 15 Ua oti hoì i te faaòrehia te au òre i to na iho ra tino, oia te ture parau faaue no te mau ôroà ra, ia riro taua piti ra ei taata âpï hoê ia na iho, a hau atu ai ra: 16 e ei faafäite ia räua atoà i te âmuiraa hoê i te Atua, i te tätauro ra, o te au òre i faaòrehia i te reira. 17 E ua haere mai ra hoì, ua aò haere i te Parau Maitaì ra o te hau ia òutou i to te ätea ê ra, e ia rätou hoì tei fätata. 18 No na hoì tätou atoà nei e ö atu ai i te Värua hoê i te Metua ra.

Māreto 6.30-34.

Pähonoraa.

(Mät 14,13-21; Ruta èv 9,10-17; Ioane 6,1-14)

30 E putuputu mai ra te mau âpotetoro ra, ua faaìte mai ra ia Ietu i ta rätou i rave, e ta rätou i haapii ra. 31 Ua parau atu ra o ia ia rätou: A haere mai òutou anaè iho, tätou i te hoê vähi moèmoè e faaea iti noa aè. Aita hoì o rätou e taime no te tämäa i te rahi o te taata i te haereà mai e te haereraa atu. 32 Hoe huna atu ra rätou nä nià i te poti i te tahi vähi moèmoè. 33 Ua ìte rä te taata ia rätou i te fanoraa, e rave rahi hoì tei ìte e o vai rätou , e ua horo atu ra nä uta mai roto atu i te mau ôire atoà, e ua tae na mua ia rätou. 34 E tei te täpaeraa atu Ietu ra, hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Manaò.

Ua päpü maitaì e, ia òre ia maitaì te òhipa i faauehia i te tahi, e taui te manaò o te metua, e faaue o ia i te tahi tamarii ê atu. Te huru ta tätou e ìte pinepine nei, te òaòa ia o te tamarii tei òre i topa mai te faaueraa a te metua i nià ia na, e te faatautau o te tamarii ta te metua i faaue i te òhipa.

Areà te parauraa e, ua tuu te Atua i to na Värua i nià ia na, eere no te mea eita te Värua o te Atua e au i te tahi pae, e nä ô rä tätou e, ua märamarama maitaì o ia i te mea ta te Atua e hinaaro ra ia na, e te reira atoà te mea e arataì ra ia na i roto i te òhipa ta na e rave atu. Ia haamata tätou i te manaò e, ua î te taata i mäìtihia i te Värua o te Atua, e òhie tätou i te manaò e, te Atua iho terä e òhipa ra i roto i te reira taata. Te auraa, na teie ihoä taata e haere, to na ihoä te âvae e taahi i nià i te repo, aore ra to na iho te âvae e puta i te ôfaì, na te märamarama rä o te parau e faaòhie ia na i to na mau tuuraa âvae atoà. Eere no te mea ua mäìtihia te tahi taata no te rave i te tahi òhipa, i riro ai te mau mea atoà ei mea òhie no na, i mänina noa ai hoì to na èà, to na noa vähi hau, eiaha rä ia, to na rä vähi taa ê, te tiàturiraa ia ta te Atua i tuu i nià ia na.

 

Ia au i te mea ta tätou i mätau, no te maitaì o te òhipa i ravehia e te tahi i mauruüru ai tätou ia na. Ua parau mai na ihoä tätou e, ia taiò tätou i te parau mai teie te huru, e òiòi rii to tätou manaò i te horo i nià ia Ietu, eita atoà rä tätou e tano e huna e, i roto i te tupuraa o te òhipa, te vai ra te mea e haamanaò mai i te parau o Ietu. Ia hiò tätou i te faanahoraa o te mau ìrava, òre noa atu ai i parau-roa-hia, ia parau mai ai te Atua e, ua mauruüru roa vau ia na, e òhipa ta Ietu i rave, e no te maitaì o te òhipa i ravehia, òre noa atu ai tätou e ìte ra i te òhipa ta na i rave, inaha mea haere mai o ia ia päpetitohia o ia, i mauruüru ai te Atua ia na. I ô nei, aita te manaò i nià i te tahi òhipa i ravehia e te tävini, tei nià rä i te taata e parauhia ra e tävini no te Atua.
Ia taiò tätou i te mau parau e haapoto i na taiòraa e maha, e märamarama tätou i te mea i roto i te huru o teie taata, tei faatupu i te mauruüru o te Atua. Mai te peu i te hiòraa noa i te huru o teie taata, ua mauruüru te Atua, e aha atu ä ia ia rave o ia i te òhipa no reira te Atua i mäìti ai ia na. Te Atua rä, e piti noa mea ta na e ani nei ia tätou ia haapaò, ia faaroo,  tirä rä. No reira, eere no te faanahoraa, eere no te tiàraa, i riro ai te tahi ei tävini no te Atua, a faaroo na tätou teie mau ìrava no teie mahana :

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-Ieremia 23, 3 E haaputu mai rä vau i te toeà o ta ù nana, i te mau fenua atoà i tïahihia atu ai rätou e au ra, e faahoì mai au ia rätou i ta rätou iho ra âua, e riro rätou i te tupu e rahi noa atu ra.

-Efetia 2, 16 e ei faafäite ia räua atoà i te âmuiraa hoê i te Atua, i te tätauro ra, o te au òre i faaòrehia i te reira.

-Märeto 6, 34 E tei te täpaeraa atu Ietu ra, hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Ua hinaaro o Ietu ia haere o ia e ta na mau pipi i te hoê vahi moèmoè, ia tià ia rätou ia pärahi i roto i te hau no te òhipa i ravehia mai e rätou. Teie ôpuaraa àita i manuia, ua na nià o Ietu e ta na mau i te poti, ua täpapa te rahiraa taata na uta i te tipaeraa o Ietu e ta na mau pipi i te vahi i reira rätou e pärahi ai i roto i te hau, ua tupu te aroha i roto ia Ietu i te ìteraa i teie mau taata maite mämoe ra te huru e te tiaì òre.

No teie òhipa i tupu ua faafäite o Ietu ia Na i teie mau taata tei hinaaro ia Na, oia hoì ua faahau o Ietu ia Na i teie mau taata haapii atu ra ia rätou, i te mau parau e rave rahi. Te ìte ra tätou te huru o Ietu i roto i te hau no te faatupu i te faufaa o te parau e hinaarohia ra e faaìte ia hanahana to na Metua. Te òhipa ta Ietu e rave nei te faahoì faahouraa ia teie mau taata i roto i te ora a te Atua Nui Tumu Tahi, no te mea, te haapiiraa, terä e türama ra, e terä e tauturu ra.

No reira, mai te peu e, e hinaaro mau to tätou ia rahi faahou tätou e to tätou nünaa, terä noa te räveà ia tupu terä faafäiteraa ia tätou ia tätou iho. Tätou i to tätou fenua, ta tätou e ta tätou peu, tätou e to tätou reo. Tätou ihoä rä e to tätou Atua, ta tätou e parau nei e Atua terä no te aroha e te here. E aroha, e here te Atua, te reira atoà te mea ta tätou e faatupu.

Haamanaò rii na tätou i te mau òhipa e tupu nei i roto i to tätou fenua, to na haaviiviiraahia, to na heruraahia, i te tahi mau faanahoraa e òre e au i to na oraraa, ua purara te nünaa i nià i to na iho fenua, ua huri täèrehia te oraraa hau o te fenua e to te nünaa i Mäòhi Nui nei.  Ma te haapurara to na manaò i nià i te òhipa e òre o ia e tiàfaahou i roto i to na iho tiàmaraa èi nunaa no teie fenua.

Te auraa, te vai ra te tahi mau parau, mea ê to tätou manaò i teie mahana ia tütonu faahou, hiò faahou i te auraa, ia òre tätou ia faaea noa i roto i te peu e te rave peu-noa-raa i te tahi mau òhipa ta tätou e parau ra e, e mau òhipa tumu terä i roto i te faaroo e ua haapae tätou i te auraa o te òhipa ta tätou e rave ra. Mai te mea e hinaaro tätou ia haere tätou i te rahi, hoê noa räveà, hoì faahou tätou i raro, e haafäite faahou ia tätou, to tätou parau, to tätou fenua e i to tätou Atua.

E aha o Ietu i parau ai, e Nana tiaì òre teie, eiaha no te mea te faaäu nei o Ietu i teie mau taata i te ànimara, te ìte nei ra o Ietu i roto i teie mau taata te hoê nünaa âpï, toeà o te nunaa e ìmi ra i te faafäiteraa ia na i te hinaaro o te Atua Nui Tumu Tahi. No reira o Ietu i itoito roa ai i te haapii i teie nana tei täpapa ia rätou i te tahi pae no te roto. Te nana teie e täpapa ra i te tiaì, i te mea te ìte rätou i roto ia Ietu i te  täpaò no te aroha e te here o te Atua, ta na e faatupu mai te aroha e te here, e püai tätou i nià i te aroha e te here. Areà teie ta tätou e ora nei i teie mahana, aita, e püai to tätou i te faaau òre, ia tätou iho, to tätou iho parau, ta tätou iho peu, mea rahi, no te mea, aita tätou e hinaaro ra e färii, e inaha e horoà na te Atua i teie nünaa Mäòhi i Mäòhi Nui nei to na fenua.

 E tià änei ia parauhia ua ihu teie nana, te nana ihoä rä tei ìte e tei òre i mataù i te fäìraa e, ua ihu o ia, e pärahi o ia i raro, e feruri i te vähi o ia i hape ai, e e hoì i te reira vähi no te faatïtïàifaro mai i to na èà. Te nana e onoöno i te haere i mua, të òre hoì e färii i to na hape, te taata e haamä ia parauhia e, ua hape o ia, aore ra të rave i te tahi èà ê atu, te faarahi noa atu ra ia i to na fifi. Hoê ä e te feiä e manaò nei e, no te mea ua horo rätou i roto i te tahi haapaòraa ê atu, aore ra ua haapae roa i te parau o te Faaroo, ua ora ia rätou, e eita e naeàhia i te faahaparaa a te parau a te Atua. Tei roto atoà ia feiä i te hape. Eere no te mea ua taui òe i te èà, i tano ai òe i te raveraa i te reira èà, no te mea rä ua ìte òe e, te vai ra te tahi vähi i nià i te èà ta òe i rave mai të tano ia faatïtïàifarohia, e ua färii òe i te faatïtïàifaro i te reira, te reira te mea e horoà i te nana i te märamarama ta na i ère i taua taime ra. I mua i te parau o te fenua e te Faufaa ora a te Atua ta na e mau ra, to na färii òre i te fenua e te Faufaa ora a te Atua ta na e mau ra, i ô mai änei te reira färii òre e riro mai ai ei färii. E nä ô ia tätou e, te feiä të òre e au i te märamarama, e horo ihoä rätou i roto i te pöiri, no te mea ua au te reira ia rätou. To tätou mau Tupuna, ua tiàturi rätou e ua here i te fenua ta rätou i faariro ei hoa, ei tauturu ia rätou i roto i te oraraa, e ua taiò te Atua i te reira ei parau tià na rätou. I teie mahana i hiroà ai tätou e, ua ätea roa tätou i te fenua, e te neneì noa mai ra te pohe e te hepohepo ia tätou, teie ta Ietu hiòraa : hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Eiaha tätou e nounou i te pohe òhie, e tïtau mäite rä i te ora, aita e haamä to te hoì, inaha te tiaì mai ra te Atua ia tätou, e  o to na ia hinaaro mau, e ua tonohia mai hoì te Tamaiti no te faaìte ia tätou i te èà. Aita roa atu ia e mea e faatano ra i ta tätou mau haapahipahiraa maoti rä, te hinaaro òre i te ora. Ia ìte mai tätou, ia òre tätou ia òhie i te pee i te Fatu i roto i te faatüàtiàtiraa ta na e faaìte ra i roto ia tätou, te fenua, e te Atua Metua, e riro tätou i te hiò mai te mea e, e haereraa ê ihoä to te  Fatu, e haereraa ê to te fenua ; e parau ê ta te Fatu, e parau ê ta te fenua. O Ietu rä i hiò e : mai te nana mämoe tiaì òre ra rätou. Haapii atu ra o ia ia rätou i te parau e rave rahi. I parau ai o ia i te horoà a te fenua e : o ta ù tino tenä, o ta ù toto tenä, no te haapäpü ia e, te fenua, mai ia na atoà, te haapiiraa ia, te parau mau, e te ora.  No reira, mai te peu hoê ä te fenua e o Ietu, eere ia no te faahapa te tahi i te tahi, no te faaìte rä i te hoêraa o ta räua faaìteraa. Te päpü maitaì ra ia tätou e, tei ìte i te nana ra, ua ìte ia i te Atua, e tei ìte hoì i te Tamaiti ra, ua ìte ia i te Atua. E tano ai tätou e parau e, te Atua ta te fenua i faaìte i te mau Tupuna, e te Atua ta te Tamaiti i haere mai e faaìte, taua Atua nei ä ia, e Atua tei here i ta na rahu, e Atua tei hinaaro ia ìte te taata e, te Hau o te Atua, ta tätou e manaò nei e, tei nià i te raì, ua hohoà maitaì ia i te fenua ta tätou e tähitohito nei. Te nä ô ra te reo o te päpaì taramo : Te Tumu Nui to ù tiaì, e òre roa vau e ère. Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. E faahoì o ia i ta ù värua, e arataì o ia ia ù nä te èà tïtïàifaro, no to na ra iòa. E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì atoà iho òe ia ù : to räau e to tootoo tei haamähanahana mai ia ù. Ua faanahonaho òe i te tahi àmuraa mäa na ù i mua i te aro o ta ù mau ènemi ; ua faatävai òe i ta ù upoo, e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

(Taramo 23, 1-6).

 

 

Teraì òr. Faatura.