Ioane 10.27-30 Tähuti.

 

Tāpati 8 no Më 2022.

Tähuti.

Taramo 100

1 Taramo haamaitaì. Ia haruru te fenua atoà i te haamaitaì i te Fatu.

2 E haamori i te Fatu mä te òaòa, e haere mai i mua i ta na aro mä te himene.

3 Ia ìte hoì òutou: o te Fatu anaè ra te Atua, na na tätou i hämani, e no na hoì tätou, e taata no na, e te mämoe no ta na ra âua.

4 E tomo i to na mau ùputa mä te ârue; e to na ra mau hëtere mä te himene haamaitaì. E ârue òutou ia na, e haamaitaì i to na iòa.

5 E maitaì hoì to te Fatu, e to na aroha e tià ia i te vai-mäite-raa, e ta na ra parau mau i tërä uì, i tërä uì.  

Òhipa 13.14-52

14 E mai Perete hoì reva atu ra rätou, e tae atu ra i Ànetiohia i Pititia, tomo atu ra i roto i te tunato i te mahana täpati, pärahi iho ra i raro.

15 E oti aè ra te taiòraa i te ture e te mau perofeta ra, ua tono aè ra te mau tävana o te tunato ra i te veà ia rätou, nä ô atu ra: «E te mau taeaè nei, te hinaaro na òutou i te aò mai i te taata nei, a parau mai.

16 Ua tià mai ra Pauro i nià, ua popoì mai ra i te rima, nä ô mai ra: «E te mau taata Ìteraèra nei, e te feiä atoà e mataù i te Atua ra, a faaroo mai.

17 Na te Atua o teie nei mau taata Ìteraèra nei i mäìti i to tätou hui tupuna, e ua faateitei o ia i taua mau taata ra ia rätou i pärahi noa i Àifiti ra, e ua arataì mai o ia ia rätou i räpae mä ta na rima püai.

18 E ua faaòromaì o ia i ta rätou parau i te mëtëpara ra, e a maha aè ra àhururaa te mätahiti.

19 E pau iho ra hoì e hitu fenua ia na i taua fenua i Tanaana ra, ua tufa terero iho ra o ia i to rätou fenua no rätou iho.

20 E oti aè ra te reira, a maha atu ra hänere e pae àhururaa te mätahiti. I tuu mai ai i te feiä haavä no rätou e tae aè ra i te perofeta ra ia Tämuera.

21 Mai reira hoì, ua hinaaro aè ra rätou i te arii, ua horoà mai ra te Atua ia Taura te tamaiti a Tita, no te ôpü o Peniamina taua taata ra, e a maha aè ra àhururaa te mätahiti.

22 E tuua-ê-hia aè ra o ia e ana, ua faatupu aè ra o ia ia Tävita e arii no rätou; ta na hoì i parau mai ra i te nä-ô-raa mai e: «Ua ìteä ia ù Tävita te tamaiti a Iete, e taata e au i ta ù âau, e na na e faatupu i ta ù mau hinaaro atoà.»

23 Ua faatupu iho nei te Atua i te Ora no Ìteraèra ia Ietu, no te huero o teie nei taata, o tei parauhia mai ra. 24 I parau haere na Ioane i te päpetito tätarahapa i te taata atoà o Ìteraèra i haere mai ai o ia.

25 Te faatupu ra Ioane i to na tere, e ua nä ô aè ra o ia: «O vai au nei i to òutou manaòraa? Eere au i te Metia. A hiò na rä, te haere mai ra te hoê i muri iho ia ù, eita vau e au ia tätara noa atu i te tämaa i ta na âvae.»

26 E te mau taeaè nei, e te tamarii o te fëtii o Âperahäma, e te feiä atoà e mataù i te Atua i roto ia òutou na, i häponohia mai teie nei parau ora ia òutou nei.

27 Te feiä hoì i pärahi i Ierutarëma, e to rätou hui raatira atoà, no te mea aore rätou i ìte ia na, e te parau a te mau perofeta i taiòhia i te mau mahana täpati atoà ra, ua faatupu iho nei rätou i taua mau parau ra i te faahaparaa atu ia na ra.

28 Aore ä hoì a ana hara i ìteä e rätou e pohe ai, ua ani atu ra rätou ia Pirato ia taparahihia o ia.

29 E hope aè ra i te faatupuhia e rätou te mau parau atoà no na i päpaìhia ra, ua tuu mai ra rätou ia na i raro mai nià mai i taua räau ra, e vaiiho atu ra ia na i roto i te menema ra.

30 Ua faatià mai rä te Atua ia na mai te pohe mai ra.

31 I ìteä mai hoì o ia e rave rahi te mahana i te feiä i haere atoà mai, e oia atoà i Ierutarëma mai Tarirea mai ra, o rätou to na ìte i te mau taata atoà ra.

32 E parau maitaì ta mätou i hopoi mai ia òutou nei, te parau i parauhia mai i to tätou hui tupuna ra;

33 ua faatupu iho nei te Atua i taua parau ra ia tätou nei i ta rätou tamarii, o ia i faatià faahou ia Ietu i nià, o ia hoì tei päpaìhia i roto i te Taramo piti ra: «Ta ù Tamaiti òe, i naùanei òe i fänauhia ai e au.»

34 I faatià mai o ia ia na mai te pohe mai ra, eiaha o ia e hoì faahou i te âpoo, o ia i nä ô mai e: «E horoà vau ia òutou i te mau maitaì i faaìtehia ia Tävita ra i te mea haavare òre ra.»

35 I parau mai ai hoì o ia i roto i te tahi Taramo ra: «Eita òe e tuu i to Mea Moà ia tähuti noa na.»

36 Âreà Tävita, rave atu ra o ia i te hinaaro o te Atua i to na ra uì, maìri atu ra to na taòto, e âmuihia atu ra o ia i to na ra hui-metua, e tähuti atu ra.

37 Âreà o ia, o ta te Atua i faatià i nià ra, aore ia i tähuti.

38 E teie nei, ia ìte òutou, e te mau taeaè nei, no teie nei taata i parauhia atu ai ia òutou na e, e matara te hara.

39 E te mau mea atoà eita òutou e tiàhia mai i te ture a Möte ra, e tiàhia mai ia ia na te feiä atoà i faaroo ra. 40 E teie nei, e haapaò maitaì, òi roohia mai òutou e tei parauhia mai e te mau perofeta ra:

41«A hiò na òutou, e te feiä e vahavaha, a mäere atu, e a pohe atu. E òhipa hoì au i te hoê òhipa i to òutou na ànotau, e òhipa rä, parau noa atu te taata ia òutou na, e òre roa òutou e faaroo.»

42 E tei te haereà te âti-Iüta i räpaeàu i taua tunato ra, ua ani atu ra te Ètene ia parauhia mai taua mau parau ra ia rätou ia tae i te täpati ra.

43 E purara atu ra taua tunato ra, ua pee mai ra to te âti-Iüta e te mau pipi pure Atua ra e rave rahi ia Pauro räua o Paranapa; o tei parau atu ia ia rätou, e aò atu ra, ia mau mäite ä i te aroha mau o te Atua.

44 E tae aè ra i te täpati, ua haaputuputu mai ra to taua ôire atoà ra e faaroo i te parau a te Atua, aore reà i toe.

45 Ia hiò mai rä te âti-Iüta i taua feiä rahi ra, î aè ra rätou i te feìi, e ua märô mai ra i taua mau parau i parauhia e Pauro ra, mä te faaòre e te faaìno hoì.

46 Itoito atu ra Pauro räua o Paranapa, e nä ô atu ra: «E mata ia òutou i te parau atu i te parau a te Atua e tià ai. O òutou rä i tute ê atu i ta na parau nei, e te parau na òutou eita òutou e au i te ora mure òre, inaha, te färiu nei mätou i te Ètene.

47 O ta te Fatu hoì ia i poroì mai ia mätou nei ra: «Ua haapaòhia òe e au ei tiàrama no te Ètene, ia riro òe ei ora e tae noa atu i te hopeà o te fenua ra.»

48 E ia faaroo mai ra te Ètene i taua parau ra, òaòa atu ra rätou, e haamaitaì atu ra hoì i te parau a te Fatu. E te feiä i haapaòhia no te ora mure òre ra, ua faaroo anaè ia.

49 Parare atu ra te parau a te Fatu e àti noa aè taua fenua ra.

50 Ua tiàrepu iho ra te âti-Iüta i te mau vahine mana pure Atua ra, e te feiä haavä i taua ôire ra, faatupu atu ra hoì i te hämani ìno ia Pauro e Paranapa, tiahi ê atu ra rätou ia räua e maìri mai ra to rätou ra fenua. 51 Ueue atu ra rä räua i te repo i to räua âvae ia rätou, e tae atu ra hoì i Ìtonio.

52 Î aè ra te mau pipi i te òaòa e i te Värua maitaì.

Àpotarupo 7.9-17

E feiä rahi roa

9 E i muri aè i te reira, hiò atu ra vau, e inaha e feiä rahi roa, e òre roa e pau ia taiò, no te mau fenua atoà, e te mau ôpü atoà, e te mau nünaa atoà, e te mau reo atoà, i te tià-noa-raa i mua i te teröno, e i mua i te Ârënio, mä te àhu teatea i te àhuraa e mä te âmaa tämara i to rätou rima;

10 e mä te pii hua hoì to rätou reo, i te nä-ô-raa e: «Tei to tätou Atua te ora, tei pärahi i nià iho i te teröno ra, e tei te Ârënio »

11Te tià anaè mai ra te mau merahi e àti noa aè taua teröno ra, e taua mau peretiputero ra, e nä mea ora e maha ra, e ua tïpapa anaè iho ra i raro to rätou mata i mua i te teröno ra, haamori atu ra i te Atua,

12 nä ô atu ra: «Âmene. O te ârue, e te hanahana, e te paari, e te haamaitaì, e te tura, e te mana, e te püai, ei to tätou Atua ia e a muri noa atu. Âmene.»

13 Ua parau mai ra te hoê o te mau peretiputero ra ia ù, nä ô mai ra: - O vai eie nei feiä e àhu i te àhu teatea nei? E mai hea mai ä rätou?

14 Ua parau atu ra vau ia na: -Ua ìte òe, e ta ù raatira. Ua parau mai ra o ia ia ù: -O te feiä i haere mai mai roto mai i te àti rahi ra, e ua horoi i to rätou àhu, e ua teatea, i te toto o te Ârënio ra.

15 I pärahi ai rätou i mua i te teröno o te Atua ra, e i haamori ai rätou ia na i te ruì e te ao i roto i to na ra hiero. E na tei pärahi i nià iho i te teröno ra e pärahi i roto ia rätou nei.

16 E òre rätou e poìa faahou, e òre hoì e poìhä faahou; e òre hoì rätou e tiàrià e te mahana e te veàveà.

17 Na te Ârënio hoì tei pärahi i röpü i te teröno ra e faaàmu ia rätou, e e arataì hoì ia rätou i te mau pape ora pihaa ra. E na te Atua e horoi hua i to rätou roimata.

Ioane 10.27-30

27 E faaroo mai ta ù ra mämoe i to ù reo, o ta ù i parau atu ia òutou ra, ua ìte au ia rätou, e e pee mai hoì rätou ia ù.

28 E e horoà atu ä hoì au i te ora-mure-òre no rätou; e òre roa rätou e pohe, e e òre roa hoì rätou i roto i ta ù rima nei, e riro i te haru ia vëtahi ê.

29 O ta ù Metua i horoà mai ia rätou no ù ra, o të hau atu ä ia; e òre roa e tià ia vëtahi ê ia haru atu ia rätou i roto i te rima o ta ù Metua ra.

30 O vau e te Metua ra, hoê ä ia.

Manaò.

Mau taiòraa no teie mahana te haapäpü noa mai ra te reira ia tätou i te mau òhipa i faatupuhia e te Atua Nui Tumu Tahi i roto i te mau taata tei tiàturi i te ôpuaraa faaora, no te ora mure òre. Tei faaìtehia i roto i te mau fenua atoà, e te mau nünaa tei tae roà i roto i te  mau ètene. Te huru teie no te puai te òhipa i tupu i te itoito o te mau toa no te Parau Maitaì a te Metia, teie mau parau tei faaâpï noa i te huru o te mau taiòraa e te fëruriraa o te mau taata faaroo i roto i te tau tei òre i tähuti. I te mea te Atua Nui Tumu Tahi teie e mau nei  to na mau tävini i roto i to na rima, teie huru no te Atua no te haapäpü i to na tiàraa Metua i roto i to na nünaa, oia hoì ta Na mau tamarii.

Te riro nei teie mau tamarii ei ìte e ei faaìte e, aita atu e mea e tupu ai te ora maoti rä, ia Atua te Atua, oia hoì ia hoê te raì e te fenua. E färereiraa teie e tupu nei i roto i te mau ui atoà, te faaâpï nei te taata i roto i to na oraraa i te rahu a te Atua. Mai te peu nä roto i teie huru färereiraa, no te tomo i roto i te rahu a te Atua, te âmui atoà nei tätou i te hui tupuna, o rätou i tiàturi e i ora atoà mai i taua parau ra. Te faufaa rahi o teie täatiraa, te hoêraa ia te taata i te Atua Nui Tumu Tahi e i te mau tupuna. Te ìte ra ia tätou e, aita te fäìraa a te Mäòhi i ätea roa atu i teie reo o Fatu, te parau i riro mai ei taata : O vau e te Metua ra, hoê ä ia. Ua ìte atoà rä tätou e, no te mea i parau te Atua, i fenua ai te fenua. No reira, te fenua, o te parau ia i riro mai ei fenua. O te Atua iho te reira, te Atua hoì e te fenua ra, hoê ä ia. Ua taiä hoì tätou i te faahitiraahia teie huru manaò, na te Fatu ä ia e horoà mai ra i te haapäpüraa a parau ai o ia no te färaoa , o ta ù tino tenä ; e no te uaina hoì e, o ta ù toto tenä. E ia püòihia teie nä parau, teie ia te auraa : o vau tenä. No te mea rä, eita te parau o te färaoa e te

uaina e tano ia faataa-ê-hia i to te fenua, aita atoà ia te parau a Ietu i faaea noa i nià i teie nä mäa, ua haere roa atoà rä i nià i te tumu o te mäa, oia te fenua. Te auraa, o vau e te fenua, hoê ä ia ; eiaha rä i nià i te manaò e, e mäa vine atoà Ietu, e e tïtona hoì, aore ra e ùru, e te vai haari, te parau rä o te aroha e te here o te Atua ta te vine, te tïtona, te ùru, e te haari e faaìte ra, e te parau o te aroha e te here o te Atua ta te Tamaiti e faaìte ra, hoê ä ia, oia hoì e parau no te horoà i te ora no te taata. Riro noa ai te tahi ei tamarii tei fänauhia aita ta te Mäòhi parau i faaea noa i reira, no te mea te ìte atoà ra o ia ia na ei tamarii na te fenua. No reira èita e tähuti te ôpuaraa faaora a te Atua Nui Tumu Tahi, a faaroo mai na te huru haapotoraa o ta tätou taiòraa no teie mahana :

-Taramo 100, 3 Ia ìte hoì òutou: o te Fatu anaè ra te Atua, na na tätou i hämani, e no na hoì tätou, e taata no na, e te mämoe no ta na ra âua.

-Òhipa 13, 37 Âreà o ia, o ta te Atua i faatià i nià ra, aore ia i tähuti.

-Àpotarupo 7, 17 Na te Ârënio hoì tei pärahi i röpü i te teröno ra e faaàmu ia rätou, e e arataì hoì ia rätou i te mau pape ora pihaa ra. E na te Atua e horoi hua i to rätou roimata.

-Ioane 10, 30 O vau e te Metua ra, hoê ä ia.

I to tätou faarooraa teie mau ìrava, te haapäpü noa mai ra te tiàraa Metua o te Atua Nui Tumu Tahi, i teie parauraa a Ietu, 30 O vau e te Metua ra, hoê ä ia,

Te mau parau teie i horoà ia tätou i te teòteòraa e te hanahana o te taata i te tau a vai täamu noa ai to na here i nià i to na fenua. Te mea ia e parauhia nei e : e tamarii no te fenua. Aita teie parau i riro e hoê iti aè ei haafaufaa-òreraa i te tiàraa Metua o te Atua, ua haapäpü noa mai rä i ta te Mäòhi hiòraa i to na parau të òre roa e tano ia faataa- ê-hia i to te fenua, aita hoì to na e tupuraa, aita e ora, tei òre i nä roto mai i te fenua, tei riro atoà ei püfenua no na. I mua hoì i te tiàturiraa o te Mäòhi, te fenua, to na ia metua vahine, te ìte ra ia tätou e, aita to na e ora i räpae aè i te Atua, ei räpae aè i te fenua. Aita teie nä hiòraa e faahapa ra te tahi i te tahi, te riro noa ra rä te tahi ei faaravaìraa i te tahi. Te auraa ra, te tüàti noa ra ia teie nä faaìteraa. I mua i te reo o te Atua e haapäpü ra e : Te mau raì ta ù teröno, e te fenua nei ta ù taahiraa âvae (Ìtaia 66, 1), te märamarama ra ia tätou e, aita te Hau o te Atua i täôtià-noa-hia i nià i te raì, ua riro atoà rä te fenua ei Hau no Na. No reira, tei here i te Atua ra, eita e tià ia na ia haaviivii i te fenua, eiaha no te mea e peu no te tau te pärururaa i te nätura, no te mea rä te fenua nei, o te Atua iho ia, te vähi ta na i hinaaro i te haamau i to na Hau, i roto i to na nünaa, te tamarii ta te fenua i fänau. Te òhie roa nei tätou i teie mahana i te parau ia tätou iho e, e tamarii na te Atua, mai te òre rä e färii ia riro nä mua roa ei tamarii na te fenua. Ia òre tätou ia riro faahou ei tamarii na te fenua, nä hea ia tätou e märamarama ai i te auraa o te parau o te tamarii a te Atua. Ietu iho, te Tamaiti a te Atua, aita atu tiàraa ta na i hinaaro i te taata ia ìte mai maoti rä, ei Tamaiti na te taata ; eiaha rä ia au i te manaò e, e tamaiti o ia na te taata ra o Iotëfa, e te vahine ra o Märia, ei tamaiti rä na te Atamu, oia te fenua. To na tiàraa Tamaiti na te Atua, e parau päpü te reira e te ìte-maitaì-hia, âreà teie tiàraa Tamaiti na te taata, te vähi ia tei òre ä te taata i märamarama maitaì atu ra i to na hohonuraa mau. Te auraa, i roto i te manaò o Ietu, te tamarii a te fenua, e tamarii ia na te Atua, oia hoì e tamarii no roto mai i te fenua e te pape. E parau òhie no tätou i te märamarama e, te taata e parau ia na e, e tamarii na te tahi, ua färii atoà ia taata i te tiàraa metua o te taata tei riro o ia ei tamarii. No reira, i parau ai Ietu ia na e, e Tamaiti na te taata, oia hoì e tamarii na te fenua, no te mea ia te ìte atoà ra o ia i te tiàraa metua o te fenua. I te faahopeàraa, te ìte ra tätou i te tahi tüàtiraa piri roa e vai ra i roto i ta te Mäòhi hiòraa i to na parau, e te mea ta te parau a te Atua e faaìte noa ra. E tano ai te parau ta tätou i parau noa na e : Tei here i te fenua, ua here ia i te Atua, te auraa, tei here i te fenua mai te tamarii i here i to na metua, o ia të òhie i te ìte e te färii i te tiàraa Metua o te Atua. Ia ìte mai tätou, i roto i te rahu a te Atua, te täpaò mätamua ta te rahu i faaìte mai, o te märamarama ia.

E Parau Maitaì tei faaìtehia e te mau veà tono a te Metia, teie òre i färiihia e te âti-Iuta ta te Atu i faatupu, o ia i faatià faahou ia Ietu i nià, o ia hoì tei päpaìhia i roto i te Taramo piti ra: «Ta ù Tamaiti òe, i naùanei òe i fänauhia ai e au.» I faatià mai o ia ia na mai te pohe mai ra, eiaha o ia e hoì faahou i te âpoo, o ia i nä ô mai e: «E horoà vau ia òutou i te mau maitaì i faaìtehia ia Tävita ra i te mea haavare òre ra.» I parau mai ai hoì o ia i roto i te tahi Taramo ra: «Eita òe e tuu i to Mea Moà ia tähuti noa na.» Rave atu ra o ia i te hinaaro o te Atua i to na ra uì, maìri atu ra to na taòto, e âmuihia atu ra o ia i to na ra hui-metua, e tähuti atu ra.

No reira e òre tähuti i te ôpuaraa faaora a te Atua Nui Tumu Tahi.

 

Teraì òr. Faatura.