Ioane 14.23-29 Mäua

 

Tāpati 22 no Më 2022.

Mäua

Taramo 67

1 Na te Mënätehe, i nià i te Netinota. Taramo e himene.

2 E aroha mai ia mätou, e te Atua e, e haamaitaì mai ia mätou. E faaànaàna mai hoì i to mata i nià ia mätou. Tera.

3 Ia ìteä to parau e àti noa aè teie nei ao, e te ora na òe i te mau êtene atoà ra.

4 Ia haamaitaì te mau taata ia òe, e te Atua e. Ia haamaitaì tahi te taata atoà ia òe.

5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì. Tera.

6 Ia haamaitaì te mau taata ia òe, e te Atua e. Ia haamaitaì tahi te taata atoà ia òe.

7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei.

8 E tämau ä te Atua i te haamaitaì mai ia tätou, e e tae roa te mataù ia na i te mau hopeà atoà o te fenua ra.

Òhipa 15.1-29

Te âpooraa i Ierutarëma

1 Ua haere mai ra e toofanu mau taata mai Iutea mai, ua haapii mai ra i te mau taeaè, nä ô mai ra: «Ia òre òutou ia peritomehia mai te peu a Möte ra, e òre òutou e ora.»

2 E märô mäite atu ra Pauro räua o Paranapa ia rätou, ua haapaò atu ra rätou ia Pauro räua o Paranapa, e i e toofanu mau taata no rätou iho, e haere i Ierutarëma i te mau âpotetoro ra e te mau peretiputero ra i taua parau ra.

3 E ärataìhia atu ra rätou e te Ètärëtia i taua haereà ra, haere atu ra rätou nä Foinitia e Tämäria, i te faaìte-mäite-raa atu i to te Ètene färiuraa, rahi roa atu ra to te mau taeaè òaòa ia rätou.

4 E tae atu ra rätou i Ierutarëma, ìtehia mai ra rätou e te Ètärëtia, e te mau âpotetoro, e te mau peretiputero, ua faaìte atu ra ia rätou i ta te Atua i rave ia räua ra.

5 Ua tià mai ra e toofanu no te pupu Färitea tei faaroo ra, nä ô mai ra: «E peritome ia rätou e tià ai, e e aò atu e haapaò i te ture a Möte ra.

6 E ua haaputuputu iho ra te mau âpotetoro e te mau peretiputero ra e feruri i taua parau ra.

7 E rahi roa aè ra te märörö, ua tià aè ra Pëtero, ua parau mai ra ia rätou: «E te mau taeaè nei, ua ìte òutou e ua haapaò te Atua i roto ia tätou nei ia ù i mütaa iho, ia ìte te Ètene i te Èvaneria i to ù nei vaha ia faaroo.

8 E o te Atua hoì tei ìte i te âau ra tei faatià mai ia ia rätou, i te horoàraa mai i te Värua Maitaì ia rätou, mai ta na i horoà mai ia tätou nei.

9 Aore hoì i faahuru ê atu ia rätou e ia tätou nei, i te haamaitaìraa i to rätou âau i te faaroo.

10 E teie nei, e aha òutou i haapeàpeà atu ai i te Atua, i te tuuraa i te tuto i nià i te àî o te mau pipi, aore i maraa i to tätou hui tupuna ra e ia tätou atoà nei hoì?

11 Ua ìte rä tätou e, e ora tätou i te aroha o to tätou Fatu o Ietu Metia, mai ia rätou atoà ra.

12 Ua mämü iho ra taua feiä rahi atoà ra, ua faaroo mai ra ia Paranapa räua o Pauro, i te faaìteraa atu i te mau täpaò e te mau temeio ta te Atua i rave ia räua io te Ètene ra.

13 E ia faaoti aè ra ta räua parauraa, ua parau atu ra Iatöpo, nä ô atu ra: «E te mau taeaè, a faaroo mai na ia ù:

14 te parau mai nei Timona e, ua hiò aroha mai te Atua i te Ètene i mütaa iho ra, e rave i te hoê pae taata i roto ia rätou ra no to na ra iòa.

15 Te au nei hoì te parau a te mau perofeta ra i te reira, oia hoì tei päpaìhia ra e:

16«Muri aè ra e hoì atu vau, e patu faahou i te tëtene o Tävita i maìri i raro ra; e te huàhuà o taua tëtene ra e patu-faahou-hia ia e au, e tià atu i nià.

17 Ia ìmi te toeà o te taata i te Fatu, e te mau Ètene atoà i maìrihia i to ù ra iòa, te nä reira mai ra te Fatu, o tei faatupu i teie atoà nei mau parau.

18 Ua ìte te Atua i ta na atoà ra mau òhipa mai te mätamua mai ä.»

19 E teie nei, teie ta ù parau, eiaha tätou e haapeàpeà atu i te feiä i färiu i te Atua no roto i te Ètene ra.

20 E päpaì atu rä tätou i te parau ia rätou ra, eiaha rätou e rave i te mea viivii hopoihia na te mau îtoro, eiaha e faaturi, eiaha e àmu i te mea ûumi-noa-hia, e te toto.

21 Te vai nei hoì te feiä i parau ia Möte i te mau ôire atoà mai tahito mai ä, te taiòhia mai nei hoì o ia i roto i te mau tunato i te mau mahana täpati atoà nei.

Te èpitetore i to Ànetiohia, Turia e Tiritia

22 Ua manaò iho ra te mau âpotetoro, e te mau peretiputero, e te Ètärëtia atoà, e tono i e toopiti puè taata mäìtihia i roto ia rätou iho ra i Ànetiohia, ia Iüta, o Paratapa te hoê iòa ra, e ia Tira, e puè taata hau ia i roto i te mau taeaè ra, o Pauro hoì e Paranapa.

23 E ua päpaì atu ra hoì i te reta na to rätou rima i hopoi, nä ô atu ra: «Te mau âpotetoro e te mau peretiputero e te mau taeaè atoà nei, te häpono atu nei mätou i to mätou aroha ia òutou, i te mau taeaè i roto i te Ètene i Ànetiohia, e i Turia, e i Tiritia ra.

24 Ìte aè nei mätou e, ua tiàrepuhia to òutou âau i te parau a vëtoofanu puè taata no ô nei atu io mätou nei, i te nä-ô-raa atu e, e peritome ia òutou, e e haapaò i te ture e tià ai; aore hoì mätou i faaue noa atu ia rätou.

25 Haaputuputu aè nei hoì mätou atoà, manaò aè nei e mea maitaì ia faatono atoà atu i e toopiti puè taata mäìtihia ia òutou na, e to mätou puè taeaè here nei ia Paranapa e Pauro.

26 E puè taata faaruru ia i to räua pohe, no te iòa o to tätou Fatu o Ietu Metia ra.

27 E teie nei, tono atu na hoì mätou ia Iüta räua o Tira, e na räua e parau vaha noa atu ia òutou i taua parau ra.

28 E mea maitaì i te Värua Maitaì e ia mätou atoà nei hoì, eiaha roa ei teimaha ê i tuuhia atu i nià iho ia òutou, maori rä o teie nei mau mea tià.

29 Eiaha òutou e àmu i te mäa i âfaìhia i te îtoro ra, e te toto, e te mea ûumi-noa-hia ra, e eiaha hoì e faaturi: i faaruè òutou i te reira, e maitaì ia òutou. Ia ora na»

Àpotarupo 21.10-14 + 22-23

10 Ua arataì atu ra o ia i ta ù värua i nià i te hoê mouà rahi teitei, ua faaìte mai ra ia ù i taua ôire rahi ra ia Ierutarëma moà, i te pouraa mai mai te raì mai, mai ô i te Atua ra,

11 mä te ànaana no ô i te Atua ra. E to na märamarama mai to te ôfaì maitaì roa ra, mai te ôfaì ìtefe ateate mai te terehe ra.

12 E ua àti i te âua rahi e te teitei, e hoê àhuru e piti tiàhapa ùputa, e nä merahi tino àhuru mä piti tei taua mau ùputa ra, e e iòa anaè hoì tei päpaìhia i nià iho, no te mau ôpü o te mau tamarii a Ìteraèra tino àhuru e mä piti ra.

13 Tei te pae i te hitià-o-te-rä ra, e toru ia ùputa; tei te pae i àpatoèrau ra, e toru ia ùputa; tei te pae i àpatoà ra, e toru ia ùputa; e tei te pae i te tooà-o-te-rä ra, e toru ia ùputa.

14 Auàhuru mä piti niu to te âua o taua ôire ra; mä te iòa hoì o te mau âpotetoro a te Ârënio tino àhuru mä piti ra i nià iho.

22-23

22 E aore roa e hiero i ìteä e au i roto ra; o te Fatu rä hoì, o te Atua Mana hope ra e te Ârënio, o to na ia hiero.

23 E aore hoì o te reira ôire e mahana e te märama, ei haamäramarama i roto ra, na te ànaana no ô i te Atua ra i haamäramarama i te reira, o te Ârënio hoì to reira.

Ioane 14.23-29

23 Ua parau atu ra Ietu ia na, nä ô atu ra: «Ia hinaaro mai te taata ia ù ra, e haapaò ia i ta ù parau. E e here mai hoì ta ù Metua ia na, e e haere atu hoì mäua ia na ra e pärahi mau atu io na ra.

24 O të òre e hinaaro mai ia ù ra, aore ia i haapaò i ta ù parau. Eere rä i ta ù teie nei parau ta òutou e faaroo nei, na te Metua rä i tono mai ia ù nei ra.

25 I faaìte au ia òutou i teie nei mau parau, i te pärahiraa vau io òutou nei.

26 Na te Faaaò rä, na te Värua maitaì ra, o ta te Metua e tono mai mä to ù nei iòa ra, na na e haapii mai ia òutou i te mau mea atoà; e e faaìte faahou mai hoì ia òutou i te mau parau atoà ta ù i parau atu ia òutou na.

27 E hau ta ù e vaiiho ia òutou nei, o to ù nei hau ta ù e hö atu no òutou. Eere mai ta to te ao nei horoà ta ù horoà ia òutou. Eiaha e taiä to òutou âau, eiaha hoì e mataù.

28 Ua ìte òutou i ta ù i parau atu ra e: «Te haere ê nei au, e e hoì faahou mai au ia òutou nei». Ahiri òutou i hinaaro mai ia ù, e òaòa ia òutou o vau e haere tià i te Metua ra; e rahi hoì ta ù Metua ia ù.

29 Ua faaìte ätea atu na vau ia òutou i teie nei i taua parau ra, ia faaroo òutou ia tupu ra.

Manaò.

Teie parauraa a Ietu Mäua e parauhia nei, na te Atua iho i faatupu, ia au rii ihoä i te mea ta te Tamaiti e parau ra e : Eere òutou tei hinaaro mai ia ù, o vau rä tei hinaaro atu ia òutou (Ioane 15, 16). Te èà te reira ta te Atua o te aroha i faatoro ei faatüàti i te raì e te fenua. Aita rä o ia i faaea noa i reira, ua tanu atoà o ia i te täpaò o to na aroha e to na here i nià i te fenua, te mea ia ta Ietu e fäì ra ia nä ô mai o ia e : o ta ù tino tenä ; o ta ù toto tenä. Ua ani atoà te Atua i te taata ia hiò i tei au ei mäa, ia rave e ia àmu, eiaha rä mai te tahi noa mea e faaî i te ôpü, te tahi mea e horoà i te tino taata i te itoito ta na e hinaaro ra, no te faaâpï rä i te aroha e te here o te Atua i roto ia na, ei räveà e òre ai e moè ia na te èà i faatorohia mai e te Atua i te fenua nei. Aita teie manaò e hinaaro nei e ìriti i te faufaa o te mäa ei faaora e ei faaitoito i te tino taata, te hopeàraa rä o te parau o te mäa, eere te ôpü, te Atua rä. Ia òre te mäa ia riro ei tumu faaâpï noa no ta tätou haamaitaìraa i te Atua, e moè te èà tei riro te mäa ei faaìte. Ia au i te huru o te èà, e tano e haere i te tahi pae e te tahi, oia hoì te vai ra to na haamataraa, e te vähi e hope atu ai. Mai te peu te raì, oia hoì te Atua, te haamataraa ia o te èà, te fenua ia te hopeàraa. Eita rä e tano e haere i te haamataraa o te èà, oia te raì, ia òre ia färii i te nä te hopeàraa, oia te fenua, i te haamata. Te märamarama atoà ra ia tätou e, te täpaò o te aroha e te here o te Atua ta te fenua e mau ra, te ùputa ia e faahoì i te taata i te Atua ra. Ua färerei te aroha i te parau mau, to na hoì raveraa i te repo fenua no te hämani i te taata ia au i to na huru e to na hohoà, e tano e parau e, te fenua, te vähi fätata roa aè ia te raì i te fenua, oia hoì, te Atua i te taata, te vähi fätata roa aè hoì no te taata no te hoìraa i te Atua ra. E aha ia te mea i onoöno noa ai tätou i te ìmi i te tahi èà ê atu i tei faaìtehia mai, te tahi èà e riro ai tätou i te ihu noa e te òre e tae i te Atua ra. I te haereraa mai Ietu, ta tätou e parau nei e, te Evaneria ora a te Atua, te parau maitaì no te aroha e te here o te Atua i te taata, aita ta na parau i huru ê i ta te Atua Metua tei ani i te taata e àmu i te täpaò no to na aroha e to na here. I teie reo haamähanahana no Ietu : 28 Ua ìte òutou i ta ù i parau atu ra e: «Te haere ê nei au, e e hoì faahou mai au ia òutou nei». Ahiri òutou i hinaaro mai ia ù, e òaòa ia òutou o vau e haere tià i te Metua ra; e rahi hoì ta ù Metua ia ù. Te vähi hau, te mea ia o ia i haapäpü i te hoêraa e vai ra i roto ia na e te hotu o te fenua : A rave a àmu, o ta ù tino tenä ; a rave a inu, o ta ù toto tenä. I tähiri ârahu noa mai na tätou, no te mea i parau te Atua, i ìtehia ai e, te vai ra te Atua. Te auraa, ua riro ia te Parau ei ìte e ei faaìte i te Atua. Te fenua e to na î, e o Ietu hoì, e piti ia parauraa i te aroha e te here o te Atua i te taata. Nä roto i te fenua e to na î, te Atua terä e parau ra i to na aroha e to na here i te taata ; nä roto i te Tamaiti, te Atua atoà terä e parau ra i to na aroha e to na here i te taata. No te mea te Atua terä e parau ra nä roto i te fenua e to na î, nä roto hoì i te Tamaiti, ua riro ia te fenua, mai te Tamaiti atoà, ei Parau maitaì no te aroha e te here o te Atua i te taata, oia hoì ei Èvaneria ora. Ia parau mai hoì Ietu e: e ia parau mai hoì o ia i te hotu o te fenua: o ta ù tino tenä; o ta ù toto tenä, aita atu ia mea ta na e hinaaro ra i te taata ia ìte mäori rä, aita e taata e tae i te Metua ra ia òre ia färii i te täpaò o te aroha e te here o te Atua ta te fenua e faaìte ra. Aita tätou e anihia nei e mäìti i te tahi, mai te haapae i te tahi. Ia parau mai te Tamaiti i te hotu o te fenua e : o ta ù tino tenä ; o ta ù toto tenä, te vai ra änei te tahi mea e faatano ra ia tätou i te òreraa e färii i te parau mau a te Fatu, te parau mau hoì a te fenua. No reira, eere no te mea aita te tahi e häroàroà ra, oia hoì aita e taa ra, e tano ai o ia e parau e, aita i parauhia ; eere hoì no te mea aita te tahi e ìte ra, aore ra aita e hinaaro ra i te ìte, e tano ai o ia e parau e, aita e vai ra.

Ia tià tätou i mua i te hiò hipa, aore ra te vai, tei räpae atu nei ihoä tätou, no tätou atoà rä te hohoà ta te vai, aore ra te hiò hipa e faahoì mai ra. Te auraa, tià noa ai tätou i räpae atu nei, tei roto atoà mai tätou. I mua i te hotu o te fenua ta te Atua Metua e te Tamaiti e ani nei i te taata e rave e àmu, te aroha e te here o te Atua ta na e àmu ra ; e ia färii o ia i te täpaò no te  aroha e te here, ua ìte te fenua ia na, e ua ìte te Atua ia na, pärahi noa ai o ia i räpae atu nei, tei roto ê na rä o ia, ia au i te hohoà o te hiò hipa. Ia faaroo tätou te haapotoraa o te mau taiòraa :

-Taramo 67, 7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei.

-Òhipa 15, 11 Ua ìte rä tätou e, e ora tätou i te aroha o to tätou Fatu o Ietu Metia, mai ia rätou atoà ra.

-Àpotarupo 21, 13 Tei te pae i te hitià-o-te-rä ra, e toru ia ùputa; tei te pae i àpatoèrau ra, e toru ia ùputa; tei te pae i àpatoà ra, e toru ia ùputa; e tei te pae i te tooà-o-te-rä ra, e toru ia ùputa.

-Ioane 14, 23 Ua parau atu ra Ietu ia na, nä ô atu ra: «Ia hinaaro mai te taata ia ù ra, e haapaò ia i ta ù parau. E e here mai hoì ta ù Metua ia na, e e haere atu hoì mäua ia na ra e pärahi mau atu io na ra.

Ia parau o Ietu e, e haere atu hoì mäua ia na ra e pärahi mau atu io na ra, e reo faatupu ora teie èi färereiraa i te taata e taura pito teie no te täamu i te nünaa i te Atua, nä reira te fenua i te Atua. Mai te tamarii i huti mai i to na ora mai roto mai i to na metua, mai te ora i nä roto mai i te pito e roto roa i te tamarii, mai te reira atoà te Atua i te faaàmuraa i te nünaa. Ua riro te tävini ei àuvaha, ei reo no te nünaa i mua i te Atua. Ua horoà te Atua ia na i te mana e te hanahana no te faatupuraa i to na hinaaro i roto i te nünaa, ua ravehia rä teie mana e teie hanahana, faaòhipahia no te faatupu i te hinaaro o te tävini, ua ravehia hoì ei moihaa horoà i te pohe o te nünaa, inaha to na te toto i manii i nià i te märae. No te faariroraahia te pito oia hoì te marae ei vähi horoà pohe, no te riroraa te àuvaha i te hinaaro ora o te Atua ei àuvaha no te Arii, e ei moihaa faatupu i te riàrià, nä roto i te haavï, no te mea ua ruri-ê-hia te tiàturiraa o te nünaa mai nià i te Atua ora, i nià i te mau atua ta te taata i hämani ei faatupu i to na mau hinaaro, riro atu ra te reira ei faaìno i te roo hanahana o te Atua ora, e ua riro te reira èi tärahu  na te nünaa mäòhi i mua i te Atua. Ua faarirohia te hanahana o te Atua ei faatupu i te hanahana o te taata, no te faariroraahia te Atua ei mea taiähia, no te haafaufaa-òre-raahia to na tiàraa Metua, ua riro te reira ei tärahu na te mau tävini o te Atua, tärahu atoà rä na te nünaa i färii e i tomo i roto i te reira òhipa tià òre i haamauhia e te tahuà no te faatupu i te maitaì e te püai o te arii.

I muri mai i te mau mitionare, ua haafaufaa òre te Mäòhi i te mau horoà a te Atua : te fenua, te reo, te hiroà tumu, te mäa, te räau faaora maì, e tei hau roa atu, ua hunahia te faufaa ta te Atua i horoà mai ia na, oia te aroha e te here. Ua tärahu no te mea, te vähi haamoriraa i te Atua, ua faarirohia ei vähi faahanahanaraa i te taata e to na mau hinaaro tià òre atoà. Ua faarirohia te Atua Metua ei Atua haavï, te nounou mana, te nounou moni, e te vahavaha hoì i te hiroà mäòhi. Aita te mau tävini o te Atua i ìmi faahou i te maitaì e te ora o te nünaa, ua faariro rä i te nünaa ei moihaa faatupu i to rätou maitaì e te oraraa fänaò të òre roa e roaa ia na àhiri aita i tävini i te Atua. E tärahu na te òrometua e te tiàtono tei riro ei arataì no te nünaa faaroo, e tärahu atoà na te nünaa tei färii i taua òhipa tià òre ra.

I patuhia te marae no te faahanahanaraa i te Atua, haaviiviihia atu ra e te hinaaro taata ; i patuhia te fare pure ei vähi haamoàraa e te faahanahanaraa i te Atua, riro mai nei rä ei räveà faahanahanaraa i te taata, e ei vähi mauiuiraa no te nünaa.

Haamanaò na tätou, i teie reo no Ietu : 23 Ua parau atu ra Ietu ia na, nä ô atu ra: «Ia hinaaro mai te taata ia ù ra, e haapaò ia i ta ù parau. E e here mai hoì ta ù Metua ia na, e e haere atu hoì mäua ia na ra e pärahi mau atu io na ra. Tätou e hinaaro nei i te tomo nä roto i te ùputa e tae ai i te Atua ra, teie atoà te tïtauraa ia tätou, ei taata tätaì tahi, e ei Etärëtia, ia tätarahapa, oia hoì ia haapee i ta tätou tärahu. Ta tätou tärahu, eere ia no te mea ua rave tätou i ta te Atua, no te mea rä aita i haapaò i to na hinaaro, ua nä nià noa tätou i to tätou manaò taata. I roto i to tätou oraraa faaroo, te raveraa ia e te faatupuraa i te faatïtïàifaroraa i roto i ta tätou iho Etärëtia, mai te türamahia e te märamarama o te Parau a te Atua. E parau au-òre-roa-hia rä te reira e tätou. Eiaha rä tätou e hiò i teie mau parau mai te tahi täpura no te mau òhipa e anihia ra tätou e faaâfaro, o te manaò tätou e, ia hope atu te reira täpura i te ravehia, ua mä atoà ia tätou, e ua hope hoì ta te Atua parau ia tätou. Te nä ô ra te haapotoraa ta Ietu e horoà ra no te ture : E here òe i te Atua i te Tumu Nui, mä to âau atoà, mä to värua atoà, e mä to manaò atoà. Te reira te ture mätamua tei hau i te rahi. E mai te reira atoà te piti : E here òe i to täuaro mai to here ia òe iho na. Te ture e te mau perofeta, tei teie nei puè ture e piti nei (Mätaio 22, 37-39). I mua i teie faateniteniraa na Ietu i te parau o te here, e hiò mai tätou nä mua i te hereraa i te Tumu Nui. Te vähi mau atoà rä te reira e ìte ai tätou i to tätou paruparu, no te mea aita tätou i ìte nä hea i te here i te Atua ta tätou e òre e ìte ra. Eita tätou e märamarama i te âano, te hohonu, e te püai o teie parau, ia òre ia hiò i te vähi òhie aè no tätou i te märamarama. Ta Ietu e haapäpü ra e, E e here mai hoì ta ù Metua ia na, e e haere atu hoì mäua ia na ra e pärahi mau atu io na ra.

 

Teraì òr. Faatura.