Ruta èv. 24.46-53 Hopoi

 

Mahana maha 26 no Më 2022.

REVARAA

Hopoi

Taramo 47

1 Na te Mënätehe. Taramo na te tamarii a Tora.

2 E patupatu na i to òutou rima, e te mau taata e, e pii hua i te Atua i te reo ûmere ra,

3 o Tei Teitei ra, o te Fatu, të mataùhia ia, o te arii rahi ia i nià i te fenua atoà nei.

4 Na na i tuu i te mau taata i raro aè ia mätou, e te mau fenua täatoà i raro aè i to mätou âvae.

5 Na na i haapaò i ta mätou tufaa, te terero maitaì a Iatöpa ta na i hinaaro ra. Tera.

6 Te aè nei te Atua mä te ûmere, o te Fatu, mä te haruru o te pü ra.

7 E himene ei ârue i te Atua, e himene ei ârue; e himene ei ârue i to tätou arii, e himene ei ârue.

8 O te Atua hoì te arii i te mau fenua atoà nei, o te Atua ta òutou e himene mä te ìte ra.

9 Tei te Atua te hau i te mau fenua atoà nei, te pärahi ra te Atua i nià i to na ra teröno moà.

10 Tei reira te mau tävana o te mau taata i te âmuiraa, te mau taata no te Atua o Âperahäma, no te Atua hoì, o tei faateitei-roa-hia ra, te päruru o te fenua nei.

Òhipa 1.1-11

Te Värua Maitaì i fafauhia i te mau âpotetoro

1 I päpaì na vau i tei mütaa iho ra papaa parau, e Teofiro, no te mau mea atoà a Ietu i rave e ta na i haapii ra, 2 e tae roa aè nei i te mahana i ravehia atu ai o ia i nià ra, ia oti te mau âpotetoro i mäìtihia e ana ra, i te poroìhia e ana i te Värua Maitaì.

3 O ta na atoà ia i faaìte ia na iho i te oraraa, i muri aè i ta na poheraa, mä te täpaò hapa-òre e rave rahi ra; e maha hoì àhururaa o na ruì i te hiòhiò-raa-hia e rätou, e te parauraa o ia ia rätou i te parau o te Pätireia o te Atua.

4 E haaputuputu aè ra o ia ia rätou ra, ua aò atu ra ia rätou: «Eiaha e faaruè ia Ierutarëma, e tiaì rä i ta te Metua i parau mai ra, o ta òutou i ìte na ia ù ra.

5 Ua päpetito ä hoì Ioane i te pape, e päpetitohia rä òutou i te Värua Maitaì i eie nei puè mahana.

Te revaraa o Ietu

6 E putuputu aè ra rätou, ua ui mai ra rätou ia na, nä ô mai ra: «E te Fatu, ei teie nei änei òe e faahoì mai ai i te hau ia Ìteraèra?

7 Ua parau atu ra rä o ia ia rätou: «Aore ia i haapaòhia e ia ìte òutou i te taime e te ànotau, i vaiihohia e te Metua ia na iho ra.

8 E noaa rä to òutou mana i te Värua Maitaì ia haere mai i nià iho ia òutou: e ei ìte hoì òutou no ù i Ierutarëma nei e Iutea atoà hoì e àti noa aè, e Tämäria, e tae noa atu i te hopeà o te fenua ra.

9 E te parau noa ra o ia i taua mau parau nei, e te hiò noa mai ra rätou ia na, ravehia atu ra o ia i nià, e vëhia mai ra o ia e te ata, moè atu ra o ia i to rätou mata.

10 E tei to rätou tiàtonu-mäite-raa i nià i te raì i te peeraa atu o ia i nià ra, inaha, te tià noa mai ra e toopiti puè taata i pïhaì iho ia rätou mä te àhu teatea;

11 o tei parau mai ia ia rätou e: E te mau taata o Tarirea nei, e aha òutou i tià noa ai e i tiàtonu märô ai i nià i te raì ra? O Ietu nei ä, tei ravehia aè nei i nià i te raì, e hoì mai ia mai te reira atoà ra, mai ta òutou i ìte atu ia na i te revaraa atu i nià i te raì ra.

Hēpera 9.24-28 + 10.19-23

24 Aita aè nei hoì te Metia i tomo i roto i nä vähi moà i hämanihia e te rima ra, i te hohoà no te vähi moà mau ra, tei te raì mau rä o ia ia faaìte o ia ia na iho i mua i te aro o te Atua no tätou, i teie nei ä.

25 Eere rä ia püpü pinepine o ia ia na iho ei tütia, mai te tahuà rahi i tomo i roto i te vähi moà i te mau mätahiti atoà, mä te toto ê ra.

26 Ahiri hoì i nä reira na, mai te mätamua mai ä o teie nei ao, ua rahi roa ia to na poheraa. Hoê roa rä o na faaìte-raa-hia mai i teie nei, i te hopeà o te mau tau nei, ia faaòre o ia i te hara i te faatütiaraa ia na iho.

27 E mai te taata nei hoì ua haapaòhia ia hoê aè poheraa, e muri aè o te haaväraa ia,

28 oia atoà te Metia, a hoê aè nei o na püpü-raa-hia ei tütia ia hopoi ê o ia i te hara ä te taata e rave rahi; e e fä mai ä o ia o te piti ia o te färaa mai, eiaha ei täraèhara, ia ora rä te feiä e tiaì ia na ra.

10, 19-23.

E haafätata anaè i te Atua ra

19 E teie nei, e te mau taeaè, ua noaa te tomoraa mataù òre i roto i te vähi moà roa, no te toto o Ietu ra;

20 taua èà âpï nei ia e te ora, i haamoàhia e ana no tätou, nä roto i te päruru ra, o to na ra tino.

21 E e tahuà rahi hoì to tätou i roto i te fare o te Atua ra,

22 e haafätata tätou mä te âau haavare òre, mä te faaroo päpü mau, e mä te âau i pïpïhia ia òre te manaò ìno, e mä te tino i höroihia i te pape mä.

23 E ia päpü mäite to tätou mauraa i ta tätou parau, mä te âueue òre (e parau mau hoì ta na ta tei parau mai ra).

Ruta èv. 24.46-53

46 Ua nä ô mai ra o ia ia rätou: «I nä-reira-hia taua parau ra i te päpaì, e ia nä-reira-hia to te Metia pohe e tià ai, e ia tiàfaahou mai te pohe mai i te ruì toru;

47 e ia poro-haere-hia te tätarahapa e te faaòreraa i te hara i to na ra iòa, na Ierutarëma atu nei ä, e àti noa aè te mau fenua atoà e tià ai.

48 E teie nei, ei ìte òutou i teie nei mau parau.

49 E inaha, na ù e tono mai ia òutou nei ta ta ù Metua i parau mai ra. E pärahi rä òutou i te ôire nei i Ierutarëma, e ia noaa mai to òutou itoito no nià mai.

Te revaraa o Ietu

(Mär 16,19-20; Òhipa 1,9-11)

50 Ua arataì atu ra o ia ia rätou i räpaeàu e Pëtänia; ua hopoi aè ra o ia i ta na rima i nià, faaora mai ra ia rätou.

51 E te faaora mai ra o ia ia rätou ra, i ravehia mai ai o ia, e hopoihia atu ra i nià i te raì.

52 Ua haamori atu ra rätou ia na, e hoì mai ra i Ierutarëma mä te òaòa rahi.

53 E e tià rätou i roto i te hiero ra, i te ârueraa e te haamaitaìraa i te Atua. Âmene.

Manaò.

Te haamaitaì nei tätou i teie mahana i täpaòhia i roto i te tereraa òhipa a te Ètärëtia Teretetiano no te haamanaòraa to Ietu Metia vaiihoraa mai te òhipa i roto i te mau taata tei tiàturi e tei fäì i te ôpuaraa faaora a te Atua Metua èi faatupuraa i te hau o te Atua Metua.

I roto ia tätou i te taata nei, te vai ra te mea e huti ia tätou i nià, to na ia huru atua, te vai ra hoì te mea e huti ia na i raro, te mea ia e, e repo fenua atoà o ia ; na te Atua te tahi, na te Atua te tahi. E haamanaò noa mai ra teie ia tätou i te mea i täamuhia i nià i te parau no to na hämaniraahia. Te hape o te taata, te manaòraa ia e mäìti i roto i te tahi e te tahi, mai te ìte òre e, eita o ia e tano e mäìti i roto i te Atua e te Atua, i te faateiteiraa i te tahi e te haafaufaa-òre-raa i te tahi. A hiò na i te rahu a te Atua : i täporo ai te täporo, i haari ai te haari, e i maiore ai te maiore, e hinaaro no te Atua. Te faahinaaro ra änei te täporo i te huru o te maiore ei huru atoà aè no na, e e aha to tätou manaò i te haari ia rave i te huru e te hohoà o te täporo. I roto i to na haèhaa, ua ìte te räau i te faatura i te hinaaro o te Atua. Ia ìte mai tätou, aita te fifi i roto i te mea i hämanihia mai e te Atua, oia te taata, aita atoà i roto i to na huru, e atua e e fenua, tei roto rä i ta to na märamarama färiiraa i to na parau, e to na matararaa ; mea maitaì aè rä paha tätou e parau e, to na tiàmäraa i mua i te tahi e te tahi. Te parau ia o te ùputa ta na e tatara. Te vähi rä i päpü, eere te ìmiraa manaò teie e anihia nei i te taata ia rave, e tïtauraa teie ia na ia faahau ia na i te fenua e i te Atua. Ia hau to na manaò, e riro o ia i te òhie i roto i ta na täpura òhipa ; ia òre, aita to na täuaro i ätea roa ia na. I mua i ta na täpura òhipa, mea maitaì te taata ia ìte e, e piti ùputa tei anihia o ia e tatara, tei roto hoì te reira i te parau no to na hämaniraahia. Ia òre ia matara ia na te ùputa mätamua, oia te parau o te fenua, eita atoà te piti e matara. Eiaha rä o ia e manaò e, e matara ia na ia tatara i terä nä ùputa i te taime hoê, eiaha atoà o ia e manaò e, mea faufaa aè ia tatara i te ùputa o te raì no te mea tei reira te ora. Ia nä reira o ia i te hiò, te haapäpü noa ra o ia e, aita ä o ia i märamarama i te rama i te faufaa o te parau o to na hämaniraahia e to na hinaaro òre i te ìte i te òhipa ta te Atua i rave no na. Ia parau mai te tahi taata e, te niàraa o te tumu räau te vähi faufaa, no te mea te vähi te reira i roto i te märamarama, te vähi hoì e horoà mai i te mäa e ora ai te taata. Aita ia taata i märamarama e, te ora ta te räau e faaìte ra i nià, no raro te höpoiraahia i te repo fenua te faaineineraahia mai ; a maitaì te fenua, a maitaì atoà te tupu o te räau ; a òre rä te fenua a horoà i te ora, a òre atoà te ùnaùna e te hotu o te vähi e toro tià atu ra i nià i te raì. Tei roto ihoä paha i te märamarama, no te mea rä aita to na e ora, e mea faufaa òre ia, no te mea eita o ia e ìte i taua märamarama ra, eita hoì e fänaò i te maitaì no roto mai ia na. Faaroo mai nä ra i te haapotoraa no tätou mau taiòraa tei hopoi i to tätou âau i nià i te mau hinaaro no te Atua Nui Tumu Tahi :

-Taramo 47, 9 Tei te Atua te hau i te mau fenua atoà nei, te pärahi ra te Atua i nià i to na ra teröno moà.

-Òhipa 1, 8 E noaa rä to òutou mana i te Värua Maitaì ia haere mai i nià iho ia òutou: e ei ìte hoì òutou no ù i Ierutarëma nei e Iutea atoà hoì e àti noa aè, e Tämäria, e tae noa atu i te hopeà o te fenua ra.

-Hepera 10, 20 taua èà âpï nei ia e te ora, i haamoàhia e ana no tätou, nä roto i te päruru ra, o to na ra tino.

-Ruta èv. 24, 51 E te faaora mai ra o ia ia rätou ra, i ravehia mai ai o ia, e hopoihia atu ra i nià i te raì.

Mai te tahi puta tei huri-òiòi-noa-hia te mau àpi, mai te täuà òre i te mea i päpaìhia, no te mea te ìmi ra te taata i te hohoà, oia hoì te tahi mea e auhia e to na mata, e të ànaanataehia hoì e to na manaò, mai te reira atoà te taata i te huriraa i te mau àpi o te parau o to na hämaniraahia. I teie mahana e au atu ra te haamata nei te taata òhipa na te faaotiraa, no te faahope na te haamataraa, oia hoì àiti-ä i tänu atu ra ua para te maa. O te mea ia ta Pauro e haamanaò mai ra, 8 E noaa rä to òutou mana i te Värua Maitaì ia haere mai i nià iho ia òutou: e ei ìte hoì òutou no ù i Ierutarëma nei e Iutea atoà hoì e àti noa aè, e Tämäria, e tae noa atu i te hopeà o te fenua ra.

Nä hea tätou e ìte ai i te Värua o te Atua ta na i tuu i roto i te taata ta na i hämani, ia òre tätou ia ìte i te fenua ei tupuraa no te parau a te Atua, ia òre hoì ia haamanaò e, te rima iho o te Atua tei rave i teie repo fenua, ta na i îpöpö, ta na i horoà i te hohoà tei au ia na, e ta na i haapüaì atu i to na iho aho ora i roto ia na, te fenua e mau ra i te Värua o te Atua. E ui rii na tätou : nähea te taata i hämanihia i te repo fenua e tano ai e rave i te huru e te hohoà o te Atua àhiri aita te Atua i tuu i to na Värua i roto i te fenua. Nä hea te tahi tamarii e rave ai i te huru e te hohoà o to na metua täne, àhiri eere no teie taata i tö ai te vahine i riro mai ei metua vahine no teie tamarii. E i to na hoì hiòraa i teie tamarii, eere änei e, o ia iho ta na e ìte atu ra, eere änei e, mai te reira atu taime, ua riro te reira tamarii ei teòteòraa no na, e ua ineine o ia i te horoà i te mau mea maitaì atoà no roto i to na here ei taoà faatau aroha na na. Te nä ô ra te Fatu : 47 e ia poro-haere-hia te tätarahapa e te faaòreraa i te hara i to na ra iòa, na Ierutarëma atu nei ä, e àti noa aè te mau fenua atoà e tià ai. Mai te peu te faaroo, o òe ia e te Atua, o òe hoì e to òe tiàturiraa i te Atua, ta Ietu faahaparaa i te taata, te mea ia e, i mua i te fenua, aita rätou i tiàturi i te Atua, aita hoì i tiàturi e, tei roto te Värua o te Atua i te fenua i te òhiparaa, ua tuu te Atua i to na here i roto i te fenua, e e arataì atoà te fenua i te taata i te Atua ra, e faaìte hoì i te taata i te èà e tae ai o ia i te Atua ra. E a hiò faaàpu noa ai tätou i te fenua, ei vähi tupuraa no te räau, te àihere, e te mäa, haamanaò e, ua òaòa te Tumu Nui i ta na iho òhipa, mai ia Taaroa hoì i òaòa i ta na iho òhipa : Ta ù taoà maitaì, ta ù fenua nei e. Tätou, mai te mau puaa atoà, te ora nei tätou i te àihere, te àmuraa i te here o te Atua, te mea ia e faaora nei ia tätou. Nä roto i te fenua, te faaìte tuutuu òre noa mai nei te Atua i to na here i te taata ia noho hau noa te taata e tiaì no te mea, te Atua e te fenua, hoê ä ia. Te faaìte noa mai ra te fenua i te maitaì o te òhipa ta te Atua i rave. E aha tätou i onoöno tämau ai, e i faahope ai i to tätou püai i te hiò-faataa-ê-raa i te fenua e te Atua, i hopoihia ai o Ietu i nià i te raì, ua vaiiho mai o Ietu i te fenua ta na i parau maua e te Atua hoê ä ia.

 

Teraì òr. Faatura.