Ruta èv. 20, 27- 38. Ora.

 

 

Tāpati 6 no Novema 2022.

ÔROA

Ora.

Mau taiòraa.

Taramo 17

1 E pure na Tävita. E faaroo mai i te tià, e te Fatu e, e haapaò mai òe i ta ù e tiàoro nei, e faaroo mai i ta ù pure: no roto i te vaha haavare òre.

2 Òe iho të tuu mai i te parau ia ù nei; na to mata e hiò i te mea tià.

3 Ua tämata òe i ta ù âau, ua hiò mai òe ia ù i te ruì; ua tämata òe ia ù, e aita e parau ìno i ìteä ia òe ra. E ua ôpua hoì au, eiaha ta ù vaha ia hapa.

4 I ta te taata nei parau, no te parau a to vaha i ara ai au i te mau haereà o te täparahi taata ra.

5 E tauturu mai òe i to ù haereà i to òe na mau èà, ia òre ia pähee o ù puè âvae.

6 Te tiàoro nei au ia òe, te faaroo nei hoì òe ia ù, e te Atua. E färiu mai to tarià ia ù nei, e haapaò mai i ta ù parau.

7 A faaìte hua mai na i to aroha hämani maitaì i mäerehia ra, e tei faaora i te feiä i tiàturi ia òe i tei tià mai i nià e märô mai i to òe na rima àtau.

8 Tiaì mai òe ia ù mai te ôriò mata ra, e huna ia ù i raro aè i to maru pererau ra,

9 i te feiä paieti-òre, o tei hämani ìno mai ia ù nei, i ta ù mau ènemi, e haapuni mai ia ù nei e täparahi.

10 Ua àti rätou i to rätou töâhua, te parau teòteò mai ra to rätou vaha.

11 To mätou èà tià, ua haapunihia e rätou i teie nei; te faatano noa ra rätou i to rätou mata i raro i te repo.

12 E au te ènemi i te riona e rü i ta na mäa, mai te riona âpï e püpuni i te vähi moè ra.

13 A tià, e te Fatu, e faaère atu ia na, e faahaèhaa atu, ia ora vau i te taata ìno, i te òè na òe ra,

14 i te rima no òe, e te Fatu, i te reira nänaì taata, te taata no teie nei ao, e tei teie nei ao ta rätou tufaa;  tei faaîhia to rätou ôpü e òe i ta òe ra taoà moè. E ua rahi to rätou tamarii e te vaiihohia nei ta rätou taoà i toe na te àruàru rii ra.

15 Âreà vau nei, e ìte au i to mata mä te parau tià; e ia ara vau ra, e mauruüru ä vau i to ù auraa atu ia òe.

Tāniera 3, 1-30.

1 Hämani iho ra te arii ra o Nëpütäneta i te hoê tii àuro, e ono àhuru te tüpiti i te teitei, e ono hoì tüpiti i te âano: e ua faatià aè ra o ia i taua tii ra i te vähi päpü ra i Tura, i te mataèinaa ra i Päpurönia.

2 Ua tono aè ra te arii ra o Nëpütäneta i te veà e ope mai i te mau arii, e te mau tävana, e te mau raatira, e te mau haavä, e te feiä mau taoà, e te mau fänaò, e te mau tiàau, e te mau tävana i te mau mataèinaa ra, e haere mai i te haamoàraa i te tii i faatiàhia e te arii ra, e Nëpütäneta.

3 Ua haaputuputu mai ra te mau arii, e te mau tävana, e te mau raatira, e te mau haavä, e te feiä mau taoà, e te feiä faaaò, e te mau tiàau, e te mau tävana i te mau mataèinaa ra, i te haamoàraa i te tii i faatiàhia e te arii ra, e Nëpütäneta. E ia tià anaè rätou i mua i taua tii i faatiàhia e Nëpütäneta ra.

4 Ua tiàoro mai ra te poro, Te faaìtehia atu na òutou, e te mau taata na, e te mau fenua na, e te reo èê atoà ra, 5 ua ìte anaè òutou i te òto o te pü, e te vivo, e te tïnura, e te tapata, e te näpara, e te tumefonia, e te mau mea atoà i faaòtohia ra, e tïpapa òutou i raro, i reira haamori ai i te tii àuro i faatiàhia e te arii ra, e Nëpütäneta:

6 e o te òre e tïpapa i raro a haamori ai, ei taua hora ra o ia e tïtirihia ai i roto i te umu auahi ura ra.

7 E tae aè ra i te taime i ìte ai te mau taata i te òto pü, e te vivo, e te tïnura, e te tapata, e te näpara, e te mau mea atoà i faaòtohia ra, ua tïpapa iho ra te mau taata atoà i raro, e te mau fenua, e te reo èà atoà, e ua haamori atu ra i te tii àuro ta te arii ra ta Nëpütäneta i faatià ra.

8 Ua haafätata mai ra te tahi pae Tarataio i reira, ua tihotiho mai ra i te Àti-Iüta.

9 Ua parau mai ra rätou, nä ô mai ra i te arii ra ia Nëpütäneta, E te arii e, ia ora roa òe.

10 Ua faatià òe i te hoê parau, e te arii e, e te taata i ìte i te òto o te pü, e te vivo, e te tïnura, e te tapata, e te näpara, e te tumefonia, e te mau mea i faaòtohia ra, o te tïpapa ia i raro haamori ai i te tii àuro ra;

11 e o tei òre e tïpapa i raro a haamori ai, e hurihia ia i roto i te umu âuahia ura ra.

12 Teie hoì e toofanu puè Àti-Iüta i tuuhia e òe i nià i te haapaòraa i te mataèinaa ra o Päpurönia, o Tätaräta, e o Mëteta, e o Àpete-neto; aore taua mau taata nei i haapaò ia òe, e te arii: aore rätou i haamori i to òe ra mau atua, aore hoì i haamori i te tii àuro ta òe i faatià ra.

13 Ua faaue atu ra Nëpütäneta mä te riri rahi ûàna nö na ra, e arataì mai ia Tätaräta, e ia Mëteta e ia Àpete-neto ra. Ua arataì mai ra rätou i taua nä taata ra i mua i te aro o te arii.

14 Ua parau mai ra Nëpütäneta, nä ô mai ra ia rätou, E parau mau änei, e Tätaräta, e Mëteta, e Àpete-neto, e òre òutou e haamori i to ù mau atua, e òre hoì e haamori i te tii àuro tä ù i faatià ra?

15 E tënä na, ia ìte òutou i te òto o te pü, e te vivo, e te tïnura, e te tapata, e te näpara, e te tumefonia, e te mau mea e faaòtohia ra, te tïpapa ra òutou i raro te haamori ra i te hohoà i hämanihia e au nei, ua tià ia; ia òre rä òutou ia haamori ra, ei taua hora ra òutou e hurihia ai i roto i te umu auahi ura ra, e o vai te Atua e faaora ia òutou i to ù nei rima?

16 Ua parau atu ra Tätaräta, rätou o Mëteta, e Àpete-neto, nä ô atu ra i taua arii ra, E Nëpütäneta, aore ra mätou i rü i te parauraa atu ia òe i tënä na parau.

17 Ia hinaaro o ia iho, e tià ia i to mätou Atua e haamori nei ia faaora o ia ia mätou i te umu auahi ura ra, e tià ia ia na ia faaora ia mätou i to rima, e te arii;

18 ia òre rä o ia ia hinaaro, e òre ä mätou e haamori i to òe ra mau atua, ia ìte mai òe, e te arii, e òre hoì e haamori i te tii àuro i faatiàhia e òe ra.

19 Î roa aè ra Nëpütäneta i te riri rahi, e huru ê atu ra ta na mata ia Tätaräta, e ia Mëteta, e ia Àpete-neto: ua parau atu ra o ia, faaue atu ra ia tahu rätou i te umu ra, e ia taìhitu te tahuraa i te mau tahuraa atoà ra.

20 E ua faaue atu ra o ia i te feiä püai rahi i te nuu atoà nö na ra e ruuruu ia Tätaräta, e ia Mëteta, e ia Àpete-neto, e huri hoì ia rätou i roto i te umu auahi ura ra.

21 Ruuruuhia iho ra taua puè taata ra, mä te àhu, e te täupoo, e te àhu tïpona, e te mau àhu atoà ra, e hurihia iho ra i roto i te umu auahi ura ra.

22 E no te mea te rü ra te faaue a te arii ra, e ua rahi roa te umu i te àma, pohe roa aè ra taua mau taata ra, o tei rave ia Tätaräta, e ia Mëteta, e ia Àpete-neto ra.

23 O teie nei rä puè taata tootoru, e Tätaräta, o Mëteta, e o Àpete-neto ra, maìri iho ra ia i raro mä te rürütaina i rotopü i taua umu auahi ura ra.

24 Ua mäere noa iho ra te arii ra o Nëpütäneta i reira, e ua tià rü noa mai ra, ua parau mai ra, nä ô mai ra i te mau faaaò nö na ra, Eere änei tootoru a tätou tau taata ruuruuhia i huri i roto i te auahi? Ua parau atu ra rätou, nä ô atu ra i te arii, E te arii, e parau mau.

25 Ua parau mai ra o ia, nä ô mai ra, Inaha, te ìte nei au i nä taata toomaha mä te täpeà òre, i te haere-noa-raa no roto i te auahi e aore roa e maì; e te huru o te toomaha ra mai te Tamaiti ia a te Atua.

26 Ua haafätata mai ra Nëpütäneta i te àuvaha o taua umu auahi ura ra, e ua parau atu ra, nä ô atu ra, e Tätaräta, e Mëteta, e Àpete-neto, e nä tävini o te Atua teitei, e haere mai i räpae, e haere mai i ô nei. Ua haere mai ra Tätaräta, e o Mëteta, e o Àpete-neto i räpae mai rotopü mai i te auahi ra.

27 E putuputu mai ra te mau arii, e te mau tävana, e te mau raatira, e te mau faaaò o te arii ra, ua hiò iho ra i taua nä taata ra, ìte aè ra e aore roa to rätou tino i taeà i te auahi, aore roa hoì te hoê iò rouru o to rätou upoo i àma, aore hoì to rätou àhu i huru ê, aore hoì i mau mai te hauà auahi i nià ia rätou.

28 Ua parau iho ra Nëpütäneta, nä ô aè ra, Ia haamaitaìhia te Atua no Tätaräta, e no Mëteta, e no Àpete-neto, o tei tono mai i ta na merahi e ua faaora i to na puè tävini i tiàturi ia na ra, e ua faaòre aè nei i ta te arii ra parau, e ua höroà noa mai i to rätou tino ia òre rätou ia haamori, ia òre ia tävini atu i te tahi atua ê, mäori rä o to rätou iho ra Atua.

29 E teie nei, te faatupu nei au i te hoê parau, E te mau taata, e te fenua, e te mau reo èê atoà ra, ia faaìno mai i te Atua no Tätaräta, e no Mëteta, e no Àpete-neto, e täpüpühia ia, e faarirohia ia to rätou mau fare ei pueà: no te mea aita atu Atua e tià ai ia faaora mai teie nei te huru.

30 Ua faateitei iho ra te arii ia Tätaräta, e ia Mëteta, e ia Àpete-neto, i taua mataèinaa ra i Päpuronia.

2 Tētāronia 2, 16-17

16 E ia haamähanahana mai to tätou Fatu o Ietu Metia iho, e te Atua to tätou Metua ra, o tei aroha mai ia tätou nei, e ua horoà mai hoì i te òaòa mure òre, e te tiàturiraa maitaì i to na ra aroha mau,

17 ia haamähanahana mai i to òutou âau, e ia haapäpü hoì ia òutou i te mau parau e te mau òhipa maitataì atoà ra.

Ruta èv. 20, 27- 38.

Te tiàfaahouraa

27 Ua haere mai ra te tahi pae i te mau Tätutea ra, o tei parau e, aore e tiàfaahouraa, e ua ui mai ra ia na,

28 nä ô mai ra: «E te Òrometua, i päpaì mai Möte i te parau ia mätou, e ia pohe te tuaana o te hoê taata aore e tamarii, te ora ra te vahine, e faaipoipo te teina i taua vahine ra, e haafänautama i te tamarii na ta na tuaana. 29 Toohitu puè tamarii tamaroa i te hoê fëtii, faaipoipo iho ra te mätahiapo i te vahine, e pohe atu ra, aore e tamarii.

30 Ua faaipoipo iho ra te toopiti i taua vahine ra, e pohe atoà atu ra mä te tamarii òre.

31 Ua faaipoipo iho ra hoì te tootoru i taua vahine rä, e i nä reira atoà hoì rätou toohitu. E hope atoà atu ra i te pohe mä te tamarii òre ä.

32 E te hopeà iho ra, pohe atoà atu ra taua vahine ra.

33 E teie nei, ia tae i te tiàfaahouraa ra, e riro o ia ei vahine nä vai i taua toohitu ra? E vahine hoì o ia na rätou atoà toohitu.

34 Ua nä ô atu ra Ietu i te parauraa atu ia rätou: «Te faaipoipo nei to teie nei ao, e te horoàhia nei e faaipoipo;

35 âreà te feiä e manaòhia e au ia rätou taua ao a muri nei, e të tiàfaahou mai te pohe mai, e òre ia rätou e faaipoipo, e òre hoì e horoàhia e faaipoipo.

36 E òre hoì rätou e pohe faahou, mai te mau merahi ra hoì rätou e tamarii na te Atua, e tamarii no te tiàfaahouraa.

37 I te parau ra e, e faatiàfaahouhia te feiä i pohe, ua faaìte atoà mai hoì Möte ia na i parau i te Fatu i fä mai i roto i te pü àihere ra: «O te Atua o Âperahäma, e te Atua no Ìtaata, e te Atua no Iatöpa.»

38 Eere hoì o ia i te Atua no tei pohe, no tei ora rä; te ora anaè ra hoì rätou ia na.

Manaò.

Te fenua, te taata ia, te nünaa hoì. Te auraa, te taata e te fenua, hoê ä ia. No te fenua i parauhia ai to te taata, aita e taata e tano e faahiti i to na parau ei taata mai te peu e haapae o ia i te parau o te fenua. E ia faahiti hoì tätou i te parau o te fenua, no te mea ia ua färii hope roa tätou i to na parau, oia te mau mea atoà e faaìte mai ra i te tupuraa o te ora ta na e mau ra, nä reira hoì te mau mea atoà ta na i amo e tei riro o ia ei ìte, ua färii hoì i ta te fenua iho parauraa i to na parau, to na reo, ta na peu, e ta na hoì faaìteraa i te Atua. E rave rahi roa te feiä haavare e faahiti nei i te parau o te fenua, mai te tähitohito ûàna rä i ta te fenua parau i nià ia na iho, mai te haafaufaa òre i to na reo, ta na peu, e te värua e faaora ra i te fenua. Mea tano ia haamanaòhia i teie feiä e, eere te fenua no roto mai i te taata, eere te taata te metua o te fenua, te taata rä tei ravehia no roto mai i te fenua. No reira, e tamarii te taata na te fenua ra, te fenua atoà ia të mau ra i to na parau. Aita ta te taata e haapiiraa i te fenua, aita ta na e faaravaìraa i te parau a te fenua. Te taata paari, te taata ia tei färii i te haapiiraa e te arataìraa a te fenua ; te maamaa rä e te aoaoa, ua hinaaro ia na na aè e haapii i te fenua i te maitaì e te ìno. I roto i ta te Pïpïria hiòraa i te parau o te fenua, oia te hiòraa a te âti Iuta, aore ra ta te nünaa Ìteraèra, no te mea i parau te Atua, i parauhia ai to te fenua, e eita te parau o te fenua e tano ia faataa-ê-hia i to te Atua na na te Parau i pü mai ai te fenua.

Mai ia Ietu i parau e : O vau e te Metua, hoê ä ia Ioane 10, 30, ia parau tätou e : Te Atua e te fenua, hoê ä ia, eere ia no te faaìte i te àifäitoraa e vai ra i roto i te tahi e te tahi, o te riro te reira ei räveà e òhie ai te parau o te tahi i te haapaehia, inaha hoê ä te tahi e te tahi. No reira, eita te fenua e rave i te tiàraa o te Atua, eita hoì te Tamaiti e rave ite tiàraa o te Metua, e haapäpüraa noa rä teie e, hoê ä faaìteraa ta te fenua e te Atua, nä reira hoì ta te Tamaiti e te Atua, aore ra, te fenua, mai te Tamaiti atoà, te faaìte ra i te hinaaro o te Atua. Eita rä te parau o te Atua e hope i roto i te fenua, eita hoì e hope i roto i te Tamaiti. Te vai ra te Atua, te vai ra te fenua, e te vai ra te Tamaiti. E täpura òhipa ta te fenua i mua i te Atua, e täpura òhipa ta te Tamaiti i mua i te Atua ; ua mauruüru te Atua i te Tamaiti : O ta ù Tamaiti here teie, ua mauruüru roa vau ia na (Mätaio 3, 17) ; ua mauruüru atoà ra i te fenua : Te òaòa nei te Tumu Nui i ta na iho ra òhipa (Taramo 104, 31). Ia òre rä ia maitaì te òhipa a te Tamaiti, aore ra ia òre ia maitaì te òhipa a te fenua, eita te reira e haafifi i te parau o te Atua. Te mea ia ta Ietu e parau ra i te raveraa mai i te tahi manaò to te päpaì taramo (102, 26), i te nä ôraa e : E mou te raì e te fenua, e òre roa rä ta ù parau e mou (Mätaio 24, 35). Haamanaò tätou i te mea ta tätou i parau na e, te Parau, te mana òhipa ia o te Atua, no reira, no te mea no roto mai te fenua i te Parau, e tano ia tätou e nä ô e : te fenua, te Parau ia a te Atua i roto i te òhiparaa. Te haapäpü noa mai ra te reira e, e täpura òhipa rahi ä ta te Atua e tiaì mai ra ia tätou, aita ä ta na ôpuaraa i hope, ia au i te manaò e, te ôpuaraa, e manaò ia tei òre ä i riro mai ei òhipa. Ua tupu te fenua nä roto i te mana o te Parau a te Atua, no te faatupu rä i ta na ôpuaraa, e hinaaro ia te Atua ia hoì te taata ta na i hämani ia na ra, ia tauturu te taata i te Atua i te faatupuraa i ta na ôpuaraa faaora, no te mea e ora rahi ta te Atua i faaineine no te taata. Ia âmui te taata i te Atua, i reira teie ora e matara ai. Aita teie manaònaòraa to te Atua i  ätea roa atu i te mea ta na i faaìte mai i te matahurahura o teie nei ao, a parau ai o ia e : Eere te mea maitaì ia pärahi noa te taata o ia anaè ra (Tenete 2, 18). Pärahi noa ai te taata i roto i te maitaì, te hinaaro nei ä te Atua ia fänaò te taata i te tahi maitaì hau atu. Ia haamanaò tätou i te mau manaò ta tätou i parau mai na i nià i te here, e märamarama tätou i te auraa o teie ôpuaraa ta te Atua. Ia faaroo tätou i te haapotoraa o ta tätou mau taiòraa no teie mahana te naò ra ia :

-Taramo 17, 5 E tauturu mai òe i to ù haereà i to òe na mau èà, ia òre ia pähee o ù puè âvae.

-Täniera 3, 28 Ua parau iho ra Nëpütäneta, nä ô aè ra, Ia haamaitaìhia te Atua no Tätaräta, e no Mëteta, e no Àpete-neto, o tei tono mai i ta na merahi e ua faaora i to na puè tävini i tiàturi ia na ra, e ua faaòre aè nei i ta te arii ra parau, e ua höroà noa mai i to rätou tino ia òre rätou ia haamori, ia òre ia tävini atu i te tahi atua ê, mäori rä o to rätou iho ra Atua.

-2 Tetaronia 2, 16 E ia haamähanahana mai to tätou Fatu o Ietu Metia iho, e te Atua to tätou Metua ra, o tei aroha mai ia tätou nei, e ua horoà mai hoì i te òaòa mure òre, e te tiàturiraa maitaì i to na ra aroha mau,

-Ruta èv. 20, 38 Eere hoì o ia i te Atua no tei pohe, no tei ora rä; te ora anaè ra hoì rätou ia na.

Te ìrava 25 i te pene 3 i te faaìteraa a Täniera teie te reo o Nëpütäneta, Ua parau mai ra o ia, nä ô mai ra, Inaha, te ìte nei au i nä taata toomaha mä te täpeà òre, i te haere-noa-raa no roto i te auahi e aore roa e maì; e te huru o te toomaha ra mai te Tamaiti ia a te Atua, e ora teie e faahitihia nei.

I mua i te parau o te ora, ia parau tätou i te ora e òhipa na te Atua, mea maitaì paha tätou ia taui rii i ta tätou hiòraa i te Atua. Ia faahiti tätou i te parau o te ora o te Atua, e manaò tätou i te tahi püai taa ê roa e òre ai te hoê noa aè mea e mau i mua i te hinaaro e te faaueraa a te Atua. E inaha, te ora, te mana ia, oia te hinaaro o te Atua ia ìtehia te tupuraa o te ora, nä roto i ta na Parau, e te mau òhipa atoà ta na i faatupu. Ua hape paha tätou e te Pïpïria atoà, i te hinaaroraa e horoà i te tahi hohoà Atua mataùhia, e te faariroraa hoì i te reira ei täpaò no te paari e ìnaha te matamehaì o te paari, te mataù ia i te Atua Nui Tumu Tahi i te faaìteraa a te Taramo 111, 10 e te Mäteri 9, 10. E teie parauraa a Nëpütäneta, e ua faaòre aè nei i ta te arii ra parau, e ua höroà noa mai i to rätou tino ia òre rätou ia haamori, ia òre ia tävini atu i te tahi atua ê, mäori rä o to rätou iho ra Atua. Oia atoà teie parauraa ta te mau Tätutea i te parau no te tiàfaahouraa, i te ôomoraa mai te parau no te faaipoiporaa no te faatià i to rätou manaò i nià i te parau no te tiàfaahouraa. Te ìmi nei teie mau taata i te parau no te pohe, e ìnaha te faaipoiporaa e parau ia no te ora, e parau no te fänauraa.

Te parauraa a Ietu, te faaipoipo nei to teie nei ao, e te horoàhia nei e faaipoipo; âreà te feiä e manaòhia e au no taua ao a muri nei, e të tiàfaahou mai te pohe, e òre ia rätou e faaipoipo, e òre hoì e horoàhia e faaipoipo. E òre hoì rätou e pohe faahou, mai te mau merahi ra hoì rätou e tamarii na te Atua, e tamarii no te tiàfaahouraa. 38 Eere hoì o ia i te Atua no tei pohe, no tei ora rä; te ora anaè ra hoì rätou ia na. Ahiri na, o vai të tano e faaü i te Atua, e te hinaaro änei hoì te reira o te Atua, ia ìte te taata e, o na te mea püai aè, oia hoì e püai aè o na i te taata ta na i hämani i te repo fenua. Aita atu e mea ta te Atua e hinaaro maoti rä, ia ìte e ia färii te taata i to na here e ta na ôpuaraa faaora ta na i ìmi noa mai na i te räveà, mai te matahurahura mai o teie nei ao, ia märamarama te taata, teie te auraa : te täatoàraa o te òhipa ta te Atua i rave, no te faaìte ia i te taata i te ora, ia òre te taata ia märamarama i te reira, e tämau noa ä o ia i te hämani i te tahi hohoà hape no te Atua, a riro atu ai te reira ei tumu e ätea noa ai te taata i te Atua. No reira, mai te peu e Atua mana te Atua, oia hoì e Atua no te ora, e Atua parau mau atoà o ia, e Atua parau tià hoì, oia hoì e Atua tei hinaaro ia faahoìhia ta na Parau, oia te mau òhipa atoà ta na i faatupu i roto i te fenua, te tumu hoê roa e te puna o te ora tei faaìte mai i te here o te Atua, ua hinaaro atoà rä te Atua i te faatïtïàifaro i te mau hape ta te taata i rave i te ruri-ê-raa i ta na Parau, a manaòhia atu ai e, e Atua ìno o ia, te ètaèta, e te haavï taata. No reira, mai te peu e Atua parau tià, ei parau tià atoà ia ta tätou i nià ia na e i roto i ta tätou raveraa i ta na òhipa e tià ai. I roto noa ä i ta te âti Iuta hiòraa i te Atua i te rahuraa i te raì e te fenua, ua manaò-noa-hia e, mauruüru noa ai te Atua i te òhipa ta na i rave, ua faaea ätea rii noa o ia i ta na rahu, e i roto i te reira hiòraa, e tiàraa taa ê roa tei horoàhia i te Parau tei riro atoà ei täpaò no te Atua. No reira, iti atu ra te faufaa o te mea i faatupuhia e te Parau, i te Parau iho i faatupu mai i taua mau mea ra. Te ìte-noa-hia ra te reira i teie mahana i roto i ta tätou mau haapiiraa, aore ra ta tätou mau pororaa tei faaìte noa mai i ta tätou huru märamaramaraa i te Parau a te Atua. No tätou, te Parau a te Atua, te mea ia i riro mai ei Pïpïria, oia te mau päpaì e faaìte ra i te parau o te Atua, aita roa atu rä to tätou manaò i nià i te òhipa ta te Atua i rave, oia te fenua ta tätou e pärahi ra, te fenua e to na î, te tai e to na î, te reva e to na î, oia hoì te mau mea e faaòhie ra e të haamaitaì ra i te oraraa o te taata. Mai te peu te Parau, te mana òhipa ia o te Atua, e eita tätou e faariro ei mea faufaa te hiòraa i te Atua i te òhiparaa ia matara te ora, aita änei hoì tätou e faariro nei i te Atua i reira mai te tahi tümëparo mäniania. E manaò hape rii rä te reira, no te mea ua tanu atoà te Atua i te räau o te ora i röpü i te ô, ua rave hoì i te repo fenua ei hämaniraa i te taata e tae noa atu i te mau ânimara. Te ìte ra tätou e, inaha aita te Atua i vahavaha i te fenua, e aha ia e noaa ai ta te taata vahavaharaa i te fenua e te mau mea atoà tei ìte o ia i te horoà ia tupu te hinaaro o te Atua e ia noaa ta te taata haamaitaìraa i te Atua. Te manaò hopeà ta tätou e haamanaò mai i roto i ta te nünaa Ìteraèra hiòraa i te parau o te fenua, te faufaa rahi ia o te pape, inaha te mea mätamua te reira e vai ra hou te mau mea atoà e ta te Värua o te Atua i faaàrepurepu. I parauhia ai to te raì, no te mea ia ua färii te vai i te faaruè i te tahi o te vähi ta na e mau ra ei tupuraa no te raì ; e i parauhia ai hoì to te  fenua, no te mea ia ua färii ä te vai i te faaruè i te tahi o te vähi ta na e mau ra ei tupuraa no te fenua. Aita rä teie faaruèraa te vai i te tahi vähi ta na e mau ra i faanaìnaì i to na parau, inaha no roto mai te täatoàraa o te ôpuaraa faaora a te Atua i te vai i te püraa mai, e te riro noa nei te vai ei ùputa no te ora. Te mea ia Ietu i rave atoà ai i te vai ei täpaò no ta na ôpuaraa faaora, oia te päpetito. Nä roto o te päpetito, te färii atoà ra te taata i te ôpuaraa faaora a te Atua i nä roto mai i te vai. Te auraa, te färii ra o ia i te rahu a te Atua, te färii ra hoì i te täpaò no te aroha e te here o te Atua. Eere o ia i te taata âpï, ia au i te manaò ta Pauro e parau ra e : Tei roto anaè te taata i te Metia, ua riro ia ei taata âpï ; ua òre te mau mea tahito, inaha ua riro te mau mea atoà ei mea âpï (2 Torinetia 5, 17), e taata rä tei märamarama i te ôpuaraa faaora a te Atua, e no te mea ua märamarama, ua färii atoà ia i te Atua, oia hoì ua färii i te ora. I mua i teie huru parauraa, e riro te tahi i te òre e tiàturi òhie noa no te mea, i ta na hiòraa, e parau òhie roa teie e te mämä rahi. Te auraa rii ia o te mea ta Ietu e parau ra e : I parau atu na vau ia òutou i te parau o te fenua, e aore òutou i faaroo Ioane 3, 12. Te haamanaò noa mai ra te reira e, aita te Atua, mai ia Ietu atoà, i parau i te taata i te parau àro, nä roto i te hoê reo tei horoàhia te märamarama i te mau merahi anaè, ua rave rä o ia i te reo e òhie te taata i te taa mai. Mai teie ta Na e parau nei i roto i ta tätou Parau Maitaì no teie mahana, e Atua ora te Atua, oia atoà ia teie reo o Nëpütäneta, nä ô aè ra, Ia haamaitaìhia te Atua no Tätaräta, e no Mëteta, e no Àpete-neto, o tei tono mai i ta na merahi e ua faaora i to na puè tävini i tiàturi ia na ra, e ua faaòre aè nei i ta te arii ra parau, e ua höroà noa mai i to rätou tino ia òre rätou ia haamori, ia òre ia tävini atu i te tahi atua ê, mäori rä o to rätou iho ra Atua, e i teie parauraa i mua i te Atua Nui Tumu tahi, ia Atua te Atua, ia fenua te fenua, ia taata te taata ua maitaì roa ia.

 

Ia ora te mau tamarii no tiàfaahouraa.

 

Teraì òr. Faatura.