Paraumaitai: Tiaìraa Toru - Täpati 11 no Tïtema 2022

Tiaìraa Toru - 11 no Tïtema 2022

MANAO TAUTURU

Te Mau Taiòraa :

Itaia 35 / 1 - 10 // Iatopo 5 / 7 - 10 // Mataio 11 / 2 - 11 // Taramo

146

Ei ômuaraa i teie manaò ïti i mua i to outou, e no te tauturu ia tätou,

te hinaaro nei na mua roa e faatae atu ia outou i te täpaò no te Aroha.

Te amo nei i te tiàraa, e tae-noa-atu tei òre ä i tapae i te reira manaò.

Te arataì nei i te mau Âmaa òhipa, e te faaineine nei ia rätou no te

reira. Tei faariro ia rätou ei mero no te Ètarëtia Porotetani Mäòhi, e te

manaò nei e tomo i roto i te reira. Te mau tamarii, te mau metua, e

tae-noa-atu te mau metua paari :

IA NUI TE HERE E TE AROHA i roto i te taata tä taìtahi, tei mau nei

ia outou no ô mai i te Atua ra, ia vai noa te reira ei moihaa nä outou

no te haatupu i te ôpuaraa faaora a te Atua tei faanahohia mai, nä te

Taata, no te haatupu i to na hinaaro, e ta na parau, ia noaa i te Taata

te pärahi-noa-raa i roto i te Hau.

Maeva e Manava hua i to tätou färereiraa i teie Täpati tiaìraa toru nä

tätou, no te taeraa mai i te Faaora. E parau rahi nä tätou no te parau

o te oraraa faaroo, i mua e i roto i teie parau, e ìte tätou te faaheporaa

(haatïtïraa) e te tiàmäraa, te tämauraa e te faaâpïraa, te parau no te

pohe e te ora-mure-òre. I reira tätou e tütonu i to tätou manaò i teie

taime mä te ui ia tätou ë, NO TE AHA.

E rahi, e, e roaa te manaò i mua i teie mau parau, e tämata ra tätou i

te haapoto i te reira. Te parau no te faaheporaa, te tämauraa, e te

pohe, e ôtià to rätou i roto i te oraraa o te Taata, aita te taata e nuu

faahou i roto i to na oraraa faaroo, e, to na iho ora. Aita te manaò e

haatoro rä i nià i te mau parau e te mau faanahoraa tei faaòhipahia e

te mau metua i to rätou ra tau, e tano ätoà ra te Taata e, ia nuu te tau,

e nuu atoà oia. Teie nei rä, eiaha e nuu, no te nuu noa, e tià ia tätou ia

òre i te faaëa i te ìmi i te mau räveà atoà no to tätou oraraa faaroo.

E tiàmäraa, e faaâpïraa, e te ora-mure-òre, e mau parau teie e ìriti nei

te ûputa o te ìmiraa i te mau räveà atoà i mua i te tau o tä tätou e ora

nei, e, e ora atu. Èita e tano e huna i te parau ë : « E ère i te mea ôhie.

» No te mea i roto i teie tau to tätou, e ìte tätou i te òhipa tei haaàmuhia,

e, te ûàna-noa-nei i teie mahana. E parau ia teie no te moni, te nä ô ra

te tahi metua paari :

« Èita e parari te ôfaì i te pape, e parari rä i te moni. »

E tano tätou e ìte i te ôfaì mai te àau o te taata no to na paari e to na

ètaèta. Èita te reira e taui taùe i mua i te pape, e tano e hiò mai te

Parau a te Atua, e parau no te ora. E taui taùe noa te àau o te taata i

mua i te parau o te moni, ia faahiti anaè i te faito o te moni e haatae

atu i roto i te rima o te taata, aita e parau faahou no te fetii, aita e parau

faahou no te hoa, e òreòre roa i te reira.

Mea rahi te parau tä te Fatu i parau i nià i tä na mau pipi, e o tä rätou

i faatae mai ia tätou nei. Teie mai te tahi mau parau :

« Aita vau i haere mai e faaòre tei ravehia, ua haere mai au e faatià i

te parau. » “A here oütou ia oütou iho mai ia ù i here oütou.”

“E aroha oütou ia oütou iho mai ia ù i aroha ia oütou.”

Mai te Metua e haapau-òre i to na reo i nià i tä na mau tamarii no te

haapii, no te aò, no te poroì ia rätou, mai te reira atoà e tano e ìte i teie

mau parau tä tätou e heheu nei, e tuatäpapa nei, e päparau nei i roto

i tä tätou mau haamoriraa. Te auraa, noa-atu te faa-huru-ê-raa o te

Taata ia na, te vai Mau-noa-ra te Parau a te Atua mai te täheraa o te

pape i nià e nä roto i te fenua.

Tei roto tätou i te tiaìraa, ua mätau tätou i te parau ë, te tiaì nei mätou

i te faaora. I mua i te huru o teie tau, te tano-noa-ra änei i teie parau.

Mai te peu, ua hiò tätou i nä parau e maha tei faataahia nä tätou i teie

mahana.

• No roto mai i te Taramo, e tämau te taata i te haamaìtaì i te Atua.

Teie nei rä, eiaha e tiàturi i te feiä e amo ra i te tiàraa, e tià ia òe

e te taata e heheu te reira i roto ia òe-noa- iho nä mua roa, no te

mea, aita te Atua e tiaì e faaìte tätou i te huru e te höhoà o te tahi

mai te peu to òe-noa-iho aita e tano ra. Tei te Atua te Mana, te

Parau Mau e te Parau Tià, e tuu i to tätou Faaroo i nià ia na.

• No roto mai ia Itaia, te tïtauhia nei e te taata ia vai ineine noa o

ia no te färii i te Metia te tono mai e te Atua. E faaìte o ia i te ora,

e te faaora tei faaroo mai ia na. O tei färii i te reira e ìte o ia te òre-raa i te ìno, te mauiui, e te òto, tä te Hau, te Hanahana, e te

Òaòa no ô mai i te Atua e mono atu.

• No roto mai ia Mataio, te poroì nei e te Fatu i te täatoàraa o te

mau taata tei mua ia na i te reira taime. E aha tä oütou e ìte, e

aore rä, e aha tä oütou i manaò e ìte. Eiaha e hiaài te ìte, e tià e

faaroo mä te ìte òre. Te tuu nei te Fatu ia Ioane i nià ia na, e te

faaìte atoà o ia o te ïti roa e pärahi nei i te hau o te Atua o ia tei

riro nei, i nià aè i te täatoàraa.

• No roto mai ia Iatopo, e faaòromaì te taata mä te faaìno-òre te

tahi i te tahi, mai te peu àore e hinaaro e färerei i te haavä. Mai

te mau Perofeta, i faaòromaì i te huru o te Taata i te mau taime i

faaìte ai rätou i te Parau o te Atua, e te Parau a te Atua. Mai te

taata i faaàpu e tiaì o ia i te mäà tä na i tanu, ia hotu, e ia paari.

I teie mahana, e tano tätou e parau ë, o vau tä te Faaora e tiaì

nei, o vau ta ù e faaineine nei no te färii i te faaora mä to àau mä,

i mua ia na, mä to värua e türaì nei i te here e te aroha, e mä to

püai e to ù täatoàraa no te haatupu i ta na Parau. No ô mai tätou

i te faaheporaa (haatïtïraa) e te tïtau nei i te rave i to tätou

tiàmäraa, ua pärahi tätou i roto i te tämauraa, e te äni mai nei

tätou ia rave i te faaâpïraa o to àau, ua ìmi i te pohe no tätou e

te Mäòhi, ìnaha hoì tei roto noa tätou i te ora-mure-òre tei

püpühia e te Atua nä tätou i te mau taime atoà, e, i te mau vähi

atoà.

E Ènana, e Ènata òe, e Paùmotu òe, e Tuhaa pae òe, e Raromataì òe,

e Nià mataì òe no te parau i to outou reo, no te ora i to tätou hïroà, e

no te rave i tä tätou mau peu tumu, e tä tätou mau mäà. Ua rau tätou

i Mäòhi Nui nei no te hoê Atua e Here nei, e Aroha nei tätou, eiaha nä

te taaêraa e faaätea ia tätou, ìnaha hoì nä te Atua e faatueä ia tätou, e

tamarii tätou nä te Atua.

No te reira e te mau taeaè, e te mau tuahine, e tau to te mau mea atoà,

ua hope to te faaauraa matamua i roto i ta na faaìteraa i te parau, to

te faaauraa âpï ua faatià-faahou-hia i te parau, i te taeraa mai ia tätou

nei e haatupu tätou i te reira.

Ua tuu mai te Atua i mua i te taata i te mau parau atoà tä tätou e ìte

nei i nià i te fenua, i roto i te moana, na nià mai i te raì. Ua höroà mai

O ia i te ärataìraa, te âveià, e te faanahoraa nä roto mai i te Fatu ia noaa i te taata i te ora-mure-òre. E tano e parau ë, ua ineine te mau

mea atoà, a hiò tei au, a rave.

E faatupu te parau nä roto i te òhipa o tä tätou e rave atu mä te fäitoòre,

mä te nümera òre. E rave tätou te òhipa no te haatupu i to na

hinaaro, e, tä na parau.

Ia fan̈ au-faahou te var̈ ua o te nun̈ aa Maò̈ hi e tià te hinaaro o te Atua,

eiaha ra to te taata.

IA ORA NA. Teraìmareva Òrometua.

Paraumaitai

lundi 21 novembre 2022

Tiaìraa Toru - Täpati 11 no Tïtema 2022

Aucun commentaire:

Enregistrer un commentaire

Märeto 12.38-44 Ö a Te Vahine Ìvi.

Rechercher dans ce blog