Ioane 1.1-18 Märamarama.

 

Tāpati 25 no Titema 2022.

ÔROÀ FĀNAU

Märamarama.

Taramo 98.

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na.

2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra.

3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua.

4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene.

5 A himene i te Fatu mä te tïnura, mä te tïnura e te reo haamaitaì atoà ra;

6 mä te mau pü e te òto o te tuferi, te harururaa i te haamaitaì i te arii ra, i te Fatu.

7 Ia haruru te tai e to na îraa, te ao atoà e to na ra mau taata.

8 Ia paìpaì te mau pape i to rätou rima, e ia ûmere tahi te mau mouà atoà,

9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Ìtaia 52.7-10

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra, o tei hopoi mai i te parau òaòa e te maitaì ra, o tei faaìte hua mai i te ora ra, o tei parau mai ia Tiona, Tei to Atua ra te hau.

8 E faateitei to mau faèhau i to rätou reo; e ûmere päatoà noa atu to rätou reo; e hiò hoì rätou, te mata e te mata, i to te Fatu faahoìraa mai ia Tiona.

9 Ia püroro noa atu te òaòa; ia ûmere päatoà, e te mau vähi pararï i Ierutarëma, ua haamähanahana hoì te Fatu i to na taata; ua faaora oia ia Ierutarëma.

10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.  

Hēpera 1.1-6

Te parauraa mai te Atua nä roto i ta na Tamaiti

1 O te Atua, o tei parau riirii mai i mütaa iho, e rave rahi te huru o te parauraa mai i te feiä tupuna i te mau perofeta,

2 o tei parau mai ia ia tätou i teie nei ànotau hopeà i te Tamaiti, o tei haapaòhia e ana ei Fatu no te mau mea atoà nei, e ua hämani hoì o ia i nä ao atoà nei ia na.

3 O te ànaana hoì o ia o to na ra hanahana, e o te hohoà mau ia no na iho, e te mauraa hoì i te mau mea atoà nei i ta na ra parau mana, oti aè ra ta tätou hara i te tämähia e ana ia na iho ra, pärahi iho ra i raro i te rima àtau o te Mana i te vähi teitei ra.

Te Tamaiti tei hau i te mau merahi

4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra.

5 O vai hoì to taua mau merahi ra ta te Atua i parau noa atu mai tahito mai ä e: «O ta ù Tamaiti òe,

i naùanei òe i fänauhia ai e au «? E ta na hoì i nä ô ra e: «Ei Metua vau no na, e ei Tamaiti o ia na ù «?

6 E ia na hoì i faahoì faahou mai i te mätahiapo i te ao nei, nä ô aè ra o ia: «Ia haamori te mau merahi atoà a te Atua ia na.»

Ioane 1.1-18

Te Parau a te Atua te Ora.

1 I vai na te Parau i te mätamua ra, i te Atua ra hoì te Parau, e o te Atua hoì te Parau/o te Parau hoì te Atua.

2 I te Atua ra hoì o ia i te mätamua ra.

3 Na roto ia na i rahuhia ai te mau mea atoà nei, e te mau mea atoà i rahuhia, aore hoê aè tei òre i nä roto mai ia na i te rähuraahia.

4 Tei roto ia na te ora, e te ora, o te märamarama ia o te taata.

5 Te ànaana nei te märamarama i roto i te pöuri, aita rä te pöuri i färii atu ia na.

6 Te vai ra ra te hoê taata tei tonohia mai e te Atua, o Ioane te iòa.

7 I haere mai o ia ei ìte, e faaìte i te märamarama, ia faaroo/tiàturi te taata atoà na roto ia na.

8 Eere o ia i te märamarama, ua haere mai rä o ia no te faaìte i te märamarama.

9 O te Parau te märamarama mau, ua haere mai o ia i te ao nei no te türama/haamäramarama i te mau taata atoà.

10 I te ao nei o ia, e na roto ia na teie nei ao i te rähuraahia; e aita to te ao i ìte atu ia na.

11 I haere mai nei o ia io na iho ra, e aore to na iho ra mau taata i färii atu ia na.

12 I te feiä atoà rä tei färii atu ia na, tei tiàturi i to na ra iòa, ua horoà o ia i te mana ia riro rätou ei mau tamarii na te Atua.

13 Te feiä eere i to te toto i fänau ai ra, eere hoì i to te hinaaro o te tino eere hoì i to te hinaaro o te taata, no te Atua rä.

14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau mau.

15 O na ta Ioane i faaìte mai, ia na i pii ra: «O ia teie ta ù i parau ra e: «O të haere mai i muri iho ia ù nei, ua riro ia i mua ia ù, o mua ä hoì o ia ia ù.»

16 Oia mau, na roto i to na î, ua noaa ia tätou atoà nei te maitaì e au atoà i to na ra maitaì.

17 Na Möte hoì i tuu mai i te ture, âreà te maitaì e te parau mau, na Ietu Metia ia.

18 Aore e taata i ìte i te Atua, o te Tamaiti fänautahi rä i nià i te ôuma o te Metua ra, o ia tei faaìte mai ia na.

Manaò.

Ia ora na i teie mahana haamanaòraa i te tupuraa òhipa i faanahohia e te Atua Nui Tumu Tahi, tei haafänau püfenua i ta na Tämaïti mai roto mai i te hoê pötii, teie haafänauraa e haafänauraa Atua, te haafaufaa noa ra te Atua i ta Na parau e fänau òe e te vahine. No teie ra tämaïti o Ietu te Faaora, ta te Atua i Faatahinu, tei ìtehia e te feiä paari, teie ta Päraama i parau i te faaìteraa a te Numera pene 24 ìrava 17, Te ìte nei au ia na, eita rä e tupu vave; te hiò au ia na, eere rä i te mea fätata; e fetià te tae mai mai ò ia Iatöpa ra, e e tupu te hoê tëpeta i Ìteraèra, o te täìri i na hiti o Moäpi ra, e e haamou i te tamarii a Tërä ra. No teie mea e fetià e märamarama ia to na auraa e Tämaïti ia teie no te märamarama to te taata ia ora. Te haamanaò mai nei te märamarama te täpaò te reira no te hanahana o te Atua, te tahi ia mea tei faatupu i te hau i roto i te pöuri, e to te pöuri färiiraa mai i te tahi papa ìtehia i roto i te mau tau e tei vai tämau, te ìriti nei te pöuri e te märamarama te faufaa o te ora ta raua e horoà noa nei, i te mau taata e te mau nünaa atoà o teie nei ao. Mai te fetià i ìtehia i roto i te pöuri  tei riro mai ei taata, te riro atoà nei teie parau o te taata ei räveà e matara ai te ùputa o te raì, oia te märamarama no te mau parau o te raì. No reira, tätou te taata nei o te tahi àma no te märamarama i te auraa e te faufaa o te ao no to na oraraa taata, o ia i märamarama ai i te auraa e te faufaa o te parau no to na oraraa värua. Ia hiò tätou i te òhipa ta te Atua i rave, ua nä mua o ia i te faatupu i te märamarama, taa atu ai te pö i te ao ; i muri mai, ua haamau te Atua i te tahi aroaro ei faataa i te pape i nià, i te pape i raro, o te reva ia ; i muri mai, ua haaputu te Atua i te pape i te vähi hoê, moana aè nei te moana, fenua aè nei te fenua ; i muri iho, ua faatupu mai te Atua i te mau räau atoà o te fenua ; i muri mai, ua faanaho te Atua i te mau tiàrama o te raì ; i muri mai, ua faaî te Atua i te moana i te mau mea oraora, e ua tuu i te manu i nià aè i te fenua ; e i te hopeà iho ra, faaue atu ra te Atua i te fenua ia fänau mai i te mau mea oraora, o te mau ânimara ia e pärahi nei i nià i te tua o te fenua. Teie atu ra te haapotoraa no te mau taiòraa i haapaòhia no teie mahana.

-Taramo 98, 8 Ia paìpaì te mau pape i to rätou rima, e ia ûmere tahi te mau mouà atoà,

-Ìtaia 52, 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua. 

-Hepera 1, 4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra.

-Ioane 1, 14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau mau.

Te faateitei nei tätou i te Atua Metua i te parau e färereihia nei e tätou i teie mahana no te haamanaòraa i te fänauraa o te faaora o te ao nei. I te faaìteraa a Ioane i te Parau Maitaì no Ietu i te pene 1, e tae i te pene 18, e fäìraa faaroo teie na te âti-Iüta teie papahia i nià i te Parau riroraa mai èi Taata. Te Parau ia a te Atua te Ora, e Parau i te mätamua ra, i te Atua ra hoì te Parau, o te Atua te Parau te Parau ra hoì te Atua ia märamarama.  I rahuhia ai te mau mea atoà nei, e te mau mea atoà i rahuhia, aore hoê aè tei òre i nä roto mai ia na i te rähuraahia. Tei roto ia na te ora, e te ora, o te märamarama ia o te taata. Te ànaana noa nei ä te märamarama i roto i te pöuri, aita rä te pöuri i färii atu ia na. E te taata ra tei tonohia mai e te Atua, o Ioane te iòa. O te ìte ia, ei faaìte i te märamarama, ia faaroo ia tiàturi te taata atoà na roto ia na. Te türamaraa teie a te märamarama, ua haere mai rä o ia no te faaìte i te märamarama. Te Parau te märamarama mau, ua haere mai o ia i te ao nei no te türama e no te haamäramarama i te mau taata atoà. I te ao nei ra o ia, e na roto ia na teie nei ao i te rähuraahia; e aita to te ao i ìte atu ia na. Aore o ia i ìtehia io na iho ra, e aore to na iho ra mau taata i färii atu ia na. Tei färii atu ia na, tei tiàturi i to na ra iòa, ua horoà o ia i te mana ia riro ei mau tamarii na te Atua, ta te Atua i haafänau, to te Parau ia riroraa mai èi taata, ua tiàhapa e ua pühapa mai i ö tätou, te hanahana ia o te Atua, e au i te Tamaiti fänautahi a te Metua, ua î i te maitaì e te parau mau. Te piiraa a Ioane : «O ia teie ta ù i parau ra e: «O të haere mai i muri iho ia ù nei, ua riro ia i mua ia ù, o mua ä hoì o ia ia ù.» ua î te àau o Ioane i te maitaì e au atoà i to na ra maitaì. Te türamahia e Möte na roto i te ture, âreà te maitaì e te parau mau, na Ietu Metia ia e türama. No te ìteraa i te Atua, o te Tamaiti fänautahi ia i nià i te ôuma o te Metua ra, o ia tei faaìte mai ia na. Ia taiò tätou i te ìrava mätamua, ia au i teie türamaraa hopeà no te taò ìte, teie ia te auraa o te mea e parauhia ra : Eere te taeraa, aore ra te òreraa te parau o te fenua i tae i roto i te tarià o te taata ta te taiòraa e parau ra ; eere atoà te faariroraa te taata i te reira parau ei òhipa, nä roto i te hiòraa e Tämaïti Fänau  ; te mea noa ta teie parau e hinaaro ra e parau i te taata, teie ia : e òhipa ta te fenua e faatupu no te taata, mai te peu e tiàturi te taata i te fenua. E no te mea te faahitihia ra te parau o te raì, e te raì hoì ra, o te Atua ia, teie atu ra ia te auraa o te mea e parauhia ra : ia tiàturi te taata i te fenua, e faaìte te fenua i te taata i te Atua, te reira te òhipa ta te fenua e rave no te taata. Te mea ia tätou i parau noa ai e, no to rätou tiàturi rahi i te fenua, ua ìte ê na to tätou mau tupuna i te Atua. Mea nä reira te fenua i riro ai ei ùputa no te raì, ta teie ia Ôroà Fänau e haamanaò mai nei ia tätou i haafänau ai te Atua i ta na Tämaïti i roto i ta na Parau na roto i te faaheitaòtoraa i te tane, ta na i faaärea te tino na roto i te ìò, te ivi, i parauhia ai te Va, no te hämani i te hine te puna faatupu ora, i parauhia ai te Vahine, tei iòa ia o Huahine, o Huahine i te nahe toètoè faatupu ora fänau Atua.  

Ia rave tätou i te piti o te hiòraa, te vai ra ihoä te auraa mätamua, oia te taeraa te parau i roto i te tarià, te vai atoà ra hoì te manaò no to te taata haapaòraa, to na haafaufaaraa, aore ra to na òreraa e haafaufaa i te reira parau, te taata rä i tiàturi i te reira parau, e horoà te reira parau i te ora no te taata. Tirä rä mea e anihia ra i te taata. Eere mai te òhipa faaàpu, e tanu òe, e horoà mai te fenua i te mäa ta òe i tanu ; ia òre òe ia tanu, aita atoà e mea ta te fenua e horoà na òe. E matara te ùputa o te ora i te tiàturiraa noa o te taata. Te mea ia ta tätou e parau nei e, faaroo. Te nä ô ra Ietu : Oia mau ta ù e parau atu ia òutou nei, e faaroo turori òre to òutou, te mea mau te reira ta te Atua e hinaaro ra i te taata ia ìmi faahou, oia hoì ia ìte-faahouhia ia na to na huru atua. I roto i to na atuaraa, aita Ietu i ìmi i te räveà ia fäito o ia i to na Metua, eiaha atoà tätou e manaò e, no te mea ua parau tätou e, e atua atoà te taata, ua fäito ia te taata i te Atua, e tano hoì e mono i te Atua. Aita, te ani noa nei te Atua i te taata ia ìmi faahou i te huru atua ta na i horoà no te taata, i te mahana i ôpua ai o ia i te taata. Eere änei e, te Atua iho të haapäpü ra e : E hämani tätou i te taata i to tätou iho huru, ia au i to tätou iho hohoà  i te faaìteraa a te Tenete pene 1, ìrava 26, e ta te päpaì taramo e haapäpü ra e : I raro iti aè o ia i te mau merahi i te hämaniraahia e te Atua Taramo 8, ìrava 5. Tano roa ai te reo o te Atua e parau ra e : Mai te raì nei, e teitei rahi to na i to te fenua, oia atoà to ù ra haereà, e teitei ia i to òutou haereà, e to ù ra manaò, i to òutou ra mau manaò Ìtaia pene 55, ìrava 9. A hiò atu ai tätou i te ärea e faataa ê nei ia tätou i te Atua. Maitaì aè no tätou ia nä ô noa e : Eiaha e faarahi i te parau. E ìmi rä i te räveà ia maraa rii aè tätou i nià. E huru pinepine terä i te ìtehia i te taata, ia òre ia noaa ia na te mea ta na e hinaaro ra i te taime ta na i hinaaro, e rave o ia i te tahi mau òhipa ta na e tätarahapa i muri aè no te mea aita o ia i ìte nä hea i te tatara ia na i räpae i te fifi ta na iho i faatupu, ia au rii ihoä ia i te mea ta Pauro e parau ra no na : Ta ù e rave nei, aore au i hinaaro, e ta ù i hinaaro ra, aore au i rave ; ta ù rä mea hinaaro òre ra, ta ù ia e rave nei Röma i te 7, ìrava 15. Te nä ô ra tätou i te ômuaraa e, no te taata, aita te parau o te märamarama i ätea roa i te mea ta to na mata i hiò, ta to na tarià i faaroo, e ta to na ìri i faaìte ia na. E mea pinepine roa te tahi pae taata i te parau e, no te mea aita to rätou mata i ìte, aita te tarià i faaroo, e aita te rima i täpeà i te Atua, aita ia e Atua ; e aita hoì e Atua ra, e mataù ia ia vai, e mataù hoì i te aha. Te mea ta te Atua e tiaì nei i te taata, eere te mata mataìtaì, ia ìte rä o ia i roto i ta na rahu, i te täpaò no to na aroha e to na here i te taata. Aita atu rä mea ta rätou e hiò maoti rä, te fare rätou haaputuputu ai, e te mau hoa rii e âmui mai. E hiò rä rätou i te aha, mai te peu tei roto i te unuhi e te manunu vareà taòto. I mua i teie mau ôtoheraa, e tano te manaò e uiui e, oia mau änei hoì, aita mau änei e mea e faaìte mai nei i te Atua i te taata, eiaha paha mai te tahi mea ìte-mata-roa-hia, ia au rä i te tahi huru tei au i te Atua i te faaìte mai ; aita änei te Atua e parau mai nei i te taata nä roto i te tahi reo òhie no na i te märamarama, aore ra nä roto i te tahi atu räveà òhie no na i te ìte i te auraa, aita änei te ìri o te taata e faaìte atoà mai nei i te taata i te Atua, e teie mau maì rau e tupu nei, e te mau àroraa mana faatere a te mau taata mäìtihia e te nünaa, ma te òre haapaò te pohe e te pohe poìa o te nünaa, e te tauà òre te veve o te taata, e i ö tätou nei ua ûàna ia faanahoraa. I tae ai tätou i nià i teie huru faanahoraa, ua moèhia ia tätou te maitaì o to tätou fenua ia Mäòhi Nui, mai te àihere i ìte i te maitaì o te fenua. 14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau mau.

 

Teraì òr. Faatura.