Mātaio 1.18-25 Faatura.

 

Tāpati 18 no Titema 2022.

TĪAÌRAA MAHA

Faatura.

Taramo 24

1 Taramo na Tävita. No te Fatu te fenua e te î atoà i nià iho, te mau fenua o te ao nei, e te feiä atoà e pärahi i reira.

2 Na na ia i faatïnana i te reira i te miti, e ua haamau o ia i te reira i te moana.

3 Nä vai e paìùma i te mouà o te Fatu? O vai të tià i to na ra vähi moà?

4 Te taata rima mä ra e te âau maitaì; o tei òre e faahiti i to na värua i te parau haavare, aore hoì i tapu mä te haavare.

5 To na te maitaì e noaa mai no ô i te Fatu ra, e te parau tià no ô i te Atua o to na ra ora.

6 Oia te feiä i ìmi ia na; o tei ìmi i to mata, e te Atua o Iatöpa. Tera.

7 E faateitei na ia òutou, e te mau ùputa e, e ia faateitei-atoà-hia òutou, te mau ôpani vaiiho taìàtä e, ia ö atu te arii hanahana i roto na.

8 O vai teie nei arii hanahana?  O te Fatu ia o tei mana e te püai; o te Fatu ia e mana i te àroraa ra.

9 A faateitei na ia òutou, e te mau ùputa e, e ia faateitei-atoà-hia òutou, e te mau ôpani vaiiho taìàtä e, ia ö atu te arii hanahana i roto na.

10 O vai teie nei arii hanahana? O te Fatu manahope ia, o ia taua arii hanahana ra. Tera.

Ìtaia 7.10-16

Te täpaò o Èmanuera

10 Ua parau faahou mai ra te Fatu ia Âhata, nä ô mai ra,

11 E ani òe i te tahi täpaò i to Atua ra, i te Fatu; e ani i raro roa ra, e aore ra, ei nià roa.

12 Ua parau atu ra Âhata, E òre au e ani, e òre hoì au e faaoôo atu i te Fatu.

13 E ua parau mai ra o ia: E faaroo mai, e te ùtuafare o Tävita; e mea iti änei òutou i faahaumani i te taata,  e faahaumani atoà òutou i ta ù Atua?

14 E tënä na, nä te Fatu iho e höroà i te tahi täpaò no òutou: inaha e tö te päretënia, e e fänau i te tamaiti,  e maìrihia hoì to na iòa o Èmanuera.

15 E àmu o ia i te päta e te meri, ia ìte anaè o ia i te haapae i te mea ìno, e te rave i te mea maitaì.

16 E òre hoì teie nei tamaiti e ìte i te haapae i te ìno, e te rave i te mea maitaì,  e faaruèhia ai taua fenua nei, e taua nä arii i àti ai òe na.

Rōma 1.1-7

Aroharaa

1 Pauro, e tävini no Ietu Metia, i faarirohia ei âpotetoro, ia faataahia no te Èvaneria a te Atua

2 o tei faaìtehia mai i mütaa iho e ta na mau perofeta i roto i te Parau moà i päpaìhia ra,

3 no ta na Tamaiti no to tätou Fatu ra no Ietu Metia, o tei fänau mai i te huaai o Tävita, i te haapaòraa i te tino ra;

4 i täpaò-faaìte-hia rä i te mana, e o te Tamaiti ia a te Atua, i ta te Värua Maitaì ra, i te tiàfaahouraa mai te pohe mai ra:

5 no na mai to mätou maitaì i noaa ai, e te töroà âpotetoro i te mau êtene atoà no to na ra iòa, ia noaa ia rätou te haapaò faaroo ra;

6 no rätou atoà hoì òutou, o tei haapaòhia e Ietu Metia ra.

7 I te feiä atoà i herehia mai e te Atua i Röma na, i haapaòhia ei feiä moà: ei ia òutou te aroha mau e te hau no ô mai i te Atua i to tätou Metua ra, e no ô hoì i to tätou Fatu ia Ietu Metia ra.  

Mātaio 1.18-25

Te faaararaa ia Iotëfa

18 Teie te huru o te fänauraa o Ietu Metia. Te momoàhia ra ta na metua vahine o Märia ia Iotëfa; aore ä räua i täati i hapü ai o ia i te Värua Maitaì.

19 E taata parau tià rä ta na täne o Iotëfa, aore rä i hinaaro i te faaìte hua ia Märia, manaò aè ra e haapae huna noa ia na.

20 E te feruri noa ra o ia i taua ôpuaraa ra, e inaha, ua fä mai ra te merahi a te Fatu, faaheitaòto mai ra ia na, nä ô mai ra:«E Iotëfa a Tävita ra, eiaha e mataù i te arataì mai i to vahine ia Märia i to fare na, no te Värua Maitaì hoì i hapü ai o ia.

21 E te tamaiti tä na e fänau, o ta òe ia e topa atu i te iòa ia Ietu; e faaora hoì o ia i to na nünaa i ta rätou hara. 

22 Tupu mau atu ra te mau mea atoà i parauhia mai e te Fatu i te perofeta, a nä ô mai ai e:

23 Inaha, e hapü te pötii, e fänau mai o ia i te hoê tamaiti, e maìrihia to na iòa ia Èmanuera», «Te Atua io tätou nei», ia ìritihia ra.

24 E ara aè ra Iotëfa, haapaò atu ra i ta te merahi a te Fatu i parau mai ia na, tii atu ra e arataì mai i ta na vahine io na ra.

25 Aita rä o ia i rave atu ia na e fänau noa mai ra i te hoê tamaiti, maìri atu ra i te iòa o Ietu.

Manaò.
I teie tiaìraa maha, mea tià ia tätou ia faaitoito i te ärairaa i te mau peu tià òre e ravehia nei i nià i te mau pötii oia hoì i nià i te mau tamarii tamahine, e hämani-ìno-hia nei e te tahi mau tane, e tae noa atu i te mau täparahiraa vahine. Ua tae tätou i nià i teie huru faanahoraa tei òre e au no te hoê nünaa tiàturi Atua, ua ère anei tätou te mau tane i te hoê vahi no to tätou oraraa i òre ai e noaa ia tätou i te àro i teie vahi paruparu no to tätou tino. Ia au i teie huru peu ua atea tätou i te ôpuaraa faaora a te Atua, ua fati te faatura i roto i te teòteò, te teòteò ra te ärataìraa ia i te taata i roto i te ano. Eita e òre e, i to ù faahitiraa atu i te parau o te faatura, to tätou manaò mätamua e haere i nià i te faatura, i nià rä i to na huriraa i roto i te reo faräni, oia hoì ta te tahi nünaa märamaramaraa i te tahi parau eere i ta na. Mai te mea ra e hiò mai tätou teie taò i roto i te faanahoraa i ta te fenua faaìteraa, te mea fatata te tumu tiàìri ia, no te tiàìri, ia òre tätou ia tüpaì i te àpu, eita tätou e ìte i te mea i hunahia i roto i to na àpu. E no te mea e märamarama to roto i te reo, ère atu ra ia tätou i te tauturu ta teie taò e horoà ia tätou àhiri i tae tätou i roto i te taò. Ua parau-atoà-hia te tiàìri e, tuitui, no te mea e tuihia te mäa o teie räau, te mörï ia o te Mäòhi i te mätamua. Parau mau, eere mai te mörï uira, e eita te fare e märamarama i te tiàìri hoê, ia tuihia rä, e maoro atu ia te märamarama ta na e horoà mai. Te vähi maere rä, te mea ia e, parau-noa-hia ai e, tei roto tätou i te tau märamarama, ia hiòhia, mai te mea atu ra ia e, tei roto noa te Mäòhi i te riàrià i te pärahiraa ; âreà i mua ra, mörï tiàìri noa ai te mörï, te pärahi hau noa ra te Mäòhi. I roto i teie märamarama rahi e parauhia nei, te tahi ä ia vähi maere, e au ra e, tei nià noa te pöiri i te Mäòhi i te haapuèraa. Mea märamarama roa hoì te Mäòhi i te pö ra,  e aha rä i perehahu noa ai i to na èà i teie mahana. Hiò maitaì na tätou : te mörï e nä räpae i te àma mai i nià ia òe, eere te mörï maitaì, no te mea e pö to òe mata i to na ànaana, òre atu ai òe e ìte faahou i to òe èà ; te mörï rä  e nä roto ia òe i te haere i räpae, te reira te mörï e türaì i te pöiri, märamarama maitaì ai o mua ia òe. Ia ìte atoà mai rä òe, eere na te mörï e faaìte mai ia òe i te èà e rave, te faaotiraa te reira ta òe e rave. Aita ä rä tätou i tae i reira. I teie taime, hoê huero tiàìri ta tätou e hinaaro nei e tütuì, ia àma teie huero tiàìri, e ìte ia tätou i te auraa o te manaò ta tätou e parau nei. Teie huero tiàìri ta tätou, teie ia taò faatura. E faaitoito tätou te tüpaì i te àpu, a ìte atu ai tätou i te mea e vai ra i roto. Te nä ô ra te tahi reo to te Atua i te faaitoitoraa i te tahi taata : A haere mä tenä na maa püai no òe na (Tävana 6, 14) ; e nä ô ia tätou e : A haere mä tenä na maa huero iti tiàìri ta òe. I roto te fifi tei reira te nünaa i te tütava-noa-raa i teie mahana mai te taa òre rahi i te hopeàraa o to na parau, e mai te âmaa räau i paìpaìhia e te àre miti, e tei hutihia e te ôpape, mai te reira atoà te manaò o te nünaa i te huti-hänoa-raahia e te feiä e manaò nei no na, e tei faaoti atoà i te mea maitaì no na. Manaòhia atu ra i te tahi parapore no te ià : e ià ê te ômii, e ià ê te îtere. Tei riro ei mea maitaì no te ômii, e haamaitaì atoà änei i te îtere ; tei òre hoì i au i te manaò o te ômii, ua riro änei ia ei mea ìno no te îtere ; e ià ê hoì te ômii, e ià ê te îtere. Teie mau ômii ta tätou e parau nei, te mau arataì poritita ia tei faaoti ê na to rätou manaò e, tei au ia rätou ra, mea maitaì atoà ia no te nünaa ; e tei òre i au ia rätou ra, eere ia te mea maitaì no te nünaa. Tatararaa : te mea e haamaitaì ia rätou, mea maitaì ia no te nünaa, òre noa atu ai te nünaa e ìte i te hohoà e te hauà o te reira maitaì. Te mea rä e òre e haamaitaì ia rätou, ua riro atoà ia ei mea ìno no te nünaa. E tano rä tätou e parau mai te täuruuru òre te manaò e, te haamataraa o te maitaì, to òe ia ìteraa i te faatura ia òe iho, oia hoì to òe ìteraa ia òe ei mea faufaa i mua i to òe iho mata. Te mea ia ta tätou i parau mai na e, te mörï maitaì, eere te mörï e nä räpae mai i te àma i nià ia òe, te mörï rä e nä roto ia òe i te haere i räpae, te mörï anaè te reira të òre e faareru i to òe feruriraa. Te tanoraa mau, te faatura, eere i te tahi òhipa ta ù e rave no ù iho, no te taata atoà rä ta ù i òre i hinaaro ia topa i roto i te peàpeà, nä roto i to ù huru, ta ù parau, e te òhipa ta ù e rave. E tano tätou e parau e, ia ìte òe i te faatura ia òe iho, e ìte atoà òe i te faatura i te täuaro, ia au i te manaò e, ta òe i hinaaro ia ravehia no òe, te mea atoà ia e tano òe e rave atu no te tahi. Ia òre to òe âau ia riro mai te hiò hipa i reira e puta atoà ai te parau o te tahi, hape noa ai òe, te tano noa ra, mai ta te paari e haamanaò mai ra : Te tià ra to te taata nei mau haereà i to na iho ra manaòraa (Mäteri 16, 2). O vau ihoä te haamataraa o te mau mea atoà, ia täua rä e maitaì ai te oraraa, mai te òre e haamoè e, te vai atoà ra räua, nä reira hoì o rätou. Te haapii noa mai ra te reira e, i roto i te mau òhipa atoà ta tätou e rave, te reo ihoä te täviri i te ùputa o te märamarama. E maere änei hoì tätou, inaha na te Parau i ìriti i te ùputa o te märamarama e te ora. Papahia teie mau manaò, ia au i te haapotoraa o te mau taiòraa no teie mahana :

 

-Taramo 24, 9 A faateitei na ia òutou, e te mau ùputa e, e ia faateitei-atoà-hia òutou, e te mau ôpani vaiiho taìàtä e, ia ö atu te arii hanahana i roto na.

-Ìtaia 7, 14 E tënä na, nä te Fatu iho e höroà i te tahi täpaò no òutou: inaha e tö te päretënia, e e fänau i te tamaiti,  e maìrihia hoì to na iòa o Èmanuera.

-Roma 1, 4 i täpaò-faaìte-hia rä i te mana, e o te Tamaiti ia a te Atua, i ta te Värua Maitaì ra, i te tiàfaahouraa mai te pohe mai ra:

-Mätaio 1, 20 E te feruri noa ra o ia i taua ôpuaraa ra, e inaha, ua fä mai ra te merahi a te Fatu, faaheitaòto mai ra ia na, nä ô mai ra:«E Iotëfa a Tävita ra, eiaha e mataù i te arataì mai i to vahine ia Märia i to fare na, no te Värua Maitaì hoì i hapü ai o ia.

No te Fatu te fenua e te î atoà i nià iho, te mau fenua o te ao nei, e te feiä atoà e pärahi i reira. To na te maitaì e noaa mai no ô i te Fatu ra, e te parau tià no ô i te Atua o to na ra ora. E faateitei na ia òutou, e te mau ùputa e, e ia faateitei-atoà-hia òutou, te mau ôpani vaiiho taìàtä e, ia ö atu te arii hanahana i roto na. A faateitei na ia òutou, e te mau ùputa e, e ia faateitei-atoà-hia òutou, e te mau ôpani vaiiho taìàtä, ia ö atu te arii hanahana i roto na. O te Fatu manahope ia, o ia taua arii hanahana ra. Te täpaò o Èmanuera, Ua parau atu ra Âhata, E òre au e ani, e òre hoì au e faaoôo atu i te Fatu no rätou atoà hoì òutou, o tei haapaòhia e Ietu Metia ra. Te faaararaa ia Iotëfa Teie te huru o te fänauraa o Ietu Metia. E taata parau tià rä ta na täne o Iotëfa, aore rä i hinaaro i te faaìte hua ia Märia, manaò aè ra e haapae huna noa ia na. E ara aè ra Iotëfa, haapaò atu ra i ta te merahi a te Fatu i parau mai ia na, tii atu ra e arataì mai i ta na vahine io na ra. Ua faaroo e ua faatura o Iotëfa i te mau faanahoraa i te taime i faaheitaòtohia ai o ia e te Värua Maitaì. Te mea ta tätou e parau nei e, te haèhaa, oia te  haereraa te taata i raro ia vai te Atua i nià, nä reira hoì te  tuuraa i te taata atoà i nià, no te mea e huru e e hohoà te taata no te Atua, te mea ia ta tätou e parau atoà nei e, faatura. Eere te reira i te täpaò no te taata tei ìte i te peu maitaì, e hinaaro mau rä no te Atua. Te nä ô ra te päpaì taramo : I raro iti aè o ia i te mau merahi i te hämaniraahia e òe, e ua faahei òe ia na i te hinuhinu e te tura (Taramo 8, 5). Te ìte noa ra tätou e, i mua i te Atua, e tiàraa upoo fäito to te taata atoà, aita e taata ta te Atua i faaère i te tura e te hinuhinu, te färiiraa i te reira, ta te taata ia faahanahanaraa i te iòa o te Atua. Eere no te tiàraa e mauhia ra e te tahi, e tei òre i noaa i te tahi, e faaturahia ai te tahi, e e òre ai hoì te tahi e faaturahia. E tano tätou e parau e, te faatura, te ture ia no te hoê oraraa maitaì, te òaòa, e te hau, te ture hoì e riro ai te òaòa, te maitaì, e te hau, ei faufaa na te taata atoà. Te Värua o te Faatura. E parau mau ihoä ia, e manaò pinepine hoì i te faahitihia e tätou e, te auraa o te tahi taò, te âmuiraa ia o te mau faaòhiparaa o te reira taò, te auraa, i roto i te rahiraa o te mau faaòhiparaa ìtehia e te färiihia o te tahi taò, oia te mau faaòhiparaa tei ìtehia e tei färiihia ei mea tano, e matara mai ai te manaò tumu ta te reira taò e mau ra. Te mea ia ta tätou e parau nei e, te värua o te tahi taò. Ia parau hoì tätou i te tano, no te feiä ia tei ìte päpü i to rätou reo ; âreà te feiä tei òre i ìte päpü i to rätou reo, e haapaò noa rätou i te mea tei au i to rätou manaò, e parau ìtehia rä hoì e tätou e, tei au i te tahi, eita paha ia e au i te tahi. Te òhipa ia e ìtehia nei i roto i ta tätou ìrava no teie mahana, te haèhaa e te faatura o Iotëfa i te faatupuraa i te faanahoraa a te Atua i te faaäraraa a te Merahi, ia piihia teie àiü ia Ietu Emanuera te Atua i ö tätou nei.

 

Teraì òr. Faatura.