Mätaio 9.36-38. 10. 1- 8. Àhune

 

Tāpati 18 no Tiunu 2023.

Àhune

Taramo 100.

1 Taramo haamaitaì. Ia haruru te fenua atoà i te haamaitaì i te Fatu.

2 E haamori i te Fatu mä te òaòa, e haere mai i mua i ta na aro mä te himene.

3 Ia ìte hoì òutou: o te Fatu anaè ra te Atua, na na tätou i hämani, e no na hoì tätou, e taata no na, e te mämoe no ta na ra âua.

4 E tomo i to na mau ùputa mä te ârue; e to na ra mau hëtere mä te himene haamaitaì. E ârue òutou ia na, e haamaitaì i to na iòa.

5 E maitaì hoì to te Fatu, e to na aroha e tià ia i te vai-mäite-raa, e ta na ra parau mau i tërä uì, i tërä uì.

Ètoto 19.2-6

2 Ia rätou hoì i faaruè i Refitima ra, tae mai ra rätou i te mëtëpara o Tinai, pühapa iho ra rätou i te mëtëpara ra; e ua pätia iho ra te âti-Ìteraèra i te tiàhapa i mua atu i taua mouà ra.

3 Haere atu ra Möte i nià i te Atua ra, e ua tiàoro mai ra te Fatu ia na i nià i taua mouà ra, nä ô mai ra, E nä ô atu òe i te ùtuafare o Iatöpa, e faaìte hua i te tamarii a Ìteraèra;

4 Ua ìte òutou i ta ù i rave i to Àifiti ra, e ua maraa òutou ia ù nä nià i te pererau âeto ra, e ua hopoi mai ia òutou i ô nei ia ù iho nei.

5 E tënä na, ia faaroo mau mai òutou i ta ù reo, e ia haapaò mäite i ta ù ra faufaa, e riro ia òutou ei taoà here rahi na ù i te mau taata atoà ra. No ù noa iho hoì to te ao atoà nei.

6 E riro ä òutou ei pätireia tahuà anaè na ù, ei nünaa moà. O ta òe ia parau e parau atu i te tamarii a Ìteraèra ra.

Röma 5.6-11.

6 I to tätou vai-paruparu-raa ra hoì i pohe ai te Metia i te tau mau ra, no te feiä paieti-òre ra.

7 E òre hoì te hoê e haapohe no te tahi taata parau tià, e faaòromaì rä paha te hoê taata atu i te pohe no te taata maitaì.

8 Ua faarahi rä te Atua i to na aroha ia tätou nei, i te mea te vai taata hara noa nei ä tätou, i pohe ai te Metia no tätou nei.

9 E teie nei, ua tiàhia tätou i to na ra toto, e rahi atu ia to tätou ora ia na ra i te pohe.

10 I faafäitehia hoì tätou i te Atua i to tätou vai-ènemi-raa ra i te pohe o ta na Tamaiti; e rahi atu ia to tätou ora i te faïteraa nei, i to na ra oraraa.

11 Eere hoì te reira anaè ra, te òaòa nei rä tätou i te Atua, i to tätou Fatu ia Ietu Metia, no na i noaa ai ia tätou taua faïteraa nei.

Mätaio 9.36-38.

Ietu e te tiàa rahi aore e tiaì

(Mär 6.6b, 34; Rut 10.2)

35 Haere atu ra Ietu na roto i te mau ôire e te mau ôire rii atoà i te haapiiraa i roto i to rätou mau tunato, te aòraa i te parau maitaì o te Hau e i te faaoraraa i te mau maì e te mau pohe atoà.

36 E ia hiò aè ra o ia i te tiàa rahi, aroha atu ra o ia ia rätou, no te mea, ua rohirohi roa rätou e ua paruparu roa hoì, mai te mämoe aore e tiaì.

37 Ua parau atu ra o ia i ta na mau pipi: «Te rahi mau nei te àuhune, te iti nei rä te rave òhipa.

38 E teie nei, e pure òutou i te fatu o te àuhune ia tono ä o ia i te rave òhipa i roto i ta na àuhune.

10. 1- 8.

Te òhiparaa a nä âpotetoro tino àhuru mä piti

(Mär 3.16-19; Rut 6.14-16)

1 Ua tïtau atu ra Ietu i ta na mau pipi tino àhuru mä piti ia na ra, ua püpü atu ra i te mana ia rätou no te tiàvaru i te mau värua viivii e ia faaora i te mau maì e te mau pohe atoà.

2 Teie hoì te iòa o te mau âpotetoro tino àhuru mä piti ra: o Timona te mätamehaì, o tei parauhia ia Pëtero ra, e to na taeaè o Àneterea; e o Iatöpo a Tepetaio ra, e to na taeaè o Ioane;

3 o Firipa e o Paretoromea, o Toma e te òhi tute ra o Mätaio, o Iatöpo a Àrefaia ra, e o Tätäio,

4 o Timona âti-Tanaana, e o Iüta Ìtatariota, o tei hoo ia na ra.

To Ietu tonoraa i te tino àhuru mä piti

(Mär 6.7-11; Rut 9.2-5; hiò Rut 10.3-12)

5 O taua tino àhuru mä piti nei ta Ietu i tono, mä te aò atu ia rätou: «Eiaha e haere noa atu na nià i te èà o te mau êtene, e eiaha atoà e tomo atu roto i te ôire o to Tämäria ra:

6 e haere tià atu rä i te mau mämoe o te ùtuafare o Ìteraèra i moè.

7 I te êà, e poro haere òutou: «Te fätata mai nei te Hau o te raì. 

8 E faaora i tei maìhia, e faatià i tei pohe, e tämä i tei rëperahia, e tiàvaru i te mau tëmoni. Ua höroà-noa-hia mai ta òutou, e höroà noa ia òutou.

Manaò.

Ia faaroo vau i te tahi tamarii ia tamaìhia no te tahi òhipa hape ta na i rave, e aha te mea e ôpani ra ia ù i te faarooraa i terä tamaì mai te mea, te au atoà ra ia ù, e te ìmi-atoà-raa i te räveà faaâfaro ia ù iho ia òre au ia naeà-atoà-hia i te faahaparaa. Te pärihia ra tätou i te taèro àva, te aoaoa, aore ra te tahi atu huru tähitohitoraa, aita o reira fifi, e eita hoì e taui e hoê iti aè i teie mau parau ta mau taiòraa e tuu mai nei i mua ia tätou. Tei ia tätou ra te parau i teie nei. E nä ô ia tätou e, tei ia tätou ra te huero e àhune ai i teie nei , e tupu teie huero ia tätou e hotu roa atu, ia òre e tiihia mai, âfaìhia vähi ê tanu atu ai. Ia parau mai te Atua e, E riro ä òutou ei pätireia tahuà anaè na ù, ei nünaa moà. O ta òe ia parau e parau atu i te tamarii a Ìteraèra ra. Ètoto pene 19 ìrava 6, ua ìte atoà ia tätou e, aita e nünaa i fatu i te Atua, te vai ra rä ta te tahi e te tahi nünaa märamaramaraa i te parau o te Atua, ia au i ta te fenua haapiiraa ia na, te parau rä a te Atua, oia hoì ta na faaìteraa mai i to na mau hinaaro, e au ia no te mau nünaa atoà tei ineine i te färii i te reira. Mai te peu te parau âfaro mai ra te Atua i te taata, te tiaì atoà mai ra ia te Atua i te tahi pähonoraa âfaro ; ei pähonoraa ihoä rä. Te Atua ihoä ia te Atua, e taata hoì te taata, te faariro nei rä te Atua i te taata ei täuaro no na. Te auraa, mai te peu te parau mai ra te Atua i te taata, no te haamanaò ia i te mea ta na e tiaì ra i te taata ia rave ; e tano atoà te taata e parau i te Atua, no te faaìte i te mea ta na e tiaì ra i te Atua ia rave no na. Te mea ia tätou i parau ai e, aita e Aua, aita e faanahoraa, aita e faaheporaa, no te mea aita te Atua e hinaaro ra i te tahi mea ia haere mai e faaapiapi i te auraa âpï ta na e hinaaro nei i te haamau i roto ia na e te taata : o vau e o òe ; o òe e o vau. E no teie auraa fätata e vai ra i teie nei i roto i te Atua e te taata, e tano ai te Atua e haamanaò mai i te taata e, ua ìte òe i te vahi maitaì ua ìte òe i te parau maitaì. Aita e mea toe tei òre i horoàhia i te taata ra, tei te taata ra te parau i teie nei. Ia hiò-anaè-hia, aita te Atua e nä murimuri noa nei i te taata, i te parau-noa-raa ia na i te mea e rave, i te mea të òre e rave. E tiàmäraa rahi roa teie ta te Atua e hinaaro nei i te taata ia faaòhipa atu. Te fifi rä, te mea ia e, ua maoro roa te taata i te färiiraa ia ärataìhia o ia, ia faanahohia mai te òhipa ta na e rave, ia parauhia mai o ia i te vähi ta na e haere, ia parau hoì i te parau mai tei hinaarohia ia parau o ia, e riro teie tiàmäraa i te faatupu i te manaò ôtohe i roto i to na âau. Ua moèhia änei i te taata to na parau, aore ra aita o ia e hinaaro ra e haamanaò. Te mea e tauturu i te taata i mua i teie fifi, te tütonu-tämau-raa ia to na manaò, to na âau i nià i teie parau e : ua hämani te Atua i te taata i to na huru e to na hohoà, teie te parauraa a te Ètoto i te 19 i te ìrava 4 Ua ìte òutou i ta ù i rave i to Àifiti ra, e ua maraa òutou ia ù nä nià i te pererau âeto ra, e ua hopoi mai ia òutou i ô nei ia ù iho nei. Te parau teie e tauturu ia tätou i te faaìteraa i te huru mau e te hinaaro hoì o te Atua i te taata, ia hanahana to na iòa moà, teie atu ra te haapotoraa o na taiòraa e maha :

-Taramo 100, 3 Ia ìte hoì òutou: o te Fatu anaè ra te Atua, na na tätou i hämani, e no na hoì tätou, e taata no na, e te mämoe no ta na ra âua.

-Ètoto 19, 5 E tënä na, ia faaroo mau mai òutou i ta ù reo, e ia haapaò mäite i ta ù ra faufaa, e riro ia òutou ei taoà here rahi na ù i te mau taata atoà ra. No ù noa iho hoì to te ao atoà nei.

-Roma 5, 10 I faafäitehia hoì tätou i te Atua i to tätou vai-ènemi-raa ra i te pohe o ta na Tamaiti; e rahi atu ia to tätou ora i te faïteraa nei, i to na ra oraraa.

-Mataio 9, 37 Ua parau atu ra o ia i ta na mau pipi: «Te rahi mau nei te àuhune, te iti nei rä te rave òhipa.

Te tuu nei teie mau ìrava ia tätou i mua i te tupuraa no te mau òhipa e hinaarohia nei e te Fatu ia tupu, naò-noa ia teie parauraa e tonoraa teie na Ietu i ta na mau pipi. No te mea te ìte ra o Ietu i roto i te mau ôire rii i te haapiiraa i roto i te mau tunato, te aòraa i te parau maitaì o te Hau e i te faaoraraa i te mau maì e te faatiàraa tei pohe. Ia hiò ra o Ietu i te tiàa rahi, aroha atu ra o ia ia rätou, no te mea, ua rohirohi roa rätou e ua paruparu roa hoì, mai te mau mämoe aore e tiaì. Te ìte nei o Ietu i te rahi o te òhipa e tià ia rave, no te ïti te feiä ôoti, te raveà e pure i te fatu o te àuhune ia tono ä o ia i te rave òhipa i roto i ta na àuhune. Teie hoì taua mau rave òhipa i te tau no Ietu, Timona te mätamehaì, o tei parauhia ia Pëtero, e to na taeaè o Àneterea; e o Iatöpo a Tepetaio ra, e to na taeaè o Ioane; o Firipa e o Paretoromea, o Toma e te òhi tute ra o Mätaio, o Iatöpo a Àrefaia ra, e o Tätäio, Timona âti-Tanaana, e o Iüta Ìtatariota, o tei hoo ia na ra. Mau tino àhuru mä piti teie ta Ietu i tono, mä te aò atu ia rätou, Eiaha e haere noa atu na nià i te èà o te mau e ateä i te hinaaro o te Atua Nui Tumu Tahi, e eiaha atoà e tomo atu roto i te ôire o to Tämäria ra: e haere tià atu rä i te mau mämoe o te ùtuafare o Ìteraèra i moè. I te êà, e poro haere òutou: «Te fätata mai nei te Hau o te raì. E faaora i tei maìhia, e faatià i tei pohe, e tämä i tei rëperahia, e tiàvaru i te mau tëmoni. Ua höroà-noa-hia mai ta òutou, e höroà noa ia òutou. Te manaò tumu o Ietu, ia ìte te mau pipi i te ère o te nünaa i te parau no te oraraa ia au i te hinaaro o te Atua Metua. Oia hoì, te ìteraa i te here i to na täuaro, e te hereraa ia na iho na roto i te reo e parau ra a höroà ma te tiäì òre ite faahoì, i te mea te here o te Atua, te hereraa ia i te täatoàraa i te mau parau e faahitihia ra i roto i te pïpïria. E ia hiò hoì tätou i te manaò e parauhia ra i roto i te mau taiòraa i faataahia no teie mahana, aita atu mea ta rätou e parau ra maori rä, tiàturi i te rahu a te Atua, tiàturi ia òe iho, te mea ia e päpü ai to òe mau haereà. Aita atu rä haapotoraa nehenehe roa aè maoti rä, teie ia reo to Ietu, Ua höroà-noa-hia mai ta òutou, e höroà noa ia òutou oia hoì ua ìte òe i te mea maitaì. Aita e ture, aita e faanahoraa, aita e faaheporaa, o òe e to òe Atua, tirä atu ai. E roaa ä ta te taata täpuniraa i muri mai i te hupehupe ; e moè atoà o ia i muri mai i te faanahoraa ; a tae atu ai i te faaheporaa, e ôtoheraa maitaì roa teie no te taata ei pärururaa ia na i te parauraa e, ta na i rave, eere na na i hinaaro. Aita atu ta te Atua tiaìraa ia òe maoti rä, ta òe haapäpüraa e, ua ìte ihoä òe i te mea maitaì, e ua ineine i te rave i te reira. I roto noa i teie parau, aita ä òe i faaìte i to òe tiàturiraa i te Atua, aita ä to òe vaha i hamama no te parau i to òe manaò, ua haapäpü ê mai na te Atua i to na tiàturiraa ia òe. Tano maitaì ai te reo o te Fatu e parau ra e, 7 I te êà, e poro haere òutou: «Te fätata mai nei te Hau o te raì.  E ia faatano tätou i teie parau i nià i te ôpuaraa a te Atua, teie ia to na faaauraa  Eere òe tei hinaaro mai ia ù, o vau rä tei hinaaro atu ia òe. O vai teie òe. Te taata te reira ta ù e parau ra. E au te òe no te taata hoê, aore ra no te hoê pupu taata, te hoê nünaa. Teie parau ta te Atua, eere te mea parau hänoa, ua faaroohia mai ra, ua faaroohia mai ia ; e aita ra, tirä atoà ia. E parau âfaro teie i nià i te taata, e nä ô paì ia tätou e : to ù vaha, to òe tarià. I reira e tupu ai te àhune ta te fenua e faaìte noa nei ia tätou te taata nei, te rahi mau nei te òhipa e ïti te feiä ôoti, tei faaìte i te ïti o te mau rave òhipa no te Hau o te Atua. Te haapii noa mai ra teie parau ia tätou e, te àhune o te mäa, eere no te mäa noa, no te âau atoà rä i faaineine e i färii i taua parau ra no te àhune. Ia tuuhia te here i roto i te àhune, maitaì taa ê to te mäa, riro noa ai ei mäa haìhaì roa.Te auraa, tei ia na noa ihoä te faaotiraa hopeà, aita ta te Atua e faaheporaa ia na, i te hinaaroraa e te òreraa e hinaaro i te Atua. Mai te ata e te taata, eita te ata e tano e haere o ia anaè ra i to na haereraa mai te faaruè mai i te taata no na i parauhia ai to te reira ata, no te mea aita to te ata e parau no na noa. Ua ìte atoà hoì tätou e, te taata aita to na e ata, e taata pohe ia, e no te märamarama i parauhia ai to te ata. Eita te ata e âfaì i te taata nä muri iho ia na, eita atoà hoì te taata e âfaì i to na ata nä muri iho ia na. E ata noa ihoä te ata, e taata noa ihoä te taata ; eita te ata e mono i te taata, aita hoì te parau o te taata i ôpanihia i roto i to na ata, eita rä to te tahi parau e tano ia faataa-ê-hia i to te tahi. E òhie tätou i te märamarama e, mea taa ê te huru o te taata tei ìte e, tei nià noa te mata o te Atua ia na, i to te taata tei färii e, mai ia na e to na ata, mai te reira atoà te auraa e täamu ra ia na i te Atua ; te au noa ra hoì te reira i te parau no to na hämaniraahia i te huru e te hohoà o te Atua. Te tahi vähi e tano e haapäpü, te mea ia e, aita te taata e hiò noa nei i te auraa âpï e faanaho ra i to na parau e te Atua, to na rä parau e to na Atua. Te Atua iho teie e faaòre nei i te ärea e faataa ê nei ia na i te taata, aita o ia e faaea noa nei i roto i te ätea e te moà, inaha te anihia nei te taata e haere mai te haèhaa e to Atua, oia hoì to òe Atua. Mai ia tätou e parau nei i te tahi tamarii e : to òe päpä, to òe mämä, te ani mai nei o Ietu ia òe ia hiò faahou i to òe parau e to òe Atua. Aita òe e anihia nei e hiò i te òhipa ta te tahi pae e rave ra, aore ra mai ta te tahi pae i rave noa mai na, mai teie atu e òhipa teie i roto ia òe e to òe Atua, na òrua e faanaho i to òrua parau, e òhipa òrua te reira. I parau ai o Ietu e, Te rahi mau nei te àuhune, te iti nei rä te rave òhipa.

 

Teraì òr. Faatura.