Ruta èv. 1.26-38 Hahaere ä

 

Tāpati 24 no Titema 2023.

TIAÌRAA MAHA

Hahaere ä

Taramo 89

1 Matetira a Ètana te âti-Ètera ra.

2 E tämau ä vau i te himene i te aroha o te Fatu, e na ta ù vaha e faaìte i te parau-mau na òe, i tërä uì i tërä uì.

3 I parau hoì au e: E tià to aroha i te vai-mäite-raa, tei te mau raì ra to parau-mau i te haamau-raa-hia.

4 Ua parau òe: «Ua fafauhia e au te faufa i tei haapaòhia e au ra, ua tapu vau i ta ù tävini ra, ia Tävita:

5 E haamau ä vau i to òe ra huaai e a muri noa atu, e patu vau i to òe ra teröno e tae noa atu i te mau uì atoà ra. Tera.

6 Ia haamaitaì te mau raì i ta òe ra räveà mana, e te Fatu, e te âmuiraa o te feiä moà ra, i ta òe ra parau-mau.

7 O vai hoì to te mau raì ra e au i te Fatu? O vai tei au i te Fatu i roto i te mau tamarii a tei mana ra?

8 E Atua mataù-roa-hia i te âmuiraa o te feiä moà ra, e ia faahanahanahia e te feiä atoà i pïhaì iho ia na ra.

9 E te Atua manahope, e te Fatu, o vai tei au ia òe ra? E mana rahi to òe, e te Fatu, e te haapunihia ra òe e ta òe ra parau-mau.

10 O òe hoì tei mana i te ûànaraa o te miti ra, e ia tupu to na àre, na òe e haamania.

11 Ua ôfatifati òe ia Rähapa mai te mea ua paruparu ê na, e na to rima ètaèta i haapurara i to mau ènemi.

12 Na òe te mau raì nei, e na òe atoà te fenua; te ao e to te ao atoà ra, na òe ä i hämani.

13 O àpatoèrau e o àpatoà, na òe i hämani; o Täpora e o Heremona tei himene hua i to òe ra iòa.

14 E rima püai to òe, ètaèta tei to rima, e te teitei roa ra to rima àtau.

15 O te parau-tià ra e te au, o te tumu ia o to òe ra teröno. O te aroha ra e te parau-mau, tei nä mua ia i to mata.

16 E ao to te mau taata i ìte i te reo òaòa ra. E hahaere ä rätou, e te Fatu, i te märamarama o to mata ra.

17 Te òaòa ra rätou i to iòa e mure noa atu te mahana, e ua teitei rätou i te parau-tià na òe ra.

18 O òe hoì te hanahana o to rätou püai, e na te here na òe ra i teitei ai to mätou tara.

19 O te Fatu mau ä to mätou tauturu, e tei moà i Ìteraèra nei, o to mätou ia arii.

20 I reira ta òe parau-ôrama-raa mai i to taata moà ra, e ua nä ô mai ra: «Ua tuu vau i te tauturu i nià i tei mana ra, ua faateitei au i te hoê i haapaòhia no roto i te mau taata nei.

21 Ua ìteä ia ù ta ù tävini o Tävita, e ua faatähinu vau ia na i ta ù monoì moà ra.

22 Na to ù iho rima o ia e haamau, e na to ù iho rima o ia e faaètaèta.

23 E òre roa o ia e vï i te ènemi, e òre hoì o ia e ìno i te taata parau ìino ra.

24 E täìrihia e au to na mau ènemi i mua i to na mata, e täìrihia e au te feiä i riri mai ia na ra.

25 Ei ia na te parau-mau na ù, e ta ù aroha vai ai e teitei hoì to na tara i to ù nei iòa.

26 E tuu vau i ta na rima àui i raro i te tai, e ta na rima àtau i raro i te pape.

27 E na na e pii mai ia ù e: «O ta ù metua òe, e ta ù Atua. E ta ù pare e ora ai au ra.

28 E faariro vau ia na ei mätahiapo na ù, e ia teitei o ia i te mau arii atoà o te fenua nei.

29 E vai ä ta ù hämani maitaì ia na, e ta ù faufaa ia na ra e päpü ia.

30 E haamau vau i to na ra huaai e a muri noa atu, e vaiiho taiàta hoì to na teröno mai te mau raì atoà nei.

31 Ia faaruè ta na mau tamarii i ta ù ture, e aore i haapaò i ta ù ra parau au;

32 ia faahapa rätou i ta ù ra haapaòraa, e aore i faaroo i ta ù ra parau:

33 e papaì au ia rätou i ta rätou ra hara i te papaì, e to rätou ìno i te täìri.

34 O to ù rä hämani maitaì, e òre ia e hopoi-ê-hia ia na, e òre hoì te parau-mau na ù ra e haamaìrihia.

35 Ta ù faufaa ra e òre e faaòrehia e au, e òre hoì e ruri ê i tei nä roto mai i to ù nei vaha.

36 Hoê aè nei a ù nei täpuraa i to ù iho ra moà: e e òre au e haavare ia Tävita.

37 E vai ä to na huaai e a muri noa atu, e to na teröno, mai te mahana ia i mua ia ù ra,

38 e tià ia i te vai-mäite-raa, mai te märama ra, e mai te ìte haavare òre i nià i te raì ra. Tera.

39 I teie nei rä, ua faaruè òe e ua haaveùveù; ua riri òe i ta òe i faatähinu ra.

40 Ua faaòre òe i te faufaa i to tävini nei, ua haaviivii òe i to na toröna i raro i te repo.

41 Ua vävähi òe i te mau âua na na, e ua huri-tumu-hia e òe to na mau haapüraa ètaèta.

42 Te haruhia ra o ia e te feiä atoà i haere nä te èà, e ua riro o ia ei faaìnoraa na to na ra mau taata-tupu.

43 Ua faateitei òe i te rima àtau o tei märô mai ia na, e ua faaòaòa òe i to na atoà ra mau ènemi.

44 Ua haamemu òe i te mata o ta na òè, e aita atu ra o ia e mau i te àroraa ra.

45 Ua faaòre òe i to na ùnaùna, e ua huri òe i to na teröno i raro i te repo.

46 Ua haamure òe i te mau mahana o to na ra âpïraa, e ua vehi òe ia na i te haamä. Tera.

47 Mai te aha ra te mäoro, e te Fatu, o to òe haamoèraa? E vaiiho noa änei i to riri ia àma noa na mai te auahi e a muri noa atu?

48 E haamanaò i te poto o to ù nei taime. E e aha òe i hämani ai i te mau tamarii atoà a te taata nei ei mea faufaa òre ra?

49 O vai te taata e ora e eita e ìte i te pohe, a ora ai to na värua i te rima o häte? Tera.

50 Tei hea, e te Fatu, to mau hämani maitaì tahito ra, ta òe i haamau i te parau-mau na òe ia Tävita ra?

51 E haamanaò, e te Fatu, i te faaìno i faaìnohia ai to mau tävini nei, e tei nià i ta ù ôuma te tähitohito o te taata nei e rave rahi.

52 Ta to mau ènemi i faaìno mai, e te Fatu, o tei faaìno mai i te haereà o tei faatähinuhia e òe ra.

53 Ia haamaitaìhia te Fatu e a muri noa atu. Âmene, e Âmene.

2 Tämuera 7.1-17

Perofeta Nätana.

(1 Ch 17.1-15)

1 E päpü atu ra to te arii pärahiraa i to na ra fare, e ua höroà mai te Fatu i te hau nö na i to na ra mau ènemi e àti noa aè,

2 ua parau atu ra te arii i te perofeta ra ia Nätana, a hiò na, te pärahi nei au i roto i te fare âreti, âreà te âfata o te Atua te pärahi nei ia i roto ìte päruru.

3 Ua parau atu ra Nätana i te arii, e haere e rave i ta òe e manaò na; tei ia òe hoì te Fatu.

4 Ua tae mai ra rä te parau a te Fatu i taua ruì ra ia Nätana, nä ô mai ra,

5 A haere, a parau atu i ta ù tävini ra ia Tävita, te parau mai ra te Fatu, e faatià mai ä òe i te hoê fare no ù ei pärahiraa?

6 Aita hoì au i pärahi i te fare mai ia ù ä i arataì mai i te tamarii a Ìteraèra mai Àifiti mai ä, e tae roa aè nei i teie nei mahana, i hähaere noa na vau nä roto i te pühapa e nä roto i te tëtene.

7 I roto atoà i taua mau mea atoà ra, ta ù i hähaere noa, e te tamarii atoà o Ìteraèra, i parau änei hoì au i te mau haavä ia Ìteraèra ta ù i parau atu e tiaì i ta ù mau taata ra ia Ìteraèra, i nä ô atu änei hoì au e, e aha òutou i òre i faatià ai i te tahi fare âreti na ù?

8 E teie nei, e parau hua atu òe i ta ù tävini ia Tävita, te nä ô mai ra te Atua Täpäota o te Fatu, i rave mai au ia òe mai te fare mämoe mai ä, mai te pee haereà i te mau mämoe, ei tävana no nià iho i to ù nei mau taata ia Ìteraèra:

9 e ei pïhaì atoà iho vau ia òe i to òe atoà ra mau haereà, e ua täpü-ê-hia e au to mau ènemi atoà. E nä ù hoì e faariro i to òe ra iòa ia rahi, mai te iòa atoà o te feiä rarahi i te ao nei.

10 E haapaò hoì au i te hoê vähi no to ù ra mau taata no Ìteraèra, e nä ù rätou e tänu i reira, e vai mau atu ä rätou i to rätou ra vähi mau, e eiaha roa ia haùti faahou; eiaha hoì te taata haùti ia haùti faahou atu ia rätou mai tei a mütaa iho ra;

11 mai ia ù ä i tuu i te mau haavä i nià iho i to ù ra mau taata ia Ìteraèra. E höroà hoì au ia òe ra ia pärahi noa òe, i to òe ra mau ènemi. Te faaìte atu nei hoì te Fatu ia òe nä na e patu i to fare na.

12 Ia hope roa hoì to òe ra puè mahana, e ia taòto atoà òe to òe puè metua, e faatià ai au i to òe ra huaai i muri aè ia òe ra, no to òe iho na ôpü, e na ù e haamau i to na ra hau.

13 Na na e faatià i te hoê fare no to ù nei iòa, e nä ù e haamau i to na teröno i to na ra pätireia e a muri noa atu.

14Ei metua vau nö na, e ei tamaiti o ia nö ù. Ia rave o ia i te hara ra, nä ù o ia e aò atu i te papaì taata nei, mai tei täìrihia te tamarii a te taata nei:

15 âreà to ù nei aroha, e òre roa ia vau e ìriti ê atu i te reira ia na, mai ia ù i nä reira ia Taura i ta ù i tuu ê atu i mua ia òe ra.

16 E to òe na fare o to òe ra pätireia, e mau ia i mua ia òe ra; to òe ra teröno, e mau ia e a muri noa atu.

17 Haapaò atu ra Nätana i teie nei mau parau, e teie nei ôrama, i te parauraa atu ia Tävita.  

Röma 16.25-27

25 E teie nei, ei ia na i tei tià ia faaitoito mai ia òutou, i tei au i te Èvaneria na ù nei, e i te parau ia Ietu Metia, ia au i te heheuraa mai i te parau àro i hunahia i te mau uì atoà mai tahito mai,

26 ua faaìtehia mai rä i teie nei, e no te faaue a te Atua pohe òre ra, i faaìtehia ai i te Ètene atoà, i te parau a te mau perofeta i päpaìhia ra, ia noaa ia rätou te haapaò faaroo ra.

27 Ei te Atua paari anaè ra te haamaitaì, ia Ietu Metia nei, e eiaha ia mure. Âmene.

Ruta èv. 1.26-38

Te faaararaa o te fänauraa o Ietu

26 E tae aè ra i te ono o te märama, ua tono mai ra te Atua i ta na merahi ia Täperiera i te hoê ôire i Tarirea o Nätareta te iòa,

27 i te hoê pötii i momoàhia i te hoê taata no te fëtii o Tävita, o Iotëfa te iòa; o Märia hoì te iòa o taua pötii ra.

28 E ia tomo mai te merahi i roto ra, ua nä ô mai ra o ia ia na: «Ia ora na, e tei here-hua-hia mai e. Tei ia òe te Fatu, e tei maitaì i te mau vahine atoà e.

29 Ìte aè ra o ia ia na höriri iho ra o ia i ta na parau, e feruri iho ra to na âau i te huru o taua aroha ra.

30 Ua parau mai ra te merahi ia na: «Eiaha e mataù, e Märia, ua herehia mai òe e te Atua.

31 E inaha, e tö òe, e fänau ta òe tamaiti, e na òe e maìri i te iòa ia IETU.

32 E rahi o ia, e e parauhia i te Tamaiti na te Teitei. E na te Fatu ra na te Atua e horoà mai i te teröno o to na ra metua o Tävita no na:

33 ei ia na te hau i te fëtii o Iatöpa e a muri noa atu; e e òre roa to na Pätireia e mure.

34 Ua parau atu ra Märia i taua merahi ra: «E aha ia e tià ai, aore hoì au i ìte i te taata?

35 Ua parau mai ra te merahi ia na, nä ô mai ra: «E pou mai te Värua Maitaì i nià iho ia òe, e na te mana o te Teitei e tämarü i nià iho ia òe, e parauhia ai hoì tënä na tamaiti moà, o te Tamaiti na te Atua.

36 E inaha hoì to tuaana o Èritäpeta, ua tö atoà o ia i te tamaiti i to na ruhiruhiäraa nei; e o te ono hoì teie o to na märama o tei parauhia ra, e uì.

37 Aore roa hoì e mea e òre te tià i te Atua.

38 Ua parau atu ra Märia: «Inaha ei tävini au no te Fatu, ia nä-reira-hia mai au mai ta òe i parau na. Reva ê atu ra taua merahi ra.

Manaò.

I te mavaèvaèraa no te haamanaòraa i te ôroà Fänauraa no te faaora o teie nei ao Ietu te Metia a te Atua Nui Tumu Tahi. Te maha teie no te Tiaìraa no roto mai teie parau ra i te taò Ratino tei parauhia "adventus " oia hoì te haereraa mai, te tiàraa mai te Faaora. Teie te maharaa o te tiaìraa hou te Noëra, i reira te mau taata Teritetiano e faaineine ai no te faatupu i te ôroà Fänauraa o Ietu. E 4 hepetoma te maoro o teie tau e haamata te reira i te maha o te tapati na mua aè i te Noëra.

Ua riro te tau tiaìraa ei taime faaineineraa i roto ia na iho no te faatupu i te ôroà haamanaòraa i te fänauraa te Faaora tei parauhia i teie mahana e Noëra, te hoê òhipa faufaa roa no te huitaata nei, no te mea ua riro mai te Atua ei taata i rotopü i te taata. Mai to na fänauraahia e tae roa atu i to na poheraa i nià i te tätauro, ua rave oia i te mau mea atoà i roto i te huru o te taata, taa ê noa atu te hara.

E piihia te mau taata atoà ia vai ära e ia täui i to rätou oraraa. Te haapäpü mai nei te mau parau a te mau perofeta, o te faaroohia nei i te mau Tapati atoà, i te tïtauraa no te faafäriuraa e te faaineineraa i te âau o te taata e to na faaroo. E täpaò atoà te haamataraa o te tau no te tiaìraa i te haamataraa o te hoê mätahiti âpï i te pae no te tereraa papa haamori e haamata te reira i te mau mätahiti atoà na roto i teie tau faaineineraa no te Noëra, e hope oia hoê mätahiti i muri aè i te hoê ä taime i te mätahiti Ètärëtia.

Ua riro te Taramo 89 èi tururaa i te tau no te taìraa èi faaìteraa no te faaroo o te hoê nünaa haapaò maitaì mai ia tätou i teie mahana, o te tiàturi nei i te fafauraa i fafauhia i to na mau tävini, o te òto nei rä a tiaì noa ai oia ia tupu te reira. Te faahiti ra teie mau parau faaauhia i to na mau tävini e te Atua, o tei tapu ia na i te hoê ôpu  mure ore. E rave rahi tumu parau rahi i roto i te Taramo 89:

-Mau ìrava 2-19 : E òaòa te Âti Iuta haapaò maitaì i te fafauraa a te Fatu e o Tavita.

-Mau ìrava 20-38: Te haamanaò ra o ia i te fafauraa i roto i to na mau huàhuàraa, ma te faatupu i te mau maitaì päpü o Tavita, te niu no te mau haamaitaìraa atoà no Ìteraèra.

-Mau ìrava 39-46: Te faaìte mai nei O ia i te taa-ê-raa i rotopü i te haamaitaìraa i fafauhia no te ùtuafare o Tavita e to rätou àti i teie nei.

-Te mau ìrava 47-52: Te ui nei O ia i te mau uiraa e te pure nei.

-Ìrava 53: I muri aè i te hoê taime mämüraa, e faaoti oia i teie mau parau na roto i te ârueraa, ma te tiaì i te aroha o te Atua.

Noa atu te mau huru hiòraa atoà, e mea päpü roa no te taata tiàturi e, te höroà o te aroha e te tiàororaa a te Atua, aore ia e tätarahapa Hepera 11:29. Noa atu te ôfatiraa ture, ua vai noa te teröno o Tavita i raro i te repo, aita rä i moèhia. Te püpü mai ra te Taramo 89 i te au maite o te aroha e te haapaò maitaì.

E au maite ai te mau faaìteraa parau i roto i te 2 Tämuera 7:1-17 èi taime faufaa rahi i roto i te Faaauraa Mätamua a te Atua. Teie te parau tapu a te Atua ia Tavita e haamau i to na ôpu fetii e a muri noa atu. I roto i teie mau parau, te faaite nei Tavita i to na hinaaro ia patu i te hoê hiero no te Fatu. Teie rä, na roto i te perofeta Nätana, ua parau te Atua ia na e e ère na na e patu i te hoê fare no te Atua, na te Atua rä e haamau i te hoê fare te hoê ôpu hui arii no Tavita.

Teie te tahi mau manaò faufaa no roto mai i teie mau ìrava:

-Ua ôpua o Tavita e patu i te hoê hiero no te Atua, aita rä te Atua i farii i te reira.

-Ua tapu te Atua ia Tavita e e haamauhia to na ôpu fetii e a muri noa atu.

-Ua fäfau te Atua e e huaai oia na Tavita no te patu i te hiero.

Noa atu te mau hara a ta na huaai a muri aè, ua tapu te Atua eiaha e ìriti ê i to Na maitaì ia Tavita, mai Ta  na i rave i nià ia Taura.

E mea faufaa teie mau ìrava no te mea te haamau nei te reira i te fafauraa a te Atua no nià i te hoê ôpu hui arii mure òre o Tavita, tei riro èi mea faufaa i roto i te tatararaa a te Faaauraa  Mätamua no nià i te tiàraa arii e i te tiàturiraa teretetiano ia Iesu Metia ei faatupuraa i taua fafauraa ra. Te haamatara rä te reira i te auraa o te tiàraa arii i haamauhia e te Atua e te faaìte atea rä i te faatereraa tautani noa atu i te mätahiti a te Metia.

-Taramo 89, 16 E ao to te mau taata i ìte i te reo òaòa ra. E hahaere ä rätou, e te Fatu, i te märamarama o to mata ra.

-2 Tämuera 7, 2 ua parau atu ra te arii i te perofeta ra ia Nätana, a hiò na, te pärahi nei au i roto i te fare âreti, âreà te âfata o te Atua te pärahi nei ia i roto ìte päruru.

-Röma 16, 26 ua faaìtehia mai rä i teie nei, e no te faaue a te Atua pohe òre ra, i faaìtehia ai i te Ètene atoà, i te parau a te mau perofeta i päpaìhia ra, ia noaa ia rätou te haapaò faaroo ra.

-Ruta Èv. 1, 38 Ua parau atu ra Märia: «Inaha ei tävini au no te Fatu, ia nä-reira-hia mai au mai ta òe i parau na. Reva ê atu ra taua merahi ra.

Te faaìte nei te mau ìrava i roto i te Ruta Èv. 1:26-38 o te haapoupouraa ia, i reira te merahi Täperiera e faaìte ai ia Maria e, e tö o ia e e fänau mai o ia ia Ietu, te Tamaiti a te Atua.

Teie te tahi mau manaò faufaa no roto mai i teie mau ìrava :

Ua tonohia mai te merahi Täperiera e te Atua i Nätareta no te paraparau ia Maria, tei momoàhia ia Iotëfa, te hoê taata no te ùtuafare o Tavita.

Ua aroha mai ra o Täperiera ia Maria, ma te parau atu ia na e ua färii o ia i te aroha e tei pïhaì ho te Fatu ia na.

Ua faaìte o Täperiera ia Maria e e tö o ia e e fänau mai o ia i te hoê tämaïti, o ta na e maìti i te iòa o Ietu.

E parauhia Iesu te Tämaïti a tei Teitei, e na te Fatu ra o te Atua e höroà mai i te teröno o to na metua tane o Tavita.

E faatere Arii o Ietu i nià i te ùtuafare o Iatopa e a muri noa atu, e aita e hopeàraa to ta na faatereraa.

Ua ui o Maria nahea te reira e nehenehe ai e tupu, no te mea e paretenia oia.

Ua faataa mai ra o Täperiera e, e pou mai te Varua Moà i nià ia na e e täpoì te mana o te Teitei Ia na. No reira, te Tämaïti moà o te fänauhia i roto ia na, e parauhia ia o ia e, e Tämaïti na te Atua.

Ua färii o Maria i te parau faaìte a te merahi e ua auraro i te hinaaro o te Atua, ma te faariro ia na iho ei tävini no te Fatu.

E mea faufaa roa teie ìrava no te faaroo Teretetiano no te mea te tohu nei te reira i te hapüraa temeio no Ietu, tei hiòhia mai te tupuraa o te fafauraa a te Atua ia Tavita no te hoê ôpu hui arii mure òre.

Ua mäìtihia o Maria ia amo ia Ietu no te tahi mau tumu no te haehaa e te faaroo i te Atua, E tamahine haehaa o Maria e te paieti no Nätareta. E tiàturi rahi to na i te Atua e ua färii ia haapaò i to Na hinaaro. Täiva òre i te Atua: Ua faaìte Maria i te hoê hiòraa täiva òre i te Atua. Ua parau oia e è i te Atua, te hoê " E " tei faataui i to na oraraa haehaa i Nätareta. Viivii ore, e paretenia o Maria, oia hoì, aita o ia i ora i pïhaì iho i ta na tane, o Iotëfa, e aore rä, i pïhaì iho i te tahi atu taata. Ua mäìti te Atua i te hoê vahine paretenia no te fänau ia Ietu, ia roaa hoì ia na te hoê tino maitaì roa. No reira, ua nehenehe o Ietu e faaora i te taata i te hara e te pohe. Te fafauraa a te Atua ia Tavita ua âfaìhia Maria ia Iotëfa ra, te hoê taata no te ùtuafare o Tavita. Te faarirohia ra te fänauraa o Ietu e Maria mai te tupuraa o te parau tapu a te Atua ia Tavita o te hoê ôpu fetii mure òre. Te faaìte ra teie mau tumu no te aha Maria i mäìtihia ai èi metua vahine no Ietu. Na to na faaroo, te haehaa, te viivii òre e te haapaò maitaì i te Atua i faariro ia na ei taata maitaì ro aè no teie òhipa moà. E nehenehe e hiò i te tupuraa mau o te Ruta Èv. Pene 1 i te mau ìrava 26 e tae i te ìrava 38, te tupuraa te ôpuaraa faaora a te Atua, na roto i te mau raveà e rave rahi.

-Te rave ra te Atua i te taahiraa mätamua: Mai ta te Atua i rave no te tono i te merahi Täperiera ia Maria ra, te tämau noa ra te Atua i te rave i te taahiraa mätamua i roto i to tätou oraraa i teie mahana. Te ìmi nei Oia ia tätou e te pii nei o ia ia tätou i te hoê auraa hohonu aè e o tätou.

-Te pähonoraa no te faaroo : Ua pähono o Maria i te piiraa a te Atua ma te faaroo hohonu e te haehaa. Oia atoà, ua piihia tätou no te pähono atu i te Atua ma te faaroo hohonu e no te parau " e " e " i to Na hinaaro i roto i to tätou oraraa.

-Te òhipa a te Atua i roto ia tätou : Mai ta te Atua i faaineine ia Maria no ta na òhipa moà, e òhipa atoà te Atua i roto ia tätou, no te faaineine ia tätou no te mau òhipa ta Na i faaineine no tätou.

-Te mana o te Atua : Mai te Varua Moà tei pou mai i nià ia Maria no te faatupu i te temeio no te fänauraa o Ietu, oia atoà ia te Varua Maitaì e òhipa nei i roto ia tätou i teie mahana, ma te höroà mai ia tätou i te puai no te faaruru i te mau tämataraa e no te rave i te maitaì.

-Te haehaa o te Atua: Ua mäìti te Atua i te hoê pötii haehaa no Nätareta no te riro ei metua vahine no Ietu. Te haamanaò nei te reira ia tätou e e mea pinepine te Atua i te heheu ia Na iho na roto i te mau raveà manaò-ore-hia e te haehaa, e te haafaufaa nei O ia i te haehaa.

-Te parau tapu a te Atua: Te faaòreraa i te hara, o te tupuraa ia o te parau tapu a te Atua ia Tavita no nià i te hoê ôpu hui arii mure òre. Te haamanaò mai nei te reira ia tätou e e haapaò maitaì te Atua i ta Ma mau fafauraa.

Ei haapotoraa, te haamanaò mai nei te Parau Maitaì i papaìhia e Ruta i te pene 1 i te mau ìrava 26 e tae ìrava 38 ia tätou e, e òhipa noa te Atua i roto i to tätou oraraa, ma te pii ia tätou i te hoê auraa hohonu aè e o Na, ma te faaineine ia tätou no ta tätou òhipa veà  tono i roto i te oraraa nei, e ma te höroà mai ia tätou i te puai no te faaruru i te mau tämataraa. Te faamanaò atoà mai nei te reira ia tätou i te faufaa rahi ia pähono atu i te Atua ma te faaroo hohonu e te tiàturi i ta Na mau fafauraa.

 

Maitaì tätou i teie ôroà Fänau e te Mätahiti âpï 2024.

 

Teraì òr. Faatura.