Ioane 12.20-33 Huero, Ora Mure Òre.

 

Tāpati 17 Pipiri/Mäti 2024.

Huero, Ora Mure Òre

Mau taiòraa.

Taramo 51

1 Na te Mënätehe. Taramo na Tävita.

2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra.

3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara.

4 E horoi hua mai òe ia ù i to ù nei ìno, tämä hua mai ia ù i ta ù nei hara.

5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù.

6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra.

7 Inaha, i fänau mai au mä te hara, e i töhia vau e ta ù metua vahine mä te ìno.

8 Inaha, o te parau-mau no roto ra ta òe e hinaaro. E haapii mai òe ia ù i te haapaò maitaì i te vähi moè ra.

9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona.

10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra.

11 E huna ê atu òe i to mata i ta ù nei mau hara, e parai hua i to ù nei mau ìno.

12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei.

13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei.

14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra.

15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe.

16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha.

17 E vëvete na òe, e te Fatu, i ta ù vaha, e na ta ù vaha e ârue ia òe.

18 Eere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia-täauahi.

19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira.

20 Ei hämani maitaì to òe ia Tiona; e patu hoì òe i te âua i Ierutarëma nei.

21 Ei reira òe e mauruüru ai i te tütia parau-tià e te tütia-täauahi täatoà mau ra; ei reira te puaatoro e hopoihia ai i nià i ta òe ra fata

Ieremia 31.31-34

Te faufaa/faaauraa âpï

31 Te parau mai ra te Fatu inaha, te fätata mai ra te ànotau, e faaau ai au i te ùtuafare o Ìteraèra e te ùtuafare o Iüta i te tahi faufaa (faaauraa) âpï;

32 eiaha mai te faufaa ta ù i faaau atu i to rätou ra mau metua, i te mahana i rave atu ai au i to rätou rima, ia arataì mai au ia rätou mai te fenua ra i Àifiti; e ua ìno iho ra ta na faufaa na ù ra ia rätou, i haapaò noa ai au ia rätou mai te täne ra te nä reira mai te Fatu,

33 Teie rä te faufaa ta ù e faaau atu i te ùtuafare o Ìteraèra; te nä ô mai ra te Fatu, ia oti aè te reira ànotau, e tuu vau i ta ù pure i roto ia rätou, e päpaì au i te reira i roto i to rätou âau; e e riro vau èi Atua no rätou, e èi taata hoì rätou nö ù.

34 E òre hoì rätou e haapii faahou, o te taata o to na iho taata-tupu, o te taata a to na iho taeaè, i te nä-ô-raa atu e, ia ìte hoì òutou i te Fatu; e ìte päatoà hoì rätou ia ù, o tei haèhaa e o tei rahi te parau mai ra te Fatu; e faaòre hoì au i ta rätou hara, e òre au e manaò faahou i ta rätou ìno.

Hëpera 5.7-9

7 Ua püpü hoì o ia i te pure i ta na oraraa ra, i te aniraa atu ia na mä te òto rahi e te roimata, i tei tià ia faaora ia na mai te pohe mai ra, ei faaroohia o ia i ta na i mataù ra.

8 E Tamaiti noa ä iho hoì o ia, i ìte o ia i te auraro i to na ra mau pohe.

9 E no te mea ua haamoà-roa-hia o ia, riro atu ra o ia ei tumu no te ora mure òre no te feiä atoà e faaroo ia na ra.

Ioane 12.20-33

Te hora o te tätauro

20 E taua feiä i haere mai e haamori i te Atua i te ôroà ra, e Herëni ia te hoê pae.

21 Ua haere mai ra rätou ia Firipa o Petetaita i Tarirea ra, ua parau mai ra ia na, na ô mai ra: «E hoa, te hinaaro nei mätou ia ìte mätou ia Ietu.

22 Ua haere atu ra Firipa, faaìte atu ra ia Àneterea, ua parau mai ra hoì Àneterea räua o Firipa ia Ietu.

23 Ua parau atu ra Ietu ia rätou, nä ô atu ra: Ua tae i te hora e haamaitaìhia ai te Tamaiti a te taata nei.

24 Âmene, âmene, e parau atu vau ia òutou: ia tuuhia te hoê huero tïtona i raro i te repo, ia òre rä ia pohe ra, ua vaiiho hoê noa ia; ia pohe rä, rahi roa atu ra ia te hotu.

25 O të nounou i to na ora, ua ère ia i te ora, e të òre e hinaaro i to na ora i teie nei ao, ei ora-mure-òre ia to na i te ao a muri nei.

26 O te taata i hinaaro ei tävini no ù ra, a pee mai ia ia ù, e te vähi ta ù e pärahi ra, ei reira atoà ia ta ù tävini; e ia tävini mai te taata ia ù ra, na ta ù Metua ia e utuà mai ia na.

To Ietu faaìteraa i to na pohe

27 Ua horuhoru roa ta ù värua i teie nei. E e nä hea vau? E nä ô änei: E ta ù Metua, e faaora ia ù i teie nei hora? I haere mai ai rä vau no teie nei hora.

28 E ta ù Metua, e haamaitaì i to iòa. Ua ìteä mai rä te hoê reo no nià i te raì i te nä-ô-raa mai: Ua haamaitaì au, e e haamaitaì faahou atu ä vau.

29 Ua ìte hoì te mau taata i pïhaì iho ra i te haruru, e ua parau aè ra: E pätiri Ua nä ô aè ra hoì te hoê pae:

E merahi të parau mai ra ia na.

30 Ua parau atu ra Ietu, nä ô atu ra: Eere no ù i tae mai ai taua reo nei, no òutou rä.

31 Ei teie nei e faahapahia ai teie nei ao, ei teie nei e hee ai te arii o teie nei ao.

32 Âreà ia hopoihia vau i nià ra, e ùmehia mai ia e au te taata atoà ia ù nei.

33 I nä reira atu ra o ia i te faaìteraa atu i te huru o to na pohe ia pohe ra.

Mau ìrava turu.

Te mau taiòraa o te faataahia no teie mahana o te hoê ia o te mau papaìraa mätau-maitaì-hia e tei puta püpü i roto i te Pîpîria. Ua riro teie mau parau mai te hoê himene no te faaìte i te tätarahapa, te hoê tiàororaa no roto mai i te âau tei î i te òto e te mau aniraa ia faaòrehia te hara a te mau taata tei ìte i te faufaa no te Aroha e te Here o te Atua Nui Tumu Tahi. E horoà mai te reira ia tätou i te hoê feruriraa hohonu no nià i te hara, te faaòreraa hara, e te faaoraraa. Teie te tahi mau täviri no te märamarama i teie mahana i to tätou nei ànotau.

Te fäìraa i te rahi o te hara a te hoê, e ta te taata, i roto i teie faanahoraa, te faaìte nei te taata faaroo Atua i ta na hara ma te ìte päpü e, ua ìte au i ta ù mau hara, e tei mua noa ia ù nei ta ù hara. E haamauiui hohonu te hara ia tätou e e heru oia i te hoê àpoo i roto i to tätou värua. E àroraa riàrià teie, e àroraa e te Atua. E naò noa ia tätou i te parauraa e ua matara te hara i te mau taata atoà mai ia Àtamu mai ä i te faaìteraa a Pauro i to Roma i te pene 5 i te mau ìrava 12 e tae i te ìrava 21. Ua fänauhia tätou i roto i te ìno e aita e tià ia tätou ia rave i te hara. E haamata te tätarahapa na roto i te faaìteraa i to tätou huru i te pae o to tätou tino. Te faaìnoraa i te Atua, te hara ia no te ôfatiraa ia i te Ture a te Atua na mua roa. Mai ta teie manaò e parau ra e, mea taa ê roa te reira i te mau mea maitataì atoà i roto i te huru o te Atua. Mea riri roa na te Atua te hara e a muri noa atu.Te parau ra o Tavita e, Ua hara vau ia òe anaè ra, ua rave au i te ìno i to mata na, ia riro oe èi taata parau-tià i ta òe ra utuà, ma te faahapa òre i ta òe haaväraa Taramo 51 ìrava 6. Te tätarahaparaa e te aroha, te parau mau te reira e hinaarohia ra i te faaìte oia hoì, te tätarahapa o te raveà ia a te Atua no te täui i to tätou hiòraa i te hara. E nehenehe ta tätou e tätarahapa no te mea e fänaò tätou i to Na aroha i te faaìteraa a te Ioane 1 i te pene 1 i te ìrava 9. E tià ia tätou i te tämähia no te mea ua amo o Ia i ta tätou mau hara. E färiu ê te Atua i ta tätou mau hara no te mea e färiu o ia i te Metia tei âfaì mai i te reira i nià i te tätauro no tatou. Te faahaamanaò mai ra teie mau parau ia tätou e ua riro te tätarahapa èi èà e ärataì i te faaoraraa, te tämäraa, e te faahauraa e te Atua, ia tupu te faatiàmaraa. O te hoê ia tiàororaa hohonu o te tïtau manihini ia tätou ia färiu atu i te aroha hopeà òre o to tätou nei huru i mua i te rahu e i teie nei ao. Mai te hoê pehepehe ra o te faaìte rä i te tätarahapa e te tätarahapa. E mai te pure no te fäìraa i mua i te Atua, ma te faaìte i te tätarahapa no te mau hara e te täparuraa i te aroha o te Atua. I roto i teie parau, e täparu te taata aò i te aroha o te Atua e e tätarahapa o ia i te mau òhipa ìino i ravehia. Teie te tahi mau tuhaa faufaa no te märamaramaraa i te poroì tumu o te mau manaò, A ìte i te ìno rahi o te hara, Te faataa nei teie manaò, te taata papaì i teie mau parau, i ta na hara ma te ìte päpü e : Te fäì nei au i ta ù mau hara, e te vai noa nei ä ta ù hara i mua ia ù nei Taramo 51 ìrava 5. E faaìno roa te hara i to tätou manaò haava e e heru oia i te hoê âpoo i roto ia tatou. O te hoê ia àroraa i te Atua iho. O te hoê ia tiàororaa no roto roa mai i te âau o te tïtau manihini nei ia tatou ia färiu atu i te aroha hope òre o te Rahu Nui. Ieremia i te 34 i te mau ìrava 31 e tae i te ìrava 34 o te hoê ia fäfauraa i te hoê fäfauraa âpï ta te Atua e haamau i te ùtuafare o Ìteraèra e te ùtuafare o Iuta e i to te ao nei. Teie te tahi mau täviri no te haaharoàroà i teie mau ìrava ia au i te hoê hiòraa : E perofeta o Ieremia o tei ora i te hoê tau ârepurepu i haamataùhia ai o Iuta e te haruraa i Päpuronia. Ua ôfati te nunaa i te faaäuraa mätamua a te Atua, ua tapu rä te Atua i te hoê faaäuraa âpï. Te faaäuraa âpï, ua faaìte te Atua e, e haamau o Ia i te hoê fäfauraa taa ê atu i tei ravehia e to rätou mau tupuna i te taime a faaruè ai rätou ia Aifiti. Eita teie fäfauraa âpï e niuhia i nià i te mau ture no rapae, i nià rä i te hoê täuiraa i roto ia rätou E tuu vau i ta ù ture i roto ia rätou, e päpaì au i te reira i roto i to rätou âau. E riro te Atua èi Atua no rätou, e e riro rätou èi nunaa no na. te ìte no nià i te Atua. I roto i teie fäfauraa âpï, e ìte te mau taata atoà i te Fatu, mai te mea ïti e tae noa atu i tei rahi roa ra. E ère faahou te reira i te ìte i te pae feruriraa, e täairaa piri roa rä e te Atua. Aita e tïtauhia ia haapii ia vëtahi ê ia ìte i te Atua, i te mea e, e ìte päpü te mau taata atoà ia Na. Te faaòreraa hara, Ua fäfau te Atua e faaòre oia i ta rätou mau hara e èita oia e haamanaò faahou i ta rätou mau hara. E parau fäfau ia no te here, te maitaì e te faahauraa. E aniraa rä ia ìte i te Atua iho e ia ora mai te au i to na hinaaro. No te ìte roa atu i te Atua, teie te tahi mau taahiraa faufaa, te hinaaro mau na mua roa, e tià i te hoê taata ia hinaaro e ìte roa atu i te Atua. E haamata te reira na roto i te hoê hinaaro hohonu e farerei ia na e e faatupu i te hoê täairaa e o na, i pïhaì iho i te Atua A rave ai i te taime ia hanahana te Atua. E Parau na te Atua te Pîpîria i päpaìhia e te feiä i uruhia i to na Värua, e täuturu te taiòraa i te reira ia tätou ia ìte maitaì atu â i te reira. E haamäramarama te Värua Maitaì ia tätou a taiò ai tätou i te mau mea e àua haaàti nei ia tätou. E mea faufaa atoà te pure a paraparau i te Atua mai te hoê hoa, a faaìte i to tätou mau manaò, to tätou mau òaòaraa e to tätou mau òto. Te auraa o Ietu Metia, o Ietu te èà e tae atu ai i te Atua ra. A farii ia Na èi Faaora e ei Fatu no tätou. E mea na roto ia na tätou e ìte ai i te Atua. E mea faufaa roa te parau no to na Tätauro e te ärai a Ietu no teie auraa. Te faaroo o te taata iho te faaòhipa i to na iho faaroo. A tiàturi e, ua here te Atua ia tätou e e faanahoraa faahiahia ta Na no to tätou oraraa. A tuu i to tätou tiàturiraa atoà i nià ia Na, e a haapii i te huti mai i to tätou faufaa e te haapäpüraa na roto mai i to Na aroha, to Na here. Te ìteraa i te Atua iho, a tuu ia Na na mua roa i roto i te mau tuhaa atoà o to tätou oraraa. A vaiiho ia tätou ia ärataìhia e ta Na Parau e to Na aro, ei reira tätou e ìte ai i te hoê auraa hohonu e te faufaa e o Na.

-Taramo 51, 17 E vëvete na òe, e te Fatu, i ta ù vaha, e na ta ù vaha e ârue ia òe.

-Ieremia 34, 34 E òre hoì rätou e haapii faahou, o te taata o to na iho taata-tupu, o te taata a to na iho taeaè, i te nä-ô-raa atu e, ia ìte hoì òutou i te Fatu; e ìte päatoà hoì rätou ia ù, o tei haèhaa e o tei rahi te parau mai ra te Fatu; e faaòre hoì au i ta rätou hara, e òre au e manaò faahou i ta rätou ìno.

-Hëpera 5, 9 E no te mea ua haamoà-roa-hia o ia, riro atu ra o ia ei tumu no te ora mure òre no te feiä atoà e faaroo ia na ra.

-Ioane 12, 28 E ta ù Metua, e haamaitaì i to iòa. Ua ìteä mai rä te hoê reo no nià i te raì i te nä-ô-raa mai: Ua haamaitaì au, e e haamaitaì faahou atu ä vau.

I roto i te Hepera i te pene  5 i te mau ìrava 7 e tae i te ìrava 9, te parau nei te taata päpaì no nià i te Metia e to Na tiàraa èi Tahuà Nui. Teie te hoê faataaraa niuhia i nià i te mau tätararaa taa ê a te Pîpîria, i te roaraa o to na oraraa i nià i te fenua nei, ua faatae te Metia i te mau pure e te mau täparuraa i te Atua, ma te taì e te puai te tahe o to Na roimata. Ua pure o ia i te Atua, o te nehenehe e faaora ia na i te pohe. E ua faaroo te Atua ia na, no te mea ua täpeà o ia i to na tiàturiraa maitaì, e te àueue òre. E Tämaïti te Metia na te Atua, e parau mau te reira, tera rä, na roto i to na mau mauiui atoà ua haapii o ia i te haapaò. Ua faariro te Atua ia na èi taata maitaì roa e te faahiahia. Noa atu e e Tämaïti oia na te Atua, ua haapii oia i te auraro na roto i te mau mea atoà ta na i mauiui. E no te mea ua ärataìhia o ia ia au i te Mana Atua i riro mai ai o ia, te tumu no te Ora Mure Òre, no te mea ua faariro te Atua ia na èi tahuà rahi i roto i te reni no Merehiteteta.

E Tämaïti te Metia na te Atua, e parau mau te reira, tera rä, na roto i to na mau mauiui atoà ua haapii o ia i te haapaò. Ua faariro te Atua ia na èi taata maitaì. Te haapäpü nei teie mau ìrava i te tiàraa o te Metia èi tahuà Nui, to Na mauiui e to na haapaò, e e mea nahea o Ia i te riroraa èi tumu no te faaoraraa mure òre no te feiä e haapaò i ta Na parau. E ìtehia te faahitiraa parau i roto i te èpitetore i to Hëpera i te pene 5 i te mau ìrava 7 e tae i te ìrava 9, ìrava 7 Ua püpü hoì o ia i te pure i to na oraraa ra, i te aniraa atu ia na mä te òto rahi e te roimata, i tei tià ia faaora ia na mai te pohe mai ra, ei faaroohia o ia i ta na i mataù ra. 8 E Tämaïti noa ä iho hoì o ia, i ìte o ia i te auraro i to na ra mau pohe. 9 E no te mea ua haamoà-roa-hia o ia, riro atu ra o ia èi tumu no te Ora Mure Òre no te feiä atoà e faaroo ia na ra.

E tahuà o Ietu no te mau tahuà atoà, te faahiti ra te taata päpaì i te òhipa a te Metia èi tahuà nui. Te faahiti ra o ia mea nafea to Ietu faataeraa i te mau pure e te mau âparauraa i te Atua, i te roaraa o to na oraraa i te fenua nei. Ua riro teie mau pure no to na iho mauiui e to na pohe e fatata mai ra. Ua ìte maitaì o Iesu te faufaaraa o ta na òhipa e ua here i te hinaaro o te Atua. Ua faaroo te Atua i ta na mau pure e ua pähono ia na, ma te faaìte ia i te haapaò maitaì o te Atua i ta Na Tämaïti. Na roto i to na mau mamae ua färii o Ietu te Tämaïti a te Atua, ia haapii o ia i te auraro na roto i to na mau mauiui. Ua riro to Na mamae ei tuhaa faufaa roa no to Na tiàraa èi Faaora no to te Ao nei. O ia i faaäuhia ia Merehiteteta, na roto i te reo Hëpera מַלְכֵּי־צֶדֶק malki-ṣedeq, oia hoì te auraa arii o te parau-tià. E taata o ia no te Pîpîria tei ìtehia i roto i te àamu no Âperahäma i roto i te puta Tenete.

I roto i te Ioane pene 12 i te mau ìrava 20 e tae i te ìrava 33, te ìte nei tätou i te hoê ìrava tei î i te mau haapiiraa. Teie te tahi mau manaò no nià i teie mau ìrava, I te ôroà Pata, e haere te tahi mau Herëni i Ierutarëma no te haamori i te Atua. Ua färiu rätou i nià ia Firipa, te hoê o te mau pipi a Ietu, e ua ui atu ra,  ua hinaaro mätou ia ìte atu ia Ietu. Ua färii atu ra o Firipa raua o Âneterea i teie aniraa ia ìte rätou ia Ietu. No teie färereiraa mätamua e parau o Ietu i te parau no te fenua, e tuu o ia i mua ia rätou te parau no te huero tïtona mai te peu e èita o ia e pohe, e vai noa o ia anaè, mai te peu rä e e pohe o ia, e hotu rahi ia te noaa mai.

Te faataipe ra teie huru parauraa i te poheraa e te tià-faahou-raa o Ietu. Na to Na mau mauiui e ta Na tutia e höroà mai i te Ora Mure Òre. Te tuu nei o Ietu i teie parau i mua i te taata atoà e taiò nei i te Pïpïria ia ìte i te maìti i rotopü i te oraraa i te fenua nei e te Ora Mure Òre. Te haapii ra o Ietu i te taata i te here i to na oraraa i te fenua nei, e ère ia o ia i te reira, tera rä, te taata o te faataa ê ia na i te reira no te Atua, e täpeà ia o ia i te reira, no te Ora Mure Òre. Te ani mai nei o ia ia tätou ia pee ia na e ia tävini i te Atua. Te hora te reira no te faahanahanaraa, tei parau-atoà-hia te hora o te taata tiàturi a te Atua. Te faaìte ra o Ietu i to na hitimahuta i te hora e fatata mai ra. Aita o ia e ani nei ia faaorahia o ia mai teie atu hora, no te mea o te reira mau ta na i haere mai. Ua pure o Ia, E ta ù Metua, ia raa to òe iòa. Te pähono mai nei te hoê reo no te raì mai e, ua haamaitaì au ia Na, e e haamaitaì faahou ä vau ia Na. E reo teie no te haaväraa i to te Ao nei e te teitei o Ietu e tiàvaruhia te arii o teie nei ao oia hoì te mau puai o te ìno. Te faaìte ra o Ietu e ia faatiàhia mai o ia mai te fenua mai, e huti mai o ia i te taata atoà i nià ia na iho. Te faahohoà ra teie tiàraa teitei i to na poheraa i nià i te tätauro. Naò noa teie manaò i te parauraa e, te ani mai nei te Ioane pene 12 i te mau ìrava 20 e tae i te ìrava 33 ia tätou ia hiò ia Ietu, ia marämarama i ta Na faatupuraa òhipa, ia mäìti i te Ora Mure Òre, e ia pee ia Na tei  haapaò i te tutia faahauraa e te Atua.

Te höroà mai nei o Ioane pene 12 i te mau ìrava 20 e tae i te ìrava 33 i te mau haapiiraa hohonu e au no to tatou oraraa i te mau mahana atoà. Teie te tahi mau manaò no nià i te raveà e tià ai ia tätou ia faaòhipa i teie mau parau i roto i to tätou oraraa :

1-Te ìmiraa ia Iesu : Mai te mau Herëni i hinaaro e ìte ia Iesu, e tià ia tätou ia ìmi i te ìte o vai o Ietu iho. E nehenehe te reira e ravehia na roto i te pure, te taiòraa i te Pîpîria tei tuuhia mai i roto i to tätou reo Mäòhi, e te fëruri-hohonu-raa i nià i to na oraraa e ta na mau haapiiraa. Ia rave tätou i te taime no te faahohonu i to tätou täaihonoraa e o Ietu, e nehenehe ia tätou e marämarama maitaì aè i to Na hinaaro no tätou.

2-Te huero tïtona : Ua faahiti o Ietu i te tïtona e tià ia pohe no te faahotu. Oia atoà, i te tahi mau taime, e tià ia tätou ia faaruè i to tätou iho mau hinaaro e mau hinaaro no te tävini i te Atua e ia vëtahi ê. Te auraa ra, e haapae i to tätou hanahana, to tätou taime, aore ra to tätou iho mau hinaaro no te maitaì o te taatoàraa. E tià ia faataipehia te tïtona i te maa ufi, ia marö te tumu ufi o te rahi te reira o te hotu, teie te maa i roto i te ôroà eufari e te vai haari i Lifou i Kanaky.

3-Te mäìtiraa i te Ora Mure Òre : Te faaitoito mai ra o Ietu ia tätou eiaha i te ora i te ora ta e fenua e höroà nei ia tätou. E tià ai i te ìmiraa i te Ora Mure Òre ia riro èi òhipa mätamua roa na tätou. E tïtau te reira ia vaiiho i te mau mea o te täpeà ia tätou, mai te miimii, te nounou, aore ra te ìmiraa i te mau mea òaòaraa poto noa.

3-Te Haapaò e te Tutia : Ua auraro o Ietu i te hinaaro o te Atua e tae roa atu i te tätauro. E tià atoà ia tätou ia tütava i te auraro i te Atua, noa atu e e tïtau te reira i te mau haapaeraa. Te auraa ra, e faaòre i te hapa, e tävini ia vëtahi ê, e aore rä, e tämau noa i roto i te faaroo noa atu te mau tämataraa, te mau faahemaraa.

4-Te hanahana o te Atua : Ua pure o Ietu ia faahanahanahia te iòa o te Atua. Mai te reira atoà tätou, e tià ia tätou ia ìmi i te ora no te hanahana o te Atua. E tià i ta tätou mau òhipa, ta tätou mau parau, e to tätou mau manaò ia faaìte i te rahi o te Atua e ia haafatata atu ia vëtahi ê ia Na ra. Ia ìmi tämau tätou ia Ietu, no te haapae i to tätou iho mau hinaaro no te Ora Mure Òre, ia haapaò i te parau a te Atua e ia ora no to na ra hanahana. Ia ärataì teie mau haapiiraa ia tätou i roto i to tätou tere i te pae o to tätou värua. E mea hohonu e te faufaa rahi te tïtauraa i te Ora Mure Òre i roto i te faaroo Maru Metia. Teie te tahi mau tumu e mea faufaa roa no te reira, to tätou huru i te pae tino no te oraraa i nià i te fenua nei ma te faahaamanaò ia tätou e, e taime au no tätou i te fenua nei, e mea tià ia faaineine i te tau no te Ora Mure Òre. Te fafauraa a Ietu, ua haapii mai o Ietu e, te feia e tiàturi ia Na, e òre ia e pohe e a muri noa atu, e roaa rä te ora mure ore ia au te faaìteraa Ioane i te pene 3 i te ìrava 16, I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. Teie fäfauraa no te hoê oraraa i ô mai i to tätou mau tiaìtururaa, o te hoê ia mana puai no te ìmi i te ora mure ore. Te tahi ia auraa no te iòa o te Atua, te Ora Mure Òre, no te faatumu i te parau mure òre i te Atua. O te raveà ia no te ora i mua i to na aro, no te ìte maitaì ia Na, e no te haamori ia Na e a muri noa atu. No reira, te ìmiraa i te Ora Mure Òre o te hoê ia hinaaro hohonu ia haafatata  i te Atua. I teie faahitiraa parau no te haamauruüruraa no te täiva-ore raa te taata i te faanahoraa ora e tupu noa ra, ia hanahana te ora. Te faahiti ra teie mau parau i te mau haamaitaìraa no te feia e tämau maite nei i roto i te faaroo e e auraro ra i te Atua, te Atua Nui Tumu Tahi.

Te ìmiraa i te Ora Mure Òre, e òhipa ia no te haapaò maitaì i mua i te Atua, e e fäfau mai te reira i te mau haamaitaìraa mure òre no te feiä e na reira. Te hiòraa no te oraraa mure ore i teie mahana, to tätou ia ìte-òre-raa, i te haafaufaa i te taime, te tau no to tätou oraraa, ua horo püpara noa tätou i te vahi e paremo ai tätou i roto i te ano. Ta te Mure òre, e türama te faanahoraa  i te hiòraa i te hitiraa maha e mea Mure òre, te toparaa mahana e mea Mure òre, te mau tiàrama e mea Mure òre, te mataì e mea Mure Òre, te Moana Nui a Hiva e mea Mure Òre, te Rähu e mea Mure Òre, te faaìte noa mai ra teie mau faanahoraa ua ôpua te Atua ia Fatu i te Ora Mure Òre. Na te ìmiraa i te Ora Mure Òre e tauturu ia tätou ia täpeà i te hoê hiòraa no te raì mai e ia tuu i roto i te mau mea faufaa mure ore. Te Ora Mure Òre o te hoê ia mäìtiraa tei hau atu i te faufaa i to tätou oraraa i nià i te fenua nei e o te ìriti ia tätou i te vairaa mau o te Ora Mure Òre i pïhaì ho i te Atua.

 

Pehepehe

Huero Ora Mure Òre.

 

Te huero tïtona, te haehaa e te moèmoè,

I roto i te fenua pöuri ua faaineinehia,

Ia pohe no te farii i te hoê hotu maitaì,

Te hoê parau huna, te hoê parau àro hope òre.

 

I raro aè i te teiaha o te repo, e faaruè oia ia na iho,

E horomii to na mau aa, e ìtehia to na mau aa,

E ìtehia te pohe, tera rä,

E ìtehia te ora i roto i teie tutia.

 

Eita o Ia e vai ôtahi noa, teie huero tïtona,

E täui o Ia, e tupu, e tupu, e faatupu,

E faatupu i roto ia Na te fäfauraa mure ore,

Te ora e upootià, te aroha tähuti òre.

 

Hoê ä huru, te ìmi nei tätou i te ora i ô mai,

I ô atu i te mau mahana, i ô atu i te mau hora

E haere mai nei, na roto i te haapaò, na roto i te parau-tià,

I roto i te marämarama no te raì, e tae noa atu i te mau hopeà o te raì ra.

 

Te Ora Mure Òre, te pehe maru, tei pïhauhau i te mataì,

Muhumuhuhia mai e te mau fetià, e pii oia ia tätou,

E huti mai te reira ia tatou,

Mai te huero tïtona, i te ora ma te paruru òre.

 

No reira, e mata na tatou i te mäìti i te èà o te tutia,

Mai ia Ietu, te Tahuà Nui, te Tämaïti haamaitaìhia,

Ia faahotu to tätou oraraa i te hotu o te here,

I roto i te tau mure ore,

I reira hoì te mau mea atoà e tupu ai.

 

 

Teraì òr. Faatura.