Märeto 12.38-44 Ö a Te Vahine Ìvi.

 

Tāpati 10 no Teeri/Novema 2024.

Ö a Te Vahine Ìvi.

Mau taiòraa

Taramo 146

EIAHA TÄTOU E FAAEA I TE HAAMAITAÌ I TE ATUA.

1 E HAAMAITAÌ ia Iehova. A haamaitaì ia Iehova, e ta ù värua.

2 E haamaitaì au ia Iehova, oi vai aè to ù ora ; e himene au i ta ù Atua oi vai aè au nei.

3 Eiaha e tiàturi i te hui arii, e te taata atoà, àita hoì o na e ora.

4 Te reva nei hoì to na värua, te hoì nei o ia i to na ra repo ; mou roa atu ra ta na i ôpua i taua mahana ra.

5 E ao to na tei te Atua o Iatöpa te täuturu ia na ; e tei to na Atua, tei ia Iehova to na tiàturiraa.

6 O tei hämani i te mau raì e te fenua, te tai, e te mau mea atoà i roto ra ; o tei haapaò i te parau mau na na e a muri noa atu ;

7o tei faatià mai i te feiä i hämani-ìno-hia ; e ua höroà mai i te maa na tei poìa ra. O Iehova tei tätara i tei tāpeàhia ra ;

8 o Iehova tei faaàraara i te mata o tei matapō ra ; o Iehova tei faatià i te faahaèhaahia ra ; o Iehova tei hinaaro i te feiä parau-tià ra.

9 Te faaora nei Iehova i te mau taata-ê ra ; te täuturu nei o ia i te òtare e te vahine ìvi ra, âreà te haerea o te paieti òre ra, e huri-ê-hia ia.

10 E vai arii mai â Iehova e a muri noa ’tu ; o to Atua, e Tiona, e tae noa atu i te mau ui atoà ra. Hareru ia.

Heuraa Manaò.

Parau mau, e òaòa te vai nei i te mau taime atoà a päpaì au i teie mau parau no te täuturu ia òutou e ia ù atoà ia hiòpoà âmui tätou i teie Taramo 146. Teie te hoê hiòraa mätamua :

Te mau manaò e täuturu no te haapiiraa

E himene ârueraa teie Taramo 146 no te faahanahana i te rahi e te haapaò maitaì o te Atua. O te hoê ia o na taramo hopeà e pae i roto i te puta Taramo, tei pii-pinepine-hia te mau Taramo no te mea e haamata e e hope te reira na roto i te parau Arue ia Iehova i roto i te reo Hepera, Hareru ia.

Te faanahoraa e te mau tumu parau rarahi

Piiraa ia Ârue ìrava 1 e te 2.

E haamata te päpaì taramo na roto i te hoê tïtau-manihini-raa no na iho e no te taatoàraa e ârue i te Atua : E haamaitaì i te Fatu. E to ù värua, a ârue ia Iehova e ârue au i te Fatu a ora noa ai au, e ârue ia vau i to ù Atua a ora noa ai au.

Faaäraraa no nià i te Tiàturiraa i te Taata ìrava 3 e te 4.

Te faaära ra te päpaì taramo no nià i te tiàturiraa i te mau tamarii hui arii aore ra te feiä mana, no te mea e taata tähuti rätou e e mou ta rätou mau ôpuaraa e o rätou : Eiaha e tiàturi i te feiä rarahi, i te tamarii a te taata nei, o te òre rätou e tià e faaora. Ua òre to rätou aho, ua hoì faahou mai rätou i nià i te fenua nei, e ia tae i taua mahana ra, ua mou ia ta rätou mau ôpuaraa.

Te mau Haamaitaìraa no te Tiàturiraa i te Atua mau ìrava 5 e tae i te ìrava 10.

Te faahiti ra te päpaì taramo i te mau tumu e haamaitaìhia ai ia tiàturi i te Atua. O te Atua te Rähu Nui, te haapaò maitaì, te parau-tià, e te paruru i tei faatîtîhia, tei poìa, tei täpeàhia, tei matapö, tei hapepa, tei purutia, tei òtare, e te mau vahine ìvi. Ua faaoti o Ia na roto i te haapäpüraa i te mana arii mure òre o te Atua : Te faatere arii nei te Fatu e a muri noa atu ; to òe Atua, e Tiona mai te matahiti e tae atu i te mau matahiti Arue i te Fatu, ma te haamaitaì e a muri noa atu, Hareru ia.

Irava faufaa e tià ia täpeàhia mai, Te hoê ìrava faufaa roa tei faahiti-pinepine-hia, o te ìrava 5 ia : E ao to na to te Atua o Iatöpa ia täuturu mai ia na, o tei tuu i to na tiàturiraa i roto i te Fatu to na ra Atua.

Tei tahi manaò tätara i teie irava, Te haapäpü ra teie ìrava i te haamaitaìraa e te panoonoo òre e noaa mai na roto i te tiàturiraa i te Atua. Taa-ê atu i te taata nei, e mea mure òre te Atua e te mana hope. Te feiä e tuu i to rätou tiàturiraa i roto ia Na, e ìte ia rätou i te täuturu päpü e te tämau.

E haamanaòraa puai teie e vai i roto te Taramo 146 i te haapaò maitaì e te parau-tià a te Atua. Te faaitoito ra o ia i te feiä faaroo ia tuu i to rätou tiàturiraa i nià i te Atua eiaha rä i nià i te taata, e ia arue i te Atua no ta na mau òhipa faahiahia e to na mana arii mure òre.

1 Te mau Arii 17.10-16

10 Ua tià aè ra o ia haere atu ra i Tarefate. E tae atu ra o ia i te ùputa o te òire, ìnaha, e vahine ìvi te ôhi haere ra i te vähie : ua pii atu ra o ia ia na, na ô atura, A hopoi mai na i te hoê maa päpe i roto i te färii, ia ïnu vau. 11 E te tii atu ra o ia ra i taua päpe ra, ua parau atu ra o ia ia na, na ô atu ra, Hopoi atoà mai i te tahi maa pane i to rima na.

12 Ua parau mai ra o ia, Te ora ra to Atua o Iehova, àita roa a ù e maa àma, maori ra te hoê maa fāraoa hoê rima e î tei roto i te hue, e te hoê maa hinu i roto i te färii ; e ìnaha, te ôhi haere nei au i te maa vähie, a haere ai au i roto a tünu ai na maua o ta ù tamaiti, a àmu ai maua, a pohe atu ai.

13 Ua parau atu ra Èria ia na, Eiaha e mätaù ; e haere ra òe e na reira ta òe i parau ra : e mata na ra i te hämani i te hoê vahi ïti na ù, a hopoi mai ai ia ù nei, a hämani ai i ta òe e ta to tamaiti.

14 Te na ô mai ra hoì te Atua o Ìteraèra a Iehova, E òre te hue fāraoa e ïti, e òre hoì e pau te färii hinu, e tae noa atu i te mahana e hopoi mai ai Iehova i te ua î te fenua nei.

15 Ua tii atura o ia, ua rave i ta Èria i parau mai ra ; ua àmu iho ra o ia e o Èria, e to na atoà ùtuafare, e rave rahi aè ra te mahana.

16 Aore hoì taua hue färaoa ra i ïti, aore hoì te färii hinu i pau, ta Iehova hoì i parau mai, i te vaha o Èria ra.

Heuraa Manaò

Te mau manaò täuturu no te haapiiraa, ua faataahia teie mau ìrava i roto i te tupüraa o te paùra i tohuhia e Èria i Ìteraèra. Ua tono te Atua ia Èria i Tarefate, te hoê òire i roto i te tuhaa fenua ètene, ia faaàmuhia o ia e te hoê vahine ìvi i teie tau oè.

Hiòraa i te mau ìrava

Ìrava 10, Ua tià aè ra o ia i nià, haere atu ra i Tarefate. I to na täeraa atu i te ùputa o te òire, ìnaha, te ôhi ra te hoê vahine ìvi i te vähie. Ua pii atu ra o ia ia na e na ô atu ra, a haere a tii mai i te tähi maa päpe i roto i te färii, ia ïnu vau.

E auraro Èria i te faaueraa a te Atua e e färerei o ia i te vahine ìvi i te ùputa o te òire. Mea faufaa roa to na tïtauraa i te päpe, noa atu e mea ôhie roa, i roto i te tupüraa o te paùra.

Ìrava 11, E ua haere atu ra o ia e tii i te tähi. Ua pii faahou mai ra o ia ia na e na ô mai ra, a hopoi mai na i te hoê färaoa i roto i to òe rima.

E äni atoà o Èria i te pane, i reira te haamätaraa te faaroo te tupu e te auraro o te vahine ìvi, noa atu e mea ïti ta na mau faufaa e vai ra.

Ìrava 12, Ua parau mai ra o ia, te ora ra to Atua o Iehova. Aita ta ù e maa, e maa färaoa ota noa ta ù i roto i te hoê hue e te tähi hinu ïti i roto i te hoê färii, e àmu tätou, e i reira tätou e pohe ai.

E faaìte te vahine ìvi i to na hepohepo e to na huru tupüraa peàpeà. Mea ïti roa ta na maa, e nävaì noa no te hoê tämaaraa hopeà hou o ia e pohe ai i te poìa.

Irava 13, Ua parau atu ra Èria ia na, Eiaha e mätaù, a hoì i muri, a rave mai ta òe i parau na. A faaineine na mua i te hoê fāraoa monamona na ù, e na òe e hopoi mai i te reira ia ù nei ; èi reira òe e rave ai i te reira no òe iho e no ta òe tamaiti.

Ua faaitoito o Èria ia na eiaha e mätaù e ua äni ia na ia faaòhipa i te faaroo na roto i te tünu-na-mua-raa i te hoê färaoa monamona na na, ma te tapu e e äupuru te Atua ia na.

Irava 14, Te na ô mai ra hoì Iehova, te Atua o Ìteraèra : E òre roa te färaoa ota i roto i te päni e pau, e òre hoì te hinu i roto i te färii e mäìri, e tae noa atu i te mahana e hopoi mai ai Iehova i te ua i nià i te repo fenua nei.

Te höroà ra o Èria i te parau tapu a te Atua : Èita te färaoa ota e te hinu è èrehia e tae roa atu i te taime e hope ai te paùra. O te hoê ia parau tapu no nià i te faanahoraa a te Atua.

Irava 15, Haere atu ra o ia, rave atu ra i ta Èria i parau mai ra. E no te hoê tau mäöro, te vai ra ta na maa no te àmu, o ia e to na ùtuafare e o Èria atoà.

Ua auraro te vahine ìvi ia Èria, mai tei tapuhia mai, ua nävaì ta na maa na na iho, na ta na tamaiti, e na Èria i te roaraa o te oè.

Irava 16, Aita te färaoa ota i roto i te päni i pau, e àita te hinu i roto i te färii i ïti mai, mai te au i te parau ta te Fatu i parau na roto ia Èria.

Ua tupu mau ä te temeio mai ta Èria i tōhu, o te faaìte ra i te haapaò maitaì o te Atua i ta na parau.

Irava faufaa e tià ia haapaòhia, Te hoê ìrava faufaa roa i roto i teie mau ìrava, o te ìrava 14 ia : Te na ô mai ra hoì Iehova, te Atua o Ìteraèra : E òre te färaoa ota i roto i te päni e pau, e òre hoì te hinu i roto i te färii e mäìri, e tae noa atu i te mahana e haamaìri mai ai te Fatu i te ua i nià i te fenua nei. Te haapäpü ra teie ìrava i te parau tapu no nià i te faanahoraa a te Atua i te mau taime fifi. Te faaìte ra te reira e mea haapaò maitaì te Atua ta na e haamaha te poìa ma te faatupu i te temeio i to tätou mau hinaaro ia faaòhipa tätou i te faaroo e te auraro. E vahine ìvi teie faaòhipahia e te Atua èi faaitoitoraa i to na tävini, ia pärahi noa i roto i ta na ôpuaraa faaora, e ia tupu ta na faanahoraa no te mau taata atoà.

Te Mau Arii 1 pene 17 i te mau ìrava 10 e tae i te 16 o te hoê ia ìteraa päpü i te puai no te faaroo e te haapaò, o Èria e te vahine ìvi no Tarefate. Te faahohoà nei te reira nahea te Atua i te höroà-temeio-raa e te haapaò-maitaì-raa i te feiä e tiàturi ia Na, noa atu te mau taime hepohepo rahi. Te haapii noa mai ra te reira ia tätou i te ìteraa i te faanahoraa a te Atua.

Hepera 9.24-28

24 Aita aè nei hoì te Metia i tomo i roto i na vahi moà i hämanihia e te rima ra, i te hohoà no te vahi moà mau ra, tei te raì mau rä o Ia ia faaìte o Ia ia na iho i mua i te aro o te Atua no tätou, i teie nei ä.

25 È ère rä ia püpü pinepine o Ia ia na iho èi tutia, mai te tahuà rahi i tomo i roto i te vahi moà i te mau mätahiti atoà, ma te toto ê ra.

26 Àhiri hoì i na reira na, mai te mätamua mai ä o teie nei ao, ua rahi roa ia to na poheraa : hoê roa rä o Na faaìteraahia mai i teie nei, i te hopeà o te mau tau nei, ia faaòre o ia i te hara i te faatutiaraa ia Na iho.

27 E mai te taata nei hoì ua haapaòhia ia hoê aè poheraa, e muri aè o te haaväraa ia :

28 oia atoà te Metia, a hoê aè nei o na püpüraahia èi tutia ia hopoi ê o Ia i te hara a te taata e rave rahi ; e e fä mai ä o Ia o te piti ia o te färaa mai, eiaha èi täraèhara, ia ora rä te feiä e tiaì ia na ra.

Heuraa Manaò

Ìrava faufaa e tià ia täpeàhia i roto i te Hepera pene 9 te ìrava 28 ia te haapoto nei teie irava i te auraa mau o te mau ìrava : Ua püpü te Metia ia Na iho i te hoê taime no te amo i te mau hara a te mau taata e rave rahi e e hoì mai o Ia ma te hara òre no te feiä e tiaì ia Na te tumu no te faaoraraa. Te haamätara teie ìrava e piti tuhaa faufaa roa :

Te tutia ôtahi a te Metia : Taa-ê atu i te mau tutia matahiti a te mau tahuà i raro aè i te Faaäuraa Mätamua, ua püpü te Metia ia Na iho èi tutia no te taatoàraa. Ua nävaì teie tutia hoê roa no te faaòre i te hara, na te reira e haapäpü i te maitaì e te ora hope o ta Na tutia.

Te hoìraa mai o te Metia : Te faaìte ra te ìrava e e hoì mai te Metia, eiaha no te amo faahou i te mau hara, no te faaora rä i te feiä e tiaì ra ia na. E haapuai te reira i te tiàturiraa Marü Metia no nià i te hoìraa mai o Ietu e te faaoraraa hopeà

Te huru oraraa e te auraa

Vahi moà i te raì : Te faataa ra te ìrava 24 e ua tomo te Metia iho i nià i te raì, te vahi moà mau, no te tià atu i mua i te Atua no tätou. Mea taa-ê roa te reira i te mau vahi moà i nià i te fenua nei, e mau hohoà no te hoê noa taime poto.

Te tutia maitaì roa : Te haapäpü nei te mau ìrava 25 e te 26 e, àita e tïtauhia i te Metia ia faatutia ia Na iho e rave rahi taime. Ta Na tutia hoê roa i te hopeà o te tau, ua faaòre ia i te hara, o te òre roa e noaa na roto i te mau tutia tämau a te mau tahuà i raro aè i te Faaäuraa Mätamua.

Te haaväraa e te faaoraraa : Te faataa nei te mau ìrava 27 e te 28 i te hoê faaäuraa i rotopü i te hopeàraa o te taata nei te poheraa i te hoê taime, te haaväraa i muri iho e te tutia o te Metia te püpüraa hoê noa taime no te amo i te hara. Te haapäpü nei te reira i te fä e te hanahana o te òhipa a te Metia no te faaoraraa. Mea faufaa roa teie ìrava no te taa i te haapiiraa faaroo marü metia no nià i te tutia o Ietu e ta Na tuhaa èi ärai no te Faaäuraa Âpï. Ua riro te vahi moà i nià i te raì èi manaò tumu i roto i te haapiiraa faaroo marü metia, i roto iho ä rä i te puta Hepera. Teie te tahi mau manaò faufaa no te marämaramaraa i to na auraa :

1. Hohoà no te vahi moà i ni'a i te fenua nei

E pinepine te vahi moà i nià i te raì i te faataahia mai te hohoà mätamua o te vahi moà i nià i te fenua nei, i pātuhia e Mote, o te hoê ia hohoà. Ia au i te Hepera 8:5, ua höroàhia ia Mote te mau ärataìraa taa-ê no te patu i te tetene i te fenua nei ia au i te hohoà no te raì mai.

2. Te vairaa o te Atua

Te faahohoà ra te vahi moà i nià i te raì i te pärahiraa o te Atua. Taa-ê atu i te vahi moà i nià i te fenua nei, te hoê vahi i reira te mau àti Ìteraèra e färerei ai i te Atua, ua riro te vahi moà i nià i te raì èi vahi moà mau i reira te Metia e faatere ai èi tahuà rahi.

3. Te täviniraa a te Metia

I roto i te vahi moà i nià i te raì, te faaòhipa ra o Ietu Metia i ta na täviniraa èi tahuà rahi. Te faataa mai nei te Hepera pene 9 ìrava 24 e, ua tomo te Metia i roto i te raì iho no te tià atu i mua i te Aro o te Atua no tätou. E mea teitei aè teie täviniraa i te raì i to te mau tahuà i te fenua nei no te mea e mea mure òre e te maitaì roa.

4. Te tāmaraa e te ärairaa

Te vahi moà i nià i te raì, o te vahi atoà ia i reira e rävehia ai te tämaraa i te hara. Te faaìte nei te Hepera pene 9 i te ìrava 23 e te 24 e e tià i te mau mea no te ra iho ia tämahia na roto i te mau tutia tei hau atu i te maitaì i to te mau mea no te fenua nei. Ua faatupu te Metia, na roto i ta na tutia ôtahi, i teie tämaraa.

5. Te tiàturiraa e te faaoraraa

I te pae hopeà, ua tāaihia te vahi moà i nià i te raì i te tiàturiraa Marü Metia o te hoìraa mai o te Metia e te faaoraraa hopeà. Te haapäpü nei te Hepera pene 9 ìrava 28 e, e hoì faahou mai te Metia no te faaora i te feiä e tiaì nei ia na, e na roto i te reira, ua faaoti o ia i ta na òhipa faaoraraa i roto i te vahi moà i te raì ra.

Èi haapotoraa, te vahi moà i te raì o te hoê ia vahi värua i reira te Metia e rave ai i ta Na òhipa no te ärairaa e te faaoraraa, ma te püpü i te tiàturiraa e te haapäpüraa i te feiä faaroo.

Märeto 12.38-44

38 Ua parau atu ra o Ia ia rätou i te haapiiraa ra, E ära i te mau päpaì parau i hinaaro i te àhu faapereue a hahaere ai, e ia arohahia i te vahi taata,

39 e te pärahiraa maitätaì i roto i te mau tunato ra, e te vahi teitei i te àmuraa maa ra ;

40 o tei rave pau roa i ta te fëtii o te mau vahine ìvi ra, e te haamaoro i te pure èi täpoì ; e pohe rahi roa atu ia to rätou.

41 E te pärahi ra Ietu i mua iho i te piha vairaa taoà ra, hiò atu ra i te taata i te tuuraa i te moni i roto i taua vairaa ra ; e rave rahi te feiä taoà i tuu i te moni rahi i roto.

42 Ua haere mai ra te hoê vahine taoà òre, e ìvi, ua tuu mai ra i e piti repeta i roto, o ia te toterane hoê ra.

43 Ua parau atu ra Ietu i ta na mau pipi, na ô atu ra ia rätou, Oia mau ta ù e parau atu ia òutou nei, E rahi ta teie nei vahine ìvi taoà òre i tuu i roto i te puèraa taoà nei i ta rätou atoà :

44 e tiàhapa hoì no ta rätou taoà rahi ta rätou i tuu i roto, âreà o ia ua hope roa a na taoà rii nävaì òre i te tuuhia e ana i roto.

Heuraa Manaò

Mau ìrava faufaa mau teie e faahitihia nei e Märeto i te pene 12 i te mau irava 43 e te ìrava 44 E mea faufaa rahi teie mau ìrava no te mea te haapäpü nei te reira i te haapiiraa a Ietu no nià i te âau höroà mau e te faaroo. Te haapäpü ra o Ietu e ua höroà te vahine ìvi veve, noa atu e mea ïti roa ta na moni, i te taoà rahi no te mea ua höroà o ia i ta na mau mea atoà.

Te huru oraraa e te auraa

Te faahaparaa i te mau päpaì parau ìrava 38 e tae i te 40 :

Te faaära ra o Ietu no nià i te mau päpaì parau o te ìmi ra i te hanahana e te haamauruüruraa i mua i te taata a faaòhipa ai i te feiä paruparu roa aè, mai te mau vahine ìvi. Te faaìno-ûàna-hia ra to rätou haerea haavare, e te faaìte ra o Ietu e e faautuàhia rätou ma te ètaèta atu ä. No te mea na rätou noa ihoä rätou e tuu ra i roto i te hoê faanahoraa e ateä rätou i te ôpuaraa faaora a te Atua.

Hohoà no te puèraa taoà ìrava 41 e te 42 :

E hiòpoà o Ietu i te mau ö i höroàhia i roto i te hiero. E höroà te taata taoà rahi i ta rätou taoà, e höroà rä te hoê vahine ìvi veve e piti repeta, te hoê tino moni e au ra e mea faufaa òre. Ua peàpeà te vahine ìvi i teie höroà ta na i te nävaì òre i mua i te Atua, ta na e höroà nei ma te haèhaa e te tätarahapa.

Te haapiiraa a Ietu ìrava 43 e te 44 :

Ua faaòhipa o Ietu i te hiòraa a te vahine ìvi no te haapii i te âau höroà mau. Te faataa ra o ia e àita te faufaa o te hoê ö i täaihia i to na rahi, i roto rä i te tutia ta te reira e faahohoà ra. Ua höroà te vahine ìvi i ta na mau taoà atoà, ma te faaìte i te faaroo hope e te tiàturi i te Atua.

Faaòhiparaa

Te höroà maitaì mau : Te tïtau manihini ra teie ìrava ia tätou ia fëruri i nià i ta tätou iho höroà maitaì. Ua ineine anei tätou i te höroà ma te tutia, e aore rä, te höroà noa ra anei tätou i ta tätou taoà mau.

Te faaroo e te tiàturi i te Atua : Ua riro te vahine ìvi èi hiòraa no te faaroo hohonu e te tiàturi i te Atua no to na mau hinaaro i te mau mahana atoà. E faaitoito te reira ia tätou ia türuì i nià i te Atua eiaha rä i nià i ta tätou iho mau faufaa.

Te faahaparaa i te huru haavare : Te faahapa ûàna ra o Ietu i te haavare i te pae faaroo. Te haamanaò mai ra te reira ia tätou i te faufaaraa o te hapa òre e te haavare òre i roto i to tätou oraraa ia au i te ärataìraa a te Värua maitaì. Ua î teie ìrava i te mau haapiiraa no nià i te âau höroà, te faaroo e te parau-tià.

E auraa rahi to te parau a Ietu no nià i te puèraa taoà i roto i te Märeto pene 12 i te mau 41 e tae i te 44 e te haapii mai nei te reira e rave rahi haapiiraa faufaa roa :

1. A ära i te mau òhipa no te âau höroà

Ua hiòpoà maite o Ietu e nafea te taata e höroà ai i roto i te hiero. Te faaìte ra te reira e te haapaò ra te Atua eiaha noa i ta tätou e höroà ra, i ta tätou atoà rä huru räveraa i te reira. Te ànaanatae ra o ia i te huru o te âau i muri mai i ta tätou mau ohipa.

2. Te taa-ê-raa i rotopü i te taata taoà rahi e te vahine ìvi

Na roto i te hiòraa i te taoà rahi ta rätou i höroà e te vahine ìvi e höroà ra i ta na mau taoà atoà, te faaìte ra o Ietu i te hoê taa-ê-raa rahi. E höroà te taata taoà rahi ma te òre e faaère ia rätou iho, âreà te vahine ìvi ra, e höroà ia ma te tutia oia mau te âpee ra i ta na i höroà. Te haapäpü ra te reira e àita te faufaa o te hoê ö i roto i to na rähiraa, i roto rä i te tutia e te faaroo ta na e faahohoà ra.

3. Haapiiraa no nià i te âau höroà mau

Te faaòhipa ra o Ietu i teie parau no te haapii i ta na mau pipi no nià i te âau höroà mau. Noa atu e mea ïti roa ta te vahine ìvi i höroà i te pae moni, ua höroà o ia hau atu i ta te taata moni no te mea ua höroà o ia i ta na mau mea atoà no te oraraa, oia hoì, ua âpee ma te pure i te Atua i te haìhaì o ta na i höroà i te Aroha Nui o te Atua. Te faaìte ra te reira e e faitohia te höroà maitaì mau na roto i te haèhaa e te haavare òre, eiaha rä te rähiraa.

4. Te faaroo e te tiàturiraa i te Atua

E hiòraa te vahine ìvi no te faaroo hohonu e te tiàturiraa i te Atua. Na roto i te höroàraa i ta na mau mea atoà, te faaìte ra o ia i to na tiàturi täatoà i te Atua no te haamaha i to na mau hinaaro. Te haapii mai nei te reira ia tätou ia tiàturi i te Atua e ia tiàturi ia Na, noa atu i roto i to tätou mau taime àti.

5. Te faaìnoraa i te haavare i te pae faaroo

Na roto i te hiòpoàraa i te mau ö, te faahapa roa ra o Ietu i te haavare a te taata taoà rahi o te höroà ia ìtehia e ia faahiahiahia o ia, eiaha rä no ta na höroà maitaì mau. Te haamanaò mai nei te reira ia tätou i te faufaa rahi no te haavare òre e te parau-tià i roto i ta tätou mau òhipa faaroo e te aroha.

Èi haapotoraa, ua riro te hiòraa a Ietu i te tumu èi haapiiraa puai no nià i te âau höroà, te faaroo e te parau-tià. Te ani nei te reira ia tätou ia hiòpoà i to tätou iho mau manaò e ia höroà na roto i te hoê räveà päpü e te haavare òre, ma te tiàturi i te Atua i roto i to tätou mau hinaaro.

Heuraa i te mau täioraa

-Taramo 146, 5 E ao to na tei te Atua o Iatöpa te täuturu ia na ; e tei to na Atua, tei ia Iehova to na tiàturiraa.

-1 Mau Arii 17, 14 Te na ô mai ra hoì te Atua o Ìteraèra a Iehova, E òre te hue färaoa e ïti, e òre hoì e pau te färii hinu, e tae noa atu i te mahana e hopoi mai ai Iehova i te ua î i te fenua nei.

-Hepera 9, 28 oia atoà te Metia, a hoê aè nei o na püpüraahia èi tutia ia hopoi ê o Ia i te hara a te taata e rave rahi ; e e fä mai ä o Ia o te piti ia o te färaa mai, eiaha èi täraèhara, ia ora rä te feiä e tiaì ia na ra.

-Marc 12, 43 Ua parau atu ra Ietu i ta na mau pipi, na ô atu ra ia rätou, o Ia mau ta ù e parau atu ia òutou nei, E rahi ta teie nei vahine ìvi taoà òre i tuu i roto i te puèraa taoà nei i ta rätou atoà :

 

Faaitoito.

I teie mahana, te putuputu nei tätou no te faahanahana i te rahi e te aroha o to tätou Atua na roto i te mau Päpaì Moà. Te haamanaò mai nei te mau ìrava ta tätou i mäìti i te haapaò maitaì o to tätou Fatu, To na maitaì, to na aroha e ta na höroà maitaì.

Te parau mai nei te Taramo 146 ìrava 5 ia tätou e : E ao to na to te Atua o Iatöpa e täuturu ia na, o tei tuu i to na tiàturiraa i te Fatu ra i to na ra Atua. Te haamanaò mai nei teie ìrava ia tätou e tei te Atua ra to tätou òaòa e to tätou vai-hau-raa. O o Ia to tätou täuturu e to tätou tiàturiraa, e tei reira o Ia no te täuturu ia tätou i te mau taime fifi.

I roto i te mau Arii 1 pene 17 ìrava 14 te taiò nei tätou e : Te na ô mai ra hoì o Iehova, o te Atua o Ìteraèra : E òre te hue färaoa ota i roto i te färii e pau, e òre hoì te hinu i roto i te färii e pau, e tae noa atu i te mahana e haamaìri mai ai o Iehova i te ua i nià i te fenua nei. Te faaìte mai nei teie ìrava ia tätou i te faanahoraa a te Atua. Te haapaò nei te Atua i to tätou mau hinaaro, noa atu te mau taime fifi roa aè, e te haapäpü mai ra o Ia e èita tätou è èrehia i te hoê noa aè mea.

Te haamanaò mai nei te Hepera pene 9 ìrava 28 ia tätou i te tutia hopeà a Ietu : Oia atoà o te Metia i püpü ia na iho èi täraèhara na te taata e rave rahi, ia pohe o Ia i te hara a te taata e rave rahi, ia tae i te piti o te taime ia rätou e tiaì ia na ia ora. Na roto i teie tutia e roaa ai ia tätou te fafauraa no te faaoraraa e te ora mure òre. Ua amo o Ietu i ta tätou mau hara e ua ìriti i te èà no tatou i te faaoraraa.

I te pae hopeà, te haapii mai nei te Märeto pene 12 i te ìrava 43 ia tätou i te faufaa o te âau höroà : Ua parau atu ra Ietu i ta na mau pipi, na ô atu ra ia rätou, Oia mau ta ù e parau atu ia òutou nei, ua rahi ta teie nei vahine ìvi taoà òre i höroà atu i ta rätou atoà i tuu i roto i te pute nei. Te haamanaò mai nei teie ìrava ia tätou e èita te âau höroà mau e faitohia ia au i te rähiraa tei höroàhia, na roto rä i te here e te tutia i muri mai i te höroàraa. Ua höroà te vahine ìvi i ta na mau mea atoà, ma te faaìte ia i te faaroo täatoà e te tiàturi hope i te Atua.

Te faaìte mai nei teie mau ìrava ia tätou i te hoê Atua o o Ia to tätou täuturu, to tätou taata äupuru, to tätou faaora, e to tätou ärataì i roto i te âau höroà. Ia haamanaò noa tätou i teie mau parau mau e ia ora tätou i to tätou oraraa ia au i te reira.

Amene.

 

Pehepehe.

Ö a Te Vahine Ìvi.

 

I roto i te Hiero, ua parau o Ietu,

O tei taoà rahi i te haapereueraa,

Ua tuu iho ra i ta rätou mau taoà höroà,

Haere mai ra rä te hoê vahine ìvi haèhaa.

 

E piti moni veo, ta na atoà,

I roto i te àfata, ua tuu o ia i te reira.

A hiò na, ua parau o Ietu i ta na mau pipi,

E rahi ta na taoà i höroà atu i te feiä taoà rahi ra.

 

No te mea ua rave rätou, na roto i to rätou huru taata,

Tera rä, Ua höroà mai o ia, na roto i to na veve,

I te mau mea atoà ta na e tià ia ora,

To na âau, to na värua, ta na i püpü mai.

 

Ua faahuàhuà te mau päpaì parau i te mau ahu roa,

Ma te ìmi i te mau faahanahanaraa e te mau tiàraa mätamua,

Ua faaìte rä teie vahine ìvi,

I roto i to na veve, i te âau höroà mau.

 

Te haapii mai nei o Ietu ia tätou na roto i te reira, è ère te höroà i te mea rahi roa, o te here rä, te tutia, te faaroo, o te faariro i ta tätou püpüraa èi mea moà, oia hoì teie âpeehia i te pure haavare òre i te Atua.

 

Teraì òr. Faatura.