Ruta èv 23.35-43 Te Àui, te Àtau

Tāpati 24 no Novema 2019.

Te Àui, te Àtau

Taramo 122

Tire a te Moruta, a Tävita. Òaòa aè ra vau e te feiä atoà i parau mai ia ù e Tätou i nià i te fare o te Fatu 2 Te tià nei to mätou âvae i teie nei i roto i to mau ùputa, e Ierutarëma e. 3 I patuhia Ierutarëma mai te ôire täatiàti-hua-hia te mau fare ra. 4 I reira te mau ôpü ia paiùma ra, te mau ôpü a te Fatu, ei faaìteraa ia no Ìteraèra, e haamaitaì i te iòa o te Fatu. 5 I reira te mau teröno haavä ra i te haamau-raa-hia, te mau teröno o te ùtuafare o Tävita. 6 E pure ia Ierutarëma ia hau E maitaì to te feiä i hinaaro ia òe ra 7  Ei hau to roto i to òe ra mau patu, e ei maitaì to roto i to òe ra mau fare arii ra 8 No to ù ra mau taeaè e te mau hoa i parau ai au i teie nei Ei hau to roto ia òe ra 9 No te fare o to tätou Atua ra o te Fatu e tämau ai au i te ìmi i te maitaì no òe ra.

2 Tämuera 5.1-3

1 Ua haere atoà mai ra te mau ôpü atoà o Ìteraèra i Heperona ia Tävita i reira, e ua parau atu ra ia na , nä ô atu ra, inaha mätou, o to òe ia ivi e to òe ia ìò. 2 I mütaa iho ra hoì, ia Taura i arii i nià ia mätou ra, o òe ä tei arataì ia mätou i räpae, e tei arataì mai ia Ìteraèra i roto. Ua parau mai hoì te Fatu ia òe, e tiaì òe mai te tiaì mämoe ä i to ù ra taata ia Ìteraèra, e ei tävana hoì òe ia Ìteraèra.3 Ua haere anaè mai ra te feiä rarahi i Ìteraèra i te arii i Heperona; ua faaau iho ra taua arii ra o Tävita i te tahi faufaa ia rätou i Heperona, i mua i te Fatu ua faatähinu iho ra rätou ia Tävita ei arii i nià iho ia Ìteraèra ra.

Torota 1.12-20

12 Te haamaitaì nei mätou i te Metua, o tei faaau mai ia tätou ia au ia tätou te hoê tufaa i te âià o te feiä moà i te ao ra. 13 O tei faaora ia tätou i te värua mana o te pöuri, e ua tähiti ê mai ia tätou i roto i te Pätireia o ta na Tamaiti here ra; 14 no na i noaa ai to tätou ora, te hara i faaòrehia ra, i to na ra toto.

Te huru o te Metia e ta na haa

15 O te huru mau o ia o te Atua hiò-òre-hia ra, o tei fänau na i te mau mea atoà i hämanihia ra. 16 Na na hoì i hämani i te mau mea atoà nei, o to te raì, e to te fenua nei, o tei ìteä ia hiò ra e tei òre i ìteä, te feiä teröno, e te feiä hau, te hui-arii, e te feiä mana. E mea hämani- anaè-hia ia e ana, e no na anaè. 17 E o mua ä hoì o ia i te mau mea atoà nei, e o ia të mau i te mau mea atoà nei. 18 E o ia hoì te upoo o te tino ra o te Ètärëtia nei; o te mätamua o ia, te mätahiapo o te feiä i pohe ra, ia hau ê atu ä o ia i te mau mea atoà nei. 19 E mea tià hoì i te Metua e ei roto ia na te î i te mau mea atoà ra vai mau atu ai. 20 E ia faafaite hoì o ia i te mau mea atoà ra ia na iho i roto ia na ra, i te hau i noaa i te toto o to na ra tätauro; to te raì e to te fenua nei, ia faite ä ia na.

Ruta èv 23.35-43

35 Te tià noa ra te taata atoà i te hiò-noa-raa atu. Ua tähitohito atu ra te mau tävana e te taata atoà ia na, nä ô aè ra Ua faaora hoì o ia ia vëtahi ê, o te Metia o ia te here a te Atua ra, a faaora o ia ia na iho  36 Ua tähitohito atoà atu ra te mau faèhau ia na, e haere atu ra, hopoi atu ra i te vineta na na, 37 nä ô atu ra: O te Arii òe o te âti-Iüta ra, a faaora ia òe iho  38 E päpaìhia iho ra te hoê parau i nià aè i ta na upoo, i te parau Herëni, te parau Röma, e ta te Hëpera O TE ARII TEIE O TE ÂTI-IUTA. 39 Ua tähito atu ra hoì ia na te hoê i taua puè taata rave parau ìno i faatätauro-atoà-hia ra, nä ô atu ra O te Metia òe ra, a faaora ia tätou  40 Ua àvau mai ra rä te tahi, nä ô mai ra Aita o òe mataù i te Atua tei pohe atoà hoì òe hoê ä huru. 41 E mea tià rä to täua pohe, o te utuà mau hoì teie i ta täua i rave; âreà teie nei taata, aita roa a ana e parau ìno. 42 Ua parau atu ra o ia ia Ietu E te Fatu, e haamanaò mai òe ia ù ia tae òe i to òe ra Pätireia. 43 Ua parau mai ra Ietu ia na Ei parataito ia òe e o vau atoà i teie nei ä mahana, oia mau ta ù e parau atu ia òe nei.

Manaò.

 E faaineineraa rahi teie e tupu nei i roto i teie mau taiòraa. Ma te tuu i te òhipa e vai nei ia ìteähia te faanahoraa a te Atua ia ora te nunaa. I te mau faatîtîraa e rave rahi i nià i to na mau tävini. Te raveà ta te Atua i faaòhipa, mauti ra ia, te haaputuraa te fetii o Tavita i te vahi hoê. Tei faaìtehia na roto i teie parau e, inaha mätou, o to òe ivi, e o to òe ia ìò, Tämuera piti pene 5 i te ìrava 1 i te vahi hopeà. E hohoà teie no te âmuiraa te hoê ôpu fetii i te vahi hoê, ma te haapäpü maitaì te tumu o te âmuiraa. Teie putuputuraa i faatupuhia e te Atua i Heperona no te faatahinu ia, ia Tavita ei Arii no Ìteraèra, oia hoì, èi upoo no te nunaa o te Atua. Teie upoo ta te Atua i faatahinu, o te arataì ia i te mau tïtï i rapae i te mau hämani- ìno- raa e tupu ra, i roto i to na nunaa. O ia te faaora i te mau hämani-ìno-raa atoà. Ia tià  te òhipa a te Atua ia vai i nià i te reni, no te òaòa. Tei faaìtehia na roto i te itoito o te ueueraa, ia vai ta mau maite te ora. No te àià o te feia moà, tei vai te mana o te Atua i nià iho. Ei faatupuraa i te faaòreraa hara, i te feia atoà e tïtau nei i te haamaitaìraa a te Atua. Te feiä atoà e ìte i tei òhipa, e pii rätou i te Atua, e ta ù Metua. E faaroo mai te Atua i to rätou reo, i roto i te mau taime ahoaho. Ua tupu anaè mai teie te huru, e täpaò faaìte tei reira te Atua i te haamoriraahia ra, ua ìte o ia i te aroha i te taata, o tei parauhia te here a te Atua. Taua here ra, o Ietu Metia ia, tei riro èi upoo no te Ètärëtia, e aita e parau tià òre o roto ia na. Oia tei faaäriihia i nià i te mau nunaa atoà o te ao nei, te Arii no te Mau Arii. I faaäriihia ai  O ia e Pirato, ma te papaì i nià aè i to na upoo, i nià i te tätauro, o TE ARII TEIE O TE ATI IUTA. Hau roa atu te reira na roto i na reo e toru Herëni, Roma, Hepera, e i teie mahana tei roto ia i te mau reo atoà, tei fauraòhia e te mau huriraa pipiria e ravehia nei. Na teie mau òhipa i tupu i nià i te tätauro, e faaìte i te mau taata faaroo atoà e o Ietu te upoo o te Ètärëtia, o ta Pauro ia e faaìte nei i to Torota. E ìtehia teie mau parau i te türamaraa o na taiòraa e mäha no teie mahana.

Taramo 122, 9 No te fare o to tätou Atua te Fatu e tämau ai te ìmi i te maitaì no òe ra.

2 Tämuera 5, 1 Ua parau atu ra ia na, nä ô atu ra, inaha mätou, o to òe ia ivi e to òe ia ìò.

Torota, 1, 13 O tei faaora ia tätou i te värua mana o te pöuri, ua tähiti ia tätou i te Pätireia o ta na Tamaiti here ra.

Ruta èv 23, 41 âreà teie nei taata, aita roa a ana e parau ìno.

Ia au ra te faaìteraa a te Parau Maitaì o Ietu i päpaìhia e Ruta i te pene 23 i te mau ìrava 35 e  tae i te ìrava 43.

Teie te tahi pae taata e faahitoatoa nei i te tino o Ietu, èi faaìteraa i to rätou mauruüru òre, i te òhipa i faanahohia no te patireia o te Atua. To rätou manaòraa, o Ietu e taata hämani- ìno teie i to rätou nunaa, eita e tià i te mau haapiiraa tei horoàhia i roto ia rätou. E tià ia parauhia e, ua paremo teie pae taata ia au i ta te paieti òre tiàturiraa. Ietu no rätou, e taata ia tei fänauhia mai no te faaìte i te tahi mau òhipa taa ê mai te hoê tahutahu ra te huru ua oti atu ai. Eiaha ra ia au ta te Atua faanahoraa, te tià ia ravehia no Ietu e faatätauro.

Areà ra no te tahi pae, te puta pü nei to rätou âau i te òhipa e tupu nei aita e òre te vai nei, te òto‑haa ra, te paìpaì ra i to rätou ôuma ma te rnäuiui rahi i te òhipa tià òre i ravehia i nià ia Ietu. Te itoito o teie mau taata eita e tià i te faaau, i roto i to rätou òto rahi noa atu to rätou faaìteraa o te Tamaiti mau teie a te Atua. Aita rätou e faaruè nei i te Fatu, noa atu te mau päira o te taura hui i nià i to na tino, e te mau pariraa tià òre. O Ietu, oia mau te àito ta te Atua i faatahinu no te haamarua i te mau patu tei faataa ê i te taata i te òaòa o te Atua. O te òhipa ia e tupu ra i te pae tätauro o Ietu, te vai ra te tahi mau taata te òaòa ra, i te mauruüru i teie òhipa ma te tauà òre. Te vai atoà nei ra te mauiui nei ma te òto rahi, no rätou aita i tià no Ietu teie pohe. Ua àmaha te ao nei i mua i te tätauro o Ietu, hoê no te puai taata, e te tahi no te puai o te Atua.

Teie o Ietu i nià i te tätauro i ropu i na tätauro no na taata hämani ìno o Ietu te taata moà e te parau tià ua faautahia i nià i te raau faaìnohia ra, ua ìritihia to na àhu, e maa tihere, e te hei taratara, to na, e ua mähae te iò no na rima e no na àvae i te naero. I teie taime aita te àvae o Ietu e ü faahou nei i nià i te repo fenua, tei ropu oia i te fenua e te raì, e ua motumotu to na tino i te mau ìravarava i te riri mäha òre o te taata nei.

I te pae àui e te pae àtau no Ietu e na taata ia tei rave i te tahi mau peu tià òre, ia au i te faanahoraa a te Hau Roma.

Te hoê o teie na taata, ua tähitohito mai ra ia Ietu, ma te parau e o te Metia òe ra a faaora ia tätou. Teie manaò aita atoà i ateä roa atu i to te mau tävana e te mau faèhau, ua faaora hoì o ia ia vëtahi ê, o te Metia O ia te here a te Atua ra. Oia mau, ua faaora oia ia vëtahi ê, eita e tià ia faaora ia na iho. E parau mau roa te reira e aita teie mau ènemi i manaò e, o te parau mau ta rätou e faatià ra. Ua faaìte mau o Ietu i to na mana faaora i Ierutarëma, e i Tarirea, ua faaora e ua faatiàma i te mau maì, ua faatià faahou i tei pohe roa. E faaora i to te ao eiaha ra ia na iho. Te horoà nei oia i to na ora èi hoo no te taata e rave rahi. No to na hinaaro i te faaora ia vëtahi ê, i òre ai o ia i faaora ai ia na iho, no te mea O ia te Ora Mure Òre.

I nià aè i te upoo o Ietu, ua haamauhia te hoê ìri päpaì ma te iòa i nià iho, O TE ARII TEIE O TE ATI IUTA. Ua päpaì o Pirato i teie parau, i te mea te pariraa ia i pärihia o Ietu, na roto i na reo e toru tei parare i taua ànotau ra, te reo Hepera, te reo Herëni, e te reo Ratino. Na roto i teie päpaì, te faaìno nei o Pirato i te Àti ­Iuta, e te faateitei nei oia i te toroà Arii o Ietu, i te aro o te mau nunaa o te ao. I ô nei te haamata nei to Ietu upootiàraa i nià i te ao, te riro nei ia te raau o te faaìnoraa, ei teröno hanahana no te Fatu.

I te pae àui e te pae àtau o Ietu, o na taata ia tei faautuàhia i te utuà teimaha no te pohe, e o Ietu i ropu ia, ia raua.

Te taata i te pae àui, te faaroo nei oia, e te ìte nei i te faaìnoraa e parauhia nei no Ietu. E ua faatupu aè ra o ia i roto ia na iho i te tahi mau manaò tià òre, ma te parau atu ia Ietu e, o te Metia òe, a faaora ia òe iho, e faaora ia tätou. Te reira anei te manaò e tià ia parau i te hoê taime mauiui, e te peàpeà rahi. Eita, te mea ra e ani, te haamaitaì ia e te faaòreraa hara a te Atua. E aore ia e mämü noa i mua i te pohe e fatata ra ia na. Aita ia o ia i hiò i te päpaì, i päpaìhia i nià i te upoo o Ietu, e aita atoà o ia i faaroo i teie reo aroha i te parauraa e, E ta ù Metua a faaòre mai i ta rätou hara, aore hoì rätou i ìte i ta rätou e rave nei. No teie taata, ua moèhia ia na te Atua i te taime no to na poheraa. Aita oia e manaò nei e, te vai nei te Atua e tià e faaora i to na Varua.

Tei pïhaìiho i te Faaora o teie ao, ma te faaòrehia ta tätou mau hara. Areà ra no teie taata e pohe o ia ma te haamaitaì‑òre‑hia, ma te tätarahapa òre, e ma te roaa òre te ora mure òre ia na.

Areà ra te taata i te pae àtau, ua faaroo i te mau parau tià òre a to na hoa Ua  àvau atu ra, i te parauraa e, aita o òe e mataù i te Atua tei pohe atoà hoì òe hoê- a- huru ? E mea tià teie i ta taua i rave, àreà teie nei taata, aita roa a na e parau ìno. I roto i teie taata te tupu nei te hoê hihi no te tiàturiraa, i te mau parau ta na i faaroo mai roto atu ia Ietu. I te mea, aita roa o Ietu e ìmi nei i te tahi mau parau no te faaìteraa, eita e tià ia na teie pohe. E aita atoà ta Ietu e pariraa i te tahi e i te tahi. Ta Ietu ra i rave e ìmi i te mau raveà atoà ia faaòrehia te hara a te mau taata atoà tei tätarahapa. Oia mau, o te tere mätamua ia o Ietu, aita o ia e hinaaro te pohe o te taata te ora ra. I nià i te tätauro teie a o Ietu e poro nei te Èvaneria hanahana a te Atua. Aita o ia e haapaò nei te motumotu o to na tino, eita e tià ia na ia haùti ua mau o ia i te pätitihia, to na ra Varua e to na vaha aita ia i mau i te pätitihia. Te reo mai ra o te taata i te pae àtau, E te Fatu, e haamanaò mai òe ia ù ia tae òe i to òe ra Patireia. E reo faahiahia mau to teie taata, te ìteraa o ia i to na faufaa òre i mua ia Ietu. E te ìteraa e, eita e tano ia Ietu i teie pohe, e tano ra ia na e to na hoa. Aita o ia e tiàturi nei e taata òhipa ìno o Ietu te tiàturi nei ra o ia e, o Ietu o ia te Tamaiti a te Atua Nui Tumu Tahi. E tià ia Ietu i te faaora ia na, i to te pohe mure òre e fatata ra ia na. Ua faaitoito teie taata i te ani ia Ietu ia haamanaò ia na, i te mea tei pïhaìiho roa te Atua ia na. Eita e täpitihia teie òhipa, e taime maitaì aè teie i te ani roa. I tià ai ia Ietu i te pähono e, Ei parataito ia òe e o vau atoà i teie nei â mahana, oia mau ta ù e parau atu ia oe nei.

Te pähonoraa a Ietu i ô nei aita roa e faaäuraa parau, te horoà nei o Ietu i te manaò tià, ma te haamarirau òre i teie mahana eiaha ra i te tahi atu mahana ê. Na roto i teie parau te vai puai noa ra te aroha o Ietu i to na taata tupu. Ma te arataì ia na i roto i te parataito te vahi i reira te mau tamarii a te Atua e faaea ai, te feia i here i te Atua. Teie vahi o te FAAROO anaè te tumu e tae ai te taata i reira. Teie ia te òhipa e tupu nei i nià i te tätauro, teie o Ietu e poro nei i te Èvaneria i na taata i pïhaìiho ia na. Teie ia to raro i to na tätauro e tähitohito nei i to na tiàraa ATUA. Te vai atoà ra te faaoôo ra, te taì ra eiaha no te mea o te Tamaiti teie a te Atua. Te taì nei rätou i te hoê taata tei here i te mau huru taata atoà, e tae noa atu i to na mau ènemi. O vai te tià e tïtau i te hoê taata i o na ma te mätau òre? O Ietu anaè te Metia, te Arii no te mau Arii te tià e tïtau i te mau taata tei tätarahapa i roto i to na patireia. E toru tätauro tei pätiahia i nià i te mouà ra no Toratota. I ropu na taata òhipa tià òre, o Ietu i roto i to na mamae rahi. I to na pae àui, e te pae àtau na taata tei faautuàhia ia pohe hoê atoà ia o Ietu. Te manaò o Ietu e faaora oia na taata toopiti. Hoê ra e topa ia i roto i te pohe mure òre, i te mea aita o ia i tätarahapa. Areà ra te tahi ra e färiihia ia o ia i roto i te parataito e Ietu.

I teie mahana, tei te hea pae tätou i te tätauro i te pae àtau, e aore i te pae àui. Te tätauro e aha to na auraa i teie mahana? no te faanehenehe noa nei ra i te fare Pure? I te fifi àrapoà? No te pätia anei i nià i te mouà?

Ta te Atua ia au ta Ìtaia faaìteraa i te pene 53, 4. Ua rave mau ra o ia i to tätou paruparu e ua hopoi ê oia i to tätou òto, ua parau ra tätou ia na e, täìri utuà to na, mai te taata täìrihia e te Atua i pohe ai ra.

Te riro nei te Tätauro e te poheraa no Ietu e faaìteraa na te Atua i to na riri tahoo i te taata nei. Ia riro mau ia te mahana poheraa no to tätou Fatu èi mahana òtoraa, èi faaìteraa ia tätou paatoà e no tätou o ia i pohe ai, e no ta tätou mau hara, e no to tätou mau àti i na reirahia ai o ia. Teie ra, na roto i to te Atua faautuàraa i ta na Tamaiti no tätou, ua hinaaro atoà te Atua i te faaìte ia tätou i to na aroha taui òre. O ta na anaè Tamaiti te tià ia amo i ta na hara na tätou ra, eita roa e maraa ia tätou te reira. Ua riro taua faautuàraa na te Atua ra, i ta na Tamaiti hara òre, èi haamäharaa i to na riri e èi faaìteraa i ta na iho parau tià. No te mea e ua pohe mau Ietu i nià i te Tätauro, ua ìte atoà tätou i te täpaò no to te Atua aroha e to na nounou ia tätou. E tiàfaahou mai ra Ietu. No reira, ia riro te märamarama no taua tiàfaahouraa mai no na ra, èi haamanaòraa na tätou i te parau rahi teimaha no te Tätauro e no to na poheraa. Te faahiti nei hoì te mau Èvaneria e, ua âfaìhia o ia i roto i te hoê menema, e ua ôpanihia i te hoê ôfaì teimaha roa. Te faaìte‑atoà‑hia nei i roto i te hiroà faaroo e, ua faatataurohia o ia, ua pohe e ua tänuhia, e ua pöu oia i raro i te pöiri. Na roto i teie nei parau, aita roa i ravaì maitaì te mau haapäpüraa, ia au i ta te parau na te Atua i faaìte mai, hou aè a riro ai taua vahi pöiri ra ei vahi no te mau pohe mure‑òre. I tià ai, ia Ietu i te färii ia pöu i raro i te vahi haehaa roa raeà‑ore‑hia i te manaò taata. Èi raveà e ìtehia ai, e parau ai to na hau i te mau vahi atoà, ia parare to na hau i nià i te teiteiraa no te mau raì, i nià i te fenua, èi raro aè i te fenua, e ia riro èi tiàturiraa na te taata atoà, te fëia e ora nei. Teihea tätou e to te Ètärëtia, i te pae àui, e aore ra i te pae àtau.

Èi ìrava tauturu, Hepera 9, 28 vh. E e fä mai ä O ia o te piti ia o te färaa mai, eiaha èi taraè hara, ia ora ra te fëia e tiaì ia na ra.

Teraì òr. Faatura.

Papa Haamori Tāpati 17 no Novema 2019.

Tāpati 17 no Novema 2019.

Papa Haamori

Ômuaraa

Te haamaitaì nei tätou i te Atua Nui Tumu Tahi tei âmui ia tätou i teie mahana no te haamori i to na hanahana, teie ta te päpaì Taramo parauraa, Taramo 98 E himene i te Fatu i te himene âpï, e mau mea taa ê hoì tei ravehia e a na, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. Âmene. E tià mai tätou, haamaitaì tätou i te Atua i te reo himene.

Himene.

5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Pärahi tätou

Te faaära

Teie te faaäraraa a te puta no te paari, Marati pene3 i te mau ìrava 19 e te ìrava 20, 19 Inaha hoì, te fätata mai ra te mahana mai te umu ra i te àmaraa e te feiä atoà i teòteò ra, e te feiä atoà i rave i te parau ìno ra, e riro ia ei àihere ra e àma rätou ia tae i taua mahana ra, te nä reira mai ra te Fatu Täpäota ra. E òre e faatoehia te tumu e te âmaa atoà ra. 20 O òutou rä tei mataù mai i to ù nei iòa, e hiti mai ia te Mahana parau tià ia òutou mä te ora i raro aè i to na pererau; e haere hoì òutou i räpae, e e tupu òutou mai te täfa faaàmu o te fare ra.

I mua i teie mau parau te faahaèhaa nei mätou i mua i te aroha e te here o te Atua tei faaära ia tätou, e te Atua e aroha mai ia mätou. Haamaitaì tätou i te Atua i te hoê reo himene.

Himene

Ua aroha mai te Atua ia tätou, te faaòre nei i ta tätou mau hara ma te faaitoito i to tätou faaroo ia òre ia riro noa i roto i te mau faanahoraa tei òre e au i te hinaaro no te tiàmaraa o te âau parau tià ia mau maite ra i nià i tumu no te tiàfaahouraa o te Metia te faaora o te ao nei. Haamaitaì tätou i te Atua no teie mau parau tei täuturu i to tätou faaroo e tià ai. Haamaitaì tätou i te Atua e tià mai tätou.

Himene

Teie te tahi mau parau ta Pauro i faahiti i roto i te rata ta na i päpaì i to Tetaronia piti pene 3 i te mau ìrava 7 e tae i te ìrava 12, 7 Ua ìte hoì òutou iho na e ia pee mai òutou ia mätou e tià ai, eere hoì to mätou i te haereà tià òre i roto ia òutou na. 8 Aore hoì mätou i àmu noa i ta vëtahi ê ra mäa, ua rave rä mätou i te òhipa mä te rohirohi, i te ruì e te ao, ia òre roa te hoê o òutou ia teimaha ia mätou nei. 9 Eere rä mai te mea e eita e au ia mätou, ia riro rä mätou ei hiòraa no òutou, ia pee mai òutou ia mätou nei. 10 E ua parau atu hoì mätou ia òutou ia mätou ä io na ia òutou na, e te taata e òre e rave i te òhipa ra, eiaha atoà o ia e àmu i te mäa. 11 Te faaroo nei hoì mätou e, e haereà tià òre to te hoê pae o òutou na, aore i rave i te òhipa, e hiòpoà rä i ta vëtahi ê ra haapaòraa. 12 O te feiä rä e nä reira ra, te parau atu nei mätou, te aò atu nei, i te iòa o to tätou Fatu o Ietu Metia, e e rave mäite rätou i te òhipa, a àmu ai i ta rätou iho mäa. Âmene.

Pärahi tätou.

Haamaitaì tätou i te Atua i te reo himene.

Himene

Pure tätou i te Atua.

Te Atua maitaì roa ra, te faaineine nei mätou i te taiòraa i ta òe parau a türama ia mätou i to märamarama parau tià Âmene.

Ta tätou nei parau no teie mahana tei roto ia i te Parau Maitaì a to tätou Fatu o Ietu Metia, i te päpaìraa a Ruta i te pene 21 i te mau ìrava 5 e tae i te ìrava 19 tei upoo parau Te faaararaa o te pauraa o te hiero  ìrava 5 Te paraparau ra te tahi pae i te hiero, i te ùnaùna i te ôfaì maitataì e te taoà moà, ua parau atu ra o ia 6 Teie nei mau mea ta òutou e hiò nei, te fätata mai ra te tau e òre e vaiihohia ai te tahi ôfaì nià iho i te tahi, e òre e toe ai i te hurihia i raro.

Te mau täpaò e te mau àti, 7 Ua ui mai ra rätou ia na, nä ô mai ra E te Òrometua, a fea ia mau mea e tupu ai? E e aha te täpaò e ìte ai e, ua fätata i te tupu? 8 Ua parau atu ra o ia E ara, eiaha òutou ia vare. E rave rahi hoì të haere mai mä to ù nei iòa, i te nä ô-anaè-raa e O vau te Metia, e Teie iho taua tau ra E teie nei, eiaha òutou e pee atu ia rätou. 9 E ia faaroo òutou i te roo tamaì e te âueue, eiaha e mataù e nä mua hoì te reira i te tupu e tià ai aita rä e fätata te hopeà i reira. 10 Ua parau atu ra o ia ia rätou E tià mai te tahi fenua e àro i te tahi fenua, e te tahi pätireia e aro i te tahi pätireia; 11 e te âueue rahi i te fenua i tërä vähi, i tërä vähi, i te oè hoì, e te maì rahi, e te mea mehameha e te temeio rahi i te ìteäraa i nià i te raì. 12 O òutou na rä të haruhia mai na, e e hämani-ìno-hia, i te tuuraa atu ia òutou i te mau tunato ra, e i roto i te täpeàraa, e e äratohia i mua i te aro o te hui arii, e te mau tävana, no to ù nei iòa. 13 E e riro te reira ei faaìteraa parau na òutou. 14 E tënä na, e ôpua mäite òutou, e eiaha roa e nä mua i te ìmi i te parau ei parauraa atu. 15 Na ù hoì e horoà atu i te parau na òutou e te paari, eita roa e tià i to òutou mau ènemi atoà ia faaòre mai e ia pätoì mai. 16 E haavarehia rä òutou e to òutou mau metua, e te mau taeaè, e to òutou iho fëtii, e to òutou mau tauà iho; e e pohe te tahi pae o òutou na ia rätou. 17 E e vähiahia mai òutou e te taata atoà i to ù nei iòa. 18 Eita roa rä te hoê ìo rouru o to òutou na upoo e moè. 19 E ora rä òutou i te mau tämau mäite.

Na te Atua e haamaitaì mai i te täiòraahia ta na parau. Te Atua e mauruüru no teie mau parau ta mätou i faaroo aè nei. Âmene.

Haamaitaì tätou i te Atua i te reo himene.

Ruta èv 21.5-19 Ìo rouru

Tāpati 17 no Novema 2019.

Ìo rouru

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e a na, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Marati 3.19-20

19 Inaha hoì, te fätata mai ra te mahana mai te umu ra i te àmaraa; e te feiä atoà i teòteò ra, e te feiä atoà i rave i te parau ìno ra, e riro ia ei àihere ra; e àma rätou ia tae i taua mahana ra, te nä reira mai ra te Fatu Täpäota ra. E òre e faatoehia te tumu e te âmaa atoà ra. 20 O òutou rä tei mataù mai i to ù nei iòa, e hiti mai ia te Mahana parau tià ia òutou mä te ora i raro aè i to na pererau; e haere hoì òutou i räpae, e e tupu òutou mai te täfa faaàmu o te fare ra.

2 Tetaronia 3.7-12

7 Ua ìte hoì òutou iho na e ia pee mai òutou ia mätou e tià ai, eere hoì to mätou i te haereà tià òre i roto ia òutou na. 8 Aore hoì mätou i àmu noa i ta vëtahi ê ra mäa, ua rave rä mätou i te òhipa mä te rohirohi, i te ruì e te ao, ia òre roa te hoê o òutou ia teimaha ia mätou nei. 9 Eere rä mai te mea e eita e au ia mätou, ia riro rä mätou ei hiòraa no òutou, ia pee mai òutou ia mätou nei. 10 E ua parau atu hoì mätou ia òutou ia mätou ä io na ia òutou na, e te taata e òre e rave i te òhipa ra, eiaha atoà o ia e àmu i te mäa. 11 Te faaroo nei hoì mätou e, e haereà tià òre to te hoê pae o òutou na aore i rave i te òhipa, e hiòpoà rä i ta vëtahi ê ra haapaòraa. 12 O te feiä rä e nä reira ra, te parau atu nei mätou, te aò atu nei, i te iòa o to tätou Fatu o Ietu Metia, e e rave mäite rätou i te òhipa, a àmu ai i ta rätou iho mäa.

Ruta èv 21.5-19

Te faaararaa o te pauraa o te hiero

(Mät 24,1-2; Mär 13,1-2)

5 Te paraparau ra te tahi pae i te hiero, i te ùnaùna i te ôfaì maitataì e te taoà moà, ua parau atu ra o ia 6 Teie nei mau mea ta òutou e hiò nei, te fätata mai ra te tau e òre e vaiihohia ai te tahi ôfaì nià iho i te tahi, e òre e toe ai i te hurihia i raro.

Te mau täpaò e te mau àti

(Mät 24,3-14; Mär 13,3-13)

7 Ua ui mai ra rätou ia na, nä ô mai ra E te Òrometua, a fea ia mau mea e tupu ai? E e aha te täpaò e ìte ai e, ua fätata i te tupu? 8 Ua parau atu ra o ia E ara, eiaha òutou ia vare. E rave rahi hoì të haere mai mä to ù nei iòa, i te nä ô-anaè-raa e O vau te Metia, e Teie iho taua tau ra E teie nei, eiaha òutou e pee atu ia rätou. 9 E ia faaroo òutou i te roo tamaì e te âueue, eiaha e mataù: e nä mua hoì te reira i te tupu e tià ai; aita rä e fätata te hopeà i reira. 10 Ua parau atu ra o ia ia rätou E tià mai te tahi fenua e àro i te tahi fenua, e te tahi pätireia e aro i te tahi pätireia; 11 e te âueue rahi i te fenua i tërä vähi, i tërä vähi, i te oè hoì, e te maì rahi, e te mea mehameha e te temeio rahi i te ìteäraa i nià i te raì. 12 O òutou na rä të haruhia mai na, e e hämani-ìno-hia, i te tuuraa atu ia òutou i te mau tunato ra, e i roto i te täpeàraa, e e äratohia i mua i te aro o te hui arii, e te mau tävana, no to ù nei iòa. 13 E e riro te reira ei faaìteraa parau na òutou. 14 E tënä na, e ôpua mäite òutou, e eiaha roa e nä mua i te ìmi i te parau ei parauraa atu. 15 Na ù hoì e horoà atu i te parau na òutou e te paari, eita roa e tià i to òutou mau ènemi atoà ia faaòre mai e ia pätoì mai. 16 E haavarehia rä òutou e to òutou mau metua, e te mau taeaè, e to òutou iho fëtii, e to òutou mau tauà iho; e e pohe te tahi pae o òutou na ia rätou. 17 E e vähiahia mai òutou e te taata atoà i to ù nei iòa. 18 Eita roa rä te hoê ìo rouru o to òutou na upoo e moè. 19 E ora rä òutou i te mau tämau mäite.

Manaò.

E tià ia parauhia i roto i na taiòraa e mäha nei, te tahi manaò tumu e ìtehia, TE MAHANA O TE ATUA, e to na mata. Na teie na tumu parau e faaìte ia tätou e, tei pïhaìiho noa te Atua ia tätou, ei haapäpüraa e, te vai tämau noa nei O ia i roto i te ora. E taua ora ra, to na ia mahana, e to na mata, tei òre i faaruè ia tätou. Te mahana o te Atua, o te mau taata atoà ia, te feia parau tià, e te feia parau tià òre tei tïtauhia ia tätarahapa. Aita O ia e faatea te reira mau maitai ta na e horoà nei, a tae roa ai i te mahana haaväraa. I reira e faataahia ai te parau tià i te parau tià òre, ia tae i teie mahana, e ìtehia ai te Mau tamarii no te pupu taata o te Atua, o tei òre i tano i te mata o te Atua ra, e òre roa e tià i mua i to na aro . E höparahia ia i rapae i te vahi àuàuraa niho. Te mata o te Atua, e tano noa ia te reira i nià i te feia parau tià, no te mea tei roto i ta na hiòraa e tupu ai te tauturu, tei faatupu i to na aroha, ma te tiàturi. I to na mau tävini, no te faaìte i to na mau hinaaro ma te ora. Ia tupu anaè mai teie te huru, eita te òhipa e teimaha i te mea o te Atua te ra, e hiòpoà ra to na mau tävini. Oia ia te parau no aòraa, na teie òhipa e faaitoito i te mau tävini o te Atua ia pärahi tämau i roto i te faaroo ia òre ia àueue. Ma te ara ra i te mau òhipa tià òre atoà e tupu na roto i te mau faahemaraa rau atoà e ìno ai, e aore ra vähiahia ai. Ia faaroo tätou te haapotoraa o te mau taiòraa e mäha nei.

-Taramo 98, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

-Materi 3, 20 O òutou rä tei mataù mai i to ù nei iòa, e hiti mai ia te Mahana parau tià ia òutou mä te ora i raro aè i to na pererau; e haere hoì òutou i räpae, e e tupu òutou mai te täfa faaàmu o te fare ra.

-2 Tetaronia 3 12 O te feiä rä e nä reira ra, te parau atu nei mätou, te aò atu nei, i te iòa o to tätou Fatu o Ietu Metia, e e rave mäite rätou i te òhipa, a àmu ai i ta rätou iho mäa.

-Ruta èv 21, 18 Eita roa rä te hoê ìo rouru o to òutou na upoo e moè.

Ta Ietu ia e faaära nei i ta na mau pipi, e ora ra òutou i te mau tämau maite, tei faahitihia i roto i te Parau Maitaì päpaìhia e Ruta i te pene 21 i te ìrava 19. Oia hoì teie ora tei roto ia i te täviniraa, e te faaìteraa i te parau tià. O teie ia ta te Parau Maitaì i päpaìhia e Ruta ia au i  te türamaraa a te pene 21 i te ìrava 5 e tae i te ìrava 19.

Ei ta tuhaaraa i te pene parau.

E tià ia parauhia e toru tuhaa e vai nei i roto i teie taiòraa.

1)                 ir.5 e tae i te ir.7          Te ùnaùna o te hiero e te tohu a Ietu.

2)                 ir.8 e tae i te ir 13        E ara.

3)                 ir.14 e tae i te ir.19      E ora ia Mau maite.

Ei tuatapaparaa.

O ta Ietu ia e faaära nei i ta na mau pipi, i te ùnaùna o teie hiero ta rätou e ìte nei. E faaìte ia i te òhipa i ravehia e te mau taata i roto i te tau tei orahia. E nehenehe mau to te hiero i patuhia e te hinaaro o te taata. E tià ia parauhia te faahiahia nei te mau pipi i teie òhipa. Ma te ìte òre ra e, e aha te òhipa e tupu ra i roto i teie fare. Ta rätou e ìte nei e mau taoà moà, e mau ôfaì maitataì, ua mau noa ta rätou hiòraa i nià i te nehenehe, eiaha ra i nià i te òhipa e tupu ra. E faaìte o Ietu eita teie mau ôfaì e vai faahou i nià i te tahi e te tahi, e hurihia i raro, e aha te täpaò, mauti ra ia, e ara, te vai ra te tahi e haere mai e parau ia mätou e, o vai te Metia, eiaha e pee atu, e faaroo òutou i te roo tämaì, te âueueraa fenua, eiaha ra e mataù. E na mua teie mau òhipa i te tupu, eita ra te reira i te hopeà o teie ao. E tià mai te tahi fenua e àro te tahi fenua, te tahi patireia e àro i te tahi patireia. E àueue te fenua, te oè e te maì rahi. E haavarehia te feia parau tià, e tuuhia i roto i te fare täpeàraa, ma te äratohia i mua i te mau mana o te ao nei i te iòa o Ietu. Ia tupu teie mau òhipa ia riro ra ia te reira ei faaìteraa i te parau mau na te mau tamarii a te Atua. Tei reira na Ietu ia e horoà mai te parau ia rätou ia faaìte. Ia òre ia fati i raro aè te faanahoraa a te ènemi, mauti ra ia o te haavare. E pohe roa te tahi pae i te faaìno i te iòa o Ietu Metia. Ia tupu anaè mai teie te huru e òre roa te hoê ìo rouru o teie Mau taata parau tià e moèhia i te Atua. E ora ra rätou ia mau maite i te tiàturiraa i te Atua. I te mea tei nià te mata o te Atua i ta na mau tamarii, tei òre i àueue te faaroo, i roto i te mau òhipa atoà e tupu nei. Ei faaturoriraa i te feruriraa o te mau taata atoà e o nei i roto i te faanahoraa a te Atua.

Ei parau no te taiòraa.

Na Èvaneria hiò àmui, te tuàti nei ia rätou ei faaìteraa i te hopeàraa no te oraraa o Ietu i te fenua nei. Ma te tuu atoà i te huru no te tupuraa te hopeà no teie nei ao. Teie hohoà, tei àmui i te òhipa e tupu i nià ia Ierutarëma ei faaìteraa ia i te haaväraa a te Atua i nià i te mau òhipa atoà, tei rahuhia, e tei faatiàhia e te taata. Oia hoì, eita na te ìno e faaoti te parau no te hopeàraa o teie nei ao. Te parau ia ta Ietu e faahiti nei i te ìrava 19, E ORA RA OUTOU I TE MAU TAMAU MAITE. To tätou teie puai e te feia faaroo, e vävähi anei te Atua ta na i here, ta na i faatavana i nià- iho. Aita vau e tiàturi nei e na reira-hia teie ao nehenehe, tei niuhia e te Atua, na roto i to na faatiàrepuraa i to na Varua i nià i te ìriatai. E faaìteraa teie, te vai noa nei te aroha o te Atua i nià ia tätou. Ia ù nei te tiàturi nei au i teie na parau a Ietu i te ìrava 14 e te 15, E TENA NA, E ÒPUA MAITE OUTOU, E EIAHA ROA E NA MUA I TE ÌMI I TE PARAU EI PARAURAA ATU NA Ù HOI E HOROÀ ATU I TE PARAU NA OUTOU E TE PAARI, AITA ROA E TIÀ I TO OUTOU MAU ENEMI ATOÀ IA FAAÒRE MAI E IA PATOÌ MAI.

Oia hoì te ani mai nei o Ietu ia ù ia àro, i te àroraa ei faaìteraa e, eita na te âueueraa fenua, te tiruviraa, te tamaìraa, e te mau maì rau, e faaoti te parau no te hopeàraa o teie ao. Ia rave au i teie òhipa te haapäpü nei o Ietu, ia au i te ìrava 18, EITA ROA RA TE HOÊ ÌO ROURU O TO OUTOU UPOO E MOÈ. To na auraa ra, e ora tätou ia tämau maite tätou i to tätou faaroo eiaha ia àueue. Àueue noa atu te fenua, aita ta tätou e raveà, eiaha ra te taata ia àueue, i reira e huehue ai.

Ia ù i manaò te parau no te hopeàraa o teie ao, eita e tupu mai ta Ruta e faatià ra. No te aha? I te mea na te Atua iho i parau e, EITA VAU E TIRUVI FAAHOU I TE FENUA, e teie parau ta Ietu i te ìrava 39 no te pene 6 i papaìhia e Ioane, TEIE HOÌ TO TE METUA TEI TONO MAI IA Ù NEI HINAARO, IA ÒRE ROA VAU IA ÈRE I TE HOÊ I TA NA I HOROÀ MAI RA, IA FAATIÀ-PAATOÀ-HIA E AU IA TAE I TE MAHANA HOPEÀ RA.

Oia hoì, eita tei pohe te parau hopeà o teie nei ao, tei te ORA MURE ÒRE ra. To na auraa ra, aita e âueueraa fenua, aita e tamaìraa, aita e maìraa, aita e vävähiraa fare faahou. No te mea te faatià nei te Atua i to na mahana. I reira te Atua e tià ai i nià i to na parahiraa no te haava i teie nei ao. Ta Tetaria ia e faaìte nei i te pene 2 no te ìrava 13, E MAMU NOA, E TE TAATA ATOÀ E, I TE ARO O IEHOVA E, UA TIÀ HOÌ  O IA I NIÀ I TO NA PARAHIRAA MOÀ.

O teie to ù TIAITURURAA no te hopeà o teie ao, na te ORA e haava i te taata, eita ra na te pohe, ia maitai te ORA.

Te nahea nei ia ta òutou hiòraa?

E aha teie e ìtehia nei i roto i te heheuraa, ta Ietu ia pähonoraa i nià i na uiraa e piti.

Àfea e tupu ai?          

Ia parau te taata e o vau te Metia.

Ia faaroo te roo tamaì

Ia àro te fenua e te fenua

Ia àro te patireia e te patireia

Ia äratohia te feia parau tià i mua i te mana o te ao.

Ia tupu te haavareraa te tahi i te tahi

EITA RA IA I TE HOPEÀ O TEIE NEI AO.

E aha te täpaò

Ia hurihia te hiero i raro.

Ia àueue te fenua

Ia oèhia te fenua

Ia maìhia.

EITA RA IA I TE HOPEÀ O TEIE NEI AO.

Te poroìraa a Ietu.

Ta òutou e hiò na, e hurihia i raro, e ara ra eita i te hopeà, te àroraa, eiaha e mehameha, tei haruhia, e riro ei faaìteraa, tei ôpuahia, e òre roa te ènemi e tià, tei haavarehia, i to ù ra iòa, e òre te ìo rouru e moè, e ora ia mau maite.

Ei uiraa.

E aha o Ietu i faaìte ai mai teie te huru?

Ei pähonoraa.

1) E ora ra òutou i te mau tämau maite. Ir 19.

2) Ia noaa te tiaìtururaa o te taata i te Atua.

Oia mau, e toru vavahiraahia te hiero o Ierutarëma. Tei faatià faahouhia e Toromona, te piti na Terupapera, e te toru na Herota nui, e i te mätahiti 70 i muri mai i te tiàfaahouraa o te Metia e vävähi faahouhia teie hiero. Te Mau täpaò ia ta Ietu i faatià, e ia tupu anaè teie mau mea, te ora tei roto i te tiaìtururaa i te Atua, te mau tämau mäiteraa i te faaroo.

Terai or. Faatura.

Ruta èv 20.27-38 Eere

Tāpati 10 no Novema 2019.

Eere

Taramo 17

1 E pure na Tävita. E faaroo mai i te tià, e te Fatu e, e haapaò mai òe i ta ù e tiàoro nei, e faaroo mai i ta ù pure no roto i te vaha haavare òre. 2 Òe iho të tuu mai i te parau ia ù nei; na to mata e hiò i te mea tià. 3 Ua tämata òe i ta ù âau, ua hiò mai òe ia ù i te ruì; ua tämata òe ia ù, e aita e parau ìno i ìteä ia òe ra. E ua ôpua hoì au, eiaha ta ù vaha ia hapa. 4 I ta te taata nei parau, no te parau a to vaha i ära ai au i te mau haereà o te täparahi taata ra. 5 E tauturu mai òe i to ù haereà i to òe na mau èà, ia òre ia pähee o ù puè âvae. 6 Te tiàoro nei au ia òe, te faaroo nei hoì òe ia ù, e te Atua. E färiu mai to tarià ia ù nei, e haapaò mai i ta ù parau. 7 A faaìte hua mai na i to aroha hämani maitaì i mäerehia ra, e tei faaora i te feiä i tiàturi ia òe i tei tià mai i nià e märô mai i to òe na rima àtau. 8 Tiaì mai òe ia ù mai te ôriò mata ra, e huna ia ù i raro aè i to maru pererau ra, 9 i te feiä paieti-òre, o tei hämani ìno mai ia ù nei, i ta ù mau ènemi, e haapuni mai ia ù nei e täparahi. 10 Ua àti rätou i to rätou töâhua, te parau teòteò mai ra to rätou vaha. 11 To mätou èà tià, ua haapunihia e rätou i teie nei te faatano noa ra rätou i to rätou mata i raro i te repo. 12 E au te ènemi i te riona e rü i ta na mäa, mai te riona âpï e püpuni i te vähi moè ra. 13 A tià, e te Fatu, e faaère atu ia na, e faahaèhaa atu, ia ora vau i te taata ìno, i te òè na òe ra, 14 i te rima no òe, e te Fatu, i te reira nänaì taata, te taata no teie nei ao, e tei teie nei ao ta rätou tufaa; tei faaîhia to rätou ôpü e òe i ta òe ra taoà moè. E ua rahi to rätou tamarii e te vaiihohia nei ta rätou taoà i toe na te àruàru rii ra. 15 Âreà vau nei, e ìte au i to mata mä te parau tià; e ia ara vau ra, e mauruüru ä vau i to ù auraa atu ia òe.

Tāniera 3.1-30

Na taata âpï e toru i roto i te auahi

1 Hämani iho ra te arii ra o Nëpütäneta i te hoê tii àuro, e ono àhuru te tüpiti i te teitei, e ono hoì tüpiti i te âano: e ua faatià aè ra o ia i taua tii ra i te vähi päpü ra i Tura, i te mataèinaa ra i Päpuronia. 2 Ua tono aè ra te arii ra o Nëpütäneta i te veà e ope mai i te mau arii, e te mau tävana, e te mau raatira, e te mau haavä, e te feiä mau taoà, e te mau fänaò, e te mau tiàau, e te mau tävana i te mau mataèinaa ra, e haere mai i te haamoàraa i te tii i faatiàhia e te arii ra, e Nëpütäneta. 3 Ua haaputuputu mai ra te mau arii, e te mau tävana, e te mau raatira, e te mau haavä, e te feiä mau taoà, e te feiä faaaò, e te mau tiàau, e te mau tävana i te mau mataèinaa ra, i te haamoàraa i te tii i faatiàhia e te arii ra, e Nëpütäneta. E ia tià anaè rätou i mua i taua tii i faatiàhia e Nëpütäneta ra. 4 Ua tiàoro mai ra te poro, Te faaìtehia atu na òutou, e te mau taata na, e te mau fenua na, e te reo èê atoà ra, 5 ua ìte anaè òutou i te òto o te pü, e te vivo, e te tïnura, e te tapata, e te näpara, e te tumefonia, e te mau mea atoà i faaòtohia ra, e tïpapa òutou i raro, i reira haamori ai i te tii àuro i faatiàhia e te arii ra, e Nëpütäneta: 6 e o te òre e tïpapa i raro a haamori ai, ei taua hora ra o ia e tïtirihia ai i roto i te umu auahi ura ra. 7 E tae aè ra i te taime i ìte ai te mau taata i te òto pü, e te vivo, e te tïnura, e te tapata, e te näpara, e te mau mea atoà i faaòtohia ra, ua tïpapa iho ra te mau taata atoà i raro, e te mau fenua, e te reo èà atoà, e ua haamori atu ra i te tii àuro ta te arii ra ta Nëpütäneta i faatià ra. 8 Ua haafätata mai ra te tahi pae Tarataio i reira, ua tihotiho mai ra i te Âti-Iüta. 9 Ua parau mai ra rätou, nä ô mai ra i te arii ra ia Nëpütäneta, E te arii e, ia ora roa òe. 10 Ua faatià òe i te hoê parau, e te arii e, e te taata i ìte i te òto o te pü, e te vivo, e te tïnura, e te tapata, e te näpara, e te tumefonia, e te mau mea i faaòtohia ra, o te tïpapa ia i raro haamori ai i te tii àuro ra; 11 e o tei òre e tïpapa i raro a haamori ai, e hurihia ia i roto i te umu auahi ura ra. 12  Teie hoì e toofanu puè Âti-Iüta i tuuhia e òe i nià i te haapaòraa i te mataèinaa ra o Päpuronia, o Tetarata, e o Mëteta, e o Àpete-Neto; aore taua mau taata nei i haapaò ia òe, e te arii aore rätou i haamori i to òe ra mau atua, aore hoì i haamori i te tii àuro ta òe i faatià ra. 13 Ua faaue atu ra Nëpütäneta mä te riri rahi ûàna nö na ra, e arataì mai ia Tätaräta, e ia Mëteta e ia Àpete-Neto ra. Ua arataì mai ra rätou i taua nä taata ra i mua i te aro o te arii. 14 Ua parau mai ra Nëpütäneta, nä ô mai ra ia rätou, E parau mau änei, e Tätaräta, e Mëteta, e Àpete-Neto, e òre òutou e haamori i to ù mau atua, e òre hoì e haamori i te tii àuro tä ù i faatià ra? 15 E tënä na, ia ìte òutou i te òto o te pü, e te vivo, e te tïnura, e te tapata, e te näpara, e te tumefonia, e te mau mea e faaòtohia ra, te tïpapa ra òutou i raro te haamori ra i te hohoà i hämanihia e au nei, ua tià ia; ia òre rä òutou ia haamori ra, ei taua hora ra òutou e hurihia ai i roto i te umu auahi ura ra, e o vai te Atua e faaora ia òutou i to ù nei rima? 16 Ua parau atu ra Tätaräta, rätou o Mëteta, e Àpete-Neto, nä ô atu ra i taua arii ra, E Nëpütäneta, aore ra mätou i rü i te parauraa atu ia òe i tënä na parau. 17 Ia hinaaro o ia iho, e tià ia i to mätou Atua e haamori nei ia faaora o ia ia mätou i te umu auahi ura ra, e tià ia ia na ia faaora ia mätou i to rima, e te arii; 18 ia òre rä o ia ia hinaaro, e òre ä mätou e haamori i to òe ra mau atua, ia ìte mai òe, e te arii, e òre hoì e haamori i te tii àuro i faatiàhia e òe ra. 19 Î roa aè ra Nëpütäneta i te riri rahi, e huru ê atu ra ta na mata ia Tätaräta, e ia Mëteta, e ia Àpete-Neto: ua parau atu ra o ia, faaue atu ra ia tahu rätou i te umu ra, e ia taìhitu te tahuraa i te mau tahuraa atoà ra. 20 E ua faaue atu ra o ia i te feiä püai rahi i te nuu atoà nö na ra e ruuruu ia Tätaräta, e ia Mëteta, e ia Àpete-Neto, e huri hoì ia rätou i roto i te umu auahi ura ra. 21 Ruuruuhia iho ra taua puè taata ra, mä te àhu, e te täupoo, e te àhu tïpona, e te mau àhu atoà ra, e hurihia iho ra i roto i te umu auahi ura ra. 22 E no te mea te rü ra te faaue a te arii ra, e ua rahi roa te umu i te àma, pohe roa aè ra taua mau taata ra, o tei rave ia Tätaräta, e ia Mëteta, e ia Àpete-Neto ra. 23 O eie nei rä puè taata tootoru, e Tätaräta, o Mëteta, e o Àpete-Neto ra, maìri iho ra ia i raro mä te rürütaina i rotopü i taua umu auahi ura ra. 24 Ua mäere noa iho ra te arii ra o Nëpütäneta i reira, e ua tià rü noa mai ra, ua parau mai ra, nä ô mai ra i te mau faaaò nö na ra, Eere änei tootoru a tätou tau taata ruuruuhia i huri i roto i te auahi? Ua parau atu ra rätou, nä ô atu ra i te arii, E te arii, e parau mau. 25 Ua parau mai ra o ia, nä ô mai ra, Inaha, te ìte nei au i nä taata toomaha mä te täpeà òre, i te haere-noa-raa no roto i te auahi e aore roa e maì; e te huru o te toomaha ra mai te Tamaiti ia a te Atua. 26 Ua haafätata mai ra Nëpütäneta i te àuvaha o taua umu auahi ura ra, e ua parau atu ra, nä ô atu ra, e Tätaräta, e Mëteta, e Àpete-Neto, e nä tävini o te Atua teitei, e haere mai i räpae, e haere mai i ô nei. Ua haere mai ra Tätaräta, e o Mëteta, e o Àpete-neto i räpae mai rotopü mai i te auahi ra. 27 E putuputu mai ra te mau arii, e te mau tävana, e te mau raatira, e te mau faaaò o te arii ra, ua hiò iho ra i taua nä taata ra, ìte aè ra e aore roa to rätou tino i taeà i te auahi, aore roa hoì te hoê ìo rouru o to rätou upoo i àma, aore hoì to rätou àhu i huru ê, aore hoì i mau mai te hauà auahi i nià ia rätou. 28 Ua parau iho ra Nëpütäneta, nä ô aè ra, Ia haamaitaìhia te Atua no Tätaräta, e no Mëteta, e no Àpete-neto, o tei tono mai i ta na merahi e ua faaora i to na puè tävini i tiàturi ia na ra, e ua faaòre aè nei i ta te arii ra parau, e ua höroà noa mai i to rätou tino ia òre rätou ia haamori, ia òre ia tävini atu i te tahi atua ê, mäori rä o to rätou iho ra Atua. 29 E teie nei, te faatupu nei au i te hoê parau, E te mau taata, e te fenua, e te mau reo èê atoà ra, ia faaìno mai i te Atua no Tätaräta, e no Mëteta, e no Àpete-Neto, e täpüpühia ia, e faarirohia ia to rätou mau fare ei pueà: no te mea aita atu Atua e tià ai ia faaora mai teie nei te huru. 30 Ua faateitei iho ra te arii ia Tätaräta, e ia Mëteta, e ia Àpete-neto, i taua mataèinaa ra i Päpuronia.

2Tetaronia 2.16-17

16 E ia haamähanahana mai to tätou Fatu o Ietu Metia iho, e te Atua to tätou Metua ra, o tei aroha mai ia tätou nei, e ua horoà mai hoì i te òaòa mure òre, e te tiàturiraa maitaì i to na ra aroha mau, 17 ia haamähanahana mai i to òutou âau, e ia haapäpü hoì ia òutou i te mau parau e te mau òhipa maitataì atoà ra.

3. 1-5

E pure no mätou

1 E teie nei, e te mau taeaè, e pure ia mätou, ia horo noa te parau a te Fatu, e ia haamaitaìhia, mai tei ô òutou atoà na, 2 e ia faaorahia mätou i te taata ìino e te haapaò òre, aore hoì i àti päatoà te taata i te faaroo. 3 E parau mau rä ta te Fatu, na na òutou e haapäpü, e e faaora hoì ia òutou i te ìno. 4 E te tiàturi nei mätou i te Fatu ia òutou, e te rave na òutou, e e rave ä òutou, i ta mätou e parau atu ia òutou na. 5 E ia faatae hoì te Fatu i to òutou âau i te aroha o te Atua, e i te faaòromaì o te Metia ra.

Ruta èv 20.27-38

Te tiàfaahouraa

(Mät 22,23-33; Mär 12,18-27)

27 Ua haere mai ra te tahi pae i te mau Tätutea ra, o tei parau e, aore e tiàfaahouraa, e ua ui mai ra ia na, 28 nä ô mai ra. E te Òrometua, i päpaì mai Möte i te parau ia mätou, e ia pohe te tuaana o te hoê taata aore e tamarii, te ora ra te vahine, e faaipoipo te teina i taua vahine ra, e haafänautama i te tamarii na ta na tuaana. 29 Toohitu puè tamarii tamaroa i te hoê fëtii, faaipoipo iho ra te mätahiapo i te vahine, e pohe atu ra, aore e tamarii. 30 Ua faaipoipo iho ra te toopiti i taua vahine ra, e pohe atoà atu ra mä te tamarii òre. 31 Ua faaipoipo iho ra hoì te tootoru i taua vahine rä, e i nä reira atoà hoì rätou toohitu. E hope atoà atu ra i te pohe mä te tamarii òre ä. 32 E te hopeà iho ra, pohe atoà atu ra taua vahine ra. 33 E teie nei, ia tae i te tiàfaahouraa ra, e riro o ia ei vahine nä vai i taua toohitu ra? E vahine hoì o ia na rätou atoà toohitu. 34 Ua nä ô atu ra Ietu i te parauraa atu ia rätou. Te faaipoipo nei to teie nei ao, e te horoàhia nei e faaipoipo; 35 âreà te feiä e manaòhia e au ia rätou taua ao a muri nei, e të tiàfaahou mai te pohe mai, e òre ia rätou e faaipoipo, e òre hoì e horoàhia e faaipoipo. 36 E òre hoì rätou e pohe faahou, mai te mau merahi ra hoì rätou e tamarii na te Atua, e tamarii no te tiàfaahouraa. 37 I te parau ra e, e faatiàfaahouhia te feiä i pohe, ua faaìte atoà mai hoì Möte ia na i parau i te Fatu i fä mai i roto i te pü àihere ra O te Atua o Âperahäma, e te Atua no Ìtaata, e te Atua no Iatöpa. 38 Eere hoì o ia i te Atua no tei pohe, no tei ora rä; te ora anaè ra hoì rätou ia na.

Manaò.

 Ei tuatapaparaa.

Ia hiò maitai anaè tätou i teie na taiòraa e mäha e tià ia tätou ia parau e, e pae iti roa teie e tiàturi nei i te Atua. To rätou ra tiàturiraa i te Atua eita ia e pohe i te auahi ia tinai. E riro ra te auahi ei faarahi faahouraa i to rätou tiàturiraa i te Atua. Te huru teie no te feia tei tuu i to rätou oraraa i roto i te hinaaro o te Atua. Teie faanahoraa, no te faaìte ia te vai nei te Mau tià e paruru ra i te hanahana o te Atua. Ta rätou e rave te òre- raa ia rätou e fati i raro aè i te Mau faaheporaa tià òre, tei faatîtî ia rätou no te haamori i te hoê atua pohe. O ta rätou ra e rave te faanahoraa ia a te Atua. Ta te Atua e faaìte ta na e tïtau mauti ra ia, te tiàmaraa i roto i te ora. Te vahi tei reira te pohe, e faaìte te Atua i te ora ia rätou, eita ra te Atua e vaiiho noa ia rätou, o rätou anaè. E pärahi fatata noa ra O ia ia rätou. Mai teie te huru te Atua ta tätou e haamori nei, e Atua tei hinaaro i te pärahi tämau i ropu i ta na Mau tamarii, ia òre te Mau tamarii ia pärahi òvere noa. Tei pärahi òvere noa o te mau taata ia, tei fati i raro aè i te mau faanahoraa a te mau atua pohe. O teie atoà mau taata ta te Atua e ôpua nei e faaora, na roto i to na faatupuraa i te tahi mau täpaò maere, naeà-òre-hia e te mau ìte taata, tei pärahi noa i roto i to rätou mau vahi moèmoè. E tei òre i haafatata i pïhaìiho i te teröno parau tià o te Atua Nui Tumu Tahi. Te huru o te Atua, tei faaìte i te ora, e huru ia no te hoê paruru parau tià. Tei horoà i to na tiàturiraa i roto i te feia e paruruhia ra, mai reira atoà teie feia i te tiàturi i te Atua. To rätou faaroo, eita e aueue i te Mau haamataùraa rau no te pohe. I te mea te ìte nei rätou i roto i te Atua te vai ra te ora. E teie ora, to tätou ia iteraa e, o vai au nei i roto i te mau hinaaro o te Atua. Ua noaa anei ia tätou i te feruri mai teie te huru, e tià ia tätou i te ìte i te parau a te Atua. E teie ora tei roto ia i te mau taata atoà e rave rahi ra ta te mau taata faaòhiparaa i teie ora. O te tià ra e parau E ATUA ORA TE ATUA. Ia au ia i te haapotoraa o na taiòraa e mäha nei.

-Taramo 17, 15 Âreà vau nei, e ìte au i to mata mä te parau tià; e ia ara vau ra, e mauruüru ä vau i to ù auraa atu ia òe.

-Tāniera 3, 25 Ua parau mai ra o ia, nä ô mai ra, Inaha, te ìte nei au i nä taata toomaha mä te täpeà òre, i te haere-noa-raa no roto i te auahi e aore roa e maì; e te huru o te toomaha ra mai te Tamaiti ia a te Atua.

-2Tetaronia 3,  5 E ia faatae hoì te Fatu i to òutou âau i te aroha o te Atua, e i te faaòromaì o te Metia ra.

-Ruta èv. 19, 38 Eere hoì o ia i te Atua no tei pohe, no tei ora rä; te ora anaè ra hoì rätou ia na.

E haafatata tätou i teie nei i pïhaìiho i teie ora e faaìtehia nei, ma te hiò i ta Ietu faatiàraa i roto i te Èvaneria ta Ruta i papaì i te pene 20 i te ìrava 27 e tae i te ìrava 38. Te faahitihia nei i roto i teie pene, te parau no te mau Tätutea òre- raa e tiàturi i te tiàfaahouraa. Teie pupu taata te tiàturi  nei rätou i te Atua tei hämani i te ao nei, ta rätou ra hiòraa i teie Atua, eita O ia e faatiàfaahou i te feia pohe, tei pohe ra ua pohe ia. Àreà ra ta Ietu, aita ia te hoê tüàtiraa i teie faanahoraa, te Atua e faatiàfaahou  O ia tei pohe, ta tätou ia e hiò i teie nei.

Te Mau tuhaa o te pene parau.

1)      Ìrava 27                      Aita e tiàfaahouraa.

2)      Ìrava 28 e tae i te 33   Herepata no te tiàfaahouraa

3)      Ìrava 34 e tae i te 37   Te mau tamarii no te tiàfaahouraa.

4)      Ìrava 38                      E Atua ora.

Ei hiòraa manaò.

Ia ua i te mau tuhaa e vai nei, te ìtehia nei te parau no te ora tei faaìtehia na roto i te tiàfaahouraa. O teie ia e uihia nei e te mau tätutea. No rätou e hope te oraraa o te taata i te taime o ia e pohe ai. To na auraa ra i to rätou tiàturiraa aita e tiàfaahouraa. Te rave nei rätou i te parau no te haaipoiporaa ei raveà no te haapäpü i teie manaò to rätou, aita e ora to muri mai i te pohe. Ia tae i nià i teie faanahoraa e Atua pohe teie, e aita atoà e faufaa faahou i te haamori i te Atua. E ìnaha hoì teie taata te Tätutea e feia haamori Atua atoà, ta Ietu e faaìte nei, aita ra rätou e tiàturi nei i te parau no te tiàfaahouraa. No rätou teie parau eita ia i te mea tià, ua pohe anaè ua oti ia to na parau. Ietu ra, aita ia te hoê aè tüàtiraa i nià i teie manaò e faaära o Ietu e, te parau no te haaipoiporaa no te fenua nei ia, e tià i te mau taata atoà ia rave teie òhipa. Ma te ìte ra i roto i te faaipoiporaa ia faufaa te faanahoraa a te Atua. To na auraa ia faaturahia ia te reira e tià ai. Eita hoì e faaïpoïpohia te hoê taata ora i nià i te hoê taata pohe, ai-ti-a i ravehia aè nei teie huru òhipa. Ta Ietu ra e hinaaro nei e haapäpü, aita e faaipoiporaa faahou i te taime no te tiàfaahouraa.

E riro rätou ei Mau merahi

E, e Mau tamarii na te Atua.

No te aha e Atua ora te Atua.

No te mea ua manaò mai te Atua ia tätou, no te ao a muri atu. Ir 35. Oia Mau na te here o te Atua i to na nunaa, e òre ia e aueue. Ia motu noa atu to tätou tüàtiraa i te Atua, na te here fäito-òre o te Atua e hämani faahou i to tätou tiàturiraa ia na iho e i roto pü i to na nunaa. Ua faatupu hope te Atua i te reira na roto i ta na faaauraa âpï e tätou ma te manaò hohonu i ta na ture i roto i to tätou âau.

Te tïtau nei te reira faaäuraa âpï ia tätou ia taui i to tätou âau e ia färiu tätou. Na te aroha e to na maru e faatupu i roto ia tätou i te reira tauiraa no te âau e o te haafäriu faahou ia tätou ia na ra.

Na te fänauraa, te pohe täraèhara e te tiàfaahouraa o Ietu Metia i haapäpü faahou e te manaò mai nei te Atua i to na mau taata tei ìte i te faanahoraa no ta na Mau tamarii. Tei ora i roto i te âmuitahiraa e te Atua e o te faatià ia tätou ia färerei faahou te tahi e te tahi, e o te faatupu hoi i te hau e te rahuraa a te Atua. Ua tuuhia hoi te parau àro no te faaoraraa i te hihi o te märamarama na roto i te òpuaraa a te Atua e to na aroha i roto ia Ietu Metia. E tià atu ra ia tätou ia ani i te mau mea atoà i te Atua i nià i te èà tei arataì ia tätou i roto i te tupu- hope-roa-raa  to tätou tiàturiraa.

Terai or. Faatura.