Tāpati 29 no Mati 2020.
Aho
Tïtauraa.
Teie
te tahi faanahoraa pure i roto i to tätou mau ùtuafare no teie täpati 29 no
Mati 2020. Te taiòraa Taramo o te päpä ia no te haamoriraa, Te taiòraa i te
puta Ètetiera te mau hinaaro ia o te Atua Nui Tumu Tahi, Te taiòraa Roma te huru ia no te faaìteraa a te
Värua o te Atua i ta na Ètärëtia. Te taiòraa no te Parau Maitaì i päpaìhia e
Ioane, to Ietu ia faatupuraa i te ora i te vahi ua äpiäpi, ua òto, ua peàpeà,
ua ahoaho, te âau o te taata i ta na raveà òre, e raveà ta Ietu ta na ia Parau,
e to na reo. Te mau himene e tiàmaraa to reira ùtuafare ia faanaho i ta na mau
himene, te mau himene rä e tuuhia atu na tätou te reira e hiò mai, faaitoito e
te nünaa Mäòhi i Mäòhi Nui nei.
Himene D
Hakamaitaìki ki te
Atua
Ki teie nei mahana
(Akapela tane)
Ki runga i te rangi
Runga te rangi,
runga te rangi
Ârue tätou ia na
Taramo
130
1 Tire a te Moruta. No roto i te vähi hohonu to ù tiàororaa atu ia òe, e
te Fatu. 2 E te Fatu, e faaroo mai òe i ta ù reo, e färiu mai i to tarià i ta ù
e ani atu. 3 Àhiri òe, e te Fatu, e täpaò na i te mau hara nei, o vai, e te
Fatu, te taata e mau. 4 Tei ia òe rä te faaòre i te hara ia mataùhia hoì òe ra.
5 Te tiaì nei au i te Fatu, ta ù värua teie e tiaì nei, e te tiàturi nei au i
ta na parau. 6 Te tiaì nei ta ù värua i te Fatu, e ïti to te mau faèhau tiaì i te
poìpoì ra; oia ä ia e ïti to te mau faèhau tiaì i te poìpoì ra. 7 Ia
tiàturi ä Ìteraèra i te Fatu, tei i te Fatu hoì te aroha, e tei ia na hoì
te ora hau ê ra. 8 E riro o ia i te faaora ia Ìteraèra i ta na atoà ra mau
hara.
Himene. C (valse)
No to
hinuhinu e te ao nei
I hema ai I
täiva ai au ia Òe
E to ù Atua
ïti e
Aore ra òe e
tahoo
E mata ê mai
ia ù
No reira te
tïpapa
Te
tätarahapa a tu nei au
I to
aro e to hanahana
E to ù Atua
ïti e
Tätara na òe
Te ìno te
teòteò
E te mau
hara atoà
I to ù âau
Tuu mai ra òe
Te here te
paari te aroha
E te hau i
to ù värua
Ei niu no to ù oraraa.
Ètetiera
37.12-14
12 E teie nei e tohu òe, e nä ô atu ia rätou, Të nä ô mai ra te ATUA ra
o te Fatu Inaha, e au mau taata e, e hüaì au i to òutou mau tänuraa, e ua
arataì mai ia òutou mai raro mai i to òutou mau âpoo ra, e ua arataì au ia
òutou i te fenua o Ìteraèra. 13 E ìte hoì òutou e, o te Fatu vau, ia heheu
vau i to òutou mau âpoo, e au mau taata, e ia arataì mai ia òutou mai raro mai
i to òutou mau âpoo. 14 e na ù e tuu i ta ù aho i roto ia òutou, e e ora ia òutou e na ù e
haamau ia òutou i to òutou iho fenua ei reira òutou e ìte ai e, na ù na te Fatu i
parau, e na ù hoì i rave te parau mai ra te Fatu.
Himene F
F
To te ao nei Dm faaroo mai F Dm
F Te fenua Dm faaroo na F teie pure C
Bb E pure teie F no te here Dm
F E pure teie Am no te aroha
F Te fenua Dm faaroo na F teie pure C
Bb E pure teie F no te here Dm
F E pure teie Am no te aroha
Bb i to ù C fenua here
F7
Bb ia ora, ia ora òe F
C E ta ù maimoa F (maimoa) F7
Bb ia raa to roo F e a C muri noa atu F
Bb ia ora, ia ora òe F
C E ta ù maimoa F (maimoa) F7
Bb ia raa to roo F e a C muri noa atu F
Bb Âmene
Rōma 8.8-11
8 E teie nei, te feiä i au i ta te tino ra, e òre roa te Atua e mauruüru
ia rätou. 9 Aore rä òutou i au i ta te tino ra, te au nei rä i ta te Värua ra,
no te mea te pärahi ra te Värua o te Atua i roto ia òutou. Te ère ra rä te hoê
taata i te Värua o te Metia ra, eere ia o ia i te taata no na. 10 E tei roto te
Metia ia òutou ra, te ora nei ia te Värua i te parau tià, ua pohe mau rä te
tino i te hara. 11 Te pärahi ra to na Värua i roto ia òutou to tei faatià ia Ietu i te
poheraa ra, o tei faatià i te Metia i te poheraa ra, na na atoà ia e faaora i
to òutou mau tino pohe ra i to na Värua i pärahi i roto ia òutou na.
Himene D
To ù ora
Noo mai i te Atua
Te tumu no te mau
Mea atoà
Te Atua ta ù ora
Te Atua i te raì teitei
Te Atua tiaì te fenua
Te Atua ta ù ora
Ioane
11.1-45
Te poheraa o Rätaro
1 Te pohe ra te hoê taata i te maì o Rätaro te iòa, no Pëtänia no te
ôire o Märia e ta na tuaana o Märeta ra. 2 O Märia i faatähinu i te Fatu i te
räau noànoà ra, e tei horoi i ta na âvae i to na iho ra rouru, no na te tuaane
i pohe i te maì ra o Rätaro. 3 Ua tono atu ra nä tuahine i te veà e faaìte ia
Ietu, nä ô atu ra E te Fatu, inaha, te taata here na òe ra, ua pohe i te maì. 4
E ìte aè ra Ietu i taua parau ra, ua nä ô aè ra. E òre te reira maì e riro ei
maì pohe; ia haamaitaìhia rä te Atua, e ia haamaitaìhia hoì te Tamaiti a te
Atua i te reira. 5 E aroha Ietu ia Märeta e ta na taeaè, e ia Rätaro hoì. 6 Ìte
aè ra e ua pohe o ia i te maì, pärahi iho ra Ietu i taua vähi ra e ruì piti. 7 E
muri aè ra, ua parau atu ra o ia i ta na mau pipi Mai haere ä tätou i Iutea. 8 Ua
parau mai ra te mau pipi E Rapi, i tïtau iho nei hoì te âti-Iüta ia òe e pëhi i
te ôfaì, e te haere faahou nei ä hoì òe i reira? 9 Ua parau atu ra Ietu. Eere
änei hoê àhuru mä piti hora i te ao hoê nei, e ia haere hoì te taata i te ao ra
e òre ia e turori, no te mea ua ìte o ia i te märamarama o teie nei ao. 10 Âreà
ia haere rä o ia i te ruì ra, e turori ia, no te mea aita e märamarama. 11 I nä
reira atu ra o ia, e oti aè ra, ua parau atu ra o ia ia rätou. Ua taòto to
tätou hoa o Rätaro, te haere nei rä vau e faaära ia na. 12 Ua parau mai ra ta
na mau pipi. E te Fatu, te taòto ra o ia e ora ia. 13 No te pohe te parau a
Ietu i parau atu ra, i manaò rä rätou e no te taòto mau ta na i parau mai ra.
14 Ua faaìte hua atu ra Ietu ia rätou. Ua pohe roa Rätaro. 15 Te òaòa nei au ia
òutou i te mea aore au i reira ia faaroo hoì òutou. Mai haere rä tätou ia na
ra. 16 Ua parau aè ra Toma, oia hoì Titimo ra, i te mau te taeaè pipi no na ra.
Mai haere atoà tätou ia pohe atoà atu.
O Ietu te tiàfaahouraa e te ora
17 E tae atu ra Ietu ra, ìte aè ra o ia e ruì maha atu ra o ia i roto i
te âpoo. 18 Tei pïhaì iho i Pëtänia i Ierutarëma, e au i te àhuru mä pae o te
tetatia ra. 19 Ua haere mai ra te âti-Iüta e rave rahi ia Märeta räua o Märia
ra e haamähanahana ia räua i to räua tuaane i pohe ra. 20 Ìte aè ra Märeta e,
te haere mai nei Ietu, haere atu ra o ia e färerei aè ra ia na; âreà Märia,
pärahi iho ra ia i roto i te fare. 21 Ua parau atu ra Märeta ia Ietu. E te
Fatu, àhiri òe i ô nei, e òre e pohe ta ù tuaane. 22 Ua ìte rä vau i ta òe e
ani atu i te Atua ra, na te Atua ia e horoà mai na òe i teie nei ä. 23 Ua parau
mai ra Ietu ia na, E tiàfaahou mai ia to tuaane. 24 Ua parau atu ra Märeta ia
na Ua ìte au e, e tiàfaahou mai ä o ia ia tae i te tiàfaahouraa i te mahana
hopeà ra.
25 Ua parau mai ra Ietu ia na, Tei ia ù te tiàfaahouraa e te
ora, o të faaroo mai ia ù ra, pohe noa ä o ia e ora ä ia. 26 E te
taata ora atoà nei e faaroo ia ù ra, e òre roa atu ia e pohe. 27 Ua faaroo òe i
te reira? Ua parau atu ra o ia ia na, E te Fatu, ê, ua faaroo vau e o òe te
Metia te Tamaiti a te Atua o të haere mai i te ao nei ra.
Te òtoraa Ietu
28 E oti aè ra taua parau ra, hoì mai ra o ia e parau atu ra ia Märia i
ta na taeaè, ômumu atu ra e, Terä aè te Òrometua, e te parau mai ra ia òe. 29 E
ìte aè ra Märia i te reira, tià aè ra o ia i nià i reira ra, haere atu ra ia na
ra. 30 Aore ä Ietu i tae i roto i te ôire, tei te vähi ä i färerei atu ai
Märeta ia na ra. 31 E te âti-Iüta i pärahi i roto i te fare i te
haamähanahanaraa ia Märia ra, ìte aè ra ia na i te tià-òiòi-raa i nià, e te
haereraa atu i räpae, ua pee mai ra ia na, nä ô aè ra, Te haere atu ra o ia i
te menema ra òto ai. 32 E tae atu ra Märia i taua vähi tei reira Ietu ra, ìte atu
ra ia na, haamaìri iho ra o ia i raro i ta na pae âvae, nä ô atu ra ia na, E te
Fatu, àhiri òe i ô nei, e òre ta ù tuaane e pohe. 33 E ìte aè ra Ietu ia na i
te òtoraa e te âti-Iüta hoì i haere atoà mai ra, ûuru iho ra o ia e horuhoru
atu ra ta na värua, 34 nä ô atu ra, Tei hea o ia i te vaiiho-raa-hia e òutou?
Ua nä ô mai ra rätou ia na, E te Fatu, a haere mai a hiò. 35 Òto iho
ra Ietu. 36 Ua parau iho ra te âti-Iüta, A hiò na i to na aroha ia na. 37 Ua nä
ô aè ra rä te hoê pae o rätou, E òre änei e tià ia na ia faaora mai i te pohe o
teie nei taata, o tei faaora hoì o ia i te taata matapö ra.
Ua ora faahou mai o Rätaro.
38 Ua ûuru faahou iho ra Ietu i roto ia na iho, e tae atu ra i te menema
ra e ana, e ôpanihia te ùputa i te hoê ôfaì. 39 Ua parau atu ra Ietu, A huri ê
atu na i te ôfaì. Ua parau mai ra Märeta, te tuahine o taua taata i pohe ra, E
te Fatu, ua hauà i tënä na, o te ruì maha hoì teie. 40 Ua parau atu ra Ietu ia
na, Aore au i parau atu ia òe e, i faaroo òe ra e ìte òe i te mana o te Atua? 41
Ua huri ê atu ra rätou i te ôfaì i taua vähi i vaiihohia ai tei pohe ra, hiò
atu ra te mata o Ietu i nià, e ua parau atu ra, E ta ù Metua, e haamaitaì au ia
òe, o òe i faaroo mai ia ù nei. 42 Âreà vau, ua ìte au e e faaroo mai ä òe ia
ù, no teie nei rä mau taata e haaàti mai ia ù nei i parau atu ai au, ia faaroo
rätou e na òe au i tono mai. 43 E oti aè ra taua parau ra, ua faateitei aè ra i
ta na reo, ua pii atu ra, E Rätaro, a haere mai i räpae 44 Ua haere
mai ra taua taata i pohe ra i räpae, ua täamuhia nä rima e nä âvae, i vehihia
hoì te mata i te àhu. Ua parau atu ra Ietu ia rätou, A tätara, e tuu atu ia na
ia haere na.
Te ôpua-raa-hia te pohe o Ietu
(Mät 26,1-5; Mär 14,1-2; Ruta èv 22,1-2)
45 E te âti-Iüta i haere mai ia Märia ra, o tei ìte i ta Ietu i rave ra,
e rave rahi ia tei faaroo ia na.
Himene F (valse)
Feùu te henua to te tani èo
Himene fakatiketike toku henua
Ua tani te èo
O taù tama e
Ia pohoè Mäòhi Nui e
Òaòaraa
Te Etua o te aki nui e
A toko mai ia mätou nei
E tau matavaa
O te henua nei
Ia pohoè Mäòhi Nui e.
Manaò
Teie
te huru no te haapotoraa o ta tätou na taiòraa e maha nei, èi haamoriraa i te
Atua Nui Tumu Tahi, te tumu no te mau maitaì atoà ta tätou e faanaò nei i
itoito ai tätou i mua i teie maì e àtuàtu nei i roto ia Mäòhi Nui nei, e i teie
nei ao. E rave rahi mau taata i teie mahana tei taòto i te puai o teie maì, ua
naeà-atoà-hia te mau täote räpaau, e ua faaruè mai, e rave rahi mau ùtuafare i
roto i te òto e te peàpeà i teie mahana.
O te piti teie no täpati te ôpaniraahia ta tätou mau fare pure a te Ètärëtia
Porotetani Mäòhi, ia itoito tätou i te pure i roto i to tätou mau ùtuafare. I
roto i teie maa raveà ïti e tamata tätou e haafatata i pïhaì iho i teie mau
taiòraa tei haapaòhia mai no tätou i teie mahana,
-Taramo
130, 6 Te tiaì nei ta ù värua i te Fatu, e ïti to te faèhau tiaì i te poìpoì
ra.
-Ètetiera
37, 14 Na ù e tuu i ta ù aho i roto ia òutou, ia ora ma te haamau i te fenua nei.
-Roma
8, 11 Te pärahi ra to na Värua i roto ia òutou to tei faatià ia Ietu i te
poheraa ra.
-Ioane
11, 43 Ua faateitei aè ra i ta na reo, ua pii atu ra, E Rätaro, a haere mai
i räpae.
Ei manaò tatara.
Te faaìte nei
teie mau taiòraa, te ORA no te òhipa ta te Atua e faatupu nei na roto i to na
mau tävini. Ia hiòhia te mau hinaaro o te Atua o te hoê ia horoàraa i to na
tiàturiraa i te tävini e färii ra i ta na mau òpuaraa faaora. Ei faaìteraa i te
faufaa e vai ra ia au i ta na faanahoraa
no te faaora i to na nunaa. I te tau no Etetiera i te vahi no te peho o te mau
ivi maro, ua rave te Atua i te hoê òhipa i reira no te taime mätamua roa. Te
horoàraa i te ora i roto i teie peho pohe riro mai nei taua vahi ra, ei vahi ORA
i ta te Atua òhiparaa. Te auraa no teie òhipa ta te Atua i rave mauti ra ia te
faaìteraa i te pohe o te nunaa Ìteraèra i to na vai tïtïraa i Päpuronia. E
hohoà ia no Ìteraèra, mai te hoê nunaa tei ère i te arii, tei ère i te fenua,
tei ère i te tiàturiraa, tei ère i te hiero, oia hoi e nunaa pohe. Te peho no
te ivi maro, o Päpuronia ia, te vahi i faatïtïhia te nunaa o te Atua. Ua tiaì
noa ra rätou i te hoê faatiàma tei òre roa i tupu vave. Ia tae mai ra to rätou
faatiàma, eita ia mea na roto i te raveà taata, eita atoà na roto i te toeà tei
toe i te fenua, na roto ra i te mana faaora o te Atua, ia òre to na nunaa, ia faaea
faahou i raro aè i te faatïtïraa o te pohe. E tià ia parauhia e ua
faatiàfaahouhia e te Atua i to na nunaa mai te pohe mai. Ua haafänau te Atua i
to na nunaa i te hoê Varua Api. I mua i teie mau òhipa i ravehia e te Atua te faaìte nei a O ia i te mau raveà taaê tei
òre roa e naeàhia e te ìte taata. Tei teie vahi tätou e mau ai i mua i te mau
faanahoraa a te Atua. Te vahi aita e raveà ta te taata, te vai ra ta te Atua.
Te taime e mau ai te feruriraa o te taata, e manaò to te Atua no te tatara. Te
hinaaro o ta te Atua e faaìte nei mauti ra ia, te faafänauraa ia i to na nunaa
na roto i te haapuaìraa i to na aho ora i nià i te mau vahi, aita e ora to
reira. Oia hoi, te hämani faahou nei O ia i to na nunaa, eiaha ra i te repo
fenua faahou i te mataì ora ra, mai roto mai i te Varua tei hämani. Ia faafänau
te Atua i to na nunaa e täpaò te reira no to na
pärahi fätataraa i pïhaì iho ia na, ma te täuturu i ta na mau òpuaraa
faaora. Na te reira e haapäpü e, tei nià te Varua o te Atua i taua nunaa ra.
Oia
atoà ia ta te Èvaneria e faaìte nei ia au i te papaìraa a Ioane i te pene 11 i
te ìrava 1 e tae i te ìrava 45. O Ietu i mua i te pohe o Rätaro.
Te
huru e te reo o Ietu i mua i teie mau
manaò ta na e faaroo nei, te naò nei ia e, E
TA Ù METUA E HAAMAITAI AU
IA OE O
OE I FAAROO
MAI IA Ù NEI,
IR.41V.H. ÒTO IHO RA
IETU.IR 43 Ua faateitei aè ra i ta na reo, ua pii atu ra, E Rätaro, a haere mai
i räpae.
Tei
te òire ra no Petepara o Ietu e ta na mau pipi i tae ai te parau peàpeà e te
maìhia ra, to na hoa o Rätaro ta na i here. Ua färii aè ra o Ietu i taua parau
ma te ru òre i te täpapa, faaea faahou atu ra rätou i reira e piti ruì. I taua
taime ra tae mai ra te parau ua pohe roa o Rätaro, e maha ia mahana i muri aè
to Ietu taeraa i Pëtänia te òire tei
reira te àti, i te ùtuafare o na tuahine o Märeta e o Maria. Tei teie vahi te
tupuraa ta tatou parau.
Te
mau pipi i mua i teie parau e hoì faahou rätou i Pëtänia, te peàpeà nei rätou i
te mea ua ìmi na te mau Àti - Iuta e pëhi ia Ietu i te ôfaì. I te mau òhipa tià
i ravehia e Ietu i reira, i to na parauraa e, O VAU TE MARAMARAMA O TE AO NEI,
O VAU TE TIAI MAMOE MAITAI. No te mau Âti-Iüta hoê noa te tià e parau i teie
mau parau, o te Atua anaè a-ti-ra atu ai. Teie ra aita te mau Âti-Iüta e ìte
nei i roto ia Ietu te òhipa faaora a te Atua. Èita ra o Ietu e paruparu i mua i
teie mau manaò, e faatupu ra O ia i te
mau òhipa atoà e ìtehia ai te ORA a te Atua.
Märeta
e o Maria, ua ìte raua e te vai nei te ORA i roto i te Fatu ra ia Ietu, i te
vai oraraa o to raua tuàne. Teie nei ra ua pohe o ia, aita ia e raveà faahou ua
hauà, ua tahe, oia hoi, tei roto i te hoê faanahoraa eita e tià ia rapaauhia. To
na auraa ra e tiaì ia i te tau hopeà i reira e faatià faahouhia ai. Teie àti i
färereihia
e raua na te mau hoa ia i tämahanahana, ua
pühapa roa te tahi pae i reira i te òtoraa, ia au i te peu Âti-Iüta.
Ietu
i mua i te pohe o Rätaro e rave O ia i te hoê òhipa mätau-òre-hia e te taata i
te hiò i te mau mahana atoà. Ma te faaìte atoà i to na òto i mua i te pohe o te
hoa ta na i here. Ia faaroo tätou i te mau reo o Ietu i roto i ta tätou taiòraa
te faaìte ra ia e, te vai nei te hoê ORA, i o mai i te pohe, e a òre ra i o mai
i to tätou mau menema. Teie taua mau reo no Ietu ra,
ir.11 ua
taòto to tätou hoa o Rätaro, te haere nei ra vau e faaära ia na,
ir.15 te
òaòa nei au ia òutou, i te mea a òre au i reira ia faaroo hoì òutou,
ir.25 tei ia
ù te tiàfaahouraa e te ora, o te faaroo mai ia ù ra, pohe noa oia e ora a ai,
ir.26 e te
taata ora atoà nei e faaroo ia ù ra,
ir.39 a huri
ê atu i te ôfaì,
ir.41 e ta ù
Metua, e haamaitaì au ia oe, o oe i faaroo mai ia ù nei,
ir.43 ua pii
atu ra, e Rätaro, a haere mai i rapae.
Na
roto i teie na reo e 7 no Ietu, te haapäpü nei ia O ia i
te òhipa ta te Atua e rave i mua i te mau taata atoà e àua haaàti nei i te
menema o Rätaro. Te parau e tià, ia parauhia i o nei, eita na te pohe e
faaäpiäpi te òhipa a te Atua, o te Atua ra te tumu o te ORA. Te riro nei te
menema o Rätaro e vahi òtoraa na te fetii, e te mau hoa, e na Ietu iho. Te òto
atoà nei o Ietu eiaha no te pohe o Rätaro, no te mau taata atoà ra te òre e
tiàturi nei i te ORA a te Atua e horoà nei i te mau vahi atoà. Ta Ietu ia e òto
nei i mua i teie pohe i te mea, te fatata atoà mai ra te hora e àro ai O ia ia
hate. Na vai ia te reira e faaìte ia tätou, na to na ia huru i mua i te menema
o Rätaro, ia au te faaìteraa a te ìrava 33 ùuru iho ra o ia e horuhoru atu ra
ta na varua, te faaìte nei ia o Ietu i to na täpaò mauruüru òre i
mua i te feia e òto nei no to rätou paruparu i mua i te pohe. Aita ia
rätou e tiàturi nei e, te parau hopeà eita ia tei te pohe, tei te Atua ra.
Ìrava 35 òto iho ra o Ietu, no te mea te pohe o Rätaro, o to na iho ia
pohe. Te òto atoà nei ra O ia no te faaroo tütaperepere o to na mau hoa fatata
ia na. Te faaìte atoà nei ra o Ietu i te tahi huru taata to na, ma te tiàturi i
te òhipa ta to na Metua e faatupu i roto i ta na aniraa.
Ìr.38 ua ùuru faahou iho ra Ietu i roto ia na iho, i
to na tiàraa i mua i te menema o to na hoa, ma te täpeà i to na òto i roto
i to na âau, e to na mauruüru òre i te mau Âti-Iüta i to rätou faaroo päpu òre, i te òhipa ta te Atua e faatupu i
mua i to rätou mata, I faaìte roa ai o
Ietu i to na hoêraa, e te faaea tämauraa mai to na Metua i roto ia na.
Na teie na täpaò e toru e faaìte ia tätou e, te ûàna
nei te òto o te Atua i to te ao nei. I ani roa ai o Ietu i to na Metua e, E TA Ù METUA
E HAAMAITAI AU
IA OE O OE I
FAAROO MAI IA Ù.
I
faaroohia ai teie reo to Ietu i te piiraa e, E RÄTARO, HAERE MAI I
RAPAE, oia hoi eiaha e faaea faahou i te vahi no te pohe e haere mai ra
i te vahi no te feia ORA. Te mau vahi
atoà tei reira o Ietu i te piiraa ia tätou, e tià ia parauhia e, e ORA to reira.
O teie ia ta Ietu e faaìte nei i mua i te mau Âti-Iüta, e ia tätou i teie
mahana. Te pii atoà nei o Ietu ia tätou ia haere atoà tätou i rapae i te
mau òhipa e haafifi ra ia tätou te tupuraa no to tätou faaroo. E reo teitei
teie no Ietu ia ìte tätou e te hinaaro atoà mai ra o Ietu ia tätou no te
faatupu i te mau òpuaraa a te Atua. E taua òpuaraa ra to tätou ia faaìteraa i
te paari o to tätou faaroo i mua i te tïtauraa a te Fatu, no te haereraa i mua.
I te mea te reo o ta Ietu e parau nei e, e ta ù Metua, o to tätou atoà ia
parauraa i mua i te Atua. O te tià ia e faaìte e te rahi mau nei to tätou
faaroo i te Atua. Tupu atu ra te òhipa a te Atua i te rahi, i te mea e rave
rahi tei tiàturi i to Ietu faatià faahouraa tei pohe i roto i te ora. Oia atoà
ia tätou, te faatià atoà nei o Ietu ia tatou. I roto i teie maì tätou e faaruru
nei i teie mahana e i roto i te ao nei, ia ìte tätou e te puai o te pure te
tiàturiraa ia tätou e, e faatupu te Atua Nui Tumu Tahi e äni tätou na roto i te
faaroo mau. Te faaroo mau ua papahia i nià i te faaìteraa a te fenua i te mea
èita te fenua e haavare i te taata. E fenua to tätou o Mäòhi Nui, to na auraa
ra e faaroo to teie nünaa tei parauhia te Mäòhi.
Himene
F
O
Ietu ta ù raatira
To
ù àveià mau
E
òre au e mätaù ai
Te
tara o te pohe
Te
pii mai ra to na reo
Ia
tätou atoà nei
A
horo paatoà mai
I
te tïpaeraa mau
O
Ietu ta ù raatira
O
tei haavï i te pohe
E
òre au e mätaù ai
Te
mana o te ènemi.
Pure
Pure
tätou i te Atua Nui Tumu Tahi, te faateitei nei mätou ia Òe, no te mau maitaì
atoà e fänaòhia nei e mätou mai roto mai i te Rähu i reira te tupuraa to Òe
aroha e to Òe here ia mätou. Ta te fenua e faaìte noa nei to Òe hanahana mure
òre i roto i te mau uì atoà ma te òre e morohi, tei ànaana ra mai te märamarama
e hiti ra i te mau mahana atoà, tei faaìte i te mahana âpï, ia tià i te taata i
te haamaitaì ia òe.
Te
piti teie no te täpati te ôpaniraa te mau fare pure a te Ètärëtia Porotetani
Mäòhi te tumu no te pärururaa i te mau marü metia to òe nünaa. I te maì e àtutu
nei i Mäòhi Nui nei e i te ao atoà nei, e maì taaê roa teie, te taata noa atu e
naeàhia te mau vahi atoà ta na e täpeà te vahi i reira o ia e pärahi ai e mau
teie maì i reira, ia haere te tahi i reira e pärahi ua roo-atoà-hia ia te reira
taata i teie maì, ia täpeà, ia àpa, ia paraparau, oia hoì na te taata iho e haaparare
nei i òhie ai teie maì i te tupu i te mau vahi atoà, fiva te haamataraa, aho
pau, a mure atu ai te aho, te raveà no te pärururaa te nohoraa ia mätou i roto
i to mätou mau ùtuafare, e te Atua aroha mai ia mätou te hara nei.
Te
pure nei mätou ia Òe e te Atua maitaì roa e, no te mau täote, te mau täote
mäìmi, te mau tuäti, e faaitoito ra i te àroraa i teie maì ia òre ia ûàna, ia
au i te mau raveà e vai ra i roto ia
rätou. Teie ra e te Atua Nui Tumu Tahi, àita e navaì ra, àita atoà e ïti
mai ra te ûàna noa ra, höroà ia rätou te mea e toe ra i roto i te mau mäìmiraa
no te räau räpaau, a türama ia rätou i te märamarama parau tià, ia tià ta òe
ôpuaraa faaora i roto i ta Òe mau tämarii, mai te mea ua rehuhia to mätou
tiàturiraa, a faaòre mai ta mätou tärahu, mätou i tärahu ia Òe.
Te
pure nei mätou no te mau ùtuafare i roto i te òto, te mihi, te peàpeà, i te mau
vahi tei reira rätou i te nohoraa, a tämahanahana i teie mau ùtuafare, e a
täuturu i te mau fetii o ta rätou i vaiiho mai i roto i teie nei ao. E te Atua
no te parau mau e, a mau ia mätou i roto i to rima aroha e te here.
Te
pure nei mätou, no te faatereraa Hau Mäòhi, te tià o te Hau Färani i Mäòhi Nui
nei, no te mau tävana, no te mau rave òhipa atoà e mau ra i te hoê hopoià no te
ärairaa ia òre teie maì ia ûàna, haamaitaì ia rätou.
Te
pure nei mätou, no ta Òe Ètärëtia Porotetani Mäòhi, e no te mau Ètärëtia atoà i
Mäòhi Nui nei, e to te ao atoà nei eiaha ia moèhia e o Ietu Metia te upoo o te
Ètärëtia. E Ietu e a pii na Òe i teie maì ia haere i räpae i ta Òe ôpuaraa
faaora. Âmene.
Himene
G F#m
G A
D G D
E to mätou
Metua i te raì ra
G D A
Ia raa to òe
iòa Ia tae to òe ra hau
D G D
Ia haapaòhia
To òe hinaaro
G D A
I
te fenua nei Mai te raì atoà ra
D G D
Ho
mai i te maa e au ia mätou
G D A
i
teie nei mahana faaòre mai ta mätou hara
G
Mai
ia mätou atoà e faaòre i te hara
A G
Ia
mätou nei eiaha e faaruè ia mätou
A
Ia
roohia noa hia e te àti
G A D
E
faaora ra ia mätou i te ìno
G D
G D
No
òe hoì te hau no òe hoì te mana
A G A D
No
òe hoì te hanahana e a muri noa atu
Âmene.
(F#m)
(G) (B) (D) (B)
Pure
a te Fatu
Âmui
E
to mätou Metua i te ao ra.
Ia raa to òe iòa
Ia
tae to òe ra hau.
Ia
haapaòhia to òe hinaaro
I
te fenua nei mai tei te ao atoà na.
Ho
mai i te mäa
E
au ia mätou i teie nei mahana
E
faaòre mai i ta mätou hara
Mai
ia mätou atoà e faaòre nei
I
tei hara ia mätou nei
E
eiaha e faaruè ia mätou
Ia
roohia-noa-hia na e te àti,
E
faaora rä ia mätou i te ìno
No
òe hoì te hau, e te mana,
E
te hanahana, e a muri noa atu. Amene.
Haamaitaìraa.
Na te Atua no te hau, e tiaì i to
tätou mau ùtuafare, e na na e ärataì na te èà no te parau tià e te parau mau.
Amene.
Faaitoito
i te noho i te ùtuafare.
Terai
or. Faatura.
