Ioane 14, 15-21 Faaaò

Tāpati 17 no Më 2020.

Faaaò

Ômuaraa.

Te faateitei nei tätou i te Atua Nui Tumu Tahi, no teie taime faufaa no te haamoriraa, te haamaitaìraa, e te ârueraa, no te ora e faanaò-noa-hia nei e tätou, maite te uì a uìuì mai ä. Te puhi nei te mau âpoo maitaì no te fenua nei, o Mäòhi Nui tei faatähirihiri i te mau àru mai te òto ùpaùpa ra ia tävevo i roto i te mau vao o te mau mouà, e tei haavarovaro te mau niàu o te mau tumu haari. Èi faaìte e ua haumärü te fenua ua tae mai te mataì âpï, ta te hupe i  faararirari i te mau ùaa tiare o te fenua.

Himene.

Taramo 66.

1 Na te Mënätehe. E Himene, e Taramo. E pii hua i te òaòa i te Atua, e te mau fenua e. 2 E himene ei haamaitaì i to na iòa, e faariro i to na hanahana ei haamaitaìraa ia na.3 E parau atu i te Atua: E mau räveà mataùtaù ta òe. No to òe ra mana rahi i auraro mai ai to mau ènemi ia òe ra. 4 E haamori te mau fenua atoà nei ia òe, e himene ia òe, e himene i to òe ra iòa. Tera. 5 E haere mai e hiò i te mau òhipa a te Atua. E mea mataùtaù ta na i rave i te taata nei. 6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na. 7 Te mana nei o ia i to na püai e a muri noa atu. Te tiàtonu ra to na mata i te mau êtene; eiaha tei haùti ra e faateitei ia rätou iho. Tera. 8 E haamaitaì i to tätou Atua, e te mau taata nei e. Ia ìteä hoì te reo i te haamaitaìraa ia na. 9 O o ia tei tiaì ia tätou e ora ai, e o tei faaitoito i to tätou âvae ia òre ia pähee.10 Ua tämata-mau-hia mätou e òe, e te Atua e. Ua tämä òe ia mätou mai te ârio i tämähia ra, 11 ua tuu òe ia mätou i roto i te märei, e ua tuu òe i te hopoià teiaha i nià i to mätou tauupu. 12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà.13 E tomo vau i to fare mä te tütia-täauahi, e faatupu vau i ta ù mau èuhe ia òe ra, 14 tei parauhia e ta ù vaha, e na ta ù vaha i faaìte i ta ù àtiraa ra.15 Te tütia-täauahi poria ra ta ù e hopoi atu ia òe ra: te mämoe oni, e te mea noànoà atoà te puaatoro e te puaaniho ta ù e faatütia. Tera. 16 E haere mai, e faaroo, o òutou atoà e mataù i te Atua ra, e na ù e faaìte i ta na i rave i to ù nei värua.17 Ua pii atu ra ta ù vaha ia na, e ua faateitei ta ù arero ia na. 18 Àhiri rä te faatià ra ta ù âau i te ìno, e òre au e faaroohia mai e te Fatu. 19 Ua faaroo mau rä te Atua ia ù, e ua haapaò mai i ta ù i ani atu. 20 Ia haamaitaìhia hoì te Atua O ia aore i haapae i ta ù nei pure, e aore hoì i faahoì i to na aroharaa ia ù nei.

Himene.

Òhipa 8.5-17

5 Haere atu ra Firipa i te hoê ôire i Tämäria, parau atu ra ia rätou i te parau o te Metia. 6 E ia faaroo mai ra rätou, e ìte aè ra hoì i te mau täpaò ta na e rave ra, ua rötahi mäite mai ra te âau o te taata i te haapaòraa mai i te parau i parauhia atu e Firipa ra. 7 Ua pii hua mai ra hoì te reo o te mau värua ìno ra, e ua haere mai ra i räpae i te feiä i uruhia ra, e rave rahi hoì te häpepa e te piriòì i ora. 8 Òaòa roa aè ra to taua ôire ra. 9 O te hoê taata rä i pärahi i taua ôire ra, o Timona te iòa, e tahutahu na i mütaa iho, e te nä-ô-raa ia na iho e taata rahi roa, e mäere atu ra te taata o Tämäria ia na: 10 tïoi atu ra rätou atoà ia na, te taata rii e tae noa atu ra i te taata rarahi ra, nä ô aè ra: O te mana rahi o te Atua ra teie nei taata. 11 Haapaò atu ra rätou ia na, no te mea ua mäoro aè ra to rätou maereraa ia na i ta na ra peu tahutahu. 12 Ia faaroo rä rätou ia Firipa i te parauraa i te parau maitaì o te Pätireia o te Atua, e te iòa hoì o Ietu Metia, päpetitohia iho ra hoì rätou te täne e te vahine atoà. 13 E faaroo atoà mai ra hoì Timona, e ia päpetitohia o ia ra, ua àti mai ra o ia ia Firipa, e ûmere mai ra o ia i te hiòraa mai i te mau täpaò e te mau temeio rarahi e ravehia ra. 14 E ìte aè ra te mau âpotetoro e pärahi i Ierutarëma ra e, ua mau to Tämäria i te parau a te Atua, ua tono atu ra rätou ia Pëtero räua o Ioane ia rätou ra. 15 E tae atu ra räua i raro, ua pure iho ra ia horoàhia mai te Värua Maitaì ia rätou ra. 16 Aore ä hoì o ia i tau mai i nià iho ia rätou atoà ra, o te päpetito anaè ra to rätou i roto i te iòa o te Fatu ra o Ietu. 17 Ua tuu atu ra räua i to räua rima i nià iho ia rätou, noaa iho ra te Värua Maitaì ia rätou ra.

Himene.

1 Pētero 3.15-18

15 E faateitei rä òutou i te Fatu ra i te Metia i roto i to òutou âau: e ia vai ineine ä òutou ia parau atu i te taata atoà ia ui mai ia òutou i te tiàturi i roto ia òutou na, mä te marü e te auraro mäite atu. 16 Ei âau hapa-òre ä to òutou, e ta rätou i faaìno mai ia òutou na, mai te mea e, e feiä rave parau ìno ra, ia haamä rätou o tei pari haavare noa mai i ta òutou parau maitaì i te Metia ra. 17 E mea maitaì hoì, ia tià i te Atua, ia pohe òutou i te parau maitaì, eiaha i te parau ìno. 18 I pohe na hoì te Metia iho no te hara hoê poheraa, te taata parau tià no te feiä parau tià òre, ia tae tätou ia na i te Atua ra, i täparahi-pohe-mau-hia o ia i te tino ra, i faaorahia rä e te Värua.

Ioane 14.15-21

E tono mai te Fatu i to na Värua

15 Ua hinaaro òutou ia ù ra, e haapaò i ta ù parau. 16 Na ù hoì e ani atu i te Metua ra, e na na e horoà mai i te tahi Faaaò ia òutou, ia pärahi mau o ia e a muri noa atu io òutou nei. 17 O te Värua parau mau ra, o të òre e färiihia mai e te ao nei ra, no te mea aore i hiò ia na, aore hoì i ìte ia na. E ìte rä òutou ia na, e pärahi mau hoì o ia io òutou nei, e ei roto hoì ia òutou.18 Eita vau e vaiiho ôtare noa ia òutou, e hoì mai ä vau ia òutou nei. 19 E ia roovaù iti aè, e òre to te ao e hiò faahou mai ia ù; e hiò mai rä òutou ia ù, no te mea e ora vau, e ora atoà hoì òutou. 20 Ia tae i te reira mahana e ìte ai òutou e, tei roto hoì au i ta ù Metua, e tei roto hoì òutou ia ù e tei roto vau ia òutou. 21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho.

Himene.

Manaò

Te värua o na taiòraa e maha, te faaìte nei ia i te òhipa e ravehia nei e te feiä paieti, ia hanahana te Atua, i ta na haapäpüraa i te mau ôpuaraa no te mau taata atoà. Te feiä atoà tei färii päpü i te parau mau a te Atua, tei roto ia i to na âau te Värua Maitaì te tiàrepuraa ia upootià te maitaì i nià i te ìno. Na teie e faahaùti nei te tiàturiraa o te taata i nià i ta te Värua Maitaì e arataì ra. Teie ra mea varavara roa to te taata ìteraa i te reira, i te mea aita to rätou âau e riro nei ei ùmete färii no te mau hinaaro o te Atua. Ua äpiäpi hoì te ùmete i te mau peu tià òre, aita atu ra i riro faahou èi pärahiraa no te Värua Maitaì, ua riro ra èi pärahiraa no te mau manaò taata. I reira te ìte, e ìte òre ai, te parau mau ei parau haavare. Ua poì te mata i te vare o te faahema, i òre ai e ìte faahou i ta te Värua Maitaì e faaìte nei. Teie te turu i to tätou tiàturi ia au te haapotoraa o na taiòraa e maha no teie mahana.

-Taramo 66, 4 E haamori te mau fenua i te Atua Nui Tumu Tahi, e himene, to na ra iòa.

-Òhipa 8, 17 Ua tuu i to räua rima i nià ia rätou, tau mai ra te Värua Maitaì.

-1 Petero 3, 17  Ia tià i te Atua, ia pohe òutou i te parau maitaì, eiaha i te parau ìno.

-Ioane 14, 15 Ua hinaaro òutou ia ù ra, e haapaò i ta ù parau.

Mau hinere teie mau taiòraa no te Parau Maitaì o Ietu i päpaìhia e Ioane i te pene 14 mai te ìrava 15 e faaea i te 21. I te mea te faaìte nei teie taiòraa e maha tumu òhipa o ta te taata faaroo e haapaò

1) Ia tiàturi te mau pipi ia Ietu.

2) E hoì mai te Fatu ei haapäpüraa e, e färii mai Ò ia i te mau Pure i faataehia ma to na iòa.

3) Eita te Fatu e faaruè i to na mau taata, e tono mai ra ò ia i te hoê Faaaò o te pärahi mai àmuri noa atu.

4) Eita o Ietu e vaiiho òtare noa i to na mau tävini.

Te faufaa o te taiòraa.

To  Ietu ia haamäramaramaraa i te mau pipi i te mau òhipa e tià ia haapaòhia.

1) Te parau nei o Ietu, a haapaò i ta ù mau parau, te mau haapiiraa, te mau aòraa, te mau ture, i reira e ìte maitaìhia ai te huru mau no te tävini.

2) Te ani Ò ia i te Metua, i te Faaaò, o ia te Paruru Parau tià, ia pärahi i roto ia rätou, e faaäuraa tià teie e au i te hoê Metua tei here i ta na mau tämarii.

3)E ara ra i te Värua Parau mau, e òre to te ao nei e färii, o òutou ra tei ìte e pärahi O ia i roto ia òutou, a tià atu ai ia faaìtehia.

4) Na te reira e haapäpü e, èita vau e faaruè òtare noa ia òutou, a tae atu ai te taime e hoì mai ai O ia ra, i te tau mau ra.

5) Ia tià ra i te mau pipi ia hiò i te Metia, i te mea èita to te ao nei e hiò faahou ia na, ia ìte ra te hiò päpu i nià i te ora, i te mea e ora te Metia, e ora atoà ia te mau pipi.

6) E mahana parau rahi to taua taime ra, te hora e ìte ai te mau pipi tei roto te Tamaiti i te Metua, te Metua i roto i te Tamaiti, ei faaìteraa i to raua hoêraa i roto i te òhipa no te ora o te taata.

7) Ia haapaò ia te taata i ta na mau parau Moà i reira te parau no te here e tupu ai, te here i te Metua ra, ua herehia ia e te Tamaiti Fänau tahi a te Atua, i reira te mata e matara ai, no te ìteraa i te mau òhipa taa ê a te Atua.

E aha te auraa o tei mau parau ?

To Ietu ia horoàraa i ta na mau pipi, e i te mau taata atoà e tiàturi nei, te hoê parau TUTUU ia haapaòhia i te mau taime atoà, e tae noa atu i  to na hoìraa mai. Oia hoì, te faariro nei o Ietu i te taata èi feiä tuhaa i roto i ta na faufaa. Teie te parau maere, e te faahiahia to te taata faataaraahia e Ietu èi puòiraa i ta na òhipa i te fenua nei, i te mea haere nei O ia i te Metua ra.

Te parau TUTUU, te faaineineraa ia a te taata ia na no te horoàraa, i te parau faturaa i te faufaa i nià i ta na mau tämarii, e aore i nià i te tahi taata ê mai te peu e aita ta na e huaai. E ravehia teie òhipa i mua i te notera, e i mua i na ìte e piti tei mäìtihia e te fatu faufaa, eiaha ra èi taata no roto i te ôpu fetii. Teie huru parau TUTUU, e parauhia te faaìteraa faufaa te taata e faafatuhia e ìte òia te parau atoà i faanahohia. Te vai atoà nei te parau TUTUU moè, na ìte noa te faaärahia, o vai ra te fatu, àreà te taata òia te faafatuhia èita roa e ìte, ia tae roa i te taime a pohe ai te fatu o te faufaa. Te tahi ia faanahoraa teie e ravehia nei e te taata i teie mahana.

Teie ra ta Ietu, te faafanaò nei O ia i te huru taata atoà, e taiò nei i teie parau, ma te faaìte atoà i te òhipa e rave, e ma te tuu atoà mai te hoê Paruru, ia òre te mau fatu no teie faufaa ia vai òtare noa. Ia riro mau ra èi mau ìte àueue òre no teie mau faufaa e hitu e faaìtehia nei i roto i ta tätou nei taiòraa.

Te tïtauraa.

Te hinaaro nei o Ietu, ia aahia to tätou faaroo i roto i te tahi faanahoraa, tei òre roa e mure e mou. Oia hoì e ia hotu i roto i te autaeaèraa te hau, na te reira e faariro ia tätou ei matamehaì no te aroha e te here o te Atua. Ei reira tätou e ìte ai ia tätou iho, i roto i te mata o te taata tupu, mai te hiò hipa ra te huru. E èi reira atoà te Atua, tei òre e ìtehia e te mata taata, e tauturu ai ia tätou i te ìteraa i te tahi, to tätou taeaè, to tätou tuahine e i te feiä atoà i roto i te ère e te veve.

E no reira, te tïtau mai nei teie parau TUTUU ia tätou ia faaitoito te huifaaroo i te ìmiraa i te mau raveà atoà, i te mau taime atoà ia àmui to na oraraa atoà i roto i te Atua no te mea o te puna te reira o to tätou ora. I roto i te manaò tumu no te âmuiraa atu i roto i te Atua, ia ìte atoà ia tätou e, e tufaa ta na i na pae e piti, te pae o te Atua e i te pae o te taata. I to na pae, ua ìmi pinepine te Atua i te mau raveà no te àtiraa mai Ia na i roto i te oraraa o te taata o ta Ietu e haamanaò mai nei ia tätou i te parauraa e, Eita vau e vai iho òtare noa ia òutou.

Himene.

Pure.

Haamaitaì mätou ia òe e te Atua Nui Tumu Tahi, no teie taime haamoriraa na mätou e i to mätou faarooraa i te mau parau no to òe aroha e no to òe here, tei faaìtehia i to mau tävini i mua ra, e ia mätou i teie nei mahana. Te höroà nei òe ia mätou te tiaìtururaa no te mau parau fäfau ia tupu ta òe ôpuaraa faaora i nià te mau taata atoà e tiàturi tämau nei ia òe. Te òhipa ia i ravehia e to mätou Fatu te Metia ta òe Tämaïti te faaora o teie nei ao. Te parau ia ta Na i faahiti i roto i te Parau Maitaì i teie mahana, Ua hinaaro òutou ia ù ra, e haapaò i ta ù parau, ia haapaò mätou e òre teie maì e haaviivii nei i Mäòhi Nui nei, e i teie ao. Aroha mai ia mätou te feiä hara nei. Âmene.

Himene

Pure a te Fatu.

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

15 Ua hinaaro òutou ia ù ra, e haapaò i ta ù parau.

Terai or. Faatura. 

Ioane 14.1-12 Mäìtihia

Tāpati 10 no Më 2020.

Mäìtihia

Ômuaraa.

Na te Taramo 33 e arataì ta tätou haamoriraa no teie mahana, 1 E òaòa i te Fatu, e te feiä parau tià e. E au te haamaitaì i te feiä parau tià. 2 E haamaitaì i te Fatu i te tïnura, e himene ia na i te näpara aho àhuru ra. 3 E himene ia na i te himene âpï, faaòto maitaì na mä te òaòa e te au mäite. 4 E parau tià ta te Fatu, e te haavare òre hoì ta na atoà ra mau òhipa. 5 Hinaaro o ia i te parau tià e te au, te î nei te fenua i te maitaì a te Fatu. 6 Na te parau a te Fatu i oti ai te mau raì, e to rätou atoà ra i te aho o to na vaha. 7 Ua haaputu o ia i te moana ra o te tai ei puèà, e ua vaiiho o ia i te moana i roto i te fare vairaa. 8 Ia mataù te mau fenua atoà i te Fatu; e ia höriri to te ao atoà nei ia na. 9 Ua parau hoì o ia, e oti aè ra; ua faaue o ia, e ua mau atu ra. 10 Te faaòre nei te Fatu i te âpooraa a te mau êtene, te faariro nei i tei ôpuahia e te mau taata ra ei mea faufaa òre. 11 Tei faaäuhia e te Fatu ra, e tià ia i te vai-mäite-raa, e tei manaòhia e ta na âau e tae noa atu i te mau uì atoà ra. 12 E ao to te fenua, o te Fatu to rätou Atua; e te mau taata i mäìtihia e ana ei tufaa na na.13 O te Fatu tei hiò mai nä nià mai i te raì, te hiò mai ra i te mau tamarii atoà a te taata nei. 14 Te vähi i pärahihia e ana ra, ta na ia hiòraa mai i to te ao atoà nei.15 O ia anaè rä tei haafäito i to rätou âau, e o ia tei hiòpoà mai i ta rätou mau räveà.16 Aore e arii i ora i te rahi o ta na nuu, aore e taata püai i ora i te rahi o te püai.17 E mea faufaa òre te puaahorofenua ei haapüraa, aore e taata e ora i to na püai rahi.18 Inaha, tei nià to te Fatu mata i te feiä i mataù ia na, i nià i te feiä i tiàturi i to na ra aroha, 19 e faaora ia rätou i te pohe, e ia ora hoì rätou i te oè ra. 20 Te tiaì nei to mätou värua i te Fatu; o to mätou ia tauturu, e to mätou ia päruru. 21 Te òaòa nei to mätou âau ia na; te tiàturi nei hoì mätou i to na ra iòa moà. 22 Ia vai mäite mai ä to aroha, e te Fatu, i nià ia mätou, mai ia mätou nei e tiàturi atu ia òe ra.

Himene.

Òhipa 6.1-7

Te mäìti-raa-hia nä tiàtono toohitu, 1 E i taua ànotau ra, i rahi te mau pipi ra, ua tupu iho ra te amuamu a te Herëni i te Hëpera, no te mea aore to rätou mau ìvi vahine i haapaòhia i te tufaraa taoà i te mau mahana atoà ra. 2 E ua haaputuputu mai ra te àhuru mä piti ra i te mau pipi atoà e rave rahi, nä ô atu ra: Eere hoì i te mea au ia mätou ia haapae i te parau a te Atua a raverave ai i te mau àmuraamäa na. 3 E tënä na, e te mau taeaè nei, e ìmi iho na òutou i e toohitu puè taata roo maitataì, e te î i te Värua Maitaì e te paari i roto ia òutou na, o ta mätou ia e haapaò no te reira òhipa. 4 Âreà mätou, ei te pure mätou eiaha e faaea, e ei te haapii hoì i te parau.5 Mauruüru atu ra taua feiä rahi atoà i te reira parau, e ua mäìti iho ra rätou ia Tetefano, e taata î i te Värua Maitaì e te faaroo, e Firipa, e Porohoro, e Nitanora, e Timona, e Paremena, e Nitoro, e peroteruto o ia no Ànetiohia. 6 O ta rätou ia i tuu mai i mua i te aro o te mau âpotetoro ra, e oti aè ra te pure, ua tuu iho ra i to rätou rima i nià iho ia rätou ra.7 Tupu atu ra te parau a te Atua, e rahi roa atu ra hoì te mau pipi i Ierutarëma, e rave rahi atoà hoì to te feiä tahuà i faaroo i te parau.

Himene.

1Pētero 2.4-9

4 O òutou hoì i te haereà mai ia na i te ôfaì ora ra, i haapae-mau-hia ä hoì e te taata, i haapaòhia rä e te Atua, e te maitaì rahi. 5 Ua patu-atoà-hia òutou, te ôfaì ora ra, ei fare värua, ei autahuà moà, ei hopoi i te tütia värua e au i te Atua ia Ietu Metia ra. 6 Tei roto hoì i te parau i päpaìhia ra e: Inaha e haamau vau i te ôfaì tihi i Tiona, e ôfaì haapaòhia, e te maitaì rahi; e o tei tiàturi i te reira, e òre roa ia e mäheàheà.7 E teie nei, ia òutou i te feiä i faaroo na, e maitaì rahi ia to na; âreà i te feiä faaroo òre ra, taua ôfaì i haapaehia e te feiä patu ra, o tei riro ia ei tiàvä. 8 E ei ôfaì türoriraa, e ei papa maheaituraa. I te feiä i turori i te parau, no te faaroo òre, i haapaòhia hoì rätou no te reira. 9 E ui mäìtihia rä òutou, e autahuà arii, e nünaa moà, e feiä hoohia; ia faaìte hua òutou i to na maitaì, tei parau ia òutou i to roto i te pöuri, ia tae i to na ra märamarama ûmerehia.

Himene.

Ioane 14.1-12

To Ietu haamähanahanaraa i ta na ra mau pipi, 1 Eiaha e horuhoru to òutou âau. E faaroo i te Atua, e e faaroo atoà mai hoì ia ù. 2 E rave rahi te pärahiraa mau i te fare o taù Metua ra, àhiri aita ra, ua parau atu ia vau ia òutou: te haere nei au e haamaitaì i te hoê vähi no òutou. 3 E ua oti anaè i te faaäuhia e au te hoê vähi no òutou ra, e hoì mai au e arataì ia òutou io ù ra; ei reira atoà òutou i te vähi e pärahihia e au ra. 4 Ua ìte hoì òutou i teie nei vähi ta ù e haere nei, e ua ìte hoì òutou i te èà.5 Ua parau mai ra Toma ia na: E te Fatu, aita mätou i ìte i tënä na vähi ta òe e haere na. E aha hoì mätou e ìte ai i te èà? 6 Ua parau atu ra Ietu ia na: O vau te èà, e te parau mau, e te ora. Aore roa e taata e tae i te Metua ra, maori ra ei ia ù. 7Àhiri òutou i ìte na ia ù, ua ìte atoà òutou i ta ù Metua. E teie nei, ua ìte òutou ia na, e ua hiò hoì òutou ia na.8 Ua parau mai ra Firipa ia na: E te Fatu, e faaìte mai ia mätou i te Metua a tirä atu ai. 9 Ua parau atu ra Ietu ia na: O to ù nei hoì pärahiraa roa io òutou nei e, e aore ä òe i ìte ia ù, e Firipa? O tei hiò mai ia ù ra, ua hiò ia i te Metua. E aha hoì òe i parau mai ai e: E faaìte mai ia mätou i te Metua ? 10 Aore òe i faaroo e tei roto vau i te Metua, e tei roto te Metua ia ù? E te parau ta ù e parau atu ia òutou nei, eere ia i ta ù iho, e te mau òhipa nei hoì, na te Metua ia i pärahi i roto ia ù nei, i rave. 11 A faaroo mai e tei roto vau i te Metua, e tei roto te Metua ia ù; e aore ia. A faaroo mai ia ù i te mau òhipa nei. 12 Âmene, âmene, e parau atu vau ia òutou: o të faaroo mai ia ù ra, e rave atoà o ia i teie nei mau òhipa ta ù e rave nei. E e rahi atu ä ta na e rave i teie, no te mea te haere nei au i ta ù Metua ra. 13 E ta òutou e ani mä to ù ra iòa, e tià ia ia ù ia maitaì te Metua i te Tamaiti. 14 O ta òutou i ani mä to ù ra iòa, na ù ia e rave.

Himene.

Manaò.

Teie märama no Më e püpü ai te taata faaroo Porotetani ta na i faaineine no te faatupu i te mau òhipa ta to na tiàturiraa e tïtau ra no te tere maitaìraa o te mau täpura òhipa i faanahohia, ia hanahana te Atua Nui Tumu Tahi. Mai te mätahiti 1818 e tae mai i teie mätahiti 2020, ua naeàhia e 202 mätahiti i teie nei, i teie mätahiti mai ta tätou i faaroo ua faataimehia no teie maì piri fee tei faataupupü i to tätou oraraa vaamataèinaa, tei haafifi roa te ìmiraa a te mau ùtuafare, tei roto roa te tahi mau ùtuafare i  te ère. Eiaha ra tätou e manaò e no teie nei te Ètärëtia Porotetani Mäòhi ìteraa i teie huru fifi, ua âpee noa na o ia i te nünaa Mäòhi i roto i to na oraraa, ma te tiàturi i te faatupuraa faaora a te Atua Nui Tumu Tahi. Ia faaroo tätou i te mau parau tei haapoto i te mau parau i taiòhia e tätou ia au i teie mau faaìteraa.

-Taramo 33, 6 Te parau a te Fatu i oti ai te raì, i te aho o to na vaha.

-Òhipa 6, 3 Toohitu taata roo maitataì tei î, te Värua Maitaì, te paari tei haapaò te òhipa.

-1 Petero 2, 9 Uì mäìtihia òutou, autahuà arii, nünaa moà, feiä hoohia no te faaìte.

-Ioane 14, 11 A faaroo mai, tei roto te Metua ia ù, A faaroo mai ia ù i te mau òhipa nei

Ei hiòraa mätamua.

Teie te reo o Ietu i te ìrava 11 i te päpaìraa a Ioane i te pene 14, A faaroo mai, tei roto te Metua ia ù, A faaroo mai ia ù i te mau òhipa nei. Te türama nei teie reo i te taata ia ìte e taata mäìtihia oia e Ietu no te òhipa, o ta na atoà ia e tämahanahana nei ma te parau e eiaha e horuhoru to òutou âau.

E tià ia parauhia e i roto i te Parau Maitaì i papaìhia e Ioane i te pene 14, i te mau ìrava 1 e tae i te 14. Ua täòtiàhia te taiòraa i nià i te parau no te tïtauraa i ta na mau pipi ia päpü te tiàturiraa i te Atua ma te aueue òre i mua i te haafifiraa rau no te oraraa faaroo, e te oraraa vaamataèinaa. No reira o Ietu i parau ai te ìrava 6 O vau te èà, e te parau mau, e te ora. Aore roa e taata e tae i te Metua ra, maori ra ei ia ù Teie huru parauraa a Ietu no te faaìte ia i te mau pipi, i to na täamuraa i nià ia rätou, i te mau taime atoà o Ietu e faahiti ai i teie parau, no to na ia ìte i te paruparu o te mau pipi i mua i te mau òhipa e tupu rä, no te mau tau e ä muri atu. No te mea tei roto te mau pipi i te hoê taime te pïtaataaraa to rätou tiàturiraa i te Atua. Noa atu rä teie huru to te mau pipi i mua ia Ietu, te tïtau nei o Ietu ia rätou ia tiàturi i te Atua e ia na atoà e tià ai.

Te huru o te taiòraa

Te mau parau mätamua o te taiòraa, te horoà nei ia, ia tätou i te hoê täupupuraa no te märamaramaraa, i te hinaaro e faaìtehia nei e Ietu. No te tahi auraa o teie mau parau te haafatatahia nei  tätou i teie manaò to Ietu, e rave rahi te parahiraa i te fare o ta ù Metua. Oia hoì, te fare ta Ietu e faahiti nei, mauti ra ia te  mau fare pure, ia riro i reira e haamorihia ai te Atua, ia riro i reira e faanahohia ai te parau no te nunaa o te Atua, e i reira atoà e faatupuhia ai te hanahana o te Atua, na roto i te mau àrueraa, e te mau haamaitaìraa. Eiaha rä i roto i tera manaò e, no te hoê fare i nià i te raì, i te hoê vahi naeà-òre-hia i te tiàturiraa o te taata. Te fare Metua o ta Ietu e parau nei, mau ti ra ia to tätou ia tino, tei riro èi hiero no te vairaa no te parau a te Atua. I te mea e parau tütuu teie na Ietu i ta na mau pipi hou O ia a haere ai i pïhaìiho i te Metua. Te taiòraa ta tätou e farerei e parau tütuu na Ietu i ta na mau pipi, e i ta na ÈTÄRËTIA.

Te taupupu o Toma e o Firipa.

Te manaònaòraa o Toma, tei i nià  ia i te parau no te èà e rave, te pähono nei o Ietu, ò vau te èà, O ia te èà no te mea tei ia na ra te parau mau, e no te mea tei ia na rä te ora. Oia hoì tei roto te Metua ia na, e tei roto O ia i te Metua. E òre roa e taata e tae i te Metua, èi na roto ia Ietu, ta Ietu e parau nei ta na mau haapiiraa, ta na mau faaoraraa maì, ta na mau temeio, ta na faaàmuraa i te mau taata e rave rahi i te maa, ta na faatiàraa i te taata mai roto mai i te pohe, e te vai atu ra. E te reira ua ìte te mau pipi.

O ia atoà ia te manaònaòraa o Firipa, ia faaìte o Ietu i rätou i te Metua àti-rä-atu ai. Teie manaò to Firipa, no te arataì ia Ietu, i te faaìteraa i te huru no to na tüàtiraa i te Metua, e to te Metua tüàtiraa ia na. Te èà e te Metua, na parau ia teie tei faaìte i te òhipa o te tià ia ravehia, èi faaitoitoraa no ìteraa i te mau faanahoraa i ravehia e te Atua no te ora o te taata.

Te faaitoitoraa a Ietu i ta na mau pipi

Te faaitoitoraa e horoàhia nei e Ietu, o ta na ia e faahiti nei i te ìrava 12 Amene, amene, e parau atu vau ia òutou, o te faaroo mai ai ù ra e rave atoà o ia i teie mau òhipa ta ù e rave nei, e teie manaò i te ìrava 14, ta òutou e äni ma to ù iòa rä na ù ia e rave. Teie mau parau ta te Fatu no te tuu ia i te mau pipi i mua i te mau hopoià e tià ia rätou ia òhipa, no te faaìteraa i te hanahana o te Atua. O ta rätou e täpeà tämau maite, ma te àueue òre i mua i te mau manaò tià òre o teie nei ao, tei haaparuparu i te tiàturiraa o te taata i te Atua. E ia noaa atoà i te mau pipi, i te haamähanahana i te âau paruparu o te taata, no hoìraa i nià i te èà, o te Atua, te parau mau a te Atua, e te ora a te Atua. E no reira O ia i parau ai e, 11 A faaroo mai, tei roto te Metua ia ù, A faaroo mai ia ù i te mau òhipa nei.

No te  aha o Ietu i faaau ai ia na i te èà ? No te mea O ia te àveià mau tei faaìte i te vahi e tià i te taata ia rave. O te hohoà ia no te tätauro o te Metia, tei tuhahia e maha maaraa èà, te èà ta te Metia e parau nei e tuàti ia o ia i te mau vahi atoà. Te vai atoà rä te èà, eita e tuàti, tei reira ia tätou  i te piiraahia e ära, ia òre na te ànimara ia e haapii mai i te taata ua hape te èà. Te òhipa i tupu i te tau o Päraama, i to Paara faaueraa ia Päraama e haere e tohu ia Pohe te nunaa o te Atua, i nià i te èà te faatäuiraahia e te Atua to na èà, e na te âtini i faaìte ia Päraama e Merahi na te Atua teie i mua. Oia atoà ia o Tauro, i nià i te èà no Tamateto, ua täorahia o ia e ta na iho puaahorofenua i nia i te fenua no te tano òre te èà. O Ietu o ia te èà e hanahana ai te Atua.

E aha te parau mau e faahitihia nei ?  O  to Ietu ia i hinaaroraa, ia mauhia  te hinaaro e tïtauhia ra i te taata i te faaìteraa a te parau a te Atua. Te Mau tei roto i tera manaò e, e täpeà maite ia òre ia mahere ia vëtahi ê, o ta te parau ia e faahitihia ra e te feiä i ü rätou i te mätaì i te vahi täutairaa, te naò ra to rätou reo e, MAU, MAU, MAU te hoë. E faaroo atoà teie parau i roto i te ârearearaa a te feiä paari, te naò nei rätou e, MAU, MAU, MAU te himene, oia hoì eiaha ia paruparu, ia mau noa ra te itoito. O ta Ietu atoà ia e parau nei i ta na mau pipi, ia mau maite rätou i te ture a te Atua, ia òre ia àueue i mua i te mau fifi o te ao nei. E aha te ora o ta Ietu e parau nei ?  O te Ietu ia faaìteraa i te reo mana o te Atua i roto i te  tau no te rahuraa.

Te Maramarama

Te fenua – miti

 àihere – tumu raau

Te tiàrama rahi e naìnaì

Te mana e te ïà

Te mau ànimara

Te hohoà o te Atua i nià i te tane e te vahine ( Tenete 1, 27) teie te ora e pärauhia nei, eiaha te mau pipi i faatea i te rahu a te Atua.

Oia atoà ia tätou, eita e tià ia tätou ia faatea i na pärau e maha nei, te ÈÀ, te PÄRAU MAU, te ORA, e te FAAROO, i te mea o te reira te faatupuhia i roto i te Fare METUA o ta Ietu e pärau nei, e parahiraa to tätou i reira, o tätou te òfaì tiàva èi  tapeàraa i te papaì o te fare ia òre ia purehu, o tei pärauhia te ÈTÄRËTIA a Ietu Metia i te ao nei. o ta tätou ia e faatupu nei na roto te horoà a te taata, èi àtuàturaa i te ÈÀ, èi haapuairaa i te PÄRAU MAU, èi Faaitoitoraa i te ORA, ia tupu te  FAAROO.

Himene

Pure

Pure tätou i te Atua Nui Tumu Tahi, Haamaitaì mätou ia òe e te Atua Metua i te mea, aita ta òe faatereraa i taui iti noa aè, mai te tumu mai o te fenua nei e ìnaa nei ; e aita atu hoì e ture ta òe i haamau ei faatere i to òe Hau maori rä, te here e te aroha, te parau mau e te parau tià, e te faaroo. Te faahaèhaa atu nei mätou i mua i to òe teitei, òe i mäìti ia mätou no ta òe ôpuaraa faaora. E te ani nei mätou ia òe, a tuu mai na i ta òe faatereraa i te feiä e faatere nei i ta òe Ètärëtia, e e faatere nei ia Mäòhi Nui, ia hoì faahou mai te hau, te òaòa, e te maitaì i roto i te oraraa täatoà o te nünaa Mäòhi. Ia TIÀ MÄ atu te nünaa Mäòhi e te TIÀMÄRAA o to na metua vahine faatupu ora, i mua i to òe TIÀMÄRAA e te Atua Nui Tumu Tahi. Amene.

Himene.

Pure a te Fatu.

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

9 E ui mäìtihia rä òutou, e autahuà arii, e nünaa moà, e feiä hoohia; ia faaìte hua òutou i to na maitaì, tei parau ia òutou i to roto i te pöuri, ia tae i to na ra märamarama ûmerehia.

Teraì or. Faatura.

Ioane 10, 1-10 TE TIAI, O TE TIAI.

Tāpati 3 no Më 2020.

ÔROÀ

TE TIAI, O TE TIAI.

Ômuaraa.

Te faaineine nei tätou no te taiò, e no te faaroo i te mau parau no roto i na taiòraa e maha tei faataahia no teie mahana, èi haamaitaìraa na tätou i te Atua Nui Tumu Tahi. Te tumu no te mau maitaì atoà e faanaòhia nei e tätou èi ia hanahana te Atua. Tei roto noa ä tätou i te äraraa i teie maì e àtutu noa nei i Mäòhi Nui nei, e i teie ao, te änihia nei i te taata tätaì tahi o ia te matamehaì no te àroraa i teie maì, i te mea o ia te tahi fauraò no te haaparare i teie maì, te taata i roohia i teie maì. E faaitoito tätou i te tiaì ia tätou, to tätou ùtuafare ia òre tätou ia pïrihia e teie maì, e te Atua Nui Tumu Tahi aroha mai ia mätou te taata hara nei.

Himene

Taramo 23

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra,  te arataì nei o ia ia ù nä pïhaì iho i te päpe atatià ra. 3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Òhipa 2.14 ; 36-41

Te aòraa a Pëtero i te mahana Penetetöte

14 Ua tià aè ra rä Pëtero, e te àhuru mä hoê atoà ra i nià, faateitei atu ra i ta na reo, ua parau atu ra ia rätou: E te mau âti-Iüta nei, e te feiä atoà e pärahi i Ierutarëma nei, ia ìte mai òutou, a faaroo mai na òutou i ta ù nei parau.

36-41

36 E teie nei, ia ìte atoà te fëtii o Ìteraèra e, ua faariro-mau-hia o ia e te Atua ei Fatu e ei Metia, o Ietu mau nei ä ta òutou i faatätauro nei. 37 E ìte aè ra rätou i taua parau ra, putapü atu ra to rätou âau, e ua nä ô mai ra ia Pëtero e te mau âpotetoro atoà ra: E te mau taeaè nei, e aha mätou nei? 38 Ua parau atu ra Pëtero ia rätou: E tätarahapa, e ia päpetitohia òutou atoà i roto i te iòa o Ietu Metia ia matara te hara, e horoàhia mai ia te Värua Maitaì ia òutou. 39 No òutou hoì tei parauhia mai ra, e no to òutou tamarii, e no te feiä atoà hoì i te ätea ê ra, ta te Fatu ta to tätou Atua e parau atu. 40 E rave rahi te parau ta na i parau atu, e aò atu ra, nä ô atu ra: Ia ora òutou i teie nei uì märô. 41 E te feiä atoà i färii mäite i ta na ra parau, päpetitohia iho ra ia, e âmui-atoà-hia mai ra ia rätou, e toru atoà tautani i taua mahana ra.

Himene

1 Pētero 2.20-25

20 I papaìhia rä òutou i ta òutou iho hara, a faaòromaì ai òutou, e aha to reira haamaitaìraa? Ia pohe rä òutou mä te haapaò maitaì, a faaòromaì ai òutou, e mea au ia i te Atua. 21 I parauhia ai hoì òutou; i pohe atoà hoì te Metia iho no òutou; e ua vaiiho hoì i te haapaòraa na òutou, ia pee òutou i to na taahiraa âvae. 22 O tei òre roa i rave i te hara, e aore roa e haavare i ìteä i to na vaha. 23 O tei òre i faaìno atu, ia faaìnohia mai o ia; e ia pohe o ia ra, aore o ia i parau tähoo atu; ua püpü rä ia na iho ia na no na te manaò tià ra.24 O tei maraa hoì ia na iho ta tätou hara i to na iho tino i nià i te tätauro, ia haapaò tätou, o tei matara mai i te hara ra, i te parau-tià; no to na hoì ìravarava i ora ai òutou. 25 Mai te mämoe i haere ê ra hoì òutou; ua hoì mai rä i teie nei i te Tiaì e te Èpitetöpo o to òutou mau värua.

Ioane 10.1-10

Te parapore o te tiaì-mämoe maitaì,

1 Âmene, âmene, e parau atu vau ia òutou, o të òre e nä te ùputa i te tomo i roto i te âua mämoe ra, o të paìùma nä te tahi èà ê ra, e èiä ia e te haru. 2 E nä te ùputa ä te tiaì-mämoe i te tomo. 3 E ìriti mai ia te tiaì-ôpani ra ia na, e e faaroo mai te mämoe i to na reo, e taò atu ä o ia i ta na iho mämoe mä te faahiti atu i te iòa, e e arataì o ia ia rätou i räpaeàu. 4 E ia arataì o ia i ta na iho mämoe i räpaeàu ra, e nä mua o ia ia rätou i te haere, e pee mai rätou ia na, ua ìte hoì rätou i to na reo. 5 E òre rätou e pee i te taata ê, e horo ê rätou i reira, aore hoì rätou i ìte i to te taata èê reo. 6 I parau-tià atu ra Ietu ia rätou i taua parapore nei, e aita roa i ìte i te parau ta na i parau atu ia rätou ra.

O Ietu te tiaì-mämoe maitaì

7 Ua parau faahou atu ra Ietu ia rätou: Âmene, âmene, e parau atu vau ia òutou: o vau te ùputa o te âua mämoe. 8 O to mua atoà ia ù nei, e èiä ia e te haru, aita rä te mämoe i faaroo ia rätou. 9 O vau te ùputa, o të nä ô nei mai ia ù nei i te tomo ra, e ora ia, e haere rätou i roto e i räpae, e noaa hoì te mäa. 10 O te èiä anaè ta te èiä i haere mai ai, e o te täparahi hoì e ia pau roa. I haere mai nei au ia noaa to rätou ora, e ia rahi atu ä te ora.

Himene

Manaò.

Ia au i na taiòraa e maha nei, e tià ia parauhia hoê tumu parau teie e âpee nei i te mau manaò. Mauti ra ia, TE TIAI, O TE TIAI, e ìtehia teie mau tumu parau i roto i mau parau i muri nei, tei faatupuhia na roto i te,  Te haamähanahana a te Atua, Te òhipa a te Varua Maitai, Te au i te Atua ora. E faaroohia to na reo. Te haapotoraa ia o ta tätou no teie mahana.

-Taramo 23, 3 E faahoì i ta ù värua. E arataì ia ù na te èà tïtïàifaro, ia hanahana to iòa.

-Òhipa 2, 38 E tätarahapa, ia päpetitohia i te iòa o Ietu Metia ia matara te hara.

-I Petero 2, 24 O tei maraa ta tätou hara i nià i te tätauro, i te parau tià.

-Ioane 10, 9 O vau te ùputa, tei tomo mai ra, e ora ia i roto e i räpae, e noaa hoì te mäa.

Teie mau parau e maha, e mau parau ia te tià e ìriti i te hoê ùputa no te hoê vahi âpï, te vahi  o te Atua anaè te Tiaì i reira, e te tävini, o tei parauhia te àua no te feia i hoofaahouhia mai e te Atua, no te ORA MURE ORE. Te tumu ia o teie manaò e, TE TIAI, O TE TIAI.

E tumu parau faufaa roa ia hiò faahouhia  i teie mahana, ei haapäpü faahouraa i te mau òhipa ta na e faatupu. I te mea aita  teie tumu òhipa i täòtiàhia no te hoê noa pae taata. E faanaho ra o ia i te taatoàraa no te oraraa o te fenua nei te vahi i reira o ia i te oraraa. I te mea aita te Atua i hämani ta âfa i te taata, ua hämani ra O ia i roto i to na taatoàraa, te tino e te varua e aita atoà te Atua i faaäu i te parau, ua horoà ra i te òhipa èi tiàau i nià i te mau ora atoà e huti ra i te aho. Te òhipa ia e tupu nei i roto i te Ioane pene 10 ìrava 1 e tae i te ìrava 10 te faahitihia ra i ù nei te parau no te àua mämoe a te Atua. E àua ma te faaìte òre i to na âano e to na roa. E te rahiraa mämoe i roto, to na auraa ra e àua päpaì òre teie, e aita to na e ôtià. Te ùputa aita atoà i faaìtehia tei hea roa i te vairaa, e ùputa iho a ra to te àua, o Ietu.

E tià roa ia tätou ia tuha i teie taiòraa e toru aè tuhaa.

1) te ir.1 te èia haru.

2) te ir.2- 6 te parapore no te tiaì mämoe.

3) te ir.7-10 te ùputa o te àua.

Teie te huru no te àua mämoe ta Ietu e faahiti nei, e to na faanahoraa, ia hiòhia, e àua tei farerei i te mau fifi rau no te oraraa e rave rahi. Tei òre i ère i te parau no te èia, te faaroo òre, te ôuà na nià  i te paruru àua, e te vai atu ra ...

Ei tatararaa.

O vai te èia haru ta Ietu e parau nei ? 

Aita atu ia o te mau Faritea ia, tei faahapa pinepine i te mau òhipa faaoraraa a Ietu e faatupu nei i te iòa o te Atua. O rätou atoà tei faataahia èi tiaì i te àua no te nunaa o te Atua, aita ra i haapaòhia i te mea ua hinaaro rätou i te faataa ia rätou i te nunaa, ua hinaaro rätou ia faaturahia rätou e te nunaa, e te tahi mau taime no te hinaaro ia e rave i te parau haava no te faautuà i te tahi. Te riro nei ia teie huru hohoà tiaì èi faatîtîraa i te nunaa, eiaha ra èi faatiàmaraa ia au i te aroha o te Atua. Ua tae atoà te manaò i nià i tera faanahoraa e, e tiaì o ia ia na iho no te faatupu i ta na òpuaraa tià òre i nià i te mämoe.

Te huru o te èia, ia au i ta tätou taiòraa e na nià o ia  i te àua i te paùma, eita o ia e na te ùputa i te haere a fifi o ia i te tiaì. I te tau o Ietu e faufaa rahi te parau no te tiaì mämoe, o ta na e faaau  nei i te mau faatere o te nunaa. Te mau tiaì mämoe maitaì e ìmi rätou i te mau raveà atoà ia ora ta na nana, ma te paruru i te veàveà o te mahana, ma te tuu i te mau vahi haumärü, ma te haamäha i te poiha, e ma te ärataì i te mau vahi heeuri te maa ia òre te nana ia pohe i te poia. Ei ia po e putuputu te mau tiaì mämoe i te hoê vahi, ma te patu i te hoê àua èi pärururaa i te mau èia haru, e te mau ânimara taehae.

Àreà ra te mau tiaì mämoe maitaì, e na te ùputa rätou i te tomo ma te tiàma i mua i te mau mämoe, e taiò o ia i ta na mau mämoe i te mau mahana atoà, ma te räpaau tei pepe, e ma te ìmi tei moè. Eita ra o ia e tiahi i te mämoe tei hahi ê i te èà, e faahoì ra o ia tei moè i te fatu no te mämoe. E vai ara noa o ia i nià i ta na nana, ma te ìte i to rätou huru, e faaroo te nana i to na reo, e ìte atoà ra te nana i to na reo, e haere te mau mämoe i rapae ma te tiàma  e te haapeàpeà òre  te manaò. Teie te mau täpaò ta Ietu e horoà nei no te hoê tiaì  mämoe tei haapaò i ta na nana.

Amene, Amene,  O vau te ùputa o te àua mämoe.

Te täpiti nei o Ietu i te parau, Amene te tumu no te ètaèta te âau o te mau Faritea, i mua i te mau òhipa maere e faatupuhia nei e te Atua. I te mea aita rätou e färii nei ua ora te matapö i te mana o te Atua, to rätou tiàturiraa eita e tià ia Ietu ia rave i teie mau òhipa, mauti ra èi taata anaè ra no o mai i te Atua ra te tià e faatupu teie huru òhipa.

Teie o Ietu e haapäpü nei e O vau te ùputa, eiaha ra tätou ia manaò e a tahi roa ra o Ietu a faahiti ai teie parau no te ùputa, te tahi faahitiraa O ia i teie parau, i roto ia i te manaò, no te ùputa oaoa, e te ùputa âano, hoê ia o na ùputa nei e tae i te patireia o te Atua.(Mataio 7:13-14,

Ev. Ruta 13:24.) Oia atoà ia te ùputa o te rai tei ìte òramahia e Iatopa te èà tei tauàti i nià i te fenua, te pauma ra te tahi pae, e te pou mai ra te tahi pae.(Tenete 28:17.)Te mau ùputa atoà  no Ierutarëma tei parauhia te tomoraa i roto i te vahi no te hau, no te parau tià, e no te fare o te Atua. (Ìtaia 60:11, Taramo 122:2,118:19-20.) No reira aita tätou e maere nei i te reo no Ietu i te parauraa e O vau te ùputa, te manaò tumu o Ietu i ù nei, te tïtau onoönoraa ia i te mau taata atoà e tiàturi nei i te Atua tei aroha, ia ìte i te tomo na teie ùputa. Te ùputa no te hoê vahi àpi, te vahi e òre ai te taata e taamino noa i te vahi hoê, e vahi ra tei ìriti i te taata i nià i to na ìteraa i te mau hinaaro o te Atua tei tïtau ia na ia ora i te mau maitaì atoà e faanaòhia nei i te ao nei. Ia hiòhia te oraraa, e orahia nei i te ao nei, te taamino noa nei te taata, te fänau nei, te pohe nei, te rave nei i te òhipa, te tämaa nei, te taòto nei, e te ara nei. Teie te huru oraraa e orahia nei e te taata. To na auraa ua òhu noa te taata i roto i te ôpape no te peu mätauhia i te ora. I parau ai o Ietu e O vau te ùputa, ia tià i te taata ia haere i roto, ei ia haere i rapae ma te òaòa e te maitaì.

I reira atoà e noaa ai te hoê ora àpi, tei haamauhia i nià i te tumu no te mau hinaaro o te Atua. Taua tumu ra to te taata ia tuuraa ia na i mua i te mau faanahoraa a te Atua tei faaora ia na. Te faanahoraa a te Atua te tomoraa ia na roto i teie ùputa ta Ietu e parau nei, te ùputa no te ora tei tiaìhia e te Atua, eita atu ra na te merahi faahou e rave i teie òhipa mai te ô i ètene ra ma te oè mata piti i ta na rima. I te mea ua matara teie ùputa na roto i te tiàfaahouraa o Ietu, o ta te Atua i faatupu ia noaa te ora i te mau taata atoà e tïtau nei na roto i te âau tätarahapa. O ta Ietu ia e parau nei e......

I haere mai nei au ia noaa to rätou ora, e ia rahi atu a te ora.

Te ora ta Ietu e faahiti nei, e haapäpüraa ia i teie mau parau e Amene, e parau mau, eita e täui, e ia haapaòhia e tià ai. I reira te àua mämoe e riro ai ei àua no te nünaa o te Atua, e tiaì to na tei hinaaro i te ora no te nana. O te tià ia faaea tiàma noa i roto, ma te tiàturi i te ärataìraa a te tiaì. Aita atu e òaòaraa to Ietu, ia noaa i te mämoe i te haapaò ia na iho, ia òre o ia ia topa pinepine i roto i te mau tämataraa rau e vai nei i rapae mai i te àua ta te Atua i faataa no te ora.

Te ora ta Ietu e parau nei te maitai ia o te tiaì i nià i ta na òhipa. E ora tei ànaana i te vahi pöuri, ei türamaraa i te èà o te ùputa o te àua no te mau tamarii a te Atua. I te mea te horoà nei teie parau i te faufaa no te mau maitaì hope òre no te puai no te mau tau e a muri atu. No reira i roto i te Atua, eita e ïti mai te ora e rahi ra ei faaìteraa e O ia  te Ârefa e te Ômeta, te haamataraa e te faahopeàraa. Eita te ora ta Ietu e parau nei no te hoê noa tuhaa e vai nei i roto i te taata o te hiò âmuiraa ra no te mau òhipa e vai ra i te ao nei. Te ora mai i reira e pihaa mai ia te mau òhipa atoà e vai nei i roto i te mau òpuaraa e faatupuhia nei, tei tià e àro i te mau faanahoraa e òre e ìtehia ai te ora. Ahiri te mau taata e ìmi nei i te mau raveà atoà no te paruru i te ora e vai nei i roto i te òpuaraa a te Atua, eita paha o Ietu e faahiti i teie parau no te ora. No te mea ra, aita teie òhipa e haapaòhia nei, i parau ai o Ietu e O vau te Ùputa. Ei horoàraa i te ora i te mau taata atoà ia na reira i te tomo, e noaa ia rätou te ora ia tomo, ei ia haere i rapae. E ora ra tei türamahia e te marämarama no te Èvaneria. Àreà ra te marämarama o te èia haru, no te haapohe ia i te nana, eiaha ia moèhia ia tätou e toru taime to Ietu faahitiraa i teie parau i te ìrava 1, 8 e te ìrava 10.E täpaò faaìte te reira te puai atoà nei te èia i to na pae.

E rahi atu a te ora, e haapäpüraa te reira e, eita e pau teie maitaì e vai nei i te Atua ra, teie ra eiaha ia te taata ia haamäuà faufaa-òre-noa te ora a te Atua. Ia tià ra ia haafaufaahia ia tupu maite te òaòaraa o tera e tera taata. Te puai o te ora  te faatupuraa ia i te hinaaro ôtià òre no te aroha o te Atua. O ta te tiaì, e ìmi i te mau raveà atoà ia riro  te èia haru, ei mämoe atoà no te nana a te Atua. Ei ia ìte o ia e o Ietu o te ùputa ia no te ORA MURE ORE. Tei hinaaro ia ora te mau taata atoà tei färii i te tïtauraa a te Atua.

Ei faaitoitoraa.

O ta te Taramo 118 ia e faaìte ra i te ìrava 20, o te ùputa teie na Iehova, e na reira te feia parau tià i te tomo. I nià i te èà ta Ìtaia e parau nei i te pene 35 i te ìrava 8,ei reira hoì te èà rahi, e  èà hoì; e maìrihia hoì te reira, o te èà moà : Aore roa e taata viivii e na reira i te haere: ei pïhaì-atoà-iho ra te Atua ia rätou, i te haereraa i taua èà ra, e òre hoì te taata ìte òre e hapa i te reira èà.

Te èà ia ta te TIAI O TE MAU TIAI, i faataa no taua mau TIAI haapaò maitaì ra, i te mea o Ietu te ùputa no te ora âpï.

Himene.

Pure

Te pure nei mätou ia Òe e te Atua Nui Tumu Tahi, no ta Òe Tiaì ia mätou i te mau mahana atoà no to mätou nei oraraa o tei fänaòhia e mätou i te mau taime òaòa, e te mau taime òto, e täpaò te reira no te òe Aroha e to Here. Na roto i ta òe Rähu te ìte nei mätou i te ora e türama ra i to mätou oraraa ta te fenua e ìriti ra i to na ùputa ia mätou no te mau maitaì atoà ta te àru e faafanaò ra ia mätou.

E te Atua e, tei roto noa to mätou fenua i te ano no teie maì piri fee e tupu  noa nei i Mäòhi Nui nei, e i te ao atoà nei. Höroà i te mau täote mäìmi, e te mau tahuà räau o te fenua i te mau raveà no te ìteraa i te räau räpaau no teie maì e haafifi ra i te oraraa o te mau taata o te ao nei.

E te Atua e, ia piri mai to Aroha i nià ia mätou, e ia natihia mätou i te täura no te here, ia tià ia mätou te taata tätaì tahi i te àro i teie maì e haaviivii noa ra ia mätou e to mätou oraraa. Te raveà hoê roa e faaärahia to mätou tiaì ra i te tahi i te tahi ia òre teie maì ia parare, na te taata tätaì tahi e haapaò i ta na iho hopoià no te pärururaa ia na iho na mua roa.

E te Atua Nui Tumu Tahi aroha mai ia mätou te taata hara nei. Âmene.

Himene.

Pure a te Fatu.

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

9 O vau te ùputa, o të nä ô nei mai ia ù nei i te tomo ra, e ora ia, e haere rätou i roto e i räpae, e noaa hoì te mäa.

Terai or. Faatura.