Mätaio 10, 37-42 Utuà

Tāpati 28 no Tiunu 2020.

Utuà.

Taramo 89

1 Matetira a Ètana te âti-Ètera ra. 2 E tämau ä vau i te himene i te aroha o te Fatu, e na ta ù vaha e faaìte i te parau mau na òe, i tërä uì i tërä uì. 3 I parau hoì au e: E tià to aroha i te vai-mäite-raa, tei te mau raì ra to parau mau i te haamau-raa-hia. 4 Ua parau òe: Ua fafauhia e au te faufaa i tei haapaòhia e au ra, ua tapu vau i ta ù tävini ra, ia Tävita: 5 E haamau ä vau i to òe ra huaai e a muri noa atu, e patu vau i to òe ra teröno e tae noa atu i te mau uì atoà ra. Tera. 6 Ia haamaitaì te mau raì i ta òe ra räveà mana, e te Fatu, e te âmuiraa o te feiä moà ra, i ta òe ra parau mau 7 O vai hoì to te mau raì ra e au i te Fatu. O vai tei au i te Fatu i roto i te mau tamarii a tei mana ra. 8 E Atua mataù-roa-hia i te âmuiraa o te feiä moà ra, e ia faahanahanahia e te feiä atoà i pïhaì iho ia na ra. 9 E te Atua manahope, e te Fatu, o vai tei au ia òe ra? E mana rahi to òe, e te Fatu, e te haapunihia ra òe e ta òe ra parau mau.10 O òe hoì tei mana i te ûànaraa o te miti ra, e ia tupu to na àre, na òe e haamania. 11 Ua ôfatifati òe ia Rähapa mai te mea ua paruparu ê na, e na to rima ètaèta i haapurara i to mau ènemi. 12 Na òe te mau raì nei, e na òe atoà te fenua; te ao e to te ao atoà ra, na òe ä i hämani. 13 O àpatoèrau e o àpatoà, na òe i hämani; o Täpora e o Heremona tei himene hua i to òe ra iòa. 14 E rima püai to òe, ètaèta tei to rima, e te teitei roa ra to rima àtau. 15 O te parau-tià ra e te au, o te tumu ia o to òe ra teröno. O te aroha ra e te parau mau, tei nä mua ia i to mata. 16 E ao to te mau taata i ìte i te reo òaòa ra E hahaere ä rätou, e te Fatu, i te märamarama o to mata ra. 17 Te òaòa ra rätou i to iòa e mure noa atu te mahana, e ua teitei rätou i te parau tià na òe ra. 18 O òe hoì te hanahana o to rätou püai, e na te here na òe ra i teitei ai to mätou tara.19 O te Fatu mau ä to mätou tauturu, e tei moà i Ìteraèra nei, o to mätou ia arii. 20 I reira ta òe parau ôramaraa mai i to taata moà ra, e ua nä ô mai ra: Ua tuu vau i te tauturu i nià i tei mana ra, ua faateitei au i te hoê i haapaòhia no roto i te mau taata nei. 21 Ua ìteä ia ù ta ù tävini o Tävita, e ua faatähinu vau ia na i ta ù monoì moà ra. 22 Na to ù iho rima o ia e haamau, e na to ù iho rima o ia e faaètaèta. 23 E òre roa o ia e vï i te ènemi, e òre hoì o ia e ìno i te taata parau ìino ra. 24 E täìrihia e au to na mau ènemi i mua i to na mata, e täìrihia e au te feiä i riri mai ia na ra. 25 Ei ia na te parau mau na ù, e ta ù aroha vai ai e teitei hoì to na tara i to ù nei iòa. 26 E tuu vau i ta na rima àui i raro i te tai, e ta na rima àtau i raro i te pape. 27 E na na e pii mai ia ù e: O ta ù metua òe, e ta ù Atua. E ta ù pare e ora ai au ra. 28 E faariro vau ia na ei mätahiapo na ù, e ia teitei o ia i te mau arii atoà o te fenua nei. 29 E vai ä ta ù hämani maitaì ia na, e ta ù faufaa ia na ra e päpü ia. 30 E haamau vau i to na ra huaai e a muri noa atu, e vaiiho taiàta hoì to na teröno mai te mau raì atoà nei. 31 Ia faaruè ta na mau tamarii i ta ù ture, e aore i haapaò i ta ù ra parau au; 32 ia faahapa rätou i ta ù ra haapaòraa, e aore i faaroo i ta ù ra parau: 33 e papaì au ia rätou i ta rätou ra hara i te papaì, e to rätou ìno i te täìri. 34 O to ù rä hämani maitaì, e òre ia e hopoi-ê-hia ia na, e òre hoì te parau mau na ù ra e haamaìrihia. 35 Ta ù faufaa ra e òre e faaòrehia e au, e òre hoì e ruri ê i tei nä roto mai i to ù nei vaha. 36 Hoê aè nei a ù nei täpuraa i to ù iho ra moà: e e òre au e haavare ia Tävita. 37 E vai ä to na huaai e a muri noa atu, e to na teröno, mai te mahana ia i mua ia ù ra, 38 e tià ia i te vai-mäite-raa, mai te märama ra, e mai te ìte haavare òre i nià i te raì ra. Tera. 39 I teie nei rä, ua faaruè òe e ua haaveùveù; ua riri òe i ta òe i faatähinu ra. 40 Ua faaòre òe i te faufaa i to tävini nei, ua haaviivii òe i to na toröna i raro i te repo. 41 Ua vävähi òe i te mau âua na na, e ua huri-tumu-hia e òe to na mau haapüraa ètaèta. 42 Te haruhia ra o ia e te feiä atoà i haere nä te èà, e ua riro o ia ei faaìnoraa na to na ra mau taata-tupu. 43 Ua faateitei òe i te rima àtau o tei märô mai ia na, e ua faaòaòa òe i to na atoà ra mau ènemi. 44 Ua haamemu òe i te mata o ta na òè,  e aita atu ra o ia e mau i te àroraa ra. 45 Ua faaòre òe i to na ùnaùna, e ua huri òe i to na teröno i raro i te repo. 46 Ua haamure òe i te mau mahana o to na ra âpïraa, e ua vehi òe ia na i te haamä. Tera. 47 Mai te aha ra te mäoro, e te Fatu, o to òe haamoèraa? E vaiiho noa änei i to riri ia àma noa na mai te auahi e a muri noa atu? 48 E haamanaò i te poto o to ù nei taime. E e aha òe i hämani ai i te mau tamarii atoà a te taata nei ei mea faufaa òre ra? 49 O vai te taata e ora e eita e ìte i te pohe, a ora ai to na värua i te rima o häte? Tera. 50 Tei hea, e te Fatu, to mau hämani maitaì tahito ra, ta òe i haamau i te parau mau na òe ia Tävita ra? 51 E haamanaò, e te Fatu, i te faaìno i faaìnohia ai to mau tävini nei, e tei nià i taù ôuma te tähitohito o te taata nei e rave rahi. 52 Ta to mau ènemi i faaìno mai, e te Fatu, o tei faaìno mai i te haereà o tei faatähinuhia e òe ra. 53 Ia haamaitaìhia te Fatu e a muri noa atu. Âmene, e Âmene.

2 Te mau Arii 4.8-16

8 E tae aè ra i te hoê mahana, te haere ra Èritaia i Tünema, tei reira te hoê vahine taoà; e ua märô mai ra o ia ia na e àmu i te mäa. E muri aè ra, ua haere anaè o ia nä reira ra, ua täpae o ia e ua àmu i te mäa. 9 Ua parau atu ra o ia i te täne, Inaha te ìte nei au i teie nei taata e haere pinepine mai i ô nei, taata moà ia na te Atua. 10 Täua e hämani i te tahi piha ïti nö na i nià i te patu nei; a tuu ai täua i te tahi roì nö na, e te tahi àmuraa, e te tahi pärahiraa, e te tahi rämepa, e ia tae noa mai o ia i ô nei, a täpae mai o ia. 11 E tae aè ra i te hoê mahana, ua haere mai ra o ia i reira, e ua täpae aè ra i roto i taua piha ra, e ua taòto iho ra. 12Ua parau atu ra o ia i te tävini ia Tehati, A pii atu na i te vahine Tünema. E oti aè ra i te piihia e ana, ua tià noa mai ra i mua ia na. 13 Ua parau atu ra o ia ia na, E parau atu òe ia na e, Inaha, i faaitoito noa na hoì òe ia mäua i tënä na faaitoitoraa; e nä hea atu ra mäua ia òe? Ia parauhia atu änei òe i te arii, e te raatira o te nuu nei ? Ua nä ô mai ra o ia, Te pärahi nei au i roto i to mätou iho nei. 14 Ua nä ô mai ra o ia, E nä-hea-hia atu ra o ia? Ua parau atu ra Tehati, Aita a na e tamaiti, e ua ruhiruhiä hoì te täne. 15 Ua parau mai ra o ia, a pii atu na. E oti aè ra o ia i te piihia atu, te tià noa mai ra i te ùputa. 16 Ua parau atu ra o ia, Mai teie nei, i te tau i haapaòhia ra, e tamaitihia ta òe. Ua parau mai ra o ia, Eiaha, e ta ù fatu, e te taata o te Atua ra, eiaha na òe e haavare mai i to tävini nei.

Rōma 6.3-11

3 Aita ä òutou i ìte o tätou atoà tei päpetitohia i roto i te Metia ra ia Ietu, ua päpetitohia ia i roto i to na ra pohe? 4 E teie nei, ua tänuhia tätou e o ia atoà, i te päpetito-raa-hia i roto i to na ra pohe; mai te Metia i faatiàhia e te mana o te Metua i te poheraa ra, ia haapaò atoà tätou i te haereà e au i te ora âpï. 5 I âpiti-atoà hia hoì tätou ia na i te huru o to na ra pohe, e âpiti-atoà-hia ia tätou i te huru o to na ra tiàfaahouraa i nià. 6 Ua ìte hoì e ua faatataurohia to tätou taata tahito e o ia atoà hoì, ia paruparu te tino o te ìno, ia òre tätou ia faaroo tävini faahou i te ìno nei. 7 O te taata hoì i pohe ra, ua matara ia o ia i te ìno nei. 8 I pohe na hoì tätou e te Metia atoà, ua ìte hoì tätou e, e ora tätou e o ia atoà hoì. 9 Ua ìte hoì tätou e, o te Metia i faatiàhia i te poheraa ra, e òre ia e pohe faahou, e òre hoì e mana faahou te pohe ia na. 10 O ia hoì i pohe ra, i pohe ia i te hara, hoê roa rä poheraa; o ia rä i ora ra, i ora ia i te Atua. 11 E manaò atoà hoì òutou ia òutou iho, e ua pohe mau i te ìno ra, ia ora rä òutou i te Atua, i to tätou Fatu ra ia Ietu Metia.

Mātaio 10.37-42

Te haapaeraa ia na iho no te pee ia Ietu

(Mär 8.34-35; Rut 14.26-27; 9.23-24)

37 O tei rahi to na hinaaro i ta na metua täne, e aore ia, i ta na metua vahine, iti ia ù, aita o ia i au ia ù, e o tei rahi aè to na hinaaro i te tamaiti, e aore ia, i te tamahine, iti ia ù, aita o ia i au ia ù. 38 E o të òre e rave i to na tätauro a pee mai ai ia ù, aita o ia i au ia ù. 39 O tei ìte i to na ora, e ère ia i te ora; âreà tei ère i to na ora no ù nei, e ìteä ia ia na te ora.

Tei färii mai ia òutou, ua färii mai ia ia ù

(Mär 9.37, 41; Rut 9.48; 10.16; Ioa 13.20)

40 O tei ìte/färii mai ia òutou na, ua ìte/färii ia ia ù, e o tei ìte/färii mai ia ù nei, ua ìte/färii ia i tei tono mai ia ù nei ra. 41 O tei ìte/färii mai i te perofeta, no te mea e perofeta, e noaa ia ia na ta te perofeta ra utuà; e o tei ìte/färii mai i te taata parau tià, no te mea e taata parau tià, e noaa ia na ta te taata parau tià ra utuà. 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Manaò.

Na taiòraa e maha tei haapaòhia no tätou no teie täpati, e piti parau e ärataì ra te tahi manaò ia au i te rahiraa o te mau parau e vai ra e to rätou faufaa. Na parau ra e piti tei haapaòhia mai teie, Te Haapae, e te Färii. Te haapae to tätou ia tuuraa i te hiti i te mau mea atoà e haaäpiäpi te tupuraa o te hoê òhipa e faaìteraa i te maitaì, no te ärairaa i te ìno. Te Färii, te tupuraa ia no te hoê òhipa e faaìte ra i te maitaì. Ia au i te haapotoraa o na taiòraa e maha nei.

-Taramo 89, 7 O vai te mau raì e au i te Fatu, i roto i te mau tamarii a tei mana ra.

-2 Mau Arii 4, 16 E tamaitihia òe, eiaha na òe e haavare mai i to tävini nei.

-Roma 6, 11 E manaò, ia ora òutou i te Atua, i to tätou Fatu ra ia Ietu Metia.

-Mätaio 10, 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Te faaìteraa ia a te Parau Maitaì ia tätou i teie mahana i te päpaìraa a Mätaio i te pene 10 i te mau ìrava 37 e tae i te ìrava 42, oia hoì, Te haapaeraa ia na iho no te pee ia Ietu, ìrava 37 e tae i te ìrava 39, Tei färii mai ia òutou, ua färii mai ia ia ù ìrava 40 e tae i te ìrava 42. Ia au i na parau e piti nei te manaò e ärataì ra mauti ra, ia haapae te taata i ta na, no te färii i ta te Atua Nui Tumu Tahi, oia hoì, na Mua ta te Atua e tià ai, ia oti ta te Atua haapaò atu ai te taata i ta na. Te auraa teie manaò, na te Parau a te Atua e ärataì e faanaho te ôpuaraa faaora o te fenua e to te raì. Ia faaroo tätou te manaò o te päpaì Taramo 7 O vai hoì to te mau raì ra e au i te Fatu. O vai tei au i te Fatu i roto i te mau tamarii a tei mana ra. Ua ineine to te raì i te täuturu i te taata i roto i te mau tamarii o te fenua nei. Ia na reira tätou i te färii te ìteraa i te mau faufaa o te raì, e to te fenua e au tätou i te Atua, e ìte tätou i te höroà i te hoê âuà päpe na te mau taata rii no te mea e pipi o ia na Ietu, e òre roa o ia e ère i te utuà. Te faaìte nei o Ietu i te tumu o to na tere i te ao nei, ia au i teie mau reo, i roto i ta tätou taiòraa no teie mahana. Te haere mai nei O ia i te ao nei ia tupu te parau tià, ia haapaòhia te taata riirii. Ia òre te taata ia faaea noa i roto i te tau no te pö mutu òre, te matara nei te ùputa o te märamarama e te ora. Nä roto ia Ietu, ua riro mai te reira märamarama ei taata, ua hiti mai i roto i te oraraa o te taata e ua faatupu atoà i te mau täuiraa rarahi. Te täuiraa e tupu nei to te taata ia ìteraa i te hinaaro, no te faatae i te mau ôpuaraa i roto i to na ötiraa. I te mea ua toe te òhipa tei òre i tae i nià i to na mau faanahoraa i parau ai o Ietu i te Au, tei Au i to na ùtuafare, to na fëtii, aore ia i Au ia Ù, te manaò o Ietu i ù nei, ua ère teie pupu taata i te haapiiraa a te Atua e ta te fenua, aore rätou e ìte nei i roto i te fenua, e te raì, te aroha e te here o te Atua Nui Tumu Tahi, te Au to te taata ia tüàtiraa i te faufaa o te òhipa e tupu ra tei tae roa i roto i to na âau, e to na värua. No reira te taata, tei roto to na parau i to na rima, e tiàmäraa to na no te färii e no te òreraa e färii i te märamarama o te parau, e tiàmäraa to na no te hinaaro i te märamarama, aore ra te pöuri. Nä roto rä i teie öraa mai te märamarama i roto i te öraraa o te taata, teie te mau täuiraa e ìtehia atu, te feiä i faaèrehia na i te ìte, o rätou të ìte i teie nei ; e te feiä i faariro na i te ìte ei faufaa e hau ai rätou i nià i te taata, o rätou të haapöirihia, a riro atu ai mai te matapö ra te huru. Te mea ta Ietu e parau ra e, tei färii mai ia òutou, O vau ta rätou e färii nei. E parau tià teie e faahitihia nei i roto i teie fäìraa ta Ietu, e parau ia no te utuà. Eiaha rä tätou e rü noa i te faaoti i te auraa o teie parau i nià i te mea ta tätou i mätau. Mai te peu na te märamarama e faataa ra i te pö i te ao i roto i te rahu a te Atua, na te parau tià e utuà mai i teie nei i te taata. No reira, ia parau tätou e, utuà, eiaha tätou e manaò i te huru utuà mai teie ta tätou i mätau i te ìte. Te auraa o teie taò utuà, e mauruüru ta tätou noa ra i mätau i te parau e faahapa, aita o Ietu e faahapa nei tei färii i te mau perofeta, te mauruüru nei ra, te utuàhia nei rätou no te mea ua ìte rätou i te hoê taata rii e pipi na Ietu, tei höroà i te hoê âuà päpe toètoè. No reira, ia au i to te taata färii, aore ra to na färii òre i te parau a te Fatu, te riro ra o ia mai te òraparaa o te âvaè i tanohia i nià i te ànaana o te mahana, aore ra tei òre i tanohia, ua riro te färiiraa ei täpaò no te märamarama ; âreà te òreraa e färii, e täpaò ia no te pöiri. E hape tätou ia faariro i te märamarama ei fäitoraa taata, te vai ra te feiä märamarama, e te vai ra te feiä pöiri. Eere roa atu te reira. Inaha o Ietu te märamarama o teie nei ao, te färiiraa ia Ietu no ta na parau, te mea ia e ìtehia ai te taata i hitihia e te märamarama.

Teie te reo märamarama o Ietu ia tätou i teie mahana, 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Ia ora na.

Teraì òr. Faatura.

Tāpati 21 no Tiunu 2020.

Mataù.

Päpä haamori.

Färiiraa.

Te hinaaro nei teie manaò, e faaìte i to ù täpaò faatura e te haèhaa i mua ia òutou, te faatura no te mau parau ia e faaroohia e tätou i roto i te haamoriraa i ta òutou märamaramaraa, e ta ù märamaramaraa. Te haèhaa no te puai ia o te mau parau e päpä ra te parau no te haamoriraa no teie mahana, na te  Taramo 69 e haamata tei faaìte i te peàpeà o te taata tiàturi Atua tei rehuhia to na faaroo, i ta na tärahu i mua i te Atua Nui Tumu Tahi, te na ò ra e, 1 Na te Mënätehe i nià i te Totanima. Taramo na Tävita. 2 E faaora òe ia ù, e te Atua Nui Tumu Tahi e, te paremo nei au i te pape. 3 Ua tae au i te vari reva, aore roa e tiàraa. Ua tae au i te pape moana roa, e ua roohia vau e te pape puè. 4 Ua pau ta ù aho i te òtoraa, ua marô ta ù àrapoà, ua poopoo ta ù mata i te tiaìraa i ta ù Atua. 5 E iti te iò rouru i to ù nei upoo i te feiä i riri hara òre noa mai ia ù nei. E te mana nei ta ù mau ènemi haavare i tïtau mai ia ù nei ia pohe. E tei ia ù te faahoì i tei òre i ravehia e au ra. 6 E te Atua e, ua ìte òe i to ù nei äoaoa, e ta ù nei mau hapa, aore ia i moè ia òe. 7 E tënä na, eiaha rätou ia haamä no ù, tei hiò atu ia òe, e te ATUA Nui Tumu Tahi e te Manahope, e te Fatu. Eiaha rätou ia roohia e te mäheahea no ù, tei ìmi ia òe, e te Atua Nui Tumu Tahi. 8 No òe mau i faaòromaì ai au i te faaìno, e no òe i püroùhia ai ta ù mata i te haamä. 9 Ua riro vau ei taata ê i ta ù mau taeaè nei, e mai te taata ìteä òre i te mau tamarii a ta ù metua vahine ra. 10 No te mea ua riro roa vau i te itoito i to fare, te faaìno a te feiä i faaìno ia òe ra, ua iri mai ia i nià ia ù. 11 Ia òto vau ra, e ia faahaèhaa i ta ù värua mä te haapae i te mäa, ua faarirohia ia ei faaìnoraa ia ù. 12 E ia àhu vau i te àhu òto ra, ua riro vau ei parauraa na rätou.

E tià mai tätou, haamaitaì tätou i  te hoê reo himene.

Himene

Pure

Pure tätou i te Atua, 13 Te feiä i pärahi i te ùputa ra, tei parau faaìno mai ia ù, e ua faarirohia vau ei peheraa na te mau taèro àva.14 Te pure nei rä vau i ta ù pure ia òe, e te Fatu, i te taime e ìtehia mai ai ra. E faaroo mai òe ia ù, e te Atua, i te aroha rahi no òe ra, i te parau mau o te ora na òe ra.15 E ìriti òe ia ù i te vari nei ia òre au ia paremo; e ia ora hoì au i te feiä i riri mai ia ù nei, ia ora vau i teie nei pape hohonu. 16 Eiaha te pape puè ia tahe nä nià iho ia ù, e eiaha vau ia horomiihia e te moana, eiaha te âpoo ia ôpani i to na vaha ia ù nei. 17 E faaroo mai, e te Fatu, e mea tià roa hoì te hämani maitaì na òe ra. E färiu mai ia ù i te aroha rahi no òe ra. 18 Eiaha e huna i to mata i to tävini nei. Ua roohia vau e te àti, ia peepee òe i te faatià mai ia ù. Âmene.

Pärahi tätou.

Te manaònaò

19 E haafätata mai i ta ù värua ia ora; ia ora hoì au i to ù nei mau ènemi. 20 Ua ìte òe i tei faaìno mai ia ù, ta ù haamä e te vahavaha ia ù nei; te vai noa ra hoì ta ù mau ènemi i mua i to aro. 21 Ua paruparu ta ù âau i te faaìno. Ua àti au i te pohe. I ìmi hoì au i tei aroha mai, e aore roa. E të haamähanahana mai, e aore roa i ìteä e au. 22 Ua hopoi mai rätou i te âuà àvaava ei mäa na ù, e ta ù poìhäraa ra, ua hopoi mai i te vineta e inu. 23 E riro ta rätou àmuraa mäa ra ei märei no rätou, e to rätou maitaìraa ei ùpeà. 24 E mohimohi to rätou mata e òre e tià ia hiò. E roohia i te rürü tämau to rätou tauupu. 25 Ninii mai i to riri tähoo ra i nià ia rätou, e ia roohia-noa-hia mai rätou e to riri rahi ra. 26 E riro to rätou mau fare i te ano, e aore roa e taatahia to rätou mau tiàhapa, 27 te hämani ìno nei rätou i tei täìrihia e òe ra, e te faarahi nei i to na òto to tei paruparu ia òe ra 28 E tuu noa òe ia âpiti noa te hara i ta rätou ra hara, e eiaha roa rätou ia tiàhia mai e òe ra. 29 Ia päraihia to rätou iòa i te parau o te feiä e ora nei, e eiaha ia päpaìhia i roto i te feiä parau tià ra. 30 Âreà vau nei, haèhaa noa ai e te pohe hoì, na te ora na òe, e ta ù Atua, e hopoi ia ù i nià.

Tätarahapa.

I mua i teie mau parau te ìte nei tätou e, e mau taata tätou tei rehuhia e te tärahu, e tei faahapahia e te hara, 31 E haamaitaì au i te iòa o te Atua i te himene, e faarahi au ia na i te haamaitaì. 32 E mea au rahi to te reira i te Fatu, i to te puaatoro oni-âpï-tara-hia ra, e tei maiùuhia ra. 33 E ìte tei àti ra i te reira mä te òaòa. E to rätou âau, to tei ìmi i te Atua ra, e faaànaànaeahia mai ia. 34 E faaroo mai hoì te Fatu i te feiä haèhaa ra, e aore hoì e vahavaha i to na taata täpeàhia ra. 35 Na te mau raì e na te fenua e haamaitaì ia na, te moana e te mau mea atoà e tere haere i reira. 36 E faaora hoì te Atua ia Mäòhi Nui, e na na e patu faahou i te mau ôire o te Mäòhi. E pärahi faahou hoì rätou i reira ia riro ia rätou. 37 E riro ia i te huaai o to na ra mau tävini, e te feiä i hinaaro i to na ra iòa te pärahi i reira. Âmene.

Himene tätarahapa.

Teie te reo o Ieremia, Ieremia i te pene 20 i te mau ìrava 10 e tae i te ìrava 13 10 Ua faaroo hoì au i te vavi-noa-raa o te taata atoà e rave rahi, e parau haamataùtaù e àti noa aè. Te nä ô mai ra rätou e parau na òutou e nä mätou e parau atoà atu: te tiaì anaè mai ra ta ù mau hoa atoà ra ia ù i te faaearaa; te nä ô ra rätou, peneiaè o ia o te täpae ê noa i te haavare, a noaa atu ai o ia ia tätou, a tähoo atu ai tätou ia na, teie rä, e pärahi fätata noa o ia ia rätou 11 Tei ia ù rä te Fatu, ei àito riàriàhia ia; e riro te mau hämani ìno ia ù ra i te turori, e òre roa hoì ta rätou e tupu; ua haamä roa rätou, no te mea aore to rätou hinaaro i tupu; ei haamä vaiiho-tämau-hia e te mure òre to rätou, eita e moè ra.12 E te Fatu manahope ra, tei tämata i te feiä parau tià o òe ra.13 E himene òutou i te Fatu, e haamaitaì òutou i te Fatu, no te mea ua faaora o ia i te rima o te feiä hämani ìno ra, i te värua o te taata haèhaa ra.

No te maitaì o teie mau parau, e tià mai tätou no te faaìte i to tätou òaòa i te Atua Nui Tumu Tahi.

Himene òaòa.

Na te èpitetore a Pauro i to Roma i te pene 5 i te mau ìrava 12 e tae i te ìrava 15 e ärataì ia tätou i roto i te Aroha e te Here o te Metia mai ia Àtamu e tae mai i te Metia. 12 E teie nei, no te taata hoê ra i ö mai ai te ìno i te ao nei, e no te ìno hoì te pohe; e ua taeà-atoà-hia te taata atoà e te pohe i te mea ua hara päatoà. 13 I vai na hoì te hara i te ao nei e tae roa aè nei i te ture nei; e òre rä te hara e haapaòhia i te ture òre. 14 I mana na rä te pohe mai ia Àtamu mai ä e tae roa aè nei ia Möte, e i te feiä atoà aore i rave i te hara mai te hara a Àtamu ra, e hohoà o ia no të tae mai. 15 Eita rä tei horoà-noa-hia mai e au i taua hara ra. E rave rahi tei pohe i te hara a te taata hoê ra, e rahi atu hoì te aroha o te Atua, e tei horoàhia mai e taua aroha ra, i te tae i te taata e rave rahi, ia Ietu Metia i te taata hoê ra.

Pärahi tätou, haamaitaì tätou i te Atua i te himene.

Himene.

Pure  no te taiòraa

E te Atua Nui Tumu Tahi, ua ineine mätou i te faaroo i te Parau Maitaì o ta òe Tämaïti i päpaìhia e Mätaio i te pene 10 i te mau ìrava 26 e tae i te ìrava 33, a parau riirii mai na òe i roto i to mätou âpoo tarià ra, o ta mätou ia e parau hua i nià iho i to mätou mau taeaè, mau tuahine tei pärahi moèmoè noa ia mätou. Âmene.

Ta tätou taiòraa no teie mahana ia au i te Parau Maitaì päpaìhia e Mätaio i te pene 10 i te mau ìrava 26 e tae i te ìrava 33 te naò nei te tumu o te taiòraa, Eiaha e mataù.

(Mär 8.38; Rut 9.26; 12.2-9)

26 Eiaha òutou e mataù i te taata. Aore roa hoì e mea täpoìhia/hunahia e toe i te faaìtehia; aore roa e mea moè e toe i te ìteä. 27 Ta ù e parau atu ia òutou i roto i te pöuri nei, o ta òutou ia e faaìte hua i te märamarama; e tei parau riiriihia i roto i to òutou tarià ra, o ta òutou ia e parau hua i nià iho i te mau fare. 28 Eiaha e mataù i tei täparahi mai i te tino nei, eita rä e tià ia rätou ia täparahi i te värua; e mataù rä òutou ia na i të tià ia na ia rave pohe roa i te tino e te värua atoà i tehena/i roto i te auahi pohe òre. 29 Eere änei taìpiti manu rii ia hoo i te moni veo/raera hoê nei? E òre rä te hoê e maìri i raro i te repo mä te tià-òre-hia e to òutou Metua. 30 No òutou, ua hope atoà rä te rouru o to òutou upoo i te taiòhia. 31 Eiaha mäori òutou e mataù, ua hau aè òutou i te rahiraa o te mau manu rii 32 E teie nei, o tei fäì ia ù i mua i te aro o te taata nei, e fäì atoà vau, e no ù o ia, i mua i te aro o ta ù Metua i te raì ra. 33 O tei huna rä ia ù i mua i te aro o te taata nei, e huna atoà vau ia na i mua i te aro o ta ù Metua i te raì ra.

Pure.

Pure tätou i te Atua nui Tumu Tahi, ua parau riirii mai Ò e i roto i to mätou mau âpoo  tärià, no te mea pütarià mätou no ta Òe ôpuaraa faaora. Âmene.

Haamaitaì tätou i te Atua i te Himene.

Himene.

Manaò.

Tei roto noa ä tätou i te rupehu no teie maì viivii piri fee e àtuàtu noa nei i roto i to tätou fenua ia Mäòhi Nui, ua haapitaataa te oraraa vaamataèinaa o te mau ùtuafare e te mau faanahoraa ua fänau te mataù i roto i te âau o te taata tätaìtahi, ua tupu mai te tahi mau faanahoraa tei òre i matauhia e tätou, o te raveà ia no teie mau taime èi pärururaa ia tätou i to te taata hoê haapaòraa i ta na iho hopoià i mua i teie maì e haaviivii nei i te taata. Oia hoì te haafaufaahia nei te parau o te Taata hoê, to na ìte, to na märamarama, to na paari, i te mea ua rahi aè o ia i te mau manu rii. Te päpä ia o ta tätou haamoriraa no teie mahana, tei päpähia i nià i na taiòraa e maha no teie täpati 21 no te märama no Tiunu 2020. A faaroo mai na ra te tahi haapotoraa no ta tätou mau taiòraa.

-Taramo 69, 35 Na te raì, na te fenua e haamaitaì ia na, te moana e te mau ora atoà.

-Ieremia 20, 13 E himene, haamaitaì i te Fatu ua faaora o ia i te taata haèhaa ra.

-Roma 5, 15 E rave rahi tei pohe i te hara, e rahi atu hoì te aroha o te Atua i te taata.

-Mätaio 10, 31 Eiaha mäori òutou e mataù, ua hau aè òutou i te rahiraa o te mau manu rii.

E rave rahi mau parau faufaa e vai nei ia au i teie mau taiòraa, ta te manaò ra i täpeà mai teie ia reo to Ietu e parau nei e, 31 Eiaha mäori òutou e mataù, ua hau aè òutou i te rahiraa o te mau manu rii.

Ei hiòraa âmui.

Te  tahi  tumu parau e tià ia riro  ei hiò âmuiraa no  na taiòraa e maha nei mauti ra ia teie reo no Ietu i roto i te Parau Maitaì päpaìhia e Mataio i te pene 10 i te mau ìrava 31 Eiaha mäori òutou e mataù, ua hau aè òutou i te rahiraa o te mau manu rii. Ua taìpiti au i te faahitiraa atu i te tumu o te parau tei manaòhia mai, no te faufaa te parau o te Taata i mua i te mataù e to na faarahi-raa-hia i  mua i te mau manu. O te òhipa ia i tupu i roto i na taiòraa e maha, to te nunaa mataùraa i te pohe e fatata nei ia rätou. Teie huru no te nunaa ua vai ia rätou i roto i te tiàturi òre i te mau òhipa ta te Atua Nui Tumu Tahi e rave no rätou. I roto i to rätou  mataù ua faanaho te Atua i te hoê  òhipa  naeà-òre-hia  e to rätou mau  märamarama. I to te Atua vahiraa i te miti ùteùte i riro mai nei ei èà no te faaora i to na nunaa i te pohe e fatata mai ra ia rätou. Area ra no te nuu o Faraò riro  iho nei ra ei  menema no rätou. Eita ra te Atua e faaea i reira e faaite-ä O ia i to na puai no roto i te Parau tei riro mai te hoê ahi ra te huru te àmaraa i roto i te âau o te taata. Ei faaìteraa i te mana te òhipa ta na e faatupu ra na roto i to na Aroha tei tïtau i te taata ia ora i ta na e faatupu nei. Ia au i teie mau poroìraa  aita te Atua e haamataù  mai nei ia tätou, te faaìte mai nei ra e, e Atua hinaaro rahi O ia e tauturu i te taata  tei tiàturi i ta na i faaoraraa.

Ei manaò tatara.

Te reo o Ietu i roto  i ta tätou taiòraa nei tei te ìrava   31 Eiaha mäori òutou e mataù, ua hau aè òutou i te rahiraa o te mau manu rii. E toru taime to Ietu faahitiraa teie parau i roto i ta tätou taiòraa, i te ìrava 26, 28, e te ìrava 31. E täpaò faaite te reira i te faufaa no te òhipa ta Ietu e hinaaro nei e faaìte i ta na mau pipi e tae noa atu i te mau taata e faaroo nei ia na. Te hinaaro nei  o Ietu ia noaa i ta na mau pipi i te hoê puai taaê, ia tià ia rätou ia na nià aè i to rätou mau mataù. I te mea na te reira e faaitoito ia rätou i te haaparareraa i te parau tià  no te patireia o te Atua i te mau vahi atoà tei reira te oraraa te taata. Tei teie  vahi  atoà  te mau ènemi  o te Atua i te rahiraa, o rätou  teie e ìmi nei i te tapoìraa  i te mau maitaì a te Atua, tei faaea noa i roto i te faatîtîraa o te pöuri, ma te pärahi  tämau i raro i te rehu no te tärahu, e te pärahi tämauraa atoà i raro aè i te mato o te hara. O rätou ta Ietu e parau  nei  i roto i ta tätou nei taiòraa, e tae atoà rätou i te hämani ìno i ta na mau pipi, ma te täparahi  haapohe roa ia rätou. Teie ra e tià ia rätou  ia täparahi i te tino areà te Varua  eita e tià ia rätou ia haamou  i te reira, o te Atua te fatu i teie faufaa. E tia i te taata ia haamou i teie ora, i nià ra i te parau no te ORA MURE ORE, aita ia to te taata mana i reira no te tinai, no te mea o te Atua Nui Tumu Tahi anaè te mana ra i nià iho.

Te parau ta Ietu e parau nei e, Eiaha mäori òutou e mataù, no na iho teie parau ta na e faahiti nei, e tupu teie parau na na i roto i te ô no Tetemane, ua mataù o Ietu i te âuà e fatata  mai ra ia na, i to na ìteraa eita e tià ia na ia àpe, parau atu ra e ta ù Metua ia tià to oè hinaaro, inu iho ra  o Ietu i taua âuà  maramara ra. E i nià i te tätauro tuu atu ra O ia i to na Varua i te Atua. To na auraa teie òhipa i tupu ua upootià tei hämani-ìno-hia, ua fifi ra tei hämani ìno. Ua mau ia rätou i te täpeà te tino o Ietu i nià i te tätauro, areà ra te Varua  aita roa ia. Tei  teie  vahi tätou e ìte ai te puai o Ietu, oia hoì, eita  na te mataù e faaapiapi  i te mau òhipa ta na e faatupu nei, e, e faaite nei.

Ia faaroo  anaè  tätou  i te mau  manaò  o Ietu, aita  ia e haaparuparu  nei  i te mau pipi i te raveraa i te  òhipa a te Atua. Te parau nei o Ietu e, eiaha  e mataù i te taata, te mau òhipa e täpoìhia e faaìtehia ia, te mau parau e faahitihia i te vahi pöuri, e haapurorohia ia i te vahi märamarama. E te mau parau e topa i roto i te hohonuraa o te tarià, ia poro haerehia ia te reira i te vahi maitaì o te âau o te taata. Eiaha  e mataù  e mea faufaa aè te taata i te  manu rii e hoohia hoê moni veo, e ua taio-atoà-hia to òutou ìo rouru, tei upoo rouru òre èita ia te Atua e òhipa rahi ia taiò. Te haapäpü  nei teie parau te huru  no to te Atua haapaòraa i te taata  ia au i ta na faanahoraa. No reira  eita e tià i te mau pipi ia mataù i te faaìteraa i te mau hinaaro o te Atua, i te mea e Atua  hinaaro rahi teie i te ora o te mau taata atoà. To na maitaì eita e tià i te taiò, e ao ra to te feia i haapaò i te parau a te Atua tei tämau maite i te parau tià, eita e faaea. Te parau a te Atua ia vai i roto i te âau o te tävini, e riro ia mai te hoê àveià, tei turaì i te tiàturiraa i nià i te tumu mau no te ora.

O ta Ietu ia e parau nei e eiaha e mataù, oia hoì  eiaha e mataù i te ora a te Atua teie ora, to na utuà e ORA MURE ORE. Te ora ra aita i niuhia i nià i te Atua, to na utuà ra te pohe mure ore ia. No  reira eita ia e tià  i te mau tävini  ia mataù, i te mau faaìnoraa e faanahohia no rätou, ia  tià  ra ia rätou ia faaìte i te puai o te Atua ia farerei rätou i teie mau òhipa. Ia  haamanaò ia rätou  e o te Fatu iho teie e na reira-hia-ra, to na ia reo i  nià i ta na mau pipi ia au i te faaìteraa a Mataio i te 5 i te ìrava 11, i te naòraa e, e ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau ìno atoà, no ù. E manaò faaitoito teie no Ietu i to na mau tävini, ma te ìte atoà  e tupu teie mau òhipa i nià ia rätou. I muri aè i to Ietu revaraa i nià i te raì, e i muri aè i te mahana penetetöte, e i te taime te mau âpotetoro a tere ai, i to rätou mau tere veà tono ua färerei rätou, i teie mau fifi, e te vai nei tei pohe roa i te täparahihia i te iòa o Ietu. Na te mau òhipa tià ore i tupu i nià  i te mau âpotetoro, i horoà faahou i te puai i te mau taata tei päpetitohia ia täpeà tämau i to rätou tiàturiraa i te Metia  tei mana i nià i te pohe. Eita i te mea òhie te parau no te haamoriraa i te tau no te mau âpotetoro, ta vëtahi i roto i te ana pure ai e aore ra i roto i te mau menema ia òre rätou ia noaahia i te mau ènemi o te Atua.

Te tumu ia o Ietu i parau ai e Eiaha mäori òutou e mataù, ia tià ra i te mau taata faaroo atoà ia fäì i to rätou faaroo i mua i te Atua. I te mea, eita  e tià ia hunahia te faaroo parau tià e mahuti-iho ra te reira i te mau vahi atoà. Na teie mau òhipa e faaite te upootiàraa te Atua i roto i ta tätou fäìraa parau e to tätou manuiaraa, to te Atua ia òaòaraa. Eiaha e mataù, to na auraa, eiaha tätou ia àueue i mua i te mau òhipa tià ore e âua haaàti  nei  ia tätou. Ia päpü  mai te ra i te faaìteraa i te faaroo  i mua i teie mau òhipa, e tià e faaturori  te mau manaò. Te aniraa ia ta Ietu e faaitoito nei i ta na mau pipi, e tae noa atu i te mau taata i faaroo i teie mau parau. Te faaroo teie  ta Ietu e faaitoito nei ia  òre ia mau i roto i te here pata no te paruparu, e te hupehupe, noa atu e tupu te mau faahaparaa e te mau hämani-ìno-raa. E tià ra i te faaroo ia faaòre te reira mau faaìteraa tià òre. Ia òre anaè e tupu mai teie te huru, e täpaò faaìte e, aita te parau no te èvaneria ia aahia i roto i te âau. Ua topa ia te huero o te èvaneria i nià i te èà tià taataahihia  iho ra e te àvae taata, e haere mai ra te mau manu o te reva àmu iho ra, e aita aè ra i tupu. Topa iho ra vëtahi i nià i te mau mato, paapaa aè ra i te mahana pohe atu ra, e ta tahi mau huero rii topa iho ra i roto i te mau àihere hoène noa iho ra to na tupuraa, âreà ra te tahi mau huero topa iho ra i nià i te repo maitaì, to rätou tupu, e te hotu ua horoà i te mau maa nehenehe mau. O te hohoà mau teie ta Ietu e faahiti nei i roto i ta tatou nei taiòraa. E färerei te mau taata faaroo i te mau fifi rau, eita ra na te reira e haamataù ia rätou i te fäìraa i to rätou faaroo i mua i te taata e te Atua. Eihea taata tei ère e aore ra tei paruparu to rätou faaroo i teie mahana, i te mea aita rätou e fäì faahou nei i to rätou faaroo. Te fäìraa faaroo, o to te taata ia haapäpüraa i to na tiàturiraa i mua i te mau hinaaro o te Atua. Ma te heheu i te hohonuraa o to na âau i te parau tià tei faatià faahou ia na i te itoito ta te Atua i faataa no na. Ei haapotoraa i te parau mau  a te Atua e horoà nei i te mau taata atoà, o ta te mau teretetiano ia e faaìte nei e tae roa mai i teie nei mahana. Na te täpaò o te fäìraa faaroo e faataaê i te taata paieti i te paieti òre. Te manaò tumu ia ta Ietu e parau nei e, eiaha e mataù, aita o Ioane Päpetito i mataù i te fäìraa i to na faaroo i te naòraa e, e ere au te Metia, à hiò na i te àrenio a te Atua tei hopoi ê atu i te hara a to  ao, Ioane pene 1 ìrava 20 e te ìrava 29. Mai ia Aneterea ua ìteä ia maua te Metia Ioane pene 1 ìrava 40 e te ìrava 41; Mai ia Natanaera e Rapi, o te Tämaïti òe a te Atua, o te Arii o oe no Ìteraèra Ioane pene 1 i te ìrava 49; Mai ia Toma e ta ù Fatu, e ta ù Atua Ioane pene 20 i te ìrava 28; Mai ia Petero, o te Metia òe, te Tämaïti  a te Atua ora ra Mataio pene 16 i te ìrava 16.O te òhipa ia e tià e rave i teie mahana  ia fäì te mau taata atoà e, o Ietu Metia te Fatu, e hanahana ai te Atua Metua ra.

E na roto i to tätou fäìraa i to tätou faaroo Mäòhi mau, e riro ai tätou ei hoa rave òhipa na Ietu, no ta na mau raveà perofeta. Ua noaa hoì i to tätou Fatu taua toroà ra, no te haamäramarama i te feia atoà e tiàturi nei, i te ìte mauraa i te Metua, no te haapii ia tätou i teie mahana, i te parau mau, e no te faariro ia tätou, ei mau  tävini haapaò maitaì no te Atua, e ia Fäì i te faaroo i te Faaora ta na i horoà mai. Te faufaahia nei tätou na roto i teie reo no Ietu eiaha e mataù, no te mea te faaära nei O ia ia tatou ma te Arai i te mau fifi atoà e tupu. Na te Metia hoi i faaìte ia tätou i te Atua, to na Metua, tei riro ei Metua atoà no tätou. Na roto ia Ietu, e tae ai tätou i pïhaìiho i te Metua, no te faaìte ia tätou i mua i to na aro, no te pupu ia tätou e te mau mea atoà na tätou, ei tutia no te haamaitaì i te Atua. I tià atoà ai ia tätou ia pure i te Atua no to tätou mau taeaè. Te riro  nei tätou  i reira, èi hoa no te faaìteraa i to te Atua mau hinaaro i to tätou mau taeaè atoà. Ta te Hepera ia e faaite nei i te pene 9 i te ìrava 24, e te pene 10 i te ìrava 10 e te ìrava 14 i te naòraa e, aita ae nei hoi te Metia i tomo i roto i na vahi moà i hämanihia e te rima ra, i te hohoà no te vahi moà mau ra, tei te raì mau ra O ia ia faaìte Ia na iho i mua i te aro o te Atua no tätou i teie nei. No taua hinaaro ra i moà ai tätou nei, i te pupuraa hoê i te tino o Ietu Metia ra. Ua maitaì roa hoì e a muri noa atu te feiä  haamoàhia e ana ra.

Te faatiàma nei O ia i to tätou ture âau, e te horoà nei ia tätou i te mau taoà värua  a te Metia, ia tià ia tätou ia ora mai teie atu nei, i roto i te mataù òre. Te horoà nei ia tätou i te mana no te haavïraa i te mau òhipa tià òre e hara ai tatou nei, i te hinaaro o te tino e no teie nei ao tei riro ei mau ènemi no to tatou mau värua hema haere noa. Te haapäpü nei O ia ia tätou, e mana tätou e te Metia atoà i nià i te mau mea atoà i hämanihia. Te riro nei tätou na roto i taua òhipa ra, èi mau tävini no te Hau Arii, na roto i te âpitiraa atu tätou i te Metia. Ia mau päpü ia tätou i te tiàma ta te Metia i faatiàma ia tätou e òre ia e tià ia tätou ia mataù. O te raveà hoê roa ia no te fäìraa i te faaroo i mua i te Atua Metua i te raì ra.  Ia ora na.

Haamaitaì tätou i te Atua i te hoê reo himene.

Himene.

Parau faaära

Püpüraa moni.

Pure ärai.

E te Atua Nui Tumu Tahi e, te Tumu o te raì e te fenua, te Tumu o to mätou mäòhiraa, mai te raì nei, e teitei rahi to na i to te fenua, to mätou atoà ia ätearaa ia òe e i te fenua ta òe i horoà i te mana no te haapii ia mätou i te ora, e no te arataì ia mätou ia òe ra, ia riro òe ei Atua no mätou, e o mätou te nünaa ta òe e arataì. I mua i te reo o Ietu e parau ra e : Tei faaroo i te Tamaiti ra, e ora mure òre to na ; tei òre i faaroo i te Tamaiti ra, ua ère ia i te ora, e tei nià te riri o te Atua ia na. Te faahaèhaa nei mätou i mua i to òe Teitei, to òe Tura, e to òe Hanahana, no te mea te ìte nei mätou ia òe, ua hara mätou ia òe, o mätou i òre i faatupu i to òe hinaaro, ua faariro rä i ta òe òhipa ei vähi e maitaì ai mätou i nià i to mätou hinaaro taata, o mätou hoì i ruri ê i to òe hanahana ei hanahana no mätou, e aore i haamanaò e, o òe te Atua, e o mätou te tävini, no te mea no òe te Hau, e te Metua, e te Hanahana e a muri noa atu. Âmene.

Pure a te Fatu.

E to mätou Metua i te raì tua tinitini

Ia faateiteihia to òe iòa moà

Ia tae mai to òe hau

Ia haapaòhia to òe hinaaro i te fenua nei, mai tei te raì atoà na

Ho mai i te mäa na mätou i teie mahana

Faaòre mai i ta mätou tärahu,

mai ia mätou e faaòre nei i ta rätou i tärahu ia mätou nei

Eiaha e faaruè ia mätou ia fati i mua i te ènemi,

Faaora rä ia mätou i te ìno

No òe te hau, te mana, e te hanahana

E a tau e a hiti noa atu, amene.

Faaitoitoraa.

Eiaha mäori òutou e mataù, ua hau aè òutou i te rahiraa o te mau manu rii.

Haamaitaìraa.

E rave rahi tei pohe i te hara, e rahi atu hoì te aroha o te Atua i te taata. Âmene.

Teraì òr. Faatura.

Faaitoito i te òhipa.

Ioane 6, 51-58 Maa

Tāpati 14 no Tiunu 2020.

Maa

Taramo 147

1 E haamaitaì i te Fatu, E mea maitaì te himene ei haamaitaì i to tätou Atua, e mea pöpou ia, e au hoì te haamaitaì ra. 2 O te Fatu te patu faahou ia Ierutarëma, e na na e haaputuputu i to Ìteraèra i purara ê ra. 3 Ua räpaau o ia i te feiä âau paruparu ra, e ua täamu i to rätou mau puta. 4 Ua hope te mau fetià i te taiòhia e ana,

e na na i maìri i to rätou iòa. 5 E rahi to tätou Fatu, e te mana rahi, e to na ìte e mea ìteä òre ia ìmi. 6 Te tauturu nei te Fatu i tei haèhaa ra, te huri nei rä i te paieti-òre i raro i te repo. 7 E himene mä te haamaitaì i te Fatu. E himene mä te tïnura i to tätou Atua. 8 O tei täpoì i te raì i te mau ata ra, o tei haapaò i te ua no te fenua, o tei faatupu i te räau rii i nià i te mau mouà: 9 te faaàmu nei o ia i te mau puaatoro i te mäa, e ta te ôrepa âpï e tiàoro atu ia na ra. 10 E òre o ia e pöpou i te itoito o te puaahorofenua ra, e òre o ia e mauruüru i te âvae o te taata ra.11 E au rä te Fatu i te feiä e mataù ia na ra, i te feiä i tiàturi i to na aroha. 12 E haamaitaì i te Fatu, e Ierutarëma; e haamaitaì i to Atua, e Tiona. 13 O ia tei faaètaèta i te mau teà o to òe ra mau ùputa, e ua haamaitaì i to mau tamarii ra i roto ia òe.14 Na na i faatupu i te hau i to òe ra mau ôtià, e ua paìa òe ia na i te tïtona maitaì rahi.15 Ua häpono o ia i ta na parau i te fenua nei, te horo ètaèta nei ta na i faaue. 16 Ua horoà mai o ia i te hiona mai te huruhuru mämoe ra, e te haapurara nei i te hau-paari mai te rehu auahi ra. 17 Ua tuu mai o ia i ta na vai-paari mai te mea òtiòtihia ra: o vai te taata e mau i te toètoè na na? 18 Ua tuu mai o ia i ta na parau, e ua tärapape iho ra ia; ua haafarara mai ra o ia i te mataì, ua tahe iho ra te pape. 19 Ua faaìte o ia i ta na parau ia Iatöpa, i ta na mau ture e ta na mau faaauraa parau, ia Ìteraèra. 20 Aore o ia i nä reira i te mau fenua atoà, e ta na ra mau faaauraa parau, aita ia rätou i ìte. Hareruia.

Teuteronomi 8.1-16

1 E haapaò maitaì òutou, e e rave i te mau parau atoà ta ù e parau atu ia òe i teie nei mahana; ia ora hoì òutou, e ia rahi òutou, e ia tae òutou e ia noaa te fenua ta te Fatu i tapu atu i to òutou mau metua ra. 2 e haamanaò hoì òe i taua èà atoà ta to Atua ta te Fatu i arataì ia òe nä roto i te mëtëpara ra, e a maha aè nei àhururaa i te mätahiti, ei faahaèhaaraa ia òe, e ei tämataraa ia òe, e ia ìteä i to roto i to roto i to òe na âau; e to òe haapaòraa i ta na ra parau, e te òreraa. 3 E ua faahaèhaa hoì o ia ia òe, ua vaiiho noa ia òe ia poìa noa na, ia faaàmu o ia ia òe i te mäna ìteä òre ia òe ra, e aita atoà to mau metua i ìte; ei faaìte ia òe eere o te päne anaè ra te mea e ora ai te taata nei, o te mau mea atoà rä i haapaòhia e te Fatu ra, e ora te taata i te reira. 4 Aita hoì to àhu i nià ia òe ra i marau; aore hoì to âvae i ère i te tämaa òre, i teie nei mau mätahiti e a maha aè nei àhururaa; 5 ia ìte mäite hoì òe i roto i to âau na, e mai te taata e aò nei i ta na tämaïti, ua nä reira to Atua ra o te Fatu i te aò ia òe ra. 6 E teie nei, e haapaò òe i te mau parau a to Atua ra a te Fatu, ia na to na ra èà te haere, e ia mataù hoì òe ia na.7 Ia tae òe i to Atua ra i te Fatu i te fenua maitaì ra; i te fenua pape tahe, e te pape pihaa, e te pape roto ra no uta i te peho, e no roto i te mouà i te pihaaraa mai: 8 i te fenua tïtona, e te tërite, e te vine, e te tute, e te rëmuna; i te fenua hinu ôrive, e te meri; 9 i te fenua àmu noa ai òe i te mäa mä te oè òre, e aore e mea e toe ia òe; i te fenua e âuri te ôfaì ra, e e noaa ia òe te veo i to na mouà ia ô: 10 ia àmu òe i te mäa ra e ia fiu e haamaitaì òe i to Atua ra i te Fatu i reira, i taua fenua maitaì ra tä na i höroà mai no òe ra. 11 E ara o te möina to Atua ra o te Fatu ia òe, i te haapaò òre i ta na ra mau parau, e ta na mau ture, e ta na mau haapaòraa, i ta ù e faaìte atu ia òe i teie nei mahana; 12 o te àmu hoì òe i te mäa e fiu iho ra, e ua faatià i te fare maitataì e ua pärahi i roto: 13 e ia rahi hoì to mau puaatoro e to mau mämoe; e rahi hoì ta òe ârio e ta òe àuro, e ia rahi hoì to mau taoà atoà ra; 14 o te teitei hoì to âau na, moè iho ra to Atua ra o te Fatu, o tei arataì mai ia òe mai Àifiti mai, mai te ùtuafare i tävini ai ra; 15 o tei arataì ia òe nä roto i taua mëtëpara rahi mataù ra, tei reira te ôfï veàveà ra, e te pata; o tei hopoi mai i te pape na òe i te vähi päpämarô ra, no roto i te ôfaì àrä ra; 16 o tei faaàmu ia òe i te mëtëpara i te mäna ra, aore i ìteä e to mau metua ra, ei faahaèhaa ia òe, ei tämataraa ia òe, ia maitaì òe ia na a muri atu;

1 Torinetia 10.16-17

16 Te âuà no te maitaì ta tätou e haamaitaì nei, eere änei i te âmui-atoà-raa i te toto o te Metia ra? Te päne ta tätou e ôfene nei, eere änei i te âmuiraa i te tino o te Metia ra? 17 No te mea hoê ä päne, tätou atoà e rave rahi nei hoê ä ia tino; te àmu atoà nei hoì tätou i taua päne hoê ra.

 Ioane 6.51-58

51 O vau te päne ora o tei pou mai, mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao. 52 Ua märô anaè iho ra te âti-Iüta rätou rätou iho, ua nä ô aè ra: E aha teie taata e tià ai ia horoà mai i to na tino e àmu? 53 Ua parau mai ra Ietu ia rätou: Âmene, âmene, e parau atu vau ia òutou: ia òre òutou ia àmu i te tino o te Tamaiti a te taata nei, e ia òre hoì ia inu i to na toto, aore ia e ora i roto ia òutou. 54 O të àmu i to ù tino e të inu i to ù toto, e ora-mure-òre to na, e na ù o ia e faatiàfaahou ia tae i te mahana hopeà ra. 55 E mäa mau to ù tino e e inu mau to ù toto. 56 O të àmu i to ù tino e të inu i to ù toto, e tià ia i te àtiraa mai ia ù, e e tià hoì au i te àtiraa atu ia na. 57 Mai te Metua hoì e ora ra, o tei tono mai ia ù nei ra, e te ora nei hoì au i te Metua; oia atoà të àmu ia ù nei, e ora ia ia ù. 58 O te päne teie no te raì mai: eere mai te mäna i àmuhia e to òutou hui-metua ra, pohe atu ra hoì rätou. O të àmu i teie päne, e tià ia i te ora-mure-òre ra.

Manaò

Te höroà nei te Atua Nui Tumu Tahi, i te taata i te ìteraa i te mau faufaa o ta Na i faatupu i roto i te rähu, te reva, e te mau vai e faahaumäru nei i te fenua. Te tuu nei te Atua teie mau maitaì ia faanaò te taatoàraa te mau taata ma te maìti òre i to na huru, to na ù, to na reo e te vahi no reira mai rätou, i roto i tera manaò e ìte tämau te taata te nehenehe o te mau tiare, te mau tumu ùru, te mau taro, e mau maa teie no roto i to tätou fenua o Mäòhi Nui, e te vai atu ra. E ia faaroo tätou te haapotoraa o na taiòraa e maha no teie mahana te naò ra.

-Taramo 147, 14 Na na i faatupu i te hau, e ua paìa ia na i te tïtona maitaì rahi.

-Teuteronomi 8, 16 Tei faaàmu i te mäna, Tei faahaèhaa, ei tämataraa, ia maitaì e muri atu.

-I Torinetia 10, 16 Te âuà, Te päne e ôfenehia, te âmuiraa i te tino o te Metia.

-Ioane 6, 58 O të àmu i teie päne, e tià ia i te ora-mure-òre.

Ta tätou parau no teie mahana haamoriraa i te Atua, tei roto roa ia i te päpä no te taime matamua, i to  Ietu haamataraa e haamau  i te  oroà  no te haamaitaìraa ia noaa te ora mure òre i te feiä  tei päpü, e tei èore i àueue te faaroo. Ua matau-noa-hia  i te parau i teie mahana te  ÔROÀ EUFARI, E AORE RA TE ÔROÀ  A TE FATU. E tià ia parauhia  e maha taime to Ietu  haapäpüraa teie manaò to na i roto i teie pene parau ma te ìrava 1 e tae i te irava71. Ma te haapäpü e O VAU TE PANE ORA, e faaroohia teie mau manaò to na i te mau ìrava 35,41,48, e ta tätou ìrava 51.E tapaò faaìte te reira te faufaa no te parau ta na e hinaaro nei  ia marämarama te mau taata atoà e faaroo ra  ia na i taua mahana ra.

Teie mau taata e faaroo nei ia na, o ta na ia i  faaàmu temeio i  na pane  e 5 e i na ïà  e piti, ia au i te faaìteraa a Ioane, e 5000 rahiraa rätou. O tei àmu i taua maa ra, e ua paia paatoà. Ua toe  mai 12 ète  huàhuà rii maa. Ua täpapa rätou ia Ietu i te poìpoì aè, no to  rätou  ä hinaaro ia tämau noa o Ietu i te faaamu ia rätou i te maa i te mahana tätaì tahi. E te ìte päpü nei hoì rätou e, teie te taata o te faaòre i to rätou poia e to rätou hepohepo no te parau  no te maa.

No te mea te parau no te maa i taua anotau ra, e parau fifi ia. E te vai noa ra hoì taua fifi ra no te maa e tae roa mai i teie anotau i to tätou. Te vai ra te pohe mau ra i te poia, te vai atoà nei ra  te pohe ra ia àmu rahi. Te vai ra te pohe nei i te poia no te raveà òre, te vai atoà nei reira te pohe nei, i te rahi te mau raveà.

Tei marämarama rä i teie reo no Ietu O vau te Pane mau, te àti nei ia te reira i nià i te  tïtauraa a te Atua no te ora mure òre. Areà ra no te tahi pae ra te tupu  nei ia te maroraa, e te marämarama òre i ta Ietu e parau nei, te tupu nei te òhomuraa a te mau âti-Iuta. I roto i to rätou manaòraa o Ietu e tamaiti noa ia na Iotefa e o Maria. I ù nei  noa, to rätou mau  feruriraa  e mau ai, eita  e haere faahou atu i mua. I te mea  o Ietu  anaè  te  tià  e parau teie  mau  huru hohoà  manaò, ei haapäpüraa e, i pou  mai  nei  o ia mai te raì mai. Te haamau nei  te mau âti-Iuta  i to rätou mau  manaò  i nià  i te mau  faanahoraa, ìtehia  e te mata, tei faaìtehia ra e te mata marämarama o te evaneria. Te ìte  nei rätou  ia  Ietu  mai te hoê  tämaïti tei  fänauhia e te taata, aita  ra  rätou e ìte nei i te tahi pae, no Ietu, ua  tohia  o ia  e te Varua  Maitai. No Ietu, e faaìte  o ia i te mau òhipa i tonohia  mai ai  o ia, e òre roa  e tià  ia na ia vaiiho noa  i te mau manaò ia hahi. E faahoì ra o ia te tiàturiraa  o te taata i nià i te Atua. I te mea e feiä haapiihia  rätou,  ia ìte i ta te Atua i tono mai.

Teie o Ietu e haapii nei i te parau no te ora mure ore  na roto i te pane ora, te marämaramahia nei ia te parau  no te pohe mure òre, e aore ra te parau no te maa tähuti, te manaò ia ta te Teuteronomi e faaìte ra i te pene 8 na te ìrava 3 i te vahi hopeà, te naò nei teie parau, E ERE O TE PANE ANAE  RA TE MEA E ORA AI TE TAATA NEI, O TE MAU MEA ATOA RA I HAAPAOHIA E TE ATUA NUI TUMU TAHI RA E ORA  TE TAATA I  TE REIRA. Eiaha ra tätou e manaò e te haafaufaa òre nei teie parau i te maa, aita roa ia, te faaara nei ra teie manaò i te faufaa no te maa ta te Atua e horoà nei i te taata eita o ia e tähuti. Te maa ta te Atua e horoà nei, e maa ia e maitaì ai te tino, e ora ai te varua. E maa e itoito ai te tino, e òaòa ai te varua, e maa e puai ai te tino, e vai ai te varua i roto i te hau. O teie te mau manaò tumu ta Ietu e hinaaro nei  e faaìte, tei marämaramahia ra e na 5000 taata tei faaàmuhia i te maa e Ietu, no te faaòre noa ia i te poia o te tino, eiaha ra ia itoito te varua.

Te fifi ia e farereihia nei i teie anotau, e rave  rahi mau nunaa, e pohe nei no te maa òre. E rave rahi atoà e tamaì nei i te tahi nunaa no te parau ä no te maa. E rave rahi atoà ra te mau nunaa e pohe nei no te rahi i te àmu i te maa. Ta vetahi mea àmu ia ìte te faufaa o te maa, ta vetahi mea àmu ia teiaha te òpu, ta vetahi ia vai mama noa te òpu. Teie te tahi mau manaò e fä mai ia au tei marämaramahia. Ia haapäpü anaè ra tätou i te hiò maite, i te tïtauraa a Ietu te ìte nei ia tätou e toru tumu o te tià ia manaònaòhia.

1) Te ORA MURE ORE. E aha ia ?

O te ora ia o ta te Parau a te Atua e faatupu nei na roto ia Ietu Metia. E ora taaê teie ia faaauhia i te ora o tätou e ora nei i te mau mahana atoà. Te Ora Mure Ore, aita to te tau e mana, aita atoà to te taata e ta na mau raveà e mana no te haamure i teie Ora, e àore ra no te haapohe. Na te parau ra a te Atua e faanaho i teie Ora Mure Ore, e taua faanahoraa ra, ua tuuhia ia e te Atua i roto ia Ietu Metia. O tei àmu i to ù nei tino e te inu i to ù toto ,e Ora Mure Ore to na. To na auraa i teie taime, eita i muri mai i te menema e tupu ai te parau no te Ora Mure Òre, e ora tämau noa i te tupu ma te mou òre. Te taata tänu tumu haaari, èita o na e hopoi ta na tumu haaari i roto i to na menema, oia atoà te tumu ùru, te tumu meià, oia atoà te taata e taòto ia taata, e vai noa mai te ora, tei faaroo ra e Ora Mure Òre tei ia na ra.

2) Te TIAFAAHOURAA I TE MAHANA HOPEA. E aha ia?

To na tänoraa mau no te pähono i teie huru uiraa, ia tae roa ia i te taua mahana ra, tätou e ìte roa atu ai i te reira parau òaòa. Ia hiò tutonu maite anaè ra tätou i teie parau, e tià ia tiàturihia no teie mahana, eiaha ra no te tau e a muri atu. Oia hoì i teie nei.

Teie noa rä te tahi àmaa pähonoraa no teie uiraa, E òtià to te oraraa o te taata nei, e taua òtià ra, o ta te pohe ia e haamanaò mai nei. E òtià atoà to teie nei ao, o ta te pohe ia e òhipa atoà nei i roto i te natura ta na atoà e haamanaò mai nei. Ta teie pohe e faatupu, o te pohe-mau-raa , oia hoì, aita e ora faahou. No tätou ra e to te hui faaroo nei, na te Fatu ra o Ietu Metia e faatià faahou nei ia tätou, o te parau te reira no te tiaìtururaa ia òre to tätou faaroo ia paruparu.

3)TE ÂTIRAA TE TAATA FAAROO I TE METIA.

E parau òaòa teie e te nehenehe atoà hoì no te taata faaroo nei. Te àtiraa i te Metia, te riroraa to tätou tino e to tätou varua ei parahiraa tämau no te parau àro, no te hau o te Atua. Oia hoì ei faaearaa, ei nohoraa e ei ùtuafare varua. I roto i teie ùtuafare, te taata faaroo e fanaò ai i te Ora Mure Ore e te parau no te tiàfaahouraa.

Aita ra o Ietu e haafaufaa òre nei i teie huru oraraa o ta tätou e ora nei. Te faaìte nei rä te Fatu i te huru no te Ora o ta na e horoà nei. Na roto i to na pohe tätauro e to na tiàfaahouraa, te riro nei teie huru oraraa o te ao nei, ei oraraa täòtiàhia.

No reira e tano ia uiui-faahou-hia te parau, no teie PANE TEI POU MAI, MAI TE RAÌ MAI.
E aha ia ?         

Te pane ora, e aore ra te maa ora  e faaìtehia  nei e Ietu, e poroì ia no o mai i te Atua ra ia ora te taata i te ora mure ore. Na  teie atoà pane e faaìte i to te Atua ia pärahi tämau maiteraa i pïhaìiho i te mau taata atoà tei färii i taua maa ra, àreà ra tei òre ä i färii atu ra te tïtau nei ia te Atua ia rätou. Te pane no te raì, te faahohoàhia  nei e Ietu, i to na tino e to na toto, e na tapaò e  faaìte i te faaòreraa hara a te Atua i te mau taata atoà tei tatarahapa  mai roto mai i te hohonuraa o to na âau. Teie ia manaò ta Ietu e faaìte nei i te ìrava 53, 54, e te 55,te naò nei to na reo e, AMENE, AMENE, E PARAU ATU VAU IA OUTOU IA ORE OUTOU IA AMU I TE TINO O TE TAMAITI A TE TAATA NEI, E IA ORE HOI IA INU I TO NA TOTO, AORE IA E ORA I ROTO IA OUTOU.O TE AMU TO U TINO E TE INU I TO U TOTO, E ORA MURE ORE TO NA, E NA U O IA E FAATIA FAAHOU I A  TAE I TE MAHANA HOPEA RA E MAA MAU TO U TINO E E INU MAU TO U TOTO.

E hoa here ma,

E 40 mätahiti to te Atua täviniraa i te nunaa Iteraera  i te metepara ma te horoà ia rätou i te mau maitaì atoà no te raì, ua tae ta na faanahoraa i te vahi ta na i manaò, e ua tae roa mai i o tätou nei. Ua hau te 200 mätahiti to teie pane ora nohoraa mai i o tätou nei, eihea tei färii i te tïtauraa a te Atua ia riro ei manihini i nià i ta na ôroà, eihea manihini tei òre faahou i färii, eihea tei òre e hinaaro e âmui i teie oroà tämaaraa ? No rätou  te patoto  noa nei te Atua i to rätou mau ùputa âau ia faaroohia  to na reo. E parau anei tätou ua pumahuhia taua pane ora ra, a òre ra ua puaavereverehia ?  Aita roa ia te vai mahaha noa ra, hoê â to na maitaì i nanahi ra,

i teie mahana, e a muri noa atu.

                       

            Ei òpaniraa i teie manaò, te reo ia o te Fatu tei päpaìhia i roto i te Apotarupo i te pene 3 te ìrava 20.

                                              

            INAHA TE TIÀ NOA NEI AU I TE ÙPUTA, TE PATOTO  ATU NEI;  IA FAAROO MAI TE HOÊ TAATA I TA Ù REO E UA ÌRITI I TE ÔPANI  RA, E HAERE ATU VAU I  ROTO IA NA RA AMU ATU AI  I TE MAA I O NA  RA, E E ÂMU ATOA O IA I O NEI, I  O  Ù  NEI.

                                              

Terai òr. Faatura.