Mātaio 13.1-23 I taua mahana ra,

Tāpati 12 no Tiurai 2020.

I taua mahana ra,

Taramo 65

1 Na te Mënätehe. Taramo, e himene na Tävita. 2 Te tiaì mäite ra te ârue ia òe, e te Atua, i Tiona; e tei èuhehia ra, e horoàhia atu ia ia òe ra, 3 e tei faaroo i te pure ra. E tae atoà mai te taata atoà ia òe ra. 4 ua upootià te ìno ia mätou nei; âreà ta mätou mau hara, ua täpoìhia ia e òe ra. 5 E ao to te taata i haapaòhia e òe, e ua haafätatahia mai e òe ia pärahi i roto i to òe ra mau hëtere. E mauruüru ia mätou i te mau mea maitataì no to òe ra fare, no to òe ra nao moà. 6 Na te mau mea maitaì, e te tià ra, ta òe, ta te Atua e ora ai mätou nei, e parau mai ia mätou nei; o òe o tei tiàturihia e to te mau hopeà o te fenua atoà nei, e te feiä atoà i te ätea ê ra i te moana. 7 O tei haamau i te mau mouà ra i to na ra püai, e ua tätuahia o ia e te mana. 8 O tei haamanino i te haruru o te miti, te haruru o te mau aru ra, e te tiàrepu o te taata nei. 9 To te mau hopeà o te fenua ra, ua roohia anaè e te mataù i ta òe ra mau täpaò. O tei ìteä i te haereà mai i te poìpoì, e te ahiahi, ua faaòaòahia ia e òe ra. 10 Ua hiò mai òe e ua faararirari i te fenua, e ua rahi roa ia i te tupu ia òe i te ânävai a te Atua ra, tei î i te pape: e maitaì aè ra ia òe ra, faatupu iho ra òe i ta rätou tïtona: 11 Ua faarari hua mai rä òe i to na mau âivi rii i te pape, e ua faatahe mai ra òe i te ua i te vähi rii poopoo ra, ua haamarü mai ra i te reira i te tuäua ra, e ua haamaitaì mai òe i tei tupu ra. 12 Te faatoröna nei òe i te mätahiti i to òe ra maitaì, e te töpata mai ra te maitaì i te mau haereà atoà no òe ra. 13 Te töpata mai ra i nià i te mëtëpara, e te òaòa nei te mau âivi e àti noa aè. 14 Ua àti te fenua i te nana puaa, e ua î te mau peho i te tïtona; te pii nei, e te himene nei i te òaòa.

Ìtaia 55.10-11

10 Mai te ua mau e topa nei, e mai te hiona, no nià mai i te raì ra, e aore i hoì faahou i reira; ua faararirari rä i te fenua ra, e ua faatupu ra, e ua faahotu mai hoì i tä na, i noaa ai hoì te huero i te feiä e ueue, i te mäa i te feiä i àmu ra: 11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra.

Rōma 8.18-23

Te hanahana e faaìtehia mai

18 Te parau nei hoì au, e òre teie nei mau pohe e au ia fäito i te maitaì e faaìtehia mai ia tätou nei. 19 Te hinaaro rahi o te mau mea hämanihia nei mä te fäàoào, te tiaì nei ia i te faaìte-raa-hia mai o te tamarii a te Atua. 20 Ua faarirohia hoì te mau mea hämanihia nei ei mea faufaa òre noa, eere rä i te mea hinaaro, na na rä na tei faariro ei mea faufaa òre noa mä te tiaì. 21 E faaorahia hoì te mau mea hämanihia nei i të täpeà ra o te pohe, ia noaa te tiàmä maitaì o te tamarii a te Atua ra. 22 Ua ìte hoì tätou e, te ûuru tahi nei te mau mea atoà i hämanihia nei mä te mäuiui fänau ra e tae roa aè nei i teie nei mahana. 23 Eere hoì o rätou anaè ra, o tätou atoà nei, o tei noaa te huero mätamua a te Värua ra, o tätou iho ä tei ûuru i roto ia tätou iho, i te tatariraa atu i te faa-tamarii-tävai-raa, oia te faaoraraa i to tätou nei tino.

Mātaio 13.1-23

Te parapore no te Hau

(Mär 4.1; Rut 8.4)

1 I taua mahana ra, haere atu ra Ietu i räpaeàu i te fare, pärahi iho ra i te hiti miti/pae tähatai. 2 E rave rahi ta te tiàa rahi tei putuputu mai ia na ra. Paìùma atu ra o ia i nià i te hoê poti, pärahi iho ra i reira; te tià noa mai ra te tiàa rahi atoà i nià i te pae.

Te ueue huero

(Mär 4.2-9; Rut 8.5-8)

3 E rave rahi ta na parau i parau parapore atu ia rätou, nä ô atu ra: Inaha, haere atu ra te ueue huero i räpae e ueue i te huero; 4 e te ueue noa ra ia, maìri iho ra e tahi pae/hiti äratià: ia maùe mai te manu, àmuhia/titotitohia iho ra. 5 Maìri iho ra e tahi pae i te vähi ôfäfaì, aita reà e repo to reira; tupu òiòi iho ra ia, no te mea aore i moè reà i raro i te repo; 6 ia hiti mai te mahana: ôriorio iho ra e pohe atu ra, no te mea aore i aahia. 7 Maìri iho ra hoì e tahi pae i roto i te räau taratara, tupu aè ra te räau taratara e apiapi iho ra. 8 Maìri iho ra te tahi pae i te vähi repo maitaì, e höroà mai ra i te mäa: hoê hänere i nià i te tahi huero, e ono àhuru i nià i te tahi, e toru àhuru i nià i te tahi. 9 E tarià tö na ra, ia faaroo ia.

No te aha Ietu i parau parapore ai

(Mär 4.10-12; Rut 8.9-10)

10 Ua haere mai ra te mau pipi, nä ô mai ra ia na: E aha òe i parau parapore ai ia rätou? 11 Ua pähono atu ra o ia ia rätou: No te mea, ua höroàhia ia òutou te ìte i te parau àro o te Hau o te raì ra, aita rä i höroàhia ia rätou. 12 E taoà tä na ra, e höroàhia atu ä tä na e ia rahi atu; aita a na ra, e rave-ê-hia ia tä na e tërä atoà e vai ra. 13 No reira vau i parau parapore atu ai ia rätou, no te mea, te hiò nei rätou, aita rä e ìte ra, te faaroo nei rätou, aita rä e häroàroà ra e e taa/märamarama ra. 14 No rätou i tupu ia teie tohu a Ìtaia, o tei nä ô mai e: E pau ta òutou faaroo, e òre roa atu ihoä òutou e taa/märamarama;  e pau ta òutou hiò, e òre roa atu ihoä òutou e ìte. 15 Ua ètaèta roa te âau o teie nei nünaa, ua turi roa to rätou tarià, e ua täpiri/täpö i to rätou mata, o te hiò hoì to rätou mata, o te faaroo hoì to rätou tarià, o te ìte to rätou âau, e o te haafäriuhia mai rätou, ia faaora atu vau ia rätou. 16 Teie rä, e ao to òutou mata, no te mea te ìte ra, e to òutou tarià, no te mea te faaroo ra. 17 Òia mau ta ù e parau atu ia òutou nei: e rave rahi te perofeta e te feiä parau tià i hinaaro i te hiò i te mau mea ta òutou e hiò nei, aita rä rätou i ìte; i hinaaro i te faaroo i te mau mea ta òutou e faaroo nei, aita rä rätou i faaroo.

Te tätararaa o te ueue huero

(Mär 4.13-20; Rut 8.11-15)

18 E teie nei, a faaroo mai na i te parapore o te ueue huero. 19 Ia faaroo te tahi taata i te parau o te Hau, e aore i märamarama i taua parau ra: e haere mai te värua ìno/hämani ìno, e rave ê atu ra ia i tei ueuehia i roto i to na âau. O te hohoà ia o te huero tei maìri i te pae/hiti äratià ra. 20 O tei maìri i te vähi ôfäfaì ra: o te taata ia tei faaroo i te parau e tei färii òaìa i taua parau ra mä te òaòa; 21 no te mea rä aore i aahia i roto ia na iho, mauraa poto ia to na; ia tae mai te àti e te hämani ìno tei riro hoì te parau ei tumu, mäheaitu atu ra ia o ia. 22 O tei maìri i roto i te räau taratara ra: o te taata ia i faaroo i te parau; no te mau manaònaòraa rä o teie nei ao e te faatïaniani/haavarevare a te taoà, apiapi iho ra te parau, e aita aè ra i hotu mai. 23 Âreà tei maìri i te vähi repo maitaì ra, o te taata ia tei faaroo e tei märamarama i te parau; hotu mai ra tä na, hoê hänere i nià i te tahi huero, e ono àhuru i nià i te tahi, e toru àhuru i nià i te tahi.

Manaò.

Na taiòraa e maha nei  te faaìte  nei  ia, i te hoê  manaò  tumu  mauti ra te parau no te fenua, te taata, te huero maitaì, tei tupu, tei hotu e tei òre. Na teie mau  tumu parau  e täamu  te mau manaò e faaìtehia nei, ia ìtehia  te hinaaro o te Atua i ta na mau tamarii. Ia tià  i te mau taata ia hoì  pinepine i te Atua ra, tei faaòre i te hara a te feia  tei ìmi  i te tätarahapa. Na roto  i te tiàturi päpüraa  i te mau òhipa faaora e faatupuhia nei  e te Atua, i te faaìteraa a Ietu. Te faaìte nei o Ietu i te ora a te Atua, ma te horoà i te mau faaauraa i te mau òhipa  e orahia nei  e te taata i te mau mahana atoà, to na auraa ra, tei roto atoà i teie mau hohoà e ìtehia ai  te mau faanahoraa a te Atua, i te mau taata faaroo atoà. Te pene parau fatata roa i teie mau manaò, te Parau Maitaì, i päpaìhia e Mataio pene 13,1-23. I teie ia manaò e, 1 I taua mahana ra, haere atu ra Ietu i räpaeàu i te fare, pärahi iho ra i te hiti miti/pae tähatai. Haapii iho ra i te mau taata e rave rahi i te parau no te huru o te patireia o to na Metua, te mea ia e faahitihia ra i roto i te haapotoraa no na taiòraa e maha no ta tätou no teie mahana, a faaroo mai na,

-Taramo 65, 14 Ua àti te fenua i te nana puaa, ua î te mau peho i te tïtona; te pii nei, e te himene nei i te òaòa.

-Ìtaia 55, 11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra.

-Rōma 8, 23 Eere hoì o rätou anaè ra, o tätou atoà nei, o tei noaa te huero mätamua a te Värua ra, o tätou iho ä tei ûuru i roto ia tätou iho, i te tatariraa atu i te faa-tamarii-tävai-raa, oia te faaoraraa i to tätou nei tino.

-Mätaio 13, 1 I taua mahana ra, haere atu ra Ietu i räpaeàu i te fare, pärahi iho ra i te hiti miti/pae tähatai.

Ei manaò tatara.

I taua mahana ra, haere atu ra Ietu i räpaeàu i te fare, pärahi iho ra i te hiti miti/pae tähatai. Teie huru no Ietu te haapäpü noa mai ra te reira i to na tiàraa haapii, i te mau tamarii a to na Metua, tei âpee ia Na i to na mau tere e tae roa mai ia tätou nei te haapii noa ra o Ietu, àita ta na haapiiraa i marau, àita i tähito, àita i puaa vereverehia, èita te haapiiraa à Ietu e maìti i te fenua, e maìti te ù o te taata, te haapiiraa a Ietu ua päpaìhia i roto i te fenua, i roto i te reva, e i roto i te papa no te âau o te taata, pärahi iho ra, haapii atu ra.  

Ta tätou ia parau  no teie  taime  paieti, e parau  ia  tei  faahitihia  i roto  i na  Èvaneria hio àmui, te vai nei  ta te päpaì  èvaneria  a Märeto faahitiraa  i te pene 4 ìrava 1 e faaea i te ìrava 20, ta te èvaneria a Ruta  i te pene  8  ìrava 4 e faaea i te ìrava 15;e ta Mataio  o ta tätou  i faaroo aè nei to na täiòraahia. I roto i na faahitiraa  e toru nei, te  haapäpü nei o Ietu e maha  tahua òhiparaa e vai nei, i reira te huero a te taata ueue e topa ai.

1) I te äratià

2) I te vahi papa.

3) I te vahi àihere.

4) I  te vahi repo maitai.

I teie na vahi e maha, te vai nei te huero èita e ôteo, ua taataahihia e te àvae taata e  aore ua àmuhia e te manu  o te reva, eita ihoä ia e tupu e e hotu. Te vai nei te ôteo  te tupu eita ra e hotu i te mea aita te aa i mau  päpu i te vahi i reira te maitaì e tae ai i roto i te tumu. Te vai nei e tupu e hotu, no te faaapiapi ra a te mau  ènemi, òre  aè ra e fäura i nià  aè, i te mau haatafifiraa vai moè noa atu  ra i te vahi hoê. Areà  ra tei topa i te vahi  maitaì ra, ua àtuàtuhia, ua  haapaòhia, ua paruruhia e no te maitaì-atoà-hoi te vahi i topahia tupu aè ra, hotu iho ra i te rahi, tai-hoê-hänere i te huero hoê, taìono àhuru i te hoê taìtoru  àhuru i te hoê. O  teie ia te huru no te mau vahi ta Ietu e faatià parapore nei i te mau taata e rave rahi tei taìruru mai i pïhaì iho ia Na, i te hiti roto no Tenetareta i Tarirea. Tei nià O ia i te hoê poti i te  faatiàraa i teie  parau, no te rahi o te taata. E tià roa  ia tätou ia parau e ua riro taua vahi  ra no tera taime, ei haapäpü faahouraa na Ietu i ta na òhipa tumu i te fenua nei i ropu i te mau taata tei faaroo i ta na mau haapiiraa. I te mea hoì e parapore teie te vai nei ia te poroìraa, te vai atoà nei ia te faaitoitoraa, tei moè i roto i te mau tumu parau ta Ietu e faaau nei i nià  i te taata. Eita  atoà ra, i te mea òhie i te märamaramaraa  i te mau  parapore a Ietu e faatià nei, àti-ra-noa-atu ra tei reira, a hiò  na ra tätou i na tumu parau  e toru nei i roto i tätou taiòraa Mataio 13,1-23.

1) Te taata ueue.

2) Te huero.

3) Te fenua.

E hoa here mä,

Te taata ueue, e hohoà  ia  no te  hoê  taata  tei horoà, tei ôpere ma  te pipiri  òre  e te nounou òre ma te tuha maitaì  i ta na e vai ra  i te mau vahi  atoà ma te hiò òre te huru  o te vahi e òre roa  o ia e täpeà i ta na mau taoà i roto  i te fare haaputuraa taoà. O te oraraa tämau ia o teie  taata, ia oti  ta na ueueraa e vaiiho o ia na te mau  ora o te reva, o te fenua e faatupu i te maa maitaì. Inaha hoì e, ua oti te repo  fenua i te haamaitaìhia. O vai taua  taata ra, e tià ia tätou  ia parau e o Ietu iho, O ia tei haere mai i te fenua  nei no  te ueue i te maitaì  a te Atua ia noaa te faufaa no te ora i te mau taata atoà  tei tiàturi i to na mau hinaaro. Oia  hoì te mau hinaaro o te Atua. Te mau taata atoà tei faaroo i teie mau parau e riro atoà rätou  èi taata tei ueue  i te mau huero o te Èvaneria i te mau vahi atoà, ma te hiò òre te huru o te vahi. Hoê  atoà  ia  te Ètärëtia  o ta na òhipa  tumu  ia  i te ueueraa  i te mau parau ta Ietu e faahiti nei.

Ei tumu parau piti  te HUERO, o vai teie huero? O te parau ia a te Atua, ua ìte hoì  tätou i te ômua-roa-raa  te parau  a te Atua  tei faaroohia  i te piiraa  Ò ia i te mau mea ora atoà  ia pühapa i  te vahi o te ora òre, e te märamarama i te vahi no te pöuri. Tei nià hoì  i taua  mau parau ra i ìtehia ai te puai  o te Varua o te Atua i te tiàrepuraa i nià i te ìriatai. E na roto  hoì i taua parau ra tei hämani, i pärahi mai ai te Atua i ropu i te taata na roto ia Ietu. Teie te parauraa a Ìtaia, 11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra. Na taua parau ra tei riro ei huero  e täpeà  maite  i te ora  tei türaì, ia tupu maitaì  ia vai  heeùri maitaì, ia ruperupe, ei ia horoà i te maitaì. E  aha ia to na auraa? Ei  hiòraa mätamua roa, te òhipa tumu ia teie  a te Ètärëtia, te haaparareraa i te huero no te Parau ora a te Atua, na roto i te haapurororaa, ia varovaro i te mau vahi atoà, èi ia ìte-ä-hia  e te mau taata atoà. Ia òre te Ètärëtia e faaòhipa na vai ia e faaòhipa? E  riro ia te huero  no  te parau a te Atua, èi huero tei maìri i te vahi faufaa òre. Ia maìri ra i te  vahi faufaa, na roto  i te faaòhiparaa, i reira e ìtehia ai, te heeùri no te maa maitaì, o te here, te hau, te oaoa, e te tiaìtururaa. E òre hoì e tià ia haaputu noa i te parau a te Atua, i roto i te hoê vairaa ma te faahotu òre. E òre roa hoì e tià ia âuahia  te parau a te Atua i te vahi hoê, ia ìritihia ra te mau âua e tià ai, ia ìte te mau taata atoà i to na märamarama. Te huero o te Èvaneria, èita o ia e maìti i te huru  o te fenua, te fenua  ra te maìti  i te huru o te Èvaneria. Ia òre ra ia  faaäpiäpihia  te tupuraa o te huero o te Èvaneria, e riro ia o ia ei tumu raau rahi e to na  mau âmaa e tauraa ia no te mau manu o te reva.

Na teie mau parau  e faaö i ta tätou na tumu parau e toru, oia hoì te Fenua. I  te mea  te vai nei te taata  ueue, te huero, te  färii i na òhipa  e piti  nei ei vairaa ihoä  ia  e tià ai, oia ia Te Fenua.

O vai te faaauraa o te fenua, ta te parapore e faahiti nei ? Aita atu ia  o te taata, i ù  nei  tätou  e ìte ai  te manaò  o Ietu  i roto i ta na  poroìraa, no na vahi e maha, te auraa  mau no na huru e maha o te taata. Te tatararaa  a Ietu no na huru e maha nei.

1) To te pae äratià ra, o te feia ia tei faaroo noa, aita ra i haapaò tiihia mai ra te parau a te Atua e te tiàporo i roto i to na âau ra hopoihia atu ra i te vahi ê. Ère atu ra taua feiä ra i te ora a te Atua. Te huru no teie taata, èita  o ia  i te mea haapaò roa  i te parau  no te ora a te Atua, ua hau aè ra to na tiàturiraa ia  na iho, ère atu ra o ia i te mau maitaì a te Atua. To na auraa ra, aita to na varua  faahou  i  roto ia na, ua tiihia mai ra e te ènemi no te Atua. Ori haere noa atu ra teie taata ma te varua òre i roto ia na. E inaha hoi te taata ta te Atua i hämani, aita roa ia hoê aè i ère i te aho ora o te Atua.

2) Te papa ia, o te feiä ia tei färii i te parau  a  te Atua  i roto i to rätou âau ma te òaòa ia faaroo, no te  mea  ra aita i äahia  i roto  ia rätou, täpetepete-iho-ra  te faaroo. I te mea  ua riro to rätou âau mai te ôfaì ra te huru, eita te aa o te Èvaneria e mau  i roto no te paari, maro  aè ra te aa i te maitaì òre. Te huru o  teie  taata, aita o ia  e hinaaro, e faaòhipa  i te mau poroìraa a te Atua. No na  te parau a te Atua, o te hoê  noa ia parau tei vavi noa, ère  atu ra o ia i te mau maitaì no o mai i te Atua ra. 

3) Te vahi àihere, o te feia faaroo ia  tei fifi i te mau peu o teie nei ao e tei äpiäpi to rätou âau  i te mau òhipa faufaa òre e tei nevaneva te tiàturiraa. I òre ai te parau a te Atua e hotu maitaì. Teie huru taata, aita rätou e päpü  maitaì  nei i te òhipa ta rätou e hinaaro nei, te pee haere noa nei to rätou mau manaò, i te mau vahi atoà, ma te tiàturi e, te tano ra rätou; aita ê teie huru taata i te fee täuiui haere noa te manaò. To na auraa ra na rätou noa rätou e faaapiapi ra i te oraraa.

4) Te repo maitaì, o te feiä ia ua faaroo maitaì i te parau a te Atua, tei täpeà  maite i  roto i to rätou âau haavare òre, tei tià i te faahoturaa i  te huero maitaì. Teie  huru taata, te mea faufaa  roa aè no na  ia rahi to na faatupuraa i te maitaì. Ta na òhipa tumu e haamaitaì te vahi aita e maitaì to reira, e horoà te hau i te vahi  aita e hau to reira, e tia ia tätou ia parau  ua noaa i teie taata i te mau faufaa atoà o ta te Atua e hinaaro nei i to na mau tävini.

Na roto  teie mau manaò te tïtauhia nei tätou e Ietu, èi taata ueue i te parau ora no te Èvaneria a te Atua, ma te ìte na mua roa e o tätou atoà te ra e ueuehia ra  ia riro èi fenua maitaì, tei färii e tei òre i apiapi  i te mau mea rii faufaa òre o te ao nei. Tei horoà ra ia tätou  i te òaòaraa i te ueueraa i te mau hinaaro o te Atua i te mau vahi atoà.

E hoa here ma e,

I roto  i na huru e maha  nei teihea roa tätou i te faaearaa?

Oia ia te reo o te Atua i nià i to na nünaa, i te naòraa  e, Mai te ua  mau e topa  nei, e mai te hiona, no nià mai i te raì  ra, e aore  i hoì faahou i reira; ua faararirai ra i te fenua ra, e ua faatupu ra, e ua faahotu mai hoì i ta na, i noaa ai hoì te huero  i te feiä e ueue, e te maa i te feiä i àmu ra.

Oia atoà  te parau no roto i to ù  vaha; e òre e hoì faufaa  òre noa mai ia ù nei, e tupu ra tei ôpuahia e au ra; e noaa hoì te mea i faaue atu ai au ra. (Ìtaia 55, 10-11).

Teraì òr. Faatura.

Mātaio 11.25-30 Maihoà

Tāpati 05 no Tiurai 2020.

ÔROÀ

Maihoà

Taramo 145

1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu. 2 E haamaitaì ä vau ia òe i te mau mahana atoà nei, e ârue au i to iòa e a muri noa atu. 3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi. 4 Te mau uì atoà të faarahi i ta òe òhipa, e e faaìte hoì i ta òe ra òhipa mana. 5 E parau vau i te tura e te hanahana o to òe ra mana, e te mau räveà taa ê na òe ra. 6 E parau rätou i te mana o ta òe ra mau räveà mataù, e faaìte hoì au i to òe ra mana. 7 E parau ä rätou i te manaòraa o to òe ra maitaì rahi, e himene hua hoì i ta òe ra parau tià. 8 E hämani maitaì e te aroha to te Fatu, e òre e riri vave, e te faaherehere rahi. 9 Hämani maitaì to te Fatu i te taata atoà, e te vai ra to na aroha faaherehere rahi i nià i ta na atoà ra mau òhipa. 10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe. 11 E parau rätou i te hanahana o to òe ra pätireia, e faatià noa hoì i ta òe ra mau räveà püai.12 I te faaìteraa i te tamarii a te taata nei i to na ra mana, e te hanahana e te manaò to na ra pätireia.13 O to òe ra pätireia, e pätireia mure òre ia, e to òe ra mana, e tae ia i te mau uì atoà ra. 13 E Atua mau te Atua e te haavare òre i roto i ta na mau òhipa.14 Te mau ra te Fatu i te feiä e hià ra, e ua faatià i te feiä e piò i raro ra.15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau.16 Te heheu nei òe i to rima, e te haamäha nei i te hiaai o te mau mea ora atoà nei. 17 E parau tià ta te Fatu i ta na atoà ra mau haereà, e te hämani maitaì i ta na atoà ra mau òhipa.18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre. 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou.20 Te tiaì nei te Fatu i te feiä i hinaaro ia na, âreà te feiä paieti òre ra, e haamouhia ia e ana. 21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

Tëtäria 9.9-10

Te metia haèhaa e te hau

9 A òaòa hua na òe, e te tamahine o Tiona e a pii na, e te tamahine o Ierutarëma e; ìnaha, te haere mai ra to arii ia òe ra: e parau tià tä na, e o te Ora hoì o ia, haèhaa tö na, i te pärahiraa i nià i te âtini, e te pinia, te fanauà o te âtini.10 E faaòrehia e au te pereoo i Èferaima, e te puaahorofenua i Ierutarëma, e faaòre-atoà-hia hoì te fana tamaì: e nä na e parau i te mau êtene i te parau hau: e riro to na hau mai te miti mai e tae noa atu i te tahi miti, e mai te pape mai e tae noa atu i te mau hopeà o te fenua ra.

Rōma 8.9-13

9 Aore rä òutou i au i ta te tino ra, te au nei rä i ta te Värua ra, no te mea te pärahi ra te Värua o te Atua i roto ia òutou. Te ère ra rä te hoê taata i te Värua o te Metia ra, eere ia o ia i te taata no na. 10 E tei roto te Metia ia òutou ra, te ora nei ia te Värua i te parau tià, ua pohe mau rä te tino i te hara. 11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na. 12 E teie nei, e te mau taeaè ra, e àmutärahu tätou, eere rä i ta te tino a haapaò atu ai i ta te tino ra. 13 Ia haapaò hoì òutou i ta te tino ra, e pohe ia òutou; ia tinai rä òutou i ta te tino ra i te Värua, e ora ia òutou.

Mātaio 11.25-30

Te Metua e te Tamaiti

(Rut 10.21-22)

25 I taua taime ra, ua parau atu ra Ietu: E haamaitaì au ia òe, e ta ù Metua, e te Fatu o te raì e te fenua, i te mea i huna ê noa òe i teie nei mau òhipa i te feiä paari e i te feiä märamarama, e ua heheu mai i te mau àiü. 26 Oia ia, e ta ù Metua, ua au te reira ia òe. 27 Ua hope roa te mau mea atoà i te püpühia mai e ta ù Metua ia ù nei, e aore roa te hoê i ìte i te Tamaiti, mäori rä o te Metua, aore hoì te hoê i ìte i te Metua, mäori rä o te Tamaiti, e ta te Tamaiti i hinaaro i te heheu atu ia na.

A rave mai i ta ù tuto

28 E haere mai òutou ia ù nei, e te feiä atoà i rohirohi, e tei teiaha i te hopoià, e höroà atu ia òutou i te faaearaa hau. 29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua. 30 Te marü nei hoì ta ù tuto e te mämä nei ta ù hopoià.

Manaò.

Eiaha ia moèhia ia tätou te ture a te Atua e haamanaò mai ra te tauturu no roto i to na aroha e to na here. Mäìti-noa-hia ai tätou e te Atua ei àpu färii ora, eita to tätou parau e tano ia faataa-ê-hia i to te fenua no reira tätou i te raveraahia mai. Eiaha atoà rä ia moèhia ia tätou e, eita te parau o te fenua e tano ia faataa-ê-hia i to te raì, no te mea hoê ä àpu to räua : te vai. Ia parau hoì Ietu i te horoà a te fenua e : o ta ù tino tenä : o ta ù toto tenä, aita atu e auraa to teie fäìraa maoti rä, ta na faateniteniraa i te fenua, to na hoì hiòraa i te fenua mai te tahi taata ora ra te huru. Ua tae roa teie faateniteniraa i te òreraa Ietu e haamä e te riroraa ei teòteòraa no na te parauraa ia na e : e Tamaiti na te taata, oia hoì e Tamaiti na te Atamu, e Tamaiti na te fenua. E mai te peu e Tamaiti atoà Ietu na te fenua, ua riro atoà ia te fenua ei metua vahine no na. Te auraa ra, ua haere mai Ietu i roto i te mau tamarii a te taata, oia te mau tamarii a te fenua, aita rä rätou i färii ia na. O Ietu hoì, mai te taata nei, mea fänau-püfenua-hia o ia, oia hoì e mea fänau-fenua-hia mai. No reira, mai te peu ta te Värua i fänau ra, e värua ia, ta te tino e fänau ra, e tino ia. E tano atoà tätou e parau e : ta te fenua e fänau ra, e taata ia. Haamanaò atoà rä tätou e, i roto i te reo mäòhi, te fenua e te püfenua, taua mea nei ä ia, na te faaòhiparaa noa räua i faataa ê. Te fenua mätamua o te taata, oia te fenua no reira o ia i te püraa mai i te ao nei, te vahine ia. Te reira atoà te fenua mätamua o Ietu. O te reira mau te vahi e türamahia ra e na taiòraa e maha, teie te haapotoraa.

-Taramo 145, 9 Hämani maitaì to te Fatu tei to na aroha faaherehere i ta na mau òhipa.

-Tëtäria 9, 10 E riro to na hau mai te miti, mai te pape e tae i te mau hopeà o te fenua.

-Roma 8, 12 E teie nei, e àmutärahu tätou, eere i ta te tino a haapaò atu ai i ta te tino ra.

-Mätaio 11, 29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua. 

Ia faaroo  tatou  i teie  reo to Ietu, e haamanaò tatou i te parau  tohu a te perofeta ra a Tetaria  i te pene 9 i te ìrava 9 i te parauraa A òaòa hua na òe e te tamahine a Tiona e, a pii na, e te tamahine a Ierutarëma e, inaha te haere mai ra  to Arii ia  òe ra, e parau tià ta na, e o te ora hoi o ia, haehaa to na, i te parahiraa i nià i te âtini e te pinia te fanauà o te âtini. E teie te reo no Ioane Päpetito i te naòraa e à hiò na i te Arenio a te Atua tei hopoi è atu i te hara o te ao.

E tià ia tätou i te  parau e, teie na ìrava  e täipe  ia  no ta tätou parau no teie mahana. I te mea te âtini e ànimara amo tuto, ei haamamaraa i te hopoià a te taata, o te fauraò ia te reira o Ietu, èi faaìteraa  i to na  marü, e te haehaa. Areà ra te Arenio e tutia maitaì  ia ei haamamaraa i te hopoià  o te hara.

Ta tätou  ra pene  parau Mataio 11, 25-30, e himene àià ia  tei Iupiri  i te parau a te Atua i roto pü  i te taata. Tei faaite i te tahi mau parau  tei hunahia  i te feia paari. Oia hoi  teie feia, e feia  àravihi  ia  i nià  i te parau  no te Ture. Te haamaitaìraa ia a te Tämaïti  i te Metua, no te tïtauraa  i te mau taata  atoà  tei teimaha i te hopoià ia tiàturi i te mau òhipa maere a te Atua tei faatupuhia  e Ietu  i te mau vahi atoà  tei ère  i te ora. I hunahia ai  te  mau  parau  no te ìteraa  i te Atua, i te feia mata î oia hoi i te feia paari, te mau haapii ture, e te tohu. Eita ra teie i te parapore ta Ietu e faatià nei, te hinaaro nei  ra O ia  ia färiu te feia  e tïtau  nei i te ìteraa i te Atua, i nià  i te tiàturiraa o te Ture a te Atua, ei haamäruraa te tuto, eiaha ia riro mai te hoê  faautuàraa, ia riro ra mai te hoê arataìraa, haapiiraa e aore faaâpïraa i te reni no te èà e tae ai i te Atua  ra. No reira  o Ietu  i haapäpü maitaì ai e, ua hope  te mau mea atoà i te püpühia i roto ia na, o tei faatupuhia na roto i te faaoraraa e te upootiàraa  i nià i te pohe. Oia hoi, ua ìte o Ietu i te Atua, to te ao nei ra aita ia i ìte o  Ietu  e, e tamaiti na te Atua, ua ìte te Atua ia  Ietu, to te ao nei ra, aita ia i ìte i te Atua e Metua ia no Ietu. Teie te tahi o te mau parau i hunahia i te feiä paari o ta tätou nei taiòraa, èi haapotoraa ua ateä teie mau taata i te ôpuaraa faaora a te Atua. Ta Ietu ra e ani nei, ia ìte-ä-hia, te aroha mau no te patireia parau tià o te Atua. Na roto te haereraa i mua ia na noa  atu te huru o te teimaha te hopoià, e tià ia na ia faaora. Ma te haapaò i te teimaha no te mau haapiiraa a te Evaneria, ia noaa te ora i te Varua. O teie noa ia ta Ietu e hinaaro nei e faaìte i te feiä e rave rahi, e tiàturi nei i ta te Atua  haamaitaìraa. No te ìteraa e, te Ture a te Atua, mai te hoê ia taura tävaha, te ärataì  i te puaahorofenua i te vahi e au ia täpae. O te huru atoà  ia te ìteraa i te Atua, ia mau te taura tävaha o te Evaneria, i reira e maru ai te mau  tuto teimaha, i reira atoà e mama ai te mau hopoià, mai te vavai ra te huru i roto i te reva. 29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua.  Aita o Ietu  e faaite nei i ù nei i to na paruparu, te haapäpü  nei ra O ia i to na puai ei faaìteraa i te mau taata e rave rahi, o te tahi teie raveà. E ära atoà ra te vai nei te maru e faatupu nei i te faatau. Te maru ra ta Ietu e parau nei, te haamäharaa rohirohi ia, i te teimaha  o te mau òhipa. Oia mau  tei roto i te maru e ìtehia ai te puai o te Atua, e mama  ai te mau hopoià atoà. Ua faaòhipa anei te Atua  i to na puai tahoo i nià i te mau ènemi o to na nunaa aita  roa, ua here O ia  ia rätou no te mea tei roto  rätou i  ta na òpuaraa. E aha ia ta Ietu e tïtau nei na roto i teie reo?

Ia haamorihia ia, ia haamaitaìhia ia, ia faahanahanahia ia, te Atua, na roto i te mau pureraa e te mau òhipa o te faaroo, ia riro ia ei haamaitaìraa i te Atua no to na mau maitaì, e noaa nei ia tätou i te mau mahana ta täìtahi  ma te faahanahana i to na Ioa. I reira e ìtehia ai te huru mau o te Atua tei haapii e tei tïtau i to na nunaa. Ia tupu teie mau faaueraa e ìtehia ai te rima aroha o te Atua, tei faatià, tei paruru, e tei faaora, tei maìri i raro aè i te tuto o ta Ietu ia tïtauraa i te mau taata paieti atoà ia faaitoito i te pure tei reira te marüraa te mau tuto, tei roto i te Metia tei tiàfaahou, e no te mau hopoià eita ia e riro faahou ei mea teimaha, e riro ra ei mea mama. Te marû nei hoì au e te haèhaa nei ta ù âau: e noaa hoì te faaearaa hau i to òutou värua. 

E reo tïtau ä teie no Ietu ia tätou ia haapaò i te mau òhipa ta te Atua e faaue nei ia aroha, i te mea O ia tei aroha mai ia tätou na mua roa. I hau ai O ia, i maru ai no te faataui i te taata hara ei taata tiàma, te taata paieti òre, ei taata paieti, te taata paruparu, ei taata puai, te òhipa teimaha, ei òhipa mama, te hopoià ei upootiàraa  no te òhipa, e te vai atu ra....

O te huru ia teie, no te reo tïtau o Ietu, tei tämahanahana i te feia rave òhipa a te Atua, tei ìte i te maru, e te mama te òhipa ia tiàturi päpü i te Atua.

Te tuto, e raau teie  tei  taraihia haamenemene a tuuhia atu ai i nià i te àî o te âtini e aore i nià i to te puaahorofenua, to te puaatoro. I nià  teie raau e täamuhia ai  te mau taura no te hutiraa i te ârote.

O ta Ietu e faaau nei  i te mau täpura òhipa e tià i te mau taata faaroo ia haapaò, i te âroteraa i te mau vahi i reira e ueuehia te mau huero o te Evaneria. I te tuuraa tätou i to tätou tiàturiraa i roto i te Metia i reira te tupuraa teie reo, te maru nei  hoi ta ù tuto, no te mea ua rave atoà tätou i ta tätou  tuhaa òhipa  ei faaìteraa i to tätou täamuraa i nià i to na mau hinaaro; e te mama nei ta ù hopoià, no te mea  te haapaò atoà ra tätou  i ta tätou tuhaa, na roto ia i te haamoriraa, e te haamaitaìraa i te Metua tei aroha mai i to te ao nei. E na roto  i teie mau òhipa  e ravehia nei e tätou  e mama ai te mau hopoià.

Te mama nei ta  tätou  mau  hopoià, i te  mea o te  Fatu teie  i pïhaìiho ia tätou ei  faaitoitoraa ia tätou. O ta Ietu  e hinaaro  nei ia mama te tuto  a te feiä  e tiàturi nei  i ta na mau òpuaraa. I tuuhia ai te tuto i nià i te àî, o te haapäpü te tähiraa âvae i nià i te fenua, na te fenua e höroà i te puai i te täatoàraa o te tino, ia mau te ârote i roto i te fenua i reira e maitaì ai te paì no te ueueraa i te huero maa. Ta tätou te mäòhi e maihoà tei amohia e te paùfifi, e faaòhipa-atoà-hia no te huti i te mau täuihaa  teimaha, na te âvae atoà e haapaari i nià i te fenua ia tià i te fenua ia tauturu ia noaa te puai. E naò ia tätou i te parauraa i teie mahana, A rave mai i ta ù maihoà i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua.    

Teraì òr. Faatura.

Mätaio 10, 37-42 Utuà

Tāpati 28 no Tiunu 2020.

Utuà.

Taramo 89

1 Matetira a Ètana te âti-Ètera ra. 2 E tämau ä vau i te himene i te aroha o te Fatu, e na ta ù vaha e faaìte i te parau mau na òe, i tërä uì i tërä uì. 3 I parau hoì au e: E tià to aroha i te vai-mäite-raa, tei te mau raì ra to parau mau i te haamau-raa-hia. 4 Ua parau òe: Ua fafauhia e au te faufaa i tei haapaòhia e au ra, ua tapu vau i ta ù tävini ra, ia Tävita: 5 E haamau ä vau i to òe ra huaai e a muri noa atu, e patu vau i to òe ra teröno e tae noa atu i te mau uì atoà ra. Tera. 6 Ia haamaitaì te mau raì i ta òe ra räveà mana, e te Fatu, e te âmuiraa o te feiä moà ra, i ta òe ra parau mau 7 O vai hoì to te mau raì ra e au i te Fatu. O vai tei au i te Fatu i roto i te mau tamarii a tei mana ra. 8 E Atua mataù-roa-hia i te âmuiraa o te feiä moà ra, e ia faahanahanahia e te feiä atoà i pïhaì iho ia na ra. 9 E te Atua manahope, e te Fatu, o vai tei au ia òe ra? E mana rahi to òe, e te Fatu, e te haapunihia ra òe e ta òe ra parau mau.10 O òe hoì tei mana i te ûànaraa o te miti ra, e ia tupu to na àre, na òe e haamania. 11 Ua ôfatifati òe ia Rähapa mai te mea ua paruparu ê na, e na to rima ètaèta i haapurara i to mau ènemi. 12 Na òe te mau raì nei, e na òe atoà te fenua; te ao e to te ao atoà ra, na òe ä i hämani. 13 O àpatoèrau e o àpatoà, na òe i hämani; o Täpora e o Heremona tei himene hua i to òe ra iòa. 14 E rima püai to òe, ètaèta tei to rima, e te teitei roa ra to rima àtau. 15 O te parau-tià ra e te au, o te tumu ia o to òe ra teröno. O te aroha ra e te parau mau, tei nä mua ia i to mata. 16 E ao to te mau taata i ìte i te reo òaòa ra E hahaere ä rätou, e te Fatu, i te märamarama o to mata ra. 17 Te òaòa ra rätou i to iòa e mure noa atu te mahana, e ua teitei rätou i te parau tià na òe ra. 18 O òe hoì te hanahana o to rätou püai, e na te here na òe ra i teitei ai to mätou tara.19 O te Fatu mau ä to mätou tauturu, e tei moà i Ìteraèra nei, o to mätou ia arii. 20 I reira ta òe parau ôramaraa mai i to taata moà ra, e ua nä ô mai ra: Ua tuu vau i te tauturu i nià i tei mana ra, ua faateitei au i te hoê i haapaòhia no roto i te mau taata nei. 21 Ua ìteä ia ù ta ù tävini o Tävita, e ua faatähinu vau ia na i ta ù monoì moà ra. 22 Na to ù iho rima o ia e haamau, e na to ù iho rima o ia e faaètaèta. 23 E òre roa o ia e vï i te ènemi, e òre hoì o ia e ìno i te taata parau ìino ra. 24 E täìrihia e au to na mau ènemi i mua i to na mata, e täìrihia e au te feiä i riri mai ia na ra. 25 Ei ia na te parau mau na ù, e ta ù aroha vai ai e teitei hoì to na tara i to ù nei iòa. 26 E tuu vau i ta na rima àui i raro i te tai, e ta na rima àtau i raro i te pape. 27 E na na e pii mai ia ù e: O ta ù metua òe, e ta ù Atua. E ta ù pare e ora ai au ra. 28 E faariro vau ia na ei mätahiapo na ù, e ia teitei o ia i te mau arii atoà o te fenua nei. 29 E vai ä ta ù hämani maitaì ia na, e ta ù faufaa ia na ra e päpü ia. 30 E haamau vau i to na ra huaai e a muri noa atu, e vaiiho taiàta hoì to na teröno mai te mau raì atoà nei. 31 Ia faaruè ta na mau tamarii i ta ù ture, e aore i haapaò i ta ù ra parau au; 32 ia faahapa rätou i ta ù ra haapaòraa, e aore i faaroo i ta ù ra parau: 33 e papaì au ia rätou i ta rätou ra hara i te papaì, e to rätou ìno i te täìri. 34 O to ù rä hämani maitaì, e òre ia e hopoi-ê-hia ia na, e òre hoì te parau mau na ù ra e haamaìrihia. 35 Ta ù faufaa ra e òre e faaòrehia e au, e òre hoì e ruri ê i tei nä roto mai i to ù nei vaha. 36 Hoê aè nei a ù nei täpuraa i to ù iho ra moà: e e òre au e haavare ia Tävita. 37 E vai ä to na huaai e a muri noa atu, e to na teröno, mai te mahana ia i mua ia ù ra, 38 e tià ia i te vai-mäite-raa, mai te märama ra, e mai te ìte haavare òre i nià i te raì ra. Tera. 39 I teie nei rä, ua faaruè òe e ua haaveùveù; ua riri òe i ta òe i faatähinu ra. 40 Ua faaòre òe i te faufaa i to tävini nei, ua haaviivii òe i to na toröna i raro i te repo. 41 Ua vävähi òe i te mau âua na na, e ua huri-tumu-hia e òe to na mau haapüraa ètaèta. 42 Te haruhia ra o ia e te feiä atoà i haere nä te èà, e ua riro o ia ei faaìnoraa na to na ra mau taata-tupu. 43 Ua faateitei òe i te rima àtau o tei märô mai ia na, e ua faaòaòa òe i to na atoà ra mau ènemi. 44 Ua haamemu òe i te mata o ta na òè,  e aita atu ra o ia e mau i te àroraa ra. 45 Ua faaòre òe i to na ùnaùna, e ua huri òe i to na teröno i raro i te repo. 46 Ua haamure òe i te mau mahana o to na ra âpïraa, e ua vehi òe ia na i te haamä. Tera. 47 Mai te aha ra te mäoro, e te Fatu, o to òe haamoèraa? E vaiiho noa änei i to riri ia àma noa na mai te auahi e a muri noa atu? 48 E haamanaò i te poto o to ù nei taime. E e aha òe i hämani ai i te mau tamarii atoà a te taata nei ei mea faufaa òre ra? 49 O vai te taata e ora e eita e ìte i te pohe, a ora ai to na värua i te rima o häte? Tera. 50 Tei hea, e te Fatu, to mau hämani maitaì tahito ra, ta òe i haamau i te parau mau na òe ia Tävita ra? 51 E haamanaò, e te Fatu, i te faaìno i faaìnohia ai to mau tävini nei, e tei nià i taù ôuma te tähitohito o te taata nei e rave rahi. 52 Ta to mau ènemi i faaìno mai, e te Fatu, o tei faaìno mai i te haereà o tei faatähinuhia e òe ra. 53 Ia haamaitaìhia te Fatu e a muri noa atu. Âmene, e Âmene.

2 Te mau Arii 4.8-16

8 E tae aè ra i te hoê mahana, te haere ra Èritaia i Tünema, tei reira te hoê vahine taoà; e ua märô mai ra o ia ia na e àmu i te mäa. E muri aè ra, ua haere anaè o ia nä reira ra, ua täpae o ia e ua àmu i te mäa. 9 Ua parau atu ra o ia i te täne, Inaha te ìte nei au i teie nei taata e haere pinepine mai i ô nei, taata moà ia na te Atua. 10 Täua e hämani i te tahi piha ïti nö na i nià i te patu nei; a tuu ai täua i te tahi roì nö na, e te tahi àmuraa, e te tahi pärahiraa, e te tahi rämepa, e ia tae noa mai o ia i ô nei, a täpae mai o ia. 11 E tae aè ra i te hoê mahana, ua haere mai ra o ia i reira, e ua täpae aè ra i roto i taua piha ra, e ua taòto iho ra. 12Ua parau atu ra o ia i te tävini ia Tehati, A pii atu na i te vahine Tünema. E oti aè ra i te piihia e ana, ua tià noa mai ra i mua ia na. 13 Ua parau atu ra o ia ia na, E parau atu òe ia na e, Inaha, i faaitoito noa na hoì òe ia mäua i tënä na faaitoitoraa; e nä hea atu ra mäua ia òe? Ia parauhia atu änei òe i te arii, e te raatira o te nuu nei ? Ua nä ô mai ra o ia, Te pärahi nei au i roto i to mätou iho nei. 14 Ua nä ô mai ra o ia, E nä-hea-hia atu ra o ia? Ua parau atu ra Tehati, Aita a na e tamaiti, e ua ruhiruhiä hoì te täne. 15 Ua parau mai ra o ia, a pii atu na. E oti aè ra o ia i te piihia atu, te tià noa mai ra i te ùputa. 16 Ua parau atu ra o ia, Mai teie nei, i te tau i haapaòhia ra, e tamaitihia ta òe. Ua parau mai ra o ia, Eiaha, e ta ù fatu, e te taata o te Atua ra, eiaha na òe e haavare mai i to tävini nei.

Rōma 6.3-11

3 Aita ä òutou i ìte o tätou atoà tei päpetitohia i roto i te Metia ra ia Ietu, ua päpetitohia ia i roto i to na ra pohe? 4 E teie nei, ua tänuhia tätou e o ia atoà, i te päpetito-raa-hia i roto i to na ra pohe; mai te Metia i faatiàhia e te mana o te Metua i te poheraa ra, ia haapaò atoà tätou i te haereà e au i te ora âpï. 5 I âpiti-atoà hia hoì tätou ia na i te huru o to na ra pohe, e âpiti-atoà-hia ia tätou i te huru o to na ra tiàfaahouraa i nià. 6 Ua ìte hoì e ua faatataurohia to tätou taata tahito e o ia atoà hoì, ia paruparu te tino o te ìno, ia òre tätou ia faaroo tävini faahou i te ìno nei. 7 O te taata hoì i pohe ra, ua matara ia o ia i te ìno nei. 8 I pohe na hoì tätou e te Metia atoà, ua ìte hoì tätou e, e ora tätou e o ia atoà hoì. 9 Ua ìte hoì tätou e, o te Metia i faatiàhia i te poheraa ra, e òre ia e pohe faahou, e òre hoì e mana faahou te pohe ia na. 10 O ia hoì i pohe ra, i pohe ia i te hara, hoê roa rä poheraa; o ia rä i ora ra, i ora ia i te Atua. 11 E manaò atoà hoì òutou ia òutou iho, e ua pohe mau i te ìno ra, ia ora rä òutou i te Atua, i to tätou Fatu ra ia Ietu Metia.

Mātaio 10.37-42

Te haapaeraa ia na iho no te pee ia Ietu

(Mär 8.34-35; Rut 14.26-27; 9.23-24)

37 O tei rahi to na hinaaro i ta na metua täne, e aore ia, i ta na metua vahine, iti ia ù, aita o ia i au ia ù, e o tei rahi aè to na hinaaro i te tamaiti, e aore ia, i te tamahine, iti ia ù, aita o ia i au ia ù. 38 E o të òre e rave i to na tätauro a pee mai ai ia ù, aita o ia i au ia ù. 39 O tei ìte i to na ora, e ère ia i te ora; âreà tei ère i to na ora no ù nei, e ìteä ia ia na te ora.

Tei färii mai ia òutou, ua färii mai ia ia ù

(Mär 9.37, 41; Rut 9.48; 10.16; Ioa 13.20)

40 O tei ìte/färii mai ia òutou na, ua ìte/färii ia ia ù, e o tei ìte/färii mai ia ù nei, ua ìte/färii ia i tei tono mai ia ù nei ra. 41 O tei ìte/färii mai i te perofeta, no te mea e perofeta, e noaa ia ia na ta te perofeta ra utuà; e o tei ìte/färii mai i te taata parau tià, no te mea e taata parau tià, e noaa ia na ta te taata parau tià ra utuà. 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Manaò.

Na taiòraa e maha tei haapaòhia no tätou no teie täpati, e piti parau e ärataì ra te tahi manaò ia au i te rahiraa o te mau parau e vai ra e to rätou faufaa. Na parau ra e piti tei haapaòhia mai teie, Te Haapae, e te Färii. Te haapae to tätou ia tuuraa i te hiti i te mau mea atoà e haaäpiäpi te tupuraa o te hoê òhipa e faaìteraa i te maitaì, no te ärairaa i te ìno. Te Färii, te tupuraa ia no te hoê òhipa e faaìte ra i te maitaì. Ia au i te haapotoraa o na taiòraa e maha nei.

-Taramo 89, 7 O vai te mau raì e au i te Fatu, i roto i te mau tamarii a tei mana ra.

-2 Mau Arii 4, 16 E tamaitihia òe, eiaha na òe e haavare mai i to tävini nei.

-Roma 6, 11 E manaò, ia ora òutou i te Atua, i to tätou Fatu ra ia Ietu Metia.

-Mätaio 10, 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Te faaìteraa ia a te Parau Maitaì ia tätou i teie mahana i te päpaìraa a Mätaio i te pene 10 i te mau ìrava 37 e tae i te ìrava 42, oia hoì, Te haapaeraa ia na iho no te pee ia Ietu, ìrava 37 e tae i te ìrava 39, Tei färii mai ia òutou, ua färii mai ia ia ù ìrava 40 e tae i te ìrava 42. Ia au i na parau e piti nei te manaò e ärataì ra mauti ra, ia haapae te taata i ta na, no te färii i ta te Atua Nui Tumu Tahi, oia hoì, na Mua ta te Atua e tià ai, ia oti ta te Atua haapaò atu ai te taata i ta na. Te auraa teie manaò, na te Parau a te Atua e ärataì e faanaho te ôpuaraa faaora o te fenua e to te raì. Ia faaroo tätou te manaò o te päpaì Taramo 7 O vai hoì to te mau raì ra e au i te Fatu. O vai tei au i te Fatu i roto i te mau tamarii a tei mana ra. Ua ineine to te raì i te täuturu i te taata i roto i te mau tamarii o te fenua nei. Ia na reira tätou i te färii te ìteraa i te mau faufaa o te raì, e to te fenua e au tätou i te Atua, e ìte tätou i te höroà i te hoê âuà päpe na te mau taata rii no te mea e pipi o ia na Ietu, e òre roa o ia e ère i te utuà. Te faaìte nei o Ietu i te tumu o to na tere i te ao nei, ia au i teie mau reo, i roto i ta tätou taiòraa no teie mahana. Te haere mai nei O ia i te ao nei ia tupu te parau tià, ia haapaòhia te taata riirii. Ia òre te taata ia faaea noa i roto i te tau no te pö mutu òre, te matara nei te ùputa o te märamarama e te ora. Nä roto ia Ietu, ua riro mai te reira märamarama ei taata, ua hiti mai i roto i te oraraa o te taata e ua faatupu atoà i te mau täuiraa rarahi. Te täuiraa e tupu nei to te taata ia ìteraa i te hinaaro, no te faatae i te mau ôpuaraa i roto i to na ötiraa. I te mea ua toe te òhipa tei òre i tae i nià i to na mau faanahoraa i parau ai o Ietu i te Au, tei Au i to na ùtuafare, to na fëtii, aore ia i Au ia Ù, te manaò o Ietu i ù nei, ua ère teie pupu taata i te haapiiraa a te Atua e ta te fenua, aore rätou e ìte nei i roto i te fenua, e te raì, te aroha e te here o te Atua Nui Tumu Tahi, te Au to te taata ia tüàtiraa i te faufaa o te òhipa e tupu ra tei tae roa i roto i to na âau, e to na värua. No reira te taata, tei roto to na parau i to na rima, e tiàmäraa to na no te färii e no te òreraa e färii i te märamarama o te parau, e tiàmäraa to na no te hinaaro i te märamarama, aore ra te pöuri. Nä roto rä i teie öraa mai te märamarama i roto i te öraraa o te taata, teie te mau täuiraa e ìtehia atu, te feiä i faaèrehia na i te ìte, o rätou të ìte i teie nei ; e te feiä i faariro na i te ìte ei faufaa e hau ai rätou i nià i te taata, o rätou të haapöirihia, a riro atu ai mai te matapö ra te huru. Te mea ta Ietu e parau ra e, tei färii mai ia òutou, O vau ta rätou e färii nei. E parau tià teie e faahitihia nei i roto i teie fäìraa ta Ietu, e parau ia no te utuà. Eiaha rä tätou e rü noa i te faaoti i te auraa o teie parau i nià i te mea ta tätou i mätau. Mai te peu na te märamarama e faataa ra i te pö i te ao i roto i te rahu a te Atua, na te parau tià e utuà mai i teie nei i te taata. No reira, ia parau tätou e, utuà, eiaha tätou e manaò i te huru utuà mai teie ta tätou i mätau i te ìte. Te auraa o teie taò utuà, e mauruüru ta tätou noa ra i mätau i te parau e faahapa, aita o Ietu e faahapa nei tei färii i te mau perofeta, te mauruüru nei ra, te utuàhia nei rätou no te mea ua ìte rätou i te hoê taata rii e pipi na Ietu, tei höroà i te hoê âuà päpe toètoè. No reira, ia au i to te taata färii, aore ra to na färii òre i te parau a te Fatu, te riro ra o ia mai te òraparaa o te âvaè i tanohia i nià i te ànaana o te mahana, aore ra tei òre i tanohia, ua riro te färiiraa ei täpaò no te märamarama ; âreà te òreraa e färii, e täpaò ia no te pöiri. E hape tätou ia faariro i te märamarama ei fäitoraa taata, te vai ra te feiä märamarama, e te vai ra te feiä pöiri. Eere roa atu te reira. Inaha o Ietu te märamarama o teie nei ao, te färiiraa ia Ietu no ta na parau, te mea ia e ìtehia ai te taata i hitihia e te märamarama.

Teie te reo märamarama o Ietu ia tätou i teie mahana, 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Ia ora na.

Teraì òr. Faatura.