Papa Haamori Tāpati 16 no Âtete 2020

 

Tāpati 16 no Âtete 2020.

Papa Haamori.

Färiiraa.

E hoa here mä e, Ia faahiti hoì tätou i te parau o te ätea, no te mea ia ua ìte tätou i te vähi ta tätou i faaruè, nä reira hoì te èà hoìraa. No reira e òre ai e tià i te taata ia òre ia rave i ta na tuhaa ; te mea hoì te reira e rave ai te Atua i ta na tuhaa. Te auraa, te vai ra ta te Atua ôpuaraa no te taata, aore ra te vai ra ta te Atua ôpuaraa ta na e hinaaro ra ia tomo atoà te taata i roto, e ia rave o ia i ta na tuhaa. Te märamarama noa ra tätou e, te hinaaro o te Atua i te taata, ia tauturu ia o ia i te Atua i te faatupuraa i to na hinaaro. E tano tätou e parau e, ia ìte òe i te Atua, ua ìte atoà òe e, e tuhaa ta òe i te Atua ra. E haapae roa tätou i te manaò e, e Atua faaueue te Atua e te hinaaro faatina i te taata i nià i te òhipa. Ia haapäpü mai hoì te Atua e : Ta ù mau i ìmi ra, te reira te tupu ; e ta ù i ôpua ra, te reira të mau  Ìtaia pene  14 ìrava 24, no te haamanaò ä ia i te taata e, eita te Atua e taui i ta na parau. Haamaitaì tätou i te Atua i te hoê reo himene e tià mai tätou.

 

Himene.

Pärahi tätou

 

Teie te parauraa a te päpaì Taramo, ia au i te faahitiraa a te Taramo 67 1 Na te Mënätehe, i nià i te Netinota. Taramo e himene. 2 E aroha mai ia mätou, e te Atua e, e haamaitaì mai ia mätou E faaanaana mai hoì i to mata i nià ia mätou. Tera.3 Ia ìteä to parau e àti noa aè teie nei ao, e te ora na òe i te mau êtene atoà ra. 4 Ia haamaitaì te mau taata ia òe, e te Atua e Ia haamaitaì tahi te taata atoà ia òe 5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì Tera. 6 Ia haamaitaì te mau taata ia òe, e te Atua e Ia haamaitaì tahi te taata atoà ia òe 7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei. 8 E tämau ä te Atua i te haamaitaì mai ia tätou, e e tae roa te mataù ia na i te mau hopeà atoà o te fenua ra.

E te Atua Nui Tumu Tahi e, aroha mai ia mätou te feiä hara nei. Âmene.

 

Himene Tätarahapa.

 

Teie te aòraa a Ìtaia i te pene 56 i te mau ìrava 1 e tae i te ìrava 7, Te aò mai nei te perofeta i te taata ia haapaò maitaì 1 Te nä ô mai ra te Fatu: E tämau i te parau au, e rave i te parau tià; ua fätata hoì te ora na ù, teie tei pïhaì iho; e te parau tià na ù ua fätata i te faaìtehia mai. 2 E ao to te taata e rave i teie; e te tämaïti a te taata ia Täpeà maitaì i taua parau nei, o tei haapaò i te Täpati, aore i haaviivii ra; e aore to na rima i rave i te parau ìno. 3 E eiaha te tämaïti a te taata ê ra e parau, o tei àti i te Fatu ra, eiaha e nä ô e, Ua faataa-ê-roa-hia vau e te Fatu i to na ra mau taata. Eiaha atoà te èunuta e parau e, Inaha, e räau marô vau. 4 Te nä ô mai ra hoì te Fatu i te mau èunuta, o tei haapaò i to ù ra mau täpati, e o tei rave i tei auhia e au ra, e ua haapaò mäite i te faufaa na ù ra; 5 o ta ù ia e höroà i roto i to ù nei fare, e i roto i ta ù nei âuà, i te manaòraa e te iòa, o tei hau ê i te iòa tamäroa e to te mau tamähine: e iòa vaiiho tämau ta ù e hö atu no rätou, e òre roa e faaòrehia ra. 6 E te mau tamarii o te taata ê o tei àti i te Fatu ra, ei haamori ia na, e ia hinaaro hoì i te iòa o te Fatu, e ia riro ei tävini nö na: te feiä atoà i haapaò i te täpati, e aore i haaviivii atu; e o tei haapaò tämau mäite i ta ù ra faufaa: 7 o rätou ta ù e ärataì i roto i ta ù mouà moà ra, e faaòaòa vau ia rätou i roto i ta ù fare pureraa: e färiihia ta rätou mau tütia täauahi e ta rätou mau tütia i nià i te ta ù fata; e parauhia hoì ta ù fare, o te fare pureraa no te taata atoà.

Oia atoà ia ta Pauro parauraa ia tätou i teie mahana Rōma pene11 i te mau ìrava 13 e tae i te ìrava 32 Te faaoraraa o te Ètene te Ètene e parauhia nei te nünaa 13 O òutou o te Nünaa ta ù e parau atu nei, te haamaitaì nei au i to ù nei töroà, no te mea o vau te âpotetoro o te Nünaa: 14 peneiaè o te oôo faatïpaupau oia hoì te pohehae to ù ra nünaa ia ù, e ia ora te tahi pae. 15 To rätou faaruè-raa-hia ra, o te faite oia hoì o teie faahau ia oè i to te ao, a tae ai hoì i te färiiraa atu ia rätou, e òre änei e riro mai te ora no te pohe mai? 16 Te moà ra te hoturaa mätamua ra, oia atoà te rahi atoà; e te moà ra te tumu ra, oia atoà te mau âmaa. 17 E i ôfene-ê-hia tahi pae i taua mau âmaa ra, e o òe hoì, e te âmaa o te tahi ôrive ê ra, tei poihia i roto ia rätou, e tei ia òe atoà te tumu e te hinu o taua ôrive ra. 18 Eiaha òe e faaoôo teòteò atu i taua mau âmaa ra. Ia teòteò hoì òe ra, e haamanaò eere òe të mau i te tumu, o te tumu rä të mau ia òe.19 E parau mai änei òe e: I ôfene-ê-hia te mau âmaa ia poihia vau i roto ? 20 Ua tià ia. No te faaroo òre i ôfene-ê-hia ai rätou, e e tià faaroo hoì to òe. Eiaha ei âau teitei, ei mataù rä. 21 Aore te Atua i faaherehere i te mau âmaa mau ra, e ara, o te òre atoà hoì o ia o të faaherehere ia òe. 22 E teie nei, a hiò na i te hämani maitaì e te faaherehere òre a te Atua, faaherehere òre i te feiä i hià ra, âreà ia òe ra, o te hämani maitaì ia, ia haapaò tämau òe i to na hämani maitaì, aore rä, e ôoti-ê-atoà-hia òe. 23 E o rätou atoà hoì, ia òre rätou ia tämau märô i te faaroo òre ra, e poihia ia i roto: e tià hoì i te Atua ia poi faahou ia rätou i roto. 24 I ôoti-ê-hia mai òe no nià i te ôrive ôviri mau, e i poi-ê-hia òe i roto i te ôrive maitaì: a tae ai hoì ia rätou i te âmaa mau ra, e poihia mai ia i roto i to rätou iho ôrive. Haamaitaì tätou i te Atua Nui Tumu Tahi tei poi ia tätou i roto i te tumu no te ora e tià ai.

 

Himene òaòa

 

25 Aore hoì au i hinaaro, e a ù mau taeaè, e ia òre òutou ia ìte i teie nei parau àro o te teitei hua hoì to òutou manaò ia òutou iho, e ua roohia Ìteraèra i te pöuri poto, e ia ö atoà mai te rahi atoà o te Ètene ra. 26 E ora päatoà ai Ìteraèra atoà, oia hoì tei päpaìhia ra e: E tae mai te Faaora mai roto mai ia Tiona, e e faaòre o ia i te paieti òre i Iatöpa ra. 27 E o ta ù a hoì teie faufaa ia rätou ra, ia hopoi ê atu vau i ta rätou ra hara. 28 I te haapaòraa i te Èvaneria nei, ua riro ia rätou ei ènemi ia òutou: âreà i te mäìtiraa te herehia nei ia rätou no to rätou feiä metua. 29 O ta te Atua hoì i horoà noa e ta na parauraa, aore ia faaòreraa. 30 Mai ia òutou hoì aore i faaroo i te Atua i mütaa iho ra, e teie nei rä, ua arohahia mai òutou i to rätou faaroo òre ra. 31 Oia atoà hoì rätou, ua òre aè nei ua faaroo i teie nei, o òutou i arohahia mai, ia aroha-atoà-hia mai rätou. 32 E faaroo òre anaè hoì rätou atoà i te vaiiho-raa-hia e te Atua, ia aroha mai o ia ia rätou atoà. Âmene.

Pärahi tätou.

Haamaitaì tätou i te Atua i te hoê reo himene.

 

Himene

 

Pure

Pure tätou i te Atua, i teie taime e taiò ai mätou i te Parau Maitaì o ta Òe Tämaïti ia au te päpaìraa a Mätaio a türama ia mätou i te ìteraa i te faufaa o teie mau parau te tià e tauturu ia mätou i roto i to mätou oraraa. Âmene.

 

Taiòraa.

Mātaio 15.21-28

Te faaroo o te vahine âti-Tanaana

(Mär 7.24-30)

21 Reva atu ra Ietu, haapaì tià atu ra i te tuhaa fenua i Turia e Titona. 22 E inaha, ua haere mai ra ia na ra te hoê vahine âti-Tanaana no reira iho e ua pii mai ra ia na: E te Fatu, te Tamaiti a Tävita, e aroha mai òe ia ù  Ua uru-maamaa-hia ta ù tamahine e te hoê tëmoni  23 Aita rä o ia i pähono noa atu ia na. Ua haafätata mai ra ta na mau pipi, ua parau maitaì mai ra ia na: A faahoì atu ia na, te pii noa mai ra o ia i muri iho ia tätou. 24 Ua pähono atu ra o ia: Aita vau i tonohia mai, mäori rä i te mau mämoe anaè i moè i te ùtuafare o Ìteraèra. 25 Ua haafätata noa mai rä o ia, tähopu mai ra ia na, nä ô mai ra: E te Fatu e, e tauturu mai òe ia ù 26 Ua pähono atu ra o ia: E mea au òre roa ia rave i te färaoa a te tamarii, no te tïtiri atu na te fanauà ùrï. 27 Ua parau mai ra o ia: Oia mau, e te Fatu, te àmu mau nei rä te ùrï i te huàhuà rii färaoa i maìri mai no nià i te àmuraa a to rätou ra mau fatu. 28 Ua pähono atu ra Ietu ia na: E teie nei vahine, e faaroo rahi to òe  O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

 

Pure

Pure tätou i te Atua, Te ìte nei mätou e, e tuhaa ta mätou ia Òe ra e te Atua Nui Tumu Tahi. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene

Parau faaära

Püpüraa moni

 

Pure ärai.

E te Atua Metua, te Atua no te here e te aroha, te haamaitaì nei e te haamauruüru nei mātou ia òe, o òe i arataì mai ia mātou i te mau mahana atoà o to mātou oraraa nei. Rau noa atu ā to mātou huru i mua ia òe, aita òe i vai iho ôtare noa ia mātou, ua faaherehere rā òe ia mātou i roto i te rima aroha noa no òe. Aita òe i faaère ia mātou i te hoê mea ïti noa aè i roto i to mātou oraraa nei, noa atu ā to mātou huru haapaò òre i ta òe mau faaueraa. E au ra paì e, ia topa te taata i roto i te fifi e te ìno, e rahi roa atu to òe peàpeà e to òe hinaaro e ùme mai ia rātou, e ia faanaò atoà rātou i te ora na òe. Ia haamaitaìhia e te Atua Metua no ta òe rahu, ta òe parau mahora noa, to mātou tauturu au i roto i te oraraa nei, na reira atoà i roto i te tāviniraa. Na roto i ta òe rahu, ua aupuru, ua faaàmu, ua àtuàtu, e ua haapii tāmau òe ia mātou i te tāviniraa mau e au ia mātou ia rave. Ia haamaitaìhia òe e te Atua Metua no te rahi o to òe here e to òe aroha ia mātou te taata nei. Âmene.

 

Haamaitaì tätou i te Atua i te hoê reo himene âmui e tià mai tätou.

 

Himene.

 

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Faaitoitoraa. E teie nei vahine, e faaroo rahi to òe  O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

 

Haamaitaìraa.

6 Ia haamaitaì te mau taata ia òe, e te Atua e Ia haamaitaì tahi te taata atoà ia òe 7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei. Âmene.

 

Teraì òr. Faatura.

 

Mätaio 14, 22-33 Täpetepete

 

Tāpati 9 no Âtete 2020.

Täpetepete

Taramo 85

1 Na te Mënätehe. E Taramo na te tamarii a Tora. 2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri.5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra? 7 Eita änei òe e faaanaanaea mai ia mätou, ia òaòa to mau taata ia òe ra? 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua. 11 O te aroha e te parau mau, ua färerei ia räua; o te parau tià e te hau, ua hohoì räua. 12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua. 14 E nä mua ia na te parau tià i te haere, e na te reira e faaìte mai i to na haereà.

1 Te mau Arii 19.9-13

9 Tae atu ra o ia i reira i roto i te hoê ana, e ua taòto iho ra i reira; e inaha, ua tae mai ra te parau a te Fatu ia na, nä ô mai ra, Te aha noa na òe i ô na, e Èria? 10 Ua parau atu ra o ia, itoito noa na vau i e te Atua Täpäota i te Fatu: ua faaruè te tamarii a Ìteraèra i ta òe parau, e ua huri i ta òe fata i raro,  ua täparahi i te mau perofeta na òe i te òè; e io vau nei, o vau anaè nei tei toe: e te ìmi mai nei rätou ia ù nei ia pohe. 11 Ua nä ô mai ra o ia, A haere, ei nià i te mouà tià noa ai i te aro o te Fatu. E inaha, ua haere iho ra te Fatu nä reira iho, o te mataì rahi iho ra e te ètaèta, i te haapararïraa i te mouà, e te vävähiraa i te mato i mua i te aro o te Fatu; aita rä te Fatu i roto i taua mataì ra; e mure aè ra te mataì, o te âueue fenua iho ra; aita rä te Fatu i roto i taua âueueraa fenua ra: 12 e oti aè ra te âueueraa fenua, e auahi; aita rä te Fatu i roto i taua auahi ra: e oti aè ra te auahi, e reo iti haìhaì mai ra, tei reira te Fatu. 13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria?

Rōma 9.1-5

Te Atua e te nünaa ta na i mäìti

1 E parau mau hoì ta ù i te Metia, aore au i haavare, te faaìte âpipiti mai nei te Värua Maitaì e ta ù âau ia ù: 2 e e òto rahi to ù, e te mäuiui tuu òre i roto i ta ù âau. 3 E tià hoì ia ù ia ànatemahia vau e taa ê atu vau i te Metia ra, i ta ù mau taeaè, to ù ra fëtii i te haapaòraa i te tino nei. 4 I te âti-Ìteraèra ra, no rätou te faatävai ra, e te ànaana, e te faufaa ra, e te ture i horoàhia ra, e te haamoriraa, e tei parauhia mai ra. 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

Mātaio 14.22-33

To Ietu haereraa nä nià i te miti

(Mär 6.45-52; Rut 6.16-21)

22 I muri mai, ua faaue atu ra Ietu i ta na mau pipi e paìùma i nià i te poti e e fano nä mua ia na i te tahi pae roto, a faahoì noa ai o ia i taua tiàa rahi ra. 23 E oti aè ra te tiàa rahi i te faahoìhia, paìùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira. 24 Ua huru ätea hoì te poti i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì. 25 E tae aè ra i te maha o te äraraa o te ruì ra, ua haere mai ra o ia ia rätou ra i nä nià i te àre. 26 I te taime i ìte atu te mau pipi ia na i te haereraa mai nä nià i te àre, riàrià roa aè ra rätou, nä ô aè ra: E tüpäpaù E ua auë anaè iho ra i te mataù. 27 Ua parau atu ra rä Ietu ia rätou i reira ra, nä ô atu ra: A faaitoito, o vau teie, eiaha e mataù  28 Ua pähono mai ra Pëtero ia na: E te Fatu, mai te peu e o òe tënä, a faaue mai ia haere atu vau ia òe na nä nià i te àre. 29 Ua parau atu ra Ietu: A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre. 30 Ia ìte rä o ia i te ûàna o te mataì, mataù iho ra, e haamata iho ra i te mure i raro, ua tuö atu ra: E te Fatu, a faaora ia ù 31 Ua faatoro mai ra Ietu i ta na rima i reira ra, haru mai ra ia na, nä ô mai ra: E teie nei taata faaroo haraìni/täpetepete, e aha òe i feàa ai? 32 E ia tae räua i nià i te poti, faaea iho ra te mataì. 33 E te feiä i roto i te poti, tähopu/haamori mai ra ia i mua ia na, nä ô mai ra: Òia mau, o te Tamaiti mau ä òe a te Atua.

Manaò.

Ei hioraa àmui.

Te tahi manaò tumu e vai nei i roto i na taiòraa e maha nei teie ia e vai nei ia au te faaìteraa a te Taramo 12 E tupu mai te parau mau no roto i te fenua, e hiò mai hoì te parau tià mai te raì mai. E tumu parau teie e ìtehia nei i roto i na taiòraa e maha nei, to te Atua faaitoitoraa i to na mau tävini tei mataù, i te mau haafifiraa rau a te mau ènemi. Tei  roto i teie mau fifi to te Atua horoàraa i te puai i to na mau tävini. O ta tätou ia e hiò i teie nei i to Ietu faaitoitoraa i ta na mau pipi i te taime a fifi ai rätou i nià i te poti.

Èi ia faaroo tätou i te haapotoraa o na taiòraa e maha, te faaìte noa mai ra te reira te huru o te tävini i mua i te Atua Nui Tumu Tahi.

-Taramo 85, 12 E tupu te parau mau i roto i te fenua, e hiò te parau tià mai te raì mai.

-I Mau Arii 19, 13 Te aha noa na òe i ô na, e Èria?

-Roma 9, 1 E parau ta ù i te Metia, aore i haavare, faaìte âpipiti mai nei te Värua Maitaì.

-Mätaio 14, 31 Ua faatoro Ietu i ta na rima, haru mai ra E te taata faaroo täpetepete, e aha òe i feàa ai?

Ei manaò tatara.

I muri äè i to Ietu faaàmu  temeioraa i na taata e 5 000 i reira  to na haapäpüraa i te auraa mau no te mäna i àmuhia e Ìteraèra i te mëtëpara, ua faaue o ia i ta na mau pipi ia haere i nià i te pahï no te fano i te tahi pae. Eita e òre e, ua na reira o ia no te faateäraa ia rätou, i te tahi manaò tei tupu i roto i teie nei nahoà rahi tei hinaaro i te faariro ia na ei arii ia au i te faaìteraa a Ioane 6,15, faatea ia rätou  ia òre ia  ö i roto  i taua manaò ra. E aita e òre e, o te tahi atoà  ia tumu i haere ai o ia i nià i te mouà e pure, faateäraa i taua tämataraa  ra, te riroraa ei arii ia au i te hinaaro o te taata o te tuu ia na i mua, o te tuu  ia na i nià aè i te taata. Ua haere mai  o ia no te taata i rotopü i te taata, no te tauturu ia na i to na mau âti, no reira e haere o ia na nià i te miti eiaha ra na nià i te manaò o te taata.

Te mau pipi tei fäno na nià i te pahï, aita i maoro atu te fanoraa i ü ai i te fifi, te mataì puai tei na mua mai e te puai hoì o te miti. Te faahaamanaò atoà ra ia tätou i te tahi àti  tei färereihia e rätou, i reira o Ietu i te faaueraa  i te mataì e te miti ia faaea, e ua faaea iho ra. E mea fifi atu ra teie tere ia hiòhia, no te mea aita pai o Ietu ia rätou ra, o rätou änaè ra. Ua tuu änei Ietu ia rätou no te tahi haapiiraa no te tupuraa o to rätou faaroo? E aore ra e haamataùraa e faaìteraa ia rätou e, o rätou o ta na i faariro ei mau ravaai taata, no teie nei ao i reira rätou e òhipa ai e mea fifi ia e te rave àta, e ere ra i te mea hau noa. Ei faaìte-atoà-raa ia rätou e, te vai ra te mahana aita o ia i rotopü ia rätou, i roto ra i te tahi huru atu hiòraa, ia tae i te reira taime ia òhipa ia rätou, e na rätou hoì e faatere i te pahï, e ere ra no to na hinaaro e faaruè ia rätou, no to na ra here i na reira ai o ia, o te poroì ra ia no to na revaraa. Ua hinaaro atoà o ia ia riro te feiä ta na i here e tei here ia na ei mau taata paari. Aita to rätou tere i ätea roa atu i haamata ai te mau fifi e vahi rahi a te toe ra e tïpae ai, ei faaìteraa e, aita te pahï no te Ètärëtia i nuu rahi i mua i te taime o Ietu i vaiiho ai ia na änaè; aita änei hoì te reira e faaìte atoà mai ra i to tätou mau täupupuraa. Ua vaiiho Ietu ia rätou ia hoe noa i tera pö e tae noa atu ra i te âahiata, i haere mai ai o ia ia rätou ra na nià i te miti no te faaìteraa e ua upootià o ia i nià i te miti, ua upootià o ia i nià i te pöuri, o te Tamaiti o ia a te Atua Nui Tumu Tahi tei mana i nià i te mau mea hämanihia e tei mau hoì ia rätou, mai te òhipa tei tupu i te miti ùteùte tei paruru i te faaoraraa ta te Atua i hinaaro no to na nünaa, i tapu ai o ia ia na. Ia tià ia Ìteraèra ia haere ma te fifi òre, e i reira Ìteraèra i te himeneraa i te upootiàraa no te Atua i te taime no te hämaniraa ra e no to na ratereraa na roto i te miti ùteùte. Te faaâpï nei o Ietu i te reira i to na haereraa i nià i te miti, te miti o tei riro ei täpaò no te mana o te ìno no te pohe o tei haafifi i ta na ôpuaraa faaora eita te reira e mau ia rätou noa atu te huru no te mana. Te parau ra Pauro i to Torota i te pene 2 ìrava 15 E PAU  AE RA  IA  NA  TE  FEIA  HAU  E  TE MANA  RA, FAARIRO  ATU RA IA  RÄTOU  EI HIÒRAA  I  TE  VAHI, I TE VAHI  ATEA  MA  TE ÙMERE  I NIÀ IHO IA RÄTOU  I  TE TÄTAURO  NO NA  RA. Te parau ra Pauro i te upootiàraa tei tupu i Toratota, e o te reira mau atoà ta teie parau e faaìte mai ra ia rätou. Ua haere  mai o  Ietu  ia rätou  ra na nià  i te miti, aita roa ra rätou i taa e,

o Ietu teie, ua rahi atu ra to rätou huehue e te mataù, mai to rätou manaò  e tüpäpaù. Inaha  hoì ua àfaì  mai  o ia i te hau. A FAAITOITO O VAU EIAHA E MATAU. E àhiri o ia e haere mai ia tätou ra i teie mahana, i teie po, hoê-a to tätou huru e to tätou manaò e to te mau pipi. Eita tätou e ìte, o o ia teie no te mea, ua huna tätou ia na i roto i ta tätou mau feruriraa e ta tätou mau faanahoraa e au ra e aita o ia i tiàfaahou e aore ra no te maoro aita atu ra tätou i tiaì mau ia na i to na haereraa mai. Inaha te haere mai nei o ia no to na here ia rätou, no to na here i ta na Ètärëtia.

Te haapäpü atoà nei teie parau e, ua hinaaro te Fatu ia tätou ia òhipa no na. Ia òre roa ia  moè ia tätou e, e mea ïti to tätou faaroo e ua riro tätou ei taata tei mataù i te taime no te mataì puai, e ia  riro  tätou  ei mau taata haehaa  tei tiàturi mau ia na e tei ìte mau ia Ietu ei Tamaiti na te Atua.

Ietu tei na nià mai i te miti te haere e i to na taeraa mai i nià i te pahï, ua faaea te mataì e te miti, ua hau. E ere roa ra to na na reiraraa no te  faaìteìte noa, no te faahiòraa ra ia rätou i nià i te òhipa rahi no to na tiàfaahouraa, te mataì puai e te miti puai ua faaau mai o ia i te reira i roto i to na oraraa rahi ta na i àro na roto i te mauiui e tae noa atu ra i nià i te tätauro, e ua faatià  mai te Atua ia na mai roto mai i te pohe, ei Fatu ora, no te horoà i te ora e te hau.

Ia riro ta tätou mau àroraa, ei mau vahi no to tätou tiàturiraa ia na, te mau àroraa no te aroha e no te parau tià ta tätou e àro nei, e upootià tätou eiaha na roto ia tätou iho, na roto ra ia na tei tiàfaahou e tei here roa ia tätou. Tei nià tätou i te pahï no te Ètärëtia e teie mai nei te mataì, e te miti o tei haafifi i te tere, tei faatupu i te mataù e te peàpeà. E aha mau te auraa no te reira no tatou i teie mahana? Te faaìnoraa e te haaviiviiraa na te taata i te mau òhipa ora atoà ta te Atua i rahu; te faatupu atoà nei te reira i to tätou peàpeà. E ere  ra o te reira anaè i te mea e, aita te mataì puai i tupu noa i roto i te aru tei roto atoà ra i te parau no te oraraa e no te ärataìraa o te mau nunaa, te parau no te tamaì e no te mau mauhaa tamaì; te parau no to te tahi pupu riroraa i nià aè i te tahi, te parau no te faaereraahia te taata i to na tiàraa. I roto i teie nei ao te vai ra te tahi mau vahi mataì puai na roto i te tuàti-ore-raa te tahi nunaa i te tahi, te farii-ore-raa i te tahi i te tahi. Te mataì puai tei roto atoà ia i te tahi mau ùtuafare te farararaa tei faaaueue e tei  haaparari, e tei roto atoà i te taata iho, ia tätou to tätou mau mataùtaùraa no te mea, te ere ra tätou i te tahi mau mea tumu no te oraraa e tae noa atu  hoì i teie parau fifi rahi e te peàpeà no te àva e te àvaàva taèro. Te farara atoà nei te mataì i roto  i te  âmuiraa faaroo, to tätou mau tüàtiàtiraa tei òre i päpü, te ïti no to tätou oraraa faaroo, te ïti no te taime ta tätou i faataa no te haafatataraa hoì i te Atua i roto  i te muhu-òre e te pure. Ua na reira Ietu te Tamaiti iho a te Atua e aha atu ia tatou?

Te fifi  no te huru o te vaamataèinaa ta tätou e ora nei, o te tià e faaòre i te manaò aroha, te manaò tauturu haapaò noa atu ai te taata ia na änaè, o te faaòre i te tiàturiraa  o te taata  i te Atua ei ora  mau, te faatupu atoà nei te reira i to tatou peàpeà.

Ia au i teie mau manaònaòraa, te haapäpü mai nei o Ietu e tei roto ia na te tiaìtururaa mau, to tätou ora  mau, tei parau mai, 31 Ua faatoro Ietu i ta na rima, haru mai ra E te taata faaroo täpetepete, e aha òe i feàa ai ?

Tei nià tätou i te pahï no te Ètärëtia, tei reira te feiä  ruhiruhiä, te feiä paari, te feiä âpï, te mau tamarii, te tane, te vahine. I roto i te matai puai e te miti, ia täuturuhia tei paruparu, ia òre ra te tahi ia haapaò noa ia na anaè, e ia òre te tahi ia hiò noa, ia âmui ra no te raveraa i te òhipa.

I roto i teie nei ao àrepurepu, ua tïtauhia tätou ia faaìte i te Fatu tei tiàfaahou, ia faatupu i to na hau e i ta na parau tià, e no te ora i to na aroha. Tätou e to te hui-faaroo, tei horoàhia te òhipa faaìteraa i te hanahana o te Atua Nui Tumu Tahi, a mau e a rohi, te parau atoà mai ra o Ietu ia tatou, E te taata faaroo täpetepete, e aha òe i feàa ai ?    

                       

Te tiàturi mau ra nei tätou i teie reo?

                                  

 

Teraì òr. Faatura.

 

 

 

 

Mätaio 14, 13-21. Èita e pau te Maitaì o te Atua.

Tāpati 2 no Âtete 2020.

ÔROÀ

Èita e pau te Maitaì o te Atua.

Taramo 145

1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu. 2 E haamaitaì ä vau ia òe i te mau mahana atoà nei, e ârue au i to iòa e a muri noa atu. 3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi. 4 Te mau uì atoà të faarahi i ta òe òhipa, e e faaìte hoì i ta òe ra òhipa mana. 5 E parau vau i te tura e te hanahana o to òe ra mana, e te mau räveà taa ê na òe ra. 6 E parau rätou i te mana o ta òe ra mau räveà mataù, e e faaìte hoì au i to òe ra mana. 7 E parau ä rätou i te manaòraa o to òe ra maitaì rahi, e himene hua hoì i ta òe ra parau tià. 8 E hämani maitaì e te aroha to te Fatu, e òre e riri vave, e te faaherehere rahi. 9 Hämani maitaì to te Fatu i te taata atoà, e te vai ra to na aroha faaherehere rahi i nià i ta na atoà ra mau òhipa. 10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe. 11 E parau rätou i te hanahana o to òe ra pätireia, e faatià noa hoì i ta òe ra mau räveà püai. 12 I te faaìteraa i te tamarii a te taata nei i to na ra mana, e te hanahana e te manaò to na ra pätireia. 13 O to òe ra pätireia, e pätireia mure òre ia,  e to òe ra mana, e tae ia i te mau uì atoà ra. 13 E Atua mau te Atua e te haavare òre i roto i ta na mau òhipa. 14 Te mau ra te Fatu i te feiä e hià ra, e ua faatià i te feiä e piò i raro ra. 15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau.16 Te heheu nei òe i to rima, e te haamäha nei i te hiaai o te mau mea ora atoà nei. 17 E parau tià ta te Fatu i ta na atoà ra mau haereà, e te hämani maitaì i ta na atoà ra mau òhipa. 18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre.19 E faatià o ia i te hinaaro o te feiä i mataù ia na, e faaroo mai o ia i ta rätou e tiàoro, e e faaora hoì ia rätou. 20 Te tiaì nei te Fatu i te feiä i hinaaro ia na, âreà te feiä paieti òre ra, e haamouhia ia e ana. 21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu. Âmene.

Ìtaia 55, 1,3.

1 E te feiä atoà i hiaai ra e, e haere mai i te pape nei, e te feiä ârio òre ra, a haere mai, e hoo e e àmu, oia ia, e haere noa mai, e hoo noa eiaha ei ârio, e eiaha ei hoo, i te uaina hoì e te ü. 2 E aha òutou i horoà ai i te ârio i te mea mäa òre, e ta òutou òhipa i te mea paìa òre? A haapaò maitaì mai na ia ù, a àmu ai i te mea maitaì; e mauruüru ia òutou i te mäa maitataì roa ra. 3 E faafäriu mai to òutou tarià, a haere mai ai ia ù nei; e faaroo mai, e ora ia òutou; i te mau maitaì i faaìtehia ia Tävita ra, i te mea haavare òre ra.

Rōma 8,35-39, 35

Na te aha e faataa ê ia tätou i te aroha o te Metia ra. Na te maì änei, e na te ahoaho, e na te hämani ìno, e na te poìa, e na te veve, e na te àti, e na te oè änei? 36 Mai tei päpaìhia ra e: No òe mätou i taparahihia ai aore i faaea, ua faarirohia mätou mai te mämoe i haapaòhia no te pohe ra.37 E òre, e riro te rë i taua mau mea atoà nei ia tätou, i tei aroha mai ia tätou nei. 38 Ua ìte mau hoì au e, e òre te pohe, e òre hoì te ora, e òre te mau merahi, e òre hoì te hui-arii, e òre te mau mea mana, e òre te mau mea e vai nei, e òre hoì te mau mea e tupu a muri atu, 39 e òre te teitei, e òre hoì te haèhaa, e e òre atoà te mau mea i hämanihia nei, e tià ia faataa ê ia tätou i te aroha o te Atua, i roto i to tätou Fatu ia Ietu Metia ra.

Mätaio 14, 13-21.

To Ietu faaàmuraa i nä taata e pae tautani, 13 E ia faaroo aè ra Ietu i taua parau ra, vaiiho mai ra o ia i taua vähi ra, e ua tere atu ra na nià i te hoê poti i te tahi vähi moèmoè; e ìte aè ra te tiàa rahi i te reira, faaruè iho ra i te mau ôire e pee atu ra ia na nä uta. 14 E tei te tïpaeraa ra atu Ietu, ìte atu ra i te tiàa rahi taata, aroha roa atu ra ia rätou; e faaora iho ra i to rätou feiä maì. 15 E töihoiho iho ra te mahana, ua haere mai ra ta na mau pipi ia na ra, ua nä ô mai ra: E vähi moèmoè teie, e ua tahataha roa hoì te mahana, a faahoì i teie nei nahoà rahi ia haere na rätou i te mau ôire rii e hoo i te mäa na rätou. 16 Ua parau atu ra Ietu: Aita e faufaa ia rätou ia haere; na òutou iho e hopoi atu i te mäa na rätou 17 Ua parau mai ra rätou ia na: E pae noa a mätou färaoa i ô nei e nä ià hoì e piti.18 Ua parau atu ra o ia: A hopoi mai i ô nei ia ù nei. 19 Ua faaue atu ra o ia i te tiàa rahi e pärahi i nià i te àihere, ua rave iho ra o ia i nä färaoa e pae e nä ià e piti, hiò atu ra i nià i te raì, haamaitaì atu ra, vävähi iho ra i te mau färaoa, tuu atu ra i te mau pipi ra; e na rätou i ôpere na te nahoà rahi. 20 Àmu anaè iho ra rätou e paìa aè ra, e ua haaputu iho ra i te toeà mäa, î roa aè ra nä ète hoê àhuru mä piti. 21 E riro e, e pae tautani täne tei tämaa, aita ia i taiòhia te mau vahine e te mau tamarii.

Manaò.

Taramo 145, 13 E Atua mau te Atua e te haavare òre i roto i ta na mau òhipa.

Ìtaia 55, 3 E faafäriu mai to òutou tarià, a haere mai ai ia ù nei; e faaroo mai, e ora ia òutou; i te mau maitaì i faaìtehia ia Tävita ra, i te mea haavare òre ra.

Roma 8, 39 e òre te teitei, e òre hoì te haèhaa, e e òre atoà te mau mea i hämanihia nei, e tià ia faataa ê ia tätou i te aroha o te Atua, i roto i to tätou Fatu ia Ietu Metia ra.

Mätaio 14, 19 Ua faaue atu ra o ia i te tiàa rahi e pärahi i nià i te àihere, ua rave iho ra o ia i nä färaoa e pae e nä ià e piti, hiò atu ra i nià i te raì, haamaitaì atu ra, vävähi iho ra i te mau färaoa, tuu atu ra i te mau pipi ra; e na rätou i ôpere na te nahoà rahi.

Ei manaò hio àmui.

Te tahi manaò tumu e vai nei i roto i na täiòraa e maha nei, tei nià ia i te tumu parau no te òre-raa te mau maitaì a te Atua e pau, tei vai ra e a muri noa atu, e aore ra ua Nui te maitaì O te Atua Nui Tumu Tahi. Na teie tumu parau e faaìte i te taata faaroo i te aroha o te Atua tei òre i taaê, i nià  i ta na mau òpuaraa. Ma te faaìte atoà i to na hämani maitaì i te mau taata, tei tïtau i te ora  i roto i ta na mau faanahoraa. E faanahoraa ia noaa te tauturu no o mai i te Atua ra. E taua tauturu ra to te Atua horoàraa i te maa na to na nunaa i te vahi maa òre, riro äè nei taua vahi ra, ei vahi tämäaraa na te feiä e rave rahi. Ta  Mataio ia faaìteraa i te pene 14 i te ìrava 20, AMU ANAE IHO RA RÄTOU E PAIA AÈ  RA, HAAPUTU  IHO RA I TE TOEA  MAA  E Î AE RA NA ÈTE RARAHI AHURU MÄ PITI.

Èi manaò tatara.

Ta tätou parau no teie mahana, Mätaio 14,13-21.

Te ômua nei ia ta tätou taiòraa i te ìrava 13, E ÌTE  AÈ  RA O  IETU  I TAUA PARAU  RA, HAERE  ATU RA I NIA I TE PAHI. E parau âpï peàpeà tei faaroohia e te Fatu, i te mea te reo tei varovaro  e tei haaparare i te piiraa e tätarahapa i te mëtëpara, ua  haamamuhia e te âti pohe tano òre. Na roto ia i to Ioane Päpetito faaìteraa i te parau mau no te ture no te faaipoiporaa, òre e tano ia Herota e faaïpoïpo, i te vahine a to na taeaè o Firipa. I ruuruuhia ai te tävini o te Atua i roto i te fare täpeàraa, no te parau tià, tei faahapa i te mea tià ore. Ua mämü  o Ioane, ua pohe, ua riro to na upoo e òhipa haùtiraa, àreà  ra ta te Atua ôpuaraa eita ia e mou, i tupu ai te mau  parau ta Ietu e faaìte nei i roto i teie taiòraa ta tätou e farerei nei.

Aita o Ietu e hinaaro nei e tute ê i te taata, aita atoà O ia e mataù nei, te haamoè nei ra O ia no te hoê taime i roto i te pure, no te pohe o Ioane-Päpetito. Eita ra teie ôpuaraa e manuia, e âpee  teie mau taata i te Fatu, i te vahi tipaeraa o te pahï no te färiiraa. I ù nei tätou  e ìte ai, te tauiraa te manaò o Ietu ua aroha O ia i teie mau taata, e ua faaora i to rätou  feia  mai. Te ìtehia nei ia te hoê ao tei ora, e tei tiaì i te hoê rahu âpï, i roto i te mau tamarii a te Atua. E mau taata teie e âpee nei ia Ietu eita atu ra na Ietu e haere i roto i tera oire. Aita e òre teie âpeeraa na rätou i te Fatu, ua mau âau ia rätou te mau parapore tei faatiàhia, i roto i te pene 13 te parau no te taata  ueue huero, e te hau o te Atua. E aore ra no te tiaì e aha ra te hopeà no teie mau parau, no te vahi ìte-òre-hia no  te mau òhipa a te Atua.

Te mau pipi i to rätou pae te ahoaho nei, i teie rahiraa taata e pae tauatini paha ia au ta te ìrava 21 faaìteraa. No te ravaì òre te maa, e ua tape te mahana oia hoi, ua töihoiho, tei te mau vahi maa òre to rätou faaearaa. E nahea ia i teie rahiraa taata te manaò o te mau pipi  e faahoì i te oire no te tii i te maa na rätou. E faahoì i te nunaa e to rätou poia, e to rätou poiha. To Ietu manaò aita e tuàti ra e to te mau pipi te parau nei ia O ia, EIAHA  RÄTOU  E HAERE, NA ÒUTOU E HOPOI  ATU I TE  MAA  NA RÄTOU. Eita e navaì  ta rätou maa, e pae noa  färaoa e piti ià, i faanaho ai o Ietu i ta na e faatupu na roto i te maere rahi, hiò atu ra i nià i te vahi Teitei, haamaitaì iho ra, vävähi iho ra i te mau färaoa, tuu atu ra i te mau pipi e ôpere na te mau taata e rave rahi. Aita teie maa rahi i pau e ua toe mai, e 12 ète î maitaì.

Teie o Ietu e horoà nei i te hoê täpaò ìte matahia, ia hiò, eita i te hoê parau parapore  tei faatiàhia, e òhipa ra te täno i te rima ia täpeà. I mua  i teie òhipa maere e tià ia i te mau pipi, te mau taata, te Ètärëtia ia fäì  i to rätou ìteraa i te òhipa ta Ietu i faatupu. Te tià nei o Ietu i roto i te püairaa no te faarahi i na färaoa e pae, e i na ià e piti, te pii nei o Ietu na roto i te haamaitaìraa ia faanavaìhia i teie mau maa. Mai roto i te aore, riro atu ra te vahi maa ore, e vahi maa eita e pau ia àmu. E àiraa maa moà teie ta te Fatu i faanaho i te mea o te Atua iho teie e faaàmu nei, ma te tiàturi i te mau pipi no te ôpereraa. E parau tohu teie, no te àiraa maa a te Metia i roto i te ùtuafare o to na Metua. Teie mau hiòraa, eiaha ia moèhia ia tätou te manaò tumu o Ietu. NA ÒUTOU E HOPOI ATU I TE MÄA. Aita te Fatu o te ôroà, e hinaaro nei e faahoì te mau taata tei färii ia na i te vahi tipaeraa, na roto i te poia e te poiha. I  färii atoà  ai o Ietu i teie  mau taata ma te  faaàmu  i te mäa mau a te Atua Nui Tumu Tahi, no te faaitoito i te tino ia noaa ia rätou te mana o te moana, e to te fenua. I te mea e feia teie tei hiaai  i te maa horoà noa a te Atua. A haamanaò atu ai tätou  i teie ìrava i roto i te Ìtaia pene 55 i te Ìrava 1

E TE  FEIA ATOA  I HIAAI RA  E, E HAERE  MAI I TE PAPE NEI, E TE FEIA ÂRIO  ÒRE RA, A  HAERE  MAI, E HOO E E ÀMU OIA IA ,E HAERE NOA MAI, E HOO NOA EIAHA E ÂRIO,E EIAHA  EI HOO, I TE UAINA HOÌ E TE Ü.

Te paia ia o te mau taata, tei tïtau  i te maitaì a te Atua. Ua paia te mau taata atoà, i te maa faaâpïhia ia au i te rahuraa a te Metia o tei höroàhia no te ôpere, ia tupu te òhipa maere a te Atua, oia hoì, te temeio, te mäa tei ôperehia na te nünaa. Eiaha ra tätou  ia ui e, mea nahea ra te tupuraa teie Òhipa, e vaiiho ra ia tätou ia ärataìhia e te Varua tei faaâpï. Ma te pure i te Atua ia haapii a ia tatou i te pure e, HO  MAI  I TE MAA  E AU  IA  MÄTOU  I  TEIE  NEI  MAHANA, E A ORE RA, HO MAI TE ITOITO IA FAAAPU  MÄTOU  I TE MAA E  AU  IA MÄTOU NO TE MAU MAHANA  ATOA.

Ua toe  te mäa, eiaha ra tätou e manaò e, e haamauàhia aita roa  ia ua òhihia ua haaputuhia i roto i te ète ia òre ia purara haere noa, 12 ète tei î maitaì e òhipa maere mau, teie e faaìtehia nei i te mau pipi e òhipa perofeta no te hau o te Atua. Aita e tatararaa no teie òhipa. Na te aroha e te here o te Atua tei òre i taaê, e faaìte. Oia mau, no te mea tei roto te Atua i te Metia.

E hoa here ma e, i roto  i ta tätou taiòraa, no teie mahana te ìtehia nei ia te tahi tumu parau tei faufaahia, e teie  nunaa tei âpee, tei färii i te Fatu, e tae noa atu i te mau pipi. Te ìteraahia  ia te parau no te  AROHA E TE HERE O TE ATUA TEI ÒRE I TAAÊ. I  nià i te âmuiraa taata tei tiàturi i te Metia i to na tau. E teie mahana tei nià i te Ètärëtia. Na teie tumu parau e faaìte ia tätou, te hau no te parau tià tei haamähanahana i te âau no te feia tei poia e tei poiha  i te täviniraa i te Atua. Ua haere mai teie mau taata e rave rahi  ia Ietu ra  ia tià, ia rätou ia ìte i te hanahana o te Atua. Tei faatupuhia na roto i te maa, e pae färaoa e, e piti ïà tei faarahihia e te puai no te tiàraa Metua o te Atua. E pae tauatini taata tei àmu teie maa, aita te mau vahine i taiòhia e te mau tamarii, aita i pau. Te ìte nei ia tätou te hohora nei te Atua i te àiraa maa na ta na mau tamarii i te vahi maa òre, riro iho nei ra taua vahi ra, èi vahi maa tei òre i pau i te âmuihia. Teie maa tei faaìte päpü i te aroha e te here o te Atua tei pärahi fatata noa i pïhaì iho i te mau taata atoà tei tïtau i te ora i roto i te Atua. E täpaò faaìte teie, to te Atua hinaaro rahi, eiaha te poia e te poiha o ta na mau tamarii, te paia ra  o ta na mau tamarii.

Eiaha ra tätou ia manaò i to Ietu faarahiraa  i te färaoa e te ià, no te faaìteraa e, te ïti  ra te feia poia e te feia  poiha e vai nei i teie mahana. Eita roa tei reira te tumu no teie temeio, mauti ra ia  te ìteraahia ia i roto i te òhipa ta Ietu e rave nei i to te Atua faaìteraa i to na tiàraa Metua i mua i ta na mau tamarii, tei âpee na muri i ta na Tamaiti. Oia hoì,  o te Atua teie ta Ietu e faaìte nei i roto i teie färaoa e teie ià, no te mea mai reira mai te tumu no teie rahiraa maa. Ia tià ia tätou i teie mahana ia ìte i te Atua na roto i te òhipa ta Ietu e faatupu nei. Te Atua eita  O ia e faaïti mai ta na höroà  i te ao nei e faarahi ra O ia. Mai ta na i höroà  i to na nunaa i te fenua o te tapu, mai ta na i höroà i te mëtëpara, e ta na atoà höroà ia Eria i te taime  ani ai ò ia i te pohe, höroàhia  mai nei i te ora, itoito aè ra ò ia i te ora a te Atua. Oia atoà ia tätou i teie mahana ia itoito atoà tätou i te ora a te Atua na roto i te maa ta na e horoà nei ia tätou i te mau taime atoà.

 

Ho mai te maa e au ia matou i teie mahana.

 

 

Teraì òr. Faatura.

 

 

 

Tāpati 26 no Tiurai 2020.

Te Taoà

Taramo 119, 121-136.

121 Ua faatupu vau i te parau tià e te au, eiaha e faaruè noa ia ù i te feiä hämani ìno mai. 122 Ei tauturu òe no to tävini ia maitaì o ia; eiaha te teòteò e hämani ìno mai ia ù. 123 Ua pöuri ta ù mata i te tiaìraa i te ora na òe, e i te parau o ta òe ra parau tià. 124 O ta òe e rave i to tävini nei, ia au ia i to òe ra aroha, e haapii mai hoì ia ù i ta òe ra mau ture.125 O to tävini hoì au, e haapii mai ia ù, ia ìte au i ta òe i faaìte mai ra. 126 O te taime teie, e te Fatu, ia faatupu i te parau au ua faaòre hoì rätou i ta òe ra ture. 127 Hinaaro rahi to ù i ta òe parau i te àuro, i te àuro i mä maitaì ra. 128 E teie nei, te parau nei au i ta òe ra mau parau atoà e mea tià anaè, te riàrià nei rä vau i te mau èà haavare atoà ra. 129 E mea maerehia ta òe ra mau parau i faaìtehia mai, i haapaò ai hoì ta ù värua i te reira. 130 Tei te heheuraa o ta òe ra parau, e noaa ai te märamarama, e noaa ai hoì te ìte i te taata ìte òre ra.131 Ua hämama vau i ta ù vaha mä te ihaiha oia hoì ma te faaihaiha, ua nounou hoì au i ta òe parau. 132 E haapaò mai òe ia ù, e aroha mai hoì ia ù, mai ta òe ra hoì i te feiä i hinaaro mai i to òe ra iòa. 133 E faaau na òe i ta ù haereà i ta òe ra parau, e eiaha te ìno nei ia faahepo mai i nià ia ù. 134 E faaora òe ia ù i te hämani ìno o te taata nei, ei reira vau e haapaò ai i ta òe ra mau parau. 135 E faaanaana mai i to mata i nià i to tävini nei; e haapii mai hoì i ta òe ra mau ture.136 Te manii pape noa nei ta ù roimata, no te mea aore te taata i haapaò i ta òe ra ture.

 

I Mau Arii 3, 5-12.

5  I Tipeona to te Fatu färaa mai ia Töromona i te taòto i te pö; ua parau mai ra te Atua, A ani mai i ta ù e höroà atu na òe ra. 6 Ua parau atu ra Töromona, e aroha rahi to òe i ta ù metua, i to tävini ia Tävita, o ia hoì i haapaò i te tià o ta na âau ia òe, e te parau mau, e te parau tià; e ua vaiihohia e òe teie nei maitaì rahi nö na o òe i höroà i te tahi tamaiti nö na ei pärahi i nià i to na teröno, mai tei teie nei ä mahana. 7 E teie nei, e ta ù Atua, e te Fatu, ua faariro mai òe i to tävini nei ei arii, ei mono aè i ta ù metua ia Tävita: e taata âpï hoì au; aore au i ìte maitaì i ta ù nei haapaòraa. 8 Tei röpü hoì to tävini nei i te mau taata no òe, i mäìtihia e òe ra, ei feiä rahi roa, eita e hope ia tataù, eita e tià ia taiò i te rahi. 9 E teie nei, ei âau ìte ta òe e hö mai no to tävini ra, ia tià ia parau i teie nei feiä, ia ìte au i te maitaì e te ìno: aore ra, o vai te tià ia parau i teie nei feiä rahi no òe ra? 10 Tià aè ra taua hinaaro o Töromona ra i te Fatu. 11 Ua parau atu ra te Atua ia na, no te mea i nä reira mai ta òe ani, aore òe i ani mai ia haamaorohia to òe aho; aore hoì i ani mai i te taoà rahi na òe iho; aore hoì i ani mai e ia pohe to mau ènemi; ua ani mai rä i te ìte ia ìte òe i te mea tià ra; 12 Inaha, tià ia ù to hinaaro: inaha, ua tià ia ù to hinaaro: inaha, te höroà nei au i te âau haapaò e te ìte i te parau; aita e fäito e au ai ia òe mai mütaa iho mai ä, e aita atoà e fäito e au ia òe a muri atu.

 

Rōma 8, 28-30,

28 Ua ìte hoì tätou e, te faatupu nei te mau mea atoà i te maitaì no te feiä hinaaro i te Atua, te feiä i parauhia mai i te ôpuaraa na na ra. 29 O ta na i ìte i mütaa iho ra, o ta na atoà ia i haapaò ätea noa ia faaäuhia mai ta na Tamaiti ra te huru, ia riro o ia ei mätahiapo i te mau taeaè atoà e rave rahi ra. 30 E o ta na hoì i haapaò ätea noa ra, o ta na atoà ia i parau mai ra, e o ta na hoì i parau mai ra, o ta na atoà ia i faatià; e o ta na hoì i faatià ra, o ta na atoà ia i hopoi i te ao.

 

Mātaio 13, 44-52,

Te taoà e te poe

44 E au ä te Hau o te raì i te taoà hunahia i roto i te hoê âua, e ìteä iho ra e te hoê taata, huna mäite iho ra o ia, e no to na òaòa, hoo atu ra o ia i te täatoà o ta na taoà atoà, hoo mai ra i taua âua ra. 45 E au ä te Hau o te raì i te hoê taata hohoo tei ìmi i te poe maitataì: 46 e ìteä iho ra ia na te hoê poe maitaì roa ra; haere atu ra o ia hoo atu ra i te täatoà o ta na taoà, hoo mai ra i taua poe ra.

Te ùpeà

47 E au ä hoì te Hau o te raì i te ùpeà i tuuhia i raro i te tai e o tei àti/î i te ià e rave rahi te huru: 48 e àti aè ra, ua ùmehia mai ra i uta, pärahi iho ra te feiä ravaai, haaputu iho ra i te ià maitataì i roto i te färii/àraìri, faaruè atu ra rä i te ià ìino. 49 Oia atoà ia tae i te hopeà o teie nei ao, na te mau merahi e haere mai e faataa i te feiä ìino mai roto atu i te feiä parau tià, 50 a huri atu ai i te feiä ìino i roto i te umu auahi; tei reira te òto e te àuàuraa niho.

Püòhuraa

51 Ua märamarama änei òutou i teie atoà nei mau parau? Ua pähono mai ra rätou: Ê. 52 Ua parau atu ra o ia ia rätou: No reira, te päpaì parau tei haapiihia i te parau o te Hau o te raì, e au ia i te fatu fare, o tei hopoi mai i te mea âpï e te mea tahito no roto i ta na ra puèraa.

Manaò

Ei manaò hiò àmui.

Te pene parau  e tià  ia täpeàhia mai  i roto i na taiòraa  e maha nei  te Evaneria ia i te mea te faaìte ia i te huru no te faaauraa o ta te Ietu e rave nei no te Patireia o te Atua. Ia au i na faaauraa e toru nei,

1) Te taoà moè tei ìtehia.

2) Te poë maitaì.

3) Te ùpeà toro.

Te parau e ìtehia nei  i roto  i teie na parapore e toru, oia hoì ia te parau  e tupu ia tae i te hopeà  o teie nei ao. Ta Ietu e faaìte  nei i te ìrava 49 i te vahi mätamua, OIA  ATOA IA TAE I  TE HOPEA  O TEIE NEI AO.

Ei manaò tatara.

Te ìrava  Mataio 13:49 vm  OIA  ATOA  IA  TAE I TE HOPEA O TEIE  NEI AO.

Ua tupu  teie parau ta Ietu  i roto i te mau  parapore rii hopeà ia au i te faaìteraa a te Mataio i te  pene 13.Teie  na parapore  e toru  ta Ietu e faatià nei te faaau nei ia o ia,

1) I TE  TAOA MOE TEI ITEHIA.

E aha teie taoà ta Ietu e parau nei i roto  i  teie parapore mätamua? E tià ia tätou ia horoà  i to tätou manaò i nià i te taoà ta Ietu e parau nei. Eita òre e horo vave to tätou mau  manaò i nià  i te parau no te moni, te piru, e te vai atu ra te reira mau feruriraa, eita i te mea ateä roa  i te mau manaò ta Ietu e faatià nei. E ö mai te reira mau feruriraa manaò, na roto i tera parau e, e hoo. Teie parau te faaìte ra ia i te hoê täuiraa i te faufaa hau  atu i te faahiahia  i te mau  taoà  ta Ietu e parau nei. E te taata tei ìtehia  e ana, rave iho ra huna atu ra, hoo äè ra  i ta na mau taoà atoà, no te rave mai i teie àua. Te  taoà ta Ietu e hinaaro nei  e faaìte mauti ra ia te parau ia no te fenua  i te mea e òaòa rahi  to te taata ia tuu i ta na mau taoà atoà i roto ia na eita ia e pau i te huhu e te pë e vai ra teie taoà i te vairaa. E pau a ia te mau taoà atoà  àreà ra te fenua eita roa ia, a taa noa atu ai te faaotiraa a te Atua i te parau no te fenua, e  mau te rai e te fenua, àreà ra ta ù parau e ore roa ia e mou. Te fenua te faaìte noa mai ra i te mau hinaaro o te Atua i te mau taata atoà. Tei riro èi ìte no te mau faufaa atoà ta te Atua i faatupu i roto ia na, tei òre i faaère i te hoê nunaa i teie faufaa. I te mea e täamuraa to te taata i nià i te  fenua, tei riro èi ìte no te òhipa ta te taata i rave. Te reo ia o te Atua i nià ia Taina i te parauraa e ua pii mai te toto o to teina mai raro mai i te fenua. E parau teie no to Taina täparahiraa  ia Apera. To na auraa  na te fenua i faaìte i te òhipa  tià ore i ravehia e Taina. Aita nei te fenua e faaìte noa mai ra ia ta tätou  i te mau òhipa i ravehia e to tätou mau tupuna. Oia te faaìte noa mai ra, te reira ia tätou noa atu te huru o te faanahoraa i ravehia e riro noa te reira ei faaìteraa. Te taoà ia ta  Ietu e parau parapore nei  te fenua, e tià ia parauhia tei roto i te fenua to te Atua faaìte päpüraa i to na Aroha i te taata, ta na i horoà  i tera nunaa e i tera nunaa. Te fenua te faaìte noa mai ra ia, ia tätou i te mau maitaì o te Atua.

Te piti o te faaäuraa, TE POE MAITAI te haamauruüru ia i noaa i teie taata tei haafaufaa i te fenua, e òaòa i te rahi i to na ìteraa i teie faufaa ta na i faaòhipa, ta na i ìmi, ma te faaea òre. Teie poe maitaì ta Ietu e faaau nei i te patireia o te Atua, mauti ra ia to te taata ìmiraa i te itoito, te hau, te here, te autaeaèraa, e te aroha. O teie taua mau poe ra, eita o na e noaa i rapae mai i te âau o te taata i roto ra, eita atoà oia e noaa  i rapae mai i te fenua i roto ra, i raro aè i teie raì ta te Atua i rahu, aita te Atua i faaère i te hoê nunaa i te fenua, mai te mea ua ère te hoê nunaa i te fenua eita ia na te Atua i faaère, na te reira ihoä ra nunaa i faaère ia na.

E hohoà teie parapore i te parau, no te hoê taata faaapu e ta na, na tamarii tamaroa e piti. E ùtuafare metua vahine òre teie, ia tae ra i te taime e fatata ai teie metua tane te faaruè mai i teie nei ao, ua poroì o ia i ta na, na tamarii eiaha ia faaruè i te fenua e taoà to roto ia na. Ia pohe ra te metua tane, ìmi iho ra teie na tamaiti  i teie taoà, ua vaere i te fenua, ua ârote, ma te hio ore i te taime no te rohirohi, to raua hinaaro ia ìteähia teie taoà e aita roa, no te nehenehe te òhipa ta raua i rave, ueue atu ra i te huero maa i nià iho. Ia tae ra i te taime no te àhune, tupu atu ra te ôotiraa, haere atu ra e hoo i te mau taoà täui, e te noaaraa mai taua mau faufaa ra, haamanaò aè ra raua i te mau poroì a to raua metua, tei roto te faufaa i te fenua. E te poe maitaì ta Ietu e faaìte nei  mauti ra ia, te itoito o te taata ìmiraa i te mau raveà atoà  ia  ìteähia te faufaa o te òaòa.

Te toru ra o te parapore mea taaè roa ia, TE UPEA TORO teie tätou e faahiòhia nei  i nià i te ùpeà, eita faahou atu ra i nià i te fenua, i roto ra i te miti. Te miti o ta Ietu atoà ia i haafaufaa maitaì i te parauraa e ia riro òutou èi miti no te fenua. Te auraa  no te ùpeà  ta Ietu  e faaìte nei, o te tïtià ia, na na e faataa tei au no te patireia o te Atua. E tïtïraa taaè mau teie, ta te ùpeà e faaìte nei, na te merahi e haere mai e òhi i te mau mea rii maitataì a tuu atu ai i roto i te farii e te mau mea rii ìino ra faaruè atu ra. Oia hoì  tei mau i nià i te ùpeà ra no te ora mure òre ia, tei òre ra i mau i nià i te ùpeà ra no te pohe mure ore.

O teie anei te huru ia tae i te hopeà o teie nei ao, e òhipa anei na te taata ia tuatäpapa i te hopeà o  teie ao? Ia au i te faaìteraa a te mau parapore ta tätou i hiò mai eita roa ia i te òhipa na tätou. Te parau mai nei ra teie mau parau, ia ìte tätou i te faufaa o te fenua, ei ia ìte tätou i te faufaa o te miti. E fenua, e miti, teie te  taoà, te poe, e te raveà te ùpeà ia, i parau ai o Ietu i ta na mau pipi e, e faariro au ia òutou ei ravaai taata, e taua ùpeà ra mauti ra ia te Evaneria Ora a te Atua; te reira e au ia i te taata ùtuafare, o tei hopoi mai i te mea âpï e te mea tahito no roto i ta na puèraa ra.

E hoa here ma e, Ia ìte tätou i te hinaaro o te Atua i roto i te fenua i rahuhia.

Ia ìte tätou i te hinaaro o te Atua i roto i te miti ta na i faatïnana.

Ei ia riro tätou ei ùpeà toro, tei ìte i te mau hinaaro o te Atua.

Te parau no te hopeà o teie  nei ao eita na te taata e tohu, eita atoà na te taata e faaoti mauti ra na te Atua ra te reira e ôpua. O Ietu iho aita o ia i ìte i te mahana e hoì mai ai O ia, o te Atua anaè ra tei ìte i te taime, te mahana no taua òhipa ra. Te hopeàraa anei o te ao nei ta tätou e tiäì nei, e aore ra te hoìraa mai o te Tamaiti a te Atua i roto i to na hanahana? Te hopeàraa o teie nei ao e òre anei te mau mea ora atoà? Mäite mea te reira te manaò, e haere ia te mau taata parau tià i hea faaea ai, e ìnaha e òre te mau fenua atoà. No te mau taata parau tià òre mea päpü maitaì to rätou parau no roto ia i te auahi mure òre. Te parau no te hopeà o te ao nei e tià ia tätou te Ètärëtia ia òaòa no te mea ei reira te Tamaiti a te Atua, e faaìte mai ai ia na i to te ao, mai te hoê taoà moè tei ìtehia, e tei ànaana mai te poe ra te huru ei faaìteraa i te aroha mure ore o te Atua, i nia i te mau taata atoà tei tuu i to rätou tiàturiraa i roto i ta na ôpuaraa ora no to te ao.

 

Teraì òr. Faatura.