Mātaio 15.21-28 POI

 

Tāpati 16 no Âtete 2020.

POI

Taramo 67

1 Na te Mënätehe, i nià i te Netinota. Taramo e himene. 2 E aroha mai ia mätou, e te Atua e, e haamaitaì mai ia mätou E faaànaàna mai hoì i to mata i nià ia mätou. Tera.3 Ia ìteä to parau e àti noa aè teie nei ao, e te ora na òe i te mau êtene atoà ra. 4 Ia haamaitaì te mau taata ia òe, e te Atua e Ia haamaitaì tahi te taata atoà ia òe 5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì Tera. 6 Ia haamaitaì te mau taata ia òe, e te Atua e Ia haamaitaì tahi te taata atoà ia òe 7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei. 8 E tämau ä te Atua i te haamaitaì mai ia tätou, e e tae roa te mataù ia na i te mau hopeà atoà o te fenua ra.

Ìtaia 56.1-7

Te aò mai nei te perofeta i te taata ia haapaò maitaì

1 Te nä ô mai ra te Fatu: E tämau i te parau au, e rave i te parau-tià; ua fätata hoì te ora nä ù, teie tei pïhaì iho; e te parau tià nä ù ua fätata i te faaìtehia mai. 2 E ao to te taata e rave i teie; e te tamaiti a te taata ia Täpeà maitaì i taua parau nei, o tei haapaò i te Täpati, aore i haaviivii ra; e aore to na rima i rave i te parau ìno. 3 E eiaha te tamaiti a te taata ê ra e parau, o tei àti i te Fatu ra, eiaha e nä ô e, Ua faataa-ê-roa-hia vau e te Fatu i to na ra mau taata. Eiaha atoà te èunuta e parau e, Inaha, e räau marô vau. 4 Te nä ô mai ra hoì te Fatu i te mau èunuta, o tei haapaò i to ù ra mau täpati, e o tei rave i tei auhia e au ra, e ua haapaò mäite i te faufaa nä ù ra; 5 o ta ù ia e höroà i roto i to ù nei fare, e i roto i tä ù nei âuà, i te manaòraa e te iòa, o tei hau ê i te iòa tamäroa e to te mau tamähine: e iòa vaiiho tämau tä ù e hö atu no rätou, e òre roa e faaòrehia ra. 6 E te mau tamarii o te taata ê o tei àti i te Fatu ra, ei haamori ia na, e ia hinaaro hoì i te iòa o te Fatu, e ia riro ei tävini nö na: te feiä atoà i haapaò i te täpati, e aore i haaviivii atu; e o tei haapaò tämau mäite i ta ù ra faufaa: 7 o rätou ta ù e ärataì i roto i ta ù mouà moà ra, e faaòaòa vau ia rätou i roto i ta ù fare pureraa: e färiihia ta rätou mau tütia-täauahi e ta rätou mau tütia i nià i te tau fata; e parauhia hoì taù fare, o te fare pureraa no te taata atoà.

Rōma 11.13-32

Te faaoraraa o te Ètene

13 O òutou o te Ètene ta ù e parau atu nei, te haamaitaì nei au i to ù nei töroà, no te mea o vau te âpotetoro a te Ètene: 14 peneiaè o te oôo faatïpaupau to ù ra nünaa ia ù, e ia ora te tahi pae. 15 To rätou faaruè-raa-hia ra, o te faite ia o to te ao, a tae ai hoì i te färiiraa atu ia rätou, e òre änei e riro mai te ora no te pohe mai? 16 Te moà ra te hoturaa mätamua ra, oia atoà te rahi atoà; e te moà ra te tumu ra, oia atoà te mau âmaa. 17 E i ôfene-ê-hia tahi pae i taua mau âmaa ra, e o òe hoì, e te âmaa o te tahi ôrive ê ra, tei poihia i roto ia rätou, e tei ia òe atoà te tumu e te hinu o taua ôrive ra. 18 Eiaha òe e faaoôo teòteò atu i taua mau âmaa ra. Ia teòteò hoì òe ra, e haamanaò eere òe të mau i te tumu, o te tumu rä të mau ia òe.19 E parau mai änei òe e: «I ôfene-ê-hia te mau âmaa ia poihia vau i roto ? 20 Ua tià ia. No te faaroo òre i ôfene-ê-hia ai rätou, e e tià faaroo hoì to òe. Eiaha ei âau teitei, ei mataù rä. 21 Aore te Atua i faaherehere i te mau âmaa mau ra, e ara, o te òre atoà hoì o ia o të faaherehere ia òe. 22 E teie nei, a hiò na i te hämani maitaì e te faaherehere òre a te Atua, faaherehere òre i te feiä i hià ra, âreà ia òe ra, o te hämani maitaì ia, ia haapaò tämau òe i to na hämani maitaì, aore rä, e ôoti-ê-atoà-hia òe. 23 E o rätou atoà hoì, ia òre rätou ia tämau märô i te faaroo òre ra, e poihia ia i roto: e tià hoì i te Atua ia poi faahou ia rätou i roto. 24 I ôoti-ê-hia mai òe no nià i te ôrive ôviri mau, e i poi-ê-hia òe i roto i te ôrive maitaì: a tae ai hoì ia rätou i te âmaa mau ra, e poihia mai ia i roto i to rätou iho ôrive.

Te faaoraraa ia Ìteraèra

25 Aore hoì au i hinaaro, e a ù mau taeaè, e ia òre òutou ia ìte i teie nei parau àro (o te teitei hua hoì to òutou manaò ia òutou iho), e ua roohia Ìteraèra i te pöuri poto, e ia ö atoà mai te rahi atoà o te Ètene ra. 26 E ora päatoà ai Ìteraèra atoà, oia hoì tei päpaìhia ra e: «E tae mai te Faaora mai roto mai ia Tiona, e e faaòre o ia i te paieti-òre i Iatöpa ra. 27 E o ta ù ä hoì teie faufaa ia rätou ra, ia hopoi ê atu vau i ta rätou ra hara. 28 I te haapaòraa i te Èvaneria nei, ua riro ia rätou ei ènemi ia òutou: âreà i te mäìtiraa te herehia nei ia rätou no to rätou feiä metua. 29 O ta te Atua hoì i horoà noa e ta na parauraa, aore ia faaòreraa. 30 Mai ia òutou hoì aore i faaroo i te Atua i mütaa iho ra, e teie nei rä, ua arohahia mai òutou i to rätou faaroo òre ra. 31 Oia atoà hoì rätou, ua òre aè nei ua faaroo i teie nei, o òutou i arohahia mai, ia aroha-atoà-hia mai rätou. 32 E faaroo òre anaè hoì rätou atoà i te vaiiho-raa-hia e te Atua, ia aroha mai o ia ia rätou atoà.

 

 

Mātaio 15.21-28

Te faaroo o te vahine âti-Tanaana

(Mär 7.24-30)

21 Reva atu ra Ietu, haapaì tià atu ra i te tuhaa fenua i Turia e Titona. 22 E inaha, ua haere mai ra ia na ra te hoê vahine âti-Tanaana no reira iho e ua pii mai ra ia na: E te Fatu, te Tamaiti a Tävita, e aroha mai òe ia ù  Ua uru-maamaa-hia ta ù tamahine e te hoê tëmoni  23 Aita rä o ia i pähono noa atu ia na. Ua haafätata mai ra ta na mau pipi, ua parau maitaì mai ra ia na: A faahoì atu ia na, te pii noa mai ra o ia i muri iho ia tätou. 24 Ua pähono atu ra o ia: Aita vau i tonohia mai, mäori rä i te mau mämoe anaè i moè i te ùtuafare o Ìteraèra. 25 Ua haafätata noa mai rä o ia, tähopu mai ra ia na, nä ô mai ra: E te Fatu e, e tauturu mai òe ia ù 26 Ua pähono atu ra o ia: E mea au òre roa ia rave i te färaoa a te tamarii, no te tïtiri atu na te fanauà ùrï. 27 Ua parau mai ra o ia: Oia mau, e te Fatu, te àmu mau nei rä te ùrï i te huàhuà rii färaoa i maìri mai no nià i te àmuraa a to rätou ra mau fatu. 28 Ua pähono atu ra Ietu ia na: E teie nei vahine, e faaroo rahi to òe  O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

Manaò.

Ei manaò hiò àmui.

Te manaò tumu tei täpeàhia mai i roto i na taiòraa e maha teie ia e faaìtehia nei e te Èvaneria o Ietu ia au i te papaìraa a Mataio i te pene 15 ma te ìrava 21 e faaea i te ìrava 28.Te ìrava ra i reira te manaò i te haamauraahia tei te ìrava 22 e te ìrava 28 vr; i te naòraa e, E TE  FATU, E TE  TAMAITI  A TAVITA, E AROHA  MAI  OE IA Ù. E TEIE NEI  VAHINE E, E  FAAROO RAHI TO OE. Èi ia faaroo tätou i na taiòraa e maha, te ìritihia nei te ôtià o te parau i to te Atua Nui Tumu Tahi faatupuraa i te färereiraa te täuaro no te hoê nünaa âpï tei parauhia te êtene, te êtene e nünaa tiàturi Atua atoà teie, teie ia e faahitihia ra i roto i te haapotoraa o na taiòraa e maha.

-Taramo 67, 5 Ia òaòa te mau êtene na òe e haavä, i te fenua nei e na òe e ärataì.

-Ìtaia 56, 7 Ta ù e ärataì i ta ù mouà moà ra, e faaòaòa vau ia rätou i ta ù fare pureraa.

-Roma 11, 23 E o rätou, e poihia e tià hoì i te Atua ia poi faahou ia rätou i roto.

Mätaio 15, 28 Ua E teie nei vahine, e faaroo rahi to òe  O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

Ei manaò tatara.

Te parau  ta tatou e hiò  nei i teie mahana paieti, ua tupu ia i Turia i Titona, e mau pae fenua  teie, no te mau taata aita e tiàturi nei i te Atua ora, tei roto noa ra rätou i te mau haamoriraa i te mau atua ê. Te na reira nei o Ietu i te ärataìraa i ta na mau pipi, e ia tätou atoà i teie poìpoì âpï, èi hiòraa na tätou e aha te poroìraa ta te Atua Nui Tumu Tahi  e faatupu i nià i teie  fenua no te hoê nunaa te tià ia parauhia aita e tiàturiraa. Ua topa i muri ia Ietu te fenua moà  no Ìteraèra, tei nià o Ietu i te tahi tuhaa fenua ê, oia hoì, te mau àua e te ôtià fenua ua ìritihia, aita e ôtià  faahou èi faaìteraa e, e fenua Ètene tera i te hiòraa a te âti-Iüta. Teie o Ietu i ropu i te hoê nunaa  no te taime mätamua roa to na ìteraa, e no teie nunaa atoà. E rave rahi  te mau taata i taua mahana ra, i roto i te òire, te vai nei te paraparau ra, te tuö ra, te pii ra, ua àmui-änaè-hia teie mau rahiraa reo aita aè i te âaoaraa ùrï. Mai roto mai i teie maniania rahi i òto ai te reo o te hoê vahine âti-Tanaana, i te piiraa e, E TE FATU E TE  TAMAITI A TAVITA E AROHA MAI OE  IA U. A tahi roa ra o Ietu i piihia ai i teie tiàraa iòa te tamaiti a Tavita, na teie atu ra ia vahine e haapäpü nei e, e tupuna mau to Ietu  i teie fenua. E teie vahine tei roto ia o ia i te peàpeà, no ta na tamahine i roto i te maì rahi. O Ietu e tià ia parauhia e, ua faaea o ia i te tahi taime no te faaroo maitaì i teie piiraa tei varovaro i roto i te rahiraa maniania ta na e faaroo nei. I te mea te vai nei te hoê reo mea taaê roa i te mau reo atoà ta na e faaroo ra. Ua faaea mämü noa o Ietu i teie pii no te aha ?  No te haapäpü änei  e aha mau te huru o teie vahine, e aore ra  no te vaiiho i teie vahine ia pii noa na i teie tiàraa e Tamaiti na Tavita, ia faaroo te mau taata atoà. Te mau pipi te ìteraa i te huru o te mau fifi te peàpeà nei, ani atu ra ia Ietu ia òre ia haapaò i te pii a teie vahine. Te pähono  nei o Ietu i te hoê parau tei faahita i te mau pipi, i te ìrava 24 AITA  VAU I TONOHIA  MAI I O  NA, MAORI  RA I TE  MAU MAMOE  I MOÈ  I TE ÙTUAFARE  RA O ÌTERAÈRA. Areà ra teie vahine tei faaroo atoà i teie parau, ua tähopu mai ra ia Ietu, ma te parau e, e te Fatu e, e turu mai oe ia ù. Aita teie vahine  e hinaaro nei e vaiiho i te ora  a te Atua ia haere noa na, na pïhaìiho  ia na, ma te òre e haapaò mai ia na, te hinaaro nei o ia e faariro i taua mahana ra, èi mahana no te Atua, èi täpaò na na, i haere mai nei te Tamaiti a te Atua i o rätou. E te manaò o Ietu, e manaò teimaha mau i te parauraa ätu i teie vahine, e mea au òre i te maa a te tamarii ra ia tïtiri atu na te ùrï. Mea teimaha mau teie manaò to Ietu, ia manaò vau àhiri o tätou äè tei parauhia i teie hohoà parau eita paha tätou e àmui faahou i roto i te mau òhipa i reira o Ietu i te tïtauraa ia tätou. Teie ra vahine te pähono nei ma te färii i teie parau aita roa e ìtehia nei te hoê  manaò te tià ia faatupu teie vahine i te hoê manaò e riri ai o ia. Te ìte nei tätou i ù nei te huru no te taata tei î i te maitaì e te märamarama, tei òre e hinaaro ia fifi te hoê äè taeaè. Te pähono nei teie vahine ia Ietu ma te haèhaa, ma te faatura, ua tupu te hau i roto i te âau o teie vahine, no te mea te püfenua tera e pii ra. OIA  MAU  E TE  FATU  TE  AMU  NEI  RA TE  ÙRI I  TE  HUA  RII  MAA  I MAÌRI  MAI  NO  NIÀ  I  TE ÀMURAA A TO  RÄTOU  FATU. Te vai ra nei te hoê manaò  o teie vahine tei faatupu i to na riri ia Ietu, aita roa, e manaò faatura ra teie èi ìritiraa te hoê ora âpï i roto ia na e ta na tamahine. Te riro nei teie tuhaa fenua na roto i teie vahine, èi fenua tei tiàturi i te faufaa no te parau ora a te Atua. Te reo o Ietu i teie vahine, E TEIE  NEI VAHINE  E, E  FAAROO  RAHI  TO  OE, ORA  ROA  ATU  RA  TA  NA TAMAHINE I TAUA HORA RA. E faaroo rahi to òe, e reo teie no Ietu i nià i teie vahine tei òre i âueue to na tiàturiraa, i te mau parau tei parauhia ia na. E reo atoà tei faateitei i teie vahine i te ìteraa i te faufaa e vai ra i roto ia Ietu ei faaora. Ta Ietu e ìte nei i roto i teie vahine to na maru, to na haehaa, e to na ìriä òre. O te hohoà mau teie no te taata tei î i te Varua Maitaì. Ta te Varua Maitaì e faatupu, mauti ra ia, te hinaaro, te òaòa, te hau, te faaòromaì, te maru, te maitaì, te faaroo, te mämahu, e te hitahita òre. Taratia5 : 22-23. Ua parauhia teie mau tumu parau e iva, na haamaitaìraa a te Atua i nià i te taata tei òre i àueue te faaroo. Tei täpeà tämau ra i te tiàturiraa i nià i te Atua ora. Te vahi faufaa te îraa teie vahine i teie mau maitaì, ua faaruè o ia i to na oraraa mätauhia e ana, ua rave i to na tiàraa faaìte i te mau maitaì o te Atua. O vai teie vahine, tei noaa ia na teie faaroo? E parau noa ia tätou e, e vahine no roto i te faanahoraa a te Atua Nui Tumu Tahi tei î i te mau maitaì atoà a te Varua Maitaì. E aore ra te Ètärëtia, tei ìte i te ora a te Atua, e i to na upoo faatere. Ua poihia teie vahine i nià i te tumu Ora i te faaìteraa a Ietu, e Faaroo Rahi to òe, te poi e parau teie no te tumu räau e reo Mäòhi teie, tei òhipahia na i mua ra e to tätou mau metua àravihi i te pae faatupuraa räau. E ravehia te hoê tumu räau päutuutu maitaì te aa tei faatupuhia, e täpuhia te tumu metua hoê tiàpana faatià i nià aè i te aa, i reira e poihia te tahi atu räau i roto i te tumu metua e ia tupu maitaì, e ia hotu vave e ia maoro te hoturaa. Teie ia ta Pauro e parau nei ia tätou i teie mahana, 23 E o rätou atoà hoì, ia òre rätou ia tämau märô i te faaroo òre ra, e poihia ia i roto: e tià hoì i te Atua ia poi faahou ia rätou i roto.

I teie mahana te haapii mai nei teie vahine ia tätou te huru no te taata ta Ietu e färii e, e faaora. Ma te faaìte atoà mai e, ua haamau o ia i to na faaroo i nià i te aroha e te here horoà noa a te Atua, ta Ietu i faatupu i nia i ta na tamahine, e ora roa atu ra teie tamarii i taua hora ra.

E to te paroita e, ua poihia tätou i roto i te Atua, e faaroo rahi to tätou. Ia ora na.

 

Teraì òr. Faatura.

 

                       

                                                                                                           

 

 

 

 

Papa Haamori Tāpati 16 no Âtete 2020

 

Tāpati 16 no Âtete 2020.

Papa Haamori.

Färiiraa.

E hoa here mä e, Ia faahiti hoì tätou i te parau o te ätea, no te mea ia ua ìte tätou i te vähi ta tätou i faaruè, nä reira hoì te èà hoìraa. No reira e òre ai e tià i te taata ia òre ia rave i ta na tuhaa ; te mea hoì te reira e rave ai te Atua i ta na tuhaa. Te auraa, te vai ra ta te Atua ôpuaraa no te taata, aore ra te vai ra ta te Atua ôpuaraa ta na e hinaaro ra ia tomo atoà te taata i roto, e ia rave o ia i ta na tuhaa. Te märamarama noa ra tätou e, te hinaaro o te Atua i te taata, ia tauturu ia o ia i te Atua i te faatupuraa i to na hinaaro. E tano tätou e parau e, ia ìte òe i te Atua, ua ìte atoà òe e, e tuhaa ta òe i te Atua ra. E haapae roa tätou i te manaò e, e Atua faaueue te Atua e te hinaaro faatina i te taata i nià i te òhipa. Ia haapäpü mai hoì te Atua e : Ta ù mau i ìmi ra, te reira te tupu ; e ta ù i ôpua ra, te reira të mau  Ìtaia pene  14 ìrava 24, no te haamanaò ä ia i te taata e, eita te Atua e taui i ta na parau. Haamaitaì tätou i te Atua i te hoê reo himene e tià mai tätou.

 

Himene.

Pärahi tätou

 

Teie te parauraa a te päpaì Taramo, ia au i te faahitiraa a te Taramo 67 1 Na te Mënätehe, i nià i te Netinota. Taramo e himene. 2 E aroha mai ia mätou, e te Atua e, e haamaitaì mai ia mätou E faaanaana mai hoì i to mata i nià ia mätou. Tera.3 Ia ìteä to parau e àti noa aè teie nei ao, e te ora na òe i te mau êtene atoà ra. 4 Ia haamaitaì te mau taata ia òe, e te Atua e Ia haamaitaì tahi te taata atoà ia òe 5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì Tera. 6 Ia haamaitaì te mau taata ia òe, e te Atua e Ia haamaitaì tahi te taata atoà ia òe 7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei. 8 E tämau ä te Atua i te haamaitaì mai ia tätou, e e tae roa te mataù ia na i te mau hopeà atoà o te fenua ra.

E te Atua Nui Tumu Tahi e, aroha mai ia mätou te feiä hara nei. Âmene.

 

Himene Tätarahapa.

 

Teie te aòraa a Ìtaia i te pene 56 i te mau ìrava 1 e tae i te ìrava 7, Te aò mai nei te perofeta i te taata ia haapaò maitaì 1 Te nä ô mai ra te Fatu: E tämau i te parau au, e rave i te parau tià; ua fätata hoì te ora na ù, teie tei pïhaì iho; e te parau tià na ù ua fätata i te faaìtehia mai. 2 E ao to te taata e rave i teie; e te tämaïti a te taata ia Täpeà maitaì i taua parau nei, o tei haapaò i te Täpati, aore i haaviivii ra; e aore to na rima i rave i te parau ìno. 3 E eiaha te tämaïti a te taata ê ra e parau, o tei àti i te Fatu ra, eiaha e nä ô e, Ua faataa-ê-roa-hia vau e te Fatu i to na ra mau taata. Eiaha atoà te èunuta e parau e, Inaha, e räau marô vau. 4 Te nä ô mai ra hoì te Fatu i te mau èunuta, o tei haapaò i to ù ra mau täpati, e o tei rave i tei auhia e au ra, e ua haapaò mäite i te faufaa na ù ra; 5 o ta ù ia e höroà i roto i to ù nei fare, e i roto i ta ù nei âuà, i te manaòraa e te iòa, o tei hau ê i te iòa tamäroa e to te mau tamähine: e iòa vaiiho tämau ta ù e hö atu no rätou, e òre roa e faaòrehia ra. 6 E te mau tamarii o te taata ê o tei àti i te Fatu ra, ei haamori ia na, e ia hinaaro hoì i te iòa o te Fatu, e ia riro ei tävini nö na: te feiä atoà i haapaò i te täpati, e aore i haaviivii atu; e o tei haapaò tämau mäite i ta ù ra faufaa: 7 o rätou ta ù e ärataì i roto i ta ù mouà moà ra, e faaòaòa vau ia rätou i roto i ta ù fare pureraa: e färiihia ta rätou mau tütia täauahi e ta rätou mau tütia i nià i te ta ù fata; e parauhia hoì ta ù fare, o te fare pureraa no te taata atoà.

Oia atoà ia ta Pauro parauraa ia tätou i teie mahana Rōma pene11 i te mau ìrava 13 e tae i te ìrava 32 Te faaoraraa o te Ètene te Ètene e parauhia nei te nünaa 13 O òutou o te Nünaa ta ù e parau atu nei, te haamaitaì nei au i to ù nei töroà, no te mea o vau te âpotetoro o te Nünaa: 14 peneiaè o te oôo faatïpaupau oia hoì te pohehae to ù ra nünaa ia ù, e ia ora te tahi pae. 15 To rätou faaruè-raa-hia ra, o te faite oia hoì o teie faahau ia oè i to te ao, a tae ai hoì i te färiiraa atu ia rätou, e òre änei e riro mai te ora no te pohe mai? 16 Te moà ra te hoturaa mätamua ra, oia atoà te rahi atoà; e te moà ra te tumu ra, oia atoà te mau âmaa. 17 E i ôfene-ê-hia tahi pae i taua mau âmaa ra, e o òe hoì, e te âmaa o te tahi ôrive ê ra, tei poihia i roto ia rätou, e tei ia òe atoà te tumu e te hinu o taua ôrive ra. 18 Eiaha òe e faaoôo teòteò atu i taua mau âmaa ra. Ia teòteò hoì òe ra, e haamanaò eere òe të mau i te tumu, o te tumu rä të mau ia òe.19 E parau mai änei òe e: I ôfene-ê-hia te mau âmaa ia poihia vau i roto ? 20 Ua tià ia. No te faaroo òre i ôfene-ê-hia ai rätou, e e tià faaroo hoì to òe. Eiaha ei âau teitei, ei mataù rä. 21 Aore te Atua i faaherehere i te mau âmaa mau ra, e ara, o te òre atoà hoì o ia o të faaherehere ia òe. 22 E teie nei, a hiò na i te hämani maitaì e te faaherehere òre a te Atua, faaherehere òre i te feiä i hià ra, âreà ia òe ra, o te hämani maitaì ia, ia haapaò tämau òe i to na hämani maitaì, aore rä, e ôoti-ê-atoà-hia òe. 23 E o rätou atoà hoì, ia òre rätou ia tämau märô i te faaroo òre ra, e poihia ia i roto: e tià hoì i te Atua ia poi faahou ia rätou i roto. 24 I ôoti-ê-hia mai òe no nià i te ôrive ôviri mau, e i poi-ê-hia òe i roto i te ôrive maitaì: a tae ai hoì ia rätou i te âmaa mau ra, e poihia mai ia i roto i to rätou iho ôrive. Haamaitaì tätou i te Atua Nui Tumu Tahi tei poi ia tätou i roto i te tumu no te ora e tià ai.

 

Himene òaòa

 

25 Aore hoì au i hinaaro, e a ù mau taeaè, e ia òre òutou ia ìte i teie nei parau àro o te teitei hua hoì to òutou manaò ia òutou iho, e ua roohia Ìteraèra i te pöuri poto, e ia ö atoà mai te rahi atoà o te Ètene ra. 26 E ora päatoà ai Ìteraèra atoà, oia hoì tei päpaìhia ra e: E tae mai te Faaora mai roto mai ia Tiona, e e faaòre o ia i te paieti òre i Iatöpa ra. 27 E o ta ù a hoì teie faufaa ia rätou ra, ia hopoi ê atu vau i ta rätou ra hara. 28 I te haapaòraa i te Èvaneria nei, ua riro ia rätou ei ènemi ia òutou: âreà i te mäìtiraa te herehia nei ia rätou no to rätou feiä metua. 29 O ta te Atua hoì i horoà noa e ta na parauraa, aore ia faaòreraa. 30 Mai ia òutou hoì aore i faaroo i te Atua i mütaa iho ra, e teie nei rä, ua arohahia mai òutou i to rätou faaroo òre ra. 31 Oia atoà hoì rätou, ua òre aè nei ua faaroo i teie nei, o òutou i arohahia mai, ia aroha-atoà-hia mai rätou. 32 E faaroo òre anaè hoì rätou atoà i te vaiiho-raa-hia e te Atua, ia aroha mai o ia ia rätou atoà. Âmene.

Pärahi tätou.

Haamaitaì tätou i te Atua i te hoê reo himene.

 

Himene

 

Pure

Pure tätou i te Atua, i teie taime e taiò ai mätou i te Parau Maitaì o ta Òe Tämaïti ia au te päpaìraa a Mätaio a türama ia mätou i te ìteraa i te faufaa o teie mau parau te tià e tauturu ia mätou i roto i to mätou oraraa. Âmene.

 

Taiòraa.

Mātaio 15.21-28

Te faaroo o te vahine âti-Tanaana

(Mär 7.24-30)

21 Reva atu ra Ietu, haapaì tià atu ra i te tuhaa fenua i Turia e Titona. 22 E inaha, ua haere mai ra ia na ra te hoê vahine âti-Tanaana no reira iho e ua pii mai ra ia na: E te Fatu, te Tamaiti a Tävita, e aroha mai òe ia ù  Ua uru-maamaa-hia ta ù tamahine e te hoê tëmoni  23 Aita rä o ia i pähono noa atu ia na. Ua haafätata mai ra ta na mau pipi, ua parau maitaì mai ra ia na: A faahoì atu ia na, te pii noa mai ra o ia i muri iho ia tätou. 24 Ua pähono atu ra o ia: Aita vau i tonohia mai, mäori rä i te mau mämoe anaè i moè i te ùtuafare o Ìteraèra. 25 Ua haafätata noa mai rä o ia, tähopu mai ra ia na, nä ô mai ra: E te Fatu e, e tauturu mai òe ia ù 26 Ua pähono atu ra o ia: E mea au òre roa ia rave i te färaoa a te tamarii, no te tïtiri atu na te fanauà ùrï. 27 Ua parau mai ra o ia: Oia mau, e te Fatu, te àmu mau nei rä te ùrï i te huàhuà rii färaoa i maìri mai no nià i te àmuraa a to rätou ra mau fatu. 28 Ua pähono atu ra Ietu ia na: E teie nei vahine, e faaroo rahi to òe  O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

 

Pure

Pure tätou i te Atua, Te ìte nei mätou e, e tuhaa ta mätou ia Òe ra e te Atua Nui Tumu Tahi. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene

Parau faaära

Püpüraa moni

 

Pure ärai.

E te Atua Metua, te Atua no te here e te aroha, te haamaitaì nei e te haamauruüru nei mātou ia òe, o òe i arataì mai ia mātou i te mau mahana atoà o to mātou oraraa nei. Rau noa atu ā to mātou huru i mua ia òe, aita òe i vai iho ôtare noa ia mātou, ua faaherehere rā òe ia mātou i roto i te rima aroha noa no òe. Aita òe i faaère ia mātou i te hoê mea ïti noa aè i roto i to mātou oraraa nei, noa atu ā to mātou huru haapaò òre i ta òe mau faaueraa. E au ra paì e, ia topa te taata i roto i te fifi e te ìno, e rahi roa atu to òe peàpeà e to òe hinaaro e ùme mai ia rātou, e ia faanaò atoà rātou i te ora na òe. Ia haamaitaìhia e te Atua Metua no ta òe rahu, ta òe parau mahora noa, to mātou tauturu au i roto i te oraraa nei, na reira atoà i roto i te tāviniraa. Na roto i ta òe rahu, ua aupuru, ua faaàmu, ua àtuàtu, e ua haapii tāmau òe ia mātou i te tāviniraa mau e au ia mātou ia rave. Ia haamaitaìhia òe e te Atua Metua no te rahi o to òe here e to òe aroha ia mātou te taata nei. Âmene.

 

Haamaitaì tätou i te Atua i te hoê reo himene âmui e tià mai tätou.

 

Himene.

 

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Faaitoitoraa. E teie nei vahine, e faaroo rahi to òe  O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

 

Haamaitaìraa.

6 Ia haamaitaì te mau taata ia òe, e te Atua e Ia haamaitaì tahi te taata atoà ia òe 7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei. Âmene.

 

Teraì òr. Faatura.

 

Mätaio 14, 22-33 Täpetepete

 

Tāpati 9 no Âtete 2020.

Täpetepete

Taramo 85

1 Na te Mënätehe. E Taramo na te tamarii a Tora. 2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri.5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra? 7 Eita änei òe e faaanaanaea mai ia mätou, ia òaòa to mau taata ia òe ra? 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua. 11 O te aroha e te parau mau, ua färerei ia räua; o te parau tià e te hau, ua hohoì räua. 12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua. 14 E nä mua ia na te parau tià i te haere, e na te reira e faaìte mai i to na haereà.

1 Te mau Arii 19.9-13

9 Tae atu ra o ia i reira i roto i te hoê ana, e ua taòto iho ra i reira; e inaha, ua tae mai ra te parau a te Fatu ia na, nä ô mai ra, Te aha noa na òe i ô na, e Èria? 10 Ua parau atu ra o ia, itoito noa na vau i e te Atua Täpäota i te Fatu: ua faaruè te tamarii a Ìteraèra i ta òe parau, e ua huri i ta òe fata i raro,  ua täparahi i te mau perofeta na òe i te òè; e io vau nei, o vau anaè nei tei toe: e te ìmi mai nei rätou ia ù nei ia pohe. 11 Ua nä ô mai ra o ia, A haere, ei nià i te mouà tià noa ai i te aro o te Fatu. E inaha, ua haere iho ra te Fatu nä reira iho, o te mataì rahi iho ra e te ètaèta, i te haapararïraa i te mouà, e te vävähiraa i te mato i mua i te aro o te Fatu; aita rä te Fatu i roto i taua mataì ra; e mure aè ra te mataì, o te âueue fenua iho ra; aita rä te Fatu i roto i taua âueueraa fenua ra: 12 e oti aè ra te âueueraa fenua, e auahi; aita rä te Fatu i roto i taua auahi ra: e oti aè ra te auahi, e reo iti haìhaì mai ra, tei reira te Fatu. 13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria?

Rōma 9.1-5

Te Atua e te nünaa ta na i mäìti

1 E parau mau hoì ta ù i te Metia, aore au i haavare, te faaìte âpipiti mai nei te Värua Maitaì e ta ù âau ia ù: 2 e e òto rahi to ù, e te mäuiui tuu òre i roto i ta ù âau. 3 E tià hoì ia ù ia ànatemahia vau e taa ê atu vau i te Metia ra, i ta ù mau taeaè, to ù ra fëtii i te haapaòraa i te tino nei. 4 I te âti-Ìteraèra ra, no rätou te faatävai ra, e te ànaana, e te faufaa ra, e te ture i horoàhia ra, e te haamoriraa, e tei parauhia mai ra. 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

Mātaio 14.22-33

To Ietu haereraa nä nià i te miti

(Mär 6.45-52; Rut 6.16-21)

22 I muri mai, ua faaue atu ra Ietu i ta na mau pipi e paìùma i nià i te poti e e fano nä mua ia na i te tahi pae roto, a faahoì noa ai o ia i taua tiàa rahi ra. 23 E oti aè ra te tiàa rahi i te faahoìhia, paìùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira. 24 Ua huru ätea hoì te poti i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì. 25 E tae aè ra i te maha o te äraraa o te ruì ra, ua haere mai ra o ia ia rätou ra i nä nià i te àre. 26 I te taime i ìte atu te mau pipi ia na i te haereraa mai nä nià i te àre, riàrià roa aè ra rätou, nä ô aè ra: E tüpäpaù E ua auë anaè iho ra i te mataù. 27 Ua parau atu ra rä Ietu ia rätou i reira ra, nä ô atu ra: A faaitoito, o vau teie, eiaha e mataù  28 Ua pähono mai ra Pëtero ia na: E te Fatu, mai te peu e o òe tënä, a faaue mai ia haere atu vau ia òe na nä nià i te àre. 29 Ua parau atu ra Ietu: A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre. 30 Ia ìte rä o ia i te ûàna o te mataì, mataù iho ra, e haamata iho ra i te mure i raro, ua tuö atu ra: E te Fatu, a faaora ia ù 31 Ua faatoro mai ra Ietu i ta na rima i reira ra, haru mai ra ia na, nä ô mai ra: E teie nei taata faaroo haraìni/täpetepete, e aha òe i feàa ai? 32 E ia tae räua i nià i te poti, faaea iho ra te mataì. 33 E te feiä i roto i te poti, tähopu/haamori mai ra ia i mua ia na, nä ô mai ra: Òia mau, o te Tamaiti mau ä òe a te Atua.

Manaò.

Ei hioraa àmui.

Te tahi manaò tumu e vai nei i roto i na taiòraa e maha nei teie ia e vai nei ia au te faaìteraa a te Taramo 12 E tupu mai te parau mau no roto i te fenua, e hiò mai hoì te parau tià mai te raì mai. E tumu parau teie e ìtehia nei i roto i na taiòraa e maha nei, to te Atua faaitoitoraa i to na mau tävini tei mataù, i te mau haafifiraa rau a te mau ènemi. Tei  roto i teie mau fifi to te Atua horoàraa i te puai i to na mau tävini. O ta tätou ia e hiò i teie nei i to Ietu faaitoitoraa i ta na mau pipi i te taime a fifi ai rätou i nià i te poti.

Èi ia faaroo tätou i te haapotoraa o na taiòraa e maha, te faaìte noa mai ra te reira te huru o te tävini i mua i te Atua Nui Tumu Tahi.

-Taramo 85, 12 E tupu te parau mau i roto i te fenua, e hiò te parau tià mai te raì mai.

-I Mau Arii 19, 13 Te aha noa na òe i ô na, e Èria?

-Roma 9, 1 E parau ta ù i te Metia, aore i haavare, faaìte âpipiti mai nei te Värua Maitaì.

-Mätaio 14, 31 Ua faatoro Ietu i ta na rima, haru mai ra E te taata faaroo täpetepete, e aha òe i feàa ai?

Ei manaò tatara.

I muri äè i to Ietu faaàmu  temeioraa i na taata e 5 000 i reira  to na haapäpüraa i te auraa mau no te mäna i àmuhia e Ìteraèra i te mëtëpara, ua faaue o ia i ta na mau pipi ia haere i nià i te pahï no te fano i te tahi pae. Eita e òre e, ua na reira o ia no te faateäraa ia rätou, i te tahi manaò tei tupu i roto i teie nei nahoà rahi tei hinaaro i te faariro ia na ei arii ia au i te faaìteraa a Ioane 6,15, faatea ia rätou  ia òre ia  ö i roto  i taua manaò ra. E aita e òre e, o te tahi atoà  ia tumu i haere ai o ia i nià i te mouà e pure, faateäraa i taua tämataraa  ra, te riroraa ei arii ia au i te hinaaro o te taata o te tuu ia na i mua, o te tuu  ia na i nià aè i te taata. Ua haere mai  o ia no te taata i rotopü i te taata, no te tauturu ia na i to na mau âti, no reira e haere o ia na nià i te miti eiaha ra na nià i te manaò o te taata.

Te mau pipi tei fäno na nià i te pahï, aita i maoro atu te fanoraa i ü ai i te fifi, te mataì puai tei na mua mai e te puai hoì o te miti. Te faahaamanaò atoà ra ia tätou i te tahi àti  tei färereihia e rätou, i reira o Ietu i te faaueraa  i te mataì e te miti ia faaea, e ua faaea iho ra. E mea fifi atu ra teie tere ia hiòhia, no te mea aita pai o Ietu ia rätou ra, o rätou änaè ra. Ua tuu änei Ietu ia rätou no te tahi haapiiraa no te tupuraa o to rätou faaroo? E aore ra e haamataùraa e faaìteraa ia rätou e, o rätou o ta na i faariro ei mau ravaai taata, no teie nei ao i reira rätou e òhipa ai e mea fifi ia e te rave àta, e ere ra i te mea hau noa. Ei faaìte-atoà-raa ia rätou e, te vai ra te mahana aita o ia i rotopü ia rätou, i roto ra i te tahi huru atu hiòraa, ia tae i te reira taime ia òhipa ia rätou, e na rätou hoì e faatere i te pahï, e ere ra no to na hinaaro e faaruè ia rätou, no to na ra here i na reira ai o ia, o te poroì ra ia no to na revaraa. Ua hinaaro atoà o ia ia riro te feiä ta na i here e tei here ia na ei mau taata paari. Aita to rätou tere i ätea roa atu i haamata ai te mau fifi e vahi rahi a te toe ra e tïpae ai, ei faaìteraa e, aita te pahï no te Ètärëtia i nuu rahi i mua i te taime o Ietu i vaiiho ai ia na änaè; aita änei hoì te reira e faaìte atoà mai ra i to tätou mau täupupuraa. Ua vaiiho Ietu ia rätou ia hoe noa i tera pö e tae noa atu ra i te âahiata, i haere mai ai o ia ia rätou ra na nià i te miti no te faaìteraa e ua upootià o ia i nià i te miti, ua upootià o ia i nià i te pöuri, o te Tamaiti o ia a te Atua Nui Tumu Tahi tei mana i nià i te mau mea hämanihia e tei mau hoì ia rätou, mai te òhipa tei tupu i te miti ùteùte tei paruru i te faaoraraa ta te Atua i hinaaro no to na nünaa, i tapu ai o ia ia na. Ia tià ia Ìteraèra ia haere ma te fifi òre, e i reira Ìteraèra i te himeneraa i te upootiàraa no te Atua i te taime no te hämaniraa ra e no to na ratereraa na roto i te miti ùteùte. Te faaâpï nei o Ietu i te reira i to na haereraa i nià i te miti, te miti o tei riro ei täpaò no te mana o te ìno no te pohe o tei haafifi i ta na ôpuaraa faaora eita te reira e mau ia rätou noa atu te huru no te mana. Te parau ra Pauro i to Torota i te pene 2 ìrava 15 E PAU  AE RA  IA  NA  TE  FEIA  HAU  E  TE MANA  RA, FAARIRO  ATU RA IA  RÄTOU  EI HIÒRAA  I  TE  VAHI, I TE VAHI  ATEA  MA  TE ÙMERE  I NIÀ IHO IA RÄTOU  I  TE TÄTAURO  NO NA  RA. Te parau ra Pauro i te upootiàraa tei tupu i Toratota, e o te reira mau atoà ta teie parau e faaìte mai ra ia rätou. Ua haere  mai o  Ietu  ia rätou  ra na nià  i te miti, aita roa ra rätou i taa e,

o Ietu teie, ua rahi atu ra to rätou huehue e te mataù, mai to rätou manaò  e tüpäpaù. Inaha  hoì ua àfaì  mai  o ia i te hau. A FAAITOITO O VAU EIAHA E MATAU. E àhiri o ia e haere mai ia tätou ra i teie mahana, i teie po, hoê-a to tätou huru e to tätou manaò e to te mau pipi. Eita tätou e ìte, o o ia teie no te mea, ua huna tätou ia na i roto i ta tätou mau feruriraa e ta tätou mau faanahoraa e au ra e aita o ia i tiàfaahou e aore ra no te maoro aita atu ra tätou i tiaì mau ia na i to na haereraa mai. Inaha te haere mai nei o ia no to na here ia rätou, no to na here i ta na Ètärëtia.

Te haapäpü atoà nei teie parau e, ua hinaaro te Fatu ia tätou ia òhipa no na. Ia òre roa ia  moè ia tätou e, e mea ïti to tätou faaroo e ua riro tätou ei taata tei mataù i te taime no te mataì puai, e ia  riro  tätou  ei mau taata haehaa  tei tiàturi mau ia na e tei ìte mau ia Ietu ei Tamaiti na te Atua.

Ietu tei na nià mai i te miti te haere e i to na taeraa mai i nià i te pahï, ua faaea te mataì e te miti, ua hau. E ere roa ra to na na reiraraa no te  faaìteìte noa, no te faahiòraa ra ia rätou i nià i te òhipa rahi no to na tiàfaahouraa, te mataì puai e te miti puai ua faaau mai o ia i te reira i roto i to na oraraa rahi ta na i àro na roto i te mauiui e tae noa atu ra i nià i te tätauro, e ua faatià  mai te Atua ia na mai roto mai i te pohe, ei Fatu ora, no te horoà i te ora e te hau.

Ia riro ta tätou mau àroraa, ei mau vahi no to tätou tiàturiraa ia na, te mau àroraa no te aroha e no te parau tià ta tätou e àro nei, e upootià tätou eiaha na roto ia tätou iho, na roto ra ia na tei tiàfaahou e tei here roa ia tätou. Tei nià tätou i te pahï no te Ètärëtia e teie mai nei te mataì, e te miti o tei haafifi i te tere, tei faatupu i te mataù e te peàpeà. E aha mau te auraa no te reira no tatou i teie mahana? Te faaìnoraa e te haaviiviiraa na te taata i te mau òhipa ora atoà ta te Atua i rahu; te faatupu atoà nei te reira i to tätou peàpeà. E ere  ra o te reira anaè i te mea e, aita te mataì puai i tupu noa i roto i te aru tei roto atoà ra i te parau no te oraraa e no te ärataìraa o te mau nunaa, te parau no te tamaì e no te mau mauhaa tamaì; te parau no to te tahi pupu riroraa i nià aè i te tahi, te parau no te faaereraahia te taata i to na tiàraa. I roto i teie nei ao te vai ra te tahi mau vahi mataì puai na roto i te tuàti-ore-raa te tahi nunaa i te tahi, te farii-ore-raa i te tahi i te tahi. Te mataì puai tei roto atoà ia i te tahi mau ùtuafare te farararaa tei faaaueue e tei  haaparari, e tei roto atoà i te taata iho, ia tätou to tätou mau mataùtaùraa no te mea, te ere ra tätou i te tahi mau mea tumu no te oraraa e tae noa atu  hoì i teie parau fifi rahi e te peàpeà no te àva e te àvaàva taèro. Te farara atoà nei te mataì i roto  i te  âmuiraa faaroo, to tätou mau tüàtiàtiraa tei òre i päpü, te ïti no to tätou oraraa faaroo, te ïti no te taime ta tätou i faataa no te haafatataraa hoì i te Atua i roto  i te muhu-òre e te pure. Ua na reira Ietu te Tamaiti iho a te Atua e aha atu ia tatou?

Te fifi  no te huru o te vaamataèinaa ta tätou e ora nei, o te tià e faaòre i te manaò aroha, te manaò tauturu haapaò noa atu ai te taata ia na änaè, o te faaòre i te tiàturiraa  o te taata  i te Atua ei ora  mau, te faatupu atoà nei te reira i to tatou peàpeà.

Ia au i teie mau manaònaòraa, te haapäpü mai nei o Ietu e tei roto ia na te tiaìtururaa mau, to tätou ora  mau, tei parau mai, 31 Ua faatoro Ietu i ta na rima, haru mai ra E te taata faaroo täpetepete, e aha òe i feàa ai ?

Tei nià tätou i te pahï no te Ètärëtia, tei reira te feiä  ruhiruhiä, te feiä paari, te feiä âpï, te mau tamarii, te tane, te vahine. I roto i te matai puai e te miti, ia täuturuhia tei paruparu, ia òre ra te tahi ia haapaò noa ia na anaè, e ia òre te tahi ia hiò noa, ia âmui ra no te raveraa i te òhipa.

I roto i teie nei ao àrepurepu, ua tïtauhia tätou ia faaìte i te Fatu tei tiàfaahou, ia faatupu i to na hau e i ta na parau tià, e no te ora i to na aroha. Tätou e to te hui-faaroo, tei horoàhia te òhipa faaìteraa i te hanahana o te Atua Nui Tumu Tahi, a mau e a rohi, te parau atoà mai ra o Ietu ia tatou, E te taata faaroo täpetepete, e aha òe i feàa ai ?    

                       

Te tiàturi mau ra nei tätou i teie reo?

                                  

 

Teraì òr. Faatura.