Tāpati 11 no Âtopa 2020. Papa Haamori. Mäìtihia.

Tāpati 11 no Âtopa 2020.

Papa Haamori.

Mäìtihia.

Ômuaraa.

Te mau taeaè, te mau tuahine tei roto tätou i te tau no te faaoraraa, te tau no te Hinapaarae, no te mea ua Aroha mai e ua Here mai te Atua Nui Tumu Tahi i te Mäòhi, i Mäòhi Nui nei e te mau taata e noho i nià i teie fenua. No teie àti e faaruruhia nei e tätou i teie mahana tei tuu ia tätou i roto i te hepohepo no te oraraa. Te tïtauraa teie na tau ia faatïtïàifaro faahou tätou ia tätou i te ora i höroàhia ia tätou, ia àtuàtu faahou i te maitaì atoà e faanaòhia nei e tätou o te hinaaro te reira no te Atua. Eie tätou i roto i te tau no te faaoraraa, e rave ta òe iho, a tiàturi ia òe, a tiàturi i te Atua tei faatiàma ia òe, e a faatupu i te hinaaro o te Atua ia ora òe.

E tià mai tätou, haamaitaì tätou i te Atua i te reo himene.

Himene.

Pärahi tätou.

 

Taramo 23

Teie te parau o tätou Taramo no teie mahana, Taramo 23, e 1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. 3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana. Âmene.

 

Himene tätarahapa

Ìtaia 25.6-9

Teie te ôpuaraa faaora a te Atua, i te faaìteraa Ìtaia i te 25 i te mau ìrava 6 e tae i te ìrava 9, 6 Ei reira te Fatu manahope ra e rave ai, na te taata atoà i teie nei mouà, i te ôroà àmuraa mäa maitataì, i te ôroà uaina tahito, i te mau mea maitataì roa ra, i te uaina tahito faaateate maitaìhia ra. 7 E e teie nei mouà o ia e faaòre ai i te täpoì i täpoìhia ai te mata o te taata atoà ra, e te vehï i höhorahia i nià i te mau fenua atoà ra. 8 E nä na e haamou roa i te pohe e a muri noa atu; e na te Fatu ra, nä te Fatu, e horoi i te roimata i te mau mata atoà ra, e faaòre hoì i te faaìno i to na taata i nià i te fenua atoà nei: o te Fatu hoì teie e parau nei 9 Ia tae i taua mahana ra e parau ai rätou, inaha, teie to tätou Atua; ua tiaì tätou ia na, e ua faaora o ia ia tätou: o te Fatu teie; ta tätou i tiaì na; e òaòa tätou mä te ôuàuà i te ora nä na. E tià ai.

 

Himene òaòa.

Firipi 4.12-20

Teie te reo o Pauro ia tätou i teie mahana, Firipi pene 4 i te mau ìrava 12 e tae i te ìrava 20 i te naòraa e, 12 E tià ia ù te iti, e e tià ia ù te mea rahi; te mau vähi atoà, e te mau mea atoà ra, ua pii ia vau, i te paìa e te poìa; i te taoà rahi e te veve. 13 E tià ia ù te mau mea atoà nei i te Metia, tei tauturu mai ia ù ra. 14 E mea tià rä ta òutou i rave i te àufau-atoà-raa ei tauturu mai ia ù i to ù nei pohe.15 E teie nei, ia ìte mai òutou, e to Firipi na, e i te haamataraa i te haapii i te Èvaneria ra, a faaruè mai ai au i Mätetönia ra, aore roa Ètärëtia i àti mai ia ù i te peu i te horoà mai e te horoà atu, maori rä o òutou anaè ra. 16 Ia ù ä hoì i Tëtäronia ra, ua häpono mai òutou i ta ù, e a piti o òutou häponoraa mai, ei tauturu ia ù i to ù ra àti. 17 Eere rä mai te mea e, te tïtau nei au i te taoà, te tïtau nei rä vau ia hopeàhia ta òutou parau, ia riro ei maitaì no òutou. 18 Aita rä e mea toe ia ù i teie nei, ua rahi mai nei, ua navaì roa ta ù, tei ia ù mai nei hoì te taoà no ô na mai ia òutou na, i häponohia mai o Èpaferotito nei, e taruru hauà ia, e tütia mauruüru rahi e te ìtehia mai e te Atua ra. 19 Na ta ù Atua ra e horoà mai i te mau mea atoà e au ia òutou i ta na ra taoà rahi i te ao, i te Metia ra ia Ietu. 20 E teie nei, ei te Atua ra, ei to tätou Metua, te haamaitaì e a muri noa atu. Âmene.

Pärahi tätou, haamaitaì tätou i te Atua i te reo Himene.

 

Himene.

 

Pure.

Pure tätou i te Atua, ua päpaì Òe ta Òe puta i roto i te rähu, te vai, te fenua, te aru, te reva, te mau tiàrama, taua mau mea ora nei, ua päpaìhia e mätou i nià i te mau àpi parau ta mätou e parau nei e pipiria, ta mätou e ineine nei i te taiò e i te faaroo, ia au i te faaauraa âpï,  i roto i te Parau Maitaì no Ietu, i te päpaìraa a Mätaio i te pene 22, i te mau ìrava 1 e moti i te ìrava 14, te ôroà täatiraa. Âmene.

 

Mätaio 22.1-14

Te ôroà täatiraa

(Rut 14.15-24)

1 Ua parau faahou atu ra Ietu ia rätou na roto i te parapore, nä ô atu ra: 2 E au te Hau o te raì i te hoê arii, o tei faatupu i te ôroà täatiraa na ta na tamaiti. 3 E ua tono atu ra i te mau tävini e tii i te feiä i parauhia ra e haere mai i te ôroà e aita rätou i hinaaro e haere mai. 4 Ua tono atu ra o ia i te tahi ä mau tävini, nä ô atu ra E taò atu òutou i te feiä i tïtau manihinihia. Inaha, ua nahonaho ta ù àmuraa, ua tüpaìhia ta ù mau puaatoro e ta ù mau puaa faaàmu, ua nahonaho te mau mea atoà; a haere mai i te ôroà täatiraa 5 Aita rä rätou i haapaò mai haere ê atu ra te tahi i ta na ra faaapu, e te tahi i ta na ra hooraa 6 haru mai ra te tahi pae i ta na mau tävini, hämani ìno mai ra; e täparahi pohe roa iho ra. 7 Riri aè ra te arii: tono atu ra i te nuu tamaì nö na ra, täparahi pohe roa atu ra i taua mau täparahi taata ra, tänina atu ra i to rätou ôire i te auahi. 8 Ua parau atu ra o ia i ta na mau tävini: Ua nahonaho te ôroà faaipoiporaa nei, âreà te feiä i parauhia ra, aore ia i au. 9 E teie nei, a haere i te mau maaraa èà, e te feiä atoà i ìteä atu ia òutou ra, e taò atu e haere mai i te ôroà täatiraa. 10 Haere atu ra taua mau tävini ra i te mau maaraa èà ra, e ua ope atoà mai ra i tei ìteä-atoà-hia ia rätou ra, tei maitaì e tei ìno; î roa aè ra taua fare ôroà ra i te manihini. 11 E ia haere mai ra taua arii ra i roto e hiò i te manihini, ìte iho ra o ia i te hoê taata, aita to na e àhu ôroà; 12 ua parau atu ra o ia ia na E hoa, e aha òe i tae mai ai i ô nei aita to òe e àhu ôroà Mämü noa iho ra taua taata ra. 13 Ua parau atu ra taua arii ra i ta na mau tävini. A ruuruu i nä rima e nä âvae nö na ra, a höpara atu ai ia na i räpae i roto i te pöuri i vaho; tei reira te òto e te àuàuraa niho. 14 E rave rahi hoì tei parauhia, e iti rä tei mäìtihia.

Pure

Pure tätou i te Atua, i to tätou faaroo i teie mau parau te uiui nei tätou eihia taime to tätou parauraa e èita vau e tae, vaiiho no teie mahana i muri, aita vau ineine, aita to ù e taime, e te vai atu ra, mauruüru e Ietu no teie mau parau, ia  tià i teie mau parau ia tauturu i to mätou faaroo. Âmene.

Haamaitaì tätou i te Atua i te hoê reo himene.

Himene.

Faaitoitoraa.

Himene.

Parau faaära.

Himene pupuraa moni.

Pure ärai.

Pure tätou i te Atua, E te Atua Metua, te Atua no te here e te aroha, te haamaitaì nei e te haamauruüru nei mātou ia òe, o òe i arataì mai ia mātou i te mau mahana atoà o to mātou oraraa nei. Rau noa atu ā to mātou huru i mua ia òe, aita òe i vai iho ôtare noa ia mātou, ua faaherehere rā òe ia mātou i roto i te rima aroha noa no òe. Aita òe i faaère ia mātou i te hoê mea iti noa aè i roto i to mātou oraraa nei, noa atu ā to mātou huru haapaò òre i ta òe mau faaueraa. E au ra paì e, ia topa te taata i roto i te fifi e te ìno, e rahi roa atu to òe peàpeà e to òe hinaaro e ùme mai ia rātou, e ia faanaò atoà rātou i te ora na òe. Ia haamaitaìhia e te Atua Metua no ta òe rahu, ta òe parau mahora noa, to mātou tauturu au i roto i te oraraa nei, na reira atoà i roto i te tāviniraa. Na roto i ta òe rahu, ua aupuru, ua faaàmu, ua àtuàtu, e ua haapii tāmau òe ia mātou i te tāviniraa mau e au ia mātou ia rave. Ia haamaitaìhia òe e te Atua Metua no te rahi o to òe here e to òe aroha ia mātou te taata nei. Âmene.

Haamaitaì tätou i te hoê reo himene âmui e tià mai tätou

Himene.

 

Faaitoitoraa.

14 E rave rahi hoì tei parauhia, e iti rä tei mäìtihia

Haamaitaìraa.

20 E teie nei, ei te Atua ra, ei to tätou Metua, te haamaitaì e a muri noa atu. Âmene.

 

Teraì òr. Faatura. 

Mātaio 22.1-14 Mäìtihia.

 

Tāpati 11 no Âtopa 2020.

Mäìtihia.

Taramo 23

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. 3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o taù mau ènemi; ua faatävai òe i ta ù upoo; e te î nei taù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Ìtaia 25.6-9

6 Ei reira te Fatu manahope, ra e rave ai, na te taata atoà i teie nei mouà, i te ôroà àmuraa mäa maitataì, i te ôroà uaina tahito, i te mau mea maitataì roa ra, i te uaina tahito faaateate maitaìhia ra. 7 E e teie nei mouà o ia e faaòre ai i te täpoì i täpoìhia ai te mata o te taata atoà ra, e te vehï i höhorahia i nià i te mau fenua atoà ra. 8 E nä na e haamou roa i te pohe e a muri noa atu; e na te Fatu ra, nä te Fatu, e horoi i te roimata i te mau mata atoà ra, e faaòre hoì i te faaìno i to na taata i nià i te fenua atoà nei: o te Fatu hoì teie e parau nei 9 Ia tae i taua mahana ra e parau ai rätou, inaha, teie to tätou Atua; ua tiaì tätou ia na, e ua faaora o ia ia tätou: o te Fatu teie; ta tätou i tiaì na; e òaòa tätou mä te ôuàuà i te ora nä na.

Firipi 4.12-20

12 E tià ia ù te iti, e e tià ia ù te mea rahi; te mau vähi atoà, e te mau mea atoà ra, ua pii ia vau, i te paìa e te poìa; i te taoà rahi e te veve. 13 E tià ia ù te mau mea atoà nei i te Metia, tei tauturu mai ia ù ra. 14 E mea tià rä ta òutou i rave i te àufau-atoà-raa ei tauturu mai ia ù i to ù nei pohe.15 E teie nei, ia ìte mai òutou, e to Firipi na, e i te haamataraa i te haapii i te Èvaneria ra, a faaruè mai ai au i Mätetönia ra, aore roa Ètärëtia i àti mai ia ù i te peu i te horoà mai e te horoà atu, maori rä o òutou anaè ra. 16 Ia ù ä hoì i Tëtäronia ra, ua häpono mai òutou i ta ù, e a piti o òutou häponoraa mai, ei tauturu ia ù i to ù ra àti. 17 Eere rä mai te mea e, te tïtau nei au i te taoà, te tïtau nei rä vau ia hopeàhia ta òutou parau, ia riro ei maitaì no òutou. 18 Aita rä e mea toe ia ù i teie nei, ua rahi mai nei, ua navaì roa ta ù, tei ia ù mai nei hoì te taoà no ô na mai ia òutou na, i häponohia mai o Èpaferotito nei, e taruru hauà ia, e tütia mauruüru rahi e te ìtehia mai e te Atua ra. 19 Na ta ù Atua ra e horoà mai i te mau mea atoà e au ia òutou i ta na ra taoà rahi i te ao, i te Metia ra ia Ietu. 20 E teie nei, ei te Atua ra, ei to tätou Metua, te haamaitaì e a muri noa atu. Âmene.

Mātaio 22.1-14

Te ôroà täatiraa

(Rut 14.15-24)

1 Ua parau faahou atu ra Ietu ia rätou na roto i te parapore, nä ô atu ra: 2 E au te Hau o te raì i te hoê arii, o tei faatupu i te ôroà täatiraa na ta na tamaiti. 3 E ua tono atu ra i te mau tävini e tii i te feiä i parauhia ra e haere mai i te ôroà e aita rätou i hinaaro e haere mai. 4 Ua tono atu ra o ia i te tahi ä mau tävini, nä ô atu ra E taò atu òutou i te feiä i tïtau manihinihia. Inaha, ua nahonaho ta ù àmuraa, ua tüpaìhia ta ù mau puaatoro e ta ù mau puaa faaàmu, ua nahonaho te mau mea atoà; a haere mai i te ôroà täatiraa 5 Aita rä rätou i haapaò mai haere ê atu ra te tahi i ta na ra faaapu, e te tahi i ta na ra hooraa 6 haru mai ra te tahi pae i ta na mau tävini, hämani ìno mai ra; e täparahi pohe roa iho ra. 7 Riri aè ra te arii: tono atu ra i te nuu tamaì nö na ra, täparahi pohe roa atu ra i taua mau täparahi taata ra, tänina atu ra i to rätou ôire i te auahi. 8 Ua parau atu ra o ia i ta na mau tävini: Ua nahonaho te ôroà täatiraa nei, âreà te feiä i parauhia ra, aore ia i au. 9 E teie nei, a haere i te mau maaraa èà, e te feiä atoà i ìteä atu ia òutou ra, e taò atu e haere mai i te ôroà täatiraa. 10 Haere atu ra taua mau tävini ra i te mau maaraa èà ra, e ua ope atoà mai ra i tei ìteä-atoà-hia ia rätou ra, tei maitaì e tei ìno; î roa aè ra taua fare ôroà ra i te manihini. 11 E ia haere mai ra taua arii ra i roto e hiò i te manihini, ìte iho ra o ia i te hoê taata, aita to na e àhu ôroà; 12 ua parau atu ra o ia ia na E hoa, e aha òe i tae mai ai i ô nei aita to òe e àhu ôroà Mämü noa iho ra taua taata ra. 13 Ua parau atu ra taua arii ra i ta na mau tävini. A ruuruu i nä rima e nä âvae nö na ra, a höpara atu ai ia na i räpae i roto i te pöuri i vaho; tei reira te òto e te àuàuraa niho. 14 E rave rahi hoì tei parauhia, e iti rä tei mäìtihia.

Manaò.

Teie te mau taiòraa turu no tätou parau no teie mahana.

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-Ìtaia 25, 9 Ia tae i taua mahana ra e parau ai rätou, inaha, teie to tätou Atua; ua tiaì tätou ia na, e ua faaora o ia ia tätou: o te Fatu teie; ta tätou i tiaì na; e òaòa tätou mä te ôuàuà i te ora nä na.

-Firipi 4, 13 E tià ia ù te mau mea atoà nei i te Metia, tei tauturu mai ia ù ra.

-Mätaio 22, 14 E rave rahi hoì tei parauhia, e iti rä tei mäìtihia.

Ei manaò tatara.

No teie mahana paieti no tätou, e parau ta tätou no te hoê ôroà  täatiraa tei faatupuhia e te Arii no ta na Tamaiti. E parau òaòa ia no te Fatu ôroà, no te mau fetii, no te mau hoa, e no te mau manihini, tei tïtauhia. Te vai nei ia te maa e rave rahi, te ârearearaa, te òriraa, e te mau ùpaùpa rau, e te vai ätu ra, e faanahoraa ia tupu maite teie ôroà.

E faaineineraa päpü tei ravehia i te  pae o te Fatu ôroà, te ara mäiteraa ia naho maitaì  hou te manihini e tae mai ai. Ia òre te manihini ia ôtiàtià  i te  hioraa i te vahi e tià ia rätou ia pärahi.

Te parapore ra tätou i faaroo äè nei i te täiòraahia, te ìte nei ia tätou i te hoê taaêraa rahi, e te huru ê teie ôroà, eiaha no te pae o te Fatu ôroà ua ineine maitaì O ia, no te pae ra o te mau manihini tei tïtauhia, tei manaòhia no teie ôroà. Ua pätoì ùànahia te tïtauraa a te Arii noa ätu te tono tämauraahia te mau tävini, e te tonoraa onoöno ta te Arii i rave na roto i na  taime e piti, ma te haapäpü i roto i te piti o taime e, ua tiàpaihia  te mau puaatoro maitataì ua naho, aita e mea e toe nei ua ineine, te manihini noa te toe, aita ra i tae mai. Haapaò-iho-ra te tahi pae manihini i ta rätou òhipa tei matauhia e rätou i te rave i te mau mahana atoà, te tahi pae te haapaòraa ia i ta rätou mau àua,  e te tahi pae i ta rätou mau hooraa. Areà ra te tahi pae ra ua haru mai ra i te mau tävini o te Arii, hämani-ìno-iho ra, ma te täparahi pohe roa te tahi pae.

Te toru ra no te tonoraa eita ätu ra i te mau tävini, e mau faèhau ia, eiaha  faahou no te tïtauraa, no te faaìteraa ra i te feiä i hämani-ìno i te mau tävini o te Arii, e tià atoà O ia i te na reira, i te òhipa tià òre i ravehia i nià i to na mau tävini. E parau peàpeà mau teie ta tätou, ua tae roa te riri o te Arii, i nià i te hoê fäito, eita e tano ia ravehia i nià i te taata. Ua tupu teie òhipa na roto i te mauruüru òre e te òto,  e mauruüru òre i tei mäìtihia no te ôroà täatiraa.

Te maha ra o te tonoraa, ia haere ia te mau tävini na te mau maaraa èà rarahi e parau ätu i te taata atoà, e färereihia ätu e rätou, ia haere mai i te ôroà täatiraa a te Arii. Haere mai ra te mau taata e rave rahi, te feiä maì, te mau piriòì, te mau hapepa, e tià ia tätou ia parau e, e feiä teie ta te totaete i òre i haapaò. Î roa äè ra te fare no te ôroà täatiraa i te manihini. Ia haere mai ra te Arii no te ôroà, no te hiò i ta na mau manihini, ìte äè ra O ia i te hoê aita to na e àhu no te ôroà täatiraa, oia hoì te àhu no te tätarahapa huruhia-iho-ra o ia i rapae, ma te ruuruuhia i ta na rima, e to na àvae höparahia atu ra i te vahi pöuri, tei reira te òto e te àuàuraa niho.

O vai ma teie mau manihini tei faataahia no teie ôroà. Mauti ra ia te mau tahuà rarahi, e te mau Faritea. O rätou tei ìte päpu  te mau parapore ta Ietu e faatià nei no rätou ia. Te naò ra hoì te ìrava 45 no te pene 21, E IA FAAROO TE  FEIA  TAHUA  RARAHI  E  TE  MAU  FARITEA I TA NA RA MAU PARAPORE, UA ITE-IHO-RA  E, O RATOU TA NA I PARAU RA.    

Areà ra te mau manihini tei opehia, mai nià mai i te mau maaraa èà, te mau aroä, o te nunaa Ìteraèra ia, tei toe mai no roto i te faatîtîraa i Päpuronia. O rätou tei änihia ia himene i te hoê himene no Tiona. Ta te Taramo 137 ia e faaìte ra, I TE HITI  O  TE MAU  PAPE  I PÄPURONIA  RA  TO  MÄTOU  PÄRAHIRAA  I RARO E UA ÒTO  IHO  RA MÄTOU I TE MANAÒ RA IA TIONA.......A HIMENE  MAI  NA I TE HOÊ HIMENE NO TIONA.

Te taata ra aita to na e àhu no te ôroà täatiraa, e taata ia te reira tei òre i faarii i te parau no te tätarahapa. Teie àhu aita ta tatou taiòraa e faaìte nei i to na ù, e parau noa ra ta tätou, e àhu te tià ia òomohia ia au no te hoê ôroà. Na te reira i faaìte i te Arii e, aita teie taata i au i to na nünaa, e aore ra i ta na manihini. Ua ìte atoà  te Arii i roto i teie manihini, i te tahi manaò faatura òre i te ôroà e tupu ra, i tuuhia ai o ia i te vahi pöuri.

E hoa mä e, E aha ta teie parapore e faaite nei ia tätou ?

Te faaìte nei ia, I TO TE ATUA, FAATUPURAA I TE ÔROAÀ NO TO NA I HERE. Oia mau aita te parapore e faaìte nei o vai te here e aore ra, o vai te vahine täatihia i teie Tamaiti. Te here ra ta te Atua e tiàturi nei mauti ra ia to na nunaa, teie ao, oia hoi te Ètärëtia, o ta na e faatupu nei teie ôroà. Te here ta te Atua e höroà nei, e òre ia  o ia e mäheahea e vai ra i te vai mäiteraa, e aita to na e tauiraa, e aita atoà e puai no teie nei ao e tià e faataaê ia na i ta na i here. E na roto te Atua i te here, no te niuraa i to na Patireia i te fenua nei, ei tïtauraa i te mau taata atoà tei ìte i to rätou hereraahia. O ta na ia e faaìte nei i to na nunaa, ia au i ta Ìtaia faaìteraa i te pene 43 i te 3 e tae i te ìrava 5,O  VAU  HOI  TO  ATUA, O TE ATUA NUI TUMU TAHI, TEI  MOÀ  I  ÌTERAÈRA  NEI  O  TO  OE  IA  ORA. NO  TE  MEA  E  HERE  OE  I  MUA  IA  Ù,  UA  FAATURAHIA  ÒE, E  UA HINAARO  VAU  IA  ÒE, HÖROAÀ  AI  AU  I  TEIE  NEI  MAU  TAATA  EI  MONO  IA  ÒE, E  TEIE  NEI  FEIÄ  EI  ORA  NO  ÒE. EIAHA  ÒE  E  MATAU, TEI  PÏHAÌIHO   VAU  IA  ÒE, E  ARATAÌ  MAI  AU  I  TO  MAU  TAMARII  MAI  TE  HITIA  O  TE  RA  MAI, E  HAAPUTU  MAI  AU  IA  ÒE  MAI TE  TOOA  O  TE  RA.

I teie  mahana i roto i te ao nei, ua moèhia i te taata te  HERE O TE ATUA, ta na i here ia ta tätou. Te haapaò  nei to te ao nei, te vitiviti o ta rätou mau moihaa no te àroraa, ei haamouraa i te mau nunaa paruparu. E ua tae roa to te ao nei, i te raveraa i te tino o te mau tamarii ei ìmiraa moni tià òre, tei faaòhipahia na roto i te mau hämani-ìno-raa. Ua ïti roa to te ao nei e ìmi nei te raveà no te faatupuraa i te parau àro no te here o te Atua. E i naha hoì e rave rahi tei parauhia, ei parauraa mätamua, to te Atua ia faaoraraa  i to na nunaa tei faatîtîhia i Àifiti, e i Päpuronia. Te parauhia ra e, e rave rahi taata, tei faaroo i te mau faaueraa a te Atua. Te piti  to Ietu ia faaàmu temeioraa i te mau taata e 5000 paha, ua faaroo atoà rätou i te mau hinaaro no Ietu, no te feiä e au no te Patireia o te Atua. E o tätou i teie mahana te nünaa mäìtihia, te faaìte noa nei ä te Atua i to na HERE i ta na mau tamarii, eiaha ra no te faaïti, no te faarahi ra. i te mea ua mäìti-atoà-hia tätou e te Atua ei mau tamarii no to na HERE.

O teie hoì te reo no te feiä i mäìtihia èi manihini  no teie ôroà, te na o ra ia e, E FAAROO ATU RA  VAU  I TO NIÀ  ATOÀ   I TE RAÌ  RA, E TO  TE  FENUA NEI,E TO  RARO  I  TE  REPO, E  TO  TE  MOANA, E TO  ROTO  IA  RÄTOU  ATOÀ  RA, I TE  NA  ORAA  E, O  TE  HAAMAITTAÌ, E TE TURA, E TE HANAHANA, E TE MANA, EI  IA NA IA EI TEI  PÄRAHI  I NIÀ  IHO  I TE TERONO  RA, E EI  TE ARENIO, E A MURI  NOA  ATU.( Apotarupo5:13.

 

Teraì òr. Faatura.

 

 

 

 

Mätaio 21, 33-43 Faaòromaì

 

Tāpati 4 no Âtopa 2020.

ÔROÀ

Faaòromaì

Taramo 80

1 Na te Mënätehe i nià i te Totanima-ètuta. Taramo na Âtafa. 2 E faaroo mai, e Të Tiaì ia Ìteraèra e O tei arataì ia Iotëfa mai te nana ra; o òe o tei pärahi i nià i nä Terupi ra, a faaanaana mai. 3 I te aro o Èferaima, e o Peniamina, e o Manate ra, e faaitoito òe, e haere mai e faaora ia mätou. 4 E faahoì mai ia mätou, e te Atua, ia ànaana mai hoì to mata, ua ora iho ra ia mätou. 5 E aha te roa, e te Atua manahope, o te Fatu, i te òe ririraa i te pure a to mau taata nei? 6 Ua faaàmu òe ia rätou i te mäa òto, e ua tuu mai i te roimata na rätou e inu e ia rahi ra. 7 Ua faariro òe ia mätou ei märöraa na to mätou mau taata-tupu, e te àtahia nei mätou e to mätou mau ènemi. 8 E faahoì ia mätou, e te Atua manahope, ia ànaana mai hoì to mata na, ua ora iho ra ia mätou. 9 E vine ta òe i rave mai mai Àifiti mai ra, ua faaruè hoì òe i te mau êtene, e ua tanu iho ra i te reira. 10 Ua väere òe i te fenua i taua vine ra. E ua toro to na aa, e ua api aè ra te fenua: 11 ua àti te mau mouà i te maru no na, e mai te âreti teitei ta na aveave. 12 Ua toro to na âmaa i tähatai, e to na tihitihi i te pape rahi ra. 13 E aha hoì òe i haapararï ai i te âua, e ua pöfaìhia e te feiä haere atoà nei? 14 Te ètuhia nei e te paha o te ururäau ra, e te àmuhia nei e te mau puaa ôviri o te aru ra. 15 E te Atua manahope e, e hoì mai, o ta mätou ia parau ia òe; e hiò mai òe i nià i te raì ia ìte, e haapaò faahou mai ä òe i taua vine nei. 16 Te räau i tänuhia e to rima àtau ra,  e te âmaa ta òe i faaètaèta na òe iho. 17 Ua täpühia ia e ua tüîa i te auahi, ua pohe ia i te aò o to mata ra 18 Ei nià to rima i te taata i to rima àtau ra, ei nià i te taata i faaètaètahia e òe no òe iho ra. 19 E òre hoì mätou e täiva ia òe i reira, e faaanaanaea mai ia mätou, e na mätou e taù i to òe ra iòa. 20 E faahoì ia mätou, e te Atua manahope, e te Fatu e, ia ànaana mai hoì to mata na, ua ora iho ra ia mätou.

Ìtaia 5.1-7

Te here e ta na ôvine, 1 I teie nei, e fatu vau i te tahi pehe i ta ù here ra; i te tahi pehe a ta ù here no tä na ra ôvine. E ôvine ta ta ù here, i nià i te mouà teitei roa e te hotu rahi: 2 e ua âua iho ra o ia, e ua ohi iho ra i te mau ôfaì e ua pau; e ua tanu iho ra i te vine maitaì; e ua patu iho ra i te fare tiaì i röpü, e ua pao iho ra i te vairaa uaina i roto ra; e ua manaò iho ra i te hotu mai i te vine mau, e huero taèro rä tei hotuhia mai. 3 E teie nei, e to Ierutarëma, e te mau taata atoà no Iüta nei; e haamanaò iho nä òutou ia ù e taua ôvine na ù nei: 4 e nä hea atu ä vau i taua ôvine na ù ra, mäori rä i ta ù i rave ra? E aha iho ra ia ù i tiaì i te vine i te hoturaa mai, i hotu mai ai i te huero taèro 5 E haere mai ra, e faaìte atu vau ia òutou i ta ù e rave i taua ôvine na ù nei: e hopoi ê au i te âua, e ia pau roa i te àmu; e vävähi au i te patu, e ia pau i te taataahihia i raro ra. 6 E faaano roa vau i te reira ia ano; e òre a topehia, e òre hoì e ôhia, e tupuhia rä te räau taratara e te tätarämoa i roto ra: e faaue hoì au i te mau ata e eiaha rätou e haamaìri i te ua i nià iho ra. 7 O taua ôvine a te Fatu manahope ra, o te ùtuafare ia o Ìteraèra; e te mau taata no Iüta ra, o tä na ia ohi pöpou: e ua tiaì hoì o ia i te parau au, e inaha, o te faafao tei ìteä; ua tiaì hoì i te parau tià, o te auë ia a te feiä hämani-ìno-hia ra.

Firipi 4.6-9

6 Eiaha òutou e ahoaho noa atu i te mau mea atoà nei, e faaìte hua rä i to òutou hinaaro i te mau mea atoà nei i te Atua, i te pure, i te aniraa atu mä te haamaitaì. 7 E na te hau a te Atua, o tei hau ê atu i te ìte taata nei, e faaitoito mai i to òutou âau, e to òutou manaò i te Metia nei ia Ietu. 8 E teie nei, e a ù mau taeaè, te mau mea haavare òre ra, te mau mea au maitaì ra, te mau mea tià ra, te mau mea viivii òre ra, te mau mea pöpouhia ra, te mau mea roo maitataì ra; te vai na te tahi maitaì e te tahi mea haamaitaì ra, e haamanaò i taua mau mea ra. 9 I te mau mea ta òutou i ìte, ta òutou i färii, ta òutou i faaroo, e ta òutou i hiò mai ia ù nei, e rave ia. E e riro te Atua hau ei pïhaì atoà iho ia òutou.

Mātaio 21.33-43

Te feiä faaapu vine ôrure hau

(Mär 12.1-12; Rut 20.9-19)

33 E faaroo mai i te tahi ä parapore: Ua tänu iho ra te hoê fatu fenua i te hoê ôvine, haaàti atu ra i te âua, hämani iho ra i te neneìraa vine i roto, faatià iho ra i te fare tiaìraa, tuu atu ra i te feiä faaàpu, reva atu ra i te fenua ê. 34 E fätata aè ra te ànotau àuhune, ua tono atu ra o ia i ta na mau tävini i te feiä faaàpu ra, ia höroàhia mai ta na tuhaa mäa. 35 Ua haru iho ra rä rätou i taua mau tävini nö na ra, papaì iho ra i te tahi, pëhi iho ra i te tahi i te ôfaì, täparahi pohe roa iho ra hoì i te tahi. 36 Ua tono atu ra o ia i te tahi mau tävini ä, e rahi ia i tei mütaa iho, e ua nä reira atoà ä te feiä ia rätou. 37 E te hopeà iho ra, ua tono atu ra o ia i ta na tamaiti ia rätou, nä ô aè ra: E riro rätou i te faaturatura mai i ta ù tamaiti. 38 Ia hiò mai rä te feiä faaàpu i te tamaiti, ua nä ô aè ra rätou rätou iho: O te taata âià teie Tätou e täparahi, a haru ai tätou i to na fenua  39 Ua haru mai ra rätou ia na, höpara atu ra i räpaeàu i taua ôvine ra, täparahi pohe roa atu ra ia na. 40 E ia haere mai te fatu na na taua ôvine ra, e aha mai ra o ia i taua feiä faaàpu ra? 41 Ua nä ô mai ra rätou ia na: E täparahi pohe roa ia o ia i te reira mau taata ìino i te pohe rahi ìno, a tuu atu ai i te ôvine i te tahi feiä faaàpu ê, o të hopoi mai i te mäa nä na i te tau mau ra. 42 Ua parau atu ra Ietu ia rätou: Aita ä òutou i taiò i roto i te parau i päpaìhia ra e: O te ôfaì i faaruèhia e te feiä patu fare ra, o tei faarirohia ia ei ôfaì tiàvä; Na te Fatu te reira i rave e te hiò atu nei tätou mä te pöpou. 43 E teie nei, e parau atu vau ia òutou: e hopoi-ê-hia te Hau o te Atua ia òutou, e e tuuhia atu i te hoê nünaa e faahotu mai i te mäa.

Manaò

Teie te tahi haapotoraa o na taiòraa e maha, no teie mahana.

-Taramo 80, 20 E faahoì ia mätou, e te Atua manahope, e te Fatu e, ia ànaana mai hoì to mata na, ua ora iho ra ia mätou.

-Ìtaia 5, 1 I teie nei, e fatu vau i te tahi pehe i ta ù here ra; i te tahi pehe a ta ù here no tä na ra ôvine. E ôvine ta ta ù here, i nià i te mouà teitei roa e te hotu rahi.

-Firipi 4, 6 Eiaha òutou e ahoaho noa atu i te mau mea atoà nei, e faaìte hua rä i to òutou hinaaro i te mau mea atoà nei i te Atua, i te pure, i te aniraa atu mä te haamaitaì.

-Mätaio 21, 43 E teie nei, e parau atu vau ia òutou: e hopoi-ê-hia te Hau o te Atua ia òutou, e e tuuhia atu i te hoê nünaa e faahotu mai i te mäa.

Ei hiòraa i na taiòraa e maha.

E tià ia haapäpühia e, ua rave te Atua i ta na òhipa no ta na ôvine. I te faahiàraa i te mau tumu raau, te vaereraa, te ôhiraa i te ôfaì e te paìraa i te repo. Ua tanu hiò ra i te vine maitaì, tuu atu ra i ta na faaàpu i roto i te mau tiàau, no te àtuàtu ma te haapaò maitaì. Ia tae ra i te taime ôotiraa, ua hinaaro te Atua i te maa no ta na faaàpu, eiaha te taatoàraa ta na ra tuhaa. E aha tei ìtehia nei te fifi ia o te faaàpu, ua riro te feia tiàau ei fatu, ua moèhia  te Fatu mau o te faaàpu. E inaha hoì e, e huero maitaì tei tänuhia, hotu iho nei ra te huero taèro, e ua î atoà i te àihere taratara. Ua ineine hoì te fare neneiraa, faufaa òre iho ra taua òpuaraa ra.

O Ìteraèra taua ôvine ra, tei òre i haapaòhia e te mau taata tiàau o ta te Atua i tiàturi. E ua tupu, ua hotu i te maitaì e te ìno, o te tià ra i te nunaa ia rave, ia piihia te Atua ma te faaroo päpu, e ia mataùhia O ia. Te reira te ìmihia ra ia te mata parau tià o Iehova, i te mea O ia anaè te tià e faaora i te nunaa. O te reira te òaòaraa i roto i te amoraa i te hopoià o ta te Atua i tiàturi e na to na nunaa e haapaò. Ia ìteähia te märu, faaitoitoraa e te haapaò maitaì. No reira te Atua i faaineine ai i ta na ôvine ia tià i te mau tiàau i te haapaò i ta rätou mau hopoià.

Aita ra i tupu mai ta te Atua i hinaaro, i te taime te Atua hinaaro ai i ta na tuhaa, ua tupu ia te hoê fifi. I nià i te mau tävini ta na i tono e tii i ta na tuhaa, e tae noa atu noa atu i ta na tamaiti. Tei täparahi pohe-roa-hia. Aita ra teie òhipa i mauruüruhia, ua täparahi pohe-atoà-hia teie mau taata ìino. Te òhipa i tupu i ù nei, ia òre te hoê nunaa e faahotu i te ôvine a te Atua, e tuuhia teie ôvine i roto i te nunaa te faahotu i te huero maitaì. E aha te faufaa e ìtehia nei i roto i teie parapore? Mau tirä ia,  TE FAAÒROMAÌ O TE AROHA.

Oia mau, e faaòromaì rahi to te Fatu ôvine i te huru o te feia faaàpu ta na i horoà i te tiàturiraa e, e tuhaa atoà ta na ia tae i te tau no te ôotiraa. Aita ra i tupu mai ta na i ôpua o tei ìtehia ra te nounou ia o te feia faaàpu i te ruperupe o teie ôvine. To na nahonaho, e tià ia parauhia e te mahana noa no te ôotiraa te mäoro. Ia tae ra i taua mahana ra, te ìtehia nei te faatura òre o te feia faaàpu  i te hinaaro o te Fatu no ta na tuhaa, e inaha ua horoà te Fatu faaapu i teie òhipa ma te âau aroha, tei ìtehia, aita teie maitaì i ìtehia mai. Ua täparahi pohehia to na mau tävini, e òhipa riàrià mau teie e tupu nei. No te aha ra? no te mea ia aita te faatura e tupu faahou ra, o te nounou ra tera e faatere ra. Riro atu ra teie ôvine e vahi täparahiraa taata. Âuë ia i te peàpeà. Te vahi ôotiraa i te aroha o te Atua riro iho nei ra ei vahi òtoraa. E aroha i te rahi e te faaòromaì to te Fatu o te ôvine, te òre-raa ta na òpuaraa e manuia. E tupu anei te riri o te Fatu, ia au i te manaò o te mau tahuà rarahi, e te mau Faritea i te ìrava 41. Àreà ra te manaò o Ietu aita ia no te mea e parauhia rätou, e ua faaruèhia te ôfaì tiàvä te tià e täpeà i te mau âpaparaa ôfaì o te fare. E te patireia o te Atua e horoàhia ia i roto i te nunaa e faahotu mai i te huero maitaì. E aha ia te faufaa e ìtehia nei? oia hoì TE FAAÒROMAÌ O TE AROHA. E faaòromaì rahi te aroha o te Atua i mua i teie òhipa i ravehia i nià i to mau tävini. O vai te Fatu fare, te Atua ia, te feia faaàpu te mau faatere ia no te hau Roma, te mau tävini, o te mau patereareha, e te mau perofeta, te feia i faaruè i te ôfaì tiàvä, o te mau tahuà rarahi, e te mau Faritea. Ia horoàhia te tuhaa a te Atua e tià ai.

 

 

Terai or. Faatura

           

 

 

Mātaio 21.28-32 Ô VINE

 

Tāpati 27 no Tetepa 2020.

Ô VINE

Taramo 25

1 Taramo na Tävita. Te faaäraära atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà. 5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre: e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà. 10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai.11 Rahi noa iho ä ta ù nei hara, e te Fatu, e faaòre mai ä òe i to òe ra iòa. 12 O vai te taata i mataù i te Fatu? E faaìte o ia ia na i ta na èà ia hinaaro ra. 13 E pärahi te reira taata mä te maitaì, e riro te fenua i to na ra huaai. 14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra. 15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra.16 Ìte mai ia ù, e aroha mai ia ù, e àti hoì to ù i te moèmoè. 17 Ua rahi iho nei te mäuiui o ta ù âau, e faaora òe ia ù i ta ù mau àti nei. 18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei. 19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti.

Ètetiera 18.25-28

25 E te parau na hoì òutou e, Aore te parau a te Fatu nei i au. E faaroo mai na, e te ùtuafare o Ìteraèra nei, O ta ù änei te parau aore i au? Eere änei o ta òutou te parau aore i au? 26 Ia faaruè te taata parau tià i te parau tià nä na ra, e ua rave i te parau ìno ra, e pohe hoì o ia i te reira; i te parau ìno i ravehia e ana ra e pohe ai o ia. 27 E ia färiu mai hoì te taata parau ìno i ta na ra parau ìno, i ravehia e ana ra, e ua rave i te mea au, e te parau tià, e ora ia o ia. 28 No te mea, ua manaò o ia, e ua färiu ê mai i te mau hapa ta na i rave ra, e ora ia o ia, e òre o ia e pohe.

Firipi 2.1-11

Te haèhaa e te rahi o te Metia

1 E teie nei, e maa itoito tei te Metia nei, e maa mähanahana to te aroha, e maa auraa to te Värua, e maa aroha âau e te hämani maitaì, 2 faanavaì mai òutou i to ù nei òaòa, i te tähoê-mäite-raa to òutou manaò, mä te hinaaro hoê, e mä te âmui-atoà-raa o to òutou âau i te haapaòraa i te parau hoê. 3 Eiaha roa ei mea e ravehia mä te märö e te teòteò faufaa òre ra; ei âau haèhaa rä, i te manaò haamaitaìraa atu te tahi i te tahi eiaha ia na iho. 4 Eiaha hoì te taata atoà e haapaò i ta na anaè iho ra, e haapaò atoà rä i ta vëtahi ê ra maitaì. 5 Ia hoê atoà o òutou huru âau e to te Metia ra to Ietu: 6 O te huru ia o ia no te Atua, e aore o ia i parau e haru töroà ia fäito atoà o ia i te Atua. 7 Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei. 8 E no te mea o ia i ìteä mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra. 9 I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na; 10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra; 11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.  

Mātaio 21.28-32

Nä tamaiti toopiti

28 E aha to òutou manaò? Toopiti a te hoê taata puè tamarii tamaroa. Ua haere atu ra o ia i te mätahiapo ra, nä ô atu ra: E ta ù tamaiti, e haere òe e rave i te òhipa i roto i ta ù ôvine i teie mahana. 29 Ua parau mai ra o ia: E òre au e tae, e i muri aè ra, tätarahapa iho ra, haere atu ra. 30 Ua haere atu ra o ia, e ua nä reira atoà atu ra i te parauraa atu i te teina. Ua parau mai ra o ia, nä ô mai ra: Ê, aita rä i tae. 31O vai to räua i haapaò i te hinaaro o to räua metua? Ua nä ô mai ra rätou ia na: O te mätahiapo ia. Ua parau atu ra Ietu ia rätou: E parau mau ta ù e parau atu ia òutou nei: o te feiä òhi tute e te mau vahine faaturi tei reva na i te Hau o te Atua, ia òutou. 32 I haere mai hoì Ioane io òutou nei mä te parau tià, e aore òutou i faaroo ia na; ua faaroo rä te feiä òhi tute e te mau vahine faaturi ia na. Òutou rä, ìte noa ä òutou i te reira, aita roa rä òutou i tätarahapa a faaroo atu ai ia na.

 

 

Manaò.

Taramo 25, 15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra.

Ètetiera 18, 27 E ia färiu mai hoì te taata parau ìno i ta na ra parau ìno, i ravehia e ana ra, e ua rave i te mea au, e te parau tià, e ora ia o ia.

Firipi 2, 11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.  

Mātaio 21, 32 I haere mai hoì Ioane io òutou nei mä te parau tià, e aore òutou i faaroo ia na; ua faaroo rä te feiä òhi tute e te mau vahine faaturi ia na. Òutou rä, ìte noa ä òutou i te reira, aita roa rä òutou i tätarahapa a faaroo atu ai ia na.

Ei tatararaa.

Te parau e tià ia täpeàhia i roto i teie mau taiòraa, e tià roa ia tätou ia parau e, TE HINAARO O TE ATUA. I te mea ua faatupu te Atua i te hoê ùtuafare i roto i te taata. Tei tiàhia mai e Ìteraèra. Tei reira te Atua i te tuuraa i ta na mau parau fäfau, ia haapaòhia to na hinaaro. Na roto i teie parau fäfau aita i tupu i nià i te hinaaro o te Atua, ua rave noa te taata i te mea o ta na e ìte ra e maitaì  no na. Àreà ra te hinaaro o te Atua ua vai noa ia te reira i pïhaìiho i te manaò taata, mai te hoê parau pohe. E ìnaha hoì te parau tià a te Atua, o te ora ia o te taata. Ia färiu ra te taata i nià  i te Atua, e noaa ia na te âau âpï e te Varua âpï. Te mauruüruraa o te Atua te ora ia o te taata. Na teie manaò to te Atua, e faaineine i te taata ia haapaò i te mau faaueraa a te Atua, tei haapiihia na roto i te ture. Ia ìte änaè te taata faaroo i teie faufaa, e tupu ta na äniraa, no te faaitoitoraa ia na, i te tauturu a te Atua. E ìtehia te tauturu na roto i te hinaaro hoê, tei fäitohia e te Atua, te fäìraa faaroo ia i te iòa o te Metia.

I mua i teie mau manaò, aita aè te faahohoà nei te Atua, Ia na mai te hoê Metua tane tei fänau e piti tamaroa ta na i tiàturi e, e faaroohia ta na parau, te mätahiapo ua tätarahapa i ta na aita, e ua faatupu i te hinaaro o te Metua. Te teina ra ua E, aita ra i faatupu i ta na E i te hinaaro o te Metua, ua topa o ia i roto i te parau tià òre.

Te hinaaro o te Atua, o te ìteraa ia, i te itoito, te aroha, e te mahanahana.

Ei heheuraa na tätou te Parau Maitaì i päpaìhia e Mataio i te pene 21 i te mau ìrava 28 e tae i te ìrava 32.

Tupuraa teie parau, tei roto ia i te hiero, ir 23.

Te vahi tei Ierutarëma, no te mea aita e hiero to te tahi atu vahi.

Mau taata o te taiòraa, e faaroo ra, mau tahuà, feia paari, e te mau pipi.

Mau taata o te parapore, te metua tane, e na tamarii tamaroa.

Mai teie te huru no te heheuraa i teie parapore, o te tià e faaìte mai ia tätou te faufaa no te mau hinaaro o Ietu i te mau taata atoà e tiàturi nei ia na.

Te tahi tumu e tià ia tuatäpapahia, mau ti ra ia te FAATURARAA i te mau HINAARO O TE ATUA.

O te hoê teie tumu parau te tià i te taata ia hiò faahou i teie mahana i te mea aita e tauà maitaìhia ra teie parau, E FAATURA. E rave rahi hiòraa no teie parau, o ta te taata e faanaho nei ia ìtehia to na faufaa. Te tumu o teie taò e TURA, te parauhia nei te tura pape, te tura maa, te tura repo, te tura färaoa. E aha teie e ìtehia nei, te parau no te faarii, eiaha teie mau òhipa ia purehu haere noa, ia vai mai te ra, eiaha atoà ia mauà. Ia parau tätou e, e faatura i tera taata, te manaò e mähia mai, mau ti ra ia te auraro. NO te aha ? No te mea ia ua riro teie taata ei faarii no te tahi ôpuaraa te faatupu i te hoêraa o te mau manaò ia ìtehia te hau o te aroha. Te ìte nei ia tätou i ù nei, eita tei nià i te tiàraa, te toroà e tupu ai te faaturaraa, tei nià ra i te parauraa, e te faaìte päpüraa i te manaò no te faatupu i te âmuiraa o te mau taata ei hoê, i nià i te tahi tumu òhipa tei òre roa i purara te feruriraa.

Ei hiò maitaì tätou i te huru o na tamarii toopiti nei, o vai tei faatura i te hinaaro o te metua .Te mätahiapo, ua parau aita, tätarahapa iho ra haere atu ra, te teina, ua parau e è aita ra i haere i roto i te ò vine

Te pähonoraa a te mau tahuà, e te feia paari te mätahiapo, oia atoà ia te pähonoraa a Ietu. Ma te tatara i to na manaò i te naòraa e, te mau vahine faaturi, te mau terona e na mua ia i te patireia, no te mea ua ìte rätou i te parau tià a Ioane, e ua faaroo ma te tätarahapa, o òutou ra aita ia. Tei faatura i te hinaaro o te Atua, o tei ìte ia i te ora e vai ra i roto ia na.

Ei manaò tatararaa, Te tahi ìrava, e tià e horoà ia tätou te tupuraa teie tumu te FAATURA, te reo faaue ia o te Metua i na tamarii, tei faahitihia i te ìrava 28 vh. E TA  U  TAMAITI, E  HAERE  OE  E  RAVE  I  TE ÒHIPA  I  ROTO  I TA U  O  VINE  AAUANEI.

I te ìrava 23 no ta tätou pene parau te haapäpühia nei e, te faatià ra o Ietu i teie parapore i nià i te mau tahuà, e i nià  i te feia paari tei haere mai e faaroo i ta na mau  haapiiraa o ta na e horoà nei i mua i te mau taata e rave rahi i putuputu mai ai rätou i roto i te hiero. Te uihia  nei  o Ietu e te mau tià o te nunaa, O VAI  TE  TUMU I TEIE  NEI MAU MEA  TA  ÒE  E RAVE NEI ? E  NA  VAI  I HOROA  I TEIE NEI  MANA IA  ÒE ? Ua tià roa  ta  rätou äniraa, no te mea o rätou  te faatere i te nünaa i te pae no te oraraa faaroo, e i te pae no te oraraa tivira, na roto i te mana i horoàhia ia rätou e te hau Roma. Aita o Ietu i pähono i ta rätou uiraa, ua tuu atoà ra O ia ia rätou i te uiraa i muri nei, NOHEA  TE PAPETITO A IOANE ? NO TE RAI MAI ANEI, E NA TE TAATA  ANEI ? I teie uiraa ta Ietu ua tupu  te hoê  feruriraa rahi i roto i te mau tahuà e te feia paari. Mai te peu e, e pähono  rätou e, no te  rai  mai, e riro o Ietu i te parau mai e, e aha iho ra òutou i òre i faaroo atu ai ia na? Mai te peu e, e parau tätou e na te taata, te mataù nei ia rätou i te taata. Ua pähono atu ra rätou ia Ietu, AORE  MATOU  I ÌTE. No  teie  ìte òre to rätou i faatià ai o Ietu i teie parapore no teie na tamarii i faauehia e to raua na Metua ia  haere e òhipa  i roto i te ô vine. Te reo o te Metua i nià i teie na tamaiti ia haere raua i roto i te ô vine. Ua  faaroo teie na tamarii i te reo faaue o te Metua, teie ra eita hoê ä huru to raua manaò. E ìtehia teie taaêraa to raua i nià i ta raua färiiraa i te faaueraa a te Metua.

Te tämaïti mätamua oia hoì te mätahiapo, e tämaïti ìte e te marämarama, tei haapiihia i te peu maitaì, tei auraro i te äniraa a to na metua no te rave i te òhipa i roto i te ô vine, noa atu ä ia ta na parauraa e, e òre au e tae, inaha i muri äè ua haere o ia, mai te âau tätarahapa. Te òhipa ta teie tämaïti i rave ei faaìteraa ia i te hape o ta na pähonoraa i mua i te tïtauraa a to na metua. Te vahi i faauehia ia na ia haere i reira e rave ai i te òhipa, e vahi ia no te ora. Ia òre ia òhipahia i roto i te ô vine e pohe  te ô vine. O teie te vahi i märamaramahia e te tämaïti mätahiapo i to na pätoìraa i te faaueraa a to na metua, i tupu ai to na tätarahapa mai roto mai i te hohonuraa o ta na âau. Riro atu ra ta na pätoìraa ei färiiraa, ta na aita ei mea, E päpu ai te faatupuraa i te hinaaro o to na Metua ia haere i roto i te ô vine òhipa ai. Teie tämaïti  ta  te parapore e faaìte nei o te hohoà mau ia no te mau patereareha e te mau perofeta ta te Atua i tïtau ei faatupuraa i to na mau hinaaro i roto i to na nunaa. Te haamanaò nei tatou i ù nei ia Mote, tei ìmi i te mau raveà atoà, no te pätoìraa i te tïtauraa a te Atua ia haere i te fenua Àifiti e ìriti mai i te nunaa mäìtihia e te Atua. Ta na mau pätoìraa, e taata reo maromaroä o ia, noa ätu ä ia teie mau manaò to na, ua tià  roa ra ia na i te haere i te vahi ta te Atua i tono ia na. Oia atoà ia te mau perofeta, te haamanaò atoà nei tätou i ù nei ia Ieremia, tei pätoì atoà i te tïtauraa a te Atua, eita e tià ia ù e tamarii ä hoì au nei. E te pähonoraa a te Atua, ua mäìtihia hoì òe e au mai roto mai ä i te ôpu o to metua vahine. Te òhipa i ravehia e teie mau tävini no te Atua mau ti ra ia te faatià faahouraa ia i te mana o te Atua i roto i to na nünaa. I tià ai i te nünaa ia hoì i nià i te èà no te parau tià e te parau mau no te mau hinaaro o te Atua. Ua tonohia mai e te Atua i to na mau tävini i roto i to na nünaa, ia tià i te mau tävini i te faaìte i te mau hinaaro o te Atua, i te mau vahi i reira rätou i te oraraa. I te mea ua faatupu te Atua i te hoê ùtuafare no na, i roto i te taata. Tei tiàhia mai e to na nünaa ta na i mäìti. Tei reira te Atua i te tuuraa i ta na mau parau fäfau, ia haapaòhia, to na hinaaro. Na roto i teie parau fäfau aita i tupu i nià i te hinaaro o te Atua, ua rave noa te taata i te mea o ta na e ìte ra e maitaì no na. Àreà ra te hinaaro o te Atua ua vai noa ia te reira i pïhaìiho i te manaò taata, mai te hoê parau pohe. E inaha hoì te parau tià a te Atua, o te ora ia o te taata. Ia färiu ra te taata i nià i te Atua, e noaa ai ia na te tiàturiraa âpï tei faatupuhia na roto i te haamaitaìraa a te Atua. Te mauruüruraa o te Atua te ora ia o te taata. Na teie manaò to te Atua, e faaineine i te taata ia haapaò i te mau faaueraa e horoàhia nei ia na e te Atua na roto i te ture. Ia ìte änaè te taata faaroo i teie faufaa, e tupu ta na äniraa, no te faaitoitoraa ia na, i te täuturu a te Atua. E ìtehia te täuturu na roto i te hinaaro hoê, tei fäitohia e te Atua. I mua i teie mau manaò, te faaìtehia nei ia te tiàraa o te Metua tane ta te parapore e faatià nei. Te mätahiapo ua tätarahapa i ta na aita, e ua faatupu i te hinaaro o te Metua. Te teina ra ua E aita ra,i faatupu i ta na E i te hinaaro o te Metua, ua topa o ia i roto i te parau tià òre. Te teina ta te parapore e faaìte nei, mau ti ra ia te mau tahuà e te feia paari, o rätou tei faaroo i te mau haapiiraa a Ietu, aita ra rätou i färii. E na rätou atoà i pari haavare ia Ietu e, e faainaina Atua, i tupu ai te faahaparaa pohe i nià i te Tämaïti a te Atua. Aita ra i ìtehia te parau no te tätarahapa i roto ia rätou i te òhipa ta rätou i rave i nià i te Tämaïti a te Atua. Ta rätou pähonoraa ia Ietu i te uiraa e, O  VAI  TEI  HAAPAO  I TE HINAARO  O TE  METUA? Te  naò nei ia rätou e, o te tämaïti mätahiapo, oia hoì te mau patereareha e te mau perofeta. Ia òre ra rätou ia tätarahapa. Te faaìte nei ia o Ietu i to na peàpeà, e na mua ia te mau terona e te mau vahine faaturi ia rätou i te Pätireia o te Atua. I te mea o rätou atoà tei färii i te päpetitoraa tätarahapa tei ravehia e Ioane i te mëtëpara. Ua ìte hoì te mau tahuà e te feia paari i te òhipa i ravehia i te mëtëpara, aita ra rätou i tätarahapa.

Te naò nei ta tätou ìrava, E  TA  U  TAMAITI  HAERE  OE  E  RAVE  I  TE  OHIPA  I ROTO  I TA U Ô VINE.

Te ô vine ta te ìrava e parau nei mau ti ra ia te nunaa o te Atua, tei roto i teie vahi te tonoraahia na tamarii e piti nei. E aha atu ra ia tei noaa i te tämaïti mätahiapo na roto i to na tätarahaparaa?

1) Ua noaa ia na te âau âpï e te varua âpï, o ta Ètetiera ia e faaìte nei i te pene 18 i te ìrava 31,32 E FAARUE  Ê  ATU  ÒUTOU  I  TO ÒUTOU  MAU  ÌNO  ATOA  RA  I  HARA  AI ÒUTOU  NA  E  FAAÂAU  ÂPÏ E TE VARUA  ÂPÏ E AHA  HOÌ  ÒUTOU  I  HINAARO  AI I TE POHE E TE UTUAFARE O ITERAERA.AORE ROA  HOI  O U E MAURUÜRURAA  I  TE  POHE  O  TE TAATA E POHE  RA TE PARAU  MAI RA TE  FATU RA O IEHOVA E TE NA NA E FARIU MAI IA ORA.

2) Ua noaa ia na te itoito, te mahanahana, te aroha e te hämani maitaì. Ta parau ia ta Pauro i faaìte i to Firipi i te pene 2 i te ìrava 1, E TEIE NEI E MAA ITOITO  TEI TE METIA NEI E MAA MAHANAHANA  TO TE AROHA E MAA AURAA TO TE VARUA E MAA AROHA ÂAU E TE HAMANI MAITAI. 

 

 

 

Terai or. Faatura.