Märeto 13.32-37 Puai

 

Tāpati 29 no Novema 2020.

TIAÌRAA HOÊ

Puai.

Mau taiòraa

Taramo 80

1 Na te Mënätehe i nià i te Totanima-ètuta. Taramo na Âtafa. 2 E faaroo mai, e Te Tiaì ia Ìteraèra e O tei arataì ia Iotëfa mai te nana ra; o òe o tei pärahi i nià i nä Terupi ra, a faaanaana mai. 3 I te aro o Èferaima, e o Peniamina, e o Manate ra, e faaitoito òe, e haere mai e faaora ia mätou. 4 E faahoì mai ia mätou, e te Atua, ia ànaana mai hoì to mata, ua ora iho ra ia mätou. 5 E aha te roa, e te Atua manahope, o te Fatu, i te òe ririraa i te pure a to mau taata nei? 6 Ua faaàmu òe ia rätou i te mäa òto, e ua tuu mai i te roimata na rätou e inu e ia rahi ra. 7 Ua faariro òe ia mätou ei märöraa na to mätou mau taata-tupu, e te àtahia nei mätou e to mätou mau ènemi. 8 E faahoì ia mätou, e te Atua manahope, ia ànaana mai hoì to mata na, ua ora iho ra ia mätou. 9 E vine ta òe i rave mai mai Àifiti mai ra, ua faaruè hoì òe i te mau êtene, e ua tanu iho ra i te reira.10 Ua väere òe i te fenua i taua vine ra. E ua toro to na aa, e ua api aè ra te fenua: 11 ua àti te mau mouà i te maru no na, e mai te âreti teitei ta na aveave. 12 Ua toro to na âmaa i tähatai, e to na tihitihi i te pape rahi ra.13 E aha hoì òe i haapararï ai i te âua, e ua pöfaìhia e te feiä haere atoà nei? 14 Te ètuhia nei e te paha o te ururäau ra, e te àmuhia nei e te mau puaa ôviri o te aru ra. 15 E te Atua manahope e, e hoì mai, o ta mätou ia parau ia òe; e hiò mai òe i nià i te raì ia ìte, e haapaò faahou mai ä òe i taua vine nei. 16 Te räau i tänuhia e to rima àtau ra, e te âmaa ta òe i faaètaèta na òe iho. 17 Ua täpühia ia e ua tüîa i te auahi, ua pohe ia i te aò o to mata ra 18 Ei nià to rima i te taata i to rima àtau ra, ei nià i te taata i faaètaètahia e òe no òe iho ra.19 E òre hoì mätou e täiva ia òe i reira, e faaanaanaea mai ia mätou, e na mätou e taù i to òe ra iòa.20 E faahoì ia mätou, e te Atua manahope, e te Fatu e, ia ànaana mai hoì to mata na, ua ora iho ra ia mätou.

Ìtaia 63.16-19

16 O òe ä to mätou metua, òre noa atu Âperahäma i te haapaò mai ia mätou nei, e òre noa ä hoì Ìteraèra i te ìte mai ia mätou: o òe, e te Fatu, o to mätou ia metua; o to mätou ia ora, mai tahito mai i to òe iòa. 17 E te Fatu, e aha òe i tuu noa ai ia mätou ia hape noa na i to òe èà? E ia fäita noa na i to mätou âau ia òre ia mataù ia òe? E färiu mai i to mau tävini nei, i te mau ôpü hoì o ta òe ra tufaa. 18 E pärahiraa iti poto to òe ra mau taata moà i reira, e ua taataahihia to vaha moà e to mätou mau ènemi. 19 Ua mäoro aè nei mätou nei, Mai te feiä aore i maìrihia i to òe ra iòa. Àhiri òe e hahae mai i te raì, a pou mai ai; ia tahe mai te mau mouà i raro mua i to aro na.

64. 1-7

Te pure ra te ètärëtia ia märamarama. 1 Mai te vahie marô e àma i te auahi; e mai te pape e pihaa i te auahi ra: ei faaìte i to iòa i to mau ènemi ra; e ia rürütaina te mau fenua i mua i to aro na. 2 Ia òe hoì i rave i te mau mea taaê ra, aore i manaòhia e mätou ra; ia òe hoì i pou mai ra, a tahe mai ai te mau mouà i mua i to aro na. 3 Mai te mätamua mai ä, aore i faaroohia e te tarià, aore hoì i hiòhia e te mata o te taata nei te mau mea ta te Atua e rave na tei hinaaro ia na ra. 4 E färerei ä òe i teie òaòa e te feiä i rave i te parau tià; o tei manaò ia òe i to òe ra mau haereà: inaha ua riri òe; ua hara tämau mäite hoì mätou i te reira mau mea ra; e ora änei hoì mätou. 5 Ua riro hoì tätou atoà nei mai te mea viivii ra; e ta tätou parau tià mai te àhu i faaruèhia ra: ua ôriorio tätou atoà mai te rau räau ra, e ua pee ê aè nei tätou i ta tätou mau hara, mai te mea i pee i te mataì ra. 6 Aore roa e taata e tiàoro i to òe ra iòa; o tei faaäraära ia na iho e täpeà ia òe; i huna ê atu ai òe i to mata ia mätou nei, e ua pau hoì mätou ia òe no te püai o to mätou mau ìno. 7 Âreà òe, e te Fatu, o òe to mätou metua; e àraea mätou, e na òe mätou i hämani: e òhipa anaè mätou na to rima.

1 Torinetia 1.3-9

3 Ei ia òutou te aroha mau e te hau, no ô mai i te Atua i to tätou Metua ra, e no ô hoì i te Fatu ra ia Ietu Metia. Te mau maitaì no ô mai i te Metia ra, 4 Te haamaitaì nei au i ta ù Atua ia òutou aita e faaea, i te maitaì a te Atua i horoàhia mai e te Metia ra e Ietu ia òutou na. 5 Ua rahi hoì ta òutou ia na i te mau mea atoà nei i te mau parau atoà e te ìte: 6 e ua faaìte-päpü-hia te parau o te Metia i roto ia òutou na. 7 E aita aè nei òutou i maìri i muri i te mau maitaì atoà nei, i te tiaìraa i to tätou Fatu ia Ietu Metia i te färaa mai: 8 na na e haapäpü ia òutou e tae noa atu i te hopeà, eiaha ei faaìnoraa, i te mahana o to tätou Fatu o Ietu Metia ra. 9 E parau mau ta te Atua, i haapaòhia ai òutou no te âmuiraa a ta na Tamaiti a to tätou Fatu a Ietu Metia ra.

Märeto 13.32-37

Te Metua anaè tei ìte i te ànotau hopeà

(Mät 24,36-44)

32 Âreà te reira mahana e te reira hora, e òre roa te hoê e ìte; e òre hoì te mau merahi o te raì, e òre atoà te Tamaiti, maori rä o te Metua anaè ra. 33 E haapaò maitaì, e faaitoito, e e pure, aita hoì òutou i ìte i taua tau ra. 34 E au hoì te Tamaiti a te taata nei i te hoê taata i haere i te fenua ê, o tei vaiiho i to na fare, e poroì iho ra i to na mau tävini, tuu iho ra i te taata atoà i ta na òhipa, e poroì iho ra hoì i te tiaì ôpani ra e faaitoito. 35 E tënä na, e faaitoito atoà òutou: aore hoì òutou i ìte i te hora e tae mai ai te taata fare, ei te ahiahi ra, ei te tuìraa pö, ei te âaoaraa moa ra, ei te poìpoì. 36 O te püòi noa mai o ia, e roohia mai ua taòto òutou. 37 E ta ù e parau atu ia òutou na, o ta ù ia parau i te taata atoà: E faaitoito.

Manaò.

E te Mäòhi e, e ìmi i te Atua, e hoì i te Atua ra, te tumu o to òe ora, e faatupu i ta na parau tià e to na mau hinaaro atoà ia òe, e tämä ia òe no te tomo i roto i te ora o te Atua. Ia faaruè òe i te Atua Nui Tumu Tahi ra ua faaruè ia i te ora, e ia faaruè i te ora ra, o te pohe ia ta òe tuhaa. E Atua ora to òe, tei hinaaro i to òe ora. Ua hinaaro atoà rä o na ia ora òe i pïhaìiho ia na, e ia ora hoì o na i pïhaìiho ia òe. Te tïtauraa ia e faatupuhia nei i roto i na taiòraa maha teie to na haapotoraa.

-Taramo 80,  20 E faahoì ia mätou, e te Atua manahope, e te Fatu e, ia ànaana mai hoì to mata na, ua ora iho ra ia mätou.

-Ìtaia 63, 7 Âreà òe, e te Fatu, o òe to mätou metua; e àraea mätou, e na òe mätou i hämani: e òhipa anaè mätou na to rima.

-1Torinetia 1, 9 E parau mau ta te Atua, i haapaòhia ai òutou no te âmuiraa a ta na Tamaiti a to tätou Fatu a Ietu Metia ra.

-Märeto 13, 33 E haapaò maitaì, e faaitoito, e e pure, aita hoì òutou i ìte i taua tau ra.  

Tätararaa.

Ta tätou parau tei roto i te ìrava 33, e reo no te Fatu i te nä-ò-raa e, E haapaò maitaì, e faaitoito, e pure, aita hoì òutou i ìte i taua tau ra.

Hiò noa ai te Fatu e nä pipi toomaha o Petero, Iatöpo, Ioane, e o Aneterea mai nià mai i te mouà Òriveta i te fare pure no Ierutarëma, ua täuàparau rätou i te pärariraa o teie fare pure. Te pärariraa te fare pure no Ierutarëma, èere änei te pü no te tiàturiraa âti Iuta terä e parari atoà ra. Mai te peu te reira, èere ia i te tahi parau naìnaì ta te Fatu e faaära ra. E parau rahi roa teie e tià i te nunaa âti Iuta ia faaroo e ia haapaò.

 

Na roto i te parau no te pärariraa o te fare pure o Ierutarëma, te faaära atoà ra te Fatu i te mau täpaò no te tupuraa o te tahi mau òhipa fifi i nià i te fenua na roto i te haereraa mai te mau metia haavare e te tupuraa te mau âueueraa fenua, te mau tämaì, te mau hämani-ìno-raa e te mau haaväraa o te mau pipi a te Fatu.

 

Te faaära atoà ra te Fatu i te haereraa mai o te Tämaïti a te taata no te tähoê i te feiä i mäìtihia. Te faaära atoà ra te Fatu aita te taata i ìte i te mahana e te hora e tae mai ai te Tämaïti a te taata. Aita te mau ârere (merahi) i ìte. Aita te Tämaïti i ìte. Aita hoê taata i ìte. Te Metua anaè tei ìte i te mahana e te hora e tae mai ai te Tämaïti a te taata.

 

I nià I te parau no te pärariraa o te fare pure no Ierutarëma ta te Fatu e faaära ra i ta na mau pipi, ua türaì roa o ia I ta rätou paraparauraa I nià I te parau o te Tamaiti a te taata tei haere mai e tähoê i te mau taata tei mäìtihia. O vai te mau taata i mäìtihia ta te Fatu e parau ra. Te mau taata i mäìtihia, e mau taata tei faatupu i te hinaaro o te Atua. Te auraa, e mau taata tei haapäpü i to rätou faaroo i te Atua o te Metia tei faaära mai i teie parau ta tätou e hiò ra.

 

Te reira haereraa mai to te Tamaiti a te taata, aita hoê aè taata i ìte. Aita atoà te mau taata fätata roa i te Atua i ìte. Te auraa, aita te ìte i te reira parau i horoàhia i te taata ra noa atu e taata mäìtihia e te Atua. Aita atoà i horoàhia i te Tämaïti ra tei horoàhia te mana o te raì e te ao atoà nei. Te Atua anaè te Fatu o te raì e te fenua tei ìte i te mahana e te hora no te haereraa mai o te Tämaïti a te taata. Te auraa, e òhipa te reira tei ìtehia e te Atua no te mea na na te reira e faaoti e e faanaho, e faatura ia tätou i te reira. Tei roto te reira faaotiraa e te reira faanahoraa i te tiàmäraa o te Atua. Ta tätou o te färii i te reira tiàmäraa to te Atua i te faaotiraa e te faanahoraa o te reira parau. Mai te peu te faaära mai ra te Tämaïti i te reira parau, e täpaò faaìte e te faatura ra te Tämaïti i te reira faaotiraa a te Atua, no reira O ia i haapäpü mai ai : aita atoà te Tämaïti i ìte.

 

I mua i te faaäraraa a te Fatu i nià i teie parau, e tià ia tätou ia haamauruüru i te Fatu o ia i faaära mai i teie parau. Aita teie faaäraraa i faataa-noa-hia no te mau pipi anaè. Te taata tei färii ia Ietu èi Fatu, e hiò atoà o na i teie faaäraraa no na atoà. Ia färii tätou i teie faaäraraa, èita tätou e tämata i te tohu e te tatara i te parau o terä mahana. Te faahua ra ia tätou.

 

Te auraa, ua päpü anaè ia tätou èere na tätou e faanaho i terä mahana, e vaiiho ia tätou ta te Atua i te Atua rä. E haere ia tätou i te vähi e tano tätou e hiò mai terä faaäraraa no te haereraa mai o te Tamaiti a te taata no te tähoê i te mau taata tei faatupu i to te Atua hinaaro. Te märamarama ra tätou teie haereraa mai o te Tämaïti a te taata no te haere mai ia e farerei i te mau taata tei faatupu i te hinaaro o te Atua. Te auraa, te faaitoito mai ra te Fatu ia tätou e faatupu i to te Atua hinaaro no te mea te reira te mau taata ta te Tämaïti a te taata e haere mai e färerei ia tae i to na mahana.

 

Te na ô ra te reo o te Fatu : E haapaò maitaì, e faaitoito, e pure, aita hoì òutou i ìte i taua tau ra. Ua päpü atoà ia tätou i te tumu te Fatu i parau ai i teie parau no teie ihoä mau òhipa fifi ta na e faaära ra èita e òre i te tupu i roto i te oraraa o ta na mau pipi. Te auraa, te faaineine ätea ra te Fatu i ta na mau pipi i te äraraa i nià i te mau òhipa te haafifi ia rätou. Mai te peu e mau òhipa fifi ta rätou e farerei, ia faaineine ia rätou ia rätou. No te mea e riro terä mau òhipa fifi i te haaparuparu ia rätou i roto i ta rätou faaìteraa e to  rätou tiàturiraa i te Atua. Te riro ra ia te mau faaäraraa a te Fatu èi tautururaa ia rätou i te äraraa i mua i terä òhipa.

 

E haapaò maitaì, te tahi parau teie tei faaìte i to te Fatu here i ta na mau pipi tei manaònaò i te rahiraa àti ta rätou e faaruru atu. Èita e òre ia tae i taua mau taime ra aita o ia to pïhaìiho ia rätou. Mea rahi te mau òhipa ta rätou e hiò maitaì, ta rätou e ära ; ta rätou e faanaho, e ta rätou e feruri. Ua päpü ra ia rätou ua faaìte te Fatu ia rätou i ta na tauturu òia hoì ta te Atua parau ta na i faaìte ia rätou na roto i ta na mau haapiiraa. Te mau òhipa faaora ta na i faaìte ia rätou. Te mau tiàvaruraa värua ìno i ravehia. Te mau faatiàraa taata mai te pohe mai e te mau faaàmuraa i ravehia. Te reira te mau òhipa e tauturu ia rätou i te mau taime fifi ia haapaò maitaì.

 

E faaitoito, Te tahi atoà parau ta te Fatu i horoà i te mau pipi. Te huru ta te Fatu i faaìte i roto i to na oraraa, mai te peu na na te Parau, èere te Parau noa ta na e horoà ra. O na atoà i roto i te Parau ta na e faaìte ra. Te auraa, èita e tià ia tätou ia faataa ê i te Fatu e ta na Parau. E Parau ihoä ta na e horoà ra, tei roto atoà rä o na i ta na Parau.

Te Parau ta te Fatu e horoà ra e òhipa taua Parau ra i roto i te taata tei färii i taua Parau ra. No te mea te Parau e horoà na te Atua ta te Fatu e faaìte ra ta na mau pipi. Aore te Fatu i haere mai e faaìte i to na hinaaro i te hinaaro o tei tono mai ia na.

E faaitoito, te tumu o te manaò o te ito, e puai no te mea ua horoà te Fatu i te mea e itoito ai rätou noa atu te huru o te fifi e te huru o te àti ta rätou e färerei. Te Fatu tei vï ia na te arii o te ìno terä e parau ra ia rätou. Te auraa, ua haamau rätou i to rätou tiàturiraa i nià i te Fatu e òre ai te mau ôpuaraa a te ìno i nià ia rätou e manuia.

 

 E pure, te Fatu ta te Atua i püpü i te mana o te raì e te ao atoà nei terä e parau ra ia rätou. Te auraa, e ani te tauturu i te Atua eiaha e faaea. Te pure, te mea ia e haapäpü i to rätou ère e to rätou faufaa òre. Te pure te mea e itoito to rätou faaroo e ta rätou täviniraa. Na roto i te pure te faaìte ra rätou i to rätou tiàturi i te Atua te tumu o te òhipa no reira te Fatu i faaineine ai ia rätou. E pure i te Atua, te tumu o te ora, na na e faaìte mai i te mea e au ia rave e ia parau i te mau taime ahoaho. Teie faaitoitoraa a te Fatu i te mau pipi e pure, e räveà e vai fätata noa ai rätou i pïhaìiho i te Atua. I roto i te mau taime fifi, te vai ra to rätou tiàturiraa tei pïhaìiho te Atua ia rätou no te tauturu ia rätou. Te pure, te mauhaa faufaa roa a te taata tei färii i te mau haapiiraa a te Fatu no te faaitoito ia na i roto i ta na faaìteraa e ta na täviniraa.

 

E haapaò maitaì, e faaitoito, e pure, aita hoì òutou i ìte i taua tau ra.

Teie te parau a te Fatu i täpeàhia mai no tätou no teie täpati mätamua no te tiaìraa i te haereraa mai o ta na Tämaïti Here. I mua i te rahiraa òhipa e haahia ra e tätou e te rahiraa fifi e àuahaati ra ia tätou, te faaroo ra tätou i teie reo to te Fatu tei faaära i ta na mau pipi no te mau òhipa fifi ta rätou e farerei. Mai te peu ua tauturu teie parau i te mau pipi, te tiàturi atoà ra vau e tauturu atoà teie parau ia tätou i te äraraa i nià i te mau òhipa ta tätou e rave ra no te tupuraa o te hau o te Atua i nià i to tätou fenua.

 

Te auraa, te vai ra te faufaa o teie parau ta te Fatu i horoà mai : E haapaò maitaì, e faaitoito, e pure, no te faaitoito ia tätou i te hiòraa i ta tätou faaìteraa, ta tätou  täviniraa e te tupuraa o te maitaì i nià i to tätou fenua tei färii i teie maì e haaviivii nei i to tätou oraraa. E hiò tätou e aha te mau mea e orahia ra e tätou e e ôpuahia ra i nià i to tätou fenua tei tuàti e tei òre e tuàti i nià i to te Atua hinaaro.

Na tätou e färii e e faaòhipa i taua parau ra i te vahi te reira tätou. E faaäraraa e e faaitoitoraa teie ta te Fatu e höroà mai ra. Èita te taata e ìno i te faaäraraa e te faaitoitoraa ia haapaòhia e tià ai. Te vahi faufaa, ua parauhia mai.

 

Ia haamaitaìhia te Atua no ta na Parau tei faaìtehia mai e ta na Tämaïti no te faaära e no te faaitoito.

Ia ora na.

 

Teraì òr. Faatura.

 

 

 

Tāpati 29 no Novema 2020. TIAÌRAA HOÊ E faaitoito.

 

Tāpati 29 no Novema 2020.

TIAÌRAA HOÊ

E faaitoito.

Aroharaa.

Ia ora na, te mau taeaè, te mau tuahine, i teie mahana haamoriraa na tätou no te tiaìraa hoê tei haamanaò ia tätou i to te Atua Nui Tumu Tahi haafänau püfenuaraa i ta na Tämaïti. I te mea ua aroha mai te Atua i te Mäòhi no te mau àti e te hepohepo rahi ta na e faaruru nei i teie mahana, e te òto värua nei hoì te mau Tupuna no tätou i teie tau na roto i to tätou ìte-òre-raa ia tätou iho e i te Atua atoà no te mau maitaì atoà ta na i höroà mai no tätou.

Teie te reo o te Taramo 80, ia tätou i teie mahana 1 Na te Mënätehe i nià i te Totanima-ètuta. Taramo na Âtafa. 2 E faaroo mai, e Të Tiaì ia Ìteraèra e O tei arataì ia Iotëfa mai te nana ra; o òe o tei pärahi i nià i nä Terupi ra, a faaanaana mai. 3 I te aro o Èferaima, e o Peniamina, e o Manate ra, e faaitoito òe, e haere mai e faaora ia mätou.

 

Pure

Pure tätou i te Atua, e te Atua Metua e, 4 E faahoì mai ia mätou, e te Atua, ia ànaana mai hoì to mata, ua ora iho ra ia mätou. 5 E aha te roa, e te Atua manahope, o te Fatu, i to òe ririraa i te pure a to mau taata nei? 6 Ua faaàmu òe ia rätou i te mäa òto, e ua tuu mai i te roimata na rätou e inu e ia rahi ra. 7 Ua faariro òe ia mätou ei märöraa na to mätou mau taata tupu, e te àtahia nei mätou e to mätou mau ènemi. 8 E faahoì ia mätou, e te Atua manahope, ia ànaana mai hoì to mata na, ua ora iho ra ia mätou. 9 E vine ta òe i rave mai, mai Àifiti mai ra, ua faaruè hoì òe i te mau êtene, e ua tänu iho ra i te reira.10 Ua väere òe i te fenua i taua vine ra. E ua toro to na aa, e ua api aè ra te fenua: 11 ua àti te mau mouà i te maru no na, e mai te âreti teitei ta na aveave. 12 Ua toro to na âmaa i tähatai, e to na tihitihi i te pape rahi ra.13 E aha hoì òe i haapararï ai i te âua, e ua pöfaìhia e te feiä haere atoà nei? 14 Te ètuhia nei e te paha o te ururäau ra, e te àmuhia nei e te mau puaa ôviri o te aru ra. 15 E te Atua manahope e, e hoì mai, o ta mätou ia parau ia òe; e hiò mai òe i nià i te raì ia ìte, e haapaò faahou mai ä òe i taua vine nei. 16 Te räau i tänuhia e to rima àtau ra, e te âmaa ta òe i faaètaèta na òe iho. 17 Ua täpühia ia e ua tüîa i te auahi, ua pohe ia i te aò o to mata ra 18 Ei nià to rima i te taata i to rima àtau ra, ei nià i te taata i faaètaètahia e òe no òe iho ra.19 E òre hoì mätou e täiva ia òe i reira, e faaanaanaea mai ia mätou, e na mätou e taù i to òe ra iòa.20 E faahoì ia mätou, e te Atua manahope, e te Fatu e, ia ànaana mai hoì to mata na, ua ora iho ra ia mätou. Âmene.

E tià mai tätou e haamaitaì tätou i te Atua i te hoê reo himene.

 

Himene.

Pärahi tätou.

Hinaaro.

Teie te hinaaro o te taata i te Atua i te faaìteraa a te perofeta Ìtaia i te pene 63 i te mau ìrava 16 e tae i te ìrava 19, 16 O òe ä to mätou Metua, òre noa atu Âperahäma i te haapaò mai ia mätou nei, e òre noa ä hoì Ìteraèra i te ìte mai ia mätou: o òe, e te Fatu, o to mätou ia Metua; o to mätou ia ora, mai tahito mai i to òe iòa. 17 E te Fatu, e aha òe i tuu noa ai ia mätou ia hape noa na i to òe èà? E ia fäita noa na i to mätou âau ia òre ia mataù ia òe? E färiu mai i to mau tävini nei, i te mau ôpü hoì o ta òe ra tufaa. 18 E pärahiraa iti poto to òe ra mau taata moà i reira, e ua taataahihia to vaha moà e to mätou mau ènemi. 19 Ua mäoro aè nei mätou nei, Mai te feiä aore i maìrihia i to òe ra iòa. Àhiri òe e hahae mai i te raì, a pou mai ai; ia tahe mai te mau mouà i raro mua i to aro na.

E te Atua te tätarahapa nei mätou i mua ia Òe, ia au i te faaìteraa a Ìtaia i te pene 64 i te mau ìrava 1 e tae i te 7, Te pure ra te ètärëtia ia märamarama. 1 Mai te vahie marô e àma i te auahi; e mai te pape e pihaa i te auahi ra: ei faaìte i to iòa i to mau ènemi ra; e ia rürütaina te mau fenua i mua i to aro na. 2 Ia òe hoì i rave i te mau mea taa-ê ra, aore i manaòhia e mätou ra; ia òe hoì i pou mai ra, a tahe mai ai te mau mouà i mua i to aro na. 3 Mai te mätamua mai ä, aore i faaroohia e te tarià, aore hoì i hiòhia e te mata o te taata nei te mau mea ta te Atua e rave na tei hinaaro ia na ra. Âmene.

 

Himene tätarahapa

 

4 E färerei ä òe i teie òaòa e te feiä i rave i te parau tià; o tei manaò ia òe i to òe ra mau haereà: inaha ua riri òe; ua hara tämau mäite hoì mätou i te reira mau mea ra; e ora änei hoì mätou. 5 Ua riro hoì tätou atoà nei mai te mea viivii ra; e ta tätou parau tià mai te àhu i faaruèhia ra: ua ôriorio tätou atoà mai te rau räau ra, e ua pee ê aè nei tätou i ta tätou mau hara, mai te mea i pee i te mataì ra. 6 Aore roa e taata e tiàoro i to òe ra iòa; o tei faaäraära ia na iho e täpeà ia òe; i huna ê atu ai òe i to mata ia mätou nei, e ua pau hoì mätou ia òe no te püai o to mätou mau ìno. 7 Âreà òe, e te Fatu, o òe to mätou Metua; e àraea mätou, e na òe mätou i hämani: e òhipa anaè mätou na to rima.

Haamaitaì tätou i te Atua no teie  mau parau e tià ai.

 

Himene òaòa.

 

Hopeà.

Teie te parau a Pauro i to Torinetia e ia tätou i teie mahana, Torinetia 1 pene 1 i te mau ìrava 3 e tae i te ìrava 9, 3 Ei ia òutou te aroha mau e te hau, no ô mai i te Atua i to tätou Metua ra, e no ô hoì i te Fatu ra ia Ietu Metia. Te mau maitaì no ô mai i te Metia ra, 4 Te haamaitaì nei au i ta ù Atua ia òutou aita e faaea, i te maitaì a te Atua i horoàhia mai e te Metia ra e Ietu ia òutou na. 5 Ua rahi hoì ta òutou ia na i te mau mea atoà nei i te mau parau atoà e te ìte: 6 e ua faaìte-päpü-hia te parau o te Metia i roto ia òutou na. 7 E aita aè nei òutou i maìri i muri i te mau maitaì atoà nei, i te tiaìraa i to tätou Fatu ia Ietu Metia i te färaa mai: 8 na na e haapäpü ia òutou e tae noa atu i te hopeà, eiaha ei faaìnoraa, i te mahana o to tätou Fatu o Ietu Metia ra. 9 E parau mau ta te Atua, i haapaòhia ai òutou no te âmuiraa a ta na Tamaiti a to tätou Fatu a Ietu Metia ra. Âmene.

Pärahi tätou, haamaitaì tätou i te Atua i te hoê reo himene.

 

Himene.

Pure.

Pure tätou i te Atua, i teie mahana haamoriraa na mätou ia òe te hinaaro nei mätou ia türama Òe ia mätou i te märamaramaraa i te parau ta mätou e fatata nei i te taiò. A türama ia mätou te vahi i èrehia e mätou i te ìteraa a tauturu mai ia mätou e te Atua maitaì roa rä. Âmene.

Ta tätou parau no teie mahana tei roto ia i te Parau Maitaì no Ietu, päpaìhia e Märeto,

 

Märeto 13.32-37

Te Metua anaè tei ìte i te ànotau hopeà

Te faaìte atoà ra o Mätaio i teie parau i te pene 24 i te mau ìrava 36 e faaea i te ìrava 44. Teie ta Märeto faatiàraa.

Ìrava 32, Âreà te reira mahana e te reira hora, e òre roa te hoê e ìte; e òre hoì te mau merahi o te raì, e òre atoà te Tamaiti, maori rä o te Metua anaè ra. 33 E haapaò maitaì, e faaitoito, e e pure, aita hoì òutou i ìte i taua tau ra. 34 E au hoì te Tamaiti a te taata nei i te hoê taata i haere i te fenua ê, o tei vaiiho i to na fare, e poroì iho ra i to na mau tävini, tuu iho ra i te taata atoà i ta na òhipa, e poroì iho ra hoì i te tiaì ôpani ra e faaitoito. 35 E tënä na, e faaitoito atoà òutou: aore hoì òutou i ìte i te hora e tae mai ai te taata fare, ei te ahiahi ra, ei te tuìraa pö, ei te âaoaraa moa ra, ei te poìpoì. 36 O te püòi noa mai o ia, e roohia mai ua taòto òutou. 37 E ta ù e parau atu ia òutou na, o ta ù ia parau i te taata atoà: E faaitoito.

Na te Atua hau i te raì teitei rä e haamaitaì no te parau i taiòhia e tätou.

 

Pure.

Pure tätou i te Atua, to Òe hanahana e to mätou Metua te mea ia e òre e moè ia mua mätou i ta Òe türamaraa i roto i to mätou âau. Âmene.

Haamaitaì tätou i te Atua i te hoê reo himene.

 

Himene.

Faaitoitoraa

Himene.

Parau faaära

Püpüraa moni.

Himene püraa moni.

 

 

Pure Ärai

E te Atua Nui Tumu Tahi e, te tiàturi nei mätou i te ora noo mai ia Òe na, te parau mai ra Òe : o Vau te Atua aore roa e Faaora maori ra, o Vau, tei òre i tiàturi faahou i te reira Atua, aita ia e Atua faahou to na, e òre o ia e ìte i te Atua ra e te ora mau. Ia òre tätou ia faatupu i te hinaaro o te Atua ra, to vai ia te hinaaro ta tätou e faatupu. Ia òre hoì tätou ia faatupu i te hinaaro o te Atua ra, no te Atua faahou änei tätou. Ia faaitoito tätou i te mea te tiaì noa mai ra te Atua i ta tätou tätarahapa e i ta tätou tämaraa ia tätou i te mau ìno atoà ta tätou  atoà i àhu noa mai na, e te mau haavare tei riro mai na èi faaùnaùna no tätou. Ia òre tätou ia hoì i te Atua ra, o te pohe ia ta tätou tuhaa, mai teie ta tätou e faaruru noa nei i te mau àti e rave rahi i teie mahana. E te nünaa o te Atua e, ia faatupu faahou tätou i te hinaaro o te Atua, e ia faatura tätou ia tätou iho, i roto i ta tätou peu, to tätou reo, ta tätou mau faanahoraa i te oraraa, e ia haamaitaìhia Òe i te Atua nä roto i te rave-faahou-raa i te mau maitaì atoà e te mau faufaa atoà ta na i faataa èi ora no tätou, i reira tätou e ìte ai i te hau o te Atua ia ärataì ia tätou i te maitaì e te òaòa i te Metia ra, e te Värua Moà. Âmene.

Haamaitaì tätou i te Atua i te hoê reo himene âmui e tià paatoà tätou.

 

Pure a te Fatu.

Âmui to tätou reo i roto i te pure a te Fatu,

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Âmene.

 

Teie ta tätou parau faaitoitoraa

Faaitoitoraa.

36 O te püòi noa mai o ia, e roohia mai ua taòto òutou. 37 E ta ù e parau atu ia òutou na, o ta ù ia parau i te taata atoà: E faaitoito.

Teie ta tätou parau haamaitaìraa.

Haamaitaìraa.

 9 E parau mau ta te Atua, i haapaòhia ai òutou no te âmuiraa a ta na Tamaiti a to tätou Fatu a Ietu Metia ra. Âmene.

 

Teraì òr. Faatura.

 

Mātaio 25.31-46 Ïti haìhaì

 

Tāpati  22 no Novema 2020.

Ïti haìhaì

Taramo 23

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra.3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Ètetiera 34.11-17

11 Te nä ô mai ra hoì te ATUA ra o te Fatu, Inaha, nä ù, nä ù iho nei e ìmi i ta ù mau mämoe, e ia ìteä atu rätou: 12 mai te tiaì e ìmi i ta na nana, tei roto o ia i ta na nana ia purara ê ra; e nä reira atoà vau i te ìmi i ta ù nana, e ua faaora ia rätou i ta mau vähi atoà i purara ai rätou i te mahana i marumaru i te ata e te pöuri. 13 E arataì mai au ia rätou i räpae àu mai i te mau taata ra, e haaputu mai au ia rätou mai te mau fenua mai: e arataì mai au ia rätou i to rätou iho ra fenua mau, a faaàmu ai ia rätou i nià i te mau mouà o Ìteraèra, e te hiti o te mau pape ra, e te pärahiraa atoà o te fenua nei. 14 E faaàmu vau ia rätou i te àmuraa maitaì ra, e ei nià i te mau mouà teitei o Ìteraèra ta rätou âua: ei reira rätou e taòto ai i te âua maitaì ra, e ei roto i te àmuraa e poria ai rätou a àmu ai i nià i te mau mouà o Ìteraèra ra. 15 Nä ù e faaàmu i ta ù nana, e ua faataòto ia rätou i raro të nä reira mai ra te ATUA ra o te Fatu. 16 Nä ù e ìmi i tei moè ra, e ua faahoì mai i tei purara ê, e ua täamu hoì i tei fati ra, e nä ù e faaètaèta i tei maìhia ra; e nä ù e täìri i tei poria e tei ètaèta; e ua faaàmu hoì au ia rätou mä te parau au ra. 17 Âreà òutou, e ta ù nana, te nä ô mai ra te ATUA ra o te Fatu; Inaha, nä ù e hiò i te puaa, i te tahi e te tahi, e te mämoe oni e te puaaniho oni ra.

1 Tōrīnetia 15.20-28

20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra. 21 Mai te pohe hoì i noaa i te taata ra, no te taata atoà e noaa ai te tiàfaahou i te feiä i pohe ra. 22 Mai te taata i hope i te pohe ia Àtamu, e hope atoà i te faaorahia i te Metia. 23 E haapaòhia rä te taata atoà i to na iho pupu: o te Metia te mätamua, e i muri aè, o to te Metia ia ia fä mai o ia ra. 24 O te hopeà ihoä ia, e püpü atu ai o ia i te Pätireia i te Atua, i te Metua ra; ia hope roa te mau hau, e te mana, e te püai i te faaòrehia e ana: 25 ei ia na hoì te hau, e ia hope roa te mau ènemi atoà i te tuuhia e ana i raro aè i ta na âvae. 26 E taua ènemi hopeà ra o te pohe, e haamouhia ia. 27 Ua tuu hoì o ia i te mau mea atoà i raro aè i ta na âvae. O ta na rä i parau mai ra e, ua tuuhia te mau mea atoà i raro aè ia na, ua ìteä-noa-hia e, te toe ra o ia iho, o tei tuu i te mau mea atoà i raro aè ia na ra. 28 E ia tuu-mau-hia te mau mea atoà i raro aè ia na ra, e i raro atoà aè ia te Tamaiti iho ia na, i tei tuu i te mau mea atoà i raro aè ia na ra, ia riro o te Atua i nià iho i te mau mea atoà i te mau vähi atoà ra.

Mātaio 25.31-46

Te haaväraa

31 Ia tae mai rä te Tamaiti a te taata mä ta na hanahana, e te mau merahi moà atoà ra, ei reira o ia e pärahi ai i nià iho i to na teröno hanahana; 32 e e haaputuhia to te mau fenua atoà i mua i to na aro: e na na e faataa ia rätou mai te tiaì mämoe e faataa i te mämoe i te puaaniho ra. 33 E e tuu o ia i te mämoe i ta na rima àtau, e te puaaniho i te rima àui. 34 Ei reira te arii e parau aè ai i tei ta na rima àtau ra: A haere mai òutou, e te feiä i faaorahia e ta ù Metua, e pärahi i te Hau i haapaòhia no òutou mai te hämaniraa mai o te fenua nei ra. 35 I poìa na hoì au, e ua höroà mai òutou i te mäa na ù; i poìhä na vau e ua faaïnu mai òutou ia ù; e taata ê au, e ua ìte mai òutou ia ù; 36 i veve na vau, e ua faaàhu mai òutou ia ù; i pohe na vau i te maì, e ua utuütu mai òutou ia ù; i roto vau i te täpeàraa, e ua haere mai òutou ia ù ra. 37 Ei reira te feiä parau tià ra e nä ô aè ai te parau ia na: E te Fatu, i nä fea mätou i ìte ai ia òe i te poìaraa, e ua faaàmu ia òe? E te poìhäraa, e ua faaïnu atu ia òe? 38 I nä fea mätou i ìte atu ai ia òe, e e taata ê, e ua ìte atu ia òe? E te veveraa, e ua faaàhu ia òe? 39 I nä fea mätou i ìte atu ai ia òe i te poheraa i te maì, e i roto i te täpeàraa, e ua haere atu ia òe ra? 40 E nä ô aè te arii i te parau ia rätou nä ô aè ra: Oia mau ta ù e parau atu ia òutou nei: o òutou i nä reira i te hoê taeaè iti haìhaì roa i roto i ta ù mau taeaè nei, ua nä reira mai ia òutou ia ù. 41 Ei reira o ia e parau aè ai i tei te rima àui: E haere ê òutou, e te feiä faaìnohia, i roto i te auahi pohe òre i haapaòhia no te tiàporo e ta na ra mau merahi  42 I poìa na hoì au, e aore òutou i höroà mai i te mäa na ù; i poìhä na vau, e aore òutou i faaïnu mai ia ù; 43 e taata ê au, e aore òutou i ìte mai ia ù; i veve na vau, e aore òutou i faaàhu mai ia ù; i maìhia na vau, e i roto vau i te täpeàraa, e aore òutou i haapaò mai ia ù. 44 Ei reira atoà rätou e parau ai ia na, i te nä-ô-raa e: E te Fatu, i nä fea mätou i ìte atu ai ia òe i te poìaraa, e te poìhäraa, e te taata-ê-raa, e te veveraa, e te poheraa i te maì, e i roto i te täpeàraa, e aore i turu atu ia òe? 45 Ei reira o ia e nä ô aè ai i te parau ia rätou: Oia mau ta ù e parau atu ia òutou na: o òutou aore i nä reira i te hoê taeaè iti haìhaì roa i roto i ta ù mau taeaè nei, aore atoà ia i nä reira mai ia ù. 46 O të haere ê ia e rave i te faautuàraa pohe mure òre, âreà te feiä parau tià ra o të rave ia i te ora mure òre.

Manaò

Eere änei tei te ïti e te haìhaì o te taata e ìtehia ai te òhipa ia tupu te ôpuaraa faaora e au i te Atua Nui Tumu Tahi : mai te tiaì e ìmi i ta na nana, tei roto o ia i ta na nana ia purara ê ra; e nä reira atoà vau i te ìmi i ta ù nana, e ua faaora ia rätou i te mau vähi atoà i purara ai rätou i te mahana i marumaru i te ata e te pöuri, Ètetiera 34, 12, Te haamanaò noa mai ra teie parau e, eita e tano e ôpani i te Atua i roto i te mätau. Aita te Atua e parau mai ra e : teie te raveraa o te reira parau, ia au i te mea i orahia mai e te hui metua, te nä ô noa mai ra te Atua : e nä reira atoà vau i te ìmi i ta ù nana, Te vai ra ihoä ta òutou i mätau e ta òutou i faaoti i te maitaì, ia faaroo ra tätou te mau taiòraa e turu ra i ta tätou parau no teie mahana.

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-Ètetiera 34, 15 Nä ù e faaàmu i ta ù nana, e ua faataòto ia rätou i raro të nä reira mai ra te ATUA ra o te Fatu.

-1 Tōrīnetia 15, 28 E ia tuu-mau-hia te mau mea atoà i raro aè ia na ra, e i raro atoà aè ia te Tamaiti iho ia na, i tei tuu i te mau mea atoà i raro aè ia na ra, ia riro o te Atua i nià iho i te mau mea atoà i te mau vähi atoà ra.  

-Mätaio 25, 45 Ei reira o ia e nä ô aè ai i te parau ia rätou: Oia mau ta ù e parau atu ia òutou na: o òutou aore i nä reira i te hoê taeaè iti haìhaì roa i roto i ta ù mau taeaè nei, aore atoà ia i nä reira mai ia ù.

Ei manaò tatara.

Aita tätou i taë ätu ra i te hopeàraa o teie ao, tei te hopeàraa ra tätou no teie pene parau ta Mätaio e faaìte nei. I roto i na tuhaa e toru nei, e tià ia parauhia mai te ìrava 1 e tae i te ìrava 13, te parapore ia no na paretenia tino àhuru, mai te ìrava 14 e tae i te ìrava 30 te parapore ia no te mau täreni tei faaòhipahia, e tei òre i faaòhipahia. E mai te ìrava 31 e tae i te ìrava 46, te mana o te Metia ia tae i te haaväraa hopeà. E piti tau parapore to roto i teie pene parau hoê ia vai ära noa ia i te tiaìraa no te hoìraa mai o te Metia, te piti e faarahi ä te Atua i ta na horoà o tei pärahi noa i roto i te tiàturiraa.

Areà ra tätou parau no teie mahana eita ia i te parapore, e òhipa ra tei tupu i muri noa äè i te tiàfaahouraa o te tino, i te mea te tiàturi nei tätou i taua mahana ra, o ta te Atua i faataa no te haava te feia parau tià, e te feia parau tià ore. Te faahita nei o Ietu i te âau taata na roto i teie mau parau, no ta na mau faanahoraa e te tupuraa. Te paruru o te feia parau tià, to rätou ia faaroo âueue òre, e te haapaòraa i te hoê taeaè iti haìhaì roa, oia hoì, o tei òre i täuàhia, tei haapaehia, tei faaruèhia mai te hoê ôfaì tiàvä ra te huru. To te parau tià òre ra aita ia to na e paruru, to na noa ia âau ètaèta e te faaroo òre. E horoà faahou änei ra te Atua i te hoê manuiaraa ia rätou, ia tätarahapa? Ia au ra i ta tätou taiòraa aita teie raveà e horoà faahouhia, to na auraa ra, eita i te taime haaväraa i reira e äni ai i te tätarahaparaa i mua i te Atua. I te taime ra no to tätou oraraa, i reira e tätarahapa ai, 44 Ei reira atoà rätou e parau ai ia na, i te nä-ô-raa e: E te Fatu, i nä fea mätou i ìte atu ai ia òe i te poìaraa, e te poìhäraa, e te taata-ê-raa, e te veveraa, e te poheraa i te maì, e i roto i te täpeàraa, e aore i turu atu ia òe?           Tei reira te vahi maere no teie òhipa ta Ietu e faatià nei i te mau pipi, te huru no te haaväraa, aita e paruru faahou to te taata ia taë i te taime e hoì mai ai te Metia. E faataa-roa-hia to te àtau e to te àui. E niuhia ia te haaväraa i nià i te faatupuraa òhipa. O tei faatupu i te maitaì ma te òaòa, e faaroo ia rätou i te reo e, A HAERE  MAI  ÒUTOU, E TE FEIÄ, I FAAORAHIA E TA  Ù METUA.

I te mea ua ravehia e òutou i te mau òhipa ïti e te haìhaì, e au no te hoê taata tupu o te ìtehia i te èreraa i te mau maitai o te tino.

I poia na hoì au, e ua horoà mai òutou i te maa na ù.

I poiha na vau, e ua faaïnu mai òutou ia ù.

E taata ê au, e ua ìte mai òutou ia ù.

I veve na vau, e ua faaàhu mai òutou ia ù.

I pohe na vau i te maì, e ua utuütu mai òutou i a ù.

I roto vau i te fare täpeàraa, e ua haere mai òutou ia ù ra.

Te haapäpü nei Ietu i ù nei, te oraraa e au i te hoê taata teretetiano ia rave ma te âau haapaò maitaì, e te haavare òre. E täpura òhipa teie, tei tupu i te mau mahana ätoà o to tätou oraraa nei, tei faariro i te mau taata faaroo ätoà ei tävini färii i te mea ïti e te haìhaì äè ia tätou, èihea taime to tätou  faatupuraa i teie täpura òhipa, èihea taime to tätou àperaa, èihea taime to tätou piripiriraa?

I parau ai o Ietu i teie parau e, O  ÒUTOU  I  NA  REIRA  I  TE  HOÊ  TAEAÈ  ÏTI  HAÌHAÌ  ROA I  TA  Ù  MAU  TAEAÈ  NEI  UA  NA  REIRA  MAI  IA  ÒUTOU  IA Ù.(IR 40 vh) E  TE  FATU  I  A  NAFEA  MÄTOU  I  ÌTE  AI  IA  ÒE  I  TE  POIARAA. Te  faaìte nei te  feiä parau tià i ù nei, e ua ravehia e rätou te òhipa e au ia rätou ia rave, no te hoê mea ïti roa äè èi faaìteraa i te täpaò no te auraro i te mauiui o vëtahi ê, ma te àmui i roto, e ma te pure. Te haamaheuhia  nei  ia, te oraraa o te hoê taata teretetiano  i te mahana tätaì tahi i te haamaitaìraa a te Atua. Te huru no teie oraraa teretetiano ia aahia ia i roto i te Metia. Oia hoì, ia aahia i roto i te pohe, te tiàfaahouraa, e te hoìraa mai no te Tämaïti a te taata, e tiàraa hanahana teie no Ietu, no te faaìte te mana faaoti i te òhipa, i te taime e hoì faahou mai ai O ia. Noa ätu te vai morohiraa no te Patireia o te Atua, te faahaamanaò nei ra o Ietu i te taata teretetiano, ia faaineine e ia faaâpï i te mau òhipa, te huru ia täui, te mau parau ia tupu te mea tià, ia haapaehia te mea tià òre, i te mea tei roto i te òhipa, te faaotiraa no te haaväraa a te Atua.

E aòraa teie ta Ietu e faatumu nei i nià i to na hanahana, no te haaväraa no te taime e hoì mai ai O ia. Te faaitoito nei o Ietu i te tià òre ia ìmi i te raveà ia  mataù i te Atua i te mea aita e äniraa faahou no te faaö i roto  i te pupu taata o te Atua, ia òre ua rave ia i te pohe mure ore.

Âreà tei mataù i te Atua ra, o te taata ia tei ite e, e hara ta na i mua i te Atua. E piti èà teie ta te Fatu e ìriti nei i roto i te oraraa nei,

1) Te èà no te aroha, tei faatupu ia i te färiiraa e te aupururaa i te hoê taeaè ïti haìhaì roa, i roto i te mau taeaè nei, tei roto ia te aroha o te Fatu ia na te vairaa. Teie faahaparaa i te hoê taeaè ïti haìhaì roa ra, e riro ätoà o ia i te faahapahia ia tae i te mahana o te Fatu.

2) Te èà ia no te faatupu i te ìno, e te taua òre i te mea ïti haìhaì roa i roto i te mau taeaè nei, (o te pohe ia.) O ta te Fatu ra e ìriti nei na roto i teie aòraa, te toru ia o te èà. No vai ? E no te aha?

No vai ? No te feia tei parauhia e, a haere mai òutou e te feia i faaorahia e ta ù Metua.

E no te aha? No te mea ia, aita rätou i haamäuà i te hinu o te rämepa no te türama i te toru o te èà. No te mea ia, aita te täreni i vai faufaa òre noa, ua rahi ra no te faatupu i te toru o te èà o te ora.

Te toru o te èà, te manuiraa ia teie e horoà faahouhia nei i te taata teretetiano, no te faatupu i te tïtauraa a te Atua, e te faaâpï faahouraa i te parau no te èuhe. I te mea te haaväraa a te Atua, eita ia mea na roto i te hiòraa a te taata, mea na roto ra i te faaturaraa i ta te Varua-Moà ärataìraa, i pohe ai o Ietu no te hara a te taata nei, i tiàfaahou ai no te tiàmaraa o te faaroo. Eiaha ia mataùhia te haaväraa a te Atua, ia vai ra te manaònaòraa i roto ia tätou, i te faaotiraa e ravehia no tätou e te Atua. Ta te taiòraa ia e faaìte nei ia tatou i teie hora paieti.

 

Teraì òr.Faatura.