Tāpati 14 no Fëpuare 2021. Papa Haamori Mä

 

Tāpati 14 no Fëpuare 2021.

Papa Haamori

Mä

Färiiraa.

Na te parau o te Taramo e ìriti to tätou haamori i teie mahana.

Taramo 102

1 E pure na te taata e òto ra ia roohia o ia e te àti rahi, e te ninii ra i ta na parau taiä i mua i te aro o te Fatu. 2 E te Fatu e, e faaroo mai i ta ù pure, e ia tae atu hoì ta ù reo ia òe ra. 3 Eiaha òe e huna i to mata ia ù ia tae i te mahana e àti ai au ra. E färiu mai i to tarià ia ù nei ia tae i te mahana e tiàoro atu ai au ra, e faaroo ènaèna mai òe ia ù. 4 Ua mou o ù nei puè mahana mai te au auahi ra, e ua viu o ù nei puè ivi mai te ômoì ra.5 Ua täìrihia ta ù âau mai te àihere ôriorio ra, e te moè noa nei ia ù ta ù nei àmuraa mäa. 6 Ua piri ta ù mau ivi i to ù nei ìri i to ù autä-noa-raa.7 Mai te tata o te mëtëpara ra vau, e mai te tuta o te vähi ano ra. 8 Te tiaì nei au, e mai te manu iti ra vau, mai te manu iti o ia anaè ra i nià i te fare. 9 Te faaìno mai nei ta ù mau ènemi ia ù e pö noa atu te mahana; e no te rahi o te riri, ua tapu rätou ia ù. 10 No te mea te àmu nei au i te rehu auahi mai te mäa ra, e ua ânoì i ta ù e inu nei i te roimata.11 No to òe rä mäinaina e te riri, ua hopoi hoì òe ia ù i nià, e ua faaruè òe ia ù i raro.12 Mai te maru ata e pee ra to ù nei puè mahana, e ua riro vau mai te àihere e mae ra. 13 Âreà òe, e te Fatu, e tià ia i te vai-mäite-raa e a muri noa atu, e te manaòraa ia òe e ia hope noa atu te mau uì atoà ra.14 E riro òe i te tià mai i nià e aroha ia Tiona. Ua tae hoì i te tau, te ànotau mau e ìtehia mai ai o ia ra. 15 Te pöpou nei hoì to mau tävini i te mau ôfaì atoà no na nei, e te aroha nei ia na e tae noa atu i te repo ra. 16 Ei reira te mau êtene e mataù ai i te iòa ra, o te Fatu, e te hui-arii atoà o te ao nei i to òe ra hanahana 17 Ia patu faahou te Fatu ia Tiona, e ìteä mai o ia mä to na iho ra hanahana, 18 e haapaòhia e ana te pure a tei àti ra, e e òre o ia e vahavaha faahou i ta rätou i ani ra. 19 E päpaìhia teie no te tahi uì atu, e e haamaitaì te feiä e fänau ra i te Fatu, 20 no te mea ua hiò mai o ia i raro i to na vähi moà teitei ra; i nià i te raì to te Fatu hiòraa mai i te fenua nei, 21 e faaroo i te autä o te feiä i täpeàhia ra, e ia tuu hoì i te feiä i haapaòhia no te pohe. 22 Ia faaìtehia to te Fatu iòa i Tiona, e ia haruru faahou te haamaitaì ia na i Ierutarëma, 23 ia âmui atoà mai te taata atoà ra, e te mau pätireia e haamori i te Fatu. 24 Ua faaòrehia ta ù püai i te èà tià ra, ua haamure o ia i o ù puè mahana. 25 Ua parau hoì au e: E ta ù Atua, eiaha vau e hopoi-ê-hia i röpü i to ù nei puè mahana, e vai ä hoì to òe ra mätahiti e hope roa aè te mau uì atoà ra. 26 Na òe i haamau i te fenua, e te Fatu, i tahito ê ra, e te mau raì hoì na to òe rima ia i hämani. 27 E riro rä te reira i te mou, e toe ä òe. E e marau rätou mai te àhu e marau ra, e e haapaehia rätou e òe mai te àhu ra. 28 Haapae noa ä iho rätou, o òe ä òe, e òre roa to òe ra mätahiti e hope. 29 E haamauhia te mau tamarii a to mau tävini, e to rätou ra huaai e haapäpühia ia i mua ia òe ra.

Haamaitaì i te Atua i te hoê reo himene.

Himene.

Faaroo mai tätou i te reo o Atua i nià ia Mote i te faaìteraa a te puta Revitito.

Revitito 13.1-2 e te ìrava 45-46

1 Ua parau mai ra hoì te Fatu ia Möte räua o Àarona, nä ô mai ra, 2 E uiui to te hoê taata, e te paa, e te vähi iti teatea i nià i to na iri, mai te maì ra e rëpera te huru i nià i to na ìri; e ärataìhia te reira taata i te tahuà ra ia Àarona, e aore ra, i te hoê tamaiti tahuà na na ra 3 e na te tahuà e hiò i taua maì ra i to na ra ìri, e te teatea te huruhuru i taua maì ra, e te hohonu ra taua maì ra i raro ia hiò, aore i te ìri anaè ra, o taua maì ra ia e rëpera; e na te tahuà e hiò ia na ra e parau ia na e, ua viivii.

45-46

45 E te taata i pohe i te rëpera ra, e pii noa o ia, Ua viivii, ua viivii, ma te ahu mähae, e te täupoo òre, e ma te täpoìhia to na taa; 46 e taua poheraa atoà no na i te rëpera, e parauhia o ia e, ua viivii o ia o ia anaè ra i to na pärahiraa; ei räpaeàu mai i te pühapa o ia e pärahi ai.

E te Atua Nui Tumu Tahi aroha mai ia mätou nei te taata hara nei. Âmene.

 

Himene Tätarahapa.

 

E riro te Atua i te tià mai e aroha mai ia tätou. Ua tae hoì i te tau, te ànotau mau e ìtehia mai ai O ia ra. Te pöpou nei hoì tätou i te mau ôfaì atoà no na nei, e te aroha nei ia na e tae noa atu i te repo ra. Ei reira te mau taata e mataù ai i to na iòa ra, o te Fatu, e te mau taata atoà o te ao nei i to na ra hanahana. Ia patu faahou te Fatu ia Mäòhi Nui, e ìteä mai o ia mä to na iho ra hanahana, e haapaòhia e ana te pure a tei àti ra, e e òre o ia e vahavaha faahou i ta rätou i ani ra.

Haamaitaì i te Atua Nui Tumu Tahi e tià ai.

 

Himene òaòa.

 

Teie ta tätou fäìraa parau i te faaìteraa a Pauro.

 

1 Törïnetia 10.31- 33 ; e te 11, i te ìrava 1.

31 E teie nei, te àmu ra e te inu ra hoì, e te mau mea atoà ta òutou e rave na, e rave ia mä te haamaitaì i te Atua. 32 Eiaha òutou ei türoriraa, i te âti-Iüta, e te Herëni, e te Ètärëtia atoà a te Atua. 33 Mai ia ù atoà e haamauruüru i te taata atoà i te mau mea atoà nei, aore au i ìmi i te maitaì no ù iho, no te taata atoà rä e rave rahi, ia ora rätou.

11.1

1 Ei pee mai òutou ia ù mai ia ù atoà e pee i te Metia nei. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

Pure

Pure tätou i te Atua, ua ineine mätou i te faarooraa i te Parau Maitaì a to Tämaïti to mätou faaora, höroà mai ia mätou i te färiiraa, ia riro teie taiòraa no mätou èi haapiiraa e èi faaitoitoraa i to mätou faaroo, e te haapaòraa i te poroìraa, e poroìhia nei ia mätou. Âmene.

 

Taiòraa.

Märeto 1.40-45

Te tämäraahia te hoê taata rëpera

(Mät 8,1-4; Ruta èv 5,12-16)

40 Ua haere mai ra te hoê rëpera ia na ra, tuu mai ra i te turi i raro i mua ia na, mä te parau maitaì mai ia na, nä ô mai ra: Ia tià ia òe ra, e mä vau ia òe. 41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra: Ua tià ia ia Ù, ia mä òe. 42 E tei te parauraa atu o ia ra, pee atu ra te rëpera o taua taata ra i reira ra, mä atu ra o ia. 43 Ua aò hua atu ra Ietu ia na, e tuu atu ra ia na ia haere na; 44 nä ô atu ra ia na: Eiaha roa òe e parau noa atu i te hoê taata. E haere rä e faaìte ia òe iho i te tahuà, e hopoi atu no te tämäraa ia òe i te mau mea ta Möte i parau mai ra, ei faaìte atu i te taata. 45 Haere atu ra rä taua taata ra, faaìte haere atu ra i taua parau ra, e haaparare haere atu ra. Aita atu ra e tià ia haere o Ietu e faaìte i taua ôire ra, pärahi noa iho ra rä i te mau vähi moèmoè ra, e ua haere mai ra rätou ia na ra no te mau vähi atoà e àti noa aè.

Na te Atua Nui Tumu Tahi, e haamaitaì mai te täiòraahia ta na parau.

 

Pure  

Pure tätou i te Atua, te mau parau ta mätou i faaroo no te tauturu ia, ia mätou i te tiàturiraa i te mau òhipa e faatupuhia nei e to mätou Faaora. Âmene.

 

Haamaitaì tätou i te Atua i te hoê reo himene.

 

Himene.

Parau faaära.

Himene püpüraa moni

Pure Ärai.

Pure tätou i te Atua Nui Tumu Tahi, mea tià atoà ia Ietu i te parau mai ia tätou te taata ta tätaì tahi, ua tià ia Ù ia moe òe, i to mätou vahi ìtehia, e te vahi ìte-òre-hia ia òre ia noaa ia mätou te mataùraa i mua i te mau maì e àua haaàti noa ra ia mätou. Mea tià ia tätou ia pärahi te tahi taime no te faaroo i te rahu a te Atua, te fenua, te mataì, te ànavai, te reva, ta rätou e faaìte ra i te hanahana o te ao Atua. Te hinaaro nei hoì mätou i te ìteraa e te märamaramaraa no to mätou huru oraraa i teie mahana, i te mea ua taamino noa te mau parau faaära no teie maì e haaviivii nei i to mätou oraraa i Mäòhi Nui nei, i te mea ua viivii atoà te mau parau faaära e faaìtehia rä mai te hoê pehe puta ra te huru. Ia parau o Ietu ia mätou e, E tià ia Ù, no to Na ia Here i to na nünaa, e no to na aroha rahi i te hiòraa i te mau àti atoà ta na e faaruru ra, no reira te Atua i tono mai ai ta na Tämaïti no te rave i te mau òhipa atoà e au ia ravehia no te haamänina i teie mau fifi tei riro èi herepata tei täumiumi noa i te taata i roto i te pohe. I te mea e nünaa mäìtihia tätou e te Atua, e òhipa ia ta tätou no te faatiàraa i te mau faaueraa e faauehia nei ia tätou i Mäòhi Nui nei, eiaha huna i ta te Atua faatiàmaraa ia tätou i Mäòhi ai tätou. Âmene.

Haamaitaì tätou i te Atua i te reo himene âmui e tià mai tätou.

 

Himene âmui.

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra: Ua tià ia ia ù, ia mä òe.

 

Haamaitaìraa.

1 Ei pee mai òutou ia ù mai ia ù atoà e pee i te Metia nei. Âmene.

 

Teraì òr. Faatura.

 

Märeto 1.40-45 Mä

 

Tāpati 14 no Fëpuare 2021.

Mä

Mau taiòraa.

Taramo 102

1 E pure na te taata e òto ra ia roohia o ia e te àti rahi, e te ninii ra i ta na parau taiä i mua i te aro o te Fatu. 2 E te Fatu e, e faaroo mai i ta ù pure, e ia tae atu hoì ta ù reo ia òe ra. 3 Eiaha òe e huna i to mata ia ù ia tae i te mahana e àti ai au ra. E färiu mai i to tarià ia ù nei ia tae i te mahana e tiàoro atu ai au ra, e faaroo ènaèna mai òe ia ù. 4 Ua mou o ù nei puè mahana mai te au auahi ra, e ua viu o ù nei puè ivi mai te ômoì ra.5 Ua täìrihia ta ù âau mai te àihere ôriorio ra, e te moè noa nei ia ù ta ù nei àmuraa mäa. 6 Ua piri ta ù mau ivi i to ù nei ìri i to ù autä-noa-raa.7 Mai te tata o te mëtëpara ra vau, e mai te tuta o te vähi ano ra. 8 Te tiaì nei au, e mai te manu iti ra vau, mai te manu iti o ia anaè ra i nià i te fare. 9 Te faaìno mai nei ta ù mau ènemi ia ù e pö noa atu te mahana; e no te rahi o te riri, ua tapu rätou ia ù. 10 No te mea te àmu nei au i te rehu auahi mai te mäa ra, e ua ânoì i ta ù e inu nei i te roimata.11 No to òe rä mäinaina e te riri, ua hopoi hoì òe ia ù i nià, e ua faaruè òe ia ù i raro.12 Mai te maru ata e pee ra to ù nei puè mahana, e ua riro vau mai te àihere e mae ra. 13 Âreà òe, e te Fatu, e tià ia i te vai-mäite-raa e a muri noa atu, e te manaòraa ia òe e ia hope noa atu te mau uì atoà ra.14 E riro òe i te tià mai i nià e aroha ia Tiona. Ua tae hoì i te tau, te ànotau mau e ìtehia mai ai o ia ra. 15 Te pöpou nei hoì to mau tävini i te mau ôfaì atoà no na nei, e te aroha nei ia na e tae noa atu i te repo ra. 16 Ei reira te mau êtene e mataù ai i te iòa ra, o te Fatu, e te hui-arii atoà o te ao nei i to òe ra hanahana 17 Ia patu faahou te Fatu ia Tiona, e ìteä mai o ia mä to na iho ra hanahana, 18 e haapaòhia e ana te pure a tei àti ra, e e òre o ia e vahavaha faahou i ta rätou i ani ra. 19 E päpaìhia teie no te tahi uì atu, e e haamaitaì te feiä e fänau ra i te Fatu, 20 no te mea ua hiò mai o ia i raro i to na vähi moà teitei ra; i nià i te raì to te Fatu hiòraa mai i te fenua nei, 21 e faaroo i te autä o te feiä i täpeàhia ra, e ia tuu hoì i te feiä i haapaòhia no te pohe. 22 Ia faaìtehia to te Fatu iòa i Tiona, e ia haruru faahou te haamaitaì ia na i Ierutarëma, 23 ia âmui atoà mai te taata atoà ra, e te mau pätireia e haamori i te Fatu. 24 Ua faaòrehia ta ù püai i te èà tià ra, ua haamure o ia i o ù puè mahana. 25 Ua parau hoì au e: E ta ù Atua, eiaha vau e hopoi-ê-hia i röpü i to ù nei puè mahana, e vai ä hoì to òe ra mätahiti e hope roa aè te mau uì atoà ra. 26 Na òe i haamau i te fenua, e te Fatu, i tahito ê ra, e te mau raì hoì na to òe rima ia i hämani. 27 E riro rä te reira i te mou, e toe ä òe. E e marau rätou mai te àhu e marau ra, e e haapaehia rätou e òe mai te àhu ra. 28 Haapae noa ä iho rätou, o òe ä òe, e òre roa to òe ra mätahiti e hope. 29 E haamauhia te mau tamarii a to mau tävini, e to rätou ra huaai e haapäpühia ia i mua ia òe ra.

Revitito 13.1-2

1 Ua parau mai ra hoì te Fatu ia Möte räua o Àarona, nä ô mai ra, 2 E uiui to te hoê taata, e te paa, e te vähi iti teatea i nià i to na iri, mai te maì ra e rëpera te huru i nià i to na ìri; e ärataìhia te reira taata i te tahuà ra ia Àarona, e aore ra, i te hoê tamaiti tahuà na na ra 3 e na te tahuà e hiò i taua maì ra i to na ra ìri, e te teatea te huruhuru i taua maì ra, e te hohonu ra taua maì ra i raro ia hiò, aore i te ìri anaè ra, o taua maì ra ia e rëpera; e na te tahuà e hiò ia na ra e parau ia na e, ua viivii:

45-46

45 E te taata i pohe i te rëpera ra, e pii noa o ia, Ua viivii, ua viivii, ma te ahu mähae, e te täupoo òre, e ma te täpoìhia to na taa; 46 e taua poheraa atoà no na i te rëpera, e parauhia o ia e, ua viivii o ia o ia anaè ra i to na pärahiraa; ei räpaeàu mai i te pühapa o ia e pärahi ai.

1 Törïnetia 10.31- 33

31 E teie nei, te àmu ra e te inu ra hoì, e te mau mea atoà ta òutou e rave na, e rave ia mä te haamaitaì i te Atua. 32 Eiaha òutou ei türoriraa, i te âti-Iüta, e te Herëni, e te Ètärëtia atoà a te Atua. 33 Mai ia ù atoà e haamauruüru i te taata atoà i te mau mea atoà nei, aore au i ìmi i te maitaì no ù iho, no te taata atoà rä e rave rahi, ia ora rätou.

11.1

1 Ei pee mai òutou ia ù mai ia ù atoà e pee i te Metia nei.

Märeto 1.40-45

Te tämäraahia te hoê taata rëpera

(Mät 8,1-4; Ruta èv 5,12-16)

40 Ua haere mai ra te hoê rëpera ia na ra, tuu mai ra i te turi i raro i mua ia na, mä te parau maitaì mai ia na, nä ô mai ra: Ia tià ia òe ra, e mä vau ia òe. 41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra: Ua tià ia ia ù, ia mä òe. 42 E tei te parauraa atu o ia ra, pee atu ra te rëpera o taua taata ra i reira ra, mä atu ra o ia. 43 Ua aò hua atu ra Ietu ia na, e tuu atu ra ia na ia haere na; 44 nä ô atu ra ia na: Eiaha roa òe e parau noa atu i te hoê taata. E haere rä e faaìte ia òe iho i te tahuà, e hopoi atu no te tämäraa ia òe i te mau mea ta Möte i parau mai ra, ei faaìte atu i te taata. 45 Haere atu ra rä taua taata ra, faaìte haere atu ra i taua parau ra, e haaparare haere atu ra. Aita atu ra e tià ia haere o Ietu e faaìte i taua ôire ra, pärahi noa iho ra rä i te mau vähi moèmoè ra, e ua haere mai ra rätou ia na ra no te mau vähi atoà e àti noa aè.

Manaò

I roto i te parau no teie mahana haamoriraa e parau ia no te mä, teie mä e faaìtehia ra e parau ia no te taata i naeàhia i te maì rëpera. Te mä o te mea ia i höroàhia e te Atua Nui Tumu Tahi no te faatupu i to na nünaa i parauhia ai to te Mäòhi, i Mäòhi Nui nei. Eiaha ra ia moèhia ia tätou nä roto i to tätou parauraa e Mäòhi, e haapäpüraa ia e mau tamarii tätou na te Tumu, ma te fäì atoà rä e, e òhipa na te Atua to tätou mäòhiraa, e huru atoà hoì te reira ta na i hinaaro èi huru no tätou, o te taura täàmu teie ia tätou e te Atua. Ia faaroo tätou i te mau taiòraa turu tei haapotohia te naò ra ia e,

-Taramo 102,  18 e haapaòhia e ana te pure a tei àti ra, e e òre o ia e vahavaha faahou i ta rätou i ani ra.

-Revitito 13, 46 e taua poheraa atoà no na i te rëpera, e parauhia o ia e, ua viivii o ia o ia anaè ra i to na pärahiraa; ei räpaeàu mai i te pühapa o ia e pärahi ai.

-I Törïnetia 10, 32 Eiaha òutou ei türoriraa, i te âti-Iüta, e te Herëni, e te Ètärëtia atoà a te Atua.

-Märeto 1,  41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra: Ua tià ia ia ù, ia mä òe.

Tatararaa.

Tätou parau no teie haamoriraa, ua haere mai ra te hoê taata rëpera i mua ia Ietu tuu iho ra to na turi i nià i te repo parau atu ra ia Ietu ia tià òe ia mä ia vau. Ua päpü i teie taata e e mä o ia  i te parau a Ietu, i te mea ua häroàroà o ia i te roo o Ietu i roto i ta na mau faaoraraa maì e te tiàvaruraa i te mau värua faufau e te mau temeio. No Ietu i te faarooraa i te reo o te rëpera ua tupu to Na aroha, ua faatoro i to na rima ua faatiàià ma te parau e ua mä òe. Te ìte nei teie taata rëpera i roto ia Ietu te puai no te aroha, te aroha tei tämä mate òre e faahaìriiri i te faatiàiàraa i ta na rima ua mä te tino o teie rëpera. Ua ìritihia e Ietu te mau òpanipaniraa no teie huru maì i to Na tau, ua tuuhia teie mau taata i rapae i te òire i te mea mau taata viivii teie, èita rätou e täno ia âmui i te mau taata no te òire. E faaotiraa teie na te mau tahuà, e te mau faatere faaroo Âti-iuta i te raveà òre e ua tae roa te manaò i te parauraa e maì teie na Atua. Teie färereiraa no te rëpera ia Ietu e tämäraa tei faatiàmä i to na tiàraa taata i mua i te mau taata, te mau tahuà o rätou te mau ra i te faaoraraa i te taata. Ua parau vave atu ra o Ietu i te rëpera eiaha roa òe e faaìte i te taata, e haere rä e faaìte i te tahuà ia riro òe èi ìte no te òhipa i ravehia i nià ia òe. Àita i tupu mai ta Ietu i hinaaro ua haapüraha o ia te mä o to na tino e ua òre to na viivii. Te manaò tumu ra o Ietu, ia haapäpü teie taata i mua i te mau tahuà teie mai nei o Ietu te Tämaïti a te Atua i röpü ia rätou  i roto i te òire. E òhipa faahiahia mau tei ravehia e Ietu, tei haapäpü e e Tävini mau, e Perofeta mau. I mua i teie òhipa i ravehia e Ietu te faaìte noa ra te reira e, e òhipa ihoä to roto i te parau o te täviniraa, ia òre rä tätou iho e te Mäòhi ia uruaì i nià i ta tätou iho märamaramaraa i te parau o te òhipa, eita änei tätou e faatupu atu i te tahi mea të òre roa e tüàti i ta tätou märamaramaraa i teie parau.

Ia haamata tätou i te manaò e, ua î te taata i mäìtihia i te Värua o te Atua, e òhie tätou i te manaò e, te Atua iho terä e òhipa ra i roto i te reira taata. Ia mäìti te Atua i te tahi taata, eere no te mono ia na, i te faatupuraa ra i ta na òhipa nä roto i teie taata, na teie iho rä taata e rave i te òhipa no reira te Atua i mäìti ai ia na, na te Atua rä e tauturu ia na, ia au rii i te manaò ta te päpaì taramo e parau ra ia nä ô mai o ia e : 18 e haapaòhia e ana te pure a tei àti ra, e e òre o ia e vahavaha faahou i ta rätou i ani ra. Te auraa, na teie ihoä taata e haere, to na ihoä te âvae e taahi i nià i te repo, aore ra to na iho te âvae e puta i te ôfaì, na te märamarama rä o te parau e faaòhie ia na i to na mau tuuraa âvae atoà. Eere no te mea ua mäìtihia te tahi taata no te rave i te tahi òhipa, i riro ai te mau mea atoà ei mea òhie no na, i mänina noa ai hoì to na èà, to na noa vähi hau, eiaha rä ia, to na rä vähi taa ê, te tiàturiraa ia ta te Atua i tuu i nià ia na. Mai ta Ietu i höroà to na tiàturiraa i nià i teie taata tei tämähia e te parau. Te tanoraa mau, no te taata hoê te parau e tupu nei, e no te mea na te Atua te parauraa, te Atua anaè ia tei ìte i te tumu o ia i rave ai i te tahi taata, e i òre i rave ai i te tahi ; te òhipa rä, te vai noa ra ia. Mai te taime rä te tahi e tae ai te parau a te Atua i roto ia na, ua faaea atoà o ia i te ìmi i to na iho maitaì, te faatupu i to na iho hinaaro, e te parau hoì i te parau no na iho, mai ta Ietu e haapäpü ra ia parau mai o ia e : Ua tià ia ia Ù, ia mä òe. Ia au i te mea ta tätou i mätau, no te maitaì o te òhipa i ravehia e te tahi i mauruüru ai tätou ia na. Ia hiò rä tätou i te reo o te Atua ta Pauro e faaìte mai nei, mea taa ê rii ia te tupuraa : 32 Eiaha òutou ei türoriraa, i te âti-Iüta, e te Herëni, e te Ètärëtia atoà a te Atua. Ua parau mai na ihoä tätou e, ia taiò tätou i te parau mai teie, e òiòi rii to tätou manaò i te horo i nià ia Ietu, eita atoà rä tätou e tano e huna e, i roto i te tupuraa o te òhipa, te vai ra te mea e haamanaò mai i te parau o Ietu. Te parau poroì a Ietu i te taata rëpera i tämähia aita i tae i te vahi i reira e faaìte ai ua haapürahia i roto i te mau taata atoà o te òire, aita teie taata i ìte e o te Atua teie e faauë nei ia na e haere e parau i te tahuà èita te Atua tumu no te maì o te taata. No reira te faatoro noa mai ra o Ietu i to na rima no te faatiàtià ia tätou, e te parau noa mai ra e Ua tià ia ia Ù, ia Mä òe, e parau tumu teie no teie parau e Tiàmä.

 

Teraì òr. Faatura.

 

 

 

Papa Haamori. ÔROÀ Aho.

 

Tāpati 7 no Fëpuare 2021.

Papa Haamori.

ÔROÀ

Aho.

Ômuaraa.

I mua i te mau àti no teie maì o ta tätou e faaruru nei tei faataui i te huru e te peu o to tätou oraraa e te nūnaa Māòhi i teie mahana, aita atu paha ia e uiraa faufaa roa maori rā : E nā hea tātou, aore ra e aha ta tātou tuhaa no tē tauturu i to tātou iho hepohepo, to tätou ahoaho. Te tumu e tià i te faatupu i roto i teie mätahiti, ei tautururaa i to tätou nünaa i Mäòhi Nui nei te haapäpüraa i ta na tuhaa, e ta na hopoià eiaha noa i roto i te oraraa âmui, ta na ihoā rā òhipa i roto i te ôpuaraa faaora a te Atua Nui Tumu Tahi i te nūnaa Māòhi. Teie te tahi êà i manaòhia : e faahiò faahou nā mua roa i to tātou iho parau ei nünaa, E no te mea e hiò-faahou-raa, no te faaitoitoraa ia i te taata ta täìtahi i tē rave māramarama-tāmau-māite-raa i ta na tuhaa, eiaha roa atu o ia ia töàruàru. Teie te tahi manaò i roto i te haapotoraa o te mau taiòraa ia au te tïtau ra ia tätou.

 

Haamaitaì tätou i te Atua i te hoê reo Himene, e tià mai tätou.

Himene.

 Pärahi tätou.

 

Teie ta te puta Taramo parauraa ia tätou,

Taramo 147

1 E haamaitaì i te Fatu, E mea maitaì te himene ei haamaitaì i to tätou Atua, e mea pöpou ia, e au hoì te haamaitaì ra. 2 O te Fatu te patu faahou ia Ierutarëma, e na na e haaputuputu i to Ìteraèra i purara ê ra. 3 Ua räpaau o ia i te feiä âau paruparu ra, e ua täamu i to rätou mau puta. 4 Ua hope te mau fetià i te taiòhia e ana, e na na i maìri i to rätou iòa. 5 E rahi to tätou Fatu, e te mana rahi, e to na ìte e mea ìteä òre ia ìmi. 6 Te tauturu nei te Fatu i tei haèhaa ra, te huri nei rä i te paieti òre i raro i te repo. 7 E himene mä te haamaitaì i te Fatu. E himene mä te tïnura i to tätou Atua. 8 O tei täpoì i te raì i te mau ata ra, o tei haapaò i te ua no te fenua, o tei faatupu i te räau rii i nià i te mau mouà: 9 te faaàmu nei o ia i te mau puaatoro i te mäa, e ta te ôrepa âpï e tiàoro atu ia na ra. 10 E òre o ia e pöpou i te itoito o te puaahorofenua ra, e òre o ia e mauruüru i te âvae o te taata ra. 11 E au rä te Fatu i te feiä e mataù ia na ra, i te feiä i tiàturi i to na aroha. 12 E haamaitaì i te Fatu, e Ierutarëma; e haamaitaì i to Atua, e Tiona. 13 O ia tei faaètaèta i te mau teà o to òe ra mau ùputa, e ua haamaitaì i to mau tamarii ra i roto ia òe. 14 Na na i faatupu i te hau i to òe ra mau ôtià, e ua paìa òe ia na i te tïtona maitaì rahi. 15 Ua häpono o ia i ta na parau i te fenua nei, te horo ètaèta nei ta na i faaue. 16 Ua horoà mai o ia i te hiona mai te huruhuru mämoe ra, e te haapurara nei i te hau paari mai te rehu auahi ra. 17 Ua tuu mai o ia i ta na vai paari mai te mea òtiòtihia ra: o vai te taata e mau i te toètoè na na? 18 Ua tuu mai o ia i ta na parau, e ua tärapape iho ra ia; ua haafarara mai ra o ia i te mataì, ua tahe iho ra te pape. 19 Ua faaìte o ia i ta na parau ia Iatöpa, i ta na mau ture e ta na mau faaauraa parau, ia Ìteraèra. 20 Aore o ia i nä reira i te mau fenua atoà, e ta na ra mau faaauraa parau, aita ia rätou i ìte. Hareruia. Âmene.

 

Himene tätarahapa.

 

Teie te parau no te tau täviniraa i te faaìteraa a Iöpa,

Iöpa 7.1-7,

Tau no te täviniraa

1 Aore änei i haapaòhia to te taata nei ànotau i te ao nei? Eere änei to na puè mahana mai te mahana o te taata tärahuhia ra? 2 Mai te tävini te ìmi ra i te pöuri, e mai te tärahuhia ra te tïtau ra i te ötiraa o ta na òhipa,  3 oia atoà vau; ua tuuhia mai te mau märama òaòaraa òre nö ù, e te mau ruì mauiui tei haapaòhia mai nö ù. 4 Ua taòto anaè au i raro, ua parau vau e, A fea rä vau a tià ai i nià e òre atu ra te ruì? E ua rohirohi au i te taahurihuri-noa-raa e tae noa atu i te aoraa ra. 5 Ua vehihia ta ù tino i te toè e te repo; ua mïmiò ta ù ìri e ua tähuti. 6 E òiòi to te mahana nö ù nei i to te mauhaa o te raraa àhu; e te hope noa nei mä te hopeà òre. 7 E haamanaò na e, o to ù nei ora e aho ia; e òre hoì to ù mata e ìte faahou i te maitaì.

E mau parau teie e faaitoito nei ia tätou, haamaitaì tätou i te Atua i te hoê reo himene e tià ai.

 

Himene òaòa

 

Teie parauraa a Pauro ia tätou i teie mahana,

1 Törïnetia 9.16-23

16 Parau noa ä hoì au i te Èvaneria, aita o ù ârueraa. Eita hoì au e tià ia òre, e àti hoì to ù ia òre au ia parau i te Èvaneria 17 Te rave nei au i taua mea nei mä te âau tae, e utuà ia ta ù; i püpühia mai ia ù te tuuraa Èvaneria nei aita i tae ta ù âau, aita a ù utuà. 18 E aha rä hoì ta ù utuà? Teie ia: ia parau vau i te Èvaneria a te Metia ra, eiaha ei hoo, eiaha vau ia rave i taua mea tià ia ù i te Èvaneria nei. 19 E taata tiàmä noa iho hoì au i te taata atoà nei, ua faariro noa vau ia ù iho ei tävini no te taata atoà, ia rahi ta ù ia noaa. 20 I te âti-Iüta ra, ua faahua âti-Iüta atoà vau, ia noaa ia ù te âti-Iüta; i te feiä i raro aè i te ture, mai te mea e, tei raro atoà aè au i te ture, ia noaa ia ù taua feiä i raro aè i te ture ra; 21 i te feiä ture òre ra, mai te mea ia e, aita a ù ture eere rä mai te mea e, aita a ù ture i te Atua, tei raro aè rä vau i te ture i te Metia, ia noaa ia ù te feiä ture òre ra. 22 I te feiä paruparu ra, ua faahua paruparu vau, ia noaa ia ù te feiä paruparu. Ua faaau vau ia ù iho i te mau mea atoà i te taata atoà nei, ia ora te tahi pae ia ù i taua mau räveà atoà nei. 23 No te Èvaneria i nä reira ai au, ia noaa atoà ia ù i ta te Èvaneria ra. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

Pure

Pure tätou i te Atua, i mua i te taiòraa e faaineinehia nei mätou i te faaroo, ia noaa mätou i te haapaò mäiteraa te mau parau e tae mai ia mätou nei, ia riro èi faaitoitoraa ia mätou, e te Atua Nui Tumu Tahi e a türama Òe i to mätou âau i te färiiraa i to mau hinaaro. Âmene.

 

Taiòraa.

Ta tätou taiòraa tei roto ia i te Parau Maitaì no Ietu ia au i ta Märeto faatiàraa.

 

Māreto 1.29-39

Te mau faaoraraa i muri mai i te täpati

(Mät 4.24; 8.16-17; Ruta èv 4.40-41)

32 E ahiahi atu ra, ia maìri te mahana ra, ua hopoi mai ra rätou i te mau taata atoà i pohe i te maì ia na ra, e te uruhia e te mau tëmoni ra. 33 Ua ruru atoà mai ra to te ôire atoà i te ùputa fare ra. 34 Ua faaora iho ra o ia i te taata e rave rahi, i tei pohe i te mau maì atoà e rave rahi te huru, tiàvaru atu ra i te mau tëmoni e rave rahi i räpae. E ua faaòre atu ra o ia, eiaha te tëmoni e parau e, ua ìte rätou ia na.

To Ietu faaruèraa ia Taperenaumi

(Mät 4.23; Ruta èv 4,42-44)

35 E âahiata aè ra, tià aè ra o ia i nià i te poìpoì roa, haere atu ra i te hoê vähi moèmoè, e ua pure iho ra i reira. 36 Ua pee atu ra Timona mä i muri iho ia na. 37 E ìte atu ra rätou ia na, ua parau atu ra: Te mäìmi nei te taata atoà ia òe. 38 Ua parau mai ra o ia ia rätou: Mai haere tätou i te mau ôire fätata nei ia parau haere atoà vau i te Pätireia i reira; o to ù hoì ia tere i haere mai ai. 39 Ua aò haere atu ra o ia i roto i to rätou mau tunato e àti noa aè Tarirea, e ua tiàvaru i te mau tëmoni i räpae.

Haamaitaì mai te Atua Nui Tumu Tahi i ta tätou  parau.

 

Pure.

Pure tätou i te Atua, i faaroo aè nei mätou i te parau a to Tämaïti Here i to na pärahi fätataraa i pïhaì iho i te mau taata tei haafifihia e te mau maì rau, e te Atua aroha mai ia mätou. Âmene.

 

Haamaitaì tätou i te Atua, i te hoê reo himene.

 

Himene

Faaitoitoraa

Himene

Parau faaära

Himene Püpüraa moni.

 

Pure Ärai.

Te Atua no te aroha, No to  òe here i te nünaa, Ua haamau  Òe i te faaäuraa ia na. Höroà mai ia mätou i te itoito, no te täpeà tämau i mua i te rauraa o te mau òhipa ìino atoà e te mau maì rau e faaruruhia nei e mätou i teie mahana. Ia riro ta  Òe höroà no te faaäuraa o te Here, e faaî ia mätou i te  òaòa. E ia mäìmi mätou i te tahi hoêraa hohonu atu ä. Nä roto ia Ietu Metia, to mätou Fatu i tiàfaahou mai, e te ora nei e te mana nei e o  Òe e te Värua maitaì. Mai teie nei e a tau e a hiti noa atu. Amene.

 

Himene ôroà

Ôroà

Himene âmui

Pure a te Fatu

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

38 Ua parau mai ra o ia ia rätou: Mai haere tätou i te mau ôire fätata nei ia parau haere atoà vau i te Pätireia i reira; o to ù hoì ia tere i haere mai ai.

Haamaitaìraa.

39 Ua aò haere atu ra o ia i roto i to rätou mau tunato e àti noa aè Tarirea, e ua tiàvaru i te mau tëmoni i räpae. Âmene.

 

Teraì òr. Faatura.

 

 

Māreto 1.29-39 Aho.

 

Tāpati 7 no Fëpuare 2021.

ÔROÀ

Aho.

Mau taiòraa.

Taramo 147

1 E haamaitaì i te Fatu, E mea maitaì te himene ei haamaitaì i to tätou Atua, e mea pöpou ia, e au hoì te haamaitaì ra. 2 O te Fatu te patu faahou ia Ierutarëma, e na na e haaputuputu i to Ìteraèra i purara ê ra. 3 Ua räpaau o ia i te feiä âau paruparu ra, e ua täamu i to rätou mau puta. 4 Ua hope te mau fetià i te taiòhia e ana, e na na i maìri i to rätou iòa. 5 E rahi to tätou Fatu, e te mana rahi, e to na ìte e mea ìteä òre ia ìmi. 6 Te tauturu nei te Fatu i tei haèhaa ra, te huri nei rä i te paieti òre i raro i te repo. 7 E himene mä te haamaitaì i te Fatu. E himene mä te tïnura i to tätou Atua. 8 O tei täpoì i te raì i te mau ata ra, o tei haapaò i te ua no te fenua, o tei faatupu i te räau rii i nià i te mau mouà: 9 te faaàmu nei o ia i te mau puaatoro i te mäa, e ta te ôrepa âpï e tiàoro atu ia na ra. 10 E òre o ia e pöpou i te itoito o te puaahorofenua ra, e òre o ia e mauruüru i te âvae o te taata ra. 11 E au rä te Fatu i te feiä e mataù ia na ra, i te feiä i tiàturi i to na aroha. 12 E haamaitaì i te Fatu, e Ierutarëma; e haamaitaì i to Atua, e Tiona. 13 O ia tei faaètaèta i te mau teà o to òe ra mau ùputa, e ua haamaitaì i to mau tamarii ra i roto ia òe. 14 Na na i faatupu i te hau i to òe ra mau ôtià, e ua paìa òe ia na i te tïtona maitaì rahi. 15 Ua häpono o ia i ta na parau i te fenua nei, te horo ètaèta nei ta na i faaue. 16 Ua horoà mai o ia i te hiona mai te huruhuru mämoe ra, e te haapurara nei i te hau paari mai te rehu auahi ra. 17 Ua tuu mai o ia i ta na vai paari mai te mea òtiòtihia ra: o vai te taata e mau i te toètoè na na? 18 Ua tuu mai o ia i ta na parau, e ua tärapape iho ra ia; ua haafarara mai ra o ia i te mataì, ua tahe iho ra te pape. 19 Ua faaìte o ia i ta na parau ia Iatöpa, i ta na mau ture e ta na mau faaauraa parau, ia Ìteraèra. 20 Aore o ia i nä reira i te mau fenua atoà, e ta na ra mau faaauraa parau, aita ia rätou i ìte. Hareruia.

 Iöpa 7.1-7

Tau no te täviniraa

1 Aore änei i haapaòhia to te taata nei ànotau i te ao nei? Eere änei to na puè mahana mai te mahana o te taata tärahuhia ra? 2 Mai te tävini te ìmi ra i te pöuri, e mai te tärahuhia ra te tïtau ra i te ötiraa o ta na òhipa,  3 oia atoà vau; ua tuuhia mai te mau märama òaòaraa òre nö ù, e te mau ruì mauiui tei haapaòhia mai nö ù. 4 Ua taòto anaè au i raro, ua parau vau e, A fea rä vau a tià ai i nià e òre atu ra te ruì? E ua rohirohi au i te taahurihuri-noa-raa e tae noa atu i te aoraa ra. 5 Ua vehihia ta ù tino i te toè e te repo; ua mïmiò ta ù ìri e ua tähuti. 6 E òiòi to te mahana nö ù nei i to te mauhaa o te raraa àhu; e te hope noa nei mä te hopeà òre. 7 E haamanaò na e, o to ù nei ora e aho ia; e òre hoì to ù mata e ìte faahou i te maitaì.

1 Tōrīnetia 9.16-23

16 Parau noa ä hoì au i te Èvaneria, aita o ù ârueraa. Eita hoì au e tià ia òre, e àti hoì to ù ia òre au ia parau i te Èvaneria 17 Te rave nei au i taua mea nei mä te âau tae, e utuà ia ta ù; i püpühia mai ia ù te tuuraa Èvaneria nei aita i tae ta ù âau, aita a ù utuà. 18 E aha rä hoì ta ù utuà? Teie ia: ia parau vau i te Èvaneria a te Metia ra, eiaha ei hoo, eiaha vau ia rave i taua mea tià ia ù i te Èvaneria nei. 19 E taata tiàmä noa iho hoì au i te taata atoà nei, ua faariro noa vau ia ù iho ei tävini no te taata atoà, ia rahi ta ù ia noaa. 20 I te âti-Iüta ra, ua faahua âti-Iüta atoà vau, ia noaa ia ù te âti-Iüta; i te feiä i raro aè i te ture, mai te mea e, tei raro atoà aè au i te ture, ia noaa ia ù taua feiä i raro aè i te ture ra; 21 i te feiä ture òre ra, mai te mea ia e, aita a ù ture eere rä mai te mea e, aita a ù ture i te Atua, tei raro aè rä vau i te ture i te Metia, ia noaa ia ù te feiä ture òre ra. 22 I te feiä paruparu ra, ua faahua paruparu vau, ia noaa ia ù te feiä paruparu. Ua faaau vau ia ù iho i te mau mea atoà i te taata atoà nei, ia ora te tahi pae ia ù i taua mau räveà atoà nei. 23 No te Èvaneria i nä reira ai au, ia noaa atoà ia ù i ta te Èvaneria ra.

Māreto 1.29-39

Te mau faaoraraa i muri mai i te täpati

(Mät 4.24; 8.16-17; Ruta èv 4.40-41)

32 E ahiahi atu ra, ia maìri te mahana ra, ua hopoi mai ra rätou i te mau taata atoà i pohe i te maì ia na ra, e te uruhia e te mau tëmoni ra. 33 Ua ruru atoà mai ra to te ôire atoà i te ùputa fare ra. 34 Ua faaora iho ra o ia i te taata e rave rahi, i tei pohe i te mau maì atoà e rave rahi te huru, tiàvaru atu ra i te mau tëmoni e rave rahi i räpae. E ua faaòre atu ra o ia, eiaha te tëmoni e parau e, ua ìte rätou ia na.

To Ietu faaruèraa ia Taperenaumi

(Mät 4.23; Ruta èv 4,42-44)

35 E âahiata aè ra, tià aè ra o ia i nià i te poìpoì roa, haere atu ra i te hoê vähi moèmoè, e ua pure iho ra i reira. 36 Ua pee atu ra Timona mä i muri iho ia na. 37 E ìte atu ra rätou ia na, ua parau atu ra: Te mäìmi nei te taata atoà ia òe. 38 Ua parau mai ra o ia ia rätou: Mai haere tätou i te mau ôire fätata nei ia parau haere atoà vau i te Pätireia i reira; o to ù hoì ia tere i haere mai ai. 39 Ua aò haere atu ra o ia i roto i to rätou mau tunato e àti noa aè Tarirea, e ua tiàvaru i te mau tëmoni i räpae.

Manaò.

I mua i te àti no teie maì o ta tätou e faaruru nei tei faataui i te huru e te peu o to tätou oraraa e te nūnaa Māòhi i teie mahana, aita atu paha ia e uiraa faufaa roa maori rā : E nā hea tātou, aore ra e aha ta tātou tuhaa no tē tauturu i to tātou iho hepohepo, to tätou ahoaho. Te tumu e tià i te faatupu i roto i teie mätahiti, ei tautururaa i to tätou nünaa i Mäòhi Nui nei te haapäpüraa i ta na tuhaa, e ta na hopoià eiaha noa i roto i te oraraa âmui, ta na ihoā rā òhipa i roto i te ôpuaraa faaora a te Atua Nui Tumu Tahi i te nūnaa Māòhi. Teie te tahi êà i manaòhia : e faahiò faahou nā mua roa i to tātou iho parau ei nünaa, E no te mea e hiò-faahou-raa, no te faaitoitoraa ia i te taata ta täìtahi i tē rave māramarama-tāmau-māite-raa i ta na tuhaa, eiaha roa atu o ia ia töàruàru. Teie te tahi manaò i roto i te haapotoraa o te mau taiòraa ia au te tïtau ra ia tätou.

-Taramo 147, 3 Ua räpaau o ia i te feiä âau paruparu ra, e ua täamu i to rätou mau puta.

-Iöpa 7, 7 E haamanaò na e, o to ù nei ora e aho ia; e òre hoì to ù mata e ìte faahou i te maitaì.

-1 Torinetia 9, 19 E taata tiàmä noa iho hoì au i te taata atoà nei, ua faariro noa vau ia ù iho ei tävini no te taata atoà, ia rahi ta ù ia noaa.

-Märeto 1, 35 E âahiata aè ra, tià aè ra o ia i nià i te poìpoì roa, haere atu ra i te hoê vähi moèmoè, e ua pure iho ra i reira.

Tatararaa.

I te mahana mätamua no te òhipa a Ietu i te ao nei ia au te faatiàraa a Märeto. Ua faaea na O ia i roto i te tunato, mai te poìpoì mai ia, e ahiahi noa äè ra. E tunato teie no Taperenaumi, e òire no te tuhaa fenua no Tarirea. I teie vahi to Ietu färereiraa i te mau taata e rave rahi, e tae noa ätu te mau huru taata ätoà no tera mai vahi e tera mai vahi. Te haapii nei O ia i reira, te faaora nei i te mau maì, te tiàvaru nei i te mau tëmoni, oia hoì te faatiàma nei o Ietu i teie mau taata tei fati i raro äè i teie mau faanahoraa tei faateimaha i to rätou oraraa. Te tupu nei te maere rahi o te mau taata i te mau òhipa ta Ietu e rave nei i mua ia rätou. Te tahi pae te uiui nei i te àravihi o teie taata, te mana o te òhipa ta na e faatupu nei. No rätou e tià ia tätou ia parau e, ua mau to rätou tiàturiraa i nià i te parau no Ietu faaora maì, e aore rä no Ietu tiàvaru tëmoni, e aore no Ietu tei haapii noa. Te faaea nei te manaò o teie mau taata i nià i te faanahoraa faaora i te mau maì rau. Aita rä te manaò i nià i tera tiàturiraa rä e, o te TAMAITI TEIE NA TE ATUA, tei haere mai e faaìte i te PATIREIA NO TE AO MURER ORE. Te tumu rahi i rave ai o Ietu i teie mau täpura òhipa no te faaoraraa i te mau maì e no te haapiiraa i te mau taata ia ìtehia te PATIREIA O te ATUA. Te ìte nei rä te mau taata i roto ia Ietu, te hoê taata mai ta rätou i ìte noa na tei rave tämau i teie huru òhipa. Aita rä rätou e tiàturi nei o Ietu no o mai O ia i te Atua rä.

Èi ia ahiahi rä te haere nei o Ietu e ta na, na pipi too maha i te ùtuafare no te metua hoovai vahine o Timona. I roto i tera manaò e, e haamäha i to rätou rohirohi, ia tae rätou i reira tei roto ätoà teie metua vahine i te maì ua fivahia, faaorahia-iho rä e Ietu. Eita e nahonaho ta rätou ôpuaraa no te haamäha i to rätou rohirohi, teie mai nei ä te taata e rave rahi, e to rätou mau maì rau, ua tae roa teie òhipa i te âahiata to rätou rave-noa-raa i teie òhipa.

MAI HAERE TÄTOU I TE MAU ÒIRE FATATA NEI, te reo ia o Ietu i ta na mau pipi.

Eiaha tätou ia manaò e, te fiu nei o Ietu i te färiiraa i te mau taata tei fifi to rätou tino i te àti maì, èita roa ia, te rü nei ra o Ietu i te faaìteraa i te mau hinaaro o to na Metua i te ao ra. No reira te âahiata noa rä i tià ai o Ietu, no te haere i te hoê vahi O ia änaè no te pure i to na Metua. Te ìte nei tätou i ù nei i te hoê òhipa faufaa e vai nei i roto i te oraraa o Ietu mauti rä ia te pure. Te hinaaro nei O ia na roto i teie mahana âpï ta na e àvari nei, e äni i to na METUA i te haamaitaì no te òhipa o ta na e rave. No Ietu te pure o te hoê ia taime te reira e àparau varua ai O ia i to na Metua. Te horoà nei o Ietu ia tätou i te hoê auraa no te pure, oia hoì to tätou ia àparau Väruaraa i te Atua. E rave rahi mau hohoà ta tätou i horoà na no te pure, te faaäuhia nei i te niuniu paraparau, te roü o te varua e te vai ätu rä. O ta Ietu rä e faaìte nei i roto i ta tätou taiòraa e mea taaê rii ia. Te pure o te taime ia e farerei ai te värua o te taata, i te värua o te Atua. No reira te taata e rave i teie tuhaa mea tïtauhia o ia i te hoê faaineineraa na mua roa ia na, hou a tià ätu ai i mua i te Atua, i te mea e òhipa faufaa roa ta na e rave rä i taua taime rä. O te òhipa ia ta Ietu e rave nei, te äniraa i to na Metua i te itoito èi ia noaa Ia na te puai no te òhipa âpï o ta na e haamata i te rave.

I muri noa äè rä o Petero ia Ietu, ma te parau e te ìmi noa nei te mau taata ia Òe e rave rahi. No Petero ma, te faaea noa nei rätou i nià i te parau no te faaoraraa maì, e te tiàvaruraa i te mau tëmoni, e te mau varua faufau. No rätou teie änaè te òhipa e tià ia Ietu ia rave, te riro nei o Ietu i roto i to rätou tiàturiraa, èi täote no te räpaau noa i te mau maì, aita rä rätou e ìte nei i roto ia Ietu ua hau ätu O ia i te täote. O Ietu, èita hoì O ia e räpaau noa te maì rapae, e räpaau ätoà ra O ia i te maì o te värua o te taata. Te aroha nei o Ietu i te ìteraa te huru o te nunaa, te fifi e ïri nei i nià ia rätou, e tià ia parauhia e, e maere rahi teie e tupu nei i mua ia Ietu, i te mea te ao ta te Atua i rahu, e ao maì òre ia. Teie ta na e ìte nei te vai rä i roto i te tunato, te vai ra i te ùtuafare. E teie nei te haere nei O ia i roto i te mau òire  fatata, e hiò ätoà i reira. Te òire teie ta Ietu e tïtau nei i te haere, i te mea tei reira ätoà te vairaa te mau taata, te mau ùtuafare, e tae noa ätu i te mau taata àravihi i te tuatapaparaa i te oraraa o te nunaa e ora ra i reira. Aita ra ta tätou taiòraa e faaìte mai nei te huru o teie mau òire, ta tätou noa ra e ìte nei, oia hoì ia, ua maìhia teie òire, no te mea ua tae roa te feiä maì i roto i te mau tunato i te äniraa i te faaora, o ta Ietu ia i rave. I tià ai ia Ietu i te parau e,

MAI HAERE TÄTOU, IA PARAU HAERE ÄTOÀ VAU I TE PATIREIA I REIRA, O TO Ù HOI IA TERE I HAERE MAI AI.

Te haapäpü nei o Ietu i ù nei èita ta na òpuaraa e faaèa noa i te vahi hoê, e haere ra oia i mua. Te na roto nei O ia i te mau òire no Tarirea, i te haapiiraa, i te faaìteraa, e i te faaoraraa i te mau maì rau e naeàhia nei i nià i te taata. E te faaìte ätoà nei o Ietu, i te tumu i haere mai ai O ia, ia tià ia na ia faaineine i te mau tamarii no te PATIREIA o to na Metua. Ta na ra e ìte nei, aita teie tuhaa òhipa i ineine, te tumu ia O ia i hinaaro ai e haere ä i mua, i te mau vahi ai-ti-ä O ia i taë i reira.

E hoa here mä.

Te parau mai nei o Ietu ia tätou na roto i teie mau òhipa Ta na e rave nei, eiaha tätou ia paruparu i te Pureraa i te taime te maì e faatere ai i to tätou tino. E parau mau i teie mahana e rave rahi mau maì èita e naeàhia e te ìte o te mau täote ia räpaau, aita ta rätou mau moihaa àravihi no teie mau maì.

Te vahi faufaa ra e vai nei i roto, i ta tätou nei parau, to Ietu ia haereraa i te hoê vahi moèmoè no te Pure, e te parauraa O ia mai haere ä tätou i te mau òire fatata.

E te parau ätoà mai nei o Ietu ia tätou e, e Pure, e eiaha e fiu i te pureraa.

 

Teraì òr. Faatura.