Ioane 12.20-33 E ta ù Metua.

 

Tāpati 21 no Mati 2021.

E ta ù Metua.

Taramo 51

1 Na te Mënätehe. Taramo na Tävita. 2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra.3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara. 4 E horoi hua mai òe ia ù i to ù nei ìno, tämä hua mai ia ù i ta ù nei hara. 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù. 6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra.7 Inaha, i fänau mai au mä te hara, e i töhia vau e ta ù metua vahine mä te ìno. 8 Inaha, o te parau mau no roto ra ta òe e hinaaro. E haapii mai òe ia ù i te haapaò maitaì i te vähi moè ra. 9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona. 10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra. 11 E huna ê atu òe i to mata i ta ù nei mau hara, e parai hua i to ù nei mau ìno. 12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei.13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei. 14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra. 15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe. 16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha. 17 E vëvete na òe, e te Fatu, i ta ù vaha, e na ta ù vaha e ârue ia òe.18 Eere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia-täauahi. 19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira. 20 Ei hämani maitaì to òe ia Tiona; e patu hoì òe i te âua i Ierutarëma nei. 21 Ei reira òe e mauruüru ai i te tütia parau tià e te tütia-täauahi täatoà mau ra; ei reira te puaatoro e hopoihia ai i nià i ta òe ra fata.

Ieremia 31.31-34

Te faaauraa âpï

31 Te parau mai ra te Fatu inaha, te fätata mai ra te ànotau, e faaau ai au i te ùtuafare o Ìteraèra e te ùtuafare o Iüta i te tahi faaauraa âpï; 32 eiaha mai te faufaa ta ù i faaau atu i to rätou ra mau metua, i te mahana i rave atu ai au i to rätou rima, ia arataì mai au ia rätou mai te fenua ra i Àifiti; e ua ìno iho ra ta na faufaa nä ù ra ia rätou, i haapaò noa ai au ia rätou mai te täne ra të nä reira mai te Fatu, 33 Teie rä te faufaa ta ù e faaau atu i te ùtuafare o Ìteraèra; te nä ô mai ra te Fatu, ia oti aè te reira ànotau, e tuu vau i ta ù pure i roto ia rätou, e päpaì au i te reira i roto i to rätou âau; e e riro vau ei Atua no rätou, e ei taata hoì rätou nö ù. 34 E òre hoì rätou e haapii faahou, o te taata o to na iho taata tupu, o te taata a to na iho taeaè, i te nä-ô-raa atu e, ia ìte hoì òutou i te Fatu; e ìte päatoà hoì rätou ia ù, o tei haèhaa e o tei rahi te parau mai ra te Fatu; e faaòre hoì au i ta rätou hara, e òre au e manaò faahou i ta rätou ìno.

Hēpera 5.7-9

7 Ua püpü hoì o ia i te pure i ta na oraraa ra, i te aniraa atu ia na mä te òto rahi e te roimata, i tei tià ia faaora ia na mai te pohe mai ra, ei faaroohia o ia i ta na i mataù ra. 8 E Tamaiti noa ä iho hoì o ia, i ìte o ia i te auraro i to na ra mau pohe. 9 E no te mea ua haamoà-roa-hia o ia, riro atu ra o ia ei tumu no te ora mure òre no te feiä atoà e faaroo ia na ra.

Ioane 12.20-33

Te hora o te tätauro

20 E taua feiä i haere mai e haamori i te Atua i te ôroà ra, e Herëni ia te hoê pae. 21 Ua haere mai ra rätou ia Firipa o Petetaita i Tarirea ra, ua parau mai ra ia na, na ô mai ra: E hoa, te hinaaro nei mätou ia ìte mätou ia Ietu. 22 Ua haere atu ra Firipa, faaìte atu ra ia Àneterea, ua parau mai ra hoì Àneterea räua o Firipa ia Ietu. 23 Ua parau atu ra Ietu ia rätou, nä ô atu ra: Ua tae i te hora e haamaitaìhia ai te Tamaiti a te taata nei. 24 Âmene, âmene, e parau atu vau ia òutou: ia tuuhia te hoê huero tïtona i raro i te repo, ia òre rä ia pohe ra, ua vaiiho hoê noa ia; ia pohe rä, rahi roa atu ra ia te hotu. 25 O të nounou i to na ora, ua ère ia i te ora, e të òre e hinaaro i to na ora i teie nei ao, ei ora-mure-òre ia to na i te ao a muri nei. 26 O te taata i hinaaro ei tävini no ù ra, a pee mai ia ia ù, e te vähi ta ù e pärahi ra, ei reira atoà ia ta ù tävini; e ia tävini mai te taata ia ù ra, na ta ù Metua ia e utuà mai ia na.

To Ietu faaìteraa i to na pohe

27 Ua horuhoru roa ta ù värua i teie nei. E e nä hea vau? E nä ô änei: E ta ù Metua, e faaora ia ù i teie nei hora? I haere mai ai rä vau no teie nei hora. 28 E ta ù Metua, e haamaitaì i to iòa. Ua ìteä mai rä te hoê reo no nià i te raì i te nä-ô-raa mai: Ua haamaitaì au, e e haamaitaì faahou atu ä vau. 29 Ua ìte hoì te mau taata i pïhaì iho ra i te haruru, e ua parau aè ra: E pätiri  Ua nä ô aè ra hoì te hoê pae: E merahi të parau mai ra ia na. 30 Ua parau atu ra Ietu, nä ô atu ra: Eere no ù i tae mai ai taua reo nei, no òutou rä. 31 Ei teie nei e faahapahia ai teie nei ao, ei teie nei e hee ai te arii o teie nei ao. 32 Âreà ia hopoihia vau i nià ra, e ùmehia mai ia e au te taata atoà ia ù nei. 33 I nä reira atu ra o ia i te faaìteraa atu i te huru o to na pohe ia pohe ra.

Manaò

I to tätou faarooraa na taiòraa e maha te haafatatahia ra tätou i pïhaì iho i te parau no te tämäraa hara, no te mea e ö tätou i roto i te haamanaòraa, no te mau àti, te mau mäuiui, te mau päriraa haavare, e färereihia e te Metia. No te hara i ravehia e tätou e te taata nei e tià ia tätou i te parau e, e horoi hua mai òe ia mätou e te Atua Nui Tumu Tahi i to mätou nei ìno, tämä hua mai ia mätou i ta mätou nei hara. Te fäì nei hoì mätou i ta mätou nei hara, e te vai noa nei ä to mätou ìno i pïhaì iho ia mätou. I mua i to aro, to òe anaè ra, i hara ai mätou nei, e i mua i to mata i rave ai mätou i te ìno. Ia faatiàhia hoì ta òe parau, e eiaha e faahapahia ia parauhia ra. Inaha, i fänau mai au mä te hara, e i töhia vau e ta ù metua vahine mä te ìno. Inaha, o te parau mau no roto ra ta òe e hinaaro. E huna ê atu òe i to mata i ta mätou nei mau hara, e parai hua i to mätou nei mau ìno. E faaau na òe i te âau mä i roto ia mätou nei, e to mätou Atua. E i reira mätou e haapii ai i te feiä rave hara i ta òe parau, e e haafäriuhia mai te rave parau ìno ra ia Òe. Eere hoì i te tütia ta Òe i hinaaro, àhiri o te reira, ua horoàhia ia e mätou, aore hoì Òe e au i te tütia-täauahi. O ta te Atua tütia hinaaro ra, o te âau paruparu ia. O te âau paruparu ra e te òto ra, e òre roa te Atua e vahavaha i te reira. E ia haere mai tätou e haamori i te Atua i te ôroà ra, tei faaìte ia tätou i to tätou tiàmaraa. Teie te tahi reo no Ietu,  O të nounou i to na ora, ua ère ia i te ora, e të òre e hinaaro i to na ora i teie nei ao, ei ora-mure-òre ia to na i te ao a muri nei. Ua horuhoru roa ta ù värua i teie nei. Ei teie nei e faahapahia ai teie nei ao, ei teie nei e hee ai te arii o teie nei ao. Âreà ia hopoihia vau i nià ra, e ùmehia mai ia e au te taata atoà ia ù nei. I nä reira atu ra o ia i te faaìteraa atu i te huru o to na pohe ia pohe ra. Teie te tahi haapotoraa no na taiòraa e maha,

-Taramo 51, 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù.

-Ieremia 31, 34 E òre hoì rätou e haapii faahou, o te taata o to na iho taata tupu, o te taata a to na iho taeaè, i te nä-ô-raa atu e, ia ìte hoì òutou i te Fatu; e ìte päatoà hoì rätou ia ù, o tei haèhaa e o tei rahi te parau mai ra te Fatu; e faaòre hoì au i ta rätou hara, e òre au e manaò faahou i ta rätou ìno.

-Hepera 5, 9 E no te mea ua haamoà-roa-hia o ia, riro atu ra o ia ei tumu no te ora mure òre no te feiä atoà e faaroo ia na ra.

-Ioane 12, 28 E ta ù Metua, e haamaitaì i to iòa. Ua ìteä mai rä te hoê reo no nià i te raì i te nä-ô-raa mai: Ua haamaitaì au, e e haamaitaì faahou atu ä vau.

Ei Tatararaa.

Tei Ierutarëma o Ietu no te ôroà pata e ta na mau pipi, e rave rahi i faahanahana teie tomoraa no te Fatu o te hau, te Fatu tei färii te parau no te tätarahapa, tei horoà i te faaòreraa hara na roto i teie pata. E faahoperaa teie no te parau o te tutia, e tutia ta te Metia no te mau tutia atoà, oia hoì, hoê tutia tei upootià ta te Atua, e tutia no te ùmeraa i te mau taata atoà ia na ra. I horuhoru ai te Varua o Ietu no taua hora ra.

Te faaära nei teie parau ia tätou i to tätou öraa i roto i te hepetoma moà, no te mau mauiui o te Metia tei faatataurohia. Teie te taatoàraa o te mau Àti Iuta, no teie ôroà haamanaòraa i to te Atua ìritiraa mai ia rätou mai raro aè mai i te tïtïraa i Aifiti. Te mau Àti Iuta tei noho maoro i te fenua Herëni, te fëia mataù Atua, tei tiàturi hoê anaè Atua, o rätou atoà teie e hinaaro nei e faahanahana teie ôroà, ma te farerei atoà ia Ietu, tei faaroohia e rätou te mau òhipa maere tei faatupuhia na roto i te puai o te mana taa ê tei òre roa e naeàhia e te mana o te mau Faritea, e te mau papaì ture.

Teie parau a te mau Herëni i te ìrava 21, E hoa te hinaaro nei mätou ia ìte ia Ietu. Te ìriti nei teie parau, te hora e haamaitaìhia ai te Tamaiti a te Atua, na roto i te pohe e te tiàfaahouraa, ia päpu te faaäuraa no te faaäuraa àpi. Teie ta te Fatu i parau i te ìrava 24, amene, amene, e parau atu vau ia òutou, ia tuuhia te hoê huero tïtona i raro i te repo ia òre ra ia pohe ra, ua vaiiho hoê noa ia, ia pohe ra, rahi roa atu ra ia te hotu. Maa matauhia teie e te Àti Iuta, o ta Ietu e faahohoà nei i nià i te hotu no te òhipa a te Varua Maitaì, te huero mea haìhaì roa. Te rave nei o Ietu te hohoà o teie maa ei faahiòraa i te parau no to na pohe, e to na tiàfaahouraa. I te mea e maa teie e au i to na parau, ia vai te huero tïtona i to na anaè vairaa aita e fenua, e òre e hotu, e òre e tävirihia ei pane. Ia tuuhia ra te huero tïtona i raro i te repo ei reira te paa rapae e àmaha ai, no te faatupu, e no te faahotu, e riro i te rahi. Oia atoà ia te Fatu, ia òre O ia ia tae i raro i te vahi hohonu no hate, e òre ia e ùmehia mai te mau taata atoà ia na ra. Àreà ra ia tae O ia i reira, e ùmehia mai ia te mau taata atoà ia na ra, no te Ora Mure Òre. I faaroohia ai te reo o te merahi i nià i te Fatu, ua haamaitaì au, e haamaitaì faahou atu a vau.......ir 28 vh. Manaòhia-iho ra e pätiri. Eita ra e reo poroì ia i to te ao e, ua tae i te hora, e haamaitaìhia te Tamaiti a te Atua no te mau taata atoà, te mau nunaa atoà. Ua horuhoru te varua o Ietu no taua taime ra, e no taua taime ra i taë mai ai O ia, ei tävini, Fatu tävini, ei Arii tävini, ei faaora. Ua taë i te hora e tuuhia ai te huero tïtona a te Atua, i te vahi e rahi ai te hotu, e ìtehia ai te hanahana. O te mau parau teie, tei faaroohia hou te Pata.

Ia hiò maitaì anaè tätou i teie parau ta te Metia e parau nei, eita e moè ia tätou e ora teie e faahitihia nei, no tätou e te mau taata atoà. Te faahoìhia nei tätou i nià i te ora ta te Fatu e parau nei. Ua ìte maitaì hoì tätou ia òre te huero maa ia tuuhia i raro i te repo, e òre o ia e maahia no te faaìte i te hotu. I te mea te ora nei o ia iho i roto i to na paa, e ora ia teie tei api i nià ia na iho, aita ra e matara, no te ìriti atu a i te hoê ora âpï ia rahi. Eita anei te ora o te hoê taata mai teie atoà te huru, oia ia, mai teie atoà te huru o te oraraa  o te taata, teie ia reo o te Fatu i te ìrava 25, o te nounou i to na ora e ère ia i te ora, e te òre e hinaaro i to na ora i teie ao, e ora mure òre ia to na i te ao a muri nei.

Te ìte nei tätou i ù nei te manaò päpü o Ietu no ta na òpuaraa, ia ora to te ao i roto i te vahi i faaineinehia e te Atua no te taata. No reira e òre te huero e ora no na anaè ia ora ra no vëtahi ê, o te taata atoà ia, ia ora o ia no te Atua i te ao nei.

O te faaäuraa ia a te Atua no te faaäuraa âpï, ia ìtehia te puai no te faaoraraa a te Metia. Ia ìte to te ao nei i te Atua na roto i te Metia, tei faahitihia i te reo haamaitaì no te ture tei tiàturihia. O te haehaa hoì teie o te Atua, tei òre i nounou te ora o ta na iho Tämaïti, tei nounou ra i te ora mure òre no te mau taata atoà. Na roto i te faaòreraa i te hara a te taata, a tei ìte e hara ta na, te tumu ia no te ôroà pata. I reira e ìtehia ai te puai o te taata faaroo i roto i te pure.

E hoa here ma e, te faahiti nei o Ietu e, Ua horuhoru roa ta ù Varua i teie nei, e e nahea vau ? E na ò anei ? E ta ù Metua, e faaora ia ù i teie nei hora, i haere mai ra vau no teie nei hora.

 Na roto i teie nei parau te tïtauhia nei tätou, i roto i ta tätou fäìraa ia Ietu ei Fatu e ei Faaora no tätou, ia ìte e, te haapeàpeà nei o Ietu i te hora e tupu ai te parau no to na taa-ê-raa i te fëia i tiàturi ia na. O vai atu ra ia te tiàturi faahou ia na, i te mau òhipa faahiahia ta na i rave no te mau taata atoà. I teie hora e faahapahia ai teie nei ao, e i reira atoà e hee ai te mau arii o teie nei ao. I te mea e hopoihia e te Atua ta na Tämaïti i nià i te vahi naeà-òre-hia e te taata e pärahi ai, i reira te mau taata atoà tei tävini ia na e ùmehia ai ia na ra. O te huru ia no ta Ietu faaìteraa i to na pohe ia pohe o ia ra.

Te taata e hinaaro ei tävini no Ietu, ua riro ia ei ùtuafare faaâpïhia e te Atua. Tei pee ia Ietu ra, ua fäì ia i te faaroo, tei haapäpü i te täamuraa i te Metia. Tei pärahi fatata noa ia Ietu ra, ua tiàturi ia i te ora mure òre.

 

                                                          

Terai or. Faatura.

 

 

 

Ioane 3.14-21 Ao o te Atua Nui Tumu Tahi.

 Tāpati 14 no Mäti 2021.

Ao o  te Atua Nui Tumu Tahi.

Taramo 137

1 I te hiti o te mau pape i Päpuronia ra to mätou pärahiraa i raro, e ua òto iho ra mätou i te manaòraa ia Tiona. 2 I nià i te mau ârope, i rotopü ra, te faauta-raa-hia ta mätou mau tïnura. 3 I reira te feiä i tïtï ai mätou ra i te faaueraa mai i te himene, e te feiä i riro mai ai mätou tei ani i te ârearea, nä ô mai ra: A himene mai na i te hoê himene no Tiona. 4 E aha mätou e tià ai ia himene i te himene a te Fatu i te fenua ê nei? 5 E Ierutarëma, ia moè òe ia ù ra, ia moè atoà i ta ù rima àtau nei to na töroà 6 Ia piri ta ù arero i ta ù vaha nei, ia òre au ia manaò ia òe, ia òre au ia faateitei ia Ierutarëma ei mea òaòa rahi na ù.7 Haamanaò, e te Fatu, i te mau tamarii a Êtoma, o tei parau i te mahana a àti ai Ierutarëma: A täìhitumu na, täìhitumu na, ia ìhipapa hua ia. 8 E te tamahine a Päpuronia faaäno fenua e, e ao to na to të tähoo atu ia òe, mai ta òe i rave mai ia mätou nei. 9 E ao to na to të rave i to na mau ènemi, e ua täìri noa i nià i te mato ra.

2 Parareipomeno 36.14-23

14 Rahi atu ra hoì ta te feiä tahuà rarahi ra hara, e ta te taata atoà, i te mau parau faufau a te êtene; e ua haaviivii i te fare o te Fatu tei haamoàhia e ana i Ierutarëma. 15 Ua tono mai ra te Atua o to rätou mau metua o te Fatu i te veà, aita i tuutuu; no te mea te aroha ra o ia i to na mau taata, e to na iho ra pärahiraa. 16 Ua tähito ra rätou i te mau veà a te Atua, e ua vahavaha i ta na parau, e ua hämani ìno i te mau perofeta nä na e tupu roa aè ra te riri o te Fatu i to na taata, e aita roa aè ra e haapüraa. 17 I tuu mai ai o ia i te arii o te Tarataio, tei täpü noa i te mau taata âpï i te òè i roto i to rätou vähi moà, aore roa i aroha i te taata âpï, e te pötii rii âpï, i te taata paari, e tei piò i raro i te ruhiruhiä: tuu-atoà-hia atu ra i ta na rima. 18 E te mau mea atoà o te fare o te Atua, te mea rahi e te mea rii, e te mau taoà atoà no te fare o te Fatu, e te taoà a te arii, e to te hui raatira atoà, ua hopoi-atoà-hia e ana i Päpurönia. 19 Ua tütuì hoì rätou i te fare o te Atua i te auahi, e ua haapararï i te âua i Ierutarëma; ua tütuì hoì te fare o te hui arii i te auahi, e ua vävähi i te mau taoà maitataì atoà ra. 20 E te feiä i ora i te òè ra, ua hopoi o ia i te reira i Päpurönia; e riro atu ra ei tävini nö na e no ta na mau tamarii e tae roa aè ra i te hau i te pätireia ra i Peretia. 21 Ia tupu te parau a te Fatu i te vaha o Ieremia, ia noaa to taua fenua ra Täpati; te vai pau noa ra hoì, te haapaò ra ä ia i te täpati e hitu àhururaa i te mätahiti. 22 Tae aè ra i te mätahiti mätamua o te arii o Peretia ra o Turo, ia tupu te parau a te Fatu i te vaha o Ieremia i faaäraära atu ai te Fatu i te âau o te arii o Peretia o Turo, ia päpaì i te tahi ture päpaì, e ua faaìte haere e àti noa aè tö na fenua, nä ô atu ra, 23 Te nä ô mai ra te arii o Peretia o Turo, ua höroà mai te Atua no te raì o te Fatu i te mau pätireia atoà o te ao nei; e ua poroì mai ia ù e faatià i te tahi hiero nö na i Ierutarëma, i Iüta ra. O vai to òutou i to na atoà ra taata? Ei ia na to na ra Atua o te Fatu a haere ai o ia i nià ra.

Èfetia 2.4-10

4 O te Atua rä, no te aroha rahi to na, no te hinaaro rahi ta na i hinaaro mai ia tätou nei ra, 5 pohe noa ai ä tätou i te hara ra, faaora aè nei ia tätou mä te Metia atoà i ora òutou i te aroha mau, 6 e ua faatià ia tätou atoà i nià, e ua haapärahi ia tätou atoà i te ao i te Metia ra ia Ietu; 7 ei faaìteraa na na i te mau uì a muri atu, i te rahi hau ê atu o to na ra aroha mau, i ta na hämani-maitaì-raa ia tätou i te Metia ra ia Ietu. 8 I ora hoì òutou i te aroha mau i te faaroo. Eere hoì ia i to òutou iho, e mea horoàhia mai ia e te Atua. 9 Eere i to te òhipa, aita atu ra o te taata nei e teòteòraa. 10 O tätou hoì ta na òhipa i hämanihia i te Metia ra ia Ietu ei rave i te parau maitaì, o tei faaau-ätea-hia tätou e te Atua, e o ta tätou ia e haapaò.

Ioane 3.14-21

14 Mai ia Möte i faateitei i te ôfï i te mëtëpara ra, oia atoà te Tämaïti a te taata, e faateitei-atoà-hia ia, 15 ia òre ia pohe te faaroo ia na ra, ia roaa rä te ora-mure-òre. 16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. 17 Aore hoì te Atua i tono mai i ta na Tämaïti i te ao nei e faahapa mai i to te ao, ia ora rä to te ao ia na. 18 Tei faaroo ia na ra, e òre o ia e faahapahia; tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra. 19 Teie taua faahapa ra, o te märamarama ua tae mai i te ao nei, e hinaaro aè nei te taata i te pöuri, aore te märamarama, no te mea te ìno ra ta rätou parau. 20 O tei mau i te parau ìno ra, aore o ia i hinaaro i te märamarama, e òre hoì o ia e haere mai i te märamarama o te ìteä ta na parau. 21 O tei haapaò rä i te parau mau ra, e tae mai ia i te märamarama ia ìteä-maitaì-hia e, te au ra ta na parau i te Atua.

Manaò.

I teie tau no te hinapaarae i to tätou pärahiraa, te òto nei tätou i te manaòraa ia Mäòhi Nui i te mau àti ta na e faaruru nei, teie maì e haaviivii nei to na èa, e tae noa atu te viivii âtömï. I nià i te mau fenua, i rotopü i te mau aru, te faauta-raa-hia e tätou te mau faatara tei pehehia e te mau âpoo mataì. E aha tätou e tià ai ia himene i te himene a te Fatu i te fenua nei. E Mäòhi Nui e, e òre òe e moè ia ù, e òre atoà ia e moè  ia ù to rima Metua nei e to na mau töroà. Ia piri ta ù arero i ta ù vaha nei, ia òre au ia manaò ia òe, ia òre au ia faateitei ia òe ei mea òaòa rahi änei na ù. 

E te mau tamahine, e te mau tamaroa no Mäòhi Nui nei faaea i te faaäno i te fenua, e ao to na to të tähoo atu ia òe, mai ta òe i rave mai ia mätou nei. Eiaha ia tähitohitohia i te mau veà tono a te Atua Nui Tumu Tahi, e ua vahavaha i ta na parau, e ua hämani ìno i te mau faaìte parau nä na e tupu roa aè ra te riri o te Fatu i to na taata, e aita roa aè ra e haapüraa. E te mau mea atoà o te fare o te Atua, te mea rahi e te mea rii, e te mau taoà atoà no te fare o te Fatu, e te taoà a te nünaa, e to te hui raatira atoà, ua hopoi-atoà-hia e ana i te vahi ateä. Ei ia na to na ra Atua o te Fatu a haere ai o ia i nià ra. Ia ora hoì Mäòhi Nui i te aroha mau i te faaroo. Eere hoì ia i to tätou iho, e mea horoàhia mai ia e te Atua Nui Tumu Tahi. Ia faaroo tätou i te mau taiòraa turu no teie mahana te naò ra ia,

-Taramo 137, 3 I reira te feiä i tïtï ai mätou ra i te faaueraa mai i te himene, e te feiä i riro mai ai mätou tei ani i te ârearea, nä ô mai ra: A himene mai na i te hoê himene no Tiona.

-2 Parareipomeno 36, 23 Te nä ô mai ra te arii o Peretia o Turo, ua höroà mai te Atua no te raì o te Fatu i te mau pätireia atoà o te ao nei; e ua poroì mai ia ù e faatià i te tahi hiero nö na i Ierutarëma, i Iüta ra. O vai to òutou i to na atoà ra taata? Ei ia na to na ra Atua o te Fatu a haere ai o ia i nià ra.

-Èfetia 2, 10 O tätou hoì ta na òhipa i hämanihia i te Metia ra ia Ietu ei rave i te parau maitaì, o tei faaäu-ätea-hia tätou e te Atua, e o ta tätou ia e haapaò.

-Ioane 3. 17 Aore hoì te Atua i tono mai i ta na Tämaïti i te ao nei e faahapa mai i to te ao, ia ora rä to te ao ia na.

Tatararaa.

Te parau e täamu ra i te mau taiòraa turu, te parau ia no te Ao-Mure-òre e aore ra te Ao o  te Atua Nui Tumu Tahi i te mea noa atu te haafifiraa rau i färereihia e te nünaa, e tae noa atu i te mau tävini. Ua faatupu noa te Atua i te mau ôpuaraa ia ìtehia te ora. E i te faataaêraa i to Na nünaa i te mau peu tei faatïtï ia na, tei haamämü ia na i te himeneraa e te haamoriraa i to na hanahana. Èere atu ra i te òhipa, aita atu ra o te taata nei e teòteòraa. O tätou hoì ta na òhipa i hämanihia i te Metia ra ia Ietu ei rave i te parau maitaì, o tei faaäu-ätea-hia tätou e te Atua, e o ta tätou ia e haapaò. Mai ia Möte i faateitei i te ôfï i te mëtëpara ra, oia atoà te Tämaïti a te taata, e faateitei-atoà-hia ia, ia òre ia pohe te faaroo ia na ra, ia roaa rä te ora-mure-òre. I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. Aore hoì te Atua i tono mai i ta na Tämaïti i te ao nei e faahapa mai i to te ao, ia ora rä to te ao ia na. Teie taua faahapa ra, o te märamarama ua tae mai i te ao nei, e hinaaro aè nei te taata i te pöuri, aore te märamarama, no te mea te ìno ra ta rätou parau. O tei mau i te parau ìno ra, aore o ia i hinaaro i te märamarama, e òre hoì o ia e haere mai i te märamarama o te ìteä ta na parau. O tei haapaò rä i te parau mau ra, e tae mai ia i te märamarama ia ìteä-maitaì-hia e, te au ra ta na parau i te Atua.

Ia faaroo tätou i te parau no roto mai i te Parau Maitaì no Ietu i te päpaìraa a Ioane i te pene 3 i te ìrava 17 Aore hoì te Atua i tono mai i ta na Tämaïti i te ao nei e faahapa mai i to te ao, ia ora rä to te ao ia na. Te faahitihia nei te parau no te Ao, e parau teie e âpee noa nei ia tätou ia hiti te mahana tei faaìte ia tätou ua märamarama te parau nei tätou ua Ao, i te mea te tumu o te mahana, te parau ia no te hana te àma te ànaana te mea e höroà ra i te märamarama, oia te tahi mea e türama, no reira e òre ai e toètoè e te uriuri, a riro atu ai te ànaana ta na e höroà èi faahiò, èi faaìte i te tahi mea te òre e ìte-òiòi-hia àhiri àita taua ànaana ra. No reira, te riro nei te mahana e te märamarama no te faaìte i te Ao, ta na e höroà nei èi räveà no te faahiò ia tätou i te faufaa hau ê o te mau maitaì ta tätou e fänaò nei. Te riro atoà nei rä te reira èi faahiòraa ia tätou i te Atua Metua te tumu o taua mau maitaì ra. Te türama mai nei te mahana i te fenua e to na î, te faahoì nei hoì te î o te fenua i taua märamarama rä i nià i te Atua. No reira i tupu ai te Ao o te Atua, e Ao-Mure-Òre. E tià roa ia tätou ia parau e, te Ao, te hitiraahia ia te fenua nei i te ànaana o te rä, a riro atu ai te märamarama ta na i ninii mai èi heheuraa mai i te maitaì hau ê o te Atua, èi faaìteraa hoì i to na hanahana.

Te ìrava 16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. Teie Ao, o te fenua ia ta tätou e pärahi nei, oia te vähi e mahora ai to tätou ora taata, e te vähi atoà e hope atu ai. Te ìte ra tätou i teie nei i te faufaa e te hohonu o te manaò e vai ra i roto i teie taò, Ao. Te vai ra te manaò o te märamarama, te hanahana, te hau, te ora, te òaòa e te vähi, ta tätou i parau e, e fenua.

Ua riro te Ao ta tätou e ora nei, i roto i te rahi o to na mau auraa, èi ata no te ao värua. Te ìte ihoä tätou i te òaòa, te ìte nei hoì i te märamarama e te hau, e mea òiòi roa rä te reira i te moè e i te monohia mai e te peàpeà, riro atu ai èi manaònaòraa na tätou, èi mihimihiraa hoì, no te mea e taoà märeva noa. No taua huru märeva noa o te òaòa e te hau ra, i òre ai te tahi pae i tiàturi ai e, te vai mau ra ihoä. Te ao taata nei, e ao ia no mau mea täôtiàhia, no te mau mea mute òiòi noa. Areà te ao värua ra, èita ia e naeàhia e te hihi o te tau, e Ao-Mure-Òre ia.

 

Teraì òr. Faatura.

Papa Haamori Ao o te Atua Nui Tumu Tahi. Tāpati 14 no Mäti 2021.

 

Tāpati 14 no Mäti 2021.

Papa Haamori

Ao o te Atua Nui Tumu Tahi.

Färiiraa.

Na te pehepehe i päpaìhia e Turo a RAAPOTO e ärataì ia tätou i roto i te haamoriraa i teie mahana.

 

TE FÄNAURAA O TE AO

E aore i te hahano o te pö uri paò.

E aore i te hohonu o te pö uri taòtaò.

E aore i te uriuri o te reva mute òre.

Aore e mua, aore e muri,

Aore e nià, aore e raro.

Inaha, ua pihaa te toto ùra o Taaroa,

Ua faahei ùra i te aore reva.

Mai te miti ia fati i te aau,

E faahei i te fenua,

Aore rä e roto, aore e vaho.

Ua àrepurepu te pöuri,

E ua tö i te töraa o te ora.

E àroraa nui tei te reva mure òre,

Ua ùraùra te ùra, teatea mai nei te uri,

Maruao aè nei te pö.

Ua rere, ua rara te märamarama,

Ua òteaone i te pöuri,

Moana aè nei te moana,

Fenua aè nei te fenua,

Ua ao.

Haamaitaì tätou i te Atua i te hoê reo himene.

 

Himene.

 

Teie te reo no te päpaì Taramo

Taramo 137

1 I te hiti o te mau pape i Päpuronia ra to mätou pärahiraa i raro, e ua òto iho ra mätou i te manaòraa ia Tiona. 2 I nià i te mau ârope, i rotopü ra, te faauta-raa-hia ta mätou mau tïnura. 3 I reira te feiä i tïtï ai mätou ra i te faaueraa mai i te himene, e te feiä i riro mai ai mätou tei ani i te ârearea, nä ô mai ra: A himene mai na i te hoê himene no Tiona. 4 E aha mätou e tià ai ia himene i te himene a te Fatu i te fenua ê nei? 5 E Ierutarëma, ia moè òe ia ù ra, ia moè atoà i ta ù rima àtau nei to na töroà 6 Ia piri ta ù arero i ta ù vaha nei, ia òre au ia manaò ia òe, ia òre au ia faateitei ia Ierutarëma ei mea òaòa rahi na ù.7 Haamanaò, e te Fatu, i te mau tamarii a Êtoma, o tei parau i te mahana a àti ai Ierutarëma: A täìhitumu na, täìhitumu na, ia ìhipapa hua ia. 8 E te tamahine a Päpuronia faaäno fenua e, e ao to na to të tähoo atu ia òe, mai ta òe i rave mai ia mätou nei. 9 E ao to na to të rave i to na mau ènemi, e ua täìri noa i nià i te mato ra.

Haamaitaì tätou i te Atua i te hoê reo himene.

 

Himene.

 

E faaroo mai tätou i te mau parau i te faaìteraa a te,

2 Parareipomeno 36.14-23

14 Rahi atu ra hoì ta te feiä tahuà rarahi ra hara, e ta te taata atoà, i te mau parau faufau a te êtene; e ua haaviivii i te fare o te Fatu tei haamoàhia e ana i Ierutarëma. 15 Ua tono mai ra te Atua o to rätou mau metua o te Fatu i te veà, aita i tuutuu; no te mea te aroha ra o ia i to na mau taata, e to na iho ra pärahiraa. 16 Ua tähito ra rätou i te mau veà a te Atua, e ua vahavaha i ta na parau, e ua hämani ìno i te mau perofeta nä na e tupu roa aè ra te riri o te Fatu i to na taata, e aita roa aè ra e haapüraa. 17 I tuu mai ai o ia i te arii o te Tarataio, tei täpü noa i te mau taata âpï i te òè i roto i to rätou vähi moà, aore roa i aroha i te taata âpï, e te pötii rii âpï, i te taata paari, e tei piò i raro i te ruhiruhiä: tuu-atoà-hia atu ra i ta na rima. 18 E te mau mea atoà o te fare o te Atua, te mea rahi e te mea rii, e te mau taoà atoà no te fare o te Fatu, e te taoà a te arii, e to te hui raatira atoà, ua hopoi-atoà-hia e ana i Päpurönia. 19 Ua tütuì hoì rätou i te fare o te Atua i te auahi, e ua haapararï i te âua i Ierutarëma; ua tütuì hoì te fare o te hui arii i te auahi, e ua vävähi i te mau taoà maitataì atoà ra. 20 E te feiä i ora i te òè ra, ua hopoi o ia i te reira i Päpurönia; e riro atu ra ei tävini nö na e no ta na mau tamarii e tae roa aè ra i te hau i te pätireia ra i Peretia. 21 Ia tupu te parau a te Fatu i te vaha o Ieremia, ia noaa to taua fenua ra Täpati; te vai pau noa ra hoì, te haapaò ra ä ia i te täpati e hitu àhururaa i te mätahiti. 22 Tae aè ra i te mätahiti mätamua o te arii o Peretia ra o Turo, ia tupu te parau a te Fatu i te vaha o Ieremia i faaäraära atu ai te Fatu i te âau o te arii o Peretia o Turo, ia päpaì i te tahi ture päpaì, e ua faaìte haere e àti noa aè tö na fenua, nä ô atu ra, 23 Te nä ô mai ra te arii o Peretia o Turo, ua höroà mai te Atua no te raì o te Fatu i te mau pätireia atoà o te ao nei; e ua poroì mai ia ù e faatià i te tahi hiero nö na i Ierutarëma, i Iüta ra. O vai to òutou i to na atoà ra taata? Ei ia na to na ra Atua o te Fatu a haere ai o ia i nià ra.

E te Atua no te ora aroha mai, ia mätou te mau taata hara nei. Âmene.

 

Himene Tätarahapa.

 

16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre.

Haamaitaì tätou i te Atua i te hoê reo himene e tià ai.

 

Himene òaòa.

 

Te parau ta Pauro i päpaì i to Èfetia, ua tae atoà mai nei ia tätou nei,

Èfetia 2.4-10

4 O te Atua rä, no te aroha rahi to na, no te hinaaro rahi ta na i hinaaro mai ia tätou nei ra, 5 pohe noa ai ä tätou i te hara ra, faaora aè nei ia tätou mä te Metia atoà i ora òutou i te aroha mau, 6 e ua faatià ia tätou atoà i nià, e ua haapärahi ia tätou atoà i te ao i te Metia ra ia Ietu; 7 ei faaìteraa na na i te mau uì a muri atu, i te rahi hau ê atu o to na ra aroha mau, i ta na hämani-maitaì-raa ia tätou i te Metia ra ia Ietu. 8 I ora hoì òutou i te aroha mau i te faaroo. Eere hoì ia i to òutou iho, e mea horoàhia mai ia e te Atua. 9 Eere i to te òhipa, aita atu ra o te taata nei e teòteòraa. 10 O tätou hoì ta na òhipa i hämanihia i te Metia ra ia Ietu ei rave i te parau maitaì, o tei faaau-ätea-hia tätou e te Atua, e o ta tätou ia e haapaò. Âmene.

Pärahi tätou, haamaitaì tätou i te Atua i te reo himene.

 

Himene.

 

Pure.

Pure tätou i te Atua, i to mätou faarooraa i te mau parau tei papa i to mätou haamoriraa i teie mahana, ua faaìte ia, ia mätou i to Òe hanahana e te Atua Nui Tumu Tahi to Òe hinaaroraa ia òre te taata i faaea noa i roto i te hara, ua aroha mai ra Òe ia mätou, a faarahi mai to mätou faaroo. Âmene.

 

Taiòraa.

Ioane 3.14-21

14 Mai ia Möte i faateitei i te ôfï i te mëtëpara ra, oia atoà te Tämaïti a te taata, e faateitei-atoà-hia ia, 15 ia òre ia pohe te faaroo ia na ra, ia roaa rä te ora-mure-òre. 16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. 17 Aore hoì te Atua i tono mai i ta na Tämaïti i te ao nei e faahapa mai i to te ao, ia ora rä to te ao ia na. 18 Tei faaroo ia na ra, e òre o ia e faahapahia; tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra. 19 Teie taua faahapa ra, o te märamarama ua tae mai i te ao nei, e hinaaro aè nei te taata i te pöuri, aore te märamarama, no te mea te ìno ra ta rätou parau. 20 O tei mau i te parau ìno ra, aore o ia i hinaaro i te märamarama, e òre hoì o ia e haere mai i te märamarama o te ìteä ta na parau. 21 O tei haapaò rä i te parau mau ra, e tae mai ia i te märamarama ia ìteä-maitaì-hia e, te au ra ta na parau i te Atua.

Na te Atua e haamaitaì mai i te täiòraahia i te mau parau i päpaìhia e Ioane no te Parau Maitaì no Tämaïti Fänau Tahi  a te Metua.

 

Pure

Pure tätou i te Atua, ua faaroo mätou i te parau no to òe aroha ia mätou e te Metua Maitaì e, aroha mai, a here mai ia mätou. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene.

Parau Faaära

Himene Püpüraa moni

Pure Ärai.

Pure tätou i te Atua Nui Tumu Tahi,  E te Atua Metua, te ani atu nei mātou ia òe, a tauturu mai ia mātou i te tāmāraa i ta mātou mau hara, e tià atu i mua ia òe ma te tiàmā. Tauturu mai òe to mātou faaroo, ia papahia te reira i nià i te faufaa no te ora, te riro hoì te rahu ei ìte, e ei tāpaò. Ia aa-faahou-hia ta òe parau tei mau-māite-hia mai e te mau tupuna i roto i to mātou mau âau, ia tià faahou ia mātou ia faariro i te rahu ei täuaro no mātou. I teie mahana, eere te rahu noa terā e fifi ra, o mātou atoà rā. Ta mātou peu, te iho, te hīroà tumu e to mātou iho reo, ua riro atoà ia i roto i te ôpape o teie tau hepohepo ; o mātou iho hoì te tumu. Te òaòa nei rā te âau, no te faaroo o te feiā e pātoì noa nei ia òre te turaraa o te taata no Māòhi Nui nei ia taataahihia. E te Atua Metua e, a faariro ia mātou ei mauhaa no te faatupuraa i ta òe ôpuaraa no te ora o teie nūnaa i Māòhi Nui nei, te tuu atoà nei mätou e Atua i te parau no te mau vahine i te mea na to Òe rima iho i hämani no te faaìte te puai o te Aroha e to òe Here, te haamanaò atoà nei ra mätou i te mau vahine tei haamauiuihia, e tei täparahi pohe-roa-hia e ta rätou mau tane e te Atua Metua àita òe i hinaaro i teie huru ao no mätou, te Ao ra ta òe i faatupu no mätou te taata nei e Ao ia no te Hau, a fārii mai i ta mātou pure. Amene.

 

Himene Âmui.

 

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

17 Aore hoì te Atua i tono mai i ta na Tämaïti i te ao nei e faahapa mai i to te ao, ia ora rä to te ao ia na.

Haamaitaìraa.

3 I reira te feiä i tïtï ai mätou ra i te faaueraa mai i te himene, e te feiä i riro mai ai mätou tei ani i te ârearea, nä ô mai ra: A himene mai na i te hoê himene no Tiona. Haere ra ma te hau i te haamaitaì o to Fatu te Metia. Âmene.

 

Teraì òr. Faatura.

 

 

Ruta èv. 19.1-10 Ôroà 05 Mati Färereiraa

 

Faraite 05 no Mati 2021.

Ôroà 05 Mati

Färereiraa

Taiòraa

Taramo 8

1 Na te Mënätehe nä nià i te titita. Taramo na Tävita. 2 E to mätou Atua, e te Fatu, ua teitei to òe iòa e àti noa aè te mau fenua atoà nei. E to òe ra hanahana, ua tuuhia e òe i nià iho i te mau raì ra.3 Nä roto i te vaha o te mau tamarii e te mau àiü, i faatupu na òe i te püai i to mau ènemi ra; ia mämü atu te ènemi e te ono ra. 4 Ia hiò vau i te mau raì i te òhipa a to rima ra, te märama e te mau fetià ta òe i faaau ra: 5 E aha te taata nei i manaò mai ai òe ia na? E ta te taata nei tamaiti i haapaò mai ai òe ia na? 6 I raro iti aè o ia i te mau merahi i te hämani-raa-hia e òe ra, e ua faatoröna òe ia na i te hinuhinu e te tura. 7 Ua faariro òe ia na ei tävana i te mau òhipa a to rima, e ua tuuhia e òe te mau mea atoà nei i raro aè i ta na âvae: 8 te mau mämoe e te mau nana puaatoro atoà, e te mau puaa atoà o te aru ra; 9 te mau manu o te reva; e te ià o te tai, tei nä te èà moana i te haere ra.10 E to mätou Atua, e te Fatu, ua teitei to òe iòa e àti noa aè te mau fenua atoà nei.

Ruta èv. 19.1-10

Ietu e o Tätäio

1 E Tomo atu ra Ietu i Ierito haere atu ra nä roto. 2 E inaha, tei reira te hoê taata o Tätäio te iòa, e taata taoà e e feiä òhi tute rahi hoì. 3 Te hinaaro ra o ia i te hiò ia Ietu ia ìte i te huru; e aita aè ra o ia i ìte, i te rahi o te taata, e taata poto hoì o ia. 4 Horo atu ra o ia nä mua, paìùma atu ra i nià i te hoê tütämino e hiò ia na; te nä reira mai ra hoì o ia i te haere. 5 E tae mai ra Ietu i taua vähi ra, ua hiò aè ra o ia i nià, ìte atu ra ia na, e ua parau atu ra ia na: E Tätäio, a pou mai i tënä na, ei to fare ra hoì au pärahi ai âùanei. 6 Ua pou òiòi mai ra o ia i raro, ìte maitaì mai ra ia na mä te òaòa. 7 E ìte aè ra taua feiä rahi atoà ra, ua ôhumu iho ra, nä ô aè ra: Te haere atu ra o ia ei manihini na te taata rave hara 8 Ua tià noa mai ra Tätäio i mua i te aro o Ietu, nä ô mai ra: Inaha, e te Fatu, e horoà vau i te âfa i ta ù nei taoà na te taata rii, e i hämani ìno na vau i te tahi taata atu i te hoê mea iti aè, ia taìmaha ia ta ù e faahoì atu nana. 9 Ua nä ô aè ra Ietu ia na: Ua tae mai te ora i teie nei fare i teie nei mahana, e tamaiti atoà hoì o ia na Âperahäma. 10 I haere mai nei hoì te Tamaiti a te taata nei e ìmi i tei moè ra e faaora.

Manaò.

Tau mätahiti i teie nei, to te Tumu Nui faatomoraa mai ia tātou i roto i te tau no te hinapaarae. E parau teie no te ôpū tamarii, ia au i ta te mau tupuna Māòhi i ora mai na, mai te tau âuìuì mai. E tau faufaa roa no te mea, i te reira noa tau e hoì ai te uì i te haamata-faahou-raa. E faaâpī te mau mea atoà. E motu te fētii i tāàmuhia e te taura o te toto. Aita hoê òhipa e mau i roto i teie faaâpīraa ärataìhia e te Atua, e te fenua. Tē hinaaro e tē hinaaro òre o te taata, e tupuhia ihoā ta te Tumu Nui. Nō reira, aita atu e mea e anihia i te taata māoti, te tomoraa i roto i taua faaâpīraa ra.

Âreà te Êtārētia, e parau ia no te tahi nūnaa o tei faaroo, e tei tiàturi i te Fatu hōê. O tātou nei rā hoì te nūnaa Māòhi, e nūnaa faaroo roa i te Atua, mai to na haapārahiraa i to tātou hui tupuna i roto i te uru maitaì o Māòhi Nui nei, e tae roa mai i teie mahana. Nō reira, te ìritiraa i te mätahiti Êtārētia, e tano tātou e parau e, o te ùputa tomoraa te reira no te nūnaa mäìtihia e te Atua, oia te nūnaa Māòhi, ia ora hope roa atu i to na Faaroo Māòhi Mau i te Atua ra. E mätahiti âpī mau ā teie no te Atua e to na nūnaa.

I teie mahana e haamanaò ai tätou i teie mahana 05 no Mati i te mau òhipa i rävehia e te mau mitionare Peretane i roto i to tätou nünaa. Tei faaö i te nünaa i roto i te parau no te taiò e te papaì, e ua faatumu i te reo Mäòhi i roto i te mau puta tei parauhia te Pipiria. Te vai atoà nei ra ta tätou i te papaìraa a te fenua e ta na parauraa i te taata e ora nei i Mäòhi Nui nei.

Ia fäì tätou e, o te Atua te fatu o te fenua, te haapäpü ra ia tätou e o te Atua te haamatara e te faahopeàraa o te fenua, e tei ia na anaè te parau e tupu mau ai te maitaì o te i te fenua. Oia mau, e parau päpü teie, no te Atua i fenua ai te fenua. E ôpuaraa no to na hinaaro i ìtehia ai e i vai mai ai te fenua, o ta na i faatupu nä roto i ta na parau mana. No reira, te ìte ra tätou e, aita to te fenua e parau i rapae aè i te Atua. Ahiri aita te Atua i ôpua, àhiri aita o ia i hinaaro, e àhiri aita o ia i parau, aita atoà ia to te fenua e parau. E täamuraa päpü to te fenua i te Atua. Ia faahitihia te parau o te fenua, e faahoì ihoä te reira ia tätou i nià i te parau o te Atua.

Teie te parauraa Ruta Èv i te pene 19, i te ìrava 7 E ìte aè ra taua feiä rahi atoà ra, ua ôhumu iho ra, nä ô aè ra: Te haere atu ra o ia ei manihini na te taata rave hara. Ua ìte o Ietu i te taata eiaha te rave hara, te taata no te Atua e na te Atua, ia parau te taata mai teie te huru, te ìno ra ia na faufaa e toru ta te Atua i tuu i nià i te taata, to na hohoà, to na huru, e to na Värua. Oia hoì e parau faufaa teie no te tauiraa rahi e faatupuhia nei e Ietu, no te tahi pae te hiò nei na roto i te hiòraa au òre e te färii òre.

I roto rä i ta tätou nei taiòraa no teie mahana paieti, te ìte atoà nei tätou i te reira hinaaro i roto ia Tätäio. Aita e òre  ua faaroo e na o ia i te mau òhipa faahiahia tei ravehia e Ietu. E te horo nei o ia na mua, ua paiùma i nià i te hoê tutamino no te hiò ia Ietu. I roto ra i te manaò no te mau taata no Ierito, o Tätäio e taata tei î i te hara i ta rätou hiòraa, i te mea e toröna o ia, e raatira no te feiä òhi tute. Fifi atu ra o ia i te ani noa atu i te feiä e paruru ra ia na ia faanuu ia nahonaho atoà o ia i te hiòraa i te Fatu, e taata poto hoì teie. Na roto ra i to na àravihi ua tià ia na ia ìte. Ore-roa-atu ra  o ia e fatata atu i pïhaìiho, to na ra hinaaro mauti, ia ìte o ia i te huru o teie taata e parauhia nei o Ietu, àti-rä-atu ai. Na roto i teie raveà, ua ìte o ia ia Ietu i te haereraa mai, ma te manaò e ua navaì noa i reira.

Teie rä, e tià roa ia tätou ia parau e, o Ietu iho tei ìte mai ia Tätäio na mua roa. Mai te mea aita o ia i fatata roa atu, ua haafatata mai ra te Fatu, no te haere mai e mä ìmi ia na. Ua manaò noa o Tätäio o o ia anaè teie e ìmi nei. O Ietu i to na pae te ìmi atoà nei, tei moè, tei haamoè, e faaora. Tei ù nei te hoê vahi faufaa roa no ta tätou parau, te färereiraa o Ietu ia Tätäio. Nahea te tupuraa teie färereiraa ? Na roto ia i to raua haafatataraa te tahi i te tahi, o teie anei te òhipa i te taata ia rave e färerei ai i te mau hinaaro o te Atua. Te faaitoito mai nei teie òhipa faahiahia i tupu ia na reira atoà tätou. Oia hoì, te ìmi atoà mai ra te Atua ia tätou, a ìmi atoà tätou i to tätou pae, e na te reira iho taata e faanaho i ta na mau raveà, ua ìte ia tätou i te raveà a Tätäio, e ta tätou e aha ia te raveà ?

Teie färereiraa no Ietu, e o Tätäio, eiaha no te faaàufau i te tute, no te tïtau ra ia Tätäio, e pou mai i te na tumu raau, èi to fare ra hoì au pärahi ai âùanei. Tià mau atu ra te auraa no te iòa o Tätäio, TE ATUA TEI HAAMANAÒ. Ua haamanaò mai te Atua i to na taata tupu no te faahoì i nià i te reni no te Parau Maitaì ia ora.

Àreà te tahi pae, te hiò noa mai ra te mau taata atoà i taìruru mai no te tiaì ia Ietu. E ta rätou tiaìraa, eita ia mai ta Tätäio. E tiaìraa maoro ra, e tiaìraa i te faaora o Ìteraèra. Te hoê Metia o tei haere mai e faahoì faahou ia Ìteraèra i roto i to na tiàmaraa ua oti atu ai. Aita to rätou âau i ineine no te tiaì i te Fatu. Ua tiàturi noa rätou e na rätou e faanaho i te òhipa a te Fatu, na rätou e faaäu i ta na òhipa, na rätou e faaoti i te parau no te mau taata e o i roto i te aroha o te Atua, e tei òre e ö.

Aita rä rätou i haapaò faahou i te tiàmaraa, i te Atua ra no te raveraa i ta na iho òhipa faaora. E tià roa ia parauhia e na rätou e faanaho atu i te òhipa a te Atua.

Ia hiò atu ra rätou ia Ietu, te haere atu ra e farerei ia Tätäio te tupu nei te ìnoìno i roto ia rätou e te mauruüru òre. Te faahapa nei rätou ma te parau e, te haere atu ra o ia èi manihini na te taata rave hara.

Teie te tahi mau manaò uiui, i teie mahana, aita anei tätou e manaò atoà nei mai teie feiä no Ierito, oia hoì te faataaêraa ia tätou i te tahi atu mau taeaè no tätou, e te tiàturi-noa-raa e, o tätou anaè ta te Atua e haere mai nei e färerei. O te faanaho atoà i te hoê tiaìraa mai teie te huru, tupu atu ai te au òre mai teie feiä no Ierito ?

Mai teie atoà nei te huru o te taata POROTETANI ? I roto i te manaòraa eita roa ia, i te mea te horoà nei teie parau i te hoê auraa faahiahia, oia hoì, e ìte no te òhipa hape, e aore ra pätoì i te òhipa hape, ia au i na manaò e piti nei te tumu o te parau, e faaìte i te parau mau. O te òhipa ia i ravehia e Tätäio i mua ia Ietu, te ìteraa o ia i to na hape, ia tià ia Ietu ia faahoì ia na i nià i te èà, no te mau tamarii a te Atua, teie hoì taua mau reo tätarahapa no Tätäio ra i te ìrava 8,

E te Fatu, e horoà vau i te àfa i ta ù nei taoà no te taata rii,  e i hämani-ìno na vau i te tahi taata i te hoê mea ïti aè, ia taìmaha ia ta ù e faahoì atu na na.  

Mai te mea i te tau no te hinapaarae, ua hinaarohia ia hoì faahou te taata i nià i te parau mau, no te mau papaì Moà, e na na aè e ärataì i te taata i te Atua ra. I teie mahana e na roto i teie nei taiòraa, te tïtauhia nei ia tätou ia vaiiho i te Atua ia parau mai ia tätou. E vaiiho i te Atua ia tomo mai i roto ia tätou mai ta na i hinaaro. Aita anei to na mau hinaaro i moèhia ia tätou e aore rä aita anei tätou i haamoè i te reira, a faaroo noa atu ai i to tätou iho.

E mea maitaì ia huru piri rii tätou i te huru o Tätäio, oia hoì te hoê taata tei ìte i to na faufaa òre, to na huru ìno o te hinaaro rä ia ìte ia Ietu. Ma te täpeà i roto ia tätou teie manaò no te tätarahapa e o te reira aè ta tätou parauraa i mua i te Atua. Eita anei.

 

Èi manaò ôpaniraa

Taramo 3, 8 no o mai te ora i te Fatu ra, te vai ra to Òe ra maitaì i nià i to Òe iho ra mau taata.

 

 

 

Teraì or. Faatura.