Ruta èv. 1.1-4, 4.14-21 Papaì, Taiò.

 

Tāpati 23 no Tënuare 2022.

Papaì, Taiò.

Taramo 19

1 Na te Mënätehe. Taramo na Tävita.

2 Te parau hua nei te mau raì i te hanahana o te Atua E te faaìte nei te reva i te òhipa a ta na rima.

3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte.

4 Aore e ôrero, aore e parau, aore to rätou reo i ìteä.

5 Ua tae rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou,

6 o tei haere mai mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa.

7 Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana.

8 Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa.

9 Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia,  e märamarama ai te mata nei.

10 Te mataù i te Fatu e mea viivii òre ia, e tià ia i te vai-mäite-raa. Te faaauraa a te Fatu e parau mau ia, e te mea tià anaè.

11 E taoà hinaaro-rahi-hia ia i to te àuro, i te àuro rahi ra e te maitataì. E momona rahi ia i to te meri i te topataraa no roto i te meriterio.

12 Na te reira hoì i haapii mai i to tävini, e tei te haapaò i te reira te utuà rahi.

13 O vai hoì tei ìte i ta na iho ra mau hara? E tämä mai òe ia ù i ta ù mau hara ìteä-òre-hia nei.

14 E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi.

15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora.

Nehemia 8.1-10

Te Ture.

1 E te taata atoà ra ua haaputuputu tahi mai ra i roto i te aroä i pïhaì iho i te ùputa pape ra; e ua parau atu ra rätou i te päpaì parau ra ia Ètera, e hopoi mai i te puta ture a Möte, ta te Fatu i parau mai ia Ìteraèra ra.

 2 Ua hopoi mai ra te tahuà ra o Ètera i te ture i te aro o taua âmuiraa atoà ra, te täne e te vahine, e te feiä atoà i ìte i te parau ia taiòhia ra, i te mahana hoê i te märama hitu ra.

3 Ua taiò iho ra o ia i taua parau ra i roto i te aroä i mua atu i te ùputa pape ra, mai te poìpoì mai a e avatea noa atu ra, i mua i te aro o te täne e te vahine, e te feiä atoà i ìte ra; faaroo päpü atu ra te tarià o te taata atoà i taua puta ture ra.

4 Te tià noa ra taua päpaì parau ra o Ètera i nià i te hoê tiàraa räau, i hämanihia e rätou no taua taiòraa ra; e tei ta na rima àtau, o Matitia ia te tiàrama, e o Tema, e o Ànaia, e o Ùria, e o Hiritia, e o Maateia; e tei ta na rima àui, o Petaia ia, e o Mitaèra, e o Maretia, e o Hatuma, e o Hatepatana, e o Tëtäria, e o Meturama.

5 Ua heheu aè ra Ètera i taua puta ra i te aro o te taata atoà ra, te teitei ra hoì to na tiàraa i to te taata atoà, e tei te heheuraa o ia i taua puta ra, ua tià anaè mai ra te taata atoà;

6 ua haamaitaì atu ra Êtera i te Atua rahi ra i te Fatu. Ua parau mai ra te taata atoà, mä te hopoi i te rima i nià, Âmene, âmene: ua piò iho ra to rätou upoo i raro, e ua haamori i te Fatu mä te mata i raro i te repo.

7 E o Ietua, e o Pani, e o Terepia, e o Iamina, e o Âtupa, e o Tapetai, e o Hotia, e o Maateia, e o Terita, e o Àtäria, e o Iotapata, e o Hänana, e o Peraia, e te mau âti-Revi; nä rätou i faaìte i te taata i te auraa i taua ture ra: te tià noa ra te taata i to rätou ra tiàraa.

8 Taiò märamarama mäite iho ra rätou i te ture a te Atua, e ua faaìte i te auraa, e ìte aè ra rätou i taua parau i taiòhia ra.

9 Ua parau atu ra te tävana ra o Nehemia, e te tahuà päpaì parau ra o Êtera, e te mau âti-Revi, tei haapii i te mau taata ra, E mahana moà teie nä te Fatu to òutou Atua ra, eiaha e auë, eiaha e òto. Ua òto anaè hoì te taata atoà i te ìteraa i taua parau ture ra.

10 Ua parau atu ra o ia ia rätou, A haere, e àmu i te mäa maitaì, e inu i te pape mäàro, a haapaò atu ai i te tahi tufaa nä te feiä eere ra: e mahana moà hoì teie no to tätou Fatu. Eiaha e òto, o te òaòa rä no ô ia te Fatu ra, to òutou ia maitaì.

1 Tōrīnetia 12.12-30

Hoê tino e te mero e rave rahi

12 Mai te tino hoì hoê nei, e rave rahi to na mero, e te mau mero atoà no taua tino hoê ra, rahi noa ä rätou, hoê ä ia tino, oia atoà hoì te tino o te Metia.

13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra.

14 Eere hoì te tino nei i te mero hoê, e rave rahi rä.

15 Ia parau hoì te âvae e: «Eere au i to te tino, no te mea eere au i te rima», eere mau änei o ia i to te tino i reira?

16 Ia parau hoì te tarià e: «Eere au i to te tino, no te mea eere au i te mata», eere mau änei o ia i to te tino i reira?

17 Ahiri e mata anaè te tino atoà nei, e aha iho ra te faarooraa? Ahiri hoì e faarooraa anaè te tino nei, e aha iho ra te hoìraa?

18 I teie nei rä, ua haamauhia e te Atua te mau mero o te tino nei i ta na vähi hinaaro ra.

19 Ahiri hoì rätou atoà e mero hoê ra, tei hea iho ra te tino i reira?

20 I teie nei rä, e rave rahi te mero, hoê roa rä tino.

21 E òre hoì te mata e tià ia parau i te rima e: «Òre noa atu ä òe ia ù nei «E te upoo hoì ia parau i te âvae e: «Òre noa atu ä òrua ia ù nei »

22 Eiaha atu ä ia, o te mau mero huru paruparu o te tino nei, eita roa atu ia e tià ia òre.

23 E te mau mero o te tino ta tätou e manaò nei e, aore e maitaì reà, te haaàti nei tätou i te reira i te maitaì rahi; e to tätou mau vähi nehenehe òre ra, te hau nei te reira i te nehenehe.

24 To tätou mau vähi nehenehe ra hoì, òre noa atu ia. Ua täàti mäite rä te Atua i te tino atoà, e ua tuu i te maitaì rahi i te vähi i ère ra.

25 Ia òre roa te au òre i te tino nei, ia fäito atoà rä to te mau mero haapaò ia rätou iho.

26 Ia mäuiui te hoê mero ra, e mäuiui atoà te mau mero atoà ra; e ia faateiteihia te hoê mero ra, e òaòa ia te mau mero atoà ra.

27 E teie nei, o te tino òutou no te Metia, e e mero anaè òutou e àti noa aè.

28 E ua tuu hoì te Atua i te âpotetoro i roto i te Ètärëtia, o mua ia, e te piti ra, e perofeta ia, te toru ra, e haapii ia, e te rave täpaò, e te faaora maì, e te tauturu, e te faaìte, e te parau èê.

29 E âpotetoro anaè änei? E perofeta anaè änei? E haapii anaè änei? E rave täpaò anaè änei?

30 Ua ìte päatoà änei i te faaora maì? E parau päatoà änei i te parau èê? E faaìte päatoà änei i te parau èê?

Ruta èv. 1.1-4

Ômuaraa

1 No te mea e rave rahi aè nei tei tämata i te tuatäpapa i te papaa parau i faatupu-mau-hia i roto ia tätou nei, 2 ia rätou i tuu mai ia tätou nei, ta tei ìte mau to rätou mata mai te mätamua mai ä, e e òrometua hoì no taua parau ra i muri aè;

3 o vau atoà hoì, no te mea ua ìteä-päpü-hia e au te mau parau atoà mai te mätamua mai ä, manaò aè nei e mea tià ia päpaì tuatäpapa atu i taua parau ra ia òe na, Teofiro tüiroo;

4 ia ìte päpü òe, e parau mau te mau parau i haapiihia atu ia òe na.

4.14-21

Te haamataraa Ietu i ta na òhipa i Tarirea

(Mät 4,12-17; Mär 1,14-15)

14 Ua hoì mai ra Ietu i Tarirea mä te mana o te Värua, tuì atu ra to na roo e àti noa aè taua fenua ra.

15 Haapii atu ra o ia i roto i to rätou mau tunato, mä te haamaitaì-päatoà-hia.

Aita to Nätareta i tiàturi ia Ietu

(Mät 13,53-58; Mär 6,1-6)

16 E tae mai ra o ia i Nätareta i te vähi i paari ai o ia ra, ua tomo mai ra o ia i roto i te tunato i te täpati, o ta na ä ia peu, e ua tià aè ra i nià e taiò i te parau.

17 Ua tuu mai ra rätou i te puta a te perofeta ra a Ìtaia i ta na rima, e ia hohora aè ra o ia i taua puta ra, ìte iho ra o ia i te vähi i päpaìhia ra:

18 «Tei nià iho ia ù te Värua o te Fatu, o ia i faatähinu mai ia ù ei poro haere i te parau maitaì i te taata rii, ua tono mai o ia ia ù ei faaora i te feiä âau òto, ei poro haere i te ora no te tïtï, e ia hiò faahou te matapö, e ei tuu hoì i te feiä i paruparu,

19 ei poro haere i te mätahiti e ìtehia mai ai e te Fatu ra.»

20 E ôtaro aè ra i taua puta ra, ua tuu atu ra i te tävini ra, pärahi iho ra i raro. Ua tiàtonu mai ra te mata o to te tunato atoà ia na.

21 Ua parau atu ra o ia ia rätou: «Teie nei parau i päpaìhia ta òutou i faaroo iho nei, ua tupu ia i teie nei mahana.

Manaò

I to tätou taiòraa na parau e maha i faanahohia ia au i te taiòraa pipiria no teie mätahiti, te faatoro nei i nià i te papaì e te taiò tei faaìte i tahi huru tupuraa no te mau faanahoraa no te oraraa i taua tau ra. Ua manaò te tahi pae, i haamauhia ai teie mau parau i nià i te hoê àpi parau, ei räveà ia e noaa ai i te faahuruè no te faariroraa teie mau parau mai te tahi òhipa haùti ra te huru. Te papaì te haaputuraa ia no te mau parau tei tupu na èi haamanaòraa i te tau i maìri, i teie tau, e no te mau tau e a muri atu. Te taiòraa o te haapäpüraa ia i te huru oraraa i tupu na i te mau tau i maìri, i teie tau e no te mau tau e a muri atu. Ta tätou o te tätau ia e tätauhia i nià i te tino o te tane te faanahoraa o te reva, te ruì no te faaàpu no te täutai, no te fänau e no te oraraa vaamataeinaa, e te paparaa tupuna tei faanaho i te ture fenua, na roto i te anaunau. Te anaunau te faaineineraa i te àmu e aore ra no te ài i te parau i reira noa e tupu ai te òhipa i manaòhia ia tià ia au i te faanahoraa i ôpuahia. Ia faaroo tätou i te haapotoraa no na taiòraa e maha teie to na faanahoraa :

-Taramo 19, 15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora.

-Nehemia 8 ; 8 Taiò märamarama mäite iho ra rätou i te ture a te Atua, e ua faaìte i te auraa, e ìte aè ra rätou i taua parau i taiòhia ra.

-1 Tōrīnetia 12, 24 To tätou mau vähi nehenehe ra hoì, òre noa atu ia. Ua täàti mäite rä te Atua i te tino atoà, e ua tuu i te maitaì rahi i te vähi i ère ra.

-Ruta èv. 4, 18 «Tei nià iho ia ù te Värua o te Fatu, o ia i faatähinu mai ia ù ei poro haere i te parau maitaì i te taata rii, ua tono mai o ia ia ù ei faaora i te feiä âau òto, ei poro haere i te ora no te tïtï, e ia hiò faahou te matapö, e ei tuu hoì i te feiä i paruparu,

Te taata i rave i te hape, e ìmi o ia i te räveà haamoè ia na, ia òre o ia ia roaa i ta na iho parau ; âreà te parau, te ìmi noa ra ia i te räveà ia noaa teie taata e ia hapa iho i ta na parau. Mea nä reira te taata i te faaìteraa i to na paari, i te ìmiraa i te vähi paruparu o te parau, ia òre o ia ia haafifihia. Te ìte noa ra tätou i roto i teie peu, eere te parau tià te mea e tïtauhia ra, te upootiàraa rä te manaò taata i nià i te tahi faanahoraa ta na iho i haamau. I roto i te reira tautooraa ta te taata, aita te haavare e te mau räveà piò i ätea roa atu i te parau tià òre. No te mea e rave rahi aè nei tei tämata i te tuatäpapa i te papaa parau i faatupu-mau-hia i roto ia tätou nei, o tätou nei ra i faaroo i teie mau parau no te haapäpü ia i to tätou tiàraa taata faaroo ia au i te mau faanahoraa a te Metia. Te mea ia i päpaìhia ia Teofiro e ia tätou i teie mahana, i teie parau e, 4 ia ìte päpü òe, e parau mau te mau parau i haapiihia atu ia òe na, i te mea te vai ra te ora, te ora ra to te taata ia märamarama. Te haamataraa Ietu i ta na òhipa i Tarirea mä te mana o te Värua, tuì atu ra to na roo e àti noa aè taua fenua ra. Haapii i roto i to rätou mau tunato, mä te haamaitaì-päatoà-hia. Aita ra to Nätareta i tiàturi ia Ietu i te vähi i paari ai o ia ra, ua tomo mai ra o ia i roto i te tunato i te täpati, o ta na ä ia peu, e ua tià aè ra i nià e taiò i te parau. Te puta a te perofeta ra a Ìtaia i tuuhia mai i ta na rima, e ia hohora aè ra o ia i taua puta ra, ìte iho ra o ia i te vähi i päpaìhia ra: 18 «Tei nià iho ia ù te Värua o te Fatu, o ia i faatähinu mai ia ù ei poro haere i te parau maitaì i te taata rii, ua tono mai o ia ia ù ei faaora i te feiä âau òto, ei poro haere i te ora no te tïtï, e ia hiò faahou te matapö, e ei tuu hoì i te feiä i paruparu, ei poro haere i te mätahiti e ìtehia mai ai e te Fatu ra.» E ôtaro aè ra i taua puta ra, ua tuu atu ra i te tävini ra, pärahi iho ra i raro. Ua tiàtonu mai ra te mata o to te tunato atoà ia na. Ua parau atu ra o ia ia rätou: «Teie nei parau i päpaìhia ta òutou i faaroo iho nei, ua tupu ia i teie nei. Oia mau i roto i teie reo no Ietu e täpura òhipa teie e tuuhia mai nei i mua ia tätou :

-Poro haere i te parau maitaì i te taata rii

-Ua tono mai o ia ia ù ei faaora i te feiä âau òto

-Poro haere i te ora no te tïtï

-E ia hiò faahou te matapö

-Tuu hoì i te feiä i paruparu

-Poro haere i te mätahiti e ìtehia mai ai e te Fatu ra

Te manaò tumu i roto i teie parau ia riro ia mai te hoê ture, o te tahi ia mau arataìraa manaò e faanaho ai te oraraa âmui o te taata, tei ìtehia e tei färiihia e te täatoà, te mea atoà te reira e horoà i to na püai e to na mana. Te auraa, te maitaì o teie täpura òhipa, aita to roto i te mau faanahoraa ta na e faataa ra, tei roto rä i te mea ta na e tïtau ra, oia te oraraa maitaì, te òaòa, e te hau no te täatoà. Ta na räveà, te faahaparaa ia na iho ia òre teie taata ia auraro i ta na iho faanaho ta na i haamau, no te mea te taòto rii noa ra i roto i te taata atoà te manaò täviri i ta na iho faanahoraa. Mai te mea e faariro teie mau faanahoraa i te ture te tanoraa mau, no te täatoà te ture, e eita te ture e mäìti i te huru o te taata. Mai te peu rä te ìmi noa nei te taata i te räveà ruriraa i te ture, te ìte-atoà-hia nei te feiä i tiàturihia e, na rätou e ara i te haapaò-mäite-raahia te ture, i te täpöraa i te mata i mua i te hara a te feiä taoà, te feiä teitei, âreà te taata rii ra, aita ia e hapa rii iho tei òre i huaìhia i mua i te mata o te taata atoà, ia riro ei hiòraa. Te mea ia te Atua i faaära ai e : Eiaha òe e rave i te taoà täparu, e pö te mata o te feiä mata àra i te taoà täparu, e e piò ê te parau a te feiä parau tià i te reira (Etoto 23, 8). Te auraa, eiaha òe e ìmi i to òe maitaì i nià i te tua o te taata. Te ture ta te manaò e parau nei, aita e faanahoraa, aita e faaheporaa e tïtau ra i te taata ia haapaò i te tahi mea, aita hoì e faautuàraa e tiaì ra i te taime e hapa ai te taata, tei nià aè o na i te mau parau atoà i päpaìhia, e eere hoì no te mea i päpaìhia i mana ai. E roaa ia na te ìte i te reira, ia hiòpoà mäite o ia i te mau mea e haaàti ra ia na. Rave na tätou i te parau o te aru, e parau tumu na tätou te fäìraa e, nä roto i te fenua, te haapii noa nei te Atua i te taata i te ora, oia hoì te mea maitaì no to na oraraa. Teie te tahi hiòraa no te tupuraa o te reira parau : ua tanu te tahi taata i te meià, e ua hiòpoà o ia e, i te tahi taime, aita ä ta na mäa i paari, te marua iho nei te tari i nià i te repo. Ua taui o ia i te pö tänuraa, i te pae hopeà, ua päpü to na manaò e, ia tanu o ia i ta na mäa i terä aore ra terä pö, terä te òhipa e tupu. E faariro o ia i te mea ta na i ìte ei ture, aore ra ei haapiiraa tumu na na, ei arataì ia na i roto i ta na òhipa. Te tahi atu taata, nä roto atoà i te hiòpoà-mäite-raa i te oraraa, ua noaa ia na te faatüàti i te toparaa te tötara e te maröraa te vavai. E faariro atoà no te taata i märamarama e i färii, te ìte ra tätou i ô nei i te maitaì o te haapiiraa a te fenua i te taata, i te arataìraa ia na i roto i te ìteraa i te mea maitaì. Aita tätou e haafaufaa òre nei i te itoito e te püai o te taata, ia tae rä te taata i te ìteraa e te färiiraa i te tauturu a te fenua ei tumu rahi no te mau maitaì ta na e fänaò noa nei, e ia faariro hoì i te reira ei taìara no na, aita atu mea e tupu mai i roto i to na âau maoti rä, te mauruüru e te mehara. E hinaaro no te Atua ia ìte te taata i te òaòa, te maitaì, e te hau ; aita o reira hapa. Mea maitaì te taata ia ìte e, e tuhaa ta na i roto i te noaaraa ia na, aore ra te èreraa o ia i te mau maitaì ta na e hinaaro ra. Haamanaò noa atoà rä tätou e, te maitaì, eere ia i te parau no te taata hoê noa, e aita hoì te reira i täôtiàhia i nià i te rahi, aore ra te iti te taoà i noaa i te tahi taata i te haaputu. Ia nä reira tätou i te hiò, e rahi aè ihoä ia te taoà e noaa i te taata püai e te tino päutuutu, i te taata paari, te paruparu, e te räveà òre. I te reira vähi, teie ta te reo e haapii mai nei : te taata tei hope to na ìte i to na reo i nià i te taò hoê, e veve rahi riàrià to te reira taata. Te huru ia o te taata tei hope to na ìte i te reo i nià i te taò : vau, mai te haapeàpeà òre to na manaò i te ìteraa e, te vai atoà ra te òe, te na, te òrua, te räua, te rätou, e te vai noa atu ra. Inaha te reo, te taura täamu ia i te taata, ia haafaufaa vau i te reo, eiaha te tahi àpaapa to te reo, te reo rä i roto i to na âanoraa, to na teiteiraa, e to na hohonuraa, te mea te reira e haapiihia. Teie te reo o Nehemia, 8 Taiò märamarama mäite iho ra rätou i te ture a te Atua, e ua faaìte i te auraa, e ìte aè ra rätou i taua parau i taiòhia ra.

 

Teraì òr. Faatura.

 

 

Ioane 2.1-12. Here i te Fenua.

 

Tāpati 16 no Tënuare 2022.

Here i te Fenua.

Taramo 96

(Hiò Taramo 105; 106; 1 Parareipomeno 16.23-33)

1 E himene i te Fatu i te himene âpï, e himene i te Fatu, e te mau fenua atoà nei.

2 E himene i te Fatu, e haamaitaì i to na iòa, e faaìte i te ora na na eiaha ei mahana tuua.

3 E faaìte i to na hanahana i roto i te mau êtene, e ta na ra mau òhipa taa ê i roto i te taata atoà ra.

4 E rahi hoì te Fatu, e ia rahi hoì te haamaitaì ia na e ia rahi hoì to na mataù-raa-hia i te mau atua atoà ra.

5 Te mau atua atoà o te mau êtene, îtoro faufaa òre ia, âreà o te Fatu na na i hämani i te mau raì ra.

6 Te tura e te mana tei mua i ta na aro.

Te püai e te nehenehe tei to na ra ia vähi moà.

7 Hö atu i te Fatu, e te mau fëtii o te taata atoà nei, hö atu i te Fatu i te hanahana e te püai.

8 Hö atu i te Fatu i te hanahana e au i to na ra iòa, ei ö te hopoi mai ia tomo i to na ra mau hëtere.

9 E haamori i te Fatu mä te tura moà ra, ia rürütaina òutou ia na, e te fenua atoà ra.

10 A parau na i rotopü i te mau nünaa e: «O te Fatu te arii, e haamauhia te fenua e òre roa e âueue.

Te haavä nei hoì o ia i te mau taata mä te parau tià.»

11 Ia reàreà te mau raì ra, e ia òaòa te fenua, ia haruru te tai e to na îraa atoà ra.

12 Ia ôuàuà te mau ô e to roto atoà ra. E ia himene hua mai te mau räau o te vähi ururäau ra

13 i te aro o te Fatu, te haere mai ra hoì o ia, te haere mai ra o ia e haavä i te fenua. E haavä o ia i te ao nei mä te parau tià, e te mau taata atoà ra mä te parau mau.

Ìtaia 62.1-5

To te perofeta hinaaro rahi ia tupu te ètärëtia.

1 No Tiona nei i òre ai au e mämü noa ai; e no Ierutarëma nei i òre ai au e pärahi noa ai; e ia püroro atu ta na parau tià mai te märamarama rahi; e te ora nä na, mai te rama e ura ra.

2 E ìte te mau fenua i te parau tià na òe ra; e te mau arii atoà i to òe ra hanahana: e maìrihia òe i te tahi iòa âpï, na te vaha o te Fatu e maìri i nià ia òe ra.

3 E riro hoì òe ei toröna ùnaùna i te rima o te Fatu; ei hei arii i te rima o to Atua ra.

4 E òre òe e parau-faahou-hia atu, E tei faaruèhia e, e òre hoì to fenua e parau-faahou-hia, E tei ano e, e parauhia rä òe e, E te mea hinaarohia e au e, e to fenua, Te fenua faaïpoïpohia: nä te Fatu hoì e au atu ia òe, e e faaïpoïpohia to fenua.

5 Mai te taata âpï e faaipoipo i te päretënia nei, e faaipoipo atoà to tamarii tamäroa ra ia òe; e mai te täne âpï e òaòa i ta na vahine; e òaòa atoà to Atua ra ia òe.

1 Tōrīnetia 12.4-11

4 E rave rahi te huru o te mau mea i horoàhia, hoê rä Värua.

5 E rave rahi ä hoì te töroà, hoê rä Fatu.

6 E rave rahi ä hoì te òhipa, hoê rä Atua e òhipa i te mau mea atoà i roto i te taata atoà.

7 Ua horoàhia ta te Värua faaìte i te taata atoà, ia maitaì päatoà.

8 I horoàhia mai te parau paari e te Värua, i te hoê ra; e i horoàhia mai e taua Värua ra te parau e noaa ai te ìte, i te hoê.

9 Ta te tahi ra, o te faaroo ia, na taua Värua ra; ta te tahi ra, o te ìte ia i te faaora maì na taua Värua ra.

10 Ta te tahi ra, o te rave täpaò ia; ta te tahi ra, o te tohu ia; ta te tahi ra, o te ìte värua ia; ta te tahi ra, o te parau èê ia; ta te tahi ra, o te faaìte parau èê ia.

11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

Ioane 2.1-12.

Te pape i faarirohia ei uaina

1 E ruì toru aè ra, e faaipoiporaa tei Tana i Tarirea ra, i reira atoà te metua vahine o Ietu.

2 E parauhia mai ra Ietu e ta na mau pipi atoà e haere i taua faaipoiporaa ra.

3 E pau aè ra te uaina, ua parau mai ra te metua vahine o Ietu ia na iho: «Aita a rätou uaina.

4 Ua parau atu ra Ietu ia na: «E aha ta òe ia ù nei, e teie nei vahine? Aore ä i tae i to ù ra hora.

5 Ua parau atu ra ta na metua vahine i te mau tävini: «Ta na e faaue mai ia òutou na, e nä reira òutou.

6 Te vai ra nä hue pape ôfaì e ono, e piti pato e ö i te hue hoê, e e toru hoì, i vaiihohia i reira no te peu o te tämäraa a te âti-Iüta.

7 Ua parau atu ra Ietu ia rätou: «A faaî na i te mau hue i te pape. Ua faaî iho ra rätou, e tae roa aè ra i te àuvaha.

8 Ua parau atu ra o ia ia rätou: «A faatahe na, e hopoi atu i te tävana o te ôroà nei ra. Ua hopoi atu ra hoì rätou.

9 E ia tämata iho ra te tävana o te ôroà i taua pape i faarirohia ei uaina ra, no te mea aore o ia i ìte i te noaaraa mai (âreà te mau tävini i faatahe mai i taua pape ra, ua ìte ia), ua parau atu ra te tävana i taua täne âpï ra,

10 nä ô atu ra: «O te uaina maitaì ta te taata atoà e tuu mai i te mätamua ra, e ia inu te taata e ia rahi, ei reira te mea ìno aè, vaiiho iho nei rä òe i te uaina maitaì, e i teie nei i hopoihia mai ai.

11 I Tana i Tarirea i te raveraa Ietu i teie nei täpaò mätamua, i te faaìteraa i to na hanahana, e ua faaroo aè ra ta na mau pipi ia na.

12 E i muri aè i te reira, haere atu ra o ia i Taperenaumi, o ia, e ta na metua vahine, e ta na vaitaeaè, e ta na mau pipi. Aita reà rä o rätou puè mahana i reira.

Manaò.

Ia ora na i to tätou färereiraa na roto i te mau parau no teie mau taiòraa i haapaòhia no tätou i teie mahana, te faaìte noa mai ra te reira i te faufaa no te puai o te mau taata faaroo i te tau e te hora i päpaìhia ai teie mau parau no te tuatua o teie nünaa. Tei tiàturi i te ärataìraa a te Atua Nui Tumu Tahi, ma te pärahi faataata noa i pïhaì i te mau faaueraa ta te värua o te fenua e haafänaò-noa ra ia noaa te ora ma te himene i te Fatu i te mau himene âpï, e ia himene te mau fenua ma te faaìte i te ora eiaha e mahana tuua. Ia ìtehia te hanahana i roto i te mau nünaa atoà, e ta na ra mau òhipa taa ê i roto i te mau taata atoà ta te värua o te fenua e aupuru noa ra. E ìtehia te hanahana o te Atua nui Tumu Tahi i roto i te mau atua atoà ra o te mau nünaa, i te mau îtoro faufaa òre, âreà o te Atua Nui Tumu Tahi na na i hämani i te mau raì e te mau tiàrama, te tane e te vahine. Te tura e te mana tei mua i ta na aro te püai ia te reira e te nehenehe tei to na ra ia vähi moà. Te Atua Nui Tumu Tahi te mau fëtii o te taata atoà nei, to na  hanahana e te püai, e au i to na ra iòa, ei ö te hopoi mai ia tomo i to na ra mau fare. E haamori i te Atua Nui Tumu Tahi mä te tura moà ra, ia rürütaina te mau nünaa ia na, e te fenua atoà ra. Te huru ia no teie mau parau e färereihia nei e tätou, teie atu ra te tahi mau parau e tià ia faatumuhia :

-Taramo 96, 10 A parau na i rotopü i te mau nünaa e: «O te Fatu te arii, e haamauhia te fenua e òre roa e âueue.

-Ìtaia 62, 4 E òre òe e parau-faahou-hia atu, E tei faaruèhia e, e òre hoì to fenua e parau-faahou-hia, E tei ano e, e parauhia rä òe e, E te mea hinaarohia e au e, e to fenua, Te fenua faaïpoïpohia: nä te Fatu hoì e au atu ia òe, e e faaïpoïpohia to fenua.

-1 Tōrīnetia 12, 11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

-Ioane 2, 4 Ua parau atu ra Ietu ia na: «E aha ta òe ia ù nei, e teie nei vahine? Aore ä i tae i to ù ra hora.

Te parau tumu e tià ia àparauhia teie ia, Faaïpoïpohia i te fenua, parau tumu i roto i teie taò e ïpo, e here to na auraa, ïpoïpo, e piti tau taata teie tei täamu i to raua here, oia atoà te tamarii i roto i te ôpu o te metua vahine te taura pito e höroà ra i te ora i roto i te àiü, i te taime e täpuhia ai teie taura e tänuhia te pü fenua i roto i te fenua no te faaìte i te here o te fenua.

E here te Atua ; ua hämani te Atua i te taata i to na huru e to na hohoà. Te tanoraa mau, ua tuu te Atua i teie taura ta tätou e parau nei e, here, i roto i te taata, e te täamu ra hoì te reira taura i te taata te tahi i te tahi, e te taata hoì i te Atua. No reira, ia ani te Atua i te taata ia here i te täuaro, te hinaaro ra o ia ia faaìte te taata e, te vai maitaì noa ra te reira taura, e taura ora, e e haru te fifi o te taata i nià i to na âau, oia hoì e faahaùti teie taura i te âau o te taata, aore ra e faaea maröia no o ia. Mai te mau mea ora atoà rä, e tuhaa na te taata te äraraa i to na tupu-maitaì-raa, te pärururaa, te àtuàturaa, te faaàmuraa ia na i te mäa. E ia ui hoì tätou e, e aha ia ta na mäa. Pähonoraa : te here iho. No reira to tätou mau metua i tuö ai i te taata i nä mua iho i to rätou fare ia haere mai e tämäa, no te mea eere te mea maitaì ia vai iho noa i te taata mai te òre e haapaòhia atu. E ta rätou hoì i rave, no te mea ua ìte rätou e, te faufaa te reira ta te Atua i horoà na rätou, no te haapii ia i te tamarii nä hea ia àtuàtu, nä hea ia poihere, nä hea teie faufaa e vai oraora noa ai i roto i te âau o te taata. Mai te tahi auahi të hinaaro ia tämaumau-noa-hia, ia tähirihia, ia tuu-noa-hia te vahie âpï, e ia ìritihia mai te rehu, oia atoà te here. Ia rahi te rehu o te täuà òre, te nounou, e te haapaò noa ia na anaè, e òiòi roa teie auahi i te pohe. E piti parau ta te Mäòhi no te taata tei marö, aore ra tei pohe teie taura i roto ia na : maröia, e te rahutarià. I roto i te maröia te vai ra teie parau no te marö tei haamanaò mai e, aita e ora faahou to roto i teie taura, mai te more marö ra te huru i te ètaèta. No te türama i te manaò e horoàhia ra e te rahutarià, e rave mai tätou nä mua i te tahi taò ê atu. Te hereraa i te fenua. Tahi atoà teie ùputa no te here, oia te èà e tae ai te taata i roto i te ìteraa i to na täamuraa i nià i te Atua. I te ômuaraa ihoä o te parau o te taata, te haamata-atoà-raa te parau o te fenua. Tei roto ihoä ia te tamarii i te ôpü o to na metua vahine, te vähi noa rä i räpae atu nei, oia

te püòhu, te vähi ìtehia e te mata, âreà te tamarii, tei roto ia i te tahi vähi moè e te ìte-òre-hia e te mata taata, i roto roa i te pü o te fenua, ta tätou e haapoto noa nei i te parauraa e, te püfenua. Te tumu ia te päpaì taramo i ârue ai i te Atua no te maitaì hau ê o ta na òhipa i rave : 10 A parau na i rotopü i te mau nünaa e: «O te Fatu te arii, e haamauhia te fenua e òre roa e âueue. No te mea te Atua iho o te here teie e òhipa nei i roto i te taata, e òre ai e tià i te taata, te metua vahine ihoä rä, ia òre ia faatura i te òhipa a te Atua, i te faariroraa i to na ôpü ei mataìtaìraa na te taata atoà. Eere te here i te tahi mea e tuuhia i mua i te mata o te taata atoà, mai te àhu e tauaìhia i te vähi haereraa taata, riro noa ai ei àhu mä, te vai ra rä i roto i te here mau te hunahuna e te haamoèmoè ia na iho. E hinaaro änei teie mau metua vahine ia riro atu ta rätou mau tamarii a muri aè mai te taiàta ra te huru i te òreraa e haamä i te faaìteìte i to rätou tino i mua i te mata o te taata atoà, ia faahinaarohia mai rätou e ia riro atu ei haamäharaa i to rätou mau hinaaro. I ô-nei-raa te metua vahine ua haamata i te faaìte i to na here i ta na tama nä roto i te pärururaa i to na ôpü i te mata e te vaha o te taata. I to na nä-reira-raa, te faaìte atoà ra o ia i to na here i te Atua e òhipa ra i roto ia na. Te faatura òre o te metua vahine i to na ôpü, to na atoà ia faatura òre i ta na tamarii, e to na hoì faatura òre i te Atua. E tupu mai änei te here no roto i te faatura òre, inaha te faatura, te here ia, te faaroo, e te haapaò. Ia maìri te tahi o teie nä mea nei, e topa te toeà. I parau ai te Mäòhi i te fenua e, to na ia metua vahine, eere te tahi noa hohoà ta na e faaòhipa ra, te tahi huru hämaniraa parau e faarooroohia i roto i te feiä paari, no te mea rä, te ìte mau ra o ia i roto i te fenua, i to na metua vahine, oia te tumu o to na parau. No te hui taata o teie mahana, e huru parauraa noa paha teie ta rätou e òre e haapeàpeà rahi roa nei i te manaò i te ìmiraa i te auraa mau, no te mau metua rä na rätou teie parau i faaherehere mai, mai ia tätou e parau nei e, e ùru ra, e ùru ia, mai te reira atoà no rätou teie parau mau no te fenua ei metua vahine. Ia fänau mai teie tamarii, te faahoìhia nei to na püfenua i roto i te pü o te fenua, e te pito i täamu na ia na i to na metua vahine, ua tänuhia i roto i te fenua, aore ra ua âfaìhia i roto i te ava, aore ra i tua, òroihia i roto i te tahi àpu päòa, tuuhia atu ai i roto i te miti, ei haamanaòraa e, no roto atoà mai te tamarii i te vai i te püraa mai i roto i te ora. Te auraa, ua püpühia te tamarii i roto i te here metua o te fenua, e no te mea te ora ta te fenua e horoà noa nei, te täpaò ia no te aroha e te here o te Atua i te taata, te riro ra teie püpüraa i te tamarii i roto i te rima o te fenua, mai te tahi atoà püpüraa i te tamarii i roto i te here metua o te Atua, te Tumu o to na ora. Ia faaroo tätou i teie reo no Ietu, 4 Ua parau atu ra Ietu ia na: «E aha ta òe ia ù nei, e teie nei vahine? Aore ä i tae i to ù ra hora. No te haapäpü ia e ua tupu te hinaaro o te Metua i te ao nei i te parau no te here, te hora e parauhia nei e Ietu, e taime ia e ìtehia ai te hanahana Metua i te mau vahi atoà ia òre ia maröia te taura o te here. O vai teie na tamarii i täatihia, o vai te Fatu o te ôroà, te mea päpü i roto i teie parau, te metua vahine, te mau pipi, te vaitaeaè, O Ietu na Ietu i faatupu te hanahana o te Metua i te faaueraa a te metua vahine, ia tupu te here fenua.

 

Teraì òr. Faatura.  

Ruta èv. 3.15-22. Ùputa.

 

Tāpati 9 no Tënuare 2022.

Ùputa.

Taramo 104

Hämanihia

1 E haamaitaì i te Fatu, e ta ù värua, E ta ù Atua, e te Fatu, òe tei rahi roa Ua vehihia òe i te hanahana e te mana,

2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru;

3 i te vauvauraa i to na ra mau piha i te pape  E te raveraa i te mau ata ei pereoo no na,  i te hahaereraa nä nià i te pererau ra o te mataì,

4 i te faariroraa i te mau merahi no na mai te mataì ra, e te mau tävini no na mai te auahi ura ra.

5 Na òe i haamau i te tumu o te fenua, ia òre roa ia âueue.

6 Ua täpoì hoì òe ia na i te àputo, mai te àhu ra, te teitei ra te pape i te mau mouà.

7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere.

8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra.

9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua.

10 Ua tuu mai o ia i te pape pihaa ei vai matätia, o tei tahe haere nä roto i te ärea o te mau mouà ra:

11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai.

12 I pïhaì iho te mau manu o te reva i te pärahiraa o tei òto i roto i te mau âmaa rii.

13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

14 Te faatupu nei o ia i te àihere na te mau puaa, e te räau rii na te taata. E te roaa nei te mäa ia na no roto i te fenua:

15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

16 Te mau räau a te Fatu ra, ua paari ia, te mau âreti i Repanona ra, ta na i tanu ra,

17 e tei ôfaahia e te mau manu ra. Te mau peruti ra to te hetite ra ùtuafare.

18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana.

19 Ua hämani o ia i te märama no te mau tau i haapaòhia ra, ua ìte hoì te mahana i to na maìriraa.

20 Na òe i hopoi mai i te pöuri, e ua ruì iho ra, ei reira te mau taehae o te ururäau ra e haere ai,

21 te mau riona âpï i te ûâ-haere-raa i te mäa, i te ìmiraa i te mäa i te Atua ra.

22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo.

23 Ua haere iho ra te taata i te òhipa na na, ta na i rave ra, e ahiahi atu.

24 Aita te huru rau o ta òe ra òhipa, e te Fatu. E mau räveà paari anaè ä ta òe. Ua î te fenua nei i ta òe ra taoà.

25 E tënä na hoì miti rahi e te âano, tei reira te mau mea e nee haere, eita e hope ia taiò: te mau mea rii ra e te mea rarahi atoà ra.

26 Tei reira te mau pahï i te tere-haere-raa;  tei reira te Reviatana ta òe i hämani i te haùti haereà.

27 Te tiaì anaè ra te reira ia òe ra, ia noaa ta rätou mäa i te taime mau ra.

28 O ta òe i horoà ra, o ta rätou ia i rave;  ua heheu òe i to rima ra, ua îî anaè ia rätou i te maitaì.

29 Ua püroù òe i to mata ra, e àti ia to rätou. Ua rave mai òe i to rätou aho, ua pohe ia rätou, e ua hoì faahou i to rätou ra repo.

30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

31 E vai ä te hanahana o te Fatu e a muri noa atu.

Te òaòa nei te Fatu i ta na iho ra òhipa.

32 Ua hiò anaè o ia i te fenua, ua rürü ia; ua faatiàià anaè o ia i te mau mouà ra, ua pee te auahi i nià.

33 Te ora nei au ra, e himene ä vau i te Fatu; te vai nei au ra, e himene au ei haamaitaì i ta ù Atua.

34 E mauruüru ä to ù manaòraa ia na; e òaòa hoì au i te Fatu.

35 Te feiä rave hara ra, e mou ia i te fenua nei; e te feiä parau ìno ra, e òre roa ia.

E haamaitaì i te Fatu, e ta ù värua e. Hareruia.

Ìtaia 40.1-11

Ùnaùna

Te èvaneria i haapiihia e Ioane päpetito ra.

1 E haamähanahana òutou, e haamähanahana i to ù ra mau taata, të nä reira mai ra to òutou Atua.

2 E faaitoito atu òutou ia Ierutarëma, e parau hua atu òutou ia na, ua hope to na tau maì; e ua färiihia te täraèhara i ta na hara; ua noaa hoì ia na i te rima o te Fatu te pohe au rahi roa i ta na ra mau hara.

3 Te pii mai ra te hoê reo i te mëtëpara; a faanehenehe na i te èà o te Fatu, e e faatïtïàifaro na i te fenua marô i te haereà o to òutou Atua.

4 E faaîihia te mau peho, e faahaèhaahia te mouà e te mau âivi; faatïtïàifarohia te piò, e te mau vähi puupuu ra, e faarirohia ia ei vähi päpü;

5 e faaìtehia mai te hanahana o te Fatu, e ìte paatoà te taata i te ora a te Atua: o te vaha hoì o te Fatu tei parau mai.

6 Te nä ô mai ra te hoê reo, A faaìte. Ua parau atu ra vau, E aha tä ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei:

7 te mäehe noa nei te àihere, te mäheahea nei te tiare, ia farara mai te mataì no i te Fatu i nià iho ra: e àihere mau ä te taata nei.

8 Te mäehe nei te àihere, te mäheahea nei te tiare; âreà te parau a to tätou Atua, e tià ia i te vai-mäite-raa.

9 A paiùma i nià i te mouà teitei, e tei hopoi mai i te parau maitaì i Tiona nei; a faateitei na i to reo mä te ûàna, o te hopoi mai i te parau maitaì i Ierutarëma nei. A faateitei na; eiaha e mataù; a parau atu i te mau ôire o Iüta, A hiò na i to òutou Atua.

10 Inaha, te haere mai ra te Fatu ra o te Fatu mä te püai, e nä tö na iho rima e faatupu i tä na. Inaha, tei ia na iho te utuà tä na e hopoi, e te hoo tä na e höroà ra, tei mua ia i ta na aro.

11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.  

Tito 2.11-14

Tämä

11 O te aroha mau o te Atua e ora ai te taata atoà ra, ua ìteä mai nei ia,

12 i te faaìteraa mai ia tätou e, e haapae tätou i te paieti òre, e te hinaaro i teie nei ao, e ia pärahi tätou mä te haapaò maitaì, e te parau tià, e te paieti, i teie nei ao;

13 i te hiòraa atu i taua maitaì e tiaìhia nei, oia te färaa hanahana mai o te Atua rahi ra o to tätou Ora o Ietu Metia,

14 o tei horoà ia na iho no tätou, ia ora tätou ia na i te mau parau ìno atoà ra, ia tämä o ia ia tätou ei taata mau no na iho, e te itoito i te mau òhipa maitataì ra.

3.4-7.

4 Ia ìteä mai nei rä te hämani maitaì e te aroha o to tätou Ora o te Atua i te taata nei;

5 ua faaora o ia ia tätou, eiaha no te parau tià i ravehia e tätou nei, no to na ra aroha, i te fänauraa âpï, e te faahouraa a te Värua Maitaì ra;

6 o ta na i ninii hua mai i nià ia tätou no to tätou Ora no Ietu Metia ra;

7 ia riro tätou i tiàhia nei e to na ra aroha mau, ei feiä tufaa i tei tiaìhia ra, i te ora mure òre.

Ruta èv. 3.15-22.

Mauruüru

15 Te fatimaùu noa ra te taata atoà ia Ioane, te feruri anaè ra te taata i roto i to rätou âau, e e riro paha o ia i te Metia.

16 Ua parau atu ra Ioane ia rätou atoà, nä ô atu ra: «Te päpetito nei ä hoì au ia òutou i te pape, te haere mai na rä te tahi e mana rahi to na i to ù, e òre ia vau e au ia tätara i te täpeà i ta na tämaa: na na e päpetito ia òutou i te Värua Maitaì e te auahi.

17 Tei to na rima ta na tähiri, e tämä mäite o ia i ta na papaìraa tïtona, e haaputu o ia i te tïtona i roto i ta na vairaa tïtona, âreà te ota e tütuì o ia i te reira i te auahi pohe òre.

18 E e rave rahi ä ta na aòraa atu, i te faaìteraa atu i te taata i te Parau Maitaì.

19 Âreà te teterareha ra o Herota, no te mea i aòhia o ia e ana ia Herotia i te vahine a ta na taeaè a Firipa, e te hara atoà i ravehia e Herota ra,

20 âmui atoà atu ra i teie, ôpani atu ra ia Ioane i roto i te fare täpeàraa.

Te päpetitoraa o Ietu

(Mät 3,13-17; Mär 1,9-11)

21 E ia Ioane i päpetito i te mau taata atoà, i päpetito-atoà-hia Ietu, e te pure ra o ia, vëtea aè ra te raì,

22 e ua pou mai ra te Värua Maitaì i nià ia na, mai te ûupa te huru, e te hoê reo mai ra no te raì, i te nä-ô-raa mai: «Ta ù Tamaiti here òe, ua mauruüru roa vau ia òe.

Manaò.

Teie te tahi parau ta te mau taata ravaì e parau no te vaa hou e fäno ai, te naò nei teie reo « ia paari te hiàto i te täamu ia òre ia fati ia ü i te vero i tua » te hiàto te fana ia e täpeà ra i te ama muri o te vaa, no te tauturu i te peperuraa i te vaa i roto i te vero.

Ua tomo tätou i roto i teie mätahiti tivira to na faanahoraa tei roto ia i te huru ta tätou mau faanahoraa, e rave rahi mau töhuraa, mau tärena òhipa, e ua tae roa te tahi pae i te haapäpüraa te mau òhipa e tupu. Te mea rä e faufaahia ai to tätou fenua ia Mäòhi Nui te vai rupehu noa ra ia i te faahitiraa, e ìnaha e mätahiti 2022, e tano ia tohu e, e faaitoito i te tänu e 2022 tumu ùru, tumu haari, tumu vï, tumu täporo, e te vai atu ra. Mai te mea rahi roa hoê aè ia i te âvaè e maitaì tatou, ia maitaì ta tätou tänuraa i te fenua e matara ai te ùputa o te raì e aore e vetea i reira e faaroohia ai te reo o te Atua Nui Tahi i te parauraa e «Ta ù Tamaiti here òe, ua mauruüru roa vau ia òe » Na te parau Atua e faaàhu i te märama ia tupu te märamarama o te mau tiàrama i höhorahia ai i te mau raì tuatinitini mai te päruru; i te vauvauraa i te mau ànavai ta te mau ata o te reva e faahau maru i te fenua ia maitaì te aru o te fare Metua, tei puhihia e te mau âpoo mataì, i haamauhia ai te tumu o te fenua, ia òre roa te Mäòhi ia âueue.

A rahu ai te Atua i te raì e te fenua, te haapäpü ra te päpaì Tënete e, te vai ano noa ra te fenua, aore e faufaa, e te pöuri hoì i nià i te ìriatai. Teie rä hohoà to te fenua ta te päpaì Tënete e faaìte mai nei, te huru ia o te fenua i muri aè i to te Atua veheraa i te vai èi tupuraa aè to te raì e te fenua. Te auraa, aita to te raì e te fenua e parau i räpae aè i te Atua na na te Parau i pü mai ai räua, oia hoì hoê ä tumu to räua. Te nä ô ra te Atua : Ia puè ê te moana i raro aè i te raì i te vähi ôtahi, ia ìteä te repo marö. No reira, eiaha ia moèhia ia tätou e, te raì, mai te fenua atoà, e tupuraa ia no te hinaaro o te Atua. Haamanaò atu ai tätou i te reo o te Fatu e parau ra e : I parau atu na vau ia òutou i te parau o te fenua, e aore òutou i faaroo, e aha òutou e faaroo ai ia parau atu vau ia òutou i te parau o te raì (Ioane 3, 12). 

Te faaìteraa atoà ia o na taiòraa e maha no teie mahana, teie te haapotoraa o te taiòraa :

-Taramo 104, 30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

-Ìtaia 40, 6 Te nä ô mai ra te hoê reo, A faaìte. Ua parau atu ra vau, E aha ta ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei:

-Tito 2, 14 o tei horoà ia na iho no tätou, ia ora tätou ia na i te mau parau ìno atoà ra, ia tämä o ia ia tätou ei taata mau no na iho, e te itoito i te mau òhipa maitataì ra.

-Ruta èv. 3, 22 e ua pou mai ra te Värua Maitaì i nià ia na, mai te ûupa te huru, e te hoê reo mai ra no te raì, i te nä-ô-raa mai: «Ta ù Tamaiti here òe, ua mauruüru roa vau ia òe.

Te faaìte noa mai ra teie mau parau ia tätou e, tätou e haafaufaa òre nei i te fenua, te Atua iho ta tätou i haafaufaa òre. Ua ìte te raì i te Atua, to na ia pärahiraa ; ua ìte te fenua i te Atua, te taahiraa âvae ia o te Atua, e te hinaaro hoì o te Atua, ia riro ia te raì, mai te fenua atoà, ei vähi tupuraa no to na hanahana, ei vähi e âruehia ai to na iòa moà.

I roto i te pure ta te Fatu i haapii i ta na mau pipi, te nä ô ra Ietu : Ia haapaòhia to òe hinaaro i te fenua nei, mai tei te raì atoà na. Mai te peu aita te Fatu i mäìti i roto i te raì e te fenua, aita hoì i haafaufaa i te tahi no te haafaufaa òre i te tahi, e aha e tià ai ia tätou ia haameremere i te fenua mai te manaò e, aita atu e mea faufaa ia tïtauhia maoti rä, te raì. Ia hiò tätou i te pure a te Fatu, te vähi tätou i tiaìhia mai ai, eere i nià i te raì, i nià rä i te fenua, i te vähi tätou i pü mai ai i te ao nei, i nià i te fenua tei hii ia tätou, i roto hoì i te nünaa tei haìhaì mai ia tätou.

Ia hiòhia te parau mai teie ta tätou e hiò nei, oia hoì, te fenua, te ùputa o te raì, e ui ihoä te manaò i te vähi tei reira teie ùputa e parauhia nei, te vai mau ra änei. Te uiraa rä të òre roa atu e maìri, te puta ia tei reira teie parau i te päpaìraahia. O tätou te tahi feiä püai roa i te tïtau i te parau i päpaìhia, ia au ihoä i te manaò e : tei päpaìhia ra, ua päpaìhia ia, oia hoì e parau mau te reira. Te auraa, tei òre i päpaìhia ra, e tute-ê-hia mai ia no te mea aita e mea e paèpaè ra i to na na parau. Ia ìte atoà rä hoì tätou e, mai te peu te vai ra ihoä te mea i päpaìhia, te vai atoà ra te auraa o te mea i päpaìhia ; eere atoà rä no te mea ua päpaìhia, i òhie ai tätou i te färii i te reira. Aita e moèhia ra ia tätou te òhipa i tupu i te tahi mahana i roto ia Ietu e te Haapii ture tei ani atu ia na i te mea e ö ai o ia i roto i te pätireia o te Atua (Ruta 10, 25-37). Te parau ta Ietu i faatià atu i teie taata, aita ia hoê aè vähi i päpaìhia ai, e inaha, ua märamarama teie taata e, ia faatupu o ia i te parau o te aroha, e matara ia na te ùputa o te pätireia. Ahiri, e faahapa änei tätou ia Ietu i te òreraa e rave i te parau i päpaìhia no te haamäramarama i teie taata i te auraa o te mea i päpaìhia. Ua ìte tätou e, e mea pinepine roa Ietu i te faaòhipa i te reira räveà, e e òhipa tumu te reira i roto i te feiä haapii, te raveraa i te tahi mau hiòraa tei òre i päpaìhia, ei räveà e märamarama ai te taata i te mea i päpaìhia. Te faufaa o te hoê puta, eere no te mea te vai ra, no te mea rä ua riro ei vähi haerehia e te taata, ei vähi rä tei ìriti ia na i te ùputa o te märamarama, eiaha rä ei vähi e manaò ai o ia e, mea faufaa òre o ia.

Te ìtehia nei te paruparu o te mau arataì o te Faaroo, to rätou ia manaò ìi, oia te òreraa e hinaaro i te tahi pae ia maitaì, inaha aita rätou iho e maitaì ra. Parau mau, e tiàraa faaora to te mau arataì o te Faaroo, eere rä na rätou e horoà i te ora, te Atua noa ihoä te Tumu o te ora. Ta rätou tuhaa, te tauturu-noa-raa ia e te faaòhieraa i te taata i te raveraa i te èà e tae atu ai i te Atua ra. Te auraa hoì o teie taò arataì, teie ia : ara (èà), taì (âfaì), oia hoì : âfaì nä nià i te èà.  I roto i te parau no te âfaì, te vai atoà ra te manaò no te âpeeraa, oia te faaea-tämau-raa i pïhaì i te taata e ìmi ra i to na èà. Te mea ia ta te päpaì taramo e haapäpü ra e : 30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

No reira, mai te peu e faaauraa ta te Atua i rave, e ua faaìte mai hoì o ia i te reira, aita ia e òhipa ta te Atua i huna, e ta Ietu faahaparaa i te mau tià arataì o te Faaroo, te mea ia rätou i hopoi ê i te täviri o te ìte, ia pärahi noa te nünaa i roto i te pöiri. Ua fatimaùu te mau taata  ia Ioane, te feruri anaè ra te taata i roto i to rätou âau, e  riro paha o ia i te Metia. Te parau nei ra Ioane ia rätou atoà, nä ô atu ra: «Te päpetito nei ä hoì au ia òutou i te pape, te haere mai na rä te tahi e mana rahi to na i to ù, e òre ia vau e au ia tätara i te täpeà i ta na tämaa: na na e päpetito ia òutou i te Värua Maitaì e te auahi. I matara ai te ùputa o te raì i teie reo no te raì i te parauraa e, «Ta ù Tamaiti here òe, ua mauruüru roa vau ia òe »

Mea maitaì ia vai noa i roto i to tätou manaò e to tätou âau e, te raì e te fenua, hoê ä to räua tumu : te vai ; te reira to räua àpu ta te mana o te Parau a te Atua i heheu mai. E mai te peu e mou te raì e te fenua e hoì faahou räua i roto i to räua àpu. E tano ia parauhia e, te fänauraa o te taata, te haapotoraa ia no te rahu a te Atua tei ìriti i te ora mai roto mai i te vai.

 

Teraì òr. Faatura.