Ruta èv. 6.27-38 Tïrärä

 

Tāpati 20 no Fëpuare 2022.

Tïrärä

Taramo 103

1 Na Tävita. E haamaitaì i te Fatu, e ta ù värua, e to roto ia ù nei, i to na ra iòa moà.

2 E haamaitaì i te Fatu, e ta ù värua, e eiaha te hoê maitaì a ana i horoà mai ra e haamoèhia.

3 O ia tei faaòre i ta òe atoà ra mau hapa, e o tei faaora i to òe atoà ra mau maì,

4 o tei faaora ia òe i te pohe, o tei faatoröna ia òe i te hämani maitaì e te aroha,

5 o tei faaî i to vaha i te maitaì, ia faaâpï-faahou-hia òe mai te àeto ra.

6 Te rave ra te Fatu i te parau tià e te au i te feiä atoà i hämani-ìno-hia ra.

7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra.

8 E aroha e te hämani maitaì to te Fatu, e òre e riri vave, te rahi ra to na aroha.

9 E òre o ia e tämau i te aò mai ia tätou e òre hoì e vaiiho maro i to na riri e a muri noa atu.

10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno.

11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra.

12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei.

13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra.

14 Ua ìte hoì o ia i to tätou huru, te manaò ra o ia e, e repo tätou nei.

15 O te taata nei e au to na puè mahana i te àihere nei: mai te tiare i roto i te aru ra to na ruperuperaa.

16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na.

17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii,

18 i te feiä i haapaò i ta na ra faufaa, e tei haapaò i ta na ra parau e rave ra.

19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia.

20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau.

21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro.

22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e ta ù värua e.

1 Tämuera 26.2-23

2  Ua tià aè ra Taura, haere atu ra i raro i te mëtëpara ra i Tifa, e nä taata i mäìtihia e toru atoà tautani no Ìteraèra i te haere-atoà-raa e ìmi ia Tävita i te mëtëpara ra i Tifa.

3 Ua pata iho ra Taura i to na pühapa i nià i te mouà ra o Hätira, i te pae èà tià i mua iho i Ietimona. Te pärahi noa ra Tävita i roto i te mëtëpara; ua ìte hoì o ia e, tei te mëtëpara mai nei Taura, te ìmi ra ia na.

4 I tono na hoì Tävita i te hiò, e ua ìte mau o ia e, ua tae mai Taura.

5 Ua tià aè ra Tävita, ua haere tià mai ra i taua vähi i pühapahia e Taura ra. Ua ìte mai ra hoì Tävita i to Taura taòtoraa e to Àpinera a Nere ra, te raatira no taua nuu ra: tei roto i te utaa to Taura taòtoraa, e te mau taata atoà i to na hiti e àti noa aè.

6 Ua parau mai ra Tävita ia Âhïmereta âti-Heta ra, e ia Àpitai a Teruia, taeaè no Ioapa, nä ô atu ra, O vai te taata e tae atoà i raro i te pühapa ia Taura ra, mäua atoà? Ua parau mai ra Àpitai, e haere atoà vau.

7 Ua haere mai ra Tävita räua o Àpitai i taua nuu ra i te pö; e inaha, te taòto noa ra Taura i roto i te mau tauhaa, e te pätia-noa-hia ra ta na mähae i raro i te repo, i te pae upoo ra, e te tärava noa ra hoì Àpinera e te taata atoà i to na hiti e àti noa aè.

8 Ua nä ô aè ra Àpinera ia Tävita, ua tuu mai te Atua i to ènemi i roto i to rima i teie nei mahana; teie tä ù parau ia òe, e tuu mai na òe, e pätia na vau ia na i te mähae e pupu noa atu i raro i te repo; e òre au e tätaìpiti i te vähiraa.

9 Ua parau atu ra Tävita ia Àpitai, eiaha o ia e täparahihia; o vai ia taata e òre e hara ia âfaì i ta na rima i nià e täparahi i to te Fatu taata i faatähinuhia ra?

10 E ua parau atu ra Tävita, te ora ra te Fatu, na te Fatu o ia e täparahi, e aore ra, te vai ra to na mahana e pohe atu ai; e aore ra, e haere o ia i te tamaì, pohe atu ai.

11 Ia täpeà mai hoì te Fatu ia ù ia òre au ia rave i te taata o te Fatu i faatähinuhia ra; teie rä tä ù parau ia òe, a rave mai na òe i te mähae i ta na hiti upoo ra, e te hue pape, e haere täua.

12 Ua rave iho ra Tävita i te mähae e te hue pape, i te hiti âpoo o Taura ra; haere noa atu ra räua, aore roa te hoê i hiò noa mai, aore i ìte, aita hoì i ara noa aè; ua roohia hoì rätou i te vareà taòto rahi no ô mai i te Fatu ra.

13 Haere atu ra Tävita i te tahi paeàu, ua tià noa mai ra i nià i te hoê âivi, tei te ätea ê, e vähi roa tei röpü ia rätou ra:

14 ua tiàoro mai ra Tävita i taua nuu ra, e ia Àpinera, nä ô atu ra O vai hoì òe e pii noa mai i te arii nei?

15 Ua parau mai ra Tävita, Eere änei òe i te taata àito? O vai hoì ia taata e au ia òe i Ìteraèra na? E aha iho ra hoì òe i òre i tiaì ai i to fatu, i te arii na.

16 Eere ta òe na i te rave maitaì. Te ora ra te Fatu, e au ia òutou te pohe, no te mea, aita aè nei òutou i tiaì i to òutou fatu, i ta te Fatu taata i faatähinu ra. E teie nei, a hiò mai na i te mähae a te arii e te hue pape i vai i ta na hiti upoo ra.

17 Te ìte ra Taura i to Tävita reo, e ua nä ô atu ra, No òe änei ia reo, e ta ù tamaiti, e Tävita? Ua parau mai ra Tävita, No ù ia reo, e ta ù fatu, e te arii.

18 ua parau mai hoì Tävita, E aha òe i aùaù mai ai i to tävini, e ta ù fatu? E aha na hoì au? E aha ra to ù nei ìno?

19 E teie nei, e faaroo mai na òe, e ta ù fatu, e te arii, i te parau a to tävini nei. Na te Fatu òe i tuì mai e rave ia ù, e färii mai o ia i te tahi tütia: na te taata anaè ra, ia tätarahia rätou i mua i te aro o te Fatu; ua tiàvaru hoì rätou ia ù eiaha vau e pärahi i te fenua o te Fatu, i te parau mai e, E haere e haamori i te mau atua èê ra.

20 E teie nei, eiaha to ù nei toto ia tahe i raro i te repo i mua i te aro o te Fatu. E tere ìmi tütuà to te arii o Ìteraèra; mai te tërä i ìmihia i nià i te mouà ra.

21 Ua parau atu ra Taura, ua hara vau; a hoì, e ta ù tamaiti, e Tävita, tïrärä hoì to ù hämani-ìno-raa atu ia òe; no te mea ua faahereherehia vau e òe i teie nei mahana: e parau maamaa hoì ta ù, e ua hapa roa vau.

 22 Ua parau mai ra Tävita, nä ô mai ra, A hiò mai na i te mähae a te arii ra, e faaue i te hoê tamaiti e tii mai. 23 Ia faautuà mai te Fatu i te taata atoà i tei au i te parau tià e te haapaò maitaì nä na ra: i tuu noa mai hoì te Fatu ia òe i ta ù rima i teie nei mahana, aita aè ra ta ù rima i rave noa atu i ta te Fatu taata i faatähinuhia ra.  

1 Tōrīnetia 15.45-49

45 Ua oti hoì i te päpaìhia: «I hämanihia te taata mätamua o Àtamu ei taata ora «; âreà te Àtamu hopeà, e Värua ora ia.

46 Aita rä i nä mua te tino värua ra, o te tino taata rä, e muri aè ra, o te tino värua ia.

47 E repo te taata mätamua, no te fenua; âreà te piti o te taata, o te Fatu ia, no te raì mai.

48 O to te repo nei, mai to te repo atoà ra rätou; o to te raì ra, mai to te raì atoà ra rätou.

49 E mai te hohoà o to te repo e vai noa i nià ia tätou nei, e riro atoà i nià ia tätou te hohoà o to te raì ra.  

Ruta èv. 6.27-38

Te aroharaa i te ènemi

(Mät 5,38-48; 7,12)

27«Teie rä ta ù parau ia òutou e faaroo mai na: E aroha i to òutou mau ènemi, e hämani maitaì atu i te feiä i riri mai ia òutou.

28 E faaora i te feiä i tuhi mai ia òutou, e pure hoì i te feiä hämani ìno mai ia òutou.

29 O tei moto mai i to päpärià na, e färiu atoà atu i te tahi; e o tei rave mai i to àhu pü na, eiaha atoà e täpae i to pereue.

30 E horoà atu i tei ani mai ia òe ra; e o tei rave i ta òe na taoà, eiaha e ani faahou atu.

31 E o ta òutou e hinaaro ia vëtahi ê ra, e nä reira atoà atu òutou ia rätou.

32 «O te feiä i aroha mai ia òutou, o ta òutou ä ia e aroha atu: e aha te haamaitaìraa ia òutou i reira? Te aroha atoà nei hoì te feiä rave hara i tei aroha mai ia rätou.

33 E o te feiä i hämani maitaì mai ia òutou, o ta òutou ä ia e hämani mataì atu: e aha te haamaitaìraa ia òutou i reira? Te nä reira atoà nei hoì te feiä rave hara.

34 E o te feiä ta òutou e manaò e noaa ta òutou i reira, o ta òutou ä ia e horoà atu: e aha te haamaitaìraa ia òutou i reira? Te horoà nei hoì te feiä rave hara i te feiä rave hara ia fäito ta rätou ia roaa mai.

35 E aroha rä òutou i to òutou mau ènemi, e hämani maitaì, e horoà, eiaha noa atu ei manaò hoo; e e utuà rahi ia ta òutou. E riro hoì òutou ei tamarii na Te Teitei: e hämani maitaì hoì to na i te feiä mauruüru òre e te taata ìno.

36 E aroha atoà hoì òutou mai to òutou Metua e aroha mai ra.

Eiaha e haavä ia vëtahi ê

(Mät 7,1-5)

37«Eiaha e faaìno atu, e eita òutou e faaìnohia mai; eiaha e faahapa atu, e eita òutou e faahapahia mai; e faaòre atu i te hara, e e faaòrehia mai ta òutou;

38 e horoà, e e noaa hoì ta òutou; e î te fäito, e neneìhia, e ueuehia, e manii noa atu, na te taata e ninii i roto i to òutou àhu. O taua fäito hoì ta òutou e fäito ra, o te fäito-faahou-hia mai ia ta òutou.»

Manaò.

Te Atua Nui Tahi te faaìte noa nei i to na Aroha e to na Here mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei. Tei paò to tätou hohoà i roto i te repo e vai noa nei i nià ia tätou, e riro atoà i nià ia tätou te hohoà o te raì. E hohoà faaora tei tuuhia i nià ia tätou, te hoà te parau tumu teie no te uira ia hoà i roto i te reva ei faaìteraa e, e paaìna te pätiri èi faahauraa i te fenua. I te fenua nei te ora nei tätou ma te àua haaàtihia i te hohoà rau o te taata, te mau hoa, mau ènemi, mau fëtii, mau rätere e te vai atu ra. Te aroha nei rätou e tae noa atu te ènemi i ànanahi ra e i teie mahana. Teie parauhia e aroha atu i to ènemi ia tupu teie parau te òhipa e fänau e faaora i te feiä i tuhi mai ia tätou, e pure hoì i te feiä hämani ìno mai ia tätou. O ta òutou e hinaaro ia vëtahi ê ra, e nä reira atoà atu tätou ia rätou. I parau ai o Ietu e, E aroha atoà hoì òutou mai to òutou Metua e aroha mai ra, Tïrärä atu ai. E òre ia tätou e ö i roto i te parau no haaväraa ia vëtahi è. Èita ia tätou e fäitohia i te fäitoraa, te fäito ia i fäitohia o Taura e Tävita, i teie parauraa, Te ora ra te Fatu, e au ia òutou te pohe, no te mea, aita aè nei òutou i tiaì i to òutou fatu, i ta te Fatu taata i faatähinu ra. Ua parau mai ra Tävita, No ù ia reo, e ta ù fatu, e te arii.19 E teie nei, e faaroo mai na òe, e ta ù fatu, e te arii, i te parau a to tävini nei. 20 E teie nei, eiaha to ù nei toto ia tahe i raro i te repo i mua i te aro o te Fatu. 22 Ua parau mai ra Tävita, nä ô mai ra, A hiò mai na i te mähae a te arii ra, e faaue i te hoê tamaiti e tii mai.

E haamaitaì tätou i te Fatu, to tätou värua, e to roto ia tätou nei, i to na ra iòa moà. 

E haamaitaì i te Fatu, e to tätou värua, e eiaha te hoê maitaì a ana i horoà mai ra e haamoèhia. 

Te rave ra te Fatu i te parau tià e te au i te feiä atoà i hämani-ìno-hia ra. 

E aroha e te hämani maitaì to te Fatu, e òre e riri vave, te rahi ra to na aroha.

Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra. 

Âreà te aroha o te Fatu mai tahito mai ia e a muri noa atu.

I te feiä i mataù ia na ra, e ta na ra parau tià i te tamarii a ta rätou ra mau tamarii, 

I te feiä i haapaò i ta na ra faufaa, e tei haapaò i ta na ra parau e rave ra. 

Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia. 

E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, 

I te faarooraa i ta na reo ia parau.

E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro. 

E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. 

E haamaitaì i te Fatu, e ta ù värua e. Tïrärä.

Teie te huru no te haapotoraa i ta tätou taiòraa no teie mahana :

-Taramo 103, 12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei.

-1 Tämuera 26, 21 Ua parau atu ra Taura, ua hara vau; a hoì, e ta ù tamaiti, e Tävita, tïrärä hoì to ù hämani-ìno-raa atu ia òe; no te mea ua faahereherehia vau e òe i teie nei mahana: e parau maamaa hoì ta ù, e ua hapa roa vau.

-1 Törïnetia 15, 49 E mai te hohoà o to te repo e vai noa i nià ia tätou nei, e riro atoà i nià ia tätou te hohoà o to te raì ra.

-Ruta èv. 6, 35 E aroha rä òutou i to òutou mau ènemi, e hämani maitaì, e horoà, eiaha noa atu ei manaò hoo; e e utuà rahi ia ta òutou. E riro hoì òutou ei tamarii na Te Teitei: e hämani maitaì hoì to na i te feiä mauruüru òre e te taata ìno.

Tïrärä ia parau, e taò mäòhi mau teie no roto i to tätou reo, te auraa o teie taò te ìteraa ia te taata i te ìno o ta na i faatupu, e i roto i tera manaò e e òre roa e na reira faahou.

Teie te huru o te Parau Maitaì e ta na faanahoraa, te horoà nei o Ietu i te mau taata tei hinaaro e faaroo e tei òre e hinaaro e faaroo. Eiaha noa e AROHA i to tätou mau ènemi, ia ravehia ra teie òhipa ma te tuu òre i te tahi mau manaò i muri mai i te tahi. E tià atoà i te taata ia parau e, aita to ù e ènemi, e aore ra te ènemihia mai ra vau. Ta Ietu ra e parau nei e ènemi, te mau taata atoà, eiaha  te parau no te AROHA ia haapaò-noa-hia i nià i te mau taata ta tätou ia au e te tahi pae rä ia, aita ia. Tei nià iho i teie tuhaa to Ietu haa­puairaa teie manaò to na, te AROHA i to ENEMI.

O VAI TEIE ENEMI?

Aita o Ietu e faaìte päpü nei to na huru e to na hohoà, ta na ra e òhipa, te ìno ia e te au ore.

Teie ènemi, e tià ia parauhia te taata ia e to na oraraa.

Oia hoì:

 

1/ O V A U:

Te ani mai ra o Ietu ia ù ia AROHA i te mau taata atoà e faaìno mai ia ù, i te mau taata e ìmi mai i te peà­peà, tei òre i tuàti mai e te mau taata e ìmi mai i te mau raveà atoà ia òre vau e faatupu i te maitaì. Teie te tahi mau hohoà ènemi ia AROHA ia vau ia rätou.

2/ TE ORARAA ÀMUI:

Te ani atoà mai ra o Ietu ia AROHA tätou i te mau pupu e ìmi nei ia tupu te âmahamaharaa eiaha ra te hoêraa.

Àhiri O VAU, e te mau taata e ora àmui nei, e faatupu mau nei teie parau ta Ietu e faaìte nei. Ia ù i manaò hou tä­tou a taiò ai te ìrava i muri mai, e rave au i te hoê àpi pepa ma te haamanaò i te mau taata ta ù i riri, ta ù i au ore, ta ù i tute ê. E papaì au i to rätou mau iòa e ia oti a fare­rei atu ai ia rätou na roto i te maru e te haèhaa, e e PURE àmui e o rätou.

O teie te Parau Maitaì a te ATUA

O to tätou âau teie ta Ietu e hinaaro mai ra ia FAATUPU.

IRAVA 29‑30: "O tei moto mai i to päpärià na, e färiu atoà atu i te tahi; e o tei rave mai to àhu pü na, eiaha atoà e täpeà i to pereue. E horoà atu i tei ani mai ia òe ra; e o tei rave i ta òe na taoà, eiaha e ani faahou atu".

Ua oti aè nei to Ietu tïtauraa i to tätou âau e te hi­naaro atoà nei ò ia ia faaineine tätou i te vahi rapae o to tätou tino. Mea maitaì atoà ra ia ara tätou, aita o Ietu e hinaaro nei e parau ia tätou e, niho ra: e niho ia e mäta ra: e mäta ia, e aore ra te hapa na i to mäta àtau e to rima àtau e ôhiti e e tapu faaruè ... Mataio 5, 29‑30). Eita roa ia te reira te manaò o Ietu. Ta Ietu ra e hinaaro hou a tupu ai teie òhipa ia noaa i te taata i te paruru ia na. Mai te mea aita e noaa ra, eiaha ia e horoà atu i te piti o te päpärià, aita ia te reira e faaïti mai ra, te faarahi roa atu ra ia te reira i te peàpeà ia ù i manaò.

Te mea e märamaramahia ra, eiaha e faahoì atu. Ua tupu anaè mai teie te huru, ua arohahia ia to ènemi. Teie ra, ua rahi aè te faahoì atu i te aroha atu.

Ua tano ihoä ra teie parau ta Ietu i nià ia na iho, i to na motoraahia i mua i te mau tahua rarahi Ioane 18, 22 e 23 ... "E tei te na reiraraa atu Ò ia ra, ua moto mai ra ia Ietu te hoê o te fëia toroà e tià noa i pïhaì iho ia na ra. Ua parau mai ra, e na reira òe i te parau atu i te tahua rahi ra. Ua parau atu ra o Ietu, ua hapa ta ù i parau aè nei a faaìte mai na i te hapa, e parau tià ra, e aha hoì òe i moto mai ai ia ù? »...  E teie atoà manaò i roto i te Ìtaia 50, 5‑6 ... ua faafatafata te Fatu ra o Iehova i ta ù tarià e aore hoì au i pätoì atu aore hoì au i ôraì tià i muri ua tuu noa atu vau i ta ù i te fëia i täìri mai e ta ù päpärià i te fëia i huti­ huti i te ùmiùmi aore hoì au i huna ê atu i ta ù mäta i te va­havaha e te tufa haere".

Te päpu nei ia ia ù, hou o Ietu a parau ai teie manaò, ua faaìte atea-hia te mau òhipa e tupu i nià ia na iho. Mea maitaì atoà ra ia tätou ia ìte e, te faatupu nei o Ietu i te mau parau atoà ta na i tïtau i te taata. Ò ia te mätamua tei roto i teie parau ta na. Ta Ietu ra e hinaaro nei, eiaha ia TUPU te faahoìraa na roto i te riri, ia ravehia ra na roto i te hau. Ua rave-anaê-hia na roto i te motoraa atu e moto mai o vai ia tei aroha? E o vai te ènemi? Ua vai noa ia teie na taata i nià i te huru taata ua rahi aè te faahoì na roto i te riri i te aroha atu tei moto mai e ua rahi atoà i te rave mai i te horoà atu.

IRAVA 31: "E o ta òutou e hinaaro ia vëtahi ê ra, e na reira atoà atu òutou ia rätou".

Ai-tä‑ê teie ìrava te hoê ture àuro i ta Ietu parauraa. Oia hoì, te mau mea atoà ta òe i òre e here, eiaha ia, ia na reira-hia i nià i to taata tupu. E parau teie na te hoê òrometua Ati Iuta o Hillel, i te tau o Ietu. E te hoê firotofo teie ta na parau "Te mau mea atoà o ta oe e hinaaro ia òre ia ravehia i nià ia òe, eiaha atoà e na reira i nià i te tahi atu mau taata.

Ta Ietu ra, ua FAAÂPÏ roa ia o ia i teie ture, ia òhipahia ia te mau maitaì i nià i to taata tupu e i nià i to ènemi. E ta tätou, E tä ù?                                                                                                                                                                  

IRAVA 32‑35 (vm): "O te fëia i aroha mai ia òutou o ta òutou a ia e aroha atu. E aha te haamaitaìraa ia òutou i reira te aroha atoà nei hoì te fëia rave hara i tei aroha mai ia rätou. E o te fëia i hämani maitaì mai ia òu­tou, o ta òutou a ia e hämani maitaì atu, e aha te haamai­taìraa ia òutou i reira ? Te na reira atoà nei hoì te fëia rave hara. E o te fëia ta òutou e manaò e noaa ta òutou i reira o ta òutou i reira? Te horoà nei hoì te fëia rave hara i te fëia rave hara ia fäito ta rätou ia roaa. E aroha ra òutou i to òutou mau ènemi e hämani maitaì e horoà, eiaha noa atu èi manaò hoo, e e utuà rahi ia ta òutou".

‑ Tätou te mau tävini o te Atua.

‑ Tätou te mau taata teretetiano,

Eita tätou i te mea taaê roa atu i te tahi mau taata. Teie ra te ani mai nei o Ietu ia tätou, ia ìtehia te taaêraa i roto ia rätou.

E AHA TAUA TAAERAA RA?

E AHA TE TAHI VAHI I HAU I ROTO I TEIE TAAERAA?

                   

Òia hoì ia, ia AROHA tätou i te mea tei òre i arohahia e tätou, to tätou mau ènemi, no te mea te AROHA atoà nei te fëia hara, e te horoà atoà nei, teie ra e faahoìraa to muri mai. Àreà ra ta tätou aita ia e faahoìraa. Te manaò hohonu o Ietu i ù nei, to tätou AROHA te FAATIA­MA i mua i to tätou oraraa àmui to tätou ùtuafare, te vahi e orahia ra e i te mau vahi atoà tei reira te taata i te oraraa, no te mea te vai nei te AMUITAHIRAA, tupu òhie noa e te òre vave noa. Ia ù i manaò eita paha te AMUITAHIRAA i te hoê òhipa òhie roa ia au i teie mau ìrava 32‑35 (vm), i te mea te faatupu atoà nei te tahi pae ta rätou âmuitahiraa :

-          no te aro i te tahi,

-          no te hämani ìno, ‑ no te täparahi, 

-          no te faatîtî e te vai atu ra.

Eita ra teie te âmuitahiraa ta Ietu e parau nei: ÒUTOU, teie tätou te mau ènemi. Te Parauhia mai nei ia tätou ia AROHA ia rätou, i te mea te AROHA FAATIAMA aita to na e ôtià e aita atoà to na e paruparuraa.

... E NAHEA IA VAU? ... E NAHEA TATOU? ...

IRAVA 35 (vh) : "E riro hoì òutou èi tamarii na te TEITEI e hämani maitaì hoì to na i te fëia mauruüru ore e te taa­ta ìno".

Teie mau parau ta Ietu te ìte nei ia tätou i to tätou ätearaa i te òpuaraa a te Atua. No reira, ia tià i te Varua o  ­te Atua ia faataui to tätou âau ei âau tei AROHA i te mau ènemi o te Atua. Ua tae roa i te tau o Ietu e i to tätou, te tupu noa nei te mau pähonoraa te ìno na roto i te ìno te ri­ri na roto i te riri, te hae na roto i te hae te feìi na ro­to i te feìi. Rahi noa atu ai te päpaìraahia teie mau parau, e rahi noa atu to tätou ìteraa te aroha òre o te ao nei. I roto i te Pipiria, mea na roto ia i te mau tamaì tei parauhia te tamaì moà, mea täparahi roa ia te mau ènemi o te Atua. Te parau a Ietu: e pure no te mau ènemi, e aroha i te mau ènemi. E taata e aroha i to na ènemi e riro ia o ia ei TAMARII na te TEITEI.

IRAVA 36‑38: "E aroha atoà hoì òutou mai to òutou metua e aroha mai ra.

Eiaha e faaìno atu, e eita òutou e faaìnohia mai.

Eiaha e faahapa atu, e eita òutou e faahapahia mai.

E faaòre atu i te hara, e e faaòrehia mai ta òutou.

E horoà noa, e e noaa hoì ta òutou e i te faito.

E neneìhia, e neneìhia, e manii noa atu na te taata e ninii i roto i to òutou àhu.

O taua faito hoì ta òutou e faito ra, o te faito-faahou-hia mai ia ta òutou".

Teie o Ietu e heheu mai nei ia tätou te huru mau o te Atua.

To Na AROHA MUTU‑ORE e faatae O ia i nià i te mau taa­ta atoà ma te uiui òre e te tuatäpapa òre.

Aita te Atua e faahapa nei e e faautuà nei, e aore e faatîtî nei. Te faaìte nei ra O ia i Ta na FAAÒRERAA HARA i te fëia atoà tei tiàturi ia Na. Tei òre ra te piihia nei rätou ia haafatata i pïhaì iho i Ta na TAMAITI ia IETU.

Te hinaaro nei o Ietu ia na reira atoà tätou, te auraa ia teie parau: e AROHA ATU I TO ENEMI. Ia òre to tätou haaväraa, tei roto noa ia ia tätou. Faaòre mai ta mätou hara mai ia mätou e faaòre tei hara mai ia mätou.

Eiaha ra ia manaòhia e, e färii te Atua i te ìno, te pa­rau tià òre, te faatîtîraa e tae noa atu i te mau òhipa tià òre i mua to Na aro. Te fëia e rave i teie huru òhipa, eita te Atua e haava ia rätou, e faahapa. Na rätou noa e haava ra, e faahapa ra ia rätou, o rätou tei pätoì te FAAORERAA HARA a te Atua.

E peàpeà roa te Atua i teie mau huru taata no to na ho­hoà i nià ia rätou.

 

Tïrärä parau.

 

Teraì òr. Faatura.

 

 

Ruta èv. 6.17-26 Ua hiò.

 

Tāpati 13 no Fëpuare 2022.

Ua hiò.

Taramo 1

Tänuhia

1 E ao to te taata, aore e faaau i to na haereà i te aò a te paieti-òre, aore i taahi i te èà o te feiä rave hara ra, e aore hoì i pärahi i te pärahiraa o te feiä tähitohito ra.

2 O  tei hinaaro rä i te ture a te Fatu, e tei ta na ture to na manaòraa i te ruì e te ao.

3  E au o ia i te räau i tänuhia i te hiti ânävai ra: o tei hotu i to na ra tau mau, e o tei òre roa i mäheahea to na rau. Oia atoà tä na e rave, te maitaì ra ia.

4 Eere mai te reira te feiä paieti-òre ra: e au ia i te ota e puehu noa i te mataì ra.

5 E òre e mau ai te paieti-òre i te haaväraa, e te rave hara i te âmuiraa o te parau tià ra.

6 Te au mai ra hoì te Fatu i te haereà o te parau tià ra, âreà te haereà o te feiä paieti-òre ra, o te pohe ia.

Ieremia 17.5-8

Mataù

5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua.

6 Ua parau atu ra vau, âuë e te ATUA, e te Fatu e, aore hoì au i ìte i te parau; e tamaiti iti hoì au,

7 Ua parau mai ra te Fatu ia ù, Eiaha e parau, e tamaiti iti au: o tei tonohia òe e au ra, o ta òe ia e haere; e o ta ù e faaue ia òe ra, o ta òe ia e parau,

8 Eiaha òe e mataù i to rätou mata; ei pïhaì atoà iho hoì au ia òe ei faaora ia òe, te parau mai ra te Fatu.

1 Tōrīnetia 15.12-20

Mätamua

12 Te parau-haere-hia nei te Metia e, ua tiàfaahou o ia i te poheraa ra: e aha i parau ai te hoê pae o òutou e, aore e tiàfaahouraa to tei pohe?

13 Aore e tiàfaahouraa to tei pohe ra, aore atoà te Metia i tià i nià;

14 e aore te Metia i tià i nià ra, e haavare mau ta mätou aò nei, e e haavä atoà to òutou faaroo.

15 Ua riro hoì mätou ei ìte haavare na te Atua; no te mea ua parau mätou i te Atua e, ua faatià o ia i te Metia; aita mau e faatiàhia tei pohe ra, aore ia o ia i faatià ia na.

16 Eita hoì e faatiàhia tei pohe ra, aore ia te Metia i faatiàhia.

 17 E aita hoì te Metia i faatiàhia ra, e mea faufaa òre to òutou faaroo; te vai noa na ia òutou mä ta òutou hara atoà.

18 E te feiä atoà i maìri te taòto i roto i te Metia ra, ua mou ia i reira.

19 Tei teie nei ao anaè ra ta tätou e tiaì i te Metia nei, e àti rahi to tätou i to te taata atoà.

20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

Ruta èv. 6.17-26

Ua hiò.

Ietu e te taata e rave rahi

(Mät 4,23-25; Mär 3,7-11)

17 Ua pou mai ra o ia i raro e rätou atoà, e faaea iho ra i te vähi päpü. Tei reira te tahi pae pipi a ana e te taata atoà e rave rahi, no Ierutarëma e no te mau vähi atoà i Iutea ra, e no te pae tähatai i Turia e Titona, i haere mai e faaroo ia na, e ia faaorahia rätou i to rätou maì;

18 e te feiä atoà i haapeàpeàhia e te värua faufau ra, faaora-atoà-hia iho ra rätou.

19 Ua tïtau mai ra taua feiä rahi atoà ra e faatiàià mai ia na, te püpü atu ra hoì te mana nä roto ia na e ora roa aè ra rätou atoà.

Te òaòa e te àti

(Mät 5,1-12)

20 Ua hiò atu ra ta na mata i ta na ra mau pipi, e ua parau atu ra: «E ao to òutou e tei haèhaa, no òutou hoì te Pätireia o te Atua ra.

21 «E ao to òutou e tei poìa i teie nei, e faaîhia hoì òutou «E ao to òutou e tei òto i teie nei, e àta hoì òutou.

22 «E ao to òutou ia riri mai te taata ia òutou, e ia faataa ê ia òutou, e ia tähito mai, e ia faaruè noa i to òutou iòa mä te faaìno, no te Tamaiti a te taata nei.

23 E òaòa i te reira mahana, e ôuòuà noa i te òaòa, ua ìte hoì òutou e e utuà rahi ta òutou tei te ao. I nä reira mai hoì to rätou hui tupuna i te mau perofeta ra.

24«E àti rä to òutou e te feiä taoà rahi, ua noaa hoì to òutou òaòaraa.

25 «E àti to òutou e te feiä i î na, E poìa hoì òutou. E àti to òutou e te feiä i àta i teie nei, E mihi hoì òutou e e òto.

26«E àti to òutou ia haamaitaì mai te taata atoà ia òutou. I nä reira hoì to rätou hui tupuna i te mau perofeta haavare ra.»

Manaò.

Mai te taata e hià ra i te räau ia noaa mai te pura auahi, mai te reira atoà te òhipa ta rätou e rave ra. Eere rä i te hiàraa mätamua e noaa mai ai te pura auahi. Te hiroà atoà ra ia tätou e, no te rahi o to tätou manaò faahapahapa e te tähitohito, e faahoì noa ai te Atua ia tätou i te haamataraa o to tätou parau, mai te tahi taata tei ihu, e tei hoì faahou, aore ra tei faahoì-faahou-hia i te vähi i hahi ai o ia, no te faatïtïàifaro mai i to na èà. Ua ìte maitaì tätou e, i teie mahana, ua ätea roa tätou i te fenua, ua ätea roa i te mau haapiiraa i arataì mai i te mau metua, e aita tätou e òhie nei i te färiiraa i te parau no te hoìraa. Te tupu nei te mau peàpeà i roto i to tätou mau ùtuafare, no te òhipa òre, te moni òre, teie mau faanahoraa no roto mai ai tera mea ta tätou e parau ra e oraraa faahiahia, vävähi te fenua no te hoo, òvere atu ra i nià i to na iho fenua.

E au rii i te tahi mau taata to tätou tei faaruè i te fenua no te haere i te ara e ìmi i te tahi oraraa hau atu i te maitaì, ia topa rätou i roto i te fifi, ia ìte i to rätou hape, ua haamä i te hoì i te vähi no reira mai rätou. No reira, haamanaò noa tätou e, aita e fifi to te hape, te òreraa rä e färii i te haamata âpï faahou, te reira te mea peàpeà. Te tamarii nei, ia paapaa te rima i te auahi, e faaea o ia i te faatoro i te rima i te vähi i mauiui ai o ia, âreà i teie ta tätou e ìte nei i teie mahana, rahi noa atu te taata i te mauiuiraa, rahi noa atoà atu to na onoöno i te haere i te reira vähi. Ia faaroo ra tätou i te mau parau taiòhia e tätou e naò ia tätou i te parau e, te höroà mai nei teie mau taiòraa i te tahi hiòraa âpï i nià i te mau tïtauraa a te Atua Nui Tumu Tahi, ia tià ia tätou ia ìte faahou i te ora e vai ra i Mäòhi Nui nei :

-Taramo 1, 3 E au o ia i te räau i tänuhia i te hiti ânävai ra: o tei hotu i to na ra tau mau, e o tei òre roa i mäheahea to na rau. Oia atoà tä na e rave, te maitaì ra ia.

-Ieremia 17, 8 Eiaha òe e mataù i to rätou mata; ei pïhaì atoà iho hoì au ia òe ei faaora ia òe, te parau mai ra te Fatu.

-1 Torinetia 15, 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

-Ruta èv. 6, 20 Ua hiò atu ra ta na mata i ta na ra mau pipi, e ua parau atu ra: «E ao to òutou e tei haèhaa, no òutou hoì te Pätireia o te Atua ra. 

I te reo o teie mau ìrava te haapäpü mai nei te reira ia tätou i te parau no ta tätou hiòraa i te hohoà o Mäòhi Nui i teie mahana, naò ia i te parauraa e ua ö Mäòhi Nui i roto i te hoê faanahoraa te au ia âpeehia na roto i te mau haapiiraa no te fenua, te moana e te reva. I te mea te Atua Nui Tumu Tahi èita i te hoê Atua no te òhipa pohe no te ora ra. Te taata teie e parauhia nei e tauturu te rähu a te Atua i te mau faanahoraa ia tupu tämau te ora i roto i te taata te riro nei te mau maitaì èi tïteàmata no hiòraa i te aroha e te here mutu òre, ia Atua te Atua, ia fenua te fenua, ia taata te taata, ua maitaì roa. Taiòiò noa ai tätou i teie mau parau, te uiui noa ra paha te manaò o te tahi i te tüàtiraa o teie parau no te fenua ei tïteàmata no te ìte, i teie mau parau e faahitihia nei e Ietu : no te òaòa e te àti,

-E ao to òutou e tei haèhaa, no òutou hoì te Pätireia o te Atua ra.

-E ao to òutou e tei poìa i teie nei, e faaîhia hoì òutou

-E ao to òutou e tei òto i teie nei, e àta hoì òutou.

-E ao to òutou ia riri mai te taata ia òutou,

-E òaòa i te reira mahana, e ôuòuà noa i te òaòa,

-E àti rä to òutou e te feiä taoà rahi, ua noaa hoì to òutou òaòaraa.

-E àti to òutou e te feiä i î na, E poìa hoì òutou.

-E àti to òutou e te feiä i àta i teie nei, E mihi hoì òutou e e òto.

-E àti to òutou ia haamaitaì mai te taata atoà ia òutou.

Teie mau faahitiraa parau a Ietu mai te tïteàmata te huru e tià e tauturu i te taata i te hiòraa e te ìteraa, e tauturu atoà te fenua i te taata i te ìteraa e te färiiraa ia na iho nä mua roa, e tauturu ta na mäa ia na i te ìteraa o vai rä o ia, no te mea e tämä te fenua i te taata, e faaâpï hoì i ta na hiòraa, e ta na märamaramaraa i te oraraa, i te vähi ta te Atua i haapärahi ia na. Te mea ia ta tätou e parau nei e, te hiroà tumu, te hiroà mäòhi.

Te varovaro nei teie reo no Atua  e parau ra ia Ieremia : 5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua. Te mea tei riro ei parau àro no Ieremia, ua orahia mai e to tätou mau tupuna i roto i te parau no te tänuraa i te püfenua, ia òre ia tupu faahou ia tätou teie fänau-faahou-raa ta te fenua e faaìte noa mai ra, e piri te ùputa o te pätireia, èie ä ia tätou e perehahu noa nei. I nià i teie èà hoìraa to tätou i te Atua ra, e mata na i te rave i te tïteàmata ta tätou i haapae roa, mai te hiroà òre e te färii òre e, o te tumu ia i àti noa ai to tätou mau haereà atoà, e òre ai hoì tätou e matara i roto i te oraraa. Ia hiòhia te rahiraa o te òhipa ta tätou e rave nei, no te tahi te mata, na te tahi e hiò nei no tätou ; no te tahi te manaò, e na te tahi e parau mai ra i te mea e au no tätou, te manaò tiàturi-roa-hia aè ia e tätou, e ua tae roa tätou i te färiiraa e, aita ihoä ta tätou e hiòraa, aita e parau, no te mea aita tätou. Tei parauhia mai i te mau metua, tei haapiihia ia rätou, e haere noa i reira ; ta te mau mitionare i haapii mai, e faaea noa i reira, eiaha e faaòhipa rahi i te manaò. E parau mau ihoä ia, ua ìte atoà rä tätou e, te metua, ia tae i te tau, e tuu o ia i te rima o te tamarii, e faaruè hoì te tamarii i te rima o te metua, no te mea eita te metua e tano e haere no te tamarii. Te vai ra teie taò ta tätou, àimama, no te hoê taata, ua paari, aita ä rä i faaruè i nä metua, e au atu ra e, na te metua noa ä e mama ra i ta na mäa. Ia òre te metua ia haere i te ïtiraa, nä hea te tamarii e haere ai i te rahiraa. E au tätou i teie mahana i te tamarii tei haamätauhia i te faaea naìnaì noa, tei haamataùhia i te rave i to na iho mata no te hiò i to na èà. Aita Ietu i mataù i te raveraa ite fenua ei tïteàmata no na ia parau o ia i te hotu o te fenua e : to ù tino tenä, a rave a àmu ; to ù toto tenä, a rave a inu. Ua tauturu te fenua ia Ietu i te ìteraa o vai o ia, ua horoà te fenua ia na i te märamarama i ìte ai o ia i te auraa o ta na òhipa, no reira mai hoì te püai ta na i faaòhipa no te faatupuraa i te hinaaro o te Atua, e aha ia te fenua e òre e tauturu atoà ai ia tätou i te faatupuraa i te hinaaro o te Atua. Mai ta Pauro e parau ra : 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra, e tano atoà tätou e parau mai te täuruuru òre te manaò e : tei roto to tätou ora i te fenua, e taua ora ra, to tätou ia märamarama, te auraa, ia märamarama e ia färii tätou i te auraa o te fenua, ua ora tätou, no te mea te reira te èà, te parau mau, e te ora. Te mea ta tätou e parau nei e, te fenua, te ùputa o te raì. No reira, mai te peu ua ìtehia ia tätou te ùputa, e aha ia te mea tätou i pärahi noa ai i räpae, e tomo anaè, e hoì anaè i te Atua ra, te tiaì mai ra te Atua ia tätou.

 

Teraì or. Faatura.

 

 

Ruta èv. 5.1-11 Pee

 

Tāpati 6 no Fëpuare 2022.

ÔROÀ

Pee

Taramo 138

To rima.

1 Na Tävita. E haamaitaì au ia òe, e te Fatu, mä ta ù âau atoà nei, e himene au ei haamaitaì ia òe, i mua i te aro o te mau atua.

2 E haamori tià atu vau i to nao moà ra, a haamaitaì atu ai i to òe iòa, e te Fatu no to òe aroha e ta òe ra parau mau: ua faarahi hoì òe i ta òe parau ia hau atu i to iòa atoà ra.

3 I te mahana i tiàoro atu ai au ra, ua parau mai òe ia ù; e ua horoà mai i te itoito i ta ù värua.

4 E hope te mau arii atoà o te fenua nei i te haamaitaì ia òe, e te Fatu, ia ìte rätou i te parau a to vaha.

5 E himene rätou i te mau parau a te Fatu: «E hanahana rahi hoì to te Fatu.

6 Teitei noa ä te Fatu, e haapaò mai ä o ia i tei haèhaa, âreà tei teòteò, ei te ätea ê o ia e hiò mai ai.»

7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù.

8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

Ìtaia 6.1-8

Teie au

Te tïtauraahia o Ìtaia

1 I te mätahiti i pohe ai te arii ra o Ûtia, hiò atu ra vau i te Fatu i te pärahiraa i nià i te teröno teitei e te teniteni; e ua î hoì te hiero i te hiti àhu roroa no na ra.

2 Te tià noa ra nä teräfi i nià aè: taìono o rätou atoà ra pererau; o e piti ra, ei täpoì ia i to na mata, o e piti ra, ei täpoì ia i ta na âvae, o e piti ra, ei maùeraa ia.

3 Ua pii iho ra rätou te tahi i te tahi, nä ô aè ra, E moà, e moà, e moà, O te Fatu manahope, ua î te fenua atoà nei i to na ra hanahana.

4 Ua turorirori iho ra nä pou i te tomoraa ra i te reo o to rätou piiraa; î aè ra hoì te hiero i te au auahi.

5 Ua nä ô aè ra hoì au, Âuë hoì au nei e ua mämü iho nei au; e taata vaha viivii hoì au, e tei rotopü hoì au i te mau taata vaha viivii atoà i te pärahiraa: ua hiò hoì ta ù mata nei i te arii, i te Fatu manahope ra.

6 Ua maùe mai ra te hoê teräfi ia ù nei; e tei ta na rima te hoê àrahu àma, i ravehia mai e ana i te faahöhoni no nià mai i te fata na.

7 Ua faatiàià mai ra i ta ù vaha, nä ô mai ra, Inaha, ua faatiàiàhia to ùtu i teie: ua faataa-ê-hia to òe piò, ua faaòrehia ta òe hara.

8 Ua faaroo atu ra vau i te reo o te Fatu, i te nä-ô-raa e, O vai ta ù e tono; o vai te haere no tätou? Ua parau atu ra vau, Inaha, teie au; o vau ta òe e tono.

1 Tōrīnetia 15.1-11

Huru

Te tiàfaahouraa o te Metia

1 E Faaìte atu rä vau ia òutou e a ù mau taeaè, i te Èvaneria ta ù i parau atu ia òutou na, ta òutou hoì i färii mai ra, e i mau ai hoì òutou na;

2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre.

3 Ua tuu atu hoì au ia òutou i mütaa iho ra, i tei noaa na ia ù ra, e i pohe te Metia i ta tätou nei hara, mai tei te parau i päpaìhia ra;

4 e i tänuhia hoì o ia, e tiàfaahou mai ra i te ruì toru, mai tei te parau i päpaìhia ra;

5 e i ìteä o ia e Tefa, e i te àhuru mä piti i muri aè.

6 E muri aè ra hoì, i ìteä o ia e te mau taeaè e pae atoà hänere e tiàhara, hoê ä ìteraa; te ora noa nei ä te rahi o taua feiä ra, ua taòto rä te tahi pae.

7 E muri aè ra hoì, ìteä iho ra o ia e Iatöpo, e i te mau âpotetoro atoà i muri aè.

8 E te hopeà iho ra, ìteä atoà iho ra ia ù, mai te mea e e mahemo vau.

9 E iti hoì au i te mau âpotetoro atoà ra, e òre hoì au e au ia parauhia e, e âpotetoro, no te mea i hämani ìno vau i te Ètärëtia o te Atua.

10 To ù nei rä huru e vai nei, no te here ia o te Atua; e te maitaì na na i horoàhia mai ia ù nei, aore ia i riro ei mea faufaa òre: e òhipa rahi hoì ta ù i rave i ta rätou atoà ra eere rä vau, o te maitaì rä a te Atua ia ù nei ra.

11 E teie nei, o vau tei aò ra, o vau ia, o rätou ra, o rätou ia, o ta mätou ä ia aò, e o ta òutou ä ia i faaroo.

Ruta èv. 5.1-11

Te tïtau

(Mät 4,18-22; Mär 1,16-20)

1 E te tià noa ra o ia i te hoê mahana i te hiti roto i Tenetareta ra, ua neneì noa mai ra te taata atoà e rave rahi ia na ra, e faaroo i te parau a te Atua.

2 Hiò atu ra o ia i e piti puè pahï i te tïpae-noa-raa i te hiti roto, âreà te feiä ravaai, tei uta ia te uhi ra i ta rätou ùpeà.

3 Haere atu ra o ia i nià iho i te hoê i taua nä pahï ra, i ta Timona ra, ua parau atu ra ia na e tute i tai iti aè. Pärahi iho ra o ia i raro, e ua haapii mai ra i nià i te pahï i taua feiä rahi ra.

4 E oti aè ra ta na parauraa, ua parau atu ra o ia ia Timona: «Hö atu i te vähi moana, e tuu i ta òutou ùpeà i te hoê häroà.

5 Ua parau mai ra Timona ia na, nä ô mai ra: «E te Fatu, i haa noa na mätou e ao noa aè nei te ruì, e aore roa i noaa, e tuu rä vau i te ùpeà o òe i parau mai na.

6 E ia tuu iho ra rätou, ua àti aè ra ia rätou te ià e rave rahi, motumotu iho ra ta rätou ùpeà.

7 Ua täpare atu ra rätou i to rätou i nià i te hoê pahï ra, ia haere atoà mai rätou e rave. Ua haere mai ra hoì rätou, ua faaî iho ra i nä pahï e piti atoà, e ua fätata roa i te tomo.

8 E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e:

«E haere ê òe, e te Fatu, e taata hara hoì au.

9 Roohia iho ra o ia e rätou atoà i te mäere rahi mataù, i taua häroà ià i noaa ia rätou ra.

10 O Iatöpo atoà hoì e o Ioane, nä tamarii a Tepetaio ra, ua âmui atoà räua ia Timona. Ua parau mai ra Ietu ia Timona: «Eiaha e mataù, i teie nei, e taata ta òe e noaa.

11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

Manaò

Mau taeaè, mau tuahine, te nünaa, o te Atua Nui Tumu Tahi, te haamaitaì nei tätou ma te faahanahana i te Atua Nui Tumu Tahi, no teie mau taiòraa i faataahia èi parau faaitoito i to tätou faaroo, ia tià ia tätou i te haafatata i te tumu no te märamarama to tätou ia ora. Te ora te tiàmaraa te reira no te taata faaroo, o ta te Atua i faatiàma i te parau tià e i te parau mau, tei ärataì i roto i te hau no te maitaì. Parau täno maitaì teie no tätou e te nunaa mäòhi, i te mea o teie to tätou oraraa mai te tau e te tau e tae roa mai i teie mahana. E nunaa tätou no roto i te hau, e no raro i te moana. O to tätou teie ora i te tuuraa i to tätou tiàturiraa i roto i te faufaa no te mau tumu o te mau maitaì no te aroha e te here i horoà ia tätou te itoito.

I teie mahana, no te mea aita te taata i ìte faahou i te òhipa, e no te mea mea rahi te òhipa âpï tei òre i ìtehia i mua ra, i rahi atoà ai te faaue, eiaha i te parauraa noa, te nä-murimuri-atoà-raa rä ia na no te hiòpoà e te haapii i te òhipa e rave. Te tumu rahi roa atu rä i püai roa ai te faaue, no te moni ia e àufauhia i te rave òhipa, no te hinaaro o te fatu òhipa ia hoo na ta na moni, e ia rahi te òhipa e oti.

Te feiä ra i färii hope roa i te fenua ei àpu färii i te täpaò no te aroha e te here o te Atua i te taata, ei taoà horoà na te Atua ia na, eiaha no te faatupu noa i to na hinaaro, ei tauturu rä ia na i te ìteraa e te faatupuraa i te hinaaro o te Atua, e topa te poa i to na mata, e riro te fenua i reira ei tïteàmata mau no na e òhie ai i te ìte e : Te mau haereà o Te Tumu Nui, te aroha ia e te parau mau i te feiä i haapaò i ta na parau i faaau e ta na i faaìte mai . Tei faariro i to na mäòhiraa ei mea ìno, ei mea faufaa òre, e tae noa atu i to na iòa, ua haafaufaa òre ia i te Atua, e tae noa atu i te fenua e amo ra ia na, te fenua i hii mai ia na e tei horoà mai i to na ora.

Tei maitaì i te Atua ra, ua maitaì ia. Mai te peu e hinaaro to te Atua ia tätou, te peeraa ia tätou ia na i te faatupuraa i to na hinaaro i te fenua nei, oia hoì ia faateiteihia to na iòa moà, ia haapaòhia to na hinaaro, ia faatupuhia to na hau i te fenua nei, ia faaea te taata i te nanao i to na mana, ia faaea i te haru i to na hanahana. Teie te tahi mau ìrava i faatumuhia mai roto mai i te mau taiòraa faataahia o teie mahana :

-Taramo 138, 8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

-Ìtaia 6, 8 Ua faaroo atu ra vau i te reo o te Fatu, i te nä-ô-raa e, O vai ta ù e tono; o vai te haere no tätou? Ua parau atu ra vau, Inaha, teie au; o vau ta òe e tono.

-1 Tōrīnetia 15, 10 To ù nei rä huru e vai nei, no te here ia o te Atua; e te maitaì na na i horoàhia mai ia ù nei, aore ia i riro ei mea faufaa òre: e òhipa rahi hoì ta ù i rave i ta rätou atoà ra eere rä vau, o te maitaì rä a te Atua ia ù nei ra.

-Ruta èv. 5, 11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

I parau ai te fëia paari e, te tärava rä te äau taata ta na täutai  E ia puai noa mai te vero, ia mau te ìato o te vaa, a roohia ai e te mataì.  O te oraraa atoà ia no teie nunaa i te hiti roto no Tenetareta i te tuhaa fenua no Tarirea. Teie reira o Ietu I te tià-noa-raa, I te hiòraa i teie mau taata tei hoì mai, mai te täutai mai, ua neneì mai rä te mau taata e rave rahi ia na rä  no te  faaroo faahou I te parau o te Atua. E tià ia parauhia e, e mau taata teie, tei mauruüru ia Ietu I to rätou faarooraa ia na i roto i te Tunato. Ua hinaaro faahou rä rätou e faaroo i te mau parau maitaì i parauhia no te Atua. No te rahi o te taata, ua paùma o ia i nià i te poti o Petero, e ua faatea rii äè rä i te tïpaeraa. Pärahi iho rä, e ua haapii atu rä i teie mau taata e rave rahi. Te parau rä no te tumu haapiiraa, aita roa ia e haapäpühia rä, e tià rä ia parauhia e, te haapiiraa ta Ietu e horoà nei, te parau no te mau ture a te Atua, ia faaroo, èi ia haapaò te taata. O te reo atoà ia  no te Atua i nià ia Ìtaia i te pene 6 i te ìrava 8, o vai ta ù e tono, o vai te haere no tätou. O ia atoà ia te reo o Ietu i nià ia Petero, ia oti äè ta na haapiiraa rä.

Ho ätu i te vahi moana.

Oia hoì haere atu i te vahi moana tärere, te vahi naeà-òre-hia e te aru o te ùpeà. I reira e tuu ai hoê aè tuuraa, eiaha e tä piti, e tä toru, hoê rä taime. O Ietu teie faaue nei, te Fatu no te mau àpoo mataì, te àito o te moana, te àivänaa no te mau vahi ïà. Oia hoì, èita o ia e hiò i te àvaè, tera àvaè rä, tera ia te täutai, tera pö rä, tera ia te täutai, tera mataì rä tera ia te täutai, e aore rä tera te àpa. Teie o Ietu e faaue nei, ia Petero, Iatöpo, e o Ioane e fano i te poti i te vahi üri o te moana e tuu ai i te ùpeà, i te hoê vahi mätau-òre-hia i reira tätou e faaî ai teie ùpeà maa òre. Te reo mai rä o Petero, e te Fatu i haa noa na mätou e ua ao, aita roa te täutai i manuia. Oia hoì, ua mauà to mätou taime, to na auraa rä, tera mau taata e rave rahi i uta aita ta rätou e maa, e to rätou mau ùtuafare, teie nei e nahea?

E tuu rä vau i te ùpeà o Òe i parau mai na

Ua töpä te ùpeà i roto i te moana üri, te vahi mätau-òre-hia. E aha tei ìtehia te manuia ia o te täutai, e rave rahi mau ïà i hei i nià i te ùpeà, ua motumotu te tahi mau vahi, ua î te poti o Petero, èita te ïà e ö ua naìnaìhia. Tarape iho rä i te tahi atu poti. Na teie na poti e piti i faaìte ia tätou te manuia teie täutai. Riro atu rä taua mahana rä èi òaòaraa na te fëia ravaai

O Petero i mua teie manuia rahi, ua tïpapa o ia i te pae turi o Ietu èi faaìteraa i to na faufaa òre i mua i teie reo no Ietu. Ho atu i te vahi moana. Tupu  atu rä te fäìraa hara a Petero, e te Fatu e taata hara hoì au. Aita-ê o Petero i teie taime i te hoê taata, aita faahou to na e faufaa i mua i te oraraa ta na i mätau. Àravihi i te òhipa täutai, ìte i te faatere i te mau òhipa, faaue i te mau rave òhipa. E teie nei te ìte nei o Petero e, te vai faahou nei te tahi mau raveà tei òre i naeàhia e to na märamarama. E te parau a Ietu ia Petero e, Eiaha e mätaù e taata ta òe e noaa i teie nei. Oia hoì, e tià ia òe ia faaamu i te taata i teie nei i te maa noo mai i te Atua rä. Èita atu rä òe e haere noa i te täutai, o òe änaè, te Atua atoà i pïhaì iho  ia òe e to òe mau hoa. E te tipaeraa rätou i tähatai, faaruè-iho ra, rätou i te òhipa mätauhia e rätou, pee atu rä ia Ietu i nià i te hoê òhipa âpï mätaù-òre-ätoà-hia e rätou.

E hoa here mä.

Te nunaa i pärahi i uta, tei faaroo i te mau hinaaro o te Atua, e tämaa ia rätou i te ïà i noaa ia Petero mä.

Na poti tei î i te ïà, o te hohoà te reira o te ÈTÄRËTIA

Tei ïà i hei i nià i te ùpeà, e täpaò ia no te àhune o te ÈTÄRËTIA.

Oia hoì tei hei i nià i te ùpeà a te Atua, e noaa ia, ia rätou te ora mure òre.

Te vahi i motumotu te ùpeà, te puai ia te reira o te ènemi.

Tei na roto i te àpoo au rä, no te pohe mure òre ia.

E ö tätou, teihea tätou i te heiraa tei nià i te ùpeà, e aore rä ua na roto tätou i te vahi motumotu i te horo i rapae.

11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

E aha te pee ta te ìrava e türama ra, te vahi päpü ta te mau taiòraa e faaìte rä te vai ra te tïtauraa e te haapiiraa ia ìte i te mau hopoià e tià i te faanaho ma te tiàma i mua i te mau täpura òhipa e ôpuahia ra. Ua faaruè i te mea i òre i naeàhia i te märamarama, ua pee i te märamarama. Oia mau, te märamarama te ùputa ia o te ora ta te mana o te Parau a te Atua i ìriti. Ia hiòhia anaè tätou i te òhipa i tupu ua parau iho ä te Atua èi ia mmm, ua mmm iho ra i muri iho teie mmm te türama ra, i te mau òhipa atoà ta te Atua i rave, ua parau te Atua ua tupu, ua hiò te Atua ua mauruüru te Atua te mea ta na i faatupu, e ua parau mea maitaì roa, ua parau, ua tupu, e te Atua iho tera e haapäpü ra e mea maitaì roa,  aita hoê taime te Atua i parau e, te vai ra te tahi mea aita i àfaro maitaì, te auraa ra te mau òhipa ta te Atua i rave, no te faaìte ia i te taata te täpaò no to na aroha e to na here ia na. No te mea ia parau anaè tätou te ùputa, e aha te ùputa te tahi vahi e na reira tätou i te ìte i te mea e vai ra i ò mai, i roto i teie ìritiraa te Atua i te ùputa o te mmm e aha te mea ta tätou  e ìte atu ra te vai ra iho ä te rahu tei faaìte mai te maitaì ta te Atua i faaineine no te taata mea täno tätou ia tütonu maitaì i nià i tera vahi te faaìte mai ra te reira te maitaì ta te Atua i faaineine no te taata e te reira mau maitaì no te faaìte ä ia i te taata to na aroha e to na here, ia haapoto-anaè-hia te mau mea atoà ta tätou e ìte nei i teie mahana te mea faaî nei i te fenua, te tai e te reva e tae noa atu to raro i te fenua tei òre tätou e ìte, no te faaìte ia i te taata i te aroha e te here o te Atua ia na. Mai te peu e ua ö mai te mmm  ua faufaa òre anei te pöuri, aita no te aha te mmm tei ö mai i roto i te pöuri te haamataraa te mau mea atoà  te vai ra te pöuri no te pöuri te parau te mmm tera i tomo mai i roto i te pöuri, i teie ra tomoraa mai te mmm i roto i te pöuri aita te pöuri i faaòrehia hau roa atu na te Atua iho horoà tei iòa o te mmm e to te pöuri, e aha te auraa ua ìte e ua färii te Atua i te mmm, e ua ìte atoà ra ua färii i te pöuri, te vai ra te tahi, te vai ra te tahi, haamanaò tätou e te mmm tera i ö mai i roto i te pöuri aita te mmm i haere mai e täpoì, aita te mmm i haere mai e faaòre te vai noa ra te pöuri. Ia hiò tätou i te òhipa i tupu i to te Atua rahuraa te raì e te fenua, no te vai te parau, ta tätou e parau nei te päpe, ua ani te Atua i te päpe ia vaiiho mai te tahi vahi taa atu ra te päpe i nià, taa mai nei te päpe i raro, tera area ta te päpe i faaruè no te pähono i te aniraa a te Atua, te vahi ia ta te Atua faataa èi tupuraa no te raì, tera päpe i raro taa atu te tahi vai mai nei te fenua tera te faanahoraa o te raì e te fenua, teie nei ra te naò atu na vau e, te haamataraa no te päpe te parau, haamanaò na tätou e aha te òhipa i tupu i te hararaa te taata i te tau o Noa, e aha te òhipa ta te Atua i rave, ua faahoì faahou te Atua i te fenua i to na huru mätamua, hoì faahou te päpe i te vahi ta na i horoà e aha i ìtehia e pohe. No reira mai te peu e ö mai te mmm i roto i te pöuri, aita te Atua i faaòre i te pöuri te vai noa ra te pöuri e te tiaì noa ra te pöuri i to na taime no te rave faahou i te vahi ta na i horoà, eiaha tätou e manaò ua faateateahia te fenua, eiaha tätou e manaò ua tuu mai te Atua i te mmm ua ora tätou aita aita hoê noa mea te taata e ora ai, ia faaea noa i roto i te mmm te taata e paruparu te taata èita e haapaò na na noa e hitimahuta ia hoì faahou mai te pöuri e rave i te mea ta na i horoà, te manaò ra tätou e i teie mahana tei roto tätou i te mmm, òia tei roto i te mmm te tiaì atoà noa ra ra te pöuri. No te aha te taata te tahi tau, èita i te tau atea roa ua färii te mea ta tätou e parau ra i teie nei mahana e Parau Maitaì te parau a te Atua ua òaòa i te tomoraa i roto i te mau taata e hinaaro e haamori i te Atua e teie mahana e aha te parau rahi e faaroohia i roto i te vaha o te taata, aita te fare pure e î faahou nei, aita te taata ànaanatae faahou nei, èita te feiä âpï ànaanatae faahou i te parau a te Atua, e aha te auraa te pöuri tera e hoì mai ra aita tätou i ìte te manaò nei tätou e tei roto tätou i te mmm ua faaorahia tätou aita, te ora to te taata ia täpeàraa, to na täpeà pautuüturaa i te mmm e ära maitaì èita te pöuri e poroì mai e hoì faahou mai ò na e rave no reira te tïtauraa ia tätou i teie mahana e ère i te parau-naò-raa e ua naò mai te Atua ua mmm, èi ia mmm, ua mmm ò ia ua ö mai te mmm te vai noa ra ra te pöuri te auraa te tïtauraa ia tätou ia vai ära noa täpeà te mmm i horoàhia mai eiaha e faaruê hoê taime èita tätou e tauà, hoê taime neneva-rii-hia tei upoo tera pöuri ua hoì mai. E te pöuri, e aha te auraa o te pöuri o te pohe ia. No reira hinaaro tätou i te ora täpeà i te mmm, te auraa ia o te Pee ta te ìrava e haapäpü ra, ta Ìtaia ia e parau mai nei ia tätou i teie mahana, 8 Ua faaroo atu ra vau i te reo o te Fatu, i te nä-ô-raa e, O vai ta ù e tono; o vai te haere no tätou? Ua parau atu ra vau, Inaha, teie au; o vau ta òe e tono.   

 

Teraì òr. Faatura.