Ruta èv. 6.17-26 Ua hiò.

 

Tāpati 13 no Fëpuare 2022.

Ua hiò.

Taramo 1

Tänuhia

1 E ao to te taata, aore e faaau i to na haereà i te aò a te paieti-òre, aore i taahi i te èà o te feiä rave hara ra, e aore hoì i pärahi i te pärahiraa o te feiä tähitohito ra.

2 O  tei hinaaro rä i te ture a te Fatu, e tei ta na ture to na manaòraa i te ruì e te ao.

3  E au o ia i te räau i tänuhia i te hiti ânävai ra: o tei hotu i to na ra tau mau, e o tei òre roa i mäheahea to na rau. Oia atoà tä na e rave, te maitaì ra ia.

4 Eere mai te reira te feiä paieti-òre ra: e au ia i te ota e puehu noa i te mataì ra.

5 E òre e mau ai te paieti-òre i te haaväraa, e te rave hara i te âmuiraa o te parau tià ra.

6 Te au mai ra hoì te Fatu i te haereà o te parau tià ra, âreà te haereà o te feiä paieti-òre ra, o te pohe ia.

Ieremia 17.5-8

Mataù

5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua.

6 Ua parau atu ra vau, âuë e te ATUA, e te Fatu e, aore hoì au i ìte i te parau; e tamaiti iti hoì au,

7 Ua parau mai ra te Fatu ia ù, Eiaha e parau, e tamaiti iti au: o tei tonohia òe e au ra, o ta òe ia e haere; e o ta ù e faaue ia òe ra, o ta òe ia e parau,

8 Eiaha òe e mataù i to rätou mata; ei pïhaì atoà iho hoì au ia òe ei faaora ia òe, te parau mai ra te Fatu.

1 Tōrīnetia 15.12-20

Mätamua

12 Te parau-haere-hia nei te Metia e, ua tiàfaahou o ia i te poheraa ra: e aha i parau ai te hoê pae o òutou e, aore e tiàfaahouraa to tei pohe?

13 Aore e tiàfaahouraa to tei pohe ra, aore atoà te Metia i tià i nià;

14 e aore te Metia i tià i nià ra, e haavare mau ta mätou aò nei, e e haavä atoà to òutou faaroo.

15 Ua riro hoì mätou ei ìte haavare na te Atua; no te mea ua parau mätou i te Atua e, ua faatià o ia i te Metia; aita mau e faatiàhia tei pohe ra, aore ia o ia i faatià ia na.

16 Eita hoì e faatiàhia tei pohe ra, aore ia te Metia i faatiàhia.

 17 E aita hoì te Metia i faatiàhia ra, e mea faufaa òre to òutou faaroo; te vai noa na ia òutou mä ta òutou hara atoà.

18 E te feiä atoà i maìri te taòto i roto i te Metia ra, ua mou ia i reira.

19 Tei teie nei ao anaè ra ta tätou e tiaì i te Metia nei, e àti rahi to tätou i to te taata atoà.

20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

Ruta èv. 6.17-26

Ua hiò.

Ietu e te taata e rave rahi

(Mät 4,23-25; Mär 3,7-11)

17 Ua pou mai ra o ia i raro e rätou atoà, e faaea iho ra i te vähi päpü. Tei reira te tahi pae pipi a ana e te taata atoà e rave rahi, no Ierutarëma e no te mau vähi atoà i Iutea ra, e no te pae tähatai i Turia e Titona, i haere mai e faaroo ia na, e ia faaorahia rätou i to rätou maì;

18 e te feiä atoà i haapeàpeàhia e te värua faufau ra, faaora-atoà-hia iho ra rätou.

19 Ua tïtau mai ra taua feiä rahi atoà ra e faatiàià mai ia na, te püpü atu ra hoì te mana nä roto ia na e ora roa aè ra rätou atoà.

Te òaòa e te àti

(Mät 5,1-12)

20 Ua hiò atu ra ta na mata i ta na ra mau pipi, e ua parau atu ra: «E ao to òutou e tei haèhaa, no òutou hoì te Pätireia o te Atua ra.

21 «E ao to òutou e tei poìa i teie nei, e faaîhia hoì òutou «E ao to òutou e tei òto i teie nei, e àta hoì òutou.

22 «E ao to òutou ia riri mai te taata ia òutou, e ia faataa ê ia òutou, e ia tähito mai, e ia faaruè noa i to òutou iòa mä te faaìno, no te Tamaiti a te taata nei.

23 E òaòa i te reira mahana, e ôuòuà noa i te òaòa, ua ìte hoì òutou e e utuà rahi ta òutou tei te ao. I nä reira mai hoì to rätou hui tupuna i te mau perofeta ra.

24«E àti rä to òutou e te feiä taoà rahi, ua noaa hoì to òutou òaòaraa.

25 «E àti to òutou e te feiä i î na, E poìa hoì òutou. E àti to òutou e te feiä i àta i teie nei, E mihi hoì òutou e e òto.

26«E àti to òutou ia haamaitaì mai te taata atoà ia òutou. I nä reira hoì to rätou hui tupuna i te mau perofeta haavare ra.»

Manaò.

Mai te taata e hià ra i te räau ia noaa mai te pura auahi, mai te reira atoà te òhipa ta rätou e rave ra. Eere rä i te hiàraa mätamua e noaa mai ai te pura auahi. Te hiroà atoà ra ia tätou e, no te rahi o to tätou manaò faahapahapa e te tähitohito, e faahoì noa ai te Atua ia tätou i te haamataraa o to tätou parau, mai te tahi taata tei ihu, e tei hoì faahou, aore ra tei faahoì-faahou-hia i te vähi i hahi ai o ia, no te faatïtïàifaro mai i to na èà. Ua ìte maitaì tätou e, i teie mahana, ua ätea roa tätou i te fenua, ua ätea roa i te mau haapiiraa i arataì mai i te mau metua, e aita tätou e òhie nei i te färiiraa i te parau no te hoìraa. Te tupu nei te mau peàpeà i roto i to tätou mau ùtuafare, no te òhipa òre, te moni òre, teie mau faanahoraa no roto mai ai tera mea ta tätou e parau ra e oraraa faahiahia, vävähi te fenua no te hoo, òvere atu ra i nià i to na iho fenua.

E au rii i te tahi mau taata to tätou tei faaruè i te fenua no te haere i te ara e ìmi i te tahi oraraa hau atu i te maitaì, ia topa rätou i roto i te fifi, ia ìte i to rätou hape, ua haamä i te hoì i te vähi no reira mai rätou. No reira, haamanaò noa tätou e, aita e fifi to te hape, te òreraa rä e färii i te haamata âpï faahou, te reira te mea peàpeà. Te tamarii nei, ia paapaa te rima i te auahi, e faaea o ia i te faatoro i te rima i te vähi i mauiui ai o ia, âreà i teie ta tätou e ìte nei i teie mahana, rahi noa atu te taata i te mauiuiraa, rahi noa atoà atu to na onoöno i te haere i te reira vähi. Ia faaroo ra tätou i te mau parau taiòhia e tätou e naò ia tätou i te parau e, te höroà mai nei teie mau taiòraa i te tahi hiòraa âpï i nià i te mau tïtauraa a te Atua Nui Tumu Tahi, ia tià ia tätou ia ìte faahou i te ora e vai ra i Mäòhi Nui nei :

-Taramo 1, 3 E au o ia i te räau i tänuhia i te hiti ânävai ra: o tei hotu i to na ra tau mau, e o tei òre roa i mäheahea to na rau. Oia atoà tä na e rave, te maitaì ra ia.

-Ieremia 17, 8 Eiaha òe e mataù i to rätou mata; ei pïhaì atoà iho hoì au ia òe ei faaora ia òe, te parau mai ra te Fatu.

-1 Torinetia 15, 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

-Ruta èv. 6, 20 Ua hiò atu ra ta na mata i ta na ra mau pipi, e ua parau atu ra: «E ao to òutou e tei haèhaa, no òutou hoì te Pätireia o te Atua ra. 

I te reo o teie mau ìrava te haapäpü mai nei te reira ia tätou i te parau no ta tätou hiòraa i te hohoà o Mäòhi Nui i teie mahana, naò ia i te parauraa e ua ö Mäòhi Nui i roto i te hoê faanahoraa te au ia âpeehia na roto i te mau haapiiraa no te fenua, te moana e te reva. I te mea te Atua Nui Tumu Tahi èita i te hoê Atua no te òhipa pohe no te ora ra. Te taata teie e parauhia nei e tauturu te rähu a te Atua i te mau faanahoraa ia tupu tämau te ora i roto i te taata te riro nei te mau maitaì èi tïteàmata no hiòraa i te aroha e te here mutu òre, ia Atua te Atua, ia fenua te fenua, ia taata te taata, ua maitaì roa. Taiòiò noa ai tätou i teie mau parau, te uiui noa ra paha te manaò o te tahi i te tüàtiraa o teie parau no te fenua ei tïteàmata no te ìte, i teie mau parau e faahitihia nei e Ietu : no te òaòa e te àti,

-E ao to òutou e tei haèhaa, no òutou hoì te Pätireia o te Atua ra.

-E ao to òutou e tei poìa i teie nei, e faaîhia hoì òutou

-E ao to òutou e tei òto i teie nei, e àta hoì òutou.

-E ao to òutou ia riri mai te taata ia òutou,

-E òaòa i te reira mahana, e ôuòuà noa i te òaòa,

-E àti rä to òutou e te feiä taoà rahi, ua noaa hoì to òutou òaòaraa.

-E àti to òutou e te feiä i î na, E poìa hoì òutou.

-E àti to òutou e te feiä i àta i teie nei, E mihi hoì òutou e e òto.

-E àti to òutou ia haamaitaì mai te taata atoà ia òutou.

Teie mau faahitiraa parau a Ietu mai te tïteàmata te huru e tià e tauturu i te taata i te hiòraa e te ìteraa, e tauturu atoà te fenua i te taata i te ìteraa e te färiiraa ia na iho nä mua roa, e tauturu ta na mäa ia na i te ìteraa o vai rä o ia, no te mea e tämä te fenua i te taata, e faaâpï hoì i ta na hiòraa, e ta na märamaramaraa i te oraraa, i te vähi ta te Atua i haapärahi ia na. Te mea ia ta tätou e parau nei e, te hiroà tumu, te hiroà mäòhi.

Te varovaro nei teie reo no Atua  e parau ra ia Ieremia : 5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua. Te mea tei riro ei parau àro no Ieremia, ua orahia mai e to tätou mau tupuna i roto i te parau no te tänuraa i te püfenua, ia òre ia tupu faahou ia tätou teie fänau-faahou-raa ta te fenua e faaìte noa mai ra, e piri te ùputa o te pätireia, èie ä ia tätou e perehahu noa nei. I nià i teie èà hoìraa to tätou i te Atua ra, e mata na i te rave i te tïteàmata ta tätou i haapae roa, mai te hiroà òre e te färii òre e, o te tumu ia i àti noa ai to tätou mau haereà atoà, e òre ai hoì tätou e matara i roto i te oraraa. Ia hiòhia te rahiraa o te òhipa ta tätou e rave nei, no te tahi te mata, na te tahi e hiò nei no tätou ; no te tahi te manaò, e na te tahi e parau mai ra i te mea e au no tätou, te manaò tiàturi-roa-hia aè ia e tätou, e ua tae roa tätou i te färiiraa e, aita ihoä ta tätou e hiòraa, aita e parau, no te mea aita tätou. Tei parauhia mai i te mau metua, tei haapiihia ia rätou, e haere noa i reira ; ta te mau mitionare i haapii mai, e faaea noa i reira, eiaha e faaòhipa rahi i te manaò. E parau mau ihoä ia, ua ìte atoà rä tätou e, te metua, ia tae i te tau, e tuu o ia i te rima o te tamarii, e faaruè hoì te tamarii i te rima o te metua, no te mea eita te metua e tano e haere no te tamarii. Te vai ra teie taò ta tätou, àimama, no te hoê taata, ua paari, aita ä rä i faaruè i nä metua, e au atu ra e, na te metua noa ä e mama ra i ta na mäa. Ia òre te metua ia haere i te ïtiraa, nä hea te tamarii e haere ai i te rahiraa. E au tätou i teie mahana i te tamarii tei haamätauhia i te faaea naìnaì noa, tei haamataùhia i te rave i to na iho mata no te hiò i to na èà. Aita Ietu i mataù i te raveraa ite fenua ei tïteàmata no na ia parau o ia i te hotu o te fenua e : to ù tino tenä, a rave a àmu ; to ù toto tenä, a rave a inu. Ua tauturu te fenua ia Ietu i te ìteraa o vai o ia, ua horoà te fenua ia na i te märamarama i ìte ai o ia i te auraa o ta na òhipa, no reira mai hoì te püai ta na i faaòhipa no te faatupuraa i te hinaaro o te Atua, e aha ia te fenua e òre e tauturu atoà ai ia tätou i te faatupuraa i te hinaaro o te Atua. Mai ta Pauro e parau ra : 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra, e tano atoà tätou e parau mai te täuruuru òre te manaò e : tei roto to tätou ora i te fenua, e taua ora ra, to tätou ia märamarama, te auraa, ia märamarama e ia färii tätou i te auraa o te fenua, ua ora tätou, no te mea te reira te èà, te parau mau, e te ora. Te mea ta tätou e parau nei e, te fenua, te ùputa o te raì. No reira, mai te peu ua ìtehia ia tätou te ùputa, e aha ia te mea tätou i pärahi noa ai i räpae, e tomo anaè, e hoì anaè i te Atua ra, te tiaì mai ra te Atua ia tätou.

 

Teraì or. Faatura.