Ruta èv. 19.1-10 Poto

 

Tāpati 30 no Âtopa 2022.

ÔROÀ 

REFOROMĀTIO

Poto

Mau taiòraa.

Taramo 145

1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu.

2 E haamaitaì ä vau ia òe i te mau mahana atoà nei, e ârue au i to iòa e a muri noa atu.

3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi.

4 Te mau uì atoà të faarahi i ta òe òhipa, e e faaìte hoì i ta òe ra òhipa mana.

5 E parau vau i te tura e te hanahana o to òe ra mana, e te mau räveà taa ê na òe ra.

6 E parau rätou i te mana o ta òe ra mau räveà mataù, e e faaìte hoì au i to òe ra mana.

7 E parau ä rätou i te manaòraa o to òe ra maitaì rahi, e himene hua hoì i ta òe ra parau tià.

8 E hämani maitaì e te aroha to te Fatu, e òre e riri vave, e te faaherehere rahi.

9 Hämani maitaì to te Fatu i te taata atoà, e te vai ra to na aroha faaherehere rahi i nià i ta na atoà ra mau òhipa.

10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe.

11 E parau rätou i te hanahana o to òe ra pätireia, e faatià noa hoì i ta òe ra mau räveà püai.

12 I te faaìteraa i te tamarii a te taata nei i to na ra mana, e te hanahana e te manaò to na ra pätireia.

13 O to òe ra pätireia, e pätireia mure òre ia, e to òe ra mana, e tae ia i te mau uì atoà ra.

13 bis(E Atua mau te Atua e te haavare òre i roto i ta na mau òhipa.)

14 Te mau ra te Fatu i te feiä e hià ra, e ua faatià i te feiä e piò i raro ra.

15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau.

16 Te heheu nei òe i to rima, e te haamäha nei i te hiaai o te mau mea ora atoà nei.

17 E parau tià ta te Fatu i ta na atoà ra mau haereà, e te hämani maitaì i ta na atoà ra mau òhipa.

18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre.

19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou.

20 Te tiaì nei te Fatu i te feiä i hinaaro ia na, âreà te feiä paieti-òre ra, e haamouhia ia e ana.

21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

Ìtaia 45.22-24

22 E hiò mai òutou ia ù ia ora, e te mau hopeà mai o te fenua ra; o vau hoì te Atua, e aita ä atu.

23 Te nä ô mai ra te Fatu, Ua tapu vau ia ù iho; ua reva te parau mau no roto i to ù nei vaha; te parau ia e òre e faaòrehia ra: e piò te mau turi atoà i raro i mua ia ù; e tapu hoì te vaha atoà i te Atua, i te nä-ô-raa e, Tei i te Fatu anaè ra te parau tià e te püai no ù.

24 E tae anaè mai rätou ia na, e e haamä te feiä atoà i riri mai ia na ra;

2 Tētāronia. 1.11- 12.

11 I pure ai hoì mätou ia òutou aore i faaea, ia faaau to tätou Atua ia òutou i taua parauraa nei, e ia faatupu hua o ia i te hämani maitaì o to na ra maitaì, e te òhipa ra o te faaroo mä te püai.

12 Ia haamaitaìhia te iòa o to tätou Fatu ra o Ietu Metia ia òutou, e o òutou hoì ia haamaitaìhia ia na, i te aroha mau o to tätou Atua, o te Fatu ra o Ietu Metia.

2.1-2

Te taata ìno

1 Te hinaaro nei rä mätou, e te mau taeaè, i te parau i te taeraa mai o to tätou Fatu o Ietu Metia ra, e to tätou haaputuputuraa i pïhaì iho ia na ra,

2 ia òre to òutou âau ia âueue vave, ia òre ia hitimaùe, i te hoê värua atu, e te parau, e te reta, mai te mea e no ô nei atu ia mätou nei, e mai te mea hoì e ua fätata roa te mahana o te Metia ra.

Ruta èv. 19.1-10

Ietu e o Tätäio

1 E Tomo atu ra Ietu i Ierito haere atu ra nä roto.

2 E inaha, tei reira te hoê taata o Tätäio te iòa, e taata taoà e e feiä òhi tute rahi hoì.

3 Te hinaaro ra o ia i te hiò ia Ietu ia ìte i te huru; e aita aè ra o ia i ìte, i te rahi o te taata, e taata poto hoì o ia.

4 Horo atu ra o ia nä mua, paìùma atu ra i nià i te hoê tütämino e hiò ia na; te nä reira mai ra hoì o ia i te haere.

5 E tae mai ra Ietu i taua vähi ra, ua hiò aè ra o ia i nià, ìte atu ra ia na, e ua parau atu ra ia na: «E Tätäio, a pou mai i tënä na, ei to fare ra hoì au pärahi ai âùanei.

6 Ua pou òiòi mai ra o ia i raro, ìte maitaì mai ra ia na mä te òaòa.

7 E ìte aè ra taua feiä rahi atoà ra, ua ôhumu iho ra, nä ô aè ra: «Te haere atu ra o ia ei manihini na te taata rave hara.

8 Ua tià noa mai ra Tätäio i mua i te aro o Ietu, nä ô mai ra: «Inaha, e te Fatu, e horoà vau i te âfa i ta ù nei taoà na te taata rii, e i hämani ìno na vau i te tahi taata atu i te hoê mea iti aè, ia taìmaha ia ta ù e faahoì atu nana.

9 Ua nä ô aè ra Ietu ia na: «Ua tae mai te ora i teie nei fare i teie nei mahana, e tamaiti atoà hoì o ia na Âperahäma.

10 I haere mai nei hoì te Tamaiti a te taata nei e ìmi i tei moè ra e faaora.

Manaò.

E taata poto teie ta tätou e färerei nei i roto i te tahi taiòraa e faanaòhia nei e tätou i teie mahana, i te faaìteraa a te Parau Maitaì. Te poto e fäito teie no te faaìte te vai ra te tahi mea roa atu i te tahi, no te taata e no te tauhaa e no te manaò tatara o te taata. Te poto te vai ra te ìmiraa raveà no te haapäpü i to na tiàraa i roto i te  oraraa vaamataèinaa, oia atoà no te roa, e naò ia teie manaò i te faahitiraa e na taò tauàti teie, i te mea e faaìte atoà i te parau no te tau, te ruì, te ao, e taò teie tei haapaòhia no te mau maitaì atoà tei faatoro i te ìteraa i te hanahana o te Atua Nui Tumu Tahi. Ia haere tätou nä nià i te tahi èà mätau-òre-hia e tätou, no te tauturu i te feiä haere, e horoà mai te taata arataì i te tahi mau täpaò, ia ìte noa rätou e, aita rätou i ätea i te èà. Ua ìte maitaì rä tätou e, e tauturu noa teie, eita te èà e hope i nià i te täpaò. Mai te peu e èà poto, e iti ia te täpaò; ia roa atu ä te èà, e rahi atoà ia te täpaò. I nià i te èà ta teie na taò e ani ra ia tätou ia haapaò maitaì, e piti noa täpaò ta na e tuu mai ra te ìteraa te värua faatupu òhipa e te puai o te taò, te täpaò te tahi mea tei haamanaò mai i te tahi. Aita atu mea ta teie nä täpaò e haamanaò mai ra maoti rä, te mea ta te Atua iho e parau ra e, te fenua e to na î, te mauraa teie no  fenua e to na î i te parau mau a te Atua, e te faaìte ra hoì i te èà e tae ai te taata i te Atua ra. Aita atu tauturu maitaì ia tiàturi te arataìraa i ta na faatupuraa òhipa maoti rä, te fenua, no te mea hoê ä ta räua faaìteraa. E aha ia tätou e ôtohetohe noa, mai te matahurahura mai o teie nei ao, te mea ta te fenua i faaìte noa mai na, te mea atoà ia no reira Ietu i tonohia mai ai i teie nei ao. E fenua noa ihoä te fenua, o Ietu ihoä Ietu. Te parau ta te taata i òre i färii hou o Ietu, teie ia ta na e faaroo nei e ta na e maèè nei ; aita te parau i taui, te räveà ta te Atua i faaòhipa no te faaìteraa i te reira, te mea noa ia i taui. E ara maitaì rä tätou i teie vähi : Aita o Ietu i haere mai e haru i te òhipa i ravehia mai e te fenua, aita atoà o ia i haafaufaa òre, ua faahanahana rä Ietu i te fenua i te parauraa e, terä ta te fenua e rave ra, o vau ia ; terä ta te fenua e horoà mai ra, to ù ia tino, to ù ia toto ; aita rä o ia i faaea noa i reira ua tae roa atoà o ia i te parauraa ia na e, e Tamaiti na te taata, oia hoì e Tamaiti na te âtamu, e Tamaiti na te fenua, e ua riro teie iòa ta na iho i mäìti ei teòteòraa no na. Mai ia Ietu rä e parau ra e, o vau e te Metua, hoê ä ia, nä roto i te tahi atu huru parauraa, te faaìte atoà nei o ia e, o vau e te fenua, hoê ä ia. E mëhara rahi to Ietu i te fenua no te haarahi ta na i rave tuutuu òre mai i te faahanahanaraa i te Atua mai te haèhaa e te moèmoè rahi. Ua ìte Ietu i te hinaaro o to na nünaa, oia hoì ia ìte o ia e ia färii i te iòa e te tiàraa e täamu ia na i to na mau tupuna, te Tamaiti a Tävita. I roto rä i te hanahana o te taata e te hanahana o te Atua, ua mäìti o ia i te haèhaa o te fenua e faateniteni noa ra i te iòa o te Atua.

A ui atu ai tätou : àhiri, teie faahanahanaraa i te Atua, na te vine noa änei e te tïtona e rave ra, aore ra na te täatoàraa o te mau mea i pü mai i roto i te märamarama o te parau a te Atua. Ua ìte Ietu i te tumu o to na tere i te ao nei e te mea te Atua i tono ai ia na, ua ìte o ia te faatura i te haarahi i ravehia mai e te fenua, mai ia na i ìte atoà i te faatura ia rätou i haa mai nä mua ia na, mai ia Möte räua o Eria (Mätaio 17, 3), no te mea hoê ä ta rätou täviniraa, hoê ä ta rätou tïtauraa : te hanahana o te Atua ia ìtehia, ia òre te hoê òhipa ta te Atua i rave ia haamoèhia, ia faatenitenihia rä to na iòa moà. I roto i to na hinaaro rahi e faahanahana, e faateniteni, e haamaitaì i te Atua, aita te päpaì taramo e ani ra i te vine e te tïtona ia rave i te reira täpura òhipa, te täatoàraa rä o te rahu a te Atua teie e anihia nei ia âmui i to rätou püai e to rätou hinaaro haamori i te Atua no te faatupuraa i te reira Taramo 148, 1-13. Ia parau mai ä te päpaì taramo e : Te aroha e te parau mau, ua färerei räua, te parau tià e te hau, ua hohoì räua ; e tupu mai te parau mau no roto i te fenua, e hiò mai te parau tià mai te raì mai Taramo 85, 10-11, e uiui te manaò i te auraa o teie vahavaha rahi e teie tiàturi òre rahi to tätou i te fenua. Ahiri, no te faufaa òre änei o te fenua i tanu ai te Atua i ta na parau mau i roto i te fenua, i püpü ai hoì i te reira i roto i te rima o te fenua, e na vai i horoà i te taata te mana no te mäìtiìti i roto i te horoà a te fenua, te mea maitaì e te mea ìno, te mea faufaa e te mea faufaa òre. Ia parau mai Ietu no te horoà a te fenua e, o vau tenä, no te aha tätou i hinaaro ai e märö i te Atua. Te mea ta Ietu e parau ra no na iho, e au roa atoà no te fenua ia nä ô mai o ia e : Tei parau i te parau no na iho ra, te ìmi ra ia i to na iho hinuhinu, tei ìmi rä i te hinuhinu o tei tono mai ia na, e parau mau ta na, aita roa e haavare o roto ia na Ioane 7, 18. Te fenua, te mau raì, e te täatoàraa o te rahu a te Atua, te parau noa nei rätou i te hanahana o te Atua. E tano ai tätou e parau i te taata e, a hiò e a faaroo. Ua ineine te rahu a te Atua i te haapii ia òe. Teie atu ra te haapotoraa o ta tätou parau no teie täpati, èi haamanaòraa na tätou i te parau no te Reforomatio, oia hoì te faatïtïàifaroraa i te hinaaro o te Atua Nui Tumu Tahi i te taata teie te tahi o te mau parau :

-Taramo 145, 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou.

-Ìtaia 45, 23 Te nä ô mai ra te Fatu, Ua tapu vau ia ù iho; ua reva te parau mau no roto i to ù nei vaha; te parau ia e òre e faaòrehia ra: e piò te mau turi atoà i raro i mua ia ù; e tapu hoì te vaha atoà i te Atua, i te nä-ô-raa e, Tei te Fatu anaè ra te parau tià e te püai no ù.

-2 Tetaronia 2, 2 ia òre to òutou âau ia âueue vave, ia òre ia hitimaùe, i te hoê värua atu, e te parau, e te reta, mai te mea e no ô nei atu ia mätou nei, e mai te mea hoì e ua fätata roa te mahana o te Metia ra.

-Ruta èv. 19, 10 I haere mai nei hoì te Tamaiti a te taata nei e ìmi i tei moè ra e faaora.

Ua moè te taata i roto i ta na iho mau faanahoraa, ua òhipa i te mau faufaa o te aru èi faatupuraa i to na iho hanahana, ua faatara päpehia te ôpuaraa faaora a te Atua Nui Tumu Tahi ua ateä te taata i te tumu o te ora. i te rave a te mau faatere Tätorita Roma i tera tau, i te parauraa i te Moà o te Päpa e o ia anaè te tià o te Atua i nià i te fenua, ua hahi. Te parauraa ia Maria te metua vahine o te Atua, ua hahi. Te hooraa i te titeti no te tomo i roto i te Patireia o te Atua, ua hahi. Te ôroà eufari te tino, te toto mau teie o Ietu, ua hahi, teie ta Ietu i parau, a àmu to ù tino tena, a ïnu to ù toto tena e te mau taime atoà e faatià òutou teie àiraa maa te haamanaò ra ia òutou i to Ù pohe e to Ù tiàfaahouraa. Teie te tahi mau tumu èi haapotoraa i na parau e 95 i piahia e Rütero Maratino i nià i te ùputa no te fare pure i te fenua Heremani i te mätahiti 1517 i te 31 no te märama no Âtopa, e naò ia teie manaò i te parauraa e, e 505 mätahiti i teie nei. O te mea ta tätou e haamanaò nei te òhipa rahi i ravehia mai e teie tävini no te Atua i to na tau. Te faatïtïàifaro-faahou-raa i te ôpuaraa faaora a te Atua i te taata, e ora te taata i to na iho Faaroo, e faatiàhia o ia i to na iho faaroo. Te Parau Maitaì ia e färereihia nei e tätou i teie mahana i te faaìteraa a Ruta èv. I te pene 19 i te mau ìrava 1 e tae i te 10, te parau no te hoê taata poto tei piihia o Tätäio. O Tätäio e fatu òhipa teie e tià i te ùputa tomoraa i roto i te òire, no te faaàufau i te taata ia nià i teie èà i te haere, e òire atoà i reira e täpïhoohia ai te mau puaa, e te mau täuihaa rau hou a tae ai i Ierutarëma. Mai te mea ra te èà poto aè teie no te haere i Ierutarëma, tei nià i teie èà te tupuraa ta tätou parau no teie mahana, ua ìmi o Tätäio i te raveà no te faaäteatea i to na èà tei faaäpiäpihia i te rahi o te taata e te rarahi o te taata. Ua horo na mua, ua paìùma i nià i te tumu räau no te faatupu i to na hinaaro hiò, e te ìte, na Ietu i ìte ia na te taata hinaaro, hiò atu ra o Ietu i nià, e Tätäio a pou mai i to fare na hoì au pärahi ai âùanei. Pou òiòi mai ra, ìte maitaì mai ra ia na mä te òaòa. Te mau taata i ìte, ua ôhumu iho ma te parau e, te haere atu ra o ia ei manihini na te taata rave hara. I roto i te fare i mua i te aro o Ietu, teie te fäìraa a Tätäio Inaha, e te Fatu, e horoà vau i te âfa i ta ù nei taoà na te taata rii, e i hämani ìno na vau i te tahi taata atu i te hoê mea iti aè, ia taìmaha ia ta ù e faahoì atu nana. Te reo o Ietu Ua tae mai te ora i teie nei fare i teie nei mahana, e tamaiti atoà hoì o ia na Âperahäma. Ia au te òhipa i tupu i roto i te fare, na Tätäio iho o ia i faatïtïàifaro i mua i te mau òhipa tià òre i ravehia e ana e ôpere te àfaraa oia hoì e haere färerei i te taata, e taìmaha te faahoì tei hämani-ìno-hia oia hoì e haere e färerei ua ìte o ia o vai mä teie taata. Ia tupu te òhipa mai teie te huru e tae mai te ora i roto i te fare, i te mea te fare e vahi e âparauraa na te metua i te mau tamarii, vahi haamäharaa i te rohirohi òhipa, e vahi haafänauraa taata, e hohoà, e huru ai te Atua. i teie reo no Ietu, I haere mai nei hoì te Tamaiti a te taata nei e ìmi i tei moè ra e faaora. Ia parau o Ietu mai teie te huru no te faaìte ia tei roto o ia i te taata i te nohoraa, no te mea àita te Atua i hämani i te taata tiàraa, ua hämani ra i te taata, ia ìte te taata ia na iho e ôpuaraa faaora na te Atua Nui Tumu Tahi e maitaì ai te oraraa vaamataèinaa. Te tiàraa no te faaìte ia i te hopoià e mauhia ra e te taata ia òre ia tupu te mau huananeraa i roto i te mau faanahoraa rau o te oraraa, taata ta na hopoià i reira e tupu ai teie reo to te Atua e naò ra e : A hiò i ta ù Tävini.

Ìtaia 42, 1 : A hiò na ta ù tävini ta ù i faatoa, e tei riro èi mauruüruraa na ù. Ua tuu vau i ta ù Värua i nià ia na, e e faaìte haere o ia i te parau tià i te mau nünaa atoà.

2. E òre o ia e pii hua, e òre e faateitei i te reo, e òre e tuoro nä te mau aroä.

3. Te âèho taraoha, e òre o ia e ôfati, te mörï àma mohimohi, e òre o ia e tüpohe. E faaìte haere o ia i te parau tià tüatau i te mau taata atoà.

4. E òre o ia e mätaetae, e òre e töàruàru, e ia tupu te parau tià i te fenua nei. E te tiaì mai ra to te mau motu i ta na mau haapiiraa.

Te auraa, eita teie taata e rave i ta na òhipa i te vähi moèmoè, aita ta na e òhipa huna, hoê huru to na i te mau taime atoà, e i te mau vähi atoà. Rave noa ai i te òhipa a te Atua, te tämau noa ra tätou i te rave i te mea e mauruüru ai tätou. E tano änei tätou e tämau noa i te täpö i te mata i nià i te òhipa e ravehia ra e te taata ta tätou e parau nei e, e tävini no te Atua, e tano änei e tämau noa i te haavare tarià turi ia parau ìno o ia i te taata, aore ra ia parau i te tahi mau parau tano òre. E aha te auraa o te òhipa ta tätou e rave noa nei.
Inaha te Metua e te Tamaiti, hoê ä ia , ta tätou i nä reira i te taata rii ra, te Atua ta tätou i nä reira. Aita te Atua e hinaaro ra ia riro to na tävini ei mataìtaìraa na te taata, te vai ra rä te haapiiraa e hinaarohia i te taata ia täpeà mai i muri aè i te reira hiòraa, ia au rii i te aniraa a te Atua i te taata ia hiò i te mea e au ei mäa, ia rave, e ia àmu. Te auraa, e òhipa to muri mai i teie hiò, e tuhaa ta te taata, o ia anaè të tano e rave i te reira. Aita te Atua e tämata ra i te huti i te manaò o te taata i te tahi pae, aore ra te tahi.

Te faaotiraa ta te taata e rave atu, na na noa ihoä te reira e rave, no te mea rä ua hiò e ua faaroo, e äteatea rii atoà ia to na manaò. Mai te peu te ani ra te Atua e hiò i to na tävini, aita te Atua e parau mai ra, e aha te mea e hiò, te tävini hoì, eere ia i te taata au roa i te faaìteìte ia na, e taata moèmoè roa rä, e te hunahuna hoì ia na. E au maitaì ia na te mea i parauhia i te mätamua e, mämahu, eiaha rä i nià i te manaò e, e taata haamä hänoa e te paraparau òre, ia au rä i te manaò e, e taata haèhaa, te marü, e te hinaaro òre ia riro o ia ei vähi e faatano ai te mata o te taata, ia riro hoì ei täuà-parau-raa na te taata. Te auraa, eita o ia e ìmi i te mata e te tarià o te taata.

 

 

Teraì òr. Faatura.

Ruta èv. 18.9-14 Ôuma

 

Tāpati 23 no Âtopa 2022.

Ôuma

Taramo 34

1 E Taramo na Tävita i to na faahuru-ê-raa ia na iho i mua ia Âpïmereta, o tei tiàvaru atu ia na, e ua haere atu ra o ia.

2 E haamaitaì ä vau i te Fatu e òre e faaea. Ia vai tämau mäite ä te haamaitaì ia na i roto i to ù nei vaha.

3 E ârue ta ù âau i te Fatu. Ia ìte mai tei pohe ra i te reira a òaòa atoà ai

4 E haamaitaì tätou i te Fatu, tätou atoà të faateitei i to na iòa.

5 Ua ìmi au i te Fatu, e ua parau mai ra o ia ia ù; e ua faaora ia ù i te mau mea ta ù i mataù ra.

6 Ua hiò atu rätou ia na, e ua haamäramaramahia mai; e aore to rätou mau mata i haamä.

7 Ua pii atu ra taua taata i pohe nei, e ua faaroo mai ra te Fatu; e ua faaora atu ra ia na i to na atoà ra mau àti.

8 Te pätia nei te merahi a te Fatu i te pühapa e àti noa aè i te feiä i mataù ia na, e ua faaora ia rätou.

9 A tämata na ia ìte i te maitaì o te Fatu. E ao to te taata i tiàturi ia na ra.

10 A mataù i te Fatu, òutou te feiä moà no na ra. Aore hoì e èreraa to te feiä i mataù ia na ra.

11 Ua ère te mau riona âpï i te mäa, e te pohe ra i te poìa; âreà tei ìmi i te Fatu ra, e òre roa e ère i te maitaì.

12 A haere mai na, e te mau tamarii na, e faaroo mai ia ù; e haapii au ia òutou ia mataù i te Fatu.

13 O vai ia taata i hinaaro i te ora, tei hinaaro ia ìte i te maitaì i to na puè mahana i te ao nei?

14 A täpeà i to arero i te ìno, e to vaha eiaha ia parau i te parau haavare.

15 E haapae i te ìno, e rave i te maitaì, e ìmi i te hau, e aruaru atu.

16 Tei te feiä parau tià ra to te Fatu mata, e tei ta rätou pure to na tarià.

17 E mata ê rä to te Fatu i te feiä i rave i te ìno ra, e ia òre roa ia manaòhia i te ao nei.

18 Te tiàoro nei te feiä parau tià e te faaroo mai ra te Fatu, e te faaora nei o ia ia rätou i to rätou mau àti atoà ra.

19 Te fätata nei te Fatu i te feiä âau paruparu ra, e te faaora nei o ia i te taata âau taiä.

20 E àti rahi to te taata parau tià ra; e faaorahia rä o ia e te Fatu i taua mau àti atoà ra.

21 Na te Fatu e tiaì i to na ra mau ivi, e òre roa te hoê e ôfatihia.

22 E pohe te paieti-òre i te ìno; e tei riri i te feiä parau tià ra, e mou ia.

23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

Teuteronomi 10.12- 20

Faatura i te ture o te here.

12 E teie nei, e Ìteraèra, e aha to te Atua hinaaro ia òe, mäori rä, ia mataù òe i to Atua i te Fatu, e ia haere i to na atoà ra mau èà, e ia hinaaro òe ia na; e ia haamori òe i to Atua ra i te Fatu mä to âau atoà, e mä to värua atoà;

13 e ia haapaò mäite òe i te mau parau a te Fatu, e ta na ra mau haapaòraa, i ta ù e parau atu ia òe i teie nei mahana ia maitaì òe ra?

14 inaha hoì te raì, e te raì i nià roa i te mau raì ra, no to Atua ia no te Fatu, te fenua atoà nei e te mau mea atoà i roto ra.

15 ìte mai ra rä te Fatu i to mau metua ra i te aroharaa mai ia rätou, e ua tae roa i te mäìti i to rätou ra huaai i muri aè ia rätou ra, no roto i te taata atoà ra, o ia hoì òutou na, mai tei ìteä-hua-hia hoì i teie nei mahana.

16 E tënä na, a peritome na i te ìri i mua o to òutou âau ra, e a tirä na i te märô faahou:

17 o to òutou Atua ra o te Fatu, o te Atua ia no te mau atua, e o te Tävana hoì no te mau tävana, e Atua rahi, e te mana, e te mataù, e te haapaò òre i te huru o te taata, e te rave òre i te tärahu:

18 o tei faatià i te ôtare, e te vahine ìvi; e te aroha hoì i te taata ê, e te höroà hoì i te mäa e te àhu na na.

19 E tënä, na e aroha atoà òutou i te taata ê; e taata ê atoà hoì òutou i te fenua ra i Àifiti:

20 o to Atua ra o te Fatu ta òe e mataù, e o ia anaè ra ta òe e haamori, e o o ia ta òe e àti atu, e e tapu òe i to na ra iòa:

21 o ia ta òe ârueraa, e o ia to òe Atua, o tei rave hoì i taua mau òhipa rahi mataù ra no òe, i ta to mata hoì i ìte ra.

22 To mau metua i haere i raro i Àifiti ra, e hitu roa nei àhururaa rätou i reira; e tënä na, ua faarirohia òe e to Atua e te Fatu, mai te fetià o te raì ra te huru i te rahi.

11.1

1 E teie nei, e hinaaro òe i to Atua i te Fatu, e te haapaò i ta na poroì, e ta na mau haapaòraa, e ta na ra mau ture, i te mau mahana atoà ra.

2 Timoteo 4.6-18

6 Teie hoì to ù toto a tahe, teie hoì au a reva ê.

7 I tö na vau i te töraa maitaì, ua oti to ù hororaa, i mau mäite na vau i te parau.

8 E teie nei, te vaiihohia ra te toröna o te parau tià no ù, ta te Fatu, ta te hiò parau tià ra, e horoà mai no ù ia tae i taua mahana ra; eere hoì o to ù anaè ra, o to te feiä atoà rä i hinaaro i taua färaa mai no na ra.

Faaitoitoraa

9 Haapeepee òe ia tae vave mai ia ù nei.

10 Ua faaruè mai hoì Tema ia ù, ua nounou i teie nei ao, e ua reva i Tëtäronia; ua reva hoì Terete i Taratia, e o Tito hoì tei Tarematia ia.

11 O Ruta anaè rä teie ia ù nei. Arataì atoà mai òe ia Märeto, e maitaì hoì au ia na i te töroà nei.

12 Ua tono atu ra vau ia Tuhito i Èfetia na.

13 Te pütë ta ù i vaiiho i Teroa ia Tarepo ra, e hopoi atoà mai ia haere mai òe ra, e te mau puta, ia rahi atu rä te mau pëpa ìri ra.

14 Hämani ìno rahi to Àretanetero tüpaì-veo ra ia ù; na te Fatu ia e faautuà mai ia na i tei au i ta na ra òhipa. 15 E ara atoà hoì òe ia na, e pätoì rahi hoì ta na i ta tätou parau.

16 I taua faatiàraa na ù ia ù iho i mütaa iho ra, aore roa e taata i turu mai ia ù, täiva anaè atu ra ia. Eiaha rä te reira ia häio tià atu ia rätou ei hara.

17 Ua turu mai ra rä te Fatu ia ù, ua faaitoito mai ra, ia ìteä-roa-hia te parau i aò-haere-hia nei ia ù, e ia faaroo te mau Ètene atoà: faaorahia iho ra vau i te vaha o taua riona ra.

18 E na te Fatu ä e faaora ia ù i te mau ìno atoà ra, e e tiaì mai ia ia ù e tae noa atu i to na ra Pätireia i te ao ra. Ei ia na te haamaitaì e a muri noa atu.  Âmene.

Ruta èv. 18.9-14

Te parapore o te Färitea e te feiä òhi tute

9 Ua parau atu ra o ia i teie nei parapore i te hoê pae taata i manaò ia rätou iho e e feiä parau tià, e e vahavaha hoì ia vëtahi ê:

10 «Haere atu ra e toopiti puè taata i nià i te hiero ra e pure; e Färitea e tahi, e feiä òhi tute e tahi.

11 Tià noa iho ra te Färitea o ia anaè ra, pure atu ra, nä ô atu ra: «E haamaitaì au ia òe, e te Atua, i te mea eere au mai te taata atoà nei, i te popore taoà, e te parau tià òre, e te faaturi, e mai tërä ra feiä òhi tute hoì.

12 Taìpiti a ù haapaeraa mäa i te hepetoma hoê, e te horoà nei au i te àhuru o te mau taoà atoà na ù nei.»

13 Âreà te feiä òhi tute, te tià noa ra ia i te ätea ê, aore i hiò noa atu ta na mata i nià i te raì, papaì noa iho ra i to na iho ôuma, nä ô atu ra: «E te Atua, e aroha mai òe ia ù i te taata hara nei.»

14 E faaìte atu vau ia òutou, i hoì mai ra taua taata ra i te ùtuafare mä te tiàhia mai, aore te tahi. O tei faateitei hoì ia na iho ra, e faahaèhaahia ia; e o tei faahaèhaa ia na iho ra, e faateiteihia ia.

Manaò.

Te ôuma e parau ia tätou o te paruru te reira no te tahi tuhaa o to tätou tino, ia hëva te àiü e hii tätou ia na i nià i teie vahi no te faanä. Te papaì atoà nei ra tätou i teie vahi no te faaìte ia i to tätou peàpeà no te teimaha o te òhipa tei tupu. I teie huru tupuraa òhipa o ta te tino e mauiui, e mamae nei no te faaroroma ia tupu te mäìmiraa ia hau te âau. Te puai ia e noaa ia tae i nià teie huru tupuraa òhipa. O te tahi ia raveà e fätata mai ai te Fatu i to tätou âau paruparu, i te mea ua topa tätou i roto i te taiä. E àti rahi to tätou te taata parau tià ; e faaorahia tätou e te Fatu i taua mau àti atoà ra. E tiaì te Fatu i to tätou ra mau hepohepo, e òre roa tätou e vaiho-noa-hia ia ôfatifatihia. I reira e ôtohe ai te paieti-òre; e tei riri i te feiä parau tià ra, e mou ia. E faaora te Fatu i to tätou värua ; e òre-roa  te hoê e tiàturi i te Atua Nui Tumu Tahi e faaruèhia.

Te haapii noa mai ra te reira ia tätou te mä o te âau, e maitaì te haereà o te taata ; âreà ia reru to tätou âau, eita te taata e fifi i te parauraa i te maitaì e ìno, e te ìno ra, e maitaì ia. Ua haamata anaè tätou i te parau i te mau manaò no te tahi ao, te ao tei faatorotoro, tei hiòpoà i te huru o te taata ua ateä tätou i te tumu no te aroha e te here o te Atua Nui Tumu Tahi. E taata te taata nä mua roa, ua riro ê na te reira ei tämataraa i te täpoìpoì i to tätou mau häpa, e te pärururaa ia tätou iho i te òreraa e rave i te òhipa mai tei hinaarohia ia tätou. Rave noa ai i te òhipa a te Atua, te tämau noa ra tätou i te rave i te mea e mauruüru ai tätou. No reira, ia faaroo tätou i teie reo no te Taramo e naò ra : 13 e ia haapaò mäite òe i te mau parau a te Fatu, e ta na ra mau haapaòraa, i ta ù e parau atu ia òe i teie nei mahana ia maitaì òe ra? E aha mau ta tätou e faaroo ra, e aha hoì ta tätou e täpeà mai. E täno änei tätou e tämau noa i te täpö i te mata i nià i te òhipa e rävehia ra e te taata ta tätou e parau nei e, e tävini no te Atua, e täno änei e tämau noa i te haavare tärià turi ia parau ìno o ia i te taata, aore ra ia parau i te tahi mau parau täno òre. Ia haavare tärià turi tätou, ia haavare mätapö, eere änei e, te haavare noa ra tätou, e roaa faahou änei ia ta te Atua parauraa e :ia Atua te Atua, ia fenua te fenua ia taata te taata ua maitaì roa ia, eita änei hoì te Atua e haamä i ta tätou rave, i to tätou manaò òre, mai ta Pauro e parau ra : Ite noa ä rätou e, e Atua, aita rätou i faateitei ia na i tei au i te Atua, aita hoì i haamaitaì atu ia na,  riro atu ra to rätou feruriraa ei mea fäufaa òre, e to rätou ra âau haapaò òre, pöuri atu ra ia (Röma 1, 21). E aha te auraa o te òhipa ta tätou e rave noa nei. Teie : ua rave tätou i to na iòa, inaha te parauhia nei tätou e tävini no te Atua, no te faaìno ia na. Tano roa ai te parau ta Ietu e parau ra e : Òutou i nä reira i te hoê taeaè ïti haìhaì roa i roto i ta ù mau taeaè nei, ua nä reira mai ia òutou ia ù (Mätaio 25, 40). Inaha te Metua e te Tämaïti, hoê ä ia (Ioane 10, 30), ta tätou i nä reira i te taata rii ra, te Atua ta tätou i nä reira. O te mea ta tätou e mäìmi nei i roto i te mau parau e faahitihia nei no te faatupu i te hau. Ua ìritihia mai te tahi mau ìrava no roto mai i na taiòraa e maha èi faatumuraa ta tätou parau no teie mahana teie taua mau ìrava nei :

-Taramo 34, 9 A tämata na ia ìte i te maitaì o te Fatu. E ao to te taata i tiàturi ia na ra.

-Teuteronomi 10, 17 o to òutou Atua ra o te Fatu, o te Atua ia no te mau atua, e o te Tävana hoì no te mau tävana, e Atua rahi, e te mana, e te mataù, e te haapaò òre i te huru o te taata, e te rave òre i te tärahu.

-2 Timoteo 4, 17 Ua turu mai ra rä te Fatu ia ù, ua faaitoito mai ra, ia ìteä-roa-hia te parau i aò-haere-hia nei ia ù, e ia faaroo te mau Ètene atoà: faaorahia iho ra vau i te vaha o taua riona ra.

-Ruta èv. 18, 13 Âreà te feiä òhi tute, te tià noa ra ia i te ätea ê, aore i hiò noa atu ta na mata i nià i te raì, papaì noa iho ra i to na iho ôuma, nä ô atu ra: «E te Atua, e aroha mai òe ia ù i te taata hara nei.»

Teie te tahi ìrava e tià i te faatumu ta tätou parau no teie mahana, teie ia reo e naò ra e : «E te Atua, e aroha mai òe ia ù i te taata hara nei.» E naò ia teie manaò i te parauraa e reo teie ia pïnaì tämau i roto i ta tätou mau ùpu i te mau taime atoà, i te mea te ôpu tera e parau ra, ta te ôuma ia e mamae ra, i papaì ai tätou i to tätou ôuma ia hau ia roromä te ôpu tei tiàrepu i te ìno. Ia hiò tätou i te tumu o ta tätou parau no teie mahana i te faatiàraa a Ietu i roto i ta na faaäuraa parau no na taata e piti, e Faritea hoê, e tià no te faanahoraa faaroo Âti-iuta, e te tahi taata Âti-iuta atoà e òhi tute na te hau Roma. Te tumu o Ietu i faatià ai teie parau faaäu, no te huru o te hoê pae taata i manaò ia rätou iho e feiä parau tià, e e vahavaha hoì ia vëtahi ê: tei roto raua i ta raua fare pure; te Färitea e tahi, Tià noa iho ra o ia anaè ra, pure atu ra, nä ô atu ra: «E haamaitaì au ia òe, e te Atua, i te mea eere au mai te taata atoà nei, i te popore taoà, e te parau tià òre, e te faaturi, e mai tërä ra feiä òhi tute hoì. Taìpiti a ù haapaeraa mäa i te hepetoma hoê, e te horoà nei au i te àhuru o te mau taoà atoà na ù nei te mätutu nei teie taata i te òhipa ta na i rave ia faaroohia mai o ia e te mau taata i pïhaì iho ia na e pure atoà ra, no na e pure faahiahia roa teie ta na. Te feiä òhi tute, te tià noa ra ia i te ätea ê, aore i hiò noa atu ta na mata i nià i te raì, papaì noa iho ra i to na iho ôuma, nä ô atu ra: E te Atua, e aroha mai òe ia ù i te taata hara nei. Te parauraa a Ietu hoê te tiàhia, o tei faateitei ia na iho ra e faahaèhaahia ia; e o tei faahaèhaa ia na iho ra, e faateiteihia ia. E aha o Ietu i parau ai mai teie te huru, no te tuö noa ia i te taata e mau taata hara tätou, e navaì noa nei i te parauraa e, «E te Atua, e aroha mai òe ia ù i te taata hara nei.» i roto i te fare pure teie te parau te tupuraa, e i te mau mahana atoà tei reira mau anei ra te faatupuraa òhipa. Te manaò o Ietu ua tià te parau a teie taata, o te mea e tià ia faahiti i roto i te pure, te toe te färiiraa te Atua, i te mea èita te Atua e vare i te haavare a te taata. I te mea e feiä hara anaè tätou, eiaha ia moèhia ia tätou ua haere mai te Tämaïti a te Atua e pühapa i roto i te taata hara. Te ìte nei o Ietu te huru o te taata, tei  manaò noa ra e parau tià ta rätou, ua tae roa atoà teie huru faanahoraa i roto i te mau ètärëtia oia atoà i roto i te Ètärëtia Porotetani Mäòhi èi hiòraa na tätou te ôroà a te Fatu, o vai te mau ra i te parau tià, te färaoa e te uaina, te taro e te vai haari, e ìnaha hoì e na maa teie e mauhia nei e te fenua, te fenua te mehoi ta te Atua Nui Tumu Tahi i tuu i roto i te taata. I to Ietu faatupuraa i ta na àiraa, i te ruì i haavarehia ai O ia, teie ta na parau to Ù tino te na, to Ù toto te na a àmu a ïnu èi manaòraa na òutou ia Ù. E ära tätou i ta tätou parau  no teie mahana, ia òre tätou ia riro e mea ìno atu i te Färitea, e ia riro mea haavare atu tätou i te Terona i te mea e òre te Atua e vare i te haavare a te taata. Teie te tahi ture a Tetunaè :A hiò i to mouà, te hanahana te reira o te âià, oia hoì, e hiò i te vahi teitei i reira e ìte te haèhaa o te fenua no te haafänau faahouraa ia Mäòhi Nui, teie te tahi parau i te tau no te marae, Èi tere pure e tae ai i te marae, mai te peu e, e tere ê, èita te Atua Nui Tumu Tahi e vare oia atoà ia tätou i teie mahana, e tere pure mau to tätou ?

 

Teraì òr. Faatura. 

Ruta èv. 18.1-8. Fiu

 

Tāpati 16 Âtopa 2022.

Fiu

Taramo 121

1 Tire a te Moruta. E hiò änei ta ù mata i te mau âivi? E noaa änei te tauturu ia ù i reira?

2 No ô i te Fatu ra te tauturu ia ù, o tei hämani i te mau raì e te fenua.

3 E òre o ia e tuu noa i to âvae ia pähee noa na, e òre tei tiaì ia òe e vareà i te taòto.

4 Inaha, o tei tiaì ia Ìteraèra ra, e òre ia e tiàruhi noa atu, e òre hoì e taòto.

5 O te Fatu të tiaì ia òe, o te Fatu to maru i to rima àtau ra.

6 E òre òe e pohe i te mahana i te ao, e òre atoà i te märama i te ruì.

7 Na te Fatu òe e tiaì i te mau ìno atoà ra, na na òe e tiaì ia ora.

8 Na te Fatu e tiaì i to haereraa atu e te hoìraa mai, i teie nei e a muri noa atu.

Ètoto 17.8-13

8 Ua haere mai ra te âti-Âmäreta e àro i te âti-Ìteraèra i Refitima.

9 Ua parau aè ra Möte ia Iotua, A mäìti na i te taata, a haere, e aro i te âti-Amäreta; a nanahi au e tià ai i nià i te mouà ma te räau a te Atua i ta ù rima.

10 Ua nä reira hoì Iotua i ta Möte i parau ia na ra, àro atu ra ia Àmäreta; e ua haere atu ra Möte, e o Àarona, e o Hura, i nià roa i te mouà.

11 E ua hopoi anaè Möte i ta na rima i nià ra, te pau ra te âti-Amäreta ia Ìteraèra; e ua tuu anaè o ia i ta na rima i raro, te pau ra Ìteraèra i te âti-Amäreta.

12 E no te mea te teimaha ra te rima o Möte, ua rave iho ra räua i te hoê ôfaì, tuu iho ra i raro aè ia na, e ua pärahi iho ra o ia i nià iho; e ua mau aè ra Àarona räua o Hura i ta na rima, hoê i te tahi pae, hoê hoì i te tahi pae; aore aè ra ta na rima âueue e maìri noa atu ra te mahana.

13 Pau iho ra Àmäreta e to na atoà ra mau taata ia Iotua i te òè.  

2 Timoteo 3.14-16

14 Ia mau mäite rä òe i ta òe i haapii ra, i tei tuuhia atu ia òe ra, ua ìte hoì òe i to òe ìte i ìte ai òe ra.

15 E mai to tamarii-rii-raa mai ä to òe ìte i te parau moà i päpaìhia ra, o te parau ia e paari ai òe e tae noa atu i te ora i te faaroo i te Metia ra ia Ietu.

16 Te mau parau moà atoà i päpaìhia ra, e mea faaurua mai ia e te Atua, e e mea maitaì ei haapiiraa, ei aòraa, ei faaìteraa hapa, ei faaìte mai i te parau tià ra;

4. 1-2

1 E teie nei, te parau hua atu nei au ia òe i mua i te aro o te Atua, e i to te Fatu ra i to Ietu Metia, o të haavä i tei ora ra e tei pohe ia fä mai o ia ia tae i to na ra Pätireia;

2 e faaìte hua òe i te parau, ia onoöno mäite ä, i te hora au e te hora au òre; e faaìte hua i te hapa, e aò atu, e faaitoito atu, mä te faaòromaì rahi, e te haapii-mäite-raa atu.

Ruta èv. 18.1-8.

Te parapore o te vahine ìvi e te haavä

1 Ua parau atu ra Ietu i te parapore ia rätou, ia tämau mäite rätou i te pure eiaha e fiu,

2 nä ô atu ra: «E taata haavä tei te hoê ôire, aore o ia i mataù i te Atua, aore hoì i haapaò i te taata.

3 E vahine ìvi hoì tei taua ôire ra, e haere atu ra o ia ia na ra, nä ô atu ra: «E faatià mai òe ia ù i ta ù ènemi nei.»

4 E aita aè ra o ia i faatià vave mai: e muri aè ra, ua nä ô iho ra o ia i te feruri-noa-raa i roto ia na iho: «Òre noa ä vau i te mataù i te Atua, e te haapaò i te taata nei,

5 no te mea rä te märô mai nei teie nei vahine ìvi ia ù, e faatià atu vau i ta na parau, o te mäniania vau ia na i te haere-pinepine-raa mai.»

6 Ua nä ô atu ra te Fatu: «A haapaò na i te parau a taua haavä parau tià òre nei.

7 E e òre änei te Atua e faatià mai i to na ra taata mäìtihia, o tei tiàoro atu ia na i te ruì e te ao? E faaroaroa änei o ia i ta rätou parau?

8 E faaìte atu vau ia òutou, e faatià mai ia o ia ia rätou e òre roa e mähia. Ia tae mai rä te Tamaiti a te taata nei, te vai ra änei te faaroo i te fenua nei?

Manaò.

Te fiu to te taata ia hinaaroraa e täpiri te mau ùputa e na reira te parau i te tomo no te faaìte ua navaì, to mau mea noa nei ä, ua täahoa roa, i te rave-noa-raa taua òhipa ra. E faaìte atoà i te parau no te paruparu, no te rohirohi i te tütava-noa-raa ma te rave òre, i mua i te mau faanahoraa tei mau tei taamino noa i te vahi hoê ma te nuu òre. I roto i teie huru to tätou te taata e tià ia tätou i te haapae i te mau mea faufaa no te oraraa, e ia vaiiho ia tupu te tahi oraraa tei òre roa e au no te oraraa vaamataèinaa. Eiaha ra tätou te taata ia tutau i roto i te mätau o te tià e faatea ia tätou i te tumu o te maitaì, te ra e tïtauhia ra ia ìte i te faufaa ta te parau e faatupu, èi hiòraa e tumu ùru, i pïhaì iho e tumu tiare Maurua, to raua mauraa e fenua, hotu noa te ùru ma te òre e rave i te huru o te tiare Maurua, ua ùaa noa te tiare Maurua ma te òre rave i te huru o te ùru, òaòa noa raua i te faaìteraa i te maitaì ma te fiu òre. Hotu noa te maa i te faanahoraa a te fenua ta te aru mau ra to na mau maitaì ma te fiu òre, naò ia te manaò i te parauraa e, mea tià i te taata ia haafatata i pïhaì iho i te aru no te tomo i roto i te hau o te uru maitaì e faaìte-noa-hia tei àua haaàti i to na oraraa vaamataèinaa. I Mäòhi Nui nei tei roto tätou i teie uru maitaì i te fänaòraa i te ora, o te tià e tauturu ia tätou ei faaòreraa te manunu o te fiu. Te ìte noa ra tätou e, te mea e tiaìhia ra i te taata, ia faatïtïàifaro faahou ia o ia i to na parau i mua i te Atua, te auraa ra, te haamanaòhia ra ia i te taata, te mau òhipa atoà ta na i rave, ua faaätea ia na i te Atua, e ua ìno te iòa e te roo o te Atua ia na. Te rahiraa o te parau, te mau mea atoà ia ta tätou i hiò mai i roto i te tuhaa no te fiu i te Atua, ia ìte mai rä tätou, eita teie faatïtïàifaroraa e tupu ia òre te taata ia ìte, ia färii, e ia fäì i to na fiu, òre noa atu ai o ia i rave roa, no te mea i haafiu ia na no te mea eita to na parau e tano ia faataa-ê-hia i te parau o te feiä tei riro ei mau metua no na. Ia òre teie ìte e teie färii ia riro mai ei tätarahapa na te taata i mua i te Atua, eita atoà ia e tupu teie faatïtïàifaroraa e parauhia nei. Ia parau anaè tätou e, ia Atua te Atua, ia fenua te fenua, ia taata te taata, ua maitaì roa, mea nehenehe roa te parau, e aha rä te auraa ; ia parau tätou e : no òe te Hau, te Mana, e te Hanahana, e parau atoà te reira, ia òre rä tätou ia faatupu i te reira parau, eita änei ia e riro èi faaâpï tämauraa i te parau o te fiu i te Atua ra. I roto roa iho i te òhipa a te Atua, no te mau tiàraa rii i mauhia mai e te taata, mea pinepine roa o ia i te faaìte mai e, o ia tei hau ; o ia atoà rä teie e haamataù nei i te taata i mua i te rahi o to na mana ; e mea pinepine roa hoì te Atua i te mohimohi i mua i te rahi o to na hanahana, e ua roaa roa atoà to na hanahana i te haafaufaa-òre-raa i te mau horoà a te Atua. I nià i to na tiàraa tävini, te moè-noa-hia nei i te taata e, e tävini o ia no te Atua, e tävini hoì no te taata, eere rä te Atua to na tävini, eere na te Atua e faatupu i to na hinaaro, e mai te tävini hoì e haamoè i to na parau i mua i to na fatu, te moè-noa-hia nei i te taata teie reo to te Fatu e : Aita te Tamaiti a te taata i haere mai ia tävinihia to na, ei tävini rä (Mätaio 20, 28). E rave òhipa teie taata e parauhia nei e tävini, e faaueueraa na te tahi Fatu, faarirohia atu ra e tätou ei tiàraa hanahana e te mataùhia e te taata rii. Tamata ia tätou i te tomo i roto i te haapotoraa no te mau taiòraa i haapaòhia no teie mahana teie atu ra te mau ìrava :     

-Taramo 121, 8 Na te Fatu e tiaì i to haereraa atu e te hoìraa mai, i teie nei e a muri noa atu.

-Ètoto  17, 12 E no te mea te teimaha ra te rima o Möte, ua rave iho ra räua i te hoê ôfaì, tuu iho ra i raro aè ia na, e ua pärahi iho ra o ia i nià iho; e ua mau aè ra Àarona räua o Hura i ta na rima, hoê i te tahi pae, hoê hoì i te tahi pae; aore aè ra ta na rima âueue e maìri noa atu ra te mahana.

-2 Timoteo 4, 2 e faaìte hua òe i te parau, ia onoöno mäite ä, i te hora au e te hora au òre; e faaìte hua i te hapa, e aò atu, e faaitoito atu, mä te faaòromaì rahi, e te haapii-mäite-raa atu.

-Ruta èv. 18, 1 Ua parau atu ra Ietu i te parapore ia rätou, ia tämau mäite rätou i te pure eiaha e fiu,

Tämau maite, e na taò tauàti teie tei faaìte i te puai te fäito e mauhia ra e te taata, i roto anei i te parau, te heiva i te tütavaraa ia mau noa te tare. O te mea ia, ia ìte i te tämau mäiteraa i to tätou tuatua ia òre ia äramoinahia i roto i te tau ia haamanaò noa mai ra te tau i te huru no te oraraa i mua ra e tae roa i teie mahana ia anoenoe noa te Aroha, te here tuatau i roto i to tätou âau. I reira tätou e färerei ai i te taata no te faatupu i te hau, te vaamataèinaa e vähi e färerei ai te taata i te taata i reira e parau ai te huru o te oraraa ta Atua e haafänaò nei, e parau ia tätou te marae ia, E vähi moà te reira, te vähi e pähono mai ai te Atua i te hinaaro o te nünaa. Te taura pito te reira e täamu i te nünaa i te Atua, nä reira te fenua i te Atua Metua. Mai te tamarii i huti i to na ora mai roto mai i to na metua, mai teie ora i nä roto mai i te pito i roto i te tamarii, mai te reira atoà te Atua i te faaàmuraa i te nünaa. Ua riro te tahuà ei àuvaha, ei reo no te nünaa i mua i te Atua, ei reo hoì no te Atua i mua i te nünaa. Ua horoà te Atua ia na i te mana e te hanahana no te faatupuraa i to na hinaaro i te nünaa. Ua ravehia rä teie mana e teie hanahana, faaòhipahia no te faatupu i te hinaaro o te arii, ua ravehia hoì ei moihaa horoà i te pohe o te nünaa, inaha to na te toto i manii i nià i te marae. No te faariroraahia te pito ei vähi horoà pohe, no te riroraa te àuvaha i te hinaaro ora o te Atua ei àuvaha no te arii, e ei moihaa faatupu i te riàrià, nä roto i te haavï, no te mea ua ruri-ê-hia te tiàturiraa o te nünaa, mai nià i te Atua ora, i nià i te mau atua ta te taata i hämani ei faatupu i to na mau hinaaro, riro atu ra te reira ei faaìno i te roo e te hanahana o te Atua ora, e ua riro ei tärahu na te nünaa mäòhi i mua i te Atua. Ua faarirohia te hanahana o te Atua ei faatupu i te hanahana o te taata. No te faariroraahia te Atua ei mea taiähia, no te haafaufaa-òre-raahia to na tiàraa Metua, ua riro te reira ei tärahu na te mau tävini o te Atua, tärahu atoà rä na te nünaa i färii i te tomo i roto i te reira òhipa tià òre i haamauhia e te tahuà no te faatupu i te maitaì e te püai o te arii. I faatià ai o Ietu i te parau tei faaauhia i nia i te hoê taata tei parauhia e haava, te haava ra e paruru o ia te tupu maitaìraa te parau tià ia au i te ture o te reira fenua. I roto i te Parau Maitaì no teie mahana teie ia, te faahiti nei o Ietu i te parau no te haava e te hoê vahine ìvi, teie taata haavä aore o ia i mataù i te Atua, aore hoì i haapaò i te taata. I haere mai ai te vahine ìvi e ani i te haavä, E faatià mai òe ia ù i ta ù ènemi nei. No te haava èita teie i te òhipa rü, e tià e faataere no te märô rä a teie vahine ìvi, o te mäniania vau ia na i te haere-pinepine-raa mai. O te tahi òhipa tià-òre-roa i te hoê taata tiàraa ia fëruri mai teie te huru. Te höroà mai nei ra te Fatu ia tätou i te puai ia tämau mäite tätou i te pure eiaha e fiu, i te mea e nünaa mäìtihia tätou, o tei tiàoro i te ruì e te ao, Ia tae mai rä te Tamaiti a te taata nei, te vai ra änei te faaroo i te fenua nei? I te mau taata tiàraa atoà e mau ra i te tiàraa, ia ìte rätou, i te tauturu i te taata raveà òre, no te faatupu i te âparauraa i nià i te tumu òhipa e tïtauhia ra, i roto i te âparauraa e noaa ai te märamarama o te tumu òhipa. Te raveà ta Ietu e höroà mai ra ia tätou, tämau maite i te pure ma te fiu òre, i reira e tupu ùmu ai te faaroo i Mäòhi nui nei.

 

Teraì òr. Faatura.