REFOROMATIO Tapati 30 no Atopa 2022

 Tapati 30 no Atopa 2022

REFOROMATIO

Faaitoitoraa

Taiòraa : Ruta 19, 1 – 10

Ia haamaitaìhia te Atua Nui Tumu Tahi i to tätou färereiraa i teie Täpati

no te FAATITIÀIFARORAA, mätau-noa-hia i te parau na roto i te reo

faräni haamäòhihia : REFOROMATIO.

I te mau matahiti atoà e hoì noa mai teie parau, o tei tupu, hau i te

maha tenetere i teie nei i te mau pae fenua Europa mä, na roto to te

tahi mau Àito no te faaroo tiàraa i nià no te patoì, ia au i te türamäraa

a te Parau a te Atua, i te tahi mau faanahoraa piò i roto i te Etärëtia. E

ia parau hoì tätou e, faatitiàifaro, eere no te mau hape tupu âpï noa, e

mau hape atoà ra erä aè ra te tau i mua ra, i te raveraahia e tae mai i

terä tau a tupu ai teie òhipa. E ia parau atoà hoì tätou e, faatitiàifaro,

e hoì roa ia i te vähi te reira i te haperaa, na reira faahou mai i te

faatano faahou i te haereà. Te ìte ra ia tätou e, eere i te tahi òhipa

naìnaì e te òhie tei ravehia i terä mau Àito, mai ia Taravino, Ioane Huta,

Rutetro, …

Te mea päpü rä, aita teie faatitiàifaroraa ta rätou i rave i tupu noa na

roto i te hau, mea rahi te mau haavïraa, te mau hämani-ìno-raa, e te

mau haamataùraa i faatupuhia i nià ia rätou e to rätou mau ùtuäfare,

ôpü fetii, e te mau faatere iho o te Etärëtia, e te pae hopeà, ua

haapohehia te tahi pae. Te pae hopeà o te òhipa o ta rätou i rave, te

àmaharaa ia o te Etärëtia no te parau tià e te parau mau, ia au i te

türamäraa a te Parau a te Atua. I Porotetani mai ai te Porotetani e tae

mai i teie mahana. E piti rä auraa e vai ra i roto i teie taò Porotetani :

A tahi, pätoì, eere rä mea pätoì noa no te pätoì. Pätoì rä ia au i te

türamäraa a te Parau a te Atua.

Te piti, te tiàmäraa ia, te vai ra te türamäraa a te Parau a te Atua, e

tiàmäraa rä to te taata e färii, e aore ra, e pätoì. Te porotetani noa ra

ihoä te reira taata. Te mea mau ihoä ia o ta tätou e ora nei i teie

mahana, i mua änei i te tahi mau faaotiraa e ravehia nei e ta tätou Apooraa Rahi Amui, te vai ra ihoä te tahi mau taata, aita i tüàti, e no

te tüàti òre faaruè mai nei te Etärëtia, e tiàmäraa to rätou.

Terä rä, aita te ùputa no te hoìraa mai i täpirihia, noa atu ua pohe, e te

mea pinepine ia e ìtehia nei i teie mahana i roto i to tätou oraraa. Te

oraraa, tei roto i te haapaòraa ê, e ia pohe e reira e ìte ai e porotetani.

Na ô mai ia te Raìvavae e : Agea ga ! No reira tätou parauhia ai tätou

e porotetani.

Ta tätou parau no teie Täpati, e parau mau âau roa ia tätou, haere atu

ai, ua himene roa hia:

1 2

Taata poto roa Tataio E parauhia rä teie nei tamaiti

I nià i te tutamino e E tamaiti na Aperahama e

Tataio pou i raro Tataio pou mai i raro

Faahoìraa

I to fare na hoì e

I reira taua e àparau ai

Tataio pou mai i raro.

Mea varavara ihoä paha teie himene i te himenehia i roto i te fare pure,

ia pau rä e piti âfata, ei reira teie mau himene e faaroohia i te mau vähi

ârearearaa, e ia pee te taèro aita e taa faahou eaha te haapaòraa.

O vai terä e ìmi ra ia vai ?

Te parau päpü, e tere ìmi to te Fatu i tei moè, ia au i to na reo i te ìrava

10: I haere mai nei hoì te Tamaiti a te taata nei e ìmi i tei moè ra e

faaora. Hoê ä atoà ia Tataio, no to na hinaaro e ìte i te Fatu e no te

rahi hoì o te taata, ua ìmi atoà o ia i te raveà no te ìteraa i te Fatu, to

na ia paiùmaraa i nià i te hoê Tutamino. E no to na ìmiraa i te Fatu, i

ìtehia mai ai o ia e te Fatu. Tano maitaì atu ai terä reo to te Fatu e na

ô ra e : E ìmi, e ìtehia ia òutou (Mätaio 7, 7).

Te vähi taaê rä i roto i teie huru tupuraa òhipa i roto i ta tätou taiòraa

i mua i te parau no te färiiraa manihini ia au i ta tätou peu tumu mäòhi.

Eere na te fatu fare e tïtau ra, e tuo ra, e pii ra i te manihini e tipae mai

i te fare nei, na te manihini iho e tïtau nei ia na iho no te tipaeraa i roto i te fare o te taata fare. Te tahi atoà ihoä ia peu pinepine e ìtehia nei i

roto i te tahi mau òroà täatiraa ta tätou, te vai ra ihoä te feiä i tïtauhia,

e te vai atoà ra te feiä na rätou noa ihoä i tïtau ia rätou. E ia hapehape

anaè mea rahi aè te feiä aita i tïtauhia, i te feiä ua tïtauhia no te ôroà.

Te haapiiraa matamua rä e tano tätou e täpeà mai i roto i teie parau,

terä ia tiàmäraa to te Fatu e tomo i roto i te fare o te taata o ta na i

hinaaro, mä te òre e mäìti i te huru. To na ia reo i roto i te Apotarupo

3, 20 : Inaha te tià noa nei au i te ùputa, te patötö atu nei ; ia faaroo

mai te hoê i taù reo, e ua ìriti i te ôpani ra, e haere atu vau i roto ia na

ra, àmu atu ai i te mäa i o na ra, e e àmu atoà o ia i ô nei ia ù nei . Eita

e òre e, te tià noa ra te Fatu i te pae ùputa o to tätou âau, aita rä tätou

e faaroo atu ra i to na reo e no te ìriti i te ôpani ia na no te tomo mai i

roto i to tätou fare. Te na ô ra paì te tahi reo e : Eiaha e haere mai i te

ao, eiaha e haere mai i te pö, e haere mai rä. Te huru atoà ia o te Fatu,

eita o na e haere mai i te ao, eita e haere mai i te pö, e haere mai rä o

na. Te tarià noa terä e anihia ra ia tätou e faatoro maitaì atu ia patötö

mai i te ôpani o to tätou âau.

Te piti no te haapiiraa e tano tätou e täpeà mai, aita ä te Fatu i parau

atu ra te tumu o ia e hinaaro ai e färerei ia Tataio, te na mua mai nei

te manaò tätarahapa o Tataio i nià i te mau hape atoà o ta na i rave i

nià i te taata, ia au i to na tiàraa Terona, taata ani tute na te Hau Roma.

Ia faaroohia ta na fäìraa i mua i te Fatu: Inaha, e te Fatu, e horoà vau

i te âfa i ta ù nei taoà na te taata rii, e i hämani ìno na vau i te tahi

taata atu i te hoê mea iti aè, ia taìmaha ia ta ù e faahoì atu na na.

Haapoto anaè tätou, e taata êiä e te täviri taata o Tataio.

Mea maere mau ä ra teie huru to Tataio. Aita ä te Fatu i parau atu ra i

te tumu o ia i hinaaro ai e färerei ia na, eie mai te manaò Tataio :

Tatarahapa i te hape ta na i rave i te taata, na roto i te êiä e te täviri.

Eiaha ihoä ia e maerehia i teie huru to Tataio, no te mea eiaha ia

moèhia ia tätou e, Ietu, o te Parau ia a te Atua i riro mai ei taata. Te

auraa, terä Fatu ta Tataio i ìte atu ra, o te Parau ia a te Atua o tei riro

mai te tahi hiò hipa ra te huru, i reira Tataio te hiòraa atu ia na i roto e

to na ìteraa e, e hohoà ê roa ta te hiò hipa e faahoì mai ra, aita hoê aè

tüàtiraa i nià i terä Tataio e tià atu ra i mua i te hiò hipa. Ahiri paì, mai

terä pauroa tätou ia Tataio, ia taiò anaè i te Parau a te Atua e ìte paì

tätou i to tätou hape, manaò anaè au, ua mau aè na te Hau o te Atua

i te fenua nei.Tätou ia e tämau noa ai i te pure i te pure a te Fatu : Ia tae mai to òe

ra Hau. Te auraa, te taeraa mai no te Hau o te Atua, aita i taere i te

Atua, ua taere noa ia tätou i te tatarahaparaa i te mau hape atoà o ta

tätou i rave. Eiaha noa te mau hape tupu âpï, te mau hape atoà rä i

tupu na a hia aè nei tau i muri ia tätou, ta to tätou änei mau metua i

rave i raro roa ra. Te tumu rahi atoà ia o te tahi mau fifi e tupu nei i

roto i te tahi mau ôpü fetii i teie mahana, mau ùtuäfare, mau âmuiraa,

mau paroita. Mea tïtauhia ia tätou e ìmi i te vähi i reira te haperaa. E

ia ìtehia, e färii e ua hape, tatarahapa, e, faatano faahou mai ai to tätou

tere, te mea ia ta tätou e haamanaò nei i teie Tapati :

FAATITIÀIFARORAA/Reforomatio. Te auraa ia no terä parau a te mau

Tupuna e : Aita e haereraa i mua, ma te òre e hiò i muri.

Hau roa atu ai tätou i teie mahana, e piti òhipa ta te Atua i tuu mai i

mua ia tätou ei tautururaa ia tätou no te faatitiàifaroraa i to tätou

oraraa, faaroo, poritita, vaamataeinaa, e faufaa, te Parau a te Atua i

riro mai ei taata ta te Pïpïria e faaìte mai ra, o ia Ietu ; e te Parau a te

Atua i riro mai ei Rahu, o ia te fenua. E mai ia Tataio, te tïtauhia mai

ra ia tätou e hiò ia tätou i roto i teie na tauaro, a ìte e aita e tano ra,

hapae ia, faahoì i nià i te tano, oia te parau tià e te parau.

Parau mau, eere i te mea òhie, no te mea mea rahi te mea e tïtauhia

ia tätou e faatopa, e haapae, te pae hopeà rä, e hau ia te roaa mai.

Aita o na i ätea i te parau o te tahi metua vahine e ineine nei i te fänau

i ta na tama, mea mauiui, mea faananau ; ia pü mai ra te tama, e òaòa

ia te tupu mai. No reira, te raveà noa e tupu ai ia tätou te

FAATITÀIFARORAA, te haèhaa ia o te âau.

Ei faahoperaa, te na ô ra paì terä maa reo iti to Henri a Hiro e:

Täua i nanahi ra, täua ânanahi, inaha, e nünaa täua. Eiaha e hoo i to

täua Âià, e tïtau rä i to täua Hau, na roto i te hau, ia hau täua.

Te Mäòhi ihoä tei ìte i te here i te Mäòhi. Aita o mua, aita o muri, maoti

ta to täua mau Tupuna i vaiho mai, to täua fenua, to täua fare, ta täua

mäa, ta täua ìnaì, ta täua òri, ta täua pehepehe, ta täua peu tumu, to

täua hiroà tumu, to täua iho tumu.

A tirë i te tümä ia täua, ia tiàmä täua.

Haere mai, höhoì anaè rä, ua ravaì terä.

Ia tiaì mai te Atua ia tätou e ia arataì ia tätou mä te hau i roto i to tätou

oraraa.

François Tahiarii PIHAATAE Òrometua

Tiaìraa mätamua Täpati 27 no Novema 2022

 Täpati 27 no Novema 2022

Tiaìraa mätamua

Taiòraa : Mätaio : 24 : 37-44

Irava 44 : E teie nei, ia parahi ineine noa òutou, ei te hora manaò-òrehia e òutou e tae mai ai te tamaiti a te taata nei… E hia atura anotau, to tätou hiòraa noa raa i te parau no te hoìraa mai o te tamaiti a te Mäòhi, àita ihoä rä e räveà e täpae ai, i te reira tau. Eère anei ua tae èna mai, èra noa rä tätou faaineine noa nei i teie tiaìraa, e ui ia èaha ta tätou e tiaì nei ? E täno-rii-paha e taui te huru hiòraa, eaha te mea e òre ai tätou e ìte ai i te tamaiti i rotopu ia tätou. Parau mau i roto i te taiòraa e faaararaa teie na Ietu no te mau òhipa e tupu i te tau no to na hoìraa mai, e parau no te taata i roto i te reru, rara o te oraraa e te vai atura, tei òre roa te mänaò e mau i nià i te hoìraa mai o te tamaiti nei. Aita anei i tae i te tahi taime e taui te huru tiaìraa, no terä mea ia hiòhia tei haere-noa-hia mai, terä te parau pinepine « A pure, tatarahapa, èiaha e hara faahou », pahono ihoä ia te taata faaroo rä i teie parau, « na reira » e maoro noa i te moèraa te pata faahou maira i terä hohoà ìte-noa-hia, e mätahiti i muri, èra faahou teie parau, àita rä e räveà e ìtehia ai i te tahi òhipa. Tämata na tätou i te räve mai i te tahi hiòraa : Ia ìte tätou e taata teie e haere mai nei io tätou ra, e faaineine ihoä i te vahi färiiraa, te nohoraa e te mau mea atoà, ia maitaì e ia mähanahana teie taata i te faaèaraa mai ia tätou nei, tona tanoraa mau. I teie mähana, mea taaê, maoro noa i te tahi taata i te parauraa mai, ua haamata i te ihuihu, to tätou ia terä haauiui-noa-rä, « eaha rä teie, Âue haere mai ia faa-rohirohi, haamanaò a räve mai i te maa ia haere mai... ». Peneiaè terä atoà te tahi tumu àita e räveà e ìte ai tätou i te tamaiti i rotopü ia tätou, ua taui rii ta tätou hiòraa ia tätou iho. Ua taui te huru färiiraa, i teie mähana èita e faaroo pinepine hia te taata ia pii faahou, « Tämaa »,« a tii mai te tahi maa päpë täporo » àore rä « a haere mai na te fare nei ». I teie mähana mea taaê mau te oraraa o tetaata, mea hiòhiò na mua o vai terä ? èere faahou na te here e te Aroha e arataì, èita e òre e parau mai ihoä paha te tahi OIA, te vahi peàpeà noa rä mea täòtiàhia te reira.Teie rä e tano e türaì faahou ä te hiòraa, àita hoê aè haapäpüraa e hoì taata mai te tamaiti a te Mäòhi , mai ta na i haere mai, te mea noai päpü e hoì mai te tamaiti. Mai te hea rä te huru, àita ia tätou i ìte. E hapehape anaè e hoì mai òia na roto i te òhipa ta te taata e räve rä, ia haamanaò na tätou i te haapiiraa rahi ta Ietu i haapii e i vaiiho mai i roto i te taata te parau ia no te HERE e te AROHA. Ia riro te here e te aroha e maa tumu na òe i te mau mahana atoà i reira ia e roaa ia òe i te ìteraa i te mea ta òe e tiaì-maoro-nei. Eere anei no terä mea ua iti te hereraa i te Atua, ua iti te hereraa i to tätou âià, te hereraa ia tätou e te aroharaa ia tätou, e ua rahi aè i te haapaò-noa-raa ia tätou i òre ai tätou e ìte nei i te reira. Te faaìte-noarä te reira huru, ua atea tätou i te papa o te parau, taime tano ia e hoì i roto i te auraa o te parau, e ia òhipa päpühia te reira. Io mätou i Tupuaì nei, mea âuhune te faaapu ùmara, te faaapu haari, te faaapu maa hotu e te faaapu « Litchis » i te mau mätahiti atoà, no te mea ua päpü ia mätou ua riro te fenua e to na mau maitaì e haapäpüraa i te hoìraa mai o te tamaiti Tupuaì na roto i ta na horoà.

Te MA te U te RU te U te RU. IAORANA

Ramaheiarii, Tetaronia.v a TETARONIA 

Tiaìraa Piti Täpati 4 no Titema 2022.

 

Tiaìraa Toru - Täpati 11 no Tïtema 2022

 Tiaìraa Toru - 11 no Tïtema 2022

MANAO TAUTURU

Te Mau Taiòraa :

Itaia 35 / 1 - 10 // Iatopo 5 / 7 - 10 // Mataio 11 / 2 - 11 // Taramo

146

Ei ômuaraa i teie manaò ïti i mua i to outou, e no te tauturu ia tätou,

te hinaaro nei na mua roa e faatae atu ia outou i te täpaò no te Aroha.

Te amo nei i te tiàraa, e tae-noa-atu tei òre ä i tapae i te reira manaò.

Te arataì nei i te mau Âmaa òhipa, e te faaineine nei ia rätou no te

reira. Tei faariro ia rätou ei mero no te Ètarëtia Porotetani Mäòhi, e te

manaò nei e tomo i roto i te reira. Te mau tamarii, te mau metua, e

tae-noa-atu te mau metua paari :

IA NUI TE HERE E TE AROHA i roto i te taata tä taìtahi, tei mau nei

ia outou no ô mai i te Atua ra, ia vai noa te reira ei moihaa nä outou

no te haatupu i te ôpuaraa faaora a te Atua tei faanahohia mai, nä te

Taata, no te haatupu i to na hinaaro, e ta na parau, ia noaa i te Taata

te pärahi-noa-raa i roto i te Hau.

Maeva e Manava hua i to tätou färereiraa i teie Täpati tiaìraa toru nä

tätou, no te taeraa mai i te Faaora. E parau rahi nä tätou no te parau

o te oraraa faaroo, i mua e i roto i teie parau, e ìte tätou te faaheporaa

(haatïtïraa) e te tiàmäraa, te tämauraa e te faaâpïraa, te parau no te

pohe e te ora-mure-òre. I reira tätou e tütonu i to tätou manaò i teie

taime mä te ui ia tätou ë, NO TE AHA.

E rahi, e, e roaa te manaò i mua i teie mau parau, e tämata ra tätou i

te haapoto i te reira. Te parau no te faaheporaa, te tämauraa, e te

pohe, e ôtià to rätou i roto i te oraraa o te Taata, aita te taata e nuu

faahou i roto i to na oraraa faaroo, e, to na iho ora. Aita te manaò e

haatoro rä i nià i te mau parau e te mau faanahoraa tei faaòhipahia e

te mau metua i to rätou ra tau, e tano ätoà ra te Taata e, ia nuu te tau,

e nuu atoà oia. Teie nei rä, eiaha e nuu, no te nuu noa, e tià ia tätou ia

òre i te faaëa i te ìmi i te mau räveà atoà no to tätou oraraa faaroo.

E tiàmäraa, e faaâpïraa, e te ora-mure-òre, e mau parau teie e ìriti nei

te ûputa o te ìmiraa i te mau räveà atoà i mua i te tau o tä tätou e ora

nei, e, e ora atu. Èita e tano e huna i te parau ë : « E ère i te mea ôhie.

» No te mea i roto i teie tau to tätou, e ìte tätou i te òhipa tei haaàmuhia,

e, te ûàna-noa-nei i teie mahana. E parau ia teie no te moni, te nä ô ra

te tahi metua paari :

« Èita e parari te ôfaì i te pape, e parari rä i te moni. »

E tano tätou e ìte i te ôfaì mai te àau o te taata no to na paari e to na

ètaèta. Èita te reira e taui taùe i mua i te pape, e tano e hiò mai te

Parau a te Atua, e parau no te ora. E taui taùe noa te àau o te taata i

mua i te parau o te moni, ia faahiti anaè i te faito o te moni e haatae

atu i roto i te rima o te taata, aita e parau faahou no te fetii, aita e parau

faahou no te hoa, e òreòre roa i te reira.

Mea rahi te parau tä te Fatu i parau i nià i tä na mau pipi, e o tä rätou

i faatae mai ia tätou nei. Teie mai te tahi mau parau :

« Aita vau i haere mai e faaòre tei ravehia, ua haere mai au e faatià i

te parau. » “A here oütou ia oütou iho mai ia ù i here oütou.”

“E aroha oütou ia oütou iho mai ia ù i aroha ia oütou.”

Mai te Metua e haapau-òre i to na reo i nià i tä na mau tamarii no te

haapii, no te aò, no te poroì ia rätou, mai te reira atoà e tano e ìte i teie

mau parau tä tätou e heheu nei, e tuatäpapa nei, e päparau nei i roto

i tä tätou mau haamoriraa. Te auraa, noa-atu te faa-huru-ê-raa o te

Taata ia na, te vai Mau-noa-ra te Parau a te Atua mai te täheraa o te

pape i nià e nä roto i te fenua.

Tei roto tätou i te tiaìraa, ua mätau tätou i te parau ë, te tiaì nei mätou

i te faaora. I mua i te huru o teie tau, te tano-noa-ra änei i teie parau.

Mai te peu, ua hiò tätou i nä parau e maha tei faataahia nä tätou i teie

mahana.

• No roto mai i te Taramo, e tämau te taata i te haamaìtaì i te Atua.

Teie nei rä, eiaha e tiàturi i te feiä e amo ra i te tiàraa, e tià ia òe

e te taata e heheu te reira i roto ia òe-noa- iho nä mua roa, no te

mea, aita te Atua e tiaì e faaìte tätou i te huru e te höhoà o te tahi

mai te peu to òe-noa-iho aita e tano ra. Tei te Atua te Mana, te

Parau Mau e te Parau Tià, e tuu i to tätou Faaroo i nià ia na.

• No roto mai ia Itaia, te tïtauhia nei e te taata ia vai ineine noa o

ia no te färii i te Metia te tono mai e te Atua. E faaìte o ia i te ora,

e te faaora tei faaroo mai ia na. O tei färii i te reira e ìte o ia te òre-raa i te ìno, te mauiui, e te òto, tä te Hau, te Hanahana, e te

Òaòa no ô mai i te Atua e mono atu.

• No roto mai ia Mataio, te poroì nei e te Fatu i te täatoàraa o te

mau taata tei mua ia na i te reira taime. E aha tä oütou e ìte, e

aore rä, e aha tä oütou i manaò e ìte. Eiaha e hiaài te ìte, e tià e

faaroo mä te ìte òre. Te tuu nei te Fatu ia Ioane i nià ia na, e te

faaìte atoà o ia o te ïti roa e pärahi nei i te hau o te Atua o ia tei

riro nei, i nià aè i te täatoàraa.

• No roto mai ia Iatopo, e faaòromaì te taata mä te faaìno-òre te

tahi i te tahi, mai te peu àore e hinaaro e färerei i te haavä. Mai

te mau Perofeta, i faaòromaì i te huru o te Taata i te mau taime i

faaìte ai rätou i te Parau o te Atua, e te Parau a te Atua. Mai te

taata i faaàpu e tiaì o ia i te mäà tä na i tanu, ia hotu, e ia paari.

I teie mahana, e tano tätou e parau ë, o vau tä te Faaora e tiaì

nei, o vau ta ù e faaineine nei no te färii i te faaora mä to àau mä,

i mua ia na, mä to värua e türaì nei i te here e te aroha, e mä to

püai e to ù täatoàraa no te haatupu i ta na Parau. No ô mai tätou

i te faaheporaa (haatïtïraa) e te tïtau nei i te rave i to tätou

tiàmäraa, ua pärahi tätou i roto i te tämauraa, e te äni mai nei

tätou ia rave i te faaâpïraa o to àau, ua ìmi i te pohe no tätou e

te Mäòhi, ìnaha hoì tei roto noa tätou i te ora-mure-òre tei

püpühia e te Atua nä tätou i te mau taime atoà, e, i te mau vähi

atoà.

E Ènana, e Ènata òe, e Paùmotu òe, e Tuhaa pae òe, e Raromataì òe,

e Nià mataì òe no te parau i to outou reo, no te ora i to tätou hïroà, e

no te rave i tä tätou mau peu tumu, e tä tätou mau mäà. Ua rau tätou

i Mäòhi Nui nei no te hoê Atua e Here nei, e Aroha nei tätou, eiaha nä

te taaêraa e faaätea ia tätou, ìnaha hoì nä te Atua e faatueä ia tätou, e

tamarii tätou nä te Atua.

No te reira e te mau taeaè, e te mau tuahine, e tau to te mau mea atoà,

ua hope to te faaauraa matamua i roto i ta na faaìteraa i te parau, to

te faaauraa âpï ua faatià-faahou-hia i te parau, i te taeraa mai ia tätou

nei e haatupu tätou i te reira.

Ua tuu mai te Atua i mua i te taata i te mau parau atoà tä tätou e ìte

nei i nià i te fenua, i roto i te moana, na nià mai i te raì. Ua höroà mai

O ia i te ärataìraa, te âveià, e te faanahoraa nä roto mai i te Fatu ia noaa i te taata i te ora-mure-òre. E tano e parau ë, ua ineine te mau

mea atoà, a hiò tei au, a rave.

E faatupu te parau nä roto i te òhipa o tä tätou e rave atu mä te fäitoòre,

mä te nümera òre. E rave tätou te òhipa no te haatupu i to na

hinaaro, e, tä na parau.

Ia fan̈ au-faahou te var̈ ua o te nun̈ aa Maò̈ hi e tià te hinaaro o te Atua,

eiaha ra to te taata.

IA ORA NA. Teraìmareva Òrometua.

Tapati 25 no Titema 2022 POROIRAA NO TE HAAMANAÒRAA I TE FANAURAA O TE AITO NUI

 Tapati 25 no Titema 2022

POROIRAA NO TE HAAMANAÒRAA I TE FANAURAA O TE AITO

NUI

Ioane 1/1-18 ; Itaia 52/7-10 ; Hepera 1/1-6 ; Taramo 98

Haamaitaìhia te Atua no te Here e te Aroha tei arataì maitai ia tätou i

roto i to tätou nei oraraa. To na tanoraa mau aita e taime tuuä te taata

i te haamaitaì i te Atua no täua maitaì no na ra. No tera ra mea e, aita

te taata e haamaitaì nei i te Atua i te mau taime atoà, töàruàru ihora

te faaroo o te taata. E ia töàruàru hoì te faaroo o te taata, te ätea atoà

ra ia te taata i te Atua. E Atua ra hoì to te Taata no te here e te Aroha

e ìmi ihoa te Atua i te räveà ia maitaì te taata, oia hoì te oraraa ia i roto

i te oraraa o te taata.

I roto i nä taiòraa atoà, te haamaitaì nei te mau tävini o te Atua i te

Atua no te parau e te òhipa ta te Atua i rave. I te matahurahuraraa o

teie nei ao, e reo no te Atua i te rahuraa i teie nei ao. Te vähi maitaì i

roto i te parau ta te Atua i parau ua òhipa te Atua, te auraa ra ua

haamani te Atua i te ao nei, e ua faaàpu, ia rahi e ia hotu ùmu te ora i

roto i te ao nei.

Âhiri paì, mai terä atoà aè ta tätou mau parau, oia hoì, e riro mai ta

tätou mau parau ei òhipa, aita to te ìno e te pohe e pärahiraa faahou i

roto i teie nei ao. Te mea e ìtehia ra i teie mahana, e i te rahiraa ihoä

o te taime, te paraparau noa ra tätou, aita ä rä tätou i parau atu ra.

Aita ä ta tätou parau i tae atu ra i nià i terä tïtauraa no te faatupu i te

hau e te ora.

Mea maitaì ihoä te taata ia parau i te tahi parau ia òhipa oia i te ta na

iho parau. Te tanoraa mau te òhipa hinaarohia ra i te taata ia rave,

maoti ra ia faahoì mai te taata i te faatereraa a te Atua i te ao nei. Vaiho

na te Atua e faanaho, vaiho na te Atua e faatere i te taata.

Te fifi o te taata no to na ia hinaaro mäha òre, hinaaro i te mau mea

atoà, e tae roa i te hinaaroraa i te fateraa o teie nei ao. Te faatereraa

te taata i teie nei ao te tumu atoà ia te taata i parahi noa ai i roto i te

fifi e tae roa mai ia tätou i teie mahana. Te tumu atoà ia te Atua i

tonoroa mai ai ta na tamaiti i roto i teie nei ao. E tere to te tamaiti a te Atua no te haapii faahou i te taata, no te faahoì

faahou i te taata i nià i te reini e hoì faahou mai ai te faatereraa a te

Atua i te ao nei.

No reira, no teie mahana haamanòraa na tätou i te fanauraahia te Aito

Nui, aita atu e poroiraa ta na ia tätou, maoti ra vaiho na te Atua e

faatere i to tätou oraraa, vaiho na te Atua e faanaho i to tätou oraraa i

reira noa te oraraa o te taata e maitai ai.

Ia ora na

Yves, Tauragni TEPUAI òrometua 

Ruta èv. 23.35-43 Faite

 

Tāpati 20 no Novema 2022.

Faite

Taramo 122

Ia hau Ierutarëma

1 Tire a te Moruta. Na Tävita. Òaòa aè ra vau e te feiä atoà i parau mai ia ù e : Tätou i nià i te fare o Iehova.

2 Te tià nei to mätou âvae i teie nei i roto i to mau ùputa, e Ierutarëma e.

3 I patuhia Ierutarëma mai te òire täàtiàti-hua-hia te mau fare ra.

4 I reira te mau ôpü ia paìuma ra, te mau ôpü a Iehova, ei faaìteraa ia no Ìteraèra, e haamaitaì i te iòa o Iehova.

5 I reira te mau teröno haavä ra i te haamauraahia, te mau teröno o te ùtuafare o Tävita.

6 E pure ia Ierutarëma ia hau E maitaì to te feiä i hinaaro ia òe ra.

7 Ei hau to roto i to òe ra mau patu, e ei maitaì to roto i to òe ra mau fare arii ra.

8 No to ù ra mau taeaè e te mau hoa i parau ai au i teie nei : Ei hau to roto ia òe ra.

9 No te fare o to tätou Atua ra o Iehova, e tämau ai au i te ìmi i te maitaì no òe ra.

2 Tämuera 5.1-3

1 Ua haere atoà mai ra te mau ôpü atoà o Ìteraèra i Heperona ia Tävita i reira, e ua parau atu ra ia na , nä ô atu ra, inaha mätou, o to òe ia ivi e to òe ia ìò.

2 Ia mütaa iho ra hoì, ia Taura i arii i nià ia mätou ra, o òe ä tei arataì ia mätou i räpae, e tei arataì mai ia Ìteraèra i roto. Ua parau mai hoì te Fatu ia òe, e tiaì òe mai te tiaì mämoe ä i to ù ra taata ia Ìteraèra, e ei tävana hoì òe ia Ìteraèra.

3 Ua haere anaè mai ra te feiä rarahi i Ìteraèra i te arii i Heperona; ua faaau iho ra taua arii ra o Tävita i te tahi faufaa ia rätou i Heperona, i mua i te Fatu: ua faatähinu iho ra rätou ia Tävita ei arii i nià iho ia Ìteraèra ra.

Torota 1.12-20

12 Te haamaitaì nei mätou i te Metua, o tei faaau mai ia tätou ia au ia tätou te hoê tufaa i te âià o te feiä moà i te ao ra.

13 O tei faaora ia tätou i te värua mana o te pöuri, e ua tähiti ê mai ia tätou i roto i te Pätireia o ta na Tamaiti here ra;

14 no na i noaa ai to tätou ora, te hara i faaòrehia ra, i to na ra toto.

Te huru o te Metia e ta na haa

15 O te huru mau o ia o te Atua hiò-òre-hia ra, o tei fänau na i te mau mea atoà i hämanihia ra.

16 Na na hoì i hämani i te mau mea atoà nei, o to te raì, e to te fenua nei, o tei ìteä ia hiò ra e tei òre i ìteä, te feiä teröno, e te feiä hau, te hui-arii, e te feiä mana. E mea hämani- anaè-hia ia e ana, e no na anaè.

17 E o mua ä hoì o ia i te mau mea atoà nei, e o ia të mau i te mau mea atoà nei.

18 E o ia hoì te upoo o te tino ra o te Ètärëtia nei; o te mätamua o ia, te mätahiapo o te feiä i pohe ra, ia hau ê atu ä o ia i te mau mea atoà nei.

19 E mea tià hoì i te Metua e ei roto ia na te î i te mau mea atoà ra vai mau atu ai.

20 E ia faafaite hoì o ia i te mau mea atoà ra ia na iho i roto ia na ra, i te hau i noaa i te toto o to na ra tätauro; to te raì e to te fenua nei, ia faite ä ia na.

Ruta èv. 23.35-43

35 Te tià noa ra te taata atoà i te hiò-noa-raa atu. Ua tähitohito atu ra te mau tävana e te taata atoà ia na, nä ô aè ra: «Ua faaora hoì o ia ia vëtahi ê, o te Metia o ia te here a te Atua ra, a faaora o ia ia na iho.

36 Ua tähitohito atoà atu ra te mau faèhau ia na, e haere atu ra, hopoi atu ra i te vineta na na,

37 nä ô atu ra: «O te Arii òe o te âti-Iüta ra, a faaora ia òe iho.

38 E päpaìhia iho ra te hoê parau i nià aè i ta na upoo, i te parau Herëni, te parau Röma, e ta te Hëpera: «O TE ARII TEIE O TE ÂTI-IUTA.»

39 Ua tähito atu ra hoì ia na te hoê i taua puè taata rave parau ìno i faatätauro-atoà-hia ra, nä ô atu ra: «O te Metia òe ra, a faaora ia tätou.

40 Ua àvau mai ra rä te tahi, nä ô mai ra: «Aita o òe mataù i te Atua tei pohe atoà hoì òe hoê ä huru?

41 E mea tià rä to täua pohe, o te utuà mau hoì teie i ta täua i rave; âreà teie nei taata, aita roa a ana e parau ìno.

42 Ua parau atu ra o ia ia Ietu: «E te Fatu, e haamanaò mai òe ia ù ia tae òe i to òe ra Pätireia.

43 Ua parau mai ra Ietu ia na: «Ei parataito ia òe e o vau atoà i teie nei ä mahana, oia mau ta ù e parau atu ia òe nei.

Manaò.

Te faite e parau teie no te faatupu i te hau, ia ìtehia te fäito o te mau taata atoà no te faatupuraa i te hau, te tïtauraa ia e vai nei i roto i teie taò ta te värua e tià faaàifäito. I te mea ia faatupu i te hau e tuu te tohe i nià i te fenua i reira e tià ai e àparau, e àparau ia tupu te faatura, te haèhaa no te faataeraa i te manaò i nià i te tauturu a te Atua Nui Tumu Tahi. Te manaò tumu rä i roto i teie parau no te faite, te tahi ia mau arataìraa manaò e faanaho ra i te oraraa âmui o te taata, tei ìtehia e tei färiihia e te täatoà, te mea atoà te reira e horoà i to na püai e to na mana. Te auraa, te maitaì o te faite, aita to roto i te mau faanahoraa ta na e faataa ra, tei roto rä i te mea ta na e tïtau ra, oia te oraraa maitaì, te òaòa, e te hau no te täatoà. Ta na räveà, te faautuàraa ia i te feiä tei òre i auraro i te mau faanahoraa ta na i haamau, no te mea te taòto rii noa ra i roto i te taata atoà te manaò täviri i te faite. Te tanoraa mau, na te täatoàraa teie òhipa, e eita te faite e mäìti i te huru o te taata. Mai te peu rä te ìmi noa nei te taata i te räveà ruriraa i te faite i reira te âmahamaha e tupu ai. No te taata i märamarama e i färii, te ìte ra tätou i ô nei i te maitaì o te haapiiraa a te fenua i te taata, i te arataìraa ia na i roto i te ìteraa i te mea maitaì. Aita tätou e haafaufaa òre nei i te itoito e te püai o te taata, ia tae rä te taata i te ìteraa e te färiiraa i te tauturu a te fenua ei tumu rahi no te mau maitaì ta na e fänaò noa nei, e ia faariro hoì i te reira ei taìara no na, aita atu mea e tupu mai i roto i to na âau maoti rä, te mauruüru e te mehara. E hinaaro no te Atua ia ìte te taata i te òaòa, te maitaì, te hau, e to na faafäiteraa ia na iho i to na mau taata e àua haaàti ra ia na ; aita o reira e hapa. Mea maitaì te taata ia ìte e, e tuhaa ta na i roto i te noaaraa ia na, aore ra te èreraa o ia i te mau maitaì ta na e hinaaro ra. Haamanaò noa atoà rä tätou e, te maitaì, eere ia i te parau no te taata hoê noa, e aita hoì te reira i täôtiàhia i nià i te rahi, aore ra te iti te taoà i noaa i te tahi taata i te haaputu. Ia nä reira tätou i te hiò, e rahi aè ihoä ia te taoà e noaa i te taata püai e te tino päutuutu, i te taata paari, te paruparu, e te räveà òre. O te mea e tïtauhia nei e na taiòraa e maha no teie mahana, teie te haapotoraa :    

-Taramo 122, 8 No to ù ra mau taeaè e te mau hoa i parau ai au i teie nei : Ei hau to roto ia òe ra.

-2 Tämuera 5, 3 Ua haere anaè mai ra te feiä rarahi i Ìteraèra i te arii i Heperona; ua faaau iho ra taua arii ra o Tävita i te tahi faufaa ia rätou i Heperona, i mua i te Fatu: ua faatähinu iho ra rätou ia Tävita ei arii i nià iho ia Ìteraèra ra.

-Torota 1, 20 E ia faafäite hoì o ia i te mau mea atoà ra ia na iho i roto ia na ra, i te hau i noaa i te toto o to na ra tätauro; to te raì e to te fenua nei, ia faite ä ia na.

-Ruta èv. 23, 43 Ua parau mai ra Ietu ia na: «Ei parataito ia òe e o vau atoà i teie nei ä mahana, oia mau ta ù e parau atu ia òe nei.

I teie huru parauraa na Ietu i teie taata, no te faaìte noa ai ia na e ua tänuhia to raua tätauro i roto i te fenua, te fenua ra te parataito ia, ta te Atua i rähu e i haamaitaì. Oia atoà i te mau taata e tähitohito ra, te mau tävana e te mau taata atoà,  i te parauraa : Ua faaora hoì o ia ia vëtahi ê, o te Metia o ia te here a te Atua ra, a faaora o ia ia na iho. Ua tähitohito atoà te mau faèhau, e haere atu ra, e hopoi i te vineta ma te parau e, O te Arii òe o te âti-Iüta ra, a faaora ia òe iho. E päpaìhia iho ra te hoê parau i nià aè i ta na upoo, i te parau Herëni, te parau Röma, e ta te Hëpera: «O TE ARII TEIE O TE ÂTI-IUTA. Ua tähito atu ra te hoê i taua puè taata rave parau ìno i faatätauro-atoà-hia ra, nä ô atu ra: «O te Metia òe ra, a faaora ia tätou, àvau mai ra rä te tahi, nä ô mai ra: «Aita o òe e mataù i te Atua tei pohe atoà hoì òe hoê ä huru, E mea tià  to täua pohe, o te utuà mau hoì teie i ta täua i rave; âreà teie nei taata, aita roa a ana e parau ìno. Te reo mai ra o te tahi ia Ietu: «E te Fatu, e haamanaò mai òe ia ù ia tae òe i to òe ra Pätireia. Te reo mai ra o Ietu: «Ei parataito ia òe e o vau atoà i teie nei ä mahana, oia mau ta ù e parau atu ia òe nei. Teie reo to Ietu tei pähono i teie taata, e reo faatupu hau i te âau o teie taata e ärataì o Ietu i teie taata i roto i te parataito, i roto i te aru a te Atua, teie parauhia nei èi reo Mäòhi Rohotunoànoà, i te mea i teie vahi te haamataraa te parau o te taata i roto i te uru maitaì a te Atua Nui Tumu Tahi. Te aniraa e pätireia, e fare ia i reira te haafänauraahia te mau tiàrama, te mau ata, e te anuanua tei turäma i te tupu maitaìraa ia Rohutunoànoà. Te haapäpü noa mai ra e, ia faaòhipa tätou i teie taò faite, eere ia no te faaìte noa i te huru o te hoê taata ia faaea parau òre noa, aore ra ia faaturuma noa. I roto i te faite, eere te parau tei haafaufaahia, ta òe iho änei, aore ra ta te tahi pae, te mea rä e faaòhie i te hiò e te faaroo, tei riro atoà ei ùputa no te ìte. Teie hoì hiò, eere ia i te mataìtaì, oia te hurihuriraa i te mata i te tahi vähi e te tahi, e hiòpoà rä, oia te taime âmui mai ai te manaò i roto i te òhipa e ravehia ra e te mata. Te auraa, aita te taata i faaea noa i nià i te mea ta na e ìte ra, te tämata atoà ra rä i te ìmi i te auraa o te mea ta na e hiò ra. Te nä reira atoà ra o ia no te faaroo, aita atoà o ia i faaea noa i nià i te parau i tae mai i roto i to na tarià, te tämata atoà ra rä i te ìmi i te tumu e te auraa o te reira mau parau. O te mea atoà ta Ietu i faatupu i nià i te tätauro to na hiòraa i teie taata e to na faarooraa. Hiò na tätou i te mäa : te mäa ta te taata i àmu, ta na i tuu i roto i to na vaha, ta na i honihoni, e ta na i horomii, te faahuru ê ra te tino i te reira mäa, ia riro mai ei püai no te raveraa i te òhipa. Ia haapotohia, e nä ô ia tätou e, te hopeàraa o te mäa i àmuhia, e òhipa ia, e rave hoì. Te mäa hoì tei òre i riro mai ei òhipa, e ìno ia, e riro mai ei meì tei faateiaha noa i te tino taata, e të riro a muri aè ei haafifi i to na oraraa. Mai te reira atoà te hiò e te faaroo ta te manaò e parau nei. Ia òre te manaò e te âau ia faahuru ê atoà i te mea ta te mata i hiò, te mea hoì ta te tarià i faaroo, ia riro mai ei òhipa, aita tätou i faufaahia. Te vai ra te tahi taò ta tätou të faaìte maitaì ra i te manaò ta tätou e parau nei : feruri. Te taò tumu i roto i te feruri, e ruri ia, oia hoì, täviri, taui, faahuru ê. Te taata e ruri i te parau, ua taui ia taata i te parau, ua faahuru ê, ua täviri, aore ra ua taui i te vairaa o te tahi mea, ua taui hoì i te manaò. Areà te feruriraa i te tahi parau, to te taata te reira äniraahia e rave i te tahi mau tauiraa, i te faariroraa i te tahi parau fifi ei mea òhie, te tuuraa i te matara i te vähi räveà òre, te tuuraa i te hau i te vähi tei reira te hepohepo. Te òhipa ia i tupu i nià i te tätauro, te äniraa te pätireia, te pähonoraa e parataito ua rurihia te parau e Ietu no faiteraa ia òre teie taata ia peàpeà i to na mau àti e te pohe. Ia hiòhia tätou i teie mahana, e au tätou i te tahi taata pohe poìa tei apuapu noa i ta na mäa mai te ìte òre i te mea ta na e àmu ra, e tei manaò e, no te mea ua î maitaì to na ôpü, ua maitaì ia. O ia iho, aita o ia i ìte e, ua î rä to na ôpu i te aha, i te mea maitaì änei, aore ra te mea ìno, aita te reira parau i haapeàpeà noa aè ia na. Te huru mau ia o to tätou nünaa i teie mahana, te feiä âpï e tae noa atoà atu i te feiä paari, i te vai-iho-raa na te vaha e te ôpü e faatere i te oraraa. To tätou pohe, te mea ia tätou i òre i hinaaro ia âmui-atoà-hia te manaò i te òhipa a te vaha, te mea ihoä rä e tuuhia atu i roto i te vaha, ta te ôpü e faaitoito noa ra i te färii mai e rohirohi atu i te faaruru-noa-raa i te manaò òre o te taata. Faufaa rahi to te mata, te tarià, te vaha, te ihu no te taata, e mau ùputa anaè hoì te reira no te ìte. Te taata rä i faaruè i to na oraraa na te mata noa e arataì, aore ra na te vaha noa e arataì, na te tarià hoì e te ihu, a tae hoì ia taata e. No te haapae-roa-raahia te manaò i roto i te mau òhipa atoà ta tätou e rave nei te mea ia tätou i ìte ai i to tätou mau fifi i te haere-noa-raa i te rahiraa mai te ìte òre tätou i te hopeàraa. No te mea eita tätou e hinaaro e manaò, faaoti atu ra tätou e, te fifi, te tuhaa ihoä i faataahia na tätou, aore ra, te Atua te tumu rahi roa o teie mau fifi, te mea o ia i faaruè noa ia tätou. Eere ia i te peu âpï, mai te tau a uìuì mai e inaa nei, to te taata ìmi-noa-raa i te täraèhara na na, aore ra te vaa uta hara, oia hoì to na ìmi-noa-raa i te räveà huri i ta na mau hara i nià i te tua o te tahi, aore ra te pariraa i te tahi ei tumu no to na mau àti. Ua ìte maitaì hoì tätou e, te fare tei òre i tiaìhia, e tomohia ia e te èiä. O tätou te fare, tei riro te mata, te vaha, te ihu, e te tarià, ei mau ùputa tomoraa, no te mea rä aita e tiaì to teie mau ùputa, ua faahoìhia e tätou, te mea ia i ö noa mai ai te mea maitaì e te mea ìno i roto ia tätou, faaea parau òre noa ai tätou. Nä ô na tätou, mai te peu tei nià tätou i te vähi raveraa òhipa, te vai ra te mau rave òhipa tei ìte maitaì i ta rätou tuhaa, te tarià ia, te mata, te vaha, te ihu, eita rä te òhipa e tano e faaruè noa i roto i to rätou rima, e haapaò noa ia te reira ia na, haapaò hoì te reira ia na. Ei raatira ihoä e maitaì ai, e tüàtiàti maitaì ai hoì te òhipa a te täatoà, te manaò ia. Na te âau e faaau mai i te òhipa, na te manaò e faanaho i te tereraa o te òhipa ta na e ôpere atu i roto i te mau rave òhipa ia tupu te hinaaro o te âau. Eiaha rä tätou e manaò e, no te mea ua rave te mata i ta na tuhaa, ua rave te tarià i ta na, ua oti ia te òhipa, aita, no te mea e ìmi ä te manaò i te räveà ia riro mai te mea i hiòhia, aore ra te mea i faaroohia ei òhipa. Te mea ia ta tätou i parau mai na e, feruri. Ia ìno te âau o te taata, e ìno atoà to na manaò, oia hoì e ìmi te manaò i te räveà ia tupu te ìno ta te âau i hinaaro. Eiaha rä tätou e manaò e, mai te reira noa te òhie te òhipa a te manaò. I te tahi taime, e àroàro atoà te manaò, te mea ia ta tätou e parau nei e, feàa, te taime te reira e àa ai te manaò, aore ra e umeume ai, oia te taime e hutihuti ai te manaò. Eiaha atoà rä hoì ia maoro roa teie ùmeùmeraa, a pohe roa te hinaaro faatupu òhipa. O te mea ta Ietu i faanaho i nià i to na tätauro, ua haapaò noa o ia i te parau o te ora i teie reo e i te parataito òe e o vau i teie nei ä mahana, ei rohotunoànoà e noho, ta te tahi pae nünaa i roto ia Mona Nui a Hiva e parau nei te karanga o te kainga.

 

Teraì òr. Faatura.

Ruta èv. 21.5-19 Ûmere

 

Tāpati 13 no Novema 2022.

Ûmere

Taramo 98

Ia pïnaì te haamaitaì i te Fatu e haere mai ra

1 Taramo. E himene ia Iehova i te himene âpï, e mau mea taa ê hoì tei ravehia e ana ; no to na iho rima àtau e to na rima moà, i riro mai ai te rë ia na.

2 Ua faaìte mai ra Iehova i te ora na na, i mua i te mata o te mau êtene atoà ra, te faaìteraahia te parau tià na na ra.

3 To na aroha e ta na parau mau, ua manaòhia e ana i te ùtuafare o Ìteraèra ; ua ìte te mau hopeà atoà o te fenua i te ora a to tätou Atua.

4 Ia pïnaì te haamaitaì ia Iehova e àti noa aè te fenua Ia püroro te reo òaòa, ia ûmere mä te haamaitaì i te himene  

5  A himene ia Iehova mä te tïnura, mä te tïnura e te reo haamaitaì atoà ra ;

6 mä te mau pü e te òto o te tuferi, te harururaa i te haamaitaì i te arii ra, ia Iehova.

7 Ia haruru te tai e to na îraa, te ao atoà e to na ra mau taata.

8 Ia paìpaì te mau pape i to rätou rima, e ia ûmere tahi te mau mouà atoà,

9 i te aro o Iehova, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò òre

Marati 3.19-20

19 Inaha hoì, te fätata mai ra te mahana mai te umu ra i te àmaraa ; e te feiä atoà i teòteò ra, e te feiä atoà i rave i te parau-ìno ra, e riro ia ei àihere ra ; e àma rätou ia tae i taua mahana ra, te nä reira mai ra Iehova Tapaota ra ; e òre e faatoehia te tumu e te âmaa atoà ra.

20 O òutou rä tei mataù mai i to ù nei iòa, e hiti mai ia te Mahana parau tià ia òutou mä te ora i raro aè i to na pererau ; e haere hoì òutou i räpae, e e tupu òutou mai te tafa faaàmu o te fare ra.

2 Tētāronia 3.7-12

7 Ua ìte hoì òutou iho na, e ia pee mai òutou ia mätou e tià ai, eere hoì to mätou i te haereà tià òre i roto ia òutou na.

8 Aore hoì mätou i àmu noa i ta vëtahi ê ra mäa, ua rave rä mätou i te òhipa mä te rohirohi, i te ruì e te ao, ia òre roa te hoê o òutou ia teimaha ia mätou nei.

9 Eere rä mai te mea e eita e au ia mätou, ia riro rä mätou ei hiòraa na òutou, ia pee mai òutou ia mätou nei. 10 E ua parau atu hoì mätou ia òutou ia mätou ä i ô na ia òutou na, e te taata e òre e rave i te òhipa ra, eiaha atoà o ia e àmu i te mäa.

11 Te faaroo nei hoì mätou e, e haereà tià òre to te hoê pae o òutou na ; aore i rave i te òhipa, e hiòpoà rä i ta vëtahi ê ra haapaòraa.

12 O te feiä rä e nä reira ra, te parau atu nei mätou, te aò atu nei, i te iòa o to tätou Fatu o Ietu Metia, e e rave mäite rätou i te òhipa, a àmu ai i ta rätou iho mäa.

Ruta èv. 21.5-19

Te mau täpaò faaära i te änoraa o te hiero

Mät 24.1-2; Mär 13.1-2

5 Te paraparau ra te tahi pae i te hiero i te ùnaùna i te ôfaì maitataì e te taoà moà, ua parau atu ra o ia :

6 Teie nei mau mea ta òutou e hiò nei, te fätata mai ra te tau e òre e vaiihohia ai te tahi ôfaì nià iho i te tahi, e òre e toe ai i te hurihia i raro.

Te mau täpaò faaära i te tau âehuehu

Mät 24.3-8; Mär 13.3-8

7 Ua ui mai ra rätou ia na, nä ô mai ra : E te Òrometua e, a fea ia mau mea e tupu ai ? E e aha te täpaò e ìte ai e, ua fätata i te tupu.

8 Ua parau atu ra o ia : E ara, eiaha òutou ia vare. E rave rahi hoì të haere mai mä to ù nei iòa, i te nä ô-anaè-raa e : «O vau te Metia », e : «Teie iho taua tau ra » E i teie nei, eiaha òutou e pee atu ia rätou.

9 E ia faaroo òutou i te roo tamaì e te àueue, eiaha e mataù ; e nä mua hoì te reira i te tupu e tià ai. Aita rä i fätata te hopeà i reira.

10 Ua parau atu ra o ia ia rätou : E tià mai te tahi fenua e àro i te tahi fenua, e te tahi pätireia e àro i te tahi pätireia ;

11 e te àueue rahi i te fenua i terä vähi, i terä vähi, i te oè hoì, e te maì rahi, e te mea mehameha, e te temeio rahi i te ìteäraa i nià i te raì.

Te hämani-ìno-raa ei täpaò päpü

Mät 10.17-22; Mär 13.9-12

12 O òutou na rä të haruhia mai na, e e hämani-ìno-hia, i te tuuraa atu ia òutou i te mau tunato ra, e i roto i te täpeàraa, e e äratohia i mua i te aro o te hui arii, e te mau tävana, no to ù nei iòa.

13 E e riro te reira ei faaìteraa parau na òutou.

14 E tenä na, e ôpua mäite òutou, e eiaha roa e nä mua i te ìmi i te parau ei parauraa atu :

15 na ù hoì e höroà atu i te parau na òutou e te paari, eita roa e tià i to òutou mau ènemi atoà ia faaòre mai, e ia pätoì mai.

16 E haavarehia rä òutou e to òutou mau metua, e te mau taeaè, e to òutou iho fëtii, e to òutou mau tauà iho ; e e pohe te tahi pae o òutou na ia rätou.

Mät 24.9-13; Mär 13.13

17 E e vähia mai òutou e te taata atoà i to ù nei iòa.

18 Eita roa rä te hoê ìo rouru o to òutou na upoo e moè ;

19 e ora rä òutou i te mau tämau mäite.

Manaò.

E ûmere, èi faaìteraa i te puai no te värua o te faaroo tei faahanahana, i te Atua Nui Tumu tahi i te mea te tupu ra te vai äraraa i nià i te mau òhipa tei hohoà ia au te ôpuaraa i faanahohia. Nehenehe noa ai te parau no te ûmere, te vai atoà ra te fifi, o te manaò te taata ia, ta na i manaò ra, ua au ia i te Atua. No reira te faufaa ia haamanaò-noa-hia teie reo to te päpaì taramo e parau ra : 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o Iehova, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò òre. Parau noa ai tätou e, ûmere, ia ìte atoà tätou e, eita te taata e mono i te Atua, i te mau taime atoà rä, e hinaaro o ia i te tauturu ia òre ia rara to na mau manaò, te ûmere nei o ia, haamanaò noa na ai, teie parau ta tätou e faahiti noa nei, te pïpïria, eita ra hoì e hope i roto i teie puta i te haamaitaìraa i te Atua Nui Tumu Tahi no te mea te vai atoà i roto i te mau aru te tià te taata, e ani, e ani i te puaa, te räau, te fenua, te manu, te ià, no te mea ia e tarià to rätou, ua ìte rätou i te parau, no te mea no roto mai rätou i te parau. E teie faaìteraa a Ioane no Ietu : E rave rahi ä ta Ietu peu i rave, àhiri i hope atoà i te päpaìhia, te manaò nei au e òre e tià i to te ao atoà nei ia färii mai i taua mau puta ra, àhiri i päpaìhia Ioane 21, 25. A tae atu ai i te Atua Metua, e hope änei to na parau i roto i te tahi puta i päpaìhia e te rima o te taata ta na iho i hämani. Te Atua iho të haapäpü ra e : Eere to ù manaò i to òutou ra manaò ; eere to òutou ra haereà i to ù ra haereà, te nä reira mai ra te Tumu Nui. Mai te raì nei, e teitei rahi to na i to te fenua, oia atoà to ù ra haereà, e teitei ia i to òutou haereà, e to ù ra mau manaò, i to òutou ra mau manaò Ìtaia 55, 8-9. Ua tae roa tätou i te tahi fäito e, aita tätou i ìte faahou e aha ta tätou e parau i nià i te Atua ia òre tätou ia faahiti i te tahi parau no roto i teie puta, te auraa, teie ta tätou e parau noa nei, eere na tätou, eere no roto i to tätou âau, mai te mea atu ra e Atua puta teie ta tätou e haamori nei. Te tiàturiraa ia o te tahi pae o tätou ia ueue i te pïpïria a parau ai e, teie te ora. Tätou i nä reira, aita änei tätou i haafaufaa òre i te Atua e ta na rahu. Mai te mea atu ra ia e, eita te parau a te Atua, e te mea i tupu mai no roto i ta na parau, e horoà i te ora, te ueueraa rä i te puta, òre noa atu ai e märamarama i te auraa o te mea i päpaìhia, te mea ia e horoà i te ora. No reira te ûmere e faaìte noa mai ra te reira o te âmuiraa o te ora e vai ra i roto i te Rahu no te faahanahana i te Atua, i te reo rau tei hoê i te ûmereraa. O te tahi ia manaò tumu e vai nei i roto i te mau taiòraa no teie mahana, teie te tahi mau ìrava tei haapoto i te mau taiòraa :   

-Taramo 98, 4 Ia pïnaì te haamaitaì ia Iehova e àti noa aè te fenua Ia püroro te reo òaòa, ia ûmere mä te haamaitaì i te himene.  

-Materi 3, 20 O òutou rä tei mataù mai i to ù nei iòa, e hiti mai ia te Mahana parau tià ia òutou mä te ora i raro aè i to na pererau ; e haere hoì òutou i räpae, e e tupu òutou mai te tafa faaàmu o te fare ra.

-2 Tetaronia 3, 8 Aore hoì mätou i àmu noa i ta vëtahi ê ra mäa, ua rave rä mätou i te òhipa mä te rohirohi, i te ruì e te ao, ia òre roa te hoê o òutou ia teimaha ia mätou nei.

-Ruta èv. 21, 18 Eita roa rä te hoê ìo rouru o to òutou na upoo e moè ;

No te aha tätou e ûmere ai, no te faaìte ia e, ia àueue te fenua, ia rupehu te mata o te taata, i mua i teie mau òhipa, i reira te taata e faaìte ai te puai no to na faaroo. Te mea ia tätou i maìri ai i teie tuhaa e, te faaroo faatoro èà ; e a haamata atu ai tätou i te hiò i teie parau, ua toro ê na te èà. Mea maitaì atoà rä ia haapäpühia e, te èà ta tätou e faatoro nei, to tätou iho âvae të taahi nä reira. Eiaha tätou e manaò e, e tämau noa tätou i te haere nä nià i te tahi èà tei marari ê na i te tahi pae, e faatoro rä tätou i to tätou iho èà. To òe färii i to òe parau, te èà atoà ia ta òe e rave atu ; to òe hoì färii òre i to òe parau, te faatoro atoà ra ia i te èà ta òe e rave atu. I te mau taime atoà, tei roto noa to tätou parau i to tätou rima. No te mea eere na ù e haere no te tahi, eere hoì na te tahi e haere no ù, eiaha vau e faatano i to ù haereà i nià i te poàraa âvae o te taata tei òre i färii i to na parau, eiaha hoì tei òre i färii i to na parau ia faatano i to na haereà i nià i te poàraa âvae o te taata i färii i to na parau, o te riro räua ei haavare. Te mea noa e anihia ra ia tätou, ia vai iho ia i te märamarama ia rave na i ta na òhipa, e ia òre ia rave i te peu a te feiä ta te Atua e faahapa ra, tei parau i te märamarama, e pöuri, e te pöuri ra, e märamarama ia. Te mea e tupu nei i roto i ta tätou parau no teie mahana, e tià ia parauhia e toru tuhaa teie e vai nei :

1- Te mau täpaò faaära i te änoraa o te hiero.

2- Te mau täpaò faaära i te tau âehuehu

3- Te hämani-ìno-raa ei täpaò päpü

Te parau nei Fatu ia tupu teie mau faanahoraa, eiaha e mätaù i te mea te vai noa nei te ora, o te täpaò puai atu ia i te mau hämani-ìno-raa, noa atu te mau haavareraa e òre e haaparuparu i te mau faanahoraa a te Atua, i te mea e òre te hoê ìo rouru o to tätou upoo e moè.

Te faaìte mai noa mai ra te reira ia tätou i te taata i te mea maitaì. I roto i teie ìrava, tei nià te manaò i te òhipa i ravehia e te Atua ìo rouru, e ia òre te taata ia haapaò, e roaa roa ta na parauraa e, aita o ia e haamanaò ra, te auraa, e roaa roa ta na faahaparaa i te Atua. No te mea te parau âfaro mai nei te Atua i te taata, te mea faufaa i ô nei, eere te taata na na te òhipa i rave, aore ra te räveà i faaòhipahia no te faaìteraa i te taata i te reira parau, nä reira hoì te taime, aore ra te vähi i ravehia ai te reira òhipa, te mea rä e, e òhipa oti teie. Aita tätou e anihia nei e hoì faahou i muri, i te ìteraa e, oia mau änei. I roto i te mau hinaaro o te Atua i te taata, teie te mätamua : ia rave i te parau tià. Te mea ia ta te Atua e hinaaro nei i te taata ia tïtau, te faatupuraa ia i te parau tià. No te mea rä eere teie i te tahi parau taa e te nahonaho maitaì, i te mau taime atoà, te tiaìhia ra te taata ia faaòhipa i to na tiàmäraa, to na feruriraa, to na paari, no te rave i te mea ta na e manaò ra e, mea tià ia rave, aore ra ia parau. Te auraa, aita te Atua e nä murimuri noa nei i te taata i te parauraa ia na e : a rave i terä ; eiaha e rave i terä. I te mau taime atoà rä, tei te taata te faaotiraa hopeà, i roto hoì i ta na e rave atu, te vai ra ia te tano, e te vai ra te hape. I roto i te mau mea ta te Atua e tiaì nei i te taata ia rave atu, teie ia hinaaro i te aroha te mea e au ia parau i te anoenoe. Ia noaa i te taata te mea ta na e hinaaro ra, ua hope atoà te parau o te hinaaro. Mai teie rii ta tätou e ìte nei i te taata tei poìhä, oia hoì tei hinaaro i te pape. Maoro teie taata i te inuraa i te pape, ua òre atoà to na hinaaro pape. E inaha, aita te hinaaro o te Atua i te taata i täôtiàhia i nià i te mea tei oti ia na i te rave, aore ra te mea tei noaa mai ia na, e tano ia parauhia e, e hinaaro tüatau to te Atua i te taata, ia tämau maite i te ûmere i to Na hanahana. Te tahi atoà fifi to te hinaaro, te mea ia e, ei mea faaära noa ia na, te vai ra hoì te taime e ara, te vai ra rä te taime, eita roa atu e ara ; aore ra, ua ara te hinaaro, eita rä te tino e pähono, oia hoì eita te reira hinaaro e riro mai ei òhipa ìtehia to na tupuraa. Te manaò tumu o te anoenoe, te tahi ia mea vai tämau, te tahi mea mutu òre to na tupuraa i roto i te tau. E ravehia no te faaìte i te òaòa o te tahi taata i te hiòraa, te mätaìtaìraa, te faarooraa i te tahi mea, aore ra te àmuraa i te tahi mäa. Ua riro te raveraa i taua mea ra ei òaòaraa no na, e te mea atoà hoì te reira e faaòaòa ia na. Rave na tätou ei hiòraa, te parau o te òri, aore ra te himene. Te vai ra te taata, tei roto ê na te reira mea ia na, maoro o ia i te faarooraa i te pehe, te haùtiùti-atoà-raa to na tino ; âreà te tahi atu taata ra, e marö ia te vaha i te faaueraa ia na e òri, eita ihoä o ia e haùtiùti. Mai te reira atoà te taata tei au i te òhipa himene, fätata to na hutiraa aho e, e òtoraa himene anaè. No reira, te taata tei anoenoe i te aroha, e taata ia, tei riro ei òaòaraa tämau no na, te faatupuraa i te aroha. Eere no te mea ua faauehia i rave ai o ia i te tahi òhipa, mai te taata rä të òre e tiaì ia parauhia atu e huti i te aho no te huti i te aho, mai te reira atoà te taata e anoenoe i te aroha. E tano tätou e faaäu i teie taata i te tahi räau ta te fenua i horoà i te ora, te tupu, e te hotu, nä roto rä i to na rau e to na hotu, te haamaitaì atoà ra teie räau i te fenua e  haamaitaì ra i to na tupu. Te manaò hau e te faufaa ta teie taò anoenoe e faaö mai ra, teie ia manaò no te òaòa tei riro ei tumu, oia hoì ei haamataraa e ei faahopeàraa no te tupuraa o te parau o te aroha, i reira tätou e ûmere ai èi faahanahana i te Atua Nui Tumu Tahi. Noa atu te mau haafifiraa rau o te oraraa i teie mahana, te mau roo tämaì, te mau maì rau e faataupupü nei te mau faanahoraa no te oraraa vaamataèinaa, te âueueraa fenua, te miti faaî, èita na teie mau tupuraa òhipa e faaïti i te ora, ia anoenoe noa te aroha, i te mea e òre te hoê ìo rouru o to tätou upoo e moè.

 

Teraì òr. Faatura.