Ioane 20.19-31 Fänau

 

Tāpati 16 no Èperera 2023.

Fänau

Taramo 118.17-29

17 E òre au e pohe, e ora mau ä vau, e parau faahou ä vau i te òhipa a te Fatu.

18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.

19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra.

20 O te ùputa teie na te Fatu, e nä reira te feiä parau tià i te tomo.

21 E haamaitaì au ia òe, ua faaroo mai hoì òe ia ù, e ua riro ei ora no ù.

22 Te ôfaì i faaruèhia e te feiä i patu ra, tei riro iho nei ei ôfaì tihi.

23 O ta te Fatu teie i rave E mea maerehia hoì i mua i to tätou nei mata.

24 O te mahana teie i faaauhia e te Fatu; e òaòa tätou, e e fänaò i teie nei mahana

25 «Ia ora i teie nei, e te Fatu, te ani atu nei au, ia ora i teie nei, te ani atu nei au. E haamaitaì mai ia mätou i teie nei, e te Fatu e»

26 Ia ora o ia o tei haere mai mä te iòa o te Fatu Te faaora atu nei mätou ia òutou mai roto atu i te fare o te Fatu.

27 O te Atua mau ra o te Fatu ia, o tei haamäramarama mai ia tätou nei. A ruuruu na i te tütia àmu i te taura i nià i te mau tara o te fata nei.

28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe.

29 E haamaitaì i te Fatu, e maitaì hoì to na, e tià hoì to na aroha i te vai-mäite-raa.

Òhipa 2.42-47

42 Mau päpü mäite atu ra rätou i ta te mau âpotetoro i haapii ra, e te âmui-mäite-raa, e te vähiraa i te päne, e te pureraa hoì.

Te oraraa i rotopü i te huifaaroo

43 E roohia iho ra rätou atoà e te mataù, e rave rahi te temeio te täpaò i ravehia e te mau âpotetoro ra.

44 Ruru aè ra taua feiä atoà i faaroo ra i te vähi hoê, e âmui noa aè ra hoì i ta rätou taoà.

45 Ua hoo atu ra i to rätou fenua e te taoà, e tufa iho ra hoì na rätou atoà, e au päatoà aè ra.

46 E tià rätou atoà i roto i te hiero i te mau mahana atoà mä te hinaaro hoê, e te vähiraa i te päne i tërä fare, i tërä fare, àmu iho ra hoì rätou i ta rätou mäa mä te òaòa, e mä te rötahi noa te âau,

47 i te haamaitaìraa i te Atua, e mä te ìtehia mai hoì e te taata atoà. E te feiä i faaorahia ra, ua âmuihia ia e te Fatu i te Ètärëtia ra, aita e mahana i tuua.

1 Pētero 1.3-9

Te tiaìtururaa ora

3 Ia haamaitaìhia te Atua te Metua o to tätou Fatu ra o Ietu Metia, o tei haafänau faahou ia tätou no te rahi o to na ra aroha, ia noaa te manaò ora i te tiàfaahouraa o Ietu Metia mai te pohe mai ra,

4 ia noaa te tufaa ìno òre ra, e te viivii òre, e te mäheàheà òre, o tei vaiihohia i nià i te raì no òutou.

5 O tei tiaì-pare-hia e te mana o te Atua i te faaroo, ia noaa te ora i ineine i te faaìtehia mai ia tae i te tau hopeà ra.

6 Ia rahi to òutou òaòa i te reira, taiä poto noa ä òutou i teie nei, no te mea tià ia, i te mau pohe èê ra.

7 Ia riro te tämataraa o to òutou faaroo, o tei rahi roa te maitaì i to te àuro moè noa nei, tämata noa ä i te auahi, ei haamaitaì, e ei tura, e ei maitaì, i te färaa mai o Ietu Metia ra.

8 O ta òutou i hinaaro na, òre noa ai te ìte ia na; o ta òutou e òaòa na i te òaòa eita e tià ia parau ra, e te î hoì i te maitaì, i te faarooraa atu, òre noa ai òutou i te hiò atu ia na i teie nei:

9 mä te noaa hoì te hopeà o to òutou faaroo, oia te ora o to òutou mau värua.

Ioane 20.19-31

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou.

20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra.

21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na.

22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra:

A färii i te Värua Maitaì.

23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra.

25 Ua parau atu ra te mau pipi ra ia na: «Ua ìte aè nei mätou i te Fatu. Ua parau mai ra o ia ia rätou: «I òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo.

26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra: Ia ora na òutou  

27 Ua färiu mai ra ia Toma, ua parau mai ra: «A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä.

28 Ua parau atu ra Toma ia na, nä ô atu ra: «E ta ù Fatu, e ta ù Atua.

29 Ua parau mai ra Ietu ia na: «No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai.

Tei ia na te Tamaiti ra, tei ia na ia taua ora ra

30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta.

31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò.

Te mea ta teie mau taiòraa e heheu mai nei ia tätou i nià i te huru o te Atua, ia au atoà ihoä rä i te tahi manaò ta tätou i faahiti pinepine noa mai na, teie ia : aita e òhipa ta te Atua e ani nei i te taata tei òre o ia i nä mua i te rave. Te huru mau atoà rä te reira o te Fatu i mua i ta na mau pipi. No reira, te mea ta te Atua i parau nä roto i te vaha o te perofeta ra o Ìtaia, te mea ia ta te Tamaiti e faatupu nei, ua riro atoà rä te reira  ei haamanaòraa mai i te taata i te aniraa a te Atua tei òre ä o ia i faatupu. Te ìte atoà ra ia tätou e, aita atu e parau maitaì roa aè maoti rä, te rave, oia hoì te tuuraa i mua i te mata, te hohoà o te òhipa e hinaarohia ra i te taata ia rave, aore ra te faariroraa i te parau ei òhipa ìtehia e te mata. Te haamanaò atoà mai ra rä te reira parau ia tätou e, no te mea te Atua te Fatu o te tau, aita te òhipa a te Atua i täôtiàhia i roto i te tau. No reira, vai noa mai te taata i nià i te fenua nei, vai noa atoà mai te hinaaro o te Atua ia ìte te taata atoà i te ora a te Atua. Te mea atoà ia o Ietu i poroì ai i ta na mau pipi e haere e faariro i te mau fenua atoà ei pipi  Mätaio i te pene 28 ìrava19, oia hoì ei feiä tei färii i te tomo atoà i roto i te ôpuaraa faaora a te Atua. Te ora a te Atua. E òhipa të anihia ra i te taata e rave : haamänina i te èà, tuu i te mouà i raro, faaî i te peho, haamänina i te puu …, e te nä ô ra te parau i te ôpaniraa e : ia ìte te taata atoà i te ora a te Atua. E tano te manaò e uiui rii, àhiri, nä roto i te òhipa ta te taata e rave ra, te faaìte ra änei o ia i te ora a te Atua, aore ra aita ta na i roto i te tupuraa o te reira parau. I roto hoì i teie parauraa e : ia ìte te taata atoà, aita änei e tüàtiraa to roto i te hopeàraa o te òhipa e tiaìhia ra e te òhipa i ravehia. Te auraa ra, aita änei ia te reira e riro ra ei faaìteraa i te ora a te Atua. Te parau ia ta tätou e tämata i te haamäramarama i teie nei. Rave na tätou i te tahi hiòraa no te haamatara maitaì i te taa-ê-raa e vai ra i roto i te parauraa e, faaìte, e te parauraa e, ia ìte… Te hinaaro ra vau e faaìte i te tahi taata i te tunu i te ùru : to ù te reira faariroraa i teie taata ei mätaìtaì, oia te taime au e rave ai i mua ia na i te mau òhipa atoà i mätauhia i te rave i roto i te tünuraa o te reira mäa. Te ìte, e te  òre teie taata e ìte, e parau taa ê te reira ; ua faaìtehia rä o ia. Areà i roto i te parauraa e : te hinaaro ra vau i te tahi taata ia ìte i te tunu i te ùru, eere te òhipa ta ù i rave te mea faufaa, te tupuraa rä o te reira ìte, tei riro noa te òhipa ta ù i rave ei tauturu, ei faaòhie i to na tupuraa. Ia au rii paì i te manaò ta Pauro e parau ra a nä ô ai o ia e : Na ù i tanu, na Aporo i faarari i te pape, na te Atua rä i faatupu  1 Torinetia i te pene 3 ìrava 6. I horoà ai te Atua i te òhipa na te taata, no te mea ia, te vähi mau te reira e ìte-päpü-hia ai te tiàturiraa o te taata i te Atua. No reira, e òhipa ta te taata ra, ia haapaò ia o ia i ta na, e eiaha o ia e haapaò atu i ta te Atua, no te mea Ìtaia i te pene 14 ìrava 24 : Ta ù mau i ìmi ra, te reira të tupu, e ta ù i ôpua ra, te reira të mau . Ua tiàturi mau te taata i te Atua ra, ua ìte atoà ia o ia e, e òhipa atu te parau a te Atua no te faatupu i te mea e hanahana ai o ia, eita hoì ta na parau e hoì faufaa òre noa ia na ra Ìtaia pene 55 ìrava 11. No reira, te faufaa o te taata, aita ia i nià i te tupuraa o te òhipa e hinaarohia ra, tei nià rä i te raveraa i te òhipa e tiaìhia ra ia na ia rave atu : ua rave o ia ra, ua tupu ia te ìte ; e aita hoì i rave ra, ua òre atoà ia te reira parau ua ìtehia. E tano ai ia parauhia e, eere no te taata i tupu ai te ìte, no te mea te òhipa ihoä te reira e tupu mai  ia rave o ia i te mea e anihia ra ia na e rave, no na rä i òre ai i tupu te ìte, no to na òreraa e rave i te tuhaa òhipa i faataahia na na ta teie ia mau ìrava e faaìte nei.

-Taramo 118, 28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe.

-Òhipa 2, 47 i te haamaitaìraa i te Atua, e mä te ìtehia mai hoì e te taata atoà. E te feiä i faaorahia ra, ua âmuihia ia e te Fatu i te Ètärëtia ra, aita e mahana i tuua.

-1 Petero1, 3 Ia haamaitaìhia te Atua te Metua o to tätou Fatu ra o Ietu Metia, o tei haafänau faahou ia tätou no te rahi o to na ra aroha, ia noaa te manaò ora i te tiàfaahouraa o Ietu Metia mai te pohe mai ra,

-Ioane 20, 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

Te parau no te tiàfaahouraa o te Fatu, ua haamata ia te reira i roto i te menema te vahi i tuuhia to na tino i te faraite poheraa. O Maria i Matätara, Petero, e te pipi herehia, o rätou e toru nei te mau taata, o ta te Evaneria e faaite nei, ei mau ìte i  te hoê menema tino òre i roto, tei faataahia te ôfaì i ôpani i te vahi tomoraa. O Maria i Matatara, i te mahana mätamua o te hepetoma. Oia hoi, i te mahana mätamua roa no te mahana o te mau taata teretetiano, tei parauhia te mahana pata, no te tiàraa o te  Fatu mai roto mai i te pohe. Te ârehurehu noa ra i tae ai o ia i mua i te menema, tei ìritihia te ùputa. Ei haapäpüraa teie e, ua tuuhia na o Ietu i roto i te menema i ôpanihia e te ôfaì  teimaha. Ma te manaò e, ua èiahia te tino o Ietu, i horo ai o ia e faaìte ia Petero no te haere e hiò i teie òhipa tià òre. I to Petero faarooraa i teie parau âpï, aita te tino o te Fatu i roto i te menema, hohoro atu ra o ia, e te pipi herehia e Ietu, na mua atu ra o ia i te menema, aita ra o ia i tomo atu i roto. Areà ra o Petero tomo roa aè ra i roto, ite aè ra e, te àhu i tuuhia o Ietu i roto te vai noa ra ia, te àhu ra i tuuhia i nià i to na upoo ei täpoìraa i to na mata, ua tiàfetuhia ia, ma te faataa to na vairaa. Na teie mau òhipa i tupu i roto i te menema, e haapäpü e, aita te tino o Ietu i èiahia. To na auraa ra, ua tià mau te Fatu, ua vai noa teie menema, ma te tino pohe òre, e tià ia parauhia e, ua riro noa teie menema, mai te hoê vahi i reira o Ietu i te haamäharaa i to na rohirohi i te òhipa rahi tei tupu i te faraite poheraa. E i te tomoraa, te pipi herehia e Ietu i roto i te menema, ite aè ra, e ua tiàturi iho ra. (ìr 8 vh). I te iho ra o ia e faaroo atu ra. Ua riro no te pipi herehia teie menema taata òre i roto, e teie mau àhu vehi i tufetuhia, mai te hoê reo tei parau ia na e ua tiàfaahou Vau. Ua ravaì te mau mea ta na e hiò nei, no te faatupu i to na faaroo e to na tiàturiraa i te tiàfaahouraa no to na Fatu. E ere i te mea faufaa ia ìte mata o ia i to na Fatu, ua faaroo o ia i teie nei. Te faarooraa i te tiàfaahouraa o Ietu e te ora mure òre, te faatupu nei ia i te òaòa tumu i roto i te oraraa no te mahana tätaì tahi. E aha te faufaa no te oraraa, àhiri te tiaì noa nei tätou i te mahana poheraa e aita atu ai ? E aha te faufaa no te mau òhipa ta tätou e rave nei, mai te peu e, na te pohe e faaoti i te mau mea atoà ? E mea faufaa òre te mau òhipa i ravehia, te faaòromaìraa i te mau àti e te mau pohe o teie nei ao, te mauiui, te poia e te poiha, e mea faufaa òre te aroha e te hämani maitai ia vëtahi ê, mai te peu e, aita to tätou faaroo i te tiàfaahouraa no Ietu. E mea tià ia te maa parau ra " e àmu tatou e e inu hoi, ànanahi tätou e pohe ai" Teie ra, ia haamaitaìhia te Atua, ua tiàfaahou Ietu, ua ôfatihia te tara o te pohe, e ua ìriti i te ùputa no te ora mure ore i mua ia tätou. A rave i te òhipa ma te òaòa. A amo i te mau hopoià atoà ma te  reàreà o te âau. Noa atu te mau mea roohia mai ai tätou i roto i teie nei ao, eita e tià i taua mau mea ra, ia ìriti i te òaòa ta te tiàfaahouraa e ninii nei i teie mahana i roto i te âau no te feiä atoà tei faaroo i te Fatu ora  ia Ietu. Te ùputa ta na i ìriti i mua ia tätou, e òre ia e tià i te hoê mana ia ôpani, e ta na i ôpani e òre e tià ia ìriti. No te mea, te ora nei o ia, e ora atoà tätou. Na teie mau parau e faaìte i te ora ta Ietu i faafänau i te mahana mätamua o te hepetoma. E hohoà te parau no te tiàfaahouraa o Ietu mai te hoê metua vahine tei tö, e tei faafänau i te àiü âpï. Ei faaìteraa te vai mau ra te tiaìtururaa ora no te mau tau e a muri noa atu. Te òhipa i tupu i te tiàfaahouraa o Ietu, ua haafänauhia te hoê tiàturiraa âpï, te hoê faaroo âpï, tei parauhia te nunaa Teretetiano. Ua niuhia teie nunaa âpï i nià i te tiàfaahouraa, no te ora mure ore, eita atu ra na te pohe e faatere teie nunaa, na te ora ra o ia e ärataì i roto i ta na mau faanahoraa. Ua fänau te hoê faaroo âpï, no te hoê nunaa tei  tiàturi i te Atua Ora, tei höroà i te taata i te haafatataraa i pïhaì iho i te teröno no te parautià. Te òhipa a teie nunaa âpï te àro tämauraa ia, ia tupu te faaìteraa na roto i te haehaa, ei ia raa te aroha, te here, e te hau i te mau vahi atoà, e i roto  i te mau ui atoà. E ìte atu ra, e tiàturi iho ra. Ia tae ra i te i te ahiahi no te mahana mätamua no te hepetoma, tei roto te mau pipi i te fare i òpanipanihia, tià mai ra o Ietu i ropu ia rätou ma te parau atu e Ia ora na òutou. Ua faaìte iho ra i to na mau puta, ìte iho rätou o te Fatu teie, Ia ora na òutou, ua haapüaì-iho-ra te aho i nià ia rätou ma te parau e a färii i te Värua Maitaì. i te vaù o te mahana ua tià faahou mai ra te Fatu i roto i a rätou, o Toma atoà i reira, tei parau e ia òre vau ia ìte i te mau puta àuri i ta na tino e òre vau e tiàturi. Te reo mai ra o te Fatu Ia ora na òutou, parau atu ra te Fatu ia Toma faatoro mai na i to rima a fafa mai ta ù rima, a fafa mai na i ta ù àoào o vau teie o te Fatu, fäì aè ra o Toma i te parauraa e, E te Fatu e ta ù Atua, no te mea ua ìte mai òe ia ù e Toma a faaroo ai, e ao to te taata aore i ìte ia ù  a faaroo ai. Te faaìte noa mai ra teie parau i to te Atua faatupuraa i to Aroha e to na Here i te taata nei. 

Te heheu atoà mai ra teie parau ia tätou i te tahi huru to te Atua : oia mau, eita o ia e horoà i te òhipa mai te òre atoà e horoà i te räveà faaòhie i te raveraa o taua òhipa ra. Te auraa, aita te Atua e horoà nei i te taata i te òhipa të òre e maraa ia na i te rave. No reira, ia òre te tahi òhipa ia maraa i te taata i te rave, eere no te teiaha e te fifi o te òhipa, no te mea rä, aita te manaò o te taata i nià i te òhipa ta na e rave ra. E tano ai teie parau ta te Fatu e : Eere o ia i to ô nei ia ù nei, no ô mai ia Mätaio i te pene 12 ìrava 30. Te auraa, mai te peu aita to na manaò i nià i te Fatu, e haere ihoä o ia i te vähi e mauruüru ai to na âau. No reira e tano ai tätou e parau e, tei àti i te Fatu ra, no te faatupu ia i ta te Fatu, e tei faaätea i te Fatu ra, no te òreraa ia te âau i tae i nià i te raveraa i ta te Fatu. Te tumu rahi ia i òre ai i tae i te hopeà te mau òhipa ta te Atua e horoà nei i te taata e rave. Te riro atoà ra rä te parauraa e : ia ìte te taata atoà i te ora a te Atua, ei tïtauraa i te taata rave ia pähono atu i mua i te Fatu o te òhipa no te tupuraa, aore ra te òreraa e tupu te òhipa i horoàhia na na e rave. Te auraa, i roto i te ôpuaraa a te Atua, aita e taata i faaèrehia, aita hoì e taata e tano ia haapaehia i te ìteraa i te ora a te Atua. Te märamarama atoà ra ia tätou e, te ôpuaraa a te Atua, no te âtamu ia, oia te taata, mai te hiò òre i te ôtià o te fenua, te hau, te nünaa, te reo …, oia hoì e parau teie no te taata ta te Atua i hämani, te taata ei tupuraa no te ôpuaraa a te Atua. Ua faahiti mai na tätou i te tahi fifi to te taata i mua i te mau haapiiraa a Ietu, no te mea te vai ra ihoä te mea e parauhia ra, âreà te auraa, mea pinepine roa ia i te ìtehia i te tahi vähi ê atu. No reira, ia òre te taata ia ara, e riro o ia i te faaea noa i nià i te taò, e te parauraa e : tei päpaìhia ra, ua päpaìhia ia. Haamanaò atoà rä tätou e, e taò tei päpaìhia, e e tuhaa na te taata te ìmiraa i te auraa o te mea i päpaìhia. Mai te peu te hinaaro o te Atua, ia ìte ia te taata atoà i ta na ora, nä hea te taata e  òhie ai i te ìteraa i te tupuraa o te reira parau. Te mea ia tätou i tämata ai i te haamatara i te taa-ê-raa e vai ra i roto i te parauraa e : faaìte i te ora, e te : ia ìte i te ora.

 

Teraì òr. Faatura.

 

Ioane 20.1-9. Mahana

 

Tāpati 09 no Èperera 2023.

ÔROÀ TIÀFAAHOURAA

Mahana

Taramo 118.1-16.

1 E haamaitaì i te Fatu, e maitaì hoì to na, e tià to na aroha i te vai-mäite-raa.

2 Ia nä reira te ùtuafare o Ìteraèra i teie nei: e tià to na aroha i te vai-mäite-raa.

3 Ia nä reira te ùtuafare o Àarona i teie nei: e tià to na aroha i te vai-mäite-raa.

4 Ia nä reira te feiä i mataù i te Fatu i teie nei: e tià to na aroha i te vai-mäite-raa.

5 Ia ù i roohia e te àti ra, ua tiàoro vau i te Fatu, e ua ìte mai ra te Fatu ia ù, e ua tuu mai ia ù i te vähi ätea.

6 Tei pïhaì iho te Fatu ia ù ra, e òre au e mataù: e aha ta te taata ia rave mai ia ù ra?

7 Tei pïhaì iho te Fatu ia ù ei tauturu ia ù ra, e ìte au i te hiàraa o te feiä i riri mai ia ù ra.

8 E mea maitaì te tiàturi i te Fatu, i te tiàturi i te taata nei.

9 E mea maitaì te tiàturi i te Fatu, i te tiàturi i te hui-arii ra.

10 Ua haapuni mai te mau êtene atoà ia ù; no te iòa rä o te Fatu, pau iho ra ia ia ù.

11 Ua nä nià iho hoì, e ua nä nià iho i te haapuni ia ù, no te iòa rä o te Fatu, pau iho ra ia ia ù.

12 Ua haapuni mai rätou ia ù mai te tepure ra, mai te auahi àihere ra, aore aè ra e mähia, mou iho ra, no te iòa hoì o te Fatu, pau iho ra ia ia ù.

13 Ua neneì hua mai hoì òe ia ù ia hià vau, ua tauturu mai rä te Fatu ia ù.

14 O to ù ia ètaèta e o ta ù ia himene o te Fatu, ua riro mai hoì o ia ei ora no ù.

15 Te reo òaòa e te ora tei roto i te mau tiàhapa o te feiä parau tià ra: «E räveà itoito tei te rima àtau o te Fatu,

16 e teitei to te rima àtau o te Fatu, e räveà itoito tei te rima àtau o te Fatu.»

Òhipa 10.34-43.

To Pëtero ôreroraa i mua ia Torenerio mä

34 Ua parau atu ra te vaha o Pëtero: «Ua ìte mau atu ra vau e òre te Atua e haapaò i te huru o te taata.

35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana.

36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haere-raa i te Parau Maitaì i te hau ra ia Ietu Metia (o te Fatu no te mau mea atoà ra).

37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra:

38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua.

39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau.

40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra;

41 eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra.

42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì.

43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa.

1 Tōrīnetia 5.6-8.

6 Eere to òutou faaahaaha i te mea maitaì. Aita òutou i ìte e, e höpue te puèà atoà i te faahöpue iti haìhaì ra? 7 E teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na: o te Metia hoì ta tätou Päta, i taparahihia ia na tätou.

8 E teie nei, e haapaò tätou i taua ôroà ra, eiaha mä te faahöpue tahito ra, eiaha atoà mä te faahöpue täiroiro e te ìno, mä te mäa faahöpue-òre-hia rä, o te haavare òre e te parau mau.

Ioane 20.1-9.

Te tiàfaahouraa o te Fatu

(Mät 28,1-8; Mär 16,1-8; Ruta èv 24,1-12)

1 E tae aè ra i te mahana mätamua o te hepetoma ra, ua haere atu ra Märia i Matätara ra i te poìpoì roa i te menema ra, te vai ârehurehu ra, e ìte aè ra e ua huri-ê-hia te ôfaì i te ùputa o te menema ra.

2 Horo mai ra o ia ia Timona Pëtero ra, e te pipi herehia e Ietu ra, ua parau mai ra ia räua e: «Ua hopoi-ê-hia e rätou te Fatu i te menema ra i räpae, e aore mätou i ìte i te vähi i vaiihohia ai o ia e rätou ra.

3 Ua haere atu ra Pëtero i räpae i reira ra, e taua pipi atoà ra, e tae atu ra i te menema ra.

4 Ua hohoro atu ra räua atoà, e hemo iho ra Pëtero i taua pipi ra, o tei tae atu na ia i te menema ra.

5 E piò iho ra o ia i raro, hiò atu ra i te àhu vehi ra i te vai-noa-raa, aore rä o ia i tomo i roto.

6 Ua haere mai ra Timona Pëtero i muri iho ia na, tomo atu ra i roto i te menema ra, hiò iho ra o ia i te àhu vehi ra i te vai-noa-raa,

7 e te àhu i vehihia i ta na upoo ra, aore ia i vaiihohia i te vairaa i te àhu vehi ra, i tiàfetuhia ia e vaiiho-ê-hia i te vairaa ê.

8 Ua tomo atoà atu ra hoì te hoê pipi i roto, o tei tae atu na i te menema ra; ìte iho ra o ia e faaroo atu ra.

9 Aore ä hoì rätou i ìte i te parau i päpaìhia ra e, e tiàfaahou mai o ia i pohe ra.

Manaò.

Te mätamua teie o te ao no te tiàfaahouraa, ua maìri te ao o te ano, te hiti nei te märamarama te moè nei te uriuri o te pö. Teie te tahi fäìraa i te parau no te ao o te tiàfaahouraa. Ia hiòhia te òhipa ta te Atua i rahu, mai te taime i ìritihia ai ta na parau i te ùputa o te märamarama, e tae mai i teie nei, te taata ia te òhipa hopeà ta na i rave ; ia hiòhia rä te òhipa ta te Atua i hämani, oia te òhipa i nä roto mai i to na rima, te taata ia te mätamua. Te vai ra i roto i te parau o te taata te tahi mea tei haafätata ia na i te Atua, te vai atoà ra rä te mea tei haapäpü mai i to na ätearaa i te Atua. No te mea e tävini te taata no te Atua, te faaìte-atoà-hia mai ra ia to na fätataraa i te Atua, te haapäpü atoà ra ia te Atua i te ätearaa e te taa-ê-raa e vai ra i roto i te taata e te Atua. Te auraa, eere teie fätataraa te taata i te Atua i te tahi tauiraa tei horoà ia na i te tiàraa atua.

No reira te Atua i hinaaro ai i te haapäpü maitaì mai e : Mai te raì nei, e teitei rahi to na i to te fenua, oia atoà to ù ra haereà, e teitei ia i to òutou haereà, e to ù ra mau manaò, i to òutou ra mau manaò  i te faaìteraa a Ìtaia i te pene 55, i te ìrava 9.Te vähi ta te manaò e hinaaro nei i te hiò, eere ia te mea e faaätea ra i te taata i te Atua, te mea rä e ìte ai te taata e, eita to na parau e tano ia faataa-ê-hia i to te fenua. E fenua ra, ei fenua ia. Mai te peu e repo fenua te taata, te vähi atoà ia te reira e roaa ai ia na te auraa o to na parau, oia te vähi e märamarama ai o ia e ìte ai hoì i te räveà e faufaahia ai to na parau. Te mea rä e ìtehia nei, te riroraa ia te tahi parau fifi òre ei parau àro. I mua i te mau mea e vai tahaa noa ra, e au ra e, tei mua te taata i te àehaa mute òre. No reira, ia moè i te taata to na parau, nä reira hoì te tumu o to na parau, e ìte-faahou-hia änei ia na te èà o te ora, oia te èà e tae atu ai o ia i roto i te ìteraa i te Atua. Eiaha rä ia àramoinahia ia tätou e, te èà, e vähi haereraa ia, e aita e faufaa to te èà ia òre te taata ia färii i te nä reira i te haere. E ia parau hoì te Fatu e : O vau te èà, te parau mau, e te ora, aore roa e taata e tae i te Metua ra maori rä, ei ia ù Ioane i te pene 14 ìrava 6, te ìte ra ia tätou e, hoê anaè èà e arataì i te taata i te tumu o te ora. Ia parau rä Ietu i te färaoa e te uaina, to ù ia tino, to ù ia toto, oia hoì o vau ia, e òhie tätou i te märamarama e, te èà ta te fenua e faaìte ra, e te èà ta te Fatu e faaìte ra, taua èà nei ä ia. Te haapäpü noa mai ra teie parau ia tätou e, hoê anaè èà e arataì i te taata i te Atua ra, eere e piti.

I parau a ai tätou e, e repo fenua te taata, eere no te mea noa e, te vai ra te tahi ìrava pïpïria e paèpaè ra i te reira manaò, no te mea rä ua nanaò-roa-hia i roto i to tätou reo mäòhi, e òre atu ai e tià ia tätou ia parau. Hiò na tätou i ta te reo tautururaa ia tätou i mua i teie parau no te tüàtiraa te taata i te fenua. Te nä ô nei tätou e, e vari, no te faaìte i te huru o te fenua tei paruparu roa no te pururaa i te pape. Ua ìte tätou e, mai te peu te vai ra te räau e au i te fenua repo uàuà, te vai ra të òre roa to na tupuraa e taupupu i te rahi o te pape. Teie repo ta tätou e märamarama nei ia parauhia no te räau, te parau atoà ia ta te reo i täpeà mai no te toto o te vahine ta te tino i òre i täpeà mai no te òreraa te ora i mau i roto ia na. Ia päpü rä te tupuraa o te ora tei riro te vahine ei färii, te mea atoà ia e mau ai taua vari ra, e a taui atoà atu ai ta te taata hiòraa i to na parau, nä reira hoì te reo e faaòhipahia atu no na. Ia hiò tätou i te hoê fenua vari tei òre i òhipahia e te rima a riro atu ai ei puna no te ora, e riro te reira i te faatupu mai i te faufau e te au òre o te taata ia hiò atu. A mä rä teie fenua, e a î hoì i te mäa, riro mai ra ia ei âruerueraa na te âau. Mai te tau a uìuì mai ä to te taata o te mau fenua atoà hiòraa i te maì o te vahine, oia te vari e parauhia nei, mai te tahi mea faufau e te viivii ra te huru. No te mea e taoà faaruèhia teie e te tino, hiò-atoà-hia atu ra te reira ei täpaò no te pohe. E no te mea e faatupu te pohe i te pohe, topa atoà mai nei te ôpaniraa i nià i te vahine ia òre o ia ia täpeà i te räau tanu, o te faatupu atoà atu to na ata i te pohe o te räau. A färii rä te tino o te vahine i te ora ta te täne i tuu atu i roto ia na, riro atu ra ia taua vari ra ei taoà àtuàtuhia e te päruruhia, topa mai nei te ôpaniraa i nià i te vahine ia òre o ia ia amo i te hopoià teiaha, ia òre ia faarohirohi i to na tino, o te hee teie vari, e o te mäuà te ora ta na e mau ra. Ia ìte mai tätou, eere no te veve i te reo i täpeànoahia mai ai teie taò vari, no te mea aita e tumu e faatano ra i teie parauraa i te toto e, vari. Ua heheu noa mai rä teie taò i te paari o te mau tupuna tei märamarama i te tüàtiraa e vai ra i roto i te toto, te vari, e te fenua ei tupuraa no te ora. Te au, e te òre te taata e au i te fenua, e fenua ihoä rä o ia, e te faaìte noa ra hoì to na parau i te parau o te fenua. Teie te tautururaa tei haapotohia ia au na taiòraa e maha no teie mahana.

-Taramo 118, 14 O to ù ia ètaèta e o ta ù ia himene o te Fatu, ua riro mai hoì o ia ei ora no ù.

-Òhipa 10, 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra;

-1 Torinetia 5, 7 E teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na: o te Metia hoì ta tätou Päta, i taparahihia ia na tätou.

-Ioane 20, 1 E tae aè ra i te mahana mätamua o te hepetoma ra, ua haere atu ra Märia i Matätara ra i te poìpoì roa i te menema ra, te vai ârehurehu ra, e ìte aè ra e ua huri-ê-hia te ôfaì i te ùputa o te menema ra.

Ao no te tiàfaahouraa teie e niuhia nei i teie mahana mätamua o te hepetoma, te vai ârehurehu noa ra i ìtehia ai e te vahine ua huri-ê-hia te ôfaì no te ùputa o te menema. E poìpoì ua vaiiho mai te ruì ia òhipa te mahana èi türamaraa i te ao, no te faaìte i te puai no te ora èi faaâpïraa i te parau no te mahana e to na taiòraa, mahana mätamua no te hepetoma. Te parauhia nei te mahana, te mahana te taime ia e hiti ai no te faaìte i te ao, ua vaiiho te pö, te reira noa nei ra te manaò i roto i teie taò te mahana. Te auraa no te mahana ia i noaa ai te parau no te ao. Ia hinaaro tätou na märamarama i te auraa o te ao, mea tià ia märamarama tätou i te auraa o te mahana. Teie taò no te mahana o te rä ia te tahi parauraa. E taò hämani teie e hana te taò tumu, ta te Paùmotu e parau nei ua ruki te hana, ua vaiiho mai te ruì ia òhipa te hana i te märamarama, te parau atoà nei te Ènata te hana tei na à i roto i manaò òhipa i teie nei mahana. Mai roto mai i teie taò hana te roaaraa mai ia tätou te hanahana ua täpitihia te parauraa no te faaìte i te puai o te taò e to na värua. Te manaò rahi e vai ra i roto i teie taò e hana, te tahi ia mea e àma, te tahi mea e horoà i te märamarama, oia te tahi mea e türama, no reira e roromä te toètoè e te uriuri, a riro atu ai te ànaana ta na e höroà èi faahiò, èi faaìte i te tahi mea të ìte-òiòi-hia ta te ànaana e faatupu. Naò ia teie manaò i te parauraa teie mahana mätamua, ua höroà i te märamarama no te mau òhipa e tupu, tei faahiò ia tätou i te faufaa hau ê no te mau maitaì ta tätou e faanaò nei. Te riro atoà nei rä te reira èi faahiòraa ia tätou i te Atua Metua te tumu no te tiàfaahouraa te Metia. Te türama mai nei te mahana i te fenua e to na î, te faahoì nei hoì te î o te fenua i taua märamarama ra i nià i te Atua. No reira i tupu ai te hanahana o te Atua, no te maitaì o to na roo ta te fenua e faaìte nei. I haere ai te vahine i te menema i te poìpoì roa, te vai ârehurehu noa ra i te mea te püfenua tera e pii ra ua haafänauhia te Ao âpï, te ao no te tiàfaahouraa. E tae aè ra i taua mahana ra, te faaìte noa mai ra ua tae i te faaâpïraa ua tämähia te èà, e àehaa mutu òre teie tei faaìte i te puai no te mau òhipa e tupu no te mau tau atoà e orahia nei e tätou. Te riro nei rä te ànaana o te hana, te mahana, ta tätou e parau nei e, e ao, èi haamanaòraa mai ia tätou e, te faahanahana nei te mau mea atoà i hämanihia i te Atua, no te faaìte ra rätou i to na parau, te haamaitaì ra i to na iòa, te ârue ra hoì ia na. Te faaìte atoà nei te teatea o te pö ta te märama, oia te âvaè, e höroà nei, i te rahi o te òhipa ta te Atua i rahu. Ta tätou parauraa i teie pö, e pö turu, e turuhia te aru, e ìtehia ai te mau ata no te mau tumu räau. E tià roa ai ia tätou ia parau e, te ao, te hitiraahia ia te fenua nei e te ànaana o te rä, a riro atu ai te marämarama ta na i ninii mai èi heheuraa mai i te maitaì hau ê o te Atua Nui Tumu Tahi èi faaìteraa i to na hanahana.

Te parau atoà nei to tätou reo e ao no te faaìte i te maitaì i te òhipa i ravehia e te tahi taata, te faahiti nei tätou e ao to òe no te haamauruüru ia. Teie parauraa no te faaìte i te täpaò no te òaòa fäito òre, e haapäpüraa hoì no te hoê oraraa fänaò, te hoê oraraa tei faatea i te mau faarumaraa e te peàpeà huru rau tei riro èi tuhaa na tätou i te fenua nei. Ua riro teie ao èi haapäpüraa e, e noaa te hau, te ora, e te òaòa.Te märamarama atoà ra ia tätou i teie nei i te tumu te Atua i ruru roa ai i te nuu atua no te faaoti i te parau o te taata. No reira, mai te Atua i here i ta na rahu, oia te òhipa i nä roto mai i ta na parau, ua here atoà te Atua i te taata, te òhipa i nä roto mai i to na rima. Te ìte atoà ra ia tätou i teie nei e, aita te taata i tuu-noa-hia i roto i te püfenua, oia hoì eere teie i te vairaa tamarii noa, ua riro mau rä ei pü no te rahu a te Atua, e ua faaìte noa mai hoì te tupuraa o te parau o te taata i te tupuraa o te rahu a te Atua. Mai te pape tei riro ei tumu no te ora o te fenua, oia atoà te taata, ua riro atoà te päpe ei tumu no to na ora, inaha ua tupu o ia i roto i te päpe, e no te taa-ê-raa te päpe i te püfenua, i taata mai ai te taata, oia hoì i fenua mai ai te fenua. No reira, ia parau Ietu e : Ia òre te taata ia fänau faahou, e òre o ia e ìte i te hau o te Atua i te faaìteraa a Ioane i te pene 3 i te ìrava 3, te märamarama ra ia tätou i te hinaaro o te Atua ia faafäite faahou te taata i ta na rahu. E mai te peu te fifi ra o ia i te reira parau, teie ia te reo o te Atua : A ui na rä i te mau puaa, e na te reira e haapii mai ; e te mau manu o te rave nei, e na te reira e faaìte mai ia òe ; e aore ra, a ui na i te fenua, e na te reira e parau mai ; e te ià atoà o te moana, e na te reira e faaìte mai ia òe ; o vai tei òre i ìte i taua mau mea ra e, na te rima o te Atua te reira i rave i te faaìteraa a Iöpa i te pene 12, i te mau ìrava 7 e tae i te 9. Ore noa atu ai rä tätou i märamarama i te reo o te mau puaa e to te mau manu, teie ia te reo o te Fatu : Ia tuuhia te hoê huero tïtona i raro i te repo, ia òre rä ia pohe ra, ua vai hoê noa ia ; ia pohe rä, rahi roa atu ra ia te hotu Ioane i te pene 12 i te ìrava  24 No reira, ia òre te taata ia färii faahou i te hoì i roto i te fenua, eita ihoä ia o ia e ìte i ta te fenua haamaitaìraa mai ia na, eita roa atu rä o ia e faaroo i te reo o te Atua, mai ta na i parau i nià i ta na rahu : mea maitaì. Te òhipa ia e tupu nei i te taeraa i te mahana mätamua o te hepetoma, i te poìpoì te ârehurehu noa ra, ua tiàfetuhia e Ietu i te àhu i vehihia to na tino, ua tià e ua haere no te faaìte ua matara te ùputa o te fenua no te Ao o te tiàfaahouraa.

 

Teraì òr. Faatura.