Ioane 20,19-23. Aho.

 

Tāpati 28 no Më 2023.

ÔROÀ no te REO.

Aho.

Taramo 104

1 E haamaitaì i te Fatu, e ta ù värua E ta ù Atua, e te Fatu, òe tei rahi roa. Ua vehihia òe i te hanahana e te mana,

2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru;

3 i te vauvauraa i to na ra mau piha i te pape. E te raveraa i te mau ata ei pereoo no na, i te hahaereraa nä nià i te pererau ra o te mataì,

4 i te faariroraa i te mau merahi no na mai te mataì ra, e te mau tävini no na mai te auahi ura ra.

5 Na òe i haamau i te tumu o te fenua, ia òre roa ia âueue.

6 Ua täpoì hoì òe ia na i te àputo, mai te àhu ra, te teitei ra te pape i te mau mouà.

7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere.

8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra.

9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua.

10 Ua tuu mai o ia i te pape pihaa ei vai matätia, o tei tahe haere nä roto i te ärea o te mau mouà ra:

11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai.

12 I pïhaì iho te mau manu o te reva i te pärahiraa o tei òto i roto i te mau âmaa rii.

13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

14 Te faatupu nei o ia i te àihere na te mau puaa, e te räau rii na te taata. E te roaa nei te mäa ia na no roto i te fenua:

15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

16 Te mau räau a te Fatu ra, ua paari ia, te mau âreti i Repanona ra, ta na i tanu ra,

17 e tei ôfaahia e te mau manu ra. Te mau peruti ra to te hetite ra ùtuafare.

18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana.

19 Ua hämani o ia i te märama no te mau tau i haapaòhia ra, ua ìte hoì te mahana i to na maìriraa.

20 Na òe i hopoi mai i te pöuri, e ua ruì iho ra, ei reira te mau taehae o te ururäau ra e haere ai,

21 te mau riona âpï i te ûâ-haere-raa i te mäa, i te ìmiraa i te mäa i te Atua ra.

22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo.

23 Ua haere iho ra te taata i te òhipa na na, ta na i rave ra, e ahiahi atu.

24 Aita te huru rau o ta òe ra òhipa, e te Fatu. E mau räveà paari anaè ä ta òe. Ua î te fenua nei i ta òe ra taoà.

25 E tënä na hoì miti rahi e te âano, tei reira te mau mea e nee haere, eita e hope ia taiò: te mau mea rii ra e te mea rarahi atoà ra.

26 Tei reira te mau pahï i te tere-haere-raa; tei reira te Reviatana ta òe i hämani i te haùti haereà.

27 Te tiaì anaè ra te reira ia òe ra, ia noaa ta rätou mäa i te taime mau ra.

28 O ta òe i horoà ra, o ta rätou ia i rave; ua heheu òe i to rima ra, ua îî anaè ia rätou i te maitaì.

29 Ua püroù òe i to mata ra, e àti ia to rätou Ua rave mai òe i to rätou aho, ua pohe ia rätou, e ua hoì faahou i to rätou ra repo.

30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

31 E vai ä te hanahana o te Fatu e a muri noa atu. Te òaòa nei te Fatu i ta na iho ra òhipa.

32 Ua hiò anaè o ia i te fenua, ua rürü ia; ua faatiàià anaè o ia i te mau mouà ra, ua pee te auahi i nià.

33 Te ora nei au ra, e himene ä vau i te Fatu; te vai nei au ra, e himene au ei haamaitaì i ta ù Atua.

34 E mauruüru ä to ù manaòraa ia na; e òaòa hoì au i te Fatu.

35 Te feiä rave hara ra, e mou ia i te fenua nei; e te feiä parau ìno ra, e òre roa ia.

E haamaitaì i te Fatu, e ta ù värua e. Hareruia.

Òhipa 2.1-11

Te haereà mai o te Värua Maitaì

1 E tae mau atu ra i te mahana Penetetöte, ua taìruru mäite aè ra rätou atoà i te vähi hoê mä te hinaaro hoê.

2 E aore i mähia, o te haruru mai ra no nià mai i te raì mai te mataì rahi ûàna ra, î roa aè ra te fare i pärahihia e rätou ra.

3 Ua fä mai ra te arero mäa ia rätou ra mai te ahi ra te huru, e faaea iho ra i nià iho ia rätou atoà ra,

4 e î aè ra rätou atoà i te Värua Maitaì, ua parau iho ra i te parau èê, i ta te Värua i horoà mai i te parau ia rätou ra.

5 E te pärahi ra te taata âti-Iüta paieti i Ierutarëma, no te mau fenua atoà i raro aè i teie nei raì.

6 E parare atu ra taua roo ra, ua ruru mai ra te taata atoà, e mäere iho ra, no te mea i faaroo atu ra taua mau taata atoà ra i ta rätou iho parau mau i te parau-raa-hia mai ra.

7 Faahiahia atu ra rätou atoà mä te pöpou, nä ô iho ra rätou rätou iho: «Inaha, eere änei rätou e parau nei i to Tarirea anaè?

8 E aha rä hoì teie i ìte ai tätou atoà nei i to tätou iho reo mau i te parau-raa-hia mai?

9 To Paretia, e te âti-Mëtai, e te âti-Èrama, e te feiä e pärahi i Metopotamia, e Iutea, e te Tapatotia, e to Ponoto, e to Àtia,

10 e to Ferutia, e to Pamafuria, to Àifiti, e to Rupi i te pae i àti mai i Turene ra, e te taata èê hoì no Röma, te âti-Iüta, e te peroteruto,

11 to Tereta, e to Âräpia, i te faarooraa atu tätou ia rätou i te parauraa mai i te peu taa ê a te Atua i ta tätou iho nei mau parau mau.  

1 Törïnetia 12.3-13

3 E teie nei, e faaìte atu vau ia òutou, aore roa e taata na te Värua o te Atua ta na parau, e parau ia Ietu e: «Ua ànatemahia», aore roa e taata e tià ia parau e: «o Ietu te Fatu», maori rä o tei parau i ta te Värua Maitaì ra.

4 E rave rahi te huru o te mau mea i horoàhia, hoê rä Värua.

5 E rave rahi ä hoì te töroà, hoê rä Fatu.

6 E rave rahi ä hoì te òhipa, hoê rä Atua e òhipa i te mau mea atoà i roto i te taata atoà.

7 Ua horoàhia ta te Värua faaìte i te taata atoà, ia maitaì päatoà.

8 I horoàhia mai te parau paari e te Värua, i te hoê ra; e i horoàhia mai e taua Värua ra te parau e noaa ai te ìte, i te hoê.

9 Ta te tahi ra, o te faaroo ia, na taua Värua ra; ta te tahi ra, o te ìte ia i te faaora maì na taua Värua ra.

10 Ta te tahi ra, o te rave täpaò ia; ta te tahi ra, o te tohu ia; ta te tahi ra, o te ìte värua ia; ta te tahi ra, o te parau èê ia; ta te tahi ra, o te faaìte parau èê ia.

11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

Hoê tino e te mero e rave rahi

12 Mai te tino hoì hoê nei, e rave rahi to na mero, e te mau mero atoà no taua tino hoê ra, rahi noa ä rätou, hoê ä ia tino, oia atoà hoì te tino o te Metia.

13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra.

Ioane 20,19-23.

Te färaa mai Ietu i ta na ra mau pipi.

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou

20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra.

21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na.

22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

Manaò.

Tei te pae àhuraa no te mahana i to Ietu niuraa i te parau no te nünaa tei piihia ia amo i te hopoià no te faafäiteraa i te Atua Nui Tumu Tahi, i ta Na Rähu, i te aru, i te taata èi ia pïhauhau tämau noa te Värua faatupu ora. O ta te aru e faaìte noa ra ia tätou i te mau mahana atoà, te ôteu noa ra te tiare Maurua, te mäoa noa ra te ùru, te para noa ra te meià, te ài noa ra te here, te täfifi noa ra te pöhue, te ìte noa nei tätou teie mau faufaa, ia tere haere tätou, ia haere tätou na pïhaì iho, no te huru ra o to tätou oraraa i teie mahana i te haapaòraa i te mau hopoià no te oraraa ùtuafare, te tïtau noa mai ra teie mau faufaa i te tahi maa taime no rätou i te haapoupouraa i teie mau maitaì. Te mahana, te ua, te mataì, teie e miri nei i te faufaa o te fenua, tei höroà i te ù i roto i te mau vao, te mau faaàpu, i reira te mau manu no te reva, e himene ai i roto i te mau âmaa räau, èi hämaniraa i to rätou mau ôfaaraa. Te hoê nei teie mau faufaa no te faaìte i te puai mana hope no te reo aroha e te here no te Atua Nui Tumu Tahi. Te Moana Nui a Hiva, te märae moà no te Atua o Taaroa Nui Tumu Tahi, tei faaòhu i te mau ôpe èi natiraa i te mau fenua te fauraò no te mau ìnaì o te moana uri paò. Tei haamahu i te anu o te vai miti ta te rä e türama ra i te mau ù o te hanahana o te Atua, tei faaìte ua hau te fenua i te hohoà o te Atua, ta Na i faahuri i ta na fana no te faatoro i te èà o te mau nuu atua, ta na i faaìte ia Noa te anuanua, e ta na atoà i faaìte ia tätou te Mäòhi to na aroha, to na here, e te hau ta na päpaì i roto i te raì èi taiòraa tämau na tätou, èi manaòraa tämau na tätou :

-Te ùoùo : te hohoà ia o te merahi, te tura, e te tiàmäraa.

-Te nïnamu : te raì ia, te tähei o teie nei ao, oia te ao o te Atua.

-Te matie : te fenua ia e to na î, nä reira hoì te mau mauà.

-Te ùteùte : te toto ia, te àti e te hara.

-Te reàreà : te hau ia, te märamarama, e te ìte.

Ua haapae te Atua i te èere i roto i te anuanua e täpaò no te pohe e te haaväraa, ia ìte maitaìraa tätou e te anuanua e täpaò no te aroha e te here fäito òre o te Atua. I mua i te aroha e te here o te Atua Nui Tumu Tahi,  e haamaitaì tätou i te Fatu,  tei vehihia ia tätou i te hanahana e te mana, i te faaàhuraa ia tätou i te märamarama mai te àhu ra, e te hohoraraa i te mau raì ra mai te päruru, i te vauvauraa i te mau ata ei fauraò, i te hahaereraa nä nià i te pererau ra o te mataì. Te faariroraa i te mau merahi no na mai te mataì ra, e te mau tävini no na mai te ahi ura ra. Tei haamau i te tumu o te fenua, ia òre roa ia âueue, ua täpoìhia te fenua, mai te àhu ra, te teitei ra te pape i te mau mouà, te haruru ra te pätiri, ua haapeepee i te haere. Te aè nei tätou i te mau mouà, te pou nei tätou i te mau peho, i te vähi i haapaòhia no tätou ra, tei faahau ia tätou i te fenua. Te pihaa noa nei te pape ei vai matätia, o tei tahe haere nä roto i te ärea o te mau mouà ra, i reira te mau puaa o te fenua nei i te inuraa, e te mau puaa taetaevao i te haamäharaa i to rätou hiaai. I pïhaì iho i te mau manu o te reva i te pärahiraa o tei òto i roto i te mau âmaa rii. Te pïnaì nei te mau âivi  no roto mai i to na mau piha; e te î nei te fenua i te heeuri te faahotu nei. Te faatupu nei i te àihere na te mau puaa, e te räau rii na te taata. E te roaa nei te mäa ia na no roto i te fenua. Teie atu ra te manaò haapoto i te mau taiòraa :  

-Taramo 104, 15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

-Òhipa 2, 8 E aha rä hoì teie i ìte ai tätou atoà nei i to tätou iho reo mau i te parau-raa-hia mai?

-1 Törïnetia 12, 13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra.

-Ioane 20, 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

Haapüaì i te aho, e tià ia parauhia e toru noa taime faahitiraahia teie tao i roto i te pîpîria, te faahiti mätamuaraahia tei roto i te Tenete pene 2, ìrava 7 A hämani ai te Atua ra o te Fatu i te taata i te repo fenua nei, ua haapüaì iho ra o ia i te aho ora i roto i ta na âpoo ihu ra, riro aè ra te taata ei taata ora. Piti Ètetiera 37,9 Ua parau mai ra o ia ia ù, E tohu òe i te aho, e tohu, e te tamaiti a te taata na, e parau atu òe i te aho ra, Të nä ô mai ra te ATUA ra o te Fatu; E haere mai, e te aho e, mai nä mataì mai e maha ra, e haapüaì mai i nià i te feiä i pohe nei ia ora rätou. Te toru teie e faahitihia nei e Ioane pene 20, ìrava 22 e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

I roto i teie fare te hämani faahouhia nei te mau pipi, i te mea ua matara te ùputa o te fenua e te ùputa no te raì. I tià ai i te mau âpotetoro i te faahiti i te reo o te mau nünaa i putuputu mai i taua mahana ra i tonohia mai ai te Värua Maitaì mai te arero maa ra, mai te ahi ra i nià i te mau taata päpetitohia atu ra rätou e rave rahi. Te färiiraa i te Värua Maitaì, te aho ia e höroà nei te itoito i roto ia tätou no te faaìteraa i te hanahana o te Atua Nui Tumu Tahi. No te huru oraraa e färereihia nei e tätou i teie manaha te rahi o te mau àti i nià i te fenua, ua rahi te maì, te pohe, e te oè, ua ìte tätou, ua ìte atoà te nünaa , ua rahi te hara i nià i te fenua, ua rahi te hara a te taata i mua i te Atua, te taime atoà te reira e faanahohia ai te vaereà marae, oia te tämäraa i te marae, tämä i te taura pito, tämä i te fenua, oia te färii ora mai reira mai te aho. I mua i te rahi o te fifi e färereihia nei e te Etärëtia, eita tätou e tano e parau e, aita e hapa ta tätou e tämä, no te mea eita te tupuraa o te òhipa e haavare. Teie faaruè rahi te taata ia tätou i teie mahana, e täpaò faaìte anaè te reira e, ua tae i te taime no te Etärëtia no te tämäraa ia na ia ora te nünaa faaroo. Te feiä atoà e pätoì i teie aniraa, te feiä atoà ia e hinaaro ra e huna i te parau mau. A ìtehia te taata e mauiui noa e aita to na e maì. E vaereà marae ta te mau Tupuna, ei tämäraa ia rätou ia ora te nünaa. No tätou nei rä, aita atu e räveà e matara ai tätou i to tätou mau fifi atoà maoti rä, ia färii te Etärëtia i te tämä ia na, ia tämä hoì te mau tävini o te Atua ia rätou, te mea noa ia e tiàturi faahou mai ai te nünaa faaroo i to na mau arataì. Te mea noa ia e faaora i te Etärëtia. Ia hiòhia tätou, i te tahi taime, ua faariro roa tätou i te Atua mai te mea ra, e Atua matapö, te tarià turi, e te vävä, mai te tahi tii të òre e ìte mai i te mau òhipa ìno e rave-noa-hia nei e to na mau tävini : te taiàta, te àmu moni, te inu àva, te parau ìno …, e te vai noa atu ra. No te òreraa te Etärëtia e hinaaro ia parauhia teie mau ìno e tupu noa nei i roto ia na, no to na ìmiraa i te räveà täpoìpoì i te reira, hiòhia atu ra mai te mea ra ua färii atoà o ia i te reira mau ìno, e ua âmui atoà hoì i roto i te reira haaviiviiraa e rave-noa-hia nei i te iòa o te Atua. Teie hoì mau parau ta tätou e faahiti nei, eere te mau parau no te raì, e mau parau anaè rä no te fenua ; eere te mau parau no tahito ra, e mau parau rä ta tätou e ìte noa nei i te tupuraa i mua i to tätou mata e tei tae roa mai te varovaro i roto i to tätou tarià, e mau parau hoì e täpiri ia tätou i te ùputa o te raì ia òre ia ìmihia te räveà tätäì i te reira, ia maitaì ta tätou täviniraa i te Atua, e ia hanahana to na iòa i nià i to tätou fenua iti, i roto i to tätou nünaa. Te vai aho noa nei tätou, e raveà faahou ta tätou, ua tämahia tätou e Ietu i to na haapüaìraa i te aho i nià i tätou, a färii i te Värua Mataì.

 

Teraì òr. Faatura.

 

 

Ioane 17.1-11. Hiemateòa.

 

Tāpati 21 no Më 2023.

Hiemateòa.

Taramo 27.

1 Taramo na Tävita. O te Fatu to ù märamarama e to ù ora: o vai hoì ta ù e mataù atu? O te Fatu të tiaì ia ù: e mataù hoì au ia vai?

2 I te haereà mai o te mau taata ìino ra, to ù ra mau ènemi e tei riri mai ia ù, i te tiiraa mai ia ù ra e rave e àmu, ua turori iho ra rätou iho, hià iho ra.

3 Pätia noa mai ä te nuu atoà ra i te pühapa ia ù nei, e òre ta ù âau e mataù. E ia tupu noa mai ä te tamaì ia ù nei, e tiàturiraa ia to ù i reira.

4 Hoê a ù mea hinaaro i te Fatu ra, e o ta ù ia e tïtau hua nei; ia pärahi ä vau i roto i te fare o te Fatu e hope roa aè o ù puè mahana, ia ìte vau i te maitaì o te Fatu, e ia ui mäite au i roto i to na nao.

5 Ia roohia hoì e te àti ra e huna ai o ia ia ù i roto i to na tiàhapa; e faatäpuni o ia ia ù i roto i te vähi moè i to na ra fare, a tuu ai ia ù i te vähi teitei ra.

6 Ei teie nei o ia e faateitei ai i ta ù upoo, i to ù atoà nei mau ènemi e àti noa aè, ia hopoi au, i to na ra tëtene, i te tütia òaòa, e himene hoì au e e himene haamaitaì hoì i te Fatu.

7 E haapaò mai, e te Fatu, i ta ù reo, ia tiàoro atu vau ra, e aroha mai, e faaroo mai ia ù.

8 Ia parau mai òe e: «E ìmi mai òutou i ta ù mata», E ìmi ia vau i to mata, e te Fatu.

9 Eiaha òe e huna ê atu i to mata ia ù nei, eiaha to tävini e haapae-riri-noa-hia: ua tauturu mai hoì òe ia ù,  eiaha vau e faaruè-ê-hia, eiaha òe e täiva ia ù, e ta ù Atua, e ta ù Ora.

10 Faaruè noa ä ta ù metua täne e ta ù metua vahine ia ù, ei reira te Fatu e rave mai ai ia ù.

11 E haapii mai òe, e te Fatu, i to òe ra èà, e arataì ia ù nä te èà manina, no to ù nei mau ènemi.

12 Eiaha òe e horoà ia ù i te hinaaro o ta ù mau ènemi; ìte haavare anaè tei tià mai e märô ia ù, e te ûàna mai ra to rätou riri ia ù.

13 Te manaò nei rä vau, e noaa ia ù te maitaì o te Fatu i te fenua o te taata nei.

14 Tiaì i te Fatu; e faaitoito; e na na e faaitoito mai i to âau ra, e tënä na, e tiaì ä òe i te Fatu

Òhipa 1.12-14

Te mono o Iüta

12 Hoì mai ra rätou i Ierutarëma, mai te mouà mai i parauhia ra o Òriveta, tei pïhaì iho i Ierutarëma, mai te vähi haerehia i te täpati nei te huru.

13 E tae mai ra rätou i roto i te ôire, tomo atu ra rätou i roto i te hoê piha i nià, e ruru atoà ai Pëtero mä ra, e Iatöpo, e Ioane, e Àneterea, e Firipa, e Toma, e Paretoromea, e Mätaio, e Iatöpo a Àrefaia ra, e Timona Terote, e te taeaè hoì o Iatöpo ra o Iüta.

14 Tämau mäite atu ra rätou atoà i te pure e te aniraa mä te âau hoê, e te mau vahine atoà, e o Märia hoì te metua vahine o Ietu ra, e to na atoà ra fëtii.

1 Pētero 4.13-16.

13 E òaòa rä, i te mea te rave atoà ra òutou i te mau pohe o te Metia; e ia faaìtehia mai to na hanahana, ia hiemateòa òutou mä te òaòa rahi.

14 E ia faaìnohia òutou i te iòa o te Metia ra, e ao to òutou, no te mea te faaea ra te Värua hanahana, te Värua o te Atua i nià iho ia òutou: ua faaìnohia o ia e rätou, ua haamaitaìhia rä e òutou.

15 Eiaha roa rä to òutou pohe i te pohe täparahi taata, e te èiä, e te rave parau ìno, e te haapeàpeà ia vëtahi ê ra.

16 Ei pohe teretetiano to na ra, eiaha o ia e haamä; e haamaitaì rä o ia i te Atua i te reira.

Ioane 17.1-11.

Te pure tahuà a te Metia

1 Ia faaoti aè ra Ietu i teie nei parauraa, ua nänä aè ra o ia i ta na mata i nià i te raì, nä ô atu ra:

«E ta ù Metua, ua tae i te hora. A haamaitaì i to Tamaiti ia haamaitaì atoà hoì to Tamaiti ia òe.

2 Ua horoà mai hoì òe i te mana no na i te taata atoà nei, ia horoà atu o ia i te ora-mure-òre i te feiä atoà ta òe i horoà mai no na ra.

3 Teie hoì te ora-mure-òre, ia ìte rätou ia òe i te Atua mau ra, e ia Ietu i te Metia i ta òe i tono mai.

4 Ua haamaitaì au ia òe i te ao nei, ua oti ia ù te òhipa ta òe i hö mai na ù e rave ra.

5 E teie nei, e ta ù Metua, e haamaitaì mai òe ia ù i mua i to aro na i te maitaì no ù ia òe hou teie nei ao ra.

6 Ua faaìte atu vau i to iòa i te mau taata o teie nei ao ta òe i hö mai no ù ra. No òe na hoì rätou; e na òe hoì rätou i hö mai no ù, e ua haapaò rätou i ta òe parau.

7 E te mau mea atoà ta òe i hö mai ia ù ra, ua ìte rätou i teie nei e, no ô na mai ia òe na;

8 e na òe i tuu mai ia ù i te parau ta ù i tuu aè ia rätou nei ra, e ua färii rätou i taua parau ra, e ua ìte mau hoì e mai ô na mai au ia òe na, e ua faaroo hoì rätou e, na òe au i tono mai.

9 O rätou ta ù e pure nei. Aore au i pure i to teie nei ao, o te feiä rä ta òe i hö mai no ù ra, no òe hoì rätou.

10 E to ù atoà ra, no òe ia; e to òe ra, no ù ia; e ua maitaì hoì au ia rätou.

11 Ua òre au ua pärahi i teie nei ao; e tià rä rätou i teie nei ao, e te haere atu nei au ia òe na. E ta ù Metua Moà ra e, e tiaì òe ia rätou i ta òe i hö mai no ù i to iòa na, ia hoê aè rätou mai ia täua atoà nei ä.

Manaò.

Hiemateòa e taò mäòhi teie no roto i to tätou reo tei taiòhia nei e tätou mauti ia te pîpîria i reira tätou e faaroo ai tei haamanaò mai ia tätou te vai ra teie parauraa e hiemateòa, e òaòa mure òre to na auraa. E ora teie e faahitihia nei ia ìtehia te hanahana o te Atua Nui Tumu tahi, tei na rotohia i te märamarama tei tauturu i to tätou mau haereà i te ao nei. Te märamarama e te ora o te âau faatura i te Atua tei faateiteihia na roto i reo aroha. Tei purehia e te mau pipi i to rätou hoìraa i Ierutarëma èi pureraa âmui, èi faaìte i to rätou hoêraa i te parauraa e ta ù Atua, e ta ù Ora. Te òaòaraa teie no te taata faaroo, i te hora o te Metia, i te mea e ao to tei faaìnohia i te iòa o Ietu, Te ìteraa te reira i te Atua, te hanahana o te Varua Moà.     I te haapaòraa i te parau a te Atua. Ia fati te tara o te pohe i te taata Teretetiano. I hoê ai te Metua, e te Tamaiti i roto i te taata, te manaònaòraa ia o Ietu i te Ètärëtia. I roto i teie  mau haapiiraa, te poroìraa e vai ra : ia pure, eiaha e rave i te peu a te feiä haavare tei hinaaro ia rahi te taata mätaìtaì ia rätou, te auraa, te ìmi ra rätou i te mata o te taata, aita rä to rätou âau e ìmi ra i te Atua, e haere rä i te vähi moèmoè, i roto i te piha, aore ra i roto i te uru räau, eiaha hoì e tähana i te parau, eiaha e faaroa faufaa òre noa i te pure no te mea ua ìte ê na te Atua i te mea ta te taata e ani atu ia na. Te tiaì mai ra te Atua ia tätou, te moemoe ra tätou i te mata o te taata, e aha ia tätou e färerei ai i te Atua. Ia haapotohia, te pure, e òhipa te reira i roto ia òe e te Atua, o òe e to òe tiàturiraa i te Atua. I roto i te tereraa o ta tätou mau taiòraa no teie mahana, eita tätou e haere hänoa, e tütonu rä tätou i te vähi i türamahia, mai te haapaò maitaì i te mea e vai ra, te mea ta tätou e ìte mau ra, eiaha te mea ta tätou e manaò ra, aore ra ta tätou e hinaaro ra i te ìte, te mea rä ta te märamarama e faaìte mai ra ia tätou. E faaea tätou i roto i te parau i te haamataraa ihoä e, te ìtehia te täuiuiraa nei, te faahuru-ê-raa-hia nei, no te mea noa aita te mörï i patahia i nià i te âvae o te taata faaea, ua faahaerehia rä i te tahi vähi âpï tei òre tätou i mätau i te hiò. I mua i teie türamaraa, na tätou iho e parau, e aha te mea ta tätou e ìte ra, te mea ta te àma o te mörï e faaìte mai ra. Ua ìte anaè rä, eita ia tätou e tano e haavare ìte òre, eita hoì e tano e faahapa no te mea ua faaìtehia. Teie atu ra te faaìteraa no te mau taiòraa tei haapotohia :

-Taramo 27, 9 Ei aha òe e huna ê atu i to mata ia ù nei, eiaha to tävini e haapae-riri-noa-hia: ua tauturu mai hoì òe ia ù,  eiaha vau e faaruè-ê-hia, eiaha òe e täiva ia ù, e ta ù Atua, e ta ù Ora.

-Òhipa 1, 14 Tämau mäite atu ra rätou atoà i te pure e te aniraa mä te âau hoê, e te mau vahine atoà, e o Märia hoì te metua vahine o Ietu ra, e to na atoà ra fëtii.

-1 Petero 4, 14 E ia faaìnohia òutou i te iòa o te Metia ra, e ao to òutou, no te mea te faaea ra te Värua hanahana, te Värua o te Atua i nià iho ia òutou: ua faaìnohia o ia e rätou, ua haamaitaìhia rä e òutou.

-Ioane 17, 11 Ua òre au ua pärahi i teie nei ao; e tià rä rätou i teie nei ao, e te haere atu nei au ia òe na. E ta ù Metua Moà ra e, e tiaì òe ia rätou i ta òe i hö mai no ù i to iòa na, ia hoê aè rätou mai ia täua atoà nei ä

E tià ia parauhia ua patuhia ta tätou taiòraa i nia i te hanahana o te Metua, e to na anaè te hanahana ia ìtehia, te hiemateòa.

Ei faatuàtiraa.

Te mau parau ta tätou e färerei nei i roto i teie mau taiòraa o te tüàtiraa ia, i te mau haamaitaìraa e tïtauhia nei e te feia paieti. Ei faaìteraa ia  i te mau àti e färereihia i te iòa o te Metia. Te faaravaìhia nei teie mau manaò, ma te faaära, ia tupu noa atu taua mau mea ra, ia haamanaò ia rätou e, ua faaìte-atea-hia e Ietu. I muri aè i to na faaitoitoraa i ta na mau pipi. E pohe to òutou i teie nei ao, e faaitoito ra, ua riro te rë o teie nei ao ia ù. E te parau e faahitihia nei e te Taramo 27 E ta ù Atua, e ta ù Ora.

Te pene 17.

O te hoê ia pene taa ê no te Èvaneria a Ioane. Na te hoê taata faaroo no te 16 no te tënetere i maìri i te iòa no teie nei pene parau i te pure tahuà. E na teie pure i òpani i te färereiraa hopeà no Ietu e ta na mau pipi, hou e täìrihia ai te Tiaì mämoe e a purara atu ai te nana. Te òhipa  e ravehia nei e Ietu i teie taime te haapäpüraa ia i te niu no te faaroo o te mau pipi ia òre ia àueue i mua i te mau peu o teie nei ao.

Ua tano roa te parauraahia teie nei pure i te PURE TAHUÀ, no te mea, o te Tahuà Rahi no te Faufaa Âpï teie e pure nei. Te pure nei O ia no to na mau taata tei papaìhia to rätou iòa i roto i to na âau, mai te Tahuà Rahi no te faufaa tahito tei pure no na ôpu 12, ma to rätou mau iòa i papaìhia  i nià i to na täpoì ôuma (Etoto 28 : 29 ). Ma te rave atoà i te pupuraa tutia täraèhara, e oia iho te Arenio, tei hopoì ê i te hara a to te ao nei.

Na te èpitetore i te mau Hepera i tatara nehenehe maitaì i te òhipa a te Metia tei riro i te taime hoê, ei Tahuà e ei täraèhara, i te pene 4, 5, 7 e tae i te 10.

Te taiòraa.

Ìrava 1 e faaea i te 11.

E tià roa ia parauhia te vai nei e piti tuhaa i roto i teie mau ìrava.

1-Te pure nei o Ietu no na iho ìrava 1 e tae i te 5.

 I roto i teie tuhaa ta tätou i te haapäpüraa e, ua oti ia Ietu te òhipa ta te Metua i horoà mai na na e rave. Ia tià i te Atua, ia papaì roa  O ia i teie parau, na roto i to na  Varua Maitaì, i roto i to tätou âau, ia ìte päpu tätou, ia faaroo e ia tiàturi e, ua oti mau ia Ietu te òhipa no te feia hara i te ao nei. Eiaha tätou ia faariro i te mau òhipa ta tätou e rave nei ei mea faufaa, i te mea àuaa tätou i tupu ai te òhipa a te Atua. Mai te ani-òre i to tätou manaò, mai te tïtau-òre, e mai te ani-òre i ta tätou tauturu, ua faatupu te Atua i ta na òhipa i raro nei na roto i ta na Tamaiti.

E aha teie òhipa ta na e parau nei e, UA OTI ? Taua òhipa ra, teie ia, ua haamaitaì au i to iòa i te ao nei. E òhipa rahi taua òhipa ra, e òhipa  oti-òre i te taata. Ua haamaitaì Ietu i te iòa o to na Metua na roto i to na haapaeraa i to na vahi Moà, no te haere mai i roto i teie nei ao na roto i te huru o te taata nei. I te mau tuuraa àvae atoà no na, i te mau mahana tataì tahi, e tae noa atu i to na aho hopeà, ua faaìte noa O ia i nià i te fenua nei, i te Atua ìte-òre-hia e te mata. Hou O ia a àmu ai i te hoê tapu färaoa, ua faateitei i to na mata i nià no te haamaitaì i te Atua. E ua ànaana noa i te mau mahana atoà na roto ia Ietu, te hanahana no te Atua i rotopü i te mau taata o te ao nei. I te mau vahi atoà, ua haamaitaì O ia i te iòa o te Atua, i rotopü i te mau matapö, te mau piriòì, te mau rëpera, te feia taoà e te feia veve e i rotopü hoì i te feia pohe. I roto i teie nei ao tei maìri i roto i te hara, tei täpoìhia e te pöuri e te ìte-òre, teie nei ao tei täpeàhia i roto i te manaò-òre e te täiroiro i te Atua, teie nei ao tei òre i faaèa i te faaìno e i te haaviivii i te iòa o te Atua, ua haamaitaì e ua haamoà Ietu i te iòa o te Metua, e ua haapii mai ia tätou e, e naò òutou ia pure ‘’ E to mätou Metua i te ao ra, ia raa to Òe iòa………… Ua haamaitaì Ietu i te iòa o te Atua na roto i te haapaòraa i ta na mau faaueraa tei òre i maaraa i te taata i te haapaò, e ua faatura O ia i to na hinaaro na roto i te au-raro-maite-raa e tae noa atu ra i te pohe tätauro. Ua na reira O ia ia noaa ia tätou te ora mure òre. I teie nei ra, ua oti taua òhipa ra, te tià nei  O ia i mua i te Atua mai te hoê tävini te huru, e te parau nei ‘’ Ua haamaitaì au i to iòa i te ao nei, ua oti ia ù te òhipa ta òe i ho mai na ù e rave.’’ 

2-Te pure nei o Ietu no te mau pipi. (Ìrava 6 e faaèa i te 11.)

Teie tuhaa e moti ia i te ìrava 19, ua faataahia ra no teie tuatapaparaa e faaoti i te ìrava 11, i te mea tei teie mau ìrava to Ietu haapuaìraa i te faaìte i to na hinaaro i te Metua no te mau pipi.

I te ômuaraa i ta na òhipa i te fenua nei, ua tïtau Ietu i te hoê mau taata ia pee mai ia na. Ua faaruè rätou i te mau mea atoà e ua àmui mai ia na. I roto i teie nei mau pipi tataì tahi tei pee mai ia na te ìte ra o Ietu i te reira mai te hoê horoà no o mai i te Metua ra. Aita o Ietu e tiàturi nei e ua roaa mai rätou  ia na  na roto i ta na iho tïtauraa, no te Atua ra rätou, e na na i horoà mai ia rätou no na. I teie taime, 11 noa iho rätou, ua reva ê te tahi. I ta tätou hiòraa, e mea iti roa. Àreà Ietu te haamaitaì nei O ia i te Atua no taua âmuiraa iti, oia hoì te tano ia parauhia, te ôteo nei te hoê faaroo âpï tei parauhia te ÈTARETIA niuhia i nia i te TIAFAAHOURAA E TE ORA MURE ÒRE. Ua ìte O ia e, te päpü nei ta na òhipa i teie nei, no te mea, na te Atua rätou i horoà mai no na. I te vahi tei reira hoê noa taata, tei vehihia ra i te mana o te Atua, e noaa i taua taata ra te mano- tini te taata e tiàturi i te Atua.

No te aha o Ietu i pure ai mai teie te huru ?

Ia ìtehia te Atua mau, te feiä atoà e ìte no te Atua e noaa ia rätou te ora mure òre. O ta Ietu e haapäpü nei i te ìrava 3, TEIE HOÌ TE ORA MURE ÒRE, IA ÌTE RÄTOU IA ÒE I TE ATUA MAU RA, E IA IETU I TE METIA I TA ÒE I TONO MAI. Te manaò atoà ia i faahitihia na e Ieremia i te pene 31 i te ìrava 34 vh. Ia ìte hoì òutou ia Iehova, e ìte paatoà hoì rätou ia ù o tei haehaa e o tei rahi, te parau mai ra Iehova ; e faaòre hoì au i ta rätou hara, e òre au e manaò faahou i ta rätou ìno.

 

 

Terai or. Faatura.

 

 

Ioane 14.15-21 Faaaò

 

Tāpati 14 no Më 2023.

Faaaò

Taramo 66

1 Na te Mënätehe. E Himene, e Taramo. E pii hua i te òaòa i te Atua, e te mau fenua e.

2 E himene ei haamaitaì i to na iòa, e faariro i to na hanahana ei haamaitaìraa ia na.

3 E parau atu i te Atua: «E mau räveà mataùtaù ta òe. No to òe ra mana rahi i auraro mai ai to mau ènemi ia òe ra.

4 E haamori te mau fenua atoà nei ia òe, e himene ia òe, e himene i to òe ra iòa. Tera.

5 E haere mai e hiò i te mau òhipa a te Atua. E mea mataùtaù ta na i rave i te taata nei.

6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na.

7 Te mana nei o ia i to na püai e a muri noa atu. Te tiàtonu ra to na mata i te mau êtene;  eiaha tei haùti ra e faateitei ia rätou iho. Tera.

8 E haamaitaì i to tätou Atua, e te mau taata nei e. Ia ìteä hoì te reo i te haamaitaìraa ia na.

9 O o ia tei tiaì ia tätou e ora ai, e o tei faaitoito i to tätou âvae ia òre ia pähee.

10 Ua tämata-mau-hia mätou e òe, e te Atua e. Ua tämä òe ia mätou mai te ârio i tämähia ra,

11 ua tuu òe ia mätou i roto i te märei, e ua tuu òe i te hopoià teiaha i nià i to mätou tauupu.

12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà.

13 E tomo vau i to fare mä te tütia-täauahi, e faatupu vau i ta ù mau èuhe ia òe ra,

14 tei parauhia e ta ù vaha, e na ta ù vaha i faaìte i ta ù àtiraa ra.

15 Te tütia-täauahi poria ra ta ù e hopoi atu ia òe ra: te mämoe oni, e te mea noànoà atoà te puaatoro e te puaaniho ta ù e faatütia. Tera.

16 E haere mai, e faaroo, o òutou atoà e mataù i te Atua ra, e na ù e faaìte i ta na i rave i to ù nei värua.

17 Ua pii atu ra ta ù vaha ia na, e ua faateitei ta ù arero ia na.

18 Ahiri rä te faatià ra ta ù âau i te ìno, e òre au e faaroohia mai e te Fatu.

19 Ua faaroo mau rä te Atua ia ù, e ua haapaò mai i ta ù i ani atu.

20 Ia haamaitaìhia hoì te Atua. O ia aore i haapae i ta ù nei pure, e aore hoì i faahoì i to na aroharaa ia ù nei.

Òhipa 8.5-17

5 Haere atu ra Firipa i te hoê ôire i Tämäria, parau atu ra ia rätou i te parau o te Metia.

6 E ia faaroo mai ra rätou, e ìte aè ra hoì i te mau täpaò ta na e rave ra, ua rötahi mäite mai ra te âau o te taata i te haapaòraa mai i te parau i parauhia atu e Firipa ra.

7 Ua pii hua mai ra hoì te reo o te mau värua ìno ra, e ua haere mai ra i räpae i te feiä i uruhia ra, e rave rahi hoì te häpepa e te piriòì i ora.

8 Òaòa roa aè ra to taua ôire ra.

9 O te hoê taata rä i pärahi i taua ôire ra, o Timona te iòa, e tahutahu na i mütaa iho, e te nä-ô-raa ia na iho e taata rahi roa, e mäere atu ra te taata o Tämäria ia na:

10 tïoi atu ra rätou atoà ia na, te taata rii e tae noa atu ra i te taata rarahi ra, nä ô aè ra: «O te mana rahi o te Atua ra teie nei taata.

11 Haapaò atu ra rätou ia na, no te mea ua mäoro aè ra to rätou maereraa ia na i ta na ra peu tahutahu.

12 Ia faaroo rä rätou ia Firipa i te parauraa i te parau maitaì o te Pätireia o te Atua, e te iòa hoì o Ietu Metia, päpetitohia iho ra hoì rätou te täne e te vahine atoà.

13 E faaroo atoà mai ra hoì Timona, e ia päpetitohia o ia ra, ua àti mai ra o ia ia Firipa, e ûmere mai ra o ia i te hiòraa mai i te mau täpaò e te mau temeio rarahi e ravehia ra.

14 E ìte aè ra te mau âpotetoro e pärahi i Ierutarëma ra e, ua mau to Tämäria i te parau a te Atua, ua tono atu ra rätou ia Pëtero räua o Ioane ia rätou ra.

15 E tae atu ra räua i raro, ua pure iho ra ia horoàhia mai te Värua Maitaì ia rätou ra.

16 Aore ä hoì o ia i tau mai i nià iho ia rätou atoà ra, o te päpetito anaè ra to rätou i roto i te iòa o te Fatu ra o Ietu.

17 Ua tuu atu ra räua i to räua rima i nià iho ia rätou, noaa iho ra te Värua Maitaì ia rätou ra.  

1 Pētero 3.15-18

15 E faateitei rä òutou i te Fatu ra i te Metia i roto i to òutou âau: e ia vai ineine ä òutou ia parau atu i te taata atoà ia ui mai ia òutou i te tiàturi i roto ia òutou na, mä te marü e te auraro mäite atu.

16 Ei âau hapa-òre ä to òutou, e ta rätou i faaìno mai ia òutou na, mai te mea e, e feiä rave parau ìno ra, ia haamä rätou o tei pari haavare noa mai i ta òutou parau maitaì i te Metia ra.

17 E mea maitaì hoì, ia tià i te Atua, ia pohe òutou i te parau maitaì, eiaha i te parau ìno.

18 I pohe na hoì te Metia iho no te hara hoê poheraa, te taata parau tià no te feiä parau tià òre, ia tae tätou ia na i te Atua ra, i täparahi-pohe-mau-hia o ia i te tino ra, i faaorahia rä e te Värua:

Ioane 14.15-21

E tono mai te Fatu i to na Värua

15«Ua hinaaro òutou ia ù ra, e haapaò i ta ù parau.

16 Na ù hoì e ani atu i te Metua ra, e na na e horoà mai i te tahi Faaaò ia òutou, ia pärahi mau o ia e a muri noa atu io òutou nei.

17 O te Värua parau mau ra, o të òre e färiihia mai e te ao nei ra, no te mea aore i hiò ia na, aore hoì i ìte ia na. E ìte rä òutou ia na, e pärahi mau hoì o ia io òutou nei, e ei roto hoì ia òutou.

18 Eita vau e vaiiho ôtare noa ia òutou, e hoì mai ä vau ia òutou nei.

19 E ia roovaù iti aè, e òre to te ao e hiò faahou mai ia ù; e hiò mai rä òutou ia ù, no te mea e ora vau, e ora atoà hoì òutou.

20 Ia tae i te reira mahana e ìte ai òutou e, tei roto hoì au i ta ù Metua, e tei roto hoì òutou ia ù e tei roto vau ia òutou.

21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho.

Manaò.

E reo faaitoito to te metua i ta na mau tamarii ia tae i te taime e ìtehia te ineineraa no te amo i te hopoià no te oraraa, i te vahi i reira e tupu ai te hinaaro ia nahonaho te mau faanahoraa e tupu ai te maitaì tei türamahia e te märamarama o te mau òhipa. Ia au i te tïtauraa no te oraraa vaamataeinaa, te fenua, te moana, te reva, te mau papa teie no te mau tumu e tià ia haatupuhia, i te mea te faaìte-noa mai ra te reira i te oraraa ia hanahana te hau Atua. E faaaò teie no teie mau maitaì faatupu ora, oia hoì te paruru nünaa, te fenua to tätou te reira paruru i te poìä, e te poìhä, te moana to tätou te reira paruru i te ìnaì, ia fänaò tätou i taua mau ora ra, te reva to tätou te reira paruru, i te mau tiàrama, e vahi rereraa no te mau manu no te faaroo i te rau o te mau òto o te oraraa, i parauhia ai to Mäòhi Nui. Te paruru e faanahoraa te reira i te tuuraa i te taata i roto i te ìteraa i te ora, i faanahohia e te Atua Nui Tumu Tahi, taua ora ra te faanaòraa ia i te mau hopoià i paruruhia ai o ia e te värua maitaì, ia vai noa te itoito, te puai, te märamarama i to na tino. Te faaroohia nei teie reo i te feiä täutai ia ü i te ôpape i tua i te vahi ravaai, e faaroohia teie reo e, e faatià te hua vaa i nià i te mataì ia paruruhia tätou, oia hoì te puai o te ôpape, e te puai o te mataì ua tià, e tià noa te vaa i to na vairaa, te òhipa i taua taime ra te tataraa i te riu, e te haapaòraa i te tutau ia tiàtaro maite, no te mea te haru noa ra te ïà. E naò noa ia teie manaò i te parauraa e, e haamaitaìraa teie na te Atua, i to te taata ìteraa ia na i roto i teie huru tupuraa òhipa tei tià. No reira i parauhia ai te taata tiàturi Atua o te mauhaa nehenehe roa aè o ta te Atua i hämani na roto i to na Aroha e to na Here. Ia ìte te taata i teie huru no te Atua, e Metua o ia tei here i ta na mau tamarii ta te Atua i horoà ia na. I roto i teie mau parau e faahitihia nei e te mau taiòraa no teie mahana, te tïtauraa ia hiòhia te faufaa no te tiàraa metua. E aha te auraa o teie taò, o vai të tano ia parauhia e, metua. Ia päpü to tätou manaò i nià i te türamaraa ta te reo e horoà mai, e päpü atoà ai tätou i te mea ta teie parau e heheu mai ra ia tätou i nià i te Atua. Ia ìte mai tätou, na te faaòhiparaa, e i roto i te faaòhiparaa e matara mai ai te auraa o te tahi taò, e tano ai tätou e parau e, te auraa o te tahi taò : te âmuiraa o te mau faaòhiparaa atoà tei ìtehia e tei färiihia ei mea tano e te feiä atoà tei päpü to rätou ìte i to rätou reo, o rätou ihoä rä e faaòhipa tämau nei i te reo i roto i to rätou oraraa i te mahana tätaì tahi. I ô nei, te faaätea ra tätou i te manaò o te feiä ìte puta, o rätou hoì e nä roto mai ra i te reo faräni, aore ra te reo paratäne i te parau e, terä te mea ta te Mäòhi e parau ra, òre noa atu ai rätou iho i ìte i te parau, òre noa atu ai e ora ra i te oraraa o te feiä no rätou te reo e hiòhia ra. No reira, ia täpeà mai tätou i te tahi faaòhiparaa hape, tei òre te feiä no rätou te reo i ìte, te färii atoà ra ia tätou i te reira hiòraa hape ia haere mai e faahape i ta tätou märamaramaraa i te auraa o te reira taò. Teie atu ra ia te haapotoraa no te mau taiòraa no teie mahana :

-Taramo 66, 20 Ia haamaitaìhia hoì te Atua. O ia aore i haapae i ta ù nei pure, e aore hoì i faahoì i to na aroharaa ia ù nei.

-Òhipa 8, 15 E tae atu ra räua i raro, ua pure iho ra ia horoàhia mai te Värua Maitaì ia rätou ra.

-1 Petero 3, 15 E faateitei rä òutou i te Fatu ra i te Metia i roto i to òutou âau: e ia vai ineine ä òutou ia parau atu i te taata atoà ia ui mai ia òutou i te tiàturi i roto ia òutou na, mä te marü e te auraro mäite atu.

-Ioane 14, 21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho.

Te faaitoito nei o Ietu i ta na mau pipi, ma te höroà i te mau faanahoraa e te àveià e tià ia rave ma te haapäpü e, tono mai au i te Värua parau mau i nià ia òutou. Ia hinaaro e ia haapaò te mau pipi i te parau o ta Ietu e ani i to na Metua, e höroàhia mai ia rätou te tahi Faaaò, oia hoì te päruru ia rätou, no te päruru ia rätou i mua i te färii òre o te ao nei. Ia òre rätou ia pärahi ôtare noa i te ao nei i te mea  e hoì mai ä te Fatu. E moè o Ietu i te mata o te ao nei, no te mau pipi ra e ìte rätou ia Ietu no te mea te ora ra o Ia, e ora atoà rätou, i te reo o Ietu tei roto hoì au i ta ù Metua, e tei roto hoì òutou ia ù e tei roto vau ia òutou. Ia haapaò i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho. Te haafaufaa nei o Ietu i te parau no te tiàraa Metua i ta na faaitoitoraa i ta na pipi e ia tätou i teie mahana. Te türama mai nei ta tätou taiòraa i te parau no te tiàraa Metua, te here e tei faaìte te tumu òhipa ia tià e fautua taua hopoià ra. Naò ia te manaò i te parauraa, Te manaò parare roa aè i roto i te taata i nià i te parau o te metua, ua haamauhia ia i nià i te fänau. Teie taò Metua ta Ietu e parau nei, aita ia i faaòhipahia no te faaìte noa i te tahi huru auraa e vai ra i roto i te taata paari e te tamarii, e aita atoà hoì i täôtiàhia i nià i te auraa fëtii e täamu ra i te tahi taata i te tahi. No reira, ia haere au i te tahi vähi âpï, e taata tei ìte mai ia ù, aita vau i fifi noa aè i te fäìraa e, i to ù purutiaraa, ua riro te reira taata ei metua no ù. Aita vau e parau ra e, ua faaamuhia vau, oia hoì ua rave teie taata i nià ia ù i te peu no te faaàmuraa tamarii, aita atoà o ia i ìte ia ù ei tamarii na na, te vai täatoà noa ra to ù tiàmäraa taata, aita vau i tärahu ia na, aita o ia i ani mai i te taime no ta na aupurupururaa ia ù, o ia rä tei riro mai te metua mau ra no ù, oia hoì ua rave o ia i nià ia ù i te huru e te peu ta te hoê metua e rave nei i nià i ta na tamarii, i te ra ia reo no Ietu e naò ra e, e òre vau e vaiiho ôtare noa ia òutou. I roto i teie huru parauraa na Ietu i te parau no te Metua, te hinaaro noa nei ra te manaò e faamanaò i faahiti atoà na o Ietu i roto i ta na pure i haapii i te mau pipi i te parau no te Metua. Nä roto i to tätou parauraa i te Atua e, to mätou Metua, te hinaaro ra tätou e faaìte e, o ia te tumu o to tätou ora, oia hoì, o ia te haamataraa e te faahopeàraa o to tätou ora, e fäìraa atoà rä teie na tätou e, na tätou e faaî i te ärea e vai fatafata noa ra. Nä mua roa, i röpü ia tätou e te fenua, i röpü hoì ia tätou e te Atua. Ia òre ia î ia tätou teie ärea, aita ia e tüàtiraa to te haamataraa i te faahopeàraa, e e riro mai teie ärea ei âpoo, ta tätou e tiàturi ra e, eita e riro mai te ärea e faataa ê ra i te taata taoà ia Rätaro, i roto i te tahi parau ta Ietu e faatià ra Ruta Èvaneria pene 16 i te mau ìrava 19 e tae i te 31, te ärea e faataa ê ra i te ora i te pohe. Mai te tamarii hoì e hinaaro ra i te mau taime atoà i te haapäpü noa i te paari o te taura e täamu ra ia na i te püfenua ta te parau o te fare metua i haamanaò mai ia tätou, e tuhaa atoà na tätou te haapäpüraa i te paari o te taura e täamu ra ia tätou i te Atua Metua nä roto i te fare metua, oia te fenua tei riro ei ùputa e tae ai tätou i te Atua ra. Ia märamarama tätou i te auraa o te parau o te fenua ei metua, e òhie atoà ai tätou i te märamarama i te auraa o te parau o te Atua ei Metua no tätou. Eiaha ia moèhia ia  tätou te mau taeaè te mau tuahine, no tätou, ua riro mai te Atua ei fenua, te tumu o to tätou ora. Mai te tamarii i huti i to na ora mai roto mai i to na metua, mai teie ora i nä roto mai i te pito i roto i te tamarii, te huti atoà nei te taata i to na ora mai roto mai i te fenua, to na metua, e teie ora, ua nä roto mai i te taura pito e täamu ra i te fenua i te Atua, oia te iho tumu, mea nä reira te Atua i te niniiraa mai i te ora no te taata. Nä roto i te tänuraa i te püfenua, ua haapäpü te taata i to na täamuraa i te fenua, e no te mea te fenua, te ùputa ia o te raì, te riro atoà ra te reira tänuraa i te püfenua ei faaòhieraa i te taata i te haapäpüraa i to na täamuraa i te Atua, te parau ia o te iho tumu. Eita e òre e, ua faaroo aè nei ä tätou i teie parau no te pito o te fenua, ia au i te manaò e, te röpüraa o te fenua, ta te Paùmotu e parau ra e, te vaenga o te fenua. Aita paha te reira manaò i tano roa. Eere änei e, te pito, te taura täamu ia i te metua i te tamarii, no reira, te pito o te fenua, te pito ia o te metua vahine, oia te taura e täamu i te tamarii ia na, tei riro atoà rä ei taura täamu i te tamarii i te Atua. Mai te peu te fenua, to tätou ia metua vahine, te Atua, to tätou ia Metua täne, ua riro te metua vahine ei räveà faaòhie ia tätou i te färereiraa i to tätou Metua täne i te raì : te parau ia o te taura pito, aore ra te pito o te fenua, no te mea tei nià te reira mea i te metua vahine i te haamauraahia. No reira, aita e taata e tae i te Metua täne ra, ia òre ia nä roto i te metua vahine i te haere, ia òre ia färii i te rave i te taura pito ta tätou e parau atoà nei e, te iho, oia te taura e täamu ia tätou i te tumu, oia te fenua, e te taura hoì ta tätou e täamu atu i te tumu, oia te Atua. E haapäpüraa teie e, te taura e täamu i te taata i te fenua, te taura hoì e täamu ia na i te püfenua, te taura täamu atoà ia ia na i te Atua, ua riro noa te fenua ei vähi i reira te haapaariraahia teie täamuraa. I räpae aè i teie pito o te fenua, aita e mauraa to te taata, e aita atoà hoì to na e ora. i teie manaò ta Ietu e parau nei e, 21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho.  

 

Teraì òr. Faatura.