Tāpati 25 no
Tiunu 2023.
Mataù
Taramo
69
1 Na te Mënätehe i nià i te Totanima. Taramo na Tävita.
2 E faaora òe ia ù, e te Atua e, te paremo nei au i te pape.
3 Ua tae au i te vari reva, aore roa e tiàraa. Ua tae au i te pape moana
roa, e ua roohia vau e te pape puè.
4 Ua pau ta ù aho i te òtoraa, ua marô ta ù àrapoà, ua poopoo ta ù mata i
te tiaìraa i ta ù Atua.
5 E ïti te ìo rouru i to ù nei upoo i te feiä i riri hara òre noa mai ia ù
nei. E te mana nei ta ù mau ènemi haavare i tïtau mai ia ù nei ia pohe. E tei
ia ù te faahoì i tei òre i ravehia e au ra.
6 E te Atua e, ua ìte òe i to ù nei äoaoa, e ta ù nei mau hapa, aore ia i
moè ia òe.
7 E tënä na, eiaha rätou ia haamä no ù, tei hiò atu ia òe, e te ATUA
manahope, e te Fatu. Eiaha rätou ia roohia e te mäheahea no ù, tei ìmi ia òe, e
te Atua o Ìteraèra.
8 No òe mau i faaòromaì ai au i te faaìno, e no òe i
püroùhia ai ta ù mata i te haamä.
9 Ua riro vau ei taata ê i ta ù mau taeaè nei, e mai te taata ìteä òre i te
mau tamarii a ta ù metua vahine ra.
10 No te mea ua riro roa vau i te itoito i to fare, te faaìno a te feiä i
faaìno ia òe ra, ua iri mai ia i nià ia ù.
11 Ia òto vau ra, e ia faahaèhaa i ta ù värua mä te haapae i te mäa, ua
faarirohia ia ei faaìnoraa ia ù.
12 E ia àhu vau i te àhu òto ra, ua riro vau ei parauraa na rätou.
13 Te feiä i pärahi i te ùputa ra, tei parau faaìno mai ia ù, e ua
faarirohia vau ei peheraa na te mau taèro àva.
14 Te pure nei rä vau i ta ù pure ia òe, e te Fatu, i te taime e ìtehia mai
ai ra. E faaroo mai òe ia ù, e te Atua, i te aroha rahi no òe ra, i te parau mau
o te ora na òe ra.
15 E ìriti òe ia ù i te vari nei ia òre au ia paremo; e ia ora hoì au i te
feiä i riri mai ia ù nei, ia ora vau i teie nei pape hohonu.
16 Eiaha te pape puè ia tahe nä nià iho ia ù, e eiaha vau ia horomiihia e
te moana, eiaha te âpoo ia ôpani i to na vaha ia ù nei.
17 E faaroo mai, e te Fatu, e mea tià roa hoì te hämani maitaì na òe ra. E
färiu mai ia ù i te aroha rahi no òe ra.
18 Eiaha e huna i to mata i to tävini nei. Ua roohia vau e te àti, ia
peepee òe i te faatià mai ia ù.
19 E haafätata mai i ta ù värua ia ora; ia ora hoì au i to ù nei mau ènemi.
20 Ua ìte òe i tei faaìno mai ia ù, ta ù haamä e te vahavaha ia ù nei; te
vai noa ra hoì ta ù mau ènemi i mua i to aro.
21 Ua paruparu ta ù âau i te faaìno. Ua àti au i te pohe. I ìmi hoì au i
tei aroha mai, e aore roa. E të haamähanahana mai, e aore roa i ìteä e au.
22 Ua hopoi mai rätou i te äu àvaàva ei mäa na ù, e ta ù poìhäraa ra, ua
hopoi mai i te vineta e inu.
23 E riro ta rätou àmuraa mäa ra ei märei no rätou, e to rätou maitaìraa ei
ùpeà.
24 E mohimohi to rätou mata e òre e tià ia hiò. E roohia i te rürü tämau to
rätou tauupu.
25 Ninii mai i to riri tähoo ra i nià ia rätou, e ia roohia-noa-hia mai rätou
e to riri rahi ra.
26 E riro to rätou mau fare i te ano, e aore roa e taatahia to rätou mau
tiàhapa,
27 te hämani ìno nei rätou i tei täìrihia e òe ra, e te faarahi nei i to na
òto to tei paruparu ia òe ra.
28 E tuu noa òe ia âpiti noa te hara i ta rätou ra hara, e eiaha roa rätou
ia tiàhia mai e òe ra.
29 Ia päraihia to rätou iòa i te parau o te feiä e ora nei, e eiaha ia
päpaìhia i roto i te feiä parau tià ra.
30 Âreà vau nei, haèhaa noa ai e te pohe hoì, na te ora na òe, e ta ù Atua,
e hopoi ia ù i nià.
31 E haamaitaì au i te iòa o te Atua i te himene, e faarahi au ia na i te
haamaitaì.
32 E mea au rahi to te reira i te Fatu, i to te puaatoro oni-âpï-tara-hia
ra, e tei maiùuhia ra.
33 E ìte tei àti ra i te reira mä te òaòa. «E to rätou âau, to tei ìmi i te
Atua ra, e faaànaànaeahia mai ia.»
34 E faaroo mai hoì te Fatu i te feiä haèhaa ra, e aore hoì e vahavaha
i to na taata täpeàhia ra.
35 Na te mau raì e na te fenua e haamaitaì ia na, te moana e te mau mea
atoà e tere haere i reira.
36 E faaora hoì te Atua ia Tiona, e na na e patu faahou i te mau ôire i
Iüta ra. E pärahi faahou hoì rätou i reira ia riro ia rätou.
37 E riro ia i te huaai o to na ra mau tävini, e te feiä i hinaaro i to na
ra iòa te pärahi i reira.
Ieremia
20.10-13.
10 Ua faaroo hoì au i te vavi-noa-raa o te taata atoà e rave rahi, e parau
haamätaùtaù e àti noa aè. Te nä ô mai ra rätou e parau na òutou e nä mätou e
parau atoà atu: te tiaì anaè mai ra ta ù mau hoa au atoà ra ia ù i te faaearaa;
te nä ô ra rätou, peneiaè o ia o te täpae ê noa i te haavare, a noaa atu ai o
ia ia tätou, a tähoo atu ai tätou ia na teie rä, e pärahi fätata noa o ia ia
rätou
11 Tei ia ù rä te Fatu, ei àito riàriàhia ia; e riro te mau hämani ìno ia ù
ra i te turori, e òre roa hoì ta rätou e tupu; ua haamä roa rätou, no te mea
aore to rätou hinaaro i tupu; ei haamä vaiiho-tämau-hia e te mure òre to rätou,
eita e moè ra.
12 E te Fatu manahope ra, tei tämata i te feiä parau tià ra, tei hiò i
te manaò i roto i te âau ra, e ìte au i to riri tähoo i nià ia rätou, ua höhora
hua hoì au i ta ù parau ia òe ra.
13 E hïmene òutou i te Fatu, e haamaitaì òutou i te Fatu, no te mea ua
faaora o ia i te rima o te feiä hämani ìno ra, i te värua o te taata haèhaa ra.
Röma
5.12-15
Àtamu e te Metia
12 E teie nei, no te taata hoê ra i ö mai ai te ìno i te ao nei, e no te
ìno hoì te pohe; e ua taeà-atoà-hia te taata atoà e te pohe i te mea ua hara
päatoà.
13 I vai na hoì te hara i te ao nei e tae roa aè nei i
te ture nei; e òre rä te hara e haapaòhia i te ture òre.
14 I mana na rä te pohe mai ia Àtamu mai ä e tae roa
aè nei ia Möte, e i te feiä atoà aore i rave i te hara mai te hara a Àtamu ra,
e hohoà o ia no të tae mai.
15 Eita rä tei horoà-noa-hia mai e au i taua hara ra. E rave rahi tei pohe
i te hara a te taata hoê ra, e rahi atu hoì te aroha o te Atua, e tei horoàhia
mai e taua aroha ra, i te tae i te taata e rave rahi, ia Ietu Metia i te taata
hoê ra.
Mätaio
10.26-33.
Eiaha e mataù
(Mär 8.38; Rut 9.26; 12.2-9)
26 Eiaha òutou e mataù i te taata. Aore roa hoì e mea täpoìhia/hunahia e
toe i te faaìtehia; aore roa e mea moè e toe i te ìteä.
27 Ta ù e parau atu ia òutou i roto i te pöuri nei, o
ta òutou ia e faaìte hua i te märamarama; e tei parau-riirii-hia i roto i to
òutou tarià ra, o ta òutou ia e parau hua i nià iho i te mau fare.
28 Eiaha e mataù i tei täparahi mai i te tino nei,
eita rä e tià ia rätou ia täparahi i te värua; e mataù rä òutou ia na i të tià
ia na ia rave pohe roa i te tino e te värua atoà i tehena/i roto i te auahi
pohe òre.
29 Eere änei taìpiti manu rii ia hoo i te moni
veo/raera hoê nei? E òre rä te hoê e maìri i raro i te repo mä te tià-òre-hia e
to òutou Metua.
30 No òutou, ua hope atoà rä te rouru o to òutou upoo
i te taiòhia.
31 Eiaha mäori òutou e mataù, ua hau aè òutou i te
rahiraa o te mau manu rii.
32 E teie nei, o tei fäì ia ù i mua i te aro o te
taata nei, e fäì atoà vau, e no ù o ia, i mua i te aro o ta ù Metua i te raì
ra.
33 O tei huna rä ia ù i mua i te aro o te taata nei, e
huna atoà vau ia na i mua i te aro o ta ù Metua i te raì ra.
Ne craignez rien.
(Mc 8.38; Lc 9.26; 12.2-9)
26 Ne les craignez donc pas. Rien n'est voilé qui ne
sera dévoilé, rien n'est secret qui ne sera connu.
27 Ce que je vous dis dans l'ombre, dites-le au grand
jour; ce que vous entendez dans le creux de l'oreille, proclamez-le sur les
terrasses.
28 Ne craignez pas ceux qui tuent le corps, mais ne
peuvent tuer l'âme; craignez bien plutôt celui qui peut faire périr âme et
corps dans la géhenne.
29 Est-ce que l'on ne vend pas deux moineaux pour un
sou? Pourtant, pas un d'entre eux ne tombe à terre indépendamment de votre
Père.
30 Quant à vous, même vos cheveux sont tous comptés.
31 Soyez donc sans crainte: vous valez mieux, vous,
que tous les moineaux.
32 Quiconque se déclarera pour moi devant les hommes,
je me déclarerai moi aussi pour lui devant mon Père qui est aux cieux;
33 mais quiconque me reniera devant les hommes, je le
renierai moi aussi devant mon Père qui est aux cieux.
Manaò.
Teie nei, te vai noa ra terä mau aniraa no te auraa o te
mau taò e vai nei i roto i te mau taiòraa i faanahohia no teie mahana ta te mau
ìrava faatiàraa. I roto i te mau tau e
tià ia parauhia e ärataì ra i nià i te Atua Metua tei rahu. Haapäpü na ra
tätou, te rahu, te tahi ia òhipa faatupuhia e te mana o te parau a te Atua. Ua
parau te Atua, ua tupu, e rahu ia. Te hämani, òhipa rave-rima-hia. Te Atua, ua
rahu te Atua, ua hämani te Atua. No te taata, ua hämanihia te taata. Ua hämani
te Atua i te taata i te repo fenua. I
mua i te parau no te rahu, te vai ra ihoä paha te ìte òre, e rahi aè rä te
haavare ìte òre. No reira, eiaha atoà tätou e ânoì noa i te ìte òre, e te
haavare ìte òre. Eita te haavare ìte òre e tano ia faarirohia ei parau mau, no
te mea e haavare te reira. Te auraa : te ìte ra, eita rä e hinaaro ia parauhia
e, ua ìte. No reira, mai ia òe e òre e tano e parau i te tahi mea tei òre òe i
ìte, eita atoà òe e maitaì ta òe parauraa i te tahi mea ta òe i òre i färii.
Parau noa ai òe, ua ìte maitaì òe e, eere te parau mau. Te auraa, ua ìte atoà
ia òe e, te haavare ra òe. No te mea paha aita te tahi i haapiihia i te
naìnaìraa, aita i parauhia i te âpïraa, aita to na tarià i haamätauhia i te
faaroo i te tahi mau parau, to na ihoä rä parau, i fäì ai o ia e, aita o ia i
ìte i te Atua ; ia parauhia rä, e topa mau ia taata i roto i te faahaparaa. Te
manaò ta tätou e tämata nei i te haamahorahora, i roto i te faaìteraa a te mau
taiòraa no teie mahana, ua hope roa te reira i roto i te taò hoê : âreà, ia nä
ô mai o ia e : âreà te òhipa a te Tumu Nui, aore ia i haapaòhia, e tei ravehia
e tana rima, aore rätou i hiò. Ei hiòraa : e òhipa tei faauehia, aore ra tei
anihia i te tahi taata e rave, aita rä i ravehia, no te mea e òhipa ê ta teie
taata e rave ra. Ìte noa ai teie taata i te mea i anihia ia na, te òhipa i nä
murihia i te ani ia na, ta na ia i nä mua i te rave. Eiaha rä ia, no te mea
aita teie taata i huri noa i te taime raveraa, ua haapae roa rä o ia i te mea
mätamua, e ua rave i te mea âpï i anihia mai ia na, mai te mea ra, tirä rä
òhipa i anihia ia na. I roto i te mau parau i faahitihia, te vähi e
märamaramahia atu ra, teie ia : ua ìte te nünaa i te hinaaro o te Atua, ua
haapae rä rätou i te reira, e ua haapüai i nià i te mea o ta na i hinaaro. E
tano ia parauhia e, èere i te huru oraraa o te nunaa i ta na mau peu ârearea teie e faahapahia nei, te haavare ìte
òre rä o te nünaa, oia to rätou raveraa mai te mea aita rätou i ìte i te
hinaaro o te Atua. Ia òre ia rara ta tätou märamaramaraa i te parau, eiaha ia
moèhia ia tätou te haamanaò e, i roto i te reo, te vai ra te mea i parauhia, e
te vai ra te mea tei òre i parauhia.
No reira, ia nä ô tätou e, èere te ârearea teie e faahapahia
nei, aita tätou i nä ô e, aita te Atua e ìte ra i te fifi i rave ai te taata i
te reira. E piti mea ta te Atua e faahapa ra i te taata : te haavare, e te
haapaeraa ia na, no te mono mai i te ârearea. Ua ìte ihoä ia tätou e, èere te
haavare i te mea maitaì, hau roa atu, e mea faufau te reira i te Atua ia au i
te faaìteraa a te Mäteri pene 6 i te mau ìrava 16 e tae i te ìrava 19. Te ìno i
roto i te haavare ìte òre, te mea ia e, ìte noa ai te taata haavare e, e
haavare ta na, te itoito noa ra o ia i te ìmiraa i te räveà ia tiàturihia mai
e, te parau ra o ia i te parau mau. Ua ìte te taata i te hinaaro o te Atua, te
rave ra rä mai te mea, aita i ìte, aore ra mai te mea, tei au ia rätou ra, ua
au atoà ia i te Atua. Te tahi atoà ia huru haapaeraa i te Atua, aore ra te tahi
huru tatäraa i te Atua i räpae i te oraraa o te taata. Ia tütonu to tätou manaò
i nià i te faahaparaa, e tano ia parauhia e, te reo, e fauraò ia no te manaò o
te taata, e räveà hoì no te faatupu i te märamarama. Ua riro atoà rä te reo ei
vähi maitaì no te hunaraa i te parau. I hiò mai ai tätou i te auraa o te taò
âreà, i roto i te âhee i maìri, no te mea ia te faaìte mai ra te reira taò e, i
roto i te mea i parauhia, e òhipa ta te taata i tämata i te huna. Te vai ra te
tahi mea tei ìte te taata, e tei òre o ia I haapaò. Te reira hoì haapaò òre,
eere ia no te mea ua moèhia, e mea hinaarohia ihoä rä ia òre ia tupu. Ua
hinaaro te taata e tämau noa i te rave i te mea e faaòaòa ia na, a parauhia ai
e, no to na ìte òre i te hinaaro o te Atua, i nä reira ai. Ua topa mai te
faahaparaa, e ua tahe atoà mai te monoì no te taurumi i te mau vähi rii i pëpë.
Teie rä ia te uiraa e tano ia uihia : E i teie nei, ua ìte o ia e, ua ìtehia ta
na haavare, e faaea änei ta na parauraa, e e haamata änei o ia i te färiu i nià
i te Atua no te rave i te mea e mauruüru ai te Atua ia na. Peneiaè teie uiraa i
te vai noa ra mai te pähono-òre-hia. Aita atoà e fifi, no te mea ia rü noa te
taata i te pähono, e manaò o ia ia na nä mua roa, oia hoì e manaò o ia i te
tahi pähonoraa e òre ai o ia e naeàhia i te faahaparaa, eita rä e manaò i te
parau mau. Te mea faufaa no tätou, eere atoà te faahaparaa i te taata, te
tämataraa rä i te märamarama i te parau, no te mea te reira anaè te räveà
maitaì aè e matara ai te fifi. Ta te mau taiòraa ia e haamanaò mai nei ia tätou
teie atu ra te mau haapotoraa :
-Taramo 69, 18 Eiaha e huna
i to mata i to tävini nei. Ua roohia vau e te àti, ia peepee òe i te faatià mai
ia ù.
-Ieremia 20, 13 E hïmene
òutou i te Fatu, e haamaitaì òutou i te Fatu, no te mea ua faaora o ia i te
rima o te feiä hämani ìno ra, i te värua o te taata haèhaa ra.
-Röma
5, 15 Eita rä tei horoà-noa-hia mai e au i taua hara ra.
E rave rahi tei pohe i te hara a te taata hoê ra, e rahi atu hoì te aroha o te
Atua, e tei horoàhia mai e taua aroha ra, i te tae i te taata e rave rahi, ia
Ietu Metia i te taata hoê ra.
-Mätaio 10, 26 Eiaha òutou
e mataù i te taata. Aore roa hoì e mea täpoìhia/hunahia e toe i te faaìtehia;
aore roa e mea moè e toe i te ìteä.
Haamanaò tätou i teie reo to Ietu e parau ra e : Ia faaroo
mai te taata i ta ù parau, e aore i haapaò, èere o vau të faahapa ia na, aore
hoì au i haere mai e faahapa i to te ao, i haere mai rä vau e faaora i to te ao
Ioane pene 12 ìrava 47. No reira, hoì rii mai na tätou i te ômuaraa o teie
pene parau ta te manaò i maìri i te iòa e, Eiaha e mataù i Te Atua ìteä-òre-hia.
Ua tütonu to tätou manaò i nià i te taò ìte ta tätou i täamu noa i nià i te
mata, te tarià, e te ìri, no te mea e mau ùputa te reira no te ìte. I roto rä i
te mau auraa o teie taò ìte, te toe nei te tahi tei òre roa tätou i faahiti noa
aè no te mea aita ihoä e taiòhia nei i roto i te ânaìraa o te mau ùputa o te
ìte. E rave tätou i te parau no te ìteraa i
te tamarii. Ia ìte te tahi taata i te tahi tamarii, to na te reira haapäpüraa i
mua i te mata o te taata atoà e, o ia te metua o te reira tamarii, oia hoì te
òaòa nei o ia i te färiiraa i to na tiàraa metua no te reira tamarii, aore ra
te òaòa nei o ia i te färiiraa i teie tamarii ei tamarii mau na na. Mai ta
tätou e ìte ra, aita faahou ta te mata, te tarià, e tae noa atu i te ìri, i
teie nei, no te âau te parau. I mua i te tautooraa a te metua i te haapiiraa i
te tamarii i te peu maitaì e haapaò i roto i te oraraa, e poroì tumu teie na na
: te ìteraa i te taata, oia hoì te färii-maitaì-raa i te taata. Ua morohi roa rä
te reira mau haapiiraa e te reira mau peu rii tei riro na ei teòteòraa no te
Mäòhi. I hoì mai ai rä tätou i nià i teie parau no te ìte, no te haamanaò ia e,
i te vähi i noaa ai ta te taata ôtoheraa no te faatiàtiàraa i ta na òhipa, te
vähi mau atoà ia e noaa ai o ia i te faahapahia. Oia mau, mai te peu te mataù
nei te tahi no te mea aita o ia i ìte i te Atua, ia au i te parau no te Atua
ìteä-òre-hia, âreà te tahi, te mataù nei ia no to na färii òre i te Atua, oia
hoì no to na hinaaro òre i te ìte i te Atua. Te riro ra te parau o te ìte mai
te òè mata piti ra i roto i te rima o te taata e mataù, oia hoì e mutu o ia i
nä pae e piti. Te tano maitaì ra ta tätou parauraa e, ua moè te hiroà taata o
te reira feiä ; eere rä paha ia e, o te reira anaè, inaha ua hämani te Atua i
te taata ia au i to na huru e to na hohoà, te hiroà atua atoà ia o te taata tei
tuu-roa-hia i raro i te repo. Eita atoà ia tätou e maere ia òre te òhipa a Te
Tumu Nui ia haapaòhia, e ia òre ia hiòhia tei ravehia e tana rima. Mai te peu
ua tae roa te hiroà atua o te taata i raro i te repo, e aha ia ta tätou e mataù
nei te parau no to na hiroà taata. Ia faahiti hoì tätou i te òhipa a Te Tumu
Nui e tei ravehia e tana rima, aita paha e moèhia ra ia tätou e, taa noa atu ai
te mau mea e haaàti ra ia tätou, to te aru, to te tai, e to te reva, o tätou
atoà iho te òhipa a Te Tumu Nui. Nä ô ia tätou e, tätou e to tätou mäòhiraa, e
òhipa na Te Tumu Nui. Ia òre tätou ia färii ia tätou iho, oia hoì ia òre tätou
ia ìte ia tätou iho, nä hea tätou e ìte ai i te Atua, nä hea tätou e tano ai e
färii ia na, te tumu o to tätou parau. I parau mai ai o Ietu ia tätou i teie
mahana. Eiaha e mataù i te taata. Aore e mea i täpoìhia i
hunahia i te Atua ìte-òre-hia i te faaìtehia, te parau mau ra o Ietu i roto i
te pöuri, ua faaìte hua i te märamarama; tei parau-riirii-hia i roto i te tarià
ra, e parau hua i nià iho i te mau fare. Eiaha e mataù tei täparahi i te tino,
eita rä e tià ia täparahihia i te värua; e mataù rä ia rave pohehia te tino e
te värua i roto i te ahi pohe òre. Taìpiti manu rii ia hoo i te moni veo i te
raera hoê E òre rä te hoê e maìri i raro i te repo mä te tià-òre-hia e to òutou
Metua. Ua hope atoà rä to tätou rouru o te upoo i te taiòhia. Eiaha mäori e
mataù, ua hau aè i te rahiraa o te mau manu rii. Tei fäì ia ù i mua i te aro o
te taata nei, e fäì atoà vau, e no ù o ia, i mua i te aro o ta ù Metua i te raì
ra. O tei huna rä ia ù i mua i te aro o te taata nei, e huna atoà vau ia na i
mua i te aro o ta ù Metua i te raì ra. Teie te tahi huru tatararaa i te taò no
te mataù, te mataù e ôtohe no te faaineine i te haapäpüraa i mua i te fäìraa i
te parau mau i mua i te
rahu, te òhipa a Te Tumu Nui, i maraa ia tätou ma te färii ia tätou iho. Te
auraa, te anihia nei ia tätou e mäìtiìti i te òhipa a Te Tumu Nui.
Teie aita i mataù, aita tätou e ìte nei ia tätou ei òhipa na
Te Tumu Nui, e aha atu ä ia te ìnoraa ia reru roa te feruriraa i te mataù. Mea
au roa na tätou e täpunipuni i muri mai i te aroha e te faaòromaì o te Atua, ia
ìte atoà rä tätou, e ôtià to te mau mea atoà. Te mea ia ta te päpaì taramo e
haamanaò mai ra ia nä ô mai o ia e : No te mea eita rätou e haapaò i te òhipa a
Te Tumu Nui, e tei ravehia e tana rima, e haapararï roa o ia ia rätou, e òre e
rave-maitaì-faahou-hia Taramo 28 ìrava 5. Aita rä vau e manaò nei e, e tiaì roa
tätou e na te àti aè e faaàraàra i to tätou mata, e na te mauiui e faafäriu ia
tätou i nià i te Atua Nui Tumu Tahi e te mau òhipa atoà ta na i rave. Te nä ô
ra Ietu : Tei hiò mai ia ù ra, ua hiò ia i tei tono mai ia ù nei Ioane pene 12 ìrava 45. Ia faaea noa ta tätou
taiòraa i nià i te hiòraa i te mataù ta Ietu e parau nei, e au noa ia teie
parau no te feiä tei ora fätata ia Ietu i to na tau. Ia märamarama rä tätou i
muri mai i teie taò mataù, te ìte e te färii tei au mai ia na, e püai atu ä ia
te parau. Teie atu ra ia te auraa : tei färii ia Ietu, ua färii ia i te Atua i
tono mai ia na. Ia täpeà noa mai tätou i teie huriraa manaò ta tätou i faaòhipa
no Ietu, e tano atoà tätou e parau e : Tei färii i to na mäòhiraa, ua färii ia
i te Atua, te tumu o to na mäòhiraa.
Teraì
òr. Faatura.
