Mätaio 15.21-28. Faatïpaupau.

 

Tāpati 20 no Âtete 2023.

Faatïpaupau.

Taramo 67

1 Na te Mënätehe, i nià i te Netinota. Taramo e himene.

2 E aroha mai ia mätou, e te Atua e, e haamaitaì mai ia mätou E faaanaana mai hoì i to mata i nià ia mätou.

3 Ia ìteä to parau e àti noa aè teie nei ao, e te ora na òe i te mau êtene atoà ra.

4 Ia haamaitaì te mau taata ia òe, e te Atua e. Ia haamaitaì tahi te taata atoà ia òe.

5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì.

6 Ia haamaitaì te mau taata ia òe, e te Atua e. Ia haamaitaì tahi te taata atoà ia òe.

7 Ei reira e hotu rahi mai ai te fenua: E na te Atua, na to tätou iho Atua, e haamaitaì mai ia tätou nei.

8 E tämau ä te Atua i te haamaitaì mai ia tätou, e e tae roa te mataù ia na i te mau hopeà atoà o te fenua ra.

Ìtaia 56.1-7

Te aò mai nei te perofeta i te taata ia haapaò maitaì

1 Te nä ô mai ra te Fatu: E tämau i te parau au, e rave i te parau tià; ua fätata hoì te ora na ù, teie tei pïhaì iho; e te parau tià na ù ua fätata i te faaìtehia mai.

2 E ao to te taata e rave i teie; e te tamaiti a te taata ia Täpeà maitaì i taua parau nei, o tei haapaò i te Täpati, aore i haaviivii ra; e aore to na rima i rave i te parau ìno.

3 E eiaha te tamaiti a te taata ê ra e parau, o tei àti i te Fatu ra, eiaha e nä ô e, Ua faataa-ê-roa-hia vau e te Fatu i to na ra mau taata. Eiaha atoà te èunuta e parau e, Inaha, e räau marô vau.

4 Te nä ô mai ra hoì te Fatu i te mau èunuta, o tei haapaò i to ù ra mau täpati, e o tei rave i tei auhia e au ra, e ua haapaò mäite i te faufaa na ù ra;

5 o ta ù ia e höroà i roto i to ù nei fare, e i roto i ta ù nei âuà, i te manaòraa e te iòa, o tei hau ê i te iòa tamäroa e to te mau tamähine: e iòa vaiiho tämau ta ù e hö atu no rätou, e òre roa e faaòrehia ra.

6 E te mau tamarii o te taata ê o tei àti i te Fatu ra, ei haamori ia na, e ia hinaaro hoì i te iòa o te Fatu, e ia riro ei tävini nö na: te feiä atoà i haapaò i te täpati, e aore i haaviivii atu; e o tei haapaò tämau mäite i ta ù ra faufaa:

7  o rätou ta ù e arataì i roto i ta ù mouà moà ra, e faaòaòa vau ia rätou i roto i ta ù fare pureraa: e färiihia ta rätou mau tütia-täauahi e ta rätou mau tütia i nià i te ta ù fata; e parauhia hoì ta ù fare, o te fare pureraa no te taata atoà.

Röma 11.13-32

Te faaoraraa o te Ètene

13 O òutou o te Ètene ta ù e parau atu nei, te haamaitaì nei au i to ù nei töroà, no te mea o vau te âpotetoro a te Ètene:

14 peneiaè o te oôo faatïpaupau to ù ra nünaa ia ù, e ia ora te tahi pae.

15 To rätou faaruè-raa-hia ra, o te faite ia o to te ao, a tae ai hoì i te färiiraa atu ia rätou, e òre änei e riro mai te ora no te pohe mai?

16 Te moà ra te hoturaa mätamua ra, oia atoà te rahi atoà; e te moà ra te tumu ra, oia atoà te mau âmaa.

17 E i ôfene-ê-hia tahi pae i taua mau âmaa ra, e o òe hoì, e te âmaa o te tahi ôrive ê ra, tei poihia i roto ia rätou, e tei ia òe atoà te tumu e te hinu o taua ôrive ra.

18 Eiaha òe e faaoôo teòteò atu i taua mau âmaa ra. Ia teòteò hoì òe ra, e haamanaò eere òe të mau i te tumu, o te tumu rä të mau ia òe.

19 E parau mai änei òe e: «I ôfene-ê-hia te mau âmaa ia poihia vau i roto.

20 Ua tià ia. No te faaroo òre i ôfene-ê-hia ai rätou, e e tià faaroo hoì to òe. Eiaha ei âau teitei, ei mataù rä. 21 Aore te Atua i faaherehere i te mau âmaa mau ra, e ara, o te òre atoà hoì o ia o të faaherehere ia òe.

22 E teie nei, a hiò na i te hämani maitaì e te faaherehere òre a te Atua, faaherehere òre i te feiä i hià ra, âreà ia òe ra, o te hämani maitaì ia, ia haapaò tämau òe i to na hämani maitaì, aore rä, e ôoti-ê-atoà-hia òe.

23 E o rätou atoà hoì, ia òre rätou ia tämau märo i te faaroo òre ra, e poihia ia i roto: e tià hoì i te Atua ia poi faahou ia rätou i roto.

24 I ôoti-ê-hia mai òe no nià i te ôrive ôviri mau, e i poi-ê-hia òe i roto i te ôrive maitaì: a tae ai hoì ia rätou i te âmaa mau ra, e poihia mai ia i roto i to rätou iho ôrive.

Te faaoraraa ia Ìteraèra

25 Aore hoì au i hinaaro, e a ù mau taeaè, e ia òre òutou ia ìte i teie nei parau àro o te teitei hua hoì to òutou manaò ia òutou iho, e ua roohia Ìteraèra i te pöuri poto, e ia ö atoà mai te rahi atoà o te Ètene ra.

26 E ora päatoà ai Ìteraèra atoà, oia hoì tei päpaìhia ra e: «E tae mai te Faaora mai roto mai ia Tiona, e e faaòre o ia i te paieti-òre i Iatöpa ra.

27 E o ta ù ä hoì teie faufaa ia rätou ra, ia hopoi ê atu vau i ta rätou ra hara.»

28 I te haapaòraa i te Èvaneria nei, ua riro ia rätou ei ènemi ia òutou: âreà i te mäìtiraa te herehia nei ia rätou no to rätou feiä metua.

29 O ta te Atua hoì i horoà noa e ta na parauraa, aore ia faaòreraa.

30 Mai ia òutou hoì aore i faaroo i te Atua i mütaa iho ra, e teie nei rä, ua arohahia mai òutou i to rätou faaroo òre ra.

31 Oia atoà hoì rätou, ua òre aè nei ua faaroo i teie nei, o òutou i arohahia mai, ia aroha-atoà-hia mai rätou. 32 E faaroo òre anaè hoì rätou atoà i te vaiiho-raa-hia e te Atua, ia aroha mai o ia ia rätou atoà.

Mätaio 15.21-28.

Te faaroo o te vahine âti-Tanaana

(Mär 7.24-30)

21 Reva atu ra Ietu, haapaì tià atu ra i te tuhaa fenua i Turia e Titona.

22 E inaha, ua haere mai ra ia na ra te hoê vahine âti-Tanaana no reira iho e ua pii mai ra ia na: «E te Fatu, te Tamaiti a Tävita, e aroha mai òe ia ù Ua uru-maamaa-hia ta ù tamahine e te hoê tëmoni

 23 Aita rä o ia i pähono noa atu ia na. Ua haafätata mai ra ta na mau pipi, ua parau maitaì mai ra ia na: «A faahoì atu ia na, te pii noa mai ra o ia i muri iho ia tätou.

24 Ua pähono atu ra o ia: «Aita vau i tonohia mai, mäori rä i te mau mämoe anaè i moè i te ùtuafare o Ìteraèra.

25 Ua haafätata noa mai rä o ia, tähopu mai ra ia na, nä ô mai ra: «E te Fatu e, e tauturu mai òe ia ù.

26 Ua pähono atu ra o ia: E mea au òre roa ia rave i te faraoa a te tamarii, no te tïtiri atu na te fanauà ùrï.

 27 Ua parau mai ra o ia: Oia mau, e te Fatu, te àmu mau nei rä te ùrï i te huàhuà rii faraoa i maìri mai no nià i te àmuraa a to rätou ra mau fatu.

28 Ua pähono atu ra Ietu ia na: «E teie nei vahine, e faaroo rahi to òe O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

Manaò.

Faatïpaupau e reo Mäòhi teie e faaìte ra i te parau no te pohehae, tei haafänau i te parau no te nounou, o te tahi huru teie no tätou te taata nei. I te mea ua pohe to tätou manaò i te nounou, tei faatupu i te hae ua tae te reira i nià i te tahi fäito teimaha roa, tei haapöuri i te fëruriraa a rave atu ai i te peu tei òre roa e au i te ôpuaraa faaora a te Atua te tumu no te ora. E ìtehia teie taò pohehae e rave rahi taime i roto i te pîpîria, e mea pinepine no nià i te Atua. Ei hiòraa, i roto i te Ètoto pene 20 i te ìrava 5 ua päpaìhia, Eiaha òe e piò i raro i mua ia rätou, e eiaha hoì e tävini ia rätou ; no te mea o vau, o te Fatu to òutou Atua, e Atua pohehae, o te faautuà i te ìno a te mau metua i nià i te mau tamarii e tae noa atu i te toru e te maha o te uì o te feiä i riri mai ia ù, i roto i te Teuteronomi pene 4 ìrava 24 ua päpaì-atoà-hia e, e Atua pohe hoi to òutou Atua i te Fatu ra o Te vai nei au, o vau e vai nei, e Atua pohehae hoi. I roto i te pîpîria, te auraa o te pohehae, o te itoito ûàna ia o te hoê taata o tei here hohonu i te hoê mea aore ra i te hoê taata. E ärataì teie itoito i te taata pohehae ia faaìte i te huna òre e te itoito i nià i te taoà o to na here. Te riroraa ei taata itoito e te pohehae i roto i te pîpîria, o te reira atoà ia te auraa, ta te värua o te taò e faaòhipa ra ia tatarahia te taò pohehae. I roto i te pîpîria, e mea pinepine te pohehae i te täaihia i te Atua e to na here i to na nunaa. Te faataahia ra te pohehae o te Atua mai te hoê itoito rahi no te paruru e no te paruru i to na mau täairaa e to na nunaa. E arataì teie itoito i te Atua ia faaìte i te itoito e te itoito i nià i to na nunaa, ma te paruru e te ärataìraa ia rätou. Ua täai-atoà-hia te pohehae o te Atua i ta na parau tià e to na Moà. E pohehae te Atua i to na iòa e i to na hanahana, e eita Oia e faatià i to na nunaa ia haamori i te tahi atu mau atua ê e aore rä ia rave i te mau peu aita i au i to na hinaaro. I roto i teie tupuraa, e nehenehe te pohehae o te Atua e hiòhia mai te hoê faaìteraa i to na here i to na nunaa, o te türaì ia na ia òhipa no te paruru ia rätou e no te ärataì ia rätou i te ora mure òre. Ei haapotoraa, ua riro te pohehae i roto i te pîpîria ei itoito rahi no te paruru e no te paruru i te hoê täairaa, tei täai-pinepine-hia i te here o te Atua e i to na nunaa. E nehenehe atoà te reira e täaihia i te parau tià e te Moà o te Atua. Tei  faariro i te mau taata no to ù iho nunaa ei mau taata o te faatupu i te pohehae i roto i to ù nei tino, aita rä e feaaraa no nià i te auraa o te parau e faahitihia ra to ù nei tino ; te faaìte ra te mau manaò atoà e e faahitiraa teie no to tätou mau hoa ètene tei riro mai èi nünaa herehia e te Atua. Noa atu te mau òhipa mätamua, o tei faariro ei òhipa tumu na te mau tävini i roto i te mau nunaa ei hiòraa ei piiraa mai te hoê raveà no te farerei a i te mau hoa here o te Atua tei pärahi moèmoè noa i roto i te ôpuaraa faaora a te Atua Nui Tumu Tahi. I te mea te faahitihia ra na mua te hoê parau no te faaora i te huru faaoraraa ta te Atua anaè e nehenehe e faatupu, e faaora. I roto i taua mau huru taime ra, e mea tïtauhia ia parau e no ù nei e faaora ai te Atua aore rä na roto i te mea ta ù i rave e faaora ai te Atua i to na nunaa.

Ua riro te ao nei ei hoa no te Atua, e ua riro atoà te reira ei ìritiraa no te hoê iòa tei päpaì-hape-hia te haruraa a to te ao nei. Te auraa o te parau e täui i te ao nei oia hoì, ua faahauhia to te ao nei i te Atua. Hoê ä mana to te parau ra e puai e te parau i hurihia na roto i te parau ra  ia tià ia faaòhipahia i roto i te hoê auraa tià e te Atua ; No roto mai te reira i te hoê tuhaa taa ê o te oraraa e e mea taa ê rii to na û, mea tià ia tätou te tamata i te faatupu i te reira. No roto mai te parau ra ia faatïtïàifarohia e te Atua  na roto i te reo o te haaväraa, ia faarirohia ei hoa no te Atua no roto mai ia i te reo o te oraraa o te mau mahana atoà. E hohoà ia no na taata e piti tei riro na ei ènemi, tera rä, ua âmuihia raua i teie nei e ua faahoa i te tahi e te tahi. Peneiaè te faahauraa e faahitihia ra, o te hoêraa ia te mau âti Iuta e te mau Etene ei nunaa no te Atua, te türama noa mai ra teie manaò i roto i te here e te aroha e moè te parau o te âti Iuta, e moe te parau o te mau Ètene e tià mai te parau no te Nunaa o te Atua, mai te mea e, e faarirohia te ao nei ei hoa no te Atua ei faaìteraa itoito, o te Atua te tià, e e riro ia te ao nei ei mau taata ê atu i te ao nei ei hiòraa, ua faariro te Atua i te tahi atu mau nunaa o te ao nei ei hoa no na iho ei hiòraa, ua faariro te Atua i te tahi atu mau taata o te ao nei ei hoa no na. Mai te huru ra ia e e tià ia taahia e o te Atua te tumu i pätoìhia ai teie parau hara, no reira, o na ia te tumu taa-maitai-hia o te iho parau no te hara. Ia parauhia te parau o te ora no te faaìte ia i te puai i mua i te mau òhipa te faaapiapi ra i te tupu maitaìraa no te ora,  e rave rahi feiä tatara parau tei taa ia rätou i te parauraa e, e riro te haafäriuraa i te mau taata e rave rahi ei òhipa maere o te tupu mai i muri aè i te tià-faahou-raa o te Metia. Teie rä, e au ra e te faaòhipa-noa-hia ra teie mau parau ei raveà no te faaìte i te haamaitaìraa rahi e te nehenehe ia manaòhia. Oia hoì, te parau ra oia e e riro te färiuraa mai te mau nunaa èi òhipa faahiahia mau e te nehenehe te reira e faaauhia i te horoàraa i te ora i te feia pohe.  Ia täuihia te tiàhape i roto i te hôe faanahoraa âano, i te mea te tiàhape e parau teie no te hoê taata tei tupu pärarai noa. Tera rä, e mea tià ia tätou ia ìte i te mau mea atoà e tupu mai i roto mai i te oraraa o te mau taata atoà. E nehenehe ta te hoê taata e parau e, ia färiihia te reira, e mea päpü roa e, e au ia mai te feiä pohe o tei hoì faahou mai te ora. Teie atu ra te paèpaè no na taiòraa e maha tei haapotohia :

-Taramo 67, 5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì.

-Ìtaia 56, 5 o ta ù ia e höroà i roto i to ù nei fare, e i roto i ta ù nei âuà, i te manaòraa e te iòa, o tei hau ê i te iòa tamäroa e to te mau tamähine: e iòa vaiiho tämau ta ù e hö atu no rätou, e òre roa e faaòrehia ra.

-Röma 11, 14 peneiaè o te oôo faatïpaupau to ù ra nünaa ia ù, e ia ora te tahi pae.

-Mätaio 15, 28 Ua pähono atu ra Ietu ia na: «E teie nei vahine, e faaroo rahi to òe O ta òe i hinaaro na, ia nä-reira-hia òe. Ora roa atu ra ta na tamahine i taua hora ra.

Te faaroo o teie vahine tei tià ia parauhia  te tiàturiraa ia Ietu, te faaora nei o Ietu i te tamahine a teie vahine ìvi. Te mea faufaa roa ia hiò-anaè-hia teie taiòraa i muri mai i te tauàraa parau no te mä e te viivii òre no te mea e vahine ìvi, te vahine ìvi ra i te hiòraa a te Ati Iuta e mea viivii. Te faaìte päpü nei teie pene parau noa atu e, e taata ê oia, ua navaì rä to na faaroo no te haapäpü ia na e, e mea mä o ia e no reira, e färiihia o ia i mua i te aro o te Atua. Te haamata nei teie ìrava i te hoê òhipa âpï, e na roto i te mau reo e rave rahi, e mea tano aè ia òre e färii i te mau päpaìraa moà, no te mea ua ìriti teie vahine i te mau ôtià o te mau fenua tei hämanihia e te taata. Te mau ìritiraa no teie mau ôtià o Ietu mau ä te taata faufaa roa e i roto i te faatiàraa, te haapäpü maitaìraahia. E tïtauraa teie na Ietu i ta na mau pipi, ia ìte i teie faaâpïraa i te nunaa o te Atua, e itoito rätou i te rave i ta rätou tuhaa i te here i ta Atua i färii i roto i ta na ôpuaraa faaora. I muri aè i te reira, te vai atoà ra tei parauhia haere ê atu e te faatupu nei te reira i te hoê uiraa no nià i te vahi mau o Ietu i te taime a haere mai ai te vahine Tanaana ia na ra na roto i ta na aniraa. E tià ia parauhia te haafaufaa nei teie vahine i teie mahana, i teie taime i te mea teie tere to Ietu èita o Ietu e täpiti, ua faaruê teie vahine i to na haamä ia tupu to na hinaaro i ta Ietu horoàraa i ta na haamaitaìraa i nià i ta na tamahine. Te mea päpü maitaì e, ua haere mai te vahine no taua tuhaa fenua ra i rapae. Ua pii noa rä teie vahine i roto i te mau reo e rave rahi, e te Fatu, o te Tamaiti a Tavita te mea mätamua ta teie vahine e parau. E ere te reo Mäòhi i te mea mätau-roa-hia ei raveà no te paraparau i te taata, ua òhipa o ia i te hoê reo o Ietu anaè tei ìte i te faaroo, e o Ietu anaè tei märamarama i te aniraa a teie vahine. I roto i te tahi mau reo, aita te tiàraa iòa no te Tamaiti a Tavita e horoà ra ia na iho mai te hoê parau no nia i te vahi nohoraa. E parau mau teie, ei hiòraa, i roto i te mau reo i reira te raveà no te hoê tiàraa e horoàhia ai tei parauhia te Tamaiti a Tavita. Eita roa atu te hoê vahine o te tuö no te tamata i te huti i te ära-maite-raa o te hoê taata e rave i te taime no te faahiti i te mau parau atoà. Te tamaiti a Tavita e te hoê nota i raro i te àpi no te faataa e e tiàraa Metia tano aè teie i te parauraa no te faaora. No te mea e aroha to roto i teie vahine, a hiò i te mau pähonoraa i tera manaò e ua haruhia oia e te hoê Tëmoni e Tëmoni to te tamahine e tei roto i te hoê huru riàrià i te parauraa ua hämani-ìno-hia oia e te hoê tiàporo  e mea maere mau te òhipa i tupu. Te mauiui rahi no te mea ua uruhia oia e te hoê varua ìno. No te mea ua haruhia oia e te hoê tëmoni.

Ua riro te huru faaòhiparaa a te mau pipi no te faaìte i to rätou taa-òre-raa, i te haamäramarama i te èà i häroà ia Ietu i te tahi atu ä haapiiraa ia rätou. O Ietu iho teie ärataì nei ma te faatupu i te âparauraa, eiaha rä i te tëmoni. Ua faaòhipahia te reira mai te tahi faanahoraa e au i te hanahana o te Atua. Ua haere mai rätou ia na ra ma te haaputuputu i pïhaì iho i te reo faaora. E tià ia parauhia te haere ra rätou na muri ia Ietu i roto i te hoê püpü e ere i te mea atea roa, âpeehia mai e taua vahine ra ; i teie nei rä, te haere nei rätou i te vahi tei reira o Ietu i te haereraa na mua i te püpü. Te faahaamanaò nei te ìrava 23, i te mau ärataìraa a Iesu i ta na mau pipi èi faaìteraa e no te mau pipi atoà teie parau, e no teie vahine. Ia au rä i te mea e tupu i muri iho i roto i te faatiàraa, e ia au iho ä ra i te ìrava 26, mea tano iho ä ra ia faaoti e te paraparau ra o Ietu i teie vahine, ma te haapäpü i te mau mämoe i te ùtuafare no Ìteraèra, te mämoe moè e parauhia nei e mau taata ia aita i ìte tei hea rätou. Ua haere mai teie vahine ia Iesu ra e ua tüturi e aore ra ua tähopu i mua ia na, ma te täparu ia tauturu ia na ma te faatura. E te Fatu, a tauturu mai na ia ù ia ora ta ù tamahine tei uruhia i te varua faufau. Te manaò o Ietu i te parauraa, E mea au òre roa ia rave i te faraoa a te tamarii, no te tïtiri atu na te fanauà ùrï. I teie reo ua itoito roa teie vahine i te faaö ia na i roto i te manaò o Ietu, te ìte nei teie vahine i te mau parau atoà no roto mai ia Ietu no te faatupu i te ora, e òre e faatïpaupau. Te reo mai ra o te vahine, Oia mau, e te Fatu, te àmu mau nei rä te ùrï i te huàhuà rii faraoa i maìri mai no nià i te àmuraa a to rätou ra mau fatu. Te auraa ua ìte maite teie vahine i te huru oraraa o te mau ùtuafare e ànimara ta rätou i roto i to rätou fare. «E teie nei vahine, e faaroo rahi to òe O ta òe i hinaaro na, ia nä-reira-hia òe. Ora roa atu ra ta na tamahine i taua hora ra. Te haapäpü noa mai ra teie reo no Ietu i te parau no te faaroo, e parau ia no te taata hoê, ia tumuhia i roto i to na värua, i reira e tupu ai i roto i te tahi ia au i to na hinaaro. I muri iho ua parauhia  Peneiaè te huriraa òhie roa aè i roto i te reo Mäòhi, o te parau ia I reira. E te vahine e, e mea faahiahia to oe faaroo, E te vahine e faaroo rahi to òe, e faaroo rahi to oe; E teie nei vahine, e faaroo rahi to oe. Te täuiraa rahi o to òutou faaroo o to òutou ia faaroo e faaroo rahi to òutou e mea òhie aè ia no te mau taata Mäòhi, mai te parau no te iòa o te vahi nohoraa, te vahine o te faataa ra i te tauiraa i roto i te oraraa. Ua ìte atoà te tahi atu mau ìritiraa i teie na tumu e piti, e ua tuu atoà mai te tahi pae o rätou i te iòa o te aòraa. E faaroo rahi to oe, e te na ô ra te mau päpaìraa moà e, Aita roa atu òe i ere i te faaroo. E tïtauhia paha ia faaìte i te faaroo mai te hoê iho parau, o te tïtau i te hoê ä taime i te hoê taoà. Teie te tahi mau hiòraa, Te tiàturi mau nei òe e, e rave au i te mea ta òe e ani mai e aore rä, e täparu mai òe ia ù ia rave. Te tiàturi rahi nei òe ia ù. Ua tamata vëtahi feiä huri i te parau e parau mau te reira i faahitihia e Iesu. Te hoê raveà o te parauraa ia e, e mama, e nehenehe ta ù e ìte e faaroo rahi to òe ia ù nei. Ia ravehia te reira no òutou mai te mea e, e hinaaro òutou e ìriti i te toru o te taata i roto i te reo e faahithia ra e Ietu, tei päpaìhia i roto, Ia horoàhia mai to òe hinaaro. Tera rä, te fifi no te feiä aò, oia hoì ia, aita e tià i te reo ia tïtau i te toru o te taata, e no reira, e rave rahi o te märamarama nei i te auraa o te parau ra E faatià oe ia oe iho ia farii i te reira. E nehenehe ta te hoê taata e ìriti i te parau e horoàhia mai to òe hinaaro e aore rä e horoà mai te Atua i to òe hinaaro faatupu ora  i taua taime mau ra  o te parau ia  mai taua hora ra te hoê ä parau i faaòhipahia. I roto i te hoê taò, e tano iho ä ia tuuhia te tumu parau na mua e i te taò haa, i ô nei rä, ua tuuhia atu i mua i ta na tamahine no te haapäpü i te faaoraraa. Mai te mea e tïtauhia ia täui i te hoê huru o te taò haa, e nehenehe te hoê e huri i taua iho taime ra ua faaora te Atua i ta na tamahine, e âparauraa parau Atua ta te Vahine e o Ietu.

 

Teraì òr. Faatura.

 

 

 

  

 

Mätaio 14.22-33 Täpetepete

 

Tāpati 13 no Âtete 2023.

Täpetepete

Taramo 85

1 Na te Mënätehe. E Taramo na te tamarii a Tora.

2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra.

3 Ua faaòre òe i te hara a to mau taata ra, e ua täpoì òe i to rätou ìno. Tera.

4 Ua faaòre òe i to òe ra riri, e ua tïoi ê atu ra òe i te ûàna o to òe ra riri.

5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei.

6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra?

7 Eita änei òe e faaanaanaea mai ia mätou, ia òaòa to mau taata ia òe ra?

8 E faaìte mai, e te Fatu, i to òe ra aroha, e hö mai i te ora na òe ia mätou nei.

9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra.

10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua.

11 O te aroha e te parau mau, ua färerei ia räua; o te parau tià e te hau, ua hohoì räua.

12 E tupu mai te parau mau no roto i te fenua, e hiò mai hoì te parau tià mai te raì mai.

13 Na te Fatu hoì e horoà mai i te mea maitaì, e hotu mai ä hoì to tätou fenua.

14 E nä mua ia na te parau tià i te haere, e na te reira e faaìte mai i to na haereà.

1 Te mau Arii 19.9-13.

9 Tae atu ra o ia i reira i roto i te hoê ana, e ua taòto iho ra i reira; e inaha, ua tae mai ra te parau a te Fatu ia na, nä ô mai ra, Te aha noa na òe i ô na, e Èria?

10 Ua parau atu ra o ia, itoito noa na vau i e te Atua Täpäota i te Fatu: ua faaruè te tamarii a Ìteraèra i ta òe parau, e ua huri i ta òe fata i raro, ua täparahi i te mau perofeta na òe i te òè; e io vau nei, o vau anaè nei tei toe: e te ìmi mai nei rätou ia ù nei ia pohe.

11 Ua nä ô mai ra o ia, A haere, ei nià i te mouà tià noa ai i te aro o te Fatu. E inaha, ua haere iho ra te Fatu nä reira iho, o te mataì rahi iho ra e te ètaèta, i te haapararïraa i te mouà, e te vävähiraa i te mato i mua i te aro o te Fatu; aita rä te Fatu i roto i taua mataì ra; e mure aè ra te mataì, o te âueue fenua iho ra; aita rä te Fatu i roto i taua âueueraa fenua ra:

12 e oti aè ra te âueueraa fenua, e auahi; aita rä te Fatu i roto i taua auahi ra: e oti aè ra te auahi, e reo iti haìhaì mai ra, tei reira te Fatu.

13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria?

Röma 9.1-5

Te Atua e te nünaa ta na i mäìti

1 E parau mau hoì ta ù i te Metia, aore au i haavare, te faaìte âpipiti mai nei te Värua Maitaì e ta ù âau ia ù:

2 e e òto rahi to ù, e te mäuiui tuu òre i roto i ta ù âau.

3 E tià hoì ia ù ia ànatemahia vau e taa ê atu vau i te Metia ra, i ta ù mau taeaè, to ù ra fëtii i te haapaòraa i te tino nei.

4 I te âti-Ìteraèra ra, no rätou te faatävai ra, e te ànaana, e te faufaa ra, e te ture i horoàhia ra, e te haamoriraa, e tei parauhia mai ra.

5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

Mätaio 14.22-33

To Ietu haereraa nä nià i te miti

(Mär 6.45-52; Rut 6.16-21)

22 I muri mai, ua faaue atu ra Ietu i ta na mau pipi e paìùma i nià i te poti e e fano nä mua ia na i te tahi pae roto, a faahoì noa ai o ia i taua tiàa rahi ra.

23 E oti aè ra te tiàa rahi i te faahoìhia, paìùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira.

24 Ua huru ätea hoì te poti i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì.

25 E tae aè ra i te maha o te äraraa o te ruì ra, ua haere mai ra o ia ia rätou ra i nä nià i te àre.

26 I te taime i ìte atu te mau pipi ia na i te haereraa mai nä nià i te àre, riàrià roa aè ra rätou, nä ô aè ra: «E tüpäpaù. E ua auë anaè iho ra i te mataù.

27 Ua parau atu ra rä Ietu ia rätou i reira ra, nä ô atu ra: «A faaitoito, o vau teie, eiaha e mataù.

28 Ua pähono mai ra Pëtero ia na: «E te Fatu, mai te peu e o òe tënä, a faaue mai ia haere atu vau ia òe na nä nià i te àre.

29 Ua parau atu ra Ietu: « A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre.

30 Ia ìte rä o ia i te (ûàna) o te mataì, mataù iho ra, e haamata iho ra i te mure i raro, ua tuö atu ra: «E te Fatu, a faaora ia ù.

31 Ua faatoro mai ra Ietu i ta na rima i reira ra, haru mai ra ia na, nä ô mai ra: «E teie nei taata faaroo haraìni/täpetepete, e aha òe i feàa ai?

32 E ia tae räua i nià i te poti, faaea iho ra te mataì.

33 E te feiä i roto i te poti, tähopu/haamori mai ra ia i mua ia na, nä ô mai ra: «Òia mau, o te Tamaiti mau ä òe a te Atua.

Manaò.

Te täpetepete nei tätou i teie mahana i te maa òre, i te mea ua feàa to tätou fëruriraa, te täpetepete nei tätou i teie mahana i te òhipa òre, i te mea ua feàa to tätou fëruriraa, te täpetepete nei tätou i teie mahana i te hoo rahi te oraraa, i te mea ua feàa to tätou itoito. Na taò Mäòhi mau teie mai roto mai i to tätou reo, te turäma ra i te òreraa te tiàturiraa i roto i to tätou âau i te vahi raveà òre. Mai te mea mai roto mai i to tätou värua te tupuraa mai teie huru to tätou, èi tautururaa i teie huru faanahoraa, tei faatäpetepete e tei faafeàa i to tätou âau ua ineine te fenua no te faaiho-faahou i te huru mau o te taata i hämanihia e te Atua Nui Tahi. Te parau o te fenua, te parau ia no te taata tei täpaòhia e te fenua i to na hana e to na värua, e parau atoà rä no te taata ei ôpuaraa na te Atua, e ei tupuraa no to na hinaaro. E tupuraa hoì te taata no te hinaaro o te Atua, no te mea ia, na te Atua iho i hinaaro ia tupu mai tätou i nià i te fenua, i roto i te nünaa, mä to na reo, ta na peu, to na iho tumu, ta na mäa, e te faufaa ta te Atua i hinaaro ei faufaa na te reira taata. E hinaaro teie no te Atua i te taata ia ora hope roa, e ia òaòa hoì i te oraraa atu i te reira. Te mea mau atoà rä te reira e fätata ai tätou i te Atua. Te taata e manaò ra e, mea faufaa aè te parau no to na iho hinaaro tei faatäpetepete e tei faafeàa ia na, ua ère ia i te reira parau, ua haafaufaa òre hoì i te ôpuaraa a te Atua, e ua ère atoà i te ora. Nä roto i te fenua e te Faufaa ora a te Atua ta na e mau ra, ua haafätata mai te Atua i te taata, nä roto i te Tamaiti a te taata, ua hinaaro te Atua e haapäpü faahou i te taata i to na hinaaro haafätata ia na. E tano ia parauhia e, nä roto ia Ietu, te Tamaiti a te taata, ua hinaaro te Atua e färerei roa i te taata, mata e mata, vaha e vaha, taata e taata, taata e te Atua. Te òhipa mau ia e ravehia nei e te fenua, te pähono noa nei te fenua i te hinaaro o te taata no to na oraraa ia pärahi hau noa te taata i roto i te hau o te Atua Nui Tumu Tahi. Mea tià ia parauhia i to tätou haafaufaa-òre-raa i te mau horoà a te Atua : te fenua, te reo, te hiroà tumu, te mäa, te räau faaora maì, e tei hau roa atu, ua hunahia te faufaa ta te Atua i horoà mai ia tätou, oia te aroha e te here. No te mea, te vähi haamoriraa i te Atua, ua faarirohia ei vähi faahanahanaraa i te taata e to na mau hinaaro tià òre atoà. Ua faarirohia te Atua Metua ei Atua haavï, te nounou mana, te nounou moni, e te vahavaha hoì i te hiroà mäòhi. Aita te mau tävini o te Atua i ìmi faahou i te maitaì e te ora o te nünaa, ua faariro rä i te nünaa ei moihaa faatupu i to tätou maitaì e te oraraa fänaò të òre roa e roaa ia na àhiri aita i tävini i te Atua. Mea tià ia parauhia, E tärahu ia te reira na te òrometua te tiàtono tei riro ei arataì no te nünaa faaroo, e tärahu atoà na te nünaa tei färii i taua òhipa tià òre ra. Te naò nei ia te manaò i te parauraa o teie te tahi vahi i feàa ai to tätou faaroo, te faatoro noa mai ra te fenua i èà e ora ai tätou. Te vai nei te hoê tumu räau i te fenua Tähiti nei tei parauhia te Toroèà e ìtehia teie tumu räau i uta èi turämaraa i te èà o te feiä tomo maa, ia òre ia täpetepete te manaò i te tomoraa i roto i te vao, e te hoìraa i tai. Ua òre teie tumu räau i nià i te mouà, o vau iho nei aore ä vau i ìte atu ra, te parauhia ra tei uta i te mataèinaa ra no Faaone. Teie te tahi turämaraa ia au te haapotoraa no te mau taiòraa no teie mahana :

-Taramo 85, 12 E tupu mai te parau mau no roto i te fenua, e hiò mai hoì te parau tià mai te raì mai.

-1 Mau Arii 19, 13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria?

-Röma 9, 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

-Mätaio 14, 31 Ua faatoro mai ra Ietu i ta na rima i reira ra, haru mai ra ia na, nä ô mai ra: «E teie nei taata faaroo haraìni/täpetepete, e aha òe i feàa ai?

E haapäpüraa teie e tupu nei i roto i te taiòraa no teie mahana, i to Ietu haereraa nä nià i te miti i tupu ai teie faanahoraa na Ietu iho i parau i ta na mau pipi e paìùma i nià i te poti e fano nä mua ia na i te tahi pae roto, i te mea te faahoì ra o ia i te tiàa taata i âmui. Hou o ia a täpapa ai ta na mau pipi ua paìùma o ia i nià i te hoê mouà, i te hoê vähi moèmoè, e pure. E ruì noa iho ra i reira. Ua ätea te fauraò i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì. Ia tae aè ra i te maha o te äraraa o te ruì ra, ua nä nià mai ra o Ietu i te àre. Ia ìte ra te mau pipi ia na i te haereraa mai nä nià i te àre, riàrià roa aè ra, nä ô aè ra, E tüpäpaù. E ua auë rätou i te mataù. Te reo o Ietu e faaitoito, o vau teie, eiaha e mataù. Tei nià mai ra te reo o Pëtero, e te Fatu, mai te peu e o òe tënä, a faaue mai ia haere atu vau ia òe na nä nià i te àre. Te reo mai ra o Ietu,  A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre. Ia ìte rä i te ûàna o te mataì, mataù aè ra, e haamata iho ra i te mure, ua tuö atu ra e te Fatu, a faaora ia ù. Ua òhie o Ietu i te faatoro i ta na rima i reira ra, haru mai ra ia na, nä ô mai ra E teie nei taata faaroo haraìni, e aore täpetepete, e aha òe i feàa ai. I nià i te poti, faaea iho ra te mataì. Tähopu aore ra haamori mai ra ia i mua ia na, nä ô mai ra, Òia mau, o te Tamaiti mau ä òe a te Atua. Teie mau òhipa e tupu nei, fenua, päpe, pö, e tià ia parauhia e ìte nati teie tei päpaì märamarama maitaìhia i te päpaìraa a Mätaio i te òhipa a Iesu i faanaho, i to aru âmuiraa i roto i te mätaù o te mau pipi, teie te mau tumu i parau ai te mau pipi e, o te Tamaiti mau ä òe a te Atua. I nià i te poti, i nià i te miti, i tupu ai te märamarama i roto i te mau pipi i faateitei ai roto i te Tamaiti a te Atua na roto i te haamoriraa i te taime i roromä ai te mataì, tei tuu i te mau pipi i roto i te hau. Te miti ra te èà ia te reira tei faatuàti i te mau fenua i te ärataìraa a te mau ôpape, te ta te mau âpoo mataì e turu nei ia fano maite te poti, ta te raatira e mau ra i te hoe. Teie te tahi reo Himene tei au maite i ta tätou parau no teie mahana, puta himene numera 159, àpi 169, te pehe o teie himene tei roto i te puta Ecole du dimanche, 143, je dois voyager au monde. Tei roto atoà i te Ailes de la foi numera 339, e i te youtube, https://www.youtube.com/watch?v=qZbMoDOUHoc.

 

Te tere nei au i raro nei.

1

Te tere nei au (i) raro nei

Mai te hoê vaa i tua

E te teitei nei te àre

I te mataì ûàna

 

Òaòaraa

To ù nei ora

O Ietu ia

Te pure ra o ia

I te Metua no ù.

 

2

Tei ia ù nei te âveià

E tae ai (i) te täpaeraa

O  ta Na ia Parau ora

Tei paruru i te pohe

 

Òaòaraa

3

E ia rumaruma te raì

E taiä ai to ù âau

Te na ò nei te Päirati

A faaitoito mai

Òaòaraa.

 

E au mau teie himene èi faaitoitoraa ia tätou i teie mahana, ia òre to tätou faaroo ia haraìni, e aore ia täpetepete, e aore ia feàa.

 

Teraì òr Faatura.

 

Mätaio 17.1-9 Märamarama.

 

Tāpati 6 Âtete 2023.

ÔROÀ.

Märamarama.

Taramo 97

1 O te Fatu te arii, ia ôuàuà te fenua, e te mau fenua rii e rave rahi ra, ia òaòa ia.

2 Te haaàtihia ra o ia i te mau ata e te pöuri. O te parau-tià rä e te au, o te tumu ia o to na teröno.

3 Te haere ra te auahi nä mua ia na, e te àma ra to na mau ènemi e àti noa aè.

4 Te märamarama ra te fenua i to na ra uira, te hiò ra te fenua mä te rürütaina.

5 Te tärapape ra te mau mouà mai te täpau i te aro o te Fatu, i te aro o te Fatu o te fenua atoà ra.

6 Te faaìte mai ra te mau raì i te parau-tià na na, e te ìte ra te taata atoà i to na hanahana.

7 Ia haamä te feiä atoà i haamori i te mau atua òtiòtihia ra, o tei teòteò i to rätou iho mau îtoro. E haamori ia na, e te mau atua ra.

8 Ua ìte Tiona e ua òaòa, e te fänaò nei te mau tamahine o Iüta i te parau au na òe, e te Fatu.

9 E teitei rahi to òe, e te Fatu, i te mau fenua atoà nei, tei nià ê ä òe i te mau atua atoà ra.

10 O òutou o tei hinaaro i te Fatu ra, ia riàrià òutou i te ìno, te tiaì ra o ia i te värua o to na feiä moà ra, e te faaora ra o ia ia rätou i te rima o te paieti-òre ra.

11 Ua ueuehia te märamarama na te feiä parau-tià ra, e te òaòa na te feiä i tià te âau ra.

12 E òaòa òutou, e te feiä parau-tià, i te Fatu, e e haamaitaì atu mä te haamanaò i to na ra maitaì.

Täniera 7.9-14

9 Te hiò ra vau, e haamauhia iho ra te mau teröno e ua pärahi mai ra To te mau mahana tahito ra, o tei au to na àhu i te hiona i te teatea, e te rouru o ta na upoo, mai te huruhuru mämoe maitaì ra ia: e auahi ùra to na teröno, e to na pereoo e auahi àma ia.

10 Puroro noa mai ra te auahi tärapape mai mua mai ia na: e ua tautani hoì i te tautaniraa i te täviniraa ia na ra, e ua àhuru hoì te tautaniraa i te manotini i te tiàraa i mua i ta na aro: pärahi iho ra te haaväraa, e ua heheuhia te mau puta.

11 Ua hiò iho ra vau e no te parau rahi i parauhia e taua tara ra hiò iho ra vau, e taparahihia taua mea ora ra, e pau aè ra to na pera, e tuuhia atu ra i te auahi àma ra.

12 Âreà te tahi pae i taua mau mea ora rarahi ra, ravehia aè ra to rätou mana; i haamaorohia rä to rätou aho e ia tae i te tau e te taime.

13 Hiò iho ra vau i taua ôrama i te ruì ra, e inaha, te hoê mai te Tamaiti a te taata ra i te haereà mai nä roto i te mau ata o te raì ra; e ua haafätata atu ra o ia i To te mau mahana tahito ra, e tuuhia iho ra i pïhaì iho ia na. 14 E ua höroàhia mai ra te mana, e te hinuhinu, e te pätireia nö na, ia auraro mai te taata atoà, e te mau fenua atoà, e te reo atoà ia na. To na na mana, e mana mure òre ia, e òre ia e mou, e to na pätireia, e òre ia e pau.

2 Pëtero 1.16-19

Te ìteraa i te hanahana o te Atua

16 Èere hoì ta mätou i te fäpura i faatupuhia e te paari ra, a faaìte atu ai mätou ia òutou i te mana e te haereà mai o to tätou Fatu ra o Ietu Metia, ua ìte hua rä to mätou mata i to na hanahana.

17 I noaa hoì ia na i te Atua Metua ra te haamaitaì e te faateitei, a tae mai ai ia na taua reo no roto mai i te ànaana rahi ra e: «O ta ù Tamaiti here teie, ua mauruüru roa vau ia na.»

18 Ua faaroo mätou i taua reo no te raì mai ra, ia mätou e o ia atoà i nià i te mouà moà ra.

19 Tei ia tätou atoà te parau a te mau perofeta tià rahi roa atu ra i teie nei; o te mea maitaì ia ia òutou ia haapaò i te reira, mai te rämepa e ànaana i te vähi pöuri ra, e ia tai ao, e ia hiti te fetià poìpoì i roto i to òutou na âau.

Mätaio 17.1-9

To Ietu faahuru-ê-raa-hia

(Mär 9.2-9; Rut 9.28-36)

1 E ruì ono aè ra, ua rave aè ra Ietu ia Pëtero, e ia Iatöpo, e ta na taeaè ia Ioane, e ua arataì atu ra ia rätou i nià i te hoê mouà teitei.

2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra.

3 E inaha, ua fä mai ra Möte räua o Èria ia rätou ra, e täuàparau anaè iho ra räua e o Ietu.

4 Ua parau atu ra Pëtero ia Ietu, nä ô atu ra: «E te Fatu, e mea maitaì ia pärahi tätou i ô nei. E ia tià ia òe ra, e faatià vau i ô nei e toru aè fare autä: no òe te tahi, no Möte te tahi, no Èria hoì e tahi.

5 E te parau noa ra o ia, e inaha, täpoìhia mai ra rätou e te hoê ata ànaana; e inaha, te hoê reo mai ra no roto i te ata, i te nä-ô-raa mai e: O ta ù Tamaiti here teie, ua mauruüru roa vau ia na. A faaroo ia na

6 E ia faaroo aè ra te mau pipi i te reira, ua tïpapa iho ra rätou i raro, mä te mataù rahi.

7 Ua haafätata mai ra Ietu i pïhaì iho, faatiàià mai ra ia rätou, nä ô mai ra: «A tià, eiaha e mataù.

8 E ia nänä aè ra i to rätou mata i nià, aore roa e taata i ìteä e rätou, mäori rä o Ietu anaè ra.

9 E tei to rätou pouraa mai mai nià i te mouà, ua faaue mai ra Ietu ia rätou: «Eiaha roa atu òutou e faaìte i te taata i ta òutou i ìte aè nei/ôrama, e tae noa atu i te taime e tiàfaahou mai ai te Tamaiti a te taata mai te pohe mai.

Manaò.

Na mua roa ia taa ia tätou e aha te haamaitaì, te haamaitaìraa e parau, e parau tei faaìte ra i te taata i te vahi te reira te maitaì, ta te Atua e faaìte noa te vahi te reira te tupu mauraa te maitaì, teie te taata tei färii e haere e faatupu i te maitaì, ia òre òe e rave èita tera maitaì e matara ia rave. Ua faaìtehia mai ra te vai ra. Te auraa mätamua ia o te parau haamaitaì. Te piti, ia matara i te taata teie maitaì, ia roaa ia na i te mea ta te Atua i parau te horoà atu nei au, i reira te piti o te auraa e matara mai ai, òia hoì, faahoì i te reira maitaì i te Atua ra, e haamaitaì atoà te reira. Teie nei e aha te haamaitaìraa a te Atua i te taata, ia hiò tätou i tera Tenete te parau te Atua i te tane e te vahine, mea tano i tera parau ia önoönohia i teie tau, no te mea ua manaò te taata, e ôpuaraa atoà ta na no te taata. Ta na ôpuaraa èi tane, èi tane, èi vahine, èi vahine, na te taata te reira. Ta te Atua èi tane, èi vahine te haamaitaìraa ia fänau o rua, te fänau, te fänauraa e ère i te tahi òhipa mea hape noa, e aore mea ravehia, e aore e tupuraa no te tahi ôpuaraa ìno, mai teie e rahi roa nei i te tupu i roto i to tätou nünaa, e ère. E haamaitaìraa òia hoì ua parau te Atua e maitaì to roto i te fänau. I teie mahana no tera mea ua pee tätou i te feruriraa no te mau òhipa e òre e au i te maitaì i ôpuahia e te Atua, i teie huru faanahoraa, aita te fänau i riro i hiòhia mai te tahi haamaitaìraa. Ia fänau te mau metua i mua ra, e tätini, ia fänau te taata i teie mahana e taiò, eiaha ia hope te mani rima ua faaea na mua aè, mai te peu ua faaea na mua aè mea maitaì ia, e aha te parau èita e paìä, èita e noaa i te rave. Te faanahoraa a te Atua mea nahea, ua faaî te Atua i te fenua i te maitaì, e ua parau i te taata a hiò te au èi maa a rave àamu, e no te mea ua î te Atua i te maitaì, i reira noa to te Atua parauraa i te taata e fänau faarahi e ra iho te maa, e aha ia te auraa, mai te peu ua pau e faaî ia, tätou i teie mahana aita, e fänau na mua i reira e feruri atu ai, aita, e päpü iho ä ia e fifi, àhiri ra mai ta te mau metua, mai ta te Atua e faanaho ra, faaî na mua te fenua, e faaî, èita te taata e hepohepo, tera mau metua to tätou ua fifi rätou aita, aita e täote ua ora, te reira ta te Atua haamaitaìraa, te auraa èita te taata e täno e faaruè i te fenua, noo ò na i te raveraahia mai e haere ò na i ô e tii te ora ta te Atua e hinaaro, fänau, faarahi. Fänau te hämaniraa ia i te taata, e mana tera ta te Atua i horoà i te taata, te Atua tei hämani i te taata, ua horoà atoà i tera mana i te taata, ia fänau atoà i te taata ia hämani atoà i te taata, na roto ra i te fänau, na roto i te fänau. No te mea ua tae roa atoà i te taata i teie mahana, ua hinaaro atoà e hämani i te taata, e hämani i te taata te vai ra ta na raveà e ère na te Atua te reira. Ta te Atua na roto i te fänau e aha te auraa, te fänau e hotu te reira no roto mai i te tumu o te püfenua, èi faatupuraa i te fänau e ère na te paari o te taata i roto i ta na mau raveà, òia e tupu ta te taata, e oti ta te taata, taata i teie mahana e ère ra na te Atua, ta te Atua na roto i te fänau òia hoì na roto i te püfenua, fänau, faarahi, aita e fifi to te rahi, i teie mahana te rahi te fifiraa, e ua faariàriàhia tätou, ua parauhia eiaha e fänau faarahi, e faaïti ua tere mai te mau täote, no te haapiipii i te taata nahea i te faaïti.

Te ùtuafare e tamarii te faatere, ua àti ia ùtuafare e ère te metua i te ìte e aha te àveià ia rave, na na e horoà i te haapiiraa, na na e ärataì, na na e haapii, na na e horoà i te ora te tamarii e haere o na i ô e haapii atoà, tera mea e tïtauhia ra ia tätou i teie mahana. No reira ia òre tätou ia haavï-faahou i ta tätou mau tamarii, eiaha e riàrià i te aò, maite peu e tae te haavïraa, te räveà hopeà i mua ra te täìri, haamanaò noa na ia tätou, e ère anei na e täìri, te pöàra i âfaro rii ai i roto i te oraraa.

Teie mahana, ua ìte au i te fare haapiiraa te tamarii aita e haere faahou i te haapiiraa, ia faaroo anaè, e aha e fifi ùtuafare, e aha te auraa teie mea e fifi ùtuafare, aita e tamarii, aita e hinaaro faahou e faaroo i te parau a te metua, hinaaro te tamarii nana e faanaho i to na oraraa, e haere o na e rave i te òhipa mai ta na e hinaaro e i te taime ta na i hinaaro, aita, na metua e faatere ia na, e ère na na e faatere i te metua, no reira tera parau e fifi ùtuafare, mea haraoooo i te faaroo i teie mau parau. E ère mea na roto mai tätou i te fifi, aita e tamarii òrurehau i roto i te ùtuafare, ua ìte te tamarii te metua te faatere, te reira ta te Atua i hinaaro, haavï iho, ia mana ò rua i nià i te mau mea atoà, te naò ra te auraa o te parau e mana. Haamaitaì mai ra te Atua ia raua, te tane e te vahine, no te mea tera te tahi vahi tätou e fifi ai i teie mahana, raua te Atua tera e parau ra, haamaitaì ia raua, teie nei o raua, tera tämaïti, tera tamähine, tera tane, tera vahine, e aha tä raua parau ia raua, e paraparau paì ia raua, taata rapae tera e parau ra ia raua, e ö raua nafea raua ia paraparau ia raua, e parau raua taua, e ö mai te taua, o òe e eo vau, teie mahana, teie te tahi manaò no Pauro, te naò ra o Pauro te tane tei upoo, èita e ère mea na reira ta te Atua, o òe e ö vau, manaò vau tera te reo e haapii faahou i ta tätou feiä âpï i teie mahana, e ère te tane o na te upoo, te auraa to na te rima rahi aè, e ère o òe e o vau, aita e ôpuaraa, aita te taua i roto o òe e o vau, hinaaro taua e fänau, o òe e o vau, te ôpuaraa o òe e o vau, te auraa te vai ra te taime e haapae te tahi i to na manaò, no te mea aita e àfaro ra i to te tahi, eiaha te reira e na nià noa i to na ètaèta, te parauraa e o vau tei upoo o te ùtuafare, e aha ia te tahi maite peu e. No reira tera paha te tahi reo, te tahi taò aita e vau e parau ra i te reo, tera te tahi taò e haapii faahou i ta tätou feiä âpï i teie mahana taua, o òe e o vau, i roto i te mau òhipa atoà e i roto i te oraraa, ia hiò tätou i teie mahana e aha te fifi e ìtehia nei, teie mau taata, teie mau tane e täparahi nei i ta rätou vahine, e ère te taua, aita ua hinaaro noa te reira tane e na nià noa o na i to na manaò, ta na i faaoti mea maitaì, aita horoà na vau i tera hiòraa e tuu atoà vau i mua ia tätou, hiò na tätou i te hoê tumu tiare e täno anei i te hoê ûmoa e parau i tera mau ûmoa atoà i nià i tera tumu tiare e mea mä faaea noa òutou, na ù e ùaa no tätou, aita, maite peu hoê noa ûmoa e ùaa no te toeà, e täpu i tera tumu tiare e àfaì e faaruè. Te tanoraa mau i ù nei, e piti ûmoa e ùaa taua, e tera ùaaraa taua, no te faahanahana i te Atua, e ère no reira ia ìte atoà tätou i te haapiiraa, e mea òhie roa te parau. Ia ìte atoà ra tätou e tei ô to tätou nunaa i te fifiraa, taua, o òe e o vau, no te mea e ôpuaraa na te Atua, tera te haamaitaìraa a te Atua i te taata, ia ìte te taata i tera parau e taua, ei ia faaaano rii aè o tätou, e aha te mea e haafaufaahia i ù nei, te parau ia riro i roto i te mau mea atoà ta tätou e rave, na parau e ìriti i te ùputa, te auraa e paraparau, ia òre anaè e paraparau, èita iho ä paha te vaha e parau, te rima paha te paraparau mai  aita te rima i ìte i te paraparau, e ère na te vaha iho ä e paraparau, e haapii faahou ia tätou i te paraparau i teie mahana, manaò anaè vau tera te mea ta te Atua e hinaaro ia ìte faahou tätou, paraparau faahou tätou, ia tätou iho, paraparau i te fenua ua ìte atoà te fenua i te faaroo i te parau, ua ìte te raau i te faaroo i te parau, e pähono te raau ia parauhia, e pähono te mataì, e pähono te miti, e paraparau atoà ra i te Atua, no te mea na te parau e ìriti i te ùputa o teie nei ao, na te parau atoà ra e ärataì ia tätou i roto i te ora, maite peu e haapiiraa ta ù e hinaaro ia täpeà tätou, tera te parau, mauruüru. Ua faatumuhia teie mau manaò i nià i na taiòraa e maha no teie mahana, teie atu ra te haapotoraa :  

-Taramo 97, 11 Ua ueuehia te märamarama na te feiä parau tià ra, e te òaòa na te feiä i tià te âau ra.

-Täniera 7, 14 E ua höroàhia mai ra te mana, e te hinuhinu, e te pätireia nö na, ia auraro mai te taata atoà, e te mau fenua atoà, e te reo atoà ia na. To na na mana, e mana mure òre ia, e òre ia e mou, e to na pätireia, e òre ia e pau.

-2 Pëtero 1, 17 I noaa hoì ia na i te Atua Metua ra te haamaitaì e te faateitei, a tae mai ai ia na taua reo no roto mai i te ànaana rahi ra e: «O ta ù Tamaiti here teie, ua mauruüru roa vau ia na.»

-Mätaio 17, 2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra.

Tätou i âmui mai i teie mahana, e ia ora tätou i te aroha, te here o te Atua Nui Tumu Tahi, ia haamaitaìhia te Atua no teie mahana maitaì roa, ta na i hohora faahou mai i mua ia tätou, teie parau no te ànaana ta te ìrava e faahiti nei, te mata ia o te mahana, e aha te ànaana, e àma ia tei faatupuhia mai roto mai i te puai o te rä, tei parau-atoà-hia te mahana. Teie ta tätou i ìte maitaì no te mea ua ö roa teie maitaì no te mahana i roto i to tätou oraraa, ua ìte maitaì tätou i to na faanahoraa, te vahi ra ta tätou e haapaò maitaì i roto i te vahi o te ànaana, naò ia tätou i te hiò te ànaana e parauhia nei, te taata tätaìtahi ia, e ère te ànaana noa e horoà ra i te märamarama, e te reira atoà mea e hinaarohia ra ia na. Mäite peu rä e tätou tera ànaana, ia taa maitaì atoà tera mea e hinaarohia ra ia tätou, ia maitaì noa te àma, te vai ra ta tätou tuhaa, ò ia hoì te àtuàturaa, i te teatea o te àhu tei faatupu i te märamarama, èi täuàparauraa i to na maitaì, e te vahi hau-roa-atu e te faahiahia maite peu e tütonu maitaì mai tätou. E aha te òhipa e ravehia e te ànaana àhiri na e aha te òhipa e ravehia e te ànaana ia ìtehia te mau ù ta te märamarama, e faaî noa ra to na mau nehenehe, tei tütuì, e aha te auraa e tütuì e tuu i te àma te auraa, e ère, e ère no te ànaana noa te àma, te àma mea tuuhia atu, maite peu mea tuuhia atu teie àma i nià i te ànaana e aita e ùiti faufaa òre te àma, tuuhia atu te àma ia ànaana. E au teie parau ta tätou i tupu i nià i te mouà no te faahuruêraahia o Ietu i mua i te mau taata i mäìtihia, o Petero, Iatöpo, o Ioane, tei haere mai e faaìte i te hiò no te hoê rämepa tei repohia tei òhene noa te àma i roto i te hiò tei òre i tämähia. E faufaa òre ia te maa i tuuhia, tuuhia atu te àma i roto i te repo o te hiò, no reira i tià ai teie âparauraa na Ietu i te mau tià no te Faaauraa Mätamua, o Mote te parau no te Ture, o Èria te parau a te mau perofeta, èi faaäraraa te vairaa i roto i te ture e te parau, ia vai tämau noa te àma o te tiàturiraa i te parau no te tiàfaahouraa o te Metia no te oraraa hau. I tià ai teie manaò i te parauraa e, e au atoà no tätou teie parau, i parau maitaìhia tätou o tätou te tahi rämepa haamanaò tätou e, maite peu e àma tätou e ère no tätou te àma, te àma e mea tuuhia mai, ua ìte atoà ia tätou i nià i te morï, ua rau te fäito àma ia ìte ra te morï tätaìtahi tera àma ta na e mau ra, a òaòa e a mauruüru, ia òre te tahi ia parau e, e aha ra e puai aè te àma o tera aè, hinaaro vau mäiteraa aè to ù àma aita, e àma o na i tera àma na na e faaìte, no reira eiaha te taata tätaìtahi ia faaäu ia na i te àma o te tahi, àma o na i te àma i horoàhia no na ua ravaì, hiò ta na i roto i te tahi ùtuafare, hoê morï i tuuhia te àma noa atu te naìnaì o te àma o teie morï ua ravaì ra no te tuu i te hau i roto i te âau o te tamarii tirärä mea e hinaarohia ra, hoê fare e àma rahi noa te morï èita te taata e taòto, e fifi te taòtoraa o te taata, no reira. Te rämepa maite peu tätou te rämepa tätou tuhaa te vai ineine-noa-raa no te färiiraa i te àma e tuuhia mai. E te àma i tuuhia mai no te horoà ia i te märamarama, e te märamarama e ère no tätou, aita faufaa tera àma no te türama noa i te rämepa, to na àma no te haamäramarama i te ùtuafare , no te haamäramaramaraa i te taata, no te horoà i te hau i roto i te taata, hiò na tätou i te tähi taata maite peu e parauhia o na e haere e tahu i te auahi, aita ia moè-roa-hia ia tätou mea nahea i te tahu i te auahi.

Ua ìte maitaì hoì tätou e e ravehia tera mau âmaa rii naìnaì roa na mua e faaàma i te reira, o tei parau-atoà-hia i te ahi ia àma i reira e tuu mai ai te àma huru rahi rii aè, eiaha e rave i te vahie rarahi, e pohe eiaha tätou e naò e e vahie maitaì teie, tera iho ä tahuraa atu ua pohe, aita tätou e haamaitaì ra i te ahi te faaìno ra no reira mea tuu märu noa ia àma mai tuu atu te mau maa ïti, e päpü roa atu te àma, ta tätou tera tuhaa i roto i te taata e faaàma, e tuu te àma i roto i te taata noa atu e àma naìnaì, e na nià iho ä i tera àma naìnaì i te haamata, maite peu e tuu tätou i tera âmaa rahi e pohe tera auahi, faufaa òre, e ära atoà ra no te mea, te vai ra te tahi pae e manaò ra rätou e ia faauehia rätou e haere e tahu i te auahi e haere rätou i mua i tera àma naìnaì i reira e üra ai, faufaa òre ia teie auahi e hinaarohia e faaàma maite peu e tätou te üra te vai atoà ra tera hohoà taata, e ère faauehia e haere e faaàma, e here e tuu i te àma, aita e haere o na i mua i te taata i reira o na e üra ai, no te haafaufaa òre ia teie üra naìnaì. E haapiiraa rahi mau teie e vai ra i roto i te ànaana mahana, te àhu teatea, e te märamarama, tei na rotohia i te ôriò mata o te Metia i te taime i faahuruèhia o ia. Naò ia tätou o te tahi òhipa âpï teie e tupu nei i nià i teie mouà i te tahi vahi haumärü e te maitaì i te faarooraa i te reo o te Atua Nui Tumu Tahi,  O ta ù Tamaiti here teie, ua mauruüru roa vau ia na. A faaroo ia na, e reo Metua no te ùtuafare faaroo i Mäòhi Nui èi faatupu tämauraa i te ora.

 Teraì òr. Faatura.