Tāpati 10 no Pipiri/Mati 2024.
Hämani-âpï-hia.
Mau
taiòraa.
Taramo
137
1 I te hiti o te mau pape i Päpuronia ra to mätou pärahiraa i raro, e ua òto
iho ra mätou i te manaòraa ia Tiona.
2 I nià i te
mau ârope, i rotopü ra, te faauta-raa-hia ta mätou mau tïnura.
3 I reira te
feiä i tïtï ai mätou ra i te faaueraa mai i te himene, e te feiä i riro mai ai
mätou tei ani i te ârearea, nä ô mai ra: A himene mai na i te hoê himene no
Tiona»
4 E aha mätou e
tià ai ia himene i te himene a te Fatu i te fenua ê nei.
5 E Ierutarëma,
ia moè òe ia ù ra, ia moè atoà i ta ù rima àtau nei to na töroà.
6 Ia piri ta ù
arero i ta ù vaha nei, ia òre au ia manaò ia òe, ia òre au ia faateitei ia
Ierutarëma ei mea òaòa rahi na ù.
7 Haamanaò, e
te Fatu, i te mau tamarii a Êtoma, o tei parau i te mahana a àti ai Ierutarëma:
«A täìhitumu na, täìhitumu na, ia ìhipapa hua ia»
8 E te tamahine
a Päpuronia faaano fenua e, e ao to na to të tähoo atu ia òe, mai ta òe i rave
mai ia mätou nei.
9 E ao to na to
të rave i to na mau ènemi, e ua täìri noa i nià i te mato ra
2
Parareipomeno 36.14-23
14 Rahi atu ra hoì ta te feiä tahuà rarahi ra hara, e
ta te taata atoà, i te mau parau faufau a te êtene; e ua haaviivii i te fare o
te Fatu tei haamoàhia e ana i Ierutarëma.
15 Ua tono mai ra te Atua o to rätou mau metua o te
Fatu i te veà, aita i tuutuu; no te mea te aroha ra o ia i to na mau
taata, e to na iho ra pärahiraa.
16 Ua tähito ra rätou i te mau veà a te Atua, e ua
vahavaha i ta na parau, e ua hämani ìno i te mau perofeta nä na e tupu roa aè
ra te riri o te Fatu i to na taata, e aita roa aè ra e haapüraa.
17 I tuu mai ai o ia i te arii o te Tarataio, tei täpü
noa i te mau taata âpï i te òè i roto i to rätou vähi moà, aore roa i aroha i
te taata âpï, e te pötii rii âpï, i te taata paari, e tei piò i raro i te
ruhiruhiä: tuu-atoà-hia atu ra i ta na rima.
18 E te mau mea atoà o te fare o te Atua, te mea rahi
e te mea rii, e te mau taoà atoà no te fare o te Fatu, e te taoà a te arii, e
to te huiraatira atoà, ua hopoi-atoà-hia e ana i Päpurönia.
19 Ua tütuì hoì rätou i te fare o te Atua i te auahi,
e ua haapararï i te âua i Ierutarëma; ua tütuì hoì te fare o te hui arii i te
auahi, e ua vävähi i te mau taoà maitataì atoà ra.
20 E te feiä i ora i te òè ra, ua hopoi o ia i te
reira i Päpurönia; e riro atu ra ei tävini nö na e no ta na mau tamarii e tae
roa aè ra i te hau i te pätireia ra i Peretia.
21 Ia tupu te parau a te Fatu i te vaha o
Ieremia, ia noaa to taua fenua ra Täpati; te vai pau noa ra hoì, te haapaò ra ä
ia i te täpati e hitu àhururaa i te mätahiti.
22 Tae aè ra i
te mätahiti mätamua o te arii o Peretia ra o Turo, ia tupu te parau a te
Fatu i te vaha o Ieremia i faaaraara atu ai te Fatu i te âau o te
arii o Peretia o Turo, ia päpaì i te tahi ture päpaì, e ua faaìte haere e àti
noa aè tö na fenua, nä ô atu ra,
23 Te nä ô mai ra te arii o Peretia o Turo, ua höroà
mai te Atua no te raì o te Fatu i te mau pätireia atoà o te ao nei; e ua
poroì mai ia ù e faatià i te tahi hiero nö na i Ierutarëma, i Iüta ra. O vai to
òutou i to na atoà ra taata? Ei ia na to na ra Atua o te Fatu a haere ai o
ia i nià ra.
Èfetia
2.4-10
4 O te Atua rä,
no te aroha rahi to na, no te hinaaro rahi ta na i hinaaro mai ia tätou nei ra,
5 pohe noa ai ä tätou i te hara ra, faaora aè nei ia
tätou mä te Metia atoà (i ora òutou i te aroha mau),
6 e ua faatià ia tätou atoà i nià, e ua haapärahi ia
tätou atoà i te ao i te Metia ra ia Ietu;
7 ei faaìteraa na na i te mau uì a muri atu, i te rahi
hau ê atu o to na ra aroha mau, i ta na hämani-maitaì-raa ia tätou i te Metia
ra ia Ietu.
8 I ora hoì òutou i te aroha mau i te faaroo. Eere hoì
ia i to òutou iho, e mea horoàhia mai ia e te Atua.
9 Eere i to te òhipa, aita atu ra o te taata nei e
teòteòraa.
10 O tätou hoì
ta na òhipa i hämanihia i te Metia ra ia Ietu ei rave i te parau maitaì, o tei
faaau-ätea-hia tätou e te Atua, e o ta tätou ia e haapaò.
Ioane
3.14-21.
14 Mai ia Möte i faateitei i te ôfï i te mëtëpara ra,
oia atoà te Tamaiti a te taata, e faateitei-atoà-hia ia,
15 ia òre ia pohe te faaroo ia na ra, ia roaa rä te
ora-mure-òre.
16 I aroha mai
te Atua i to te ao, e ua tae roa i te horoà mai i ta na Tamaiti Fänautahi, ia
òre ia pohe te faaroo ia na ra, ia roaa rä te ora-mure-òre.
17 Aore hoì te Atua i tono mai i ta na Tamaiti i te ao
nei e faahapa mai i to te ao, ia ora rä to te ao ia na.
18 Tei faaroo ia na ra, e òre o ia e faahapahia; tei
òre i faaroo ra, ua faahapa-ê-hia na ia, o ia aore i faaroo i te iòa o te Tamaiti
Fänautahi a te Atua ra.
19 Teie taua faahapa ra, o te märamarama ua tae mai i
te ao nei, e hinaaro aè nei te taata i te pöuri, aore te märamarama, no te mea
te ìno ra ta rätou parau.
20 O tei mau i te parau ìno ra, aore o ia i hinaaro i
te märamarama, e òre hoì o ia e haere mai i te märamarama o te ìteä ta na
parau.
21 O tei haapaò rä i te parau mau ra, e tae mai ia i
te märamarama ia ìteä-maitaì-hia e, te au ra ta na parau i te Atua.
Mau ìrava Turu.
Te mau parau o te Pîpîria te faahiti-noa-hia ra i teie
mahana èi papa, no te faaìte maitaìraa i
te päpaì ta te fenua, te raì, reva, e faahiò ra i te faufaa tumu o te rähu tei
täpirihia i roto i te mau poroì no te àamu, o te mau taata no te mau tau atoà.
Mäite mea ra te parau i päpaìhia i roto i te Taramo 137 i te hopoi-tîtî-raa-hia
te nunaa àti Iuta i te fenua Päpuronia. Ua tiàvaruhia te mau àti Iuta i rapae i
to rätou fenua àià, o Ierutarëma, e ua faahepohia rätou ia ora i te hoê fenua
ê. Ua mihi noa rätou ia Tiona oia hoì ia Ierutarëma e to na Hiero, o tei
haamouhia e to Päpuronia. Te mau mea e vai ra i roto, te faaite ra te taata
taramo i to na peàpeà e to na hepohepo i
te hopoi-tîtî-raa-hia. Oia hoì ua täaàhia rätou, i te pae päpe no Päpuronia i
pärahi ai rätou e i òto ai i te haamanaòraa ia Tiona. Te haamanaò ra teie mau
parau i te nehenehe o Ierutarëma e te mauiui o te èreraa i to tätou Hiero te
pito o to rätou tiàturiraa. No reira ia tae i te pae hopeà e faaoti ai te taramo
na roto i te hoê pure no te tahoo i te feiä haavï. Ia au i teie mau parau poroì
na roto i te feruriraa i teie mau faaìteraa i roto i to na tupuraa o te àamu, e
nehenehe tätou te feiä faaroo e marämarama maitaì i te mau òtoraa èi faaìteraa
i te faaroo i roto i te àti, ma te haapaari i to tätou täaihonoraa e te Atua. I
te mea te haamanaò mai ra teie mau parau e i roto atoà i te mau taime pöuri roa
aè, e nehenehe tätou e färiu i nià i te Atua Nui Tumu Tahi ma to tätou mau huru
òto, mau mauiui, e te mau uiraa. Te tïtau manihini ra tätou ia feruri i nià i
te mauiui, te èreraa, e te ìmiraa i te parau-tià, a täpeà noa ai i te tiàturiraa
i te Atua. Ia tämau noa teie mau parau i te tämahanahana i te feiä taiò, e te
feiä e faaroo ra i te reira i teie mahana. Te faaìte ra teie mau faaìteraa i te
hoê ànoìraa fifi mau o te mau manaò hohonu e te mau tumu parau, e nehenehe rä
ta na poroì tumu e haapotohia mai teie. Te manaònaòraa e te mauiui o te
hopoi-tîtî-raa, manaò hohonu teie e manaònaòhia nei i te èreraa i to rätou
fenua tumu e te hiero te pito o to rätou faaroo. I te hiti o te mau ànavai päpe
no Päpuronia ua pärahi mätou ma te haamanaò noa ia Tiona, te faaìte mai nei te
reira i teie mauiui, ma te ìmiraa i te parau-tià e te tähooraa, te ani nei te
päpaì taramo e ia haamouhia te feiä i haamou ia Ierutarëma. Te faatupu ra
te reira i te mau uiraa no nià i te parau-tià a te Atua e te faautuàraa. Te naò
nei te manaò i te parauraa e, te faaroo i roto i te àti, noa atu te mauiui, e
färiu i nià i te Atua, e piiraa no roto
mai i te àau o te tuatäpapa ra i te mauiui o te hopoi-tîtî-raa, te manaònaòraa,
e te mäìmiraa i te auraa i roto i te mau huru tupuraa o te fifi.
Te faatià nei te Parareipomeno Piti, i te pene 36, ite
mau ìrava 14 e tae i te ìrava 23, i te hoê taime faufaa rahi i roto i te àamu o
te nunaa no Ìteraèra. Te täivaraa e te haaviiviiraa i te faaìteraa a te ìrava 14, Ua faaìte te
mau tahuà rarahi e te nunaa e ua täiva roa rätou i te peeraa i te mau òhipa haaìriiri
a te mau nunaa. Ua haaviivii rätou i te fare o te Fatu i Ierutarëma, tei haamoàhia.
Te mau faaaäraraa tauà-òre-hia ia au i te mau ìrava 15 e te 16, Ua tono mai te
Atua i te mau perofeta no te faaära i te nunaa mai te haamataraa mai ä. Aita rä
rätou i tauà i teie mau faaararaa, ma te faaoooo i te mau veà a te Atua e ma te
vahavaha i ta rätou mau parau. Ua òre roa te riri o te Fatu i nià i to na
nunaa. Te faautuàraa e te faatîtîraa i te faaìteraa a te ìrava 17 e tae i te ìrava
19, Ua faatià te Fatu i te arii no te Tarataio
o Nëpütäneta ia tià mai e àro ia rätou. Ua roohia te mau taureàreà, te
feiä paari, e te feiä atoà e faaea ra i reira i te òè i roto i te fare moà. Ua
âfaìhia te mau färii o te fare o te Atua i Päpuronia, e ua tutuìhia te fare
pure i te auahi e ua vävähihia. E tià mai o Turo no te faaoraraa ia au i te
ìrava 22 e te 23 I te mätahiti mätamua o Turo, arii no Peretia, ua faaära te
Atua i to na värua, Ua faaue ia Turo ia patu-faahou-hia te fare o te Fatu i
Ierutarëma i Iuta. Te haamäramarama ra teie ìrava i te täivaraa o te nunaa, te
mau faaäraraa täuà-òre-hia e te faautuàraa a te Atua, oia atoà rä te aroha o te
Atua na roto i te faaoraraa i muri iho. Te mau òto e te mau pure, ua òto te
mau Âti Iuta i te moèraa te Hiero e ua faaìte i to rätou òto na roto i te òto.
Ua tämau noa rätou i te pure e i te tiàturi i te faahoì-faahou-raa-hia mai o
Ierutarëma e te Hiero, te itoito te reira e te faaroo, noa atu te àti, ua faaìte
te mau àti Iuta i te puai o to rätou itoito rahi. Ua täpeà noa rätou i to rätou
faaroo i te Atua e ua tämau noa i te faaòhipa o ta rätou haapaòraa, noa atu e,
aita rätou i hämani i te hiero. Te mana ra rätou i nià i te haapaòraa àti Iuta.
Ua riro te haamouraahia te Hiero èi täpaò no te hopeà o te Anotau o te Hiero e te
haamataraa o te tau o te Òrometua. Ua riro te mau faanahoraa e te tahi atu mau
päpaì a te mau Òrometua ei tuhaa faufaa roa i roto i te oraraa faaroo àti Iuta.
Ua vaiihohia mai te haamouraa o te Hiero i te hoê òhipa riàrià rahi i roto i te
àamu o te mau âti Iuta, ua haapuai atoà rä te reira i to rätou itoito e to
rätou täaihonoraa i to rätou faaroo mau.
-Taramo 137, 1 I te hiti o
te mau pape i Päpuronia ra to mätou pärahiraa i raro, e ua òto iho ra mätou i
te manaòraa ia Tiona.
-2 Parareipomeno 36, 18 E te mau mea
atoà o te fare o te Atua, te mea rahi e te mea rii, e te mau taoà atoà no te
fare o te Fatu, e te taoà a te arii, e to te huiraatira atoà, ua hopoi-atoà-hia
e ana i Päpurönia.
-Èfetia 2, 8 I ora hoì
òutou i te aroha mau i te faaroo. Eere hoì ia i to òutou iho, e mea horoàhia
mai ia e te Atua.
-Ioane 3, 21 O tei haapaò
rä i te parau mau ra, e tae mai ia i te märamarama ia ìteä-maitaì-hia e, te au
ra ta na parau i te Atua.
I roto i te èpitetore a Pauro i to Efetia i te pene 2 i te mau ìrava 4 e tae i te ìrava
10, te horoà mai nei te âpotetoro o Pauro i te hoê hiòraa hohonu no nià i te
maitaì o te Atua e to na faaoraraa ia Ietu Metia. Teie te tahi mau manaò faufaa
roa no te ìteraa i to tätou huru mätamua ia au i te ìrava 1 e tae i te 3 Ua
pohe paatoà tätou i te pae värua no ta tätou mau hara e ta tätou mau hape. Hoê
ä huru to te Âti Iuta e to te mau nunaa atoà oraraa mai te au i te mau hiaai o
te tino e te mau ùmeraa a to te ao nei e ta te tiàporo. Mauti ra te aroha o te
Atua i te mau ìrava 4 e tae i te ìrava 6, Noa atu to tätou huru tupuraa
hepohepo, ua î te Atua i te aroha e te here. Ua horoà mai o Ia ia tätou i te
ora i pïhaì iho i te Metia, ua faatià ia tätou i nià, e ua tuu ia tätou i te
mau vahi o te raì i roto ia Na. Teie mau òhipa rahi, o te hotu ia o te aroha
hanahana, eiaha rä no to tätou maitaì, no te faaora ia tätou
na roto i te faaroo i te faaìteraa a te
ìrava 8 e tae i te ìrava 10 E faaorahia tätou na roto i te aroha, e na roto i
te faaroo ia Ietu Metia. E ere te reira no roto mai i ta tätou mau òhipa, ia
òre te hoê taata ia faaahaaha, ia na iho, e maitaì ra te reira no te Atua Nui
Tumu Tahi. Ua hämanihia tätou i roto i te Metia no te rave i te mau òhipa
maitaì ta te Atua i faaineine na mua roa. Te haamanaò mai nei te Efetia i te
pene 2 i te mau ìrava 4 e tae i te ìrava 10 ia tätou e, to tätou
faaoraraahia e horoà tämoni òre ia no ô
mai i te Atua ra, tei niuhia i nià i to Na aroha e to tätou faaroo ia Ietu
Metia. O tätou ta Na òhipa, tei hämanihia no te rave i te mau òhipa maitaì o te
faaìte i to Na hanahana e to Na here. Te âmuiraa i te Metia, o te hoêraa ia
aore ra te täaihonoraa no te täamu i te taata faaroo i te Metia. E ravehia te
reira na roto i te Värua Maitaì e te faaroo, i tià ai i te feiä faaroo ia färii
i te mau haamaitaìraa o te faaoraraa. Teie te tahi mau mea no te tauturu ia
tätou ia marämarama i teie manaò : Hämaniraa Âpï Ia färii anaè tätou ia
Ietu Metia ei Faaora Nui no tätou, ua hämani-âpï-hia tätou i roto ia Na. E ère
teie täatiraa no nià noa i to tätou täuiraa i rapae, no nià atoà rä i to tätou
täuiraa i roto ia tätou e te pühaparaa i roto i to tätou âau. Te âmuiraa i te
pae värua e te Metia: Ia hoê tätou e te Metia, te auraa ra, ua täamuhia tätou i
te pae värua i nià ia Na. Ua aahia tätou i roto ia Na, mai te àmaa i aahia i
roto i te vine ia au te faaìteraa a Ioane pene 15 ìrava 5. Tiàraa taata to
te Metia i roto ia tätou :
Ua täaihia to tätou iho taata i to te Metia i teie
nei. E faarirohia tätou ei feiä parau-tià i mua i te aro o te Atua no te
parau-tià a te Metia i tuuhia mai i nià ia tatou. Te tumu e te mau òhipa maitaì
i tupu i roto ia tätou, ua hämanihia tätou i roto i te Metia no te rave i te
mau òhipa maitaì. Ua faaineine è na te Atua i teie mau òhipa ia rave
tätou, ma te mäìti òre i te huru o te taata, te taata ra teie e faatea nei i te
Aroha e te Here o te Atua Nui Tumu Tahi. E tià i ta tätou mau òhipa ia faaìte i
to tätou tiàraa âpï hämanihia e te parau i roto i te Metia. Te hoêraa e te
Metia o te täuiraa ia, te hoêraa ia Na, e te piiraahia ia ora i te hoê oraraa o
te faahanahana i te Atua. I roto i te faaìteraa a Ioane i te pene 3 i te mau
ìrava 14 e tae i te ìrava 21, te faaìte nei o Ietu i te hoê haapiiraa faufaa
rahi no nià i te aroha e te here, te faaoraraa e te marämarama. Teie te mau
manaò faufaa o teie mau ìrava: Te Òfi Veo ìrava 14 e te 15 : Ua faahiti o Ietu
i te àamu o Mote i roto i te mëtëpara i te faaìteraa a Numera i te pene 21 i te mau ìrava 4 e tae i
te ìrava 9. Mai te òfi veo i faatiàhia no te faaora i te feiä i
hohonihia e te òfi, e faatiàhia e Iesu i nià i te tätauro no te faaora i te
huitaata. Te taata e tiàturi ia Ietu, e ora mure òre ia to na. Te Here o te
Atua i te ìrava 16 e te ìrava17 : Ua here roa te Atua i to te ao nei e ua püpü
mai o Ia i ta Na Tämaïti fänau tahi no te faaoraraa i te taata atoà. Aita o Ietu
i haere mai no te faahapa i teie nei ao, no te faaora rä ia na. E ärataì te
faaroo ia Ietu i te ora mure òre. Te marämarama e te pöuri i te ìrava 19 e tae
i te ìrava 21: Ua tae mai te marämarama i roto i te ao nei o Ietu no te
haamäramarama i te mau àau taata atoà. Area rä, e mea au aè na te tahi mau
taata te pöuri i te marämarama, no te mea e mea ìno ta rätou mau òhipa. Te feiä
e haa ia au i te parau mau, e haere mai i roto i te marämarama. Te haamanaò mai
nei te Ioane i te pene 3 i te mau ìrava 14 e tae i te ìrava 21 ia tätou e, e
mea faufaa te faaroo ia Iesu, te here o te Atua, e te marämarama o te Metia no
te ora mure òre. Te tiàturiraa ia Ietu, o te hoê ia òhipa faaroo hohonu. Teie
te tahi mau taahiraa no te tauturu ia tätou ia tiàturi ia Ietu :
A ìmi i te parau mau :
A rave i te taime no te haapii i te mau haapiiraa a
Ietu i roto i te mau Èvaneria.
A taiò i te Pîpîria e a ìmi o vai o Ia, e aha ta Na i
haapii, e e mea nahea o Ia i te oraraa. A pure e a ui :
A tüturi e a pure i te Atua, te Metua o to tätou värua,
mai te mea ra e o Ietu ta Na Tämaïti.
A tiaì, a rave i te taime no te faaroo e no te putapü.
A fäì i ta tätou mau hara :
A färii i ta tätou mau hape e a ani i te tauturu a te
Atua ia täui. E mea faufaa rahi te tätarahapa no te tiàturi ia Ietu.
Marämarama i te tutia a Ietu :
Ua pohe Ietu Metia no ta tätou mau hara.
A färii i teie tutia ei täpaò no te here e no te
faaoraraa.
A ani manihini ia Ietu i roto i to tätou àau :
Na roto i te pure, a ani ia Ietu ia tomo mai i roto i
to tätou oraraa.
A ani ia Na ia riro èi Faaora e èi Fatu no tätou.
A haa mai te hoê Mäòhi maitaì. Ia tiàturi anaè
tätou ia Ietu, a ora mai te au i ta Na mau haapiiraa.
A here i te Atua e a here i to taata tupu.
Te faaroo ia Ietu, e tere ia no te taata iho. A rave i
te taime no te tupu i te rahi i roto i to tätou auraa ia Na e ia ìte i to Na
maitaì e to Na here.
Pehepehe.
Te here fäito òre
I nià i te raì fetià, i reira te ìriatai e tärava ai,
E tupu te here o te Atua, ma te rahi e te teitei.
Mea âano aè o Ia i te moana, hohonu aè i te àpoo,
Te hoê muhumuhu maru i roto i te mataì, te hoê fetià o te ora mai.
Tei reira oia na mua aè i te hora,
Na mua aè i te âahiata mätamua, Ma te täamu i te mau
taura ite-òre-hia,
Te mau taura o te haapau ia tatou. Ua hämani o Ia i te
ao nui märeàreà, te mau fetià atoà,
Te mau àihere atoà, e i roto i teie hohoà rahi te
faataa nei o Ia i to tatou hopeàraa.
Te here o te Atua o te hoê ia auahi o te haapau i to
tätou mau fifi,
O te tüpohe i ta tätou mau hara, to tätou mau tätarahaparaa,
To tätou mau mataù faufaa òre. E faateitei Oia ia
tatou, E faatäui ia tätou,
E faatiàmä ia tätou e e marämarama, mai te mau manu e
rere e tae atu i te mure ore.
Tei reira o Ia i roto i to tätou mau roimata, i roto i
to tätou mau taì muhu òre,
I roto i to tätou mau òaòaraa, to tätou mau òto, ta
tätou mau moemoeä.
E toro mai o Ia i to na rima ia tätou a turori noa ai
tätou i te pö,
Ma te ärataì ia tätou i te marämarama, i te âahiata e
ànaana mai nei.
E hoà te here o te Atua, e òhipa huru ê roa, e horoàhia
ma te fäito òre,
Ma te tïtauraa òre, ma te òre e fäito i te pö.
Ua amo o Ia i ta tätou mau hopoià i nià i te tätauro,
no te here fäito òre,
Ia tià ia tätou ia tiàmä, ia ora tätou i roto ia Na.
No reira, e faateitei na tätou i to tätou âau i nià i
te raì fetià,
E mata na tätou i te pähono i teie here, te pehe
nehenehe roa aè i himenehia.
No te mea, i roto i te here fäito òre o te Atua e
ìtehia ia tätou te täviri,
Te täviri o te ìriti i te mau ùputa o te aroha e te
here, o te mure òre.
Ia haati noa mai teie here fäito òre ia tätou e ia
ärataì noa ia tätou.
Chant.
Incommensurable.
(Refrain)
L'amour
de Dieu est incommensurable,
Plus
profond que l'océan, plus haut que le ciel.
Il
est plus grand que tout ce que nous pouvons imaginer,
C'est
l'amour de Dieu qui ne finit jamais.
1.
Dieu,
ton amour est comme un océan sans fin,
Ton
pardon est aussi vaste que le ciel.
Dans
les moments de doute, dans les moments de peur,
Ton
amour incommensurable est toujours là.
(Refrain)
2.
Dans
la joie et dans la peine, dans la lumière et dans l'obscurité,
Ton
amour, Seigneur, est notre guide.
Aucun
amour sur terre ne peut se comparer,
À ton
amour incommensurable, notre abri.
(Refrain)
3.
Dieu,
ton amour est une source d'espérance,
Un
phare dans la nuit, notre consolation.
Dans
ton amour, nous trouvons notre paix,
Ton
amour incommensurable, notre salut.
(Refrain)
Teraì òr. Faatura.
