Märeto 7.31-37 Hämani Faahou.

Täpati 09 no Tetepa 2018.

Hämani Faahou.

Taramo 146

1 E haamaitaì i te Fatu A haamaitaì i te Fatu, e ta ù värua 2 E haamaitaì au i te Fatu, òi vai aè to ù ora e himene au i ta ù Atua, òi vai aè au nei.3 Eiaha e tiàturi i te hui-arii, e te taata atoà, aita hoì o na e ora. 4 Te reva nei hoì to na värua, te hoì nei o ia i to na ra repo, mou roa atu ra ta na i ôpua i taua mahana ra.5 E ao to na tei te Atua o Iatöpa te tauturu ia na, e tei to na Atua, tei te Fatu to na tiàturiraa 6 O tei hämani i te mau raì e te fenua, te tai e te mau mea atoà i roto ra; o tei haapaò i te parau mau na na e a muri noa atu. 7 O tei faatià mai i te feiä i hämani-ìno-hia, e ua horoà mai i te mäa na tei poìa ra. O te Fatu tei tätara i tei täpeàhia ra, 8 o te Fatu tei faaaraara i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra. 9 Te faaora nei te Fatu i te mau taata èê ra, te tauturu nei o ia i te ôtare e te vahine ìvi ra âreà te haereà o te paieti-òre ra, e huri-ê-hia ia. 10 E vai arii mai ä te Fatu e a muri noa atu. O to Atua, e Tiona, e tae noa atu i te mau uì atoà ra. Hareruia.

Ìtaia 35.4-7

4 E parau atu òutou i te âau taiä, Ia itoito òutou; eiaha e mataù; inaha hoì to òutou Atua. E faaìtehia mai ä te riri; te tähoo a te Atua ra o ia iho te haere hua mai e faaora ia òutou. 5 Ei reira e faaaraarahia ai te mata o te matapö ra, e àmaha hoì e te tarià o te feiä tarià turi ra 6 ei reira te piriòì e ôuàuà noa ai mai te àiri, e himene mai hoì te vaha o te taata vävä ra e püpü mai hoì te pape na te mëtëpara, e te pape tahe i te fenua marô ra. 7 E riro te one veàveà ra ei pape hopuna, e te repo marô ra ei pape pihaa anaè e ei te pärahiraa o te teni ra e tupu ai te âretu, e te âèho, e te tima ra.

Iatöpo 2.1-5

E ara i te òhipa paetahi

1 E aù mau taeaè ra, eiaha òutou e mau i te parau a to tätou Fatu ra a Ietu Metia, te Fatu o te hanahana ra, mä te haapaò i te huru o te taata. 2 Ia haere mai hoì te hoê taata i roto i to òutou tunato, mä te täpeà àuro i te rima e te àhu ùnaùna ra; a tomo atoà mai ai te hoê taata taoà òre mä te àhu ìno ra 3 ìte atu ra òutou i tei àhu i te àhu ùnaùna ra, e ua parau atu ra ia na e E pärahi òe i ô nei i te vähi maitaì, a parau atu ai i te taata taoà òre ra Tià noa atu òe i ô atu, e aore ia, e pärahi i ô nei i ta ù tïroaroaraa âvae nei. 4 Eere änei ua faahuru ê òutou, e ua riro ei feruri manaò ìno ra 5 A faaroo mai na, e aù mau taeaè here e eere änei o te feiä taoà òre o teie nei ao ta te Atua i mäìti ei feiä taoà i te faaroo ra, e ei feiä âià i te Pätireia ta na i parau e horoà mai i te feiä e hinaaro ia na ra?

Märeto 7.31-37

Te faaora-raa-hia te taata turi-vävä

31 Faaruè iho ra o ia i te ôtià i Turia e Titona, hoì atu ra i te roto i Tarirea ra, nä roto i te fenua ra o Tetapori. 32 Ua arataì mai ra rätou i te hoê taata turi vävä ia na ra. Ua parau maitaì mai ra ia na ia tuu o ia i ta na rima i nià iho. 33 Ua rave atu ra Ietu ia na ôpapaì aè ra i te hiti, tuu atu ra i ta na rima i roto i to na tarià, ua tufa iho ra o ia i te huare, e ua faatiàià atu ra i to na arero. 34 Ua hiò atu ra i nià i te raì, òto iho ra, e ua nä ô atu ra ia na Êfäta (o te faaauraa ra «Ia àmaha» 35 Àmaha iho ra ta na tarià, matara aè ra to na arero, maitaì mai ra ta na parau i reira ra. 36 Ua aò atu ra o ia ia rätou, e eiaha roa rätou e faaìte i te taata, e ia rahi ta na aòraa atu ia rätou e eiaha, rahi roa atu ra ta rätou faaìte haere; 37 mäere roa atu ra rätou aita e fäito, e ua nä ô aè ra E mea tià roa te mau mea atoà ta na e rave nei Te faaroo nei te turi e te parau nei te vävä ia na.

Manaò.

I mua i teie mau taiòraa tore maha e mau reni ärataì teie no te mau manaò tei  tupu i roto i te mau tau taaê hoê ra vahi e faanahohia ra, ta te ôpuaraa faaora e tïtau ra i te haamaitaìraa a te Atua Nui Tumu Tahi. Mai te anuanua ra e tore i nià i te raì, e anuanua rahi änei, e tape anuanua noa änei ; hoê noa änei, e piti änei ; aita te mata o te tahi e täuà atu ra ; te ìte atu ra te tahi i te täpaò no te tahi mea maitaì ; te hiò ra te tahi i te rahiraa uri, te püai o te àma, aore ra te teatea o te anuanua ; te uiui ra te tahi i te tumu i puta mai ai i terä vähi aore ra i terä, i teie taime aore ra i te tahi atu taime, e te mea i moè atu ai. Eita e hope te manaò e te uiuiraa a te taata i mua i te tahi anuanua, a tini e a mano tini noa ai to na ìteraa, aita e räveà te anuanua e tahitoraa ai i mua i to na mata, te manaò hoì e te hiòraa a te taata, te mau ù e tore ra èita e ânoì te tahi i te tahi tei haafanahia tei  faaàmahia e te mau hihi o te mahana ta te töriri päpe ua e faatore ra na ù e hitu, tei haamata i nià i te fenua tei hope i nià i te fenua. Mai te ùru o te hoê tumu ùru, te faaâpï noa ra, aita e faaearaa. Oia atoà te mau parau o tätou taiòraa no teie mahana tei faaìte i te here te aroha, mai te tau a uìuì mai e inaa nei, aita atoà tätou i ìte aè nei i te taata i te pauraa to na manaò i nià i te reira parau. Te tupu nei e te pohe nei te tumu  ùru, te here te aroha rä, mai te rauère ùru të òre e puru i te pape, mai te reira atoà te tau i te heeraa nä nià ia na, no te mea te Atua Nui Tumu Tahi iho te reira. Te mau parau ia ta tätou e färerei nei i roto i teie mau taiòraa ia au i te mau faaìte a te,

-Taramo 146, 2 òi vai aè to ù ora e himene au i ta ù Atua

-Ìtaia 35, 4 E faaìtehia mai ä te riri; te tähoo a te Atua ra o ia iho te haere hua mai e faaora ia òutou.

-Iatöpo 2, 1 te Fatu o te hanahana ra, mä te haapaò i te huru o te taata.

-Märeto 7, 32 Ua arataì mai ra rätou i te hoê taata turi vävä ia na ra.

Te vähi ta te manaò e hinaaro ra i te parau, teie ia te vai noa ra te âanoraa e te rauraa o te mau vähi e tano te manaò e hiò i te mau faaòhiparaa o teie mau parau, eita te reira e hope ia tätou. Ia rave te manaò i te tahi hiòraa no roto i to tätou oraraa, e nä ô ia teie manaò e, eere no te mea ua haapiihia vau i te tunu paa i te ùru, e manaò ai au e, tirä rä huru àmuraa i te reira mäa. Te ìte maitaì ra tätou i te naìnaì o te reira huru manaò e te rahi te ère o te taata tei òre i färii i te tahi atu huru raveraa. No reira te Taramo i haamaitaì ai i te Atua i te parauraa e, 2 òi vai aè to ù ora e himene au i ta ù Atua.

Ia parauhia te parau o te ora, e haamanaò noa ia tätou e, te Atua iho te reira, ua ìte atoà ia tätou e, eita te Atua e ö i roto i te paruparu o ta tätou parau. E parau teie no te taata atoà, mai te hiò òre i te huru o te taata, eiaha mai te mea e, te vai ra te feiä e tano e parau, e te vai ra te feiä të òre e tano e parau. Ia manaò tätou e, no te täne noa te ora, no te vahine noa, no te taata hoê noa èita roa ia, ia na reira anaè ra, mea maitaì aè ia i te mämü noa, e manaò hape roa te reira. Eere tätou te haamataraa, eere hoì o ia te faahopeàraa o teie parau i vai na te ora, e vai ä te ora mai tei ìtehia i te tau a uìuì, e të ìtehia i te tau a muri atu, e parau ihoä teie no te taata, e parau hoì no te Atua. Eere no te mea te ora ra te tahi taata i teie parau, e mau ai te tereraa o te mahana, no te mea te täpura òhipa a te taata atoà, te âfaìraa ia i te mähanahana i roto i te âau o te taata atoà te rahi mau nei te taata e hinaaro nei e të tiaì nei i te mahanahana o te mau hihi o te ora. Te parau ia ta Ìtaia e faahiti nei, 4 E faaìtehia mai ä te riri; te tähoo a te Atua ra o ia iho te haere hua mai e faaora ia òutou. Ia parau o Ìtaia mai teie huru no te faaìte i te hohonuraa o te here o te Atua i te taata mai te täura pito o te pü  fenua ra te huru. I te mea te haapaò nei te Atua i te huru o te taata tei turäma i te èà e tae ai i te ora i faataahia ia hanahana te Atua Nui Tumu Tahi. E manaò faufaa roa te tià ia tätou e täpeà mai i roto i teie parau e haere hua mai e faaora e huru teie no te metua, te manaò ia e horoàhia ra e teie parau no te faaora, mai te püfenua rä oia te iho tumu, te taura mutu òre o te ora i haamata mai i roto i te fenua, e ta te tamarii e ìte ra i te faufaa ia hoì tämau noa mai no te faaîraa ia na i taua ora ra. Mai te ora i nä roto na i te metua vahine i te haere i roto i te tamarii nä roto i te taura pito, nä roto i te faahoìraahia te püfenua i roto i te fenua, te metua vahine o te taata, te nä roto atoà ra te Atua i te taura pito i te horoà mai i te ora i roto i te tamarii, nä roto i te metua vahine, oia te fenua. Ia faaroo tätou i te manaò o Iatöpo e parau rä, 1 te Fatu o te hanahana ra, mä te haapaò i te huru o te taata. Te haapaò, te huru ia o te taata e rave i ta na òhipa mä to na âau atoà, to na manaò, e to na püai. Aita rä e taata e tano e haapaò i te hinaaro o te Atua mai te peu aita o ia i ìte i te mea ta te Atua i hinaaro mai ia na ia rave, e mai te peu aita o ia i here i te Atua. Te here te  mätamua i roto i te faatupuraa i te hinaaro o te Atua, ia òre, e rave noa te taata mai ta na e haapaò ra i te ture. I roto i te haapaòraa i te hinaaro o te Atua, ia ara atoà tätou, o te manaò tätou i to tätou au òre, to tätou tüàti òre i te tahi mau parau e, te tüàti òre atoà ia o te Atua, e te ìmiraa i te räveà ia òre te taata ia pee i te mea tei òre i au i to tätou manaò, te faatupu ra ia tätou i te hinaaro o te Atua. Mai teie turi vävä  i te faaìteraa a Märeto, 32 Ua arataì mai ra rätou i te hoê taata turi vävä ia na ra. Ua piri na ùputa e piti no te parau, no te faaroo, e no te òrero. I muri aè i to tätou hiòraa mai i te tuhaa no na reni e maha a te taata i te Atua ra, e hiò mai tätou i te hinaaro o te taata i te Atua. Eere ihoä na te taata i faanaho i te täpura o te mau mea ta na e hinaaro ra i te Atua, na te Fatu te reira i haapaò mai. Ia hiòhia, ua huru fäito noa te rahiraa òhipa ta te taata e rave no te Atua, i ta na e ani nei i te Atua no na. I roto i te arataìraa a te taata, ua faaea noa Ietu i nià i te mea faufaa, oia te mau mea e òre ai te taata e topa i roto i te hepohepo e te fifi, Teie te reo o te taata, ia tuu o ia i ta na rima i nià iho. Ua rave o Ietu ia na ôpapaì aè ra i te hiti, tuu ta na rima i roto i te tarià, ua tufa i te huare, e ua faatiàià i to na arero. Ua hiò i nià i te raì, ua òto,  nä ô aè ra Êfäta te faaauraa ra Ia àmaha ua Àmaha te tarià, matara te arero, maitaì mai ra te parau. Te parau a Ietu, eiaha roa rätou e faaìte i te taata, ua rahi ta na aòraa ia rätou e eiaha, rahi roa atu ra ta rätou faaìte haereraa aita e fäito, e ua nä ô aè ra E mea tià roa te mau mea atoà ta na e rave nei Te faaroo nei te turi e te parau nei te vävä ia na. No te here o Ietu i te taata ua hämani faahou te tärià te mea i òre i te taata i te hämani, e ua faatiàià i te huare i nià i te arero oia hoì ua haapahara noa te huare. Mai te peu e hiò te taata i te âpaparaa o to na mau hinaaro, e riro ihoä ia o ia i te peàpeà rii i te manaòraa i te mau mea i moèhia ia na i te parau no te mea aita e vähi e ö ai te reira i roto i teie òhipa i  ravehia e Ietu. Mai te peu rä e hiò o ia i teie hämani faahouraa mai te tahi faahanahanaraa i te Atua, ua ìte atoà ia o ia e, òre noa atu ai i roaa ia na i te parau, ua ìte ê na te Atua i te mau mea ta na i hinaaro.

Teraì òr. Faatura.

PUTARIÀ

Täpati 02 no Tetepa 2018.

PUTARIA

ÔROÀ

Mätahiti Ètärëtia.

Taramo 15 

1 Taramo na Tävita. O vai, e te Fatu, të tiàhapa i to òe ra tëtene. O vai të pärahi i to mouà moà ra. 2 O te taata haereà piò òre, o tei haapaò i te parau tià ra, o tei parau i te parau mau i roto i to na ra âau. 3 O tei òre i ôhumu to na arero, o tei òre i hämani ìno i te taata tupu ra, o tei òre i färii i te parau ìno i to na tauà. 4 O tei vahavaha i te taata parau faufau ra, e faatura rä i te feiä i mataù i te Fatu, o tei tapu atu, ìno noa ai o ia iho ra e aore e tähema ra. 5 O tei òre i tuu i ta na moni i te tärahu ra, o tei òre e rave i te tärahu ei faahapa i te taata hara òre ra. O tei nä reira i te rave i taua mau parau nei, e òre roa e âueue.

Teuteronomi 4.1-8

1 E teie nei, e Ìteraèra, e faaroo mai i te mau haapaòraa e te mau ture ta ù e haapii atu ia òutou nei, e e rave ia ora òutou, ia tae òutou i nià iho e ia noaa te fenua, ta te Atua o to òutou mau metua, ta te Fatu e höroà mai no òutou. 2 Eiaha òutou e täati noa mai i te tahi vähi ê i teie nei parau ta ù e parau atu ia òutou, eiaha hoì òutou e haamaìri i te tahi vähi i taua parau nei; ia haapaò hoì òutou i te parau a to òutou Atua ra a te Fatu, ta ù e parau atu ia òutou nei.3 Ua ìte hoì to òutou mata i ta te Fatu i rave i te hara ia Paara-peora ra; ua hope roa hoì te mau taata atoà i roto ia òutou i pee ia Paara-peora i te pohe i to òutou Atua ra i te Fatu; 4 âreà o òutou o tei àti mäite i to òutou Atua ra i te Fatu, te ora nei òutou atoà i teie nei mahana. 5 Inaha, ua faaìte atu vau ia òutou i te mau haapaòraa e te ture, ta ta ù Atua ta te Fatu i faaìte mai ia ù ra ei haapaòraa na òutou i te fenua ta òutou, e tii e rave nei ei pärahiraa. 6 E tënä na, e haapaò maitaì i taua parau ra, e e rave; o to òutou ia paari e te haapaò maitaì i mua i te aro o te feiä e ìte i teie nei mau haapaòraa, e riro ia i te parau e, Tiàraa nünaa rahi paari e te haapaò maitaì o taua feiä ra. 7 Tei hea hoì ia fenua rahi e fätata mai to rätou atua ia rätou, mai to tätou Atua ra mai i te Fatu e fätata mai ia tätou nei, ia tiàoro noa atu tätou ia na? 8 E tei hea ia fenua rahi i tià ta na mau haapaòraa e te ture, mai te tià i teie atoà nei ture ta ù e tuu atu i mua i to òutou aro i teie nei mahana ?

Iatöpo 1.17-27

17 Te mau mea maitataì i hö-mai-hia, e te mau mea tià roa e maitaì roa ai, no nià ia, mai nià mai ia i te Metua o te märamarama, aore roa e hirohirouri ia na ra, aore hoì e huru-ê-raa e vähi iti noa aè. 18 Na na tätou i fänau i te parau mau ra, no to na iho hinaaro, ia riro tätou mai te òho mätamua o te mau mea i hämanihia e ana ra.

Faaroo e faaòhipa

19 E teie nei, e aù mau taeaè here e, ia rü te taata atoà i te faaroo, ia haere mäine i te parau, ia haere mäine hoì i te riri; 20 e òre hoì te riri o te taata nei e faatupu i te parau tià a te Atua. 21 E tënä na, e tuu ê atu i te mau mea faufau ra, e te mau ìno rarahi atoà ra, a färii mäite ai mä te marü i te parau haamauhia i roto ra, e ora ai to òutou värua. 22 Ei feiä rave hoì òutou i te parau nei, eiaha ei feiä faaroo noa, i te haavare-noa-raa ia òutou iho. 23 O te taata hoì i faaroo noa i te parau, e aore o ia i rave, e au o ia i te taata e hiò noa i to na iho mata i roto i te hiò ra. 24 Te hiò ra hoì o ia ia na iho, e haere atu ra, àromoè noa iho ra to na huru ia na iho i reira ra. 25 O të hiò rä i roto i te ture tià roa o te tiàmä ra, mä te tämau mäite, no te mea eere o ia i te taata e möina noa te parau ia faaroo ra, e taata rave rä o ia i taua òhipa ra, e haamaitaìhia ia o ia i ta na ra raveraa. 26 Te manaò ra te hoê taata i roto ia òutou, e e paieti to na, e aore i täpeà i to na vaha, te haavare ra rä i to na iho âau, e paieti haavare to na. 27 O te paieti mau e te ìno òre i mua i te aro o te Atua, o to tätou Metua ra, o teie ia o të hämani maitaì i te ôtare e te mau vahine ìvi i to rätou ra àti, e të tiaì maitaì ia na iho, eiaha ia viivii i teie nei ao.

Märeto 7.1-23

Te haapiiraa a te feiä tahito ra (Mät 15,1-9)

1 Ua haere mai ra te mau Färitea, e o e toofanu mau päpaìparau no Ierutarëma mai, ia na ra. 2 E ia hiò mai rätou i te tahi pae pipi a ana ra i te àmuraa i te mäa mä te rima viivii, oia hoì te rima horoi-òre-hia ra, ua faaìno mai ra. 3 E haapaò hoì te mau Färitea e te âti-Iüta atoà i te peu i tuua mai e te feiä tahito ra, e òre e àmu noa i te mäa, e mata na rä i te horoi mäite i te rima. 4 E ia hoì mai rätou mai te hooraa ra, ia òre rätou ia horoi ia rätou iho e òre rätou e àmu. E rave rahi ä ta rätou peu i tuuhia mai ta rätou e haapaò, mai te horoiraa âuà ra, e te päni ra, e te mau âuà veo ra, e te mau àmuraa mäa ra. 5 Ua ui mai ra te mau Färitea e te mau päpaìparau ia na. E aha to mau pipi nei i òre i haapaò ai i tei tuuhia mai e te feiä tahito ra, i àmu ai hoì i te mäa mä te rima horoi-òre-hia ra. 6 Ua parau atu ra o ia ia rätou, nä ô atu ra, E te mau haavare e, te au mäite na òutou i ta Ìtaia i parau mai ia òutou na, a nä ô mai ai o ia ra e Te faatura mai nei te vaha o teie nei feiä ia ù âreà to rätou âau ra tei te ätea ê ia.7 E haamoriraa faufaa òre rä ta rätou ia ù, tei haapii rätou i tei tuuhia mai e te taata anaè ra. 8 Ua haapae hoì òutou i te parau a te Atua, e te täpeà nei i tei tuuhia mai e te taata, mai te horoiraa päni, e te mau âuà ra, e rave rahi hoì te peu mai te reira te huru ta òutou e rave nei. 9 E ua nä ô atu rä o ia ia rätou, Faaòre tià ä òutou i ta te Atua ra parau, ia ö mai ta òutou parau i tuuhia mai ra. 10 I parau mai hoì Möte e, E faatura i to metua täne e to metua vahine, e O tei faaìno i te metua täne e te metua vahine ra, e täparahi-pohe-roa-hia ia. 11 Te parau na rä òutou, Ia parau te taata i ta na metua täne e ta na metua vahine Ia Torepana oia hoì ia haamoàhia, ta ù atoà nei taoà e faufaahia ai òe na, 12 eiaha o ia e turu noa atu i ta na metua täne e ta na metua vahine i reira i ta òutou. 13 I te faaòreraa i te parau a te Atua i ta òutou parau i tuuhia mai i haamauhia e òutou na. E e rave rahi ta òutou mea e rave nei mai te reira te huru.

Te viivii o te taata

(Mät 15,10-20)

14 Ua parau atu ra o ia i taua feiä rahi atoà ra ei pïhaì iho ia na ra, ua nä ô atu ra ia rätou A faaroo mai òutou atoà na ia ù ia ìte 15 Aita roa o räpaeàu nei e viivii ai te taata ia ö i roto. O te mau mea rä no roto mai i te taata, o te mea ia e viivii ai o ia. 16 O te taata e tarià to na ei faarooraa, a faaroo mai o ia 17 E ia haapaì mai ra o ia i roto i te fare, ia vaiiho atu i taua mau taata ra, ua ui atu ra ta na mau pipi ia na i te auraa i taua parau ra. 18 Ua parau mai ra o ia ia rätou Te vai ìte òre atoà na òutou, Aita òutou i ìte e, o to räpaeàu nei ia ö i roto i te taata ra, e òre o ia e viivii i te reira, 19 no te mea aore i ö i roto i te âau manaò, i roto rä i te ôpü i te vähi e taa ai te ìno o te mäa ra e faaruèhia atu ra i räpae 20 E ua nä ô atu ra o ia O te mea no roto mai i te taata ra, o te mea ia e viivii ai te taata. 21 No roto mai hoì i te âau taata te manaò ìno, te faaturi, te poreneia, te täparahi taata, 22 te èiä, te nounou taoà, te feìi, te haavare, te tiàâ, te miimii, te faaìno, te teòteò, e te äoaoa 23 no roto anaè te reira mau mea ìino, o te mea ia e viivii ai te taata.

Manaò.

E maha tau ìrava i manaòhia èi arataìraa te rahi o te mau parau e faahitihia ra i roto i teie mau taiòraa, maite mea ra e, ua püòi noa te ôpuaraa faaora a te Atua Nui Tumu Tahi, èi faaìteraa i te ture e tiàma ai te taata i ta te parau tià türamaraa i te nünaa. Te ani noa ra te Atua i te taata ia färii i te huru ta na i horoà no te taata, ia òre o ia ia ìmi i te räveà täpoìpoì, te huna, aore ra te faahuru ê, no te mea e taoà horoà te reira na te Atua ia na. Mai te Atua tei òre i ìmi i te räveà faahuru ê i te mea tei anihia te taata ia rave no na, ia au i te hohoà no te rahu e faaìte noa ra i te here e te aroha , eita atoà te Atua e hinaaro i te taata ia faahuru ê i te mea ta na i faataa no te taata, eiaha atoà rä hoì te taata e manaò e, e tiàmäraa atoà no na te faahuru-ê-raa i te ôpuaraa a te Atua. No reira, tei haamä i te ôpuaraa a te Atua, tei riro o ia ei tupuraa, e haamä atoà te Atua ia na, e e faahaamä hoì ia na ; tei färii poupou rä i te reira, e popou atoà te Atua ia na, e ua riro te reira ei parau tià na na i mua i te Atua, e ei hanahana no na, mai te hanahana o te taata e amo ra i to na tiàraa nünaa. E nä ô ia tätou e, te täviniraa mätamua roa ta te Atua e tïtau mai nei ia tätou, te färiiraa ia i to tätou mäòhiraa mai te tahi täpaò ta te Atua i tuu i nià ia tätou e ìte ai o ia i to na mau taata. Te märamarama atoà ra ia tätou e, tei haapae i te reira, e òre te Atua e ìte mai ia na. E au maitaì ia teie mau parau tei täpeàhia i te faaìteraa a te,

-Taramo 15, 5 O tei nä reira i te rave i taua mau parau nei, e òre roa e âueue.

-Teuteronomi 4, 6  Tiàraa nünaa rahi paari e te haapaò maitaì o taua feiä ra.

-Iatöpo 1, 25 O të hiò rä i roto i te ture tià roa o te tiàmä ra, mä te tämau mäite

- Märeto 7. 16 O te taata e tarià to na ei faarooraa, a faaroo mai o ia.

Ia au i teie mau tumu parau e faaìtehia ra, te taata ta te Atua e hinaaro, ei taata ia tei âueue òre,  tei haapaò maitaì tei hinaaro i te ture a Te Tumu Nui,  e te tarià faaroo, e parauhia teie taata, to na PUTARIA, e to na manaòraa i te ruì e te ao tei te Atua Nui Tumu Tahi ia te vairaa. E au o ia i ta te Taramo e faaìte ra, O vai, e te Fatu, të tiàhapa i to òe ra tëtene. O vai të pärahi i to mouà moà ra. 2 O te taata haereà piò òre, o tei haapaò i te parau tià ra, o tei parau i te parau mau i roto i to na ra âau. Te hohoà ta te päpaì taramo e tuu mai ra i mua ia tätou, te tahi taata tei faararihia to na âau i te parau tià e te parau mau, tei rari noa to na âau, tei òre to na tupu i taui noa aè, e tei òre atoà i taui to na hotu. Teie rari, te ture ia a te Atua, oia te parau a te Atua tei riro ei manaòraa na te taata i hinaaro ia na i te pö e te ao. Eita tätou e fifi i te märamaramaraa e, te taata i faanaho i to na Pütarià ia hanahana te Atua i ta na  ìmiraa, e hanahana te Atua i roto i ta na mau ôpuaraa. 5 O tei nä reira i te rave i taua mau parau nei, e òre roa e âueue. Te taata rä tei faaea fätata e tei ora tämau i roto i te parau, ua horoà te parau ia na i te haapiiraa e tano atoà ai o ia e taiò i te mau mea të òre te mata o te tahi atu e ìte, mai te reira atoà te tarià ia faaroo. Te auraa, aita e ùputa eita e matara i te faaroo, e tae noa atu i tei òre i manaòhia e tätou. Te reira mau atoà rä te vähi tätou i fifi ai, no te mea ua mätau roa tätou i te faaea fätata noa i te mau vähi ìtehia e tätou, te vai noa ra i roto ia tätou te mataùtaù i te haere nä te mau vähi ìte-òre-hia e tätou, e inaha, te tanoraa mau, aita e ôtià, aita e ùputa të òre e matara i te faaroo, e tae noa atu i te ora, ia na reira tätou e noaa te î e te paari i te faaroo. Ia au i te mea ta te Teuteronomi e faahiti ra, Tiàraa nünaa rahi paari e te haapaò maitaì o taua feiä ra. Tei roto i te paari o te faaroo e riro ai te Putarià i te hinaaro tumu i te Atua Nui Tumu Tahi, no te mea te faahitihia ra te parau o te haapaò maitaì, e te maitaì hoì ra, o te Atua ia, teie atu ra ia te auraa o te mea e parauhia ra, ia tiàturi te taata i te maitaì, e faaìte te maitaì i te taata i te Atua, te reira te òhipa ta te maitaì e rave no te taata. E taua maitaì ra ta te fenua ia e faaìte noa ra, te mea ia tätou i parau noa ai e, no to rätou tiàturi rahi i te fenua, ua ìte ê na to tätou mau tupuna i te Atua, no te mea to rätou Putarià tei fenua ia. Te mea mau te reira ta te Atua e hinaaro ra i te taata ia ìmi faahou, oia hoì ia ìte-faahouhia ia na to na huru atua. 25 O të hiò rä i roto i te ture tià roa o te tiàmä ra, mä te tämau mäite. Te hinaaro ra te Atua ia riro ta na ture èi Putarià ei manaòraa tämau na te taata i te pö e te ao. Ia faahiti tätou i te parau o te taata faaroo, aore ra te taata faaroo òre, no te haamanaò ia e, te vai ra te taata haapaò, e te taata haapaò òre, aita roa atu rä e parauhia ra e, e tarià maitaì, oia hoì e tarià faaroo to te tahi, e tarià maì to te tahi. Te auraa, aita te manaò i nià i te òhieraa, aore ra te täupupuraa te parau i te ö i roto i te tarià o te tahi, aore ra te tahi, tei nià rä te manaò i ta räua haafaufaaraa, aore ra ta räua haafaufaa-òre-raa i te parau i tae ia räua ra. Te taata haapaò, e taata ia tei ìmi tämau i te räveà ia riro te mea i parauhia ei òhipa ; âreà te taata haapaò òre, no te mea aita i mau mai ia na te mea i parauhia, e aha o ia e manaò ai i te òhipa e rave, ta na noa i ìte, te òhipa ia e mauruüru ai o ia. Ta Ietu e parau nei i ta na mau pipi, 16 O te taata e tarià to na ei faarooraa, a faaroo mai o ia. Ia parau o Ietu mai teie te huru, no te faaìte ia ua ätea te taata i te hinaaro o te Atua. E parau no te ora teie e faatupuhia ra i te tïtauraa ia vai te parau i roto i te tarià. Òre noa atu ai te maniania e faaroohia, te riro atoà nei te faaroo ei täpaò no te ora. Te reira te mea e ìtehia ra i ta Ietu i faatupu, i roto teie reo. Te parau o te aroha e te here, teie ta Ietu e hinaaro nei ia riro ei Putarià e ìtehia ai e mau taata teie no te Atua i mua i te mau taata eere no te Atua te faaroo e parau tumu teie i roto i ta na mau pororaa, aore e ta na faaìteraa tumu. E tano teie  parau ia faaäuhia i te tiàraa o Ietu ei Tamaiti na te Atua, òre noa atu ai i riro ei faaìteraa tumu na na e, e Tamaiti o ia na te Atua, nä roto rä i te mau parau ta na i parau, te mau òhipa hoì ta na i rave, te mea te reira ta te taata i märamarama. I ô nei, te mea faufaa, eere te mea i parauhia, te mea rä tei riro te parau ei räveà faaìteraa. Te ìte ra ia tätou e, aita te faaroo i riro noa ei täpaò tei hope to na parau i nià ia na iho. Nä roto ra i to Ietu haapäpüraa i roto i te parau, te faaâpï nei o ia i nià ia na i te òhipa i haamauhia mai e te Metua i te ìritiraa mai i te ora mai roto mai i te märamarama, i te haapäpü-faahou-raa e, ua tuu mai te Atua i te ora i roto i te fenua. Nä roto i te tomoraa i roto i te märamarama, te hope roa nei te mea ta Ietu i parau e, 6 Ua parau atu ra o ia ia rätou, nä ô atu ra, E te mau haavare e, te au mäite na òutou i ta Ìtaia i parau mai ia òutou na, a nä ô mai ai o ia ra e Te faatura mai nei te vaha o teie nei feiä ia ù âreà to rätou âau ra tei te ätea ê ia.7 E haamoriraa faufaa òre rä ta rätou ia ù, tei haapii rätou i tei tuuhia mai e te taata anaè ra. 8 Ua haapae hoì òutou i te parau a te Atua, e te täpeà nei i tei tuuhia mai e te taata, mai te horoiraa päni, e te mau âuà ra, e rave rahi hoì te peu mai te reira te huru ta òutou e rave nei. Eiaha no te mea e, te hinaaro nei Ietu e täpiti i te rahu, oia te òhipa ta to na Metua i rave mai, te haapäpü ûàna nei rä o ia e, ta te Metua i hinaaro i te taata ia ìte mai, ta na atoà ia e faaìte, mai teie atu, ei hanahana no to na Metua.

Ia riro noa tätou èi PUTARIA no te mau hinaaro o te Atua Nui Tumu Tahi, te ö nei tätou i roto tau Ètärëtia no te mätahiti 2018-2019 no na tau e maha, 1) Mau tiaìraa, te Fänau, Te mätahiti âpï, 2) Tïtauraa, ìmi manaò, mau tiàraa 3) Haapaeraa maa, Te mau âti, te pohe, tiàfaahouraa, revaraa, Penetetote. 4)  Tau Ètärëtia, rururaa òrometua, ARA. Teie tahi haapotoraa no te mau täpura òhipa a te  EPM,

Ia hanahana te Atua Nui Tumu Tahi.

Teraì òr. Faatura.

Te TAE

Täpati 26 no Âtete 2018.

Te TAE

Taramo 34.16-23

Tämeha

16 Tei te feiä parau-tià ra to te Fatu mata,  e tei ta rätou pure to na tarià.

Ôina

17 E mata ê rä to te Fatu i te feiä i rave i te ìno ra, e ia òre roa ia manaòhia i te ao nei.

Pë

18 Te tiàoro nei te feiä parau-tià e te faaroo mai ra te Fatu, e te faaora nei o ia ia rätou i to rätou mau àti atoà ra.

Tati

19 Te fätata nei te Fatu i te feiä âau paruparu ra, e te faaora nei o ia i te taata âau taiä.

Tofa

20 E àti rahi to te taata parau-tià ra; e faaorahia rä o ia e te Fatu i taua mau àti atoà ra.

Reta

21 Na te Fatu e tiaì i to na ra mau ivi, e òre roa te hoê e ôfatihia.

Tina

22 E pohe te paieti-òre i te ìno; e tei riri i te feiä parau-tià ra, e mou ia.

Täu

23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

Iotua 24.1-18

1 Ua haaputuputu faahou mai ra Iotua i te mau ôpü atoà o Ìteraèra i Tetema e ua parau atu ra i te feiä paari o Ìteraèra ra, e to rätou hui tävana, e to rätou mau haava, e to rätou feiä toroà atoà ra ua tià noa mai ra rätou i mua i te aro o te Atua. 2 Ua parau atu ra Iotua i taua feiä atoà ra, Të nä ô mai ra te Atua o Ìteraèra nei o te Fatu, Tei te tahi pae pape to òutou hui metua i te pärahiraa i mütaa iho ra, o Tera, te metua no Âperahäma, e te metua hoì no Nahora; e ua haamori rätou i te mau atua èê ra. 3 E nä ù hoì i rave mai i to òutou metua ia Âperahäma mai te tahi pae pape mai ra, e ua arataì au ia na nä roto atoà i te fenua atoà nei o Tanaana, e ua faarahi au i to na ra huaai, e ua höroà hoì au i tö na, o Îtaata. 4 E ua höroà hoì au i ta Îtaata, o Iatöpa, e o Ètau; e ua höroà hoì au i te mouà ra o Teira no Ètau ei taoà nä na; haere atu ra rä Iatöpa e ta na mau tamarii i raro i Àifiti; 5 e ua tono atu ra vau ia Möte räua o Âarona, täìri atu ra hoì au ia Àifiti i tä ù i faatupu i roto ia rätou ra, e i muri aè ra, arataì mai au ia òutou i räpae. 6 E ua arataì mai au i to òutou mau metua mai Àifiti mai; e tae mai ra rätou i tähatai, e ua aùaù mai to Àifiti i to òutou mau metua mä te pereoo e te puaahorofenua e tae roa mai ra i te tai ùteùte. 7 E ia rätou i pii i te Fatu ra, ua tuu iho ra o ia i te pöuri i röpü ia rätou e to Àifiti, e ua hopoi mai ra i te miti i nià iho i to Àifiti, täpoì atu ra ia rätou; ua ìte hoì to òutou mata i tä ù i rave i to Àifiti ra. E mäoro aè ra to òutou pärahiraa i te mëtëpara ra. 8 Ua arataì mai au ia òutou i te fenua o te âti Àmori, tei pärahi i te tahi pae Iörïtäna ra e ua àro mai rätou ia òutou na, e ua höroà atu vau ia rätou i roto i to òutou rima, e pau roa aè ra rätou ia ù i mua i to òutou aro, ia noaa to rätou fenua ia òutou. 9 Ua tià mai ra Parata a Tipora, arii no Moäpi ra, e tamaì mai ia Ìteraèra, e ua tono atu ra i te veà e tii ia Päraama a Peora, ei tuhi ia òutou: 10 aore rä vau i faaroo ia Päraama; faaora noa atu rä o ia ia òutou, ua ora iho ra òutou ia ù i ta na rima. 11 Haere mai ra hoì òutou i te tahi pae Iörïtäna, e tae mai ra i Ierito; e ua àro mai ra to Ierito ia òutou, e ua àro mai hoì te âti-Àmori, e te âti-Pereti, e te âti-Tanaana, e te âti-Heta, e te Teretati, e te âti-Hevi, e te âti-Ieputi; e ua tuu atu vau ia rätou i roto i to òutou rima. 12 E ua tono vau i te manu pätia nä mua ia òutou, e hee iho ra nä arii toopiti o te âti-Àmori i te reira i mua ia òutou; aore hoì rätou i pau i ta òutou ra òè, e ta òutou ra fana. 13 E ua höroà vau i te fenua no òutou, aore i òhipahia e òutou ra; e te pärahi na òutou i roto i te ôire, aore i patuhia e òutou; e te àmu na òutou i te mäa o te ô-vine e te ô ôrive, aore i tänuhia e òutou ra. 14 E tënä na, e mataù òutou i te Fatu, e e haamori hoì ia na mä te haavare òre, mä te parau mau e faaruè e atu i te mau atua a to òutou hui metua i haamori i te tahi pae pape ra, e i Àifiti hoì; e e haamori i te Fatu anaè ra. 15 E e mea ìno ia òutou ia haamori i te Fatu, e faataa na òutou i teie nei mahana i ta òutou e haamori; e o te mau atua änei a to òutou mau metua i haamori i te tahi pae pape ra, e te mau atua änei o te âti-Àmori nei no rätou te fenua ta òutou e pärahi nei? Âreà vau e to ù atoà ra ùtuafare, e haamori ia mätou i te Fatu. 16 Ua parau mai ra taua mau taata ra, nä ô mai ra, Eiaha roa ia parau ia mätou i te faaruè i te Fatu e te haamori i te mau atua èê; 17 o te Fatu hoì to mätou Atua; o ia tei arataì mai ia mätou e to mätou feiä metua mai te fenua mai ra mai Àifiti, mai te ùtuafare i tävini ai ra, o tei rave hoì i taua mau temeio rarahi ra i mua i to mätou mata, o tei tiaì mai hoì ia mätou i te mau haereà atoà i haerehia e mätou ra, e i roto i te mau êtene atoà i ta mätou i haere nä roto ra. 18 E ua tiàvaru te Fatu i te taata atoà i nä mua ia mätou, i te âti-Àmori atoà ra o tei pärahi i ìeìe nei fenua; o te Fatu atoà hoì ta mätou e haamori; o ia hoì to mätou Atua.

Êfëtia 5.21-32.

21 mä te auraro mäite hoì òutou ia òutou iho mä te mataù i te Atua.

Te mau vahine e te mau täne faaipoipo

22 E te mau vahine ra, e auraro òutou i ta òutou iho ra mau täne, mai ta tätou i auraro i te Fatu ra. 23 O te täne hoì to te vahine ra upoo, mai te Metia atoà ra ei upoo ia no te Ètärëtia, e o te ora hoì o ia o te tino ra. 24 E teie nei, mai te Ètärëtia e auraro i te Metia nei, ia nä reira atoà te mau vahine i ta rätou iho mau täne i te mau mea atoà nei. 25 E te mau täne ra, e aroha òutou i ta òutou mau vahine, mai te Metia atoà i aroha i te Ètärëtia, e ua horoà ia na iho ei taui. 26 Ia haamaitaì e ia tämä o ia ia na, i te horoiraa pape, e te parau i aòhia ra, 27 ia tuu o ia ia na i mua i ta na aro, ei Ètärëtia hinuhinu, mä te pöraò òre, e te miòmiò òre, e te mau mea atoà mai te reira te huru ia moà rä, e te ìno òre. 28 E aroha atoà te mau täne i ta rätou iho mau vahine e tià ai mai ta rätou i aroha i to rätou iho tino ra. O tei aroha i ta na iho vahine, ua aroha ia ia na iho. 29 Aore roa hoì e taata i riri i to na iho tino, âreà e faaàmu, e te faaherehere mäite, mai ta te Fatu i te Ètärëtia nei. 30 E mero hoì tätou no to na tino, no to na ìò, e to na ivi. 31 E no reira e faaruè ai te taata nei i ta na metua täne e te metua vahine, a àti atu ai i ta na vahine, e e riro räua ei hoê. 32 E parau moè rahi teie, no te Metia rä ta ù e parau nei, e no te Ètärëtia.

Ioane 6.60-69 e taiò atoà te 70 e te 71.

Te parau no te ora mure òre

60 E rave rahi ta na mau pipi i faaroo i taua parau nei, i nä ô e. E parau riàrià teie. E ìteä ia vai? 61 Te ìte ra Ietu i roto ia na iho e te ômumu ra ta na mau pipi i taua parau ra, ua parau mai ra ia rätou. Te mäheaitu ra òutou i te reira? 62 Ahiri paha òutou e ìte na i te Tamaiti a te taata i te hoì-faahou-raa atu i nià i te vähi ta na i pärahi i mütaa iho ra? 63 No te Värua te ora, aita o te tino faufaa. Te parau ta ù i parau atu ia òutou nei, e värua ia, e ora tei reira. 64 Aita rä te hoê pae o òutou nei i faaroo. Ua ìte hoì Ietu mai te mätamua mai ä i te feiä aore i faaroo, e te taata e haavare ia na ra. 65 Ua parau atu ra hoì o ia i parau atu ai au ia òutou e, e òre roa te taata e tae mai ia ù nei, ia òre ia horoàhia mai te tae e taù Metua ra. 66 Faaruè mai ra te hoê pae rahi pipi a ana i reira ra, aita mai ra i pee faahou ia na. 67 Ua parau mai ra Ietu i te Àhuru mä piti ra E haere atoà änei òutou? 68 Ua parau atu ra Timona Pëtero ia na, E te Fatu, e haere tià mätou ia vai ra? Tei ia òe hoì te parau o te ora-mure-òre ra. 69 Ua faaroo aè nei hoì mätou, e ua ìte hoì mätou e, o òe te Metia, te Tamaiti a te Atua Ora ra.70 Ua parau mai ra Ietu ia rätou, Eere änei ua mäìti au ia òutou tino Àhuru e mä piti, e e tiàporo ä te hoê o òutou nei? 71 O Iüta Ìtatariota a Timona ra ta na e parau ra, no te Àhuru mä piti noa iho ä o ia, o ia te taata e haavare atu ia na.

Manaò.

Te tahi mau parau tumu e täamu nei teie mau taiòraa e maha, te ìmiraa raveà no te haafatataraa i te tumu o te ora. Te taime te Atua Nui Tumu Tahi ìpopo ai i te taata i te repo fenua, ua haapüaì o ia i to na aho ora i riro mai ai o ia ei taata ora, no te haapäpü i to na haafatataraa tämau e te taata ia tià ia raua ia haere âmui. E hinaaro tumu no te Atua, ia vai noa mai te mä, te tià e te tura o te taata, a tau a hiti noa atu. Te puai no te hinaaro o te Atua e türaì nei i te taata ia faaea tämau i te vahi o ia a ìte ai i te ora e ia here. I te mea na te Atua e na te fenua e faatiàma nei i te taata tei topa na i raro aè i te mau faatîtîraa e rave rahi.  No te faarooraa e te färiiraa a te taata i te parau a te Tumu Nui. Naò ia tätou i te parau e, e hopoià ta tätou i roto i teie ora e faanaòhia nei e tätou tei napehia na fenu e maha, hoê fenu te Atua, hoê fenu te fenua, hoê fenua, te taata, hoê fenu o Ietu, ia fenuhia e noaa te âmui-tahi-raa o te puai i te nape varo maha. Te tahi ia hiòraa no na parau e maha nei, na te here i nati ia vai tämau noa te ora i roto i te taata, te ùtuafare, te nünaa. Te firi faahou nei o Ietu i te parau o te ora, i ta na fenu tei parauhia te Ora Mure Òre, e auraa hohonu to te teie parau e rave rahi tätou e ìmi nei, e rave rahi atoà tätou teie e horoà nei i te tahi tatararaa, no ù atoà teie parau ta ù e faahiti nei. Te tïtau nei ra teie parau ia tätou ia faaroo mai te tahi mau tumu parau i ìritihia mai, mai roto i na parau e maha no teie mahana.

-Taramo 34, 19 Te fätata nei te Fatu i te feiä âau paruparu ra, e te faaora nei o ia i te taata âau taiä.

- Iotua 24.15 Âreà vau e to ù atoà ra ùtuafare, e haamori ia mätou i te Fatu.

- Èfetia 5, 30 E mero hoì tätou no to na tino, no to na ìò, e to na ivi.

-Ioane 6, 65 e òre roa te taata e tae mai ia ù nei, ia òre ia horoàhia mai te tae e ta ù Metua ra.

Te parau e nati nei na taiòraa e maha mauti ra TE TAE, e parau ôtià òre teie e ötiraa no te tahi òhipa, e haamatara rä no te òhipa âpï, maite mau tiàrama e faaìte ra i te ao e te pö ma te faaea òre.  

I roto i te Tae, te vai ra te manaò no te tau, te vähi, e tae noa atu i te òhipa iho e tïtauhia ra te taata e rave ia tupu te mea ta te taò e faaìte ra. Ia òre to tätou manaò ia faaruè i te taiò te atea, oia hoì ia òre tätou ia faaea i te hiò nümera i teie parau, eita tätou e ìte i te värua o te taò, e peneiaè o te rahi atu te ìno ta tätou e faatupu i te tïtauraa i te tae, no te mea aita to tätou manaò i päpü i te parau o te tae. Ia ìte mai tätou, te taeraa, e täpura òhipa te reira. Mai te peu e täpura òhipa, te vai ra ia te taata rave, te vai ra hoì te manaò arataì i te mea tei färii te taata i te rave, e tae noa atu i te hopeàraa maitaì ta rätou e tiàturi ra i te pae hopeà aè o te haa ta rätou i tautoo mai. Eita te òhipa a te taata tätaì tahi e hope noa i nià i ta na i rave, eita atoà rä e tià ia na ia haapae i te rave i ta na tuhaa. E tano e parau e, aita te tae i roto i te pärahi noa, tei roto rä i te rauraa , te auraa, eita tätou e märamarama i te taeraa ia òre ia nä roto i te rauraa i te hiò mai i te reira parau ; i roto rä hoì i teie rauraa, e tano atoà tätou e uiui e, eita änei e moè te taeraa, aore ra, eita änei te rauraa e topa i roto i te purara, haapaò noa atu ai te reira taata, te reira pupu taata i to na èà, mai te haapeàpeà òre te manaò i te vähi täpaeraa, aore ra te taime e täpae atu ai. Ia haamanaò aè tätou i teie reo to Taramo e parau ra e 19 Te fätata nei te Fatu i te feiä âau paruparu ra, e te faaora nei o ia i te taata âau taiä ua ìte atoà ia tätou i te tae tei au i te Atua. Te vähi atoà ia ta tätou e ara ia òre tätou ia viriô i roto i te tae, no te òreraa e färii i te taeraa. I roto i te parau ta tätou e hiò nei, oia hoì te tae e riro ei èà hoê rau noa atu te vahi e faatorohia ra, e piti taò faufaa roa ta te taata i haapae no te täpeà noa mai i te hoê. Teie taua nä taò ra, te riro, e te âmui. E faaìte te riro i te tahi tauiraa e tiàturihia ra to na tupuraa, tei roto noa ä te reira i te manaònaòraa, e òhie to na tupuraa mai te peu e haapaòhia te mau mea e faaòhie i te tupuraa o te reira parau. Areà te âmui, te haamanaò noa mai ra ia e, eere teie parau no te taata hoê, no te rahi rä, no na e no na ; e ia faaâfarohia atu hoì te parau i nià i teie mau taata, teie ia to na faaauraa no òutou teie parau, na tätou e na mätou e faatupu. Te reo o Iotua, 15 Âreà vau e to ù atoà ra ùtuafare, e haamori ia mätou i te Fatu.

No reira, ia ìte ia tätou te taata i färii i te faatupu i te taeraa, e òhipa teie aita to na e hopeàraa, eita hoì e tià ia tätou ia faahaere i teie òhipa i te vähi i au i to tätou manaò, faaruè mai ai. No te tauturu ä i to tätou manaò i te märamaramaraa i te värua o teie parau no te taeraa ta tätou e hiò nei, faahiti na tätou i teie reo to Pauro i to Èfetia, 30 E mero hoì tätou no to na tino, no to na ìò, e to na ivi. Te haapii noa mai ra te reira e, i te mau taime atoà, ia ìte tätou te tahi i te tahi i roto i to tätou taa-ê-raa, ia òre ia färii, ia òre hoì ia faatura te tahi i te tahi, e riro mau teie taeraa i te òre e tupu. Ia horoà te Atua i te òhipa i roto i te rima o te taata, eiaha ia te taata e ìmi i te ôtoheraa, e eiaha hoì e ruri i te parau. No reira, ia òre ia tupu te hinaaro o te Atua, e hoì noa ihoä te pariraa i nià i te taata, te auraa, o ia iho te tumu i òre ai i tupu te taeraa i te Atua ra. Ta Ietu e parau nei e, 65 e òre roa te taata e tae mai ia ù nei, ia òre ia horoàhia mai te tae e ta ù Metua ra. E rave rahi mau pipi a Ietu i faaruè mai ia na i to rätou faaroo i te parau mau, parau tià no roto  mai ia  Ietu. Te horoà nei o Ietu i ta na mau pipi i te hoê haapäpüraa e, o vai ra O ia, e aha ta na òhipa, e aha ta na faanahoraa, e o vai O ia ia au ta te taata hiòraa. Te mea ta Ietu e parau ra na te Metua e horoà mai te tae, Te haamanaò noa mai ra ia i te òhipa e tupu ia òre te taata ia färii, aore ra te täatoàraa o te mau mea i parauhia ai to na ei nünaa. Aita hoì e nünaa e aita to na e fenua, aita e reo, aita e peu, e aita e hiroà tumu e àita ta na fäìraa faaroo. E òhipa te rave ia tae, to tätou ia haapäpüraa e firi ta tätou fenu ta te Atua Nui Tumu Tahi i horoà mai no te firi i nià i tumu no te Faaroo i reira noa e matara ai te ùputa nehenehe o te Ora Mure Òre.

Teraì òr. Faatura.