Maha o te mahana Mahana toru 08 no Tënuare 2020

Maha o te mahana

Mahana toru 08 no Tënuare 2020

Te tumu parau : Te Rahu, ei ìte no te fänauraa

(Ietu / Teva no Vaiarii nui.)

Te pehepehe : UIUIRAA

Aroha atu i to taata tupu,

E o vau, tei hea vau i te tupuraa.

Na vai au e aroha mai.

E täporo ra, e täporo ia,

Te reira te iho tumu o te täporo,

E o vau, e aha to ù iho tumu.

Te tupu nei au i roto i te taa òre e,

È aha rä te iho i roto ia ù.

È aha te mäa ta ù e hotu mai.

Te taiòraa :

1- Mataio 2, 1-10

2-Vairimatauhöê, te metua täne o Teva, tei parau ia Hotutu : Hou vau e hoì ai i to ù âià, ia ìte òe e, terä tamarii i roto i to òe ôpü, na ù. Ia fänau mai òe ia na, e maìri òe i to na iòa o Teva, e hoà te uira, e haruru te pätiri, e pä te toà, e e topa te ua rahi. E patu òe i te tahi märae no na i Papara.

Te manaò tauturu

Te tüàtiraa o nä fänauraa e piti. Hou a fänauhia ai nä Arii e piti, ua faaìte mai te rahu i te mau täpaò : Ietu na te fetià, Teva na te ua, te hoà uira e te pätiri. No te haapäpü-noa-raa i te höêraa o te Atua, te rahu e te taata. I roto i nä faatiàraa e piti, hou räua a tae mai ai i roto i teie nei ao, ua tohuhia to räua parau. Òia hoì, ua faaìte mai te Atua i te parau i te rahu e i te taata, no te faaara i te parau o nä Àito, e ua tupu te reira mau faaìteraa. E te haereraa mai, àita höê aè parau i hape, ua haere räua nä nià i te êà i taraihia no räua, ma te tauturuhia e te Atua. No te faaìte-faahou-raa ia tätou i te faufaa o te Atua nä roto i te tauaroraa a te parau, te rahu e te taata. Àita e òre, höê ä huru no tätou, ua ìte te rahu e ua faaìte i te tahi mau täpaò, e Arii mau teie taata, e òrometua mau teie taata, e pätiri teie taata. Aore e taata haapaòraa òre i teie taata, tei òre i roaa ia tätou i te taiò. Te mea rä e tano e täpeà mäite, ta tätou ia peu tumu, te faahoìraa i te pü fenua o te àiü, i roto änei i te fenua, aore ra, i roto i te miti.

Teie rä, e tano atoà e ui, no te aha ia tätou i teie mahana, i òre i ôhie ai i te färii-faahou-raa i te rahu, ei ìte no te taata. Te tauaro mätämua roa te reira no te tauturu i te taata i te ìteraa i to na parau. I te tau o te mau tupuna, ua ìte maitaì rätou i te taiò i te mau täpaò o ta te rahu e faaìte. Mea tüàti roa räua. E faaroo te miti i te parau a te taata. E faaroo te ua. I teie mahana, a parau na i te miti e tamarü ia na, eìta ò ia e marü mai, e haere i te rahi.

Rave mai tätou i te hiòraa a te nünaa no RAPA, hou te fänauraa, e rävehia te tahi täuàparauraa i roto i te ôpü fëtii no te hiò i te iòa pii o teie tama, ma te rave i te iòa o te mau tuhaa fenua. Ia fänauhia teie tamarii, àita e maì, mea oraora maitaì. Täpaò te reira, ua färii te rahu e ua färii te mau tupuna. Ia paari, e ìtehia te tüàtiraa o teie tama i te auraa o to na iòa.

No te haamanaòraa i te rahiraa o te mau nünaa, i te nünaa Mäòhi ihoä ra. Te vai ra te tahi mau nünaa, te mau noa ra to rätou faatura e te tüàtiraa i nià i to rätou fenua, eìta ò ia e nä räpae i to na höêraa i te Atua e te rahu no te ora-hau-noa-raa i to na oraraa.

Rave atoà mai tätou i te tahi hiòraa no te nünaa Rangihä, i te tau o te mau Àito. Mea nä hea e ìtehia ai te täpaò e Àito teie tamaroa ia fänauhia. E püòhuhia i roto i te rauère àpe, ia ètu ò ia i roto, e mutu. Te täpaò ia e faaìte mai, e Àito teie tama. Te tahi atoà te reira tauturu ia tätou i te hiò-faahou-raa i te faufaa ora ta te rahu e faaìte noa ra ia täua e te nünaa Mäòhi.

I mua i te òreraa i ôhie ai tätou i te ìte-fahou-raa i te faaìteraa a te rahu, no terä mea ua pö roa to tätou mata i ta tätou rave-ìno-raa i te rahu, ma te haapaò noa ia tätou. Te auraa, e hoì ia i te haamataraa o te parau o teie nünaa, e hiò è aha te tauturu e roaa mai, ia maitaì e ia ora faahou te Mäòhi i to na oraraa hau i teie mahana.

Te mau noa ra te tahi mau aveave o te faufaa ta te rahu e haapii nei ia tätou. Âhani, e tià na, èiaha ia riro ei aveave noa, ei tumu rä no te ora o teie nünaa. Mäuruuru

Pure

E te Atua Nui Tumu Tahi e, ua höroà mai òe i te rahu ei ìte no to mätou nei parau, o ta mätou i òre i tià na i te haamäuruuru maitaì no te reira, o mätou i òre e färii nei i ta na tauturu rahi i te taata, mätou i òre atoà i ìte i te auraa mau o ta na mau faaìteraa. Te fäì nei mätou i to mätou ätea-ê-raa i to mätou tauaro mätämua roa, o ta òe i tuu mai ei tautururaa i to mätou oraraa nei. A färii mai i te manaò tätarahapa, ma te ani ia òe, a tauturu mai na ia mätou i te hoìraa i te fare metua, ia roaa faahou ä ia mätou te reira ìte i mauhia na e te mau metua, no te haereraa i mua. Ia tuiau noa mätou e te rahu no te färiiraa i to òe here nä roto i te maitaì e te haèhaa. No te mea i teie mahana, te tïpee nei mätou i te tahi ao e òre no mätou, te tiàturi nei mätou i te taata, e inaha hoì, tei te âpoo ihu noa te ora, e te âuahaati nei to òe Here e to òe Aroha ia mätou, o ta òe i òre i faaea i te niinii noa mai, ia roaa ia mätou i te tahi oraraa hau, ia färii te nünaa i to na parau. Nö reira, a färii mai i teie aniraa a to òe nünaa, a färii atoà mai i to mätou manaò hape.

Pae o te mahana Mahana maha 09 no Tënuare 2020

Pae o te mahana

Mahana maha 09 no Tënuare 2020

Te tumu parau : Te fänau e te fänau-faahou-raa

Te pehepehe : HAAMANAÒ

A fänau te taata, a fänau te fenua.

A fänau ta räua, e tamarii àpu rua,

E tamarii puna rua.

A pärahi i roto i te here metua e te tama,

A pärahi i roto i te here fenua e te tama,

E pärahi i roto i te here tauàti.

E rahi òe i roto i te here metua,

E rahi òe i roto i te here fenua,

Haamanaò e te tama.

Te taiòraa : Ioane 3, 1-11 ; 1 Ioane 4, 7-10.

Te manaò tauturu

Ia haamaitaìhia te Atua no to tätou färereiraa i teie mahana âpï tei tupu nei nä roto i teie tuhaa, òia hoì, te höroàraa i te tahi manaò na tätou, ia riro atu te reira ei tauturu no to tätou oraraa. E täpaò no te Aroha o ta mätou e faatae atu ia òutou to te nünaa mäòhi, tei amo nei i te tiàraa, tei täpae atu i te tahi fäito i roto i te oraraa faaroo, e tae noa atu i te mau taata tei òre i täpae, ia vai noa tätou i roto i te Here e te Aroha o to tätou Metua.

Te hinaaro nei e tuu i te tahi haamanaòraa na tätou, e manaò noa teie, ua ìte maitaì tätou e, e manaò to te taata tätaìtahi, e feruriraa to te taata tätaìtahi, e ìte-atoà-hia i te märamarama o te taata tätaìtahi. No te reira, èiaha te manaò e haataupupü te âau, ia faaroo anaè i teie mau manaò. Teie nei rä, e ìmi tätou i te räveà no te hiò atu e, e mai te peu teie to na manaò, tei hea vau, o vau e to ù parau. Tei hea atu ra to na vairaa.

E pähonoraa ta Nitotemo e ani ra ia Ietu, taa ê noa atu to na tiàraa tävana, e tae roa atu i to na tuatäpaparaa i te parau o te ture. Te ìte nei o Nitotemo i te tahi ärea e vai ra i mua i to na ìte, e te mau òhipa tei faatupuhia e Ietu. Ia au te mau tiàraa o ta na e amo ra, e te ärea o ta na e ìte ra, àita e òre, te tïtau nei ò ia i te tahi arataìraa, te tahi rëni no te tauturu ia na i nià i te mau òhipa o tä na e rave atu.

I roto i to räua färereiraa, e tuu Ietu i te parau o te fänau faahou, e òiòi te manaò o te taata, mai ia Nitotemo i nià i te hoìraa i roto i te ôpü o te metua vahine no te mea, mea nä reira te taata e fänauhia ai i roto i teie ao to tätou. Teie nei rä, te faatïtïàifaro ra o Ietu i teie manaò to te taata, mä te haamanaò atu e, èiaha e pärahi noa, täua e te taata, i nià i te òhipa o ta te ìte o te mata, e to te tarià e färii nei, maori ra, e fäfä atoà tätou i ta te manava e parau ra, e haapäpü ra. Ia faatià anaè te taata ia tätou i te tahi parau, mea huru ôhie na tätou i te färii, e te tiàturi, mai te peu na te fëtii, e aore ra, na te hoa rahi e tuu mai, no te mea e fëtii, e hoa tei faatià mai i teie mau parau. Âhiri e, mai te peu na te taata nä räpae mai, eìta te manava e ôhie maitaì i te färii no te mea àita täua i ìte o vai mau na teie taata i mua ia täua. No te ìte òre te taata te tumu, eìta atoà ia e tiàturi.

Te nä ô ra te tahi parau e : « e tävini au, mä to âau, mä to manaò, e mä to püai atoà... ». Ia manaò anaè au, e mai te peu mai te reira to täua huru mau i mua i to täua Metua, eìta täua e te nünaa mäòhi, e ìte atu te parau o te fifi, eìta e taupupü i to täua raveraa i te òhipa, eìta atoà täua e teimaha ia tae atu i te taime no te höroà.

Ia taiò anaè teie parau ta tätou, e pihaa mai te manaò e, ua päpetitohia, ua haapäpühia te faaroo. Ua amo te tiàraa, eìta rä täua e täpae atu i te vähi, e aore ra, i nià i te fäito e tïaìhia mai ra ia täua.

Ia nä ô anaè to täua Fatu e : «... O ta òe e nä reira ra, o vau ia ...», e àita anaè : «... Ia here òutou ia òutou iho mai ia ù i here ia òutou ...» I mua i teie mau parau, mea poto roa te päpaì, e te parau. E tano, e, e tià ia täua to te nünaa mäòhi i te uiui ia täua iho, ua täpae änei täua i nià i teie fäito, e i te vairaa tei tïtauhia mai nei ia täua. Te auraa, i teie mahana, e i teie taime, e hiò täua i to täua parau, ia au te arataìraa, e te âveià o ta täua i faaoti. E aha to täua huru, e tamata täua i te hoì rii i muri. I te mätämua, eìta te taata e mataìore i te tahi, e tuö rä no te haere mai e tämäa. Àita te taata i ìte i te parau o te pipiri, e ôpere rä na te taata e pärahi ra i roto i te ère. I teie mahana, eìta e faaroo-faahou-hia te tuö, e aore ra, te mata o te taata. Àita ä te vaa i fätata mai i te fenua, ua haamata te huna i te ià.

Te uiraa hopeà e vai nei no täua e te nünaa mäòhi, a hiò na, eìta e noaa ia täua i te faahoì mai i to täua huru, e to täua hïroà mau. Ia au teie parau to te âti-Iuta, e to täua iho peu tumu, eìta e tià ia täua i te faahoì ia täua iho i nià, e i roto i te Here i vai aè na täua.

Mai tei parauhia i te ômuaraa, e manaò noa teie, tei pihaa nei i roto i te manava. O ta ù ia e ôpere na tätou. Eìta vau e huti te taata ia pee mai ia ù, e manaò to òe, e märamarama to òe, tei noaa ia òe i te färii, tei tià ia òe i te faatupu, e parau noa vau e : «Mäuruuru ia Òe e te Atua Nui Tumu Tahi, Fatu o te Ora, to te Raì, to te Moana, e to te Fenua.» IA ORA NA

Pure

E te Atua e,

Te Purapura noa nei to Òe Here e to Òe Aroha i mua ia mätou. Te ìte noa nei te mata, te tarià, te vaha, e te rima. O ta mätou e hinaaro nei e haamäuruuru ia Òe. Te Faateniteni nei mätou i to Òe iòa, ia mutu òre to Òe tïaìraa ia mätou, e faaeaea òre i to Òe arataìraa, e te tautururaa ia mätou.

Mätou teie, ta Òe mau tamarii. Ua ìte Òe te mau manaò e vai ra i roto ia mätou, e te mau òhipa o ta mätou i faatupu, e pau ia mätou i te huna i mua i te òi e te puta o to Òe mata. O ta mätou noa e ani haèhaa atu nei ia Òe, o tei riro i to Òe mata ei haapaòraa òre, a faaòre mai na Òe. O ta Òe e ìte ra i Hanahanahia i to Òe iòa, a türaì mai na Òe, ia noaa mai ia mätou i te ôpereraa i te reira i te tahi.

To mätou Metua e,

Nä roto i te mau î atoà, e ora ia to mätou mau tino. Nä roto i te mau parau o ta Òe i faatae mai i mua ia mätou, e ora, e, e päutuutu i to mätou värua. E mä te moè òre ia mätou i te tuuraa i te parau o to mätou mau taeaè, e to mätou mau tuahine, tei fätata mai nei ia mätou, e tei ätea atu ia mätou i mua i to Òe Aro. Ia vai noa rätou i roto i to Òe àpu rima, ia mähanahana, èiaha rä ia toètoè.

No te reira, e te Fatu e,

Teie o ta mätou e fäì nei, o Òe te Tumu o to mätou ora, to mätou Tïaì, e tei ia Òe ra i te Faaora, mai teie nei, e a tau a hiti noa atu. Teie mai ta mätou pure, na Òe te reira e färii mai. IA ORA NA

Ono o te mahana Mahana pae 10 no Tënuare 2020

Ono o te mahana

Mahana pae 10 no Tënuare 2020

Te tumu parau : Te faaroo, te ora ia o Mäòhi Nui

Te pehepehe : TE IHO

Te iho, te iho, tei hea te iho.

Uri noa ai to ìri i to na uriraa.

E uriraa ia no te ìri. Tei hea rä te iho.

E pee te mähu i te ahu o te mahana.

E teatea te ìri o te pari i te marumaru.

Eìta änei te iho e pee, eìta änei e marau.

E tau huri tau tei ta ù fenua.

Àuë : ua haamä te ohi i te ìteraa i te tumu.

Ua tïpee te uru i te iho o te hotu päinu

Ua àriàri te aa o te ohi, ua tata i te hià.

Ua haamere te Mäòhi i te iho o te Mäòhi.

Òre atu ai e riro ei ohi, ei mea päinu rä.

Te òto nei te törea : e iho törea ia.

E toihoiho ra òe ia taahi i to iho.

I to reo hoì, Taaroa i rahu ai i to fenua.

Mai te reva e pihaa, ia fäì to reo i to iho.

E aha atu ra hoì te faufaa o te âpoo reva ia î.

E aha te faufaa o te Mäòhi reo òre.

Ia tiàmä òe ia òe : èiaha e tümä ia òe.

A mau tütüaau i te iho i noaa i to fenua.

Te fenua i amo i te marae o to tupuna.

Te iho o te nünaa.

I parau-atoà-hia ai òe e Mäòhi.

Eere i te ravarava o to ìri.

E i to fänauraa òe i Mäòhi ai.

E uru ra, e uru ia.

A tau e a hiti noa atu.

Te taiòraa : PM Ruta 18/ 1-8 ; Iöpa 10/ 15-25

Te tumu parau : Te haaroo, te ora ia o Mäòhinui.

Te manaò tauturu

E hoa mä e, höê teie àito e höê tapairu no te haaroo âti-Iuta. Höê ta räua tïtauraa, ia tupu te ora e ia pua te haaroo.

A tahi : teie àito o Iöpa, i roto i te tahi taime teiaha e te àti mau. E hinaaro to na i te itoito, te òaòa, te turuturu, te haaìte e ö ò ia i roto i te rima o te Tumu Nui. Ta na e tïtau nei, te höêraa o to na ùtuähare, ia tahe te parau maitaì o te here e te aroha o te Tumu Nui i roto ia rätou. Te mea tei haahoì mai, te höêraa i roto i te ìno e te haaìno, te höêraa i roto i te mata-ê-raa, te höêraa i roto i te haafaufaa ia na. Auaa noa iho, e aa metua te täpeà ra ia na e to na haaroo i te Tumu Nui i ora ai ò ia. Eìta e âueue ia au i ta na häìraa i te ìrava 25, ua ìte au e te ora ra te Tumu Nui, tei haaora ia ù.

A piti : teie tapairu, tei ravehia ei hiòraa no te höê taata, e mäa tumu na na, te Tumu Nui i roto i to na oraraa, i te pö, i te ao, te taime àti, te taime maitaì, i nià i te mouà, e i te mau vahi atoà. E au ia taata i te tapairu, tei ani e tei onoono, e tae roa i te haatiàhia mai to na hinaaro. Àuë  ia te òaòa e, e ua tauturu teie haaraa parau tià òre ia na. Ua höê atu i te aniraa, no to na rohirohi, i te huru o teie vahine. E aha atu ä ia te Tumu Nui, te tumu ora, eìta ò ia e rohirohi ia onoono roa ta na mau tamarii i te ani ia na i ta rätou e hinaaro. E maru püpara mai te àuhune o te maitaì, te aroha, te here, te hau, te ora e te òaòa.

Te tumu parau : Te haaroo, te ora ia o te Mäòhi Nui

E hoa mä e, te haaroo o te mäòhi, ua haamauhia i nià i te mea mau : te taata, te henua, te tai, te reva e to roto ia rätou.

A tahi hiòraa : te iòa mäòhi nui. E iòa teie no te höê henua, te höê nünaa. I roto i teie iòa, tei roto te parau o te Tumu Nui e teie nünaa mäòhi. Ua haaìte te Tumu Nui i te nünaa, e henua herehia teie mai te marama mai ä e no roto mai ia na to na tupuna e to na oraraa taata e te Tumu Nui, to na ìte, to na paari, to na àravihi, to na maitaì, to na here, to na aroha, to na ìte e ta na haariiraa i te taata e to na haaroo e te vai atu ra.

Te auraa, te haaroo o te mäòhi, tei roto i ta na òhipa i te mau mahana e orahia e te höê mäòhi. O òe e te Tumu Nui, o ôrua, o täua, o mäua, o tätou, o mätou terä e ora ra i te haaroo. E na teie iòa mäòhi, aore ra mäòhi nui e haapii noa ra, e turuturu noa ra i te mau tau atoà. Na te tumu henua, e te papa henua, e täpeà ia tätou ia ora noa tätou. A haaroo na i te pehe a te mau tamarii a Hiromataatua.

E te Tumu e, a nee mai. Te pähono ra nä tamarii e pae : Eìta vau e nee atu, e tumu vau no te henua nei. E te pii ra Hiro : E te papa e, a nee mai. Te pähono ra nä tamarii e pae : Eìta vau e nee atu, e papa vau no te henua nei. Tumu nià, tumu raro, tumu hiihii e, papa nià, papa raro, papa hiihii e, a ora te ora, ia ora te ora.

O te höêraa ia i noaa i teie mau tamarii, òia to rätou haaroo, to rätou ia ora. Te aroha ia rahi. Anere

Pure

E te Tumu Nui e, Te Tumu nià, te papa nià, e Tumu raro, te papa raro o to mätou haaroo mauraa täuruuru òre no mätou i roto i te mau maitaì, ahuri hïroà, e te mau ôpape haaparemo i mua i te mau peu no räpae mai, ia ìte mätou, o òe e àita atu e Tumu Nui, àita atu hoì e papa raro, o òe to mätou Henua, Metua vahine here e noaa ai te hau, te marü ia mätou.

E te Tumu Nui e, a hänau ä ia mätou i te hänauraa pü henua, ia haapü ä to mätou Metua vahine o Mäòhi Nui, o mätou ia e to mätou Päpä Here, o mätou e to mätou Mämä Here, a haaâpï i to mätou manaò, to mätou manava, ia hono noa te taura àha o to òe aroha e to here i to òe nünaa Mäòhi.

Ia haamaitaihia òe no to mätou haaroo Mäòhi mau, tei haamauhia i nià i te mau faufaa ora ta òe i höroà ia Mäòhi Nui. Mäuruuru i teie häìraa haaroo a to mätou Tupuna o HIROMATAATUA, tei täamu höê i nä Hiro e Pae i roto i te parau höê. Ia ora te ora, a ora i te ora, ua ora te Haaroo, ua ora o Mäòhi Nui. HA HE! HA HE!

Hitu o te mahana Mahana mäa 11 no Tënuare 2020

Hitu o te mahana

Mahana mäa 11 no Tënuare 2020

Te tumu parau : Te parau mau e te parau tià

Te pehepehe : TE VAI NEI AU, O ÒE E VAI NA

Te ora ta ù e tïtau nei,

Te tumu atoà ia o te mea ta ù e haa nei.

Ua ìte te räau i te reira,

Ta te fenua atoà ia e haapii mai nei.

Te räau tumu òre, e räau pohe ia ;

Te räau aa òre, e räau hotu òre ia.

A ìtea te räau i te haapaeraa ia na iho,

E te hoturaa i te mäa eere i to na.

O vau i huna ia ù, ua huna ia ia òe.

O vau i täiva ia ù, ua täiva ia ia òe.

Te vai nei au, o òe e vai na.

Ta ù i nä reira ia ù, ua nä reira ia ia òe.

E te Mäòhi e, o òe e te Tumu Nui, höê ä ia.

A here ia òe, ia hanahana te Tumu Nui,

Te vai na òe, te Tumu Nui e vai nei.

Tei here òe ia òe, ua here ia i te Tumu Nui.

Mai te vai e faahoì i te ànaàna i te raì,

I te vähi, nö reira mai te märamarama,

Ia riro atoà to òe mau haereà,

Ei hanahana no tei hämani ia òe.

Te taiòraa :

-Taramo 85, 8-13 : Te parau mau e te parau tià

-Ruta èv 20, 9-16 : Te tiàau parau tià òre

Te manaò tauturu

Te manaò nei te päpaì Taramo, O te aroha e te parau mau, ua färerei ia räua ; o te parau tià e te hau, ua höhoì räua. E tupu mai te parau mau nö roto i te henua, e hiò mai hoì te parau tià mai te raì mai.

Te faaìte noa mai ra teie parau ia tätou, te höêraa te Atua e te rahu, e te höêraa te taata i te rahu. Ia hiòhia teie parau, ua haere roa mai te Atua e färerei i te henua, òia hoì, ua färii te henua i te Tumu Nui. E ua färii te Tumu Nui i te henua. Àita atu hoì e òhipa i tupu maori ra ua hoìhoì räua. E tano ia parau e, te Atua iho, o te rahu ia.

I roto i te hiòraa a te Âti-Iuta, te rahu, o te parau ia a te Atua i riro mai ei òhipa. I roto i te hiòraa mäòhi, te Rahu o te Atua ia. Te haapäpü noa mai ra teie parau ia tätou, te faanahoraa ta te Tumu Nui i faaineine no te mau nünaa atoà, òia hoì, te ora ia.

Ia au i te hiòraa Mäòhi, e mea fätata roa te nünaa mäòhi i te Rahu, e te  riro nei te henua ei metua vahine faatupu ora, no te mea, te hiò nei ò ia i te raì, o te metua täne ia ; e te hiò nei ò ia i te henua, o te metua vahine ia. Te auraa, ua ìte te mäòhi to na ora ta te metua vahine i püpü mai i roto ia na. E parau tätou, e mea fätata roa te nünaa i te henua no te mea i te mau vähi atoà ta te taata e haere nei, tei reira te metua vahine faatupu ora, no te tauturu i te taata. Ua ìte tätou, no te parau mau e te parau tià, i nä reira ai te Tumu Nui.

I roto i te Èvaneria a Ruta, te ìte nei tätou i teie parapore ta Ietu i faatià i ta na mau pipi. Te faaìte noa mai ra te reira ia tätou, te huru tupuraa o teie parau, òia hoì, to teie fatu ô vine püpüraa i ta na faaàpu i roto i te rima o te feiä faaàpu. Ua tiàturi maitaì ò ia ia rätou ei mau tävini maitaì no te haapaò e no te rave i te òhipa i roto i ta na ô vine. E tiàraa tiàau to teie mau taata, òia hoì, e tiàraa maitaì roa. E ìmi rätou i te mau räveà ia maitaì e ia hotu teie faaàpu, òia hoì, ia tere maitaì te òhipa, ia manuia e ia àuhune. Eere hoì rätou i te fatu o te faufaa, ua riro noa rätou ei tiàau. Te òhipa rä i tupu, ua ìte teie mau tiàau i te maitaì o te òhipa ta rätou i rave. Ua ìte atoà i te hotu o te faaàpu, òia hoì, e àuhune rahi te noaa nei i te tau ôotiraa.

Ua ìte tätou, ua tävini maoro teie mau tiàau i teie fatu òhipa. Ua taui to rätou feruriraa, ua nounou rätou i teie faufaa. Te auraa, ua topa rätou i roto i te ôpuaraa ìino, ua nounou, ua hämani ìno i te fatu o te ô vine, òia hoì, ua faariro roa rätou ia rätou ei fatu faufaa. I te haamataraa mai teie mau tiàau, e mau tiàau parau tià e te parau mau, tei ìte i te faufaa o te òhipa. Te auraa, e tiàau no te parau mau e te parau tià, e ia tae i te hopeà, ua taui rätou. Ua riro mai, ei mau tiàau parau tià òre, tei haru i te faufaa a teie fatu ô vine.

I teie mahana, e àroaraa ta tätou e te nünaa mäòhi, no te parau mau e te parau tià. Te àro nei tätou i te taèro âtömï, te àro nei tätou i te rauraa o te mau maì ta te Âtömï i faatupu. Te àro nei tätou i te ìno e te mau haaviiviiraa e tupu noa nei i roto i to tätou henua, i roto i te moana, e i roto i te reva, ia tupu te parau mau e te parau tià. Nö reira, èiaha ia moè ia tätou e, e òre tätou i te fatu faufaa, o te Tumu Nui te Fatu i te faufaa ora, ta na i höroà mai i roto ia tätou, ma te parau mau e te parau tià.

Pure

Ia haamaitaìhia òe e te Atua Nui Tumu Tahi, no te rahi o to òe here e to òe aroha ia mätou. Ua faaìte òe i te reira ia mätou, nä roto i te î o ta te Rahu faaìteraa, tei türama noa ia mätou, òia hoì, te henua e to na î, te moana e to na î, te reva e to na î. Te reira ta òe taoà faatau aroha ia mätou. Aore roa e nünaa i te ao nei i ère i taua faufaa ra no te mea ua ìte mätou i to mätou fänaò i te ora ta òe i höroà mai i roto ia mätou nei, nä roto i te rahu. Ua tïtau òe ia mätou ia tiàau, mai ta òe i hinaaro. Ua rahi aè rä to mätou nounou e te haapaò òre i ta òe faufaa, topa roa atu ai mätou i roto i te ìno. Ua ìmi mätou i to mätou pohe, e mea ìno mätou i nià ia mätou iho, e mea ìno atoà mätou i nià i te rahu, e i nià atoà ia òe e to mätou Metua here e.

E te Atua Nui Tumu Tahi e, ua hinaaro òe ia faahou te taata e te rahu. Ua ìte rä mätou i to mätou paruparu e to mätou haapaò òre, tauturu mai rä òe ia mätou i te faatupu-faahou-raa i te reira i roto i te òaòa e te hau. Ia tupu te parau mau e te parau tià. Ia hotu ùmu ä te Aroha e te Here i nià i to mätou Henua. Ia riro ä mätou ei mau veà no te parau mau e te parau tià. Te pure atu nei mätou ia òe i te iòa o Ietu Metia e ma te mana o te Värua maitaì. Amene.

Vaù o te mahana Täpati 12 no Tënuare 2020

Vaù o te mahana

Täpati 12 no Tënuare 2020

Te tumu parau :

Te Ôroà a te Fatu e te parau o Ruataata

Te pehepehe : TE MÄÒHI E TA NA MÄA

Ua hämani te Atua i te taata

Ia au i to na hohoà.

Ua hämani i te repo o te fenua,

Te fenua e faatupu i te mäa

E au i te reira taata.

Nö reira e te Mäòhi,

E àmu i te ùru, te meià, e te taro,

Ia hohoà òe i te Atua.

E àmu i te taruä, te ufi, e te fëî,

Te reira to òe hïroà.

E àmu i te mäniöta, te haari, e te täporo,

Faaravaì atu ai i te îîtä, te ânani, e te vï.

Te repo, e faatupu i ta òe mäa,

Te repo atoà ia ta te Atua i rave

No te hämani ia òe

Te repo, o te fenua i Mäòhi ai òe.

Te taiòraa :

1-Mätaio 26, 26

2-E Rumauarii e, ia ara òe i te poìpoì, e haere òe i räpae, e hiò òe i ta ù rima, e rau ùru ia, e hiò òe i te tumu e te maaraa e rua o te räau, o to ù ia tino e to ù nä âvae, e hiò òe i te mäa menemene i nià iho, e ùru, o to ù ia upoo. E te hune i roto i taua mäa ra, o to ù ia arero. (Teuira Henry, Tahiti i te pö, àpi 438.)

Te manaò tauturu

Ua mätau tätou i te faaroo i te parau no to Ietu faatiàraa i te ôroà i mua i ta na mau pipi. Te ôroà, to te taata ia haamaitaìraa i te Atua no terä mau maitaì atoà ta te fenua e faaìte noa ra, àita e mahana tuua. Òia hoì, e faahanahanaraa, e âruerueraa i te Tumu o te ora, e te vähi nö reira terä maitaì. I mua hoì i terä ora, te haapäpü noa ra te Fatu i te täamuraa piri roa e vai i roto i te Rahu e te taata. Terä mäa e vai ra i mua ia tätou, i nià, i raro, i tai, i uta, e o Ietu, höê ä ia. E tupuraa räua no te here e te aroha o te Atua.

Ia hiò tätou i te parau maitaì o Ruataata, tei pärahi i roto i te pure, no te ani i te Atua i te tauturu, èiaha to na fëtii taata ia roohia e te àti. Ua tauturu te fenua i te taata i te faahoìraa mai i te hau i roto i te oraraa. Te nä ô ra o Ruataata i ta na vahine ia Rumauarii e, ia ara òe i te poìpoì, e haere òe i räpae, e hiò òe i ta ù rima, e rau ùru ia, e hiò òe i te tumu e te maaraa e rua o te räau, o to ù ia tino e to ù nä âvae, e hiò òe i te mäa menemene i nià iho, e ùru, o to ù ia upoo. E te hune i roto i taua mäa ra, o to ù ia arero.

Te faaìte noa mai ra terä nä òhipa, i te tiàturiraa rahi e vai ra i roto i te î o te fenua e te taata. Höê a räua, e tupuraa no te parau o te faaroo, te türuìraa päpü i nià i te Tumu Nui. E tano ai ia tätou ia parau e, ia tupu te höêraa, e tupu atoà ai te oraraa hau o te nünaa. Terä parau no te ora ta te rahu e o Ietu e faaìte ra, ua ìte atoà te Mäòhi, ua tauturu noa mai te tahi faatiàraa i te tahi faahitiraa parau. E aha ia to na auraa no tätou i teie mahana. E tano e parau e, te faaitoito noa mai ra terä nä parau i to tätou faaroo i te Tumu Nui.

Ia hiò-anaè-hia, mai te Atua i mau i te rima o te fenua, a mau atoà tätou i to tätou rima i nià i te rahu e i te Tumu Nui. Eìta rä e tano ia tätou ia òre e haapaò no te mea e fifi roa ia te oraraa o te taata. Te haamanaò noa mai ra terä oraraa âmui to te rahu, te taata, e te Atua, i te papa o te tiàturiraa o te Mäòhi. A mau faahou i to tätou faaroo Mäòhi mau, ia tupu ùmu faahou te ora o terä tumu räau i nià i te märae o Mäòhi Nui nei. Eere terä i te àmuraa i te mäa noa, te àmu-atoà-raa rä i te here e te aroha o te Tumu Nui.

A faaea anaè i te haaviivii e te faaìno i te rahu, no te mea to òe iho ora ta òe e nä reira ra. A täpeà höê rima i nià i te Atua, höê rima i nià i te rahu, e a hoì anaè i te fare metua. A tià, a tauturu anaè i te Atua Nui Tumu Tahi, ia tupu to na hau i Mäòhi Nui nei. E tano ai to tätou reo e âmui i to Ruataata i te nä ôraa e : e ta mätou mau tamarii, ta mätou mau Hinapaarae, ia tià mai òutou i te poìpoì, tei roto òutou i te uru maitaì. Ia ora o Mäòhi Nui i teie nei, Ia ora na.

Pure

E te Atua Nui Tumu Tahi e, èiaha ei faaroo taiàta, ei faaroo Mäòhi mau rä. O ta òe ia e tïtau mai ra ia mätou, ta òe mau tamarii. Te tätarahapa nei mätou i mua ia òe, e i mua i te rahu no to mätou haamoèraa i te höêraa ta ôrua i mau mai na e a muri noa atu. Mai te tamarii i aòhia e to na metua, te hoì mai nei mätou i roto i ta ôrua arataìraa.

A tià mai òe e te Atua Tumu Nui i nià i te ômii o te ià nui nei, a faatere òe i to mätou fenua iti, ei tere hau, ei tere ora, ei tere höêraa. A tahitià mai, tahitià mai. Mäuruuru.

Ruta èv 23.35-43 Te Àui, te Àtau

Tāpati 24 no Novema 2019.

Te Àui, te Àtau

Taramo 122

Tire a te Moruta, a Tävita. Òaòa aè ra vau e te feiä atoà i parau mai ia ù e Tätou i nià i te fare o te Fatu 2 Te tià nei to mätou âvae i teie nei i roto i to mau ùputa, e Ierutarëma e. 3 I patuhia Ierutarëma mai te ôire täatiàti-hua-hia te mau fare ra. 4 I reira te mau ôpü ia paiùma ra, te mau ôpü a te Fatu, ei faaìteraa ia no Ìteraèra, e haamaitaì i te iòa o te Fatu. 5 I reira te mau teröno haavä ra i te haamau-raa-hia, te mau teröno o te ùtuafare o Tävita. 6 E pure ia Ierutarëma ia hau E maitaì to te feiä i hinaaro ia òe ra 7  Ei hau to roto i to òe ra mau patu, e ei maitaì to roto i to òe ra mau fare arii ra 8 No to ù ra mau taeaè e te mau hoa i parau ai au i teie nei Ei hau to roto ia òe ra 9 No te fare o to tätou Atua ra o te Fatu e tämau ai au i te ìmi i te maitaì no òe ra.

2 Tämuera 5.1-3

1 Ua haere atoà mai ra te mau ôpü atoà o Ìteraèra i Heperona ia Tävita i reira, e ua parau atu ra ia na , nä ô atu ra, inaha mätou, o to òe ia ivi e to òe ia ìò. 2 I mütaa iho ra hoì, ia Taura i arii i nià ia mätou ra, o òe ä tei arataì ia mätou i räpae, e tei arataì mai ia Ìteraèra i roto. Ua parau mai hoì te Fatu ia òe, e tiaì òe mai te tiaì mämoe ä i to ù ra taata ia Ìteraèra, e ei tävana hoì òe ia Ìteraèra.3 Ua haere anaè mai ra te feiä rarahi i Ìteraèra i te arii i Heperona; ua faaau iho ra taua arii ra o Tävita i te tahi faufaa ia rätou i Heperona, i mua i te Fatu ua faatähinu iho ra rätou ia Tävita ei arii i nià iho ia Ìteraèra ra.

Torota 1.12-20

12 Te haamaitaì nei mätou i te Metua, o tei faaau mai ia tätou ia au ia tätou te hoê tufaa i te âià o te feiä moà i te ao ra. 13 O tei faaora ia tätou i te värua mana o te pöuri, e ua tähiti ê mai ia tätou i roto i te Pätireia o ta na Tamaiti here ra; 14 no na i noaa ai to tätou ora, te hara i faaòrehia ra, i to na ra toto.

Te huru o te Metia e ta na haa

15 O te huru mau o ia o te Atua hiò-òre-hia ra, o tei fänau na i te mau mea atoà i hämanihia ra. 16 Na na hoì i hämani i te mau mea atoà nei, o to te raì, e to te fenua nei, o tei ìteä ia hiò ra e tei òre i ìteä, te feiä teröno, e te feiä hau, te hui-arii, e te feiä mana. E mea hämani- anaè-hia ia e ana, e no na anaè. 17 E o mua ä hoì o ia i te mau mea atoà nei, e o ia të mau i te mau mea atoà nei. 18 E o ia hoì te upoo o te tino ra o te Ètärëtia nei; o te mätamua o ia, te mätahiapo o te feiä i pohe ra, ia hau ê atu ä o ia i te mau mea atoà nei. 19 E mea tià hoì i te Metua e ei roto ia na te î i te mau mea atoà ra vai mau atu ai. 20 E ia faafaite hoì o ia i te mau mea atoà ra ia na iho i roto ia na ra, i te hau i noaa i te toto o to na ra tätauro; to te raì e to te fenua nei, ia faite ä ia na.

Ruta èv 23.35-43

35 Te tià noa ra te taata atoà i te hiò-noa-raa atu. Ua tähitohito atu ra te mau tävana e te taata atoà ia na, nä ô aè ra Ua faaora hoì o ia ia vëtahi ê, o te Metia o ia te here a te Atua ra, a faaora o ia ia na iho  36 Ua tähitohito atoà atu ra te mau faèhau ia na, e haere atu ra, hopoi atu ra i te vineta na na, 37 nä ô atu ra: O te Arii òe o te âti-Iüta ra, a faaora ia òe iho  38 E päpaìhia iho ra te hoê parau i nià aè i ta na upoo, i te parau Herëni, te parau Röma, e ta te Hëpera O TE ARII TEIE O TE ÂTI-IUTA. 39 Ua tähito atu ra hoì ia na te hoê i taua puè taata rave parau ìno i faatätauro-atoà-hia ra, nä ô atu ra O te Metia òe ra, a faaora ia tätou  40 Ua àvau mai ra rä te tahi, nä ô mai ra Aita o òe mataù i te Atua tei pohe atoà hoì òe hoê ä huru. 41 E mea tià rä to täua pohe, o te utuà mau hoì teie i ta täua i rave; âreà teie nei taata, aita roa a ana e parau ìno. 42 Ua parau atu ra o ia ia Ietu E te Fatu, e haamanaò mai òe ia ù ia tae òe i to òe ra Pätireia. 43 Ua parau mai ra Ietu ia na Ei parataito ia òe e o vau atoà i teie nei ä mahana, oia mau ta ù e parau atu ia òe nei.

Manaò.

 E faaineineraa rahi teie e tupu nei i roto i teie mau taiòraa. Ma te tuu i te òhipa e vai nei ia ìteähia te faanahoraa a te Atua ia ora te nunaa. I te mau faatîtîraa e rave rahi i nià i to na mau tävini. Te raveà ta te Atua i faaòhipa, mauti ra ia, te haaputuraa te fetii o Tavita i te vahi hoê. Tei faaìtehia na roto i teie parau e, inaha mätou, o to òe ivi, e o to òe ia ìò, Tämuera piti pene 5 i te ìrava 1 i te vahi hopeà. E hohoà teie no te âmuiraa te hoê ôpu fetii i te vahi hoê, ma te haapäpü maitaì te tumu o te âmuiraa. Teie putuputuraa i faatupuhia e te Atua i Heperona no te faatahinu ia, ia Tavita ei Arii no Ìteraèra, oia hoì, èi upoo no te nunaa o te Atua. Teie upoo ta te Atua i faatahinu, o te arataì ia i te mau tïtï i rapae i te mau hämani- ìno- raa e tupu ra, i roto i to na nunaa. O ia te faaora i te mau hämani-ìno-raa atoà. Ia tià  te òhipa a te Atua ia vai i nià i te reni, no te òaòa. Tei faaìtehia na roto i te itoito o te ueueraa, ia vai ta mau maite te ora. No te àià o te feia moà, tei vai te mana o te Atua i nià iho. Ei faatupuraa i te faaòreraa hara, i te feia atoà e tïtau nei i te haamaitaìraa a te Atua. Te feiä atoà e ìte i tei òhipa, e pii rätou i te Atua, e ta ù Metua. E faaroo mai te Atua i to rätou reo, i roto i te mau taime ahoaho. Ua tupu anaè mai teie te huru, e täpaò faaìte tei reira te Atua i te haamoriraahia ra, ua ìte o ia i te aroha i te taata, o tei parauhia te here a te Atua. Taua here ra, o Ietu Metia ia, tei riro èi upoo no te Ètärëtia, e aita e parau tià òre o roto ia na. Oia tei faaäriihia i nià i te mau nunaa atoà o te ao nei, te Arii no te Mau Arii. I faaäriihia ai  O ia e Pirato, ma te papaì i nià aè i to na upoo, i nià i te tätauro, o TE ARII TEIE O TE ATI IUTA. Hau roa atu te reira na roto i na reo e toru Herëni, Roma, Hepera, e i teie mahana tei roto ia i te mau reo atoà, tei fauraòhia e te mau huriraa pipiria e ravehia nei. Na teie mau òhipa i tupu i nià i te tätauro, e faaìte i te mau taata faaroo atoà e o Ietu te upoo o te Ètärëtia, o ta Pauro ia e faaìte nei i to Torota. E ìtehia teie mau parau i te türamaraa o na taiòraa e mäha no teie mahana.

Taramo 122, 9 No te fare o to tätou Atua te Fatu e tämau ai te ìmi i te maitaì no òe ra.

2 Tämuera 5, 1 Ua parau atu ra ia na, nä ô atu ra, inaha mätou, o to òe ia ivi e to òe ia ìò.

Torota, 1, 13 O tei faaora ia tätou i te värua mana o te pöuri, ua tähiti ia tätou i te Pätireia o ta na Tamaiti here ra.

Ruta èv 23, 41 âreà teie nei taata, aita roa a ana e parau ìno.

Ia au ra te faaìteraa a te Parau Maitaì o Ietu i päpaìhia e Ruta i te pene 23 i te mau ìrava 35 e  tae i te ìrava 43.

Teie te tahi pae taata e faahitoatoa nei i te tino o Ietu, èi faaìteraa i to rätou mauruüru òre, i te òhipa i faanahohia no te patireia o te Atua. To rätou manaòraa, o Ietu e taata hämani- ìno teie i to rätou nunaa, eita e tià i te mau haapiiraa tei horoàhia i roto ia rätou. E tià ia parauhia e, ua paremo teie pae taata ia au i ta te paieti òre tiàturiraa. Ietu no rätou, e taata ia tei fänauhia mai no te faaìte i te tahi mau òhipa taa ê mai te hoê tahutahu ra te huru ua oti atu ai. Eiaha ra ia au ta te Atua faanahoraa, te tià ia ravehia no Ietu e faatätauro.

Areà ra no te tahi pae, te puta pü nei to rätou âau i te òhipa e tupu nei aita e òre te vai nei, te òto‑haa ra, te paìpaì ra i to rätou ôuma ma te rnäuiui rahi i te òhipa tià òre i ravehia i nià ia Ietu. Te itoito o teie mau taata eita e tià i te faaau, i roto i to rätou òto rahi noa atu to rätou faaìteraa o te Tamaiti mau teie a te Atua. Aita rätou e faaruè nei i te Fatu, noa atu te mau päira o te taura hui i nià i to na tino, e te mau pariraa tià òre. O Ietu, oia mau te àito ta te Atua i faatahinu no te haamarua i te mau patu tei faataa ê i te taata i te òaòa o te Atua. O te òhipa ia e tupu ra i te pae tätauro o Ietu, te vai ra te tahi mau taata te òaòa ra, i te mauruüru i teie òhipa ma te tauà òre. Te vai atoà nei ra te mauiui nei ma te òto rahi, no rätou aita i tià no Ietu teie pohe. Ua àmaha te ao nei i mua i te tätauro o Ietu, hoê no te puai taata, e te tahi no te puai o te Atua.

Teie o Ietu i nià i te tätauro i ropu i na tätauro no na taata hämani ìno o Ietu te taata moà e te parau tià ua faautahia i nià i te raau faaìnohia ra, ua ìritihia to na àhu, e maa tihere, e te hei taratara, to na, e ua mähae te iò no na rima e no na àvae i te naero. I teie taime aita te àvae o Ietu e ü faahou nei i nià i te repo fenua, tei ropu oia i te fenua e te raì, e ua motumotu to na tino i te mau ìravarava i te riri mäha òre o te taata nei.

I te pae àui e te pae àtau no Ietu e na taata ia tei rave i te tahi mau peu tià òre, ia au i te faanahoraa a te Hau Roma.

Te hoê o teie na taata, ua tähitohito mai ra ia Ietu, ma te parau e o te Metia òe ra a faaora ia tätou. Teie manaò aita atoà i ateä roa atu i to te mau tävana e te mau faèhau, ua faaora hoì o ia ia vëtahi ê, o te Metia O ia te here a te Atua ra. Oia mau, ua faaora oia ia vëtahi ê, eita e tià ia faaora ia na iho. E parau mau roa te reira e aita teie mau ènemi i manaò e, o te parau mau ta rätou e faatià ra. Ua faaìte mau o Ietu i to na mana faaora i Ierutarëma, e i Tarirea, ua faaora e ua faatiàma i te mau maì, ua faatià faahou i tei pohe roa. E faaora i to te ao eiaha ra ia na iho. Te horoà nei oia i to na ora èi hoo no te taata e rave rahi. No to na hinaaro i te faaora ia vëtahi ê, i òre ai o ia i faaora ai ia na iho, no te mea O ia te Ora Mure Òre.

I nià aè i te upoo o Ietu, ua haamauhia te hoê ìri päpaì ma te iòa i nià iho, O TE ARII TEIE O TE ATI IUTA. Ua päpaì o Pirato i teie parau, i te mea te pariraa ia i pärihia o Ietu, na roto i na reo e toru tei parare i taua ànotau ra, te reo Hepera, te reo Herëni, e te reo Ratino. Na roto i teie päpaì, te faaìno nei o Pirato i te Àti ­Iuta, e te faateitei nei oia i te toroà Arii o Ietu, i te aro o te mau nunaa o te ao. I ô nei te haamata nei to Ietu upootiàraa i nià i te ao, te riro nei ia te raau o te faaìnoraa, ei teröno hanahana no te Fatu.

I te pae àui e te pae àtau o Ietu, o na taata ia tei faautuàhia i te utuà teimaha no te pohe, e o Ietu i ropu ia, ia raua.

Te taata i te pae àui, te faaroo nei oia, e te ìte nei i te faaìnoraa e parauhia nei no Ietu. E ua faatupu aè ra o ia i roto ia na iho i te tahi mau manaò tià òre, ma te parau atu ia Ietu e, o te Metia òe, a faaora ia òe iho, e faaora ia tätou. Te reira anei te manaò e tià ia parau i te hoê taime mauiui, e te peàpeà rahi. Eita, te mea ra e ani, te haamaitaì ia e te faaòreraa hara a te Atua. E aore ia e mämü noa i mua i te pohe e fatata ra ia na. Aita ia o ia i hiò i te päpaì, i päpaìhia i nià i te upoo o Ietu, e aita atoà o ia i faaroo i teie reo aroha i te parauraa e, E ta ù Metua a faaòre mai i ta rätou hara, aore hoì rätou i ìte i ta rätou e rave nei. No teie taata, ua moèhia ia na te Atua i te taime no to na poheraa. Aita oia e manaò nei e, te vai nei te Atua e tià e faaora i to na Varua.

Tei pïhaìiho i te Faaora o teie ao, ma te faaòrehia ta tätou mau hara. Areà ra no teie taata e pohe o ia ma te haamaitaì‑òre‑hia, ma te tätarahapa òre, e ma te roaa òre te ora mure òre ia na.

Areà ra te taata i te pae àtau, ua faaroo i te mau parau tià òre a to na hoa Ua  àvau atu ra, i te parauraa e, aita o òe e mataù i te Atua tei pohe atoà hoì òe hoê- a- huru ? E mea tià teie i ta taua i rave, àreà teie nei taata, aita roa a na e parau ìno. I roto i teie taata te tupu nei te hoê hihi no te tiàturiraa, i te mau parau ta na i faaroo mai roto atu ia Ietu. I te mea, aita roa o Ietu e ìmi nei i te tahi mau parau no te faaìteraa, eita e tià ia na teie pohe. E aita atoà ta Ietu e pariraa i te tahi e i te tahi. Ta Ietu ra i rave e ìmi i te mau raveà atoà ia faaòrehia te hara a te mau taata atoà tei tätarahapa. Oia mau, o te tere mätamua ia o Ietu, aita o ia e hinaaro te pohe o te taata te ora ra. I nià i te tätauro teie a o Ietu e poro nei te Èvaneria hanahana a te Atua. Aita o ia e haapaò nei te motumotu o to na tino, eita e tià ia na ia haùti ua mau o ia i te pätitihia, to na ra Varua e to na vaha aita ia i mau i te pätitihia. Te reo mai ra o te taata i te pae àtau, E te Fatu, e haamanaò mai òe ia ù ia tae òe i to òe ra Patireia. E reo faahiahia mau to teie taata, te ìteraa o ia i to na faufaa òre i mua ia Ietu. E te ìteraa e, eita e tano ia Ietu i teie pohe, e tano ra ia na e to na hoa. Aita o ia e tiàturi nei e taata òhipa ìno o Ietu te tiàturi nei ra o ia e, o Ietu o ia te Tamaiti a te Atua Nui Tumu Tahi. E tià ia Ietu i te faaora ia na, i to te pohe mure òre e fatata ra ia na. Ua faaitoito teie taata i te ani ia Ietu ia haamanaò ia na, i te mea tei pïhaìiho roa te Atua ia na. Eita e täpitihia teie òhipa, e taime maitaì aè teie i te ani roa. I tià ai ia Ietu i te pähono e, Ei parataito ia òe e o vau atoà i teie nei â mahana, oia mau ta ù e parau atu ia oe nei.

Te pähonoraa a Ietu i ô nei aita roa e faaäuraa parau, te horoà nei o Ietu i te manaò tià, ma te haamarirau òre i teie mahana eiaha ra i te tahi atu mahana ê. Na roto i teie parau te vai puai noa ra te aroha o Ietu i to na taata tupu. Ma te arataì ia na i roto i te parataito te vahi i reira te mau tamarii a te Atua e faaea ai, te feia i here i te Atua. Teie vahi o te FAAROO anaè te tumu e tae ai te taata i reira. Teie ia te òhipa e tupu nei i nià i te tätauro, teie o Ietu e poro nei i te Èvaneria i na taata i pïhaìiho ia na. Teie ia to raro i to na tätauro e tähitohito nei i to na tiàraa ATUA. Te vai atoà ra te faaoôo ra, te taì ra eiaha no te mea o te Tamaiti teie a te Atua. Te taì nei rätou i te hoê taata tei here i te mau huru taata atoà, e tae noa atu i to na mau ènemi. O vai te tià e tïtau i te hoê taata i o na ma te mätau òre? O Ietu anaè te Metia, te Arii no te mau Arii te tià e tïtau i te mau taata tei tätarahapa i roto i to na patireia. E toru tätauro tei pätiahia i nià i te mouà ra no Toratota. I ropu na taata òhipa tià òre, o Ietu i roto i to na mamae rahi. I to na pae àui, e te pae àtau na taata tei faautuàhia ia pohe hoê atoà ia o Ietu. Te manaò o Ietu e faaora oia na taata toopiti. Hoê ra e topa ia i roto i te pohe mure òre, i te mea aita o ia i tätarahapa. Areà ra te tahi ra e färiihia ia o ia i roto i te parataito e Ietu.

I teie mahana, tei te hea pae tätou i te tätauro i te pae àtau, e aore i te pae àui. Te tätauro e aha to na auraa i teie mahana? no te faanehenehe noa nei ra i te fare Pure? I te fifi àrapoà? No te pätia anei i nià i te mouà?

Ta te Atua ia au ta Ìtaia faaìteraa i te pene 53, 4. Ua rave mau ra o ia i to tätou paruparu e ua hopoi ê oia i to tätou òto, ua parau ra tätou ia na e, täìri utuà to na, mai te taata täìrihia e te Atua i pohe ai ra.

Te riro nei te Tätauro e te poheraa no Ietu e faaìteraa na te Atua i to na riri tahoo i te taata nei. Ia riro mau ia te mahana poheraa no to tätou Fatu èi mahana òtoraa, èi faaìteraa ia tätou paatoà e no tätou o ia i pohe ai, e no ta tätou mau hara, e no to tätou mau àti i na reirahia ai o ia. Teie ra, na roto i to te Atua faautuàraa i ta na Tamaiti no tätou, ua hinaaro atoà te Atua i te faaìte ia tätou i to na aroha taui òre. O ta na anaè Tamaiti te tià ia amo i ta na hara na tätou ra, eita roa e maraa ia tätou te reira. Ua riro taua faautuàraa na te Atua ra, i ta na Tamaiti hara òre, èi haamäharaa i to na riri e èi faaìteraa i ta na iho parau tià. No te mea e ua pohe mau Ietu i nià i te Tätauro, ua ìte atoà tätou i te täpaò no to te Atua aroha e to na nounou ia tätou. E tiàfaahou mai ra Ietu. No reira, ia riro te märamarama no taua tiàfaahouraa mai no na ra, èi haamanaòraa na tätou i te parau rahi teimaha no te Tätauro e no to na poheraa. Te faahiti nei hoì te mau Èvaneria e, ua âfaìhia o ia i roto i te hoê menema, e ua ôpanihia i te hoê ôfaì teimaha roa. Te faaìte‑atoà‑hia nei i roto i te hiroà faaroo e, ua faatataurohia o ia, ua pohe e ua tänuhia, e ua pöu oia i raro i te pöiri. Na roto i teie nei parau, aita roa i ravaì maitaì te mau haapäpüraa, ia au i ta te parau na te Atua i faaìte mai, hou aè a riro ai taua vahi pöiri ra ei vahi no te mau pohe mure‑òre. I tià ai, ia Ietu i te färii ia pöu i raro i te vahi haehaa roa raeà‑ore‑hia i te manaò taata. Èi raveà e ìtehia ai, e parau ai to na hau i te mau vahi atoà, ia parare to na hau i nià i te teiteiraa no te mau raì, i nià i te fenua, èi raro aè i te fenua, e ia riro èi tiàturiraa na te taata atoà, te fëia e ora nei. Teihea tätou e to te Ètärëtia, i te pae àui, e aore ra i te pae àtau.

Èi ìrava tauturu, Hepera 9, 28 vh. E e fä mai ä O ia o te piti ia o te färaa mai, eiaha èi taraè hara, ia ora ra te fëia e tiaì ia na ra.

Teraì òr. Faatura.