Mātaio 5.13-16 Ora.

Tāpati 9 no Fëpuare 2020.

Ora.

Taramo 112

1 E haamaitaì i te Fatu E ao to te taata i mataù i te Fatu ra, tei riro roa to na âau i ta na parau. 2 E mana hoì to na huaai i te fenua nei, e maitaì hoì te tamarii a te feiä parau tià ra. 3 E àtuàtu tei to na fare e te taoàhia, e tià hoì ta na parau tià i te vai-mäite-raa. 4 Ei te pöuri nei e hiti mai ai te märamarama i te feiä parau tià, e te hämani maitaì, e te aroha, e te piò òre. 5 E hämani maitaì to te taata maitaì, e horoà ta na ia tïpeehia mai, e rave o ia i ta na mau peu atoà ra mä te haapaò 6 E òre roa o ia e àrori; e manaò-tämau-hia te feiä parau tià, e a muri noa atu. 7 E òre o ia e mataù i te roo ìno ra; ua mau to na âau i te tiàturiraa i te Fatu. 8 No te mea ua itoito ta na âau, e òre o ia e mataù, e ìte noa atu o ia i te hiàraa o to na mau ènemi. 9 Ua ôpere noa o ia, e ua horoà hua na tei veve ra, e tià ta na parau tià i te vai-mäite-raa. E faateiteihia to na tara mä te tura ra.10 E ìte te paieti òre mä te òto, e àuàu to na niho, e mou atu ra. Te tiàturiraa o te paieti-òre ra, e mou ia.

Ìtaia 58.7-10

7 Èere änei ia tufahia ta òe mäa i te feiä i poìa ra; e ia ärataì i te taata rii i àti ra i to ùtuafare? E ia ìte òe i te veve ra, ia faaàhu atu òe ia na, e eiaha òe e täpuni i to òe iho ra hoì tino? 8 Ei reira to òe märamarama e püroro noa mai ai mai te poìpoì ra; e e àti vave hoì to òe ra mau puta; e nä mua hoì to parau tià ia òe i te haere; e te hanahana o te Fatu te pee mai ia òe ra. 9 E parau òe i reira, e nä te Fatu e parau mai; na òe e tiàoro, e nä na e parau mai e, Inaha, teie Au. Ia faaruè òe i te tuto i roto ia òe ra; i te töhuraa i te rima, e te parau ìno ra; 10 ia hopoi mai òe i ta òe mäa nä tei poìa ra, e paìa aè ra te taata i roohia e te àti ra, ei reira to òe märamarama e hiti mai ai i roto i te pöuri, e to òe ra pöuri e riro mai te avatea ra.

1 Torinetia 2.1-5

Te faaìteraa i te Metia i faatataurohia

1 Ia ù hoì i haere atu ia òutou na, e a ù mau taeaè, aore au i haere atu mä te parau ahaaha e te paari, i te parauraa atu ia òutou i te Èvaneria o te Atua. 2 Ua ôpua mäite au e, aita roa a ù parau e faaìte atu io òutou na, maori rä o Ietu Metia e o ia i faatataurohia ra. 3 E paruparu hoì to ù, e te mataù, e te rürütaina rahi io òutou na. 4 Eere hoì ta ù parau e ta ù aòraa i te parau täparu no te paari o te taata nei, i parau atu rä vau mä te faaìte päpü a te Värua e te mana. 5 ia òre to òutou faaroo ia faatumuhia i te paari o te taata nei, i te mana rä o te Atua.

Mātaio 5.13-16

Te miti e te märamarama

(Mär 9.50; 4.21; Rut 14.34-35; 8.16; 11.33)

13 O òutou te miti no te fenua. Âreà ia mäàro te miti ra, e aha te mea e àvaàva faahou ai? Ua riro ia ei mea faufaa òre, e faaruèhia e e taataahihia e te âvae taata.14 O òutou te märamarama o teie nei ao. E ôire tei faatiàhia i nià i te mouà ra, eita ia e moè. 15 E òre hoì te taata nei e tütuì i te rämepa a tuu ai i raro aè i te färii, ei nià rä i te vairaa; ia märamarama to te fare atoà ra.16 Oia atoà to òutou märamarama, ia ànaana ia i mua i te aro o te taata, ia ìte rätou i ta òutou mau òhipa maitataì, e ia faahanahana rätou i to òutou Metua i te mau raì ra.

Manaò.

Taramo 112, 4 Ei pöuri e hiti ai te märamarama i te feiä parau tià, te hämani maitaì, te aroha, e te piò òre.

Ìtaia 58, 10 ia hopoi te mäa nä tei poìa ra, e paìa te taata i roohia te àti ra, ei reira te märamarama e hiti ai i roto i te pöuri, te pöuri e riro èi avatea.

I Torinetia 2, 5 ia òre to òutou faaroo ia faatumuhia i te paari taata, i te mana rä o te Atua.

Mätaio 5, 16 Oia atoà to òutou märamarama, ia ànaana ia i mua i te aro o te taata, ia ìte rätou i ta òutou mau òhipa maitataì, e ia faahanahana rätou i to òutou Metua i te mau raì ra.

Teie te huru no te haapotoraa o na taiòraa e maha, te mea e faaroohia te mau parau ia i muri nei, te märamarama, te pöuri, te ànaana, te miti, te fenua, e te faahanahana. Mau parau tumu teie no te täuturu i to tätou faaroo ia òre ia mäaro i roto i te pöuri. Te taiòraa e tià e turäma ia tätou teie ia, i papaìhia e Mataio i te pene 5 i te ìrava 13 e tae i te ìrava 16. No te mea e 4 noa  puè ìrava tei täpeàhia mai no teie parau tuatapaparaa i te feia e ìmi nei i te maitaì i roto i te mau hinaaro o te Atua no te taata. No reira e tià ia  taiòhia  teie pene parau e 5 taime e aore ra 10 taime, e aore ra hau atu no te faaroo päpüraa i te tïtauraa e piihia nei e Ietu. I te mea te parauhia nei to tätou parau e te feia faaroo, to na huru i te fenua nei, e to na huru i te ao nei. Na roto ia i na faufaa e piti e faahitihia nei, te MITI, te MARAMARAMRA, e na maitaì teie hoê te tano ia täpeàhia e te rima taata mauti ra ia te  MITI, àreà te tahi ra te MARAMARAMA, eita ia e mou i roto i te rima ia täpeà, e turäma ra o ia i te taata ia rave i te èà e tano ia haere. Te horoà-atoà-hia nei i hea roa e òhipa ai teie na faufaa e piti, hoê i te fenua nei, te taata teie e parauhia nei i te hiòraa i to na repo te maitai ra nei e aore ra aita, oia hoì  to na tino e te faufaa e vai ra i roto. Te piti te ao nei, te mau taata teie e parauhia nei, ia ìte ia te taata tätaì tahi i te tià i te vahi i reira e ìtehia to te tahi faaturaraa i te huru o te tahi ia noaa te parau o te tiàturiraa i te paieti òre.( Taramo 112 : 10).

Te parau no te taiòraa. Mataio 5 : 13 – 16.

Ietu, i roto i ta na mau haapiiraa, e rave rahi mau hohoà o ta na e rave, no te faaòhie i te faaharuraa i te manaò i te hinaaro e tïtauhia ra. Te mau hohoà-iho-ra matarohia e te taata i roto i te ùtuafare. E tei ìtehia i te mau mahana atoà, täpeàhia e te rima, e aore ra tei faahiò-noa-hia. Te tumu o Ietu i rave ai teie mau hohoà, no te faaìte ia, e ia òhipa te taata te mau maitaì e vai ra i mua ia na, e i roto i to na oraraa, no te faanavaì. Te tahi ra mau taime, e rave nei o Ietu te mau hohoà ìte-òre-hia e te mata taata, e tei òre te rima e täpeà mai to na iho patireia, tei faaau-noa-hia e au te patireia o te Atua i tera faufaa e tera faufaa. Teie huru ra, aita ia e faaòhie nei te feruriraa, te faatiàturi nei ra o Ietu i te taata ia ìte. Mai te tahi mau parapore, haapunihia te auraa o te parau, i muri mai i te hohoà e faahitihia ra. E na te taata taiò ia e ìmi e aha te tahi auraa. I roto i te mau faahitiraa parau e ravehia nei e Ietu, mea pinepine roa O ia i te faahiti te parau no te ora e te pohe, te märamarama e te pöuri, te patireia e o hate, ei faaìteraa ia haapaò mai te, i te mea aita te faaìno e atea nei i te haamaitaì.

O te auraa ia no te parau ta Ietu e faahiti nei, ÒUTOU TE MITI O TE FENUA, te miti e auahi tei ìritihia mai roto mai i te pape no te moana nui a hiva, tei àua haaàti i te mau fenua atoà, e aita to na e hopeàraa. Tei na poro e maha o te ao nei to na vairaa. Mea paruparu, e mea puai, mea purehu, e mea paari. Tei täpeà i te maitai ia òre ia ìno, e tei òre i täpeà no te horoà i te ìno. I te vahi no te maitaì ua maitaì ia, te vahi no te ìno ra ua ìno ia.

Te tïtauraa ra a Ietu i te mau pipi no te miti no te haamaitaì ia. Ia òre e taataahihia e te àvae taata i te mea ua òre te maitaì. Te àanoraa teie, te òhipa ta te mau pipi e rave no te Atua, i te mea ua î, te tahi mau vahi o te ao nei i te ènemi.

ÒUTOU TE MARAMARAMA O TE AO NEI, e parau maere teie ta Ietu, i te mea o ia iho te märamarama o te ao. Oia tei ànaana i roto i te mau vahi pöuri. Teie rä, e riro te mau pipi ei märamarama ànaana na roto i te Metia. Te àve pitihia nei e Ietu te miti e te märamarama, no te aha, e aha te tumu ? Teie ia, tei raro aè te mau pipi i te maru pererau o te Atua i te vairaa. Oia hoì i reira e faatumu ai te mana o te Atua, i reira atoà te täuturu e noaa ai. No te òhipa i te miti i te vahi aita e miti, te märamarama i te vahi aita e türamahia ra. Tei reira te faaìteraahia te feia tei piihia e Ietu Metia.

O ‘’ÒUTOU’’ O vai teie ÒUTOU ? Te parau ia a Ietu, o vai te tià e färii i teie parau mai te hoê faaueraa ra te huru, tei òhipa i te mau vahi aita e ìtehia nei te hanahana o te Atua. O te pähonoraa e tano ia parau te taata tätaì tahi, O VAU teie, oia hoì èi faaìteraa ua tae mai  taua reo ra, e ua faaroohia, e ua òhipahia. I taua taime ra, te noaa ra ia i te taata, i te tuu ia na i mua i te parau no te miti, e te märamarama. Ia tae te taata i nià i teie faanahoraa,  te ora rä ia tätou i roto i te òpuaraa ta Parau Maitaì e tïtau mai nei ia tätou.

Te faufaa o te tumu parau.

No te aha te miti ?

Ia ânoìhia i roto i te maa èi horoàraa i te âminamina ia àmu, e täpeà atoà o ia i te iò maa ia òre ia tähuti. Te mau faanahoraa mätauhia e tätou i te òhipa i roto i to tätou oraraa. Teie te huru no te faaìteraa a te faufaa mätamua i te miti, i roto i te faaäuraa mätamua e 7 tumu òhipa e haafaufaa ra i te miti.

1)      No te faatupu ia i te hoê parau tütuu i ropu i na taata toopiti, ma te àmu i te miti. No te haapäpü maitaìraa i to raua täamuraa te tahi i ta tahi. E àore ra i te Atua. (Numera 18 : 19 ).

2)      E pîpîhia te tutia i te miti, ei faaìteraa i to na maitaì. Ta te Revitito ia e faaìte ra i te pene 2 i te ìrava 13, e haamiti atoà òe i te mau tutia, i ta òe tutia àmu.

3)      E ânoìhia te miti i roto i te mau haaputuraa noànoà ra èi faaìte i to na maitaì e to na moà. ( Etoto 30 : 35 ).

4)      Te mau ôroà i te fare pure, e rave-atoà-hia te miti èi täpaò no te tähuti òre o tei tuuhia i roto i te mau haapuèraa maa. (Etera 7 : 22).

5)      E taurumihia te àiü fänau àpi i te miti, eiaha èi faaìteraa no te mä, èi faaìteraa ra i te hoê peu tei ravehia e te nunaa o te Atua ia au te faaìteraa a Etetiera.

6)      E faaora te miti i te puna pape, te òhipa ia ta Eritaia i rave i te pihaa i Ierito. Mau Arii piti pene 2 ìrava 20 e te 21. E hopoi mai i te tahi päni àpi a tuu ai te miti i roto, ua haere atu ra o ia i te pihaa o taua pape ra, e ua huri atu ra te miti i roto, e ua na o aè ra, te na o mai ra o Iehova, ua faaorahia e au teie nei pape.

7)      Ia tupu ia te àroraa, e aore ra te tamaìraa, te òire e hià, e ueuehia te miti i nià iho ei faaìteraa e aita e ènemi faahou to reira. Mau Tävana pene 9 i te ìrava 45, haaparari  atu ra i te òire i raro, e ua ueue atu ra hoì i te miti.

Te faaìteraa teie na te faaäuraa mätamua, i na faanahoraa e 7 o te miti. No reira aita tätou e maere nei te tumu o Ietu i faariro ai ia tätou èi miti no te fenua nei. Tei roto ia i tera manaò e, e noaa i te taata, te paari, i te îraa i te mau faanahoraa a te Atua, e te mä ei faaìteraa i te tiàmaraa no te mau tamarii a te Atua. O te hiòraa ia teie a te faaäuraa àpi, te miti e täpaò  ia no te paari, e te îraa i te maitaì a te Atua.

Ia ânoìhia te miti i roto i te mau maitaì no te tino, eita e ìtehia o te au noa ra te haapoupouhia e te taata e färii ra, tei tano i to na hinaaro. To na auraa ra te miti, e horoà ia oia i te au i te mea au òre, te maitaì i te mea tähuti, te ora i te vahi pohe. Ia rahi anaè te miti, eita ia no te miti te hape no te taata faatano ia te hape, i te  tano òre ta na fäito.

ÒUTOU TE MARAMARAMA O TE AO NEI.

Te faaìteraa a te Tenete pene 1 i te ìrava 3 e faaea i te 5 o te òhipa mätamua ia ta te Atua i Parau, te märamarama. E ua maìri O ia i to na iòa i te ao. E i roto  i te Ioane pene 8 i te ìrava 12, te parau nei o Ietu e o vau te märamarama o teie nei ao, o tei pee mai ia ù ra e märamarama ora ia to na. Ia au i teie reo no Ietu, te haafaufaa nei O ia i te taata tätaì tahi, i te märamarama e vai i roto i tera e tera. To na auraa ra aita roa te hoê i ère i teie faufaa, mai te mea ua ère te hoê i teie faufaa, eita ia na te Atua i hämani ia na.

Ia au i na parau e piti nei, e tià roa ia parauhia te tumu no te märamarama mai roto mai ia i te faanahoraa a te Atua. O ta Ietu i òhipa èi ärataìraa i te taata i nià i te faanahoraa o te ora. O te pure ia a Tavita, o Iehova to ù märamarama, e to ù ora. (Taramo 27 : 1). To na auraa ra te tumu o te märamarama ra noo mai ia i te Atua ra. Na teie märamarama e faaìte i te maitaì o te ao nei, o tei òre roa e tià i te tahi atu mau faanahoraa ia faaö mai i roto. I te mea o te Atua teie e türama nei i teie ao. Eiaha  noa ra na roto i te ànaana o te mahana, e te nehenehe o te âvaè e te mau fetià. Na roto atoà ra i te märamarama o ta na ture, tei tae roa to na hihi i te mau vahi haamoriraa a to na nunaa i te fare pure. No reira te ture a te Atua o te rämepa ia tei türama i to na fare, òire faatiàhia i nià i te mouà. Tei haamäramarama i te fenua, tei rapaauhia e te miti, ia ora to te ao. E ôire tei faatiàhia i nià i te mouà ra, eita ia e moè. 15 E òre hoì te taata nei e tütuì i te rämepa a tuu ai i raro aè i te färii, ei nià rä i te vairaa; ia märamarama to te fare atoà ra.16 Oia atoà to òutou märamarama, ia ànaana ia i mua i te aro o te taata, ia ìte rätou i ta òutou mau òhipa maitataì, e ia faahanahana rätou i to òutou Metua i te mau raì ra.

Terai or. Faatura.

    

Ruta èv 2.22-40 Èpa

Tāpati 2  Fëpuare 2020.

Ôroà.

Èpa

Taramo 24

1 Taramo na Tävita. No te Fatu te fenua e te î atoà i nià iho, te mau fenua o te ao nei, e te feiä atoà e pärahi i reira. 2 Na na ia i faatïnana i te reira i te miti, e ua haamau o ia i te reira i te moana. 3 Nä vai e paiùma i te mouà o te Fatu. O vai të tià i to na ra vähi moà? 4 Te taata rima mä ra e te âau maitaì o tei òre e faahiti i to na värua i te parau haavare, aore hoì i tapu mä te haavare. 5 To na te maitaì e noaa mai no ô i te Fatu ra, e te parau tià no ô i te Atua o to na ra ora. 6 O ia te feiä i ìmi ia na; o tei ìmi i to mata, e te Atua o Iatöpa. Tera.7 E faateitei na ia òutou, e te mau ùputa e, e ia faateitei-atoà-hia òutou, te mau ôpani vaiiho taìàtä e, ia ö atu te arii hanahana i roto na 8 O vai teie nei arii hanahana. O te Fatu ia o tei mana e te püai; o te Fatu ia e mana i te àroraa ra. 9 A faateitei na ia òutou, e te mau ùputa e, e ia faateitei-atoà-hia òutou, e te mau ôpani vaiiho taìàtä e, ia ö atu te arii hanahana i roto na 10 O vai teie nei arii hanahana. O te Fatu manahope ia, o ia taua arii hanahana ra. Tera.

Marati 3.1-4

1 Inaha, e tono vau i ta ù veà, e na na e haamaitaì i te èà i mua ia ù ra e te Fatu ta òutou e ìmi na, o te tae vave mai ia i to na ra hiero, te veà a te faufaa ta òutou i òaòa na inaha, o te tae mai ia, te parau mai ra te Fatu manahope ra. 2 E tià rä ia vai ra a faaòromaì ia tae i te mahana e haere mai ai o ia ra. E o vai te mau ia fä mai o ia ra? E au hoì o ia i te auahi a tämä àhu ra: 3 e pärahi mai o ia mai te tamä e te haamaitaì i te ârio ra e na na e tamä i te tamarii a Revi, e haamaitaì hoì ia rätou mai te àuro e te ârio ra, e nä rätou e hopoi mai i te tütia parau tià i te Fatu ra. 4 E riro te tütia a Iüta e ta Ierutarëma i te mea mauruüru na te Fatu i reira, mai tei te ànotau tahito ra, te mau mätahiti i mütaa iho ra.

Hēpera 2.14-18

14 E teie nei, no te mea e tino to te tamarii ra, ua rave atoà hoì o ia iho i te reira, ia na te pohe o ia i te faaère atu ia na no na te pohe nei, oia hoì te tiàporo ra; 15 e ia faaora hoì o ia i te feiä i tïtï i te mataù i te pohe e hope roa aè to rätou oraraa nei. 16 Aita roa hoì o ia i täpeà i te mau merahi, ua täpeà rä o ia i te huaai o Âperahäma. 17 I tià ai ia na ia faarirohia mai ta na mau taeaè te huru i te mau mea atoà ra, ia riro o ia ei tahuà rahi parau mau e te aroha noa i te mau mea a te Atua ra, ia tätara o ia i te hara a te taata nei. 18 E o ia iho hoì i pohe i te mea i roohia i te àti, e tià hoì ia na ia turu mai i te feiä i roto i te àti ra.

Ruta èv 2.22-40

Te faaìte-raa-hia o Ietu i roto i te hiero.

22 E hope aè ra o na puè mahana tämäraa i haapaòhia i te ture a Möte ra, hopoi atu ra rätou ia na i Ierutarëma e püpü atu i te aro o te Fatu ra. 23 Mai tei päpaìhia hoì i te ture a te Fatu ra e O te mau tamaroa mätahiapo atoà a te metua vahine ra, ua moà ia no te Fatu. 24 E e hopoi atu hoì i te tütia mai tei parauhia i te ture a te Fatu ra E piti ùupa, e aore ra, e piti ùuàiraò fanauà. 25 E inaha, tei Ierutarëma te hoê taata o Timeona te iòa, e taata parau tià e te haapaò maitaì, te tiaì ra i te haamähanahana no Ìteraèra, e tei ia na te Värua Maitaì. 26 E i faaìtehia mai o ia e te Värua Maitaì e eita o ia e pohe vave ia ìte rä o ia i te Metia o te Fatu ra. 27 E i ärataìhia o ia e te Värua i roto i te hiero; te hopoi mai ra nä metua i te tamaiti ra ia Ietu i roto, e rave i ta te ture ra ia na, 28 ua rave atu ra o ia ia na, ua hii iho ra, haamaitaì atu ra i te Atua, nä ô atu ra 29 E te Fatu, e tuu òe i to tävini i teie nei mä te hau, ua au hoì i ta òe parau. 30 Ua ìte aè nei hoì ta ù mata i te Ora na òe, 31 i haapaòhia e òe i mua i te mata o te taata atoà nei; 32 e tiàrama ei haamäramarama i te Ètene, e ei hanahana no to òe ra taata no Ìteraèra.

Te tohu a Timeona

33 Mäere iho ra Iotëfa e te metua vahine o Ietu i taua mau parau i parauhia e ana ra. 34 Ua faaora atu ra Timeona ia räua, nä ô atu ra i te metua vahine ia Märia Inaha, ua haapaòhia teie nei tamaiti ia hià to Ìteraèra e rave rahi e ia tiàfaahou mai to Ìteraèra e rave rahi; ei täpaò e märöhia 35 e e putapupü atoà to òe iho âau mai te puta hoto ra, ia ìteä te manaò no te âau taata e rave rahi.

Te perofeta vahine ra o Àna

36 E te hoê perofeta vahine ra o Àna, e tamahine na Fänuera, no te ôpü o Àtera. Ua ruhiruhiä o ia, e hitu o na mätahiti i te taòtoraa i te täne, ta na i faaipoipo i te pötiiraa ra 37 ua ìvi ra o ia a varu aè ra àhururaa o na mätahiti e maha tiàhapa, aore roa o ia i faaruè i te hiero, e tià rä i te haamoriraa i te Atua mä te pure e te haapaeraa mäa i te ruì e te ao. 38 E o ia i tomo mai i roto i reira ra, haamaitaì atoà atu ra i te Fatu, e ua parau iho ra ia na i te feiä atoà i haapapa i te ora i Ierutarëma ra.



Te hoìraa i Nätareta

39 E oti aè ra ia räua tei parauhia mai i roto i te ture a te Fatu ra, hoì atu ra räua i Tarirea i to räua iho ôire mau i Nätareta. 40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

Manaò.

Taramo 24, 1 Taramo na Tävita. No te Fatu te fenua e te î atoà i nià iho, te mau fenua o te ao nei, e te feiä atoà e pärahi i reira.

Marati 3, 1 Inaha, e tono vau i ta ù veà, e na na e haamaitaì i te èà i mua ia ù ra e te Fatu ta òutou e ìmi na, o te tae vave mai ia i to na ra hiero, te veà a te faufaa ta òutou i òaòa na inaha, o te tae mai ia, te parau mai ra te Fatu manahope ra.

Hepera 2, 17 I tià ai ia na ia faarirohia mai ta na mau taeaè te huru i te mau mea atoà ra, ia riro o ia ei tahuà rahi parau mau e te aroha noa i te mau mea a te Atua ra, ia tätara o ia i te hara a te taata nei.

Ruta Èv. 2, 40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

I roto i ta tatou taiòraa, te parau faufaa tei hiòhia mai e te manaò, o teie na färereiraa i roto pu i te ùtuafare o Ietu e teie na taata paari. Te taata mätamua o Timeona to na iòa, e taata parau tià e te haapaò maitai. E taata teie, i roto i te tiaìraa i te Faaora o te mau nunaa atoà. Tei reira ta na manaònaòraa i roto i to na oraraa, ua vai noa tera manaò i roto ia na oia hoì ia ìte ia Ietu hou a pohe ätu ai. E tiaìraa mäoro tei ravehia e Timeona, e te tuutuu òre i to na parahiraa i roto i te fare o te Atua i te mau mahana atoà no to na oraraa. Ia tae ra i te mahana e tià ai e hopoi i teie àiü i mua i te aro o te Atua ei haamaitaìraa, e tupu teie òhipa i te vaù no te mahana i muri aè te fänauraa. E faanahoraa teie na te âti-Iüta i te peritome i te mau tamarii tamaroa e ôroà tumu teie, e òaòaraa atoà na na metua. E i roto i teie ôroà, to Timeona ìteraa i teie àiü ta na i tiaì mäoro. Te vai àiü noa ra o Ietu, ua faatura teie taata paari ia na. Ua ìte atoà teie taata paari e o Ietu teie te Tamaiti a te Atua. Te päpu ra ia tatou i te rahi o te òaòa o teie taata. Te òhipa o ta na i tiaì noa na, te ìte ra o ia i teie nei. Ia haamaitaìhia te Atua no te reira. A hiò na tätou i te mau parau a teie taata paari i parau no Ietu.

-Te ora no te mau taata atoà (ir 30-31).

-E tiàrama no te mau êtene, e no Ìteraèra (ir 32).

Te färereiraa i roto pu ia Ana e te ùtuafare o Ietu, e mea taaê rii. Aita e parau ta Ana i parau no Ietu. Te vahi noa ta te päpaì èvaneria a Ruta e faaìte ra e perofeta o ia, e vahine tei haere pinepine i te hiero, e tei tämau i te pure e te haapaeraa maa i te ruì e te ao.

Teie na färereiraa, ua tupu ia i roto i te hiero no Ierutarëma. Ua haere o na metua i Ierutarëma no te püpü ia Ietu i mua i te aro o te Atua. E ua  tupu teie òhipa i roto i te hiero, o te tumu ia, i färerei ai rätou, Ua tano te haereraa o te ùtuafare o Ietu i te hiero e teie na taata paari. Ia haamaitaìhia te Atua tei faatupu i teie na färereiraa. E teie tau taata paari tei pärahi noa i roto i te tiaìraa e ia ìte i te Faaora o teie nei ao hou to raua poheraa. Ua faufaahia to raua tiaìraa, ua ìte raua ia Ietu.

No teie färereiraa, o Ruta èvaneria noa tei faatià i teie parau. Ua maìti o ia i te hiero o Ierutarëma ei pü no teie färereiraa. I roto i te oraraa o Ietu, ua riro te hiero no Ierutarëma ei vahi e haere pinepinehia e Ietu. Aita te hiero o Ierutarëma i riro noa ei vahi maitaì no Ietu. I roto i ta tatou taiòraa, ua riro teie vahi ei vahi färereiraa na Ietu i te Atua to na Metua, e ei vahi färereiraa i teie na taata paari. Te riro atoà teie na taata paari ei ìte mätamua no Ietu. Na te mau parau a Timeona i parau no Ietu e haapäpü mai ia tatou i te rahi e te hohonu o te faaroo o teie taata, ei pure haamauruüruraa na na i te Atua, tei färii e haamäoro i to na pue mahana i te ao nei no te ìte ia Ietu.

O Timeona e o Ana e hohoà te reira no te mau tävini tei pärahi noa i roto i te faaòromaì, tei horoà päpu ia raua no te maitaì o te òhipa a te Atua. Aita raua i ìte i te mau òhipa ta Ietu i rave, oia hoì ta na mau òhipa faaora mai e ta na mau haapiiraa, i te reira vahi ra ua tuàti noa ia tätou. Ua mauruüru noa raua i te ìteraa ia Ietu àiü. Te haapii nei ra teie taiòraa i te faufaa e vai ra i roto i te färereiraa te feia paari i te tamarii. Mai te tamarii e hiaai ra i te feia paari oia atoà te feia paari i te tamarii. Ia tuàti maitaì raua e tià ai, e tià atoà ia tätou ia parau, e ua ora o Timeona e o Ana i to raua faaroo i te ìte-noa-raa ia Ietu àiü. E ora atoà tätou i to tätou faaroo.

I roto i te hiòraa o ta tatou parau e tià ia parauhia e, e parau âpï òaòa teie e färereihia nei e tätou. Èi haapäpüraa no taeraa mai te  tumu o te ora, tei hiihia e te taata i nià i ta na ôuma no te taata faaroo. E i roto i te ôroà no te peritomeraa, oia hoì tei parauhia te ôroà no te tämaraa, i te ìteraahia te faufaa ta te Atua i horoà mai i te ao nei. I reira te àti-Ìteraèra e ìte ai te hanahana o te Atua i te pouraa mai. I reira atoà te hui arii e tuu ai i to rätou mau turi i raro, no te faaìteraa e, teie te Arii tei rahi aè i te mau arii atoà. Ua himenehia teie parau e te mau tamarii a Tora, ia au te faaìteraa a te Taramo 48. Inaha ua àmui te hui arii, ua haere atoà hoì rätou e rave. O te Atua nei ä hoi to mätou Atua e a muri noa ätu, e ärataì tämau ä hoi O ia ia mätou e tae noa ätu i te pohe ra. E riro atoà te parau no te tae raa mai o te Ora, ei faahiti mähutaraa i te taata taua tau ra, oia hoì te Färaa mai o te Tamaiti a te Atua.

Te òhipa i ravehia e Timeona e o Ana, o te òhipa atoà ia i ravehia e to tätou mau hui tupuna i mua ra, tei parauhia te ÈPARAA TAMARII. E tupu teie faanahoraa no te mau tamarii mätahiapo tamaroa änaè, aita to te mau tamarii tamahine mätahiapo. Te taime te tö ra te metua vahine, e faaineine te feia paari o te ùtuafare i te àhu no te püòhu i teie àiü, tei parauhia te PARIA o ta tätou e parau ra i teie mahana te tapa.

Te òhipa ia  ta Timeona i rave te taime o ia a hii ai ia Ietu àiü i roto ia na, to na auraa te èpa nei o ia i teie àiü i roto i to na âau. E na metua tane paari roa i roto i te fetii e rave i teie òhipa, e ma ta paraparau i nià iho. E ta Timeona mau parau no Ietu i nià i te metua vahine teie ia, inaha ua haapaòhia teie nei tämaïti ia hià to Ìteraèra e rave rahi e ia tià faahou to Ìteraèra e rave rahi ei täpaò e märöhia, e, e putapü atoà to òe iho âau mai te puta hoto ra ia ìteä te manaò no te âau taata e rave rahi.

O teie te parau faaitoito a Timeona ia Ietu àiü, o tei parauhia e te reo o te paari, o ta na atoà ia e faaitoito ra ia tätou i teie mahana, ei ia èpahia tätou i te Evaneria ora a te Atua.

Teraì òr. Faatura.

                                                                                             

                                                                      

                                                                                                           

Mataio 4, 12-23 PÜOÌ

Pueu  i te 20 no Tënuare 2020.

Ètärëtia Porotetani Mäòhi

Paroita Pueu Tuhaa I

PÜOÌ

Rururaa òrometua, tiàtono, haapii parau maitaì, e te mau tuahine.

Fëruriraa Pipiria no te tāpati 26 no Tënuare 2020.

Mau taiòraa turu.

Taramo 27

Ìtaia 8.23-9.3

1Tōrīnetia 1.10-13 ; 17

Taiòraa tumu  

Mātaio 4.12-23

To Ietu haapaìraa i Tarirea

(Mär 1.14-15; Rut 4.14-15)

12 E faaroo aè ra o ia e ua täpeàhia o Ioane, haapaì atu ra o ia i Tarirea. 13 Faaruè iho ra i Nätareta, haere atu ra e pärahi i Täperenaumi, i te hiti roto, i te pae fenua o Tepuruna e Nafatari, 14 ia tupu tei parauhia mai e te perofeta e Ìtaia 15 E te fenua o Tepuruna, e te fenua o Nafatari, i te hiti roto i ô mai i Iörïtäna, e Tarirea o te mau êtene16 Te feiä i pärahi i roto i te pöuri ra ua ìte ia i te märamarama rahi, e i nià i te feiä i pärahi i roto i te marupohe, e märamarama tei hiti mai. 17 I reira to Ietu haamataraa i te aò, i te nä-ô-raa e A tätarahapa, te fätata mai nei hoì te Hau o te raì.

Te tïtauraa i te mau pipi mätämua

(Mär 1.16-20; Rut 5.1-11)

18 E te haere noa ra Ietu nä te hiti roto i Tarirea, ìte atu ra o ia i nä taeaè toopiti, o Timona, tei parauhia o Pëtero, e to na taeaè o Âneterea, te tuu ra i te ùpeà i roto i te miti, e ravaai hoì räua. 19 Ua parau atu ra o ia ia räua A pee mai ia ù, e faariro vau ia ôrua ei ravaai taata. 20 Faaruè iho ra räua i ta räua ùpeà i reira ra, e ua pee atu ra ia na. 21 E ia haere atu o ia, i pïhaì rii atu, ìte atu ra e piti ä taeaè, o Iatöpo a Tepetaio ra e to na taeaè o Ioane, tei nià i te poti e to räua metua täne o Tepetaio, te ène ra i ta rätou mau ùpeà. Ua pii atu ra o ia ia räua. 22 Faaruè iho ra räua i te poti i reira ra e to räua metua täne, e ua pee atu ra ia na.

Ietu e te mau taata e rave rahi

(Mär 1.39; Rut 4.44; 6.17-18)

23 Haere atu ra o ia nä Tarirea atoà e àti aè, i te haapiiraa i roto i to rätou mau tunato ra, te pororaa i te parau maitaì o te Hau e te faaoraraa i te mau maì e te mau haapepa atoà i roto i te nünaa.

Heuraa taò.

Ir 12, haapaì,  täui te èà

Ìr 16, marupohe, vahi täpoìhia ia òre ia ìtehia te ora

Ìr 17, aò, e mau parau faaitoito

Ìr. 17, tätarahapa, te vai nei te parau no te rahi, e te hau

Ir, 19, faariro, e täui te tahi manaò, te tahi ra e pau te tahi, e âpï te tahi.

Ìr, 21 ène, tätaì, hämani  i te ùpeà, te parau atoà hia nei täfai.

Te manaò.

-Te mea mätamua to Ietu haereraa na roto i te mau òire e  färerei i te mau taata ma te aò i te  parau no te tätarahapa te fatata mai ra.

-Te piti te ìtehia nei i roto i te taiòraa, te reo o Ietu i te tïtauraa i teie mau taata o ta na i ìte no te taime mätamua roa,  e te tärià o teie mau taata maite mea ra e ua ineine è na rätou i te faaroo  i teie reo, ma te färii i te täpura òhipa e tiaì ra ia rätou. No reira te reo o te hoê nünaa, ta na ia huru faanahoraa i to na ao, ia faaroo tätou i teie reo to Ietu e parau ra pee mai ia ù, mai te mea ra ihoä ia e, eita tätou e ìmi i te auraa o te parau, na te parau noa e heheu mai ia na. Te vai nei te tahi parau na Turo a RAAPOTO te naò ra, e taoà ora te reo, te värua te reira o te hoê nünaa, te rämepa türama i te èà o te taata, tae atu ai o ia i roto i te ìte. Ia ìno te reo, te èà o te taata terä e mohimohi ra, parau hänoa atu ai o ia i te parau mai te taa òre i te mea ta na e parau ra, mai te haapeàpeà òre to na upoo i te ìno ta na e rave ra, no na iho nä mua roa, e no te feiä atoà e faaroo mai ra ia na. Ua ineine te reira taata i te parau i te mea e parauhia ia na e parau, aita hoê aè fifi to na i te parauraa i te maitaì, e ìno, e te ìno ra, e maitaì ia ; te parauraa i te pöuri, e märamarama, e te märamarama ra, e pöuri ia ; te parauraa hoì i te maramara, e momona, e te momona ra, e maramara ia.

-Te toru, Ietu haapiiraa i te mau taata i roto i te mau tunato.

No te puai o teie mau parau  i roto i ta tätou taiòraa i tupu ai te manaò e faanaho e maha aè uiraa na tätou.

Mau uiraa

1)   Mau Tiàtono : Pöuri e te märamarama, marupohe e te märamarama e aha ta teie na parau e tïtau mai ra ia tätou, no ù e no to ù nünaa Mäòhi ?

Hiò mai mätou na mua roa te reo, e aha te reo fauraò no te ìte, te märamarama te paari o te hoê nünaa, e aha te parau te horoà atoà ra no te märamarama o te hoê taata. i roto i ta tätou parau ia hiò anaèhia paì. E aha te mea i märamaramahia atu e mätou, e te mea ta òe e tïtau mai ra ia mätou,  to mätou ia ìteraa e àita te reo i riro e mea faufaa roa no mätou, ìnaha hoì, te reo e toà ora paì te reira e te reira taò te värua ia no te hoê nünaa. Mäite mea e värua no te hoê nünaa e rämepa te reira no te türama i tona èà e tae atu o ia i te ìte e ia hiò anaehia te tahi taime mea pinepine te taata te täpöni i muri i te reo te parauraa e, èita paì to tätou reo e märamaramahia ra. E ìnaha hoì èere i te fifi no tera i ò mai, te fifi no teie pae atu no tera taata e parau atu ra te reira te mea e ìtehia ra, àita paha e paroita àita tera  parau. Mea ra ta te manaò e hinaaro e parau, ua roa paì te taata i  te parauraa e, te maitai mea ìno ia, e te ìno mea maitaì ia. Tei reira te täfifi rahi i teie mahana, èita tei upoo e haapeàpeà e ìnaha hoì, ua hee roa mai teie parau i roto i ta tätou mau tamarii no te faatià faahou, ae e tüà òhipa no tere mea te òre e haapaò i tera òhipa topa te taatoàraa i roto i te pöuri. Te haereraa mai paì no taua, e parau paha tätou i teie te höpoiraahia mai te parau na räpae, te na atoà ra te tahi pae ai ua tae mai te märamarama ia hiò anaèhia ta tätou taiòraa te märamarama tera ia taata e parau ra e ìnaha hoì te parauraa paì teie taata mea è ihoä ta na parauraa i roto i te nünaa, te haereraa i roto i te nünaa e ia ìte te nünaa e tätarahapa tera e hau ra, tera e hapa ra täpu faaòre, teie atoà ta na huru e hoà parau no tätou i teie mahana no te märamarama ra o Ietu i te parauraa atu i nià i ta na mau pipi, e te märamaramaraa te mau pipi i te auraa te ìte i to na reo òhie roa atu ra te òhipa te parauraa o Ietu ua taa e ua märamarama te taata i te värua o te parau, ta Ietu e parau ra e pee ia ù, faariro vau ia ò rua èi ravaai taata. Te reira parau i teie mahana ua moè, moè no te aha àita te reo i tae i nià i to na vairaa, te auraa àita faahou i nià i to na reo tumu, te reo o te fenua, te reo i vaiiho mai, e aore te reo i vaiihohia e te Atua i roto i teie nünaa, i roto i te taata àita faahou, mai te mea te parau ra tätou te vai ra mea ïti roa ia. Ia hiò änaè tätou te toru o te tuhaa te parau ia no to Ietu haereraa e parau  i tera mau taata i roto anei i te fare pure te ìte atoà ra o Ietu e, te vai ra ihoä to rätou ìte, te vai atoà ra te tahi mea e moèhia ra ia rätou te haèhaa anei, te tura anei, aore ra te moèraa ia rätou e, te Atua èere noa paì no roto noa i te fare pure, èere te Atua no te hoê noa vahi, e aore te òreraa e taa mai ra te parau, tera ta Ietu e parau ra ia rätou i tae mai ai tera Tämaïti te mori türama ia o teie ao no te parauraa ia i te taatoàraa e,  tera mau mea ta òutou e mau noa ra e aore ra te ra mau mea tätou òutou e hinaaro noa ra, ua tae i teie taime o vau ia ìnaha hoì te vai ra te taata e ìte ra te vai atoà ra tera e òre e ìte ra te  tahi tuhaa o te manaò penei aè te vai atu ra te manaò i muri mai tera mai.  

2)   Haapii Parau maitaì : Te nahea ra ta òutou märamaramaraa te ìrava 17.

Te naò ra ia e, Te nahea ra ta òutou märamaramaraa te ìrava 17, te ìrava 17 e rave noa mai tera vahi hopeà tera e naò ra e a tätarahapa, ta tätou e ìte e i roto i here, te ìtehia ra te parau no te hau, te rahi, òhie noa atu ra te parau no te pähonoraa, te tahi hiòraa te parau no to tätou reo, teie mahana te reo Mäòhi e rave rahi faataìraa to te reo Mäòhi te vai ra tera päpaìraa tera ta tätou ìte ra i roto i ta tätou puta, te pipiria, te vai atoà ra tera e päpaìhia e te faatereraa o te fenua, te fare vana, e te tahi mau piha no te faatereraa hau fenua te rave atoà ra rätou ta rätou. Te reira mau faanahoraa ua pöuri, ua pöuri roa to tätou manaò i roto i to tätou oraraa, i roto ia i to tätou oraraa faaroo, no te mea ia hiò anaèhia tera mau reo, tera i päpaìhia e ta tätou tera i roto i te pipiria e mahana ê roa täpiripirihia te tahi mau taò, i roto i ta tätou pipiria mea òhie roa, tera päpaìhia te parau ta to tätou mau tupuna e parau i mütaa-iho ra i te reira tau i tae roa mai ai te èvaneria tera mea päpü maitaì, teie ra tätou e paraparau noa nei na tätou noa ia te reira  no teie tau i te päpairaahia te reira mau mea ua faarahi-noa-hia te märamaramaraa i roto i te haaponiraa te manaò te reira mau peu i päpaìhia, te reira  mau taò tuuhia atu i täpirihia atu i pïà-iho i te reo i roto i te taò i teie mahana. Te tau o Ietu i roto i ta tätou parau, te reira te mea ta Ietu e haamanaò ra te tätararaa te âau o te taata i te faaroo i to na reo to na, to na iho parau, ua oti, teie mahana àita vau i ìte e te vai noa ra anei, e aore ia, tei nià noa nei ra tätou i te märamarama i au i te taò Mäòhi i teie mahana. Au aè mauti ra hoì te mau haapiiraa mea òhie roa, mätou te haapii parau maitaì, e au e te tiàtono atoà, te vai ra ihoä te faaea noa ra ua paruparu, i nià ia i tera päpaìraa i te mätamua ra e i teie mahana, te ria te ria tera e manaònaòhia ra tera paì faaturoriraa i teie mahana te taata to na reo ia òre tera âau ia matara faahou, ia òre to na âau ia ìriti faahou i te ùputa no te märamarama ia nehenehe o na ia faaroo ia ìte i te hinaaro o to na Atua. Te vai atoà ra te tahi mau ùtuafare àita rätou e nehenehe e parau te reo Mäòhi, e parau popaa ta rätou e parau ra e ìmi mätou i te raveà nafea e märamarama ai, nafea tera taata märamarama ai te parau ta mätou hopoi atu i roto i te ùtuafare, te vai ra te tinitö, te vai ra te popaa teie mau taime ua tae mätou i roto i  teie mau ùtuafare e ìmi ia mätou i te raveà, te mea ra e nehenehe ia mätou i te parau ua tae te parau a te Atua i roto i te ùtuafare no te faatupuraa i te parau, na te Fatu iho te parau te faatupuraa e ìte atu ihoä te reira ùtuafare i te tupuraa, to mätou fifi te reo te reira rii te mea e märamaramahia  ra. Te tätarahapa te tätararaa ia mea e faaapiapi ra to tätou tärià, to tätou  âau, ia nehenehe te parau a  te Atua, ia nehenehe tätou ia färii i te parau a te Atua i roto i te oraraa tera noa te tahi mau manaò, te vai faahou atu ra te manaò.

  

3)   Mau Tuahine Te faariro, te pee, e aha ta teie na taò e tïtau mai ra ia tätou i teie mahana ?

Ee eee e,  tei nià mätou i te parau no te uiraa te faariroraa e te peeraa teie parau ua tupu ia i te pae tähatai hinaaro o Ietu i teie taime i muri aè i to na faarooraa i tera parau peàpeà e te mauiui e te òto atoà, mea ua puai aè to na taeaè ïti o Ioane i roto i te fare täpeàraa. Hinaaro o Ietu te òhipa i ravehia i mua nei eiaha ia òre eiaha ia morohi tera taime ua mau te òhipa a Ioane ia au te hiòraa a te taata. Te auraa noa ia Ietu, e ärataì noa te òhipa a te Atua, ia tupu te hinaaro o te Metua. Ìnaha àita o Ietu i haere na roto i te mau ùtuafare o te taata i te ìmi to na tere e ìmi i te taata e täpiri ia na no te rave i te òhipa te ìte ra o Ietu tera fëia mau e rave ra te òhipa i mua i to na aro, mea teimaha èita e maraa i te hoê noa taata i ämo i te rave èi pupu taata ra, àita O na i haere na roto i te mau ùtuafare i te haere, e rave mai tera, e rave mai tera. Na te pae tähatai O ia i te haere e ìnaha te ìte ra O ia te tahi nau taata te òhipa täià na reira tätou i te parauraa, ìmi te raveà ia pö e haere e täià noaa mai te ïà faaàmu te ùtuafare ìnaha teie tau taata ua pau àita e ìnaì, i roto i to na hiòraa tera tau taata ua ìte to na mata ua ìte atoà to na värua. E nehenehe tera tau taata e ìmi te raveà, ìnaha ua noaa tei ïà ia rätou, nehenehe atoà paha ia e noaa mai te taata ia rätou mea tià tera manaò to Ietu i tïtau ai, hein, haere e tii tera mau taata, hein, pee mai e faariro vau ia ò rua èi ravaai taata. Mua tera parau tätou tera èita e òhie i te haere no te  mea àita i ìte òhipa e ärataìhia mai ra e tera taata. Nehenehe änei e pee noa àita i ìte e aha te  täpura òhipa i mua. Ua òhie teie na taata i te pee, àita ia i fifi ua òhie paì i te pee, te auraa te parauraa o Ietu to na reo, to na feruriraa, to na värua, ua ö i roto i tera parau ua tupu ua âpee mai, te auraa te parau te faariro, ia riro mai te òhipa, i te tahi atu òhipa taaê ta òe e tïtau ra, i roto i tera faariroraa ta tätou parau i teie mahana e ìmi o Ietu i te raveà ia riro mai tera mau taata ia na, ua riro no te mea ua pee ia na. Teie nei ra te peeraa, àita òe e matapö i ta tätou parauraa, e nehenehe e pee matapö, aore e parau vau e ua tae to rätou âau i te pee no te aha, no te mea ua rave o Ietu i te tahi täpaò, hou a pee ai na muri iho ia na te täpaò ta Ietu i rave mauti ra, te türaìraa ta rätou ôpuaraa täià i te moana nui ua roaa ta rätou ìnaì i taua taime ra na te reira i taui te âau o teie mau taeaè i òhie ai ia raua i te pee. Ua riro teie na taò päpü maitaì i nià i te täviniraa i teie mahana  eiaha e parau e, e, èere mea òhie te täviniraa o ia, o ia no te mea parau anaè te Atua, par exemple, e rave tätou haere noa vau i ò teie mahana òhie te mau taata i te färii i te mau manaò  o te òrometua e parau ra te taata i to na manaò maite mea ua ö e vai noa te haamaitaìraa a te Atua i roto ia tätou e òhie ia tätou te auraa teie parau ua riro èi täutururaa ia tätou i roto i te täviniraa i te Atua ia riro ihoä ta tätou e ei e, e tätou àita èi àita, tera noa to mätou manaò e te vai atu ra, te rahi o te parau tera aè i te mau àivänaa aè ra.

Teie te uiraa, te faariro, te pee e aha ta teie na taò e tïtau mai ra ia tätou i teie mahana, te faariro te vai ra ihoä tera tätararaa i nià iho i ta tätou papier, e taui te tahi manaò, te tahi ra e pau te tahi e âpï te tahi te faariro e rave noa mai mätou te tahi hohoà i nià iho i tera haùti a te tamarii, tera haùti pata poro te naò ra to mätou manaò maite peu àita ta òe e poro no te haere òe e faariro i te tahi, nahea te tahi, nahea te tahi poro e riro mai ia òe, èi poro ihoä ta òe no te haere e faariro, e, e ìmi òe te raveà ia riro mai tera poro ta òe e hinaaro ia riro mai ia òe ta ù e rave ia pau te tahi ia òe tei reira ia te haùti pataraa poro e te naò ra te manaò o Teraì i te parauraa e, e mea faufaa te parau o te reo te vai ra te tahua mätamua te parau o te reo, te reo ia o te nünaa te vai ra te piti o te tahua i roto i te fëia e òhipa ra te toru o te tahua te reo i roto i te fare pure. Te naò atoà to mätou manaò i te parauraa e, te reo te parau ora ia e hiòraa te mau manaò o te mau mama ua ìmi o Ietu i te raveà ia riro mai tera mau taata ia na e ia òhie i te pee ia na, te naò nei ia te manaò o te mau mama i te parauraa e, ua faaòhipa o Ietu taaê noa atu ai e, e reo Aramea, ua faaòhipa O ia i tera manaò na roto i te haèhaa i te haere, mauruüru atoà te mau manaò o te mau mama tei na mua mai, no te mea ua mätaratara te tahi mau manaò na roto mai ia rätou e te naò atoà ra te tahi mau manaò i te parauraa e, no te ìmiraa paì te raveà ia ö te reo i roto i te fëia e òhipa ra e ia rave paì òe te tahi faanahoraa e faaineine ia òe, ia ö òe ia tuàti to òe faanahoraa i roto i tera mau taata no o mai. E tera parau no te fëia ravaai, ua ìmi o Ietu i te raveà e, ia ö o na no te faanahoraa i tera mau taata e àfaì i òhie ai te pee ia na e, ia vai noa paì tera reo rä tera taime tera e orahia i teie mahana tera mau taata e hinaaro paì e haere mai ia päpü paì tera reo tera reo pae taata te tahi fifi e ìtehia e ua uiui noa atoà ia e, e riro mau anei ra te reo èi reo ora, e reo täutururaa, e reo èi faariroraa mai tera e hinaaro i te maitaì, hinaaro i te ora, hinaaro ra i te âmui mai e aore ra te riro ra èi tiahiraa i te taata ia ateä i tera e vai ra i roto i te fare pure, ua tae atoà te tahi mau manaò o te mau mama i te naòraa e, te faariroraa èere paì na tätou te reira tuhaa na te Atua ra na te Atua te faariro tätou ra te pee-noa-raa ia. Teie te tahi mau parau ia tuu atu i mua ia tätou, tätou mai te peu noa atu e te vai ra te tahi manaò täuturu te änihia ra ia tätou ia täuturu, teie rä te faanahoraa e taiò atu vau te tahi manaò no roto atu i te reo färani, te mea e reo färani, te naò ra, il faut d’abord un travail de soi avant d’aller prêcher avant de parler a des personnes qui sont dans différents endroit, e manaò teie no roto mai i te mama reo färani te mau mama e nehenehe i te täuturu mai i to tätou manaò mauruüru.

Tätou paurua ia ora, ia ora na, ae ia hiò-anaè-hia ta tätou parau i roto i teie taiòraa ta Mätaio e faaìte mai ra ia hiò-anaè-hia e toru tuhaa i roto ia na, tuhaa mätamua tera ia te nünaa te piti taata òhipa, te toru i roto ia i te fare pure, te nünaa, te taata e òhipa ra, e i roto i te fare pure. Ae, ia hiò anaè tätou i roto i te nünaa, maite mea ra i roto i te nünaa èi nünaa ihoä e nehenehe ai e maìti i te taata, maite peu àita e nünaa e maìti ia, ia vai, e maìti ia tera mau puèraa na tähatai tera ia tera ia te manaò i te hiòraa atu. E te piti o te tuhaa, tei nià ia i te taata e òhipa ra, te taata paì e òhipa ra èita ia tera taata e haere taòto ei naa e taata òhipa te auraa faaitoito te taata i roto i ta na òhipa èiaha te òhipa ia topa, maite peu e haaparuparu o na täpaò ua pau roa te òhipa àita e faufaa ae, ae, òiòi roa tätou i te märamarama i te fëia rave òhipa e ta tätou òhipa faaea noa ia tätou e aha ia ta tätou òhipa i roto ia i teie faanahoraa ta tätou e hiò ra. E haere mai ai tätou i roto i te fare pureraa te òhipa ra o Ietu àita o Ietu e taòto ra te fare pure èere i te fare taòtoraa, no te mea tei reira to òe pärahiraa i roto i tera patireia to te ao i nia ihoä paì i te fenua, i nià ihoä te fenua to faaìteraa i te taata e uiraa toru ta mätou èita mätou e faataere te naò ra, te faariro te pee, e aha ta teie na taò tïtauraa mai ia tätou i teie mahana, e aha paì ta na e tïtau mai ra ia tätou, tera tahi mau manaò i tätarahia-iho atu ra e täpu paì òe i te taò faariro, te faa, e òhipa ia, riro hoê òhipa e ìmi te raveà ia riro mai ia òe maite peu i roto i to tätou i to oraraa faaroo te vai ra e hoê taata àita e ora ra e haere tätou ia na ra e ìmi te raveà ia riro mai paì ia tätou ia ora o ia i roto i te oraraa faaroo mea rahi roa ia te reira mau huru taata e ora i o tätou àita ra e haerehia nei e faariro mai, haerehia atu ra taataahi roa atu, mätaratara roa e tiàtono ia hiò anaèhia te parau a te Atua, èere te mätaratara nei, ia haere òe e faariro e aha te pee àita ihoä e pee ra, e haere ra òe e faariro i te taata ia riro mai, e nehenehe ai o Ietu e haamau ta na faanahoraa e mau ai i te vairaa. Tera paì ia ta  tätou e hiò ra i roto i ta tätou parau i teie mahana, e teie mau parau e faaìte-noa-hia ra ia tätou e ra e na te tau na nià noa iho e, e tae roa mai ia tätou no reira àita atoà ànaanatae-atoà-hia ra e paraparau, no tera mea ua ìte ua märamarama paì i na taòtoòto noa ai i teie nei tera ia ta mätou hiòraa atu paì ta mätou paì, ta mätou paraparau noa mea rahi to mätou manaò e te peeraa paì ia Ietu èere atoà ia no te pee noa àita e faaineineraa ua pee anaè ia Ietu ua òhipa paì òe i reira òe e pee ai, eiaha tera pee e haapaò papier noa te tahi tiàraa ia ù ae, taaè noa atu te vai ra ta ù papier tiàraa to ù aita èere te reira e òhipa na mua haere ai òe e pee, o vau te faatere, o vau te peretiteni, i reira e pee ai te Atua. Tera mau taata i tïtauhia àita hoê to rätou e rë tera parau e pee faariro vau ia òutou èi ravaai taata tera taime àita atoà vau i ìte tei roto paha i tera parau ta Ietu, tera reo to Ietu te reira paha tera ora i òiòi ai te peeraa aita e pähonoraa, reva atoà vaiiho te metua tane vaiiho te poti, vaiiho i te mea e faaapiapi ia òe e tïtauraa teie e haere mai nei ua reva tera paì ta Ietu faanahoraa àita o Ietu i hiò e mea aroha mea tano maitaì, tarià maitaì no te faaroo mai i te parau tera te mea ta Ietu e hinaaro i te taata to òe tarià faanahoraa tera to mätou manaò tauturu to mätou manaò            

4)   Mau òrometua : E  aha ta te ìrava 23 e hinaaro mai ra ia tätou i Mäòhi Nui nei ?

Te parau a Ìtaia, ua taa i te Fatu i te fifi o te nünaa e aha te mea e tïtauhia ra ia rave, te tuhaa a te taata terä i roto i te mmm, e te pöuri. E aha te mea e toe ra ia rave. E Püòi, e mea fäufaa te taata e püòi no te haamata i te òhipa tei ravehia mai, e turu i te mea i haamatahia no te türaìraa i te òhipa, te tïhopuraa a Ietu e mau Mäòhi teie i nià i ta rätou mau òhipa tumu no te mau mahana atoà.

Tarahapa, e tatara te mea e faateiaha ra i te tävini, te parau atoà ia a Ioane Päpetito i te mëtëpara, i ta Ietu haapäpüraa. Te òhipa mätamua e rave te tätarahapa, tätara ia mätara. Io tätou nei mea taaè roa, na roto i te tätarahapa i te rave, tanoraa mau na òe. No teie mätahiti teie paha te òhipa e rave i teie tereraa to tätou na mua ia tätou. E täuturu te rähu ia tätou, i roto i te haereraa te tuhaa  a te Atua i te taata.

I roto i te paroita te vai ra te mau òhipa i ravehia mai ia maitaì. Teie hepetoma no te hoêraa, mea täno ia rave faahouhia e faaòre rä te parau o te faaroo, e te mau pehepehe ia hinaaro tätou e rave te taatoàraa o te òhipa.

Ir 23, te peeraa e täno anei e haere matapö noa na muri i te tahi.

Te tïhopuraa tei roto noa i te fëtii,

Ia here i tai mea faanaho e pure, ia haere uta àita e faanahoraa, i roto i te oraraa ua ärea te hoê vahi i roto i to  tätou oraraa.

Ministère pastoral  quand il y a changement parce qu’il y a l’église libre, et l’église protestante il y a la coutume avec la monnaie Kanak. Un dimanche dans le temple il y a que la famille de pasteur, et un vieux vient à la porte du temple après la prière il dit au vieux de rentré dans, le vieux lui dit je ne suis pas venu au culte, je sus venu chercher ton filets pour aller à la pêche, le pasteur voila le filet, il prend le filet il est partie à la pêche, quand il est revenu il a ramener le filet, le poisson il a gardé, il n’a pas pour le pasteur.

Faufaa o te tupuraa te parau i roto i te taiòraa te puai o te parau a te Fatu, i te taata te fäito parau i te faaòhiparaahia e te Fatu, mea nahea tera huru reo to te Fatu. Te vai ra te tuhaa a te taata tätaì tahi, te fenua fänau atua, fenua fänau taata. E tätara te mea ta teie mau parau e faaìte ra.

Ua püòi o Ietu i te òhipa a Ioane Päpetito, e aha te püòi te faatanoraa i nià i te tahi tuhaa òhipa tei vaiihohia mai, ma te òre e faaruè tera i oti i te rave, ia haapaari maitaìhia no te ìriti i te ùputa no te hoê tau òhiparaa. Oia atoà te taura ia püòihia no te mea ua potohia no te faatae i nià i te mea e tïtauhia ra, oia atoà no te püòiraa i te hoê paehaa räau. I te püòiraa mai o Ietu i te òhipa a Ioane, te parau atoà ra O ia a tätarahapa, te fätata mai nei hoì te Hau o te raì.

 

   

Teraì òr. Faatura.