Ruta èv 1.26-38.TÏAÌRAA MAHA Èi Tävini.

 

Tāpati 20 no  Titema 2020.

TÏAÌRAA MAHA

Èi Tävini.

Taramo 89

1 Matetira a Ètana te âti-Ètera ra.2 E tämau ä vau i te himene i te aroha o te Fatu, e na ta ù vaha e faaìte i te parau mau na òe, i tërä uì i tërä uì. 3 I parau hoì au e: E tià to aroha i te vai-mäite-raa, tei te mau raì ra to parau mau i te haamau-raa-hia.4 Ua parau òe: Ua fafauhia e au te faufaa i tei haapaòhia e au ra, ua tapu vau i ta ù tävini ra, ia Tävita: 5 E haamau ä vau i to òe ra huaai e a muri noa atu, e patu vau i to òe ra teröno e tae noa atu i te mau uì atoà ra. Tera.6 Ia haamaitaì te mau raì i ta òe ra räveà mana, e te Fatu, e te âmuiraa o te feiä moà ra, i ta òe ra parau mau.7 O vai hoì to te mau raì ra e au i te Fatu? O vai tei au i te Fatu i roto i te mau tamarii a tei mana ra? 8 E Atua mataù-roa-hia i te âmuiraa o te feiä moà ra, e ia faahanahanahia e te feiä atoà i pïhaì iho ia na ra.9 E te Atua manahope, e te Fatu, o vai tei au ia òe ra? E mana rahi to òe, e te Fatu, e te haapunihia ra òe e ta òe ra parau mau.10 O òe hoì tei mana i te ûànaraa o te miti ra, e ia tupu to na àre, na òe e haamania.11 Ua ôfatifati òe ia Rähapa mai te mea ua paruparu ê na, e na to rima ètaèta i haapurara i to mau ènemi.12 Na òe te mau raì nei, e na òe atoà te fenua; te ao e to te ao atoà ra, na òe ä i hämani.13 O àpatoèrau e o àpatoà, na òe i hämani; o Täpora e o Heremona tei himene hua i to òe ra iòa.14 E rima püai to òe, ètaèta tei to rima, e te teitei roa ra to rima àtau.15 O te parau tià ra e te au, o te tumu ia o to òe ra teröno. O te aroha ra e te parau mau, tei nä mua ia i to mata.16 E ao to te mau taata i ìte i te reo òaòa ra. E hahaere ä rätou, e te Fatu, i te märamarama o to mata ra.17 Te òaòa ra rätou i to iòa e mure noa atu te mahana, e ua teitei rätou i te parau tià na òe ra.18 O òe hoì te hanahana o to rätou püai, e na te here na òe ra i teitei ai to mätou tara.19 O te Fatu mau ä to mätou tauturu, e tei moà i Ìteraèra nei, o to mätou ia arii. 20 I reira ta òe parau ôramaraa mai i to taata moà ra, e ua nä ô mai ra: Ua tuu vau i te tauturu i nià i tei mana ra, ua faateitei au i te hoê i haapaòhia no roto i te mau taata nei. 21 Ua ìteä ia ù ta ù tävini o Tävita, e ua faatähinu vau ia na i ta ù monoì moà ra. 22 Na to ù iho rima o ia e haamau, e na to ù iho rima o ia e faaètaèta. 23 E òre roa o ia e vï i te ènemi, e òre hoì o ia e ìno i te taata parau ìino ra. 24 E täìrihia e au to na mau ènemi i mua i to na mata, e täìrihia e au te feiä i riri mai ia na ra.25 Ei ia na te parau mau na ù, e ta ù aroha vai ai e teitei hoì to na tara i to ù nei iòa. 26 E tuu vau i ta na rima àui i raro i te tai, e ta na rima àtau i raro i te pape. 27 E na na e pii mai ia ù e: «O ta ù metua òe, e ta ù Atua. E ta ù pare e ora ai au ra. 28 E faariro vau ia na ei mätahiapo na ù, e ia teitei o ia i te mau arii atoà o te fenua nei. 29 E vai ä ta ù hämani maitaì ia na, e ta ù faufaa ia na ra e päpü ia. 30 E haamau vau i to na ra huaai e a muri noa atu, e vaiiho taiàta hoì to na teröno mai te mau raì atoà nei.31 Ia faaruè ta na mau tamarii i ta ù ture, e aore i haapaò i ta ù ra parau au; 32 ia faahapa rätou i ta ù ra haapaòraa, e aore i faaroo i ta ù ra parau: 33 e papaì au ia rätou i ta rätou ra hara i te papaì, e to rätou ìno i te täìri. 34 O to ù rä hämani maitaì, e òre ia e hopoi-ê-hia ia na, e òre hoì te parau mau na ù ra e haamaìrihia. 35 Ta ù faufaa ra e òre e faaòrehia e au, e òre hoì e ruri ê i tei nä roto mai i to ù nei vaha. 36 Hoê aè nei a ù nei täpuraa i to ù iho ra moà: e e òre au e haavare ia Tävita. 37 E vai ä to na huaai e a muri noa atu, e to na teröno, mai te mahana ia i mua ia ù ra, 38 e tià ia i te vai-mäite-raa, mai te märama ra, e mai te ìte haavare òre i nià i te raì ra. Tera.39 I teie nei rä, ua faaruè òe e ua haaveùveù; ua riri òe i ta òe i faatähinu ra. 40 Ua faaòre òe i te faufaa i to tävini nei, ua haaviivii òe i to na toröna i raro i te repo.41 Ua vävähi òe i te mau âua na na, e ua huri-tumu-hia e òe to na mau haapüraa ètaèta. 42 Te haruhia ra o ia e te feiä atoà i haere nä te èà, e ua riro o ia ei faaìnoraa na to na ra mau taata tupu.43 Ua faateitei òe i te rima àtau o tei märô mai ia na, e ua faaòaòa òe i to na atoà ra mau ènemi. 44 Ua haamemu òe i te mata o ta na òè, e aita atu ra o ia e mau i te àroraa ra.45 Ua faaòre òe i to na ùnaùna, e ua huri òe i to na teröno i raro i te repo.46 Ua haamure òe i te mau mahana o to na ra âpïraa, e ua vehi òe ia na i te haamä. Tera.47 Mai te aha ra te mäoro, e te Fatu, o to òe haamoèraa? E vaiiho noa änei i to riri ia àma noa na mai te auahi e a muri noa atu? 48 E haamanaò i te poto o to ù nei taime E e aha òe i hämani ai i te mau tamarii atoà a te taata nei ei mea faufaa òre ra? 49 O vai te taata e ora e eita e ìte i te pohe, a ora ai to na värua i te rima o häte? Tera. 50 Tei hea, e te Fatu, to mau hämani maitaì tahito ra, ta òe i haamau i te parau mau na òe ia Tävita ra? 51 E haamanaò, e te Fatu, i te faaìno i faaìnohia ai to mau tävini nei, e tei nià i ta ù ôuma te tähitohito o te taata nei e rave rahi. 52 Ta to mau ènemi i faaìno mai, e te Fatu, o tei faaìno mai i te haereà o tei faatähinuhia e òe ra. 53 Ia haamaitaìhia te Fatu e a muri noa atu Âmene, e Âmene.

2 Tämuera 7.1-16

Te tohu a Nätana.

(1 Ch 17.1-15)

1 E päpü atu ra to te arii pärahiraa i to na ra fare, e ua höroà mai te Fatu i te hau nö na i to na ra mau ènemi e àti noa aè, 2 ua parau atu ra te arii i te perofeta ra ia Nätana, a hiò na, te pärahi nei au i roto i te fare âreti, âreà te âfata o te Atua te pärahi nei ia i roto ìte päruru. 3 Ua parau atu ra Nätana i te arii, e haere e rave i ta òe e manaò na; tei ia òe hoì te Fatu. 4 Ua tae mai ra rä te parau a te Fatu i taua ruì ra ia Nätana, nä ô mai ra, 5 A haere, a parau atu i ta ù tävini ra ia Tävita, te parau mai ra te Fatu, e faatià mai ä òe i te hoê fare no ù ei pärahiraa? 6 Aita hoì au i pärahi i te fare mai ia ù ä i arataì mai i te tamarii a Ìteraèra mai Àifiti mai ä, e tae roa aè nei i teie nei mahana, i hähaere noa na vau nä roto i te pühapa e nä roto i te tëtene. 7 I roto atoà i taua mau mea atoà ra, tä ù i hähaere noa, e te tamarii atoà o Ìteraèra, i parau änei hoì au i te mau haavä ia Ìteraèra tä ù i parau atu e tiaì i ta ù mau taata ra ia Ìteraèra, i nä ô atu änei hoì au e, e aha òutou i òre i faatià ai i te tahi fare âreti na ù? 8 E teie nei, e parau hua atu òe i ta ù tävini ia Tävita, te nä ô mai ra te Atua Täpäota o te Fatu, i rave mai au ia òe mai te fare mämoe mai ä, mai te pee haereà i te mau mämoe, ei tävana no nià iho i to ù nei mau taata ia Ìteraèra: 9 e ei pïhaì atoà iho vau ia òe i to òe atoà ra mau haereà, e ua täpü-ê-hia e au to mau ènemi atoà. E nä ù hoì e faariro i to òe ra iòa ia rahi, mai te iòa atoà o te feiä rarahi i te ao nei. 10 E haapaò hoì au i te hoê vähi no to ù ra mau taata no Ìteraèra, e nä ù rätou e tanu i reira, e vai mau atu ä rätou i to rätou ra vähi mau, e eiaha roa ia haùti faahou; eiaha hoì te taata haùti ia haùti faahou atu ia rätou mai tei a mütaa iho ra; 11 mai ia ù ä i tuu i te mau haavä i nià iho i to ù ra mau taata ia Ìteraèra. E höroà hoì au ia òe ra ia pärahi noa òe, i to òe ra mau ènemi. Te faaìte atu nei hoì te Fatu ia òe nä na e patu i to fare na. 12 Ia hope roa hoì to òe ra puè mahana, e ia taòto atoà òe to òe puè metua, e faatià ai au i to òe ra huaai i muri aè ia òe ra, no to òe iho na ôpü, e na ù e haamau i to na ra hau. 13 Na na e faatià i te hoê fare no to ù nei iòa, e nä ù e haamau i to na teröno i to na ra pätireia e a muri noa atu. 14 Ei metua vau nö na, e ei tamaiti o ia nö ù. Ia rave o ia i te hara ra, nä ù o ia e aò atu i te papaì taata nei, mai tei täìrihia te tamarii a te taata nei: 15 âreà to ù nei aroha, e òre roa ia vau e ìriti ê atu i te reira ia na, mai ia ù i nä reira ia Taura i tä ù i tuu ê atu i mua ia òe ra. 16 E to òe na fare o to òe ra pätireia, e mau ia i mua ia òe ra; to òe ra teröno, e mau ia e a muri noa atu. 17 Haapaò atu ra Nätana i teie nei mau parau, e teie nei ôrama, i te parauraa atu ia Tävita.

Rōma 16.25-27

25 E teie nei, ei ia na i tei tià ia faaitoito mai ia òutou, i tei au i te Èvaneria na ù nei, e i te parau ia Ietu Metia, ia au i te heheuraa mai i te parau àro i hunahia i te mau uì atoà mai tahito mai, 26 ua faaìtehia mai rä i teie nei, e no te faaue a te Atua pohe òre ra, i faaìtehia ai i te Ètene atoà, i te parau a te mau perofeta i päpaìhia ra, ia noaa ia rätou te haapaò faaroo ra. 27 Ei te Atua paari anaè ra te haamaitaì, ia Ietu Metia nei, e eiaha ia mure. Âmene.

Ruta èv 1.26-38.

Te faaäraraa o te fänauraa o Ietu

26 E tae aè ra i te ono o te märama, ua tono mai ra te Atua i ta na merahi ia Täperiera i te hoê ôire i Tarirea o Nätareta te iòa, 27 i te hoê pötii i momoàhia i te hoê taata no te fëtii o Tävita, o Iotëfa te iòa; o Märia hoì te iòa o taua pötii ra. 28 E ia tomo mai te merahi i roto ra, ua nä ô mai ra o ia ia na Ia ora na, e tei here-hua-hia mai e. Tei ia òe te Fatu, e tei maitaì i te mau vahine atoà e 29 Ìte aè ra o ia ia na höriri iho ra o ia i ta na parau, e feruri iho ra to na âau i te huru o taua aroha ra. 30 Ua parau mai ra te merahi ia na: Eiaha e mataù, e Märia, ua herehia mai òe e te Atua. 31 E inaha, e tö òe, e fänau ta òe tamaiti, e na òe e maìri i te iòa ia IETU. 32 E rahi o ia, e e parauhia i te Tamaiti na te Teitei. E na te Fatu ra na te Atua e horoà mai i te teröno o to na ra metua o Tävita no na: 33 ei ia na te hau i te fëtii o Iatöpa e a muri noa atu; e e òre roa to na Pätireia e mure. 34 Ua parau atu ra Märia i taua merahi ra: E aha ia e tià ai, aore hoì au i ìte i te taata? 35 Ua parau mai ra te merahi ia na, nä ô mai ra: E pou mai te Värua Maitaì i nià iho ia òe, e na te mana o te Teitei e tämarü i nià iho ia òe, e parauhia ai hoì tënä na tamaiti moà, o te Tamaiti na te Atua. 36 E inaha hoì to tuaana o Èritäpeta, ua tö atoà o ia i te tamaiti i to na ruhiruhiäraa nei; e o te ono hoì teie o to na märama o tei parauhia ra, e uì. 37 Aore roa hoì e mea e òre te tià i te Atua. 38 Ua parau atu ra Märia: Inaha ei tävini au no te Fatu, ia nä-reira-hia mai au mai ta òe i parau na. Reva ê atu ra taua merahi ra.

Manaò.

E tiaìraa maha teie o ta tätou e haamanaò nei i te ôroà fänau no te Tämaïti here a te Atua, o ta na i haafänau pü fenua èi ìritiraa i te ùputa no te faaoraraa i te parau no te ìteraa te taata i ta na hara na roto i te fäìraa hara e te fäìraa faaroo ia ö i roto i te ôpuaraa faaora a te Atua Nui Tumu Tahi. Teie te parau haapotoraa a taiòraa e maha no ta tätou parau o teie mahana.

-Taramo 89,

-2 Tämuera 16, 16 E to òe na fare o to òe ra pätireia, e mau ia i mua ia òe ra; to òe ra teröno, e mau ia e a muri noa atu.

-Roma 16, 27 Ei te Atua paari anaè ra te haamaitaì, ia Ietu Metia nei, e eiaha ia mure. Âmene.

-Ruta Ev. 1, 38 Ua parau atu ra Märia: Inaha ei tävini au no te Fatu, ia nä-reira-hia mai au mai ta òe i parau na. Reva ê atu ra taua merahi ra.

 

Tätararaa.

Te parau e färereihia nei e tätou i teie tiaìraa maha te âparauraa ia i roto i te hoê pötii e te merahi a te Atua no te faatupu i te ôpuaraa faaora a te Atua. Te reo o te merahi E tö òe, te reo o te pötii aore o Märia E aha ia e tià ai, aore hoì au i ìte i te taata. Te tupuraa rä o ta tätou parau ua tono mai te Atua i ta na merahi ia Täperiera i te hoê ôire i Tarirea o Nätareta te iòa. E pötii  tei momoàhia i te hoê taata no te fëtii o Tävita, o Iotëfa te iòa; o Märia hoì te iòa o taua pötii ra. Teie mai nei te reo o te merahi Ia ora na, tei here-hua-hia mai. Tei ia òe te Fatu, e tei maitaì i te mau vahine atoà. Ua höriri iho ra o ia i ta na parau, e feruri iho ra to na âau i te huru o taua aroha ra. Te reo o te merahi, Eiaha e mataù, e Märia, ua herehia mai òe e te Atua. E inaha, e tö òe, e fänau ta òe tamaiti, e na òe e maìri i te iòa ia IETU. E parauhia teie Tamaiti na te Teitei. E na te Fatu ra na te Atua e horoà mai i te teröno o to na ra metua o Tävita. E pou mai te Värua Maitaì i nià iho ia Märia, e na te mana o te Teitei e tämarü i nià iho ia na, e parauhia ai hoì tënä na tamaiti moà, o te Tamaiti na te Atua. 38 Ua parau atu ra Märia: Inaha ei tävini au no te Fatu, ia nä-reira-hia mai au mai ta òe i parau na. Reva ê atu ra taua merahi ra. Ua färii o Märia i te amo ma te haapaò i te hopoià i tuuhia i mua ia na. I te parauraa e, ei tävini au no te Fatu, ia nä-reira-hia mai au mai ta òe i parau na. Teie huru pähonoraa tei faaìte nei i te tahi auraa mau no te parau e tävini, te matara nei e maha âmaa òhipa tei tupu,

1-Te färiiraa e te faaroo.

2-Te âparauraa, e te faatura

3-Te haapäpüraa, e te òhipa

4-Te faatupu e te âpeeraa.

Teie te mau papa tei faatae te pähonoraa a Märia i nià i teie parauraa e, ei tävini au no te Fatu, ia nä-reira-hia mai au mai ta òe i parau na. Te faatupu nei teie reo, to na huru, ta na peu, to na fäito, e to na puai i te au i roto i te òhipa, o teie änei te tahi auraa no te parau e tävini. Te vähi faufaa i roto i te parau o te tävini ta te Atua e ani nei ia na e hiò mai òe, no te mea ia na te Atua iho o ia i mäìti. Te taata i mäìtihia, e taata ia tei faaineinehia no te räve i te hoê òhipa päpü maitaì, ma te âpee no te faatae i nià i to na vairaa ia ìtehia te faahiahia to na ötiraa. E haere o ia i nià i te hoê vahi mätau-òre-hia, e ia faahitihia e vahi mätau-òre-hia, no te mea ia te vai ra te mau tupuraa òhipa tei òre te tävini i faaineinehia, oia hoì te tahi taata tei hinaaro ia upootià o ia i nià ia òe, mai ia òe e hinaaro ra i te upootià i nià ia na. Eiaha tätou e manaò e, te vai ra te tahi faaineineraa taa ê ta te Atua e rave no to na tävini. Teie noa te haapäpüraa ta te Atua e horoà mai nei i te parauraa a te merahi, E pou mai te Värua Maitaì i nià iho ia òe, e na te mana o te Teitei e tämarü i nià iho ia òe, e parauhia ai hoì tënä na tamaiti moà, o te Tamaiti na te Atua, tei ineine te Atua i te rave no to na tävini, oia te haapäpüraa i to na manaò i nià i te òhipa ta te Atua e hinaaro ra ia na, mai te ìte maitaì atoà i te tiàturiraa o te Atua i nià i te hopeàraa maitaì o te òhipa i horoàhia na na e rave. Nä ô noa na tätou : ia parau tätou i te tahi taata e, faaitoito, aita e òhipa ta tätou i rave, ìtehia atu ai te tahi tauiraa rahi, riro mai ai o ia ei taata itoito. Ua ìmi noa tätou i te räveà ia faaära teie taata i te itoito e vai ra i roto ia na. Eere mai te faèhau, aore ra te feiä hoe vaa, tei ravehia te tahi faaineineraa taa ê no rätou, ia vï te tino, e ia òre ia ôtohe i mua i te mauiui, e te rohirohi. I roto i te faaineineraa, aore ra te faatoaraa i te tävini o te Atua, te vai ra te tuhaa a te taata, e tano e parau e, ta na te tuhaa rahi aè, te mea ia ta te Atua e ta Ietu e haamanaò pinepine noa ra : Eiaha e mataù, te vai atoà ra rä te tuhaa a te Atua, oia te òreraa e faaruè ia na. Ia au i te reira manaò, ia paruparu te taata, eere no te mea e püai aè te ènemi, no te mea rä ua haaparuparu ê na teie taata ia na iho, ua hiò ê na ia na i roto i te pau, e aita i haamanaò faahou e, no te mea na te Atua te òhipa ta na e rave ra, tei pïhaì noa ia te Atua ia na. Ua tuu ihoä paha te Atua i to na Värua i nià i teie taata, mai te peu rä ua apiapi ê na to na âau i te mataù, nä hea ia te Värua o te Atua e òhipa ai i roto ia na. Mai terä rii faaararaa ta te Atua ia Märia na roto i te merahi, 30 Ua parau mai ra te merahi ia na: Eiaha e mataù, e Märia, ua herehia mai òe e te Atua.

Hinaaro òe na te mataù e arataì ia òe i te mäìtiraa a te Atua ; pärahi iho ia ; hinaaro òe na te Atua e arataì ia òe, a tuu ia i te mataù i räpae. Ia märamarama maitaì mai tätou i teie vähi, eere na te tävini teie mäìtiraa, ia au i te parau o te mäìtiraa, eere atoà na te Atua, hinaaro rä te Atua i te taata ta na i mäìti ia tauturu ia na i te faatupuraa i to na hinaaro. Ia ìte atoà rä o ia e, te hanahana o te òhipa, eere no na, no te Atua rä, i teie parauraa a te päpaì Taramo. 26 E tuu vau i ta na rima àui i raro i te tai, e ta na rima àtau i raro i te pape. E taata noa ihoä paha te taata, te taata rä i haapaò i te hinaaro o te Atua, ua riro ia ei teòteòraa no te Atua, te auraa ia o teie reo to te Atua ta te merahi i parau ia Märia, e te pähonoraa, 38 Ua parau atu ra Märia: Inaha ei tävini au no te Fatu, ia nä-reira-hia mai au mai ta òe i parau na. Reva ê atu ra taua merahi ra.

Mai te peu ua mäìti te Atua i te tahi, e ua tuu i to na Värua i nià ia na.

 

Mataì tätou i te ôroà ta tätou haamanaò nei te fänauraa te Metia, e te mätahiti âpï tivira.

 

Teraì òr. Faatura.

PURE NO TE HŌÊRAA O TE NŪNAA MĀÒHI E TE MAU NŪNAA ATOÀ O TE AO NEI (Mai te 03 e tae atu i te 10 no Tēnuare 2021) Te tumu parau : « A àti mai òutou ia ù e na ù e àti atu ia òutou ». (Ioane 15, 4)

ÈTÄRËTIA   POROTETANI  MÄÒHI

PURE NO TE HŌÊRAA

O TE NŪNAA MĀÒHI

E TE MAU NŪNAA ATOÀ

O TE AO NEI

 

Te âpaparaa

Àpi 01 -Te ômuaraa

Àpi 05 -Te papa haamori

Àpi 10 -Te ôroà a te Fatu

Àpi 12 -Te mahana mātāmua :

 

-Tāpati 3 no Tēnuare 2020

Àpi 16 -Te piti o te mahana :

-Monirē 4 no Tēnuare 2020

Àpi 21 -Te toru o te mahana :

-Mahana piti 5 no Tēnuare 2020

Àpi 26 -Te maha o te mahana :

-Mahana toru 6 no Tēnuare 2020

Àpi 31 -Te pae o te mahana :

-Mahana maha 7 no Tēnuare 2020

Àpi 35 -Te ono o te mahana :

-Mahana pae 8 no Tēnuare 2020

Àpi 39 -Te hitu o te mahana :

-Mahana māa 9 no Tēnuare 2020

Àpi 44 -Te vaù o te mahana :

-Tāpati 10 no Tēnuare 2020

 

Te ômuaraa

PURE NO TE HŌÊRAA

O TE NŪNAA MĀÒHI

E TE MAU NŪNAA ATOÀ

O TE AO NEI

(Mai te 03 e tae atu i te 10 no Tēnuare 2021)

Te tumu parau : « A àti mai òutou ia ù e na ù e àti atu ia òutou ». (Ioane 15, 4)

Ômuaraa :

Teie te tumu parau tei mäìtihia mai no teie hepetoma pure no te hoêraa o te mau nūnaa o te ao nei, tei faaineinehia mai e te mau paretenia no te âmuitahiraa monastique no Grandchamp. I te ārea mätahiti 1930, ua ìte teie mau vahine no te Êtārētia Reforomätio no Tuete, no roto mai i te pupu Dames de Morges, i te faufaa no te parau o te māmūraa, no te faarooraa i te parau a te Atua. Tē ora nei rātou i te haapiiraa faaroo, no tē tauturu i to rātou oraraa faaroo, papahia i nià i te oraraa o Ietu, to na huru, ta na parau. No te mea aita atu e vāhi ta Ietu e haere nei no tē pure i to na Metua, tei te vāhi moèmoè. I teie mahana, 50 vahine paretenia e ora nei i Grandchamp, 50 vahine no terā e terā Êtārētia no te mau fenua atoà o te ao nei, i roto i te rauraa o te mätahiti, tei haapāpū i to rātou parau i roto i te tāviniraa, e te färiiraa i te mau manihini perenina e haere mai nei i ta rātou pū. Ua faaìte te tahi mau paretenia paari i to rātou manaò peàpeà, i te mau âmahamaharaa e vai ra i roto i te mau Êtārētia o te ao nei. Te reira ta rātou àroraa rahi, täuturuhia mai e te òrometua Abbé Paul Couturier, metua i te faaroo i roto i te parau no te hepetoma pureraa no te hoêraa o te mau nūnaa o te ao nei.

Te àtiraa i roto i te aroha o te Atua, o te faahauraa ia òe e o òe iho.

Te manaò tumu e vai ra, te parau ia no te hoêraa, te tanoraa mau to tātou âau, to tātou tino e to tātou vārua, hoê. Eiaha e vaiiho ia äratohia i roto i te ùmeùmeraa, ia vai noa te hoêraa i roto ia òe iho e te hoêraa i roto i te Metia. A àti mai òutou ia ù e na ù e àti atu ia òutou, te reo ia o te Fatu (Ioane 15,15). Ua täatihia tātou i nià i te tumu o te vine, oia te Metia, e o te Atua Metua te taata faaàpu tei ineine i tē tope i te mau âmaa no tē faarahi i te hotu. Ia àti pāpū tātou i te Metia, e rahi to tātou hotu i roto i te tau. I teie nei, e riro to na hoturaa i te faaäpiäpihia, no te mea ua rau te mau faatïanianiraa e haaparuparu i to na tupuraa. Tātou tei ìte i te faufaa o te oraraa faaroo, e tuhaa rahi ta tātou no tē faatupu i te reira, na roto i te haaputuraa i to tātou pūai, te here, te hoêraa, te tiàturiraa te tahi i te tahi, ia tupu noa i roto i te hau.

 

Te àtiraa i te Metia e to na hoturaa.

O te mea e maitaì ai ta ù Metua, ia rahi to òutou hotu (Ioane 15,8). Eita te âmaa e hotu, mai te peu ua täpuhia i te tumu, âreà te mea faufaa e faatūàti ra ia rāua, o te täpau ia. Ta tātou e parau nei e, te tāpau no te here, te tāpau no te aroha. To tātou te reira tūàtiraa e te Fatu, na ta na parau e faaora ia tātou.

 

Te àtiraa i te Metia, o te puna ia o te here e te aroha.

To tātou àtiraa i te Metia, e na reira atoà tātou i te àtiraa atu i to tātou mau taeaè, mau tuahine. Ua ìte atoà tātou, eere i te mea ôhie i tē ora i roto i te tahi oraraa âmui, no te mea, ua rau te huru, te māramarama, te tiàturiraa, te faaroo e tē vai noa atu ra. Terā ta tātou àroraa ia tupu noa te hoêraa.

Teie te mau tumu parau i te mau mahana tātaì tahi :

 

Mahana mātāmua : Tītauhia e te Atua « Eere na òutou i hinaaro mai ia ù, na ù rā i hinaaro atu ia òutou. » (Ioane 15,16)

Piti o te mahana : E àti mai ia ù, e na ù e àti atu ia òutou. (Ioane 15, 4)

Toru o te mahana : E aroha òutou ia òutou iho, mai Ia ù e aroha atu ia òutou na. (Ioane 15, 12)

Maha o te mahana : Eìta atu ra vau e parau atu ia òutou e, e tāvini… ua parau ra vau ia òutou e, e tauà. (Ioane 15,15)

Pae o te mahana : Ua mā rā òutou i tenā na, i te parau ta ù i haapii atu ia òutou na.

(Ioane 15,3)

Ono o te mahana : Te färiiraa. E ua haapaò ia òutou ia haere òutou e ia hotu i te huero.

(Ioane 15,16)

Hitu o te mahana : O vau te vine, o òutou te âmaa (Ioane 15, 5)

Vaù o te mahana : Ia vai ā to ù òaòa ia òutou, e ia tià atoà hoì to òutou òaòaraa. (Ioane15, 11)

 

Te papa haamori :

 

E nūnaa here te Māòhi i te Tumu Nui, mai te haamataraa mai o to na parau. No to na faaroo, to na here e to na faatura i te Atua e to na tiàturiraa i faaroo ai te rahu i to na reo. Aita atu e vāhi to te Atua tänuraa i te ora, tei roto i te fenua, tei roto i te moana e tei roto i te reva, ta te mau tupuna i ìte, e i fārii, i te uru maitaì ta te Tumu Nui i haamau na na, no te mau tau atoà. Te tāatoàraa o te parau o te Māòhi, ua papahia i nià i te Atua, te fenua e te tāatoàraa o ta na rahu, ta na māa, to na reo, to na hīroà, e to na iho tumu. Eiaha e mataù i tē hoì i te fare metua ra, tei reira to òe parau e to òe ora e te tama Māòhi.

 

TE PAPA HAAMORI 2021

Himene tomoraa

Rautī :

Te hei o te reva. Te hei nehenehe roa o te ao nei, Ua faautahia i nià i te raì. Ua manotini, ua manotini, Te tiare o te reva E àma i te hihi o te mahana, No tē faaìte i te Māòhi e, Tē manaò mai ra te Atua ia na. E taù âmui tātou i te Atua.

 

(E tià pāatoà)

E te Atua Metua e, te puna o te māramarama e te ora, Òe e pārahi nei i te raì hāmama noa. A haere mai, a pārahi mai i roto i te haamoriraa nei. Haamaitaì nei mātou ia Òe, o Òe i faahei ia mātou i to Òe tura e to Òe hinuhinu, te faufaa ia o to mātou nei Māòhiraa, te èà ia o te parau mau e te ora e paèpaè nei ia mātou. Eere na mātou i hinaaro atu ia Òe, na Òe rā i hinaaro mai ia mātou. A ninii mai i to Vārua Maitaì i nià i to mau tamarii, ia riro, ei mau rima rave òhipa na Òe, no ta Òe ôpuaraa faaora tūatau, no teie nūnaa. Amene.

 

Himene. (Pārahi)

Te faaroo, te tāviri ia o te ora.

 

E māa tumu e te hotu ùmu te faaroo i roto i to tātou nei fenua e te Atua Metua e, ua ìte mātou e, e ìriti te faaroo i te mau ùputa atoà, e haafifi nei i te tupuraa o te ora o te taata. E tāamuraa pāpū te reira no mātou i nià ia Òe. E hotu no roto i to mātou nei âau, eere ānei e, i te vāhi tē reira te aroha e te here, tei reira atoà te faaroo. Ìnaha hoì, e here te Tumu Nui, e aroha te Tumu Nui. Te èà te reira, e òre ai te âvae o te taata e pähee, e e toro atoà te reira maitaì i roto i te roaraa o te tau, e na te mau vāhi atoà, tei faaìte-tātaìtahi-hia mai e te mau mea o ta Òe i rahu. Ua ìmi e ua tiàturi pāpū te Māòhi ia òe e te Tumu Nui, e ua tiàhia mai rātou e Òe, i hōroà mai ai Òe i te parau e faaroo ai te rahu ia rātou.

 

Âmui

E te Tumu Nui e, e tupuraa hanahana te tama Māòhi no to Òe hinaaro, papahia i nià i te tiàturiraa, e aita to na parau e to na ora i rāpae aè mai ia òe.

 

Himene

 

Ia fānau faahou te ora.

To Òe huru e te Atua Nui Tumu Tahi e, te huru ia ta Òe i haamau i nià i teie fenua o Māòhi nui. To na faaroo, oia te faaroo ta te fenua e haafānau noa ra, te faaroo ta to na reo, ta na māa, ta na peu, ta to na hīroà tumu e haafānau noa ra i roto i to na âau. Ua ìte mātou e, ua ineine ê ana to te reva, to te tai e to te fenua, i te täuaro mai i teie haereraa roa to tātou. Ia mau tūtūaau teie taura tāamu i roto ia òe te taata e te Tumu Nui. E ohi mā tāua e te tama Māòhi. Tei roto noa to òe ora, i to òe iòa i tē haamauraahia, no roto mai tāua i te tumu o te mā. A tuu mai i te hau, a tuu mai i te here, te ō maitaì roa aè e hanahana ai te Atua.

 

Âmui

E te Tumu Nui e, e tupuraa hanahana te tama Māòhi no to Òe hinaaro, papahia i nià i te tiàturiraa e, aita to na parau e to na ora i rāpae aè mai ia Òe.

 

Himene

 

Te faufaa ora a te Atua i te taata.

E nūnaa here te Māòhi ia Òe e te Tumu nui e, mai te haamataraa mai o to na parau, to na faaroo, to na tiàturiraa e hope roa. Ua faariro te Māòhi i te fenua, te tai e te reva ei fare pure no na, nā vāhi ia i reira to òe tänuraa i te ora. Aita roa teie mau parau i taui i to mātou hīroà, to mātou iho tumu, e ta mātou peu. Ua ìte mātou i te faatoro a to mātou mau metua, ua pāpaìhia i nià i te tua raì, i roto i te mataì, i roto i te âvaè, i roto i te mahana, e tupuraa to na i nià i te fenua nei. O to Òe here e to Òe aroha ta Òe i haamau ei ora no mātou. A pārahi i roto i te here metua e te tama Māòhi, a pārahi i roto i te here fenua. E rahi òe i roto i te here metua, e rahi òe i roto i te here fenua.

 

Âmui

E te Atua Metua e, a fārii mai òe ia hoì atu mātou ia òe, ia riro mātou ei moihaa no te faatupuraa i to Òe hinaaro. A tauturu mai ia mātou i te faaroo-faahou-raa i to Òe reo. No te mea, to Òe reo e te Rahu Nui e, te reo ia o te fenua. Haamaitaì mātou ia òe.

 

Himene

Pehepehe

Taiòraa pīpīria

Himene

Manaò tauturu

Pure

Himene âmui

Pure a te Fatu

Himene ôroà (Tāpati ôroà)

Ôroà a te Fatu

Himene hopeà

 

Faaitoitoraa & Haamaitaìraa

E to mātou Metua i te raì tuatinitini e, ènā atu te hei o te here e te aroha, ènā atu te hinuhinu e te tura o te Māòhi, ènā atoà atu te tiàmāraa o te nūnaa Māòhi. Mauruüru i to Òe âmuiraa mai i te haamoriraa nei. Ia Òe i tura ai e i hanahana ai ta mātou nei haamoriraa. Hoì noa ai Òe i to Òe nohoraa hanahana, i te vāhi e òre e naeàhia e te ìno. Vaiho mai Òe ia mātou i roto i te rima o to mātou nei metua vahine, na na e hii ia mātou i to na here metua. E te hui faaroo e, a haere ma te hau, a haamanaò i teie maa parau iti e, Ia tura i te taata te fenua, te metua ia i fānau ia na. Te fenua, te iho tumu e te Atua, to òe ia ora. E parau mau. Amene.

 

Te Ôroà a te Fatu

Tātou i âmui mai no te haamanaòraa i te òhipa i ravehia e to tātou Fatu e Ietu Metia, a faaroo mai i te parau i haamau i te ôroà. E tē tāmāa ra rātou, ua rave iho ra Ietu i te färaoa, e oti aè ra ia na i tē haamaitaì i te Atua Metua, vāvāhi iho ra, tuu atu ra ia rātou ra, nā ô atu ra : A rave a àmu o ta ù tino tenā. Ua rave iho ra i te âuà, haamaitaì atu ra i te Atua Metua, tuu atu ra i ta na mau pipi ra, nā ô atu ra : A rave a inu, o ta ù toto tenā, te toto no te faaauraa âpī i haamaniihia no te taata e rave rahi, ia matara te hara. Haamanaò tātou e, te ôroà, e haamaitaìraa e e faahanahanaraa tuutuu òre na te taata i te Atua, no te here e te aroha ta te fenua e faaìte noa ra i te mau taime atoà. I tano roa ai te reo o te Atua Metua i te taata, a hiò i tei au ei māa, a rave a àmu. No taua māa nei ā hoì ta òe i faahotu mai, i tae roa ai to Tamaiti Here i te parauraa, mai tē tāuruüru òre e : O ta ù tino tenā, O ta ù toto tenā. No reira, ta Òe faaìteraa e ta te Tamaiti a te Teitei Nui, hoê ā ia : e aroha te Atua.

Te haamaitaìraa i te māa e te pape.

 

(E tià te taata)

No te māa

Tē haamaitaì nei mātou ia Òe e te Atua Metua e, no to Òe here e to Òe aroha ta te māa : ùru, taro, färaoa ta te fenua i faatupu mai ei ora no mātou.

 

No te pape

Tē haamaitaì nei mātou ia òe e te Atua Metua e, no to Òe here e to Òe aroha ta te pape haari, te uaina, ta te fenua i hōroà mai. A rave a àmu, a rave a inu, ia hanahana te Atua Nui Tumu Tahi.

 

Ia hope

Ia haamaitaìhia te Atua Metua, te Fatu o te raì e te fenua, tei ìriti i te ùputa o te ora. E faaìte tātou i to tātou òaòa e to tātou mauruüru. E ârue tātou ia na mai ta te fenua e ta te Tamaiti e haapii mai nei ia tātou. E tomo i roto i to na Hau, tātou e ta tātou huaai, te faufaa ora mutu òre te reira na tātou. E ia Òe ta mātou ârueraa e a tau a hiti noa atu. Âmene.

 

Mahana mātāmua

Tāpati 3 no Tēnuare 2021

Te tumu parau :

Eere na òutou i hinaaro mai ia ù, na ù rā i hinaaro atu ia òutou. (Ioane 15, 16)

 

Te pehepehe :

Kai kaia.

Ka kai ä e e e

Te reo tumu ia o te fenua, e faaära ra i te tama,

A kai… àmu…, e ia paìa òe i to òe parau,

A faateni i to âià here, ta te Tumu Nui i hōroà mai no òe,

A parau, e, a ora i roto i to òe reo,

 

E fenua to òe, tei nià i te tua raì, tē pāpaìraahia te mau òhipa, tē tià i tē faatupu i te fenua.

A kai ā… i te reira haapiiraa, e ta ù tama,

A kai e ia paìa òe, i ta òe i tanu,

Kakaia e e e…

kakaia kai a kai e…

 

A ara e ta ù Tama, eiaha e vaiho na verā e kai i to òe parau,

A ara, tē matamatahia mai ra òe,

E hinaaro rahi to rātou i to òe àpu,

Eiaha e faarirohia to òe àpu, mai te pataraa pōro ra te huru,

Ta òe te reira pirū, ta te Tumu Nui i faaherehere no òe,

E ta ù tama e…

Kakaia kaia kai e…

 

Te mau taiòraa :

Tenete 12, 1-4 : Te tītauraahia o Âperahäma.

Ioane 1, 35-51 : Te tītauraahia te mau pipi.

 

Te manaò tauturu

E ôpuaraa teie na te Atua e haere e fārerei i te taata, no te tāpura òhipa e tīaì mai ra ia na. I tae mai ai te reo ia Âperahäma, e faaruè i te ùtuafare o to na mau metua, e haere i te fenua o ta te Atua e hōroà no na. E èà roa teie, e i mua i teie tāvini tei fārii i tē tomo i roto i teie ôpuaraa âpī, ta te Tumu Nui e hinaaro nei i tē haamau, e fenua âpī, e faanahoraa âpī, e arataìraa âpī. Aita te Atua i huna i to na hiaai, e mea māramarama maitaì te faaauraa i roto ia rāua, e nūnaa rahi tē matara mai no roto ia na. Te auraa, tē faaâpī nei te Atua i te uì taata tē na roto atu ia Âperahäma, eere no tē haafaufaa òre i te ùtuāfare o ta na i faaruè atu i Ùra i te Tarataio, eere roa atu i te reira. No te mea, ua tae i te tau, tē hinaaro e tē òre e hinaaro, e tupu ihoā ta te Tumu Nui faaâpīraa. I roto i teie haereraa âpī, aita te Atua e ôpua nei e taui te oraraa o teie nūnaa, e tīaì ânimara, e feiā faaàpu, e feiā piri roa i te fenua, feiā tei here e tei faatura i te fenua e tae noa atu i ta te fenua i faahotu mai. Ia hiò-anaè-hia, te faaauraa ta te Atua i faaau ia Âperahäma, ta te Atua atoà ia i faaau i to tātou mau tupuna. E ta ù nūnaa iti e, ua tīpee òe i ta verā, te oraraa ta to òe mau metua i faanaho no òe, e ùtuāfare hoê, e oraraa fētii. Mea nahonaho maitaì to òe oraraa, fare taòtoraa, fare tāmāaraa, ahimāa ta òe, e faaàpu ta òe, e ânimara ta òe, e vaa to òe. Tei roto òe i te uru maitaì, te vāhi ia ta te Atua i haapārahi ia òe. E oraraa fānaò to òe, aita te Atua, aita te fenua i faaère ia òe. E māa ta òe, e rāau ta òe, ua riro te fenua ei òrometua haapii nūmera hoê no òe e te taata. Ia hinaaro òe e àmu i terā fāito ià, a hiò i te âvaè, a hiò i te mau tāpaò ta te fenua e faaìte mai ra. Te tänuraa i te māa hotu, a hiò i te âvaè, e mau tāpaò anaè terā no te ora. E ta ù nūnaa iti e, tē nounou mai ra o verā i to òe oraraa e ta òe faufaa. Tē haere noa ra te tau i to na haereraa, tē haere noa atoà atu ra i te tūmā marū-noa-raa ia òe, ua haamata i tē tūraìraì ia òe, eita òe e tano faahou i terā vāhi, e tano rā òe i ô. Tē riro nei òe ei ôvere iō òe iho, tē nūnaahia ra te mau aroā i te òire pū. I teie mahana, tē ihu nei tātou. E aha te tahi rāveà. E pārahi i raro, e tuu i te tohe i raro, a hiò atu ai i te èà o ta òe i haere mai, e aha te huru.

E ta ù nūnaa iti e, e turaraa to òe, â tirē i tē haafaufaa òre ia òe, e parau nehenehe roa to òe. Te moni e e e, ha ! ha ! Faaruè roa te metua vahine faatupu ora, o te papa ia o to òe ora. Haamanaòhia atu ra te parau o te ûrī e tāpeà ra i te ivi i roto i to na vaha, na nià i te èà turu, ìte atu ra i to na hohoà i roto i te pape, tē mau ra i te ivi rahi atu ā, faaruè atu ra i terā i roto i te vaha, ôuà iho nei i roto i te pape, o to na ia pohe.

Te uiraa i ô nei : E aha paì ta te māramarama e te paari o te taata, e hōroà mai na òe. E aha ta na e vaiho mai na òe.

I teie mahana, ua tāpiri terā taiete, terā taiete, âreà te fenua, aita to na ùputa i piri, tē tīaì mai ra ia òe. Eiaha e mataù i tē hoì i te fenua, te papa terā no to òe ora. E aha ta òe e tīaì ra, e ora òe ia òe iho, eere òe te nūnaa tāparu, a tiàturi ia òe, e a tiàturi i to òe Atua, a haere, o òe e to òe fenua, o òe e to òe Atua.

 

Te pure

Haamaitaì mātou ia òe e te Atua Nui Tumu Tahi, fenua no mātou, fenua Māòhi no to mātou Māòhiraa, reo no ta mātou faateniteniraa, te iho tumu no to mātou ora, uruaìraa no mātou i roto i te àti e te fifi. Metua faaroo i to mātou reo tātarahapa, monoì tāvai i to mātou mau māuiui. Mai te tamarii i aòhia e to na metua, tē hoì mai nei mātou mā te âau tātarahapa no tē ani ia Òe, ia haamāhorahora mai ā Òe i to Òe rima metua, e ia fārii ia mātou i roto i to Òe here.

Âmene.

 

 

 

Piti o te mahana

Monirē 4 no Tēnuare 2021

Te tumu parau :

E àti mai Ia ù, e Na ù e àti atu ia òutou. (Ioane èv 15, 4)

 

Te pehepehe :

E te Māòhi e

Te Māòhi inanahi ra

I teie mahana e a tau a hitu noa atu

E aha to òe huru i teie mahana

E aha to òe manaò i teie taime

Ua ìte ānei òe, tē haere ra òe i hea

Ua ìte ānei òe i te mau maitaì e âuahāàti nei ia òe

E te tama e, e te tama herehia e te Tumu

Mau ia òe i To na here e To na aroha

Mau ia òe i Ta na mau maitaì

E te tama e, eiaha e fāriu ê i te mau mea e haaäpiäpi nei ia òe

E faaātea ia òe i te ora

A ìmi, a ìmi i to Atua ia ora òe

A ìmi, ia tià faahou mai òe i nià i to òe Māòhiraa

Tama òe no te here

Tama òe na te Tumu

E te Māòhi e, ia ora pāpū òe i roto Ia na

Aita atu to òe ora, to Atua ia.

 

Te mau taiòraa :

Èfetia 3, 14- 21 : « Ia pārahi te Metia i roto i to òutou âau i te faaroo ».

Ruta èv 2, 41- 51 : « Vaiiho atu ra Māria i taua mau mea atoà ra i roto i to na âau ».

 

Te manaò tauturu

Ta tātou tumu parau no teie mahana « E àti mai Ia ù, e Na ù e àti atu ia òutou », e parau faaitoito terā na Ietu i Ta na mau Pipi, i roto i ta tātou taiòraa Ioane. Tē faahohoà nei Ietu Ia na mai te tahi tumu vine, e te mau Pipi mai te tahi âmaa. Te Atua te faaàpu, Ietu te tumu e te mau Pipi te âmaa. I roto i terā faahohoàraa ta Ietu, tē parau nei O ia e, e tāpūhia te mau âmaa hotu òre e e topehia te mau âmaa hotu, ia rahi faahou ā te hotu. Mai terā atoà no te tahi taata faaàpu, ia tanu anaè o na i te tahi māa aore ia tumu rāau, e tāpūhia te mau âmaa hotu òre e e topehia te tahi mau âmaa ia rahi faahou ā te hotu. Ua riro te reira faahohoàraa, ei faaìteraa i te mau Pipi e, mai te peu eita rātou e ìmi i te tahi rāveà no tē tāpiri ia rātou i nià i te tumu rāau, oia hoì ia Ietu, e tāpūhia te reira mau âmaa hotu òre, e mai te peu ra e, e piri rātou i nià i te tumu, i te reira taime e topetopehia te âmaa ia rahi te hotu. Te auraa, e topetopehia te tahi mau vāhi tē faaapiapi nei ia rātou, to rātou huru, ia au i ta te Atua ôpuaraa. E tuhaa ta te mau Pipi tātaìtahi e rave, e e tuhaa atoà ta Ietu e rave atu ia tūàti maitaì rātou e ia riro rātou ei hoê. I mua i terā tumu vine e faaìtehia ra e Ioane, te parau no te tūàtiraa, te àtiraa i roto i te mau Pipi e Ietu, ua arataì-atoà-hia te reira manaò e Pauro, na roto i ta na rata i te nūnaa no Èfetia. Mai te rahu e hoê nei, tē tītau-atoà-hia ra i te nūnaa, ia hoê te taata na roto i te hoêraa ia Ietu. Ia pārahi te Metia i roto i to òutou âau i te faaroo, no teie nūnaa Èfetia e te oraraa i orahia mai e ana, tē haapāpū nei o Pauro i ô nei, i te hinaaro o te Atua ia na, na hea te reira nūnaa e ora ai, e e aha te rāveà, ia haapāpū te nūnaa no Èfetia i to na faaroo, na roto i te vaiihoraa ia na ia ärataìhia e te Vārua Maitaì, vaiiho ia na ia pārahi te Vārua faaroo i roto i to na âau no tē haapāutuutu atu i to na oraraa faaroo. Mai te peu e faatupu te reira nūnaa i te hoêraa i roto ia rātou e i roto i te Metia, e ìtehia te reira i roto i to rātou oraraa âmui. No te mea, e parau rahi to te hoêraa, aita ana e faataaraa i te taata, i te huru o te taata. E mai te peu e ìriti te nūnaa i to na âau no tē vaiiho atu i te Atua, te Tamaiti e te Vārua Maitaì ia pārahi i roto, no te mea te reira ihoā te pārahiraa o te Atua, tē roto i te âau o te taata, ua ora ia nūnaa. Na roto atoà i te reira hoêraa, ua faatupu ia te taata i te hinaaro o te Atua. Parau pāpū ia te reira ta Pauro e hinaaro nei e tuu i roto i te nūnaa no Èfetia e ia tātou atoà.

Te tumu vine, te hoêraa, te tahi te reira mau tuhaa òhipa ta Ietu i haere mai e faaìte i te nūnaa, ua faaìte e ua ora atoà no tē faaìte atu i te taata e, e maraa atoà ia na i tē rave na roto ihoā ia i te tahi huru taata. Tē faahope nei ta tātou tumu parau rahi na roto i te Èvaneria a Ruta, te parau no te Pāta, te parau no te tahi òhipa tē tupu i taua taime ra. Ia au te faatiàraa a Ruta, ua haere o Ietu, To na metua Vāhine o Māria e o Iotëfa i te tahi ôroà Pāta tē tupu i Ierutarëma. No te rahi ihoā o te taata, tei âmui, ua moè o Ietu, ua ìmi nā metua, e aita i ìtehia mai e rāua.

I te reira taime, ua haamanaò atu ra o Māria i te òhipa e auhia e Ietu i tē rave aore ra, ua haamanaò atu ra Māria, e aha te tītauraa a te Atua ia Ietu i nià i te fenua nei, haere atu ra nā metua i te Fare Pure, vāhi pāpū ai ia rāua e, to ô te Tamaiti ra. Aita ihoā te manaò i hape, tē roto te Tamaiti i te nūnaa, tē parauparau ra, tē hōroà ra te haapiiraa i nià i te parau a te Atua, faaìte i te nūnaa, o vai te Atua. I mua i te aniraa a Māria e te pāhonoraa a Ietu, e putapü ihoā te âau o te metua vahine, no to na rā here i to na Atua e no te mea ua ìte o na i te tuhaa tē horoàhia i roto i ta na Tamaiti, ua vai muhu noa o na. E au ra e, tē faaìte nei te reira tupuraa òhipa i te taata, i te tahi huru ia hoê anaè te taata i te Atua. E au ra e, aita o Māria i haataupupū i to na manaò, ua tuu ra o na ta na mau manaònaòraa, haapeàpeàraa i roto i te rima a te Atua. E nā roto i to na raveraa i te reira tuhaa, ua māmā te feruriraa, ua māmā te âau, noa atu terā âau metua vahine to na.

Ua tiàturi o ia e, e na te Atua e tīaì i ta na Tama. Na roto i to Māria tiàturiraa, na roto i te hoêraa i te nūnaa

i roto i te Metia e na roto i te àtiraa o te mau Pipi ia Ietu, ua riro te reira mau taiòraa no teie mahana ei haamanaòraa ia tāua, te nūnaa Māòhi, i te tītauraa ta te Atua e hinaaro nei ia tupu i roto ia tātou. Ua âpī te reira nūnaa i terā ra tau, na roto i te mau faaìteraa, mau haapiiraa ta Ietu i rave i rotopū ia rātou, ua âpī atoà rā tāua e te nūnaa Māòhi, i mua i te mau haapiiraa ta te metua, ta te mau tupuna i faaìte ia tātou no tē haafātata atu ia tātou i te Atua. Na roto i te fāriiraa i te mau maitaì atoà i vaiihohia mai e te Atua, tē faaìte nei te Atua i To na nūnaa i te mau mea atoà e ora ai o ia. Ta tātou tuhaa, te haamanaòraa i tē tiàau māite atu i te reira, mā te òre atoà e haamoè e, ia vai ìriti noa to tātou mau âau no tē fārii atu te parau maitaì a te Atua e no tē faaìte, i te tauturu i to tātou nūnaa i mua i te reira mau maitaì. No reira, teie ia te tahi mau manaò i mua i ta tātou parau no teie mahana. Ua ìte òe e, ua here te Atua ia òe, a faaitoito anaè ia. Ia ora na.

 

Te pure

Atua tē î i te here Metua, Fatu o te raì e te fenua, te moana e to na mau î atoà. Tē mauruüru nei to mātou âau no te mau maitaì atoà tē fānaòhia nei e mātou. I mua i to Òe here e to Òe aroha ia mātou, tē faahaèhaa atu nei mātou i mua ia Òe. Te Atua, e haapiiraa rahi tē noaa mai ia mātou na roto i teie mau tumu parau tē heheuhia e mātou, o ta mātou e tuu pāpū nei i roto i to mātou mau âau, ia ìmi mātou te rāveà ia tūàti faahou mātou ia Òe. Te Atua, ua ìte atoà mātou e, eita te reira e tupu aita anaè mātou e tuu i to mātou tāatoàraa i roto i ta Òe parau. Tauturu faahou mai ia mātou i tē ìteraa e, o Òe te Fatu o to mātou ora, a nīnii mai to Òe Vārua no tē faaìte ia mātou i te vāhi ta Òe i faaineine no mātou. Teie te pure ta mātou e pūpū nei i roto i to Òe rima, na roto i te iòa o ta Òe Tamaiti here o Ietu Metia. Âmene.

 

Toru o te mahana

Mahana piti 5 no Tēnuare 2021

 

Te tumu parau : E aroha òutou ia òutou iho, mai Ia ù e aroha atu ia òutou na. (Ioane èv 15, 12)

 

Te pehepehe :

E homā, e te tama Māòhi e

Tama no te âià here

Tama no te haèhaa

Tama no te hau

A hiò i te Tumu, a hiò i te ora

Hohoà òe no te reira Tumu

Tama herehia òe e Ana

Eiaha e tītau i te rahi

Eiaha e tītau i te ànaana

Fāriu ê atu rā òe i to taata tupu

E hohoà teie tē ātea roa ia òe i te parau no te here e te aroha

E te tama, terā ānei ta te Tumu e tītau rā ia òe

Haamanaò, rau noa atu ai to òe huru

Ua here O ia ia òe.

 

Te mau taiòraa :

Torota 3, 12 - 17 : « E tenā na, e faaâau aroha noa ».

Ioane èv 13, 1 - 15 ; 34 - 35 : « E aroha òutou ia òutou iho »

 

Te manaò Tauturu

E aroha òutou ia òutou iho, mai Ia ù e aroha ia òutou na, ta tātou te reira tumu parau no teie mahana. E parau pāpū teie na Ietu i Ta na mau Pipi, faatupu i te aroha, faatupu i te here i roto ia rātou, i roto i te taata tātaìtahi. Mai ta te Atua e Ietu e faaìte rā i te taata, mai terā atoà te huru here ta Ietu e hinaaro ra ia tupu i roto i to rātou mau âau. Ia hiò-anaè-hia, te reira here to Ietu, ua hōroà O ia i To na tāatoàraa no te taata i roto i te fifi, i roto i te māuiui, i roto i te hepohepo, aita i fāito, aita i hiò no hea roa, no te aha, aita i māìti i te taata, mai te haìhaì roa e tae atu i te mea teitei, mai terā i ìno e tae atu i terā mea maitaì, ua tueā noa te here o Ietu i nià i te tāatoàraa. « Mai Ia ù i aroha ia òutou na », terā ia te here i tītauhia e te mau Pipi ia tupu i roto ia rātou, i roto i to rātou âau faaroo. A hiò na, ua hōroà Ietu i To na ora no te taata i nià i te tātauro, ua riro te reira ei faaìteraa i To na here fāito òre i te taata, terā tei hape aore ra tei hara, hōroà te ora no te tahi, ta Ietu ia i rave no te taata e Ta na atoà ia e hinaaro ra e faaìte. Ia tae anaè te reira here, te reira huru here i roto i te mau Pipi, ua ineine atoà ia o na i tē hōroà i to na ora no te tahi, no ta na täuaro. Mai te Metua i here i Ta na Tamaiti, mai terā atoà to te Tamaiti here i te mau Pipi e te taata. Na roto i te faatupuraa i te here i roto i te mau Pipi tātaìtahi e te taata, tē faaitoito atoà nei o Pauro i te Êtārētia no Torota mā tē faatupu atoà i te reira, teie ia to na reo : « E faaâau aroha noa ». I roto i te reira arataìraa manaò, tē hinaaro nei o Pauro e faatītīàifaro i te tahi mau òhipa tē tupu i roto i teie nūnaa, te mau òrometua haavare, te mau òhipa hape ta rātou i rave, tē faarahi aè i te mau òhipa pae tino i ta te faaroo. Tē faaìte nei o Pauro i teie nūnaa e, ia haapae o ia i teie taata tahito no tē faatià atu i te tahi taata âpī. Ia vaiiho teie mau taata i tē matauhia e rātou i tē rave no tē faaàhu atu ia rātou i te tahi àhu âpī, ia au i to te Atua hinaaro, inaha hoì, aita e tià te mau òhipa ta rātou e rave ra, aita te parau o te faaroo i roto, aita te parau o te Atua, te parau no te tiàturi i te Atua i roto. Ia hiò-anaè-hia, ua ātea roa teie nūnaa i te Atua. E faaâau aroha noa, ia vaiiho rātou i te Atua, te Metia e te Vārua Maitaì, ia pārahi i roto i to rātou mau âau e na te reira e arataì ia rātou i roto i to rātou oraraa. Haapāpū i to na parau na roto i te Metia.

E aroha òutou ia òutou iho, e faaâau aroha noa. Teie here, teie taata âpī tē hinaarohia, tē hoì faahou mai nei te parau no te aroha na roto ia Ioane. E aroha òutou ia òutou iho, tātaì piti i te parau no tē haamanaò e no tē haapāpū i te taata. Na roto i te òhipa tē tupu i roto ia Ietu e Ta na mau Pipi hou te ôroà Pāta, no to Ietu ìteraa ua fātata te hora e faaruè mai ai O ia i teie nei ao, ua horoi atu ra i te âvae a Ta na mau Pipi, tae atu ai i nià ia

Timona Pētero. Mea taa ê rii ia to na tupuraa, inaha hoì, ua mārō o Ietu i tē horoi i to na âvae, hinaaro atu ra o Pētero ia höroihia te tāatoàraa o to na tino, mai te upoo e tae atu ai i to na âvae, ia mā maitaì o na. I mua i te reira mau parauparau tē tupu i roto ia rāua, tē faaìte māite nei Ietu i te faufaa o teie horoiraa âvae e te faufaa òre o tē faateitei. I mua i To na tiàraa Tamaiti a te Atua, aita O ia e haafaufaa nei i te reira, ua haèhaa roa Ietu, ua faaìte O na i te mau Pipi te parau no te haèhaa. E aha te faufaa o te nūnaa, te mau òrometua haavare, te mau òhipa hape ta rātou i rave, tē faarahi aè i te mau òhipa pae tino i ta te faaroo. Tē faaìte nei o Pauro i teie nūnaa e, ia haapae o ia i teie taata tahito no tē faatià atu i te tahi taata âpī. Ia vaiiho teie mau taata i tē matauhia e rātou i tē rave no tē faaàhu atu ia rātou i te tahi àhu âpī, ia au i to te Atua hinaaro, inaha hoì, aita e tià te mau òhipa ta rātou e rave ra, aita te parau o te faaroo i roto, aita te parau o te Atua, te parau no te tiàturi i te Atua i roto. Ia hiò-anaè-hia, ua ātea roa teie nūnaa i te Atua. E faaâau aroha noa, ia vaiiho rātou i te Atua, te Metia e te Vārua Maitaì, ia pārahi i roto i to rātou mau âau e na te reira e arataì ia rātou i roto i to rātou oraraa. Haapāpū i to na parau na roto i te Metia. E aroha òutou ia òutou iho, e faaâau aroha noa. Teie here, teie taata âpī tē hinaarohia, tē hoì faahou mai nei te parau no te aroha na roto ia Ioane. E aroha òutou ia òutou iho, tātaì piti i te parau no tē haamanaò e no tē haapāpū i te taata. Na roto i te òhipa tē tupu i roto ia Ietu e Ta na mau Pipi hou te ôroà Pāta, no to Ietu ìteraa ua fātata te hora e faaruè mai ai O ia i teie nei ao, ua horoi atu ra i te âvae a Ta na mau Pipi, tae atu ai i nià ia Timona Pētero. Mea taa ê rii ia to na tupuraa, inaha hoì, ua mārō o Ietu i tē horoi i to na âvae, hinaaro atu ra o Pētero ia höroihia te tāatoàraa o to na tino, mai te upoo e tae atu ai i to na âvae, ia mā maitaì o na. I mua i te reira mau parauparau tē tupu i roto ia rāua, tē faaìte māite nei Ietu i te faufaa o teie horoiraa âvae e te faufaa òre o tē faateitei. I mua i To na tiàraa Tamaiti a te Atua, aita O ia e haafaufaa nei i te reira, ua haèhaa roa Ietu, ua faaìte O na i te mau Pipi te parau no te haèhaa. E aha te faufaa o te teitei, inaha hoì, no te Atua anaè te teitei, aita to te taata. Ia riro te reira ei haaferuriraa i te mau Pipi i nià i te òhipa ta Ietu i rave i roto i To na oraraa i nià i te fenua e ta Ietu atoà e tītau ra ia rave, ia faaìte te mau Pipi i te taata, pūòi i Ta na òhipa i nià i te fenua na roto i te haèhaa e te tāviniraa i te taata. Tāpiti i te parauraa e, E aroha òutou ia òutou iho, te parau no te faaâau aroha noa. Na te reira mau tumu parau ta tātou no teie mahana e tauturu i te taata tātaìtahi i nià i te hinaaro mau a te Atua, mā tē haapāpū i to tātou tiàturiraa Ia na. Ua haere mai Ietu i nià i te fenua, e ora i roto i te nūnaa mai te hoê taata eere no te faateiteiraa Ia na, faateitei i To na tiàraa, no tē faaìte rā i te tahi huru taata e noaa ai ia na i te ora, te here, te haamaitaìraa a te Atua. Haamanaòraa ia tāua e te nūnaa Māòhi, i mua i te mau hōroà atoà a te Atua ia tātou, i mua i te huru o to tātou oraraa tātaìtahi, rau noa atu ai, ua here te Atua ia tātou, e mai ia Ietu, tē faaitoito i tē faaìte o vai te Atua Metua, no vai te ora e, e aha te tuhaa òhipa a te taata i nià i te fenua, na roto rā i To na faaroo, To na tiàturiraa i te Atua. Ua māraa Ia na i terā tiàraa taata, na roto i te haèhaa, te here te tahi i te tahi, te tiàturiraa, na te reira i tūraì To na oraraa i nià i te tahi fāito. E aha faahou ā ta tātou e tīaì ra no tē taahi i nià i te èà no te ora, e aha faahou ā ta tātou e hinaaro ra, ia faaìte mai te Atua, è rā mai te mau maitaì atoà e âuahāàti nei ia tātou. Ia haamaitaìhia te Atua no teie mau parau tē hiòhia mai ei tautururaa ia tātou i te mau mahana atoà. Hoê Atua tē here ia tātou, hoê Metia tē pūpū Ia na i nià i te tātauro, e hoê Vārua Maitaì no tē arataì ia tātou. Teie ia te tahi mau manaò i nià i ta tātou parau, Ia ora na.

 

Te pure

To mātou haapūraa ora, tumu o te mau maitaì atoà tē fānaòhia nei e mātou, mauruüru, mauruüru e te Atua no teie mau hōroà. I teie mahana, ua hiò mai mātou i te parau e te faufaa no te here e na hea mātou e faatupu te reira i roto ia mātou e i nià i to mātou mau tauà. Mā te âau haèhaa, tē ani nei mātou ia Òe te Atua, ia faaitoito, ia tūraì Òe, ia tūrama Òe ia mātou no tē faatupu atu i to Òe hinaaro. Teie mai to mātou mau âau, e tē pūpū nei mātou i te reira i roto i to Òe rima Metua, no tē haafaufaa atu te parau no te here. Metua, o Òe anaè tē ìte i to mātou mau huru tātaìtahi, a faariro ia mātou ei mauhaa no to Òe here e no to Òe aroha, ia riro mātou ei mau tāvini tē tià i mua i to Òe nūnaa no tē tauturu atu ia na i tē hoì ia Òe ra. Teie mai ā ta mātou pure e te Metua, aroha mai ia mātou, aroha mai ia mātou e te taata hara nei, na roto i te iòa mana o ta Òe Tamaiti here o Ietu Metia. Âmene.

 

Maha o te mahana

Mahana toru 6 no Tēnuare 2021

 

Te tumu parau :

« Eita atu ra vau e parau atu ia òutou e, e tāvini... ua parau ra vau ia òutou e, e tauà » (Ioane 15, 15)

 

Te pehepehe : Te rāau Māòhi

Tei roto te tamarii i te ôpū o te metua vahine,

Ua haamata òe i ta òe òhipa,

Tāmā, haamaitaì i te èa.

E tauturu òe i te metua vahine,

No te tupu-maitaì-raa o ta na âiū.

Ia fānau mai te tama, èie ā òe.

Maa monoì iti e te ahi i nià i to na pito,

Ia òre âiū ia putahia i te toètoè,

Aore òe e faaea i tē àtuàtu, tē pāruru i teie tamarii

E tae noa atu i to na paariraa.

To òe ia huru e te rāau Māòhi.

Ua riro òe ei mea faufaa i roto i te oraraa o te Māòhi

E hia uì ta òe i faaora.

E hia uì taata i tītau i te ora e vai ra i roto ia òe.

Ua vaiho òe ia òe ia raveravehia, e te mau rima o māmāû mā, pāpāû mā.

Te tāpaò ta òe e faaìte mai, tē vai ra te tāpaò, e maì teiaha terā, e, e maì ora noa terā.

Ia faaìte mai òe ia òe, tei te vāhi āteatea noa òe. Eita e òhipa rahi no tē ìmi ia òe,

Mea na roto ānei i te moemoeā,

To òe ia huru e te rāau Māòhi

Ia faatura-noa-hia òe, e to mātou täote nui e.

Māòhi e Māòhi, e here i ta tāua rāau, a inu i ta tāua rāau.

 

Te mau taiòraa :

Roma 8, 26-27 : Tē turu atoà mai nei hoì te Vārua i to tātou nei paruparu.

Ruta 11, 1-4 : E te Fatu, a haapii mai ia mātou i tē pure.

 

Te manaò tauturu

E aniraa teie na te tahi pipi ia Ietu ia haapiihia rātou i tē pure. Parau mau, mea pinepine ihoā rātou i tē ìte ia Ietu ia pure, âreà rātou aita ā ia i ìte. Te mea ia i ani ai o ia ia Ietu, ia haapii atoà ia rātou. E manaò huru peàpeà to te mau pipi ia au i ta Ruta hiòraa, riro noa ai rātou ei pipi, pee noa ai i te mau taahiraa âvae o te Fatu, faaroo noa ai i te rahi o ta na mau haapiiraa, aita rā rātou iho e taa ra. No reira, eita atoà tātou e maere i te huru no ta rātou aniraa i te Fatu e, e haapii mai ia mātou i tē pure. Tē faaìte noa mai ra te reira hohoà i te rahi o to rātou paruparu aore rā no te tahi mea i manaòhia e ua èrehia e rātou, oia hoì, te pure. Te pure, e taime fārereiraa te reira i te Atua, e taime hoì i reira te taata e faaìte ai i te Atua ta na e hinaaro ra. I mua i te manaò peàpeà o te mau pipi, e to rātou hinaaro rahi ia pāhonohia ta rātou aniraa, tē faahiò nei te Fatu ia rātou i nià i te Atua, to na Metua. Te Tamaiti iho teie a te Atua, tei ìte maitaì i te huru o to na Metua, o na teie e haapii ra i te mau pipi i tē pure, tei au i te hinaaro o to na Metua. Ia haapotohia, te pure, e òhipa te reira i roto ia òe e te Atua, o òe e to òe tiàturiraa i te Atua. Te auraa, e tauturu teie ta te Fatu e hōroà ra e ta na e faatoro nei i ta na mau pipi i te vāhi e na reira i tē haere. E te vāhi mātāmua roa e faatorohia ra e Ietu, o te faahiòraa ia ia rātou i te parau o to na Metua. Ia haamanaò rātou e, hou te mau mea atoà ta rātou e manaò ra i tē rave, no te Atua ihoā te parau mātāmua. O na te Metua, e Metua no te here e te aroha, e Metua tei aupuru, tei hōroà, tei faaàmu, e tei pāruru. O na te Tumu, te mātāmua e te faahopeà o te mau mea atoà, tei ia na ra te ora. E huru ihoā terā o te Metua, ta na tuhaa, ìmiraa i te rāveà ia ora te tamarii. Mai terā te huru o te Atua, aita atu ta na e manaònaòraa, ia ora te mau taata atoà. To tātou fifi, te fifi atoà i ìtehia e te mau pipi, ua ìte rā ānei hoì tātou i tē pure mai ta Ietu i haapii i ta na mau pipi, aita ānei hoì tātou, mai te mau pipi ra te huru, aita ānei tātou e rave peu noa, aita ānei tātou i ère i te tahi mea. Tē tauturu nei te piti o ta tātou nei taiòraa, na te Vārua e tauturu i to tātou paruparu. Eere i te parauparauraa noa, pure no teie mahana e no te mahana tātaìtahi noa. Eere ua mau âau noa ia tātou, no te mea rā ua faaâpī-noa-hia teie pure e to tātou faaroo. Te tiàturiraa, aita tātou i vaiho-ôtare-noa-hia i mua i te fifi, noa atu aita tātou i ìte i tē ani. Tē pure nei te Vārua Maitaì na roto ia tātou e na te Atua e pāhono mai. Tē tauturu nei te Fatu ia tātou i roto i ta na pure, eiaha tātou e mataù i tē haafātata i te Atua. No reira, i te mau taime atoà e pārahi ai tātou i roto i te peàpeà, te taime hoì e topa ai i roto i te ère, te taime hoì e òre ai e taa faahou, e aha te òhipa e rave, terā te rāveà, terā te faanahoraa. E ani, e hōroàhia, e ìmi, e ìtehia, e patōtō, e ìritihia mai te ôpani ia òutou. No te taata tei pāpū to na tiàturiraa i te Atua, eita o ia e faaea i tē ani mai te peu, aita te Atua e pāhono mai i ta na aniraa. Eita ta na ìmiraa e faaea mai te peu, eita te mea ta na e ìmi ra e ìtehia mai. Eita atoà hoì e faaea i tē patötö mai te peu, eita te ôpani e ìritihia ia na. No reira, tē haamanaò noa mai ra teie parau ia tātou e, te taata e ani i te Atua, ua ìte atoà ia taata e, i roto anaè i te Atua, e ìtehia ai te parau o te ora.

 

Te pure

E te Atua tei faatiàma ia mātou, a haapii ia mātou i tē pure, mai ta IETU i haapii i ta na mau pipi, e a faariro ia mātou ei mauhaa no tē faatupu i te hoêraa ìtehia e te mata taata, ia hoê mātou te tahi i te tahi, mai ia ôrua i hoê na, e hoê nei e e hoê ā e a muri noa atu. Ia hoê mātou i roto i te faaroo, te here e te aroha e i roto hoì i te tāviniraa. E to mātou Metua, a faariro i teie mau àti ta mātou e faaruru noa nei i roto i to mātou oraraa, ei rāveà no tē faahoì faahou ia mātou i mua i to òe moà, no tē ani i ta òe tauturu. E teie hoì mau pure ta mātou e faatae nei i mua ia òe, eiaha ia riro ei paraparauraa na mātou, e mau pure rā ta mātou e ora pāpū ra i roto i to mātou oraraa e ta mātou tāviniraa. A hōroà ia mātou i te māramarama, te paari e te faaroo. E te Atua e, a arataì ia mātou i roto i te parau-tià e te hau. Âmene.

 

Pae o te mahana

Mahana maha 7 no Tēnuare 2021

Te tumu parau :

Ua mā rā òutou i tenā na, i te parau ta ù i haapii atu ia òutou na. (Ioane 15, 3)

 

Te pehepehe : Mave mai.

A mave mai, mave mai,

Te reo ia o te fenua ia òe e te Tama,

Tīpae mai i te fare nei,

Ua ineine te fenua no tē fārii ia òe.

E aha teie, ta òe e hepohepo nei ?

Ua moèhia ia òe, te haapiiraa a te fenua,

Te tanoraa mau, eita òe e fifi,

È rā o Tīreo, e parau mai ra ia òe,

A tänu, a huri i te repo, a ueue i te huero,

Tötoma noa aè, tōmāti noa aè

E tāmāa te ùtuāfare.

Te pō no òreòre, na tai mai,

Eiaha e onoöno i tē haere e täutai,

E hoì paa noa mai òe.

Ia pāpū ia òe, te reo o te fenua

Ia pāpū ia òe, te haereraa o te âvaè

E te moana, ua tāmāa òe.

 

Te mau Taiòraa :

Teuteronomi 30, 11-20 : Tei pīhaì-roa-iho rā te Parau a te Atua nei ia òe.

Mātaio 5, 1-12 : E ao to òe.

 

Te manaò tauturu

Hoa here mā, i roto i ta tātou taiòraa Teuteronomi, tē tītau e tē faaitoito maitaì ra o Mōte i te nūnaa no Ìteraèra, ia here i te Atua na roto i te haapaòraa i ta na parau. Na te reira e faaìte i te taata i here i te Atua e tei òre i here ia na. O te mea atoà ia o ta Ietu i haapāpū i tē nā ôraa e : « mai te peu ua here òutou ia ù ra, haapaò i ta ù parau ... O tei òre i here ia ù ra, e òre ia e haapaò i ta ù parau » (Ioane 14,23-24). Mai te mea ra, na roto i teie mau parau, e tītauraa terā ia tātou tātaìtahi, i te feiā atoà i fāì e, ua here rātou i te Fatu, ia hiòhiò faahou, tē tano noa ra ānei to tātou oraraa i nià i te parau a te Atua. E parau pāpū rā, te taata i here i te Fatu, e tūraì te reira ia na i te haapaòraa i te parau a te Fatu. I roto i ta tātou Èvaneria no teie mahana, tē faaìte nei nā ìrava mātāmua ia tātou, i to Ietu haereraa i nià i te hoê mouà e ta na atoà mau Pipi, no tē haapii i te feiā atoà tei âpee ia na. No reira, tē tauturu nei Ietu i te hoìraa i muri, oia hoì, e hoì faahou tātou i roto i ta te Atua faanahoraa, no te mea e haamanaòraa teie na Ietu. Ia parau hoì tātou e haamanaòraa, te tahi ia òhipa tei parauhia aore ra tei tupu na, o ta tātou i ora aore ra tei haaferuri no te tautururaa i te oraraa i teie tau. Tē ômua nei o Ietu i ta na haapiiraa na roto i te ìritiraa mai i te hoê parau òaòa ra,

“E Ao…..” O vai mā ta na e parau nei e : « E Ao to Òutou » O te hoê ia mau taata ta tātou i ìte e, eita teie parau e tano no rātou, oia hoì te feiā veve, te feiā òto noa, te feiā tei aroha noa, te feiā tei faatupu i te hau, te feiā âau marū, te feiā tei hāmani-ìno-noahia, e tae noa atu i te feiā tei faaìnohia e tei pari-haavare-hia. I taua feiā ra, na roto i ta Ietu hiòraa, no rātou mau te Pātireia o te ao. O vai mā taua mau taata ra ? Eere ia i te feiā moà e te hara òre, e feiā hara atoà hoì e te mau Pipi. Taua feiā ra, ua pūpū ia ia rātou i te Atua ra, tei auraro ia Ietu e o tei tīaì i to na hoìraa mai. Ua ìte pāpū rātou e, i reira ra, e faaòrehia ai te òto, e hōroàhia ia rātou te fenua na roto ia Ietu, faaòrehia hoì ta rātou hiaairaa, e parauhia rātou i te mau tamarii na te Atua na roto ia Ietu no te mea ua riro rātou i teie nei, ia Ietu. No reira, ia faaroohia te mau parau ta Ietu i faahiti, ia ìte ia te taata atoà i te Pātireia o te Atua. Tē parau nei o Ietu e, « E Ao to òutou », e aore e Ao to rātou, eiaha te feiā tei rave i te mau òhipa maitaì na mua, te feiā rā tei fārii i ta na mau parau òaòa e tei tātarahapa. Eere teie parau no te mau pipi anaè, eere no te tahi noa pupu taata, eere no verā mā, e parau rā teie no te taata tātaìtahi, e parau no te taata atoà tei hinaaro i tē pee i te Fatu, no tātou teie parau. I nià noa i te hiòraa i teie mau parau, mea huru teimaha. Te rāveà atoà rā te reira e ìte ai i te ora. Ta tātou, o tē rave noa ia e te haapaòraa ia, âreà te haamauruüruraa, na te Atua te reira, terā ta Ietu e parau ra e, no rātou te Pātireia o te Atua. No reira, e faaitoito tātou i tē faatupu i teie mau parau ei hanahana no te Atua, te Tumu o te Ora.

 

Te Pure

E te Rahu Nui e, ua rahu òe i te raì e te fenua, te mau mea ora atoà, e o mātou tātaìtahi. Tē âmui nei mātou no tē haamaitaì i to òe aroha ôtià òre. Ia riro ta òe parau, tei faafānau i teie nei ao, ei paari e ei arataì no mātou, ia tià ia mātou i tē àtuàtu faahou i teie nei mau hōroà. E te Rahu Nui e, i mua i te tāatoà o te rahuraa tei riro ei

ùtuafare no te Atua, e ta na hoì i pūpū ei vauvau no mātou te taata nei, tē tātarahapa nei mātou i mua i to òe moà e ta òe parau tià, no to mātou huritua-noa-raa i mua i te reira mau maitaì. Tē ani atu nei e tē tāparu atu nei mātou ia òe, te tumu pau òre no te mau maitaì atoà, ia faataui faahou òe i to mātou ôriò mata e to mātou pūtarià i nià iho ia òe, e ia òe anaè ra, te tumu hoì no te ora, ia tià ia mātou mai teie atu nei, ia ìte e ia faaroo faahou i to òe anaè ra reo. No reira, tē ani nei mātou ia òe, ia faariro ā ia mātou, ei mau mauhaa no tē faatià faahou i teie ùtuāfare tei topa i roto i te àti. A tauturu mai ia mātou e te Metua e. Âmene.

 

 

 

Ono o te mahana

Mahana pae 8 no Tēnuare 2021

Te tumu parau : Te fāriiraa.

E ua haapaò ia òutou ia haere òutou e ia hotu i te huero. (Ioane15, 16)

 

Te pehepehe : Te ora hanga i te kainga

 

To ù oraraa i to ù nei motu, eere i te fenua mouà,

Tārava te aau i te moana uriuri,

Taata i ta na täutai.

Âuē hoì e, te òaòa o to ù nei oraraa e…

Tei roto i te rima o te Atua.

E pātere māa ta ù, e vairaa no te paru, te pāhua, te māòa e te rimu.

Na vai e kai e hami ai, te aroha o te Tumu Nui.

E poe pārau ta ù, e pōreho ta ù, e pūpū ta ù, e pūhā ta ù

E mau faufaa anaè terā, ta te Atua i tuu mai ei ora no te tamariki Paùmotu.

 

Te mau taiòraa :

Tenete 18, 1-5 : Âperäma i te fāriiraa i nā mērahi tootoru i te rāau rahi i Māmere ra.

Māreto 6, 30-44 : To Ietu faaàmuraa i te taata.

 

Te manaò tauturu

To te paroita, terā mai te hei o te aroha, no te fāriiraa i to tātou fārereiraa i teie pō. Tē nā ô ra ta tātou tumu parau e : te fāriiraa. E aha mau na te fāriiraa ? O vai te tumu o te fāriiraa ? No vai te fāriiraa ? Mea faufaa ānei te parau no te fāriiraa i roto i te oraraa o te taata ? E… te mātāmehaì o te fāriiraa, o te fenua ia. Aita te fenua i tāôtià i ta na hōroà no te fāriiraa e te aupuraraa i te taata. Ua mahora te uru maitaì no òe, e reo to òe, e peu ta òe, e hīroà to òe, e māa ta òe. Aita e nūnaa ta te fenua i faaère i to na maitaì. Te huru o te fenua, te huru atoà ia o te Atua. E ta tāua e te Māòhi, mea na hea ta tāua faaòhiparaa i teie parau no te fāriiraa i roto i to tāua oraraa ? E parau tātou e, e nūnaa fārii òe e te Māòhi, i to òe mau taeaè, rau noa atu te taata e tià mai i mua ia òe, i tae roa ai te tahi faatīanianiraa i tē parau e, te fāriiraa, e peu tumu te reira no to tāua fenua e te Māòhi. Parau mau, i mua ra, terā te reo e faaroohia, haere mai e tāmāa, tīpae mai i te fare nei. No tē faaìte ia, e oraraa hoê to tātou, e oraraa fētii, e oraraa ùtuāfare to tātou. Aita e patu e faataa ê ra ia ù e to ù taata tupu, ta ù na òe, ta òe na ù. Ua riro te reira ei rāveà ia pārahi noa te taata i roto i te hau, te faatura, ia òre te tahi mau fifi ia tupu mai. I teie mahana, tē iti noa atu ra terā reo ia faaroohia na. I mua ra, a haere mai e tāmāa, ua rau te mau tumu, no nià ānei te faanahoraa o to tātou oraraa ? Ua ânoì ānei te toto ? Aore te Māòhi e ìte faahou ia na i roto i terā parau, e Māòhi ? Aita ta na hiòraa i âano faahou, ua tāôtià rā o na i ta na hiòraa i to na parau. Ua ō roa tātou i roto i te ao reva pihaa rau (mondialisation). Terā ānei te mau tumu ? Eiaha tātou e tūmā i terā mau haapiiraa maitaì, i orahia mai e to tātou mau metua. Teie nei rā, e faaitoito tātou i tē faaòhipa i teie parau no te fāriiraa, i roto ānei i to tātou oraraa paroita, to tātou oraraa fenua, to tātou oraraa Tuhaa, no te mea e mau taime terā e tāhoê ai te nūnaa i te vāhi hoê, e taime no te fārereiraa, e taime no te àitauiraa, e taime òaòaraa, e taime tāmāaraa.

Aita e faataaraa i te tiàraa taata, ravaì ānei, ravaì òre ānei, ua âmui rā i te vāhi hoê, te vāhi faufaa ia i roto i to tātou oraraa e te Māòhi. Na te reira e tauturu nei i te taata, te haereraa e fārerei, i to tātou mau taeaè, mau tuahine, e òhipa ora teie. Te fāriiraa : ia faanaho anaè tātou i ta tātou mau vāhi fāriiraa, tē tuu nei tātou i to tātou tāatoàraa i roto i ta tātou òhipa. Māmā mā, terā mau tīfaifai faahereherehia, ua reva i nià i te papaì, te tiare, ua rau te huru, ua rau te faanahoraa. Pāpā mā i to rātou pae, pae ānei o te māa, e rau noa atu. Te vāhi tāmāaraa, ua rau atoà to na mau faanahoraa, e hape ihoā òe, tei te hōtera tātou. E àhu faaau to tātou, aita e vāhi purapura òre no tē fārii i ta na manihini, na te here i ta na òhipa i tūraì, ia tupu teie mau faanahoraa. I tano roa ai terā parau ta te faatīaniani e, te fāriiraa, e peu tumu ihoā na tāua e te Māòhi. Ia ora na.

 

Te pure

E te Atua Nui Tumu Tahi, te Fatu o te raì e te fenua, te tumu o to mātou Māòhiraa, haamaitaì mātou ia òe no te ora ta òe i hō mai. Haamaitaì mātou ia òe no to mātou metua vahine faatupu ora, te papa o to mātou ora. Ua haapārahi òe ia mātou i roto i te uru maitaì, ta mātou e fānaò nei, teie metua vahine faatupu ora, tei faaàmu ia mātou, tei räpaau ia mātou, tei haapii ia mātou i te ìteraa i to here e to aroha. Ua hōroà òe i te tiàmāraa i roto ia mātou tātaìtahi, no tē rave i te mea tià e te mea maitaì i roto i to mātou nei oraraa. Tē faahaèhaa atu nei mātou i mua i to òe teitei, o òe e faahau nei i to mātou âau, ia pārahi tāmau te Māòhi i roto i te faatura. A tauturu mai na ia mātou i te fāriiraa i ta òe anaè faatereraa, ia hoì faahou mai te hau, te òaòa e te maitaì i roto i te oraraa tāatoà o te nūnaa Māòhi. Âmene.

 

Hitu o te mahana

Mahana māa 9 no Tēnuare 2021

 

Te tumu parau : O vau te vine, o òutou te âmaa (Ioane 15, 5)

 

Te pehepehe : E REO TO Ù

 

Turo a RAAPOTO, Te pinaìnaì o te âau, àpi 14

E Atua mana o Taaroa i te pō ra,

E iòa noa o Taaroa i teie nei.

E rahu ta Taaroa i te fenua o te Māòhi,

E haru ta te hutu pāinu i te fenua o te Māòhi.

Te reo faatupu ora, ua taahia ;

Te reo faatupu pohe, ua araahia.

E aha iho ra vau i ôtare ai iō ù.

E reo to ù, aore ā i pohe,

E fenua to ù, aore ā i riro,

E nūnaa te Māòhi, aore ā i ara.

Ua neneva rā vau i te faatīani a te hutu pāinu.

Ua hōroà vau i te tarià i te reo o te tāvaimanino.

Ua nānā ta ù mata, ua toro ta ù rima,

Inaha te vauvau, ua hutia.

Te Māòhi e, ia ora.

Te fenua e, ia fenua.

E faahoì i te vaa i te âià,

E faahoì i te huià i te ùtuāfare,

E heiva mā te hau

E tuoro i te hau,

Ei vauvau no te fenua.

E reo no te here te reo o te Māòhi.

Ia faaruè i te here, e mata ê te ono.

Ia faaruè i te reo, e mana ê te ono.

E tanu ā i te pūfenua i te repo o te fenua,

Ei hoê pito tāati i te taata e te fenua,

Ei hoê reo pūòhu i te taata e te fenua,

Ia òre ia puehu te rahu a Taaroa.

 

Heuraa taò :

Taahia : e taahi te taò tumu ; hoê ā e te taahihia.

Araahia : âfaìhia i nià.

Hutia : e huti te taò tumu ; hoê ā e te hutihia.

Tuoro : hoê ā e te tuō, aore ra te tiàoro.

Mata ê : tāuà òre, hiò òre i te tahi taata mātauhia.

Ono : hoê ā e te mono.

 

Te mau taiòraa :

1 Tōrīnetia 1, 10-13 ; 3, 21-23 : Ua âmahamaha ānei te Metia ?

Ioane 17, 20-23 : Mai ia òe e o vau hoê nei.

Te manaò tauturu

Èrā mai te tāpaò faatau aroha no teie mätahiti âpī 2021. No te arataìraa i te taata i te tahi vāhi pāpū, no te haamāramaramaraa i te taata i te auraa no te oraraa ta na e oraraa, tē riro noa ra te rahu a te Tumu Nui ei rāveà no te tatararaa i te taata i roto i to na pōuri e to na taa òre. Ia hiòhia i roto i te mau òhipa ta te mau pipi e faatupu nei, aita te nūnaa e ìte ra i te tumu mau, aita e paò ra i roto i te taata te puna mau no te mau parau e matara mai ra mai roto mai i te vaha o te mau àuaha a te fatu. I topa ai te nūnaa i roto i te māìtiraa i te taata i taìtaì mai i teie mau parau âpī no te poheraa e te tiàfaahouraa o te Metia. Aita atu ra te âmaa i piri faahou i nià i te Tumu. Ua piri rā te âmaa i nià i te âmaa. Terā ia ùmeùmeraa e ìtehia ra, tupu atu ra te māìtiitiraa taata, te âmahamaha. Manaòhia atu ra, ua vai noa terā huru i Ìteraèra, inaha hoì, tē tupu atoà ra iō tātou nei. Mea au aè na ù terā tiàtono i terā tiàtono, terā òrometua i terā òrometua, rau noa atu ai te tiàraa e mauhia ra e terā taata i roto i te oraraa faaroo. Ua pae te taata e tē faatano nei te taata i to na iho manaò tumu i nià i te mea ta na e māramarama ra, aita te taata e vaiho nei e, na te māramarama o te parau a te Atua e arataì nei ia na. E inaha hoì, mea māramarama roa ta te rahu e haapii nei. Teie rā, e tano e ui faahou, tē farii ra ānei te taata e, na te rahu e haapii ia na, e tauturu ia na. No tē tātara i te fifi o te taata, tē horo tià nei te Fatu i nià i te rahu, tē faaìte atoà nei te Fatu te faufaa no te rahu, e te rahu no roto roa mai i te parau a te Tumu Nui. Eita te âmaa e ora ia piri anaè o ia i te âmaa. E tāpūhia, a tuuhia atu ai i roto i te auahi. Hoê atoà ia òre anaè ia piri i nià i te tumu, e auahi atoà te hopeàraa. Te tahi taime, tē faariro nei te âmaa ia na iho, e o ia aè te tumu. Aita te haapiiraa a te Fatu e tae noa atu te tauturu a te rahu e aratō nei i te taata i te faatupuraa i te fifi, tē ìmi nei te Fatu i te rāveà ia òre te taata ia topa i roto i terā ôpape. A ìte, e ua rave òe i te tahi tiàraa, eere no òe. I rahi ai te fifi, te peàpeà e tē vai atu ra, no te mea, tē haru ra òe i te tahi tiàraa ia ìtehia òe. Â tīrā na i tē rave faahou i terā peu, to òe tiàraa, te faahoìraa mai te taata i nià i te hinaaro o te Tumu Nui, te faatupuraa i te hoêraa, te hau. Ia ora na.

 

Te pure

E te Atua Nui Tumu Tahi, te Puna o te māramarama e te ora, haamaitaì mātou ia òe tei riro to mātou nei Māòhiraa ei tupuraa no òe i nià i teie fenua. E ohi mā teie ta Òe e te Tumu Nui i fānau. No roto mai au i te rahu, e vārua Māòhi te reira o te Tumu. I amoamohia to ù parau e te mataì o te here, na nià i te tara o te mouà o te aroha nui. Mauruüru ia Òe e te Fatu o te raì, te Fatu o te fenua, te Fatu o te moana. Ua pāpaìhia to ù iòa i te one o teie fenua, i te reo o teie fenua, i te māa o teie fenua maitaì roa. E to ù ora, ua pāpaìhia i te aho o teie nūnaa. Ua faatoa Òe i te Māòhi i te taoà tei hau roa i te maitaì i mua i to Òe aro, oia te here e te aroha. Mau ia mātou i roto i to àpu rima, ia riro mātou mai te tiare i nià i te hei herehia e Òe ra. Ia vai mai ā to Òe Hau i nià i teie fenua, a tau a hiti noa atu. Âmene.

 

Vaù o te mahana

Tāpati 10 no Tēnuare 2021

 

Te tumu parau : Ia vai ā to ù òaòa ia òutou, e ia tià atoà hoì to òutou òaòaraa. (Ioane15, 11)

 

Te pehepehe : TE MĀÒHI E TA NA MĀA

 

Turo a RAAPOTO, TAMA, àpi 24

Ua hāmani te Atua i te taata ia au i to na hohoà.

Ua hāmani i te repo o te fenua,

Te fenua e faatupu i te māa

E au i te reira taata.

No reira e te Māòhi,

E àmu i te ùru, te meià, e te taro, ia hohoà òe i te Atua.

E àmu i te tärua, te ufi, e te fēî, te reira to òe hīroà.

E àmu i te māniōta, te haari, e te tāporo, faaravaì atu ai i te îitā, te ânani, e te vī.

Te repo e faatupu i ta òe māa,

Te repo atoà ia ta te Atua i rave

No te hāmani ia òe

Te repo o te fenua i Māòhi ai òe.

 

Te mau taiòraa :

Torota 1, 15-20 : E o ia tē mau i te mau mea atoà nei.

Māreto 4, 30-32 : Mea iti roa i te huero tïnapi.

 

Te manaò tauturu

O tātou te hoê nūnaa tei àuahaatihia e te here fāito òre o te Tumu Nui. I ta na anaè parau i tupu ai te rahu, e te reira no òe ia e te taata. Te fenua e to na î, te tai e to na î, te reva e to na î, no òe ā ia e te taata, ta na i here. E oraraa pārataito to òe e te taata. E mai te reira atoà te here o te Fatu ia òe e teie nūnaa Māòhi. Mai te Metua e te Tamaiti, ua faaìte hope rāua i to rāua here no òe e te nūnaa Māòhi. O te parau ā ia e tūrama ra ia tātou i teie mahana. Te rahu ā terā e turu mai ra ia òe. Ua onoöno anaè, te Fatu i tē tūrama i te taata na roto i te rahu, no te mea ia, tē ora tāmau ra tātou i pīhaìiho i te rahu, tē hōroà mai i te māa, te hau, te pape, te haumārū. Hoê terā tiàraa e faaìte mai ra ia òe, ua here te metua i ta na tamarii. Tē parau mai ra te rahu ia òe, tē haapii mai ra te rahu ia òe, tē faatoro mai ra te rahu i te êà, ia ìte òe te taata i te paari mau o to òe Metua, te Tumu Nui. Âreà te ìte, te paari o te taata, e aita to na tiàturiraa i te Atua, e mea faufaa òre ia, eita te reira òhipa e tū i mua i te Tumu Nui. Manaò noa atu ai te taata e mea tià ta na, e mea tano ta na, e o ia anaè, to na anaè te hinaaro. Na te reira e faatupu i te fifi, te fēìi, te peàpeà, te âmahamaha, te faaìno e tē vai atu ra. A tūtonu māite na i te mea oraora e hāàti ra ia òe, a hiò māite, a vaiho na to òe manaò haapeàpeà, to òe manaò tūpohe i te òhipa maitaì. A tuu na, ia tomo mai te parau tià i roto i to òe âau. Haamanaò na rā, terā huero haìhaì roa e tei rahi i te mau rāau atoà, tei ìtehia to na ruperupe e te nehenehe, mai te hoê âuri ôvāhine ra o ia, o tē ùme mai i te mau manu e tau roa atu i nià iho. Ia riro òe mai terā huero haìhaì roa. Hoê noa atu taata e tiàturi ra i te Tumu Nui. Eita roa atu te òhipa a te Tumu Nui e mōrohi. Eere òe terā e hinaaro ia ìtehia, o te Tumu Nui rā. O te òaòa ia o te Fatu ia òe. IA ORA NA.

 

Te pure

E to mātou Metua i te raì ra, te Atua o te here e te aroha, tē haamaitaì nei e tē haamauruüru nei mātou ia òe, o òe i pārahi i pīhaì ia mātou i teie hepetoma pureraa, rau noa atu to mātou huru i mua ia òe, aita òe i vaiho ôtare noa ia mātou. Ua faaherehere rā òe ia mātou i roto i to rima aroha. Aita òe i faaère ia mātou i te hoê mea iti i roto i to mātou oraraa, noa atu to mātou huru haapaòraa òre, e au e, ia roo-noa-hia atu vau i te fifi, ia haavitiviti noa òe i tē tātara i te reira fifi i to ù. Ua ìte rā vau e, eere te reira i te tahi rāveà maitaì. Ua tuu mai òe i te itoito i roto i to mātou rima, no tē faatià i to mātou ùtuāfare, te faatiàraa i to mātou oraraa i roto i te tāviniraa i te Êtārētia. A tuu mai i te tahi rāveà no te faatīoiraa i te mau maì rau e tāumiumi nei i teie nūnaa i roto i te hepohepo, te mataù ia tutehia no te òreraa e tāmau i te pāruru vaha e te ihu. A tāmarū i te manaò o te feiā e rautī nei i teie maì, ia faaìte rātou i te parau tià, te fare rāau o teie nūnaa, tei roto i te fenua ra. A tauturu mai i teie nūnaa iti e te Atua Metua e, ia hoì faahou mai te oraraa mai tei mātauhia e mātou, Âmene.