Māreto 1.21-28 Tuì

 

Tāpati 31 no Tënuare 2021.

Tuì

Taramo 95

1 Tätou e himene i te Fatu, e himene hua tätou i te mato e ora ai tätou nei 2 E haere tätou i mua i ta na aro mä te haamaitaì, e mä te taramo e himene hua atu ai ia na.3 E Atua rahi hoì te Fatu E arii rahi i nià i te mau atua atoà ra 4 Tei ta na rima te vähi hohonu o te fenua nei, e te teiteiraa o te mau mouà ra, no na ia. 5 Na na te tai, na na hoì i hämani, e na ta na rima i hämani i te repo marô. 6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu.7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo: 8 Eiaha e faaètaèta i to òutou âau mai tei Meripa ra, e mai tei te mahana i Mata, i te mëtëpara ra, 9 i ta to òutou mau metua i faaoôo mai ia ù ra, e ua àa mai ia ù, ìte noa ai rätou i ta ù ra mau òhipa. 10 A maha aè ra àhururaa o ù mätahiti i te oôoraa i te reira uì, e ua nä ô aè ra vau: E feiä âau hapa rätou, e aore i haapaò i ta ù ra parau, 11 o tei tapuhia e au i ta ù ririraa ra, e eiaha roa rätou ia ö i to ù ra faaearaa.

Teuteronomi 18.15-20.

15 E faatupu to Atua ra o te Fatu i te hoê perofeta na òe i rotopü ia òe ra, i te hoê i te mau taeaè no òe ra, mai ia ù nei; o ia ta òutou e faaroo: 16 mai ta òe hoì i hinaaro i to Atua ra i te Fatu i Hörepa ra, i te mahana âpooraa ra, ta òe i parau ra e, Eiaha vau ia ìte faahou i te reo o ta ù Atua ra o te Fatu, eiaha hoì au ia ìte faahou i teie nei auahi rahi, ia òre hoì au ia pohe. 17 E ua parau mai ra te Fatu ia ù, E parau tià ta rätou i parau mai ra. 18 E faatupu vau i te tahi perofeta na rätou i to rätou ra mau taeaè, mai ia òe na te huru, e e tuu vau i ta ù parau i roto i ta na vaha, e na na e parau atu ia rätou i te mau parau atoà ta ù e faaue atu ia na ra: 19 e te òre e faaroo mai i te parau na ù tä na e parau ra i to ù nei iòa, e faautuà atu ia vau ia na. 20 Âreà te perofeta e parau teòteò noa i te parau mä to ù ra iòa, eere i ta ù i faaue ia na e e parau, e o te parau atoà mä te iòa o te mau atua èê ra, e pohe ia perofeta.

1 Tōrīnetia 7.32-35

 32 Te hinaaro nei rä vau, e eiaha to òutou ei tapitapi. Te taata aore i faaïpoïpohia ra, te tapi ra ia i ta te Fatu ra, te mea e mauruüru ai te Fatu ia na: 33 âreà tei faaïpoïpohia ra, te tapi ra ia i te mau mea o teie nei ao, i te mea e mauruüru ai ta na vahine. 34 E huru ê atoà to te tara täne e te pötii. Te vahine faaipoipo-òre-hia ra, te tapi ra ia i ta te Fatu ra, ia maitaì o ia i te tino e te värua atoà. Âreà te vahine i faaïpoïpohia ra, te tapi ra ia i te mau mea o teie nei ao, i te mea e mauruüru ai ta na ra täne. 35 Ia maitaì òutou i parau atu ai au i teie nei parau, eere mai te mea e te tïtiri atu nei au i te märei i nià ia òutou, no te mea rä e parau au, e ia haapaò òutou i ta te Fatu ra mä te peàpeà òre.

Māreto 1.21-28

To Ietu faaìteraa i to na mana i roto i te tunato no Taperenaumi

(Ruta èv 4.31-37)

21 Haere atu ra rätou i Taperena. E tae aè ra i te täpati, haere atu ra o ia i roto i te tunato, haapii atu ra i te taata. 22 Maere iho ra rätou i te huru o ta na parau; i haapii hoì o ia ia rätou mä te mana, eere mai ta te mau päpaìparau ra. 23 Tei roto i te tunato te hoê taata i uruhia e te värua faufau, e ua pii hua mai ra, 24 nä ô mai ra: Âuë e Ietu i Nätareta e E aha ta òe ia mätou nei? I haere mai òe e haapohe ia mätou? Ua ìte au ia òe: o te Mea Moà ia o te Atua ra 25 Ua àvau atu ra Ietu ia na, nä ô atu ra: A mämü, a haere i räpaeàu, e vaiiho atu ia na 26 Ua rave ûàna iho ra taua värua faufau ra ia na, ua pii hua mai ra te reo e oti aè ra, haere mai ra i räpaeàu. 27 Ua mäere anaè iho ra rätou atoà, ua uiui iho ra ia rätou iho, i te nä-ô-raa e: E aha rä teie? E aha teie nei parau âpï? Te faaue nei hoì o ia i te mau värua faufau mä te mana, e te faaroo nei rätou ia na 28 Tuì atu ra to na roo e àti noa aè ra taua fenua ra o Tarirea.

Manaò.

Teie te mau ìrava turu no ta tätou parau no teie mahana, e mau manaò e tïtau ra i te taata taiò i te ìteraa, mai teihea te huru parauraa te Atua ia Na, e ta te taata parau i te Atua. E Atua rä teie tei Parau ia Na TE  VAI  NEI  AU O VAU E VAI NEI. I Mäòhi Nui nei teie te parauraa i mua ra hou te pipiria, Te Atua Nui Tumu Tahi. E na parauraa teie tei horoà i te Atua, i te ora e vai rä i roto ia na iho. E tei horoà i roto i te taata, na roto i te haapuaìraa i te aho ora. I roto i teie huru parauraa, taa noa atu ai te haapäpüraa no te taui òre te huru o te Atua, te vai atoà rä te manaò no te taui òre te tau, e te tüàti-tämau-raa hoì te tau e te vahi. No reira te Atua, e parau ia tei riro i te mau tau atoà i te mau vahi atoà èi parau no teie vahi, e no teie taime, oia hoì no teie taime, e Tumu ia te Vai ra. E mau täpaò maere teie, tei fafauhia i te taata ia tiàturi na roto i te faaroo päpü i te Atua, ia tuì te roo o te Atua. Ia au i teie mau taiòraa turu,

 

-Taramo 90, 7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo:

-Teuteronomi 18, 20 Âreà te perofeta e parau teòteò noa i te parau mä to ù ra iòa, eere i ta ù i faaue ia na e e parau, e o te parau atoà mä te iòa o te mau atua èê ra, e pohe ia perofeta.

- I Torinetia 7, 35 Ia maitaì òutou i parau atu ai au i teie nei parau, eere mai te mea e te tïtiri atu nei au i te märei i nià ia òutou, no te mea rä e parau au, e ia haapaò òutou i ta te Fatu ra mä te peàpeà òre.

- Märeto 1,  21 Haere atu ra rätou i Taperena. E tae aè ra i te täpati, haere atu ra o ia i roto i te tunato, haapii atu ra i te taata.

Tatararaa.

Te perofeta a te Atua, Eiaha o ia e faahuruè te mau faaueraa a te Atua. Ei ia mäìtihia te hoê tià, èi perofeta na te Atua ia ora te parau. Ia Atua te Atua, èi arii no te mau atua atoà, èi ärataì eiaha ia àahia. E täpi ra i te mea e mauruüru ai te Fatu, te maitaì no te mau maitaì ia haapaòhia eiaha ra e tapitapi o te Atua te ärataì. Te mau haapiiraa ia a Ietu i te taata, ia òre ia üruhia i te varua faufau i te mea o Ia tei  faatähinuhia e te Atua, Te ora a te Atua. I faaroo ai te varua faufau i te reo Ietu, i tuì ai te roo o Ietu. Oia i haruru ai te parau o Ietu e àti aè i te mau vahi atoà. E mea tupu maere mau te parau a te Atua ia taiòhia na roto i te hoê tiàturiraa mau e te àueue òre. E te hoê ìteraa päpü ia au ta te Varua Maitaì tururaa. Te  hoêraa ia o te mau papaì Moà,  ua rau rä te ìteraa e te faaìteraa, i roto i tera uì, e te tau, te vai te ra te hoê  ärea i roto i te mau faaìteraa e 1 500 mätahiti i roto i tera taata papaì e te tahi. E tià ia parauhia ua naeàhia rätou e 40 taata papaì i te mau parau Moà a te Atua, tei î i te Värua Maitaì, e aore rä tei naeàhia i te mau faaueraa a te Atua. Mai te mau arii, te faatere hau o Täniera, te tävini o te arii o Nehemia, papaì ture o Ètëtera, te raatira o te nunaa o Mote, Iotua, te tiaì mämoe Amota, te haava o Tämuera, te ravaai taata, Petero, Ioane, Iatöpo, Âneterea, te räpaau mai Ruta èvaneria. Te taata papaì èpitetore o Pauro. Na teie feiä i papaì te vai nei ia te ärea i roto ia rätou e te mau tau. E täpaò faaìte ia teie, te parau a te Atua, èita e maìti i te tau, parauhia rä i roto i te tau. Eita atoà e maìti i te fenua e faaìtehia rä i roto i taua nunaa rä. Oia hoì, te töhuraa ia a te faaäuraa mätamua, i tupu ai te faaäuraa âpï.

Te faaäuraa âpï  teie e faaìte nei ia tätou i teie taime paieti i roto i teie Parau Maitaì papaìhia e Märeto i te pene 1, i te ìrava 21 e taë i te 28, e parau ia no te hoê varua faufau i te haapäpüraa i te Tämaïti a te Atua, àue e Ietu i Nätareta e, e aha to òe ia mätou nei ? i haere mai òe e haapohe ia mätou? Ua ìte au ia òe, o te mea Moà ia o te Atua rä. ( ìrava 24) E reo faahapa mau teie no te hoê taata tei üruhia e te varua faufau. Tei roto i te tunato te parauraahia teie reo, te haapii rä o Ietu i te mau taata tei hiaai i te mau parau no te hau, te aroha te here e te ora a te Atua, te vai rä te faaroo rä, èi haamäharaa i te hepohepo o te âau i roto i te oraraa. Te vai ätoà nei rä te faaroo, mai te hoê parau àita to na e faufaa. I faaroohia ai te harururaa o teie reo i roto i te fare o te Atua i taua täpati rä. E täpati taaê rii hoì teie no te òire o Täperenaumi, I te mea te parauhia nei te mau ture a te Atua I roto I te hoê hiòraa âpï, te hoê ärataìraa âpï, te hoê faanahoraa âpï. E maere rahi to te mau taata, I to rätou faarooraa, èita hoì mai ta te mau päpaì ture. Te faaìte nei o Ietu i te hoê Atua, tei faatiàma i te taata, na roto i te aroha, eiaha ra no te faahapa, no te faaora rä i te tuto teimaha o te hara. I auë ai te värua faufau i roto i te hoê o te taata e faaroo nei i te mau haapiiraa a Ietu. Ua puta te tiàporo i te ture faatiàma a te Atua mai te hoê âuri hoto te mauraa i roto i te âau, i purehu ai te parau no te Tämaïti a te Atua.  I haere mai òe e haapohe ia mätou? Oia mau, te tumu rahi ia no te mau aòraa a Ietu, no te räpaau i te feiä tei òre faahou to rätou tiàturiraa e tano i nià i te èvaneria ia pohe te mau värua ia tià mai te iho tumu o te taata na roto i te hoê taata tei faaâpï faahouhia e te parau òaòa a te Atua. Te ìte päpü nei te värua faufau e, èita o ia e manuia i taua täpati rä, ua haamamuhia, ua tiàvaruhia i rapae i te tino taata. No te mea te mau vahi e Moà ai te Atua àita e parahiraa to te tiàporo. Ua ö änaè te tiàporo i reira mea faaöhia ia, ua paruparu ia te faaroo i reira.

O te Atua tei Moà i roto i te mau tau ätoà, O ia tei faatupu i te hoê tara no te ora, ia ora te mau taata atoà. I tupu ai i tera tau e tera uì te hoê mau tävini no te òhipa a te Atua, noa atu te taaêraa te tahi i te tahi, te fä rä e tïtauhia rä, èita ia e täui te Parau Maitaì a te Atua, ia päpü te ìteraa. 

Ua ìte au ia òe, Te ìte nei te tiàporo to rätou hiàraa i roto i te òhiparaahia a te Metia i te ìritiraa i te parau a te Atua, e reo àro teie tei hinaaro e faatito i te puai o te Atua, i te puai o Tätani, ma te hinaaro atoà ia haama i ta te Atua i tuu i nià i te torono o te Patireia, e te tiàmaraa, o ta te Atua e faatupu rä e òre ia e àueue, e òre e faufaa òre. O te mea Moà ia o te Atua rä, te ìte päpüraa ia te tiàporo e, èita o ia e upootià i te àroraa i te Metia, e òre ätoà o ia e upootià i te tamaìraa i te Metia. O tei Moà i roto i ta te Atua ôpuaraa e òre ia e àueue.

I faaruè ai te tiàporo i te tino o taua taata rä, haere atu rä e ìmi tei paruparu te faaroo no te faatiàrepu, te tiàturiraa i roto i te àmahamaha. O te òhipa ia i ìtehia i roto i te Tunato no Taperenaumi I taua täpati rä. Te tiähiraahia te tëmoni mai roto mai i te hoê taata i rapae, e  te faarooraa te tëmoni i te reo o te Metia. E te òhipa tei hau atu i teie, te haapiiraa ia a Ietu, te ìriti faahouraahia te ture a te Atua, tei au i to rätou tau.

E hoa here mä e, I teie tau to tätou, e aha ta te Metia e hinaaro nei e haapii ia tätou? I roto i teie Märeto pene 1 i te mau ìrava 21 e tae i te 28? Te hinaaro atoà nei te Metia e haapii ia tätou na roto i teie pene parau, te parau ia no te tuu tämauraa te taata teretetiano i to na tiàturiraa, i roto i te ìte päpüraa e, o te Atua te Tumu e ora ai te taata nei. Te tüàtiraa ia o na pene parau e maha nei, tei faataahia no teie mahana paieti. Te perofeta a te Atua no te parau ora ia, o ta te Atua ia i hämani, i faatupu ia òre ia àueue, e ia òre ia faufaa òre, ia täpihia rä te maitaì no te haapaò, o te ora hoì te reira a te Atua. I fati ai te tiàporo i te faaueraa a Ietu ia haere i vaho i ta te Atua i faatiàma. Tuì-aè-rä te roo o Ietu i Tarirea, e i roto i tera tau e i tera uì. O tei tiàturi, I ta te Fatu i faatupu rä tei roto ia o ia i te òaòaraa no te Parau Maitaì e te ora a te Atua.

 

Teraì òr. Faatura .

 

 

 

 

 

Papa Haamori Tāpati 24 Tënuare 2021. Maùe.

 

Tāpati 24 Tënuare 2021.

Papa Haamori

Maùe.

Färiiraa.

 

Ànuhi e, Ia ora na, teie te manaò färii ia òe i teie mahana haamoriraa, e parau no te here fenua.

 

Here Fenua.

Ànuhi e a Maùe, i to maùeraa.

Te mau noa ra òe i to âpaèraa.

A faaruè to tauraa tei täpauhia.

Te tiaì noa mai ra to Atua Nui Tumu Tahi.

 

Ànuhi e a rere, i to rereraa.

A hipahipa i to ôtià fenua

A hipa i uta, a hipa i tai.

A hipa i te hiòhipa a te mau Tupuna.

 

Ànuhi e a pee, i to peeraa.

A puhi te mau âpoo mataì

Èi faaära  ua nä te fenua

Ua topa te hau o te hupe.

 

Ànuhi e a tänu, i te tänuraa

Ia tupu feretau te Aroha

Ia more te taura o te here

Ia hotu ùmu te vaamataèinaa.

 

Haamaitaì tätou i te Atua i te hoê reo himene e tià mai tätou.

Himene.

Pärahi tätou.

Taramo 25

Te Aroha faaherehere.

1 Taramo na Tävita. Te faaäraära atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà 5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre: e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà.10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai. 11 Rahi noa iho ä ta ù nei hara, e te Fatu, e faaòre mai ä òe i to òe ra iòa. 12 O vai te taata i mataù i te Fatu? E faaìte o ia ia na i ta na èà ia hinaaro ra.13 E pärahi te reira taata mä te maitaì, e riro te fenua i to na ra huaai.14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra.15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra.16 Ìte mai ia ù, e aroha mai ia ù, e àti hoì to ù i te moèmoè.17 Ua rahi iho nei te mäuiui o ta ù âau, e faaora òe ia ù i ta ù mau àti nei. 18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei. 19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe. 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti. Âmene.

 

Himene tätarahapa.

 

 

Iona 3.1-10

Teie te aòraa a Iona, ua färiu to Nïneve, ua faaora te Atua, 1 E päpiti mai ra te parau a te Fatu ia Iona ra, nä ô mai ra: 2 A tià, a haere i taua ôire ra i Nïneve, a tiàoro atu ai i tä ù i faaue atu ia òe na. 3 Ua tià aè ra Iona i nià, e no teie taime  haere atu ra i Nïneve, i ta te Fatu i parau mai ra. E ôire rahi roa Nïneve, e toru ia mahana e àti ai. 4 Ua tämata atu ra Iona i te haere nä roto i taua ôire ra, hoê aè ra mahana i te haereraa; ua tiàoro atu ra o ia, nä ô atu ra: E piti täau mahana toe e täìhi-tumu-hia ai Nïneve. 5 Ua faaroo atu ra to Nïneve i te Atua, e ua poro atu ra i te haapaeraa mäa, e ua àhu atu ra i te àhu òto, mai te taata rahi ra e tae noa atu ra i tei ïti. 6 Ua tae roa hoì taua parau ra i te arii o Nïneve, ua tià aè ra o ia mai nià mai i to na teröno, ua haapae atu ra i to na iho àhu i nià ia na iho, täpoì iho ra ia na iho i te àhu òto, e ua pärahi iho ra i nià i te rehu auahi. 7 Faaìtehia aè ra e poro-haere-hia i Nïneve atoà ra: Te parau a te arii e to na ra mau toofä, nä ô atu ra, Eiaha roa te taata e te puaa atoà, te nana puaatoro e te nana mämoe, e tämata noa aè i te mäa, eiaha e àmu, eiaha hoì e inu i te pape. 8 Ia täpoìhia rä te taata e te puaa atoà i te àhu òto; e tiàoro hua atu hoì te taata i te Atua, a färiu ê mai ai rätou atoà i ta rätou parau ìno, e te hämani ìno o to rätou rima. 9 Peneiaè o te färiu te Atua, e o te tätarahapa, a faaruè atu ai i to na riri rahi, ia òre tätou ia pohe. 10 Ua hiò mai ra te Atua i ta rätou i rave ra, e ua faaruè anaè rätou i ta rätou parau ìno; e ua tätarahapa iho ra te Atua i te ìno tä na i parau ra e, e tuu mai i nià ia rätou, e aore aè ra o ia i nä reira mai.

 

Haamaitaì tätou i te Atua Nui Tumu Tahi no teie mau parau e tià ai.

 

Himene òaòa.

 

1 Torinetia 7.29-31

Teie te parauraa a Pauro ia tätou i teie mahana.

29 Teie rä ta ù parau, e a ù mau taeaè, te poto nei te taime: e au i te feiä tara vahine ra, ia riro mai te mea e, aore; 30 e te feiä i òto ra, mai te mea e, aore i òto; e te feiä i òaòa ra, mai te mea e, aore i òaòa; e te feiä i hoo ra, mai te mea e, aita a rätou; 31 e te feiä i rave i to teie nei ao ra, mai te mea e aore i rave; te mou nei hoì te huru o teie nei ao. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

 

Pure.

Pure tätou i te Atua, Te Atua Nui Tumu Tahi, i mua i te mau parau atoà i faaroohia e mätou ta òe mau tamarii teie arataì ia mätou i te taiòraa i te Parau Maitaì a to Tämaïti to mätou Fatu, to mätou faaora hoê roa, a horoà mai ia mätou i te ìteraa e te märamaramaraa o ta òe Parau. Âmene.

Taiòraa.

Teie te taiòraa tei faataahia no tätou no teie hora paieti.

Märeto 1.14-20

To Ietu pororaa i te Èvaneria i Tarirea

(Mät 4.12-17; Ruta èv 4.14-15)

14 Ia täpeàhia rä Ioane, haere atu ra Ietu i Tarirea, i te parau haereà i te Parau Maitaì o te Pätireia o te Atua. 15 Na ô atu ra: Ua tae i te tau, te fätata mai nei te Pätireia o te Atua A tätarahapa, a faaroo mai i te Èvaneria nei.

Te tïtauraahia nä taata ravaai toomaha

(Mät 4.18-22; Ruta èv 5.1-3, 10-11)

16 E te haere ra o ia nä te hiti i te roto i Tarirea ra, ìte atu ra o ia ia Timona, e ta na taeaè ia Àneterea, i te tuuraa i te ùpeà i taua roto ra, e puè ravaai hoì räua. 17 Ua parau atu ra Ietu ia räua: A pee mai ia ù, e faariro vau ia òrua ei ravaai taata. 18 Faaruè iho ra räua i ta räua tau ùpeà i reira ra, e ua pee atu ra ia na. 19 Haere atu ra o ia e pïhaì ïti atu, ìte atu ra ia Iatöpo a Tepetaio ra, räua o ta na taeaè o Ioane, tei nià i te poti te ène ra i ta räua tau ùpeà. 20 Ua parau atu ra o ia ia räua i reira ra: vaiiho iho ra räua i to räua metua ia Tepetaio e nä tävini tärahuhia ra i nià i te poti, pee atu ra räua ia na.

Na te Atua Hau i te raì teitei, te Fatu o te fenua e haamaitaì mai te taiòraa ta na parau.

Pure

Pure tätou i te Atua, i to mätou taiòraa e to mätou faarooraa i ta òe Parau te ìriti nei teie mau parau i te ùputa o to mätou âau ia Maùe i to mau hinaaro. Âmene.

Haamaitaì tätou i te Atua i te hoê reo himene.

Himene.

Faaitoitoraa.

Himene

Parau Faaära.

Himene pupuraa ö.

Pure.

Te Atua te mau moni i höroàhia e mätou no te mau täpura òhipa ia o te fenua nei, ia rautï maite mätou ia òre mätou ia hapahia i mua ia òe. Âmene.

Pure Ärai.

Pure tätou i te Atua, e te Atua Metua e, ua haafänaò Òe ia mätou i to Aroha e to Here ta to mätou fenua e faaìte noa ra ia mätou. Ia riro te parau no te here fenua èi haapii, èi haamanaò ia tätou e, to tätou Metua i te raì, te ara noa ra i nià ia tätou, e te tiaì noa ra i to tätou reo pii ia na, E te Atua Metua e, faaora mai ia mätou ta òe tamarii nei, te hoì atu nei mätou ia òe na, ia raa o òe iòa, e ia tupu to òe hanahana i nià i te fenua nei i mua i te aro o to te ao atoà nei. E aha atu ä te mea e au ia tätou ia rave maoti, te tävini-mau-raa i to tätou Atua nä roto i te parau tià e te haavare òre. Âmene.

Haamaitaì tätou i te Atua i te reo himene âmui, e tià paatoà tätou.

Himene

Âmui to tätou reo i roto i te  pure a te Fatu.

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie ta tätou parau faaitoitoraa

Faaitoitoraa.

15 Na ô atu ra: Ua tae i te tau, te fätata mai nei te Pätireia o te Atua A tätarahapa, a faaroo mai i te Èvaneria nei. Teie te reo o Ietu A pee mai ia ù, e faariro vau ia òutou ei ravaai taata.

 

Teie ta tätou parau haamaitaìraa.

Haamaitaìraa.

10 Ua hiò mai ra te Atua i ta rätou i rave ra, e ua faaruè anaè rätou i ta rätou parau ìno; e ua tätarahapa iho ra te Atua i te ìno tä na i parau ra e, e tuu mai i nià ia rätou, e aore aè ra o ia i nä reira mai.

 

Teraì òr. Faatura.

 

Māreto 1.14-20 Maùe.

 

Tāpati 24 Tënuare 2021

Maùe.

Taramo 25

1 Taramo na Tävita. Te faaäraära atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà 5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre: e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà.10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai. 11 Rahi noa iho ä ta ù nei hara, e te Fatu, e faaòre mai ä òe i to òe ra iòa. 12 O vai te taata i mataù i te Fatu? E faaìte o ia ia na i ta na èà ia hinaaro ra.13 E pärahi te reira taata mä te maitaì, e riro te fenua i to na ra huaai.14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra.15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra.16 Ìte mai ia ù, e aroha mai ia ù, e àti hoì to ù i te moèmoè.17 Ua rahi iho nei te mäuiui o ta ù âau, e faaora òe ia ù i ta ù mau àti nei. 18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei. 19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe. 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti.

Iona 3.1-10

Ua aò o Iona, ua färiu to Nïneve, ua faaora te Atua

1 E päpiti mai ra te parau a te Fatu ia Iona ra, nä ô mai ra: 2 A tià, a haere i taua ôire ra i Nïneve, a tiàoro atu ai i tä ù i faaue atu ia òe na. 3 Ua tià aè ra Iona i nià, e no teie taime  haere atu ra i Nïneve, i ta te Fatu i parau mai ra. E ôire rahi roa Nïneve, e toru ia mahana e àti ai. 4 Ua tämata atu ra Iona i te haere nä roto i taua ôire ra, hoê aè ra mahana i te haereraa; ua tiàoro atu ra o ia, nä ô atu ra: E piti täau mahana toe e taahi-tumu-hia ai Nïneve. 5 Ua faaroo atu ra to Nïneve i te Atua, e ua poro atu ra i te haapaeraa mäa, e ua àhu atu ra i te àhu òto, mai te taata rahi ra e tae noa atu ra i tei ïti. 6 Ua tae roa hoì taua parau ra i te arii o Nïneve, ua tià aè ra o ia mai nià mai i to na teröno, ua haapae atu ra i to na iho àhu i nià ia na iho, täpoì iho ra ia na iho i te àhu òto, e ua pärahi iho ra i nià i te rehu auahi. 7 Faaìtehia aè ra e poro-haere-hia i Nïneve atoà ra: Te parau a te arii e to na ra mau toofä, nä ô atu ra, Eiaha roa te taata e te puaa atoà, te nana puaatoro e te nana mämoe, e tämata noa aè i te mäa, eiaha e àmu, eiaha hoì e inu i te pape. 8 Ia täpoìhia rä te taata e te puaa atoà i te àhu òto; e tiàoro hua atu hoì te taata i te Atua, a färiu ê mai ai rätou atoà i ta rätou parau ìno, e te hämani ìno o to rätou rima. 9 Peneiaè o te färiu te Atua, e o te tätarahapa, a faaruè atu ai i to na riri rahi, ia òre tätou ia pohe. 10 Ua hiò mai ra te Atua i ta rätou i rave ra, e ua faaruè anaè rätou i ta rätou parau ìno; e ua tätarahapa iho ra te Atua i te ìno tä na i parau ra e, e tuu mai i nià ia rätou, e aore aè ra o ia i nä reira mai.

1 Torinetia 7.29-31

29 Teie rä ta ù parau, e a ù mau taeaè, te poto nei te taime: e au i te feiä tara vahine ra, ia riro mai te mea e, aore; 30 e te feiä i òto ra, mai te mea e, aore i òto; e te feiä i òaòa ra, mai te mea e, aore i òaòa; e te feiä i hoo ra, mai te mea e, aita a rätou; 31 e te feiä i rave i to teie nei ao ra, mai te mea e aore i rave; te mou nei hoì te huru o teie nei ao.

Māreto 1.14-20

To Ietu pororaa i te Èvaneria i Tarirea

(Mät 4.12-17; Ruta èv 4.14-15)

14 Ia täpeàhia rä Ioane, haere atu ra Ietu i Tarirea, i te parau haereà i te Parau Maitaì o te Pätireia o te Atua. 15 Na ô atu ra: Ua tae i te tau, te fätata mai nei te Pätireia o te Atua A tätarahapa, a faaroo mai i te Èvaneria nei.

Te tïtauraahia nä taata ravaai toomaha

(Mät 4.18-22; Ruta èv 5.1-3, 10-11)

16 E te haere ra o ia nä te hiti i te roto i Tarirea ra, ìte atu ra o ia ia Timona, e ta na taeaè ia Àneterea, i te tuuraa i te ùpeà i taua roto ra, e puè ravaai hoì räua. 17 Ua parau atu ra Ietu ia räua: A pee mai ia ù, e faariro vau ia òrua ei ravaai taata. 18 Faaruè iho ra räua i ta räua tau ùpeà i reira ra, e ua pee atu ra ia na. 19 Haere atu ra o ia e pïhaì ïti atu, ìte atu ra ia Iatöpo a Tepetaio ra, räua o ta na taeaè o Ioane, tei nià i te poti te ène ra i ta räua tau ùpeà. 20 Ua parau atu ra o ia ia räua i reira ra: vaiiho iho ra räua i to räua metua ia Tepetaio e nä tävini tärahuhia ra i nià i te poti, pee atu ra räua ia na.

Manaò.

Ua marämarama tätou i te hinaaro o te Atua. Ua ìte te taata i te taiò i te mau täpaò ta te rahu e faaìte noa mai ra. Aita ra te taata e hinaaro faahou ra e hiò i te mea ta te rahu e faaìte mai ra. Ua ìte te nunaa i te faufaa o te fenua, te mea ra e toe ra aita te Mäòhi e färii faahou ra i to na parau, to na Mäòhiraa. Ia färii anaè ra o ia i to na parau, to na taatoàraa, i reira noa o na e matara ai i mua i te parau no to na fenua. Te vai ra te tiàmäraa ta te Atua i horoà i roto i te taata i te färii i te mea maitaì e te mea ìno. Te mea ra e ìtehia ra te färii noa ra tätou i to rapae mai, i paruparu ai tätou i nià ta tätou. Manaò atu ra tätou i roto i taua òhieraa ra, hau atu ra tätou i te Atua. I roto i te hiòraa te morohi atu ra tätou, e to tätou parau i nià i te parau o te fenua. I tupu ai to na ètaèta i mua i te parau o te fenua. I teie taime, ua rahi roa i te haapiiraa no te pärururaa ia tätou no teie maì e haaviivii nei ia tätou, ua tae mai te pätia ärai, ia au i teie mau òhipa e tupu nei i roto i to tätou fenua ia Mäòhi Nui nei, tamata tätou i te haafatata i te mau taiòraa i faanahohia no tätou i teie mahana, teie te haapotoraa.

-Taramo 25, 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra.

-Iona 3, 10 Ua hiò mai ra te Atua i ta rätou i rave ra, e ua faaruè anaè rätou i ta rätou parau ìno; e ua tätarahapa iho ra te Atua i te ìno tä na i parau ra e, e tuu mai i nià ia rätou, e aore aè ra o ia i nä reira mai.

-1 Torinetia 7, 30 e te feiä i òto ra, mai te mea e, aore i òto; e te feiä i òaòa ra, mai te mea e, aore i òaòa; e te feiä i hoo ra, mai te mea e, aita a rätou;

-Märeto 1, 15 Na ô atu ra: Ua tae i te tau, te fätata mai nei te Pätireia o te Atua A tätarahapa, a faaroo mai i te Èvaneria nei.

Ei manaò mätamua.

I roto i na Evaneria e maha nei, Mataio, Märeto, Ruta, Ioane, ta Märeto te puta poto äè. Tei àmui te mau manaò, te òhipa a Ietu no te tävini na roto i te ora, te pohe, e te tiàfaahouraa. Ietu no Nätareta, o ia tei  haere i roto i tera vahi, e i tera vahi, no te faaora i te maì, e te feia tei fati i raro äè i te faatîtîraa a te tiàporo, e tei pïhaìiho te Atua ia Ietu ia au i te mau òhipa ta na e rave ra. Oia hoì IA IETU NO NÄTARETA O TEI FAATAHINUHIA MAI E TE ATUA I TE VÄRUA MAITAÌ E TE MANA RA, O TE HAMANI MAITAÌ HAERE RA, O TE FAAORARAA I TE FEI Ä ÄTOA I NENEIHIA E TE TIÀPORO RA TEI IA NA RA HOÌ TE ATUA. (OHIPA 10:38).

O Märeto e taata aro piti o ia, no te mea, o Ioane to na iòa Hepera, e o Märeto tei iòa Roma ia. Oia teie ta te mau èpitetore e faaìte nei o Ioane-Märeto, o te tämaïti teie i te pae faaroo a Petero. Aita o Märeto i riro ei pipi na te Fatu, eita o ia i te hoê ìte mata, e ìte faaroo ra. E rave òhipa o ia na Pauro i roto i te mau tere veà tono i Roma e i Àtia ïti. Ua faaroo pinepine oia ia Petero to na metua i te faaroo, i te faatiàraa i te huru o te Metia i roto i te òhiparaa i te hanahana o te Atua. Eita o Märeto e tià e pipi na te Fatu, i te mea e taata âpï roa o ia, i te ô no Tetemane i te taime a täpeàhia ai o Ietu e te mau faèhau Roma, tei reira ätoà o Märeto, o ia tei haruhia te àhu pü horo taha noa atu ra o ia. (Märeto 14:51-52). Teie noa to Märeto ìte ua oti ätu ai, e ìte tamarii teie, te toeà o to na ìte ra mea haapiihia ia o ia e Petero. O te huru ra teie no te hoê tävini päpü no te Atua, e te itoito. I parau ai o Amota perofeta i te pene 2 i te ìrava 16, E O TEI ITOITO I ROTO I TE FEIÄ PUAI RA, E MAÙE TAHA NOA IA IA TAE  I TAUA MAHANA RA, TE NA REIRA MAI RA TE ATUA NUI TUMU TAHI.

Èi manaò tatara.

Te òhipa ra e tupu ra i roto i ta tätou taiòraa no teie hora paieti, te maùêraa ia teie mau pipi mätamua i te reo tïtau o Ietu. PEE  ATU RA RAUA  IA NA. Te haamata nei te Fatu ra o Ietu i te poro haere i te parau faaâpï i te òaòa o te Atua. Ua oti te tau no te tiaìraa, ua oti te tau no te hiòraa i te fetià ànaana o te poìpoì, e ua oti ätoà i te hiò-noa-raa i te àrenio a te Atua, i te mea te patireia o te Atua teie e fatata mai nei. E patireia tei pii i te mau taata ätoà ia tätarahapa i te peeraa i te reo o Ietu. Te feia tei tïtauhia ia pee i te Metia, te änihia nei ia e hiò tütonu i te Atua, ma te tiàturi päpü. Te patireia o te hau o te Atua tei roto ia i te âau taata e to na oraraa vaamataeinaa, ia märamaramahia teie tüàtiraa i roto ia Ietu e te taata faaroo. O Ietu iho taua patireia ra tei tae mai na, e tei hoì faahou i te Metua ra ma te ämo i te hopoià a to te ao nei i nià i ta na täpano, e hoì faahoì mai ra O ia no tätou. I te mea e ua tae i te tau no te patireia o te Atua, ua tae ätoà ia i te tau no te faaìteraa i te parau no te mau mea ätoà i parauhia i roto i te Faaäuraa mätamua o tei tiaì-turu-noa-hia na, oia hoì te parau no to te Atua faatereraa i teie nei ao. E ere teie i te parau âpï i roto i te vaha o te mau perofeta e tae noa ätu i te mau tävini o te Atua.

I te hiti roto no te fenua ra o Tarirea to Ietu tiàororaa i te parau òaòa no te Patireia o te Atua i te feia ätoà tei tätarahapa. E parau maitaì tei faatupu i te òaòa i roto i te feiä tei faaroo i teie mau reo, e tei färii. O Timona, e ö Àneterea tei färii i teie tïtauraa a te Fatu, A PEE MAI IA Ù E FAARIRO VAU IA O RUA EI RAVAAI TAATA. I teie reo no Ietu, aita teie na taata i tuatäpapa i te manaò, ma te faaau òre i te parau no te òhipa, e ua pee raua i teie tïtauraa. Oia ätoà ia o Iatöpo e ô Ioane tei nià i te poti te ène ra i te ùpeà i tae ätu ai te parau tïtau, ua vaiiho i ta raua òhipa, to raua na metua e taë noa ätu i na tävini tärahuhia, pee ätu ra raua ia Ietu. Hoê ä manaò to rätou e maha nei hoê ä ôpuaraa e pee i te Fatu. Aita roa te hoê reo no roto mai ia rätou tei haaparuparu i teie tïtauraa a te Fatu. Ia hiò maitaì änaè tätou e mea òiòi teie mau taata ravaai i te faaroo  i te parau a Ietu. Ua faaruè na taata mätamua i ta raua ùpeà e ua pee raua ia Ietu. E i te piti o na taata, ua faaruè i to raua poti, to raua na metua ia Tepetaio e na tävini i tärahuhia i nià i te poti.

Teie  mau taata ravaai too maha, o Timona, o Àneterea, o Iatöpo, e ö Ioane, e fatu òhipa rätou, o rätou iho to rätou raatira, e aita te tahi e tià e haere mai e  faatere ia rätou. Ua faaruè rätou i te òhipa i herehia e rätou i te mau mahana ätoà, o ta rätou i mätau maitaì. To rätou àravihi i te hiò i te mau faanahoraa o te reva, tera mataì ra tera ia te ïà, tera âvaè ra tera ia te ïà, tera ôpape ra tera ia te mauraa ïà e te moana o to rätou ia ùtuafare i te mau mahana ätoà. Te vaiiho nei rätou i to rätou toroà, no te rave i te hoê toroà âpï tei òre i matauhia e rätou. Eiaha no te mea, aita teie òhipa e tere nei, eita roa ia. No te mea ra te ìte nei rätou i roto ia Ietu te hoê faufaa e tià ia ravehia, i teie reo to te Fatu e a tätarahapa, te taata te rave i teie òhipa, eita te ïà, te ïà aita ta na tätarahaparaa. Te taata ra oia ia, te parau ia ta Ietu e hinaaro nei e haapäpü na roto i tera manaò ravaai taata.

Te manaò ätoà ia o te Atua i nià ia Ieremia i te pene 16 i te ìrava 16, te naò ra, INAHA, E TONO  VAU I TE VEA E TII I TE FEIÄ RAVAAI E RAVE RAHI, TE NA REIRA MAIRA O IEHOVA, NA RÄTOU E RAVAAI TE TAATA. No reira i tupu ätoà ai te tïtauraa a Ietu i nià i te feiä ravaai.

PEE ÄTU RÄTOU IA NA.

Te faaruè nei teie feia ravaai i te vahi òhipa i matauhia e rätou, e te pee nei i te Metia, eiaha i nià i te moana, i nià ra i te fenua nei, eiaha ra i roto i te mau Nana ïà, i roto ra i te mau tamarii a te Atua. Eiaha no te täutai i te ïà ia paia te ùtuafare e te nunaa, ia täutai ra i te taata ia tätarahapa. Te pee nei rätou i te Metia ei faaìteraa i to rätou manaò tiàturi i te parau tätarahapa no teie Patireia e fatata mai nei ia rätou. E tià ia tätou ia parau e, te riro nei teie mau pipi, mai te nunaa no Nïneve ra te huru, tei farii i te haapaeraa maa i tiàorohia ia rätou e Iona, ia tätarahapa ia òre ia täìhi-tumu-hia to rätou fenua e te Atua. E ua tupu te tätarahapa no te nunaa o Nïneve e ua tiàturi i te here faaòreraa hara a te Atua. Faataui atu ra te Atua i teie ôpuaraa na Na, ei ôpuaraa no te aroha tupu ätu ra te òaòa i roto i teie nunaa. O ta Ietu ätoà e hinaaro nei i ta na mau pipi, ia riro ei feiä tämau i te ìmi i te parau no te tätarahapa, e ia  tätarahapa te mau taata e naeàhia nei i te parau àro no te Èvaneria. Ua faataui te Atua i ta na ôpuaraa i nià ia Nïneve, ua faataui ätoà na taata ravaai e maha i ta rätou ôpuaraa no te täutai i te ïà, e teie nei e ravaai rätou i te taata  ia tätarahapa. I pee ai rätou i te reo tïtau no te Metia, i te mea ua tätarahapa ätoà rätou. Oia ätoà te mau taata tei faaroo i te reo tïtau o te Fatu ia pee ia na, ma te faaòhipa i ta na täreni, taata tätaìtahi te haapaò i ta na täreni. O ta te Âpotetoro ra ia o Pauro e faaite nei i to Torinetia hoê i te pene 7 i te ìrava 25 e faaea i te ìrava 31, mai te mea e paretenia ra, ia itoito ia i te peeraa i te Metia, te feia täatihia ra, ia puai ätu i te here i to na hoa haaipoipo, ei ia rahi ätu ä i te ìmiraa raveà no te hau, mai te mea te òaòa ra, ia täpeà noa ia i to na huru taata òaòa, no te täviniraa i te Atua.

Te tïtau ätoà nei te Metia ia tätou ia pee Ia na,no te aha ?

No te mea,      1) mau Tamarii tätou no roto i te Patireia o te Atua.

                        2) Mau Tamarii tätou no te ôpu o te tätarahapa.

E ta tätou raveà te ravaai taata ia.

Te naò ra te parau paari ra e, te tärava ra te äau taata ta na täutai.

 

                       

Teraì òr. Faatura.

Ioane 1.35-42 Maìrihia

 

Tāpati 17 no Tënuare 2021.

Maìrihia

Taramo 40

(Ìr. 14-18: hiò Taramo 70, 2-6)

1 Na te Mënätehe. Taramo na Tävita.2 Tiaì mäite atu ra vau i te Fatu, e ua färiu mai ra o ia ia ù, e ua faaroo i ta ù pure. 3 Ua ùme o ia ia ù i räpae i taua âpoo riàrià ra, no roto i te vari hohonu e te piripiri. E ua tuu o ia i ta ù âvae i nià i te papa, e ua faaäu mäite hoì i to ù mau haereà. 4 E ua tuu mai o ia i te himene âpï i roto i to ù nei vaha, e himene haamaitaì i to tätou Atua. E rave rahi të hiò, e ua mataù ia na e tiàturi hoì rätou i te Fatu. 5 E ao to te taata e tiàturi i te Fatu, e aore i haapaò i te teòteò, e tei färiu i te parau haavare ra.6 E rave rahi, e ta ù Atua, e te Fatu, te mau òhipa taa ê i ravehia e òe ra, e to òe ra manaò ia mätou nei. E òre e tià ia taiò noa atu i mua ia òe na, e faaìte hoì au, e parau vau i te reira eita rä e tià ia taiò atu i te rahi.7 Aore òe i hinaaro i te tütia e te tütia àmu, ua haafatafata òe i to ù puè tarià. Te tütia-täauahi e te tütia no te hara ra, aita òe i tïtau mai. 8 Ua parau atu ra vau: Inaha, te haere atu nei au. Ua päpaìhia te parau no ù i roto i te puta ra. 9 E mea au na ù te rave i to òe hinaaro, e ta ù Atua; te vai nei hoì ta òe ture tei roto i to ù nei âau.10 Te parau nei au i te parau tià i roto i te âmuiraa rahi o te taata nei; inaha, aore roa ta ù vaha i mämü i te reira ua ìte atoà hoì òe, e ta ù Atua e te Fatu. 11 Aore au i huna i te parau tià na òe i roto i ta ù âau; te faaìte nei au i to parau mau e te ora na òe. Aore au i huna i to hämani maitaì e to parau mau i te âmuiraa rahi ra. 12 Eiaha òe e hopoi ê i to aroha hämani maitaì ia ù, e te Fatu e; na to hämani maitaì e to parau mau e tiaì mai ia ù. 13 Ua haaàtihia hoì au e te ìno e rave rahi; ua roohia vau i ta ù nei mau hara, e eita e tià ia nänä noa atu i nià ra. E rahi te reira i te iò rouru i to ù nei upoo; e teie nei, ua taiä ta ù âau i roto ia ù nei. 14 Ia tià ia òe, e te Fatu, e faaora ia ù: ia peepee mai, e te Fatu, e tauturu mai ia ù. 15 Ia haamä rätou e ia hepohepo rätou atoà ra o tei tïtau mai ia ù nei ia pohe. Ia faahoìhia rätou e ia hepohepo tei tïtau mai ia ù nei ia ìno. 16 O te pau të noaa ia rätou, ei utuà no ta rätou faaìno, o tei parau ia ù nei e: «Àitoa! Àitoa!» 17 O te feiä atoà rä i ìmi ia òe ra, e òaòa ia rätou, e ia reàreà ia ia òe; e te feiä i hinaaro i te ora na òe ra, e parau ia rätou e: Ia faarahihia te Fatu e a muri noa atu. 18 E àti e te veve to ù, te manaò mai ra rä te Fatu ia ù. O òe ta ù tauturu e ta ù ora. Eiaha e faaroaroa, e ta ù Atua.

1 Tämuera 3.1-19

Tïtauraa ia Tämuera.

1 Te rave ra taua tamaiti ra o Tämuera i te òhipa a te Fatu i mua i te aro o Èri. Te ïti ra te parau a te Fatu i te reira ànotau, aita hoì e ôrama pinepine i reira. 2 I taua ànotau te taòto noa ra Èri i to na ra roì mau, ua mohimohi to na mata aita o ia i ìte ia hiò ra, 3 e aita i pohe te rämepa a te Atua i te nao o te Fatu i vaiihohia ai te âfata a te Atua ra, ua taòto atoà iho ra Tämuera: 4 ua tiàoro mai ra te Fatu ia Tämuera: e ua parau atu ra o ia, Teie au. 5 Ua horo atu ra o ia ia Èri ra, e ua nä ô atu ra, Teie au; ta òe hoì tiàoro mai ia ù nei. Ua parau mai ra o ia, Aore au i tiàoro atu ia òe, a haere a taòto. 6 Ua tiàoro faahou mai ra te Fatu ia Tämuera. Ua tià aè ra Tämuera i nià, haere atu ra ia Èri ra, e ua nä ô atu ra, Teie au, ua tiàoro mai hoì òe ia ù. Ua parau mai ra o ia, Aita vau i tiàoro atu ia òe, e ta ù tamaiti, e haere ä e taòto. 7 Aita hoì Tämuera i ìte i te Fatu; aore ä hoì te parau a te Fatu i faaìtehia mai ia na ra. 8 Ua tiàoro faahou mai ra te Fatu ia Tämuera, o te toru ia o te tiàororaa mai. Ua tià aè ra o ia i nià, haere atu ra ia Èri ra, nä ô atu ra, Teie au ua tiàoro mai ä òe ia ù. Ìte aè ra Èri e, o te Fatu tei tiàoro mai i taua tamaiti ra. 9 E ua nä ô mai ra Èri ia Tämuera, A haere a taòto, e ia tiàorohia mai òe ra, e parau atu òe i reira ra e, E parau mai òe, e te Fatu e, te faaroo nei hoì to tävini. Ua haere mai ra Tämuera ua taòto i nià i ta na roì. 10 Ua haere mai ra te Fatu, ua tià noa mai ra, e ua tiàoro, mai tei mütaa iho ra, E Tämuera, e Tämuera, Ua parau atu ra Tämuera, E parau mai, te faaroo nei hoì to tävini. 11 Ua parau mai ra te Fatu ia Tämuera, Inaha, e faatupu vau i te hoê mea i Ìteraèra nei, e riro nä tarià o te feiä atoà e faaroo ra i te turi. 12 E ia tae i taua tau ra, e faatupu ai au i te parau ia Èri ra, i te mau parau atoà i parauhia e au i to na ra ùtuafare; ua haamata anaè au, na ù atoà ia e faaoti. 13 Ua parau hoì au ia na e, e tähoo atu vau i to na ra ùtuafare e a muri noa atu, no te mea, ìte noa ä o ia i te hara a nä tamarii nö na ra, o tei faariro ia räua iho ei mea faufau ra, aita ä o ia i faaòre i ta räua parau. 14 E teie nei, ua tapu vau i te ùtuafare o Èri ra e, e òre roa te hara a te ùtuafare o Èri mä i te tütia e te ö e a muri noa atu. 15 Taòto noa iho ra Tämuera e ao noa aè ra, e ua ìriti aè ra i te mau ôpani o te fare o te Fatu. Mataù aè ra Tämuera ia faaìte atu ia Èri i taua ôrama ra. 16 Ua pii mai ra rä Èri ia Tämuera, nä ô mai ra, E ta ù tamaiti, e Tämuera, ua parau atu ra o ia, Teie au. 17 Ua nä ô mai ra o ia, E aha ta te Fatu parau i parau mai ia òe ra? Teie tä ù parau ia òe, eiaha òe e huna i taua parau ra ia ù; ia nä reira mai te Atua ia òe, e ia rahi noa atu ä, ia huna noa atu òe i te hoê parau ia ù i te mau parau atoà ta na i parau mai ia òe ra. 18 Ua faaìte atu ra Tämuera ia na i te mau parau atoà ra, aore roa e parau i hunahia. Ua nä ô mai ra o ia, O te Fatu ia, e rave o ia i tei au ia na iho ra. 19 Tupu atu ra Tämuera, e ua àti mai ra te Fatu ia na, e aore roa te hoê parau a na i òre i te tupu ia na.

1 Torinetia 6.13-20

E faahanahana i te Atua mä to òutou tino

13 No te ôpü te mäa, e no te mäa hoì te ôpü, e faaòre rä te Atua i te ôpü e te mäa atoà. Eere rä te tino no te taiàta, no te Fatu rä; e no te tino hoì te Fatu. 14 Ua faatià hoì te Atua i te Fatu, e e faatià atoà o ia ia tätou i to na iho mana. 15 Aita òutou i ìte e no te Metia to òutou mau tino? E rave änei hoì au i to te Metia ra, a faariro atu ai no te faaturi? Eiaha roa ia. 16 Aita òutou i ìte e, o tei àti atu i te faaturi hoê ä ia tino? Ua parau hoì o ia e: E riro räua ei tino hoê. 17 O te taata rä i àti atu i te Fatu ra, hoê ä ia värua. 18 E maùe ê atu i te faaturi. Te mau hara atoà e ravehia e te taata nei, aita rä te tino; o te taata rä i faaturi ra, ua hämani ìno o ia i to na iho tino. 19 Aita òutou i ìte, e e hiero to òutou tino no te Värua Maitaì i roto ia òutou na, tei noaa ia òutou i te Atua ra, eere hoì òutou i to òutou iho? 20 Ua täuihia hoì òutou i te täui, e teie nei, e haamaitaì i te Atua, i to òutou tino, e i to òutou värua, no te Atua ia.

Ioane 1.35-42

Te mau pipi mätamua

35 E ao aè ra, te tià noa ra Ioane e o e toopiti puè pipi ana ra. 36 E ìte aè ra ia Ietu i te haereraa nä reira iho, ua nä ô aè ra: A hiò na i te Ârënio a te Atua. 37 E ìte aè ra nä pipi i taua parau ra, ua pee atu ra räua ia Ietu. 38 Ua färiu mai ra Ietu i muri, ìte mai ra ia räua i te peeraa atu, e ua parau mai ra ia räua: E aha ta òrua e ìmi nei. Ua parau atu ra räua ia na: E Rapi oia hoì të parauhia ra E te Òrometua e tià òe i hea? 39 Ua parau mai ra o ia ia räua: A haere mai, a hiò. Haere atu ra räua e ìte atu ra i to na pärahiraa, e pärahi atu ra io na i taua mahana ra: ua tae hoì i te àhuru o te hora ra. 40 E te hoê i taua puè taata toopiti i faaroo i te parau a Ioane ra, o tei pee atu ia Ietu ra, o Àneterea ia, te taeaè o Timona Pëtero ra. 41 E färerei atu ra o ia i te mätamua i ta na tuaana iho ia Timona, e parau atu ra ia na: Ua ìteä ia mäua te Metia oia hoì Tei Faatähinuhia ia ìritihia ra. 42 E ua arataì mai ra o ia ia na ia Ietu ra. E ia hiò aè ra Ietu ia na ra, nä ô atu ra: O Timona òe, te tamaiti a Iona, e maìrihia òe ia Tefa oia hoì Pëtero.

 

Manaò.

Mau taiòraa i haapaòhia no tätou i teie mahana, e mau parau no te faatupu i te mau hinaaro o te Atua Nui Tumu Tahi, tei ärataì i to tätou tiàturiraa i te ìteraa i te tïtauraa e te faarooraa, tera e reo no te Atua, tera e vava mataì, tera poà päpe,  tera e fätiraa miti i nià i te aau. I te mea ua rahi roa to te mau tävini haapaòraa i te mea e au ia na, eiaha ra i te Atua te tumu o to na tiàraa tävini, e hau roa atu ai te reira to te tävini ia hinaaroraa i te hoê faanahoraa tei haaäpiäpi te tupuraa te hinaaro o te Atua, mauiui aè ra te nünaa i ta na mau haapahi, ta na peu faatarere ia òre ia tupu maite te ôpuaraa ora a te Atua.

No teie mau òhipa i tupu te haafatata faahou mai ra te Atua i pïhaìiho i te taata no te faaìte i to na ätearaa i te mau faaueraa, e to te mau tävini hunaraa i te parau tumu no te aroha e te here. E to te mau tävini tapoìraa i te hara a te nünaa, oia hoì te vaiihoraa i te nünaa i nià i te mea e viivii ai te mau hinaaro o te Atua. Ia taiò tätou, e ia faaroo tätou i te haapotoraa no na taiòraa maha i faataahia no teie mahana teie ia,

 

-Taramo 40, 9 E mea au na ù te rave i to òe hinaaro, e ta ù Atua; te vai nei hoì ta òe ture tei roto i to ù nei âau.

-1 Tämuera 3, 18 Ua faaìte atu ra Tämuera ia na i te mau parau atoà ra, aore roa e parau i hunahia. Ua nä ô mai ra o ia, O te Fatu ia, e rave o ia i tei au ia na iho ra.

-1 Torinetia 6, 20 Ua täuihia hoì òutou i te täui, e teie nei, e haamaitaì i te Atua, i to òutou tino, e i to òutou värua, no te Atua ia.

-Ioane 1, 42 E ua arataì mai ra o ia ia na ia Ietu ra. E ia hiò aè ra Ietu ia na ra, nä ô atu ra: O Timona òe, te tamaiti a Iona, e maìrihia òe ia Tefa oia hoì Pëtero.

 

Tauturu.

E parauhia teie mau ìrava, e mau ìrava ìte Parau Atua, i te mea te parau o te Atua teie e faarähihia nei ia iho faahou mai te parau o te taata tävini Atua, tei here e tei aroha i te nünaa o te Atua ta te fenua e faaìte noa ra ia na, ia ìte te tävini te here o te fenua, te aroha o te fenua, o te Atua ia, te Atua Nui Tumu Tahi, naò ia teie manaò i te parauraa e, te tävini o te Atua èita te hohoà noa o te Atua tei nià ia na, te hopoià atoà ra, mai teie ta Ietu e parau nei, O Timona òe, te tamaiti a Iona, e maìrihia òe ia Tefa oia hoì Pëtero. Teie reo e haapäpüraa na Ietu i to na tiàturiraa i te taata, e te ìteraa i te rähu a to na Metua ma te parau i nià i te taata e, e Ôfaì òe. Te maìrihia nei o Timona i te hoê parau, e aore ra te hoê iòa tei faatäui roa ia na i to na metua ia Iona. Teie o Ietu e parau nei i te taata i te ôfaì, te ìte nei ia te taata ia Ietu maite puaa ra te huru, A hiò na i te Ârënio a te Atua. Na roto i na täpaò e piti o te fenua ua färerei te Atua i te taata, ua tupu te tahi täuiraa manaò, te ìteraa te taata i roto ia Ietu i te maru, te haèhaa, te faatura, e i te haapaòraa i te here fenua, i te pae o Ietu te ìteraa i roto i te taata, te ètaèta, te faateitei, te teòteò, te haavare, te täviri, te huna, i parau ai o Ietu e ôfaì òe. Te haapäpü noa ra o Ietu i te manaò no te mau taata e pee ra ia na e to rätou huru, e hinaaro mau anei ra teie i te peeraa i te mau faanahoraa i te haapaòraa i te mau hopoià ia au te mau faaueraa a te Atua, e i ta te fenua. To Ietu parauraa i te taata i te Ôfaì, i mua na pipi a Ioane, ia Àneterea, ia Timona, èi faaìteraa i teie mau taata i to rätou huru, e te huru o te mau taata atoà tei òre i ìte i te aroha Metua, e tei òre i ìte i to rätou ätearaa i te mau faaueraa a te Atua Nui Tumu Tahi. Te hinaaro nei o Ietu e parau i teie mau pipi a tätaì ia òutou aita te Atua i hämani i te taata i te ôfaì, i te repo fenua ra ta na i ìpopo i to na rima, èita e ö ia haapüaì te Atua i to na aho i roto i te ôfaì i roto ra i fenua, to na hohoà tei nià i te fenua, èita tei nià i te ôfaì. Teie huru parauraa ta Ietu i te taata e ôfaì te faaära o Ietu na òutou iho o òutou e tätaì, ma te täuturuhia e ta ù mau haapiiraa. Te faaineineraa a Ietu i ta na mau pipi mätamua a Haere mai a hiò, a haere mai a Faaroo teie noa te parau, e hiò i te aru to na faufaa e ta na poroìraa ia parau te Paùmotu e Hiò te Vaitià, to na auraa aita te ôpape e tiàfaahouraa i te taiòraa, e mea hora ua faahoì, e mea hora ua tomo, no te faaâpï te roto te vai ra ihoä te mau haaviiviiraa a te taata, e te mau faatäuiraa i te mau tereraa o te ôpape, e matie-roa-hia ai te roto no te mea àita e täno faahou ra te òhuraa ôpape no te faaâpï te roto, no te mea ua heruhia te aruaru.

E ia parau hoì Vaitä mai teie te huru, te Ìte nei au, i mua ia ù nei te auraa o teie nei mau peu maere rahi. Tenä mai te fänau ùnaùna a te Tumu, e haere mai e hiò i teie uru räau i Taputapuätea nei. E tino ê to rätou, e tino ê to tätou, hoê anaè ra huru, no te Tumu mai. E riro teie nei fenua ia rätou, e mou teie haapaòraa tahito nei, e e tae mai hoì te mau manu moà o te moana i te fenua nei, e haere mai e taìhaa i ta teie räau i motu e haapii nei (Teuira HENRY, Tahiti i te pö, àpi 16).

Ia au i na parau e piti nei ua moèhia i te taata i te Haapiiraa a te aru e ta te reo e faaòto ra, ia parauhia te Vaitià àita te roto e faaâpï faahou ra ia na, e teie reo, e haere mai e taìhaa i ta teie räau i motu e haapii nei. Na te reo noa e tatara i te auraa o te taò, e ia faaroo hoì tätou i teie reo o Ietu, O Timona òe, te tamaiti a Iona, e maìrihia òe ia Tefa oia hoì ia Pëtero.

Te haapiiraa i roto i teie reo te taò ia e maìrihia òe, e taò teie no te haapäpüraa i te tumu òhipa e hinaarohia ra e faatupu ia au i te iòa, e ia au i te òhipa. E parau-atoà-hia, e topahia òe, e parau hoê teie e te manaò hoê to na tupuraa. Teie maìriraa iòa a Ietu no te faatura ia i te òhipa ta to na Metua i rave i nià i te taata, e fenua te taata, te hohoà ia te reira no te Atua, te huru o te fenua te huru ia o te Atua, te aho o te fenua, te aho ia o te Atua. Teie huru tupuraa òhipa te faahaamanaò mai nei ia tätou te mau tävini, i te tumu ta tätou i faataa i riro ai tätou èi àuaha parau no te ôpuaraa faaora i te hinaaro o te Atua Nui Tumu Tahi, ia ora o  Mäòhi Nui.

Te horoà nei o Ietu ia tätou te tahi türamaraa âpï, na roto i te maìriraa iòa ia tupu i roto i te ao ta tätou e ora nei te hoê täuiraa i te hiòraa i te aru a te Atua Nui Tumu Tahi, i te mea èita o ia e haavare e tautururaa o ia i te taata no te faatupuraa i te mau faaueraa ia tupu te maitaì e te hau. Ia parau tätou Mäòhi Nui e ao teie no te nünaa Mäòhi, e te mau taata atoà i roto ia na no rätou atoà teie ao, e ao mure òre. I te mea na te mahana e faaìteraa i te nehenehe o teie ao, èi mahana e parauhia to te ao. Te ao ra te märamarama ia te ora ia te reira no te taata, ia parau o Ietu ia tätou e ôfaì òe, o òe te tahi papa no te faatià i to òe nünaa, i te piiraa a te fenua, ia ôfaì to òe âau faaitoito i te vävähi, ia àma faahou te mahana o te Aroha e te here.

Teie te tahi reo no Pauro, -1 Torinetia 6, 20 Ua täuihia hoì òutou i te täui, e teie nei, e haamaitaì i te Atua, i to òutou tino, e i to òutou värua, no te Atua ia.

 

Ia ora na.

 

Teraì òr. Faatura.