Ioane 1.35-42 Maìrihia

 

Tāpati 17 no Tënuare 2021.

Maìrihia

Taramo 40

(Ìr. 14-18: hiò Taramo 70, 2-6)

1 Na te Mënätehe. Taramo na Tävita.2 Tiaì mäite atu ra vau i te Fatu, e ua färiu mai ra o ia ia ù, e ua faaroo i ta ù pure. 3 Ua ùme o ia ia ù i räpae i taua âpoo riàrià ra, no roto i te vari hohonu e te piripiri. E ua tuu o ia i ta ù âvae i nià i te papa, e ua faaäu mäite hoì i to ù mau haereà. 4 E ua tuu mai o ia i te himene âpï i roto i to ù nei vaha, e himene haamaitaì i to tätou Atua. E rave rahi të hiò, e ua mataù ia na e tiàturi hoì rätou i te Fatu. 5 E ao to te taata e tiàturi i te Fatu, e aore i haapaò i te teòteò, e tei färiu i te parau haavare ra.6 E rave rahi, e ta ù Atua, e te Fatu, te mau òhipa taa ê i ravehia e òe ra, e to òe ra manaò ia mätou nei. E òre e tià ia taiò noa atu i mua ia òe na, e faaìte hoì au, e parau vau i te reira eita rä e tià ia taiò atu i te rahi.7 Aore òe i hinaaro i te tütia e te tütia àmu, ua haafatafata òe i to ù puè tarià. Te tütia-täauahi e te tütia no te hara ra, aita òe i tïtau mai. 8 Ua parau atu ra vau: Inaha, te haere atu nei au. Ua päpaìhia te parau no ù i roto i te puta ra. 9 E mea au na ù te rave i to òe hinaaro, e ta ù Atua; te vai nei hoì ta òe ture tei roto i to ù nei âau.10 Te parau nei au i te parau tià i roto i te âmuiraa rahi o te taata nei; inaha, aore roa ta ù vaha i mämü i te reira ua ìte atoà hoì òe, e ta ù Atua e te Fatu. 11 Aore au i huna i te parau tià na òe i roto i ta ù âau; te faaìte nei au i to parau mau e te ora na òe. Aore au i huna i to hämani maitaì e to parau mau i te âmuiraa rahi ra. 12 Eiaha òe e hopoi ê i to aroha hämani maitaì ia ù, e te Fatu e; na to hämani maitaì e to parau mau e tiaì mai ia ù. 13 Ua haaàtihia hoì au e te ìno e rave rahi; ua roohia vau i ta ù nei mau hara, e eita e tià ia nänä noa atu i nià ra. E rahi te reira i te iò rouru i to ù nei upoo; e teie nei, ua taiä ta ù âau i roto ia ù nei. 14 Ia tià ia òe, e te Fatu, e faaora ia ù: ia peepee mai, e te Fatu, e tauturu mai ia ù. 15 Ia haamä rätou e ia hepohepo rätou atoà ra o tei tïtau mai ia ù nei ia pohe. Ia faahoìhia rätou e ia hepohepo tei tïtau mai ia ù nei ia ìno. 16 O te pau të noaa ia rätou, ei utuà no ta rätou faaìno, o tei parau ia ù nei e: «Àitoa! Àitoa!» 17 O te feiä atoà rä i ìmi ia òe ra, e òaòa ia rätou, e ia reàreà ia ia òe; e te feiä i hinaaro i te ora na òe ra, e parau ia rätou e: Ia faarahihia te Fatu e a muri noa atu. 18 E àti e te veve to ù, te manaò mai ra rä te Fatu ia ù. O òe ta ù tauturu e ta ù ora. Eiaha e faaroaroa, e ta ù Atua.

1 Tämuera 3.1-19

Tïtauraa ia Tämuera.

1 Te rave ra taua tamaiti ra o Tämuera i te òhipa a te Fatu i mua i te aro o Èri. Te ïti ra te parau a te Fatu i te reira ànotau, aita hoì e ôrama pinepine i reira. 2 I taua ànotau te taòto noa ra Èri i to na ra roì mau, ua mohimohi to na mata aita o ia i ìte ia hiò ra, 3 e aita i pohe te rämepa a te Atua i te nao o te Fatu i vaiihohia ai te âfata a te Atua ra, ua taòto atoà iho ra Tämuera: 4 ua tiàoro mai ra te Fatu ia Tämuera: e ua parau atu ra o ia, Teie au. 5 Ua horo atu ra o ia ia Èri ra, e ua nä ô atu ra, Teie au; ta òe hoì tiàoro mai ia ù nei. Ua parau mai ra o ia, Aore au i tiàoro atu ia òe, a haere a taòto. 6 Ua tiàoro faahou mai ra te Fatu ia Tämuera. Ua tià aè ra Tämuera i nià, haere atu ra ia Èri ra, e ua nä ô atu ra, Teie au, ua tiàoro mai hoì òe ia ù. Ua parau mai ra o ia, Aita vau i tiàoro atu ia òe, e ta ù tamaiti, e haere ä e taòto. 7 Aita hoì Tämuera i ìte i te Fatu; aore ä hoì te parau a te Fatu i faaìtehia mai ia na ra. 8 Ua tiàoro faahou mai ra te Fatu ia Tämuera, o te toru ia o te tiàororaa mai. Ua tià aè ra o ia i nià, haere atu ra ia Èri ra, nä ô atu ra, Teie au ua tiàoro mai ä òe ia ù. Ìte aè ra Èri e, o te Fatu tei tiàoro mai i taua tamaiti ra. 9 E ua nä ô mai ra Èri ia Tämuera, A haere a taòto, e ia tiàorohia mai òe ra, e parau atu òe i reira ra e, E parau mai òe, e te Fatu e, te faaroo nei hoì to tävini. Ua haere mai ra Tämuera ua taòto i nià i ta na roì. 10 Ua haere mai ra te Fatu, ua tià noa mai ra, e ua tiàoro, mai tei mütaa iho ra, E Tämuera, e Tämuera, Ua parau atu ra Tämuera, E parau mai, te faaroo nei hoì to tävini. 11 Ua parau mai ra te Fatu ia Tämuera, Inaha, e faatupu vau i te hoê mea i Ìteraèra nei, e riro nä tarià o te feiä atoà e faaroo ra i te turi. 12 E ia tae i taua tau ra, e faatupu ai au i te parau ia Èri ra, i te mau parau atoà i parauhia e au i to na ra ùtuafare; ua haamata anaè au, na ù atoà ia e faaoti. 13 Ua parau hoì au ia na e, e tähoo atu vau i to na ra ùtuafare e a muri noa atu, no te mea, ìte noa ä o ia i te hara a nä tamarii nö na ra, o tei faariro ia räua iho ei mea faufau ra, aita ä o ia i faaòre i ta räua parau. 14 E teie nei, ua tapu vau i te ùtuafare o Èri ra e, e òre roa te hara a te ùtuafare o Èri mä i te tütia e te ö e a muri noa atu. 15 Taòto noa iho ra Tämuera e ao noa aè ra, e ua ìriti aè ra i te mau ôpani o te fare o te Fatu. Mataù aè ra Tämuera ia faaìte atu ia Èri i taua ôrama ra. 16 Ua pii mai ra rä Èri ia Tämuera, nä ô mai ra, E ta ù tamaiti, e Tämuera, ua parau atu ra o ia, Teie au. 17 Ua nä ô mai ra o ia, E aha ta te Fatu parau i parau mai ia òe ra? Teie tä ù parau ia òe, eiaha òe e huna i taua parau ra ia ù; ia nä reira mai te Atua ia òe, e ia rahi noa atu ä, ia huna noa atu òe i te hoê parau ia ù i te mau parau atoà ta na i parau mai ia òe ra. 18 Ua faaìte atu ra Tämuera ia na i te mau parau atoà ra, aore roa e parau i hunahia. Ua nä ô mai ra o ia, O te Fatu ia, e rave o ia i tei au ia na iho ra. 19 Tupu atu ra Tämuera, e ua àti mai ra te Fatu ia na, e aore roa te hoê parau a na i òre i te tupu ia na.

1 Torinetia 6.13-20

E faahanahana i te Atua mä to òutou tino

13 No te ôpü te mäa, e no te mäa hoì te ôpü, e faaòre rä te Atua i te ôpü e te mäa atoà. Eere rä te tino no te taiàta, no te Fatu rä; e no te tino hoì te Fatu. 14 Ua faatià hoì te Atua i te Fatu, e e faatià atoà o ia ia tätou i to na iho mana. 15 Aita òutou i ìte e no te Metia to òutou mau tino? E rave änei hoì au i to te Metia ra, a faariro atu ai no te faaturi? Eiaha roa ia. 16 Aita òutou i ìte e, o tei àti atu i te faaturi hoê ä ia tino? Ua parau hoì o ia e: E riro räua ei tino hoê. 17 O te taata rä i àti atu i te Fatu ra, hoê ä ia värua. 18 E maùe ê atu i te faaturi. Te mau hara atoà e ravehia e te taata nei, aita rä te tino; o te taata rä i faaturi ra, ua hämani ìno o ia i to na iho tino. 19 Aita òutou i ìte, e e hiero to òutou tino no te Värua Maitaì i roto ia òutou na, tei noaa ia òutou i te Atua ra, eere hoì òutou i to òutou iho? 20 Ua täuihia hoì òutou i te täui, e teie nei, e haamaitaì i te Atua, i to òutou tino, e i to òutou värua, no te Atua ia.

Ioane 1.35-42

Te mau pipi mätamua

35 E ao aè ra, te tià noa ra Ioane e o e toopiti puè pipi ana ra. 36 E ìte aè ra ia Ietu i te haereraa nä reira iho, ua nä ô aè ra: A hiò na i te Ârënio a te Atua. 37 E ìte aè ra nä pipi i taua parau ra, ua pee atu ra räua ia Ietu. 38 Ua färiu mai ra Ietu i muri, ìte mai ra ia räua i te peeraa atu, e ua parau mai ra ia räua: E aha ta òrua e ìmi nei. Ua parau atu ra räua ia na: E Rapi oia hoì të parauhia ra E te Òrometua e tià òe i hea? 39 Ua parau mai ra o ia ia räua: A haere mai, a hiò. Haere atu ra räua e ìte atu ra i to na pärahiraa, e pärahi atu ra io na i taua mahana ra: ua tae hoì i te àhuru o te hora ra. 40 E te hoê i taua puè taata toopiti i faaroo i te parau a Ioane ra, o tei pee atu ia Ietu ra, o Àneterea ia, te taeaè o Timona Pëtero ra. 41 E färerei atu ra o ia i te mätamua i ta na tuaana iho ia Timona, e parau atu ra ia na: Ua ìteä ia mäua te Metia oia hoì Tei Faatähinuhia ia ìritihia ra. 42 E ua arataì mai ra o ia ia na ia Ietu ra. E ia hiò aè ra Ietu ia na ra, nä ô atu ra: O Timona òe, te tamaiti a Iona, e maìrihia òe ia Tefa oia hoì Pëtero.

 

Manaò.

Mau taiòraa i haapaòhia no tätou i teie mahana, e mau parau no te faatupu i te mau hinaaro o te Atua Nui Tumu Tahi, tei ärataì i to tätou tiàturiraa i te ìteraa i te tïtauraa e te faarooraa, tera e reo no te Atua, tera e vava mataì, tera poà päpe,  tera e fätiraa miti i nià i te aau. I te mea ua rahi roa to te mau tävini haapaòraa i te mea e au ia na, eiaha ra i te Atua te tumu o to na tiàraa tävini, e hau roa atu ai te reira to te tävini ia hinaaroraa i te hoê faanahoraa tei haaäpiäpi te tupuraa te hinaaro o te Atua, mauiui aè ra te nünaa i ta na mau haapahi, ta na peu faatarere ia òre ia tupu maite te ôpuaraa ora a te Atua.

No teie mau òhipa i tupu te haafatata faahou mai ra te Atua i pïhaìiho i te taata no te faaìte i to na ätearaa i te mau faaueraa, e to te mau tävini hunaraa i te parau tumu no te aroha e te here. E to te mau tävini tapoìraa i te hara a te nünaa, oia hoì te vaiihoraa i te nünaa i nià i te mea e viivii ai te mau hinaaro o te Atua. Ia taiò tätou, e ia faaroo tätou i te haapotoraa no na taiòraa maha i faataahia no teie mahana teie ia,

 

-Taramo 40, 9 E mea au na ù te rave i to òe hinaaro, e ta ù Atua; te vai nei hoì ta òe ture tei roto i to ù nei âau.

-1 Tämuera 3, 18 Ua faaìte atu ra Tämuera ia na i te mau parau atoà ra, aore roa e parau i hunahia. Ua nä ô mai ra o ia, O te Fatu ia, e rave o ia i tei au ia na iho ra.

-1 Torinetia 6, 20 Ua täuihia hoì òutou i te täui, e teie nei, e haamaitaì i te Atua, i to òutou tino, e i to òutou värua, no te Atua ia.

-Ioane 1, 42 E ua arataì mai ra o ia ia na ia Ietu ra. E ia hiò aè ra Ietu ia na ra, nä ô atu ra: O Timona òe, te tamaiti a Iona, e maìrihia òe ia Tefa oia hoì Pëtero.

 

Tauturu.

E parauhia teie mau ìrava, e mau ìrava ìte Parau Atua, i te mea te parau o te Atua teie e faarähihia nei ia iho faahou mai te parau o te taata tävini Atua, tei here e tei aroha i te nünaa o te Atua ta te fenua e faaìte noa ra ia na, ia ìte te tävini te here o te fenua, te aroha o te fenua, o te Atua ia, te Atua Nui Tumu Tahi, naò ia teie manaò i te parauraa e, te tävini o te Atua èita te hohoà noa o te Atua tei nià ia na, te hopoià atoà ra, mai teie ta Ietu e parau nei, O Timona òe, te tamaiti a Iona, e maìrihia òe ia Tefa oia hoì Pëtero. Teie reo e haapäpüraa na Ietu i to na tiàturiraa i te taata, e te ìteraa i te rähu a to na Metua ma te parau i nià i te taata e, e Ôfaì òe. Te maìrihia nei o Timona i te hoê parau, e aore ra te hoê iòa tei faatäui roa ia na i to na metua ia Iona. Teie o Ietu e parau nei i te taata i te ôfaì, te ìte nei ia te taata ia Ietu maite puaa ra te huru, A hiò na i te Ârënio a te Atua. Na roto i na täpaò e piti o te fenua ua färerei te Atua i te taata, ua tupu te tahi täuiraa manaò, te ìteraa te taata i roto ia Ietu i te maru, te haèhaa, te faatura, e i te haapaòraa i te here fenua, i te pae o Ietu te ìteraa i roto i te taata, te ètaèta, te faateitei, te teòteò, te haavare, te täviri, te huna, i parau ai o Ietu e ôfaì òe. Te haapäpü noa ra o Ietu i te manaò no te mau taata e pee ra ia na e to rätou huru, e hinaaro mau anei ra teie i te peeraa i te mau faanahoraa i te haapaòraa i te mau hopoià ia au te mau faaueraa a te Atua, e i ta te fenua. To Ietu parauraa i te taata i te Ôfaì, i mua na pipi a Ioane, ia Àneterea, ia Timona, èi faaìteraa i teie mau taata i to rätou huru, e te huru o te mau taata atoà tei òre i ìte i te aroha Metua, e tei òre i ìte i to rätou ätearaa i te mau faaueraa a te Atua Nui Tumu Tahi. Te hinaaro nei o Ietu e parau i teie mau pipi a tätaì ia òutou aita te Atua i hämani i te taata i te ôfaì, i te repo fenua ra ta na i ìpopo i to na rima, èita e ö ia haapüaì te Atua i to na aho i roto i te ôfaì i roto ra i fenua, to na hohoà tei nià i te fenua, èita tei nià i te ôfaì. Teie huru parauraa ta Ietu i te taata e ôfaì te faaära o Ietu na òutou iho o òutou e tätaì, ma te täuturuhia e ta ù mau haapiiraa. Te faaineineraa a Ietu i ta na mau pipi mätamua a Haere mai a hiò, a haere mai a Faaroo teie noa te parau, e hiò i te aru to na faufaa e ta na poroìraa ia parau te Paùmotu e Hiò te Vaitià, to na auraa aita te ôpape e tiàfaahouraa i te taiòraa, e mea hora ua faahoì, e mea hora ua tomo, no te faaâpï te roto te vai ra ihoä te mau haaviiviiraa a te taata, e te mau faatäuiraa i te mau tereraa o te ôpape, e matie-roa-hia ai te roto no te mea àita e täno faahou ra te òhuraa ôpape no te faaâpï te roto, no te mea ua heruhia te aruaru.

E ia parau hoì Vaitä mai teie te huru, te Ìte nei au, i mua ia ù nei te auraa o teie nei mau peu maere rahi. Tenä mai te fänau ùnaùna a te Tumu, e haere mai e hiò i teie uru räau i Taputapuätea nei. E tino ê to rätou, e tino ê to tätou, hoê anaè ra huru, no te Tumu mai. E riro teie nei fenua ia rätou, e mou teie haapaòraa tahito nei, e e tae mai hoì te mau manu moà o te moana i te fenua nei, e haere mai e taìhaa i ta teie räau i motu e haapii nei (Teuira HENRY, Tahiti i te pö, àpi 16).

Ia au i na parau e piti nei ua moèhia i te taata i te Haapiiraa a te aru e ta te reo e faaòto ra, ia parauhia te Vaitià àita te roto e faaâpï faahou ra ia na, e teie reo, e haere mai e taìhaa i ta teie räau i motu e haapii nei. Na te reo noa e tatara i te auraa o te taò, e ia faaroo hoì tätou i teie reo o Ietu, O Timona òe, te tamaiti a Iona, e maìrihia òe ia Tefa oia hoì ia Pëtero.

Te haapiiraa i roto i teie reo te taò ia e maìrihia òe, e taò teie no te haapäpüraa i te tumu òhipa e hinaarohia ra e faatupu ia au i te iòa, e ia au i te òhipa. E parau-atoà-hia, e topahia òe, e parau hoê teie e te manaò hoê to na tupuraa. Teie maìriraa iòa a Ietu no te faatura ia i te òhipa ta to na Metua i rave i nià i te taata, e fenua te taata, te hohoà ia te reira no te Atua, te huru o te fenua te huru ia o te Atua, te aho o te fenua, te aho ia o te Atua. Teie huru tupuraa òhipa te faahaamanaò mai nei ia tätou te mau tävini, i te tumu ta tätou i faataa i riro ai tätou èi àuaha parau no te ôpuaraa faaora i te hinaaro o te Atua Nui Tumu Tahi, ia ora o  Mäòhi Nui.

Te horoà nei o Ietu ia tätou te tahi türamaraa âpï, na roto i te maìriraa iòa ia tupu i roto i te ao ta tätou e ora nei te hoê täuiraa i te hiòraa i te aru a te Atua Nui Tumu Tahi, i te mea èita o ia e haavare e tautururaa o ia i te taata no te faatupuraa i te mau faaueraa ia tupu te maitaì e te hau. Ia parau tätou Mäòhi Nui e ao teie no te nünaa Mäòhi, e te mau taata atoà i roto ia na no rätou atoà teie ao, e ao mure òre. I te mea na te mahana e faaìteraa i te nehenehe o teie ao, èi mahana e parauhia to te ao. Te ao ra te märamarama ia te ora ia te reira no te taata, ia parau o Ietu ia tätou e ôfaì òe, o òe te tahi papa no te faatià i to òe nünaa, i te piiraa a te fenua, ia ôfaì to òe âau faaitoito i te vävähi, ia àma faahou te mahana o te Aroha e te here.

Teie te tahi reo no Pauro, -1 Torinetia 6, 20 Ua täuihia hoì òutou i te täui, e teie nei, e haamaitaì i te Atua, i to òutou tino, e i to òutou värua, no te Atua ia.

 

Ia ora na.

 

Teraì òr. Faatura.