Ioane 2.1-12. Here i te Fenua.

 

Tāpati 16 no Tënuare 2022.

Here i te Fenua.

Taramo 96

(Hiò Taramo 105; 106; 1 Parareipomeno 16.23-33)

1 E himene i te Fatu i te himene âpï, e himene i te Fatu, e te mau fenua atoà nei.

2 E himene i te Fatu, e haamaitaì i to na iòa, e faaìte i te ora na na eiaha ei mahana tuua.

3 E faaìte i to na hanahana i roto i te mau êtene, e ta na ra mau òhipa taa ê i roto i te taata atoà ra.

4 E rahi hoì te Fatu, e ia rahi hoì te haamaitaì ia na e ia rahi hoì to na mataù-raa-hia i te mau atua atoà ra.

5 Te mau atua atoà o te mau êtene, îtoro faufaa òre ia, âreà o te Fatu na na i hämani i te mau raì ra.

6 Te tura e te mana tei mua i ta na aro.

Te püai e te nehenehe tei to na ra ia vähi moà.

7 Hö atu i te Fatu, e te mau fëtii o te taata atoà nei, hö atu i te Fatu i te hanahana e te püai.

8 Hö atu i te Fatu i te hanahana e au i to na ra iòa, ei ö te hopoi mai ia tomo i to na ra mau hëtere.

9 E haamori i te Fatu mä te tura moà ra, ia rürütaina òutou ia na, e te fenua atoà ra.

10 A parau na i rotopü i te mau nünaa e: «O te Fatu te arii, e haamauhia te fenua e òre roa e âueue.

Te haavä nei hoì o ia i te mau taata mä te parau tià.»

11 Ia reàreà te mau raì ra, e ia òaòa te fenua, ia haruru te tai e to na îraa atoà ra.

12 Ia ôuàuà te mau ô e to roto atoà ra. E ia himene hua mai te mau räau o te vähi ururäau ra

13 i te aro o te Fatu, te haere mai ra hoì o ia, te haere mai ra o ia e haavä i te fenua. E haavä o ia i te ao nei mä te parau tià, e te mau taata atoà ra mä te parau mau.

Ìtaia 62.1-5

To te perofeta hinaaro rahi ia tupu te ètärëtia.

1 No Tiona nei i òre ai au e mämü noa ai; e no Ierutarëma nei i òre ai au e pärahi noa ai; e ia püroro atu ta na parau tià mai te märamarama rahi; e te ora nä na, mai te rama e ura ra.

2 E ìte te mau fenua i te parau tià na òe ra; e te mau arii atoà i to òe ra hanahana: e maìrihia òe i te tahi iòa âpï, na te vaha o te Fatu e maìri i nià ia òe ra.

3 E riro hoì òe ei toröna ùnaùna i te rima o te Fatu; ei hei arii i te rima o to Atua ra.

4 E òre òe e parau-faahou-hia atu, E tei faaruèhia e, e òre hoì to fenua e parau-faahou-hia, E tei ano e, e parauhia rä òe e, E te mea hinaarohia e au e, e to fenua, Te fenua faaïpoïpohia: nä te Fatu hoì e au atu ia òe, e e faaïpoïpohia to fenua.

5 Mai te taata âpï e faaipoipo i te päretënia nei, e faaipoipo atoà to tamarii tamäroa ra ia òe; e mai te täne âpï e òaòa i ta na vahine; e òaòa atoà to Atua ra ia òe.

1 Tōrīnetia 12.4-11

4 E rave rahi te huru o te mau mea i horoàhia, hoê rä Värua.

5 E rave rahi ä hoì te töroà, hoê rä Fatu.

6 E rave rahi ä hoì te òhipa, hoê rä Atua e òhipa i te mau mea atoà i roto i te taata atoà.

7 Ua horoàhia ta te Värua faaìte i te taata atoà, ia maitaì päatoà.

8 I horoàhia mai te parau paari e te Värua, i te hoê ra; e i horoàhia mai e taua Värua ra te parau e noaa ai te ìte, i te hoê.

9 Ta te tahi ra, o te faaroo ia, na taua Värua ra; ta te tahi ra, o te ìte ia i te faaora maì na taua Värua ra.

10 Ta te tahi ra, o te rave täpaò ia; ta te tahi ra, o te tohu ia; ta te tahi ra, o te ìte värua ia; ta te tahi ra, o te parau èê ia; ta te tahi ra, o te faaìte parau èê ia.

11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

Ioane 2.1-12.

Te pape i faarirohia ei uaina

1 E ruì toru aè ra, e faaipoiporaa tei Tana i Tarirea ra, i reira atoà te metua vahine o Ietu.

2 E parauhia mai ra Ietu e ta na mau pipi atoà e haere i taua faaipoiporaa ra.

3 E pau aè ra te uaina, ua parau mai ra te metua vahine o Ietu ia na iho: «Aita a rätou uaina.

4 Ua parau atu ra Ietu ia na: «E aha ta òe ia ù nei, e teie nei vahine? Aore ä i tae i to ù ra hora.

5 Ua parau atu ra ta na metua vahine i te mau tävini: «Ta na e faaue mai ia òutou na, e nä reira òutou.

6 Te vai ra nä hue pape ôfaì e ono, e piti pato e ö i te hue hoê, e e toru hoì, i vaiihohia i reira no te peu o te tämäraa a te âti-Iüta.

7 Ua parau atu ra Ietu ia rätou: «A faaî na i te mau hue i te pape. Ua faaî iho ra rätou, e tae roa aè ra i te àuvaha.

8 Ua parau atu ra o ia ia rätou: «A faatahe na, e hopoi atu i te tävana o te ôroà nei ra. Ua hopoi atu ra hoì rätou.

9 E ia tämata iho ra te tävana o te ôroà i taua pape i faarirohia ei uaina ra, no te mea aore o ia i ìte i te noaaraa mai (âreà te mau tävini i faatahe mai i taua pape ra, ua ìte ia), ua parau atu ra te tävana i taua täne âpï ra,

10 nä ô atu ra: «O te uaina maitaì ta te taata atoà e tuu mai i te mätamua ra, e ia inu te taata e ia rahi, ei reira te mea ìno aè, vaiiho iho nei rä òe i te uaina maitaì, e i teie nei i hopoihia mai ai.

11 I Tana i Tarirea i te raveraa Ietu i teie nei täpaò mätamua, i te faaìteraa i to na hanahana, e ua faaroo aè ra ta na mau pipi ia na.

12 E i muri aè i te reira, haere atu ra o ia i Taperenaumi, o ia, e ta na metua vahine, e ta na vaitaeaè, e ta na mau pipi. Aita reà rä o rätou puè mahana i reira.

Manaò.

Ia ora na i to tätou färereiraa na roto i te mau parau no teie mau taiòraa i haapaòhia no tätou i teie mahana, te faaìte noa mai ra te reira i te faufaa no te puai o te mau taata faaroo i te tau e te hora i päpaìhia ai teie mau parau no te tuatua o teie nünaa. Tei tiàturi i te ärataìraa a te Atua Nui Tumu Tahi, ma te pärahi faataata noa i pïhaì i te mau faaueraa ta te värua o te fenua e haafänaò-noa ra ia noaa te ora ma te himene i te Fatu i te mau himene âpï, e ia himene te mau fenua ma te faaìte i te ora eiaha e mahana tuua. Ia ìtehia te hanahana i roto i te mau nünaa atoà, e ta na ra mau òhipa taa ê i roto i te mau taata atoà ta te värua o te fenua e aupuru noa ra. E ìtehia te hanahana o te Atua nui Tumu Tahi i roto i te mau atua atoà ra o te mau nünaa, i te mau îtoro faufaa òre, âreà o te Atua Nui Tumu Tahi na na i hämani i te mau raì e te mau tiàrama, te tane e te vahine. Te tura e te mana tei mua i ta na aro te püai ia te reira e te nehenehe tei to na ra ia vähi moà. Te Atua Nui Tumu Tahi te mau fëtii o te taata atoà nei, to na  hanahana e te püai, e au i to na ra iòa, ei ö te hopoi mai ia tomo i to na ra mau fare. E haamori i te Atua Nui Tumu Tahi mä te tura moà ra, ia rürütaina te mau nünaa ia na, e te fenua atoà ra. Te huru ia no teie mau parau e färereihia nei e tätou, teie atu ra te tahi mau parau e tià ia faatumuhia :

-Taramo 96, 10 A parau na i rotopü i te mau nünaa e: «O te Fatu te arii, e haamauhia te fenua e òre roa e âueue.

-Ìtaia 62, 4 E òre òe e parau-faahou-hia atu, E tei faaruèhia e, e òre hoì to fenua e parau-faahou-hia, E tei ano e, e parauhia rä òe e, E te mea hinaarohia e au e, e to fenua, Te fenua faaïpoïpohia: nä te Fatu hoì e au atu ia òe, e e faaïpoïpohia to fenua.

-1 Tōrīnetia 12, 11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

-Ioane 2, 4 Ua parau atu ra Ietu ia na: «E aha ta òe ia ù nei, e teie nei vahine? Aore ä i tae i to ù ra hora.

Te parau tumu e tià ia àparauhia teie ia, Faaïpoïpohia i te fenua, parau tumu i roto i teie taò e ïpo, e here to na auraa, ïpoïpo, e piti tau taata teie tei täamu i to raua here, oia atoà te tamarii i roto i te ôpu o te metua vahine te taura pito e höroà ra i te ora i roto i te àiü, i te taime e täpuhia ai teie taura e tänuhia te pü fenua i roto i te fenua no te faaìte i te here o te fenua.

E here te Atua ; ua hämani te Atua i te taata i to na huru e to na hohoà. Te tanoraa mau, ua tuu te Atua i teie taura ta tätou e parau nei e, here, i roto i te taata, e te täamu ra hoì te reira taura i te taata te tahi i te tahi, e te taata hoì i te Atua. No reira, ia ani te Atua i te taata ia here i te täuaro, te hinaaro ra o ia ia faaìte te taata e, te vai maitaì noa ra te reira taura, e taura ora, e e haru te fifi o te taata i nià i to na âau, oia hoì e faahaùti teie taura i te âau o te taata, aore ra e faaea maröia no o ia. Mai te mau mea ora atoà rä, e tuhaa na te taata te äraraa i to na tupu-maitaì-raa, te pärururaa, te àtuàturaa, te faaàmuraa ia na i te mäa. E ia ui hoì tätou e, e aha ia ta na mäa. Pähonoraa : te here iho. No reira to tätou mau metua i tuö ai i te taata i nä mua iho i to rätou fare ia haere mai e tämäa, no te mea eere te mea maitaì ia vai iho noa i te taata mai te òre e haapaòhia atu. E ta rätou hoì i rave, no te mea ua ìte rätou e, te faufaa te reira ta te Atua i horoà na rätou, no te haapii ia i te tamarii nä hea ia àtuàtu, nä hea ia poihere, nä hea teie faufaa e vai oraora noa ai i roto i te âau o te taata. Mai te tahi auahi të hinaaro ia tämaumau-noa-hia, ia tähirihia, ia tuu-noa-hia te vahie âpï, e ia ìritihia mai te rehu, oia atoà te here. Ia rahi te rehu o te täuà òre, te nounou, e te haapaò noa ia na anaè, e òiòi roa teie auahi i te pohe. E piti parau ta te Mäòhi no te taata tei marö, aore ra tei pohe teie taura i roto ia na : maröia, e te rahutarià. I roto i te maröia te vai ra teie parau no te marö tei haamanaò mai e, aita e ora faahou to roto i teie taura, mai te more marö ra te huru i te ètaèta. No te türama i te manaò e horoàhia ra e te rahutarià, e rave mai tätou nä mua i te tahi taò ê atu. Te hereraa i te fenua. Tahi atoà teie ùputa no te here, oia te èà e tae ai te taata i roto i te ìteraa i to na täamuraa i nià i te Atua. I te ômuaraa ihoä o te parau o te taata, te haamata-atoà-raa te parau o te fenua. Tei roto ihoä ia te tamarii i te ôpü o to na metua vahine, te vähi noa rä i räpae atu nei, oia

te püòhu, te vähi ìtehia e te mata, âreà te tamarii, tei roto ia i te tahi vähi moè e te ìte-òre-hia e te mata taata, i roto roa i te pü o te fenua, ta tätou e haapoto noa nei i te parauraa e, te püfenua. Te tumu ia te päpaì taramo i ârue ai i te Atua no te maitaì hau ê o ta na òhipa i rave : 10 A parau na i rotopü i te mau nünaa e: «O te Fatu te arii, e haamauhia te fenua e òre roa e âueue. No te mea te Atua iho o te here teie e òhipa nei i roto i te taata, e òre ai e tià i te taata, te metua vahine ihoä rä, ia òre ia faatura i te òhipa a te Atua, i te faariroraa i to na ôpü ei mataìtaìraa na te taata atoà. Eere te here i te tahi mea e tuuhia i mua i te mata o te taata atoà, mai te àhu e tauaìhia i te vähi haereraa taata, riro noa ai ei àhu mä, te vai ra rä i roto i te here mau te hunahuna e te haamoèmoè ia na iho. E hinaaro änei teie mau metua vahine ia riro atu ta rätou mau tamarii a muri aè mai te taiàta ra te huru i te òreraa e haamä i te faaìteìte i to rätou tino i mua i te mata o te taata atoà, ia faahinaarohia mai rätou e ia riro atu ei haamäharaa i to rätou mau hinaaro. I ô-nei-raa te metua vahine ua haamata i te faaìte i to na here i ta na tama nä roto i te pärururaa i to na ôpü i te mata e te vaha o te taata. I to na nä-reira-raa, te faaìte atoà ra o ia i to na here i te Atua e òhipa ra i roto ia na. Te faatura òre o te metua vahine i to na ôpü, to na atoà ia faatura òre i ta na tamarii, e to na hoì faatura òre i te Atua. E tupu mai änei te here no roto i te faatura òre, inaha te faatura, te here ia, te faaroo, e te haapaò. Ia maìri te tahi o teie nä mea nei, e topa te toeà. I parau ai te Mäòhi i te fenua e, to na ia metua vahine, eere te tahi noa hohoà ta na e faaòhipa ra, te tahi huru hämaniraa parau e faarooroohia i roto i te feiä paari, no te mea rä, te ìte mau ra o ia i roto i te fenua, i to na metua vahine, oia te tumu o to na parau. No te hui taata o teie mahana, e huru parauraa noa paha teie ta rätou e òre e haapeàpeà rahi roa nei i te manaò i te ìmiraa i te auraa mau, no te mau metua rä na rätou teie parau i faaherehere mai, mai ia tätou e parau nei e, e ùru ra, e ùru ia, mai te reira atoà no rätou teie parau mau no te fenua ei metua vahine. Ia fänau mai teie tamarii, te faahoìhia nei to na püfenua i roto i te pü o te fenua, e te pito i täamu na ia na i to na metua vahine, ua tänuhia i roto i te fenua, aore ra ua âfaìhia i roto i te ava, aore ra i tua, òroihia i roto i te tahi àpu päòa, tuuhia atu ai i roto i te miti, ei haamanaòraa e, no roto atoà mai te tamarii i te vai i te püraa mai i roto i te ora. Te auraa, ua püpühia te tamarii i roto i te here metua o te fenua, e no te mea te ora ta te fenua e horoà noa nei, te täpaò ia no te aroha e te here o te Atua i te taata, te riro ra teie püpüraa i te tamarii i roto i te rima o te fenua, mai te tahi atoà püpüraa i te tamarii i roto i te here metua o te Atua, te Tumu o to na ora. Ia faaroo tätou i teie reo no Ietu, 4 Ua parau atu ra Ietu ia na: «E aha ta òe ia ù nei, e teie nei vahine? Aore ä i tae i to ù ra hora. No te haapäpü ia e ua tupu te hinaaro o te Metua i te ao nei i te parau no te here, te hora e parauhia nei e Ietu, e taime ia e ìtehia ai te hanahana Metua i te mau vahi atoà ia òre ia maröia te taura o te here. O vai teie na tamarii i täatihia, o vai te Fatu o te ôroà, te mea päpü i roto i teie parau, te metua vahine, te mau pipi, te vaitaeaè, O Ietu na Ietu i faatupu te hanahana o te Metua i te faaueraa a te metua vahine, ia tupu te here fenua.

 

Teraì òr. Faatura.  

Ruta èv. 3.15-22. Ùputa.

 

Tāpati 9 no Tënuare 2022.

Ùputa.

Taramo 104

Hämanihia

1 E haamaitaì i te Fatu, e ta ù värua, E ta ù Atua, e te Fatu, òe tei rahi roa Ua vehihia òe i te hanahana e te mana,

2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru;

3 i te vauvauraa i to na ra mau piha i te pape  E te raveraa i te mau ata ei pereoo no na,  i te hahaereraa nä nià i te pererau ra o te mataì,

4 i te faariroraa i te mau merahi no na mai te mataì ra, e te mau tävini no na mai te auahi ura ra.

5 Na òe i haamau i te tumu o te fenua, ia òre roa ia âueue.

6 Ua täpoì hoì òe ia na i te àputo, mai te àhu ra, te teitei ra te pape i te mau mouà.

7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere.

8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra.

9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua.

10 Ua tuu mai o ia i te pape pihaa ei vai matätia, o tei tahe haere nä roto i te ärea o te mau mouà ra:

11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai.

12 I pïhaì iho te mau manu o te reva i te pärahiraa o tei òto i roto i te mau âmaa rii.

13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

14 Te faatupu nei o ia i te àihere na te mau puaa, e te räau rii na te taata. E te roaa nei te mäa ia na no roto i te fenua:

15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

16 Te mau räau a te Fatu ra, ua paari ia, te mau âreti i Repanona ra, ta na i tanu ra,

17 e tei ôfaahia e te mau manu ra. Te mau peruti ra to te hetite ra ùtuafare.

18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana.

19 Ua hämani o ia i te märama no te mau tau i haapaòhia ra, ua ìte hoì te mahana i to na maìriraa.

20 Na òe i hopoi mai i te pöuri, e ua ruì iho ra, ei reira te mau taehae o te ururäau ra e haere ai,

21 te mau riona âpï i te ûâ-haere-raa i te mäa, i te ìmiraa i te mäa i te Atua ra.

22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo.

23 Ua haere iho ra te taata i te òhipa na na, ta na i rave ra, e ahiahi atu.

24 Aita te huru rau o ta òe ra òhipa, e te Fatu. E mau räveà paari anaè ä ta òe. Ua î te fenua nei i ta òe ra taoà.

25 E tënä na hoì miti rahi e te âano, tei reira te mau mea e nee haere, eita e hope ia taiò: te mau mea rii ra e te mea rarahi atoà ra.

26 Tei reira te mau pahï i te tere-haere-raa;  tei reira te Reviatana ta òe i hämani i te haùti haereà.

27 Te tiaì anaè ra te reira ia òe ra, ia noaa ta rätou mäa i te taime mau ra.

28 O ta òe i horoà ra, o ta rätou ia i rave;  ua heheu òe i to rima ra, ua îî anaè ia rätou i te maitaì.

29 Ua püroù òe i to mata ra, e àti ia to rätou. Ua rave mai òe i to rätou aho, ua pohe ia rätou, e ua hoì faahou i to rätou ra repo.

30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

31 E vai ä te hanahana o te Fatu e a muri noa atu.

Te òaòa nei te Fatu i ta na iho ra òhipa.

32 Ua hiò anaè o ia i te fenua, ua rürü ia; ua faatiàià anaè o ia i te mau mouà ra, ua pee te auahi i nià.

33 Te ora nei au ra, e himene ä vau i te Fatu; te vai nei au ra, e himene au ei haamaitaì i ta ù Atua.

34 E mauruüru ä to ù manaòraa ia na; e òaòa hoì au i te Fatu.

35 Te feiä rave hara ra, e mou ia i te fenua nei; e te feiä parau ìno ra, e òre roa ia.

E haamaitaì i te Fatu, e ta ù värua e. Hareruia.

Ìtaia 40.1-11

Ùnaùna

Te èvaneria i haapiihia e Ioane päpetito ra.

1 E haamähanahana òutou, e haamähanahana i to ù ra mau taata, të nä reira mai ra to òutou Atua.

2 E faaitoito atu òutou ia Ierutarëma, e parau hua atu òutou ia na, ua hope to na tau maì; e ua färiihia te täraèhara i ta na hara; ua noaa hoì ia na i te rima o te Fatu te pohe au rahi roa i ta na ra mau hara.

3 Te pii mai ra te hoê reo i te mëtëpara; a faanehenehe na i te èà o te Fatu, e e faatïtïàifaro na i te fenua marô i te haereà o to òutou Atua.

4 E faaîihia te mau peho, e faahaèhaahia te mouà e te mau âivi; faatïtïàifarohia te piò, e te mau vähi puupuu ra, e faarirohia ia ei vähi päpü;

5 e faaìtehia mai te hanahana o te Fatu, e ìte paatoà te taata i te ora a te Atua: o te vaha hoì o te Fatu tei parau mai.

6 Te nä ô mai ra te hoê reo, A faaìte. Ua parau atu ra vau, E aha tä ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei:

7 te mäehe noa nei te àihere, te mäheahea nei te tiare, ia farara mai te mataì no i te Fatu i nià iho ra: e àihere mau ä te taata nei.

8 Te mäehe nei te àihere, te mäheahea nei te tiare; âreà te parau a to tätou Atua, e tià ia i te vai-mäite-raa.

9 A paiùma i nià i te mouà teitei, e tei hopoi mai i te parau maitaì i Tiona nei; a faateitei na i to reo mä te ûàna, o te hopoi mai i te parau maitaì i Ierutarëma nei. A faateitei na; eiaha e mataù; a parau atu i te mau ôire o Iüta, A hiò na i to òutou Atua.

10 Inaha, te haere mai ra te Fatu ra o te Fatu mä te püai, e nä tö na iho rima e faatupu i tä na. Inaha, tei ia na iho te utuà tä na e hopoi, e te hoo tä na e höroà ra, tei mua ia i ta na aro.

11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.  

Tito 2.11-14

Tämä

11 O te aroha mau o te Atua e ora ai te taata atoà ra, ua ìteä mai nei ia,

12 i te faaìteraa mai ia tätou e, e haapae tätou i te paieti òre, e te hinaaro i teie nei ao, e ia pärahi tätou mä te haapaò maitaì, e te parau tià, e te paieti, i teie nei ao;

13 i te hiòraa atu i taua maitaì e tiaìhia nei, oia te färaa hanahana mai o te Atua rahi ra o to tätou Ora o Ietu Metia,

14 o tei horoà ia na iho no tätou, ia ora tätou ia na i te mau parau ìno atoà ra, ia tämä o ia ia tätou ei taata mau no na iho, e te itoito i te mau òhipa maitataì ra.

3.4-7.

4 Ia ìteä mai nei rä te hämani maitaì e te aroha o to tätou Ora o te Atua i te taata nei;

5 ua faaora o ia ia tätou, eiaha no te parau tià i ravehia e tätou nei, no to na ra aroha, i te fänauraa âpï, e te faahouraa a te Värua Maitaì ra;

6 o ta na i ninii hua mai i nià ia tätou no to tätou Ora no Ietu Metia ra;

7 ia riro tätou i tiàhia nei e to na ra aroha mau, ei feiä tufaa i tei tiaìhia ra, i te ora mure òre.

Ruta èv. 3.15-22.

Mauruüru

15 Te fatimaùu noa ra te taata atoà ia Ioane, te feruri anaè ra te taata i roto i to rätou âau, e e riro paha o ia i te Metia.

16 Ua parau atu ra Ioane ia rätou atoà, nä ô atu ra: «Te päpetito nei ä hoì au ia òutou i te pape, te haere mai na rä te tahi e mana rahi to na i to ù, e òre ia vau e au ia tätara i te täpeà i ta na tämaa: na na e päpetito ia òutou i te Värua Maitaì e te auahi.

17 Tei to na rima ta na tähiri, e tämä mäite o ia i ta na papaìraa tïtona, e haaputu o ia i te tïtona i roto i ta na vairaa tïtona, âreà te ota e tütuì o ia i te reira i te auahi pohe òre.

18 E e rave rahi ä ta na aòraa atu, i te faaìteraa atu i te taata i te Parau Maitaì.

19 Âreà te teterareha ra o Herota, no te mea i aòhia o ia e ana ia Herotia i te vahine a ta na taeaè a Firipa, e te hara atoà i ravehia e Herota ra,

20 âmui atoà atu ra i teie, ôpani atu ra ia Ioane i roto i te fare täpeàraa.

Te päpetitoraa o Ietu

(Mät 3,13-17; Mär 1,9-11)

21 E ia Ioane i päpetito i te mau taata atoà, i päpetito-atoà-hia Ietu, e te pure ra o ia, vëtea aè ra te raì,

22 e ua pou mai ra te Värua Maitaì i nià ia na, mai te ûupa te huru, e te hoê reo mai ra no te raì, i te nä-ô-raa mai: «Ta ù Tamaiti here òe, ua mauruüru roa vau ia òe.

Manaò.

Teie te tahi parau ta te mau taata ravaì e parau no te vaa hou e fäno ai, te naò nei teie reo « ia paari te hiàto i te täamu ia òre ia fati ia ü i te vero i tua » te hiàto te fana ia e täpeà ra i te ama muri o te vaa, no te tauturu i te peperuraa i te vaa i roto i te vero.

Ua tomo tätou i roto i teie mätahiti tivira to na faanahoraa tei roto ia i te huru ta tätou mau faanahoraa, e rave rahi mau töhuraa, mau tärena òhipa, e ua tae roa te tahi pae i te haapäpüraa te mau òhipa e tupu. Te mea rä e faufaahia ai to tätou fenua ia Mäòhi Nui te vai rupehu noa ra ia i te faahitiraa, e ìnaha e mätahiti 2022, e tano ia tohu e, e faaitoito i te tänu e 2022 tumu ùru, tumu haari, tumu vï, tumu täporo, e te vai atu ra. Mai te mea rahi roa hoê aè ia i te âvaè e maitaì tatou, ia maitaì ta tätou tänuraa i te fenua e matara ai te ùputa o te raì e aore e vetea i reira e faaroohia ai te reo o te Atua Nui Tahi i te parauraa e «Ta ù Tamaiti here òe, ua mauruüru roa vau ia òe » Na te parau Atua e faaàhu i te märama ia tupu te märamarama o te mau tiàrama i höhorahia ai i te mau raì tuatinitini mai te päruru; i te vauvauraa i te mau ànavai ta te mau ata o te reva e faahau maru i te fenua ia maitaì te aru o te fare Metua, tei puhihia e te mau âpoo mataì, i haamauhia ai te tumu o te fenua, ia òre roa te Mäòhi ia âueue.

A rahu ai te Atua i te raì e te fenua, te haapäpü ra te päpaì Tënete e, te vai ano noa ra te fenua, aore e faufaa, e te pöuri hoì i nià i te ìriatai. Teie rä hohoà to te fenua ta te päpaì Tënete e faaìte mai nei, te huru ia o te fenua i muri aè i to te Atua veheraa i te vai èi tupuraa aè to te raì e te fenua. Te auraa, aita to te raì e te fenua e parau i räpae aè i te Atua na na te Parau i pü mai ai räua, oia hoì hoê ä tumu to räua. Te nä ô ra te Atua : Ia puè ê te moana i raro aè i te raì i te vähi ôtahi, ia ìteä te repo marö. No reira, eiaha ia moèhia ia tätou e, te raì, mai te fenua atoà, e tupuraa ia no te hinaaro o te Atua. Haamanaò atu ai tätou i te reo o te Fatu e parau ra e : I parau atu na vau ia òutou i te parau o te fenua, e aore òutou i faaroo, e aha òutou e faaroo ai ia parau atu vau ia òutou i te parau o te raì (Ioane 3, 12). 

Te faaìteraa atoà ia o na taiòraa e maha no teie mahana, teie te haapotoraa o te taiòraa :

-Taramo 104, 30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

-Ìtaia 40, 6 Te nä ô mai ra te hoê reo, A faaìte. Ua parau atu ra vau, E aha ta ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei:

-Tito 2, 14 o tei horoà ia na iho no tätou, ia ora tätou ia na i te mau parau ìno atoà ra, ia tämä o ia ia tätou ei taata mau no na iho, e te itoito i te mau òhipa maitataì ra.

-Ruta èv. 3, 22 e ua pou mai ra te Värua Maitaì i nià ia na, mai te ûupa te huru, e te hoê reo mai ra no te raì, i te nä-ô-raa mai: «Ta ù Tamaiti here òe, ua mauruüru roa vau ia òe.

Te faaìte noa mai ra teie mau parau ia tätou e, tätou e haafaufaa òre nei i te fenua, te Atua iho ta tätou i haafaufaa òre. Ua ìte te raì i te Atua, to na ia pärahiraa ; ua ìte te fenua i te Atua, te taahiraa âvae ia o te Atua, e te hinaaro hoì o te Atua, ia riro ia te raì, mai te fenua atoà, ei vähi tupuraa no to na hanahana, ei vähi e âruehia ai to na iòa moà.

I roto i te pure ta te Fatu i haapii i ta na mau pipi, te nä ô ra Ietu : Ia haapaòhia to òe hinaaro i te fenua nei, mai tei te raì atoà na. Mai te peu aita te Fatu i mäìti i roto i te raì e te fenua, aita hoì i haafaufaa i te tahi no te haafaufaa òre i te tahi, e aha e tià ai ia tätou ia haameremere i te fenua mai te manaò e, aita atu e mea faufaa ia tïtauhia maoti rä, te raì. Ia hiò tätou i te pure a te Fatu, te vähi tätou i tiaìhia mai ai, eere i nià i te raì, i nià rä i te fenua, i te vähi tätou i pü mai ai i te ao nei, i nià i te fenua tei hii ia tätou, i roto hoì i te nünaa tei haìhaì mai ia tätou.

Ia hiòhia te parau mai teie ta tätou e hiò nei, oia hoì, te fenua, te ùputa o te raì, e ui ihoä te manaò i te vähi tei reira teie ùputa e parauhia nei, te vai mau ra änei. Te uiraa rä të òre roa atu e maìri, te puta ia tei reira teie parau i te päpaìraahia. O tätou te tahi feiä püai roa i te tïtau i te parau i päpaìhia, ia au ihoä i te manaò e : tei päpaìhia ra, ua päpaìhia ia, oia hoì e parau mau te reira. Te auraa, tei òre i päpaìhia ra, e tute-ê-hia mai ia no te mea aita e mea e paèpaè ra i to na na parau. Ia ìte atoà rä hoì tätou e, mai te peu te vai ra ihoä te mea i päpaìhia, te vai atoà ra te auraa o te mea i päpaìhia ; eere atoà rä no te mea ua päpaìhia, i òhie ai tätou i te färii i te reira. Aita e moèhia ra ia tätou te òhipa i tupu i te tahi mahana i roto ia Ietu e te Haapii ture tei ani atu ia na i te mea e ö ai o ia i roto i te pätireia o te Atua (Ruta 10, 25-37). Te parau ta Ietu i faatià atu i teie taata, aita ia hoê aè vähi i päpaìhia ai, e inaha, ua märamarama teie taata e, ia faatupu o ia i te parau o te aroha, e matara ia na te ùputa o te pätireia. Ahiri, e faahapa änei tätou ia Ietu i te òreraa e rave i te parau i päpaìhia no te haamäramarama i teie taata i te auraa o te mea i päpaìhia. Ua ìte tätou e, e mea pinepine roa Ietu i te faaòhipa i te reira räveà, e e òhipa tumu te reira i roto i te feiä haapii, te raveraa i te tahi mau hiòraa tei òre i päpaìhia, ei räveà e märamarama ai te taata i te mea i päpaìhia. Te faufaa o te hoê puta, eere no te mea te vai ra, no te mea rä ua riro ei vähi haerehia e te taata, ei vähi rä tei ìriti ia na i te ùputa o te märamarama, eiaha rä ei vähi e manaò ai o ia e, mea faufaa òre o ia.

Te ìtehia nei te paruparu o te mau arataì o te Faaroo, to rätou ia manaò ìi, oia te òreraa e hinaaro i te tahi pae ia maitaì, inaha aita rätou iho e maitaì ra. Parau mau, e tiàraa faaora to te mau arataì o te Faaroo, eere rä na rätou e horoà i te ora, te Atua noa ihoä te Tumu o te ora. Ta rätou tuhaa, te tauturu-noa-raa ia e te faaòhieraa i te taata i te raveraa i te èà e tae atu ai i te Atua ra. Te auraa hoì o teie taò arataì, teie ia : ara (èà), taì (âfaì), oia hoì : âfaì nä nià i te èà.  I roto i te parau no te âfaì, te vai atoà ra te manaò no te âpeeraa, oia te faaea-tämau-raa i pïhaì i te taata e ìmi ra i to na èà. Te mea ia ta te päpaì taramo e haapäpü ra e : 30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

No reira, mai te peu e faaauraa ta te Atua i rave, e ua faaìte mai hoì o ia i te reira, aita ia e òhipa ta te Atua i huna, e ta Ietu faahaparaa i te mau tià arataì o te Faaroo, te mea ia rätou i hopoi ê i te täviri o te ìte, ia pärahi noa te nünaa i roto i te pöiri. Ua fatimaùu te mau taata  ia Ioane, te feruri anaè ra te taata i roto i to rätou âau, e  riro paha o ia i te Metia. Te parau nei ra Ioane ia rätou atoà, nä ô atu ra: «Te päpetito nei ä hoì au ia òutou i te pape, te haere mai na rä te tahi e mana rahi to na i to ù, e òre ia vau e au ia tätara i te täpeà i ta na tämaa: na na e päpetito ia òutou i te Värua Maitaì e te auahi. I matara ai te ùputa o te raì i teie reo no te raì i te parauraa e, «Ta ù Tamaiti here òe, ua mauruüru roa vau ia òe »

Mea maitaì ia vai noa i roto i to tätou manaò e to tätou âau e, te raì e te fenua, hoê ä to räua tumu : te vai ; te reira to räua àpu ta te mana o te Parau a te Atua i heheu mai. E mai te peu e mou te raì e te fenua e hoì faahou räua i roto i to räua àpu. E tano ia parauhia e, te fänauraa o te taata, te haapotoraa ia no te rahu a te Atua tei ìriti i te ora mai roto mai i te vai.

 

Teraì òr. Faatura.

 

Ìtaia 40.1-11 Tahito.

 

Mahana māa 1 no Tënuare 2022.

Tahito.

Taramo 103

Aroha.

1 Na Tävita. E haamaitaì i te Fatu, e ta ù värua, e to roto ia ù nei, i to na ra iòa moà.

2 E haamaitaì i te Fatu, e ta ù värua, e eiaha te hoê maitaì a ana i horoà mai ra e haamoèhia.

3 O ia tei faaòre i ta òe atoà ra mau hapa, e o tei faaora i to òe atoà ra mau maì,

4 o tei faaora ia òe i te pohe, o tei faatoröna ia òe i te hämani maitaì e te aroha,

5 o tei faaî i to vaha i te maitaì, ia faaâpï-faahou-hia òe mai te àeto ra.

6 Te rave ra te Fatu i te parau tià e te au i te feiä atoà i hämani-ìno-hia ra.

7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra.

8 E aroha e te hämani maitaì to te Fatu, e òre e riri vave, te rahi ra to na aroha.

9 E òre o ia e tämau i te aò mai ia tätou e òre hoì e vaiiho maro i to na riri e a muri noa atu.

10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno.

11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra.

12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei.

13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra.

14 Ua ìte hoì o ia i to tätou huru, te manaò ra o ia e, e repo tätou nei.

15 O te taata nei e au to na puè mahana i te àihere nei: mai te tiare i roto i te aru ra to na ruperuperaa.

16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na.

17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii,

18 i te feiä i haapaò i ta na ra faufaa, e tei haapaò i ta na ra parau e rave ra.

19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia.

20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau.

21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro.

22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau.  E haamaitaì i te Fatu, e ta ù värua e.  

Ìtaia 40.1-11

Ôuma

Te èvaneria i haapiihia e Ioane päpetito ra.

1 E haamähanahana òutou, e haamähanahana i to ù ra mau taata, të nä reira mai ra to òutou Atua.

2 E faaitoito atu òutou ia Ierutarëma, e parau hua atu òutou ia na, ua hope to na tau maì; e ua färiihia te täraèhara i ta na hara; ua noaa hoì ia na i te rima o te Fatu te pohe au rahi roa i ta na ra mau hara.

3 Te pii mai ra te hoê reo i te mëtëpara; a faanehenehe na i te èà o te Fatu, e e faatïtïàifaro na i te fenua marô i te haereà o to òutou Atua.

4 E faaîihia te mau peho, e faahaèhaahia te mouà e te mau âivi; faatïtïàifarohia te piò, e te mau vähi puupuu ra, e faarirohia ia ei vähi päpü;

5 e faaìtehia mai te hanahana o te Fatu, e ìte paatoà te taata i te ora a te Atua: o te vaha hoì o te Fatu tei parau mai.

6 Te nä ô mai ra te hoê reo, A faaìte. Ua parau atu ra vau, E aha ta ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei:

7 te mäehe noa nei te àihere, te mäheahea nei te tiare, ia farara mai te mataì no te Fatu i nià iho ra: e àihere mau ä te taata nei.

8 Te mäehe nei te àihere, te mäheahea nei te tiare; âreà te parau a to tätou Atua, e tià ia i te vai-mäite-raa.

9 A paiùma i nià i te mouà teitei, e tei hopoi mai i te parau maitaì i Tiona nei; a faateitei na i to reo mä te ûàna, o te hopoi mai i te parau maitaì i Ierutarëma nei. A faateitei na; eiaha e mataù; a parau atu i te mau ôire o Iüta, A hiò na i to òutou Atua.

10 Inaha, te haere mai ra te Fatu ra o te Fatu mä te püai, e nä tö na iho rima e faatupu i tä na. Inaha, tei ia na iho te utuà tä na e hopoi, e te hoo tä na e höroà ra, tei mua ia i ta na aro.

11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.

Manaò.

I teie mätahiti âpï tivira, tei faaö ia tätou i roto i te mau töhuraa a te mau taata e rave rahi, tei faaìte i te huru tupuraa no teie mätahiti tivira, te oraraa vaamataèinaa, te oraraa tivira, te mau täpihooraa, e te vai atu ra. Ua ìmi teie mau taata i roto i teie mau huru faanahoraa i te mau vahi e hau ai rätou i te tahi, te haamäraraa rä i te tahi pae, te faateiaha ra i te tahi pae, to na auraa rä te huru ä te huru àita e huru, teimaha noa ihoä te tahi pae o te nünaa, e ti tahi aè pae te parau ra ia, e àifaitoraa no te mau ùtuafare navaì òre, i teie huru parauraa te hunahia nei te tumu o te fifi mau, te haapöirihia nei te nünaa i te paru ia paruparu to na àma, ia òre ia marämarama i te mau pereraa a te mau faatere Hau Mäòhi, e te mau òna haamoemoeä i te òhipa tupu òre. Vaere i te mau tumu haari, te mau tumu ùru, te mau tumu purau, no te mea te faaäpiäpi ra te faatiàraa fare tei parauhia e faahotu i te fenua, no te mau tumu maa hotu te parau o te hotu, teie mau faanahoraa e mau faanahoraa e topatari te fenua, e pë te fare, mau ôpuaraa ohi òre teie. Àhiri e tià ia rätou ia haapoto i te mahana e te pö, ua haapotohia ia tupu vave te mau ôpuaraa tei faafänau te haavare, te èiä, te aroha òre, e te vai atu ra.

Haamanaòhia atu ra te parau no Mäui, o ia tei hï i te ià e rave rahi mai raro mai i te hohonu o te moana, oia te fenua nei, o ia atoà tei märei i te rä ia taere to na tere no to na aroha i to na metua vahine tei ôru te vaha no te àmuraa i te àpe àiota. Ia faahiti hoì tätou i te parau no te hïraa fenua ra, e parau ia te reira no te taata täià, e taata täià tüiroo mau ä o Mäui, e taata atoà rä tei î i te here i te feiä tei au mai ia na, tei ineine i te faaora i te feiä atoà i roto i te fifi. Ia faaroo tätou i te parau o Mäui, mai te tahi atoà atu mau parau, te nä ô nei tätou e, àai, aore ra, àamu, ia au i te manaò e, e mau parau faahiahia no te tahi mau òhipa i tupu i te pö a uìuì. Ua vai noa rä te reira ei parau. Ia täpiri mai hoì tätou i te taò, faahiahia, e òhie roa te taata i te manaò e, ua faaravaìhia teie mau parau, oia hoì ua faananeahia, ua haamaitaìhia, ua faanehenehehia, te mea ia e òre ai o ia e horoà rahi roa i to na tiàturiraa, mauruüru noa ai to na tarià i te faarooraa i te reira mau parau, hau roa atu, aita to te reira mau parau e faaauraa i roto i te oraraa o teie mahana, e aita e tauturu e noaa mai i te taata no roto i te reira mau parau. Mai te mea atu ra e, e hahape hänoa te manaò i te faarooraa i teie mau parau, eita e hinaaro i te tau, no te hinaaro òre paha ia roohia i te tähitohito. No reira teie mau parau i te haapae-roa-hia. Mai te taata paari e tae atu i te tamarii, hoê anaè ä òreraa e haafaufaa i teie mau parau, hoê anaè ä òreraa

e tiàturi e, te vai ra te tahi parau mau, te vai ra te tahi haapiiraa e tauturu i te Mäòhi i roto i te oraraa fifi e te hepohepo i ta na e tütava noa nei. Ia faaroo tätou i teie na ìrava papa mai roto mai i na taiòraa, te faaìte noa mai ra te reira ia tätou i te hanahana o te Atua Nui Tumu tahi ia tätou i teie täpati mätamua no teie mätahiti tivira, e riro te ruì, e te ao i te ärataì ia tätou, faaroo mai ra teie na parau papa e piti :   

-Taramo 103, 17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii,

-Ìtaia 40, 11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.

E rave rahi tätou e parau nei e, te mea tahito, e mea pohe te reira, e aita e faufaa ia faaora faahou mai i te mea pohe. Oia ia. No te ätearaa te Mäòhi i te fenua, te mea ia o ia i fifi ai i te märamaramaraa i te haapiiraa a te fenua : ia täpühia te tahi räau, e pohe ihoä paha te reira räau, e räau ê rä të tupu mai i te vähi i tupuhia e te räau mätamua, e na to na pera e faaora i teie räau âpï, no te mea eita te fenua e färii i te ano e te pohe. E au ra ia hiòhia e, ua mutu te here i roto i te Mäòhi e to na fenua, te here e riro noa ai te tahi ei pütarià e ei ôriò mata no te tahi. Aita rä te fenua i fiu i te faaàmuraa i te Mäòhi, eiaha i te mäa noa, i te parau atoà rä, te Mäòhi teie e fiu nei i te färiiraa i te ora ta te fenua e horoà noa mai nei, e aita hoì e hinaaro faahou nei i te färii i to na iho parau. Mai te taata tei òre i fänau metua òre noa mai, mea maitaì te Mäòhi ia ìte e, aita atoà o ia i fänau parau òre noa mai. No te reira hoì parau, i ìtehia ai o ia ei taata, ei Mäòhi.

To tätou fifi rahi roa e te Mäòhi i teie mahana, te reo òre ia, e te parau òre atoà. Ia rahi hoì te òre i roto i te parau o te tahi taata, te tahi nünaa, eere änei e, o ia iho terä e moè rii mäite noa atu ra. Ei hiòraa : mai te peu e parau ta tätou, e mata na tätou i te ani i te Faräni i to na manaò, te pähonoraa ta na e horoà mai, te auraa ihoä ia o ta tätou parau. Teie te auraa o teie manaò : i mua i te tahi taò, e nä mua tätou i te hiò i to na huriraa i roto i te reo faräni, ta tätou atoà ia i faariro ei auraa mau no ta tätou taò. Ia parau tätou e, àai, aore ra àamu,

aita paha tätou e täuà nei, taua mea nei ä ia, e parau no te mäa. E piti ùputa tomoraa to te mäa i roto i te tino : te vaha e te tarià. I parau ai te mau tupuna e, àai, no te mea ia e, ua hiò rätou i te reira mai te mäa mau ra te huru, e te mäa hoì, te mea ia e faaamuhia i te taata, mai te tamarii e tae atu i te taata paari. Te òhipa hoì a te mäa, te horoàraa ia i te itoito e te püai i te taata. Te mäa rä tei hoìhoì-noa-hia, tei òre i àmuhia, tei òre te vaha i ìte i te âminamina e te monamona, tei òre i täpeàhia e te ôpü, eita te reira mäa e horoà mai i te mauruüru, te püai, e te ora. Mai ia tätou e àmu nei i te ùru, te àmu atoà nei tätou i te parau. Te vähi peàpeà rä hoì, te mea ia te taata i òre i mäìti faahou i te mäa maitaì no to na tino e to na värua, i te rahiraa o te taime, mea apu aè o ia i nià i te mäa ìno, i te mäa maitaì. Te tino nei, mai te värua atoà, e hinaaro atoà ia i te mäa. Te tanoraa mau, ia faaamuhia òe i to òe iho parau, e roaa ia òe te itoito e te püai âpï, e te taata hoì tei î i te itoito, e rahi atoà to na tiàturi ia na iho, eita o ia e mataù i te fifi o te oraraa ; âreà i teie, to na iho parau te mäa àmu-òre-roa-hia aè e te taata, mai te peu eere te reira te mäa riri-roa-hia e ana. Te taata hoì e puhi mai i te mäa i faaamuhia ia na, eita ihoä o ia e ìte i te maitaì no roto mai i te reira mäa. Te mea noa e tano e parau i te taata i teie mahana, teie ia : tämata paì.

E au mau tätou i te tahi tamarii faaàmu, tei òre i paari i pïhaì i nä metua i fänau mai ia na, e tei tämau noa i te hiò taata ê ia räua. E inaha, to tätou fifi, aita to roto i te reira nä taata, tei roto rä ia tätou iho. Ia òre tätou ia färii i te faaî i te ärea e faataa ê ra ia tätou i to tätou iho parau, nä hea tätou e ìte ai e, o vai mau tätou. Ia ìte atoà mai rä tätou, aita tätou e anihia nei e färii matapö noa, aore ra e färii peu noa i te reira mau parau. Eere roa atu te reira. Ua ìte tätou e, mai te peu te vai ra te parau, te vai atoà ra te auraa o te parau, oia te mea e horoà mai i te märamaramaraa o te parau. Te mea faufaa no tätou, ia vai noa ia to tätou tiàmäraa i te haere i te tahi pae e te tahi, te tomo i roto, e te haere i räpae, mai te taata i to na iho fare. E parau päpü teie, ia ìte òe o vai òe, e òhie atoà òe i te ìte i te mea e au ia òe, te mea ihoä rä ta òe e ère ra. Mai te peu rä aita òe, aita ihoä ia e faufaa to te mäa i faahereherehia mai na òe. Ta te tahito ia e turäma mai nei ia tätou i te mea e vai âpï noa te mätahiti, mai te tumu haari e hotu noa ra i te mau taime atoà, ua òroe, ua puä, ua tiare, ua poniu, ua ôuo, ua puhiri, ua niä, ua òmoto, ua haari, ua uto, ua hinu haari, ua teioro. Te aroha o te Atua Nui Tumu Tahi mai tahito mai ia e a muri noa atu… Oia atoà ia te reo Mäòhi e òre e tahito…. Mai te mea e ui mai òutou e, nohea mai te reo Mäòhi, e parau atu vau e, no roto mai i te fenua, mai te àihere, mai te tiare Maurua e ùaa noa ra, te navenave ia o te reo Mäòhi, i Mäòhi Nui nei…..            

 

Ia ora na, i teie mätahiti âpï tivira.

 

Teraì òr. Faatura.