Tāpati 13 no Mäti 2022.

Mata

Taramo 27

1 Taramo na Tävita. O te Fatu to ù märamarama e to ù ora: o vai hoì ta ù e mataù atu? O te Fatu të tiaì ia ù: e mataù hoì au ia vai?

2 I te haereà mai o te mau taata ìino ra, to ù ra mau ènemi e tei riri mai ia ù, i te tiiraa mai ia ù ra e rave e àmu, ua turori iho ra rätou iho, hià iho ra.

3 Pätia noa mai ä te nuu atoà ra i te pühapa ia ù nei, e òre ta ù âau e mataù. E ia tupu noa mai ä te tamaì ia ù nei, e tiàturiraa ia to ù i reira.

4 Hoê a ù mea hinaaro i te Fatu ra, e o ta ù ia e tïtau hua nei; ia pärahi ä vau i roto i te fare o te Fatu e hope roa aè o ù puè mahana, ia ìte vau i te maitaì o te Fatu, e ia ui mäite au i roto i to na nao.

5 Ia roohia hoì e te àti ra e huna ai o ia ia ù i roto i to na tiàhapa; e faatäpuni o ia ia ù i roto i te vähi moè i to na ra fare, a tuu ai ia ù i te vähi teitei ra.

6 Ei teie nei o ia e faateitei ai i ta ù upoo, i to ù atoà nei mau ènemi e àti noa aè, ia hopoi au, i to na ra tëtene,

i te tütia òaòa, e himene hoì au e e himene haamaitaì hoì i te Fatu.

7 E haapaò mai, e te Fatu, i ta ù reo, ia tiàoro atu vau ra, e aroha mai, e faaroo mai ia ù.

8 Ia parau mai òe e: «E ìmi mai òutou i ta ù mata», E ìmi ia vau i to mata, e te Fatu.

9 Eiaha òe e huna ê atu i to mata ia ù nei, eiaha to tävini e haapae-riri-noa-hia: ua tauturu mai hoì òe ia ù, eiaha vau e faaruè-ê-hia, eiaha òe e täiva ia ù, e ta ù Atua, e ta ù Ora.

10 Faaruè noa ä ta ù metua täne e ta ù metua vahine ia ù, ei reira te Fatu e rave mai ai ia ù.

11 E haapii mai òe, e te Fatu, i to òe ra èà, e arataì ia ù nä te èà manina, no to ù nei mau ènemi.

12 Eiaha òe e horoà ia ù i te hinaaro o ta ù mau ènemi; ìte haavare anaè tei tià mai e märô ia ù, e te ûàna mai ra to rätou riri ia ù.

13 Te manaò nei rä vau, e noaa ia ù te maitaì o te Fatu i te fenua o te taata nei.

14 Tiaì i te Fatu; e faaitoito; e na na e faaitoito mai i to âau ra, e tënä na, e tiaì ä òe i te Fatu.

Tenete 15.5-18

5 Ua arataì aè ra o ia ia na i te vähi ätea, nä ô mai ra, A hiò na to mata i nià i te raì, a taiò na i te mau fetià, i te tiàraa ia òe ia taiò. E ua nä ô mai ra o ia ia na, Oia atoà to òe na huaai.

6 Ua faaroo atu ra Âperäma i te Fatu; e ua faariro atu ra o ia i te reira ei parau tià na na.

7 E ua parau mai ra o ia ia na, O vau o te Fatu, o tei arataì mai ia òe mai Ùra mai, mai io te Tarataio ra, e höroà i teie nei fenua ei pärahiraa no òe.

8 Ua parau atu ra rä o ia, E te Fatu, e te Fatu, e aha te mea e ìte ai au e, e noaa ia ù?

9 Ua parau mai ra o ia ia na, A pütö mai i te hoê puaatoro ufa mätahiti toru ra, e te hoê puaaniho ufa mätahiti toru, e te hoê mämoe paè mätahiti toru ra; e te hoê ûupa, e te tahi ûuàiraò.

10 Ua hopoi mai ra o ia i taua mau mea atoà ra ia na ra, ua vähi iho ra na röpü e piti vehea, tuu iho ra i te tahi vehea i te tahi pae, e te tahi vehea i te tahi pae, e fäito aè ra; ärea na manu ra, aita o ia i vähi i te reira.

11 E ia tau mai te mau manu taehae i nià i taua mau puaa ra, ua tïahi atu ra Âperäma.

12 E te maìri atu ra te mahana i raro, roohia iho ra Âperäma i te taòto rahi; e inaha i roohia atoà iho ra o ia i te höriri, e te pöuri rahi.

13 Ua parau mai ra o ia ia Âperäma, E riro mau to òe huaai ei purutia i te fenua no vëtahi ê, e haafao mai taua fenua ra e e hämani ìno mai, e e maha atoà hänere i te mätahiti, ia ìte mai hoì òe.

14 Âreà taua fenua e haafao ia rätou ra, na ù ia faautuà atu; e muri aè ra, e haere ê mai ia rätou ma te taoà rahi.

15 E reva rä òe io to mau metua ra ma te hau; ia ruhiruhiä roa òe e tänuhia ai.

16 E ia tae i te maha o te uì e hoì mai ai rätou i ô nei; aita hoì i navaì roa te hara a te âti-Àmori ra.

17 E maìri atu ra te mahana, e pöuri atu ra, inaha, e au auahi mai to te umu ra, e te rama ura tei na röpü i taua na àpaapa puaa ra.

18 Ua fäfau iho ra te Fatu i te faufaa ia Âperäma i taua mahana ra, nä ô mai ra, E höroà vau i teie nei fenua no to òe ra huaai, e moti i te pape i Àifiti e tae noa atu i te pape rahi ra o Eufaräte,

Firipi 3.17-21

17 E a ù mau taeaè ra, ei pee atoà òutou atoà na ia ù, e hiò mäite hoì i te feiä e nä reira atoà ra, o mätou hoì to òutou hiòraa.

18 Ta te tahi paeàu haereà, e mea ê ia, o ta ù i faaìte pinepine atu ia òutou, e te faaìte atu nei hoì au ia òutou i teie nei mä te roimata, e e ènemi rätou no te tätauro a te Metia ra.

19 O te pohe roa to rätou hopeà, te ôpü hoì to rätou atua, e ta rätou parau haamä ra, o to rätou ia teòteòraa; e to teie nei ao anaè ra ta rätou e haapaò.

20 Âreà mätou e ta mätou parau no te ao ia, e te tiaì atoà nei mätou i te Ora no reira mai, i te Fatu ra ia Ietu Metia.

21 E na na e faahuru ê i to tätou tino haèhaa, ia hoê atoà huru i to na iho tino maitaì rahi ra, i te räveà mana na na e tià ai ia na ia rave i te mau mea atoà nei, e vï atoà ai i raro aè ia na iho ra.

4.1

1 E teie nei, e a ù mau taeaè here-rahi-hia, e te haapöpouhia, ta ù òaòaraa e ta ù toröna, ia itoito ä òutou i te Fatu nei, e a ù mau here e.

Ruta èv. 9.28-36

To Ietu faahuru-ê-raa-hia

(Mät 17,1-8; Mär 9,2-8)

28 E fätata aè ra te ruì varu i muri aè i tei nei parauraa, ua arataì atu ra o ia ia Pëtero, e ia Ioane, e ia Iatöpo, haere atu ra i nià i te hoê mouà e pure.

29 Te pure ra o ia, huru ê atu ra to na mata, teatea atu ra to na àhu mai te uira ra.

30 E inaha, te paraparau mai ra ia na e toopiti puè taata, o Möte e o Èria:

31 i fä mai räua i roto i te ànaana, e ua parau iho ra i te poheraa no na, o ia i fätata i te pohe i Ierutarëma ra. 32 Âreà Pëtero mä, ua vareà ia i te taòto; e ara aè ra rätou, ìte atu ra rätou i to na hanahana, e nä taata toopiti i tià atoà i pïhaì iho ra ia na.

33 E tei te reva-ê-raa räua ia vaiiho ia Ietu ra, ua parau atu ra Pëtero ia na: «E te Òrometua, e mea maitaì ia pärahi tätou i ô nei. E faatià mätou i te fare autä e toru aè, no òe e tahi, no Möte e tahi, e no Èria e tahi. Aita rä o ia i ìte i ta na i parau ra.

34 Tei te nä-reira-raa atu o ia, te ata mai ra i te täpoìraa mai ia rätou, mataù aè ra rätou i to rätou öraa atu i roto i taua ata ra.

35 E te hoê reo mai ra no roto i taua ata ra, i te nä-ô-raa mai: «O ta ù Tamaiti here teie, a faaroo ia na.

36 E mure aè ra taua reo ra, o Ietu anaè iho ra të toe. Huna iho ra rätou, aore roa i faaìte noa atu i te taata i te reira ànotau i te hoê i taua mau mea ta rätou i ìte ra.

Manaò.

I teie tau e àrepurepu nei to tätou oraraa, i te hoo rahi te mau mea atoà, tei haafifi i ta tätou mau ôpuaraa, te mohi nei tätou i roto i te hepohepo e te mataù. Ia faaroo tätou i te mau parau e faahitihia ra no te oraraa, ua rau te mau faahitiraa manaò, tei haamainu i to tätou âau i roto i te taa òre no te tià o te mau parau, tei haapitaataa i oraraa vaamataèinaa i Mäòhi Nui nei. To tätou mata tei nià ia i te mau mea tei haamarau i to tätou òriò i te ìte i te faufaa o to tätou fenua, ua marau te òriò i nia i te hohoà o te ùru, te haari, te taro, te ufi, mea märama ra to tätou òriò i nià i te mau mea eere no roto i te fenua i Mäòhi Nui nei. Tei faatea ia tätou i te hau o te fenua e to na aroha, no te mea te vahi ta tätou e tïtau nei i te hau o to tätou âau, tei nià i te vahi mau òre no te, reo, te hiroà, peu, ia täamu tätou ia tätou i nià i te tumu i papahia te Mäòhi e ìte mai te mata o te aru i ta na mau tamarii i roto i te hepohepo, i te mea ra ua hinaaro tätou i te tahi faufaa tei ärataì ia tätou i nià i te tahi èà ê atu tei haaparemo ia tätou i roto i te täparu, e te tärahu, i àmahamaha ai te oraraa vaamataèinaa. Ia haere âmui anaè ra tätou e te fenua, e tauturu te fenua i te ìteraa i te Atua Nui Tumu Tahi. Te tahi ia tïtauraa e vai nei i roto i na taiòraa e maha no teie mahana, teie te tahi mau tumu i ìritihia mai :  

-Taramo 27, 9 Eiaha òe e huna ê atu i to mata ia ù nei, eiaha to tävini e haapae-riri-noa-hia: ua tauturu mai hoì òe ia ù, eiaha vau e faaruè-ê-hia, eiaha òe e täiva ia ù, e ta ù Atua, e ta ù Ora.

-Tenete 15, 5 Ua arataì aè ra o ia ia na i te vähi ätea, nä ô mai ra, A hiò na to mata i nià i te raì, a taiò na i te mau fetià, i te tiàraa ia òe ia taiò. E ua nä ô mai ra o ia ia na, Oia atoà to òe na huaai.

-Firipi 3, 18 Ta te tahi paeàu haereà, e mea ê ia, o ta ù i faaìte pinepine atu ia òutou, e te faaìte atu nei hoì au ia òutou i teie nei mä te roimata, e e ènemi rätou no te tätauro a te Metia ra.

-Ruta èv. 9, 29 Te pure ra o ia, huru ê atu ra to na mata, teatea atu ra to na àhu mai te uira ra.

Te vähi e hinaarohia ra i te taata, te ìteraa ia e te färiiraa e, eita e tià ia na ia haapae i te Atua i roto i to na oraraa. Te auraa, tei ia na noa ihoä te faaotiraa hopeà, aita ta te Atua e faaheporaa ia na, i te hinaaroraa e te òreraa e hinaaro i te Atua. Mai te ata e te taata, eita te ata e tano e haere o ia anaè ra i to na haereraa mai te faaruè mai i te taata no na i parauhia ai to te reira ata, no te mea aita to te ata e parau no na noa. Ua ìte atoà hoì tätou e, te taata aita to na e ata, e taata pohe ia, e no te märamarama i parauhia ai to te ata. Eita te ata e âfaì i te taata nä muri iho ia na, eita atoà hoì te taata e âfaì i to na ata nä muri iho ia na. E ata noa ihoä te ata, e taata noa ihoä te taata ; eita te ata e mono i te taata, aita hoì te parau o te taata i ôpanihia i roto i to na ata, eita rä to te tahi parau e tano ia faataa-ê-hia i to te tahi. Teie te manaò i hinaarohia i te haamatara i roto i teie mau manaò e faahitihia e na tumu e maha nei. Ia faaroo hoì tätou i te manaò e faahitihia ra e Ruta èv. 29 Te pure ra o ia, huru ê atu ra to na mata, teatea atu ra to na àhu mai te uira ra. Teie òhipa i tupu e toru tià to te fenua tei riro èi ata, Petero, Ioane, Iatöpo, te ata no te ao mure òre, Mote tià o te ture, Èria tià o te mau perofeta, te parau o te pohe o te Metia e fatata mai ra i Ierutarëma, na te ànaana o te parau i faaìte i te òhipa e tupu i nià i te Metia. Te mau tià o te fenua ua haamata i te hua nane i te Metia, ua haamata i te haaparuparu, ia òre ia tupu te faahauraa i te fenua e te taata. Te reo mai ra o te Atua Nui Tumu Tahi, «O ta ù Tamaiti here teie, a faaroo ia na. I teie reo e haamata te òhipa a Ietu e te mau taata, i te faatupuraa i te hau te taata i te Atua, te taata i te fenua, ia tià i te taata ia haere e to na Atua, te Atua Nui Tumu Tahi. E täpura òhipa teie e vai i roto i te ìrava 29 e faahithia nei e Ruta èv :

-1 Pure

-2 Te mata

-3 Teatea te àhu

- 4 Te Uira

Teie huru no Ietu e taime poto i te tupuraa i nià ia Na, mai te hoà uira ra te huru, tei haatupu i te âparauraa no te faahauraa te taata i te fenua. No te mea ua ateä te taata i te fenua, te òhipa e tià ia ravehia mauti ra o te pure, te pure to te taata ia tatahiraa i te mau manaò e faaapiapi ra to na âau ia tià i to na värua ia faatupu i te hau, ia märae to na âau i reira o ia e tià ai e faateitei i to na Atua, te Atua Nui Tumu tahi, i reira noa e matara te tapu räau e faarupehu ra i te ìteraa i te maitaì o te fenua, ia matara teie tumu räau i roto i te ôriò, i reira e teatea te hoà uira tei turäma te nehenehe o te aru a te Atua. Te mä i roto i teie taò e Märae, te mea ta na e faahiti ra te hinuhinu ia o te tahi vahi, te faaìte atoà nei ra teie mä te hau te rahi e te òhipa tuatau ta te taata e tià ia rave ia ànaana noa to na ôriò mata. I reira noa e tià ai e ùpu, oia hoì èi pure, e tärava, e ruàu, e tuki, e hivinau, e teki, e ùte. Mai ta tätou rä e ìte ra, aita tätou i faaea noa i nià i te mau taò, te tahi mau rä teie hiòraa i te auraa ta te Atua i hinaaro noa i te haamau i roto ia na e te taata ia parau o Ia e «O ta ù Tamaiti here teie, a faaroo ia na. òhie tätou i te märamarama e, mea taa ê te huru o te taata tei ìte, tei nià noa te mata o te Atua ia na, i to te taata tei färii e, mai ia na e to na ata, mai te reira atoà te auraa e täamu ra ia na i te Atua; te au noa ra hoì te reira i te parau no to na hämaniraahia i te huru e te hohoà o te Atua. Te tahi vähi e tano e haapäpü, te mea ia e, aita te taata e hiò noa nei i te auraa e faanahohia ra i to na parau e te Atua, to na rä parau e to na Atua, te Atua nui Tumu tahi. Te Atua iho teie e faaòre nei i te ärea e faataa ê nei ia na i te taata, aita o ia e faaea noa nei i roto i te ätea e te moà, inaha te anihia nei te taata e haere mai te haèhaa e te hau e to Atua, oia hoì to òe Atua, te Atua i fenuahia ai tätou, i Mäòhi ai tätou i Mäòhi nui. Mai ia tätou e parau nei i te tahi tamarii e: to òe päpä, to òe mämä, te aniraa e vai i roto i teie reo no Atua, i teie reo e, O ta ù Tamaiti here teie, a faaroo ia na te haapäpü noa mai ra teie reo, i to òe parau e to òe Atua. Aita òe e anihia nei e hiò i te òhipa ta te tahi pae e rave ra, aore ra mai ta te tahi pae i rave noa mai na, mai teie atu e òhipa teie i roto ia òe e to òe Atua, na òrua e faanaho i to òrua parau, e òhipa òrua te reira. Teie atu ra ta tätou parau i teie nei : Ua faaìtehia  ia òe i te mea maitaì i tupu i roto i ta tätou parau no teie mahana, ei mata faaroo i te ìte i te Atua Nui Tumu Tahi to na mauruüru ia òe maoti rä, ia rave i te mea tià, ia anoenoe i te aroha, e ia haere mai te haèhaa e to Atua. Aita atu e auraa to te faufaa o te parau ta tätou i faaroo i roto i teie âparauraa maoti rä, te faatororaa i te èà te Atua i te èà ta tätou e rave atu i roto i teie hoìraa i te Atua ra ta tätou e haamanaò noa nei aita e mätahiti tuua. Mai ta tätou atoà ihoä rä i parau noa mai na, aita e faufaa to te èà mai te peu aita e taata e hinaaro i te haere nä reira, mai te peu e faaoti te taata i te tämau noa i te haere nä nià i te èà ta na e to na mau metua i rave noa mai na. E tano ihoä te taata e nä reira i te faanaho i to na parau, mea maitaì atoà rä o ia ia haamanaò i teie reo to te Atua e parau ra e : ta ù mau i ìmi ra, te reira të tupu ; e ta ù i ôpua ra, te reira të mau (Ìtaia 1, 24). Aita te Atua e hinaaro nei e haamataù i te taata, ia ìte o ia e, te Atua ihoä te mea püai aè. Hinaaro rä te Atua ia haru te taata i te faaauraa âpï ta na e hinaaro nei i te haamau i roto ia na e te taata. Ia färii te taata, eere faahou o ia i te Atua i te raì tua tinitini, to òe rä Atua ; te auraa, aita e mea e faataa ê faahou ia òe ia täno to mata i te aroha e te here o to òe Atua.

 

Teraì òr. Faatura.

 



 

Ioane 11.28-45 Färerei.

 Mahana māa  5 no Mäti 2022.

Färerei.

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe. 2 Te parau nei au i te Fatu e: «O ta ù Fatu òe, aita a òe e faufaa i to ù nei maitaì.» 3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra: te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì. 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

Ioane 11.28-45

Te òtoraa Ietu

28 E oti aè ra taua parau ra, hoì mai ra o ia e parau atu ra ia Märia i ta na taeaè, ômumu atu ra e: «Terä aè te Òrometua, e te parau mai ra ia òe. 29 E ìte aè ra Märia i te reira, tià aè ra o ia i nià i reira ra, haere atu ra ia na ra. 30 Aore ä Ietu i tae i roto i te ôire, tei te vähi ä i färerei atu ai Märeta ia na ra. 31 E te âti-Iüta i pärahi i roto i te fare i te haamähanahanaraa ia Märia ra, ìte aè ra ia na i te tià-òiòi-raa i nià, e te haereraa atu i räpae, ua pee mai ra ia na, nä ô aè ra: «Te haere atu ra o ia i te menema ra òto ai.» 32 E tae atu ra Märia i taua vähi tei reira Ietu ra, ìte atu ra ia na, haamaìri iho ra o ia i raro i ta na pae âvae, nä ô atu ra ia na: «E te Fatu, àhiri òe i ô nei, e òre ta ù tuaane e pohe. 33 E ìte aè ra Ietu ia na i te òtoraa e te âti-Iüta hoì i haere atoà mai ra, ûuru iho ra o ia e horuhoru atu ra ta na värua, 34 nä ô atu ra: «Tei hea o ia i te vaiiho-raa-hia e òutou? Ua nä ô mai ra rätou ia na: «E te Fatu, a haere mai a hiò. 35 Òto iho ra Ietu. 36 Ua parau iho ra te âti-Iüta: «A hiò na i to na aroha ia na. 37 Ua nä ô aè ra rä te hoê pae o rätou: «E òre änei e tià ia na ia faaora mai i te pohe o teie nei taata, o tei faaora hoì o ia i te taata matapö ra? Ua ora faahou mai o Rätaro 38 Ua ûuru faahou iho ra Ietu i roto ia na iho, e tae atu ra i te menema ra: e ana, e ôpanihia te ùputa i te hoê ôfaì. 39 Ua parau atu ra Ietu: «A huri ê atu na i te ôfaì. Ua parau mai ra Märeta, te tuahine o taua taata i pohe ra: «E te Fatu, ua hauà i tënä na, o te ruì maha hoì teie. 40 Ua parau atu ra Ietu ia na: «Aore au i parau atu ia òe e, i faaroo òe ra e ìte òe i te mana o te Atua? 41 Ua huri ê atu ra rätou i te ôfaì i taua vähi i vaiihohia ai tei pohe ra, hiò atu ra te mata o Ietu i nià, e ua parau atu ra: «E ta ù Metua, e haamaitaì au ia òe, o òe i faaroo mai ia ù nei. 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai. 43 E oti aè ra taua parau ra, ua faateitei aè ra i ta na reo, ua pii atu ra: «E Rätaro, a haere mai i räpae. 44 Ua haere mai ra taua taata i pohe ra i räpae, ua täamuhia nä rima e nä âvae, i vehihia hoì te mata i te àhu. Ua parau atu ra Ietu ia rätou: «A tätara, e tuu atu ia na ia haere na. 45 E te âti-Iüta i haere mai ia Märia ra, o tei ìte i ta Ietu i rave ra, e rave rahi ia tei faaroo ia na.

Manaò.

Taramo 16, 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti.

Ioane 11, 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai.

Te pae no Mäti 1797 te haapäpü noa mai ra te reira te tupuraa te parau i tohuhia e Vaitä, hou teie mau taata a tae mai ai i Mäòhi Nui nei, Tē ìte nei au, tei mua ia ù te auraa o teie nei peu maere rahi. Tenā mai te fanauà ùnaùna na te Tumu, e haere mai e hiò i teie uru rāau i Taputapuātea nei. E tino ê to rātou, e tino ê to tātou, hōê anaè rā huru no te Tumu mai, e e riro teie fenua ia rātou, e mou teie haapaòraa tahito nei, e e tae mai hoì te manu moà o te moana e haere mai e taìhaa i ta teie rāau i motu e faaìte nei.

E tano e parau e, te rahiraa o te parau i roto i te tohu a Vaitā, ua tupu, mai teie i muri nei : te parau o te mau fanauà ùnaùna a te Tumu e tae mai, ua tae mai, ua tupu ia ; te riroraa te fenua ia rātou, ua tupu atoà ; te mouraa te haapaòraa tahito, ua tupu atoà ; te taeraa mai te mau manu moà o te moana i te fenua nei, ua tupu atoà ; âreà te haereraa mai rātou e taìhaa i ta te rāau i motu e haapii nei, ua haamatahia i tē rave, aita rā i tupu hope. E aha te tāpaò e haapāpū mai e aita i tupu hope. Haamanaò tātou e, te taìhaa, te òtohaa, te tämahanahana, aore ra te faatià faahou i te nūnaa Māòhi, te tuhaa ia ta te Atua i ani i te mau manu moà o te moana e rave. Ua ìte maitaì rā hoì tātou e, aita te fifi o te nūnaa Māòhi i mätara, ua ûàna roa atu rā i teie mahana. Aita atu paha ia e tiàturiraa to te Atua maori rā, i te mau manu moà o te fenua nei, oia te mau tāvini o teie tau. No reira, ia uihia tātou e : E aha ta te tohu a Vaitā e tūrama mai ra ia tātou i nià i ta tātou tuhaa i teie mahana ; aita atu ia e pāhonoraa maori rā : E haere te mau tāvini o teie tau e taìhaa i mua i te nūnaa Māòhi, te taìhaa te faaìteraa ia i te peàpeà o te âau, te âau ra te värua ia e vai ra i roto i te tino taata. Teie tuhaa e tià ia parauhia aita e rave faahouhia, ua haapaò noa te mau tävini o te Atua, i te mau taata e tae mai nei i te pureraa i te täpati, a parau ai e ua ïti te taata i teie täpati e aore ra ua rahi no te ôroà a te Fatu e aore ra no te päpetitoraa, e aore no te haapäpüraa i te faaroo. Ia parauhia e haere e taìhaa, e haere e färerei, e faaroo i te nünaa e faaitoito no te faatupu i te hanahana o te Atua Nui Tumu Tahi, no te mea te tupu e faaìte o ia i te rahi, te faaìte tämauraa i te nünaa to na ora, to na ia marämarama, e to na tiàmäraa.

Ia faatupuhia te mau haapiiraa, te rāveà ia i hōroàhia i te tāvini ia māramarama te taata i te hinaaro o te Atua. I roto i te tohu a Vaitā, e haapii atoà te rāveà i hōroàhia i te mau manu moà o te moana, terā ia vāhi e nā ô ra e : E haere mai rātou e taìhaa i ta teie rāau i motu e HAAPII nei. E aha te haapāpūraa hau atu, teie ia : e HAAPII ihoā, eere rā i te mea haapii hānoa, e papa rā i te haapiiraa i nià i te rāau i motu, teie räau i motu to na iòa hou te tohu a Vaitä e Tumu Rau e tumu räau teie na Taaroa Nui Tumu Tahi, to na aa te ravehia no te hämani i te ùmete no te püpüraa maa i nià i te Marae, èi faaìteraa i te hotu o te fenua, e te itoito o te Mäòhi i te mata ära i nià i te fenua. I te taime i tope-àuru-hia ai i parauhia ai e e Tumu Àti e tae mai i teie mahana. E tano atoà e haapāpū e, teie tänu e te hotu te haapiiraa ia e anihia ra i te mau tāvini o teie tau, e teie anaè te papa haapiiraa e tià faahou ai te nūnaa Māòhi i teie mahana. Te uiraa paha e vaivai noa ra, teie ia : Ua ineine ānei tātou i tē faatano i ta tātou haapiiraa i teie nei i nià i teie papa. Te mea pāpū, teie anaè te hinaaro o te Atua i to na mau tāvini i teie mahana, e tià faahou ai te nūnaa Māòhi. Te tope no te faaìte ia te puai o te tupu o te tumu räau, te àuru, e faaìte ia te puai o te ora, te mau àmaa i tope-àuru-hia te heeùri ia o te tumu räau tei faaìte i te nehenehe o te aru, te mea ia i paru ai te Mäòhi i to na Atua, te Tumu Nui, e aore ra te Atua Nui Tumu Tahi.

Ia faaroo tätou i teie reo o Ietu e parau ra, 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai. I mua i te hepohepo o Maria e o Märeta no to raua tuaane i pohe o Rätaro, te manaò o te ùtuafare ua taere roa, e tae noa atu no te mau taata e òtohaa ra, e taìhaa ra mea ê ia te mau taata e amuamu ra i to Ietu taëraa i roto i te ùtuafare, e i mua i te ôfaì o te menema. Ua òto o Ietu, ua faateitei aè ra i ta na reo, ua pii atu ra E Rätaro, a haere mai i räpae, ua faaroo o Rätaro ua haere i rapae i vahi no te pohe, to na tino i natinatihia i te àhu no te pohe, ua tatarahia i te mea aita e mana to te pohe i te reo o Ietu. Te haapiiraa e horoàhia nei i teie reo no Ietu, to na ia tomoraa i roto i te òto o teie ùtuafare tei faariro atoà èi òto no Na, i faaroo ai te Atua i to na reo.

I teie mahana te faaroohia nei te tahi mau tävini i roto i te Ètärëtia Porotetani Mäòhi, èita na ù e haere, na rätou ra e haere mai, te faaroo-atoà-hia ra eiaha na te uahu e täpiri i nià i te pähi, na te pähi ra, e te vai atu ra te rahi o te parau e faahitihia nei e te mau tävini, no te paruru ia i to rätou faatau e te hupehupe.

I mua i te mau àti rau e tupu noa nei i teie mahana tei tāumiumi i te nūnaa Māòhi, mea tià ia tätou ia haapäpü i te fautua i te mau hopoià ia au ia tätou ia faatae i nià i to na reni mau. No te mea te tumu àti aita i pohe ua tope-àuru-hia to na auraa to tätou reo Mäòhi, te hiroà, te peu, te vai noa ra, e Mäòhi tätou no Mäòhi Nui.

 

Teraì òr. Faatura.

 

 

 

 

 

Mahana māa  5 no Mäti 2022.

Färerei.

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe. 2 Te parau nei au i te Fatu e: «O ta ù Fatu òe, aita a òe e faufaa i to ù nei maitaì.» 3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra: te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì. 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

Ioane 11.28-45

Te òtoraa Ietu

28 E oti aè ra taua parau ra, hoì mai ra o ia e parau atu ra ia Märia i ta na taeaè, ômumu atu ra e: «Terä aè te Òrometua, e te parau mai ra ia òe. 29 E ìte aè ra Märia i te reira, tià aè ra o ia i nià i reira ra, haere atu ra ia na ra. 30 Aore ä Ietu i tae i roto i te ôire, tei te vähi ä i färerei atu ai Märeta ia na ra. 31 E te âti-Iüta i pärahi i roto i te fare i te haamähanahanaraa ia Märia ra, ìte aè ra ia na i te tià-òiòi-raa i nià, e te haereraa atu i räpae, ua pee mai ra ia na, nä ô aè ra: «Te haere atu ra o ia i te menema ra òto ai.» 32 E tae atu ra Märia i taua vähi tei reira Ietu ra, ìte atu ra ia na, haamaìri iho ra o ia i raro i ta na pae âvae, nä ô atu ra ia na: «E te Fatu, àhiri òe i ô nei, e òre ta ù tuaane e pohe. 33 E ìte aè ra Ietu ia na i te òtoraa e te âti-Iüta hoì i haere atoà mai ra, ûuru iho ra o ia e horuhoru atu ra ta na värua, 34 nä ô atu ra: «Tei hea o ia i te vaiiho-raa-hia e òutou? Ua nä ô mai ra rätou ia na: «E te Fatu, a haere mai a hiò. 35 Òto iho ra Ietu. 36 Ua parau iho ra te âti-Iüta: «A hiò na i to na aroha ia na. 37 Ua nä ô aè ra rä te hoê pae o rätou: «E òre änei e tià ia na ia faaora mai i te pohe o teie nei taata, o tei faaora hoì o ia i te taata matapö ra? Ua ora faahou mai o Rätaro 38 Ua ûuru faahou iho ra Ietu i roto ia na iho, e tae atu ra i te menema ra: e ana, e ôpanihia te ùputa i te hoê ôfaì. 39 Ua parau atu ra Ietu: «A huri ê atu na i te ôfaì. Ua parau mai ra Märeta, te tuahine o taua taata i pohe ra: «E te Fatu, ua hauà i tënä na, o te ruì maha hoì teie. 40 Ua parau atu ra Ietu ia na: «Aore au i parau atu ia òe e, i faaroo òe ra e ìte òe i te mana o te Atua? 41 Ua huri ê atu ra rätou i te ôfaì i taua vähi i vaiihohia ai tei pohe ra, hiò atu ra te mata o Ietu i nià, e ua parau atu ra: «E ta ù Metua, e haamaitaì au ia òe, o òe i faaroo mai ia ù nei. 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai. 43 E oti aè ra taua parau ra, ua faateitei aè ra i ta na reo, ua pii atu ra: «E Rätaro, a haere mai i räpae. 44 Ua haere mai ra taua taata i pohe ra i räpae, ua täamuhia nä rima e nä âvae, i vehihia hoì te mata i te àhu. Ua parau atu ra Ietu ia rätou: «A tätara, e tuu atu ia na ia haere na. 45 E te âti-Iüta i haere mai ia Märia ra, o tei ìte i ta Ietu i rave ra, e rave rahi ia tei faaroo ia na.

Manaò.

Taramo 16, 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti.

Ioane 11, 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai.

Te pae no Mäti 1797 te haapäpü noa mai ra te reira te tupuraa te parau i tohuhia e Vaitä, hou teie mau taata a tae mai ai i Mäòhi Nui nei, Tē ìte nei au, tei mua ia ù te auraa o teie nei peu maere rahi. Tenā mai te fanauà ùnaùna na te Tumu, e haere mai e hiò i teie uru rāau i Taputapuātea nei. E tino ê to rātou, e tino ê to tātou, hōê anaè rā huru no te Tumu mai, e e riro teie fenua ia rātou, e mou teie haapaòraa tahito nei, e e tae mai hoì te manu moà o te moana e haere mai e taìhaa i ta teie rāau i motu e faaìte nei.

E tano e parau e, te rahiraa o te parau i roto i te tohu a Vaitā, ua tupu, mai teie i muri nei : te parau o te mau fanauà ùnaùna a te Tumu e tae mai, ua tae mai, ua tupu ia ; te riroraa te fenua ia rātou, ua tupu atoà ; te mouraa te haapaòraa tahito, ua tupu atoà ; te taeraa mai te mau manu moà o te moana i te fenua nei, ua tupu atoà ; âreà te haereraa mai rātou e taìhaa i ta te rāau i motu e haapii nei, ua haamatahia i tē rave, aita rā i tupu hope. E aha te tāpaò e haapāpū mai e aita i tupu hope. Haamanaò tātou e, te taìhaa, te òtohaa, te tämahanahana, aore ra te faatià faahou i te nūnaa Māòhi, te tuhaa ia ta te Atua i ani i te mau manu moà o te moana e rave. Ua ìte maitaì rā hoì tātou e, aita te fifi o te nūnaa Māòhi i mätara, ua ûàna roa atu rā i teie mahana. Aita atu paha ia e tiàturiraa to te Atua maori rā, i te mau manu moà o te fenua nei, oia te mau tāvini o teie tau. No reira, ia uihia tātou e : E aha ta te tohu a Vaitā e tūrama mai ra ia tātou i nià i ta tātou tuhaa i teie mahana ; aita atu ia e pāhonoraa maori rā : E haere te mau tāvini o teie tau e taìhaa i mua i te nūnaa Māòhi, te taìhaa te faaìteraa ia i te peàpeà o te âau, te âau ra te värua ia e vai ra i roto i te tino taata. Teie tuhaa e tià ia parauhia aita e rave faahouhia, ua haapaò noa te mau tävini o te Atua, i te mau taata e tae mai nei i te pureraa i te täpati, a parau ai e ua ïti te taata i teie täpati e aore ra ua rahi no te ôroà a te Fatu e aore ra no te päpetitoraa, e aore no te haapäpüraa i te faaroo. Ia parauhia e haere e taìhaa, e haere e färerei, e faaroo i te nünaa e faaitoito no te faatupu i te hanahana o te Atua Nui Tumu Tahi, no te mea te tupu e faaìte o ia i te rahi, te faaìte tämauraa i te nünaa to na ora, to na ia marämarama, e to na tiàmäraa.

Ia faatupuhia te mau haapiiraa, te rāveà ia i hōroàhia i te tāvini ia māramarama te taata i te hinaaro o te Atua. I roto i te tohu a Vaitā, e haapii atoà te rāveà i hōroàhia i te mau manu moà o te moana, terā ia vāhi e nā ô ra e : E haere mai rātou e taìhaa i ta teie rāau i motu e HAAPII nei. E aha te haapāpūraa hau atu, teie ia : e HAAPII ihoā, eere rā i te mea haapii hānoa, e papa rā i te haapiiraa i nià i te rāau i motu, teie räau i motu to na iòa hou te tohu a Vaitä e Tumu Rau e tumu räau teie na Taaroa Nui Tumu Tahi, to na aa te ravehia no te hämani i te ùmete no te püpüraa maa i nià i te Marae, èi faaìteraa i te hotu o te fenua, e te itoito o te Mäòhi i te mata ära i nià i te fenua. I te taime i tope-àuru-hia ai i parauhia ai e e Tumu Àti e tae mai i teie mahana. E tano atoà e haapāpū e, teie tänu e te hotu te haapiiraa ia e anihia ra i te mau tāvini o teie tau, e teie anaè te papa haapiiraa e tià faahou ai te nūnaa Māòhi i teie mahana. Te uiraa paha e vaivai noa ra, teie ia : Ua ineine ānei tātou i tē faatano i ta tātou haapiiraa i teie nei i nià i teie papa. Te mea pāpū, teie anaè te hinaaro o te Atua i to na mau tāvini i teie mahana, e tià faahou ai te nūnaa Māòhi. Te tope no te faaìte ia te puai o te tupu o te tumu räau, te àuru, e faaìte ia te puai o te ora, te mau àmaa i tope-àuru-hia te heeùri ia o te tumu räau tei faaìte i te nehenehe o te aru, te mea ia i paru ai te Mäòhi i to na Atua, te Tumu Nui, e aore ra te Atua Nui Tumu Tahi.

Ia faaroo tätou i teie reo o Ietu e parau ra, 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai. I mua i te hepohepo o Maria e o Märeta no to raua tuaane i pohe o Rätaro, te manaò o te ùtuafare ua taere roa, e tae noa atu no te mau taata e òtohaa ra, e taìhaa ra mea ê ia te mau taata e amuamu ra i to Ietu taëraa i roto i te ùtuafare, e i mua i te ôfaì o te menema. Ua òto o Ietu, ua faateitei aè ra i ta na reo, ua pii atu ra E Rätaro, a haere mai i räpae, ua faaroo o Rätaro ua haere i rapae i vahi no te pohe, to na tino i natinatihia i te àhu no te pohe, ua tatarahia i te mea aita e mana to te pohe i te reo o Ietu. Te haapiiraa e horoàhia nei i teie reo no Ietu, to na ia tomoraa i roto i te òto o teie ùtuafare tei faariro atoà èi òto no Na, i faaroo ai te Atua i to na reo.

I teie mahana te faaroohia nei te tahi mau tävini i roto i te Ètärëtia Porotetani Mäòhi, èita na ù e haere, na rätou ra e haere mai, te faaroo-atoà-hia ra eiaha na te uahu e täpiri i nià i te pähi, na te pähi ra, e te vai atu ra te rahi o te parau e faahitihia nei e te mau tävini, no te paruru ia i to rätou faatau e te hupehupe.

I mua i te mau àti rau e tupu noa nei i teie mahana tei tāumiumi i te nūnaa Māòhi, mea tià ia tätou ia haapäpü i te fautua i te mau hopoià ia au ia tätou ia faatae i nià i to na reni mau. No te mea te tumu àti aita i pohe ua tope-àuru-hia to na auraa to tätou reo Mäòhi, te hiroà, te peu, te vai noa ra, e Mäòhi tätou no Mäòhi Nui.

 

Teraì òr. Faatura.

 

 

 

 

 

Ruta èv. 4.1-13 Poìa

 

Tāpati 6 no Mati 2022.

Ôroà

Poìa

Taramo 91

1 O tei pärahi i raro aè i te täpoì o Të Teitei ra, e taòto ia i raro aè i te maru o te Püaihope ra.

2  Te parau nei au i te Fatu: «To ù ia haapüraa e to ù pare, ta ù Atua, e ta ù e tiàturi nei.»

3 Na na mau ä òe e faaora i te märei a te ìmi manu ra, e i te maì faufau e pohe ai ra.

4 E täpoì o ia ia òe i to na ra huruhuru, e e ora òe i raro aè i to na puè pererau. O ta na ra parau mau, o to òe ia päruru e o to òe ia täpoì.

5 E òre òe e mataù i tei mataùhia i te ruì ra: e te òhe e pee i te ao ra,

6 e te maì e haere noa i te pöuri ra, e te pau e pau ai i te avatea ra.

7 E tautani të maìri i to hiti, e àhuru ia te tautani i te rima àtau, e òre rä e fätata mai te pohe ia òe ra.

8 O to mata anaè ra te hiò, ia ìte òe i te utuà a te paieti-òre ra.

9 No te mea ua faariro òe i te Fatu, ta ù haapüraa. O Tei Teitei ra, ei pärahiraa ora no òe ra.

10 E òre roa òe e roohia e te ìno, e òre hoì te maì pohe ra e haafätata mai i to òe ra ùtuafare.

11 E aò hoì o ia i ta na mau merahi ia òe, e tiaì ia òe i to òe mau haereà atoà ra

12 E mau hoì rätou ia òe i to rätou ra rima òi tiàià noa atu to òe âvae i te ôfaì.

13 E taahi noa atu òe i nià i te riona e te âtepi, i te riona âpï e te teni ta òe e taataahi.

14 Te nä ô mai ra te Atua: «No te mea, te hinaaro mai ra o ia ia ù, e faaora vau ia na, e faateitei au ia na i nià, no te mea te haapaò ra o ia i to ù nei iòa.

15 Ia tiàoro mai o ia ia ù ra, na ù e parau atu ia na. Ei pïhaì-atoà-iho vau ia na ia roohia e te àti ra, e faaora atu vau ia na e e faatura atu vau ia na.

16 E haamauruüru atu vau ia na i te aho roa, e faaìte au ia na i te ora na ù.

Teuteronomi 26.4-10

4 E na te tahuà e rave mai i te ète i to rima ra, e tuu ai i raro i mua i te fata e to Atua ra e te Fatu.

5 E na òe e parau atu, e nä ô atu òe i mua i te aro o to Atua ra o te Fatu, E âti-Àrama pohe i te atu to ù ra metua täne, haere atu ra hoì o ia i Àifiti, purutia noa atu ra i reira aita reà ra; e riro atu ra o ia ei nünaa rahi püai, e te taata rahi i reira.

6 e ua hämani ìno mai to Àifiti ia tätou, e ua faafao mai ia tätou, e ua haapahi mai ia tätou i te òhipa rahi;

7 e ua tiàoro tätou i te Atua o to tätou hui-metua ra i te Fatu, ua faaroo mai te Fatu i to tätou reo, e ua hiò mai ra i to tätou pohe, e ta tätou òhipa, e to tätou faafao-raa-hia mai;

8 e ua arataì mai te Fatu ia tätou mai Àifiti mai i te rima püai, mä te rima faatorohia ra, e mä te mataù rahi e te täpaò, e te räveà i mäerehia:

9 e ua arataì mai hoì ia tätou i ô nei, e ua höroà mai i teie nei fenua no tätou i te fenua tahe pape noa te ü e te meri nei.

10 E teie nei inaha, i hopoi mai nei au i te òho mätamua o taua fenua nei, ta òe, e te Fatu, i höroà mai no ù nei. A tuu atu ai òe i te reira i mua i te o to Atua ra o te Fatu, e haamori i mua i te aro o to Atua ra o te Fatu:

Rōma 10.8-13

8 E te nä hea mai rä o ia? «Tei pïhaì iho te parau ia òe, tei roto i to vaha, e tei roto i to âau», oia hoì te parau o te faaroo ta mätou e faaìte nei.

9 Ia fäì hoì to vaha i te Fatu ra ia Ietu, e ia faaroo to âau e ua faatià te Atua ia na i te poheraa ra, e ora ia òe.

10 O te âau hoì to te taata nei i faaroo, e ia roaa atu te parau tià; o te vaha hoì tei fäì i te parau, e ia roaa atu te ora.

11 Te parau mai ra hoì te parau i päpaìhia ra e: «O tei faaroo atoà ia na ra, e òre anaè ia e haamä.»

12 Aita roa hoì e huru ê i te âti-Iüta e te Herëni, e hämani maitaì rahi hoì to te Fatu o te mau mea atoà nei, i te taata atoà i tiàoro atu ia na ra.

13 «O të tiàoro atoà hoì i te iòa o te Fatu ra, e hope roa ia i te ora.»

Ruta èv. 4.1-13

Te tämata-raa-hia o Ietu

(Mät 4,1-11; Mär 1,12-13)

1 Ua hoì mai ra Ietu mai Iörïtäna mai, mä te î i te Värua Maitaì, e ärataìhia atu ra e te Värua i te mëtëpara,

2 e e piti taau aè ra mahana tötövähia iho ra o ia e te tiàporo. Aore ä o ia i àmu i te mäa i taua nä mahana ra; e hope aè ra, poìa iho ra o ia.

3 Ua parau mai ra te tiàporo ia na: «E tamaiti òe na te Atua ra, a parau òe i teie nei ôfaì ia riro ei päne.

4 Ua parau atu ra Ietu ia na, nä ô atu ra: «Ua päpaìhia: «E òre te taata e ora i te päne anaè ra, i te mau mea atoà rä i haapaòhia e te Atua.»

5 Ua arataì atu ra te tiàporo ia na i nià i te hoê mouà teitei, e ua faaìte mai ra ia na i reira ra i te mau pätireia atoà o te ao nei.

6 Ua parau mai ra te tiàporo ia na: «E horoà atu vau i te hau, e te hinuhinu i teie nei mau fenua ia òe, ua püpühia mai hoì tei ia ù, e na ù e horoà atu na ta ù taata i hinaaro.

7 E teie nei, ia tià ia òe i te tähopu mai ia ù nei, na òe anaè ia.

8 Ua parau atu ra Ietu, nä ô atu ra: «E haere ê atu òe, e Tätani, ua päpaìhia e: «O te Fatu ra o te Atua ta òe e tähopu, e o ia anaè ra ta òe e haamori.»

9 Ua arataì atu ra ia na i Ierutarëma, e ua tuu atu ra ia na i nià iho i te poretito o te hiero, ua parau atu ra ia na: «E tamaiti òe na te Atua ra, e haamaìri òe ia òe iho i raro i teie nei vähi;

10 ua oti hoì i te päpaìhia e: «E poroì o ia i ta na mau merahi ia òe, e tiaì ia òe;

11 e na rätou e mau ia òe i to rätou rima, òi tiàià noa atu to âvae i te ôfaì.»

12 Ua parau atu ra Ietu ia na, nä ô atu ra: «Ua parauhia mai e: «Eiaha òe e àa atu i to Atua i te Fatu.»

13 E hope aè ra ta te tiàporo tötöäraa, haere iti ê atu ra o ia, faaruè mai ra ia na.

Manaò.

Te parau e färereihia nei e tätou i teie mahana, e parau ia no te taata ia au i to na faanahoraa na roto i te haafatataraa i pïhaì iho i te Atua Nui Tumu Tahi, mea tupu naìnaì anei o ia, aore ra mea tupu rahi noa, te märamaramaraa o teie parau o te tupu, aita ia i roto i te naìnaì, tei roto rä i te rahi. Te tupuraa o te taata, e täpaò ia no te ora. Te tahi mea iti e òre e mau i te rima ia täpeà, i roto i to na tupuraa, e mau ia na ia täpeà i te mau räveà paari atoà e vävähi ia au i to na manaò a ui atu ai tätou e, eere änei te riri i te tahi mea e hotu mai i roto i te âau o te taata, e të riro i te faatupu atu i te ìno. I roto i te tupuraa o te parau i te rahi, te mea ta tätou e parau nei e, e feìi, i roto i te ûàna o to na riri, e faaìte atoà mai ihoä te parau e, no na i parauhia ai to te fenua, te vähi i horoàhia ei pärahiraa no te taata, ei vähi hoì e mähorahora ai te tupuraa o to na ora. Mai te peu e, te tupu nei te riri o te taata, ua ìte atoà te taata i te faatupu i te hau e te òaòa o te tamarii e maitaì ai te oraraa. Ia poìa te taata, te àmu ra o ia i te mäa. I àmu ai rä te taata i te mäa, no te mea ia te ìte ra o ia i te ère, aore ra te paruparu ra to na tino, e o te räveà te reira e hoì faahou mai ai te itoito o to na tino, e te ànaanaea o to na värua. Te faaroo atoà nei rä tätou i te taata ia parau e, ua àmu te pape i to na fenua ; i te tahi aè pae, te nä reira atoà ra ta tätou parau i nià i te miti. Teie rä àmuraa ta te pape, eere ia no te mea te poìa ra te pape, e o te reira noa ihoä te räveà e hoì faahou mai ai to na itoito e to na püai, eere roa atu. Te faaìte noa ra rä te taata e, ua pau te tahi vähi o to na fenua, ua paohia e te pape. Te mea rä ta te pape i ìriti mai i te tahi vähi, te âfaì ra o ia i te tahi vähi ê atu vai iho atu ai. Te auraa, mai te peu te pau ra te tahi vähi, te î atu ra ia te tahi. E au ra ia hiòhia e, te faanaho atoà ra te pape i te huru o te fenua, e o vai hoì të tano e faanaho maoti rä, te tahi mea ora. No reira, teie àmuraa ta te pape i te fenua, te haamanaò noa mai ra ia i ta te taata faaäpiäpiraa i to na haereà. Te auraa ra, aita ia te pape e faaère nei i te taata i te fenua, te taata rä teie e hinaaro nei e faahuru ê i te taheraa o te pape, te taata atoà teie e hinaaro nei e faanaho atu i te pape. No te reira faatura òre i àmu ai te pape i te fenua tei riro noa mai te tahi raveraa i to na tiàraa e to na vairaa mau. Te auraa ra, tämata noa atu ä te taata i te faahuru ê i te haereà o te pape, e hoì faahou ihoä te pape i to na vairaa, no te mea ua ìte te päpe i te mea maitaì no na, e ia maitaì hoì te pape ra, ua maitaì atoà ia te taata. Eere änei e, o te hinaaro ia o te Atua, ia ìte te taata i te maitaì, te òaòa, e te hau. Te mea e tupu nei i roto i na taiòraa e maha tei faanahohia no teie mahana, teie te mau ìrava tei faatumuhia èi parau aè no tätou e âparauraa na tätou no teie taime haamoriraa :

-Taramo 91, 9 No te mea ua faariro òe i te Fatu, ta ù haapüraa. O Tei Teitei ra, ei pärahiraa ora no òe ra.

-Teuteronomi 26, 9 e ua arataì mai hoì ia tätou i ô nei, e ua höroà mai i teie nei fenua no tätou i te fenua tahe pape noa te ü e te meri nei.

-Roma 10, 9 Ia fäì hoì to vaha i te Fatu ra ia Ietu, e ia faaroo to âau e ua faatià te Atua ia na i te poheraa ra, e ora ia òe.

-Ruta èv. 4, 2 e e piti taau aè ra mahana tötövähia iho ra o ia e te tiàporo. Aore ä o ia i àmu i te mäa i taua nä mahana ra; e hope aè ra, poìa iho ra o ia.   

 Teie te âparauraa, a Ietu e to na taeaè te Tiàporo, e aore o Tätani :

 -Mä te î i te Värua Maitaì, e ärataìhia e te Värua i te mëtëpara,

- Ruta èv. Piti taau mahana, tötövähia e te tiàporo. Aore i àmu i te mäa ia hope, poìa iho ra o ia.

-Tiàporo, E tamaiti òe na te Atua ra, a parau òe i teie nei ôfaì ia riro ei päne.

- Ietu, Ua päpaìhia: «E òre te taata e ora i te päne anaè ra, i te mau mea atoà rä i haapaòhia e te Atua.»

-Ruta èv. I nià i te hoê mouà teitei, e ua faaìte mai ra ia na i reira ra i te mau pätireia atoà o te ao nei.

-Tiàporo, E horoà atu vau te hau, te hinuhinu i te fenua, ua püpühia mai, e na ù e horoà i te taata i hinaaro.

-Tiàporo, ia tià ia òe i te tähopu mai ia ù nei, na òe anaè ia.

- Ietu, «O te Fatu ta òe e tähopu, e o ia anaè ta òe e haamori.»

-Tiàporo, «E tamaiti òe na te Atua ra, e haamaìri òe ia òe iho i raro i teie nei vähi;

-Tiàporo, ua päpaìhia e: «E poroì o ia i ta na mau merahi ia òe, e tiaì ia òe;

-Tiàporo, e na rätou e mau ia òe i to rätou rima, òi tiàià noa atu to âvae i te ôfaì.»

- Ietu, «Eiaha òe e àa atu i to Atua i te Fatu.»

-Ruta èv. E hope aè ra ta te tiàporo tötöäraa, haere iti ê atu ra o ia, faaruè mai ra ia na.

Te mau parau i pähonohia e Ietu no te haapäpü ia, i to na tiàraa taata i mua ia Tätani, to na ôpu no te maa, to na tiàturiraa no te haamori i te Atua Nui Tumu Tahi, to na tura no te faahaèhaa i mua i te Atua Nui Tumu Tahi. Teie huru parauraa te faaìte noa ra o Ietu e, tei te fenua nei o ia te faatupuraa te hinaaro o to na Metua. Ia parau o Ietu i te pane, te haamori, te tura, no te haapäpü ia to na tapu âvae tei nià i te fenua, ta na ia parauraa i te fenua, aita to na e tüàtiraa i nià i te fenua ta te Tenete e faaìte ra. I faahanahana ai o Ietu i te fenua, no te mea ia, te fenua te mätamua i färii i te maitaì o te parau a te Atua, te fenua hoì tei riro ei ìte e ei faaìte i te rahi o te hanahana o te Atua. Eere rä no te mea te faahiti nei tätou i teie mau manaò i riro ai te reira ei mea òhie i te färii-atoà-hia e te taata. No roto ihoä paha te fenua i te pöuri i te raveraahia mai e te Atua, te fenua atoà rä te mätamua i ànaànahia e te märamarama o te Parau a te Atua, e ia fäì te Atua i te maitaì o te märamarama, ia ìte ia tätou e, eere no te märamarama anaè te reira maitaì, no te fenua atoà rä i faahoì mai i te maitaì o taua märamarama ra. I òre ai o Ietu e poia no te mea ua tiàturi o ia i te tauturu a te mëtëpara, te fenua ia, te maitaì ia o te märamarama, te mea ia e, aita o ia i türama noa i te fenua mai te tahi mea i nä nià mai i te tau i raro, ua nä roto atoà mai rä i te fenua, nä roto i te mau täpaò ora ta te fenua i faaìte mai e tei riro ei mauruüruraa na te Atua. Te mea e au no te fenua e au atoà ia no te taata. Te auraa, eita te märamarama e tano ia faataa-ê-hia i te Parau, eita hoì te ora e tano ia faataa-ê-hia i te märamarama ta te reira Parau i faatupu mai. No reira e òre ai e tià ia tätou ia faaea noa i nià i te mea i parauhia, aore ra te mea i päpaìhia mai te òre e tïtau i te märamarama. Te auraa, eita te taata e ora i te parau, oia te mea i parauhia, aore ra te mea i päpaìhia, riro noa ai ei parau no te fenua, aore ra ei parau no te Mäòhi, e ora rä i te märamarama o te parau, te märamarama tei riro te parau, aore ra te päpaì, ei püòhu, ei fauraò. Te faufaa o te parau, te riroraa ia ei faatupu i te märamarama, oia hoì ei tauturu i te taata i te ìteraa i te òhipa e tiaìhia ra ia na ia rave atu. E tano te fifi o te taata i te färiiraa i te parau o te fenua ia faaauhia i te fifi o te mau pipi i te märamaramaraa i te parau o Ietu. A hiò noa ai e a faaroo noa ai tätou i te fenua, mai te ìte òre e te häroàroà òre, no te mea ia, ua mäìti ê na e ua faaoti ê na tätou i te mea ta tätou e hiò, e te mea ta tätou e faaroo, e aha ia ta te fenua haapiiraa mai ia tätou i reira. Haamanaò tätou e, eere te fenua no roto atu ia tätou i te püraa mai i te ao nei, o tätou rä, e tamarii ia na te fenua, e eita to tätou parau e tano ia faataa-ê-hia i to te fenua. I te roaraa o te tau ta tätou i haere mai, aita änei tätou i faaea noa i nià i te paa, te püòhu, e i faaruè i te mäa. Aita änei tätou e ìte noa ra e, ua pau ê na te mäa, e ua tae i te taime no te faaâpï i te mäa no te mea aita e faufaa ia täpeà noa i te paa e aita o roto e mäa. 

E faaamuhia te moa i te ota haari, te taata rä, te rito të au ia na. Ua ìte maitaì tätou i nià i te räau, no te tupu i te rahi, aita te räau i fifi i te tauiraa i to na huru, te faaruèraa i te paa tahito mai te mono mai i te paa âpï, te faaruèraa i te rauère para, te rauère tahito, no te mono mai i te mea âpï. No te aha ia tätou aita i täpeà mai i te haapiiraa a te räau. Aita tätou e parau nei e, mea faufaa òre te paa tahito e te rauère tahito, ua riro te taa-ê-raa te paa e te rauère tahito i te tumu ei täpaò no te tupu-maitaì-raa o te hoê räau. Te paa hoì e te rauère i topa i raro, ua riro ia ei haamaitaì i te fenua e ei haamaitaì i te tupu o te räau. Teie hoì paa âpï e teie rauère âpï, e paa noa ihoä e rauère hoì no taua räau nei. Te hinaaro nei tätou i te faaâpï, mai te òre rä e faaruè i te paa tahito e te rauère tahito, e tae noa atu i te âmaa marö. Ia òre te hoê räau ia tupu i te rahi, oia hoì ia òre ia faaruè i te paa tahito e te rauère tahito, ia òre ia faaâpï i to na püòhu, te pohe atu ra ia räau. Aita änei hoì tätou i tae atoà i reira. To tätou fifi, te mea ia e, ua mätau roa tätou i te hiò i te fenua mai te mea, o te paa ia, âreà te raì, te mäa värua ia, te ora, te pätireia o te Atua. E parau maamaa ihoä paha te parau o te paa räau, te rauère räau, e te âmaa pohe, aore ra te âmaa marö, e haapiiraa rahi rä ta te räau e horoà mai nei ia tätou, no te räveà e noaa ai ia tätou te märamarama i nià i te hinaaro o te Atua ia tätou. Haut du foTe fenua, te vähi ia ta te Atua i mäìti no te ìritiraa i te ùputa o te märamarama. Ta Ietu ia e àvari nei, na roto i to na poia, te poia ra e täpaò ia no te ora, te ora te marämarama ia o te âau i nià i na parauraa e toru o Ietu :

- Ua päpaìhia: «E òre te taata e ora i te päne anaè ra, i te mau mea atoà rä i haapaòhia e te Atua.»   

- O te Fatu ta òe e tähopu, e o ia anaè ta òe e haamori.

- Eiaha òe e àa atu i to Atua i te Fatu.

 

 

Teraì òr. Faatura.