Ruta èv. 9.11-17 Mäa

 

Tāpati 19 no Tiunu 2022.

Mäa

Taramo 110

1 Taramo na Tävita. Ua parau atu ra te Fatu i ta ù Fatu: «E pärahi òe i ta ù rima àtau nei, e ia faarirohia e au to mau ènemi ei taahiraa âvae no òe.»

2 E faatae atu ä te Fatu i te tëpeta ra o to òe mana mai Tiona atu nei. E arii hoì òe i rotopü i to mau ènemi ra.

3 E tià rahi roa to to òe ra mau taata, i te mahana e faaìtehia ai to òe ra mana mä te tura moà ra; to òe ra huaai,  mai te hau ia no te ôpü ra o te poìpoì.

4 Ua tapu te Fatu, e òre e tätarahapa: «E tahuà òe e a muri noa atu, ia au i te parau ia Meretiteteta.»

5 Na te Fatu i to rima àtau ra, e täìri i te hui arii ia tae i te mahana e riri ai o ia ra;

6 e haavä o ia io te mau êtene ra; e ia î noa atu te fenua i te taata pohe; e täìri hoì i te feiä rarahi no te mau fenua e rave rahi.

7 E inu hoì o ia i te pape e tahe nä te pae èà tià, e no reira o ia e faateitei ai i te upoo i nià.

Tenete 14.18-20

18 E ua hopoi atu ra hoì te arii o Tärema o Merehiteteta, i te päne, e te uaina; e no te mea e tahuà o ia na te Atua teitei,

19 ua haamaitaì atu ra o ia ia na, nä ô atu ra, Ia haamaitaìhia Âperäma e te Atua teitei, e te Fatu o te raì e te fenua nei.

20 e ia haamaitaìhia hoì te Atua teitei o tei tuu mai i to mau ènemi i to rima na. Ua tuu mai ra o ia i te àhuru i taua mau taoà atoà o te pau ra no na.

1Tōrīnetia 11.23-26

Te haamauraa i te àmuraamäa a te Fatu (Mät 26,26-29; Mär 14,22-25; Ruta èv 22,14-20)

23 I noaa hoì ia ù i te Fatu ra ta ù i tuu atoà atu ia òutou na, e: Ua rave te Fatu ra o Ietu i te päne i te ruì i haavarehia mai ai o ia ra,

24 e oti aè ra ia na te haamaitaì i te Atua, vävähi iho ra, nä ô atu ra: «A rave mai, a àmu; o ta ù tino teie e ôfatihia no òutou nei. E nä reira òutou ei manaòraa ia ù.»

25 E ua nä reira atoà hoì i te âuà, ia oti aè ta na àmuraa, nä ô atu ra: «Teie nei âuà, o te faufaa âpï ia i to ù nei toto, e nä reira òutou ia inu ei manaòraa ia ù.»

26 Ua àmu anaè òutou i teie nei päne, e ua inu anaè i teie nei âuà, ua faaìte ä ia òutou i te pohe o te Fatu, e tae noa mai o ia ra.

Ruta èv. 9.11-17

11 E ìte aè ra te rahi o te taata atoà ra, ua pee mai ra rätou ia na. E ua färii atu ra o ia ia rätou, e ua parau atu ra i te parau o te Pätireia o te Atua, e faaora atu ra i te feiä maì.

12 E tapetape roa atu ra te mahana, ua parau mai ra te tino àhuru mä piti ra ia na, nä ô mai ra: «E tuu atu i te mau taata nei, ia haere na i te mau ôire rii, e te mau fare fätata nei, ia noaa te mäa na rätou, e te taòtoraa: e mëtëpara hoì teie ta tätou e pärahi nei.

13 Ua parau atu ra o ia ia rätou: «Na òutou e hopoi atu i te mäa na rätou. Ua parau mai ra rätou: «E pae roa a tätou päne, e piti hoì ià tirä rä. Âreà e haere mätou e hoo i te mäa na teie nei feiä rahi.

14 E pae hoì tautani o te taata. Ua parau atu ra o ia i ta na mau pipi: «A faataòto pupu na ia rätou i raro, ia taìpae àhuru i te pupu hoê.

15 Ua nä reira atu ra rätou, faataòto atu ra ia rätou atoà i raro.

16 Ua rave iho ra o ia i nä päne e pae e nä ià e piti ra, hiò aè ra i nià i te raì, haamaitaì atu ra i te Atua i taua mäa ra, vävähi iho ra, tuu atu ra i te mau pipi e tuu i mua i te aro o taua feiä rahi ra.

17 Àmu anaè iho ra rätou, e paìa aè ra. Òhihia iho ra te toeà mäa, e î aè ra nä ète rarahi hoê àhuru mä piti.

Manaò,

I mua i te mau taiòraa e maha nei, te faaìtehia ra te teitei no te mau òhipa faaora i tupu i roto i hanahana o te Atua Nui Tumu Tahi. Tei haapäpü i te tupuraa no te mau faanahoraa ei haamanaòraa i to te Atua pärahi fatata-noa-raa i pïhaì iho i te taata. Eere änei e, tei raro iti noa aè te taata i te mau merahi i te hämaniraahia e te Atua. Ta tätou täpura òhipa mätamua roa e te Mäòhi, te faatupuraa ia i to tätou mäòhiraa, eiaha no te rätere, no te faaî i te âfata moni a te fenua, nä roto i te hooraa i to tätou âià, e te türaìraa i ta tätou mau tamarii i roto i te tahi oraraa ê atu i te faanahoraa e au i te Atua, no te faahanahana rä i te Atua, ia tiàhia to na hinaaro ia tätou nei. Mea nä ô tätou ia tauturu i te Atua ia tupu to na hinaaro i te fenua nei, i roto i to tätou nünaa iti. E hape huru hape mau to tätou i te manaòraa e tähitohito i te parau o te mäòhiraa, no te mea o te Atua iho te reira. E aha te maitaì e noaa ia tätou i te àroraa i te Atua ; e hanahana änei to na iòa moà i te reira. Ia riro ei òaòaraa no tätou te amoraa i to tätou mäòhiraa, te Atua terä e teitei ra, to na tura ta tätou e faaìte ra. Faaea tätou i te ìmi i te tura i te vähi aita o reira e tura, e te hinuhinu hoì i te vähi e mohimohi noa ai to tätou parau, e marau roa atu ; marau i te haapaò òre e te täuà òre i te horoà a te Atua ia tätou. Te nä ô ra te paraparau a te tahi tamaiti himene : te ìriti noa ra te Atua i to na mau maitaì … A ui atu ai ia tätou e, no te aha. Eere änei no te rahi te täuà òre o te taata, no te vahavaha i ta na iho, e no te nounou i ta vëtahi ê. Mai te ômuaraa mai e tae mai i teie nei, eita e òre te tahi i te uiui noa e, e aha rä, e ia hiòhia, mea aè, e Mäòhi ; mea aè, e Mäòhi ; no te Mäòhi noa atu ra ia te parau. Oia ia, eiaha rä e fiu i te faarooraa i to tätou parau, eiaha hoì e fiu i te haamanaòraa i te here o te Atua ia tätou. Ua moèhia änei ia tätou e, e òhipa atoà tätou na te Atua Nui Tumu Tahi, e aha te mea tätou i fifi ai i te färiiraa i te reira, e aha tätou e òre ai e hinaaro i te hiò i ta te Tumu Nui i rave no tätou. I mua i te parau o te maa, e tano ia parauhia e, e paìa püai tätou, ua faahiahia roa tätou i te reira ia haamata ra tätou i te haapae i te maa, e vai noa mai te maa Mäòhi i to na vairaa mai te mea ra ia ua anianiahia i te tähitohitoraa i te òhipa ta te Atua i rave no te Mäòhi, te nünaa ta te Atua i mäìti ei nünaa no na. Tei muri paha ia te taèro i te hora päpua. Aita teie taèro i mäìti i te taata : te mea paari, te mea âpï, te mea fanauà, e tae noa atu i te ata o te taata. Te taata ia taèro i te ià, maoro te àmuraa i te ià, ua haùti faahou te taèro. Mai te reira atoà te taata i taèro i te parau o te Mäòhi, maoro o ia i te faarooraa i te parau o te Mäòhi ia faahitihia, te haùtiraa iho, e ìriti-roa-hia te tahi ia täfifi. Ahiri aè e papaâ te faahapa, maa vähi iti ä ia ; âreà i teie, te Mäòhi iho te mea ènemi roa i to na parau, e to na nünaa. A tià paì, te taèro i to na iho parau. Vaiiho na ra ia ärataìhia tätou ia au i te haapotoraa o na taiòraa e maha no teie mahana :

-Taramo 110, 3 E tià rahi roa to òe ra mau taata, i te mahana e faaìtehia ai to òe ra mana mä te tura moà ra; to òe ra huaai,  mai te hau ia no te ôpü ra o te poìpoì.

-Tenete 14, 19 ua haamaitaì atu ra o ia ia na, nä ô atu ra, Ia haamaitaìhia Âperäma e te Atua teitei, e te Fatu o te raì e te fenua nei.

-1 Torinetia 11, 25 E ua nä reira atoà hoì i te âuà, ia oti aè ta na àmuraa, nä ô atu ra: «Teie nei âuà, o te faufaa âpï ia i to ù nei toto, e nä reira òutou ia inu ei manaòraa ia ù.»  

Ruta èv. 9, 16 Ua rave iho ra o ia i nä päne e pae e nä ià e piti ra, hiò aè ra i nià i te raì, haamaitaì atu ra i te Atua i taua mäa ra, vävähi iho ra, tuu atu ra i te mau pipi e tuu i mua i te aro o taua feiä rahi ra.

Ua tupu ta tätou parau i to Ietu ìteraa i te rahi o te taata pee mai ra ia rätou. E ua färii o Ietu, ma te haapii i te mau parau o te Pätireia o te Atua, e faaora i te feiä maì. Ua  tapetape roa te mahana, ua parau mai ra te tino àhuru mä piti ia Ietu: «E tuu atu i te mau taata nei, ia haere na i te mau ôire rii, e te mau fare fätata nei, ia noaa te mäa na rätou, e te taòtoraa: e mëtëpara hoì teie ta tätou e pärahi nei. Te reo o Ietu i mua i te ahoaho o te mau pipi: teie te reo o Ietu «Na òutou e hopoi atu i te mäa na rätou. Ua parau mai ra rätou: «E pae roa a tätou päne, e piti hoì ià tirä rä. Âreà e haere mätou e hoo i te mäa na teie nei feiä rahi. E pae tautani taata i taua mahana ra. Te reo o Ietu  i ta na mau pipi: «A faataòto pupu na ia rätou i raro, ia taìpae àhuru i te pupu hoê. Ua nä reira atu ra rätou, faataòto atu ra ia rätou atoà i raro. 16 Ua rave iho ra o ia i nä päne e pae e nä ià e piti ra, hiò aè ra i nià i te raì, haamaitaì atu ra i te Atua i taua mäa ra, vävähi iho ra, tuu atu ra i te mau pipi e tuu i mua i te aro o taua feiä rahi ra. Àmu anaè iho ra rätou, e paìa aè ra. Òhihia iho ra te toeà mäa, e î aè ra nä ète rarahi hoê àhuru mä piti. Ua faataòto o Ietu i na taata e pae tauatini, ia tià i teie mau taata ia faaroo te reo o te fenua ia ìriti i te ùputa o te fenua. I hiò ai o Ietu i nià i te raì tuatinitini èi haamaitaìraa i te Atua Nui Tumu Tahi, vävähi iho ra i te maa, tuu atu ra i te mau pipi ia ôperehia e ua àmu ua toe.

Te taata ia haamata i te ôtohe, ia au i ta tätou tumu parau te mäa, ua ìte maitaì o ia i te mea ta na e àpe ra, te rave ra o ia mai te mea, aita taua mea ra, aore ra aita o ia e ìte ra, aore ra te rave ra i te tahi òhipa ia haru to na mata i te tahi vähi ê, aore ra te haamaniania ra ia òre roa atu to na tarià ia haru i te tahi mea e haamanaò ia na i te mea ta na e hinaaro ra i te haamoè. Te auraa ra, te haavare noa ra te reira taata ia na iho. E parauhia te reira e haavare ìte òre, aore ra e haavare faaroo òre, e haavare ihoä rä. Ta te puta Tenete ia e faahiti ra, Tenete 14, 19 ua haamaitaì atu ra o ia ia na, nä ô atu ra, Ia haamaitaìhia Âperäma e te Atua teitei, e te Fatu o te raì e te fenua nei. Ia riro ei teòteòraa no teie nünaa te haamanaòraa e, o Âperahäma to na tupuna, to na täamuraa i nià i te Atua ta na e parau ra ; ia riro hoì ei haapiiraa tumu na teie nünaa te haamanaòraa i te òhipa ta te Atua i rave no na, i te ìritiraa mai ia na mai roto mai i te fenua Aifiti, te fenua o te tïtïraa, te here o te Atua ia na ta na e faaìte ra. Eita te reira mau parau e moèhia. Hoê ä ia huru e te mea ta tätou e faaroo nei i roto i te reo tähitohito o te tahi pae o tätou, e tae noa atu i ta tätou iho mau tamarii, ia parau mai no ta tätou mau àài, aore ra te parau no te òhipa faahiahia i ravehia e te mau Aito e te mau tupuna mäòhi : eiaha e tiàturi i te reira mau haavare, ua hope te tau o te reira mau parau, eita tätou e hoì faahou i muri. Te moèhia ra rä i teie feiä e, aita e mua, àhiri aita e muri, aita e ômou, àhiri aita e tumu. Ahiri aita to tätou mau tupuna, e parau tätou i te aha i teie mahana. No reira, mea maitaì terä reo hoo âià e te huna âià e haamata nei i te parare i roto ia tätou e ta tätou mau tamarii ia haapae-roa-hia atu. Tei hea ia peu i te ìteraahia e, na te fanauà e faaàmu i te maiaa. Aita, te itoito e te püai o te fanauà, no roto mai ia i te maiaa ; teie rä reo tähitohito, no roto mai ia i te tïpee e te òhi hänoa i ta vëtahi ê. No reira, eita e tano e faahiti i te parau o te moè no te tämata i te tämarü i teie hapa rahi roa to te nünaa. Taa noa atu ai te òhipa ta te Atua i rave no na, te rahiraa täpaò ta na i faaìte mai no ta na faaherehere ia na, te haapäpü noa mai ra teie huru to te nünaa i to na ätearaa i te Atua. Ia haapotohia, teie ia te parau e au : ua faaruè te nünaa i te Atua. Te mea ia ta te Atua iho e heheu mai ra ia nä ô mai o ia e : -Taramo 110, 3 E tià rahi roa to òe ra mau taata, i te mahana e faaìtehia ai to òe ra mana mä te tura moà ra; to òe ra huaai,  mai te hau ia no te ôpü ra o te poìpoì.

Teie te huru e te auraa ta te Atua i hinaaro i te haamau i roto ia na e to na nünaa, e mea pinepine roa rä to na nünaa i te haamoè ia na. Ia parau tätou i te moè, no te tahi ia òhipa ta te roaraa o te tau i parai i roto i te manaò e te âau o te taata ; âreà te haamoè, te tahi ia faaotiraa ta te taata i rave, i te mäìtiraa i te mea ta na e täpeà mai i roto i to na manaò e to na âau, e te mea ta na e haapae, no te mea aita o na e ìte faahou ra i te faufaa. Te ùpaùpa, oia te mau taihaa e faaòhipahia no te paèpaèraa i te himene e no te âpeeraa i te òri i roto i te ârearearaa, e faufaa tumu te reira na te hoê nünaa. Te auraa, aita to rätou e ìno, eere no te mea ua parauhia te tahi taihaa e, tïtä, ùkarere, i riro ai ei mea ìno, aita hoì i hämanihia no te faatupuraa i te ìno, e no te hämani-ìno-raa i te taata. Te vähi tei reira te nünaa, i roto i te mau taime faufaa o to na oraraa, i roto i te òaòa, te peàpeà, i roto i te haamoriraa, aore ra i roto i te ârearearaa, no te faahanahana i te Atua, aore ra no te faahanahana i te manihini, no te tämäaraa, te faaipoiporaa …, te faataì nei te taata i te ùpaùpa. Te òiòi rii nei paha tätou i te faaoti e, no te mea ua faataìhia te tahi ùpaùpa i roto i te ârearearaa, e òre ai e tano ia faataìhia i te vähi e te taime haamoriraa i te Atua. Ei faaauraa na tätou, nä ô noa na tätou : no te mea änei ua ìtehia te tahi taata i te himeneraa i te himene taureàreà i roto i te ârearearaa, e tano ai tätou e parau e, eita ia taata e tano faahou e himene i roto i te fare pure i te taime haamoriraa no te mea ua viivii to na reo, aita hoê mea e faatano ra ia tätou i te hinaaroraa e ôpani ètaèta i te reira taata ia tomo i roto i te fare pure. Ua ìte maitaì tätou e, mai te òrometua, te tiàtono, te haapii parau maitaì, e tae noa atu i te taata päroita, aita hoê taata e tano faahou e haamaitaì i te Atua i te reo himene. E ia faahiti tätou i te parau o te mau tamarii no te haapiiraa täpati, ua ìte atoà tätou e, maoro te reira mau tamarii i te taureàreàraa mai, èrä e nä nià atoà atu i te taìara o te mau metua. E ia manaò hoì tätou i te faataì noa i te rïpene ia òre ia ìtehia atu te vaha taata ia haùtiùti no te himene, te vai ra ia te parau o te feiä no rätou te reo i faaharuharuhia i roto i te rïpene … Ua manaò hoì tätou e, mea mä aè, aore ra mea moà aè, mea tura aè te ùpaùpa a te papaâ i roto i te haamoriraa, te haavare noa ra tätou ia tätou iho. Te parau mau, aita ä te Mäòhi i haùti i ta na ùpaùpa, ua faautuà ê na tätou ia na. Na te Mäòhi iho e faahapa nei i te Mäòhi. E aha ta na hara : to na mäòhiraa. Eere hoì to tätou mäòhiraa ta tätou e haamori nei, te hinaaro nei rä tätou e rave i te faufaa no roto mai i to tätou nei mäòhiraa ei haamoriraa e ei faahanahanaraa i te Atua. Ia haamaitaì o Ietu i te färaoa, te ïà, ua hanahana te Atua, ia haamaitaì te òrometua i e vai haari e te uto no te faahanahana i te Tumu Nui, mai te mea atu ra ia teie na mäa e òre e au no te ôroà moa a te Fatu, èi färaoa èi uaina e tià ai, i teie taime te haavahavaha ra tätou i te tumu no te Aroha e te here o te Atua Nui Tumu Tahi.  

 

Teraì òr. Faatura.

 

Ioane 16.12-15 Manaò

 

Tāpati 12 no  Tiunu 2022.

Manaò

Taramo 8

1 Na te Mënätehe nä nià i te titita. Taramo na Tävita.

2 E to mätou Atua, e te Fatu, ua teitei to òe iòa e àti noa aè te mau fenua atoà nei. E to òe ra hanahana, ua tuuhia e òe i nià iho i te mau raì ra.

3 Nä roto i te vaha o te mau tamarii e te mau àiü, i faatupu na òe i te püai i to mau ènemi ra; ia mämü atu te ènemi e te ono ra.

4 Ia hiò vau i te mau raì i te òhipa a to rima ra, te märama e te mau fetià ta òe i faaau ra:

5 E aha te taata nei i manaò mai ai òe ia na? E ta te taata nei tamaiti i haapaò mai ai òe ia na?

6 I raro iti aè o ia i te mau merahi i te hämani-raa-hia e òe ra, e ua faatoröna òe ia na i te hinuhinu e te tura.

7 Ua faariro òe ia na ei tävana i te mau òhipa a to rima, e ua tuuhia e òe te mau mea atoà nei i raro aè i ta na âvae:

8 te mau mämoe e te mau nana puaatoro atoà, e te mau puaa atoà o te aru ra;

9 te mau manu o te reva; e te ià o te tai, tei nä te èà moana i te haere ra.

10 E to mätou Atua, e te Fatu, ua teitei to òe iòa e àti noa aè te mau fenua atoà nei.

Māteri 8.22-31

22 Ia te Fatu ra vau i haamata ai o ia i ta na òhipa; hou ta na mau òhipa, mai tahito mai ä.

23 Ua faatähinuhia vau mai tahito mai ä; hou te haamataraa i te òhipa nei, hou te fenua nei.

24 Aore hoì e miti ra, i fänau na vau, aore hoì e pape rahi i te pihaaraa.

25 Aita i tätumuhia te mau mouà, aita hoì te mau âivi, i fänau na vau;

26  aita hoì i hämani i te fenua, e te mau vähi ätea ra, e te hoê huà iti repo o te mau fenua nei.

27 Ia na i haamau i te mau raì ra, tei reira vau; ia na i tïpaò i te moana e àti noa aè;

28 ia na i haamau i te ata i nià ra; ia na i faaètaèta i te mau tumu o te moana;

29 ia na i haapaò i te ôtià o te miti ra, ia haapaò mäite te moana i to na ôtià ia na i haamau i te tumu o te fenua ra.

30 Tei pïhaì iho hoì au ia na i reira mai te tamaiti faaàmu; e te òaòa noa ra vau i te mau mahana atoà ra, te òaòa-tämau-mäite-raa i mua i ta na aro;

31 i te òaòa-mäite-raa i te fenua i pärahihia e te taata ra; e tei te mau tamarii a te taata ra to ù òaòaraa.

Rōma 5.1-5

Te hau a te Atua

1 E teie nei, ua tiàhia tätou i te faaroo, e hau to tätou i te Atua ra, i to tätou Fatu ia Ietu Metia ra;

2 no na hoì tätou i ö ai i te faaroo i roto i teie nei maitaì i pärahihia e tätou nei, e te òaòa nei i te tiaìraa i te maitaì o te Atua.

3 Eere hoì te reira anaè ra, te òaòa atoà nei rä tätou i te mau àti nei; ua ìte hoì tätou e, na te pohe e faatupu i te faaòromaì;

4 e na te faaòromaì e faatupu i te ìte; na te ìte e faatupu i te tiaì.

5 E òre hoì te tiaì e faahaamä mai, no te mea ua niniihia mai te hinaaro o te Atua i roto i to tätou âau e te Värua Maitaì i horoàhia mai ia tätou nei.

Ioane 16.12-15

12 E rave rahi ä ta ù parau ia parau atu ia òutou, eita rä e tià ia òutou i teie nei.

13 Ia tae mai rä te Värua parau mau ra, na na ia e arataì ia òutou i te mau parau mau atoà ra. E òre hoì ta na parau e riro na na iho; o ta na rä i faaroo ra, o ta na ia e parau mai e na na hoì e faaìte mai ia òutou i te mau mea e tupu a muri atu ra.

14 E haamaitaì o ia ia ù; e rave hoì o ia i ta ù ra, a faaìte atu ai ia òutou.

15 O te mau mea atoà a te Metua ra, na ù ia. I parau atu ai au e, e rave o ia i ta ù ra e a faaìte atu ai ia òutou.

Manaò.

Te pehepehe nei te aru a te Atua Nui Tumu Tahi, i te mau faufaa i Rähuahia tei faaìte i te hanahana o te fenua, te moana, te reva e te mau raì. Teie mau faufaa i te Atua ra rätou i te tautururaa ia tupu te ôpuaraa faaora hinaarohia no te taata. Ia manaò te taata i te mea ta na e faanaò ra no roto mai i te aroha e te here o te Atua. Te manaò te haamataraa te reira no te hinaaro, no te tuuraa te mau parau àro i fërurihia i roto i te märamarama tei faatupu i te òhipa i mua i te mata òoi o te mau taata e faahiahia rä te maitaì ia hotu tuatau noa na. Ia na reira tätou e vai tämau noa te mau ôpuaraa faaora a te Atua, ma te ära ra e tupu âpitipiti te maitaì e te ìno tei teie vahi i te äniraahia ia tätou ia âpee ia òre te ìno, ia ìnoìno. Te mau mea të òre e ia moèhia i te haamanaò ia faahiti tätou i te parau o te manaò o te Atua, no te mea to tätou te reira maitaì, te mea mau ia ta te Atua ia haapaò no tätou. Mai te mea atu ra e, na te mau mea faufaa òre e faaìte mai i te taata, te faufaa o te maitaì, i tura ai ta na òhiparaa. Te hanahana tei roto i ta tätou parau, to tätou huru, e ta tätou mau peu, e aha to reira te faanahoraa e au no te Atua Nui Tumu Tahi. Taa noa atu ai te manaòraa i teie taata ta te Atua e parau nei e, to na ia tiaì, te mea ta te Atua e hinaaro ra ia tätou ia ìte, eere te òhipa ta na e rave ra, te òhipa rä të òre te tiaì e rave, te tiaì ta te manaò e faahiti nei o te taata ia tei ìte i ta na hopoià i roto i te ôpuaraa faaora i manaòhia mai e te Atua no te taata. Aita ta te Atua e tatararaa no te parau o te tiaì, ua ìte rä te Atua e, ua ìte tätou i te pähonoraa, te mea ia o ia i ani mai ai ia tätou e hiò. Ia hope aè i te taata te haapae i te mau mea të òre e au i te Atua, te toe noa ra te mau mea ta te Atua e hinaaro ra ia na ia rave. Mäite âèho paruparu ihoä paha tätou, e te mörï mohimohi, te räveà rä te reira tei au i te Atua no te türama ia tätou i nià i te parau o te taata e ta na faaìteraa ia na, i roto hoì i te mau mea paruparu e ìtehia ai te rahi o te Atua. E aha te âèho taraoha, e te mörï mohimohi, eere änei e, ta tätou ia hiòraa i te parau o te fenua. Teie parau tei pïhaì iho roa ia tätou, tei to tätou vaha, tei to tätou âau, ia haapaò tätou i te reira. E tano tätou e püòi mai e, a faaroo ia òe iho, a tiàturi ia òe, a tiàturi i te fenua, tirä rä. E haavare ä te taata, eita te fenua e haavare, te mau ra hoì te fenua i te parau mau a te Atua. E tano tätou e parau e, te fifi i roto i te parau o te taata, eere te Atua, te taata rä, no to na hinaaro ia ö te Atua i roto i te mea ta na i manaò e, mea maitaì ia ravehia no te Atua, ia au i te manaò e, tei au i to na manaò ra, ua au atoà ia i te Atua. Te ìte ra tätou e, rahi noa atu tätou i te haperaa, rahi noa atu tätou i te onoöno i te manaòraa e, te tano noa ra. Ua ìte maitaì tätou e, aita ta te Atua e parau i roto i te fare ta te taata i manaò e vahi haamoriraa, eere to na hanahana ta teie mau taata e ìmi nei, to rätou rä mana ta rätou e hinaaro ra i te taata ia ìte, e ia mataù. Te ôpani nei òutou i te pätireia o te Atua i te taata, e òre òutou iho e tomo, e te feiä e tomo ra, te täpeà nei òutou. Haamanaò tätou e, faaueueraa, te auraa ia o teie taò tävini, ta te taata e manaò nei e raatira hänere o ia. Te tupu âpipiti noa nei teie nä räau, hoê ihoä rä të huhutihia e të hurihia atu i vaho, hoê hoì të täpeàhia mai. Teie te haapotoraa no te mau taiòraa turu :

-Taramo 8, 5 E aha te taata nei i manaò mai ai òe ia na? E ta te taata nei tamaiti i haapaò mai ai òe ia na?

-Materi 8, 29 ia na i haapaò i te ôtià o te miti ra, ia haapaò mäite te moana i to na ôtià ia na i haamau i te tumu o te fenua ra.

-Roma 5, 4 e na te faaòromaì e faatupu i te ìte; na te ìte e faatupu i te tiaì.

-Ioane 16, 13 Ia tae mai rä te Värua parau mau ra, na na ia e arataì ia òutou i te mau parau mau atoà ra. E òre hoì ta na parau e riro na na iho; o ta na rä i faaroo ra, o ta na ia e parau mai e na na hoì e faaìte mai ia òutou i te mau mea e tupu a muri atu ra.

E faufaa mau teie e vai nei i roto i teie mau manaò i faahitihia i roto i te mau tau mäoro tei òre i marau to na mau päpaì, tei rätere i roto i te mau uì atoà e tae roa mai ia tätou nei tei faaìte mai te puai o te mau manaò. Mai teie e faahitihia nei e Ioane i te pene 16 i te mau ìrava 12 e moti i te 16, E rave rahi ä ta ù parau ia parau atu ia òutou, eita rä e tià ia òutou i teie nei. 13 Ia tae mai rä te Värua parau mau ra, na na ia e arataì ia òutou i te mau parau mau atoà ra. E òre hoì ta na parau e riro na na iho; o ta na rä i faaroo ra, o ta na ia e parau mai e na na hoì e faaìte mai ia òutou i te mau mea e tupu a muri atu ra. 14 E haamaitaì o ia ia ù; e rave hoì o ia i ta ù ra, a faaìte atu ai ia òutou. 15 O te mau mea atoà a te Metua ra, na ù ia. I parau atu ai au e, e rave o ia i ta ù ra e a faaìte atu ai ia òutou.

I mua i teie manaò no Ietu, eita tätou e maere i te mea te arataì nei o Ia ia tätou i roto i te  parau e mau, a riro atu ai tätou i muri iho ei ìte e ei faaìte i te parau o te ora no ô mai i te Atua ra, e ta te fenua e faaìte noa ra. I roto i teie pärahiraa no Ietu i te fenua nei, teie te tahi vähi të òre roa tätou e fifi i te hiòraa atu : e tià mai te ènemi, e àro mai i te taata atoà tei hinaaro i te faaìte i te ora no ô mai i te Atua ra. Te märamarama ra ia tätou e, nä roto i to Ietu faahitiraa i te parau mau, nä roto i to na färiiraa i te òhipa no reira te Metua i tono mai ai ia na, te färii atoà ra o ia e, e àrohia mai o ia, e eita te ènemi e faaherehere ia na i te mau taime atoà o ia e faaìte ai e, te fenua, te aroha ia e te here o te Atua, te ora hoì i nä roto mai i te pape i te püraa mai. Te ìte ra ia tätou e, aita te mau parau a Ietu i hope noa i roto i te faaìteraa i te parau mau te vai nei ä i riro ai te mau taata atoà èi mauhaa no ta na mau faatupuraa òhipa tei haamanaò noa i te parau ei täpaò tei hope: i nià ia na iho. Nä roto i to Ietu tomoraa i roto i te päpe, te faaâpï nei o ia i nià ia na i te òhipa i haamauhia mai e te Metua i te ìritiraa mai i te ora mai roto mai i te pape, i te haapäpü-faahou-raa e, ua tuu mai te Atua i te ora i roto i te fenua. Nä roto i te tomoraa i roto i te pape, te hope roa nei te mea ta Ietu i parau e : O vau e te Metua, hoê ä ia, Eiaha no te mea e, te hinaaro nei Ietu e täpiti i te rahu, oia te òhipa ta to na Metua i rave mai, te haapäpü ûàna nei rä o ia e, ta te Metua i hinaaro i te taata ia ìte mai, ta na atoà ia e faaìte, mai teie atu, ei hanahana no to na Metua. Ia au rä i te tahi manaò ta tätou i faahiti pinepine noa mai na, e tano tätou e haamanaò e, aita e òhipa ta Ietu e ani nei i te taata tei òre o ia i nä mua i te rave. No reira, ia parau Ietu e : 13 Ia tae mai rä te Värua parau mau ra, na na ia e arataì ia òutou i te mau parau mau atoà ra. E òre hoì ta na parau e riro na na iho; o ta na rä i faaroo ra, o ta na ia e parau mai e na na hoì e faaìte mai ia òutou i te mau mea e tupu a muri atu ra, te märamarama ra ia tätou e, no te mea ua ìte te taata i te ôpuaraa faaora a te Atua, e ua färii atoà i ta na òhipa, e tano ai o ia e tomo atoà i roto i te päpe, mai ta Ietu i ômua mai i nià ia na. Mai te Metua hoì, aita atoà te Tamaiti e hinaaro nei i te pohe o te taata, to na rä ora, aita rä to te taata e ora i räpae aè i te rahu a te Atua. No reira, te taata tei färii i te reira ora, ua färii atoà ia i te tomo i roto i te päpe tei riro ei ùputa no taua ora ra. Te taata hoì i färii i teie täpaò, eere faahou o ia te òhipa hopeà ta te Atua i hämani, inaha ua ineine o ia i te faaroo i te parau mau tei ìte e tei fäì i te Atua ei Atua, te Tumu o te ora.

 

Teraì òr. Faatura.

 

 

Ioane 14.15-26 Ôtare

 

Tāpati 5 no Më 2022.

ÔROÀ PENETETŌTE

Ôtare

Taramo 104

1 E haamaitaì i te Fatu, e ta ù värua. E ta ù Atua, e te Fatu, òe tei rahi roa. Ua vehihia òe i te hanahana e te   mana,

2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru;

3 i te vauvauraa i to na ra mau piha i te pape. E te raveraa i te mau ata ei pereoo no na, i te hahaereraa nä nià i te pererau ra o te mataì,

4 i te faariroraa i te mau merahi no na mai te mataì ra, e te mau tävini no na mai te auahi ura ra.

5 Na òe i haamau i te tumu o te fenua, ia òre roa ia âueue.

6 Ua täpoì hoì òe ia na i te àputo, mai te àhu ra, te teitei ra te pape i te mau mouà.

7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere.

8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra.

9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua.

10 Ua tuu mai o ia i te pape pihaa ei vai matätia, o tei tahe haere nä roto i te ärea o te mau mouà ra:

11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai.

12 I pïhaì iho te mau manu o te reva i te pärahiraa o tei òto i roto i te mau âmaa rii.

13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

14 Te faatupu nei o ia i te àihere na te mau puaa, e te räau rii na te taata. E te roaa nei te mäa ia na no roto i te fenua:

15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

16 Te mau räau a te Fatu ra, ua paari ia, te mau âreti i Repanona ra, ta na i tanu ra,

17 e tei ôfaahia e te mau manu ra. Te mau peruti ra to te hetite ra ùtuafare.

18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana.

19 Ua hämani o ia i te märama no te mau tau i haapaòhia ra, ua ìte hoì te mahana i to na maìriraa.

20 Na òe i hopoi mai i te pöuri, e ua ruì iho ra, ei reira te mau taehae o te ururäau ra e haere ai,

21 te mau riona âpï i te ûâ-haere-raa i te mäa, i te ìmiraa i te mäa i te Atua ra.

22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo.

23 Ua haere iho ra te taata i te òhipa na na, ta na i rave ra, e ahiahi atu.

24 Aita te huru rau o ta òe ra òhipa, e te Fatu. E mau räveà paari anaè ä ta òe.

Ua î te fenua nei i ta òe ra taoà.

25 E tënä na hoì miti rahi e te âano, tei reira te mau mea e nee haere, eita e hope ia taiò: te mau mea rii ra e te mea rarahi atoà ra.

26 Tei reira te mau pahï i te tere-haere-raa; tei reira te Reviatana ta òe i hämani i te haùti haereà.

27 Te tiaì anaè ra te reira ia òe ra, ia noaa ta rätou mäa i te taime mau ra.

28 O ta òe i horoà ra, o ta rätou ia i rave; ua heheu òe i to rima ra, ua î î anaè ia rätou i te maitaì.

29 Ua püroù òe i to mata ra, e àti ia to rätou. Ua rave mai òe i to rätou aho, ua pohe ia rätou, e ua hoì faahou i to rätou ra repo.

30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

31 E vai ä te hanahana o te Fatu e a muri noa atu.

Te òaòa nei te Fatu i ta na iho ra òhipa.

32 Ua hiò anaè o ia i te fenua, ua rürü ia; ua faatiàià anaè o ia i te mau mouà ra, ua pee te auahi i nià.

33 Te ora nei au ra, e himene ä vau i te Fatu; te vai nei au ra, e himene au ei haamaitaì i ta ù Atua.

34 E mauruüru ä to ù manaòraa ia na; e òaòa hoì au i te Fatu.

35 Te feiä rave hara ra, e mou ia i te fenua nei; e te feiä parau ìno ra, e òre roa ia. E haamaitaì i te Fatu, e ta ù värua e. Hareruia.

Òhipa 2.1-11

Te haereà mai o te Värua Maitaì

1 E tae mau atu ra i te mahana Penetetöte, ua taìruru mäite aè ra rätou atoà i te vähi hoê mä te hinaaro hoê.

2 E aore i mähia, o te haruru mai ra no nià mai i te raì mai te mataì rahi ûàna ra, î roa aè ra te fare i pärahihia e rätou ra.

3 Ua fä mai ra te arero mäa ia rätou ra mai te ahi ra te huru, e faaea iho ra i nià iho ia rätou atoà ra,

4 e î aè ra rätou atoà i te Värua Maitaì, ua parau iho ra i te parau èê, i ta te Värua i horoà mai i te parau ia rätou ra.

5 E te pärahi ra te taata âti-Iüta paieti i Ierutarëma, no te mau fenua atoà i raro aè i teie nei raì.

6 E parare atu ra taua roo ra, ua ruru mai ra te taata atoà, e mäere iho ra, no te mea i faaroo atu ra taua mau taata atoà ra i ta rätou iho parau mau i te parau-raa-hia mai ra.

7 Faahiahia atu ra rätou atoà mä te pöpou, nä ô iho ra rätou rätou iho: «Inaha, eere änei rätou e parau nei i to Tarirea anaè?

8 E aha rä hoì teie i ìte ai tätou atoà nei i to tätou iho reo mau i te parau-raa-hia mai?

9 To Paretia, e te âti-Mëtai, e te âti-Èrama, e te feiä e pärahi i Metopotamia, e Iutea, e te Tapatotia, e to Ponoto, e to Àtia,

10 e to Ferutia, e to Pamafuria, to Àifiti, e to Rupi i te pae i àti mai i Turene ra, e te taata èê hoì no Röma, te âti-Iüta, e te peroteruto,

11 to Tereta, e to Âräpia, i te faarooraa atu tätou ia rätou i te parauraa mai i te peu taa ê a te Atua i ta tätou iho nei mau parau mau.  

Rōma 8.8-17

8 E teie nei, te feiä i au i ta te tino ra, e òre roa te Atua e mauruüru ia rätou.

9 Aore rä òutou i au i ta te tino ra, te au nei rä i ta te Värua ra, no te mea te pärahi ra te Värua o te Atua i roto ia òutou. Te ère ra rä te hoê taata i te Värua o te Metia ra, eere ia o ia i te taata no na.

10 E tei roto te Metia ia òutou ra, te ora nei ia te Värua i te parau tià, ua pohe mau rä te tino i te hara.

11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na.

12 E teie nei, e te mau taeaè ra, e àmutärahu tätou, eere rä i ta te tino a haapaò atu ai i ta te tino ra.

13 Ia haapaò hoì òutou i ta te tino ra, e pohe ia òutou; ia tinai rä òutou i ta te tino ra i te Värua, e ora ia òutou.

14 O te feiä atoà hoì i ärataìhia e te Värua o te Atua ra, e tamarii anaè ia rätou na te Atua.

15 Eere hoì i te värua tävini tei noaa ia òutou ia mataù faahou; o te Värua faatamarii rä tei noaa ia òutou, i parau ai hoì tätou: «E Àpa, e ta ù Metua.»

16 O te Värua iho hoì, e to tätou atoà nei värua, o tei faaìte ia e, e tamarii tätou na te Atua.

17 E tamarii ra, e feiä tufaa ia; e feiä tufaa i te Atua ra, e feiä tufaa tätou e te Metia; te pohe âpipiti nei hoì tätou e o ia atoà, ia haamaitaì-âpipiti-hia tätou e o ia atoà hoì.

Ioane 14.15-26

E tono mai te Fatu i to na Värua

15 «Ua hinaaro òutou ia ù ra, e haapaò i ta ù parau.

16 Na ù hoì e ani atu i te Metua ra, e na na e horoà mai i te tahi Faaaò ia òutou, ia pärahi mau o ia e a muri noa atu io òutou nei.

17 O te Värua parau mau ra, o të òre e färiihia mai e te ao nei ra, no te mea aore i hiò ia na, aore hoì i ìte ia na. E ìte rä òutou ia na, e pärahi mau hoì o ia io òutou nei, e ei roto hoì ia òutou.

18 Eita vau e vaiiho ôtare noa ia òutou, e hoì mai ä vau ia òutou nei.

19 E ia roovaù iti aè, e òre to te ao e hiò faahou mai ia ù; e hiò mai rä òutou ia ù, no te mea e ora vau, e ora atoà hoì òutou.

20 Ia tae i te reira mahana e ìte ai òutou e, tei roto hoì au i ta ù Metua, e tei roto hoì òutou ia ù e tei roto vau ia òutou.

21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho.

22 Ua parau mai ra Iüta ia na (eiaha Ìtatariota): «E te Fatu, e aha òe i faaìte mai ai ia mätou ia òe iho, e aore i to te ao?

23 Ua parau atu ra Ietu ia na, nä ô atu ra: «Ia hinaaro mai te taata ia ù ra, e haapaò ia i ta ù parau. E e here mai hoì ta ù Metua ia na, e e haere atu hoì mäua ia na ra e pärahi mau atu io na ra.

24 O të òre e hinaaro mai ia ù ra, aore ia i haapaò i ta ù parau. Eere rä i ta ù teie nei parau ta òutou e faaroo nei, na te Metua rä i tono mai ia ù nei ra.

25 I faaìte au ia òutou i teie nei mau parau, i te pärahiraa vau io òutou nei.

26  Na te Faaaò rä, na te Värua maitaì ra, o ta te Metua e tono mai mä to ù nei iòa ra, na na e haapii mai ia òutou i te mau mea atoà; e e faaìte faahou mai hoì ia òutou i te mau parau atoà ta ù i parau atu ia òutou na.

Manaò.

Teie mahana te haamanaò nei tätou i to te Atua Nui Tumu Tahi ìritiraa i te ùputa tei täpirihia na i te taime te taata a rave ai te faaotiraa e färii i te ora, e färii i te pohe, färii i te maitaì, e färii i te ìno, töpä atu ai tätou i roto i te hara i reira to te Atua äteäraa ia tätou. Na roto i te faaòreraa hara i faatupuhia e Ietu, te mau haapiiraa tei faaìte i te ora, i te tiàturiraa i te mau tïtauraa a Ietu no te faatupu i te ao Atua i te fenua nei, i teie mahana e haapäpü ai te Värua Maitaì i te òhipa faahiahia te ìteraa te mau nünaa atoà i putuputu i taua mahana ra i te faarooraa i to rätou iho reo i te faahitiraahia i roto i te mau aòraa a te mau veà tono. E au atu ra tätou mau taiòraa no teie mahana i teie tämaïti tei täpaò haere i to na èà hoìraa i te fare i nià i te mau tumu räau no te aru.

Te nä ô ra ei manaò e, ua ìte ê na te taata i te èà hoìraa i te Atua ra, ua moèhia rä ia na, e aita o ia e haamanaò faahou ra. Teie hoìraa tätou i roto i te vai, no te haamanaò ia i te èà ta te Atua i faaineine no tätou, nä reira te mau täpaò, i nià i te mau tumu räau ta na i täpaò haere i nià i te mau tumu räau ta tätou e rave atu ia tae i te mahana e ìte ai tätou i te hinaaro o te Atua, oia te mahana tätou e märamarama ai i te mea ta te Atua e tiaì ra ia tätou ia rave. Teie püraa mai tätou i te ao nei, eere no te haere e ìmi i te Atua, no te hoì rä i te Atua ra, no te haere e tii i te märamarama e ìte ai tätou i te hinaaro o te Atua i te taata i te ao nei. Ia nä ô mai te päpaì taramo e :

1 E haamaitaì i te Fatu, e ta ù värua. E ta ù Atua, e te Fatu, òe tei rahi roa. Ua vehihia òe i te hanahana e te   mana,

2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru;

3 i te vauvauraa i to na ra mau piha i te pape. E te raveraa i te mau ata ei pereoo no na, i te hahaereraa nä nià i te pererau ra o te mataì,

4 i te faariroraa i te mau merahi no na mai te mataì ra, e te mau tävini no na mai te auahi ura ra.

5 Na òe i haamau i te tumu o te fenua, ia òre roa ia âueue.

6 Ua täpoì hoì òe ia na i te àputo, mai te àhu ra, te teitei ra te pape i te mau mouà.

7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere.

No te haamanaò mai ia e, no te mea aita te rahu i huna i te Atua, te faateniteni noa nei rä i to na iòa, te vähi mau atoà te reira e noaa ai ia tätou te ìte i te Atua, ia au i tei orahia mai e to tätou mau Tupuna. Teie atu ra te haapotoraa no te mau taiòraa o teie mahana :

-Taramo 104, 13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

-Òhipa 2, 4 e î aè ra rätou atoà i te Värua Maitaì, ua parau iho ra i te parau èê, i ta te Värua i horoà mai i te parau ia rätou ra.

-Roma 8, 17 E tamarii ra, e feiä tufaa ia; e feiä tufaa i te Atua ra, e feiä tufaa tätou e te Metia; te pohe âpipiti nei hoì tätou e o ia atoà, ia haamaitaì-âpipiti-hia tätou e o ia atoà hoì.

-Ioane 14, 18 Eita vau e vaiiho ôtare noa ia òutou, e hoì mai ä vau ia òutou nei.

Ua riro te mau mea atoà ta te Atua i rahu e ta na i hämani mai te hiò hipa e faaìte ra i te Atua, no te mea te parau ra rätou i te parau o te Atua, te faaìte ra hoì i to na hanahana. Ia haapotohia, te mea e hinaarohia ra i te taata, te färiiraa ia i te Faufaa ora a te Atua, e tae roa atu i roto i te vai no reira te mau mea atoà i te püraa mai. Te auraa ra, ia tae roa ia teie färiiraa i te Faufaa ora a te Atua i roto i te päpetitoraa, ia riro e, ia nä roto atoà te taata i te vai i te pü mai i roto i te märamarama. Ia tae i reira, ua märamarama atoà ia te taata e, te mau mea atoà e faaî nei i te fenua, e täpaò anaè ia no te aroha e te here o te Atua i te taata. Mai te peu te riro ra te rahu mai te hiò hipa ra te huru i te faaìteraa i te Atua, te faaìte atoà mai ra te reira hiò hipa i te mea e tiaìhia ra i te taata ia rave. Aita te hinaaro o te Atua i te taata i faaea noa i nià i te hiò noa, te mätaìtaì noa, tei nià atoà rä i te rave-roa-raa e te àmuraa hoì. Te mea ia ta te Atua e parau ra e : A hiò i tei au ei mäa, a rave a àmu, e ta Ietu i faaâpï i te nä ôraa e : O ta ù tino tenä, a rave a àmu ; o ta ù toto tenä, a rave a inu, oia hoì : a àmu e a inu i te aroha e te here o te Atua. Mai te peu te hotu o te fenua, te horoà a te fenua, te tino ia e te toto o Ietu, no te mea ia te ìte atoà ra Ietu ia na ei tamarii na te fenua, oia hoì te ìte atoà ra o ia i te fenua ei metua vahine no na, ia au i te hiòraa a te Mäòhi. Mai te fenua hoì e faaìte ra i te aroha e te here o te Atua Nui Tumu Tahi i te taata, oia atoà te Fatu, te reira atoà ta na faaìteraa. Te mea mau atoà ia ta te puta Òhipa  e parau ra ia nä ô mai o ia e :

7 Faahiahia atu ra rätou atoà mä te pöpou, nä ô iho ra rätou rätou iho: «Inaha, eere änei rätou e parau nei i to Tarirea anaè?

8 E aha rä hoì teie i ìte ai tätou atoà nei i to tätou iho reo mau i te parau-raa-hia mai?

9 To Paretia, e te âti-Mëtai, e te âti-Èrama, e te feiä e pärahi i Metopotamia, e Iutea, e te Tapatotia, e to Ponoto, e to Àtia,

10 e to Ferutia, e to Pamafuria, to Àifiti, e to Rupi i te pae i àti mai i Turene ra, e te taata èê hoì no Röma, te âti-Iüta, e te peroteruto,

11 to Tereta, e to Âräpia, i te faarooraa atu tätou ia rätou i te parauraa mai i te peu taa ê a te Atua i ta tätou iho nei mau parau mau.  

E te parau mau, te fenua ia. No reira, mai te peu ua färerei te aroha e te parau mau, oia hoì ua färerei te Atua e te fenua, färereiraa ta te Fatu i haere mai e haapäpü, e aha ia ta tätou e ìmi nei i te ùputa o te raì.

Teraì òr. Faatura.