2 Parareipomeno 7, 1 – 11 Mahana mäa 10 no Tetepa 2022

 

Mahana mäa 10 no Tetepa 2022

 

Faaitoitoraa

 

Taiòraa : 2 Parareipomeno 7, 1 – 11

 

E te nünaa o te Atua, tenä atu ä te täpaò no te here e te aroha o te Atua.

 

Te pö hopeà teie no ta tätou pureraa hepetoma no te Matahiti Âpï Etärëtia, ôpani atu ai tätou ànanahi täpati. Te parau e tano e täpeà mai, ia au i te arataìraa a teie puta Parareipomeno 2 o ta tätou i âpee mai i te roaraa o teie hepetoma, te parau ia no te faaroo, nä roto i to Toromona paturaa i te fare pureraa e tae roa atu i to na tomoraa, e teie ahiahi, te haamoàraa ia o te fare. Te mea päpü, i muri aè i te pure a te arii, ua pähono mai te Atua i ta na pure, nä roto i te maìriraa mai te ahi no te raì mai i nià i te mau tutia e te îraa te fare i te hanahana o te Atua.

 

Ua riro teie hepetoma ta tätou i ora mai, ei faaàma-faahou-raa i terä hinaaro i roto ia tätou e te nünaa Mäòhi, e haapäpü faahou i to tätou faaroo i roto i to tätou Atua. Te faaite atoà mai ra ia tätou e, i te faufaa o te haamoriraa e au i te Atua, eiaha rä tei au ia tätou e to tätou hinaaro. Te hopeàraa o te haamoriraa, ia ìtehia ia te hanahana o te Atua i roto i te oraraa o te taata tataì tahi e te oraraa o te nünaa.

 

Te mea noa ta te Atua e tïtau ra ia tätou, ia tatarahapa ia, oia hoì ia ìte te Mäòhi e ia färii e, eita o ia e ora ia nä rapae o ia i ta te Atua arataìraa, no te mea na na iho teie ôpuaraa faaora. Eita te Atua e faatano ia na i nià i to tätou hinaaro e ta tätou mau haapahiraa, o tätou rä te faatano ia tätou i nià i te hinaaro o te Atua. Te mea ta te Atua e hinaaro nei, ia färiu ia te âau, te manaò, te värua o te Mäòhi i nià ia na, e ia horoà o ia i to na püai no te faatupuraa i to na hinaaro e to na anaè. Te auraa matamua ia o te tatarahapa ta te Atua e hinaaro nei ia täpeà tätou i roto i te papa o to tätou âau.

 

Te piti, ia ìte te Mäòhi e, te Tumu Nui teie e hinaaro nei e faaora ia na. No reira, eiaha ia tätou e hiò i to tätou parau i roto i te mata o te feiä e faaineine maite nei i to tätou pohe, eiaha hoì to tätou tarià e horoà atu i te reo tähitohito, e te haameremere o te feiä e tohu nei i te pohe o te Mäòhi. 

 

Te toru, inaha ua here te Atua i te Mäòhi, e aha ia tätou i haafaufau ai ia tätou iho, e aha tätou i haamä ai ia tätou iho. A ìte e, ua haamata ta te Atua ôpuaraa faaora no òe, e te faahoì nei o ia ia òe i te vähi no reira mai òe. No reira, a hiemäteòa, a teòteò, e a färii ia òe i roto i to òe mäòhiraa, te mea mau hoì te reira e ìriti ia òe i te ùputa o te ora.

 

Te nä ô ra te reo o te Atua ia Ieremia : Eiaha òe e taiä i to rätou mata, o te vaiho noa atu vau ia òe ia mäheàheà ia rätou (Ieremia 1, 17).

 

E mai te peu te apiapi ra to òe manaò i to òe mäòhiraa ta òe e manaò na e, e au i te tahi fëfë i röpü i te rae, te tano atoà ra ia i nià ia òe teie reo to te Atua ia Ieremia : Aita òe i hämanihia e au i roto i te ôpü, i ìte ai au ia òe ; aita òe i fänau, i faataahia ai òe e au ei perofeta no te mau fenua (Ieremia 1, 5). Huriraa : aita ä to òe parau i ôpuahia, ua ìte ê na te Atua ia òe, ua mäìti ê na te Atua ia òe ei nünaa no na, no te faaìte i to na parau i to te ao nei. E hiò mai to te ao nei ia òe a ûmere ai i te Atua.

 

Ia tae tätou i te reira mahana e tano ia tätou teie reo to Ietu e parau ra e : Òutou te märamarama o teie nei ao. E òire faatiàhia i nià i te mouà, eita ia e moè. E òre hoì te taata nei e tutuì i te rämepa a tuu atu ai i raro aè i te färii, ei nià rä i te vairaa, ia märamarama to te fare atoà ra. Oia atoà to òutou märamarama, ia ànaàna ia i mua i te aro o te taata nei, ia hiò rätou i ta òutou òhipa maitaì, e ia haamaitaì i to òutou Metua i te ao ra (Mätaio 5, 14 – 16).

 

Te mea noa e anihia ra ia tätou, ia faahaèhaa e ia tatarahapa, ia hoì faahou i te Atua ra, ia faaroo i ta na mau aòraa, ia here faahou i to tätou parau, to tätou fenua, e ia mau tütüaau i te faufaa ora ta te Atua i horoà na tätou.

 

Te nä ô ra te ture a Tetunaè : A hiò i to mouà, te hanahana te reira o te âià. E nä ô ia tätou ia fäì i teie mahana e : A hiò i to òe Atua e te Mäòhi, a hiò i to òe fenua e te Mäòhi, ua ineine to räua ôpü mähorahora i te färii faahou ia òe. 

 

Ia haamaitaì mai e ia tiaì mai te Atua ia tätou. Ia ora na.

 

(Faaravaì atu)

Ruta 15,1-3 ; 11-32 Täpati 11 no Tetepa 2022

 

Täpati 11 no Tetepa 2022

 

Faaitoitoraa

 

Taiòraa : Ruta 15,1-3 ; 11-32

 

Aroharaa

 

Te nünaa o te Atua i Mäòhi Nui nei. Nä roto i te haèhaa e te faatura ia òutou, a färii mai i te hei no te here e te aroha o te faatereraa e tae noa atu i te mau rave òhipa ia tätou. Mai terä âiü e tae roa i terä taata paari roa aè ; mai terä tino maitataì e tae roa i terä tino maìmaì ; mai terä mau upoo rarahi e tae roa i terä mau upoo naìnaì ; mai te rahi o te mana e tae roa i te iti o te mana ; tei na te moana noa atu ra, tei na te reva atu ra, e tei na te porömu ra i te haere. Hoê parau e au, Ia ora na âmui tätou i te aroha o te Atua.

 

Te òhipa ta teie parau e faaìte mai nei, te tupu noa nei ia i roto i to tätou oraraa i te mau mahana atoà, mai teie e faatiàhia nei no Ietu.

 

Mea mauruuru roa no tätou i te faaroo i te parapore no te mämoe i moè e te parapore no te tamaiti i haere i te fenua roa, e mai te peu hoì e, e tuuhia mai te uiraa ia tätou, eita ia tätou e fifi e hoê iti aè i te pähonoraa i te reira mau uiraa.

 

Mai te peu ra e taui tätou i te huru horoàraa i te parau, nä ô na tätou e : Ua ìte mai nei au ia òrometua, e èrä rätou iö mea mä e inu mai ra i te pae tahatai ; aore ra, ua ìte au ia òrometua i te fare ârearearaa. Ua päpü maitaì, aita ia to teie òrometua e parau maitaì faahou no te mea, ua faaoti atoà to tätou manaò e, e inu àva terä taata, e aore ra e ori pö. Eita to tätou manaò e haapeàpeà i te ìmiraa i te tumu i ìtehia ai teie òrometua i te mau vähi i faahitihia aè nei.

 

Aita teie parau i taa-ê roa atu i to Ietu, o ia i ìtehia i te pärahiraa i nià i te ìri àmuraa a te feiä rave hara ; no te mea ua faaoti atoà te manaò o te mau Päpaì Parau e, e taata rave hara atoà teie.

 

E ui na tätou, nähea te hoê metua i te horoi i te rima repo o ta na tamaiti, mai te peu e eita o ia e färii i te täpeà i nià i te repo i mau mai i nià i te rima o ta na tamaiti. Ua ìte tätou e, eita e tano e horoi manaò noa i to na rima, e täpeà ihoä ra i nià i te repo ei räveà no te tatara i te repo. Te tumu ia Ietu i haere roa ai i rotopü i terä mau taata, eita e tano faaòre manaò noa i ta rätou hara.

 

Ua mätau roa tätou e, na te taata e haere mai ia tätou ra ; e peàpeà roa rä tätou ia manaò iti noa aè e, na tätou aè e haere atu i te taata ra.

 

Te haapiiraa ta Ietu e horoà mai nei teie ia : aita e peàpeà i te feiä i haere mai, e näfea rä i te feiä tei òre i tae mai, e mai te peu aita i tae mai, e haere ia i te vähi tei reira rätou, mai te täuà òre i te paraparau a te taata.

 

Te parau ra o Pauro : I o te Ati-Iuta, ua faahua Ati-Iuta atoà vau, i o te feiä ture òre, ua rave au mai te mea ra aita ta ù e ture, ua mau maitaì ia tätou teie parau. Te haapäpü atoà ra rä o Pauro e, e mau räveà noa teie e roaa mai ai ia na te reira mau taata i te èvaneria. Te auraa, ia haere Ietu e àmu i te mäa i o teie feiä, eere no te mea e, hoê ä ta rätou peu, no te mea rä te òhipa matamua te reira e rave, oia hoì te haereraa i te vähi e orahia ra e te taata.

 

Mea au roa na tätou te haamanaò e, e feiä hara anaè tätou, e moèhia ra ia tätou te haamanaò e, ua riro mai te Tamaiti a te Atua ei taata, e ua haere roa mai i roto i te feiä hara i te pärahiraa.

 

Te huru e au ia tätou, te haèhaa ia ; no te mea aita ihoä e taata huru maitaì aè, e feiä hara anaè ihoä tätou e hoê ä tätou èreraa i te ora. Eiaha rä e manaò e, te faatiàtià nei tätou i te inu àva e te tahi atu mau òhipa ìino, no te mea te haamanaò noa mai ra te parau a te Atua e, te taata tei hinaaro ia na, ia riàrià ia e ia faufau i te ìno, ia au i te Mäteri 6, 16-19 :

 

‘Teie na parau e ono ta te Tumu Nui e riri nei, e te hitu hoì e mea faufau atoà ia ia na : te mata teitei, te arero haavare, te rima e manii ai te toto hara òre, te âau i ôpua i te parau ìno, te âvae e horo òiòi e rave i te ìno, te ìte haavare e parau i te parau haavare, e o tei faatupu i te märö i roto i te mau taeaè ra’.

 

I mua i teie parau, e parapore ta Ietu i horoà, oia te parapore no te tamaiti i haere i te fenua roa. Te huru ihoä rä no teie metua i mua i nä huru taa-ê o nä tamarii e piti. Aita to na here i hau atu i te tamaiti i faaea noa i te fare e te tamaiti i haere i te fenua roa. Te auraa, hoê noa fäito to te here o te Atua i te taata. No teie metua, te mea faufaa, te hoìraa te tamarii ia na ra, ma te tuatapapa òre i te òhipa i ravehia e a na.

 

Te fifi rä o te taata, te fifi ia ta te mau haapiiraa atoà ta Ietu e faaìte noa ra, oia to te tahi pae taata manaòraa e, mea maitaì aè rätou i te tahi pae ; mea maitaì ihoä paha te taata tei òre i rave i te hara, e maitaì atoà rä te vai ra i roto i te taata i rave i te hara. Näfea rä te reira maitaì e ìtehia ai, mai te peu eita tätou e faaitoito i te faaìteraa i te maitaì e vai ra. Të reira ta tätou tuhaa, vai iho nä te Atua e haavä, e faaitoito rä tätou i te ìmiraa i te raveà ia nünaahia to te Atua.

 

A tuö, a tïtau i te mau taata atoà ta te Atua i hämani ia haere mai e färerei i to rätou Atua. O rätou i topa i roto i te inuraa àva e te àvaàva taèro, te taiàta, te êiä, te hämani ìno taata, haere anaè mai, e na te here e te aroha o te Atua e faaâpï ia rätou.

 

Haamanaò na tätou i te parau ta Ietu i parau atu i te vahine taiàta : Aita e taata i taora ia òe i te ôfaì ? Eita atoà vau e faahapa ia òe, a haere, eiaha rä e nä reira faahou.

 

Mai te peu e, e maraa atoà ia tätou teie reo to Ietu, te huru upootià ra ia te Atua i nià i to tätou âau, e te ìte-atoà-hia ra ia e, ua hitihia tätou e te märamarama o te here o te Atua.

 

No reira, mai te peu e tei roto tätou i terä pupu taora ôfaì, haamanaò e, e hoì mai te ôfaì ta òe iho i taora i nià ia òe.

 

Te tahi mahana, te ui ra te tahi òrometua Ati-Iuta i ta na mau pïahi e : E aha te taime e parau ai òutou e, ua hiti te märamarama no òe. Te pähono ra te tahi, i te taime e àaoa ai te moa ; ta te tahi, te taime e faaètaèta ai te mau tämera i to rätou âvae ; ta te tahi, ia ìtehia te mau hihi matamua o te rä. Na ôraa ia te òrometua ia rätou, o ia e parau mau roa ta òutou, teie rä te tahi pähonoraa, i te taime e ìte ai òe i te hohoà o to òe tauaro, noa atu e te märehurehu noa ra ä, ua hiti ia te märamarama no òe i reira.

 

Te parau e täpeà mai ei tautururaa ia tätou i te hoìraa i te Atua ra, Faahaèhaa e Tatarahapa, o nä parau papa ia ta tätou Apooraa Rahi Amui i haapäpü ei papa no to tätou taìara i teie matahiti âpï e matara nei i mua ia tätou. No reira, a faaitoito anaè i te peeraa i to tätou Fatu nä roto i te haèhaa e te tatarahapa, te mea noa ia e ora hau noa ai tätou i roto i to tätou oraraa i mua i te rauraa no te mau fifi o ta tätou e faaruru nei i teie mahana. A tiàturi ia òe iho e a tiàturi i te Atua to òe ora.

 

Ei te Atua te hanahana, te tura, e te hau, Ia ora na.

Ruta èv. 14.1-14 Hiòpoà.

 

Tāpati 28 no Âtete 2022.

Hiòpoà.

Taramo 68

1 Na te Mënätehe. Taramo, e himene na Tävita.

2 Ia tià mai te Atua, e ia haapurara i to na mau ènemi. E te feiä i riri ia na ra, e maùe ê atu ia i mua i to na mata.

3 Mai te auauahi e pee ra, ia pee atoà rätou. Mai te täpau e tahe i te auahi ra, ia nä reira to te paieti-òre pohe i te aro o te Atua.

4 Ia òaòa rä te feiä parau tià e ia ôuàuà noa i te aro o te Atua, e ia rahi to rätou òaòa.

5 E himene i te Atua, e himene haamaitaì i to na iòa, e faateitei i tei horo nä roto i te reva ra: o Te Fatu to na iòa. E ôuàuà òutou i mua i ta na aro.

6 O te metua o te mau ôtare, e te haavä o te mau ìvi, o te Atua ia i to na ra pärahiraa moà.

7 E tuu hoì te Atua i te pütii ia pärahi i to na ra ùtuafare, e tei täpeàhia i te fifi âuri ra, na na ia e tätara. Âreà tei haùti ra, e pärahi ia i te fenua marô.

8 E te Atua e, ia òe i haere nä mua i to òe ra mau taata, ia òe i haere nä roto i te mëtëpara ra, Tera.

9 ua âueue iho ra te fenua, e ua tärapape hoì te mau raì i te aro o te Atua, o Tinai atoà ra i te aro o te Atua, te Atua o Ìteraèra.

10 Ua manii mai ra ia òe te ua rahi, e te Atua e, e te tufaa rohirohi na òe ra, ua turuhia ia e òe.

11 Ua pärahi hoì to òe ra pupu taata i rotopü i te reira, no to òe hämani maitaì i faanahonaho ai òe, e te Atua, i ta te taata rii.

12 Ua tuu mai te Fatu i te parau, e e pupu rahi te feiä i faaìte ra.

13 Te mau arii o te mau nuu ra, ua maùe, ua maùe, e te mau fëtii i te ùtuafare ra, te tufa ra i te taoà pau.

14 Taòto noa iho ä òutou i te pae auahi ra? E riro òutou mai te pererau ûupa i täpoìhia i te ârio, e tei faaìravarava-haere-hia i te àuro ra.

15 Ia purara atu ra taua mau arii ra i te Püaihope i reira ra, ua riro ia i te ùoùo mai te hiona i Taramona.

16 E au te mouà o te Atua i te mouà ra o Pätäna; e mouà teitei rahi mai te mouà ra o Pätäna.

17 E aha òutou i feìi ai, e te mau mouà teitei na, i te mouà ta te Atua i hinaaro ei pärahiraa, e na te Fatu e pärahi i reira e a muri noa atu?

18 Te mau pereoo a te Atua, e piti àhuru tautani i te taauraa i te merahi maitataì, tei roto te Fatu ia rätou, i roto i te vähi moà ra mai tei Tinai ra.

19 Ua reva òe i nià, ua arataì òe i te tïtï e rave rahi, e ua tufa òe i te taoà na te taata ra, e i roto atoà i te feiä i haùti atoà ra, ia pärahi te Atua ra, o Te Fatu, i roto ia rätou.

20 Ia haamaitaìhia te Fatu, o tei tauturu mai ia tätou i tërä mahana, i tërä mahana. O taua Atua nei to tätou ora. Tera.

21 O to mätou nei Atua, o te Atua ia e ora ai: no te ATUA hoì, no te Fatu, i ora ai tätou i te mau pohe nei.

22 Ua täìri rä te Atua i te upoo o to na mau ènemi, e te tupuaì upoo o te feiä i mau märô i ta rätou hara.

23 Ua parau hoì te Fatu: «E arataì mai au ia rätou mai Pätäna mai, e e arataì hoì au ia rätou mai tähatai mai ra mai te moana,

24 ia uhi òe i to âvae i roto i te toto o to mau ènemi, e ia miti te arero o to mau ùrï ra i te reira.»

25 To òe ra mau haereà, e te Atua, te hiòhia nei e te taata te haereà o ta ù Atua, o ta ù arii i te vähi moà ra.

26 Ua nä mua te mau himene, muri iho te feiä i faaòto i te mau peu i rotopü i te mau pötii i te faaòtoraa i te tofe ra.

27 E haamaitaì i te Atua i roto i te âmuiraa, te fanauà a Ìteraèra tei haamaitaì i te Fatu.

28 Teie hoì o Peniamina, taata âpï ra, o to rätou ia arataì, te mau arii o Iüta, e to rätou atoà ra pupu, te mau arii o Tepuruna, te mau arii o Nafatari.

29 Ua faaue to Atua i to òe ra püai, e haapäpü na, e te Atua, i ta òe i rave no mätou nei.

30 E no to òe ra nao i Ierutarëma, e hopoi mai ai te mau arii ra i te taoà na òe.

31 E aò atu òe i te taehae o te uru âèho ra, te âmuiraa o te puaatoro ra, e te mau puaatoro âpï o te mau taata ra, a auraro mäite ai rätou mä te ârio i te rima: e haapurara òe i te feiä i hinaaro i te tamaì.

32 E tae mai te feiä rarahi no Àifiti mai, e rü mäite hoì Tuta i te horoà i ta na rima i te Atua. Atua

33 E te mau pätireia o te ao nei, e himene òutou i te Atua, e himene ei haamaitaì i te Fatu, Tera.

34 ia na i tei horo nä nià i te raì teitei tahito ra. Inaha, haruru iho ra ta na reo rahi i te pätiri.

35 E tuu atu i te püai i te Atua ra, tei nià ia Ìteraèra to na mana, e tei te mau raì ra to na püai.

36 Mataùtaù-rahi-hia to òe e te Atua, i to òe vähi moà ra, o te Atua o Ìteraèra o te Fatu O ia tei horoà mai i te itoito e te püai i to na ra taata. Ia haamaitaìhia te Atua.

Māteri 4.1-9.

E taoà maitaì te paari

1 E faaroo mai, e te mau tamarii ra, i te aò a to metua täne; e haapaò mäite mai ia noaa ia òutou te ìte.

2 O te parau maitaì hoì tä ù e faaìte atu ia òutou: eiaha hoì òutou e faaruè i ta ù nei parau.

3 E tamaiti pöpouhia hoì au e to ù ra metua täne, e te here ôtahi mäite i te mata o to ù ra metua vahine.

4 E ua haapii mai o ia ia ù, e ua nä ô mai ra, E täpeà mäite to âau i ta ù nei parau; e haapaò i ta ù e parau atu, e ora hoì òe i reira.

5 E tïtau te paari ia noaa, e te haapaò maitaì ia noaa atoà; eiaha e àramöina, eiaha e färiu-ê i te parau o ta ù vaha nei.

6 Eiaha e faaruè ia na, e nä na e tiaì ia òe; ia hinaaro mäite òe ia na, nä na òe e faaora.

7 O te paari ä te mea maitaì; e tïtau i te paari; e te mau mea atoà e noaa ia òe ra e tïtau ä te haapaò maitaì.

8 E faateitei òe ia na, e nä na e faateitei ia òe; e täuahi òe ia na, e nä na e faatura atu ia òe.

9 Na na e höroà mai i te täupoo nehenehe no to upoo na; e te toröna hanahana tä na e tuu mai i nià ia òe ra.

Hēpera 12.19-24

19 e te òto pü ra, e te haruru o te parau; i ta te feiä i faaroo ra i parau e, eiaha roa ia parau e parau-faahou-hia mai ia rätou ra:

20 aita atu ra hoì i tià ia rätou ia haamahu i tei faaìtehia mai ra: «E ia faatiàià noa atu te hoê puaa i taua mouà ra, e tüìhia ia i te ôfaì, e e pätia-pupu-roa-hia ia i te hoto ra.»

21 E no te mea mataù rahi tei faaìtehia mai ra, ua parau iho ra Möte: «Mataù rahi to ù e te rürütaina.»

22 I te mouà rä o Tiona ta òutou e haere mai nei, e te ôire o te Atua ora ra, Ierutarëma i te ao ra, e te pupu merahi atoà eita e hope ia taiò ra,

23 i te taìrururaa rahi ra i te Ètärëtia feiä mätahiapo ra, tei päpaìhia te iòa i te ao ra, e te Atua hoì te haavä i te taata atoà ra, e te mau värua o te feiä parau tià i haamaitaì-roa-hia ra,

24 e ia Ietu hoì i te ärai i te faufaa âpï ra, e te toto pïpï ra, e parau maitaì rahi to te reira i to te toto o Àpera ra.

Ruta èv. 14.1-14

Te faaora-raa-hia te hoê taata i pohehia i te höpue

1 E tae aè ra i te hoê täpati, haere atu ra o ia i roto i te fare o te hoê Färitea taata mana e àmu i te mäa, te hiòpoà mäite mai ra rätou ia na.

2 E inaha, tei mua i ta na aro te hoê taata i pohe i te höpue.

3 Ua parau atu ra Ietu i te mau haapii-ture e te mau Färitea, nä ô atu ra: «E faaorahia änei te maì i te täpati?

4 Aita rä rätou i parau mai, ua rave atu ra o ia i te rima o taua taata ra, faaora atu ra, e tuu noa atu ra ia haere na.

5 Ua parau faahou atu ra o ia ia rätou, nä ô atu ra: «O vai to òutou e òre e ùme mai i nià i ta na âtini e ta na puaatoro ia maìri i roto i te âpoo i te mahana täpati?

6 Aita atu ra e tià ia rätou ia mötoì mai i taua parau ra.

Te mäìtiraa i te pärahiraa

7 E ia hiò atu o ia i taua mau manihini ra i te rü ia noaa te vähi teitei i te àmuraa mäa ra, ua parau atu ra o ia i teie nei parapore, nä ô atu ra:

8 «Ia parauhia mai òe e haere i te ôroà faaipoiporaa, eiaha e haere i te vähi teitei i te àmuraa mäa ra, o te parau-atoà-hia te hoê taata teitei atu;

 9 o te haere atu hoì taua taata i parau ia òrua ra, o te parau atu ia òe e: «A tuu mai i tënä na vähi i teie nei taata», o te haere haamä noa atu hoì òe i te vähi haèhaa.

10 Ia parauhia rä òe ra, e haere noa atu i te vähi haèhaa, e ia tae mai tei parau ia òe ra, ia nä ô mai o ia ia òe e: «E hoa ìno, a haere atu òe i nià atu. «Tura atu ra òe i reira i mua i te aro o taua feiä atoà i te àmuraa mäa ra.

11 O tei faateitei hoì ia na iho ra, e faahaèhaahia ia; e o tei faahaèhaa ia na iho ra, e faateiteihia ia.

12 Ua parau atu ra o ia i taua taata i parau mai ia na ra: «Ia faatupu òe i te àmuraa mäa avatea e te àmuraa ahiahi, eiaha e parau atu i to mau hoa, e to mau taeaè, e to fëtii e te feiä mana taata-tupu ra; o te parau atoà mai hoì rätou ia òe, o te tähoo mai rätou ia òe.

13 Ia faatupu rä òe i te ôroà àmuraa mäa, o te taata rii të tii atu, te anapero, te piriòì, e te matapö.

14 E e ao ia to òe i reira (aita hoì a rätou ia faautuà mai ia òe), e utuàhia mai hoì òe ia tae i te tiàfaahouraa o te feiä parau tià ra.

Manaò.

Te färerei nei tätou i teie mahana te teimaha o te oraraa, tei faataupupü te tupu maitaìraa i te tahi mau ôpuaraa e tià e turu i te mau òhipa no te faatià i te turaraa o te taata e te nünaa. Teie ra ia hiò maitaì anaè ra tätou i te aru a te Atua Nui Tumu Tahi, te hiti noa ra te mahana, i te hitià-o-te-rä tei faaìte i te aroha e te here tuatau o te rähu o ta tätou e fänaò noa nei i te mau taime atoà, mai te ua, te mataì, te vero, tei faaruperupe, ia heeùri te aru. Na teie mau faanahoraa e tauturu ia tätou ia ora i roto i te rahu, tei haamämä te mau teimaha o te oraraa vaamataèinaa, ia mäoa noa anaè te ùru, ia tari-noa-hia te meià, ia topa noa te maa maniota, ia mäa-noa-hia te taro e haapäpüraa teie te âpee noa ra te fenua i to tätou oraraa, tei tïtau noa mai ia tätou, a vaere, a ùtaru, a tanu, i te tau mau ra i reira e ôoti ai. Ia hiò tätou na roto i te ôriò mata o te fenua e ìte tätou i to tätou maitaì, o ta te Metua Vahine faatupu ora e hii-noa nei ia tätou i nià i to na ôuma tei tämahanahana i ta na àiü ia hëva. Ia tuu tätou i to tätou tiaìtururaa i roto i te fenua e pähono mai te fenua i to tätou hinaaro, tei ärataì ia tätou i roto i te tiàmaraa tei turäma ia tätou te maitaì tuatau o te fenua tei papahia i nià i te uì no te faatomo ia tätou i roto i te tau no te hinapaarae, te hinapaarae ra tei faaìte ia tätou ua nünaahia te ôpu fetii, tei faaâpïhia i roto i te ôriò mata o te fenua, i parauhia ai to te paparaa tupuna, tei puna. E tupuraa òhipa maere teie tei faahohoàhia i nià i te aa no te hoê tumu räau, tei mauhia e te fenua ia òre ia hià, ia tupu maite ra ma te hau i roto i te mau hitihti no mau âmaa, tei pua, tei tiarehia, e tei maahia. E mau tupuraa teie tei faaìte i te puai o te ora tei òre i mäheahea. Te tahi ia faaìteraa teie no te mau taiòraa o ta tätou e fänaò nei i teie mahana :    

-Taramo 68, 36 Mataùtaù-rahi-hia to òe e te Atua, i to òe vähi moà ra, o te Atua o Ìteraèra o te Fatu O ia tei horoà mai i te itoito e te püai i to na ra taata. Ia haamaitaìhia te Atua.

-Materi 4, 8 E faateitei òe ia na, e nä na e faateitei ia òe; e täuahi òe ia na, e nä na e faatura atu ia òe.

-Hepera12, 23 i te taìrururaa rahi ra i te Ètärëtia feiä mätahiapo ra, tei päpaìhia te iòa i te ao ra, e te Atua hoì te haavä i te taata atoà ra, e te mau värua o te feiä parau tià i haamaitaì-roa-hia ra,

-Ruta èv.14, 1 E tae aè ra i te hoê täpati, haere atu ra o ia i roto i te fare o te hoê Färitea taata mana e àmu i te mäa, te hiòpoà mäite mai ra rätou ia na.

Te mata o Ietu i nià i te taata i roto i te ère, ia au i ta na hiòpoàraa i te taata i roto i te fare o te hoê Färitea, i te hôe täpati, e tämaaraa tei faatupuhia. E rave rahi mau taata i teie tämaaraa, te mau taata tiàraa, te mau taata tiàraa òre, i mua ia Ietu te hoê ia taata, tei pohe i te höpue oia hoì, ua îî to na ôpu i te mataì te auraa rä ua poìa, e aore rä e puhä päpe ua faatiàma o Ietu i teie taata ma te faaora. Tei uiraa a Ietu i te mau haapii-ture e te mau Färitea : «E faaorahia änei te maì i te täpati? Ua mämü teie mau taata i to Ietu tïtauraa i te âparauraa maite mea ra teie uiraa ua haapeàpeà ia rätou. Ua tuu faahou atu ra o Ietu i e tahi uiraa, O vai to òutou e òre e ùme mai i nià i ta na âtini e ta na puaatoro ia maìri i roto i te âpoo i te mahana täpati? Aita atu ra e tià ia rätou ia mötoì mai i taua parau ra, oia hoì, vaiiho mai ra ia Ietu ma te âparau òre. I faaära ai o Ietu i te mau manihini e ära i roto i teie huru tämaraa, ua faanahohia te mau vahi pärahiraa, tei haapüpühia, te taata tiàraa mana, te mau taata tiàraa òre, e te mau taata i pohe i te poìä. Teie huru faanahoraa no te faaìte ia, i te taata i to na ätearaa i te ôpuaraa faaora a te Atua Nui Tumu Tahi. E inaha hoì mau taata teie tei ìte i te Here e te Aroha, i ta rätou faanahoraa i te ture ia pärahi fatata noa te parau Atua i to rätou tiàturiraa ia î i te faaroo.

I roto i te mau hinaaro o te Atua i te taata, teie te mätamua, ia rave te taata i te parau tià. Te tauiraa ta Ietu e hinaaro nei te huru hiòraa ia a te taata i to na täuaro no te mea te faaö noa mai nei te taata i te tahi mau faanahoraa reo ia atea i nià i te tumu e tïtauhia ra, te ìritihia nei te tahi mau vahi faufaa i roto i te reo no te faatupu i roto i te oraraa te àmahamaha. Te hiòpoà a Ietu no te faatupu ia tià te parau, te parau-atoà-hia nei mai teie te huru mea tià. No te tämata i te faataa i teie nä taò, rave mai na tätou i te tahi hiòraa i roto i te reo. E nä ô ia tätou e, te vai ra te reo, e te vai ra te parau. Te reo, te faufaa ia a te hoê nünaa, i roto rä i te faaòhiparaa, e riro mai ia te reo ei parau. Te mea ta te Ietu e hinaaro nei i teie mau taata ia tïtau, te faatupuraa i te parau tià. No te mea rä eere teie i te tahi parau taa e te nahonaho maitaì, i te mau taime atoà, te tiaìhia ra te taata ia faaòhipa i to na tiàmäraa, to na feruriraa, to na paari, no te rave i te mea ta na e manaò ra e, mea tià ia rave, aore ra ia parau ua faaea muhu noa te mau Färitea, e te mau päpaì parau, i mua na uiraa e piti. Te auraa, aita o Ietu e nä murimuri noa nei i te taata i te parauraa ia na e : a rave i terä ; eiaha e rave i terä. I te mau taime atoà rä, tei te taata te faaotiraa hopeà, i roto hoì i ta na e rave atu, te vai ra ia te tano, e te vai ra te hape. Ia hiòpoà o Ietu no te faatupu i te âparauraa e reo Atua nei ra teie e turäma nei ia tätou, te reo Atua o te parau tià ia, eita rä te reira e tupu, ia òre te taata ia haamata i te rave i te mea tià, ia au atoà ihoä i te mea ta Ietu e parau ra e : Tei haapaò maitaì i te mea iti ra, e haapaò maitaì atoà ia i te mea rahi ; e tei òre i haapaò i te mea iti ra, e òre ia e haapaò i te mea rahi. Mai te reira rii atoà te faaauraa i roto i te hiòpoàraa a Ietu i te parau tià e te mea tià. Mea tià atoà ia hiòpoà mai o Ietu ia tätou i Mäòhi Nui nei.

Teraì òr. Faatura.

Ruta èv. 13.22-30. Aò

 

Tāpati 21 no Âtete 2022.

Aò

Taramo 117

1 E haamaitaì i te Fatu, e te mau nünaa e, e faateitei ia na, e te mau taata atoà na.

2 Hämani maitaì rahi to na ia tätou nei, e te parau mau a te Fatu, e tià ia i te vai-mäite-raa. Hareruia.

Ìtaia 66.18-21

18 Ua ìte hoì au i ta rätou mau parau e rave, e ta rätou i ôpua ra: e e riro hoì au i te haaputuputu atoà mai i te mau fenua atoà e te mau reo atoà; e haere mai hoì rätou, e ìte rätou i to ù ra hanahana.

19 E tuu atu vau i te täpaò ia rätou; e te feiä i ora mai ra, tä ù ia e tono i te mau fenua ra: i Taretita, i Pura, i Ruta, o tei faafefe i te fana; i Tüpara hoì, e i Iävana, nä fenua roa ra; i te feiä aore roa i faaroo i to ù iòa, e aore roa i ìte i to ù ra hanahana: e nä rätou e faaìte i to ù ra hanahana i roto i te mau êtene.

20 E nä rätou e hopoi i to òutou mau taeaè atoà, no te mau fenua atoà, ei tütia nä te Fatu; nä nià i te mau puaahorofenua, te mau pereoo ra, e te mau tepa; e te mau fërati, e te mau petari ra; i ta ù mouà moà ra ia Ierutarëma, te parau mai ra te Fatu, mai te tamarii a Ìteraèra i hopoi mai i te tütia, i roto i te färii viivii òre, i te fare o te Fatu ra.

21 O to rätou tä ù e rave, ei tahuà, ei âti-Revi, te parau mai ra te Fatu.  

Hēpera 12.5-13.

5 E ua moè änei ia òutou te aò i aòhia mai ai òutou mai te mea e, e tamarii ra: «E ta ù tamaiti, eiaha òe e haafaufaa òre i te aò a te Fatu nei, eiaha hoì ia pau te aho ia faahapahia mai òe e ana ra.

6 O ta te Fatu e here ra, o ta na ia e aò mai, e e papaì ä o ia i te mau tamarii atoà ta na e ìte mai ra.»

7 Te aòhia mai na òutou, mai te rave a te metua i te tamarii ra ta te Atua rave ia òutou. O vai hoì ia tamaiti aore i aòhia e te metua ra?

8 Aore òutou i aòhia i te aò i te tamarii atoà ra, na te faaturi ia òutou, eere i te tamarii mau.

9 E e metua hoì to tätou to te tino nei, o tei aò mai ia tätou, e ua faaïti hoì tätou, eiaha ia rahi atu to tätou auraro i te Metua o te värua nei, e ia ora atu?

10 I aò mai hoì rätou ia tätou i te reira ra puè mahana aore reà ra, no to rätou iho ia hinaaro, âreà o ia ia faufaahia tätou, ia noaa atoà ia tätou to na ra maitaì.

11 Aita roa hoì e aò e riro ei mea òaòa i reira ra, e mea òto rä; âreà i muri aè, o te maitaì ra ia o te parau tià të tupu i taua aò ra, i te feiä i haamätarohia i te reira.

Faaitoitoraa e faaararaa

12 E tënä na, e âfaì na i nä rima i faatautauhia i raro ra i nià, e e faaètaèta i te turi paruparu ra;

13 e haamanina hoì i te èà o to òutou âvae, ia òre te piriòì ra ia maòìa roa, ia faaorahia rä.

Ruta èv. 13.22-30.

Te ùputa pirihaò

(Mät 7,13-14; 21-23)

22 Haere atu ra o ia i Ierutarëma nä roto i te mau ôire e te mau ôire rii i te haapii-haere-raa atu.

23 Ua parau mai ra te hoê taata ia na: «E te Fatu, e iti änei te ora?

24 Ua parau atu ra o ia ia rätou: «E faaitoito hua i te tomo nä te ùputa pirihaò: e faaìte atu hoì au ia òutou, e rave rahi të tämata noa i te tomo i reira, e e òre roa e ö.

25 «Ua tià anaè hoì te taata ùtuafare i nià, e ua haamau i te ùputa, e ua tià mai òutou i räpaeàu mai, pätötö mai ai i te ùputa, a nä ô mai ai ra e: E te Fatu, e te Fatu, ìriti aè na ia mätou. E riro o ia i te nä ô mai ia òutou: Aore au i ìte ia òutou e to òutou ra vähi.

26 Ei reira òutou e parau mai ai e: I àmu na hoì mätou e inu na hoì i mua i to aro, e i haapii na hoì òe i te mau aroä io mätou ra.

27 E parau atu ä o ia: Te parau atu nei au ia òutou, aore au i ìte ia òutou e to òutou na vähi, ia ätea ê atu òutou, e te mau rave parau ìno.

28 O te òto iho ra e te àuàuraa niho i reira ra, ia hiò òutou ia Âperahäma, e ia Ìtaata, e ia Iatöpa, e te mau perofeta atoà tei roto i te Pätireia o te Atua, e höparahia òutou iho i räpaeàu;

29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e e riro ia ei manihini i te Pätireia o te Atua.

30 E inaha, e riro to muri ra no mua, e to mua ra no muri.

 

 

Manaò.

E aha te aò, o te reo haapii ia o te metua tane e te metua vahine i te tamarii, e te mau tamarii i roto i te ùtuafare, ia noaa te ora faatupu òhipa. Tei turäma i te èà e tae ai i te vahi e noaa ai te maitaì, e taua maitaì ra te marämarama ia o te oraraa. Te àveià teie no te èà e ìte ai i te haere ma te hau i te mau vahi atoà o ta te vaamataeinaa e faaìte nei i te oraraa o te nünaa. I roto i to tätou oraraa i teie mahana ua rau te mau faanahoraa e àua haaàti nei ia tätou, e tei teie vahi to tätou tïtauraahia ia faatupu e ia tià te mau hinaaro o te Atua Nui Tumu Tahi, te aroha e te here ia riro èi niu no te oraraa. Ia ìtehia i roto i te aò ; te peu tumu o te fenua, te peu : o te mau òhipa atoà ia ta te hoê nünaa i mätau i te rave, ta na i ìte i te maitaì no na iho, e tei riro èi teòteòraa na na, no te mea, ta na atoà te reira räveà no te faaìte i to na huru mau. Ia riro te parau no te peu no te faaìte i te faufaa o te aò, te aò ra te haapiiraa ia, tei haamanaò tämau mai ia tätou i to tätou Metua i te raì tuatinitini, tei ara noa i nià ia tätou, e tei tiaì noa ra i to tätou reo pii ia Na : E te Atua Metua e, faaora mai ia mätou ta òe mau tamarii, te hoì atu nei mätou ia òe ra, ia raa to òe iòa, e ia tupu to òe hanahana i nià i te fenua nei i mua i te ora o te ao atoà nei. Te aò e ìriti i te mau ùputa o te marämarama, te marämarama ra te ora ia o te taata, ia na reira tätou i te haere e topa te mau mea atoà e faaapiapi i to tätou mau haereraa i te ao nei. Ua òhipahia te pöuri e te Atua, no te ìriti i te ùputa o te märamarama na roto i te Parau mana ia tupu te ora. Ia hiòhia anaè tätou i te òhipa i tupu ua parau ihoä te Atua èi ia märamarama, ua märamarama iho ra i muri iho teie märamarama te türama ra, i te mau òhipa atoà ta te Atua i rave, ua parau te Atua ua tupu, ua hiò te Atua ua mauruüru te Atua te mea ta na i faatupu, e ua parau mea maitaì roa, ua parau, ua tupu, e te Atua iho tera e haapäpü ra e mea maitaì roa,  aita hoê taime te Atua i parau e, te vai ra te tahi mea aita i àfaro maitaì, te auraa ra te mau òhipa ta te Atua i rave, no te faaìte ia i te taata te täpaò no to na aroha e to na here ia na. No te mea ia parau anaè tätou te ùputa, e aha te ùputa te tahi vahi e na reira tätou i te ìte i te mea e vai ra i ò mai, i roto i teie ìritiraa te Atua i te ùputa o te märamarama e aha te mea ta tätou  e ìte atu ra te vai ra iho ä te rahu tei faaìte mai te maitaì ta te Atua i faaineine no te taata mea täno tätou ia tütonu maitaì i nià i tera vahi te faaìte mai ra te reira te maitaì ta te Atua i faaineine no te taata e te reira mau maitaì no te faaìte ä ia i te taata to na aroha e to na here, ia haapoto-anaè-hia te mau mea atoà ta tätou e ìte nei i teie mahana te mea faaî nei i te fenua, te tai e te reva e tae noa atu to raro i te fenua tei òre tätou e ìte, no te faaìte ia i te taata i te aroha e te here o te Atua ia na. Faaroo na ra tätou i te haapotoraa o te mau taiòraa no teie mahana :

-Taramo 117, 2 Hämani maitaì rahi to na ia tätou nei, e te parau mau a te Fatu, e tià ia i te vai-mäite-raa. Hareruia.

-Ìtaia 66, 18 Ua ìte hoì au i ta rätou mau parau e rave, e ta rätou i ôpua ra: e e riro hoì au i te haaputuputu atoà mai i te mau fenua atoà e te mau reo atoà; e haere mai hoì rätou, e ìte rätou i to ù ra hanahana.

-Hepera 12, 6 O ta te Fatu e here ra, o ta na ia e aò mai, e e papaì ä o ia i te mau tamarii atoà ta na e ìte mai ra.»

-Ruta èv. 13, 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e e riro ia ei manihini i te Pätireia o te Atua.

Teie te mau ùputa o te ao, no te hau o te Atua Nui Tumu Tahi tei na roto i teie mau ùputa i te tomo e riro rätou èi manihini i te Hau Atua. Teie te tahi mau ùputa pirihaò i te faahitiraa a Ietu, te mau mea faufaa òre atoà i piri i nià i te taata e matara noa i te mea ua färii teie taata ia tatara i te mau mea e faateiaha to na tomoraa, ua ö mai te märamarama. E tià roa ai ia tätou i te parau e, ua faufaa òre anei te pöuri, aita no te aha te märamarama tei ö mai i roto i te pöuri te haamataraa te mau mea atoà te vai ra te pöuri no te pöuri te parau te märamarama tera i tomo mai i roto i te pöuri, i teie ra tomoraa mai te märamarama i roto i te pöuri aita te pöuri i faaòrehia hau roa atu na te Atua iho horoà tei iòa o te märamarama e to te pöuri, e aha te auraa ua ìte e ua färii te Atua i te märamarama, e ua ìte atoà ra ua färii i te pöuri, te vai ra te tahi, te vai ra te tahi, haamanaò tätou e te märamarama tera i ö mai i roto i te pöuri aita te märamarama i haere mai e täpoì, aita te märamarama i haere mai e faaòre te vai noa ra te pöuri. Ia hiò tätou i te òhipa i tupu i to te Atua rahuraa te raì e te fenua, no te vai te parau, ta tätou e parau nei te päpe, ua ani te Atua i te päpe ia vaiiho mai te tahi vahi taa atu ra te päpe i nià, taa mai nei te päpe i raro, tera area ta te päpe i faaruè no te pähono i te aniraa a te Atua, te vahi ia ta te Atua faataa èi tupuraa no te raì, tera päpe i raro taa atu te tahi, vai mai nei te fenua tera te faanahoraa o te raì e te fenua, teie nei ra te naò atu na vau e, te haamataraa no te päpe te parau, haamanaò na tätou e aha te òhipa i tupu i te hararaa te taata i te tau o Noa, e aha te òhipa ta te Atua i rave, ua faahoì faahou te Atua i te fenua i to na huru mätamua, hoì faahou te päpe i te vahi ta na i horoà e aha tei ìtehia e pohe. No reira mai te peu e ö mai te märamarama i roto i te pöuri, aita te Atua i faaòre i te pöuri te vai noa ra te pöuri e te tiaì noa ra te pöuri i to na taime no te rave faahou i te vahi ta na i horoà, eiaha tätou e manaò ua faateateahia te fenua, eiaha tätou e manaò ua tuu mai te Atua i te märamarama ua ora tätou aita, e aita hoê noa mea te taata e ora ai, ia faaea noa i roto i te märamarama te taata e paruparu te taata èita e haapaò, na na noa e hitimahuta ia hoì faahou mai te pöuri e rave i te mea ta na i horoà, te manaò ra tätou e i teie mahana tei roto tätou i te märamarama, òia tei roto i te märamarama te tiaì atoà noa ra rä te pöuri. No te aha te taata te tahi tau, èita i te tau atea roa ua färii te mea ta tätou e parau ra i teie nei mahana e èvaneria te parau a te Atua ua òaòa i te tomoraa i roto i te mau taata e hinaaro e haamori i te Atua e teie mahana e aha te parau rahi e faaroohia i roto i te vaha o te taata, aita te fare pure e î faahou nei, aita te taata ànaanatae faahou nei, èita te feiä âpï ànaanatae faahou i te parau a te Atua, e aha te auraa te pöuri tera e hoì mai ra aita tätou i ìte te manaò nei tätou e tei roto tätou i te märamarama ua faaorahia tätou aita ra te ora ta te taata i faanaò i täpeà ua tärapape, e ära maitaì ra tätou te faufaa ia o te aò, te haapiiraa, ia pärahi tämau tätou i roto i te märamarama, i te mea èita te pöuri e poroì mai e hoì faahou mai ò na e rave no reira te tïtauraa ia tätou i teie mahana e ère i te parau-naò-raa e ua naò mai te Atua ua märamarama, èi ia märamarama, ua märamarama ò ia ua ö mai te märamarama te vai noa ra rä te pöuri te auraa te tïtauraa ia tätou ia vai ära noa täpeà te märamarama i horoàhia mai eiaha e faaruê hoê taime èita tätou e tauà, hoê taime neneva-rii-hia tei upoo tera pöuri ua hoì mai. E te pöuri, e aha te auraa o te pöuri o te ano. No reira ia hinaaro tätou i te ora täpeà i te märamarama, oia hoì, täpeà te aò, i aòhia ia tätou te èà ia o te märamarama.

 

Teraì òr. Faatura.