Ioane 20.1-9. Mahana

 

Tāpati 09 no Èperera 2023.

ÔROÀ TIÀFAAHOURAA

Mahana

Taramo 118.1-16.

1 E haamaitaì i te Fatu, e maitaì hoì to na, e tià to na aroha i te vai-mäite-raa.

2 Ia nä reira te ùtuafare o Ìteraèra i teie nei: e tià to na aroha i te vai-mäite-raa.

3 Ia nä reira te ùtuafare o Àarona i teie nei: e tià to na aroha i te vai-mäite-raa.

4 Ia nä reira te feiä i mataù i te Fatu i teie nei: e tià to na aroha i te vai-mäite-raa.

5 Ia ù i roohia e te àti ra, ua tiàoro vau i te Fatu, e ua ìte mai ra te Fatu ia ù, e ua tuu mai ia ù i te vähi ätea.

6 Tei pïhaì iho te Fatu ia ù ra, e òre au e mataù: e aha ta te taata ia rave mai ia ù ra?

7 Tei pïhaì iho te Fatu ia ù ei tauturu ia ù ra, e ìte au i te hiàraa o te feiä i riri mai ia ù ra.

8 E mea maitaì te tiàturi i te Fatu, i te tiàturi i te taata nei.

9 E mea maitaì te tiàturi i te Fatu, i te tiàturi i te hui-arii ra.

10 Ua haapuni mai te mau êtene atoà ia ù; no te iòa rä o te Fatu, pau iho ra ia ia ù.

11 Ua nä nià iho hoì, e ua nä nià iho i te haapuni ia ù, no te iòa rä o te Fatu, pau iho ra ia ia ù.

12 Ua haapuni mai rätou ia ù mai te tepure ra, mai te auahi àihere ra, aore aè ra e mähia, mou iho ra, no te iòa hoì o te Fatu, pau iho ra ia ia ù.

13 Ua neneì hua mai hoì òe ia ù ia hià vau, ua tauturu mai rä te Fatu ia ù.

14 O to ù ia ètaèta e o ta ù ia himene o te Fatu, ua riro mai hoì o ia ei ora no ù.

15 Te reo òaòa e te ora tei roto i te mau tiàhapa o te feiä parau tià ra: «E räveà itoito tei te rima àtau o te Fatu,

16 e teitei to te rima àtau o te Fatu, e räveà itoito tei te rima àtau o te Fatu.»

Òhipa 10.34-43.

To Pëtero ôreroraa i mua ia Torenerio mä

34 Ua parau atu ra te vaha o Pëtero: «Ua ìte mau atu ra vau e òre te Atua e haapaò i te huru o te taata.

35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana.

36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haere-raa i te Parau Maitaì i te hau ra ia Ietu Metia (o te Fatu no te mau mea atoà ra).

37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra:

38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua.

39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau.

40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra;

41 eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra.

42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì.

43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa.

1 Tōrīnetia 5.6-8.

6 Eere to òutou faaahaaha i te mea maitaì. Aita òutou i ìte e, e höpue te puèà atoà i te faahöpue iti haìhaì ra? 7 E teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na: o te Metia hoì ta tätou Päta, i taparahihia ia na tätou.

8 E teie nei, e haapaò tätou i taua ôroà ra, eiaha mä te faahöpue tahito ra, eiaha atoà mä te faahöpue täiroiro e te ìno, mä te mäa faahöpue-òre-hia rä, o te haavare òre e te parau mau.

Ioane 20.1-9.

Te tiàfaahouraa o te Fatu

(Mät 28,1-8; Mär 16,1-8; Ruta èv 24,1-12)

1 E tae aè ra i te mahana mätamua o te hepetoma ra, ua haere atu ra Märia i Matätara ra i te poìpoì roa i te menema ra, te vai ârehurehu ra, e ìte aè ra e ua huri-ê-hia te ôfaì i te ùputa o te menema ra.

2 Horo mai ra o ia ia Timona Pëtero ra, e te pipi herehia e Ietu ra, ua parau mai ra ia räua e: «Ua hopoi-ê-hia e rätou te Fatu i te menema ra i räpae, e aore mätou i ìte i te vähi i vaiihohia ai o ia e rätou ra.

3 Ua haere atu ra Pëtero i räpae i reira ra, e taua pipi atoà ra, e tae atu ra i te menema ra.

4 Ua hohoro atu ra räua atoà, e hemo iho ra Pëtero i taua pipi ra, o tei tae atu na ia i te menema ra.

5 E piò iho ra o ia i raro, hiò atu ra i te àhu vehi ra i te vai-noa-raa, aore rä o ia i tomo i roto.

6 Ua haere mai ra Timona Pëtero i muri iho ia na, tomo atu ra i roto i te menema ra, hiò iho ra o ia i te àhu vehi ra i te vai-noa-raa,

7 e te àhu i vehihia i ta na upoo ra, aore ia i vaiihohia i te vairaa i te àhu vehi ra, i tiàfetuhia ia e vaiiho-ê-hia i te vairaa ê.

8 Ua tomo atoà atu ra hoì te hoê pipi i roto, o tei tae atu na i te menema ra; ìte iho ra o ia e faaroo atu ra.

9 Aore ä hoì rätou i ìte i te parau i päpaìhia ra e, e tiàfaahou mai o ia i pohe ra.

Manaò.

Te mätamua teie o te ao no te tiàfaahouraa, ua maìri te ao o te ano, te hiti nei te märamarama te moè nei te uriuri o te pö. Teie te tahi fäìraa i te parau no te ao o te tiàfaahouraa. Ia hiòhia te òhipa ta te Atua i rahu, mai te taime i ìritihia ai ta na parau i te ùputa o te märamarama, e tae mai i teie nei, te taata ia te òhipa hopeà ta na i rave ; ia hiòhia rä te òhipa ta te Atua i hämani, oia te òhipa i nä roto mai i to na rima, te taata ia te mätamua. Te vai ra i roto i te parau o te taata te tahi mea tei haafätata ia na i te Atua, te vai atoà ra rä te mea tei haapäpü mai i to na ätearaa i te Atua. No te mea e tävini te taata no te Atua, te faaìte-atoà-hia mai ra ia to na fätataraa i te Atua, te haapäpü atoà ra ia te Atua i te ätearaa e te taa-ê-raa e vai ra i roto i te taata e te Atua. Te auraa, eere teie fätataraa te taata i te Atua i te tahi tauiraa tei horoà ia na i te tiàraa atua.

No reira te Atua i hinaaro ai i te haapäpü maitaì mai e : Mai te raì nei, e teitei rahi to na i to te fenua, oia atoà to ù ra haereà, e teitei ia i to òutou haereà, e to ù ra mau manaò, i to òutou ra mau manaò  i te faaìteraa a Ìtaia i te pene 55, i te ìrava 9.Te vähi ta te manaò e hinaaro nei i te hiò, eere ia te mea e faaätea ra i te taata i te Atua, te mea rä e ìte ai te taata e, eita to na parau e tano ia faataa-ê-hia i to te fenua. E fenua ra, ei fenua ia. Mai te peu e repo fenua te taata, te vähi atoà ia te reira e roaa ai ia na te auraa o to na parau, oia te vähi e märamarama ai o ia e ìte ai hoì i te räveà e faufaahia ai to na parau. Te mea rä e ìtehia nei, te riroraa ia te tahi parau fifi òre ei parau àro. I mua i te mau mea e vai tahaa noa ra, e au ra e, tei mua te taata i te àehaa mute òre. No reira, ia moè i te taata to na parau, nä reira hoì te tumu o to na parau, e ìte-faahou-hia änei ia na te èà o te ora, oia te èà e tae atu ai o ia i roto i te ìteraa i te Atua. Eiaha rä ia àramoinahia ia tätou e, te èà, e vähi haereraa ia, e aita e faufaa to te èà ia òre te taata ia färii i te nä reira i te haere. E ia parau hoì te Fatu e : O vau te èà, te parau mau, e te ora, aore roa e taata e tae i te Metua ra maori rä, ei ia ù Ioane i te pene 14 ìrava 6, te ìte ra ia tätou e, hoê anaè èà e arataì i te taata i te tumu o te ora. Ia parau rä Ietu i te färaoa e te uaina, to ù ia tino, to ù ia toto, oia hoì o vau ia, e òhie tätou i te märamarama e, te èà ta te fenua e faaìte ra, e te èà ta te Fatu e faaìte ra, taua èà nei ä ia. Te haapäpü noa mai ra teie parau ia tätou e, hoê anaè èà e arataì i te taata i te Atua ra, eere e piti.

I parau a ai tätou e, e repo fenua te taata, eere no te mea noa e, te vai ra te tahi ìrava pïpïria e paèpaè ra i te reira manaò, no te mea rä ua nanaò-roa-hia i roto i to tätou reo mäòhi, e òre atu ai e tià ia tätou ia parau. Hiò na tätou i ta te reo tautururaa ia tätou i mua i teie parau no te tüàtiraa te taata i te fenua. Te nä ô nei tätou e, e vari, no te faaìte i te huru o te fenua tei paruparu roa no te pururaa i te pape. Ua ìte tätou e, mai te peu te vai ra te räau e au i te fenua repo uàuà, te vai ra të òre roa to na tupuraa e taupupu i te rahi o te pape. Teie repo ta tätou e märamarama nei ia parauhia no te räau, te parau atoà ia ta te reo i täpeà mai no te toto o te vahine ta te tino i òre i täpeà mai no te òreraa te ora i mau i roto ia na. Ia päpü rä te tupuraa o te ora tei riro te vahine ei färii, te mea atoà ia e mau ai taua vari ra, e a taui atoà atu ai ta te taata hiòraa i to na parau, nä reira hoì te reo e faaòhipahia atu no na. Ia hiò tätou i te hoê fenua vari tei òre i òhipahia e te rima a riro atu ai ei puna no te ora, e riro te reira i te faatupu mai i te faufau e te au òre o te taata ia hiò atu. A mä rä teie fenua, e a î hoì i te mäa, riro mai ra ia ei âruerueraa na te âau. Mai te tau a uìuì mai ä to te taata o te mau fenua atoà hiòraa i te maì o te vahine, oia te vari e parauhia nei, mai te tahi mea faufau e te viivii ra te huru. No te mea e taoà faaruèhia teie e te tino, hiò-atoà-hia atu ra te reira ei täpaò no te pohe. E no te mea e faatupu te pohe i te pohe, topa atoà mai nei te ôpaniraa i nià i te vahine ia òre o ia ia täpeà i te räau tanu, o te faatupu atoà atu to na ata i te pohe o te räau. A färii rä te tino o te vahine i te ora ta te täne i tuu atu i roto ia na, riro atu ra ia taua vari ra ei taoà àtuàtuhia e te päruruhia, topa mai nei te ôpaniraa i nià i te vahine ia òre o ia ia amo i te hopoià teiaha, ia òre ia faarohirohi i to na tino, o te hee teie vari, e o te mäuà te ora ta na e mau ra. Ia ìte mai tätou, eere no te veve i te reo i täpeànoahia mai ai teie taò vari, no te mea aita e tumu e faatano ra i teie parauraa i te toto e, vari. Ua heheu noa mai rä teie taò i te paari o te mau tupuna tei märamarama i te tüàtiraa e vai ra i roto i te toto, te vari, e te fenua ei tupuraa no te ora. Te au, e te òre te taata e au i te fenua, e fenua ihoä rä o ia, e te faaìte noa ra hoì to na parau i te parau o te fenua. Teie te tautururaa tei haapotohia ia au na taiòraa e maha no teie mahana.

-Taramo 118, 14 O to ù ia ètaèta e o ta ù ia himene o te Fatu, ua riro mai hoì o ia ei ora no ù.

-Òhipa 10, 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra;

-1 Torinetia 5, 7 E teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na: o te Metia hoì ta tätou Päta, i taparahihia ia na tätou.

-Ioane 20, 1 E tae aè ra i te mahana mätamua o te hepetoma ra, ua haere atu ra Märia i Matätara ra i te poìpoì roa i te menema ra, te vai ârehurehu ra, e ìte aè ra e ua huri-ê-hia te ôfaì i te ùputa o te menema ra.

Ao no te tiàfaahouraa teie e niuhia nei i teie mahana mätamua o te hepetoma, te vai ârehurehu noa ra i ìtehia ai e te vahine ua huri-ê-hia te ôfaì no te ùputa o te menema. E poìpoì ua vaiiho mai te ruì ia òhipa te mahana èi türamaraa i te ao, no te faaìte i te puai no te ora èi faaâpïraa i te parau no te mahana e to na taiòraa, mahana mätamua no te hepetoma. Te parauhia nei te mahana, te mahana te taime ia e hiti ai no te faaìte i te ao, ua vaiiho te pö, te reira noa nei ra te manaò i roto i teie taò te mahana. Te auraa no te mahana ia i noaa ai te parau no te ao. Ia hinaaro tätou na märamarama i te auraa o te ao, mea tià ia märamarama tätou i te auraa o te mahana. Teie taò no te mahana o te rä ia te tahi parauraa. E taò hämani teie e hana te taò tumu, ta te Paùmotu e parau nei ua ruki te hana, ua vaiiho mai te ruì ia òhipa te hana i te märamarama, te parau atoà nei te Ènata te hana tei na à i roto i manaò òhipa i teie nei mahana. Mai roto mai i teie taò hana te roaaraa mai ia tätou te hanahana ua täpitihia te parauraa no te faaìte i te puai o te taò e to na värua. Te manaò rahi e vai ra i roto i teie taò e hana, te tahi ia mea e àma, te tahi mea e horoà i te märamarama, oia te tahi mea e türama, no reira e roromä te toètoè e te uriuri, a riro atu ai te ànaana ta na e höroà èi faahiò, èi faaìte i te tahi mea të ìte-òiòi-hia ta te ànaana e faatupu. Naò ia teie manaò i te parauraa teie mahana mätamua, ua höroà i te märamarama no te mau òhipa e tupu, tei faahiò ia tätou i te faufaa hau ê no te mau maitaì ta tätou e faanaò nei. Te riro atoà nei rä te reira èi faahiòraa ia tätou i te Atua Metua te tumu no te tiàfaahouraa te Metia. Te türama mai nei te mahana i te fenua e to na î, te faahoì nei hoì te î o te fenua i taua märamarama ra i nià i te Atua. No reira i tupu ai te hanahana o te Atua, no te maitaì o to na roo ta te fenua e faaìte nei. I haere ai te vahine i te menema i te poìpoì roa, te vai ârehurehu noa ra i te mea te püfenua tera e pii ra ua haafänauhia te Ao âpï, te ao no te tiàfaahouraa. E tae aè ra i taua mahana ra, te faaìte noa mai ra ua tae i te faaâpïraa ua tämähia te èà, e àehaa mutu òre teie tei faaìte i te puai no te mau òhipa e tupu no te mau tau atoà e orahia nei e tätou. Te riro nei rä te ànaana o te hana, te mahana, ta tätou e parau nei e, e ao, èi haamanaòraa mai ia tätou e, te faahanahana nei te mau mea atoà i hämanihia i te Atua, no te faaìte ra rätou i to na parau, te haamaitaì ra i to na iòa, te ârue ra hoì ia na. Te faaìte atoà nei te teatea o te pö ta te märama, oia te âvaè, e höroà nei, i te rahi o te òhipa ta te Atua i rahu. Ta tätou parauraa i teie pö, e pö turu, e turuhia te aru, e ìtehia ai te mau ata no te mau tumu räau. E tià roa ai ia tätou ia parau e, te ao, te hitiraahia ia te fenua nei e te ànaana o te rä, a riro atu ai te marämarama ta na i ninii mai èi heheuraa mai i te maitaì hau ê o te Atua Nui Tumu Tahi èi faaìteraa i to na hanahana.

Te parau atoà nei to tätou reo e ao no te faaìte i te maitaì i te òhipa i ravehia e te tahi taata, te faahiti nei tätou e ao to òe no te haamauruüru ia. Teie parauraa no te faaìte i te täpaò no te òaòa fäito òre, e haapäpüraa hoì no te hoê oraraa fänaò, te hoê oraraa tei faatea i te mau faarumaraa e te peàpeà huru rau tei riro èi tuhaa na tätou i te fenua nei. Ua riro teie ao èi haapäpüraa e, e noaa te hau, te ora, e te òaòa.Te märamarama atoà ra ia tätou i teie nei i te tumu te Atua i ruru roa ai i te nuu atua no te faaoti i te parau o te taata. No reira, mai te Atua i here i ta na rahu, oia te òhipa i nä roto mai i ta na parau, ua here atoà te Atua i te taata, te òhipa i nä roto mai i to na rima. Te ìte atoà ra ia tätou i teie nei e, aita te taata i tuu-noa-hia i roto i te püfenua, oia hoì eere teie i te vairaa tamarii noa, ua riro mau rä ei pü no te rahu a te Atua, e ua faaìte noa mai hoì te tupuraa o te parau o te taata i te tupuraa o te rahu a te Atua. Mai te pape tei riro ei tumu no te ora o te fenua, oia atoà te taata, ua riro atoà te päpe ei tumu no to na ora, inaha ua tupu o ia i roto i te päpe, e no te taa-ê-raa te päpe i te püfenua, i taata mai ai te taata, oia hoì i fenua mai ai te fenua. No reira, ia parau Ietu e : Ia òre te taata ia fänau faahou, e òre o ia e ìte i te hau o te Atua i te faaìteraa a Ioane i te pene 3 i te ìrava 3, te märamarama ra ia tätou i te hinaaro o te Atua ia faafäite faahou te taata i ta na rahu. E mai te peu te fifi ra o ia i te reira parau, teie ia te reo o te Atua : A ui na rä i te mau puaa, e na te reira e haapii mai ; e te mau manu o te rave nei, e na te reira e faaìte mai ia òe ; e aore ra, a ui na i te fenua, e na te reira e parau mai ; e te ià atoà o te moana, e na te reira e faaìte mai ia òe ; o vai tei òre i ìte i taua mau mea ra e, na te rima o te Atua te reira i rave i te faaìteraa a Iöpa i te pene 12, i te mau ìrava 7 e tae i te 9. Ore noa atu ai rä tätou i märamarama i te reo o te mau puaa e to te mau manu, teie ia te reo o te Fatu : Ia tuuhia te hoê huero tïtona i raro i te repo, ia òre rä ia pohe ra, ua vai hoê noa ia ; ia pohe rä, rahi roa atu ra ia te hotu Ioane i te pene 12 i te ìrava  24 No reira, ia òre te taata ia färii faahou i te hoì i roto i te fenua, eita ihoä ia o ia e ìte i ta te fenua haamaitaìraa mai ia na, eita roa atu rä o ia e faaroo i te reo o te Atua, mai ta na i parau i nià i ta na rahu : mea maitaì. Te òhipa ia e tupu nei i te taeraa i te mahana mätamua o te hepetoma, i te poìpoì te ârehurehu noa ra, ua tiàfetuhia e Ietu i te àhu i vehihia to na tino, ua tià e ua haere no te faaìte ua matara te ùputa o te fenua no te Ao o te tiàfaahouraa.

 

Teraì òr. Faatura. 

 

 

Mātaio 21.1-11 Pütö.

 

Tāpati 2 no Èperera 2023.

NO TE MAU ÂMAA

ÔROÀ

Pütö.

Taramo 22

1 Na te Mënätehe, i nià i te Àireta Tahara. Taramo na Tävita.

2 E ta ù Atua, e ta ù Atua, e aha òe i faaruè mai ai ia ù? E aha òe i faaätea ê atu ai i te tauturu ia ù nei? E te haapaò òre mai i to ù nei ûuru?

3 E ta ù Atua, te tiàoro nei au i te ao, aita rä òe i parau mai; e te ruì hoì, aita rä o ù e mäpuhiraa aho!

4 Òe rä Tei Moà ra, e tei pärahi i roto i te haamaitaìraa o Ìteraèra.

5 I tiàturi na to mätou hui-metua ia òe, ua tiàturi rätou, e ua faaorahia rätou e òe;

6 ua tiàoro rätou ia òe, e ua faaorahia; i tiàturi na ia òe, e aore i mäheahea.

7 E toè rä vau nei, eere i te taata, e faaìnoraa na te taata, e ta te taata ia tähitohitoraa.

8 Te feiä atoà e hiò mai ia ù nei, te àta tähitohito mai ra ia ù; ua fäita i te ùtu, e ua ueue rätou i te upoo.

9 Te na ô mai ra rätou: «Oia nei, te tiàturi nei ia i te Fatu, ia faaora o ia ia na; tii mai o ia e haru ia na Inaha, e here hoì o ia na na.

10 Na òe au i rave mai mai roto i te ôpü, o to ù ia tiàturiraa, a òte ai i te ü o ta ù metua vahine ra.

11 Ua tuuhia atu vau ia òe mai ta ù fänauraa mai ä; o ta ù Atua hoì òe mai te ôpü mai ä o ta ù metua vahine.

12 Eiaha e faaätea ê atu ia ù, ia fätata mai te àti ra; e aita atu e tauturu ia tauturu mai

13 E rave rahi te puaatoro e haaàti mai ia ù nei; te mau puaatoro àito o Pätäna teie e haaàti mai ia ù nei.

14 Te hämama mai ra to rätou mau vaha ia ù, mai te riona ûuru ra ia ìmi i te mäa.

15 Mai te pape e niniihia ra vau, e ua paruparu ta ù mau ivi; mai te täpau nei ta ù âau, ua tärapape i roto i ta ù ôpü nei.

16 Ua marô to ù püai mai te àraea a te pötera ra; ua piri ta ù arero i ta ù taa; e ua tuu òe ia ù i raro i te repo pohe ra.

17 Ua haaàtihia vau e te ùrï ra; ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou.

18 E taiò noa vau i o ù mau ivi. Te hiò mai ra rätou, te tiàtonu mai ra ia ù,

19 ua tufa rätou i ta ù mau àhu ra no rätou, e te haa-maìri-terero nei i ta ù pereue.

20 Eiaha òe, e te Fatu, e faaätea ê atu ia ù nei; e ta ù püai, ia peepee mai òe i te tauturu mai ia ù.

21 E faaora òe ia ù i te òè nei, eiaha vau ia riro i te püai o te ùrï.

22 Ia ora vau i te vaha o te riona, ua faaora hoì òe ia ù i te tara o te reema ra. Ua pähono mai òe ia ù:

23 E faaìte au i to iòa i to ù ra mau taeaè; ei rotopü i te âmuiraa ra e haamaitaì atu ai au ia òe:

24 «O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra ra, e mataù òutou ia na.

25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na

26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra.

27 E àmu te feiä haèhaa e ia paìa. O tei ìmi i te Fatu ra e haamaitaì rätou ia na, e vai ä te ànaanaea o to rätou âau.

28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe.

29 No te Fatu hoì te Pätireia, e o ia te tävana i te mau fenua atoà.

30 E àmu te feiä taoà o te fenua nei, e e haamori; e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra.

31 Na te tahi pae huaai e faaroo ia na, e e parauhia ia ei taata no te Fatu:

32 e haere mai hoì rätou e faaìte i ta na ra parau tià i te tahi mau taata èê ra ia fänau mai, na na hoì teie i rave.

Ìtaia 50.4-7

4 Ua horoà mai te Fatu ra o te Fatu ia ù i te arero o te feiä ìte, ia haru mai i parau atu i te parau au i tei rohirohi ra. Te faaära nei o ia i tërä poìpoì, i te poìpoì, te faaära nei o ia i ta ù tarià, ia haapaò vau mai te taata e haapii ra.

5 Ua haafätata te Fatu ra o te Fatu i ta ù tarià, e aore hoì au i pätoì atu; aore hoì au i ôraì tià i muri.

6 Ua tuu noa atu vau i ta ù tua i te feiä i täìri mai; e ta ù päpärià i te feiä i hühuti i te ùmiùmi; aore hoì au i huna ê atu i te vahavaha e te tufatufa haere.

7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä.

Firipi 2.6-11.

6 O te huru ia o ia no te Atua, e aore o ia i parau e haru töroà ia fäito atoà o ia i te Atua.

7 Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei.

8 E no te mea o ia i ìteä mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra.

9 I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na;

10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra;

11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.

Mātaio 21.1-11

To te Metia tomoraa i roto ia Ierutarëma

(Mär 11.1-11; Rut 19.28-40; Ioa 12.12-16)

1 E fätata mai ra Ierutarëma ia rätou, ia tae rätou i Petefäte, i te mouà ra o Òriveta, ua tono aè ra Ietu i e toopiti puè pipi a ana ra,

2 nä ô atu ra: «E haere ôrua i tërä aè ra ôire ïti i mua ia ôrua, e e ìte ôrua i te hoê âtini ufa, ua fëtiihia, e te fanauà i pïhaì iho; e tätara e pütö mai i ô nei ia ù nei.

3 E ia parau noa mai te tahi taata ia ôrua, e parau atu ôrua: «Tei hinaarohia mai ra e te Fatu»,  na na ia e tuu noa mai i reira ra.

4 Ia tupu te parau a te perofeta ra i nä-reira-hia ai, o tei nä ô mai ra e:

5 «A parau atu i te tamahine o Tiona: Inaha, te haere mai na to arii ia òe na mä te haèhaa, e mä te pärahi i nià i te âtini ufa, e te pinia, te fanauà o te âtini.»

6 Haere atu ra nä pipi, nä reira atu ra mai ta Ietu i faaue mai ia räua ra,

7 pütö mai ra i te âtini e te fanauà atoà, tuu iho ra i to räua àhu i nià iho i taua nä âtini ra, e ua pärahi iho ra Ietu i nià iho.

8 Höhora iho ra te tiàa rahi i to rätou àhu i te èà tià; ôoti aè ra hoì te tahi pae i te âmaa räau, vauvau iho ra i nià i te èà tià.

9 Te pii noa mai ra te tïàa rahi i haere nä mua ra, e tei pee mai nä muri, nä ô mai ra: «Hötana i te Tamaiti a Tävita Ia haamaitaì o ia o tei haere mai mä te iòa o te Fatu  Hötana i te raì teitei. 

10 E ia tomo o ia i Ierutarëma, âueue iho ra taua ôire atoà ra, e te taata atoà i te uiraa e: O vai teie.

11 Ua parau atu ra taua tïàa rahi ra: «O te Perofeta ra o Ietu, no Nätareta i Tarirea.

Manaò.

Te täpaò ta te Atua i tuu mai, ta te Tamaiti atoà ia i haere mai e haapäpü faahou i to na faaâpïraa i te faaauraa i ravehia e te Atua, i te parauraa i te hotu o te fenua e : A rave a àmu, o ta ù tino tenä ; a rave a inu, o ta ù toto tenä. Mai te peu o Ietu, te parau ia no te aroha e te here o te Atua i te taata, te fenua, te parau atoà ia no te aroha e te here o te Atua i te taata. Aita atu hinaaro rahi roa to te Atua i te taata maoti rä, ia färii o ia i te ora ta na i horoà mai, te ora e mauhia ra e te fenua. Ia parau mai Ietu e : Tei ìte i ta ù parau e ua faaroo ia na i tei tono mai ia ù nei, e ora mure òre to na, e òre o ia e faahapahia, mai te pohe mai ia, e tei te ora atu ra Ioane 5, 24, e aha atu ä ia ia faaroo tätou i te Atua ia faaìte mai o ia i te ora ta na i faataa no tätou Tenete 2, 9 e ta te Tamaiti e faaitoito ra ia tätou ia färii no te mea o ia iho te reira. Te ìte ra ia tätou i teie nei, te mea tätou i parau ai e, te fenua, te ùputa ia o te raì ; e tei färii i te fenua ra, ua färii ia i te Atua.

I nià i teie èà hoìraa i te Atua ra, eiaha tätou e manaò e, e feiä haere hänoa tätou, e feiä tei haere matapö noa, e feiä tei haapaò haere noa, mai te manaò e, ua tae ra, ua tae ia ; e aita ra, tirä rä ihoä ia. I te matahurahura o teie nei ao, te Atua iho te matamua tei tuu mai i te täpaò ei tauturu ia tätou ia òre ia fifi to tätou tere i te ao nei, eiaha no te ìmi ia na, no te faatupu rä i to na hinaaro. Haamanaò tätou i te mea ta te päpaì tenete e faaìte ra : Ua faatupu te Atua i te mau räau maitataì atoà ia hiò e tei au ei mäa i taua fenua ra ; e te räau o te ora i röpü i taua ô ra, e te räaua e ìte ai i te maitaì e te ìno Tenete 2, 9.  Ua horoà mai te Atua i te ora no te taata, te ora tei riro te fenua ei àpu. Te auraa, eita te ora ta te Atua i horoà no te taata e tano ia faataa-ê-hia i te fenua, eita atoà rä e tano ia faataa-ê-hia i te Atua ; te mea ia e parauhia ra e, te räau o te ora. To tätou fifi, te mea ia e, e tumu räau ta tätou e ìmi nei, moèhia atu ra ia tätou e, ua hunahia te parau i roto i te taò. Teie räau o te ora, te iho tumu ia, oia te taura e täamu i te taata i te Atua, të au roa ia faaauhia i te tahi taura pito e nä reira te Atua i te ninii mai i te ora o te taata. Ia òre te taata ia faaruè i teie taura e täamu ra ia na i te Atua, oia hoì ia vai tüàti noa o ia i nià i te Atua, vai noa atoà mai te ora ei tuhaa na na ; a faaruè rä te taata i teie taura, oia hoì te tumu o to na ora, a ìte atoà o ia i te fifi, te ère, e te ahoaho. I teie mahana, e tano ia parauhia e, ua faaruè te taata i teie taura pito, te taura o te ora e täamu ra i te fenua i te Atua, e ua haru i te mau taura i faatorohia mai e te taata, e tei tävere ia na i roto i te mau fifi mute òre. Te toru o te räau ta te Atua i tanu i nià i te fenua, te räau ia e ìte i i te maitaì e te ìno. Te tiàmäraa teie ta te Atua i horoà no te taata e ìte ai o ia i te maitaì e te ìno, aore ra e tano ai o ia e mäìti i te rave i te mea maitaì, aore ra te mea ìno. No te mea eita te parau o te taata e tano ia faataa-ê-hia i to te fenua e i to te Atua, ia rave te taata i te òhipa e ìno ai te iòa o te Atua, e viivii ai hoì, ua riro atoà te reira ei ìno no na, te ìno e faaea ai te fenua i te horoà i te maitaì, te ìno e täpeà ai te Atua i te taura pito ta na i faatoro mai ei ora no te taata. Areà ia rave te taata i te mea e hanahana ai te iòa o te Atua, ia faateniteni hoì ia na no te rahi o to na maitaì, e faaìte mai te fenua i te mauruüru o te Atua, e e tuu mai ä te Atua i te taura o te ora e ìte noa ai te taata i te òaòa, te maitaì, e te hau. No reira, e mäìti te taata i te ora ta na i hinaaro, aore ra te pohe ta na i hinaaro. Ta te mau taiòraa ia i faanahohia no teie mahana èi ìritiraa i te hepetoma moà, i to tätou âpeeraa ia Ietu i nià i teie èà, ma te taiò i te mau parau i faaineinehia, no te mau pö tätaì tahi. Teie atu ra te haapotoraa o ta tätou mau taiò :

-Taramo 22, 28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe.

-Ìtaia 50, 4 Ua horoà mai te Fatu ra o te Fatu ia ù i te arero o te feiä ìte, ia haru mai i parau atu i te parau au i tei rohirohi ra. Te faaära nei o ia i tërä poìpoì, i te poìpoì, te faaära nei o ia i ta ù tarià, ia haapaò vau mai te taata e haapii ra.

-Firipi 2, 10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra;

-Mätaio 21, 10 E ia tomo o ia i Ierutarëma, âueue iho ra taua ôire atoà ra, e te taata atoà i te uiraa e: O vai teie.

I nià i te èà e rave rahi mau òhipa i tupu ia au i te faaìteraa a Mätaio, Ietu i faaue e piti pipi no te haere e pütö mai i te hoê âteni ufa tei fetiihia, i te mea e hinaaro teie no te Fatu. Teie te fauraò o Ietu i te tomoraa i roto i te òire no Ierutarëma èi faatupuraa i te tohu a te perofeta. Ua tuu teie na pipi to raua àhu i nià i te âtini, parahi iho ra o Ietu ìnià iho, ôoti aè ra te tahi pae i te mau àma räau ua vauvau i nià i te èà, te pii ra te tahi pae hotana te tamaiti a Tavita te haere mai ma te iòa o te Atua, e te tahi pae tei parau e Perofeta no Nätareta. Ua âueue te fenua i teie tomoraa no Ietu, no te faaìte ia i te mana o te Atua tei pärahi fataata i te mau hareà no Ietu. Mea tià atoà ra i roto i ta tätou taiòraa ia haapaò maitaì i teie reo no Ietu e parau ra e a haere a pütö mai, ma te faaära i te fatu o te âteni e hinaaro teie no te Fatu, te òhipa e tupu i roto i teie taò, te vai ra te faateiaha, te faatarere, te faatautau, e parau-atoà-hia parauhia e pütötö no te òhipa ravaai ia, te vai ra ia te manaò ùme eiaha ia mau. Te òhipa ra e tupu ra i roto i teie färereiraa i te fatu o te âteni ua haamoèhia te ani i te âteni, i te mea te Atua te Fatu mau o te âteni no reira päha ia o Ietu i parau ai a haere a pütö mai. No reira te heheu mai nei ta tätou parau ia tätou, te mau vahi faufaa e tupu nei i nià i teie èà, te faaueraa a Ietu, na pipi e te âteni, te àhu, te âmaa räau, te reo pii o te nünaa, te fenua tei âueue.

Na o ia teie manaò i te parauraa te ìriti nei o Ietu i te ùputa o te fenua i parauhia ai  no te taata, e te Atua. Ua ìte maitaì tätou e, eita te parau o te taata e tano ia faataa-ê-hia i to te fenua no reira o ia i te raveraahia mai, i to te Atua i hämaniraa ia na i te repo fenua. Ia färii hope roa te taata i to na parau ei fenua, te mea noa ia e märamarama  ai o ia i te auraa o te òhipa ta te Atua i rave no na, e te mea o ia e ìte ai i te pähonoraa ta te Atua e tiaì ra ia na ia faaìte mai. No te mea e fenua te taata, e tupuraa hoì no te ôpuaraa a te Atua, e òre ai ta te Atua ôpuaraa faaora e nä räpae ai i te fenua, e tei òre hoì i färii i te fenua ta te Atua i haafaufaa, inaha ua tuu o ia i to na Värua i roto i te fenua i âueue ai te fenua, e te òhipa nei to na Värua i nià i te fenua, ua ère ia i te maitaì e te ora ta te Atua i hinaaro ia riro te fenua ei färii. Mai te peu rä e àpu färii ora te fenua, no te mea ia na te Atua te ora i tuu i roto, e ua tuu mai hoì te Atua i te ora ra, e tià roa atoà ia na ia täpeà mai te peu e haaviivii te taata i te àpu färii ora, e eita hoì e hamanaò e, te ora ta na e fänaò nei, e taoà horoà  na te Atua, e täpaò no to na aroha e to na here. A hiò na ia tätou, eita tätou e tuu i te mäa i roto i te tahi färii repo, no te mea aita te reira e au ra i te mau peu maitataì i haapiihia ia tätou e to tätou mau metua tei hinaaro ia ìmi tätou i te mau taime atoà i te räveà ia tupu te parau o te mä. Eiaha rä tätou e manaò e, o tätou anaè te taata tei ìte i te reira peu, inaha mai te reira atoà te räau. Te vai ra te räau ta tätou e parau nei e, mea faaùiùi roa, oia hoì eita e au i te mea viivii. Ia òre te reira viivii ia ìriti-òiòi-hia, e ìno roa te tupu o teie räau, e pohe roa atu. Eita rä hoì tätou e maere, inaha te Atua te tumu o to rätou parau. I mauruüru ai rä te Atua i te fenua ta na i hämani i te faaìteraa a Teuira  Henry i te àpi 350, no te mea ia te faahanahana ra te fenua i te Atua, te faaìte ra hoì i to na rahi, ia au i te huru o te pape e faahoì ra i te märamarama i nià i te raì, i te vähi no reira mai taua märamarama ra. Te reira atoà te manaò o te nünaa Iteraèra ta te päpaì taramo e haamanaò mai ra : te òaòa nei te Tumu Nui i ta na iho ra òhipa ia au te faaìteraa a te Taramo 104 te ìrava 31. No te mea aita te fenua e faaea nei i te haamaitaì i te Atua : Te parau hua nei te mau raì i te hanahana o te Atua, te faaìte nei te reva i te òhipa a tana rima. Te haapii nei te tahi ao i te tahi i te parau, e te faaìte nei te tahi ruì i te tahi i te ìte. Aore e òrero, aore e parau, aore to rätou reo i ìtea, ua tae rä to rätou haruru i te mau fenua atoà, e ta rätou faaìteraa i te ôtià o teie nei ao Taramo 19, i te mau ìrava 1 e tae i te 4. Te mea e hinaarohia nei i te taata, eere te tämä-noa-raa i te fenua, te tämä-atoà-raa rä ia na iho, e te taui-roa-raa i to na oraraa, te tatarahaparaa hoì i mua i te Atua no te mau ìno atoà ta na i faatupu. Ia tae tätou i reira e tano ai tätou e parau e, te mea faufaa, eere te tämäraa, te òreraa rä e faarepo, te òreraa e haaviivii ia na iho e te fenua faatupu ora. Te òhipa ia e tupu nei i roto i ta tätou taiòraa, te vaere nei o Ietu i to na èà ia märae, e vaere atoà nei to tätou âau ia märae, e mä ai to tätou rae.

Faaroo mai tätou te tahi pure i päpaì e Turo a Raapoto:

Pure tätou i te Atua.

E te Atua Nui Tumu Tahi e, te tumu o te raì e te fenua, te tumu o to mätou mäòhiraa, e ârue mätou i to òe iòa moà, haamaitaì mätou ia òe no to òe aroha e to òe here tei ìriti ia mätou i te ùputa o te raì, haamaitaì mätou ia òe no te iho tumu ta òe e faatoro faahou mai nei ia mätou ia ora mätou, e haamaitaì mätou ia òe no te fenua maitaì roa ta òe i ho mai no mätou, te fenua tei riro ei òaòaraa no òe, haamaitaì mätou ia òe i te mea e, nä roto i te fenua, o òe teie e haapii noa mai nei ia mätou i te ora.

Haamaitaì mätou ia òe e te Värua Moà, òe e ìriti noa nei ia mätou i te ùputa o te märamarama ia ìte mätou i te hinaaro mau o te Atua Metua ia mätou. Mauruüru no te itoito e te püai ta òe e faaâpï noa nei i roto ia mätou, ia faateniteni noa mätou i te iòa o te Atua Metua.

Mauruüru ia òe e Ietu Metia, to mätou Fatu no te märamarama o ta òe parau e tauturu noa nei ia mätou i te ìteraa e te raveraa i te èà e tae ai mätou i te Atua ra, te tumu o to mätou ora e te tumu o ta mätou ârueraa, no te mea hoê anaè èà e tae ai mätou te taata nei i te Atua Metua ra maoti rä, nä roto ia òe, nä roto i ta òe parau e türama nei i to mätou èà.

No òe te Hau e te Tumu Nui, no òe te Mana, no òe te Hanahana, mai teie nei e a tau e a hiti noa atu. Amene.

Te faaìte mai nei teie pure tei roto tätou i te tau no te Hinapaarae, i te haafänauraa i te Nuu Atua, tei âvari i teie hepetoma moà, ia pärahi tämu tätou i roto i te pure no to tätou Fatu te Metia. Teie ta Ìtaia parauraa :  Ìtaia pene 50, ìrava 4 Ua horoà mai te Fatu ra o te Fatu ia ù i te arero o te feiä ìte, ia haru mai i parau atu i te parau au i tei rohirohi ra. Te faaära nei o ia i tërä poìpoì, i te poìpoì, te faaära nei o ia i ta ù tarià, ia haapaò vau mai te taata e haapii ra.

 

Teraì òr. Faatura.