Itaia 52, 7-12

Mahana piti 25 no Titema 2018

Itaia 52, 7-12

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra ! o tei hopoi mai i te parau òaòa e te maitaì ra, o tei faaìte hua mai i te ora ra ! o tei parau mai ia Tiona : Tei to Atua ra te Hau ! 8 E faateitei to mau faèhau i to rätou reo ; e ûmere päatoà noa atu to rätou reo ; e hiò hoì rätou, te mata e te mata, i to Iehova faahoìraa mai ia Tiona. 9 Ia püroro noa atu te òaòa ; ia ûmere päatoà, e te mau vähi pararï i Ierutärema ! ua haamähanahana hoì Iehova i to na taata ; ua faaora o ia ia Ierutärema. 10 Ua faaìte hua Iehova i ta na rima moà i mua i te mata o te mau êtene atoà ra ; e ua ìte i te mau hopeà atoà o te fenua ra i te ora a to tätou Atua.

Ia haamaitaìhia te Atua i to tätou färereiraa i teie ôroà Fänau no ta na Tamaiti.

Ia haamaitaìhia te Atua tei faaìte noa i to na Here e to na Aroha na roto i ta na Rahu : Te fenua e to na î, te moana e to na î, te raì e to na î.

Ia haamaitaìhia te Atua tei faaìte mai i to na Here e to na Aroha na roto i ta na Parau.

Ia haamaitaìhia te Atua tei faaìte mai i to na Here e to na Aroha na roto i te mau taata e faatupu ra i te maitaì no te mäa ta rätou e tanu ra, te ià ta rätou e tautai ra, te ànimara ta rätou e faaàmu ra, te mäì o te taata ta rätou e rapaau ra, te fifi o te taata ta rätou e tatara ra, te parau maitaì ta rätou e faaìte ra e te òhipa maitaì ta rätou e rave ra.

Ta tätou parau tei roto i Itaia 52 ìrava 7 i te vähi hopeà tei nä ô e : Tei to Atua ra te Hau.

I roto i teie pene 52, te faaìte ra te perofeta i te mau àti ta Iteraèra i ora i te faaätea-raa-hiahia i to na fenua i to na àfaì-tïti-raa-hia i Aifiti, i Päpuronia e i Peretia(Irava 4 e 5). Ua ora o ia i terä àti e toru no to na taiva i te Atua te tumu o to na ora. Tei Peretia Iteraèra a faaara ai te perofeta i teie parau ia na.

E parau maitaì teie ta te perofeta e faaara ra no te mea e haere mai te Atua e faaìte ia na i to na nünaa. Tei roto te nünaa Iteraèra i te tïtïraa. Teie faaìteraa to te Atua ia na, e faaotiraa ta te Atua i rave i roto i to na tiàmäraa. Eita te Atua e haere noa mai e faaite ia na e aita e tumu. No te mea te vai ra ta te Atua ôpuaraa no to na nünaa i haere mai ai o ia e faaìte ia na.

Tei to Atua ra te Hau.

Te ìte ra tätou teie haereraa mai to te Atua no te faaìte ia na e to na Hau i to na nünaa. Te auraa, eere o te Atua noa te haereraa mai. E haere mai o ia e ta na Faatereraa. E te riro ra te reira ei parau maitaì no te mea te faaea noa ra to na nünaa i raro aè i te faatereraa a te tahi Hau. Mai te peu tei raro aè te nünaa i te faatereraa a te tahi Hau, aita o ia e ora faahou ra i nià i to na fenua. E te riro ra teie haereraa mai to te Atua e ta na Faatereraa ei parau maitaì no na.

Ua riro atoà teie haereraa mai to te Atua e ta na Faatereraa ei parau òaòa no te nünaa no te mea eita te Atua e haere noa mai e faaìte ia na e ta na Faatereraa ma te òre e rave i te tahi òhipa no to na nünaa. E tano e parau e ôpuaraa ta te Atua no to na nünaa i roto i te tïtïraa. Eere teie i te tere faaìteìte to te Atua. Eere atoà te tere faautuà. E tere faaara i to na nünaa i roto i te tïtïraa, te vai ra ta na ôpuaraa faaora no na.

Te Atua e to na Hau, e parau maitaì e e parau òaoa no te nünaa. No te mea no te nünaa te Atua i haere mai ai e faaìte ia na e ta na Faatereraa. No te mea tei raro aè te nünaa i te faatereraa a te tahi Hau, te vai ra te hinaaro o te Atua e haamau i ta na Faatereraa i te vähi ta na e hinaaro ra.

No te Atua te hinaaro, eita e roaa i terä Hau e faatere ra i te nünaa Iteraèra e haafifi i te reira noa atu te rahi o ta na mau räveà. E ìmi te Atua i te mau räveà atoà ia tiàmä to na nünaa. Eita te ôpuaraa a te Atua e mau. Ia haamaitaìhia te Atua.

Tei to Atua ra te Hau.

I teie mahana haamanaòraa i te fänauraa o te Tamaiti a te Atua, te faaara mai ra teie parau e e faatupu te Atua i to na Hau na roto i te haereraa mai o ta na Tamaiti.

Te Hau o te Atua, te Hau ia ta te Tamaiti e haere mai e faaìte  i te fenua nei. Ua riàrià te arii Herota i te faarooraa e te vai ra te Arii fänau âpï i roto i to na fenua. E hia tamarii ta na i haapohe no to na riàrià i teie Arii fänau âpï.

Teie Arii fänau âpï i tonohia mai e te Atua eere no te haamau i te Hau faaterehia e te taata ia au i to na hinaaro e ta na faanahoraa. No te haamau rä i te Hau o te Atua e arataìhia e te ture no te Here e te Aroha.

E te Hau arataìhia e te ture no te Here e te Aroha, te Hau ia i reira e tauàhia ai te taata e to na mau fifi. I reira e ìmihia ai te mau räveà no te haamämä i te àti o te taata. I reira e faanahohia ai te oraraa no te maitaì o te täatoà.

E Hau i reira e ìtehia ai te tupuraa o te parau tià e te parau mau i nià i te fenua. E Hau i reira te taata e ìte ai te tahi i te tahi e e tauturu ai te tahi i te tahi.

E Hau  reira te taata e ìte ai e tuhaa ta na i roto i teie Hau. E Hau i reira e faaturahia ai te Atua, te fenua e te taata.

Tei to Atua ra te Hau.

Ia haamaitaìhia te Atua no ta na Parau.

Jean, Tehaapapa a TEURURAI òrometua