Te maha o te mahana Te tiaìraa a te Tumu Nui i to òe faaroo

Mahana toru 9 no Tēnuare 2019

Te maha o te mahana

-Tumu parau : Te tiaìraa a te Tumu Nui i to òe faaroo

-Pehepehe

E TE TAU E ENĀ ATU

O vai tei ìte i te taiò ia òe

O vai tei ìte i to òe puna

O vai tei ìte i to òe haereà

Inaha mātou nei, oi vaivai noa mai nei

E te tau i hiti mai na òe

Mai te raro roa mai i te pō

Te hiti nei òe ei arataì ia mātou

E hiti ā òe i te moèmoèraa roa

Aita rā òe i taiò aè nei ia òe iho

Ia hiti te rā, e mahana âpī no tāua

A tià mai te ruì e pō âpī no te tama

Tīreo te pō, âvaè âpī no te taureà

Oreòre roto te pō, òhuraa tau no òe e te Māòhi

Taaroa Nui Tumu Tahi te Fatu o te tau

Ua ìte o na ia òe e ta ù nūnaa iti

Tei to na ra tau òe ora noa ai

Ia ora òe ia na i to òe Ao Māòhi

To òe ia Faaroo Māòhi Mau.

Maha o te mahana 31

Māòhi e, eiaha e tāpapa i te tau No òe na hoì o ia i hiti mai ai Eiaha e horo noa, e moèhia te aroha Eiaha e ahoaho, e moèhia i te here ia òe iho.

Te mau taiòraa

-Etetiera 17/22-24 : Te ôpuaraa a te Tumu Nui

-Taramo 92 : Te tiàraa taata parau tià

-II Torinetia 5/6-10 : Te pūai o te faaroo

-Māreto 4/26-34 : Te faanahoraa a te Tumu Nui.

Te manaò tauturu

E parapore teie e faatiàhia nei e Ietu, tei faaau i te Pātireia o te Tumu Nui i te taata ueue huero e aore ra i te huero tïnapi. I roto i teie nā parapore, te faaäuhia nei te huero i ueuehia i te parau a te Tumu Nui tei topa i roto i te âau o te taata, oia hoì te fenua ia. Te auraa, te faaìte nei nā parapore i te faufaa o te tiàraa e mauhia ra e te fenua i roto i te faanahoraa a te Tumu Nui, te tupuraa o te huero e to na hoturaa. Te mea pāpū, e tītauraa teie no te huru faaroo ta te Tumu Nui e tiaì ra i to na mau tāvini, te faaitoitoraa te tāvini tātaì tahi i te tomoraa i roto i te māramarama o te parau, te haapūairaa i roto i te faaroo. Ta Pauro ia i tītau i te Êtāretia no Torinetia, te faatupuraa i te hoêraa i roto i te tino e te Vārua Maitaì, e ìtehia ai te hoturaa o te parau o te faaroo. Ìnaha, aita e faufaa to te tino mai te peu aita to te Vārua e parau, e aita atoà hoì to te Vārua e faufaa mai te peu aita to te tino e parau. Oia hoì, e faufaahia te tahi i te tahi.

Te tauturu nei Pauro ia rātou ia faatupu i te hoêraa i roto i te tino e te Vārua, e tupu ai te maitaìraa o te oraraa o te Êtāretia i haamauhia rātou i nià i te tiàturiraa i te ora a te Tumu Nui, i ta te faaroo ia arataìraa. Te maitaì ia ta te taata parau-tià e faatupu, te ìmiraa i te rāveà ia hotu ùmu noa te reira i roto i te oraraa ta te Tumu Nui i manaò no ta na mau tamarii. Oia hoì, ta te parau-tià e rave te faatupuraa i te maitaì ia au te tītauraa e te hinaaro o te Tumu Nui. Ìnaha, e parau tahito te reira na te Tumu Nui, ua haamaitaì O ia i te mau mea atoà o ta na i Rahu, tei te taata rā i te faanahoraa i to na parau i roto i terā uru maitaì ta te Tumu Nui i pūpū ia na. No reira, a ora i to faaroo, e tià ai te faanahoraa ta te Tumu Nui i rave no tātou, ma te haapāpū e e mau tāvini tātou no te parau tià.

Te pure

To mātou Pā ìno e, te Metua i te raì tuatini, òe tei hau i te mau maitaì atoà o te Rahu, ua hohora òe ia mātou i te ora atoà no ô mai ia òe ra. To Here manotini e to Aroha tuatau, ta to parau mana i haapāpū ia mātou te tiàraa e mauhia ra e òe, tei tià roa ia mātou ia faatura. To mātou Metua, paruparu to mātou i te ora pāpū-hope-roa-raa i roto i te faaroo ta òe i tiaì ia mātou, ta mātou aniraa ia òe, ia tià ta òe ôpuaraa e ia òre ia fifi. Faatià mai to tāvini ta òe i māìti rau noa atu ā te tahua e te huru oraraa e orahia ra e mātou, ìnaha no òe te Hau, te Mana, te Hanahana, mai teie nei e a tau a hiti noa atu. Amene.