Te pae o te mahana Ia vai māite ā te aroha taeaè

Mahana maha 10 no Tēnuare 2019

Te pae o te mahana

-Tumu parau : Ia vai māite ā te aroha taeaè…

-Pehepehe

TO ÒE UÌ E TO Ù

Erā te parau ua reva e,

Te uì o te tama e te uì o te metua,

Ua vāhia, aore e hono e tāati ai.

A ria, e mata ê ānei te ôpū i ta na i fānau,

E tute ānei te tama i te ôpū i hii ia na.

E fifi ra, no te uì ia i fifi ai,

No te uì atu ra te mau fifi atoà.

Te uì i to na reo, te uì i ta na peu,

Aore e hono e tāati ai,

Aore e hono ei firiauì.

Te ū o te here ta òe i ài,

No te fero ia ia òe i te here metua,

No te fero ia òe i te here fenua.

Te äratohia nei rā òe, tautau mai nei au,

E te uì hou e, haamanaò o vai rā òe.

34 Pae o te mahana

Te tama i to na tau, te metua i to na, Te reo ia o te vāhiavai. Aore rā e haereraa i mua, Tei òre i riro atoà ei haereraa i muri Ia vaiiho noa tāua, a tau e a uì noa atu.

Te taiòraa : -Hēpera 13/1-5

Te manaò tauturu

E parau rahi roa to te AROHA i roto i te oraraa o te taata. I roto te oraraa ùtuafare ānei, te oraraa vaamataèinaa e tae roa i roto i te oraraa faaroo. Te ATUA te tumu o te AROHA, o te ATUA tei AROHA mātāmua i te taata. Ta te pāpaì Hepera ia e haamanaò nei ia tātou, te faufaa rahi o te AROHA i roto i te hoê ùtuafare. Te nā ô nei te ìrava 1 : “ Ia vai māite mai ā te Aroha Taeaè ”. Te haapāpū noa mai ra teie parau e, eiaha te AROHA ia òre i roto i te tahi ùtuafare. Te ìte ra te pāpaì Hēpera e, te paruparu ra te AROHA i roto i te mau taeaè, e o ta na e faaitoito nei i te taata ia tāpeà māite ā i te faatupu i te AROHA. Ia paruparu te AROHA, te oraraa tāatoà te paruparu, e e tae roa te tahi i te haapaò-noa-raa ia na iho ma te òre e haapaò faahou i te tahi. Ora âmui noa ai te tahi ôpū fētii i roto i te hoê fare, ia òre te AROHA, aita te tāamuraa e ìte-faahou-hia, aita te tāuàparauraa e tupu. Aita te parau no te tautururaa te tahi i te tahi e ìte-faahou-hia, aita te here e faufaahia.

Pae o te mahana 35

Te AROHA, o te taoà nehenehe roa teie ta te Atua i pūpū i te taata ei maitaìraa no to na oraraa. Te Nūnaa Māòhi te ìte maitaì te auraa o teie parau, tei roto roa te reira parau i to na Ôpū. E nūnaa fārii te nūnaa Māòhi, e nūnaa here i te taata, e nūnaa faatupu AROHA te nūnaa māòhi. I mua rā, ia hahaere te hoê taata na pïhaìiho i to òe fare, e tuō òe : “tīpae mai i te fare nei, haere mai e tāmāa”, o te AROHA tenā. Mai te peu aita ta òe, e tauturu mai te tahi ia òe, o te AROHA tenā. Aita ānei ra teie parau e haauiui atoà rā ia tātou te nūnaa Māòhi i teie mahana, aita ānei te AROHA i paruparu atoà io tātou. E aha te huru o te AROHA e to ù nūnaa i teie mahana, te maitaì noa ra ānei, te pūai noa ra ānei. Mai te peu e, ua paruparu, e aha te rāveà e hoì faahou mai ai to tātou huru mau, to òe huru mau e te Māòhi. Teie ia, a hoì faahou i roto i to òe Parau, a hoì i roto i to òe faaroo māòhi mau, e na te reira e tūrama faahou ia òe te auraa mau o te AROHA. TE AROHA, o te tāviri te reira, o te hoê oraraa òaòa, te hoê oraraa hau, mai ta Pauro i parau, “ te vai ra te Tiaì, te Faaroo e te Aroha, tei hau ra i na parau e toru o te Aroha ia ”. No reira e teie nūnaa, a mau i te Atua i roto i te hoê rima, e te Aroha i roto i te tahi a haere rā ma te hau.

IA ORA NA

Te pure

E te Atua e, ua ìte òe i to mātou huru no te mea e Atua māramarama òe. I mua i te rahi o te mau òhipa e tupu nei i roto i to mātou oraraa, ua ìte mātou e, aita òe e ātea nei ia mātou. Teie nei rā e te Atua, ua paruparu mātou te faatupuraa e te faaìteraa i to òe Aroha, i to òe Here mātou mātou iho. O ta òe ia e haamanaò noa nei ia mātou na roto i ta òe Parau : “ia vai māite ā te Aroha taeaè”. Oia mau e te Atua, tauturu mai òe ia mātou te ìte-faahou-raa ia mātou i roto i te tahi, ia ìte te māòhi ia na iho. Te pure nei mātou no te tāatoàraa o te mau ùtuafare o Māòhi Nui nei, tei pārahi noa i roto i te peàpeà e te ahoaho, a tuu faahou òe, i te huero o te Aroha i roto i to rātou âau, te tāviri noa ia e matara faahou ai te ùputa o te Ora, no te Hau. AMENE