Te ono o te mahana Tei nià te mata o te Tumu Nui ia tātou

Mahana Pae 11 no Tēnuare 2019

Te ono o te mahana

-Tumu parau : Tei nià te mata o te Tumu Nui ia tātou…

-Pehepehe

MAOHI E, IA ORA I TE HAEREA

Ore noa atu òe e ìte e

Te haere tià atu ra òe i hea

A ìte paha ia e, mea na hea mai òe.

Ore noa atu ai òe e ìte e o vai òe

A fārii paha ia e, tei nià ia òe

Te mata o te Tumu Nui

E ohi hoì òe no na

Māòhi Nui, to òe ia metua vahine

Tei to tere atoà na o ia

No te tāvaimanino

I to mau haereà atoà.

Na te mau àre roroa o to òe oraraa

Na te marū o to na reo e faahaumārū ia òe

Ia òre ia ùmea e te ôpape àhure hīroà

Moè ê atu ra ia òe, te mato i paohia mai ai òe.

Māòhi e, te Atua Nui Tumu Tahi

Te tumu ia o to òe faaroo

To òe fenua, te papa àueue òre ia

O to òe faaroo Māòhi Mau

38 Ono o te mahana

Tei to reo tumu na te tāviri e matara

Ai ia òe te ùputa o to òe parau

E ei to metua vahine faatupu ora

E mähorahora ai to ora

I te mau mahana atoà ra.

E tenā na Māòhi e, a haere ra

Ma tenā na maa faaroo iti

Eiaha to âau ia taiā iti noa aè

Inaha na Taaroa Nui Tumu Tahi

E amoamo e tuutuu i to nau âvae atoà

E na to metua vahine e tāmarū

Ia hau noa to mau haereà atoà

I teie nei a tau a hiti noa atu

Te mau taiòraa

-Ieremia 10/12-16 : Te Atua rahunui, e Atua ora ia…

-Māreto 16/14-15 : E haere òutou e faaìte i te parau maitaì i te taata atoà. O tei faaroo e ua päpetitohia, e ora ia, âreà o te òre e faaroo ra, e faahapahia ia.

Te manaò tauturu

I mua i teie tumu parau i to tātou, aita atu e tītauraa ta te Atua i te taata i roto i te rauraa no te huru ta na i haafānaò i te taata tātaì tahi, ia âmui i to tātou pūai iti, to tātou ìte, to tātou paari, ia riro tātou ei rāveà faaìte i te taata i te parau maitaì a te Atua, aore ra ia riro tātou ei àveià arataì i te taata i te Atua ra. E riro hoì te reira ei òaòaraa no te tahi taata tei tauhia e te tītauraa a te Atua. Ia òre rā ia moèhia i te taata i te ìte e, e te fāì e, te Atua te haamataraa o te mau mea atoà. Te Atua atoà rā i roto i to na tiàmāraa i te raveraa i te mea tià no te taata nei. I roto i te faaìteraa a te puta Ieremia, te hinaaro nei te Atua ia hoì faahou mai i roto i te manaò o te taata, te òhipa faufaa roa ta te Atua i rave no na e na na. E inaha, hou aè te Atua a hāmani ai i te taata, ua faanahonaho te Atua i te oraraa o te taata ia òre o na ia pārahi i roto i te ère e ia ineine hoì te mau mea atoà, i reira to te Atua haapārahiraa i te taata i roto i te uru maitaì. Na tāua uru maitaì e haamanaò tāmau ia na e, te Atua te Fatu o te ora, tei ineine hope i te tuu i te taata i roto i te ora. Te ìtehia nei i te tau o Ieremia te taata i te fāriu-ê-raa i te Atua, e i te hōroàraa i to rātou tiàturiraa i roto i te rima o te mau îtoro. Ia hiò tātou i te faaìteraa a Māreto, te faaue nei Ietu i ta na mau pipi e haere, te auraa, e faaruè i te tahi vāhi no te fano i te tahi atu vāhi. Eere rā i te haere noa ta Ietu e tītau ra ia rātou, e haere rā ma te faaìte i te parau maitaì, oia te Evaneria ora. Aita atu e hinaaro to te Fatu i ta na mau pipi, ta na i māìti e tei tuu atoà o ia i to na tiàturiraa, maoti ra ia riro te reira ei òhipa tāmau na rātou i te faaìteraa i te hinaaro e te parau a te Atua i te taata na. O tei faaroo e ua pāpetitohia, e ora ia, âreà o te òre e faaroo ra, e faahapahia ia. I ô nei, eita te parau no te peeraa ia Ietu e hope i nià i te pāpetitoraa, aore ia, aita te pāpetitoraa i riro noa ei tāpaò tei hope to na parau i nià ia na iho, te mea e toe ra, te māramarama ia i te auraa mau o te pāpetitoraa. Te auraa o teie taò, tāumi i te taata i raro i te pape, i ô nei, aita e anihia ra i te taata e tāumiumi ia rātou raro i te pape, ia fārii rā te taata ia tāumihia o na i roto i te parau a te Atua, tei riro ei tāpaò no te faaâpīraa i te òhipa ta te Atua i haamau i te ìritiraa mai i te ora mai roto mai i ta na parau. Eita e māramarama mai te peu eita e fārii ia tāumihia i roto i te parau, eita e māramarama mai te peu eita e tomo i roto i te parau a te Atua. Nā hea te parau a te Atua e tano ai e tūrama i te èà o te taata mai te peu aita e taata e hinaaro i te haere na nià i taua èà ra, e te reira atoà te òhipa tei òre i māramaramahia e Pētero. Te taime a hinaaro ai Ietu e horoi i to na âvae, teie te reo o Pētero, eiaha òe e horoi i to ù âvae. Te haapāpū mai ra Ietu e, Ia òre au ia horoi ia òe, aita ta òe e faufaa ia ù nei. Te manaò o Pētero, eiaha i te âvaè anaè, te tāatoà rā o te tino, ta te Fatu ia i pāhono mai e, no te feiā tei hopu noa na, âtirā i te hopu faahou, o teie noa maa pape iti, ua mā ia te tāatoàraa e ua ora. Tei nià te mata o te Atua i ta na rahu e i te taata. Aita e fenua e e nūnaa i te ao nei eere no te Atua. Ia hiòhia rā te huru o te taata e ta te taata faanahoraa i te parau no te rahu a te Atua, te ìte ra ia tātou e, ua haafatu te taata i ta te Atua maitaì ei maitaì no na e na na. Moèhia i te taata i te ìte e te faahoì i ta te Atua i te Atua ra, no te mea, o na te Fatu no taua maitaì ra. E fenua ora to te Māòhi, tei faaàmu i te tama Māòhi. Tei nià ia tātou te mata o te Tumu Nui, aita e taata eita e tanohia i te poromata o te Atua. Haamanaò na tātou i te tahi tupuraa òhipa ta Ietu i ìte e tei riro hoì ei haapiiraa i te taata atoà. Te hōroà a te tahi Vahine ìvi taoà òre, ua riro ia ei haapāpūraa i te taata i te faaroo rahi o teie nei Vahine e to na tuu-hope-roa-raa i te tāatoàraa o to na parau e to na ora i roto i te rima o te Atua. E o tātou, ua ineine ānei tātou i te rave atoà i ta tātou tuhaa mai teie Vahine. Mai te peu e, E, a rave ia i to òe faaroo e a tuu i te tāatoà o to òe ora i roto i te rima o te Tumu Nui e i roto i ta na òhipa. Haamanaò, tei nià ia tātou te mata o te Tumu Nui, mea ôhie te Atua i te ìte e, e parau mau e parau tià ta òe, aore ra, e haavare e haavarevare ta òe i te Atua. A haere anaè i roto i ta te Atua ôpuaraa, ua ineine te Atua i te fārii ia tātou. Ia ora na.

Te pure

Haamaitaì mātou ia òe e te Atua Metua i te raì tuatinitini, Fatu o te ora, Fatu i te mau maitaì atoà e fānaòhia nei e te taata. Te rahu e âua haaàti ra ia mātou tei haamanaò tāmau ia mātou i te rahi no to òe here e ta òe hāmani maitaì ia mātou nei. Te taata e âua haaàti nei ia mātou, o te täuaro ia ta òe i tītau ia mātou e ia hoê aè mātou i to mātou ìte, pūai no te tāvini ia òe. Te faahaèhaa atu nei mātou i mua i to moà e to òe tura, o mātou aore i tiàturi e i fārii i te here rahi no òe tei na roto mai i te Fenua e te mau mea atoà ta òe i rahu. Ua hōroà òe i te tiàmāraa i roto ia mātou tātaì tahi no te rave i te mea tià e te mea maitaì i roto i to mātou nei oraraa. A tauturu mai ia mātou i te hoì-faahou-raa i roto i ta òe ôpuaraa faaora no mātou nei. Te ani atu nei mātou ia òe e te Atua ia arataì òe i to mātou mau taahiraa âvae atoà, ia òre mātou ia topa i roto i te mau òhipa tià òre, e hapa ai mātou i mua ia òe. Ia riro rā ta òe parau ei mōrī e arataì i to mātou âvae ia òe ra. I te iòa o te Faaora Nui Ietu. Amene.