Tāpati 26 no Èperera 2020.

Ànaanatae.

Ômuaraa.

Faaitoito e au hoa faaroo, i te haamoriraa i roto i to tätou mau ùtuafare ia riro èi taime faufaa no te faarooraa i te mau hinaaro o te Atua Nui Tumu Tahi na roto i te mau taiòraa i faataahia no teie mahana. No teie maì piri fee e tupu nei i Mäòhi Nui nei, e i te ao. Tei ä tätou ra te raveà mätamua roa  e mau ai te parareraa o teie maì, ma te ära tämau i te mau vahi e hahaerehia e tätou, ma te faatura i te mau faanahoraa. Na te Atua e haamaitaì mai ia tätou

Himene

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe. 2 Te parau nei au i te Fatu e: O ta ù Fatu òe, aita a òe e faufaa i to ù nei maitaì.3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra: te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì.10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

Himene.

Òhipa 2.14-33

Te aòraa a Pëtero i te mahana Penetetöte

14 Ua tià aè ra rä Pëtero, e te àhuru mä hoê atoà ra i nià, faateitei atu ra i ta na reo, ua parau atu ra ia rätou: E te mau âti-Iüta nei, e te feiä atoà e pärahi i Ierutarëma nei, ia ìte mai òutou, a faaroo mai na òutou i ta ù nei parau. 15 Aore hoì teie nei mau taata i taèro i ta òutou e manaò na, o te toru ä hoì teie o te hora i teie nei mahana. 16 O tei parauhia mai rä teie e Ioera perofeta ra e: 17 Te parau mai ra te Atua: Ia tae i te mau mahana hopeà ra, e ninii atu ai au i ta ù Värua i nià iho i te taata atoà, e na to òutou mau tamarii tamaroa ra e te mau tamahine e tohu, e e ìte hoì to òutou mau taata âpï ra i te ôrama, e to òutou hoì mau taata ruhiruhiä ra, e täòtoòtoähia ia.18 E ninii atu vau i ta ù Värua i nià iho i ta ù mau tävini täne e ta ù mau tävini vahine i te reira mau mahana, e e tohu hoì rätou.19 E na ù e tuu i te piri i nià i te raì, e te täpaò i raro i te fenua; te toto, e te ahi, e te ata auahi hoì. 20 E riro te mahana ei pöuri, e te märama ei toto, e tae ai i taua mahana rahi mataù a te Fatu ra. 21 E e riro hoì e, o të tiàoro i te iòa o te Fatu ra, e ora ia. 22 E te mau taata o Ìteraèra nei, e faaroo mai òutou i teie nei parau: o Ietu o Nätareta, o te taata i tiàhia e te Atua, i rotopü ia òutou i te mau òhipa mana e te temeio, e te mau täpaò ta te Atua i rave ia na i röpü ia òutou nei, ua ìte atoà hoì òutou iho na. 23 Oia rä i tuuhia mai ia òutou i te ôpua mau e te haapaò-ätea-raa a te Atua, i noaa ai ia òutou, faatätauro iho ra, e täparahi pohe roa atu ra i te rima o te haapaò òre ra. 24 Oia hoì ta te Atua i faatià aè nei, ua matara hoì ia na te täpeà ra o te pohe, e òre roa hoì o ia e mau i te reira. 25 Te parau mai ra hoì Tävita ia na e: Ua ìte au i te Fatu e tià i mua i ta ù mata, no te mea tei ta ù rima àtau o ia, e òre au e âueue. 26 I òaòa ai ta ù âau, e ua òaòa hoì ta ù vaha; e e taòto atoà hoì ta ù tino mä te tiaì; 27 e òre hoì òe e vaiiho i ta ù värua i häte, e òre hoì òe e tuu i to mea moà ra ia tähuti noa na. 28 E faaìte mai ia òe ia ù i te èà ora; e faaî mai ia òe ia ù i te òaòa i to mata na. 29 E hömä, e te mau taeaè, e parau noa atu na vau ia òutou i te patereareha ra ia Tävita, e ua pohe hoì o ia e ua tänuhia, e te vai noa nei ä to na menema io tätou nei e tae roa aè nei i teie nei mahana. 30 No te mea rä e perofeta, ua ìte hoì o ia e, ua parau mai te Atua ia na mä te tapu, e faatià o ia i te Metia i to na ra huaai i te haapaòraa i te tino ra, ei pärahi i nià iho i to na ra teröno; 31 o ia rä i ìte ätea noa i te reira, i parau ai o ia i te tiàfaahouraa o te Metia ra: E eita to na värua e vaiihohia i häte, e eita to na tino e vaiiho-noa-hia ia tähuti noa na.32 O taua Ietu nei ä ta te Atua i faatià aè nei i nià, o mätou atoà nei hoì te ìte. 33 E teie nei, ua faateiteihia o ia i te rima àtau o te Atua, e ua noaa mai i te Metua ra te Värua Maitaì i parauhia mai ra, ua ninii mai o ia i teie ta òutou e hiò nei, e ta òutou e faaroo nei.

Himene.

1Pētero 1.17-21

17 E te taù na òutou i te Metua, o tei feruri i tei au i ta te taata nei òhipa mä te haapaò òre i te huru o te taata, e pärahi i to òutou purutiaraa i ô nei mä te mataù. 18 Ua ìte hoì òutou e aore òutou i hoohia i te mea e ìno noa ra, mai te ârio e te àuro, i ta òutou parau faufaa òre i tuuhia mai e to òutou hui-metua ra; 19 i te toto taoà rä o te Metia ra, mai to te ârënio ìno òre e te maì òre: 20 o tei haapaò-ätea-hia ia hou te tumu o teie nei ao, i teie nei rä mau ànotau hopeà i faaìtehia mai ai no òutou; 21 o tei faaroo i te Atua ia na, o tei faatià ia na i te poheraa ra, e ua horoà i te mana no na, ia riro to òutou faaroo e te tiàturi i te Atua.

Himene

 Ruta èv 24.13-35

Te färaa mai Ietu i nä pipi no Èmäuta

(Mär 16,12-13)

13 E inaha, rereva atu ra e toopiti o rätou i taua mahana ra i te hoê ôire ïti o Èmäuta te iòa, e ono àhuru tetatia te mäoro e Ierutarëma. 14 Paraparau noa iho ra räua i taua mau mea atoà i ìteä ra. 15 E te paraparau noa ra räua, e te feruri noa ra räua räua iho, ua täàti atoà mai ra Ietu ia räua, haere atoà atu ra rätou. 16 Ua faaòrehia rä te ìte i to räua mata, aita atu ra räua i ìte ia na. 17 Ua parau mai ra o ia ia räua: E aha tënä na parau ta òrua i paraparau noa na mä te mata huru òto.18 Ua parau atu ra te hoê o räua ra ia na, o Tereopa te iòa, nä ô atu ra: O òe anaè na paha te taata ê i Ierutarëma nei aore i ìte i te mau mea i tupu i reira i eie nei puè mahana? 19 Ua nä ô mai ra o ia ia räua: E aha ia mau mea? Ua parau atu ra räua ia na: Ia Ietu i Nätareta ra, e perofeta mana ia i te raveà, e te parau i mua i te aro o te Atua e te taata atoà hoì. 20 E to tätou mau tahuà rarahi e te mau haavä, i te tuuraa atu ia na ia faautuàhia ia pohe, e ua faatätauro hoì ia na. 21 Âreà mätou nei, manaò ia mätou e, o te taata ia e ora ai Ìteraèra nei: eere rä te reira anaè ra, o te toru hoì teie o te mahana i ravehia ai taua mea ra. 22 I hitimaùe ra mätou i e toofanu puè vahine o mätou nei, o tei haere i te poìpoì roa i te menema ra; 23 e aore aè ra i ìteä e rätou to na tino, haere mai ra, parau mai ra e: E puè merahi tei ìteä ia rätou, o tei parau mai ia e: Ua ora o ia. 24 Haere atu ra e toofanu puè taata o mätou i te menema ra, e roohia atu, oia mau ä ta taua mau vahine i parau mai ra: aita rä rätou i ìte ia na. 25 Ua parau mai ra o ia ia räua: Âuë ia puè taata manaò òre e, e te faaroo taìàtä i tei hope i te parauhia mai e te mau perofeta ra e 26 Eere änei ia nä-reira-hia to te Metia pohe e tià ai, a reva atu ai i to na ra ao? 27 Ua faaìte mai ra o ia ia räua i te auraa i te mau parau no na iho i roto i te mau parau atoà i päpaìhia ra, mai ia Möte mai ä e tae roa aè ra i te mau perofeta atoà. 28 E fätata mai ra ia räua taua ôire haerehia e räua ra, ua faahua haere roa o ia. 29 Täpeà atu ra rä räua ia na, nä ô atu ra: E faaea na tätou; ua huru ahiahi hoì, ua mure te mahana. Haere atu ra o ia i roto e pärahi atoà rätou. 30 E ia na i âmui atoà atu ia räua i te àmuraa mäa ra, ua rave iho ra o ia i te päne, haamaitaì atu ra i te Atua, vähi iho ra tuu atu ra ia räua ra. 31 Tuua iho ra te ìte i to räua mata, ìte atu ra räua ia na, moè roa atu ra rä o ia. 32 Ua parau iho ra räua räua iho: Eere, e hoa, i ànaanatae to täua âau ia na i paraparau mai ia täua i te äratià ra, a faaìte mai ai ia täua i te auraa i te mau parau i päpaìhia ra? 33 Ua tïtià aè ra räua i nià i reira ra, hoì mai ra i Ierutarëma, roohia mai ra ua putuputu te tino àhuru mä hoê ra, e te tahi pae atoà o rätou ra, 34 o tei parau atu ia räua e: Ua tià mau ä te Fatu i nià, e ua faaìte mai ia Timona. 35 Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra.

Himene.

Manaò.

I to tätou taiòraa, e faarooraa i te mau parau tei faahitihia i roto i na taiòraa e maha nei te ìtehia nei te ànaana o te parau e tae nei i roto i to tätou tärià i to tätou faarooraa. Te ànaana te ànapa ia o te märamarama e faahoì ra te vahi mai reira mai te türamaraahia, mai te mahana e ànapa ra i nià i te moana, te faahoì nei taua märamarama ra te vahi no reira mai o ia, te tumu no taua märamarama ra. Mai te pape atoà hoì e faahoì ra i te ànaana o te mahana i nià i te raì, te vähi no reira mai taua märamarama ra, te faahoì atoà ra te fenua i te hanahana o te Atua ta na e mau ra, i te Atua ra, te tumu o te maitaì ta na e faaìte noa ra aita e mahana tuua. E tano te parau o te fenua ia faaäuhia ia tätou tei riro atoà ei färii no te ôpuaraa faaora a te Atua. Mai te Värua o te Atua Nui Tumu Tahi i faaàrepurepu i te moana i te matahurahura o teie nei ao ei faaineineraa i te fenua i te färiiraa i te ôpuaraa faaora a te Atua, ua faaàrepurepu atoà te Värua o te Atua i nià ia tätou ei faaineineraa ia tätou i te färiiraa i te ôpuaraa faaora a te Atua, i roto i teie tau ta tätou e faaruru nei teie maì viivii piri fee, te anihia ra i te taata tätaì tahi tei ana ra te raveà mätamua roa no te tinai i teie maì, ia ànaana o ia i te täma ia na i te päpe e i te mau faaueraa atoà i faanahohia, ia ànaana tätou ia tae te ànaana i roto ia tätou, a ànaanatae ai tätou i te taiòraa i te haapotoraa no ta tätou parau nei teie mahana.

-Taramo 16, 7 E haamaitaì ä vau i te Fatu o tei haapii mai, te aò i ta ù manaò âau i te ruì.

-Òhipa 2, 32 O taua Ietu nei ä ta te Atua i faatià aè nei i nià, o mätou atoà nei hoì te ìte.

-I Petero 1, 21 Tei faaroo i te Atua, tei faatià i te mana i to òutou faaroo e te tiàturi.

-Ruta èv 24, 32 Eere, e hoa, i ànaanatae to täua âau i te paraparauraa mai i te äratià ra.

Te parau e färereihia nei, te parau o na pipi no Èmäuta hoìraa i Ierutarëma, tei nià i teie èà te tupuraa te mau manaò, i orahia e raua i te faraite a pohe ai o Ietu. E huru peàpeà to teie na taata, hoê o Tereopa, Aita i pee te òto o teie na taata. Te manaò nei raua e, e faaea te parau o Ietu i Nätareta i te menema no Arimataio mai tei ìtehia ia pohe te hoê taata. Teie ra aita o Ietu, i haere mai no te parau i roto i te menema, ua haere mai ra O ia no te huaì i te mau menema, ia ìtehia te parau no te tiàfaahouraa. Ia noaa i te mau taata atoà te parau no te haafatataraa i te Atua.

Te mau mahana atoà no to tätou oraraa, mea haere pinepine tätou na nià i te èà. E rave rahi mau taata, ta tätou e farerei, mau fetii, mau hoa, e àparau tätou ia rätou, no te ui ia rätou e aha te huru. Àreà ra te feia aita tätou i mätau ra aita ia tätou e àparau, e aore e aroha.

No reira te Parau Maitaì i papaìhia e Ruta i te pene 24 i te mau ìrava  13 e tae i te 35, te faaìte nei ia i te tahi huru färereiraa e tupu i nia i te èà, to na auraraa ua tupu ta tätou taiòraa i nià i te èà no te hoìraa fare, no te òhipa rahi i tupu i nià ia Ietu. I te mea i roto i to raua manaòraa, aita e òhipa faahou to Ierutarëma. E na taata perenina teie, tei tiàturi i te mau òhipa tei ravehia e te Fatu e Ietu no Ìteraèra. Teie taua  mau rave òhipa ra tei rave i te mau temeio i te iòa o te Fatu.

Tei nià raua i te èà, no te haapae i te tiàraa perenina, a hoì atu ai i nià i te toroà, tei matarohia i te mau mahana tätaìtahi. Teie atoà mai ra te Fatu, ta raua i manaò eita e farerei faahou, te àmui nei i teie tere. E färereiraa taa ê mau teie, no te mea to raua ìte na roto i te mata varua ua faaòrehia ia, ua rupehu roa ia te reira. I ui maere ai te Fatu iho ia raua, no tei mau parau e faahitihia nei. Na te pähonoraa i faaìte i te Fatu e, ua marau te mau òhipa ta na i ravehia i roto i te mau pipi. Àreà no teie na taata perenina, te vai noa nei ia te tahi aveave, no te òhipa i tupu i te faraite poheraa, e i te ôroà pata.

I te parauraa e, o Ietu i Nätareta, e perofeta mana i mua i te aro o te Atua, e taata teie e ora ai Ìteraèra. Te vai nei ra te hitimaùe i roto i to raua âau, no te mea, ua ora O ia ia au i te ìrava 23, aita ra rätou i ìte ia na ia au i te ìrava 24. O raua atoà, aita i ìte e, o te Fatu mau teie i roto pu i teie âparauraa, i parau noa atu ai raua e, na te mau tahuà rarahi, e te mau haava i faautuà pohe ia Ietu. I faahapa ai o Ietu, i te maoro o to raua faaroo, e to raua ìte òre. Ma te auë, i te faaroo taìàtä o na pue taata perenina.

I horoà faahou ai o Ietu i te haapiiraa i te mau Papaì Moà, ma te faahiti mai a Mote mai, e tae roa i te mau perofeta. Ia fatata ra i te òire no Èmäuta, te manaò nei o Ietu e haere i mua. Te täpeà nei ra  teie na pipi, i te mea ua ahiahi ua mure te mahana. I àmui ai rätou i te àiraa i te maa, e na te Fatu iho i vahi ta rätou pane, e te haamaitaìraa, i reira atoà to teie na pipi ìteraa o te Metia teie, ta raua i àparau i te roaraa, o teie èà e 32 kirometera.

E 32 kirometera te àparau-noa-raa na taata perenina e o Ietu, e mahana täatoà ia. No te aha o Ietu aita i faaruè i teie na taata ? E aha te tumu ? No te mea ia, aita ta raua òhipa i oti i Ierutarëma, e hoì faahou i reira no te tiaì i te Varua Maitai. I tupu ai te Ànaanatae i roto i teie na pipi i te hoì i Ierutarëma. No reira ia tae te ànaana o te parau a te Atua Nui Tumu Tahi  i roto i to tätou âau,  no te ärataì ia tätou  i roto i teie tau ta tätou e ora nei i teie  maì piri fee e faataupupü nei i to tätou oraraa i teie mahana.

Himene 

Pure

Pure tätou i te Atua, te aroha o te tätarahapa, E te Atua Nui Tumu Tahi e haamanaò mai Òe ia mätou, i roto i teie maì piri fee i iri mai nei i nià ia mätou. E hiò mai i raro nei, e haamanaò mai i to mätou ìno. Ua ruri-ê-hia ta mätou tuhaa tei ia vëtahi ê, e to mätou mau fare tei te taata èê. Ua riro mätou ei ôtare aore e metua täne, ua ìvi to mätou mau metua vahine te fenua. Ei moni e inu ai mätou i ta mätou pape, i hoohia mai hoì ta mätou vahie. Te faahorohia nei mätou mä te hopoià i nià to mätou àî, te haa noa nei mätou, aore e faaearaa. Ua auraro noa mätou i te mau mea faufaa òre, te paìa nei mätou i te mäa no te ära mai. Ua tärehuhia to mätou fenua i to mätou haapaò òre, e te Atua e ua rehuhia to mätou faaroo, a faaòre mai ta mätou tärahu, ua ateä mätou i ta òe ôpuaraa faaora, a faaòre mai ta mätou hara. No reira i taiä ai to mätou âau, no teie maì piri fee i mohimohi ai to tätou mata. O Òe ra, e te Atua Nui Tumu Tahi, te tiàturi nei mätou ia òe aroha mai ia mätou. Âmene.

Pure a te Fatu

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

32 Ua parau iho ra räua räua iho: Eere, e hoa, i ànaanatae to täua âau ia na i paraparau mai ia täua i te äratià ra, Ua tià mau ä te Fatu i nià,  Âmene.

Terai or. Faatura.

Ioane 20.19-31 Faanä

Tāpati 19 no Èperera 2020.

Faanä

Ômuaraa.

I teie ä täpati ua muhu te mau oe no te mau fare pureraa a te Ètärëtia Porotetani Mäòhi, no te faaära ia tätou e, e òhipa taaê teie e tupu nei i roto ia Mäòhi Nui e i roto i te oraraa o te faaroo. Te faaìte nei  tätou i ù nei i te hoê hohoà no te âmui tähiraa no te mau puai ia noho tätou i roto i to tätou mau ùtuafare ma te pure. Te tumu hoê roa ia no te tama teie maì viivii e tupu nei, i Mäòhi Nui nei, e i teie ao. Te ärai hoê roa no teie taime, to te taata tätaì tahi ia haapaòraa i ta na hopoià i mua i teie maì e haaviivii nei i to tätou oraraa. Na to tätou ära tämauraa i te mau vahi e haerehia e tätou, ma te paruru ia tätou ia au i te mau faaueraa i faanahohia, te riro nei ia tätou èi taata faatupu ora no  te maitaì o te täatoà, tei parauhia te âmui tähiraa o te mau puai.

Himene

Taramo 118.15-29

15 Te reo òaòa e te ora tei roto i te mau tiàhapa o te feiä parau tià ra. E räveà itoito tei te rima àtau o te Fatu,

16 e teitei to te rima àtau o te Fatu, e räveà itoito tei te rima àtau o te Fatu. 17 E òre au e pohe, e ora mau ä vau, e parau faahou ä vau i te òhipa a te Fatu. 18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20 O te ùputa teie na te Fatu, e nä reira te feiä parau tià i te tomo. 21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23 O ta te Fatu teie i rave. E mea maerehia hoì i mua i to tätou nei mata. 24 O te mahana teie i faaäuhia e te Fatu;  e òaòa tätou, e e fänaò i teie nei mahana 25 Ia ora i teie nei, e te Fatu, te ani atu nei au, ia ora i teie nei, te ani atu nei au. E haamaitaì mai ia mätou i teie nei, e te Fatu e 26 Ia ora o ia o tei haere mai mä te iòa o te Fatu Te faaora atu nei mätou ia òutou mai roto atu i te fare o te Fatu. 27 O te Atua mau ra o te Fatu ia, o te haamäramarama mai ia tätou nei. A ruuruu na i te tütia àmu i te taura i nià i te mau tara o te fata nei. 28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe. 29 E haamaitaì i te Fatu, e maitaì hoì to na, e tià hoì to na aroha i te vai-mäite-raa.

Himene

Òhipa 2.42-47

42 Mau päpü mäite atu ra rätou i ta te mau âpotetoro i haapii ra, e te âmui-mäite-raa, e te vähiraa i te päne, e te pureraa hoì.

Te oraraa i rotopü i te huifaaroo

43 E roohia iho ra rätou atoà e te mataù, e rave rahi te temeio te täpaò i ravehia e te mau âpotetoro ra. 44 Ruru aè ra taua feiä atoà i faaroo ra i te vähi hoê, e âmui noa aè ra hoì i ta rätou taoà. 45 Ua hoo atu ra i to rätou fenua e te taoà, e tufa iho ra hoì na rätou atoà, e au päatoà aè ra. 46 E tià rätou atoà i roto i te hiero i te mau mahana atoà mä te hinaaro hoê, e te vähiraa i te päne i tërä fare, i tërä fare, àmu iho ra hoì rätou i ta rätou mäa mä te òaòa, e mä te rötahi noa te âau, 47 i te haamaitaìraa i te Atua, e mä te ìtehia mai hoì e te taata atoà. E te feiä i faaorahia ra, ua âmuihia ia e te Fatu i te Ètärëtia ra, aita e mahana i tuua.

1Pētero 1.3-9

Te tiaìtururaa ora

3 Ia haamaitaìhia te Atua te Metua o to tätou Fatu ra o Ietu Metia, o tei haafänau faahou ia tätou no te rahi o to na ra aroha, ia noaa te manaò ora i te tiàfaahouraa o Ietu Metia mai te pohe mai ra, 4 ia noaa te tufaa ìno òre ra, e te viivii òre, e te mäheàheà òre, o tei vaiihohia i nià i te raì no òutou. 5 O tei tiaì-pare-hia e te mana o te Atua i te faaroo, ia noaa te ora i ineine i te faaìtehia mai ia tae i te tau hopeà ra. 6 Ia rahi to òutou òaòa i te reira, taiä poto noa ä òutou i teie nei, no te mea tià ia, i te mau pohe èê ra. 7 Ia riro te tämataraa o to òutou faaroo, o tei rahi roa te maitaì i to te àuro moè noa nei, tämata noa ä i te auahi, ei haamaitaì, e ei tura, e ei maitaì, i te färaa mai o Ietu Metia ra. 8 O ta òutou i hinaaro na, òre noa ai te ìte ia na; o ta òutou e òaòa na i te òaòa eita e tià ia parau ra, e te î hoì i te maitaì, i te faarooraa atu, òre noa ai òutou i te hiò atu ia na i teie nei, 9 mä te noaa hoì te hopeà o to òutou faaroo, oia te ora o to òutou mau värua.

Himene

Ioane 20.19-31

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou, 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou: Ia ora na òutou, Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì. 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na: Ua ìte aè nei mätou i te Fatu, Ua parau mai ra o ia ia rätou: I òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra: Ia ora na òutou. 27 Ua färiu mai ra ia Toma, ua parau mai ra: A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä. 28 Ua parau atu ra Toma ia na, nä ô atu ra: E ta ù Fatu, e ta ù Atua, 29 Ua parau mai ra Ietu ia na: No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai.

Tei ia na te Tamaiti ra, tei ia na ia taua ora ra

30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Himene

Manaò.

Mai te pape hoì e faahoì i te ànaana o te mahana i nià i te raì, te vähi no reira mai taua märamarama ra, te faahoì atoà ra te fenua i te hanahana o te Atua ta na e mau ra, i te Atua ra, te tumu o te maitaì ta na e faaìte noa ra aita e mahana tuua. E tano ai i te parau e, te fenua teie e mau nei i te òhipa i tupu i te tiàfaahouraa o te Metia, tei faaharuru te fenua e tei faahoà te uira o te raì. To na auraa ua ìritihia te ùputa o te raì e te fenua, o ta Ietu ia e hinaaro nei i ta na mau pipi, eiaha ia mohi faahou i raro aè i te papa o te maru pohe. E repo fenua  tätou te taata nei, na teie hoì fenua o ta te Atua Nui Tumu Tahi i ìpopo a haapüaì i te aho ora i roto i riro mai ai tätou èi tumu òhipa i te ôpuaraa faaora o teie nei ao. E ia faaroo tätou te mau haapotoraa o na taiòraa e maha nei. 

-Taramo 118, 22 Te ôfaì i faaruèhia e te feiä i patu ra, tei riro iho nei ei ôfaì tihi.

-Òhipa 2, 46 E tià rätou i te mau mahana atoà mä te hinaaro hoê, te vähiraa i te päne.

- I Petero 1, 7 Ia riro te tämataraa i te faaroo, ei tura, ei maitaì, i te färaa mai o Ietu Metia.

-Ioane 20, 31 O teie rä tei päpaìhia, ia faaroo òutou ia Ietu te Metia te Tamaiti a te Atua.

I to tätou faarooraa i te haapotoraa i na taiòraa e maha, te ìte ra ia tätou e, to tätou färii, aore ra to tätou färii òre i te Fatu e i te Atua Metua, e aore ra ua faaère ia tätou i te ora no roto mai i te aroha e te here o te Atua ; te ture hoì e faanaho ra i te parau o te fenua, te aroha ia e te here. Te reira atoà te ture e faanaho ra i te òhipa a Ietu, i tonohia ai o ia i roto i to na nünaa. Mai te Fatu e faatupu ra i te hinaaro o te Atua Metua, te faatupu atoà ra te fenua i te hinaaro o te Atua, e tià roa ai i te Fatu, mai te fenua atoà, ia haapii i te taata, oia hoì ia horoà i te taata i te märamarama i nià i te ôpuaraa ora a te Atua. To tätou fifi rahi, to tätou ia ìte òre e te hinaaro òre i te faaroo e te taiò i te haapiiraa ta te fenua e horoà noa nei. Te haapii nei te fenua i te faanahoraa o te ora e mauhia ra e te tai ; te haapii mai ra te tai i te taata i te paari ta na e mau ra e òre ai te taata e fifi i te haereraa i te vähi eere i to na ; te haapii mai ra te raì i te taata i te faanahoraa o te aru e te tai, e te haapäpü mai ra te täatoàraa i te rahi e te hanahana o te Atua i te faanahoraa i te mau mea atoà ei ora no te taata. Mai te Fatu i parau e, Ia ora na òutou, te faanä nei o Ietu i te mataù o te mau pipi tei panipani ia rätou i roto i te fare. Ua riro hoì te fenua ei èà ta Ietu i rave pinepine no te arataìraa i te taata i roto i te märamarama, oia hoì i roto i te ìteraa i te Atua Metua. Ua moèhia i te mau pipi te mau täpaò, o te fenua, to te reva, to te raì, o ta Ietu i faahiti tämau i roto i ta na mau haapiiraa. I parau faahou ai o Ietu i ta na mau pipi, Ia ora na òutou, ma te höroà i te òhipa e tià ia rätou ia rave, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì, ua hämani faahouhia te mau pipi e Ietu.

I te haereraa mai o Ietu, aita atu to na hinaaro maoti rä, ia ìte faahou te taata i te Atua e ia hoì i te Atua ra. Te vähi rä i moèhia i te mau pipi, te mea ia e, eita teie hoìraa e tupu ia òre ia nä roto i te fenua i te haere, no te tauturu ia rätou i roto i te täpura òhipa i höroàhia. I parau faahou ai o Ietu ia rätou  e ia Toma atoà i te piti o te hepetoma, Ia ora na òutou. No te faanä ia i te tiàturi òre o Toma, faatoro mai, e hiò mai a fäfä mai, eiaha e faaroo taìäta, E ao to te feiä aore i ìte ia ù a faaroo mai ai. Ua faanä o Ietu i te peàpeà o te âau o te mau pipi i roto i to rätou mataù.

Ia faanä o Ietu tei tiàfaahou i to tätou âau, e horuhoru nei, e peàpeà nei, e e mataù nei, no teie maì e haaviivii nei i to tätou oraraa vaamataeinaa. O te hoê taime faufaa roa teie no tätou i te färiuraa i nià i te ùnaùna o to tätou fenua  to na maitaì e te ora höroà noa. E taime atoà ra i te mätutu, eihia tumu maniota, tumu meià, tumu ùru, tumu haari, ta ù i tänu i roto i to ù oraraa. E aore ra te uiraa e, e aha ta ù i rave no to ù fenua ia Mäòhi Nui. Te ìrava  31, no ta tätou parau no teie mahana te tiaìtururaa i te faarooraa ia Ietu, O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa. Teie päpaìraa, ua päpaìhia i roto i te puta a te Atua Nui Tumu Tahi te Rähau, i reira te tupu mauraa to na Aroha e to na here ia tätou.

Pure

Haamaitaì mätou ia òe e te Atua Nui Tumu Tahi i te mea, te haamanaò mai nei òe ia mätou e, na roto i te parau no teie mahana, ua haere mai ta òe Tämaïti e faanä i to mätou peàpeà, no teie maì e haaviivii nei to mätou oraraa, i Mäòhi Nui nei e i te ao nei. Te haa nei te mau taata e mau ra i te mau hopoià no te ìmiraa i te räau e tià i te räpaau ia mä te viivii o teie maì. I teie taime te raveà hoê roa, tei te taata tätaìtahi i te pärururaa ia na ia òre teie viivii ia parare i nià i te tahi atu taata, ua tae mätou i nià i te parau no te âmuiraa tähiraa i te mau puai i te faataa-ê-raa ia mätou i te mau peu mätauhia e mätou, e te Atua Nui Tumu Tahi e, eiaha mätou ia riro èi mau taata tei faatïtïhia e teie maì, tei haaviivii i to òe nünaa. Ia tupu ra ta òe ôpuaraa faaora i te nünaa Mäòhi e i to te ao atoà e faaruru noa nei i te mau faatïtïraa rau i teie mahana. A faatiàmä ia mätou te faahaèhaa atu nei mätou i mua i te nui o to Òe here, e ta òe faaherehere ia mätou, a faanä ia mätou. E te ani atu nei mätou ia òe, ia arataì faahou Òe i to mätou nünaa ïti i te tähiti faahouraa i roto i te tau no te Hinapaarae. A tuu mai i ta òe faatereraa tiàmä i te feiä e faatere nei i to mätou fenua ïti, ia TIÀMÄ te faatereraa, e TIÀMÄ atoà te nünaa Mäòhi i mua te mau haafifiraa rau no to na oraraa. Tahi tià mai.

Himene.

Pure a te Fatu.

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Teraì òr. Faatura.



Mātaio 28.1-10 ÔROÀ TIÀFAAHOURAA Ia ora na. Tāpati 12 no Èperera 2020.

Tāpati 12 no Èperera 2020.

ÔROÀ TIÀFAAHOURAA

Ia ora na.

Ômuaraa

Ua tià mau to tätou Fatu, o Ietu te Metia, ua faaruè te vahi no te pohe, ua haere e faaära i te feiä tei pohe te värua ia noaa te hau i te tino. I teie mahana e haamanaò ai tätou i te tiàfaahouraa o to tätou Fatu, o Ietu te Metia, te faahanahana nei tätou i te mau òhipa atoà a te Atua Nui Tumu Tahi i faatupu i nià i ta na Tämaïti fänau pü fenuahia, e i nià ia tätou e haamori nei i roto i to tätou mau ùtuafare. No teie ihoä maì e tupu ûàna nei i roto ia Mäòhi Nui, e i to te ao. Te raveà mau e ora ai tätou, to tätou mau ùtuafare, ta tätou mau tamarii, tei roto ia, ia tätou i te amoraa te taata taì tahi i ta na hopoià. Ua tupu è na teie òhipa i te tau o Mote, i to te Atua parauraa ia Mote e faaära i te mau tamarii a Ìteraèra e täpaò i nià i te mau ùputa te toto o te ârënio, e haere mai au e färerei ia rätou, tei täpaòhia ua faaroo ia te faaueraa, tei òre ra na roto iho ia e amo te hopoià no te faatura òre. Te haamaitaì nei tätou i te Atua Nui Tumu Tahi no teie taime faufaa rahi no ta tätou haamoriraa i teie taime.

No ta tätou mau faanahoraa e tiàmaraa to te reira ùtuafare, no te mau himene.

Himene. (G)

E hau faatiàma to rae

E hau i to haereà

I roto te ôpuaraa faaora

Ua riro èi fäìraa na tätou

 E hau faatià ia ora te mäòhi

A tià a haere teie au

Ma te tura e te tiàma

A tià a haere e to Atua

Ua mä, ua mä to rae

Taramo 118.1-20

1 E haamaitaì i te Fatu, e maitaì hoì to na, e tià to na aroha i te vai-mäite-raa. 2 Ia nä reira te ùtuafare o Ìteraèra i teie nei e e tià to na aroha i te vai-mäite-raa.3 Ia nä reira te ùtuafare o Àarona i teie nei e e tià to na aroha i te vai-mäite-raa.4 Ia nä reira te feiä i mataù i te Fatu i teie nei e e tià to na aroha i te vai-mäite-raa. 5 Ia ù i roohia e te àti ra, ua tiàoro vau i te Fatu, e ua ìte mai ra te Fatu ia ù, e ua tuu mai ia ù i te vähi ätea. 6 Tei pïhaì iho te Fatu ia ù ra, e òre au e mataù e aha ta te taata ia rave mai ia ù ra? 7 Tei pïhaì iho te Fatu ia ù ei tauturu ia ù ra, e ìte au i te hiàraa o te feiä i riri mai ia ù ra. 8 E mea maitaì te tiàturi i te Fatu, i te tiàturi i te taata nei 9 E mea maitaì te tiàturi i te Fatu, i te tiàturi i te hui-arii ra 10 Ua haapuni mai te mau êtene atoà ia ù; no te iòa rä o te Fatu, pau iho ra ia ia ù. 11 Ua nä nià iho hoì, e ua nä nià iho i te haapuni ia ù, no te iòa rä o te Fatu, pau iho ra ia ia ù.12 Ua haapuni mai rätou ia ù mai te tepure ra, mai te auahi àihere ra, aore aè ra e mähia, mou iho ra, no te iòa hoì o te Fatu, pau iho ra ia ia ù. 13 Ua neneì hua mai hoì òe ia ù ia hià vau, ua tauturu mai rä te Fatu ia ù. 14 O to ù ia ètaèta e o ta ù ia himene o te Fatu, ua riro mai hoì o ia ei ora no ù. 15 Te reo òaòa e te ora tei roto i te mau tiàhapa o te feiä parau tià ra E räveà itoito tei te rima àtau o te Fatu,16 e teitei to te rima àtau o te Fatu, e räveà itoito tei te rima àtau o te Fatu 17 E òre au e pohe, e ora mau ä vau, e parau faahou ä vau i te òhipa a te Fatu.18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20 O te ùputa teie na te Fatu, e nä reira te feiä parau tià i te tomo. 

Himene. (C)

Mon cœur s’est fermé

Devant le cadeau

Que tu m’as donné Seigneur

Mes yeux se sont fermés

Pliés au devant

De ta vérité

Gonflé plein d’orgueil

Je n’ai pas su aimé

Ce merveilleux cadeau

Pardonne-moi Seigneur

Pardonne-moi

Òhipa 10.34-43

To Pëtero ôreroraa i mua ia Torenerio mä

34 Ua parau atu ra te vaha o Pëtero, Ua ìte mau atu ra vau e òre te Atua e haapaò i te huru o te taata. 35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana. 36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haere-raa i te Parau Maitaì i te hau ra ia Ietu Metia o te Fatu no te mau mea atoà ra. 37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra 38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua. 39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau. 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra; 41eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra. 42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì. 43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa.

Himene (G)

Te püpü nei au

I to ù oraraa

I roto i to rima          

E to ù Atua e

Färiu mai to mata

Färiu mai to aro

Tuu mai to aroha

I nià ia mätou.

Torota 3.1-4

1 E tënä na, ua faatiàhia òutou i nià e te Metia atoà ra, e tïtau i te mau mea i nià ra, i te vähi e pärahihia e te Metia i te rima àtau o te Atua ra. 2 E haamau i to òutou âau i te mau mea i nià ra, eiaha i to teie nei ao ra. 3 I pohe na hoì òutou, e tei ô te Metia ra to òutou ora, tei te Atua. 4 Ia fä mai te Metia, tei ia na to tätou ora i te vairaa ra, ei reira atoà òutou e ìteä-atoà-hia ai, e o ia atoà i te ao ra.

Himene (D)

To ù ora

Noo mai i te Atua

Te tumu no te mau mea atoà

Te Atua ta ù ora

Te Atua i te raì teitei

Te Atua tiaì te fenua

Te Atua ta ù ora

Mātaio 28.1-10

Aita Ietu to roto i te menema

(Mär 16.1-8; Rut 24.1-11; Ioa 20.1,11-18)

1 I muri aè i te täpati, i te âahiata i te mahana mätämua o te hepetoma, ua haere mai ra Märia i Matätara räua te tahi Märia e hiò i te menema. 2 E inaha, i rahi iho nei te âueue o te fenua, ua pou mai ra te merahi a te Fatu mai nià mai i te raì, e ua huri ê atu ra i te ôfaì, e pärahi iho ra i nià iho. 3 Mai te uira ra to na hohoà/huru, e to na àhu mai te hiona ia i te teatea; 4 rürütaina iho ra te mau tiaì i te mataù i te hiòraa atu ia na, riro atu ra mai te taata pohe ra te huru. 5 Ua parau mai ra rä te merahi i taua nau/nä vahine ra, Eiaha ôrua e mataù, ua ìte hoì au e te ìmi nei ôrua ia Ietu i faatataurohia aè nei. 6 Aore o ia i ô nei, ua tiàfaahou o ia, mai tä na i faaìte mai. A haere mai na, a hiò i te vähi i vaiihohia ai o ia. 7 A haere òiòi na ôrua a parau atu i ta na mau pipi E ua tiàfaahou o ia mai te pohe mai, e inaha, te haere atu ra o ia nä mua ia òutou i Tarirea, i reira òutou e ìte ai ia na. Na reira ia, ua parau atu vau ia ôrua. 8 Faaruè òiòi mai ra räua i te menema i reira ra, mä te mataù e te òaòa rahi, horo atu ra e faaìte i taua parau âpï ra i ta na mau pipi. 9 E inaha, ua färerei mai ra Ietu ia räua, nä ô mai ra Ia ora na Ua haafätata atu ra räua ia na, täpeà atu ra i ta na âvae, tähopu atu ra i mua ia na. 10 Ua parau mai ra Ietu ia räua Eiaha e mataù. A haere a parau atu i to ù mau taeaè e haere i Tarirea, ei reira rätou e ìte mai ai ia ù.

Himene. (Mi)

A tämau atu i to òe reo

Apee atu i to òe reo

Eiaha roa hoì

Ia morohi roa atu

I te hoê mahana

I mütaa iho ra

Faaroo aè nei au

I te hoê reo

I te piiraa mai, aroha mai.

T : E reo………. V : Marü

T : E reo………..V : Haèhaa

T : E reo………..V : Märamarama

No te Türama

I to òe mau haereà

E Metua òe e huaai to òe

E reo i Mäòhi ai òe

Teie mahana.

Manaò.

Teie te huru no te haapotoraa i ta tätou mau taiòraa no teie mahana e parau te faatià ra i te ora, e parau atoà ra te tuu ra ia tätou i mua i te mau faanahoraa no te ora, i ta te Atua Nui Tumu Tahi i faanaho ia tupu te ora mure òre. A faaroo na i te mau ìrava i täpeàhia mai èi tumu no ta tätou  mau parau no teie mahana.

-Taramo 118, 20 O te ùputa a te Fatu, e nä reira te feiä parau tià i te tomo.

-Òhipa 10, 43 Oia hoì, o të faaroo ia na ra, e matara ta rätou hara i to na ra iòa.

-Torota 3, 4 Ia fä mai te Metia, tei ia na te ora ei reira e ìteä-atoà-hia ai te ao ra.

-Mätaio 28, 8 Ia ora na, 10 Eiaha e mataù haere i Tarirea, ei reira rätou e ìte mai ai ia ù.

Ua moè te parau no te menema, ua òre te parau no tätauro, ua mämü te mau parau a te feiä tähitohito, ua muhu te mau parau faaìno. Te reo e faaroohia ra, 8 Ia ora na, 10 Eiaha e mataù haere, ua tià mai o Ietu no te faanä i te mau taata atoà, no te mea e òhipa âpï te tupu i roto oraraa tei òre i àueue to rätou faaroo, te matara nei te ùputa o te raì, i ta te fenua haafänauraa i te Ora Mure Òre. Naò noa ia tätou i te parauraa e, te Fenua te Ùputa ia no te Raì. Tei te fenua nei te haamataraa te mau òhipa atoà i faatupuhia e Ietu no te ora,  e taua ora ra to te taata ia märamarama.

No reira, ta tätou parau no teie mahana, e parau òaòa ia no te mau pipi na mua roa, no tätou e no te feiä tei färii i te Fatu. E parau òaòa atoà rä no te feiä tei òre ä i färii ia Ietu èi Fatu i te mea e, i roto i te ôpuaraa a te Atua, aita o ia i faataa i te feiä e fänaò i te ora e te feiä te òre e fänaò i taua ora ra. No tätou rä e tiàturi nei e ua riro Ietu ei Fatu mau no tätou, e ta tätou tuhaa, te faaìteraa ia i to na tiàfaahouraa i to teie nei ao mä te mataù òre.

Na te tiàfaahouraa, tei tupu i taua mahana ra, e horoà nei ia tätou i teie mahana te itoito e te püai o te faaroo i teie mahana. No reira, ta tätou pureraa i teie mahana, e ère ia i te haamanaò-noa-raa i te mea i tupu i mütaa ra, e ère atoà hoì i te tiaì-noa-raa i te mea e tupu mai ànanahi, te haapäpü faahouraa rä i roto i to tätou faaroo i te Fatu i roto i to tätou oraraa e i te faufaa o to na tiàfaahouraa i teie mahana. Oia hoì, te ora nei tätou i taua tiàfaahouraa ra. Mai ia tätou i pohe na nä roto i te pohe o to tätou Fatu, ua tiàfaahou atoà ia nä roto i to na tiàfaahouraa. E ère rä i te tahi mea e tiaì tätou i to na tupuraa. Te òaòa nei rä tätou i te mea te ora nei tätou i taua tiàfaahouraa ra.

E parau mau, e pohe ihoä tätou, to tätou tino, ia tae i to na ra mahana. E faanahoraa te reira ta te Atua i tuu no te mau mea ora atoà ta na i rahu. Ua horoàhia rä ia tätou te upootiàraa no te tiàfaahouraa nä roto i to tätou faaroo i te Metia.

I taua mahana mätamua ra o te hepetoma, i te âahiata roa, ua färerei nä vahine o Maria i Matatara e te tahi Maria i te Fatu tei horoà mai ia räua i teie faaitoitoraa ia ora na, ua na ô mai ra Ietu ia räua, eiaha e mataù, a haere a parau atu i ta ù mau taeaè, e haere rätou i Tarirea, ei reira rätou e ìte mai ai ia ù.  Ta räua ôpuaraa i taua poìpoì ra, i te mea ua oti te täpati, e haere ia e faahope roa i te òhipa e au ia ravehia no te hoê taata tei pohe. Oia hoì, e faatae i te parau o te pohe i nià i to na vairaa. E te reira peu, no te tauturu ia i te feiä fatata roa ia Ietu, te feiä i mätau maitaì ia na e tei âpee noa na ia na i roto i to na mau tere, tei faaroo noa na i ta na mau haapiiraa, e tei horoà hoì i to rätou tiàturiraa ia na no te arataì i to rätou oraraa.

Nä roto i te òhipa a teie nä vahine e ôpua nei, e tano ia e parau e, e ère te tino noa o Ietu ta räua e hinaaro nei i te haapäpü te pohe, te tiàturiraa atoà rä o teie mau taata i to rätou Fatu terä e pohe atoà atu ra. Ua ìte tätou e, te peu ta teie nä vahine e rave nei, no te faatià i te hoê peu tei matarohia e te nünaa âti Iuta i mua i te parau o te pohe. Te haapäpü noa atoà mai ra te reira e, ua pohe te märamarama ta te Fatu i tuàma i roto i teie nä vahine. Ua ineine räua i te täpiri i te àpi no te mau parau e no te mau haapiiraa a te Fatu. E te faatupuraa hoì i te reira peu, ta räua i tiàturi e, o to räua täpaò no te here i to räua Fatu, te haapäpü noa ra ia i to räua faaruèraa i te mau mea i horoàhia ia räua e to räua Fatu no te hoì faahou i te vähi i reira to te Fatu raveraa mai ia räua.

Maoti rä te veà tono a te Atua i na mua ia räua, no te faaära ia räua i te òhipa i tupu hou räua  a tae mai ai. « Eiaha ôrua e mataù, ua ìte hoì au e te ìmi nei ôrua ia Ietu i faatataurohia aè nei, aore o ia i ô nei, ua tià faahou aè nei ia, ta na i faaìte atea mai ra ». Aita te Fatu i roto i te âpoo no te faatupu i te ôpuaraa a nä vahine. E te haamanaò atoà mai ra te veà tono, te mea ta räua e ìte nei, e ère i te tahi òhipa tei òre räua i ìte e aore ia i faaroo i to na parau. E parau rä tei faaìte-atea-hia mai. Te haamanaò noa mai ra te veà tono, te mea faufaa e tià räua ia rave, e ère te faatiàraa i te mea ta te peu a te nünaa e tïtau ra ia räua, te täpeàraa rä i te mea ta te Fatu i parau mai ia rätou, òre noa atu ai räua i ìte atu ra i to na tupuraa. No reira te haapäpü mai ra te veà a te Atua, aita te pohe o te Fatu i riro ei hopeàraa no to na ora, te haamataraa rä no te hoê oraraa âpï ta na e faanaho nei no ta na mau pipi e no te feiä atoà e faaroo i ta rätou ra haapiiraa.

No reira, te tïtau nei te veà a te Atua i teie nei nä vahine, ia hoì i te vähi no reira mai räua, oia hoì i rotopü i to räua mau taeaè no te faaìte ia rätou i te mea ta räua i ìte iho nei. Te auraa, e vaiiho i ta räua ôpuaraa. E ère atu ra i te haapäpüraa no te pohe, e haapäpüraa rä no te tiàfaahouraa o to rätou Fatu e te tiaì mai ra ia rätou i Tarirea. E tano atoà ia tätou ia ui e, no te aha i Tarirea e aita i te tahi atu vähi huru maitaì aè, i Ierutarëma änei ?

Ua ìte tätou e, i Tarirea to te Fatu piiraa ia rätou, ia riro rätou ei pipi na na, ei veà no ta na mau parau e èi ìte no ta mau òhipa. E tano ai tätou ia pähono e, te hinaaro nei te Fatu e faaâpï faahou i ta na piiraa i ta na mau pipi, ia päpü ia rätou e, te piiraa mätamua ta rätou i faaroo i Tarirea, tei faaî i to rätou tiàturiraa, aita te reira i taui, aita i hope mai ta rätou i manaò i to rätou ìteraa i to rätou Fatu i nià i te räau tärava. Aita te reira i hope noa atu ua tuuhia to rätou Fatu i roto i te vairaa o te tino pohe. E hoì i Tarirea no te haamata faahou i te faaroo i te mau mea atoà ta na i parau mai ia rätou, te fëruri faahou i te mau parau atoà ta na i horoà mai ia rätou e i te mau mea ta na i rave i mua ia rätou ia iteä ia rätou te auraa mau o taua mau parau ra e o taua mau òhipa ra.

Mai teie tuhaa fenua i te ôtià i o te mau ètene ra, mai reira o ia e tono ai i ta na mau pipi i te mau hopeà o te fenua. O tätou ia i teie mahana, e faaroo nei i te parau o to tätou Fatu. Aita atu ra tätou i riro noa ei mau tarià tei faaroo, ua riro rä nä roto i te faaroo i to tätou Fatu, i noaa ia tätou mai roto mai i te mau faaìteraa e rave rahi, i terä uì e terä uì, i tià roa ai ia tätou ia haapäpü i roto ia tätou tätaì tahi e mä te faaroo e i teie mahana, te faatiàfaahou nei te Fatu ia tätou nä roto i ta na ra Parau.

E no te mea e feiä faatiàhia tätou e te faaroo i to tätou Fatu, e òre ai e tano ia tätou ia pärahi noa e aore ia faaea manaò-òre noa i mua i te rahiraa o te mau àti e iri nei i nià i te nünaa i teie mahana. Te riro nei to tätou faatià-faahou-raa-hia i nià ei faaueraa ia tätou ia tià i nià e ia riro ei feiä tei faatià atoà i te taata i nià mai roto mai i to rätou àti, mai roto mai i te mau haavïraa e rave rahi o teie tau. Ta tätou òhipa i te iòa o to tätou Atua, o te Atua iho te tumu, o ia i aroha mai ia tätou na mua roa. To na Aroha e to na Here ôtià òre, tei òre i mäìti i te huru o te taata, te tumu ia o ta tätou ârueraa e ta tätou haamoriraa ia na i teie mahana. Ia haamaitaìhia o ia, e ia na anaè te hanahana e a muri noa atu. Ia ora na.

Himene. (G) (valses)

No roto mai te teröno

E päpe tei tahe mai

E päpe mau e te moà

No te täma i te hara.

Ref.

A tama mai ia mätou nei

E to Väruaraa e

Tama, tama, tama mai,

Tama mai ia mätou

Ia ïnu to ètärëtia

I teie päpe ora

E päpe mau e te moà

No te täma i te hara.

(E täpati ôroà teie, ta tätou ôroà te maa ia ta tätou i faaineine no teie mahana e mau maa atoà tei haamaitaìhia e te Atua.)

Pure

Pure tätou i te Atua, Haamaitaì mätou ia òe e te Atua Nui Tumu Tahi i te mea, te haamanaò mai nei òe ia mätou e, te tiàfaahouraa o ta òe Tämaïti e ôpuaraa faaora te reira ia ora te nünaa Mäòhi e faaruru nei i teie maì e tupu nei i o mätou e i teie nei ao i teie mahana. Ta mau raveà i horoàhia ia mätou no te pärururaa te nohoraa ia i te fare, a faahau òe i to mätou âau e to te mau faatere fenua. Horoà te mau raveà i roto i te mau täote räpaau, te mau täote ma ìmi, i te itoito i te ìmiraa i te räau no te räpaau i teie maì e tupu nei. Oia atoà te mau tuäti mai, te mau taata uta maì, te feiä tüpohe ahi e tae noa atu i te mau taata atoà e òhipa nei no te ärai i te nünaa. Te mau piiraa, e piihia nei i te nünaa ia faatura, e ia noho i te fare o te raveà hoê roa ia no te àro i teie maì.

Te faahaèhaa atu nei mätou i mua i to òe here e to aroha rahi e ta òe faaherehere rahi ia mätou, o mätou e pärahi nei i roto i te mataù no teie nei maì e tupu nei.

E te ani atu nei mätou ia òe, ia arataì faahou òe i to mätou nünaa ïti i te ìte faahouraa i te faufaa o to mätou fenua o Mäòhi Nui i roto i te tau no te Hinapaarae. A tuu mai i ta òe faatereraa tiàmä i te feiä e faatere nei

i to mätou fenua ïti, ia TIÀ MÄ te faatereraa, e TIÀMÄ atoà te fenua. Âmene

Himene (C)

Tongia ia koe

E te Aua e

O koe i tauturu

Ia mätou

Ta mätou òhipa i rave

Tongia ia koe

E te uì âpï

A tämau mau e

E tiàturi i te Atua

E ora tätou Ia na

A tämau a e

A tämau a.

Pure a te Fatu

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

4 Ia fä mai te Metia, tei ia na to tätou ora i te vairaa ra, ei reira atoà òutou e ìteä-atoà-hia ai, e o ia atoà i te ao ra. Âmene.

Teraì òr. Faatura.