Tāpati 26 no Èperera 2020.

Ànaanatae.

Ômuaraa.

Faaitoito e au hoa faaroo, i te haamoriraa i roto i to tätou mau ùtuafare ia riro èi taime faufaa no te faarooraa i te mau hinaaro o te Atua Nui Tumu Tahi na roto i te mau taiòraa i faataahia no teie mahana. No teie maì piri fee e tupu nei i Mäòhi Nui nei, e i te ao. Tei ä tätou ra te raveà mätamua roa  e mau ai te parareraa o teie maì, ma te ära tämau i te mau vahi e hahaerehia e tätou, ma te faatura i te mau faanahoraa. Na te Atua e haamaitaì mai ia tätou

Himene

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe. 2 Te parau nei au i te Fatu e: O ta ù Fatu òe, aita a òe e faufaa i to ù nei maitaì.3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra: te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì.10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

Himene.

Òhipa 2.14-33

Te aòraa a Pëtero i te mahana Penetetöte

14 Ua tià aè ra rä Pëtero, e te àhuru mä hoê atoà ra i nià, faateitei atu ra i ta na reo, ua parau atu ra ia rätou: E te mau âti-Iüta nei, e te feiä atoà e pärahi i Ierutarëma nei, ia ìte mai òutou, a faaroo mai na òutou i ta ù nei parau. 15 Aore hoì teie nei mau taata i taèro i ta òutou e manaò na, o te toru ä hoì teie o te hora i teie nei mahana. 16 O tei parauhia mai rä teie e Ioera perofeta ra e: 17 Te parau mai ra te Atua: Ia tae i te mau mahana hopeà ra, e ninii atu ai au i ta ù Värua i nià iho i te taata atoà, e na to òutou mau tamarii tamaroa ra e te mau tamahine e tohu, e e ìte hoì to òutou mau taata âpï ra i te ôrama, e to òutou hoì mau taata ruhiruhiä ra, e täòtoòtoähia ia.18 E ninii atu vau i ta ù Värua i nià iho i ta ù mau tävini täne e ta ù mau tävini vahine i te reira mau mahana, e e tohu hoì rätou.19 E na ù e tuu i te piri i nià i te raì, e te täpaò i raro i te fenua; te toto, e te ahi, e te ata auahi hoì. 20 E riro te mahana ei pöuri, e te märama ei toto, e tae ai i taua mahana rahi mataù a te Fatu ra. 21 E e riro hoì e, o të tiàoro i te iòa o te Fatu ra, e ora ia. 22 E te mau taata o Ìteraèra nei, e faaroo mai òutou i teie nei parau: o Ietu o Nätareta, o te taata i tiàhia e te Atua, i rotopü ia òutou i te mau òhipa mana e te temeio, e te mau täpaò ta te Atua i rave ia na i röpü ia òutou nei, ua ìte atoà hoì òutou iho na. 23 Oia rä i tuuhia mai ia òutou i te ôpua mau e te haapaò-ätea-raa a te Atua, i noaa ai ia òutou, faatätauro iho ra, e täparahi pohe roa atu ra i te rima o te haapaò òre ra. 24 Oia hoì ta te Atua i faatià aè nei, ua matara hoì ia na te täpeà ra o te pohe, e òre roa hoì o ia e mau i te reira. 25 Te parau mai ra hoì Tävita ia na e: Ua ìte au i te Fatu e tià i mua i ta ù mata, no te mea tei ta ù rima àtau o ia, e òre au e âueue. 26 I òaòa ai ta ù âau, e ua òaòa hoì ta ù vaha; e e taòto atoà hoì ta ù tino mä te tiaì; 27 e òre hoì òe e vaiiho i ta ù värua i häte, e òre hoì òe e tuu i to mea moà ra ia tähuti noa na. 28 E faaìte mai ia òe ia ù i te èà ora; e faaî mai ia òe ia ù i te òaòa i to mata na. 29 E hömä, e te mau taeaè, e parau noa atu na vau ia òutou i te patereareha ra ia Tävita, e ua pohe hoì o ia e ua tänuhia, e te vai noa nei ä to na menema io tätou nei e tae roa aè nei i teie nei mahana. 30 No te mea rä e perofeta, ua ìte hoì o ia e, ua parau mai te Atua ia na mä te tapu, e faatià o ia i te Metia i to na ra huaai i te haapaòraa i te tino ra, ei pärahi i nià iho i to na ra teröno; 31 o ia rä i ìte ätea noa i te reira, i parau ai o ia i te tiàfaahouraa o te Metia ra: E eita to na värua e vaiihohia i häte, e eita to na tino e vaiiho-noa-hia ia tähuti noa na.32 O taua Ietu nei ä ta te Atua i faatià aè nei i nià, o mätou atoà nei hoì te ìte. 33 E teie nei, ua faateiteihia o ia i te rima àtau o te Atua, e ua noaa mai i te Metua ra te Värua Maitaì i parauhia mai ra, ua ninii mai o ia i teie ta òutou e hiò nei, e ta òutou e faaroo nei.

Himene.

1Pētero 1.17-21

17 E te taù na òutou i te Metua, o tei feruri i tei au i ta te taata nei òhipa mä te haapaò òre i te huru o te taata, e pärahi i to òutou purutiaraa i ô nei mä te mataù. 18 Ua ìte hoì òutou e aore òutou i hoohia i te mea e ìno noa ra, mai te ârio e te àuro, i ta òutou parau faufaa òre i tuuhia mai e to òutou hui-metua ra; 19 i te toto taoà rä o te Metia ra, mai to te ârënio ìno òre e te maì òre: 20 o tei haapaò-ätea-hia ia hou te tumu o teie nei ao, i teie nei rä mau ànotau hopeà i faaìtehia mai ai no òutou; 21 o tei faaroo i te Atua ia na, o tei faatià ia na i te poheraa ra, e ua horoà i te mana no na, ia riro to òutou faaroo e te tiàturi i te Atua.

Himene

 Ruta èv 24.13-35

Te färaa mai Ietu i nä pipi no Èmäuta

(Mär 16,12-13)

13 E inaha, rereva atu ra e toopiti o rätou i taua mahana ra i te hoê ôire ïti o Èmäuta te iòa, e ono àhuru tetatia te mäoro e Ierutarëma. 14 Paraparau noa iho ra räua i taua mau mea atoà i ìteä ra. 15 E te paraparau noa ra räua, e te feruri noa ra räua räua iho, ua täàti atoà mai ra Ietu ia räua, haere atoà atu ra rätou. 16 Ua faaòrehia rä te ìte i to räua mata, aita atu ra räua i ìte ia na. 17 Ua parau mai ra o ia ia räua: E aha tënä na parau ta òrua i paraparau noa na mä te mata huru òto.18 Ua parau atu ra te hoê o räua ra ia na, o Tereopa te iòa, nä ô atu ra: O òe anaè na paha te taata ê i Ierutarëma nei aore i ìte i te mau mea i tupu i reira i eie nei puè mahana? 19 Ua nä ô mai ra o ia ia räua: E aha ia mau mea? Ua parau atu ra räua ia na: Ia Ietu i Nätareta ra, e perofeta mana ia i te raveà, e te parau i mua i te aro o te Atua e te taata atoà hoì. 20 E to tätou mau tahuà rarahi e te mau haavä, i te tuuraa atu ia na ia faautuàhia ia pohe, e ua faatätauro hoì ia na. 21 Âreà mätou nei, manaò ia mätou e, o te taata ia e ora ai Ìteraèra nei: eere rä te reira anaè ra, o te toru hoì teie o te mahana i ravehia ai taua mea ra. 22 I hitimaùe ra mätou i e toofanu puè vahine o mätou nei, o tei haere i te poìpoì roa i te menema ra; 23 e aore aè ra i ìteä e rätou to na tino, haere mai ra, parau mai ra e: E puè merahi tei ìteä ia rätou, o tei parau mai ia e: Ua ora o ia. 24 Haere atu ra e toofanu puè taata o mätou i te menema ra, e roohia atu, oia mau ä ta taua mau vahine i parau mai ra: aita rä rätou i ìte ia na. 25 Ua parau mai ra o ia ia räua: Âuë ia puè taata manaò òre e, e te faaroo taìàtä i tei hope i te parauhia mai e te mau perofeta ra e 26 Eere änei ia nä-reira-hia to te Metia pohe e tià ai, a reva atu ai i to na ra ao? 27 Ua faaìte mai ra o ia ia räua i te auraa i te mau parau no na iho i roto i te mau parau atoà i päpaìhia ra, mai ia Möte mai ä e tae roa aè ra i te mau perofeta atoà. 28 E fätata mai ra ia räua taua ôire haerehia e räua ra, ua faahua haere roa o ia. 29 Täpeà atu ra rä räua ia na, nä ô atu ra: E faaea na tätou; ua huru ahiahi hoì, ua mure te mahana. Haere atu ra o ia i roto e pärahi atoà rätou. 30 E ia na i âmui atoà atu ia räua i te àmuraa mäa ra, ua rave iho ra o ia i te päne, haamaitaì atu ra i te Atua, vähi iho ra tuu atu ra ia räua ra. 31 Tuua iho ra te ìte i to räua mata, ìte atu ra räua ia na, moè roa atu ra rä o ia. 32 Ua parau iho ra räua räua iho: Eere, e hoa, i ànaanatae to täua âau ia na i paraparau mai ia täua i te äratià ra, a faaìte mai ai ia täua i te auraa i te mau parau i päpaìhia ra? 33 Ua tïtià aè ra räua i nià i reira ra, hoì mai ra i Ierutarëma, roohia mai ra ua putuputu te tino àhuru mä hoê ra, e te tahi pae atoà o rätou ra, 34 o tei parau atu ia räua e: Ua tià mau ä te Fatu i nià, e ua faaìte mai ia Timona. 35 Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra.

Himene.

Manaò.

I to tätou taiòraa, e faarooraa i te mau parau tei faahitihia i roto i na taiòraa e maha nei te ìtehia nei te ànaana o te parau e tae nei i roto i to tätou tärià i to tätou faarooraa. Te ànaana te ànapa ia o te märamarama e faahoì ra te vahi mai reira mai te türamaraahia, mai te mahana e ànapa ra i nià i te moana, te faahoì nei taua märamarama ra te vahi no reira mai o ia, te tumu no taua märamarama ra. Mai te pape atoà hoì e faahoì ra i te ànaana o te mahana i nià i te raì, te vähi no reira mai taua märamarama ra, te faahoì atoà ra te fenua i te hanahana o te Atua ta na e mau ra, i te Atua ra, te tumu o te maitaì ta na e faaìte noa ra aita e mahana tuua. E tano te parau o te fenua ia faaäuhia ia tätou tei riro atoà ei färii no te ôpuaraa faaora a te Atua. Mai te Värua o te Atua Nui Tumu Tahi i faaàrepurepu i te moana i te matahurahura o teie nei ao ei faaineineraa i te fenua i te färiiraa i te ôpuaraa faaora a te Atua, ua faaàrepurepu atoà te Värua o te Atua i nià ia tätou ei faaineineraa ia tätou i te färiiraa i te ôpuaraa faaora a te Atua, i roto i teie tau ta tätou e faaruru nei teie maì viivii piri fee, te anihia ra i te taata tätaì tahi tei ana ra te raveà mätamua roa no te tinai i teie maì, ia ànaana o ia i te täma ia na i te päpe e i te mau faaueraa atoà i faanahohia, ia ànaana tätou ia tae te ànaana i roto ia tätou, a ànaanatae ai tätou i te taiòraa i te haapotoraa no ta tätou parau nei teie mahana.

-Taramo 16, 7 E haamaitaì ä vau i te Fatu o tei haapii mai, te aò i ta ù manaò âau i te ruì.

-Òhipa 2, 32 O taua Ietu nei ä ta te Atua i faatià aè nei i nià, o mätou atoà nei hoì te ìte.

-I Petero 1, 21 Tei faaroo i te Atua, tei faatià i te mana i to òutou faaroo e te tiàturi.

-Ruta èv 24, 32 Eere, e hoa, i ànaanatae to täua âau i te paraparauraa mai i te äratià ra.

Te parau e färereihia nei, te parau o na pipi no Èmäuta hoìraa i Ierutarëma, tei nià i teie èà te tupuraa te mau manaò, i orahia e raua i te faraite a pohe ai o Ietu. E huru peàpeà to teie na taata, hoê o Tereopa, Aita i pee te òto o teie na taata. Te manaò nei raua e, e faaea te parau o Ietu i Nätareta i te menema no Arimataio mai tei ìtehia ia pohe te hoê taata. Teie ra aita o Ietu, i haere mai no te parau i roto i te menema, ua haere mai ra O ia no te huaì i te mau menema, ia ìtehia te parau no te tiàfaahouraa. Ia noaa i te mau taata atoà te parau no te haafatataraa i te Atua.

Te mau mahana atoà no to tätou oraraa, mea haere pinepine tätou na nià i te èà. E rave rahi mau taata, ta tätou e farerei, mau fetii, mau hoa, e àparau tätou ia rätou, no te ui ia rätou e aha te huru. Àreà ra te feia aita tätou i mätau ra aita ia tätou e àparau, e aore e aroha.

No reira te Parau Maitaì i papaìhia e Ruta i te pene 24 i te mau ìrava  13 e tae i te 35, te faaìte nei ia i te tahi huru färereiraa e tupu i nia i te èà, to na auraraa ua tupu ta tätou taiòraa i nià i te èà no te hoìraa fare, no te òhipa rahi i tupu i nià ia Ietu. I te mea i roto i to raua manaòraa, aita e òhipa faahou to Ierutarëma. E na taata perenina teie, tei tiàturi i te mau òhipa tei ravehia e te Fatu e Ietu no Ìteraèra. Teie taua  mau rave òhipa ra tei rave i te mau temeio i te iòa o te Fatu.

Tei nià raua i te èà, no te haapae i te tiàraa perenina, a hoì atu ai i nià i te toroà, tei matarohia i te mau mahana tätaìtahi. Teie atoà mai ra te Fatu, ta raua i manaò eita e farerei faahou, te àmui nei i teie tere. E färereiraa taa ê mau teie, no te mea to raua ìte na roto i te mata varua ua faaòrehia ia, ua rupehu roa ia te reira. I ui maere ai te Fatu iho ia raua, no tei mau parau e faahitihia nei. Na te pähonoraa i faaìte i te Fatu e, ua marau te mau òhipa ta na i ravehia i roto i te mau pipi. Àreà no teie na taata perenina, te vai noa nei ia te tahi aveave, no te òhipa i tupu i te faraite poheraa, e i te ôroà pata.

I te parauraa e, o Ietu i Nätareta, e perofeta mana i mua i te aro o te Atua, e taata teie e ora ai Ìteraèra. Te vai nei ra te hitimaùe i roto i to raua âau, no te mea, ua ora O ia ia au i te ìrava 23, aita ra rätou i ìte ia na ia au i te ìrava 24. O raua atoà, aita i ìte e, o te Fatu mau teie i roto pu i teie âparauraa, i parau noa atu ai raua e, na te mau tahuà rarahi, e te mau haava i faautuà pohe ia Ietu. I faahapa ai o Ietu, i te maoro o to raua faaroo, e to raua ìte òre. Ma te auë, i te faaroo taìàtä o na pue taata perenina.

I horoà faahou ai o Ietu i te haapiiraa i te mau Papaì Moà, ma te faahiti mai a Mote mai, e tae roa i te mau perofeta. Ia fatata ra i te òire no Èmäuta, te manaò nei o Ietu e haere i mua. Te täpeà nei ra  teie na pipi, i te mea ua ahiahi ua mure te mahana. I àmui ai rätou i te àiraa i te maa, e na te Fatu iho i vahi ta rätou pane, e te haamaitaìraa, i reira atoà to teie na pipi ìteraa o te Metia teie, ta raua i àparau i te roaraa, o teie èà e 32 kirometera.

E 32 kirometera te àparau-noa-raa na taata perenina e o Ietu, e mahana täatoà ia. No te aha o Ietu aita i faaruè i teie na taata ? E aha te tumu ? No te mea ia, aita ta raua òhipa i oti i Ierutarëma, e hoì faahou i reira no te tiaì i te Varua Maitai. I tupu ai te Ànaanatae i roto i teie na pipi i te hoì i Ierutarëma. No reira ia tae te ànaana o te parau a te Atua Nui Tumu Tahi  i roto i to tätou âau,  no te ärataì ia tätou  i roto i teie tau ta tätou e ora nei i teie  maì piri fee e faataupupü nei i to tätou oraraa i teie mahana.

Himene 

Pure

Pure tätou i te Atua, te aroha o te tätarahapa, E te Atua Nui Tumu Tahi e haamanaò mai Òe ia mätou, i roto i teie maì piri fee i iri mai nei i nià ia mätou. E hiò mai i raro nei, e haamanaò mai i to mätou ìno. Ua ruri-ê-hia ta mätou tuhaa tei ia vëtahi ê, e to mätou mau fare tei te taata èê. Ua riro mätou ei ôtare aore e metua täne, ua ìvi to mätou mau metua vahine te fenua. Ei moni e inu ai mätou i ta mätou pape, i hoohia mai hoì ta mätou vahie. Te faahorohia nei mätou mä te hopoià i nià to mätou àî, te haa noa nei mätou, aore e faaearaa. Ua auraro noa mätou i te mau mea faufaa òre, te paìa nei mätou i te mäa no te ära mai. Ua tärehuhia to mätou fenua i to mätou haapaò òre, e te Atua e ua rehuhia to mätou faaroo, a faaòre mai ta mätou tärahu, ua ateä mätou i ta òe ôpuaraa faaora, a faaòre mai ta mätou hara. No reira i taiä ai to mätou âau, no teie maì piri fee i mohimohi ai to tätou mata. O Òe ra, e te Atua Nui Tumu Tahi, te tiàturi nei mätou ia òe aroha mai ia mätou. Âmene.

Pure a te Fatu

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

32 Ua parau iho ra räua räua iho: Eere, e hoa, i ànaanatae to täua âau ia na i paraparau mai ia täua i te äratià ra, Ua tià mau ä te Fatu i nià,  Âmene.

Terai or. Faatura.